\id REV - Kashinawa NT -Peru 2008 (DBL -2013) 
\h Apocalipsis 
\toc1 Jaska inunbadiai Jesucriston juan unanmani janchakiaki 
\toc2 Apocalipsis 
\toc3 Ap 
\mt2 JASKA INUNBADIAI JESUCRISTON JUAN UNANMANI JANCHAKIAKI 
\mt1 APOCALIPSIS 
\c 1  
\s1 Na jancha Juanen jatu kenexunikiaki, na janchadan 
\p  
\v 1 Ja dukun Diosun Jesucristo ixanai unanmaniki. Januxun eadi samama jawaida jaskaxanai ea en jawen tsuma Juan unanmakatsis ikin jawen nai tsuma Jesucriston yunua ea uinmashinaki, na jaska inunbadiai dasibi nun jawen tsumabun tapintan jatu yusinkubainxanun ea unanmakinan.  
\v 2 Jaskawen taexun Diosun jancha inun, Jesucriston ea unanmashina en ninkashina inun, dasibi en uinshina jawa chanichakama en matu yui kayabiaii. En jancha chanima uinkin ninkaidakanwen. 
\p  
\v 3 Tsuabunda na en jancha jatu yuiaibu inun jabun na jancha ninkatan: “Chanimaki”, ikin chibankubainxanaibudan, Diosun jabu benimawaxanikiki, jaska inunbadiai chanini ma jamapai taxni taeai uinan. 
\p  
\v 4 Man Jesús chibainbu ja 7 yusinanain ichamisbu tibi Asia mai pakeanuabuun, en Juanen, en matu kene bumai ninkaidakanwen. Ja ini inun, ikunkainai inun, ana juxanaitun, nukun Diosunan, jau matu duawakin jawen pepa matu inankin unanuma matu jiwemakubainunwen. Jabiaskadi wakin ja 7 yushin pepa jawen xanen ibu tsauti bebun mapuabu jau jabun jabiaskadi matu wanunbunwen.  
\v 5 Ja dikabi Jesucristo jawa chani chakaisma mawatan ja dukun besteni inun mai jidabi anu jabu xanen ibu betsa betsapa binui jatun xanen ibumisdan, jau jatun matu unanuma jiwemadianunwen. Ja inun, nuku bechipai nukuwen nuikin nukun chakabuwen taea mawakin jawen jimi jabakin nuku buaxundianiki.  
\v 6 Na jabiatian jawen Epa Dios dayaxuni nuku jabe janchanika wakin jatun nuku xanen ibu keska waniki. Jaskawen taea dasibi jawenas kushipa jaya inun pepa jayaken niti ikama kenwankubainankanwen. Jaskakidan. 
\q1  
\v 7 Uian. Nai anua nukun Xanen Ibu nai kuinwen juai 
\q1 dasibibun uinxankanikiki. 
\q1 Ja dikabi jabun jatu tenanmanibu inun 
\q1 jabun dananmisbu mai jidabi anu manibaunabun 
\q1 uin datei kaxaxankanikiki. 
\q1 Jaskaxankanikiki, chanimadan. 
\p  
\v 8 Janua mai jayadiama nukun Xanen Ibu Dios dasibi kushipajaida jiwea jaya inun, natian jiwekunkainai inun, ana juxanaitun ea yuikin: “Ea dukun en jiweni inun en jawen jenea debesekeaki”, ea waxuki. 
\s1 Jesúsun Juan betsa watan uinmanikiaki, na janchadan 
\p  
\v 9 Ea en matun betsa Juanan, matu keska Jesúski dasia Diosbe xanen ibuibe nia betsa betsapa tenei chintuanma Jesúsun kushipawen en binukubainaii. Ja inun, Diosun kakape yusinkin Jesúsun nuku mekekatsis ikai xabakabi en jatu yuikubainaiwen taexun na natukan jawen kena Patmos anu ea nichianbu \fig |src="HK00378b.tif" size="col" loc="Rev. 1.9-11" copy="Horace Knowles; British & Foreign Bible Society" ref="(1.9-11)" \fig* 
\v 10 nukun Xanen Ibu janu besteni xaba domingo betsatian Dios en yushinki nukuxun ea betsa wa en ninkaya en pechiudixun jui kushipajaida trompeta mimawati keskawen  
\v 11 tsuanda ea yuikin: 
\p “Jawada en mia uinmai unaki kenexun Asia mai pakea anu ja 7 yusinanain ichamisbu tibi anu bumaxanwen, Éfeso anu inun, Esmirna anu inun, Pérgamo anu inun, Tiatira anu inun, Sardes anu inun, Filadelfia anu inun, Laodicea anudan”, ea waya \fig |src="BK00154b.tif" size="col" loc="Rev. 1.12-13" copy="Bass/Knowles; British & Foreign Bible Society" ref="(1.12-13)" \fig* 
\p  
\v 12 tsuan ea jancha wai dabanen uinun ika nasauketan uinkin jaki bin tsaunti 7 oro mane chanka daka tsaubauna uinkin  
\v 13 ja namakis juni kayabi keska nia en uinxuki. Jakidi matu yuinun ninkakanwen. Jawen tadi chaipa jupuxku anu kesua inun, jawen oro mane nanexeketi xuchi puchinin kesuaki.  
\v 14 Ja inun, jawen bu juxupajaida inun, jawen bedu chi jede chaxa keskaki.  
\v 15 Ja inun, jawen tae mane tashipa betsa jawen kena bronce chi medan napua chaxajaida keskaki. Ja inun, jawen jui jene didi ikai ninka keskaki.  
\v 16 Ja inun, jawen meken yusiudi 7 bishi tsuma inun, jawen jaxpanu nupe detenameti chaipajaida kenu dabeya tukuan jayaki. Ja inun, jawen besu badi keska chaxakin xabawaki. 
\p  
\v 17 Jaska uin jawen tae naman mawa keskai tsistikain en tin ika daka jawen meken yusiudi ea mekin yuikin: 
\p “Dateyamawe. Eadan, ea dukun en jiweni inun en jawen jenea debesekeaki.  
\v 18 Ea en jiwea en mawani natian ana en besteni niti ikama en jiwepakeaii. Ja inun, jiwemati kushipa inun kupiti kushipadan, ea besti en jayaki. Janu mawai ikibi ixanaibu anudan, ean besti en yunutiduki.  
\v 19 Dasibi min uinxu inun, na jabiatian ikai inun, jaskadada inunbadiai unaki jatu kenexundiwe.  
\v 20 Ja jawada junea min uinxu xabakabi mia yusinun ninkawe. Ja 7 bishi en meken yusiudi en tsuma min uinxudan, ja 7 mae ichamisbu tibitun medabenan Dios yuixunikaki. Ja dikabi jaki bin tsaunti 7 oro mane chanka daka min uinxudan, ja 7 mae ikunwainbu ichamisbuki”, iwanan, 
\c 2  
\s1 Éfeso anuabu dukun kene bumai chani taenikiaki, na janchadan 
\p  
\v 1 ana Jesúsun ea yuikin: 
\p “Ja mae anu jatun Diosun jancha yuixunika Éfeso anua ichamisbu mekea na jancha en mia yuiai kenexundiwe: ‘Ja 7 bishi en meken yusiudi en tsuma inun jaki bin tsaunti 7 oro mane chanka daka namakis anu en nimistun na jancha en matu yuiai ninkaidakanwen.  
\v 2 Ea chibankin ea dayaxunkin bika tenei man chintuanbumaki. Ja inun, tsuabunda matu padanmisbun yuikin: Jesúsun kushipawen en jawen yununikaki. Ea ninkakanwen, ikaibu unantan jatu danankin  
\v 3 en jancha jeneama ea duawanun ika ewen taea nuitapabiai punu nukai chintuanma man chibankubainai en matu unaiin.  
\v 4 Jakia na bestiwen en matu chiteai ninkakanwen. Ja dukun ea ikunwankin taewakin man ea duajaidawakubaini keskama man ana jabias keska ea wamaki.  
\v 5 Jaskawen taexun jaska man ea duawakin taewani keska jani man benukainimamen, ana shinanjaidatan matun juinti pewakin shinan betsa watan ana Dios anu chintuntan ea chibankubainkanwen. Jamen man jaska betsa wamaken matu anu ana kaxun matu danankin matun oro mane chanka daka matu anua mebinkin en tsekaxanaii.  
\v 6 Jamen ja padanananmis Nicolaus chibanmisbu en dananchakayamamis keska wakin matundi man jatu bechipaiabuma en unaiin.  
\v 7 Man pabinkiyabunan, Yushin Pepatun ja man ichamisbu matu yuiai ninkakanwen: Tsuabunda ea dananma jabun maemakin binumisbudan, mae pepa naiudi janu Dios jiwea anua jawen benimai jiweti ji bimi en matu pimaxanaii, niti ikamadan’, ikin”, ea waxu en matu kenexunaii. 
\s1 Esmirna anuabu kene jatu bumanikiaki, na janchadan 
\p  
\v 8 Ana Jesúsun ea yuikin: 
\p “Ja jatun Diosun jancha yuinika Esmirna anu ichamisbu mekea anu na jancha en mia yuiai kenexundiwe: 
\p ‘Eadan, ea dukun en jiweni inun en jawen jenea debesekeaki. Mawabiatan en ana besteni en jiweatun en matu yuiai ninkakanwen.  
\v 9 Natian bika betsa betsapa tenei jawauma man nuitapaibu en unaiin. Jaskabia chanima matun manakuti ichapa nai anu matuki nun tana man jayaki. Ja inun, jabu matukidi jancha atimapa janchai inun ibubiskidi yui: En judioki, ibiai ikun kayabiwama jaska Satanásan bechipaiai besti chibanmisbu en jatu unandiaii.  
\v 10 Matu bika memaxanaibuwen taea dateyamakanwen. Eska wakin diablon bestibu matu jatu achimatan bichiti jiwe anu matu bichimaxanikiki. Jaska wakin dasibi man ea ikunwainbu matu bika tenemaibu jawen matu unanti wa akeakexankanikiki. Jaskawen taea 10 día besti jaska matu tenemaibuwen taea chintunyamaxankanwen. Matu ichakawakin matu tenanbiaibun tenekubainxankanwen. Matu jaska waibuwen taexunan, eanan, matun manakuti inankinan, jiwea kayabi en matu inanxanaii.  
\v 11 Man pabinkiyabunan, Yushin Pepatun ja man ichamisbu matu yuiai ninkakanwen: Tsuabunda ea dananma jabun maemakin binumisbudan, ana jadia dabeki mawakin chi jede meama ixankanikiki’ ”, ea waxu en matu kenexunaii. 
\s1 Pérgamo anuabu kene jatu bumanikiaki, na janchadan 
\p  
\v 12 Ana Jesúsun en Juan ea yuikin: 
\p “Jatun Diosun jancha yuinika Pérgamo anu ichamisbu mekea na jancha en mia yuiai kenexundiwe: 
\p ‘En mane nupe chaipajaida kenu dabeya jayatun en matu yuiai ninkakanwen.  
\v 13 Janu Satanás xanen ibui tsaua anu man jiweabu en unaiin. Ja inun, Antipas en jancha yuixunika chintuanma matun mae anuxun tenanbianibun ja shinain matudi chintuanma eki jawa dakeama yudabuki chanikin en yusian ikunwankin man chibankubainai en unandiaii.  
\v 14 Man jaskabia kanei eska tibi matu anu jayabu matu yuinun ninkakanwen. Ja man jabube ichabiamis jatidibun Balaamin yusini putabumaki. Israelbu jau Dioskidi chakabuxanunbun Balaamin nawa xanen ibu Balac yusinchakakin yuikin: Jatu beyusmakin yushin dami kenwanti betsa nami inanshinabu jatu pimaxanwen, ani inun matun bake chipashbe jatu chutanamemati jatu shinanmaxanwen, ani jaska jeneabumaki.  
\v 15 Ja dikabi jatiditun Pérgamo anuxun Nicolausin jatu yusinchakani chibankin putabumadiki.  
\v 16 Man jatidi jaskabia Dios man chibankatsis ikaidan, matun chakabu jenetan matun shinan betsa watan Dios anu bedikanwen. Tsuada jaskabumaken samama jatu anu kaxun jabun chakabuwaibu kupikin na en nupe chaipa en jaxpanu en tukuanwen en jatube detenamei kaxanaii.  
\v 17 Man pabinkiyabunan, Yushin Pepatun ja man ichamisbu matu yuiai ninkakanwen: Tsuabunda ea dananma jabun maemakin binumisbudan, pewen kupikin misi naiudia Diosun junemis en jatu pimaxanaii, nai anu unanuma ebe jatu jiwemakinan. Ja inun, kena bena nenkati juxupaki jatun kena nea en jatu inanxanaii. Ja jabun biaibun besti ja kena unanxankanikiki, tsua betsan unantidumadan’ ”, ea waxu en matu kenexunaii. 
\s1 Tiatira anuabu kene jatu bumanikiaki, na janchadan 
\p  
\v 18 Ana Jesúsun ea yuikin: “Jatun Diosun jancha yuinika Tiatira anu ichamisbu mekea na jancha en mia yuiai kenexundiwe: ‘En Diosun baken, na en bedu chi jede chaxa keska inun na en tae mane tashipa betsa jawen kena bronce denke denke aka chaxajaida keskayatun en matu yuiai ninkakanwen.  
\v 19 Jaska matun shinan pepa jayaxun ea chibain man jiwekunkainai en unaiin. Jaskaken nuinamekin ea ikunwain chintuanma ea chibankin ea duawanun, iwanan, jamapai betsa betsapa pepa man akin taewani man binumai en unandiaii.  
\v 20 Man jaskabiai eska besti matu anu jayaki. Ja ainbu man Jezabel wamis jatun chakabuwaikidi man nemaisma ja bestikidi matu yuinun ninkakanwen. Ja Jezabelin matu padankin yuikin: Eandi Diosun jancha en yuimiski. Ea ninkakanwen, matu watan man en tsumabu bestibu matu ichawaxun yusinkin yuikin: Ainbu min ainmabe min chutanameadan, peki. Juni min benemabe min chutanameadan, pediki. Jamapaibe chutanameadan, pediki, akin pitikidi matu yuikin: Ja yushin dami betsa kenwanti nami inanmisbu man piadan, jawa chakabumaki, iwanan, matu padankin matu chakabuwamakubainmiski.  
\v 21 Jamen jau Jezabelin jawen chakabu jenekin jawen shinan betsa wanun ixun en manakabia shinan betsa wakatsi ikama jawen kemu chutanametikidi jenekatsi ikamaki.  
\v 22 Jaskaken kupikin en isin chakabu tenemaxanaii. Ja inun, ja ainbu Jezabel inun dasibibun ja chibain jabe chutanamei atimapamisbun en yusian danankin jamapai chakabuwen kemumisbu bikajaida en jatu tenemaxanaii, jabun jawen yusian dananbumadan.  
\v 23 Ja inun, ja ainbun jancha ninkamisbu tenankin en jatu yamawaxanaii. En jatu jaska waya dasibibun shinan inun jabun juinti en unanjaidamis jabun ea ikunwankin chibanmisbun chanima unanxankanikiki. Ja inun, jatidibun jaska jiwea bechipaimisbu unantan pepabu pepawen jatu kupikin chakabubu chakabuwen en jatu kupixanaii.  
\v 24 Jamen Tiatira anuxun ja ainbun yusian danankin Satanásan shinan junea jawen kushipawen dayanun ixun jatidibun man unankatsi ikabumadan, man peken matukidi en ana jancha jayamaki.  
\v 25 Jakia na besti matu yuinun ninkakanwen. Diosun yusian man jaya ja chibankin jenepakeyamaxankanwen, en ana juyuxanaidan.  
\v 26 Tsuabunda ea dananma chakabu maemakin binumisbudan, jawa jeneama jaska en bechipaiai apakemisbudan, janu en ana juai anu en jatu xanen ibu wakin kushipa waxanaii, jau nawa xukuabu mekenunbunan.  
