\id 2TI - Kashinawa NT -Peru 2008 (DBL -2013) 
\h 2 Timoteo 
\toc1 Timoteo Pablon ja kachu kene bumanikiaki 
\toc2 2 Timoteo 
\toc3 2 Ti 
\mt2 TIMOTEO PABLON JA KACHU KENE BUMANIKIAKI 
\mt1 2 TIMOTEO 
\c 1  
\s1 Pablon Timoteokidi shinanikiaki, na janchadan 
\p  
\v 1 Ea en Pablodan, Diosun jaska shinainwen Jesucriston kushipaya ea wakinan, jawen yunuawen ea aniki. Jaska wakinan, jamen ea akama jakia jaska bebunkidi Dios yubakani jawen jiwea keyuisma ikibi ikakidi jaska shinankubainmis jaska jayawen taexun Jesucristo ea katumaniki.  
\v 2 Timoteoon, en mia kene bumai uindawe, min Jesucristo ikunwainwen taea min en bake kayabi keskakidan. Nukun Epa Dios inun nukun Xanen Ibu Jesucristo miwen nuikin jau mia unanuma jiwemakin pewakin duawapakekubainunbunwen. 
\s1 Pablon Timoteo paxkabidanimaxun Dios kenwanxunkubainikiaki, na janchadan 
\p  
\v 3 Punu nuka juinti nishma min bashikuimaken mia shinankin janu en Diosbe janchaitian badidi inun meshu tibi mia jakimama mikidi Dios kenwankin en mia yukaxunkubainmiski, ean Dios duawakinan. Jaska en shinan jawa chakabumakidi ea shinanmaya en akubainaii, jaska nukun xenipabun Dios ikunwankin apaunibu keskadi wakinan.  
\v 4 En mia paxkabidana min ewen nui kaxaya nenu juimaxun en mia shinan jeneamaki. Jaskawen taea ana miki nukutan en mia ana uin miwen en benimakatsis ikaii.  
\v 5 Ja dukun min chichi Loida inun min ewa Eunicen Jesucristo ikunwani chintuinsbuma keska jabias shinan miandi min ikunjaidawakin min shinan min betsa watiduma en unaiin. 
\s1 Jesucristokidi yusin daketimakiaki, na janchadan 
\p  
\v 6 Jaskaken natian en mia yunukin yuaidan, ninkaidawe. Diosun jawen kushipa pepa jau mia inankin kayati wamanun mia mamepixun en mia yukaxuniki. Jabiaswen ana kushipai chi ketianbu ji imis keskai ana min kushipa babu wayamawe.  
\v 7 Diosun jawen Yushin nuku inankin yushin babu dateti nuku inanma iniki. Jakia jawen Yushin kushipa pepa inun jawen bechipai nuinameti inun jawen nukunmebi nun pepakin shinantidu nuku inaniki.  
\v 8 Mia jaska waxuniwen taea nukun Xanen Ibukidi yusin jakidi janchai jaki dakeyamakunkainwen. Ja dikabi, jawen taexundi nenu ea bichiabuwen taea ewendi taea ekidi janchaidi ewen dakeyamadiawe. Dateama eskakunkainwen. Diosun nuku kushipa wakubainmiswen taexun Jesucristo mekenankidi kakape nun jatu yusianyan nuku ichakawaibuwen taexun miadi bika tenemabiabu jatuwen dateama Diosun kushipayaxun yusinkin jeneyamawe. 
\p  
\v 9 Eska Diosun bebunkidi shinanidan, jawada pepa nun amiswen taeama jakia jaska Diosun na mai anu jawa wadiamajaidabia bebunkidi jawen shinan duapawen taexun jawen janchawen jiwei nun jawenabu medibi pepakubainxanunbun nukun chakabuwen nuku kupikatsi ikama jaska yubakaniwen taexun tsuabunda Jesucristo ikunwainbu nuku katukin kenanixun natian nuku ma mekekubainikiki.  
\v 10 Januxun chanima Diosun jawen nuikipa nuku unanmakinan, jawen bake Jesucristo nukun mekenanwankin mawawen dasibibu nun datemis jatun maemakin nuku binuxuniki. Ja kakape jakidi jiwea jancha yuikin datan ati shada ana juneama wakin xabakan taxnimakin xabakabi waniki. 
