\id 2PE - Chipaya NT -Bolivia 2009 (DBL -2013) 
\ide UTF-8 
\h 2 SAN PEDRO 
\toc1 Segunda Carta de San Pedro 
\toc2 2 Pedro 
\toc3 2Pe 
\mt2 SEGUNDA CARTA DEL APOSTOL 
\mt1 SAN PEDRO 
\c 1  
\p  
\v 1 Wejr Simón Pedruqui anc̈hucaquin cjijrz̈cuc̈ha. Wejrqui Jesucristuz̈ manta payiñ z̈oñtc̈ha. Niiz̈ uchta apostoltc̈ha. Yooztan Jesucristo Liwriiñiz̈tan z̈oñinacz̈quiz anaz̈ illillza; legaliz̈ niiqui. Jalla niz̈tiquiztan anc̈hucmi wejrmi Jesucristuz̈quin kuzziz cjen Yooziz̈ tjaata kamaña tanzinc̈humc̈ha. Ancha zumac̈ha nii kamañaqui.  
\v 2 Yoozquiz niz̈aza uc̈hum Jesucristo Jilirz̈quiz juc'ant zuma pajz waquizic̈ha. Nekztan anc̈hucqui juc'anti Yooziz̈ yanapta cjequic̈ha, niz̈aza tsjan walikaz kamaquic̈ha Yooziz̈ cjen. 
\s1 CRIICHI Z̈OÑINACZ̈ KUZ PUNTU 
\p  
\v 3 Yoozqui uc̈hum kjawzic̈ha, niiz̈tan chica honorchiz cjisjapa, niz̈aza nii irata zuma kamañchiz cjisjapa. Jaziqui Yoozqui niiz̈ aztan anc̈hucaquiz yanapc̈ha, niiz̈ kuzcama zuma kamñi atñijapa. Anc̈hucqui Yooz puntu zizñi zizñiz̈ cjen Yooz yanaptaqui tanznasac̈ha.  
\v 4 Yoozqui niiz̈ ancha zuma walurchiz tawkz̈tan compromitchic̈ha, uc̈hum yanapzjapa. Nii compromitta taku cumplissic̈ha. Jaziqui anc̈hucqui Yooz kuz irataz̈ cjisnaquic̈ha. Niz̈aza anc̈hucqui tii muntuquiz z̈ejlñi ana walinacquiztan atipaquic̈ha. Tii muntuquiz ancha ana walinaca z̈ejlc̈ha z̈oñinacaz̈ ana zuma pinsiñiz̈ cjen.  
\v 5 Jalla niz̈tiquiztan anc̈hucqui Yoozquin tjapa kuztan cjee juc'anti juc'anti zuma cjisjapa. Jesucristuz̈quin kuzziz cjen lijituma zuma kamz waquizic̈ha. Nekztan zuma kamcan, zizñi niz̈aza intintiñi kuzziz cjis waquizic̈ha.  
\v 6 Nekztan zizñi kuzziz cjican, persun kuzquiz ewjazñi kuzziz cjis waquizic̈ha. Nekztan persun kuzquiz ewjazcan, zuma tjurt'iñi kuzziz kamz waquizic̈ha. Nekztan tjurt'iñi kuzziz kamcan, Yooz kuzcamakaz kamz waquizic̈ha.  
\v 7 Nekztan Yooz kuzcamakaz kamcan, criichi z̈oñinacz̈quiz okzñi kuzziz cjis waquizic̈ha. Nekztan okzñi kuzziz cjican, tjapa z̈oñinacz̈quiz zuma munaziñi kuzziz cjis waquizic̈ha. 
\p  
\v 8 Anc̈hucqui jalla niz̈ta ancha zuma kuzzizc̈hucc̈halaj niiqui, juc'anti juc'anti zumaz̈ cjequic̈ha. Niz̈aza anc̈hucaz̈ zuma kamtaqui anaz̈ ina cjequic̈ha. Niz̈aza anc̈hucaz̈ Jesucristo Jilirz̈ puntunaca ziztaqui anaz̈ ina cjequic̈ha. Jesucristuz̈ puntunacquiztan zizñi zizñi cjican, walja zuma obranacchiz cjisnaquic̈ha.  
