\id 2TH - Kashinawa NT -Peru 2008 (DBL -2013) 
\h 2 Tesalonicenses 
\toc1 Tesalónica anuabu Pablon ja dukun jatu kene bumanikiake 
\toc2 2 Tesalonicenses 
\toc3 2 Ts 
\mt2 TESALÓNICA ANUABU PABLON JA KACHU JATU KENE BUMANIKIAKI 
\mt1 2 TESALONICENSES 
\c 1  
\s1 Pablon jatukidi shinanikiaki, na janchadan 
\p  
\v 1-2 En Pablon, en medabewanika Silvano inun Timoteobetan en ana matu kene bumai uindakanwen. Tesalónica maewan anuxun man ikunwainbu nukun Epa Dios inun nukun Xanen Ibu Jesucristobe man dasiken Diosun matu duawakin jawama unanuma jau matu jiwemakubainunwen. 
\s1 Jesucristo ikunwainbu Pablon jatu shinankin kenwankin Dios jatu yukaxunkubainikiaki, na janchadan 
\p  
\v 3 En betsabu inun en puibuun, chanima matun shinanen Jesús ikunjaidawai man ma yumei kushipai en matu unaiin. Jaskakin ana jeneama ikunwain betsabube kushipai nui jenenameyamakubainxankanwen. Man jaskaya matukidi shinankin Dios matu yukaxunkin matuwen nun Dios kenwankubainaii, jaska nuku yunuayadan.  
\v 4 Janua matu ichakawakin yumanwanbiaibun ikunwain kushipai man jawa chintuanma ikunkainaya jaska shinankin janu ikunwain ichamisbu tibi anuxun benimai nun matukidi chanii nun janchakunkainaii.  
\v 5 Bika tenei man jaskaya Dios kaneismatun yuda dasibibu unankin matun pepawen matu unanti watan matukidi pe shinanyan janu Dios xanen ibumis anu jabe man jiwenun matu jikimaxanai nun unaiin. 
\p  
\v 6-8 Jamen jabun Diosun jancha tapinkin Dioskidi shinankatsi ikama inun Xanen Ibu Jesúsun jancha chibankatsi ikabuma jatu manakukin kupinun ika jui nai anua chi jede nakua Jesús jawen nai tsuma kushipabuya jabube taxnikidan jatu kupi juxanikiki. Na jaska bika tenemakin nuku nuitapawaibudan, jaska Diosun matu jatu bika tenemaidan, jawen dateyamakanwen. Jaska wakin jabun matu nuitapawamisbu jatu bextetan matu inun nuku ichakawamisbu binumakin nuku juindunkunmakin unanuma nuku jiwemaxanikiki.  
\v 9 Jamen nuku jaska wamisbuwen taexun jabu kupikin nuitapawadiakin ikibi imakin jawen kushipa paewen benukin inun jawen chaxa pepa jawendua jatu uinmakatsi ikama ja bebunua chaijaida jatu putaxanikiki.  
\v 10 Jaskaken jawada nukun Xanen Ibukidi nun matu yusin chanitanima man ikunwainwen taexun jatianda nukun Xanen Ibu janu juaitian dasibi mai jidabi anuxun nun ikunwanbaunaibun chanima uintan duawakin nun kenwanxankanaii. 
\p  
\v 11 Jaskawen taea Diosbe janchakin matukidi yukakin nun jeneismaki. Diosun matu kenakin katunixun pepabu matu wakatsis ikaikidi matu yukaxunkinan, man ikunwainwen taexun jawen kushipawen jamapai pepa akin betsabube medabenamei man jiwekubainunbun en matu ea axunkubainaii.  
\v 12 Jaska en matukidi Dios yukaxunmiswen taexun matu uinkin nukun Xanen Ibu Jesús dasibibun kenwanxankanikiki. Man jaska waibu Jesúsun matu duawakin matu kenwandiaxanikiki, jaska nukun Epa Dios inun nukun Xanen Ibu Jesucriston nuku bechipaikin jaska shinankubainmisdan. 