\p  
\v 11 Jaskawen taexun Diosun ea katutan jawen bakekidi kaka pepa judiobuma en jatu yusinkubaunun ea yunukin Jesúsun kushipaya ea wanixun ea yusinan waniki.  
\v 12 Ea jaska waniken Diosun jancha en yusinkubaunmiswen taexun ichakawakin ea bichibiabun en Jesús ikunwankin taewaya ea mekenitun badi jawen jeneaitian ea mekekubainxanai unain en dakeamaki.  
\v 13 Jesucristo nuku ixuniwen taea ikunwain bechipainamekin en mia yusinmis keska wakin jancha kayabi kayatapia yusinkin jeneyamawe.  
\v 14 Jaska wakin Jesúskidi yusian min tapini jau tsuan betsa wayamanunbun Diosun Yushin Pepa nukuki dasiatun mia medabewaya jawen kushipawen uindakubainwen. 
\p  
\v 15 Jaska inun, min ma unaiin. Asia mai pakea anuabun Jesús ikunwainbu dasibi eki dakei eki pechitan ana ea medabewabumaki, Figelo inun Hermógenes dikabitunan.  
\v 16-17 Ea jaska wabiaibun nenu Roma anu en bikai jiwebiaken nukun jaibu Onesíforon Roma anu jikitushitan jawa juindukuanma ea bechinun ika ea benachakayamakin atimas ea bechimaki. En mane dispi chiwetameyawen en menexekeaki dakeama jawenchains ea medabewakin ea shinan chankanwanbidanbidanimaki. Ea jaska waimaken Diosundi jawenabuswen nuikin jau jatu medabewakubainunwen.  
\v 18 Éfeso anuxun Onesíforon nuku medabewakubaini min unanjaidaii. Badi jawen jeneaitian Diosun yudabu jatu unanti waitian nukun Xanen Ibun jau Onesíforo duawaxanunwen. 
\c 2  
\s1 Soldado pepa keskatikiaki, na janchadan 
\p  
\v 1 Min en bake keska Jesucristoki dasia min jawen kushipa jayanun Diosun jawen pepa mia inanidan, jawen besti kushipakunkainwen.  
\v 2 Ichapabu en jatu yusinkubaunai min ninkakin tapinmisxun akai keskadi min jatu tapinmaidan, ja junibu pe jiwekin ikunjaidawai chintuanma jatu uinmai duapakunkainkin yudabu yusinkin jatu medabewatidubu jatu katutan jau jabiaskadi yusinkubainunbun jatu yunukubainwen. 
\p  
\v 3 Jamen mia ikidan, soldado keskai jiwewe. Jaskakin en ikai keska jiwekin Jesucristo min ikunwanyan mia ichakawabiabu Jesucriston tsuma pepai nuitapabiai bika tenei jiwekunkainwen.  
\v 4 Uinwen. Chanima soldado unanepatun jawen xanen ibun yunua besti dayaxunkatsi jawa jamebi jawen shinanen bechipai atidumaki, jawen xanen ibu besti benimawanun ikadan.  
\v 5 Ja dikabi, jabiaskadiai, buda putanika beyuskin jawen yunuti inun jawen nemati chibanbuma jawen manakuti pepa jayatidubumaki.  
\v 6 Ja inun, juni betsan yunu banaima jawen dayaxunikan mekexunmiswen taexun janu tsekatitian bai ibuan tsekakin jawena dukun biama ja dayaxunmis paxkaxunkin jawena dukun inantiki.  
\v 7 Na jaska tibikidi en mia yuiai shinankubainwen. Min jaska waya nukun Xanen Ibun mia medabewakin dasibi mia tapinmaxanikiki. 
\p  
\v 8 Nukun xenipabu xanen ibu pepa Davidin baba Jesucristo mawa Diosun ana bestenwani kaka pepa datan akin en jatu yusinmisdan, jakimama shinaindakubainwen.  
\v 9 Jesucristokidi en yusinkubaunmiswen taexun ea ichakawabu tenekin en meaii. Juni atimapa jawaki dateama chakabuwai bechitan amisbu keska wakin ea nemakin mane dispiwen ea menexabu keska wadiakin Diosun jancha kakape yuikin en datan amisdan, ja tsuan nemakin nexatidubumaki.  
