\id 1TI - Chipaya NT -Bolivia 2009 (DBL -2013) \ide UTF-8 \h 1 TIMOTEO \toc1 Primera Carta a Timoteo \toc2 1 Timoteo \toc3 1Ti \mt2 PRIMERA CARTA DEL APOSTOL SAN PABLO A \mt1 TIMOTEO \c 1 \p \v 1 Wejrtc̈ha Pablutqui. Timoteo jila, amquin tii cartal cjijrz̈cuc̈ha. Jesucristuz̈ illzta apostultc̈ha wejrqui. Jalla nii apóstol puestuquin uc̈hum Liwriiñi Yooz Ejpqui Jesucristo Jilirz̈tanpacha wejr utchic̈ha. Jesucristo Jiliriz̈ tjonz tjuñi tjewz̈a uc̈humqui. \v 2 Timoteo jila, amquin tii cartal cjijrz̈cuc̈ha. Weriz̈ Yooz taku paljaytaz̈ cjen amqui tjapa kuztan Yoozquin criichamc̈ha. Jaziqui wejt maati cuntamc̈ha. Amc̈ha lijitum criichi z̈oñiqui. Yooz Ejpz̈tan uc̈hum Jesucristo Jilirz̈tan amquiz zumaj yanapla, niz̈aza amquiz okzla, niz̈aza walikaj kamkatla. \s1 ANA WALI TJAAJIÑINACA TJONAQUIC̈HA \p \v 3 Tuquiqui ima Macedonia yokquin ojkcan wejrqui amquiz rocchinc̈ha, Efeso wajtquin z̈elajo. Anziqui wilta rocuc̈ha nicju tiraka z̈elajo. Jalla nicju z̈ejlcan, amqui tsjii z̈oñinacz̈quiz chiiz̈inz waquizic̈ha. Jalla ninacz̈quiz amqui mantaquic̈ha, Yooz taku ana iya tsjii kjutñi tjaajnajo. \v 4 Niz̈aza mantaquic̈ha z̈oñiz̈ pinsita quintunacquizimi ana kuz tjaajo. Niz̈aza tuquita atchi ejpnacz̈ tjuunac puntuquizimi anapanc̈ha nijcchucqui kuz tjaazqui. Jalla nuz̈ amqui mantaquic̈ha. Jalla niz̈ta parlanacaqui panz̈ inakazza, kuznaca turwayskatñi alajac̈ha. Niz̈ta parlanacaqui anapanz̈ uc̈humnacaquiz yanapc̈ha, Yooziz̈ tjaata kamañquiz juc'ant zuma kamajo. Yooz kamañquiz kamcan, Yoozquin kuzziz cjicjiñi, jalla niiz̈ walc̈ha. \p \v 5 Jalla nuz̈ wejrqui mantuc̈ha, criichi z̈oñinacaz̈ porapat zuma munazajo. Zuma kuzzizpan, niz̈aza ana c̈hjul ujmi cjuñz̈cu, zuma munaziz waquizic̈ha. Niz̈aza tjapa kuztan Yoozquin criican, jalla niz̈ta kuzziz z̈oñinacaqui zuma munaziz waquizic̈ha. \v 6 Jalla niz̈ta zuma kamañquiztan tsjii z̈oñinacaqui chekachuc ojkchic̈ha. Jaziqui parleeka parlis pecñic̈ha, ana c̈hjulquiz waquiziñi. \v 7 Niz̈aza walja zizñi Moisés lii tjaajiñi cjis pecc̈ha. Ninacazti tjaajinz̈cupacha, persuna chiita ana intintassa. Niz̈aza “Tuz̈upanc̈ha werar razunaqui” cjiscupacha, ana panz̈ niiz̈ persuna tjaajintaqui intintazasac̈ha. \p \v 8 Yooziz̈ Moisesquiz tjaata liinacaqui zumac̈ha, Yooz kuz jaru lijituma tjaajintaz̈ niiqui. \v 9 Niz̈aza lii puntuqui tuz̈uc̈ha: Moisés liinacaqui anatac̈ha ut'ayta zuma kamñi z̈oñinacz̈tajapa. Antiz ana zuma kamñi z̈oñinacz̈tajapa ut'aytatac̈ha. Zuma paaznaca ana juyzu paañi z̈oñinacz̈ta, niz̈aza Yooz kuzcama ana kamñi z̈oñinacz̈ta, niz̈aza ana Yooz sirwiñinacz̈ta, niz̈aza uj paañinacz̈ta, niz̈aza Yooz kamañ jicz ana pecñinacz̈ta, niz̈aza ana Yooz rispitñinacz̈ta, niz̈aza persun maa ejp conñinacz̈ta, niz̈aza z̈oñi conñinacz̈ta, \v 10 niz̈aza adulteriuquiz ojklayñi z̈oñinacz̈ta, niz̈aza luctakpora