\c 2  
\s1 Jesús ana juxanaikidi Pablon xabakabi jatu yusinikiaki, na janchadan 
\p  
\v 1 En betsabu inun en puibuun, badi jawen jenei keyuaitian dasibibu nuku ichawanun ika nukun Xanen Ibu Jesucristo nai anua ana chintunkidan jua nun jabe ichaxankanaikidi matu yuinun ninkakanwen,  
\v 2 eska taxnixanaikidi bebunkidi nun matu ana xabakabi yusiainan. Tsuanda Yushin Pepatun yuia keska shinankin: “Nukun Xanen Ibu Jesús ma juaki”, ikin matu padainbu inun, yusian betsa tapintan: “Jesús june ma juimakiaki”, ikaibu inun, nukuki padana en kene keska buxun matu yuikin: “Pablo eska chanikiki, Jesús ma juimakiaki”, ikin man jaska tapianma ibiaimaken matu padankin yuia akeakeaibu ninkatan e iki juinti metexeketan matun shinan jawaida maewai jatuwen dateyamaxankanwen.  
\v 3-5 Ja inun, matube jiwexun jawada en matu yusintanimadan, man ma daki jakimai ikai matu ana yuinun ninkakanwen. Dios ikunwainbu ichapabun Dios danain chintuainbun Jesús juxanai ma kemaya juni chakabu kushipa bebunkidi ja dukun juxanikiki, ja juni chakabun ibudan, jau Diosun kupiti tenechakayamaxanun Diosun ma jaki tanaxun pewanidan. Ja Dioski sinatamistun Diosun yunuti inun jawen nemati danankin jamapai tibi kenwankin chibainbu nemanun, iwanan, jamapai dami shadabu kenwanmisbu jatu binukin maematan jamebi kein janua Templo Jerusalén anu tsauxun yuikin: “Eadan, en Dioski”, ixanikiki. Jaskawen taexun jau matu padanyamaxanunbun jatu jawa ninkamayamaxankanwen.  
\v 6 Ja juni chakabu jawen yuba idiamaken natian kainmayuama tsuanda nemayukubainai man unaiin.  
\v 7 Ja juni chakabu Satanásan kainmaxanaidan, ma june yubakai dayaikiki, yudabu padankin chakabu ewawaidan. Jaskabiaya jatun nemakubainmisxun jenea janua ana nemamaken taxnixanikiki.  
\v 8 Janua ja juni chakabu taxniken nukun Xanen Ibu Jesús dasibi jawen chaxa kushipaya jukidan ja juni chakabun kushipa mebinkin paismawatan jawen jaxpawen xuun akin kupikin tenanxanikiki.  
\v 9 Ja juni chakabu jawen xanen ibu Satanásan kushipa wakin medabewaya dami atimaska betsa betsapa wakin yudabu padanxanikiki.  
\v 10 Jabun Diosun kakape Jesúswen mekekatsi iki bechipainameama dananankin chanima jancha danainbu ja juni chakabunan, chakabu atimapa betsa betsapawen jatu padanyan jaska uintan chibainbun  
\v 11 jaskawen taexun Diosun chani yushin jatu padanmaya jaska chani jancha kenwainbu  
\v 12 atimas janu kupiaitian ja jancha chanima danankin chakabu besti bechipaibu Diosun jatu jawen kupixanikiki. 
\s1 Jawenabu wanun, iwanan, bebunkidi Diosun jatu katunikiaki, na janchadan 
\p  
\v 13 En betsabu inun en puibuun, Dios matuwen nuikin matu bechipaikin bebunkidijaida matu katuniwen taexun chanima jawen paxati man bixanai jawen Yushin Pepatun matu medabewai kai ma matukidi pewaniken chanima man ikunwanyan jaskawen taexun matu medibi waniki. Man jaskaken Dios nun matukidi pe kenwanxunkubainaii.  
\v 14 Kakapekidi datan akin nun matu yusianyan Diosun matu ikunwanmaniki, jau nukun Xanen Ibu Jesucriston kushipaki dasitan man jawenabu ikunkainxanunbunan. 
\p  
\v 15 Jaskawen taea en betsabu inun en puibuun, matu jaska wakin katuniken nukun yusian beya bena jadi matun mae anu kaxun ibubis nun matu yusintanima inun nukun kenewen nun matu yusiainan, jakimama chibankubainkanwen.  
\v 16-17 Januxun nukun Xanen Ibu Jesucristo jamebi inun nukun Epa Dios nukuwen nuikin bechipaikin nuku duawakin nuku shinan chankanwan niti ikama nai anu nun jatube jiwexanai manakamakin nuku yubaniki. Janua mestenwantan matun juinti shinan chankanwankin matu kushipa wai jeneama jamapai yuikin man akai pepas jau matu amakubainunbunwen. 