\v 10 Jaskaken tsuabuda Diosun katunibu Jesucristo ikunwain pepai jau jatun chakabuwen Diosun jatu kupiama jatu paxawakin piskuma jau jawen kushipa ikibi ikanu jau janu jiwediaxanunbun natian ea jiweyuxun en jatu bika tenexunyuaii. 
\p  
\v 11 Na jaska en mia yuiaidan, chanimajaidaki. Shinaindawe. 
\q1 Tsuabuda nun ma jabe mawani keska jabun nun shinainbudan, 
\q1 jabusdi nun jabe jiwexankanaii, niti ikamadan. 
\q1  
\v 12 Tsuabuda Cristowen taea nuitapabiai babuama kushipakin nun binukubainaibudan, 
\q1 chanima janu xanen ibuai anu jabe nun xanen ibuxanaii. 
\q1 Jamen tsuabunda jakidi chani peama yui keyainsbumadan, 
\q1 jabiaskadi Cristo jatukidi Epa Dios chanikin jatuki dakediaxanikiki. 
\q1  
\v 13 Jamen nukubu nun shinan betsa betsapa wai chintunbiamisken 
\q1 jatunan, jawa shinan betsa betsapa waisma ikunkainunbadikiki, 
\q1 jaskatan jamebi ibubis chani chakatidumadan. 
\s1 Pablon yusinmis keska wakin jau Timoteon adiakubainun yununikiaki, na janchadan 
\p  
\v 14 En mia yuiai keska shinankin betsabu jatu yusinkin tapinmaidakubainwen. Diosun ninka keyuaya yusian betsa betsapakidi yui jau kemanameyamanunbun jatu nemakubainwen, tsua jatu medabewatidubumakidan. Jaskaibu tsuanda jatu ninkai e ixankanikiki, Jesucristo ikunwanpaidan.  
\v 15 Jamen mia ikidan, jin jin ikama min Dios dayaxunaidan, Diosun besuubi jawa bedabini min dakeama ixanaidan, chanima jancha Jesucristokidi dasibi jatu yui pepakunkainwen. Min jaskamiswen taexun Diosun mia unanti wakin: “Juni dayakapakunkainkin min ea dayaxunmis peki”, iwanan, mia yuixanikiki. Shinaindakubainwen.  
\v 16 Tsuabunda janchawen besti jamapai bemakis pepakidi shinain kemanamei janchakin jaska bestikidi shinainbu tsuabunda jatu ninkai jatun yusianwen beyai xuxatidumai atimapai pikukubainkanikiki.  
\v 17 Jatun yusianan, isin chakabu taxni su ika ewakunkainmis keskaki. Jaska keskadi wakin jatun yusianwen yudabu yusinkin jatunabu chakabu pa wamakanikiki. Jatu uindakubainwen. Jaska keskai Himeneo inun Fileton jatu chibankin  
\v 18 chanima jancha jenetan ma jamakidi jatun shinan benuabuki. Jabun jatu yusinkin yuikinan: “Ikunwainbu mawadan, ana bestenxanaidan, nun ma jayaki”, iki mapubaunkin jatu padankin Jesús ikunwain jatidi chintunmakanikiki.  
\v 19 Jatu jaska wabiaibun ma medibi Diosun jawenabu kushipa wakin mestenwani jawa ana betsa wama ixanai ma Diosun jancha kaneama kenenibu jayaki. Jaskaken: “Nukun Xanen Ibun jadatuda jawenabu ma unainkiki”, ja inun: “Tsuabunda nukun Xanen Ibun kenawen Diosbe janchakinan, jatun chakabu chitetan jau jenekubainunbunwen”, adiani kenenibu jayaki. 
\p  
\v 20 Jaska inun, juni mabuyatun jiwe ewapa medan jawen mabu tibidan, oro inun plata jawendua besti jayamaki. Jakia ja dikabi ji mabu inun mai mabu pepa bexmas jayadiki. Ja mabu dabe jaska keska dabes jayamaki. Betsa jawa jusiama jawen pepajaida besti atiki. Janua betsa jawen jamapai wakin pepa bexmas dasibibun metidubu jayadiki.  