\v 9 Jakzilta z̈oñit niz̈ta zuma kamañchiz ana z̈ejlc̈haja, jalla niic̈ha tsjii zur z̈oñiz̈takaz. Niz̈aza niic̈ha ana zizñi zoñiqui. Niiz̈ ujnacaqui pertunzqui tjatztac̈ha.  
\v 10 Anc̈hucqui, anac̈ha niz̈ta cjee. Yoozqui anc̈huc illzcu kjawzic̈ha. Jalla nii kjawz̈ta zumpachaz̈ catoka. Niz̈aza niiz̈quinpan kuz tjaaquic̈ha. Jalla nuz̈ zumpachaz̈ kamaquiz̈ niiqui, anapanz̈ Yoozquiztan zarakasac̈ha.  
\v 11 Nekztan anc̈hucaz̈ zuma kamtiquiztan arajpach wajtquin zuma risiwtaz̈ cjequic̈ha. Nii arajpach wajtquin Liwriiñi Jesucristo Jiliriqui wiñayjapa mantic̈ha. 
\p  
\v 12 Jalla niz̈tiquiztan wejrqui anc̈hucaquin tirapan nii puntunaca cjuñzkatac̈ha. Anc̈hucqui nii puntunaca zizza. Niz̈aza anc̈hucqui werar Yooz taku catokz̈cu Yoozquin tjurt'ichi z̈ejlc̈ha.  
\v 13 Jalla nuz̈ cjenami wejrqui tuz̈ tantiichinc̈ha. Wejr iya z̈ejtcan, anc̈hucaquiz cjuñzkatz pecuc̈ha, tii chiiz̈intanacz̈tan. Nii walikaz cjiwc̈ha.  
\v 14 Uc̈hum Jesucristo Jiliriqui wejtquiz zizkatchic̈ha, wajillaz̈ tii curpu eccu arajpach wajtquin okac̈ha, nii.  
\v 15 Jalla niz̈tiquiztan tii puntunacquiztan cjijrz pecuc̈ha. Nekztan weriz̈ ticz̈tan anc̈hucqui c̈hjulorami tii puntunaca liyasac̈ha, zuma cjuñajo. 
\s1 JESUCRISTUZ̈ PUNTUQUIZTAN TJAAJINTA 
\p  
\v 16 Anc̈hucaquin tjaajincan, wejrqui uc̈hum Jesucristo Jilirz̈ puntuquiztan tjaajinchinc̈ha, jaknuz̈t walja aztan wilta tjonac̈haja, jalla nii. Jalla nii tjaajintaqui anaz̈ wejt kuzquiztan ulanchic̈ha. Nii tjaajintaqui anac̈ha mañz̈tan tantiita quintuqui. Antiz wejrqui persun c̈hjujcz̈tan Jesucristuz̈ honora cherchinc̈ha.  
\v 17 Wejrqui cherchinc̈ha, Yooz Ejpqui Jesucristuz̈quiz zuma honora tjaachic̈ha. Niz̈aza Yooz Ejpz̈ ispantichuc joraqui chiiz̈quichic̈ha tuz̈ cjican: “Jalla tiic̈ha wejt k'ayi Maatiqui. Tiiz̈ cjen ancha cuntintutc̈ha”.  
\v 18 Jalla nuz̈ cjiñi taku nonzinc̈ha arajpachquiztan tjonñi. Nii oraqui wejrqui Jesucristuz̈tan chica z̈ejlchinc̈ha Yooziz̈ illzta curquin. 