\c 3  
\s1 Nukun dayakidi Dios nuku yukaxunkubainkanwen, jatu wanikiaki, na janchadan 
\p  
\v 1 En betsabu inun en puibuun, nun ma matu kene keyuxunai uindakanwen. Jesúskidi kakape ninkaxun man shinan betsa waima keska wakin nanta manibaunabundi jabundi Jesúskidi kakape ninkatan jau jawaida shinan betsa watan Dios kenwandianunbun nun jatu yusinkubaunaya Diosbe janchakin kushipa nuku yukaxunkubainkanwen.  
\v 2 Ja inun, dasibibun Jesús ikunwanbumawen taexun yuda betsa chakabubu inun dakeisbuman chakabuwakubainkin nuku ichakawaibu jau nuku nemaxunun Dios nuku ea axunkanwen.  
\v 3 Jaska wakin Satanásan matu kanemakatsis ikaya nukun Xanen Ibu nuku jakimaismatun nuku xununbainama matu kushipa wakin mekekin chakabu matu binumakubainxanikiki.  
\v 4 Ja inun, nukun Xanen Ibube nun jabe dasitan matu yusintanima jawa jeneama chibankin man jabias akubainxanai jaskakidi nun matu ikunwaiin.  
\v 5 Epa Dios nukuwen nuimis keskai betsabube man nuinameaidan, jaska Criston bika tenei jawen kushipa babuama ini keskai matudi man babuyamanunbun jau nukun Xanen Ibun matu medabewakubainunwen. 
\s1 Chikishbu tapinmatikiaki, na janchadan 
\p  
\v 6 En betsabu inun en puibuun, nukun Xanen Ibu Jesucriston nuku yunumiswen taexun nun matudi yunuai, ninkakanwen. “Nukubetan Jesús ikunwankatsi ibiai tsuada nun yusiain chibanma inun beya bena nun matu yusinma danankin akabumadan, ana jatukidi shinanyamakubainkanwen”, jatu dakewakinan.  
\v 7-8 Jamen eadan, matube jiweyuxun jawa tidumakin matu daketapawama tsuabunda piti nun jamen pianma ikimaki. Jaskakin nukun jamapai ibubis bi badidi inun meshu medan dayachakayamai yumankin nun matu bikawama ikimaki. Matube jiwexun nun matu uinmaima keska ikubainkanwen, tsua jameen ea iki daketapamadan.  
\v 9 Ja inun, nun Jesúsun kushipayabun matu yusinkubainkin jawen taexun matun piti nun yukatidubia nukun piti inun nukun tadi jawen biti man nuku dibibiaken nun matu jawa yukama ikimaki. Jakia ibubis mekenen dayai jaska nun jiwemis keskai matundi nuku chibain man jiwekubainxanunbun nun matu uinmaimaki.  
\v 10 Jaska matu yusin kainmaxun matu yunukin: “Tsuabuda dayakatsi ikama chikishaibudan, jau jatu pimayamadianunbunwen”, iwanan, nun matu yusinmaki.  
\v 11 Jakia matukidia chani juai nun ninkashinadan, jatididan, man chikish dayama jawawakatsi ikama kaka betsa betsapa besti ninkatan betsabu yui man yuananan bestikubainkanikiaki.  
\v 12 Jaskaken nukun Xanen Ibu Jesucriston kushipawen nun matu yunuaii. Yudabu chikishbu yunukin tapinmakin: “Jaska besti jiwetidubuma jau tadi medibi jatun daya tapintan ana yuda betsabu xetukin yuanmama jau jatun piti inun jatun mabu jau ibubis bikubainunbunwen”, iwanan, matundi man jatu yununun nun matu yunudiaii. 
\p  
\v 13 En betsabu inun en puibuun, jawada daya pepa aki man jawen jiwemis akidan, punu nukai jin ikin jeneyamakanwen.  
\v 14 Ja inun, nukun jancha nun matu bumai jatidibun ninkakin tapinkatsi ikama jatun chakabu unain jau dakenunbun ana jatube mapuyamakubainkanwen.  
\v 15 Jakia jatuki sinatama min betsabube min ikai keskakin jatu jancha chakabuwama jatu yusinkin nema bestikubainkanwen. 
\p  
\v 16 Nukun Xanen Ibun jamebi jawenabu unanuma jiwemakubainmistun matudi unanuma jiwemakin jawada badi tibi betsa betsapa man akai jau matu uindakubainunwen. 
\p  
\v 17 Ea Pablon, en jancha matu bumakin jaska ibubis en mekenen kenekin en keyumis keska wakin en matu axuaiin, en tsumapan ana ea axuanmakenan.  
\v 18 Jaskaken nukun Xanen Ibu Jesucriston jau unanuma jawama matu duawakubainunwen. 
\p Jatiski, en janchadan. 
\p Pablo