\id JON  
\h Jonasa 
\toc1 Jonasarini kuku 
\toc2 Jonasa 
\toc3 Jon 
\mt1 Jonasarini kuku 
\imt1 Kirak yuwaa Jonasarinee kamanku anoo pakich kamanchintspa 
\iot ¿Chakaja anoo yandarang? 
\ip Chakamasaja nee kirak yandarangiya. Yasareezini. Itaru, tputs Jonasarinee kuk kamankiya. Jonasarini yuwapur Jerobowam Israelshucheem kurak taarangu, anpurtatam taarangiya. Arapich tputs Ninipish yakat taarangsin, Israelchichee izuuru tpachingamaam zandaranganaya. Kizpur undararimuncha. Israelchich tputs uru, Apanll iyaatsimari chinakiya. ¿Antaati arapich tputsee tapachindacheeja? táranganaya. Ashirucha, Jonasarini amb naamaam kapung ngatarangiya Apanllee kuk kamanimaama. 
\iot ¿Chakaama yandarang? 
\ip Apanll Jonasarinee, Nuwap tputsiri nuwaa kuki kamanishincha, nda tárangiya. Itaru, Ninipip kamanishincha, tárangiya. Ninipshuch tputs kizpur yutarit taaranganaya. Uwshtisin tsapurunasee ztaru tputs wamari kasiranganaya. Ashirucha, Apanll, Nuwsha Ninipshuchee zurampatari wanichima, tárangiya. Itaru, shiynaa Jonasaa, nduma wanichuri, wasina kamanshini, tárangiya. 
\ip Ashiritaa, Apanll nee kirak Israelchichpatatin wanimaam tuyandarangiya. Nuw tsapurunasee tputsi ichingaru chinakina, tápi átu atiya. 
\iot ¿Mayaamaja yandarang? 
\ip Israelchich tputs, Apanll iyaatsimari chinakiya, tárangusin, Apanllsha, Tárintspa. Nuw kchinamisheeruri, arapcheetstaa tputs chinakina. Tputsee ichingaru nuw nayanikuri, tapachindamaam zandkina, tárangiya. Jonasarini waana tárangiya. Apaa, shiy nda musá tsiyantaksha. Watam shiy Apaa, kchinamishawa. ¿Antaati shiy Ninipshuchee tunaree wanicheezish? tárangiya. 
\iot ¿Mayaatseeja kamanik? 
\ip Na yuwari kamanku anoo kamanchintspa. 
\io1 Kapitoroo 1. Apanll Jonasarinee, Ninipip nuwaa kuki kamanishini. Kundarareetstaata kamaningcha, tárangiya. Jonasarinsha kapung ngatarangu, nllitarap tsap suwapi tárangu, Apanllee kuk kapeetarangu, kayupichsha Jonasaa pisharangiya. 
\io1 Kapitoroo 2. Jonasarinisha kayupchimand chik Apanllpat tsiyatarangu, Apaa, nuw yutaritana. Nuw shiyaa kukish kapeetarangina. Ashiriy nuwaa nayaningandama, tárangu, Apanllsha mazinarangiya. 
\io1 Kapitoroo 3. Jonasarini Ninipip naatarangu, Apanll siyaa zurampatari wanichintsa. Nimun 40 maats ichingurus tsipatssa, tárangiya. 
\io1 Kapitoroo 4. Ninipshuchsha tputs Apanllee mangoonarangsin, yutaritshirinee izuuru kasayarangusin, Apanllsha nayanirangu, Ashiriya, wanimaam watsitshaparee, tárangiya. Anumand Jonasarini kapung tsiyantarangu, tsiyansimun tsipamaam zandarangiya. Itaru Apanllsha, ¿Mayaamsha ashiru chinaksha? Nuw tputsee ichingaru chinaktana, tárangiya. 
\mt1 Jonasarini kuku 
\c 1  
\s1 Jonasarinee kuk kamanchintspa 
\p  
\v 1 Apanll Jonasaa, Amitarineetsi wip kamachtaku tárangiya.  
\v 2 Shiy Ninipip yakat na naachcha. Nuwaa kuki kamanishincha, watam nuw anshuchee mikeeruri wanichinawa. Na nuw tsiyatssee mazinarangina. Ninipshuch yakat tputs yutaritshishpansincha, tárangiya. 