ana wali paasñinacz̈ta, niz̈aza z̈oñi tanñinacz̈ta, niz̈aza toscara chiiñinacz̈ta, niz̈aza toscar juramentuz̈tan chiiñinacz̈ta, niz̈aza tjapa zuma tjaajintanacz̈ quintra paañinacz̈ta, jalla ninacz̈ta ut'aytatac̈ha Moisés liinacaqui. \v 11 Zuma tjaajintanacaqui zuma liwriiñi Yooz tawk jaruc̈ha. Yooz takuqui azzizza, z̈oñinaca liwriizjapa. Walja zuma Yoozqui wejtquiz nii liwriiñi taku zizkatchic̈ha, niz̈aza wejtquiz cumpjiichic̈ha, z̈oñinacz̈quiz paljayajo. \s1 JESUCRISTUQUI PABLUZ̈QUIZ ANCHA OKZIC̈HA \p \v 12 Yooz taku paljayajo, Jesucristo Jiliriqui wejtquiz yanapchic̈ha. Jalla niz̈tiquiztan Jesucristuz̈quin sparaquiz̈ cjiwc̈ha. Jesucristuqui wejr cumpliñipan cherzic̈ha. Jalla niz̈tiquiztan apóstol puestuquiz wejr utchic̈ha nii sirwajo. \v 13 Tuquiqui wejrqui Jesucristuz̈ quintra chiiñtac̈ha, niz̈aza niiz̈ quintra iñariñtac̈ha. Niz̈aza Jesucristuz̈quin criichi z̈oñinacz̈ quintra payiñtac̈ha. Jalla nuz̈ paanami niz̈aza chiyanami, Yoozqui wejtquiz okzic̈ha. Ima Jesucristuz̈quin criican, jalla nuz̈ ana wali ojklaychintac̈ha ana ultim werara zizcu. Jalla niz̈tiquiztan Yoozqui wejtquiz ancha okzic̈ha. \v 14 Uc̈hum Yooz Jiliriqui wejtquiz walja zuma okzic̈ha. Jaziqui Jesucristuz̈ cjen, Yoozquin tjapa kuztan cjissinc̈ha wejrqui, niz̈aza Yooztan ancha munaziñi kuzziz cjissinc̈ha. \p \v 15 Jesucristuqui tii muntuquiz tjonchic̈ha, ujchiz z̈oñinaca liwriyi. Jalla nii takuc̈ha ultim razunaqui. Niz̈aza tjappachaqui nii taku catokz waquizic̈ha. Tjapa ujchiz z̈oñinacz̈quiztan wejrtc̈ha juc'ant ujchiztqui cjiwc̈ha. \v 16 Jalla nuz̈ cjenami, Yoozqui wejr zumapan okzic̈ha, Jesucristuz̈ zuma pasinziz kuz tjeezjapa. Weriz̈ cjen, tjappacha zizaquic̈ha, Jesucristo ancha zuma pasinziz kuzziz, jalla nii. Tjapa ujchiz z̈oñinacz̈japa Jesucristuqui zuma pasinziz kuzzizza. Cristuz̈quin criyaquiz̈ niiqui, c̈hjul z̈oñimi Yooztan wiñaya kamaquic̈ha. \v 17 Jalla niz̈tiquiztan tjapa mantiñi Yooz honoraz̈ wiñayjapa waytitaj cjila. Yoozqui wiñaya z̈ejlc̈ha, niz̈aza ana ticznasac̈ha, z̈oñz̈ c̈hjujcquiz anaz̈ cherta cjesac̈ha. Tsjiillapanikazza Yoozqui, niz̈aza niipanc̈ha juc'ant tjappacha zizñiqui. Jalla nii Yooz honora wiñay wiñaya tirapan waytitaj cjila. Jalla nuz̈oj cjila. Amén. \p \v 18 Timoteo jila, wejt maati cuntamc̈ha. Zuma zultatuz̈takaz Yoozquin tjurt'iñi kuzziz cjee. Niz̈aza Satanás partiranacz̈ quintra cjee. Tuquiqui tsjii criichi jilanacaqui am puntuquiztan Yooziz̈ tjaata taku chiichic̈ha. Nii takunaca cjuñzna. Jalla nii tawk jaru amqui Yooz sirwiz puestuquiz utz̈tac̈ha. Jaziqui amquin tii chiiz̈inuc̈ha. \v 19 Tirapan Yoozquin tjapa kuzziz cjee, niz̈aza zumapan kama. Zuma kamcan, am kuzquiz ana ujnaca cjuñznaquic̈ha. Yekjapaqui persun kuzquiz ujnaca cjuñz̈cu, ana juyzu paachic̈ha, nii ujquiztan ana jaytichic̈ha. Jalla niz̈tiquiztan ninacaqui