\v 27 Jaska en Epan ea yunua en jabe xanen ibumis keska wakin xanen ibukin ea chibankubainmisbun jatu mekebiabu en jancha ninkaisbuma mane mestenti tsumaxun man jatu yamawaxanaii, jaska mai kenti wamistun jawen kenti chakabu pusamis keska wakinan.  
\v 28 Ja dikabi pena bishi chaxamis keska en matu inanxanaii.  
\v 29 Man pabinkiyabunan, Yushin Pepatun ja man ichamisbu matu yuiai ninkakanwen’ ”, ea waxu en matu kenexunaii. 
\c 3  
\s1 Sardes anuabudi kene jatu bumanikiaki, na janchadan 
\p  
\v 1 Ana Jesúsun ea yuikin: “Jatun Diosun jancha yuinika Sardes anu ichamisbu mekea na jancha en mia yuiai kenexundiwe: ‘Ja 7 Diosun Yushin en jaya inun ja 7 bishi en tsumaxun en mekeatun en matu yuiai ninkakanwen. Jaska man jiwexun jatu kaka jawendua ninkamabiai uke medan man mawa keskabu en matu unaiin.  
\v 2 Janua jaska Diosun matu shinanmakin jawen jancha matu chibanmakatsis ikai chibankin man keyudiamajaida unankin matu yununun ninkakanwen. En jancha unanjaidabiakin man akin pewamaki. Ana chibanma man jakimakin man ma jeneaii, mawai keskaidan. Man tsuabuda jaskadan, uxa bestein keskatan matun juintinin shinan mestenwantan ana en Dios chibanjaidakubainkanwen.  
\v 3 Januxun Diosun jancha yusinanbun matu yusianbu man ninkani shinankanwen, shinan betsa watan ana chiban taewakinan. Jamen man ea ninkakatsi ikabumaken yumetsu june jumis keskai man ea manachakaya jatiada eadi june juxun en matu datetushixanaii.  
\v 4 Jabiaskabiaken jatidi Sardes anuabun jawa chakabuwakin man kaneisbumaki, matun tadi detsis keska wamadan. Jabudan, ebetan tadi juxupa sawea ebe mapuxankanikiki, jaska jabu pepakin binumisbudan.  
\v 5 Tsuabunda ea dananma jabun maemakin binumisbudan, tadi juxupa sawexankanikiki. Ja dikabi jatun kena Diosun jiwemati una anua en tede akama ixanaii. Januxun en Epa inun jawen nai tsumabu bebun jatu nichintan en jabu jatu unanmaxanaii.  
\v 6 Man pabinkiyabunan, Yushin Pepatun ja man ichamisbu matu yuiai ninkakanwen’ ”, ea waxu en matu kenexunaii. 
\s1 Filadelfia anuabu kene jatu bumanikiaki, na janchadan 
\p  
\v 7 Ana Jesúsun ea yuikin: “Jatun Diosun jancha yuinika Filadelfia anu ichamisbu mekea na jancha en mia yuiai kenexundiwe: ‘Ea en medibi inun en chanimajaida David kushipa ini keska binua jawen bepenti shabi en jayaki. Tsuanda ja mae bepean tsuan beputiduma inun ja mae bepua tsuan bepentidumaki. Jaska mekeatun en matu yuiaii.  
\v 8 Eanan, dasibi man akubainai en unaiin. Uinkanwen. Matu bebun matu anu beputi bepenmana keska jawa tsuan matu bepuntiduma en matu bepenxunaki. Jaskawen taea man chintuanma en jancha chibankin man kushipa midin jayabia eki dakeama jatu yuikin: En Jesúsunabuki, man imiski.  
\v 9 Ja inun, judiobu betsabu jaska Diosun bechipaiai akamabia janchawen besti yuikin: Nun judiobuki, ibiakin Satanás chibankin jaska bechipaiai axuin jiwemisbu judio kayabibumadan, en matu bechipaijaidamis jau unanunbun jatu babu watan matun tae naman en jatu danti imaxanai manayukanwen.  
\v 10 Ja inun, ichakanikatun mai jidabi anu dasibi maniabu jatu bika tenemakin ichakawaya man Filadelfia anuabun en yusian jancha chibankin jawa man jeneismaken matu medabewakin jawa putama en matu kexekubainxanaii.  
\v 11 Ja inun, matun pepa jawen kupiti jau tsuan matu bianbainyamaxanun en yusian shinankin chibankin jeneyamakanwen, en samama ana chintunkidanxanaidan.  
\v 12 Tsuabunda ea dananma jabun maemakin binumisbudan, janu en Epa Diosun jiwe anu jawen chibu betsa keska tsuan betseketiduma keska en matu waxanaii. Janua man jani ana kainbainama inunbadiaii. Jaska inun, en Epa Diosun kena matuki kenekin netankin jawen mae Jerusalén Bena ja mae nai anua butuxanai jawendi matuki kenekin netankin en kena benadi en matuki netanxanaii.  
\v 13 Man pabinkiyabunan, Yushin Pepatun ja man ichamisbu matu yuiai ninkakanwen’ ”, ea waxu en matu kenexunaii. 
\s1 Laodicea anuabu kene jatu bumanikiaki, na janchadan 
\p  
\v 14 Ana Jesúsun en Juan ea yuikin: 
\p “Jatun Diosun jancha dayaxunika Laodicea anu ichamisbu mekea na jancha en mia yuiai kenexundiwe. ‘Dasibi Diosun jakidi yuiai en Jabiaskaki, imistun mai jidabi inun nai jidabi damiwakin ewen Diosun ani chanima jancha besti chanii en kaneismatun en matu yuiai ninkakanwen.  
\v 15 Man ea chibanjaidama inun ea dananjaidakubainama man shinan bekaxnaibu en unaiin. Jaskatimaki. Tsuabunda ea chibankatsis ikin jau ea chiban kayabinunbunwen. Jakia tsuabunda ea chibankatsis ikabuma danankin jau ea jene kayabinunbunwen.  
\v 16 Jamen tsuabuda ekidi shinan bekaxnadabei maniabuwen taexun janain keskakin en matu putaxanaii.  
\v 17 Jaska inun, matumebi shinankin yuikin: Mabu ichapa jaya pei ichapa jaya dasibi en jayaki, ikin man shinanbiakin en yusian shinankin man chibanbumawen taea man ibubis nuitapai jawa jayama bekun tadiuma keska man jiwekunkainaii.  
\v 18 Jamen tsuabuda man pepakatsis ikaibu matu yusinun ninkakanwen. Dasibi pepa jas man jayakatsis ikaidan, oro chiwen kuakin jas wa man bikatsis imis keskakin en yusian kayatapia ea anua bikanwen, jawen kemutapatidan. Ja inun, matun yuda man jawen dakeai junenun ixun tadi sawea keskakin matun chakabu ea buamanun ixun tadi juxupa ea anua bia keska wakin matun chakabu jenetan ea chibankubainkanwen. Ja inun, uin pewanun ika bedu daunwen ika keskakin en yusianwen matu kaya watidu ea anua bidiakanwen.  
\v 19 Ja inun, dasibi man enabuwen nuikin matu medabewa bestinun ixun jancha kushipawen matu ja akin en matu yusinxuwen taexun en yusian ninkakin pewatan matun shinan betsa watan shinan chankanjaida bestikunkainkatsis ikidan, Dios anu bedikanwen.  
\v 20 Uian. Matu tibi jaibuwakatsis ikin matun beputi keska matun juinti anuxun ean en matu kenakin akawaii. Tsuanda en jui ninkatan ebe jaibunamekatsis ikin beputi keska matun juinti man ea bepenxuna matun jiwe anu jikitan en matubetan pikatsis ikaii.  
\v 21 Tsuabunda ea dananma jabun chakabu maemakin binumisbudan, jatu manakukin ea dapi tsaumakin en jatu xanen ibumaxanaii, jaska ean en binu keyuni en Epa dapi tsaua en jabe xanen ibuni keska wakinan.  
\v 22 Man pabinkiyabunan, Yushin Pepatun ja man ichamisbu matu yuiai ninkakanwen’ ”, ea waxu en matu kenexunaii. 
\c 4  
\s1 Nai anuxun Dios kenwainbu Juanen uinikiaki, na janchadan 
\p  
\v 1 Jaska ninkashina inun jati uinxu naiudi besuxun beputi bepean uintan jui trompeta mimawati kushipa keskawen jawen dukun Jesús janchai en ninkashina ana jabianwendi ea jancha wakin yuikin: “Ea anu inayuwe, min inaken jaskadada ana betsa betsapa inunbadiai en mia uinmaidan”, ea watan 
\p  
\v 2 jawaida ea betsa watan en yushinki dasitan ea uinma nai anu inaxun en uinxu matu yuinun ninkakanwen. Jadi Xanen Ibu jaki tsautiki nukun Epa Dios tsaua en uinxuki.  
\v 3 Ja tsaua jawen yudadan, diamante keska kasmai rubí keska nenkati kadujaida chaxajaida bakamana bakamana ikaya jawen tsauti kesukauana namakis nawan bai tapia esmeralda nenkati nanketapa keska chaxa chaka ikikiki.  
\v 4 Janua Dios xanen ibu jaki tsauti anu 24 tsauti betsa janu sedebauna uinkin 24 mekenikabu jabu jaki tsauabu tadi juxupa sawea xanen ibun oro mane maiti maiabu en uianyan  
\v 5 Dios janu tsaua anua kana bakatan tin ikaini danka ikainaya Diosun besuudi jawen medabenan yushin 7 nanpadina bin dekua nichinbauna chaxa keskabuki.  
\v 6 Jaska inun, tsauti besuudi ianenwan bexnanjaida bakamanaya ja dapi jiweabu dabe inun dabe ja tsauti anu mapubauna jabun besuudi bedu sankan daka inun jatun pechiudi bedu pesankan dakabu  
\v 7 ja dukun inu ewapa betsa jawen yuda león keska ja kachu ina awa bake keska ja kachu betsa junin besuya keska ja kachu betsa tete ewapa nuyai keska  
\v 8 jatibu 6 punyan peiya jabun yuda jidabi jawen bedunati chaxa dakabun badidi inun meshu medan Dios kenwankin jabun jeneisbuman yuikin: 
\q1 “Min pepajaidaki. 
\q1 Min dasibi kushipa binuaki. 
\q1 Mai jayadiama nukun Xanen Ibu Dios 
\q1 dasibi kushipajaida jiwea jaya inun, 
\q1 natian jiwekunkainai inun, 
\q1 ana min butuxanai nun unaiin”, ikin 
\p  
\v 9 Dios niti ikama jiwea ja dabe inun dabe jiweabun jamapai pepa jakidi shinankin jawen pepakidi yuikin kenwainbun  
\v 10 ja 24 mekenikabun kenwandiakin danti ixun xanen ibujaidawakin jabun jatun oro mane maiti mabikitan inankin jawen tae naman manchintan yuikin: 
\q1  
\v 11 “Dasibi damiwakin 
\q1 min shinanwen jamapai dasibi min damiwani 
\q1 min nukun Xanen Ibu inun 
\q1 min nukun mekenika yushin Dioski. 
\q1 Jaskawen taexun mia besti kenwankin 
\q1 nun mia duawakubainaii”, 
\m akaibu uinkin en matu kenexunaii. 
\c 5  
\s1 Chaxuwan baken una sebi keneya chudenikiaki, na janchadan 
\p  
\v 1 Januxun en ninkaya una sebi kene dabeya uke medan inun bemaki keneya 7 jawen tsamia tsuan june mekin bepentiduma inun chudediama unantiwen tsami dakabidana Dios jawen tsautiki tsauxun jawen meken yusiudiawen tsuma en uianyan  
\v 2 nai tsuma kushipatun uinbaunkin jui kushipawen jabu yukakin: 
\p “¿Tsua pepa kushipajaidatun atidumen? ja una tsamia tibi daxnukin jatun chudeaidan”, jatu wa  
\v 3 jakia nai anu inun, mai anu inun, janu mawabun yushin maniabu anu tsua pepajaida jayamaken tsuan chudexun uintidumaken  
\v 4 chanima tsua pepa kushipa juxun chudexun uintidumawen taea nui en kaxajaidaya  
\v 5 mekenika betsan ea yuikin: “Kaxayamawe. Xanen ibu Davidin baba betsa ja Judán baba yuinaka dasibibun xanen ibu inu betsa jawen kena león nun dabimis pepa kushipajaidakin jaki sinataibu maemanitun ja unanti tsamia tibi jatun daxnu daxnu akin keyutan ja una chudetiduki. Manayuwe”, ea waya 
\p  
\v 6 januxun Dios tsaua nashui ika namakis ja jiweabu dabe inun dabe mapubaunabu inun jabianudi ja 24 mekenikabu tsaubaunabu anu ja namakis nashui ika chaxuwan bake jawen yuda chachinibu mawa keska nia 7 maxunyan inun 7 beduya en uinxuki. Chaxuwan bake jawen 7 bedudan, ja jawen yushinwen mai jidabi anu Diosun jatu yusinmakubainaidan, jaska en uinxuki.  
\v 7 Januxun chaxuwan bake ja Dios janu tsau anu kemaxun jawen meken yusiudi anua una sebi bitan tsumaken  
\v 8 janua benimajaidakin ja jiweabu dabe inun dabe inun ja 24 mekenikabun jatun mimawati betsa jawen kena arpa inun oro mane kencha ni pei ininti ja kuaxunti keska mata jaska jawenabu Diosbe janchamisbu tsumaxundi jabu dasibibun chaxuwan bake kenwain jaki danti itan  
\v 9 dasibibun nawati bena juiwen nawakin yuikin: 
\q1 “Min pepajaidaki. 
\q1 Mawakin min jimiwen yuda xukuabu tibi anua inun, 
\q1 nawa tibi anua inun, 
\q1 jancha tibi anua inun, 
\q1 mai pakea tibi anua Epa Dios bixunkin jawenabu jatu wakin 
\q1  
\v 10 Diosbe janchaxunikabu min ma jatu waniki. 
\q1 Diosbe janu xanen ibuxanaibu jatu wanixun 
\q1 mai anua jabu xanen ibuxankanikiki. 
\q1 Jaskaken mian besti Diosun una bixun min chudetiduki. 
\q1 Min pepajaidaki”, akaibun 
\p  
\v 11 januxun ana uinkin en ninkaya ja jiweabu inun ja mekenikabu inun nai tsuma midimajaida Dios xanen ibu jaki tsauti dapi manibaunabun  
\v 12 jancha kushipawen jabun yuikin: 
\q1 “Chaxuwan bake keska deteabu 
\q1 ana besteni pepa kayabidan, 
\q1 jatun besti bitiduki, kushipadan, pepa tibidan, 
\q1 unanepajaidadan, xanen ibu kushipadan. 