\p  
\v 3 Itaru, Jonassha Ninipip Apanllee kuk kamanimaam kapung ngatarangu, suwamamarisha chinarangiya. Ashiri upeewapsha botee napkatu, patussip naatarangiya. Patusis sur Jopimuncha. Ashiri anush bot yuwaa naamachu, tununkachu, anoo parangiya. Ashiri botish naamaam tuwaparangiya. Sheeru, botish zaruyaru naatarangiya.  
\v 4 Itaru, Apanllsha kambusuru zanganirangiya. Kambusursha kizpur kambustarangu, marsha kizpur warastarangiya. Botsha izuuru yangamaam zandarangiya. Bot kizpur zpuzarangiya. Pátangamaam zandarangiya.  
\v 5 Ashiri botee ksutamapansha kapung puniranganaya. Minamtawarisin apanllputsirineetsi mashiranganaya. Anumunsha, botee tamuzingamaam mangush chinarangusin, maacheetsi kóstaroo kungush kapeetaranganaya. Itaru, Jonassha mapiyru wantsush pshturu, wachoo shtandayaru, maa ashirangiya.  
\v 6 Ashiri kapitansha yap Jonas mapiyru maaru amb naateeru tsiyatarangiya. ¿Shiy tamaktish nish mapiyru maasha? Natu mikeerush chiyzayarush, apanllireetsish mashangi. ¿Nduniya ashkachush, iyaatssha shiy Apanllirish istach? mang Jonasaa tárangiya. 
\p  
\v 7 Ashiri anumunsha, botee ksutamapansha waanpatatin tsiyatkusin, Na yachayani. ¿Chakaja yutaritshishirini taaru anumand Apanll ashik? atusin, tputsee sur yandarangusin, yacharangusin, Jonasaamsha sur shitungarangiya. Ashiri Jonasaatssha kurpashtaranganaya.  
\v 8 Kapitansha Jonasaa, Na kamaninda. ¿Mayaamsha shiy iyash zarurangsha? ¿Sheerush, iyaatssha tayuritaksha? ¿Maysha paxanxkatush, shiy iyash zarurangsha? ¿Yapsha shiy naatachsha? ¿Yapichsha shiya? ¿Chakshasha shiya? tárangiya.  
\v 9 Ashiri Jonassha, Nuw Hebrewshuchtana tputsi. Mishat, nuw tayaspatampantana Apanllee íwarpicheetsi, yuw maree tinarangu, anumun tsapootstam tinarangu anootsi. 
\p  
\v 10-11 Nuw Apanllee kuk nda payumaam zandaranguri, ningeemsha suwarangina, tárangiya. Itsinsaru kamanirangtaa, itaru marsha nda pakchiyam zanayarangiya. Aranginasha kizpurinasha warastarangiya. Ashiri tputs aranginasha punirangusin, anumun masharanganaya. Ashiriya, ¿mayaamsha amb ashirangsha? ¿Na shiyaa tamaycheezini mar zanayamaama? táranganaya.  
\v 12 Jonassha, Ashiri marish kpitangandama. Nuw nuwaanaatsi izuuru yasaktana. Nuwcha yutaritti. Mishat, nuwamand yutaritshishiri kambusur kizpur kambustakiya. Warassha kizpuritam warastakiya, tárangiya Jonasa. 
\p  
\v 13 Itaru, botee ksutamapanshtisin arachich kiteeni atusin, kizpuritaa kchungarangsin, nda waritaranganaya. Watam mar kizpur warastaranguwa. Aranginasha, aranginasha ashirangiya. Izuuru arachich kitamaam pinasaranganaya.  
\v 14 Apanlleetssha masharanganaya. Apaa, Jonasamand yutaritshishirini iyaa kungush tpachingarispa. Mishat, iyaa waneerichpa, yuwamand iy Jonasaa kungush kapeetkachini anumanda. Watam shaana tputsee natstayarush, wanitarshawa, Apanllee táranganaya. 
\p  
\v 15 Amb táyarusin, Apanllpa tsiyateersin, izuuru Jonasaa marish kapeetaranganaya. Ashiri marsha izuuru zanayatara sheeru, zanaramach ashirangiya.  
\v 16 Anoo parangusin, botee ksutamapanshtisin kapung Apanllee chinaranganaya. Apanllee kuk izuuru payuranganaya. Maacheetsi chinuzee Apanlleem wayayarusin, mbutarangsin, Apanllee kuk izuuru tuminuranganaya. 
\p  
\v 17 Ashiriya, waana Apanll kayupchee wataramashi wayayaru, Jonasaa pisharangiya. Jonassha kayupchish chik tuchip zari psaanpatari taarangiya.\f * \fr 1:17 \ft Yuwaa nish átu anootstam Matiwa 12.40 tayusima kamankiya.\f* 
\c 2  
\p  
\v 1 Ashiri Jonas kayupchish chik taaru, Apanllpa tsiyatarangiya. 