\p  
\v 19 Jaziqui wejrqui cjiwc̈ha tuquita Yooztajapa chiiñi profetz̈ takuc̈ha werar takuqui, nii. Jesucristuz̈ tjonzcama nii profetaz̈ chiitaqui uc̈humnacaltajapa kjanazt'ic̈ha tsjii zuma lamparaz̈takaz. Jalla niz̈tiquiztan nii profetaz̈ chiitiquiz kuz tjaaz waquizic̈ha. Nii walikaz cjiwc̈ha. Wentan kjantati chawcwa tewcz̈can, anaz̈ iya lampara kjañi pecasac̈ha. Jalla niz̈ta irata Jesucristuz̈ tjontan, profetaz̈ chiitanacaqui anaz̈ iya pecasac̈ha.  
\v 20 Jalla tii zakaz intintaz waquizic̈ha. Nii cjijrta profetaz̈ chiitanacaqui Yooz takuc̈ha. Jaziqui profetaz̈ chiitami z̈oñz̈ kuzquiztankaz ana intintazta cjesac̈ha. Yoozpanikazza profetaz̈ chiita intintazkatñiqui.  
\v 21 Profetanacaqui anac̈ha persun kuzcama niz̈tanaca chiichiqui. Antiz Yooz Espíritu Santuqui ninacz̈quiz Yooz taku chiikatchic̈ha. 
\c 2  
\s1 FALSO TJAAJIÑINACZ̈ PUNTU 
\p  
\v 1 Tuqui timpuqui toscara chiiñi profetanacaqui Israel wajtchiz z̈oñinacz̈quiz jeczic̈ha. Jalla niz̈ta irata zakaz anc̈hucaquiz toscar tjaajiñinacaqui jecznaquic̈ha. Ninacaqui persuna pinsitaquiztan chjojzakaz̈ tjaajnaquic̈ha, z̈oñinaca turwayskatzjapa, niz̈aza Yoozquiztan zarakskatzjapa. Jalla nuz̈ anawali tjaajincan Jesucristo Jiliri ana pajñi chiyaquic̈ha. Pero Jesucristuqui ninaca liwriizjapa ticzic̈ha. Jalla nuz̈ anawali tjaajintiquiztan ninacpachaz̈ wajilla castictaz̈ cjequic̈ha.  
\v 2 Niz̈ta anawali tjaajintiquiz walja criichi z̈oñinacaqui kuz tjaaquic̈ha. Nekztan anazuma kamaquic̈ha. Jalla ninacaz̈ anazuma kamtiquiztan z̈oñinacaqui werar Yooz kamañ quintra iñaraquic̈ha.  
\v 3 Ancha paaz paca peccu, nii anawali tjaajiñi z̈oñinacaqui toscar tawkz̈tan anc̈hucaquiz incallaquic̈ha. Nekztan anc̈huca paaz tanznaquic̈ha. Jalla nuz̈ cjen ninacaqui ultimupan tantaz̈ cjequic̈ha. Tuquitanpacha Yoozqui ninaca utchic̈ha casticta cjisjapa. 
\p  
\v 4 Yoozqui uj paachi anjilanacz̈quiz ana pertunchic̈ha. Antiz infiernuquin tjojtchic̈ha. Zumchiquiz chawctaz̈takaz nekz chjojta z̈ejlc̈ha, ultimu pjalz tjuñicama.  
\v 5 Niz̈aza tuquita timpuqui Yoozqui uj paachi z̈oñinaca ana pertunchic̈ha. Antiz kjaz juyzu mantiz̈quichic̈ha nii anazuma kamañchiz z̈oñinaca ticznajo. Noé cjitaqui z̈ejtkatchic̈ha niiz̈ pakallak familianacz̈tan. Noequi nii timpuquiz kamñi z̈oñinacz̈quiz cjichic̈ha: “Zuma kamañchiz cjee” cjican. Pero z̈oñinacaqui Noez̈ chiita tawkquiz ana juyzu paachic̈ha.  
\v 6 Niz̈aza Yoozqui ana wal Sodoma wajtchiz z̈oñinacami niz̈aza Gomorra wajtchiz z̈oñinacami ujz̈tan ujchic̈ha, kjup tuczcama. Jalla nuz̈ Yoozqui liwj tjatanzjapa mantichic̈ha. Jalla nuz̈ casticcan Yoozqui wiruñ tjonñi anawal kamñi z̈oñinacz̈quiz chiiz̈inz pecchic̈ha, “Anac̈ha niz̈ta kamzqui” cjican.  