ana uj tantiyasñi kuzziz cjissic̈ha, nekztan Yooz kamañ jiczquiztan zarakchic̈ha. \v 20 Jalla niz̈ta paachic̈ha Himeneuz̈tan niz̈aza Alejandruz̈tan. Jalla ninaca Satanás kjarquiz intirjichinc̈ha, ana Yooz quintra iya chii zizajo. \c 2 \s1 YOOZQUIN MAYIZIZ PUNTU \p \v 1 Tsjiiz̈tan cjiwc̈ha. Primeraqui chiiz̈inz̈cuc̈ha jalla tuz̈: Tjapa z̈oñinacz̈ta Yoozquin mayizaquic̈ha, niz̈aza zuma kuztan Yooztan parlaquic̈ha, niz̈aza tjapa z̈oñinacz̈tajapa Yoozquiztan roct'iz̈inaquic̈ha, niz̈aza Yoozquin sparaquiz̈ cjequic̈ha. Jalla nuz̈ mayiziz waquizic̈ha tjapa z̈oñinacz̈tami, \v 2 niz̈aza tjapa pajk mantiñi jilirinacz̈tami, niz̈aza tjapa jilirinacz̈tami. Jalla nuz̈ mayiziz waquizic̈ha, walikaz kamajo. Jalla nuz̈ kamcan, Yoozquin sirwiñi kuzziz cjee, niz̈aza niz̈ta kuzziz kamcan jilirinacz̈quiz rispitñi kuzziz cjee. \v 3 Jalla niz̈ta kamaquiz̈ niiqui, walikazza. Niz̈aza jalla niz̈ta kamz cjen, uc̈hum Liwriiñi Yoozqui cuntintuz̈ cjequic̈ha. \v 4 Uc̈hum Liwriiñi Yoozqui tjapa z̈oñinaca liwriita cjis, jalla nii pecc̈ha. Niz̈aza tjapa z̈oñinaca werar taku pajñi cjis, jalla nii zakaz pecc̈ha. \v 5 Tsjii Yoozpanikaz z̈ejlc̈ha. Niz̈aza z̈oñinacaltajapa tsjii Yoozquiz pjalt'iz̈iñi z̈ejlc̈ha. Jalla niic̈ha Jesucristuqui. Uc̈hum irat z̈oñi cjiscu, \v 6 tjapa tii muntuquiz z̈ejlñi z̈oñinacz̈ laycu ticzic̈ha. Jalla nuz̈ ticz̈cu ninacz̈ ujquiztan pacchic̈ha. Yooz pinsita timpu tjonz̈cu, jalla nekztan nii zuma liwriiñi quintuqui z̈oñinacz̈quiz paljaytatac̈ha. \v 7 Jalla nii Jesucristuz̈ z̈oñinacz̈ laycu ticzi quintu wejrzakaz paljayuc̈ha. Niz̈ta paljayajo, Yoozqui wejr apóstol puestuquiz utchic̈ha. Wejr utchic̈ha werar liwriiñi Yooz taku tjaajnajo ana judío z̈oñinacz̈quin. Ninacz̈quin Yooz taku paljayiñc̈ha, ninaca Jesucristuz̈quin kuzziz cjeyajo. Wejrqui Jesucristuz̈quin criichiz̈ cjen weraral chiyuc̈ha. Ana toscaral chiyuc̈ha. \p \v 8 Tjapa kjutñi z̈oñinacaqui Yoozquin mayiziñi cjic̈haj cjiwc̈ha. Jalla niil pecuc̈ha. Zuma kuzziz, niz̈aza ana z̈awjchi kuzziz, niz̈aza ana ch'aazñi kuzziz, niz̈aza zuma kuztan kjara waytizcu, jalla nuz̈ mayiziñi cjic̈haj cjiwc̈ha. \s1 MAATAKZ̈ PUNTU \p \v 9 Niz̈aza maatakanacami zuma kuzziz cjispanc̈ha. Zuma zquitinaca anaz̈ juc'anti cujtzni cjic̈haj cjiwc̈ha. Anac̈ha iziwiri maatakaz̈takaz cujtzqui. Niz̈aza anac̈ha ricachuz̈takaz cujtzqui. Anaz̈ ancha ist'asaquic̈ha. Niz̈aza maatakanacami anac̈ha persun ach charquiz ancha quitsnacchiz cjequic̈ha. Niz̈aza anaz̈ ancha c̈hjul alajanacchiz cjequic̈ha. Niz̈aza anaz̈ ancha zquitinaca cujt cutaquic̈ha. Jalla niz̈ta zquitinacquizimi niz̈aza cusasanacquizimi ana kuz tjaa. \v 10 Antiz zuma kamzquin kuz tjaa. Zuma kamz waquizic̈ha Yoozquin kuzziz criichi maatakanacami. \v 11 Niz̈aza maatakanacami ch'uju z̈ejlcan tjaajinta takunaca catokspanc̈ha, ana c̈hjulu chiizcu. \v 