\q1 Duawai shinan chankain benimawakin nun ja kenwaiin”, 
\m ikaibun 
\p  
\v 13 januxun ana en ninkaya ja dasibi Diosun damiwakin jatu jiwemani nai anuxun inun, mai anuxun, inun mawabu yushin bumisbu anuxun, inun ianenwan anuxundi jabun kenwandiakin yuikin: 
\q1 “Ja Xanen Ibu jaki tsauti anu tsaua inun 
\q1 chaxuwan bake jatu duawakin shinan chankanwankin 
\q1 jawen benimawatiwen jau xanen ibujaida wakubainunbunwen, niti ikamadan”, ikaibun 
\p  
\v 14 ja jiweabu dabe inun dabebun jabiaskadi shinankin kemakin: 
\p “Jabiaskaki”, idiaibun ja 24 mekenikabu danti iki beti itan kenwandiaibun 
\c 6  
\s1 Ja dukun 4 jawen unanti tsamia Jesucriston daxnukin taewanikaki, na janchadan 
\p  
\v 1 januxun Diosun chaxuwan baken jawen unanti ja dukun tsamia daxnuaya ja jiweabu dabe inun dabe betsan jawen jui tin ikainkainai keskai uinkin en ninkaya jatun yuikin: “Juwe”, akai 
\p  
\v 2 en uianyan janua caballo juxupaki tsuada kanunyan katsaua xanen ibun maiti betsa Diosun inan maia junibube detenamekin binumakin jatu maema akeakebaini kaken 
\p  
\v 3 januxun Diosun chaxuwan baken jawen unanti tsamia ja segundo daxnuaya ja jiweabu betsan yuikin: “Juwe”, akai  
\v 4 en uianyan janua caballo betsa tashipaki tsuada betsa jaki tsaukainkin kushipa bibainkin jau mai jidabi anu tsuabuda ana unanuma jiweama janubi jau detenamebaununbun nupe chaipa inantan yunua kaya 
\p  
\v 5 januxun Diosun chaxuwan baken jawen unanti ana ja tercero tsamia daxnuaya jiweabu betsan kenakin yuikin: “Juwe”, akai en uinyan janua caballo betsa meshupa tsuada betsa jawen xankama unanti tsuma jaki tsaua  
\v 6 ja jiweabu dabe inun dabe anua ja jancha kainmakin yuiai en ninkaya: “Piti yama tukantian xekiwan ja misi wati kilo bestichai jawen kadu xekamakin xaba bestichai daya pei wakubainwen. Ja inun, misi wati betsa cebada pe bexmas kilo dabe inun besti jawen kadu xekamakin xaba bestichai daya pei wakubainwen. Jakia piti xeni inun uva vino ana kadu wayamakubainwen”, aka kaya 
\p  
\v 7 januxun Diosun chaxuwan baken jawen unanti ana ja cuarto tsamia daxnuaya jiweabu betsan yuikin: “Juwe”, akaya  
\v 8 en uianyan janua caballo betsa pashin bexunaki tsuada betsa jawen kena Mawamanika jaki katsaua inun janu mawabu bumisbu jabun xanen ibu jachun juai en uianyan Diosun mai jidabi anuabu yudabu xukua tibi jabu anua paxka akeakekin ja dabe xanen ibu watan ja cuarta parte jatu inankin kushipa wakin yunukin nupewen jau detenamenunbun inun, buniwen jau tenanmanunbun inun, isin betsa betsapawen jau tenanmenunbun inun, yuinaka pubenbun jau jatu pimanunbun ja kushipa inan bibainaya 
\s1 Ja quinto inun sexto jawen unanti tsamia Diosun chaxuwan baken daxnunikiaki, na janchadan 
\p  
\v 9 januxun Diosun chaxuwan baken jawen unanti ja quinto tsamia daxnuaya jabun Jesús ikunwankin Diosun jancha Jesúskidi yusinkubaini bika betsa betsapa tenebiai chintuanbuma jatu tenanbu chi tapu januxun Dios kenwankin inankuinti januxun kuamisbu anu ja naman ja pepabun yushin datanbu en uianyan  
\v 10 jabun jancha kushipawen yuikin: “Min nukun Xanen Ibu binu keyua medibi min chanima kayabiki. Jaskaken mai anuxun jabun nuku tenanibudan, ¿jatian min jatu unanti watan jatu nuku kupixunxanai?” akabu 
\p  
\v 11 yushin datanbu Diosun jatu yuikin: “Matudan, juindukunyukanwen. Ikismaki. En tsumabu betsa matu keska ea dayaxunmis jabudi jau tenanyununbunwen. Jabun matu tenanmis keskadiwakin en jatu kupixanai manayukanwen”, itan jabu tibi pepawen kupikin tadi juxupa chaipa jatu inankin sawemakin keyuaya 
\p  
\v 12 januxun Diosun chaxuwan baken jawen unanti ja sexto tsamia daxnuaya en uianyan pacha sakujaidai badi nukai meshua tadi meshupa keska dakaken uxedi jimi keskai tashia dakaken  
\v 13 janua niwe bidenepan ji bimi jushindiama nidi amis keskai bishi tsekebidani mai anu nidi iake iakeaibun  
\v 14 janua nai yamakaini una sebiki ikaskainaya mati inun jene anu mai natukan maeakei xekekaunaya  
\v 15 janua mai jidabi anua xanen ibujaidabu inun, soladobu xanen ibubu inun, mabuwanyanbu inun, yuda kushipabu inun, dasibi jatun jatu dayaxunmisbu inun, yuda tsuan tsumama dasibi jatibu datei mai tanpe inun mishkipanwan mati janu junenun ika buxun  
\v 16 jaki junenun ixun mati inun mishkipanwanbu yuikin: “Janu kupi ma jua tsuan nematidumaki. Epa Dios jawen xanen ibun tsautiki tsaua inun jawen bake chaxuwan bake nukuki sinataiwen taea nuku junei nukuki di idikanwen.  
\v 17 Ma ja xaba janu Diosun jatu kupiaitian ma jua tsuan ana nematidumaki”, akeakeaibun 
\c 7  
\s1 Diosun bebunkidi jawenabu katuni jawen nai tsumabun jabu unanti wanikiaki, na janchadan 
\p  
\v 1 ja binukainaya januxun ana uinkin nai tsuma dabe inun dabe mapua akeakeabu en uianyan betsa badi juaikidi este anu nia betsa badi jikiaikidi oeste anu nia betsa norte anu nia betsa sur anu nia jabun niwe dasibi tsumaxun nemakin mai inun ianenwan inun ji mapua jau niwe janu xunku ikin jau ichakawayamayununbun  
\v 2 janua nai tsuma betsa badi juaikidia estekidia jukin nukun Epa Dios jiweatun jawenabu unanti waxunti jayatun jui kushipawen ja nai tsuma dabe inun dabe jabu kushipa mai inun ianenwan daunti jayabu jatu  
\v 3 yuikin: “Meyamayukanwen. Diosun tsumabu jabun betunkuki netankin jabu Diosunabu nun unanti wadiamaken mai inun ianenwan inun ji mapua ichakawakin daunyamayukanwen, Diosunabu jau mawayamayununbunan”, jatu wa 
\q1  
\v 4 jaska wakin 144,000 Israelin 12 juni bakebun bababu xukuabu Diosun jawenabu jawen betunkuki jawen unantiwen unanti wakin yuda betsa betsapabu katukin 
\q1  
\v 5 Judán bababu 12,000 jawenabu wakin unanti netankin 
\q1 Rubénen bababu 12,000 jabiaskadi wakin 
\q1 Gadin bababu 12,000 jabiaskadi wakin 
\q1  
\v 6 Aserin bababu 12,000 jabiaskadi wakin 
\q1 Neftalín bababu 12,000 jabiaskadi wakin 
\q1 Manasésin bababu 12,000 jabiaskadi wakin 
\q1  
\v 7 Simeónen bababu 12,000 jabiaskadi wakin 
\q1 Levín bababu 12,000 jabiaskadi wakin 
\q1 Isacarin bababu 12,000 jabiaskadi wakin 
\q1  
\v 8 Zabulónen bababu 12,000 jabiaskadi wakin 
\q1 Josén bababu 12,000 jabiaskadi wakin 
\q1 Benjamínen bababu 12,000 jabiaskas wakin 
\q1 Diosun jatu unanti wakin katumai en ninkaxuki. 
\s1 Nai anuxun jati tsuan tanatidumabun tadi juxupa saweabukidi yuinikiaki, na janchadan 
\p  
\v 9 Januxun ana uinbaunkin yudawan jati tsuan tanatiduma en uinxu matu yuinun ninkakanwen. Nawabu mai pakea tibi anuabu inun, yuda betsa xukua tibi anuabu inun, dasibi jancha tibi anuabu inun, mae tibi anuabu Dios xanen ibu jaki tsauti inun chaxuwan baken besuudi jabu nixun tadi juxupa chaipa sawexun xenpan tsuma nixun  
\v 10 jui kushipawen jabun yuikin: 
\q1 “Nukun Epa Dios xanen ibu jaki tsauti anua inun jawen bake chaxuwan bake nukun meketidan, jabuanuaki”, 
\m ikaibun  
\v 11 dasibi Diosun nai tsumabu inun, jabu jiwea dabe inun dabe inun, ja 24 mekenikabu jatibu xanen ibun tsauti anu mapubaunabu Diosun besuudi main beti ixun kenwankin  
\v 12 yuikin: 
\q1 “Nukun Epa Dios unanepa Xanen Ibu kushipajaidaki. 
\q1 Benimawakin jawenduawakin kenwankubainankanwen, niti ikamadan. 
\q1 Jaskakidan”, 
\m ikaibun 
\p  
\v 13 januxun mekenika betsan ea yukakin: “Na tadi juxupa saweabudan, ¿tsuabumen? ¿Jania beabumen?” ea wa  
\v 14 kemakin: “Xanen ibuun, min mian unaiin”, en wa januxun mekenikatun ana ea yuikin: “Chanimaki. Ichakawanikatun yuda dasibi mai jidabi anuabu bikawakin jatu nuitapawaya yudabun jatun chakabu jenekin jabun tadi detsis keska chaxuwan baken jimiwen chukakin jabun detsis yamawakin jabun tadi juxu pejaidawabuki.” 
\q1  
\v 15 “Jesúsun jaska wakin na mapubaunabu jatu pepawa 
\q1 Dios xanen ibu jaki tsauti anu manixun 
\q1 meshu medan inun badidi Dios janu jiwe anuxun 
\q1 duawakubainaibu Diosun jabu mekekubainxanikiki, 
\q1 shinan chankainbudan. 
\q1  
\v 16 Jadia ana nuitapai buni unpax manui ikama inun, 
\q1 badin ana jatu kuama inun, 
\q1 xana bakakin ana jatu bikawama ixankanikiki. 
\q1  
\v 17 Ja inun, chaxuwan bake Dios xanen ibu jaki tsauti namakis niatun 
\q1 unpax paisma pejaida chacha jene jawen jiwemati jaya anu jatu iyuxun amai 
\q1 jatun mekenan ixanikiki. 
\q1 Januxun ja kaxamisbu 
\q1 Diosun jatun bedu beun jene dasibi taxka waxanikiki”, ea wa 
\c 8  
\s1 Jawen jenekin séptimo tsamini daxnunikiaki, na janchadan 
\p  
\v 1 januxun Diosun chaxuwan baken ja séptimo jawen unanti jawen jenekin tsamini daxnuaya janua Diosun mae anua dasibi media hora nishma dakatan binukainaya 
\p  
\v 2 januxun ja 7 nai tsumabu Diosun besuudi mapuabu jabu tibi mimawati trompeta jatu inain en uianyan  
\v 3 nai tsuma betsan oro mane kencha tsumatan Dios kenwankin jawen inankuinti janu janati tapu anu Dios xanen ibu jaki tsauti besuudi ka nia jabun Dios kenwainbun jancha duapa inintibe jusixun janu kenwanti tapu anu jau manchinun ni pei ininti pepa ja bechipaimis ichapa nai tsuman inan  
\v 4 bixun nai tsuman jawen mekenki tsumaxun ja ininti inun ja Dios yukamisbu chi deken matsistua menui jawen kuin inin pejaida inabainaya ikunwainbun jancha duapa Dios yukamisbu ja kuinyanbi jusia inadiaya  
\v 5 januxun nai tsuman oro kencha ana tsumaxun chi deken janu kenwanti tapu anua beakin mata waxun mai anu udenkin sa aka jadia kana baka baka itan tin ikainkaini pacha sakuaya 
\p  
\v 6 januxun ja 7 nai tsumabu jabiatitundi trompeta jabun mimawati mawanun, iwanan, tsumabun 
\s1 Cuatro trompeta mawakin chan anibukiaki, na janchadan 
\p  
\v 7 ja nai tsuma betsa ja dukun primeron jawen trompeta chan akin taewaya mai pakea tibi anu nidi iake iakekaunkin badux ui inun chi ja dabe jimiyabi jusia Diosun puta mai pakea tibi anu kuakin ja pakea betsa anu kauankin ni inun ni maxu tercera parte kuakin basi nanke dakayabi dasibi kuaken 
\p  
\v 8 januxun nai tsuma ja segundon jawen trompeta chan akaya tsuanda ianenwan jatiubukuns watan pake dabe inun besti jabiatiubus waken mati ewapa menuai keska ianenwanu Diosun puta pukukin ianenwan pakea betsa jimiwaya  
\v 9 ja jabias pakea ianenwan medan jiweabu mawaibun ja pakea anu xaxuwan nexeabudi mushi mushi ikaya 
\p  
\v 10 januxun nai tsuma ja terceron jawen trompeta chan akaya jene inun chacha mai pakea betsa tibi anu bishiwan jede ji iki bin dekua keska chaxajaida nai anua kauani tercera parte mai anu inun jene betsa anu inun chacha anu tin iki kauanaya  
\v 11 ja bishiwan jawen kena Muka mai anu tin ikin mai pakea tibi anu jene tercera parte unpax mukajaidawaken yuda ichapabun ja unpax aki mawaibun 
\p  
\v 12 januxun nai tsuma ja cuarton jawen trompeta chan akaya tsuanda badi inun uxe inun bishi jabun chaxa kushipa jatiubukuns watan pake dabe inun besti jabiatiubus waken nai tsuman pakea betsa ichakawakin xaba betsa tibi badi nukawakin meshu tibi uxe inun bishi nukawakubainaya 
\p  
\v 13 januxun ana uinkin en ninkaya tete ewapa nai natukanu nuyakauankin junin jui kushipa keskawen yuikin: “Juaai, juaai, nai tsuma dabe inun bestitun jabun jatun trompeta jawaida chan akaya dasibi na mai anu jiweabu nuitapai yumanxankanikiki”, ikaya 
\c 9  
\s1 Quinto nai tsuman jawen trompeta mawakin chan anikiaki, na janchadan 
\p  
\v 1 januxun ja quinto nai tsuman jawen trompeta chan akaya bishi keska mai anu kauani tin ika en uianyan mai kini keyatapa xankinjaida janu yushin chakabu jiweabu anu jawen bepenti shabi ja bishi keska Diosun nai tsuman inanken  
\v 2 bishi keskatun jawen kini bepeanyan janua chi kuin midima bai ewapa kua keskai meshu tuenabainkin badi inun nun jawen juinsinamis meshu waya  
\v 3 kuin puebainai nakui shininwan midima mai anu pai butuabu nibu keska wakin Diosun jatu paepawakin pubenwankin  
\v 4 yunukin: “Mai anuxun basi piama jamapai miban shadabu piama ji piama yudabu jabun betunkuki Diosunabu jawen unanti netanbuma besti pikin jatu ichakawakubaintankanwen,  
\v 5 cinco uxe jatu isin tenemabiakin tsua tenanmadan”, jatu wa buxun yudabu ichakawakin nibu keskakin jatu pikin jatu isinjaida tenemakubainaibun 
\p  
\v 6 ja jatu jaska waitian yuda midimabu isin tenei mawakatsis ibiai juinti xukubiai mawabuma ixankanikiki. 
\p  
\v 7 Ja shinikidi matu yuinun ninkakanwen. Jabun yudadan, caballo jawen detenametanun ixun pewamisbu keska inun, xanen ibun oro mane maiti maia keska inun, jabun besu juni kuin besu keskaki.  
\v 8 Ja inun, jabun bu ainbun bu keska inun jabun xeta inu puben leónen makuxpi chaipa keskaki.  
\v 9 Ja inun, jabun yuda achimati mane kushipajaida sawea inun jabun punyan peiwen nuyai caballo midimatun jawen tadanbaintiwen tadanbainkin detenameaibu iyui banabainaibu keskabuki.  
\v 10 Ja inun, jabun jina nibu jina keskawen yudabu pikin jatu chakabuwa uxe meken bestiti isin tenekubainxankanikiki.  
\v 11 Ja inun, shinin xanen ibudan, ja kini keyatapajaida jatun yunumis nai tsumaki. Jawen kena hebreo janchawen Abadónki. Ja inun, jawen kena griego janchawen Apoliónki. Ja inun, jancha kuinwen kenadan, Yamawanikaki. 
\p  
\v 12 Janua ja dukun mesejaida atimapa keyukainaya janua dabe taxnidiama jayayuaki. 