\v 21 Ja mabu pepa oro keskadan, tsuabunda chakabu jenetan jawen Xanen Ibu pepakin dayaxuni jawa chakabu jusikin ana meama ja besti pepaxunaiwen taexun jamapai daya pepa betsa betsapa jawen Xanen Ibu Jesúsun yunutiduki. 
\p  
\v 22 Jaskawen taexun bedunanbu jamapai tibiwen kemumisbu keska jenetan janua ana jaska jiweama paxakunkainwen. Eska bestiwen jiweiti pepa benakubainwen, jawa chani chakama inun, Jesucristo ikunwain inun, nui bechipainamei inun, unanuma jiwei dasibu juinti xunpinbubetan nukun Xanen Ibu kenwankubainkinan.  
\v 23 Ja dikabi, unainsmapabu kemanamei sinatanamemisbuwen taexun jatu ninkayamakubainwen.  
\v 24 Nukun Xanen Ibu dayaxunikabia nukun beyawen jamakidi janchawain detenameai keskai nun maputidubumaki. Jamen nuku ikidan, dasibibube pepaidan, dasibibu yusinti shadaidan, dasibibu jawada kaneaibu jawaida jin jin, iwanan, jatu chakabu wama jiwekunkaintiki.  
\v 25 Tsuabuda ninkaisbuma inun patapabu min jatu medabewakin pewakatsis ikaidan, juinti babutan jawa sinatama eska shinankin jatu unanmakubainwen, Diosun jawen chakabu unanma shinan betsa watan: “Jaskadan, chanimaki”, ikin jatun chakabu jenetidubu manakinan.  
\v 26 Min jaska waya jabu diablo Satanásan jatu beya wakin tsumawani jabun mia nemakubainshinabu bestean keskatan kainkainkin Jesucristokidi chanima jancha unantan ana chakabu wakatsi ikama jabun Satanás mepanmabaintidubuki. 
\c 3  
\s1 Ma badi jawen jeneaitian yudabu jaskaxanaibu Pablon yuinikiaki, na janchadan 
\p  
\v 1 Janu Jesucristo ma ana jua kemaya bika betsa betsapa kainbidanxanaidan, min ma unain uindakubainxanwen.  
\v 2 Ja yudabu eska bestiwen jamebi kenkin jatun mabu inun jatun pei bestiwen kemui “Eadan, tsua ea keskamaki”, ikin Dioskidi jancha chakabukin jatun ibuan jancha ninkama inun, jawa pepa shinanma inun, Dios kenwainbuki meseama chakabuxankanikiki.  
\v 3 Yuda betsabu duawatikidi shinanma inun, jawa jatuki nuitimakidi shinanma inun, yuanananti besti shinain inun, jatun jiwea mekekin pewama puben besti shinankin jawada pepa Diosun bechipaimis danain jaki sinataxankanikiki.  
\v 4 Jaska inun, betsadan, yuda pepabu tsuabuda jatuki sinataibu jatun jatu unanmamis inun, jawada itidu bebunkidi shinanma jamapai amisbu inun, jamebi kenkin shinankin: “Yuda betsan atidumabiaken ean besti en atiduki”, iwanan, shinain inun, jawen kemu pae bestiwen shinain pe jiwenun ika Dios benakin shinanma idiaxankanikiki.  
\v 5 Jatun kexawen bemakis xabakabi Dios kenwanbiakin jawa jawen jiweawen pepakin uinmama Diosun kushipaki dakekin kenwan kayabiama dananxankanikiki. 
\p Jaska keskabudan, jatube ketaxameama jatu dunkekubainwen.  
\v 6 Jamen betsabu ikidan, eskakanikiki. Jatubetan chani yui shadanun ika ainbuaibu jawa unanma chakabui jiwekin kemu betsa betsapa teneai anu jatun jiwetan jikitan jatu yusinchakakin jatun tsumabu jatu wamisbuki.  
\v 7 Jabun jawadakidi tapinbiakubainkin jawa chanima jancha xabakabi ninka pewatidubumaki.  
\v 8 Juni mukaya dabe Janes inun Jambrésin Moisin jancha bextenun ika inibu keskakin jabu padananainbun chanima janchadi nemanun ika ja junibu jatun shinan pema inun ikun kayabi wama jamakidi kanekanikiki.  