\v 7 Nii pizc ujzi watjanacquiztan Lot cjita z̈oñiqui alajakaz liwriitac̈ha. Jalla niitac̈ha zuma kamañchizqui. Parti z̈oñinacaqui tjapaman ana walinaca paachic̈ha. Jalla niz̈tiquiztan Lot cjitaqui nii anawali kamñi z̈oñinaca cherz̈cu ancha llactazñitac̈ha.  
\v 8 Nii zuma z̈oñiqui zapuru niiz̈ kuzquiz ancha zint'iñitac̈ha, nii parti z̈oñinacaz̈ Yooz lii quintra paachiz̈ cjen. Lot cjita z̈oñiqui zapuru ninacaz̈ anawali paatanaca cherchic̈ha, niz̈aza nonzic̈ha. Jaziqui nii anawali paañinacz̈tan kamcan, niiz̈ kuzquiz ancha zint'iñitac̈ha.  
\v 9 Ultimquiziqui Yoozqui Lot jwessic̈ha nii wajtquiztan. Yooz Jiliriqui pruebanacz̈quiztan zuma kamañchiz z̈oñinaca liwriiñic̈ha. Niz̈aza Yoozza anazuma kamñinaca pjalzñiqui, niz̈aza chjojñiqui casticz tjuñicama. 
\p  
\v 10 Yoozqui juc'anti casticaquic̈ha jalla tiz̈ta z̈oñinaca, persun anawali pecñi kuzcama kamñi z̈oñinacami, niz̈aza jilirinacz̈quiz ana rispitñinacami. Jalla niz̈ta z̈oñinaca juc'anti castictaz̈ cjequic̈ha. Ninacaqui ancha lisuc̈ha, niz̈aza mit kuztan anawali paañic̈ha. Ninacaqui poderchiz arajpachquin z̈ejlñinacz̈quiz ana ekscu ararñic̈ha.  
\v 11 Yooz zuma anjilanacazti nii poderchiz arajpachquin z̈ejlñinacz̈quiz ararzjapa eksa, azziz anjilanacaz̈ cjenami. Niz̈aza zuma anjilanacaqui Yooz yujcquiziqui nii anawal z̈ejlñinacz̈ quintra ana uj tjojtunz pecc̈ha. 
\p  
\v 12 Jalla nii anawal kamñi z̈oñinacaqui animalaz̈takazza ana intintazñi kuzziz. Persun kucamakaz ojklayñic̈ha, Yoozquin ana juyzu paañi. Q'uit animalanacaqui z̈ejlc̈ha, tanz̈ta cjisjapa, niz̈aza conta cjisjapa. Jalla niz̈taz̈ nii z̈oñinacaqui. Ana zizta puntuquiztan quintra chiic̈ha. Anawali kamcan nii anawali kamtiquiztan animalanacaz̈takaz ticznaquic̈ha.  
\v 13 Niz̈aza ninacaqui parti z̈oñinacz̈quiz sufriskatchiz̈ cjen, zakaz sufraquic̈ha. Niz̈aza anawal pjijztanacquiz kamcan, “Cuntintutc̈ha wejrnacqui” cjican chiiñic̈ha. Anc̈hucqui ninacz̈tan z̈ejlzqui azipanc̈ha, niz̈aza ninacz̈ cumpant'izmi anc̈hucaltajapa ana walic̈ha. Ninacaqui anc̈hucaquiz incallz ancha juztazza, anc̈huc criichinacz̈tan chica z̈ejlzjapa.  
\v 14 Nii anawali z̈oñinacaqui tsjii maataka cherz̈cu, panz̈ adulterio paaz pecc̈ha. Niz̈ta anawali paaznacquiztan anapan ochñic̈ha. Incallchuc maatakanacz̈quiz adulterio kjutñi chjichñic̈ha. Jalla niz̈ta z̈oñinacaqui adulteriuquiz ojklayñi, niz̈aza paaz tanzñi niz̈aza c̈hjul uj paazmi ancha atñipanikazza. Jalla niz̈ta cjiicjiñinacaqui infiernuquin ojkñi z̈oñinacac̈ha.  