\s1 Sexto nai tsuman jawen trompeta mawakin chan anikiaki, na janchadan 
\p  
\v 13 Ana ja sexto nai tsuman jawen trompeta chan chan akai en ninkaya Diosun besuudi ja Dios kenwanti oro mane tapu anu ja dabe inun dabe dexun tibi jaki mani chimei chankan tsamia anua jui taxni janchakin  
\v 14 ja nai tsuma trompetaya yuikin: “Ja nai tsuma dabe inun dabe jenewan Éufrates dapi nexea pekatan jatu nichindiwe”, aka  
\v 15 jaska was ja nai tsuma dabe inun dabe jatu peka mai jidabi anu yuda tibi manibaunabu jau na jabia hora inun, día inun, uxe inun, año tercera parte jau jatu tenan atanunbun nai tsuma betsan ja nai tsumabu dabe inun dabe jatu nichian taxnibainaibun  
\v 16 jabun soldadobu caballoki katsaunabudan, 200.000.000ti yuikanxu jaskaxanaibu en matu kenexunaii. 
\p  
\v 17 En nama keskatan jaska en uinxu inun jaska en ninkashina matu yuinun ninkakanwen. Juni tibitun jawen xuchi achimati mane tashipa chi keska inun, nanketapa jacinto keska, inun pashinipa azufre keska saweabun jabun caballo buxka inu león buxka keska jayabun jawen jaxpa anua chi inun, kuin inun, azufre pashinipa kui taxnibainaya  
\v 18 dabe inun besti pakea anu yudabu ja dabe inun besti isin chakabu ja caballo jaxpa anua kainkainkin chi inun, kuin inun, azufre kainkainkin jatu tenan keyuken  
\v 19 ja caballo jawen jina dunu keskaki, jawen jina inun, jawen dekin inun jawen xeta paepawen yudabu jatu chakabuwaidan. 
\p  
\v 20 Jakia ja yuda texeabu isin chakabuwen jabu mawabuma jabun chakabuwakubainkin jeneama yushin chakabu kenwankin jeneabumadiki. Ja inun, yushin dami betsa oro mane inun, plata mane juxupa inun, bronce mane tashipa inun, mishki dami inun, ji dami ja dami betsa betsapabun uintiduma inun, ninkatiduma inun, maputiduma kenwankin jeneabumaki.  
\v 21 Ja dikabi detenamei jeneabuma inun, yushin chakabun xuun itiwen daunanain jeneama inun, juni inun ainbu betsa betsapabube chutanamei jeneama inun, yumetsui jeneama chakabupakexanaibu en Juanen jaskaxanaibu en uinxuki. 
\c 10  
\s1 Una pishta sebi bepemana nai tsuman benikiaki, na janchadan 
\p  
\v 1 Janua nai tsuma kushipa betsa nai anua butuai en uinxu matu yuinun ninkakanwen. Jawen yuda nai kuinen yabua inun, jawen buxka nawan bai tapia keska inun, jawen besu badi keska chaxa inun, jawen bikedan chi deken keskaki.  
\v 2 Ja inun, una pishta sebi bepemana tsumabidana jawen tae chishabukuntan jawen tae yusiudi ianenwan bepaia inun jawen tae yusmaudi maiki paiaki.  
\v 3 Ja nai tsuma sai iki inu león pubein tekeden imis keskai jui kushipawen sai iken janua 7ki jui taxni tin ikainkaini keska en ninkashinaki.  
\v 4 Jawenchains 7ki denke iki betsa betsapai jancha ninkatan jawen jancha kenenun ixun en pewaya naiudixundi jui betsawen tsuanda ea yuikin: “Ja jawenchains ja 7ki den iki betsa betsapai min ninkabiaxudan, ja keneama junewe, tsua yuiyamadan”, ea waya 
\p  
\v 5 janua ja nai tsuma ianenwan bepaia inun mai anu paia jawen meken yusiudi naiudi sanantan  
\v 6 ja jiweibi jiweni jiwea jatun nai wani inun mai wani inun ianenwan wani dasibi jabu jawen jiwebaunabu jakidi jancha betsa watimakidi yuikin: “Badi jawen jeneidan, jatixun bestiki.  
\v 7 Ja 7 nai tsumabu jawen jenea séptimon jawen trompeta chan akaya Diosun tsumabu jawen jancha yuixunikabu jaska inunbadiaikidi Dios june yubakapauni ma jatixun besti menexanikiki”, ikaya 
\p  
\v 8 ja jui nai anua taxniai en ninkashinatun ana ea yuikin: “Ja nai tsuma jawen tae betsa ianenwan bepaia jawen tae uke betsa maiki paiatun una pishta sebi bepemana tsumaki nukuxun mebinwen”, ea wa  
\v 9 kaxun yuikin: “Ja una pishta sebi bepemana min tsumadan, ea inanwen”, en aka ea yunukin: “Naki, pidiwe. Min pia min jana buna bata keska ibiatan min jatu mukajaidaikiki”, ea wa 
\p  
\v 10 ja una sebi pishta nai tsuman tsuma mebintan en pia en jana buna bata keska batabiakaini en jatuki nanekin muka wabainaya  
\v 11 januxun nai tsumabun ana ea yuikin: “Diosun mia ana yunuaidan, mia yuinun ninkawe. Mae betsa betsapa anu jiweabukidi inun, nawa mai pakea betsa betsapakidi inun, jancha tibi janchaibukidi inun, xanen ibu kushipajaida betsa betsapakidi jawen jancha bena xabakabi jatu kenexunkin jaska Diosun jatu jaska waxanai jatuki chanidiwe”, ea wa en ninkaxuki. 
\c 11  
\p  
\v 1 Januxun jawen mestenti tanati tawa mexte nai tsuman ea inanxun yuikin: “Benikaini kaxun ja tanatiwen Dios kenwanti Templo Jerusalén anu tanatan tapu janu jawen inankuinti janamisbu tanatanwen. Januxun jatibun januxun jabun Dios kenwankubainmisbudi númerowen yudabudi tanadiawe.  
\v 2 Jakia jawen kenwanti Templo jemaintin Diosun nawabu ma jatu yunuima januxun jabun 42 uxe Dios danankin jawen mae pepa ichakawakubainxanaibu jemaintin anu tanayamawe.  
\v 3 Januxun ea Diosun en tsuma dabe en kushipa inankin en jatu yunua yudabuwen nuijaidakin bexa tadi sawetan 1,260 xaba en kakape yusin janchakubainxankanikiki”, ea waxu 
\p  
\v 4 jatukidi matu yuinun ninkakanwen. Na Diosun jancha yuixunika dabedan, olivo ji dabe inun bin pejaida dabe keskabun mai dasibi jatun damiwani Ibu Diosun yunua anun ikaibudan, jawen besuudi nia keskabuki.  
\v 5 Jabu dabe tsuabunda jatu danankin jatu chakabuwanun ikaibu ja jabu jaki sinataibu jatun jaxpawen jabuin xuun akin chi jede taxnimakin jatu kuakin tenanxankanikiki.  
\v 6 Ja inun, Diosun jawen kushipa jatu yunua jawen jancha yusinkubainkin jau ana ui iyamayunun nai beputidubuki. Ja inun, jabun jene dami wakin jimi watidubuki. Ja inun, jawatianda jatu dasibi tenemakatsis ikin jamapai isin inun jamapai betsa shadabu mai anu jiweabu jatu bika tenema akeaketidubuki, Diosun kushipa jayabuwen taexunan. 
\p  
\v 7 Jakia Diosun jancha kakape jatu yunua yusinkin keyuaibun jawada atimapa pubenepa mai kini keyatapajaida anua mapekekidan jatube achinamekin jatu maemakin tenanyan  
\v 8 Jerusalén bai kaya namaki jabun yuda datanbu na jaskaidan, januxun jatun Xanen Ibu cruzki mastanibu anu ja maewan Jerusalén anu yuda jiweabun Diosun jancha danankin ninkaisbuma Sodoma inun Egipto anu jiwenibu keska ikubainaibu anu jatun yuda dakaken  
\v 9 xaba dabe inun besti namakis mae tibi anu jiweabu inun, yuda betsa xukuabu tibi inun, jancha betsa betsapawen yuiaibu inun, mai pakea betsa betsapa anuabun ja mawa daka jau maiwayamanubun jatu yunuabuma  
\v 10 Diosun jancha yuikin jabun jatu ja akaibu ma mawabuwen taea midimabu mai anu jiweabu benimai shinan chankain jatun jaibuaibube jatun jamapai jamen inananainbun 
\p  
\v 11 janua jaskabiaibun xaba dabe inun besti namakis ka jawen jancha yuixunikabu Diosun ana jatu bestenwan ana jiwei benidabebaunaibu dasibibun jatu uin date paepaibun  
\v 12 janua nai anua jui kushipawen Diosun jancha yuixunika dabe Diosun jatu kenakin: “Nedi inadi bekanwen”, jatu wa ninkatan nai kuinwen inaibu ja jaki sinatashinabun uiainbun  
\v 13 ja jaskabaini nesebainaibun pacha sakuaya ja mae décimo parte pake betsa di akaya 7,000 yudabu debuaibun dasibi yuda betsabu jabu jiweyuabu datejaidai damapaikin Dios nai jidabi xanen ibu kushipajaida ikunwanmabia kenwainbu jaskaxanaibu ninkakin en uinxuki. 
\p  
\v 14 Janua ja segundo mesejaida atimapa keyukainaya janua ana betsa tercero taxnidiama jawaida kaindiaikiki. 
\s1 Ja 7 nai tsumabu jawen jenea séptimo trompetayatun jawen trompeta chan anikiaki, na janchadan 
\p  
\v 15 Ja 7 nai tsumabu jawen jeneatun trompeta chan akai en ninkaya nai anua jui kushipawen jabun kenwankin yuikin: 
\q1 “Nukun Xanen Ibu Dios inun 
\q1 jawen bake Mesías Cristo besti 
\q1 natian mai jidabi anu ja besti xanen ibukin 
\q1 jatu mekekubainxanikiki, niti ikamadan”, 
\m ikaibun  
\v 16 ja 24 mekenikabu Dios xanen ibun jaki tsauti dapi janu tsauabun jabun Dios kenwain jawen tae naman maiki danti iki beti ixun  
\v 17 yuikin: 
\q1 “Yavé Diosuun, min pejaidaki. 
\q1 Mai jayadiama min jiwenidan, 
\q1 natian betsama jabias min jiweaki. 
\q1 Xanen ibu betsa yamawatan 
\q1 min kushipa min jayakunkainmiswen yuda dasibibu mekei 
\q1 mia besti min ma xanen ibui taeaii. 
\q1 Mia besti kushipa dasibi binu keyua min pepa nun mia kenwaiin. 
\q1  
\v 18 Ja dukun mai jidabi anuabun mia bechipaiama 
\q1 mia danan paepawai miki sinatakubainimabuki 
\q1 Jakia miadi natian jatuki sinatadiai 
\q1 janu jatu kupinun ika min ma taxniaki. 
\q1 Januxun mawabu bestenwantan jatu unanti wakin 
\q1 min tsumabu min jancha yuixunikabu inun, 
\q1 minabu wakin medibi min jatu wani 
\q1 jabu dasibi xanen ibubu inun xanen ibubuman 
\q1 mia chibankin mia kenwankubainmisbu 
\q1 jabun pepawen min jatu manakuxanaii. 
\q1 Jakia jabun jawada mai anuxun pepa yamawakin 
\q1 mia chibankubainama mia dananmisbu 
\q1 jabun chakabuwen jatu unanti watan manakudiakin 
\q1 jabun chakabuwen miandi min jatu yamawai kaii”, 
\m akaibu en ninkaya 
\p  
\v 19 januxun Templo nai anua bepenxun ja jiwe medanua Diosun nukun xenipabu yubani kene ji bauki adua jatu uinmaya kana baka baka iki tin ikainkainaya pacha sakuaya badux ui ewapabu nidi iki jaskai keyuxanai en uinxuki. 
\c 12  
\s1 Ainbuki yushibu xeanan pubenikiaki, na janchadan 
\p  
\v 1 Janua nai anua unanmati betsa taxnikidani ainbu jawen bachi badin chaxapan yabua inun, jawen tae uxen tachaxa inun, xanen ibun maiti 12 bishi nea maia  
\v 2 ja ainbu tuya bake kainun ika isinjaida mei bis ikai en uianyan 
\p  
\v 3 janua jawen unanmati dami betsa nai anua taxnia yushibu xeanan tashipa jawen yuda kapetanwan yuda keska 7 buxkaya 10 maxunyan buxka tibiki xanen ibun maiti maia taxnitan  
\v 4 tsuanda bishi jatiubukuns watan pake dabe inun besti jabiatius waken pakea betsa yushibu xeanantun jawen jina bekun bekun akin bishi pakea betsa mai anu udentan ja yushibu xeanantun ainbu tuya bake kainun ikai ja dapi jawen besuudi nixun jawen bake kaiain achixun xeanun, iwanan, manaya  
\v 5 ja ainbu anua juni bake kaintan ewatan nawa betsa betsapa dasibi binukin jabun Dios ninkabuma jawa kaneama kupi jau xanen ibuxanun ja bakeishta kaian xeanantun xeanpanan iyukin jawen xanen ibun tsauti anu Diosun paxawakin ainiken  
\v 6 ainbu janu tsua jiweabumanu paxawakin mae betsa Diosun ainbu pewaxuni anuxun 1,260 xaba jadixun jau pimakubainxanunbun jadi yunua ainbu paxaken 
\p  
\v 7 janua nai anua Diosun nai tsumabu xanen ibujaida Miguel jawen tsumabube inun yushibu xeanan jawen tsumabuyadi jatube detenameaibun  
\v 8 yushibu xeanantun maematidubumawen taexun nai anu ana jabube jiwetidubuma Miguelin jatu udenkin  
\v 9 ja yushibu dunuwan jiwei taeni xeanan chani ewan yuda dasibibu jatu padankubainmis nun Diablo Satanás wamis jawen tsumabube mai anu jatu maemakin nidi akabun 
\p  
\v 10 janua jui kushipa nai anua kaiain en ninkaya yuikin: 
\q1 “Nukun betsabu jabun ikunwainbu 
\q1 badidi inun meshu medan Dios bebunxun 
\q1 nuku jatu chitenkin yuanmis ma putabuki. 
\q1 Pejaidaki. Natian Dios xanen ibuaya 
\q1 jawen bake Mesías Cristo jabe xanen ibukin 
\q1 jatun kushipajaidawen nuku mekekin taewakanikiki, 
\q1 ja yaushikin ana tsua benutimadan. 
\q1  
\v 11 Jabu nukun betsabun Satanás maemakinan, 
\q1 Jesús Diosun chaxuwan bake jabu mawaxunkin 
\q1 jawen jimi jabaniwen taea inun 
\q1 jawen kakape jancha chanikin 
\q1 jawa dateama jatun jiwea benutiduma unankubainmisxun 
\q1 jabu mawawen dateisbuman Satanás ma maemadiabuki. 
\q1  
\v 12 Jaskawen taea nai inun man janu jiweabuun, benimadikanwen. 
\q1 Jakia man mai anu inun ianenwan anu jiweabuun, man peidakanwan. 
\q1 Satanás pubenjaidatun badi ichapama besti matu ichakawatidu 
\q1 shinain matu anu ma jadi butuaki”, 
\m jatu wa 
\p  
\v 13 januxun yushibu xeanan ma mai anu puta uintan ja juni baken ewa yushibu xeanantun ichakawakin nuitapawakin taewakubainaya  
\v 14 janu tsua jiweabumanu chai jadixun badi dabe inun besti namakis keska Diosun ainbu medabewakin pimakubainun, iwanan, tete ewapan punyan damiwatan Diosun ainbuki tsamian jawen nuyakaini janu jiwexanai anu paxawaxanun ikaya  
\v 15 yushibu xeanan jaki sinatajaidakin jawen jaxpakan unpax tuea chada chada ikin jene ewabainkin jau ainbu nuntanbainun, iwanan, aka  
\v 16 jakia main ainbu medabewakin ja yushibu xeanantun jene wa ja mai jaxpatan jene tsu akin keyuaya  
\v 17 jaskaya yushibu xeanan ainbuki ana sinatajaidakin ana jawawen jaska watima jawen bababu texebun Diosun jancha chibankin Jesús ikunwankubainaibu tenanun ika  
\v 18 ja yushibu xeanan ianenwan kexa janus kexea niken 
\c 13  
\s1 Jesucristo xanen ibuni mebinun ikai inun jawen janchaxunika padanananxanaikidikiaki, na janchadan 
\p  
\v 1 janua yuinaka ewapa mese atimapajaida ianenwanua mapekeai en uinxu matu yuinun ninkakanwen. Jawen buxka 7 jaya inun, 10 maxunyan inun ja tibiki xanen ibun maiti maiaki. Ja dikabi jawen buxkaki Dioski xechakati jawen kenaya jayaki.  