12 Niz̈aza z̈oñinaca cheran maatakanacami luctakanacz̈quiz anaz̈ tjaajinz waquizic̈ha; niz̈aza anaz̈ mantiz waquizic̈ha. Niz̈aza maatakanacz̈laqui ch'uju z̈ejlcan luctakanacz̈ takunaca nonspanc̈ha. \v 13 ¿Kjaz̈tiquiztan niz̈ta cjesajo, maatakanacz̈ puntuquiztanajo? Jalla tuz̈uc̈ha niiqui. Tuquiqui Yoozqui Adán paachic̈ha. Nekztan Eva paachic̈ha. \v 14 Niz̈aza Adanz̈quiz anatac̈ha incallta. Antiz Evaquiztac̈ha incallta. Incallskattiquiztan Evaqui ujquiz tjojtsinc̈ha. \v 15 Maatakanacami maatakz̈ kamañquiz kamz waquizic̈ha, maatinaca majtcan. Niz̈aza Yoozquin kuzziz, niz̈aza zuma munaziñi kuzziz, niz̈aza ana ujchiz zuma kamañ kuzziz, niz̈aza humilde kuzziz, jalla niz̈ta kuzzizpan kamaquiz̈ niiqui, liwriita cjequic̈ha maatakanacami. \c 3 \s1 ICLIZ JILIRZ̈ PUNTU \p \v 1 Jakziltat icliz jilirz̈ puestuquiz luz pecc̈haja, jalla niiqui zuma Yooztajapa langz pecñic̈ha niiqui. Jalla nii takuqui ultim werarac̈ha. \v 2 Jalla niz̈tiquiztan jakziltat icliz jilirz̈ puestuquiz luzaja, jalla niiqui zuma kamañchiz z̈oñi cjispanc̈ha. Jalla niz̈tiquiztan z̈oñinacaqui niiz̈ puntu cjiñicha, “Zuma z̈oñipancha, ana ujchiz” cjicanaqui. Niiqui tsjaa tjunchizpanikaz cjispanc̈ha. Niz̈aza ewjazñi kuzziz cjispanc̈ha. Niz̈aza zumapan kamñi kuzziz cjispanc̈ha. Niz̈aza zuma kamtiquiztan rispittaz̈ cjispanc̈ha. Niz̈aza tjonzñi z̈oñinacz̈quiz kjawzñi kuzziz cjispanc̈ha. Niz̈aza zuma tjaajiñiz̈ kuzziz cjispanc̈ha. \v 3 Niz̈aza anapan licñi kuzziz cjispanc̈ha. Niz̈aza ana kichjasñi kuzziz cjispanc̈ha, antiz pasinziz kuzzizpan cjispanc̈ha. Niz̈aza anapan ch'aazñi kuzziz cjispanc̈ha. Niz̈aza paaz pecñi kuzziz anapan cjispanc̈ha. \v 4 Niz̈aza niiz̈ kjuychiz z̈ejlñi z̈oñinaca zuma irpiñi cjispanc̈ha. Niz̈aza niiz̈ maatinacami zuma cazñi niz̈aza walja rispitñi, jalla niz̈ta kuzziz cjispanc̈ha. \v 5 Tsjii icliz jiliriqui niiz̈ persun kjuy z̈oñinaca ana zuma irpiñi atchucaz̈laj niiqui, jalla niz̈tiquiztan, ¿jaknuz̈t Yooz icliz z̈oñinaca zuma irpasajo? \v 6 Niz̈aza tsjii icliz jiliriqui anaz̈ uzca criichi z̈oñi cjesac̈ha. Uzca criichi cjesaz̈ niiqui, mitarazi kuzziz cjisnasac̈ha, nekztanaqui ujquiz tjojtsnasac̈ha. Niz̈aza jaknuz̈t diabluqui niiz̈ ujquiztan casticta cjec̈haja jalla niz̈ta irata nii z̈oñiqui uj paatiquiztan casticta cjequic̈ha. \v 7 Niz̈aza icliz jilirinacaqui tjapa z̈oñinacz̈quiz rispittaz̈ cjispanc̈ha, criichi z̈oñinacami, ana criichi z̈oñinacami. Ana criichi z̈oñinacaqui niiz̈quiz ana rispitaquiz̈ niiqui, juc'anti niiz̈quin ujnacaz̈ tjojtnasac̈ha. Jalla niz̈tiquiztan diabluqui nii z̈oñz̈quiz ujquiz tjojtskatasac̈ha. \p \v 8 Jalla niz̈ta zuma kamañchiz zakaz cjispanc̈ha iclizquiz yanapñi z̈oñinacaqui. Jalla ninacaqui zuma rispitta kamañchiz cjispanc̈ha. Niz̈aza ninacz̈ chiita taku cumpliñi kuzziz cjispanc̈ha. Niz̈aza anapan licñi kuzziz