\b  
\q1  
\v 2 Apaa, nuwaanamand yutaritshishiri shiyaa mashkina. 
\q1 Itaru, shiysha Apaa, yuwaa nuw shiyaa mashki anoo mazinangcha. 
\q1 Izuuru tsipamaam waritakuri, shiyaa mashkina. 
\q1  
\v 3 Shiy imurish marush nuwaa kasarangsha. 
\q1 Kungsha nuwaa waras purangiya. Nuwamunsha kung warastatar ashirangiya. 
\q1  
\v 4 Itaru, nuwsha shiyaa wanasirimshirish tácharangina. 
\q1 Ashiri nuwsha mangishi chinakuri, Apanllee pang' ndunpari pangchina, táranguri, 
\q1  
\v 5 kungsha izuuru nuwaa purangiya. Imurish wantsush nuwaa tapshturangiya. 
\q1 Mishat, tundunarputssha muchimunutamti izuuru kpatarangiya. 
\q1  
\v 6 Nuw izuuru kungush wantsush yangarangina. Tsapumun tamoo ashirangina. 
\q1 Yuwaa ashtachish anoo nuw urutari wasina waneeshee yasarangina. 
\q1 Ashiritaa Apaa, shiy nuwaa tsipani tapachindarangsha. 
\q1  
\v 7 Nuw, Tsipachparina, táranguri, anush shiyaa yusur chinarangina. 
\q1 Apaa, pangimandish nuwaa kuki yuwaa mashki anoo mazinarangsha. 
\q1  
\v 8 Itaru Apaa, yuw tputs apanllputsee chinakana, 
\q1 anshitisin nda shiyaa wanasireem ínakanaya. 
\q1  
\v 9 Itaru, ayamsha nuw zurampatari maachi wayayruri, shiyaam muchchima. 
\q1 Watam shiy nuwaa tapachindakshawa, 
\b  
\m Jonas kayupish tápun taaru, tárangiya. 
\p  
\v 10 Ashiri Apanll kayupchee kamachtarangu, kayupichsha Jonasaa tsapumun wanasirimun katarangiya. 
\c 3  
\s1 Apanll Jonasaa yusur, Ninipip nuwaa kuki kamaningcha, tárangiya 
\p  
\v 1 Ashiri Apanllsha yusur Jonasaa tsiyatarangiya. Kamachtaku tárangiya.  
\v 2 Naayarush, yaktap Ninipi kamanishini, yuwaa nuw kamachtayanlli anootsi, tárangiya. 
\p  
\v 3-4 Ashiri Jonassha tayuyaru, Ayu, táyaranllu, yaktap Ninipip naatarangiya. Yuwari Apanll waana kamachtayaru, anuri naatarangiya. An yakat kapungumuncha. Ashchiri napamaam tuchip zar waritarangiya. Itaru, Jonassha anush yakat pshturangu, minamari zar naayaru, anush apusanand kapung tsiyatku tárangiya. Apanll mikeeru waneekchu, nimun 40 maats izuuru kachingchiya, tárangiya. 
\p  
\v 5 Ashiri tputssha kurakaw, misha tiptsirtam ichingaru Apanllee mangoonaranganaya. Sheersin, izuuru tachitaranganaya. Ashiri mang' mantsaksin, Apanlleem manguyani atusin, wamar kuchariwaa kamartaranganaya.  
\v 6 Ashiri tsiyatsissha Ninipshuchish urkar kusarangiya. Uwsha kurakush pang' shitungeeru, wamaree wanasirimshee yusheeru, wamar kuchartamsha kamartayaru, tsapushtamsha kuxinarangiya.  
\v 7 Anumunsha, kurak wipunashee kamachtaku tárangiya. Na nimun ktungintspa pakchiyama. Mishat, wakaraamtam maritarintspa. Kungootstam yasintspa, kurak tsiyatku tárangiya.  
\v 8 Tputs siyaa pamaam ichingurus kamaris kuchar kamartangtsa. Anamun tputs siyaa yasamaama yuwaa mangis mantsakis anootsi. Sheerus, izuuru mangiptis Apanllee mashangtsa, yutaritshishireetsis tachingamaama. Yuwaa mantsir chinakis anoo zurampatari ksangtsa. Tputspatatis yutarit waratkis anootstam ksangtsa.  