\v 2 Ja inun, jawen yuda inu keneya keska inun, jawen tae inu betsa meshupa oso itamama tae keska inun, jawen jaxpa inu león pubenjaida keskaki. Jaska inun, yushibu xeanantun ja yuinaka mese atimapajaida jawen kushipa pae inun, janu xanen ibui jaki tsaumis inun jawen yunuti kushipajaida inankin yunua  
\v 3 jawen buxka betsa tenanun, iwanan, tsuanda chachikin debuwani keska ma buni baka jaya mai anu yuda dasibibun ja mese uin e iki dateyabi: “Jabaa!” ikin uinkin chibainbun  
\v 4 jabiatiandi yushibu xeanantun jawen kushipa ja yuinaka mese atimapajaida inanwen taexun dasibibun kenwankin ja dikabi yuinaka mese atimapa kenwankin yuikin: “Na yuinaka atimapa keska tsua jayamaki. Tsua jabe detenamekin maematidumaki. Pejaidaki”, ikaibun 
\p  
\v 5 januxun yushibu xeanantun yuinaka mese ja kushipa jaska tibiwen jau kushipanun yuikin: “Jamapai jancha atimapai Dioskidi xechakai 42 uxe kushipakunkainwen”, aka  
\v 6 jaska yunua akin Dioskidi jancha chakabui jakidi jamapai betsa betsapa atimapa yui inun jawen kenwanti Templokidi inun nai anu jiweabu jawen janchawen jatu ichakubainaya  
\v 7 ja dikabi yushibu xeanan jau Dios chibankin Jesús ikunwainbube detenamei jau jatu maemanun kushipa inankin yunutan yuda betsa xukuabu tibi inun, mae tibi jiwebaunabu inun, jancha tibi yuiaibu inun, nawa mai pakea tibi anu jiweabu xanen ibukunkainwen, ikin jancha wakin meneken  
\v 8 ja yuinaka mese atimapa kenwankinan, jabu mai jidabi anu jiweabu tsuabuda bebunkidi Diosun mai dami wadiama jabun kena chaxuwan bake nuku mawaxunitun unaki keneama ini jabun besti duawakin kenwanxankanikiki. 
\p  
\v 9 Tsuabuda man pabinkiyabunan, ninkakanwen: 
\q1  
\v 10 “Tsuada bichiti jiwe anu iyukatsi ikin 
\q1 bichiti jiwe anu jatu bichixankanikiki. 
\q1 Januxun tsuada nupe chaipawen jatu tenankatsis ikin 
\q1 nupewen jatu debuwaxankanikiki”, 
\m jabun chanima Dios ikunwankin jabun jawa shinan betsa wama jatun kushipa jatu uinmaxankanikiki, ikunwain medibibunan. 
\s1 Yuinaka ewapa mese atimapajaida mai medanua ja kachu kainikiaki, na janchadan 
\p  
\v 11 Janua yuinaka ewapa mese atimapajaida betsa mai medanua taxnikidana en uinxu matu yuinun ninkakanwen. Chaxuwan bake maxun dabeya keska yushibu xeanan dunuwan taeya Satanáskidan padananain janchai  
\v 12 ja yuinaka mese atimapa betsadan, ja ja dukun tenanibubia ma jawen dete bunitun jawen kushipa dasibi jayatun ja bebunxun mai jidabi anu jiweabu ja ja dukun yuinaka mese atimapa jatu kenwanmakubainkin  
\v 13 januxun dami tsuan jaska atiduma yudabun bedubi kainmakin naiudia chi jede pakeaya  
\v 14 jatu jaska waxun uinmakin ja yuinaka mese atimapa ja dukuntun besuudi jamapai atimaska akaiwen yudabu dasibi padankin ja kachukeatun yunukin yuikin: “Yuinaka mese atimapajaida ja tsuanda buxkaki chachini mawa ana besteni jiwea keska ja itsa damiwadikanwen”, jatu wa  
\v 15 ma damiwabun yuinaka ja kachukeatun ja ja dukun yuinaka mese kushipa inan ja damiwabu jiwemakin janchamaya jabun ja kenwanbuma jau jatu tenanun  
\v 16 januxun dasibibu jatidi xanen ibubu inun xanen ibubuma inun, jatidi mabuwanyanbu inun nuitapaibu inun, jatidi tsuanda tsumabu inun tsumaumabu yuinaka mese atimapa ja kachukeatun jawenabu unanti wakin betsabu jabun meken yuisiudi tuxkutimawen netankin betsabu jabun betunkuki netankin wabu  
\v 17 tsuabuda ja yuinaka mese atimapan kena inun jawen unanti número jayabumanan, jawa jabun jatun jamapai inantidubuma inun bitidubuma jatu wamaxanikikiki. 
\p  
\v 18 Jaskaken unanepajaidatun ninka pejaidawatan tanaidan, eskatiki. Matu yuinun ninkakanwen. Yuinaka ewapa mese atimapa jawen número 666dan, juni betsan jawen kena unanmati númeroki. Ja número unainan, bikajaidabia unanepatun besti tanatidubuki. 
\c 14  
\s1 Nai anuxun nawati benawen kenwain nawanibukiaki, na janchadan 
\p  
\v 1 Januxun ana uinkin Diosun chaxuwan bake Sión mati anu ja yudabu 144,000 jabe mapuabu jatibu jawen kena inun jawen Epa Diosun kena ja dabetun kena jatun betunkuki kene nea jabe mapuabu en uinxu matu yuinun ninkakanwen.  
\v 2 Nai anua jui betsa kaiain jene didi ikai jui keska inun, kana tin ikainaitun bana jui keska inun, yuda ichapabun jabun arpa mimawati mawaibu jui keskawen ja mapuxun  
\v 3 nawa bena nawaibu en ninkaxuki. Dios xanen ibu jaki tsauti besuudi inun ja jiweabu dabe inun dabebun besuudi inun, ja 24 mekenikabun besuudi jawen nawati benawen ja 144,000 jabu ja yudabu anua katukin Diosun jawenabu jatu wani nawaibu uinkin en ninkaxudan, jabun besti ja nawati bena unankanikiki, tsua betsan ja tapintidubumadan.  
\v 4 Ja nawakin Dios inun jawen bake chaxuwan besti duawakin kenwankubainunbun Diosun jabu ja dukun inankuin keska wakin jabu dukun katuniki. Jaska Dios inankuinmisbu keska wakin jabun jatun yuda Dios inun jawen bake inanbu jatu mekenibu jabun ainbu betsabu chutabaunabuma pepa besti Diosun chaxuwan bake janida kai anu jabu jachun buxankanikiki.  
\v 5 Jabudan, jabu anua tsuan chani bechitidubuma inun jawa chakabu jatukidi yuitidubumaki. 
\s1 Nai tsumabu inun nukun Juchi Kayabi Iyuatun yudabu kupixankanikiaki, na janchadan 
\p  
\v 6 Janua ana betsa taxniai en uianyan nai tsuma betsa nai natukanu nayakaunkin Diosun jancha kakape bunikatun mai anu jiwebaunabu nawan mai pakea tibi anu inun, yudabu xukuabu tibi anu inun, jancha tibiyabu anu inun, mae tibi anu jiwebaunabu jancha ikibi ika jatu yuinun ika  
\v 7 jui kushipawen yuikin: “Diosun nai inun mai inun ianenwan inun unpax chacha tibi damiwanitun yuda dasibi unanti watan na jabiatian jatu kupikin taewaikiki. Jaskaken menan jaki danti itan Dioski datekin kenwandikanwen”, ikainaya 
\p  
\v 8 janua ja nai tsuma betsa ja kachukeatun chibanbainkin jui kushipawendi yuikin: “Babilonia maewan ken ewa ma yamaikiki. Babilonia anuabun chakabujaidawakin chutawen kemukubainkin nawa betsa betsapabu dasibi jabiaskadi chakabu atimapa jatu wamakubainaibuwen taexun jabun maewan Babilonia Diosun kupikin ma yamawaki”, ikainaya 
\p  
\v 9 janua nai tsuma betsan chibandiabainkin jui kushipawendi yuikin: “Tsuabunda yuinaka mese atimapa inun jawen dami kenwanun ika jabu jeen iyamama jatun betunkuki inun jatun mekenki jawen unanti man jatu netanmamisbudan,  
\v 10 Dios ma jawen sinata pae jatuki tanani jawen jatu kupijaidakin azufre pashinipawen jatu nuitapawakin tsekeden imakin chiwen menukin jatu kupijaidaxanikiki, Diosun nai tsumabu inun chaxuwan bake bebunxunan.  
\v 11 Ja inun, tsuabunda yuinaka mese atimapa kenwankin jawen dami kenwandiaibu jawenabu wakin jawen jatu unanti wai jatu nemama jatun kena jatu netanmamisbu badidi inun meshu medan jeneama ja kuinwen chi nukaismawen dunua nuyai badi tibi jawa juindukuanma isin tene chakayamakubainxankanikiki”, ikainaya 
\p  
\v 12 januxun jabun chanima Jesús ikunwankin jabun jawa shinan betsawama Diosun janchawen jiwekin jatun kushipa jatu uinmaxankanikiki, ikunwain medibibunan. 
\p  
\v 13 Januxun nai anuxun jui betsa taxnikin ea yunukin: “Na jancha kenediwe. Na jabia unudi pakea nukun Xanen Ibuki dasitan mawakubainxanaibudan, Diosun jatu benimajaidawaxanikiki”, ikaya januxun Yushin Pepatundi ea yuikin: 
\p “Jabiaskaki. Jabudan, jatun daya jenetan juindukun bestixankanikiki. Ja inun, jamapai shadabu Cristo axunkubainmisbuwen Diosun jatu manaku bestixanikiki”, ea wai ninkakin jaskaxanaibu en uinxuki. 
\p  
\v 14 Janu ana betsa kaiain uinkin nukun Juchi Kayabi Iyua nai juxupa kubuduki tsaua xanen ibun oro maiti maia inun jawen mekenwen beki machatu chaipa ewapa kenujaida tsuma en uinxuki.  
\v 15 Templo nai anua nai tsuma betsa kainkidankin ja nai kubuduki tsaua yunukin jui kushipawendi yuikin: “Yudabu mai anu jiweabu yunu banaimabu keskadan, ma janu kania tsekati keskaki. Janun min beki machatu chaipa min tsumawen xachiwan mextea keska wakin ichawaxun adudiwe”, aka  
\v 16 januxun ja nai kubuduki tsauatun jawen beki machatu chaipa bekunkin Diosunabu mai anuabu mextea keska wakin jatu ichawaxuki, mekekinan. 
\p  
\v 17 Janua nai tsuma betsa Templo nai anua beki machatu chaipa kenujaida tsuma kaindiakidanaya  
\v 18 janua nai tsuma betsan chi dasibi yununika Dios kenwankin tapu janu jawen inankuinti janamisbu anua kainkidankin nai tsuman beki machatu chaipa tsuma jui kushipawen yunukin: “Yudabu chakabu uva bimi ma jushian keskaki. Kania tibi mextexun ichawadiwe”, akaya  
\v 19 janua Diosun nai tsuman jawen beki machatu chaipa tsumaxun yudabu uva bimi kania keska tibi mextexun jawen bimi jene biti tsiniti anu manchinxuki, jau jabuki sinatakin tsinikin akawakin jatun chakabuwen kupinunan.  
\v 20 Januxun mae benanta uva bimiki paikin jawen jene bimisbu keska wakin Diosun jabun jimi jabamakin bai mata keska wakin caballo jawen kui anu kesunbainkin 300 kilómetro jabamabainxanai en uinxuki. 
\c 15  
\s1 Yudabu jatu ichakawati 7 nai tsumabu jaya Juanen uinikiaki, na janchadan 
\p  
\v 1 Januxun jawen jatu unanmakin ichakawati mese 7 jawen jenea jaska nai anua kaiain ja uin e iti chakabujaidawen jaska nai tsumabun Diosun yudabu nuitapawakin jatu ichakawaxanai 7 nai tsumabun kencha tibiki jawen jenea Dios sinatamis tsumabu en uianyan 
\p  
\v 2 janua ja dukun ianenwan bexnanjaida bishtu keska chiyabi jusia jayaki. Jaskadan, eskaki. Jabun ja yuinaka mese atimapajaida inun, jawen dami danankin kenwanbuma inun, jawenabu jawen unanti número kena danankin Diosun jancha chibankin Jesús ikunwankubainkin maemashinabu jabu ianenwan dapi mapuxun Diosun mimawati arpa jatu inan tsumabu en uinxuki.  
\v 3 Jabu nawakin Diosun tsuma Moisés inun Jesús chaxuwan bake ja dabetan nawatiwen Dios kenwankin nawakin yuikin: 
\q1 “Dasibi jamapai dami ewapa tibi akin min jatu e imati anidan, min mia bestiki, 
\q1 Yavé Dios kushipa dasibi binu keyuadan, mai jidabi yudabun min Xanen Ibudan. 
\q1 Tsua padanma min shinan kayatapiawen chanima min nuku pe mekekubainmiski. 
\q1  
\v 4 Mia besti medibi jiwea min kaneisma unankin 
\q1 yudabu betsa betsapa dasibibun mia yui mesewai datebetanan duawakin mia kenwanxankanikiki, 
\q1 min pepawen kaneama min akubainmiswen taexunan”, 
\m akaibun 
\p  
\v 5 jaskaibu naiudi en uianyan Diosun jiwe nai anu bepenmanakainaya Dios yubakatan Moisés jiwe wamani  
\v 6 ja medanua 7 nai tsumabun ja tibitun jawen jatu ichakawati tsuma kainbidanaibun jabun tadidan, juxupa chaxajaida sawea inun oro nanexeketi xuchi puchinin kesua sawea mapuabu  
\v 7 ja jiweabu dabe inun dabe betsan ja 7 nai tsumabu tibi oro kenchaki Dios jiwei ikibi ini jiweatun jawen yudabu kupiti mata jatu inan akeakeaya  
\v 8 Dios kushipa duapajaida chi kuin keska jawen medibi dintu mata anua juikiki. Ja 7 nai tsumabu jabu tibitun ichakawatiwen yudabu ichakawakin keyudiabumaken Diosun Templo anu yane jikitidubumaki. 
\c 16  
\p  
\v 1 Januxun en ana ninkaya nai anu Dios kenwanti Templo anua jui kushipawen 7 nai tsumabu tsuanda yunukin jatu yuikin: “Matun 7 kenchaki Dios sinatamis mata mesejaida mai anu buxun jiweabuki jatu juka akeakeditankanwen”, jatu wa 
\s1 Diosun jawen jatu kupiti 7 nai tsumabun kencha mata juka akeakekubainaibu uinikiaki, na janchadan 
\p  
\v 2 nai tsuma betsa ja dukun kaxun jawen kenchaki Dios sinatamis mata mai anu jukaya ja yudabu mai anu jiweabu jabu ja yuinaka mese atimapa jabun unantiyabu inun jawen dami kenwanmisbu jabun yudaki chami isin atimapa kainkin isinjaida jatu tenemaya 
\p  
\v 3 janua nai tsuma ja segundo kaxun jawen kenchaki Dios sinatamis mata ianenwanu jukaya juni puben jatuki sinatakin jatu chachia mawai jimi jabamis keskai jene pisiwa jene medan jiweabu dasibi mawaibun 
\p  
\v 4 janua nai tsuma ja tercero kaxun jawen kenchaki Dios sinatamis mata jene kayabi dasibi inun chacha dasibi anu jukaya jene dami jimi keyuaya  
\v 5 nai tsuma jene jatun mekemistun Dios yuikin: 
\q1 “Mai jayadiama min jiweni inun 
\q1 natiandi Dios medibi jiwemistun jawa kaneama 
\q1 jabis jatu unanti wakin min amisdan, min mia besti nun unaiin. 