cjispanc̈ha. Niz̈aza paaz pecñi kuzziz anapan cjispanc̈ha. \v 9 Tuquiqui Jesucristuz̈ puntumi niz̈aza niiz̈quin kuzziz puntumi ana tjapa ziztatac̈ha. Anziqui kjanacama paljaytac̈ha. Nii Jesucristuz̈ puntu zuma zizñi kuzziz cjispanc̈ha. Nii iclizquiz yanapñi z̈oñinacaqui ana uj paañi kuzziz cjispanc̈ha. \v 10 Tsjii z̈oñiqui iclizquiz yanapz puestuquiz luzasaz̈ niiqui, primeraqui niiz̈ persun kamaña zumpacha tantiitaz̈ cjispanc̈ha. Nekztan zuma kamañchiz cjequiz̈ niiqui, iclizquiz yanapz puestuquiz luzasac̈ha. \v 11 Jalla niz̈ta zuma kamañchiz cjispanc̈ha iclizquiz yanapñi maatakanacami. Nii maatakanacami walja rispitta kamañchiz cjispanc̈ha. Niz̈aza anapan ana wal quintu joojooñi kuzziz cjispanc̈ha. Niz̈aza ewjazñi kuzziz cjispanc̈ha. Niz̈aza tjapa cumpliñi kuzziz cjispanc̈ha. \v 12 Niz̈aza iclizquiz yanapñi z̈oñinacaqui tsjaa tjunchiz alajakaz cjispanc̈ha. Niz̈aza niiz̈ persun maatinacami kjuy z̈oñinacami zumapanz̈ irpiñi cjispanc̈ha. \v 13 Jakziltat iclizquiz yanapz puestuquiz zuma cumplac̈haja, jalla niiqui zuma honorchiz cjequic̈ha, niz̈aza juc'ant tjup kuzziz cjisnaquic̈ha, Jesucristuz̈quin criiz puntuquiztan paljayzjapa. \p \v 14-15 Wajilla wejrqui amquin ojkz pecuc̈ha. Pero anat uri tjonz atuc̈hani. Jalla niz̈tiquiztan tii takunaca amquin cjijrz̈cuc̈ha. Tii takunacaz̈ cjen amqui zizaquic̈ha, jaknuz̈t Yoozquin criichi z̈oñinacaqui parti Yooz maatinacz̈tan kamz waquizic̈haja, jalla nii. Yooz maatinacac̈ha werar z̈ejtñi Yooz iclizaqui. Yooz icliz z̈oñinacaqui werar Yooz tawkquizimi tjurt'iñi kuzzizpanc̈ha. \v 16 Anaz̈ jecmi kjaz̈ cjesac̈ha tii puntuquiztan. Tuquiqui Jesucristuz̈ puntumi, niz̈aza Yooz kamañ puntumi ana tjapa ziztatac̈ha. Anziqui nii puntunacami kjanacama ziztac̈ha. Tii Jesucristuz̈ puntunacac̈ha chekanaqui. Jesucristuqui uc̈hum irat curpuchiz tjonchic̈ha tii muntuquiziqui. Jacatattiquiztan Yooz Espíritu Santuqui ticlarchic̈ha niiz̈ puntuquiztan, lijituma Yooz kamañchizza, jalla nii. Niz̈aza Yooz anjilanacaqui Jesucristo cherchic̈ha. Niz̈aza tjapa tii muntuquiz z̈ejlñi z̈oñinacz̈quiz Jesucristuz̈ puntuquiztan paljaytac̈ha. Niz̈aza tjapaman z̈oñinacaqui niiz̈quiz criichic̈ha. Niz̈aza Jesucristuqui tsewc arajpachquin wilta quejpchic̈ha. Jalla nii puntunacac̈ha chekanaqui. \c 4 \s1 ZUMA TJAAJINTA TAKUNACA \p \v 1 Tsjii puntu cjesac̈ha. Yooz Espíritu Santuqui kjanapacha intintazkatchic̈ha jalla tuz̈u: Ima Jesucristuz̈ wilta tjonan, yekjap criichinacaqui Yoozquin criizquiztan zarakaquic̈ha. Tsjii kjutñi irpitaz̈ cjequic̈ha incallñi zajranacaz̈ cjen, niz̈aza nii ana wal zajranacz̈ tjaajintaz̈ cjen. \v 2 Nii zajranacaz̈ mantita z̈oñinacaqui incallñi kuzziz cjican toscar takunaca paljayaquic̈ha. Niz̈aza ninacz̈ toscar takunaca nonz̈cu, yekjap werar Yoozquin criichinacaqui Yoozquiztan tsjii kjutñi