\v 15 Yooz jiczquiztan zarakchic̈ha. Nekztan uj paacan ojklayñic̈ha. Tuquitan tsjii anawali profeta z̈elatc̈ha, Balaam cjita, Beorz̈ majch. Jalla niiqui anawali paatiquiztan paaz ganz pecchic̈ha. Jalla nii Balaam cjitaz̈ iratac̈ha ninaca ojklayñiqui.  
\v 16 Tsjii ana chiiñi aznuqui Balaamz̈quiz ujzic̈ha z̈oñz̈ tawkz̈tan, Balaam anawali paaz pecchiz̈ cjen. Jalla niz̈ta ujzñiz̈ cjen Balaamqui atajtatac̈ha niiz̈ anawali pinsita jaru ana paazjapa. 
\p  
\v 17 Wejr cjiwc̈ha, nii anawali tjaajiñi z̈oñinacaqui ana kjazziz tujz̈takazza. Ancha taku tjaac̈ha, pero anawira cumplic̈ha. Niz̈aza ninacac̈ha ana chijñichiz tsjiriz̈takaz, tjami chjichta tsjiriz̈takaz. Ninacaqui wiñayjapa casticta cjequic̈ha anawal tsokchi zumchiquiz chjatkatz̈cu.  
\v 18 Nii anawalinacaqui mitarazzi tawkchiz inapankaz chiiñic̈ha. Anawali paaznaca tjaajincan, niz̈aza anawali pecznaca tjaajincan uz̈ca anawal kamañquiztan zarakchinacz̈quiz wilta anawal kamañchiz kamkatz pecñic̈ha.  
\v 19 Wejtnac jaru cjee, cjiñic̈ha. Wejtnac jaru cjican, c̈hjulu paaznacami walikazza cjiñic̈ha. Pero ninacapacha anazum kamañanac jaru cuztumrazzic̈ha. Jakziltat anawal kamañ jaru cuztumrazac̈haja, jalla niic̈ha nii anawal kamañ mantuquiz z̈ejlñiqui.  
\v 20 Uc̈hum liwriiñi Jesucristo Jilirz̈quin criiz̈cu, yekjap nii anawal tjaajñinacaqui liwriitac̈hani anawali paatanacquiztanami, niz̈aza anazuma kamtiquiztanami. Liwriita cjiscu wilta anazum kamañquiz mitisac̈haja, niz̈aza anazuma kamaña cuztumrazac̈haja, niiz̈ tuquita anawal kamañquiztan juc'anti anawaliz̈ cjequic̈ha.  
\v 21 Ninacaqui Yooz zuma kamaña ana pajtasaz̈ niiqui, ninacz̈taqui tsjan cusaz̈ cjitasac̈ha. Pero ninacaqui Yooz zuma tjaajinta catokchic̈ha. Jaziqui Yooz zuma kamaña pajz̈cu, quejpsic̈ha. Jalla niz̈tiquiztan ninacz̈taqui juc'ant anawira waliz̈ cjequic̈ha.  
\v 22 Ninacaqui Yooz tawk jaru ojklaychitac̈ha. Nekztan Yoozquiztan quejpsic̈ha ninacaqui. Jaziqui nii quejpsñi z̈oñinacaqui pacunacaz̈takazza. Pacunacaqui jotz̈cu persun joti lujlz̈a. Niz̈aza tsjii ajunta cuchiqui wilta ljajzpiquizpacha zumt'ic̈ha. Jalla niz̈tac̈ha nii anawal tjaajñinacaqui. 
\c 3  
\s1 JESUCRISTUZ̈ TJONZ PUNTU 
\p  
\v 1 Pecta jilanaca, cullaquinaca, jalla tiiz̈tan pizc wilta cartal anc̈hucaquin cjijrz̈cuc̈ha. Jalla tii pizc cjijrta cartaz̈ cjen anc̈hucaquiz werar razunz̈tan pinsiskatz pecuc̈ha.  