\q1  
\v 6 Min jancha yuixunikabu inun 
\q1 Jesús chibainbu ichakawakin 
\q1 jabun jimi jabawakin tenankubainmisbu 
\q1 jabudi jatu kupikin jimi min jatu amaii. 
\q1 Jaska menun ika imisbudan, jau jaskanunbunwen”, akaya 
\p  
\v 7 januxun Dios kenwankin tapu janu jawen inankuinti janamisbu anuxun tsuanda yuikin: “Xanen Ibu Epa Dios dasibi binuatuun, januki. Dasibi kushipayakin kaneisma yudabu unanti watan chanima min shinan kayatapiawen mian besti min jatu kupiaii. Min pejaidaki”, akaya 
\p  
\v 8 janua nai tsuma ja cuarto kaxun jawen kenchaki Dios sinatamis mata badi anu jukakin badi kushipa wa ja badin kushipa bitan yudabu menuaya  
\v 9 jawen kupiti tibi Diosun yunukin jatu tenemaiwen taexun ja kujaidaiwen menubiakin jaska shadabu mebiai Dioski xechakakin kenwanun ixun shinan betsa wabumaki. 
\p  
\v 10 Janua nai tsuma ja quinto kaxun jawen kenchaki Dios sinatamis mata yuinaka mese atimapajaida jaki tsauti anu juka jawen mae meshuaya yudabu ana jawawen jaskatima isin tenei jatun jana buxtebainbaina manibia  
\v 11 jabun isin chakabu tibi mebiai inun chami tenebiai jabun jiwea chakabu jenekatsi ikama Dios nai anu jiwea jaki xechakai jancha chakabu yui jeneabumaki. 
\p  
\v 12 Janua nai tsuma ja sexto kaxun jawen kenchaki Dios sinatamis mata jenewan Éufrates anu jukaya jau xanen ibubu badi juaikidia jau jawen benunbun bai tapinxuni jene netsuaya 
\p  
\v 13 januxun yuinaka mese atimapa jaxpa anua inun, yushibu xeanan jaxpa anua inun, juni betsan padan jancha yusinmis jaxpa anua jabu tibi anua yushin chakabu jeu keska kaiain en uinxuki.  
\v 14 Ja yushin tibidan, jawen yushin chakabuwen dayakin dami atimaska betsa betsapa jatu waxunkin xanen ibubu dasibi mai jidabi anua jatu taxnibidan jatun soldadobuya detenamemanun, iwanan, jatu icha waken januxun Dios kushipa binuatun janu akaitian jatu maemakin yamawaxanikiki. 
\p  
\v 15 Jaskai en uianyan Jesús chani: “Uian. Ea ana matu anu kaidan, en yumetsu kai keskakainxanaii, tsuan jaska ana shinanmakenan. Jabu man benimaxanaibudan, uxa keskama bestenxun min jiwea min tadi min meke pewa keska ixankanwen, jawa min tadi pekatan nia keskamadan, matun yuda tadiuma nia jawen man daketidu keska iyamakanxunan”, ea waya 
\p  
\v 16 januxun yushin chakabu jeu keskabu buxun jau Diosbe detenamenunbun jawen hebreo janchawen Harmagedón mae anu xanen ibubu dasibi jatu ichawabu 
\p  
\v 17 janua ja nai tsumabu jawen jenea ja séptimo kaxun jawen kenchaki Dios sinatamis mata jawen juinsinaibu anu niwe anu jukaya janua Dios xanen ibu jaki tsauti jawen jiwe anua jancha kushipa kainkin yuikin: “Ma jatis besti en keyuxuki”, ikaya 
\p  
\v 18 janua kana baka baka itan tin ikainkaini mai taka aki mai pacha sakui yudabu mai anu jiweabu: “Jaskakunkidanai nun meismaki”, iki mesejaidaibun  
\v 19 dasibi yudabun maewan Diosun tekekin keyukin ja maewan Babilonia kushipajaidabia jawen chakabu shinain jaki sinatajaidakin pakea dabe inun besti waxun jatu kupijaidakin  
\v 20 dasibi natukan tibi yamawadiakin mati dasibi yamawakin  
\v 21 jaska waya naiudia badux ui itamama betsa 40 kilo yudabuki nidi imaya badux ui mesejaidawen taea yudabu Dioski xechakaxanaibu ninkakin en uinxuki. 
\c 17  
\s1 Maewan betsa ainbu jininipa keska Diosun kupixanikiaki, na janchadan 
\p  
\v 1 Januxun ja 7 nai tsumabu betsan 7 kenchaki Dios sinatamis mata tsuma juxun ea yuikin: “Nedi juwe, ainbu jininipa jenewan nemaki tsaua en kupiai en mia uinmaidan.  
\v 2 Mai jidabi anu xanen ibubu jawen kemui jabe chutanamei keskai ma jabe beyabuki. Jaska inun, yudabudi mai jidabi anuabudi Dios kayabi ikunwanma jamen yushin betsa betsapa ikunwain jawen kemui chutai keskai jabun kemu paewen paean keskabuki. Uinwen”, iwanan, 
\p  
\v 3 janua ja nai tsuma ja en yushinki nukuxun nama keskawen ea uinmaitun janu tsua jiweabuma anu ea iyua jadixun uinkin ainbu betsa yuinaka mese atimapajaida tashipaki katsaumea en uinxuki. Ja yuinakadan, 7 buxkaya inun 10 maxunyan inun Dioski xechakati kena jaki yabukuaki.  
\v 4 Ja inun, ja ainbudan, tadi tashipa uxna duakabi inun tashipajaida sawea inun, jawen jawenduai daukin oro mane inun, nenkati mane jawendua kadujaida sawea inun, chudi mane perla juxupa kadujaidadi saweatun jamapai pepa danain jawen atimapamis kenchaki tsuma jaya  
\v 5 inun, jawen betunkuki jawen junea kena kenea: “Babilonia maewan mesejaida ea en jatun ibu jininipaki. Ea anu ainbu jininipa dasibi inun jamapai shadabu mai jidabi anuxun pepa danankin chakabuwamisbu jiweabuki”, ika netanki.  
\v 6 Jaska inun, Jesús chibankin jawen jancha yusinmisbu midimabu ja ainbu jininipa itsa maewan Babilonia anuabun jatu tenanxun jabun jimi akai keska paean jaskai uinkin shinain e iki teku itan en pes niken  
\v 7 nai tsuman ea yuikin: “¿Jaskai e iki min jawen dateai? Ja ainbu inun ja yuinaka atimapa mese 7 buxkaya inun 10 maxunyan ainbu jaki tsaua ja dabekidi junea xabakabi mia yuinun ninkawe.  
\v 8 Yuinaka mese atimapajaida min uinxudan, bebunkidi jiwebiani natian ana jiwea jayamabia jaskabia ana jawen jenei Dios kupimakin keyumayui kini keyatapa xankinjaida anua mapekei taxnia Diosun yamawaxanikiki. Jaskakidanai mai damiwaitian tsuabuda Diosbe jiwekuinxanaibu unaki Diosun jabun kena netanma ini yuinaka mese atimapajaida mawabiani ana un unuatian jiwea mapekea jabun uinkin yui: ‘Jabaa! ¿Jawamen?’ ixankanikiki. 
\p  
\v 9 Ja yuinaka mese atimapajaidakidi unanepa bestibun shinankin unantidubuki. Jawen 7 buxka unantidan, 7 mati Roma anuki, jaki ainbu tsaua unantidan. Ja dikabi jawen 7 buxkadan, 7 xanen ibu jawen unantidiki.  
\v 10 Ja inun, 5 xanen ibu ma mawanibuki. Jakia betsa natian xanen ibuikiki. Ja inun, betsa xanen ibunun ika judiamaki. Janua ja jawen jenea xanen ibui juadan, jatixuinda badi ichapa xanen ibuama ixanikiki.  
\v 11 Ja inun, ja yuinaka mese atimapajaida ja xanen ibu 7 betsa ibiani ja dukun jiwebiani natian ana jayamabia ana jiwea ja octavo xanen ibu ixanikiki. Jakia atimas ja yuinaka mese atimapajaida jawen jenekin Diosun kupikin yamawaxanikiki, niti akamadan. 
\p  
\v 12 Ja inun, ja 10 maxun min uinxudan, 10 xanen ibubu betsaki. Jabu xanen ibui taediabumabiaken yuinaka mese atimapa xanen ibukin jawen kushipa jatu yunutan uxa eskadabes ja 10 jabe xanen ibumaxanikiki.  
\v 13 Ja inun, ja 10 xanen ibunan, jabe xanen ibukin yuinaka mese atimapan jabias jawen shinan axunkin medabewakin jawen yunuti chibankin  
\v 14 chaxuwan bakebe detenamexankanikiki. Jakia chaxuwan bake Jesucristo dasibi xanen ibubu inun dasibi yununikabu binukin keyumiswen taexun jabu Diosun katuxun jatu kenani chintuainsbumabetan ja 10 xanen ibubu maemaxankanikiki, nukun Xanen Ibu Jesucristobetanan”, ea watan 
\p  
\v 15 ja dikabi nai tsuman ana betsa ea yuikin: “Ja jenewan namaki ainbu jininipa tsaua min uinxudan, ja mae tibi anu jiwebaunabu inun, yuda tibibu inun, jancha betsa betsapa yuiaibu inun, mai pakea ichapaki.  
\v 16 Ja inun, ja 10 maxun xanen ibubu inun ja yuinaka mese atimapajaidatun ja ainbu jininipa ichakawakin jawen kushipa danankin jamapai jawendua jaya yamawakin ana jawen nuiama jenekin nuitapawakin jawen nami pikin keyutan jawen xau kuaxankanikiki.  
\v 17 Ja inun, ja 10 xanen ibubunan, ja yuinaka mese medabewakin jabun kushipa inankin jabun jawen yunua chibankatsis ikin jaska Diosun jatu jaska wamakatsis ikai jatun juinti medan jatu shinanmaya jaska yubakani menemakin Diosun jatu amakubainxanikiki.  
\v 18 Ja inun, ja ainbu jininipa min uinxudan, ja maewanki, xanen ibu kushipa tibi yunumisdan”, ea waxuki. 
\c 18  
\s1 Diosun Babilonia maewan yamawaxanai uinikiaki, na janchadan 
\p  
\v 1 Ea jaska watanaya nai tsuma betsa nai anua butukidankin kushipajaida jaya jawen chaxawen mai chaxawakin  
\v 2 jancha kushipawen sai ikin yuikin: 
\q1 “Babilonia maewan ken ewa ana jawama 
\q1 jawen kushipa ma bextekeaki. 
\q1 Janu Satanásan tsumabu inun, 
\q1 jatun yushin chakabubu inun, 
\q1 peiyabun pisi pimisbu inun, 
\q1 yuinaka atimapa piama nun dananmis ma jabu jawen jiwekanikiki. 
\q1  
\v 3 Ja inun, mai pakea tibi anua bea 
\q1 jawen jamapai tibi kemu pae jawenduawen kemui 
\q1 jabe chutanamei keskaibu inun, 
\q1 xanen ibu kushipa betsa betsapa tibidi chai jiwea 
\q1 midimabun Babiloniabe atiai keskai jabe yubakamisbuki. 
\q1 Ja inun, ja mabu inanananmisbu mai jidabi anuadi bea 
\q1 janua mabuwanyain jabun mabu inankin pei midima bimisbuki”, 
\m ikaya 
\p  
\v 4 janua jui betsa nai anua taxnikin yuikin: 
\q1 “Enabuun, ja maewan anua taxnidibainkanwen, 
\q1 jau jabun chakabu akaibube man jusiama inun 
\q1 jau Diosun atimapawen jatu kupikin 
\q1 matu dikabis jau matu kupiyamaxanunan”, iwanan, 
\q1  
\v 5 “Jabun chakabudan, jamapai ichawakin maspuwakubainkin nai anu mati aka keska waibu 
\q1 juneama ma xabakabi Diosun jatun chakabu betsa betsapa uinkiki. 
\q1  
\v 6-7 Jaskawen taexun Babilonia ainbu keskakin 
\q1 ibubis daui jamapai mabu pepa shadabu bi kenkin yuikin: 
\q1 ‘Tsuabuda ebe detenamekin ea maematidumaki. 
\q1 Ja inun, jawawenda dabanan en kaxama ixanaii. 
\q1 Jakia dasibi pepa shadabu jaya xanen ibu ainbu keska en jiweaki’, 
\q1 imiswen taexun jawen chakabuwen inun jatu chakabuwamiswen taexun 
\q1 dabeki kupikin ja maewan ainbu keska jabias keska wakin 
\q1 kupichakayamakanwen, nuitapawakinan. 
\q1 Babilonia maewan anuabun yuda betsabu kemumakin kenwanmamiswen taexun 
\q1 ichakawakin jabiaskadi wakin jatu nuitapawa chakayamadiakanwen, 
\q1 jau ana betsa betsapa bikajaida tenenunbunan. 
\q1 ‘Jakia dasibi pepa shadabu jaya xanen ibu ainbu keska en jiweaki’, 
\q1 imiswen taexun jawen chakabuwen inun jatu chakabuwamiswen taexun 
\q1 dabeki kupikin ja maewan ainbu keska jabias keska wakin 
\q1 kupichakayamakanwen, nuitapawakinan. 
\q1  
\v 8 Jabun chakabuwakubainmisbuwen taexun 
\q1 nukun Xanen Ibu Dios kushipajaidatun ja maewan ainbu jininipa keska kupikin 
\q1 jabias xabatian yuda ichapa tenankin 
\q1 betsabu bika tenemakin inun 
\q1 buni tenemakin maewan kuaxanikiki. Manayukanwen”, iwanan, 
\p  
\v 9 ana nai tsumapan ea yuikin: “Maewan kuaya chi kuin nuyabainai xanen ibu betsa betsapabu jawen jamapaiwen kemui jabe chutanamei itsai kemui jabe jawen jawenduamisbu chakabu jatubetan akubainmisbun uin jawen nui sain iki kaxachakayamakin  
\v 10 ja keska tenekatsis ikama datei chai mapubaunxun yuikin: 
\q1 ‘Yuu, yuu. Babilonia min maewan ewapa kushipabiaken 
\q1 jawaida Diosun kupikin mia yamawaxuki.’ 
\p  
\v 11-13 Oro mane inun, plata mane inun, nenkati jawendua kadujaida inun, chudi mane juxupa bemisbu ana tsuan biama ixankanikiki. Ja inun, tima tadi pepajaida inun, chaxa tadi betsa uxna duakabi betsa tashipa bemisbu inun, ji ininipa mabu inun, elefante makuxpi itsa jawen mabu inun, ji pepa mabu kadu betsa betsapa bemisbu inun, bronce mane inun, hierro mane inun, epa juxupa pejaida mabu bemisbu ana tsuan biama ixankanikiki. Ja inun, betsabun canela jawen piti nis pejaidawati inun, piti nis wati betsa betsapa inun, ininti betsa betsapa bemisbu inun, uva vino inun, piti xeni pepa inun, xekiwan dudu pepa bemisbu ana tsuan biama ixankanikiki. Ja inun, ina awa inun, chaxuwan inun, caballo inun, jawen tadanbainti inun, yuda betsa jau tsuanda tsuma wanun bibidan jatu inanmisbu ana tsuan biama ixankanikiki. Jaskaken inanananmisbu mai jidabi anu Babilonia maewanwen taea kaxachakayamai jawen taea sain ixankanikiki, ana janixun jatun mabu jadi buxun inantimawen taeadan, akin yuixankanikiki”, iwanan, 
\p  
\v 14 jabun maewan ana yuikin: 
\q1 “Babilonia anuabuun, jamapai bimi shadabu man jawen kemujaidamis inun 
\q1 man bechipaimis man ana jayamaki. 