\v 9 Ja padananainbu unainsmapakin jancha kayabima jatu yusiainbu dasibibun unantan ichapabu jatuki chiti ikama ixankanikiki. Jaska Moisés bextenun ika Janes inun Jambrés tatima ini keskai jabudi jaskaxankanikiki, bextekeidan. 
\s1 Jawen jenekin Pablo Timoteowen nuijaidakin yununikiaki, na janchadan 
\p  
\v 10 Mianan, ja padananainbu min jatu chibanmaki. Jamen jaska yusiin en jiwemis keska min chibanmiski, eska tibi ea chibainan. Jaska en shinanmis inun, jaska en ikunwanmis inun, jaska jawaida jin jin ikama en tenemis inun, en nui bechipainamemis inun, jamapai ekidi kainbidanai tenei en kushipamis inun,  
\v 11 jaska Antioquía anuxun inun, Iconio anuxun inun, Listra anuxun ea ichakawakin ea bika tenemakubidanyamabu min unain keskakin miadi bika tenemaibu min teneai ea keskakin min mekubainaii. Ea jaska tibi wabiaibun nukun Xanen Ibuan ea jatu mepamakubainyamaki.  
\v 12 Jamen chanima tsuabunda Diosun jancha ikunwain pepakin Jesucristoki dasia jiwekatsis ikaibudan, jatu bika tenemakin jatu nuitapa waxankanikiki.  
\v 13 Jakia juni chakabu inun jabu padananainbudan, jatun jiwea pe buama piku bestixankanikiki, jatu padainbuwen inun ibubis padananainan. 
\p  
\v 14 Jaskabiaibun miadan, Diosun jancha pepa mia yusianbu tapintan min ikunwani jabiaskas shinankin chibankubainwen.  
\v 15 Min bakeishta Diosun jancha pepa medibi mia yusinkin mia tapinmakin jawen besti paxati Jesucristokidi mia unanmabu ninkakin min ikunwanidan, shinaindawe.  
\v 16 Dasibi Diosun janchadan, junibun shinanma Diosun jatu shinanma jabun kenenibudan, jadan peki. Jawen yuda betsabu yusinti inun jawen jatu nemakin bexteti inun, jatu jawen pewati inun, jau jawen jiwei pebainunbun jawen jatu unanepa watiki.  
\v 17 Jaska yununiwen taexun jabu Diosun yunua jawen jancha yuixunikabu jawen janchawen unanepakin pepajaidakin Dios dayaxunkin pepa betsa betsapa axuntidubuki. 
\c 4  
\p  
\v 1 Epa Dios inun Jesucristo ja xanen ibujaidai jawen kushipawen juxun mawabu inun jiweabu unanti waxanaitun nuku xabakabi uiainbun en mia yunuchakayamai ea ninkaidawe.  
\v 2 Eska en mia shinanxunaidan, Diosun jancha jatu tapinmakin jawa jeneama badi tibi benuama akubainwen, janu ninkakatsis ikin ninka pewaibutian inun janu ninkakatsi ismabia inun janu bika teneaibutianan. Jaska wakin jatu ikunwanmakin jatun chakabu jatu jenemakin jatu benimawakin jatu yusiin jin jin ikama akubainwen.  
\v 3 Chipu badi betsatian yudabu ichatan yusian kayabi ana ninkakatsi ikabuma ixankanikiki. Jakia jaska jabun ninkakin bechipai besti anun ikaibu jatun yusian pepamabiaken jawen benimanun ixun jawada jaska ninkakatsi ikaibu besti jatu yusinmanun ixun yusinan ichapabu jatu yusinmaxankanikiki,  
\v 4 Jesucristokidi chanima jancha jenei jaki pechitan miyui betsa betsapawen besti yusiainbu chibankinan.  
\v 5 Jamen mia ikidan, dasibi min shinanen mekei pekin bika tenebiai Jesucristokidi kakape datan akin jatu yuikin daya pepa en mia yunubainai shinan betsa wama jatu yusinkubainxanwen. 
\p  
\v 6 Jamen eadan, natian ma en yuda Jesucristo inankin en mawaxunxanai ma kemaikiki.  