\v 2 Tuquitan Yooztajapa chiiñi zuma profetanacaqui Yooz puntu mazinchic̈ha. Niz̈aza wejrnac apostolonacaqui liwriiñi Jesucristo Jiliriz̈ mantitanaca anc̈hucaquiz tjaajinchinc̈ha. Jaziqui tjapa nii tjaajintanaca cjuñzna. 
\p  
\v 3 Profetaz̈ mazinta timpuz̈ tjontan z̈oñinacaqui tjonaquic̈ha. “Yooz puntu tjaajintanaca inapanikazza” cjican burlasaquic̈ha. Nii burlasñi z̈oñinacaqui persun anawal kuzcama ojklayaquic̈ha, niz̈aza persun kuzcama kamaquic̈ha. Anc̈hucqui jalla nii zumpacha ziz waquizic̈ha.  
\v 4 Ninacaqui pewcznaquic̈ha, tuz̈ cjican: “¿Kjaz̈t cjisit Cristojo tjonaquic̈ha cjetla pero? Uc̈hum tuquita atchi ejpnacaqui kamchic̈ha; nekztan ticzic̈ha. Tii muntu kalltiquiztanpacha tjapa niz̈tapankaz watc̈ha. Cristuc anaz̈ tjonasac̈ha”. Nuz̈ cjicanz̈ chiyaquic̈ha ninacaqui.  
\v 5 Pero tuquita timpuquiztanpacha arajpachaqui Yooz chiitiquiztanpacha paatac̈ha. Jalla nii Yooz paatami, ninacaqui anaz̈ naaza. Niz̈aza Yooz mantitiquiztanpacha tii yokaqui kjazquiztan jeczic̈ha.  
\v 6 Niz̈aza kjaz juyzu tjontiquiztan nekztanpachaz̈ tii muntu yoka kjazquiz katz̈cu pertissic̈ha.  
\v 7 Tii muntuquiz z̈ejlñi yokami pachanacami ujz̈tan ujzjapa chjojta z̈ejlc̈ha. Yooz mantita jaru zakaz niz̈ta wataquic̈ha. Jalla nii ujqui ultimu pjalz tjuñquiz ujaquic̈ha. Nii pjalz tjuñquiz zakaz anazum kamañchiz z̈oñinaca castictaz̈ cjequic̈ha nii ujquizpacha. 
\p  
\v 8 Pecta jilanaca, cullaquinaca, tiizakaz anaz̈ tjatzna. Yooz Jilirz̈tajapa tsjii noojiqui warank watanaca cuntac̈ha. Niz̈aza warank watanacaqui tsjii nooj cuntac̈ha. Yooztajapa timpunacaqui niztac̈ha.  
\v 9 Yekjap z̈oñinacaqui tuz̈ cjic̈ha, Yooz Jiliriqui niiz̈ tjaata taku ana uri cumplic̈ha. Jilanaca, jalla nii chiitaqui anazuma razunac̈ha. Antiz Yoozqui anc̈hucaltajapa pasinziz kuzziz z̈ejlc̈ha. Yoozqui anaz̈ jakziltami casticz pecc̈ha. Antiz tjapa z̈oñinaca “ujchizpantc̈ha” cjican chiikatz pecc̈ha, ninaca liwriita cjisjapa. Jalla niz̈tiquiztan ana uri tjonc̈ha. 
\p  
\v 10 Pero Jesucristo Jiliriz̈ tjonz tjuñiqui tiripintitz̈ tjonaquic̈ha, tsjii tjañiz̈takaz. Jalla nii tjuñquiziqui tii muntu pachanacaqui tsjii tsucchuc jorjorñiz̈tan tucuzinz̈naquic̈ha. Tjuñimi jiizmi warawarami liwj kataquic̈ha; ujta cjequic̈ha. Niz̈aza tii muntu yokami tjapa z̈ejlñinacz̈tan pacha ujz̈tan tankattaz̈ cjequic̈ha. 