\v 9 Wapaz Apanll iyaa mapiykchu, misha watsiyun zambazakchu, itaru ashkachinaari chiy tsipacheezich ndambari, kurak tárangiya. 
\p  
\v 10 Ashirucha, Apanllsha yuwaa ashkana anoo parangu, izuuru mapiyrangiya. Ndusha tputsee wanimaam zandarangiya. 
\p Ashiriya, kamaneena yuwaa Jonasarini Ninipishuchee Apanllee kuk kamanirangu anootsi. 
\c 4  
\s1 Ashiriya, kamanchintspa yuwaa Apanll yutaritshishpanee tputs nayaniku anootsi 
\p  
\v 1 Ashiri Jonassha kizpur tsiyantarangiya, yuwamand Apanll tputsee tunaree Ninipishuchee nda waneerangu anumanda. Kapung mang' mantsarangiya.  
\v 2 Jonas, Apaa, nuw shiyaa yasaktana. Shiy Apanlltishcha. Taarashipanish chinampanish. Ashirucha shiy nda musá tsiyantaksha. Watam shiy Apaa, kchinamishawa. Ashirucha, nuw tsapunshi taaruri, ¿Antaati shiy Ninipshuchee tunaree wanicheezish? shiyaa tárangashina. Mangupari waneeshish tushiychiya, tárangina. Ashirucha, nuw anumand tsiyantayaruri, Társisup botish suwarangina. Watam shiy wanimaam mapiykshawa. Tunareetstaa wanasir chinaksha, Apaa. Nayanikush nda waneeksha.  
\v 3 Ashirucha Apaa, nuw shiyaa mashkina. Mikeerush nuwaa tsipamaam wayangandama. Nuw arangeem taamaam zandkeezi, Jonas Apanllee mashku tárangiya.  
\v 4 Ashiri Apanllsha, ¿Shiyaam tsiyantakish, an wanasir? tárangiya.\f * \fr 4:4 \ft Lukasa 15.31-32 tsiyatsis nipta tatsamooru taaritamta.\f* 
\p  
\v 5 Jonassha yaktash shitungeeru naatarangiya apuspi. Sheeru, amb naayaru, watambureem tambtayaru, watamburish pshtuyaru taarangiya. ¿Mayaja yaktash tushiych? ¿Kamapari Apanll wanichiya? átu, anshurisha kutarangiya.  
\v 6 Ashiri Apanllsha watamburimun karutaa wayarangiya. Karutsha Jonasamun watambur káreeru, izuuru yambutarangiya. Itaru, Jonassha watamburish mang' kis mapiyru kuxinxinaw ashirangiya. 
\p  
\v 7 Ashiri putamsha tarasitanu, Apanll yusur mbichaa zanganirangitamta. Mbichsha puruzee katureeru, puruzsha izuuru pchiruyaru, tsiparangiya.  
\v 8 Zarsha yakatanu, Apanllsha kambusuroo zanganirangiya. Kambusursha kambustarangiya. Ashiri zarsha Jonasamun much kizpur zatarangiya. Ashiri Jonassha sambaytarangiya. Tsipamaam waritarangiya. Jonassha tárangiya. 
\p Izuurinacha tsipakuri waritasha. Taakuch, kiyung kachiyakchi, Jonas tárangiya.  
\v 9 Ántaru, Apanllsha, Zuraktishcha. ¿Shiyaam kamiran tsiyantamaam waritariya? Itaru, ¿na watam puruz tambureetsish yambutarangu an pchiruyaru tsiparanguwa? Apanll tárangiya. Jonassha, Zuraktishcha. Nuwaantaricha zurampatari tsipamaam zandki, Jonas tárangiya.  
\v 10 Apanllsha, Zuraktishcha. Shiy nda shaana karutaa tatsumarangsha. Mishat, nda shaana yanungarangsha. Itaru, psaan wanitari shitungarangiya. Sheeru, yusur putamsha tsiparangiya. Itaru, shiy anoo wanasir chinarangsha, tárangiya Apanlli.  
\v 11 Itaru, nuw Ninipshuchee aranginasha chinamaam waritariya. An yakat kapungcha. Anush nllur zapan taariya. Washunand nllurnandari 120 mil washunand taariya. Anumunsha chinuz wakar zapantam taaritamta. Ashirucha, nuw anoo chinakuri mapiykina, Apanll tárangiya. 
\p Ashiriya, na kamaneena yuwaa Apanll yutaritshishee tputs nayniku anootsi. 
\p [Ashiri wappari. Watamaricha Jonasarini kuku.]