zarakaquic̈ha. Nii zajranacaz̈ mantita z̈oñinacaqui ujquiztan ana sint'iñi kuzziz cjequic̈ha, niz̈aza ana uj naazñi kuzziz cjequic̈ha. \v 3 Nii ana wal z̈oñinacaqui anapanz̈ lucutjiñi zalzqui cjican mantaquic̈ha. Niz̈aza tsjii c̈hjerinaca lujlzmi, anapanz̈ lulzqui, cjican mantaquic̈ha. Nii incallñi z̈oñinacaqui jalla nuz̈ cjequic̈ha, pero Yoozqui nii c̈hjeri tjaachic̈ha, z̈oñinacaz̈ lulajo. Jalla niz̈tiquiztan Yoozquin criichinacami werar Yooz tawkquiz criichinacami nii c̈hjeri lulasac̈ha Yoozquin sparaquiz̈ cjiz̈cu. \v 4 Tjapa Yooziz̈ tjaata c̈hjerinacaqui walipankazza. Yoozquin sparaquiz̈ cjiz̈cu lulasac̈ha. Anapanc̈ha “Lujlzjapac̈ha anawaliqui” cjizqui. \v 5 Yoozquin sparaquiz̈ cjiz̈cu, niz̈aza Yooz taku chiiz̈cu, c̈hjul c̈hjerimi walipankaz cjesac̈ha, lujlzjapa. \v 6 Jalla nii weriz̈ tjaajinta takunaca criichi z̈oñinacz̈quiz tjaajnaquic̈ha amqui. Nekztan amqui Jesucristuz̈tajapa zuma sirwiñim cjequic̈ha. Yooz tawk jaru, niz̈aza Yooz puntu zuma tjaajintanac jaru zuma kamchamc̈ha. Niz̈aza zuma tjaajnaquiz̈ niiqui, juc'ant zuma kamañchiz cjequic̈ha. \v 7 Ana wal quintumi niz̈aza zumzu z̈oñinacz̈ quintumi anapan nonznaquic̈ha. Antiz Yooz kuzcamapankaz kamzquinc̈ha kuz tjaazqui. \v 8 Curpu ejercicio paakatzqui curpuquizkaz yanapc̈ha. Yooz kuzcama kamzqui curpuquizimi kuzquizimi tjappachquizpanz̈ yanapc̈ha. Niz̈aza tii muntuquiz kamz z̈ejtzquizimi arajpach muntuquiz kamz z̈ejtzquizimi yanapc̈ha. \v 9 Jalla werar razunac̈ha nii takuqui. Jalla niz̈tiquiztan catokz waquizic̈ha. \v 10 Uc̈humqui z̈ejtñi Yoozquin criichiz̈ cjen tjewznaquic̈ha arajpachquin Yooztan kami ojkzjapa. Jalla nuz̈ tjewz̈can, uc̈humqui Yoozta ancha langz̈a niz̈aza sufric̈ha. Jalla nii z̈ejtñi Yoozza ultim werar Liwriiñiqui. Niiz̈quin criichinacaqui liwriita cjequic̈ha. Niz̈aza tjapa z̈oñinacaqui liwriita cjesac̈ha, niiz̈quiz criyaquiz̈ niiqui. \p \v 11 Jalla nii puntu tjaajintanaca mantaquic̈ha, niz̈aza tjaajnaquic̈ha amqui. \v 12 Amqui tjowaz̈ cjenami z̈oñinacz̈quiz rispitskataquic̈ha, amiz̈ zuma kamtiquiztan. Amqui zumapan kamaquic̈ha, niz̈aza zumapan chiyaquic̈ha, niz̈aza z̈oñinacz̈tan zuma munazaquic̈ha, niz̈aza Yoozquin tjapa kuzzizpan cjequic̈ha, niz̈aza lijitum kamañchiz cjequic̈ha. Nekztan jaknuz̈t amqui zuma kamc̈haja, jalla nii cherz̈cu, parti criichi z̈oñinacaqui am iratapacha zakaz zuma kamasac̈ha. \v 13 Niz̈aza wejt tjonzcama, parti criichi z̈oñinacz̈quin Yooz taku liizinzjapa kuz tjaaquic̈ha. Niz̈aza Yooz taku liiz̈cu parti criichi z̈oñinacz̈quin zumpacha chiiz̈inaquic̈ha. Niz̈aza ninacz̈quiz tjaajnaquic̈ha. \v 14 Tuquiqui icliz jilirinacaqui kjarz̈tan am juntuñ lanzic̈ha. Niz̈aza am puntuquiztan tsjii Yooziz̈ tjaata taku chiichic̈ha, “Yooz tjaata kamañchiz cjequic̈ha” cjicanaqui. Nekztan jalla niz̈ta Yooz kamañchiz amquiz cjiskatchic̈ha. Amqui