\q1 Dasibi jawen mabu jawendua tibi inun 
\q1 mabu kadu tibi ma benui keyuaki.” 
\b  
\p  
\v 15 Janua jamapai pepa shadabu inananankin pei ichapa bikubainshinabu ja maewan anuma nanta mapua ana inananantidubuma uin inun jatu kupiaiwen taea jatuwen datei nui kaxai sain ikin  
\v 16 yuikin: 
\q1 “Aitaa. Aitiin. Maewan kushipa ja ainbu jawendua keska 
\q1 janu jiweabun tima tadi pepajaida sawekin 
\q1 tadi uxna duakabi inun tashipa sawekin 
\q1 jawen daui oro mane inun, chudi mane juxupa inun, 
\q1 nenkati pepa mane kadujaida sawebiabu 
\q1  
\v 17 ¿jatun mabuwan jawaida jaskaxumen?” 
\m ikaibun 
\p jabun xaxuwan yunumisbu inun, jabun xaxuwan tuenbainkin buxken buxken abainmisbu inun, xaxuwanwen bumisbu inun, ianenwan anu dayamisbu nanta mapubaunxun  
\v 18 maewan kuaya chi kuin nuyabainai uin sai sai ikin yuikin: “Aitaa. Aitiin. Maewan betsa ana jaska keska jayanakamaki”, iwanan,  
\v 19 jatun beya chibain mai mishpu kudu maputukui kaxai sain ikin bis ikin yuikin: 
\q1 “Aitaa. Aitiin. Dasibi xaxuwanyanbu Babilonia anu kaxun 
\q1 jatun mabu pepa jawendua inananantan 
\q1 pei midima bibidan bibidanaibu ja maewan ma jawaida yamaxuki”, akin yuixankanikiki, ea waya 
\m  
\v 20 jaskaya jui betsa kain chanii: 
\q1 “Nai anuabu inun, man Diosunabu medibibu inun, 
\q1 man jawen jancha yuixunikabu inun, 
\q1 man Jesúsun kushipayabudan, 
\q1 Diosun na maewan chakabujaida kupikin 
\q1 matuwen dabanan xunska sinatakin axanaiwen taea matudan, 
\q1 benimai shinan chankankubainxankanwen”, ikai ninkatan en matu kenexunaii. 
\p  
\v 21 Januxun nai tsuma betsa kushipajaidatun jawen deneti mishkipawan binibainkin ianenwan anu udenkin pukuxun yuikin: 
\q1 “Na mishkipawan ianenwanu en pukuxu keska 
\q1 ja maewan Babilonia tsuan ana uintiduma ipakexanikiki. 
\q1  
\v 22 Ana benimakin arpa mimawati mawaibu inun, 
\q1 tepe dewe shadabu mawaibu inun, 
\q1 trompeta mimawati mawaibu inun, 
\q1 mimawati betsa betsapa mawaibu matun maewan anuxun 
\q1 ana jawa mimawabuma ixankanikiki. 
\q1 Ja inun, jamapai mabu betsa betsapa wamisbu 
\q1 matun maewan anu ana jaska tibi daya jayama idiaxankanikiki. 
\q1 Ja inun, piti pepawai mishki denetiwen dayaibu 
\q1 jawen jui denke ikai tsuan ana ninkabuma idiaxankanikiki. 
\q1  
\v 23 Ja inun, junin ainbu ainwankin 
\q1 jawen jaibuaibu beyusmaya benimai chikishtapamisbu 
\q1 tsuan ana ninkama idiaxankanikiki. 
\q1 Ja inun, matun mabu inanananika kushipabun 
\q1 mai jidabi anu jatu paxkaxunmis inun 
\q1 jabianuxundi mai pakea tibi anua beaibu 
\q1 mukayakin jatu padanmisbuwen taea 
\q1 matun maewan anu tsua ana jayamaken 
\q1 ana tsuan bin chaxawakin dekuabuma idiaxankanikiki”, 
\m jatu jaska waxanai uinmakin ana ea yuikin: 
\p  
\v 24 “Ja mae Babilonia anuxun Diosun jancha yuixunikabu inun ikunwainbu betsabun Jesús chibainbu inun yuda betsabu jatu tenankin jabun jimi jaba wamisbuwen taexun na maewan jaki sinatakin Diosun kupikin yamawaxanikiki”, ea wa 
\c 19  
\p  
\v 1 januxun en ninkaya nai anua tsuada midimabun yuikin: 
\q1 “Aleluya! Nukun mekenika Dios nun kenwaiin. 
\q1 Duapa kushipajaidatun nun jawenabu nuku mekepakexanikiki. 
\q1  
\v 2 Ja inun, yuda dasibibu unanxun kaneama kupimiswen taexun 
\q1 maewan ainbu jininipa keskatun yudabu dasibi chakabuwamakubainai ma kupikiki. 
\q1 Ja inun, ainbu jininipa keskatun Diosun tsumabu tenankubainmiswen taexun 
\q1 Diosun jawen maewan jaki sinata paepakin yamawaikiki”, itan 
\q1  
\v 3 januxun jabun ana yuikin: 
\q1 “Aleluya! Dios pepajaidaki. 
\q1 Ja maewan kuin inai juxu puepakexanikiki”, 
\m ikaibun 
\p  
\v 4 jaskaibun ja 24 mekenikabu inun ja jiweabu dabe inun dabetun Dios jaki tsautiki tsaua naman danti iki maiki beti ixun kenwankin yuikin: “Jau jaskanunwen. Aleluya! Chanima Epa Dios pepajaidaki”, ikaibun  
\v 5 en ninkaya ja Dios tsaua namanua jui betsa taxnidiakin yuikin: 
\q1 “Man Diosun tsumabuun, mai jidabi anua betsabu 
\q1 man xanen ibubu inun betsabu man xanen ibubuman 
\q1 Diosun kushipaki mesekin duawai pepakin kenwankubainkanwen”, 
\m ikaibu uinkin ninkatan en matu kenexunaii. 
\s1 Diosun chaxuwan bakebetan ikunwainbun jabetan pixankanikiaki, na janchadan 
\p  
\v 6 Januxun en ninkaya yuda midimabu janchai jene didi ikai keskawen inun tin ikainkainai keskawen yuikin: 
\q1 “Aleluya! Nukun Epa Dios kushipajaida dasibi binu keyua 
\q1 ja bestitun nuku dasibi mekei ma xanen ibui taeikiki. 
\q1 Pejaidaki. Kenwanankanwen. 
\q1  
\v 7 Ainbu jawen bene juaibe jiwenun, iwanan, 
\q1 jawen jamapai pewakin akawai 
\q1 Jesúsunabu jabe jiwekatsis ikanikiki. 
\q1 Ja jaskadan, Jesucristo chaxuwan baken 
\q1 jawenabu niti akama jabe jiwemaxanikiki. 
\q1 Jaskaken benimai shinan chankain tse ikin 
\q1 Dios kenwanankanwen. 
\q1  
\v 8 Tima tadi juxupa chaxakapa pejaida 
\q1 ja Diosunabu medibi jabun jatun shinanwen kaneama chiban pewamisbun jau sawenunbun, iwanan, 
\q1 jatun jiwea medibi unanmati ja tadi ma jatu inan saweabuki”, 
\m ikaibu en ninkaxuki. 
\p  
\v 9 Januxun nai tsuman ana ea yuikin: “Diosun jancha kayabi en mia yuiai ninkatan kenediwe, eskadan. Chaxuwan bake keskatun jawenabu nai anu jabe jiwemanun, iwanan, jatu ichawaxun jabetan pidan, benimachakayamaxankanikiki”, ea jaska yuiaya 
\p  
\v 10 kenwanun ika jawen tae naman en danti itanaya ea nemakin yuikin: “Eki jaskayamawe. Mia inun Diosunabu betsabun Jesucristo chibankin jawen jancha yusinmisbu keska eandi Diosun jancha bunika en jawen tsumadiki. Jaskaken ea kenwanma Dios besti kenwanwen”, ea waxuki. 
\p Jaskadan, tsuabuda Jesúskidi kakape Yushin Pepatun xabakabi jatu shinanmaya jabu yusinanbu jakidi chanikin banabimabaunmisbuki. 
\s1 Caballo juxupaki katsauntan chakabubu kupi kanikiaki, na janchadan 
\p  
\v 11 Janua nai bepeanyan xanen ibu jawen kena Chanima Jancha Kaneisma caballo juxupaki katsaua en uinxu matu yuinun ninkakanwen. Xanen Ibu pepatun yudabu unanti wai jatube detenamenun inun ikaidan,  
\v 12 jawen bedu chaxadan, chi jede keskaki. Ja inun, xanen ibu kushipajaidaiwen taea Xanen Ibun maiti ichapa maia jayaki. Ja inun, jawen junea kena ja bestitun unain ja kena jaska jaki neaki.  
\v 13 Ja inun, jawen tadi saweadan, jimiki pukua saweaki. Ja inun, jawen kena betsadan, Diosun Jancha Kayabiki.  
\v 14 Ja inun, jawen soldadobu nai anua tima tadi juxupa pejaida jawa detsisma saweadi caballo juxupabuki katsaumea jachun kainbainkin jatun Xanen Ibu chibanbainkanikiki.  
\v 15 Ja Xanen Ibu kaidan, xanen ibu yununika mane kushatia inun jawen jaxpa anu nupe chaipa kenujaida kaian tukunwan jawen jabun Dios ninkaisbuma mai jidabi anuabube jatube detenamei kaidan, jaskawen taea ja Xanen Ibu kayabistun jamebi ja jatuki Dios sinatai jatu uinmakin jaska uva vino tsinikin pema pema amisbu keska wakin Dios kushipa binu keyuatun jawen puben pae jatu memai kaikiki.  
\v 16 Ja inun, jawen kena mestenepa Dasibi Xanen Ibubu Inun Dasibi Yununikabu Binukin keyuaki, ika jawen tadi chaipaki inun jawen kishi kateki ja dabeki jawen kena neaki. 
\s1 Jesúski jabu jaki sinataibu jatu maemanikiaki, na janchadan 
\p  
\v 17 Januxun en uianyan nai tsuma betsa badi medan nixun dasibi jabu peiyabun pisi pimisbu nai natukanu nuyabaunmisbu jatu kenakin jui kushipawen yuikin: “Nenu bei nedi ichai bekanwen, jau Diosun matu pimanunan.  
\v 18 Jabube Xanen Ibu detenamekin maema jabun namidan, xanen ibubun nami inun, soldadobu jabu xanen ibubun nami inun, jamapai juni kushipabun nami inun, caballo nami inun, dasibi caballoki katsaunabun nami inun, junibun tsumabun nami inun, tsuan tsumabuman nami inun, jamapai yuda betsa betsapabun Dios ninkaisbuma Jesúsun jatu maema jabun nami pikanxunan”, ikai en ninkaxuki. 
\p  
\v 19 Januxun ana en uianyan yuinaka mese atimapajaida inun, xanen ibubu mai jidabi anua inun, jatun soldadobu icha ja caballo juxupaki katsaua jawen soladobuya jatube detenamenun ika icha maniabun  
\v 20 ja padan jancha yuixunikatun yuinaka mesen besuudi atimaska betsa betsapa tsuan atiduma wakin jabu yuinaka mese atimapajaidatun kena jabu jen iyamama inun jawen dami kenwanmisbu jatu padanmiswen taexun padan jancha yuixunika Xanen Ibu binuatun tsumabun achikin yuinaka mese atimapajaida jabe achitan ninkaibu janu ian azufre pashinipa menui jede ji ji ikai anu ja dabe jatu putabu  
\v 21 caballoki katsaunxun jawen nupe chaipa jawen jaxpanu tukuanwen dasibi yuda betsabu Jesúsun jatu detekin keyuken peiyabun dasibibu jabun nami pi xuku dakakin yani waibu en uinxuki. 
\c 20  
\s1 1,000 año Jesucristo xanen ibuxanikiaki, na janchadan 
\p  
\v 1 Januxun en ana uianyan nai tsuma betsa nai anua butukidankin ja kini keyatapa xankinjaida jawen bepenti shabi inun mane dispi chiwetameya ewapa tsuma en uinxu matu yuinun ninkakanwen.  
\v 2 Ja nai tsuma jukidanan, yushibu xeanan ja dukun dunutan padananain taeni jawen kena dabe Diablo inun Satanásdan, achixun mane dispiwen nexatan 1,000 año  
\v 3 kini keyatapajaida anu udenxun jawen beputiwen bepukin mestenjaidawatan jawen unantiwen beputiki tsaminkin unanti watan 1,000 año bichitan janu mekekubainxanikiki, jau ana mai jidabi maniabu jatu padanyamanunan. Jakia ja 1,000 año keyukainaya jau ana jatu jaskadawanun jawa wama kainmatan ana jatixuinda badi Satanás yunuama ixanikiki. 
\p  
\v 4 Januxun jabun jatu unanti waxanai jaki tsauxun unanti wati jabun jatun kushipa biaibu en uinxuki. Ja dikabi Diosun yusian chibankin chintuanma Jesúskidi yusinkubainaibu jabun buxka texteabu jatun yushin en uinxuki. Jabu ikidan, ja yuinaka mese atimapajaida inun, jawen dami kenwanbuma inun, yuinaka mese atimapajaidatun enabu unanti jabun betunkuki inun jatun meken pechiki jatun kene netanmakin amama ikubainimabuki. Jaskawen taea ana bestein benibaun 1,000 año Cristobe xanen ibuxankanikiki. Jaskaibu en uinxuki,  
\v 5 jabu dukun mawakubidanpaunibu bestein taeidan. Janua 1,000 año keyui maekainaya ja mawanibu betsabudi bestendiaxankanikiki.  
\v 6 Ja inun, Diosun jawenabu wakin medibi wanixun jabu dukun bestenwanan, benimajaidaxankanikiki. Jabudan, ana jawa jatun kushipa mawa dabeki jayamajaida ixankanikiki. Jaskawen taea Dios inun Cristo dayaxuni janchaxuni besti jabe xanen ibui 1,000 año jabe xanen ibuxankanikiki. 
\p  
\v 7 Januxun ja 1,000 año binukainaya mai kini keyatapajaida anua jawen nai tsuma Satanás Diosun mistumanixun kainma  
\v 8 taxnitan nawabu dasibi mai jidabi anu jiwebaunabu anua tibi jatu padankin ja mae Gog inun Magog anua jawenabu soldadobu ichapawakin ianenwan kexanua mashiti wakin jabube detenameti ichawaxanikiki. 
\p  
\v 9 Mai jidabi anua bui Diosunabu jatu manakai ichabu inun ja maewan Diosun bechipaijaidai ja dabe kexei beabu anu Diosun nai anua chi jede jatu anu puta jatu kuakin yamawatan  
\v 10 janu ja ian janu azufre pashinipa menui jede ji ji ikai anu yuinaka mese atimapajaida inun padan jancha yuixunika nai tsumabun udenibu anu Satanásdi udean jadia badidi inun meshu medan niti akama Diosun jatu isin tenemachakayamaxanikiki, jawa juindukunti jayama niti ikama akibi akinan. 