\v 7 Eadan, Jesucriston soldado pepa detenamekin jatu binumis keskakin jabun ea ichakawaibu en binuaii. Kushibainkin jatu maemakatsis imisbu keskakin jaska ewen Dios yubakani jawa chintuanma en ma ixuanki. Ikunwanixun jawen kakapekidi yusin bikabiakin en jawa jeneama ikunkainaii.  
\v 8 Natian en dayaxunkunkainmiswen taexun jaska jayanun ika en imis en maiti manakuti pepa Diosun ea mekexunkubainmis badi jawen jeneaitian jancha pewanika duapatun Jesucriston ea inanxanai en manaii. Jaska wakinan, ea besti inanma dasibi jabun Jesucristo ana chintunkidanxanai bechipaikin manaibudi jatu inanxanikiki. 
\s1 Pablon jaibuaibun jaskawaibukidi Timoteoki chaninikiaki, na janchadan 
\p  
\v 9 Jawa teai bika teneama jawaidakidan juxun ea uinyuwe.  
\v 10 Demas jawen jiweawen besti inun mabuwen kemukin ea jenebaini Tesalónica maewan anu kashianki. Crescente Galacia mai pakea anudi kadiashinaki. Tito Dalmacia mai pakea anudi kashianki.  
\v 11 Lucas besti nenu ebe jiweaki. Jukin Marcos benakin bechitan iwexanwen, mibetan nenuxun ea medabewatidukidan.  
\v 12 Nukun jaibu Tíquico Éfeso anu en yunuyuaii.  
\v 13 Tróade anu nukun jaibu Carpon jiwe anu en matsi tadi en jenebidanyama inun en una ichapa inun ja xunska min ja jakimatiduma en una bichi sebi ewapa en bashibidanyama jukin ea keyu bexunxanwen. 
\p  
\v 14 Mane mabu wanika Alejandron ea jadakidi shinantima kaya wakin ea ichakajaidawaimaki. Jaskawen taexun nukun Xanen Ibun jaska bechipaiai keskawen kupixanikiki.  
\v 15 Nun jatu Jesucristo kakape yusinmiskidi nuku jatu dananmaikiki. Jaskawen taexun miandi jakidi uindakubainwen. 
\p  
\v 16 Jamen betsadan, ja dukun Roma xanen ibubu ninkamakin judiobun ea kunyan akaibun en chakabuma en jatu yuiaya tsuan kedabewai ea janchaxunama dakekin dasibi en jaibuaibun ea jenebainimabuki. Ea jaska wabiabainimabun jatun chakabuwen taexun jau Diosun jatu kupiyamaxanunwen.  
\v 17 En jaibuaibun ea jenebiabainabun jawen binuti Jesucristokidi jawen kaka pepa jawen paxatikidi en jatu yui keyuaya judiobuma dasibibun jau ninkanunbun nukun Xanen Ibun ea jeneama ea kushipa waxun jatu daewakin mese anua ea piskumaimaki, ea jaska nukun Xanen Ibun jatu binumakin inu keneya pintsi kexea keska anua ea binumakinan.  
\v 18 Chakabu dasibi nukun Xanen Ibun ea binumakubainkin janu xanen ibuai pepa jawendua nai anu ea paxawatan ea mekexanai en unaiin. Jaskaken niti ikama ja duawakin kenwanankanwen. Jaskakidan. 
\p  
\v 19 Jaska inun, jadi jiweabu Prisca inun Áquila inun Onesíforon enabu: “¿Jaska pebumenkain?” ikin en jancha en jatu bumai ea jatu yuixunwen.  
\v 20 Corinto anu Erasto bashikuaya en juyamaki. Ja inun, Trófimon isin teneai Mileto anu en bashiyubidanyamaki.  
\v 21 Ui matsi inun niwe kushipa bediamaken manama jawaida juwe. “¿Jaska min pemen?” ixun Eubulo inun, Pudente inun, Lino inun, Claudian nenuxun dasibi ikunwainbubetan jatun jancha mia yunukanikiki.  
\v 22 Nukun Xanen Ibu Jesucristo mibe nixun jau mia medabewakubainunwen. Ja inun, Éfeso anuxun ikunwainbu dasibi Diosun jau matu duawakubainunwen. 
\p Jatiski, en janchadan. 
\p Pablo