nii Yooz kamaña ana cutznaquic̈ha. \p \v 15 Jalla nii am kamañ puesto cumplisjapa, tjapa kuz tjaaquic̈ha. Nii kamañ jaru kama. Jalla niz̈ta kamz cjen, amqui juc'ant juc'ant zuma kamaquic̈ha. Niz̈aza parti criichinacaqui am juc'ant zuma kamñiz̈ cjen nayaquic̈ha. \v 16 Jaziqui am persun kuzquizimi niz̈aza amiz̈ tjaajintanacquizimi cuitaza, zumapan cjisjapa. Weriz̈ chiiz̈intanaca tirapan cjuñzna. Jalla nuz̈ zuma cjuñznaquiz̈ niiqui, ultimquiziqui liwriitam cjequic̈ha. Niz̈aza amiz̈ tjaajinta catokchi z̈oñinacaqui liwriitaz̈ zakaz cjequic̈ha. \c 5 \s1 Z̈EW MAATAKANACZ̈ PUNTU \p \v 1 Tsjiilla cjesac̈ha. Irarchiz ejpnacz̈quiz ana ancha ujznaquic̈ha. Antiz persun ejpz̈takaz zuma tawkz̈tan chiiz̈inaquic̈ha, niiz̈ ana wali paatiquiztan jaytiskatzjapa. Niz̈aza parti luctak z̈oñinacz̈quiz persun jilanacz̈quiz chiiz̈intaz̈okaz chiiz̈inaquic̈ha. \v 2 Niz̈aza irarchiz maatakanacz̈quiz persun maaz̈takaz zuma rispitchiz razunz̈tan chiiz̈inaquic̈ha. Niz̈aza parti maatakanacz̈quiz persun cullaquinacz̈quiz chiiz̈intaz̈okaz chiiz̈inaquic̈ha, zuma kuztan. Maatakanacz̈quiztan zumapan pinsaquic̈ha. \p \v 3 Niz̈aza ultim t'akjir z̈ewanacz̈quiz okznaquic̈ha. \v 4 Tsjaa z̈ew z̈onqui maatinacchiz niz̈aza ajlchinacchiz cjesaz̈ niiqui, jalla ninacaqui naa z̈ew maaquiz okz waquizic̈ha. Jakziltat Yoozquin criichiz̈laj niiqui, persun famillz̈quiztan z̈ew maatakanacz̈quiz yanapz waquizic̈ha. Nii z̈ew maatakanacaqui famill ocjalanaca jwesi yanapchiz̈lani. Z̈ew maatakanacz̈quiz yanapzpanz̈ waquizic̈ha persun familiaqui. Jalla nuz̈ Yooz yujcquiziqui walipanikaz cjequic̈ha. \v 5 Jakzilta t'akjir z̈ew z̈onmi zinalla z̈ejlc̈haj niiqui, jalla naac̈ha werar z̈ewqui. Naaqui Yoozquin kuzziz cjenaqui arajpachquin kami ojkz, jalla nii tjewz̈a. Niz̈ta tjewz̈can naaqui majiñami weenami Yoozquin ancha mayizinc̈ha. \v 6 Jakzilta z̈ew z̈onmi tii muntuquiz kamzquinkaz kuz tjaachi z̈ejlc̈haja, jalla naaqui criichi z̈oñz̈ cuzturumpi paachi cjenami, ana Yoozquin kuzziz zuma kamc̈ha. \v 7 Persun famillz̈ z̈ewnacz̈quiz okz waquizic̈ha. Jalla nuz̈ mantaquic̈ha amqui, z̈ewanacami ninacz̈ familianacami ana ujchiz cjisjapa. \v 8 Persun famillz̈quiztan tsjii t'akjiri z̈ejlc̈haj niiqui, famillz̈quiztan mantinta cjis waquizic̈ha. Ana mantintaz̈laj niiqui, nii famillchiz z̈oñinacaqui Yooz kuzcama kamz ana cumplic̈ha. Niz̈aza niz̈ta z̈oñinacaqui tsjan ana zuma kuzzizza ana criichinacz̈quiztanami. \p \v 9 Jakzilta z̈ew maatakanacz̈ tjuumi icliz listiquiz z̈ejlc̈haja jalla ninacaqui yanapta cjesac̈ha. Niz̈aza nii z̈ew maatakanacaqui yanapzjapa sojta tunc wata jilchiz cjistanc̈ha. Niz̈aza tsjii luctakz̈tan panikaz zalsintac̈ha naa z̈ewqui. \v 10 Niz̈aza z̈oñinacaqui naaz̈a zuma kamtiquiztan pajta cjistanc̈ha. Niz̈aza naa z̈ewqui maatinaca zuma irpiñtacha. Niz̈aza tjonzñi