\p  
\v 11 Jalla niz̈ta liwj tjatantaz̈ cjequic̈ha. Jalla niz̈tiquiztan anc̈hucqui Yooz kuzcama juc'anti kamz waquizic̈ha, niz̈aza Yooz irata zuma kamañchiz cjis waquizic̈ha. Jalla niz̈ta kamañchiz waquizic̈ha anc̈hucqui.  
\v 12 Yooz tjonz tjuñi tjewz̈na, niz̈aza zumapan langz̈na, Yooz apura tjonzjapa. Nii tjonz tjuñquiziqui tii muntu pachanacami ujz̈tan tankattaz̈ cjequic̈ha. Niz̈aza tjuñi jiizmi warawarami ujquiz liwj jiñkattaz̈ cjequic̈ha; nekztan liwj kataquic̈ha.  
\v 13 Pero uc̈humzti ew arajpachami yokami tjewz̈a, Yooz chiita tawk jaru. Nii ew arajpachquinami yokquinami tjappacha Yooz irata zumacamaz̈ cjequic̈ha. Ana zinta anawaliqui cjequic̈ha. 
\p  
\v 14 Pecta jilanaca, cullaquinaca, Yooz tjonz tjuñi tjewz̈can, zuma kamañquiz kuz tjaa, niiz̈ yujcquiz ana ujchiz cjisjapa. Nekztan Yooztan uc̈humnacatan walikaz cjequic̈ha.  
\v 15 Jalla tii cjuñzna. Yooz Jiliriqui anc̈hucaltajapa pasinziz kuzziz z̈ejlc̈ha, anc̈huc liwriita cjisjapa. Jalla nii puntuquiztan zakaz Pablo jilaqui anc̈hucaquin cjijrchic̈ha. Yoozqui niiz̈quiz zizñi zizñi niz̈aza zuma intintazñi kuzziz cjiskatchic̈ha. Jalla nii ziztanac jaru uc̈humz̈ pecta Pabluqui anc̈hucaquin cjijrchic̈ha.  
\v 16 Weriz̈ chiita puntunacquiztan Pabluzakaz chiichic̈ha tjapa niiz̈ cjijrta cartanacquiz. Parti Pabluz̈ cjijrtanacaqui ch'aman intintazzucac̈ha. Jalla niz̈ta ch'aman intintazzucanacaqui ana zizñi z̈oñinacami, niz̈aza pizc kuzziz z̈oñinacami tsjii kjutñiz̈ intintazza. Niz̈aza parti Yooz takunaca zakaz tsjii kjutñiz̈ intintazza. Jalla nuz̈ tsjii kjutñiz̈ intintazcu, ninacaqui ninacz̈tajapa juc'ant ana zumquiz cjissa; nekztan castictaz̈ cjequic̈ha. 
\p  
\v 17 Pecta jilanaca, cullaquinaca, ima tii muntuquiz tiz̈tanaca watan tii puntunaca anc̈hucaquiz zizkatchinc̈ha. Jaziqui anawali incallñi z̈oñinacaqui z̈elaquic̈ha. Nii anawali incallñi z̈oñinacaqui Yooz mantitanaca anapan cassa. Jalla niz̈tiquiztan ninacz̈quiztan cuit'aza, ana tsjii kjutñi chjichta cjisjapa. Anawalinac kjutñi chjichta cjequiz̈ niiqui, anc̈hucqui ana tjurt'iñi kuzziz cjequic̈ha.  
\v 18 Anc̈hucqui uc̈hum liwriiñi Jesucristo Jilirz̈quiz juc'ant zumaz̈ pajaquic̈ha. Niz̈aza niiz̈ puntu juc'ant zizaquic̈ha. Niz̈aza juc'ant zuma kamañchiz cjee. Uc̈hum Jesucristo Jiliriqui honorchizkaj cjila anztajapami wiñayajapami. Jalla nuz̈oj cjila. Amén.