\s1 Jawen jenekin mawanibu nukun Xanen Ibun jatu unanti waxanikiaki, na janchadan 
\p  
\v 11 Januxun Xanen Ibu jaki tsauti juxupa jawenduajaida nukun Xanen Ibu jaki tsaua en uinxuki. Tsauken badi inun, uxe inun, bishi inun, mai keyu tsekebaini nishmai yamakainaya  
\v 12 janua dasibi xanen ibubu inun xanen ibubuma mawani ana bestentan Xanen Ibun besuudi mapuabun jawada betsa betsapa akubainibu Diosun jaki kenemis una ichapa bepentan janua una betsa tsuabunda Dios chibankin Jesús ikunwain niti ikama Diosbe jiwekuinxanaibu jabun kena Diosun jaki kenediakubainmis una betsa jawen jiwemati kene bependiaxun ja jabu jiwexun jaska wamisbu jatukidi ja unaki kenekubainmisxun dasibi mawanibu ana bestean mapuabu jabis jatu yuikin jatu unanti wakeakeaya  
\v 13 ianenwan batapa anua mawanibu inun janu mawabu bumisbu anua mawanibu jabu Diosun bestenwantan ichawaxun jaskadada jiwekubainibu jabu tibi unanti wakin pepabu inun chakabubu jatu kupiaya  
\v 14 jatun jatu mawamanika inun janu mawabu bumisbu anu ja ian janu menui jede ji ji ikai anu jau dabeki mawakin menununbun jatu udean  
\v 15 tsuabunda Dios chibankin Jesús ikunwanbuma jabun kena Diosun jaki kenemis una anu jabun kena jayama ja ian janu menui jede ji ji ikai anu ma jatu puta keyuabuki. 
\c 21  
\s1 Jerusalén bena Juanen uinikiaki, na janchadan 
\p  
\v 1 Ja jaskaibutian jabu dukun badi inun, uxe inun, bishi inun, mai damiwani bepemanai xabakainaya ianenwan batapadi jayamaya jabiatiandi ana uinkin nai bena inun mai bena taxnidiai en uindiashinaki. 
\p  
\v 2 Januxun ana betsa taxnikidanai uinkin ainbun juni benewanun, iwanan, jawen beneki nukui kanun ika jawenduai keskamis Jerusalén maewan bena ma dasibi iduya pepaya Diosun nai anua buteaya  
\v 3 xanen ibu jaki tsauti anuxun jui kushipawen yuiai en ninkaya: “Uian. Na maedan, jaki, ja medan yudabube Dios jiwepakexanaidan. Jawen jatube jiweidan, jawenabubes ixanikiki. Dios ja besti jabun mekenika ixanikiki.  
\v 4 Jaskawen taea jabu kaxamisbu jatun beun taxka watan ana mawa jayama inun, ana sain ikama inun, kaxa jayama inun, isin jayama dasibi jaska Diosun jawen bika jiweti wani bextekin ana ja jayama waki”, ikaya 
\p  
\v 5 janua xanen ibu jaki tsauti anuxun nukun Xanen Ibun ea yuikin: “Chanima jancha shinan kaya en mia yuiai kenediwe, eskadan. Uian. Eanan, dasibi en bena wakin keyuaii”, itan 
\p  
\v 6 ana ea yuikin: “Dasibi jaskaxanai en yuinidan, ma en akin keyuaki. Ea dukun en ini inun niti ikama en jiwepakexanaii. Tsuabunda unpax akatsis ikin manuaibu keska ea anu beaibu en jatu jiwea inanxanaii, jawa jatu pakamamadan.  
\v 7 Ja inun, tsuabunda ea dananma jabun maemakin binumisbudan, ea en jatun mekenika Dios ikaya jabu en bakebu na mae bena anu jawa benuama ebe jiwei ikibi ipakexankanikiki.  
\v 8 Jakia jameen ekidi janchabiai eki dakemis inun, eki pechia jawa shinainsbuma inun, yuda betsabe dananananmisbu inun, yuda betsa tenanmisbu inun, chutanamebaunmisbu inun, mukayakin Satanásan kushipa yukamisbu inun, yushin dami betsa kenwanmisbu inun, chani chakabaunmisbu jabu dasibi en kupia janu buidan, ja ian janu azufre menui jede ji ji ikai anu ja dabeki mawa mexankanikiki”, ea wa en matu kenexunaii. 
\p  
\v 9 Januxun 7 nai tsumabun ja 7 Diosun yudabu jawen jenea kupiti mese kencha betsa mata tsuma eki nukuxun ea yuikin: “Chaxuwan baken ainyanxanai yusinkin mia kayatiwamanun nedixun uinyuwe”, iwanan,  
\v 10 ja nai tsuma en yushinki nukuxun nama keskawen mati keyatapa anu en yushin ea iyuxun Jerusalén maewan pepajaida medibi Diosun nai anua buteai ea uinmashina matu yuinun ninkakanwen.  
\v 11 Jawen maewan chaxadan, Diosun xabawaki. Nenkati betsa diamante kadujaida bexnan bishtu keska bakamanai chaxamai en uinxuki.  
\v 12 Jawen kene keyatapa kushipawen dakenbauna inun, jawen jikiti xui beputiya 12 jayaki. Ja inun, ja jikiti xui tibi anu nai tsuma betsan kexea inun jikiti xui mamaki tibi Israelin 12 bababu xukua tibitun jabun jatun kena betsa tibi kene jayaki.  
\v 13 Ja inun, badi juaikidi esteudi jikiti xui dabe inun besti jaya inun, norteudi jabiatidi jaya inun, surkidi jabiatidi jaya inun badi jikiaikidi oesteudi jabiatidi jayadiki.  
\v 14 Ja inun, jawen kene keyatapa jawen kushipa wati 12 mishkipawan jawen mestenwankin tsamabauna keneyaki. Ja inun, chaxuwan baken 12 tsuma kushipayabun kena tibi mishkipawan tibiki nea jayaki, jatun kenadan. 
\p  
\v 15 Janua ja nai tsuman ea jancha waitun maewan inun jawen jikiti xui inun jawen kene kauana tananun, iwanan, jawen tanati tawa keska oro tsumaxun  
\v 16 jawen tanaxuki. Maewan jawen chaipa inun jawen jaxpa inun jawen keyatapa jawa binuama jabiatixunbus 2,200 kilómetro iakea jayaki.  
\v 17 Januxun kene jawen jaxpadi tanaxuki. Junibun tanamis keska wakin nai tsuman ja tanatiwen kene jawen kextu 64 metro tanaxuki. 
\p  
\v 18 Jawen kenekidi matu yuinun ninkakanwen. Ja dukun mae jidabi oro keska dasibi tashipa chaxajaidaki. Ja inun, jawen kenedan, jaspe nenkati nanketapa bexnan kadujaida kenekauana jayaki.  
\v 19 Ja inun, mishkipawan jabuki kene tsamabaunabu nenkati kadujaida tibiwen dauyaki. Mishkipawan ja dukun diamante nenkati bexnanjaida jayaki. Ja segundo zafiro nenkati nanketapa jayaki. Mishkipawan ja tercero ágata nenkati nanketapa kudupa jusia shiwaya jayaki. Ja cuarto esmeralda nenkati nanke kudupa jayaki.  
\v 20 Ja quinto ónice nenkati juxupa inun tashipa bexmas jusia shiwaya jayaki. Ja sexto rubí nenkati tashi bexmas jayaki. Ja séptimo crisólito nenkati pashinipa kudupa jayaki. Mishkipawan ja octavo berilo nenkati ankunepa jayaki. Ja noveno topacio nenkati pashinipa jayaki. Ja décimo crisoprasa nenkati ankunepa bexmas jayaki. Ja undécimo jacinto nenkati nanke bexmas jayaki. Ja 12 mishkipawan jawen jenea ja duodécimo amatista nenkati minanepa jayaki.  
\v 21 Ja inun, ja 12 beputi tibidan, perla chudi mane ewapajaidabuki. Ja inun, maewan jawen niti bai kayadan, bexnanjaida oro jas bixtu keska bakamanaikiki. 
\p  
\v 22 Ja inun, Diosun maewan bena jidabi anuxun Epa Dios Xanen Ibu binu keyua inun jawen bake chaxuwan jabu kenwankubainmisbuwen taea jawen kenwanti jiwe jayama en uianma ixuki.  
\v 23 Ja inun, ja maewan anudan, Epa Dios jawen kushipawen chaxajaidamis inun chaxuwan bake bin keskai chaxai ji imisken ana badi inun uxe jawen chaxa ana jabu jayamaki.  
\v 24 Jaska inun, nawabu dasibi ja maewan anu mapuidan, bin chaxa keskawen mapuxankanikiki. Ja inun, xanen ibu Diosunabu mai jidabi anuabun jatun mabu pepa Dios inanxankanikiki.  
\v 25 Ja inun, jawen beputidan, xaba ikibi ikawen taea bepenmanaibi bepenmanaki, jawa ana yame jayamawen taeadan.  
\v 26 Ja inun, beputi xui anu jikikin nawa betsa betsapa shadabun Dios kenwankin dasibi jawen jawendua jayabu inanun ika jikixankanikiki.  
\v 27 Jaskabiaken tsuabuda atimapamisbu inun, jawada Diosun dananmis amisbu inun, jabu chani chakamisbu jabu jadi jikitaskama ixankanikiki. Jakia jamen jabu jikidan, tsuabunda kena chaxuwan baken jiwe kuian una medan Diosun netani jabu besti Diosun mae bena anu jikixankanikiki. 
\c 22  
\p  
\v 1 Januxun xanen ibu jaki tsauti Dios inun chaxuwan bake jaki tsauabu anua jene jiwekuian jaya kauana bexnan pejaida bixtu keska nai tsuman ea uinmaxuki.  
\v 2 Jaska ja bai kaya namakis jene kexa uke dabebi jawen jiwemati ji mapubaina en uinxuki. Jawen bimi betsa betsapa uxe tibi betsa maei bimimisbuki, jau Diosunabun pipakexanunbunan. Ja inun, jabia ji peiwen yudabun jamapai betsa betsapa tenekubainaibu jawen peiwen xuxatidubuki.  
\v 3 Ja inun, Diosun mae anu jawa yupukunanti jayamaki. Ja inun, xanen ibu jaki tsauti anua Dios inun jawen bake chaxuwan bake tsauabun ja mae medanxun Diosunabun jabun jatu kenwankubainxankanikiki.  
\v 4 Jadia Diosbe beisinan dabexankanikiki, Diosun kena jatun betunkuki nea jayadan.  
\v 5 Jadi jiweabu anu ana yame jayama inun janu jiwexun nukun Xanen Ibu Dios jatu jiwemakin jatu xabawaxunken jabu jabe xanen ibui jeneama ipapakexankanikiki. Jaskawen taea ana badin chaxa inun binman chaxa jayama ixankanikiki. 
\s1 Jesús ana juxanai ma kemaikiaki, na janchadan 
\p  
\v 6 Januxun nai tsuman ea ana yuikin: “Chanima jancha en mia yuiai ninkawe. Nukun Xanen Ibu Diosun jawen jancha yuixunikabu jawen jancha jatu yunumistun jaskadada samama ixanai jau jawen tsumabun yusinxanun, iwanan, en jawen nai tsuma jawen jancha eadi yunuxuki, en mia tapinmanunan. Diosun chanima jancha tibi yubakatan axanai en mia uinmaxu en mia yuiai ninkatan ikunwandiwe”, ea waya 
\p  
\v 7 Jesúsundi ea yuikin: “Uian. En samama ana kaxanaii. Jaskaken na jancha jaskadada inunbadiaikidi chaniai kenekin min una waidan, tsuabunda ikunwankin chibanxanaibudan, Diosun jatu benimawaxanikiki. Manayuwe”, ea waxuki. 
\p  
\v 8 En Juanen dasibi na jancha ninkakin na betsa betsapa uinkin keyui benimai juinti shinan chankain nai tsuman ea uinmakubainxu kenwanun ika jawen tae naman en danti ikaya  
\v 9 ea nemakin yuikin: “Jaskayamawe. Mia keska eadi en Diosun tsumaki. Min betsabu Diosun jancha yuixunikabu betsa inun dasibibun na jancha kenekin min una wai jabun chibanxanaibu keska eadi en jatu keskaki. Dios besti kenwanwen”, ea watan 
\p  
\v 10 nai tsuman ana ea yuikin: “Dasibi en mia uinmaxu jaska inunbadikiki. Jaskawen taexun na Diosun jancha juneama na min una wai ma badi keyui kemai jawen unanxankanikiki. Ana juneama xabakabi jaska tibi kainkunkaini menekunkainxanikiki.  
\v 11 Jaska inun, tsuada chakabui jiweadan, jatu bexteyamawe, jau jabiaska chakabu chibain jiwenunbunan. Ja inun, tsuada atimapa jiweadan, jau jawen atimapa chibain jiwepakenunbunwen. Ja inun, tsuada pepai jiwekatsis ikidan, jau pepa besti wakubainunbunwen. Ja inun, tsuada medibi Diosunabuidan, jaska Diosun bechipaiai keska jau ikubainunbunwen”, ea waya 
\p  
\v 12 Jesúsun ana ea yuikin: “Uian. En samama ana kaxanaii. Kakinan, jatun manakuti tibi en jatu buxunxanaii, jaska tibi jiwemisbu keska jatu inain kaidan.  
\v 13 Ea dukun en taxnini inun en jawen jenea debesekeaki. Ja inun, eadan, ea dukun en ini niti ikama en jawen jeneaki. Ja inun, ea dukun en ini niti ikama en jiwepakexanaii”, ea waxuki. 
\p  
\v 14 Uinwen. Tsuabuda benimati jayadan, jatun tadi patsa keska wakin jabun shinan kayabiwen Jesús ikunwankin chakabu Dios buamakubainmisbu jawen mae bena anu jikitan jabu besti pekin jawen benimai jiweti ji bimi pikubainxankanikiki.  
\v 15 Jamen betsabudan, Dios danankin jamapai chakabuwamisbu inun, mukayakin Satanásan kushipa yukamisbu inun, chutanamebaunmisbu inun, yuda betsa tenanmisbu inun, yushin dami betsa kenwanmisbu inun, dasibi jamapai tibi bechipaibaunmisbu inun, chani chakamisbu jabu jaskamisbu besti bashikuxankanikiki, jabu Diosun mae pepa anu jikiamadan. 
\p  
\v 16 Januxun Jesúsun ana ea yuikin: “Eadan, Davidin baba inun pena bishi chaxajaidamis keskatun en Jesúsun en mia yuiai ninkawe. Diosunabu ichamisbu betsa betsapa anu jaska en uiain min jatu pewakin e imaxanun, iwanan, en nai tsuma en mia anu yunua jaska dasibi mia uinmaxuki, jau en jancha min jatu bumaxanunan”, ea waya 
\p  
\v 17 janua nun Chaxuwanen ainen jabun nun ikunwainbunan, Yushin Pepabetan Jesús yuikin: “Judiwe!” nun ikaya tsuabunda nuku ninkakin: “Jau judinunwen!” jau idianunbunwen. Ja inun, tsuabuda unpax manui keskakin Dios benakin Jesús chibankatsis ikin jau ikunwanunbunwen. Jaska watan jawen unpax jiwemati jaya jau aki benunbunwen, jawa pakamadan. 
\p  
\v 18 Na jancha dasibi Diosun ea bebunkidi uinmaxu ninkatan en matu yuiai ninkaidakanwen. Na dasibi jancha Diosun ea yuixuyabi padananankin tsuabunda ibubis jatun jancha kenekin ana unakia kene chichikin ewa watan yuikin: “Nadan, dasibi Diosun janchaki, chanimadan”, itidubu bebunkidi en matu mesewaii. Tsuabunda jaska waxanaibu jatu kupikin ja ichakawati betsa betsapa ea yusinxuwen Diosun ana kupiti betsawen jatu kupixanikiki.  
\v 19 Ja inun, tsuabunda na jancha Diosun ea yuixu en una waxukia ja unakia jancha betsa tede akaibuwen taexun Diosun jawen benimai jiweti ji bimi jaki tanabiayama jatu mebintan jawen mae pepa anu na unaki ea kenemaxu keska wakin Diosun jatu jikimama ixanikiki. 
\p  
\v 20 Na jancha jatun ea pewamaitun yuikin: 
\p “Chanima en samama ana kaxanaii”, ikaki. 
\p Jabiaskaki. Nukun Xanen Ibu Jesucristoon, menan jawaida judiwe, nun mia shinainan. 
\p  
\v 21 Nukun Xanen Ibu Jesucriston jau matu dasibi jawen pepawen duawakubainxanunwen. 
\p Ea uinmakubidanxu en jancha chanimadan, jatiski. 
\p Juan