z̈oñinacz̈quiz zuma atintiñi kuzziz cjispanc̈ha. Niz̈aza criichi z̈oñinacz̈ kjojcha humilde kuzziz ajwsinintac̈ha. Niz̈aza sufriñi z̈oñinacz̈quiz zuma yanapñi kuzziz cjispanc̈ha. Niz̈aza tjapaman wali paatanacz̈quiz kuz tjaañi cjispanc̈ha. Jalla niz̈ta zuma kuzziz z̈ew maatakanacaqui iclizquiztan yanapta cjesac̈ha. \p \v 11 Ima sojta tunca watchiz cjen z̈ew maatakanacaqui anaz̈ icliz listiquiz apuntita cjesac̈ha, yanapta cjisjapa. Listiquiz apuntita cjisjapaqui, z̈ew maatakanacaqui tsjii icliz jilirinacz̈ acuerduquiz luztanc̈ha. Tur z̈ew maatakanacaqui wilta zalz pecac̈hani. Wilta zalaquiz̈ niiqui, nii acuerduquiztan ulanspanc̈ha. Jalla nuz̈ ulantiquiztan Cristuz̈ quintraz̈takaz cjequic̈ha. \v 12 Nii primero acuerduquiztan ulantiquiztan ujchiz cjequic̈ha. \v 13 Niz̈aza turapacha z̈ew maatakanacaqui kjuyquiztan kjuya ojklayasaz̈ niiqui, jayraz̈ cjesac̈ha. Niz̈aza ana wali quintu joojooñiz̈ cjesac̈ha. Niz̈aza yekja z̈oñz̈ parliquiz mitisñi cjesac̈ha. Jaziqui ana zuma takunaca chiichiyac̈hani. Niz̈ta chiichiizqui inapankazza. Anapan waquizic̈ha. \v 14 Jalla niz̈tiquiztan tur z̈ew maatakanacaqui zalz waquizic̈ha. Zalzcu, ocjalchiz cjesac̈ha. Niz̈aza kjuya luraña cwitiñi cjesac̈ha. Jalla niz̈ta zuma kamañ quintra z̈oñinacaqui icliz z̈oñinacz̈quiz anaz̈ iñarasac̈ha. \v 15 Yekjap z̈ew maatakanacazti Yoozquiztan zarakchic̈ha, niz̈aza Satanás diabluz̈ kuzcama ojkc̈ha. \p \v 16 Jakzilta criichi luctakami maatakami persun famillz̈quiztan tsjaa z̈ew z̈on z̈ejlc̈haja, naa z̈ew z̈on yanapz waquizic̈ha, icliz z̈oñinacz̈ta ana ch'ama cjeyajo. Jalla niz̈tiquiztan ultim t'akjir chawc z̈ew maatakanacz̈quiz icliz paaz̈tan yanapta cjesac̈ha. \s1 ICLIZ JILIRZ̈ PUNTU \p \v 17 Jakzilta icliz jilirit zumpacha irpac̈haja, parti criichi z̈oñinacaqui nii jilirz̈quin zuma honora tjaaz waquizic̈ha, niz̈aza zuma pacz waquizic̈ha. Niz̈aza Yooz taku paljayñi jilirz̈quizimi, niz̈aza Yooz taku tjaajiñi jilirz̈quizimi juc'ant honora tjaaz waquizic̈ha, niz̈aza juc'anti pacz waquizic̈ha. \v 18 Tuquitanpacha cjijrta Yooz takuqui tuz̈ cjic̈ha: “Tsjii trigo jojñi aznuqui ñujcz̈tan ana ñucasac̈ha ana lulajo”. Niz̈aza cjijrta Yooz takuqui tuz̈ cjic̈ha: “Jakziltat langzñiz̈laja, jalla niiqui pacta cjis waquizic̈ha”. \p \v 19 Niz̈aza tsjii z̈oñikaz icliz jilirz̈quiz uj tjojtnasaz̈ niiqui, jalla nii z̈oñz̈ chiitaqui anac̈ha nonzqui. Antiz tsjii pucultan c̈hjepultan tisticu z̈oñinacaz̈ ujchizpanc̈ha cjesaz̈ niiqui, ninacz̈ chiitaqui nonznaquic̈ha. \v 20 Niz̈aza jakzilta icliz jilirit uj paañi z̈ejlc̈haja, jalla niiz̈quiz ujsnaquic̈ha parti criichi jilanacz̈ yujcquiz. Jalla niz̈tiquiztan nii parti z̈oñinacaqui uj paaz jiwjataquic̈ha. \v 21 Jaziqui Yooz Ejpz̈tan niz̈aza Jesucristuz̈tan niz̈aza Yooziz̈ illzta anjilanacz̈tan, jalla ninacz̈ yujcquiziqui amquiz mantuc̈ha, nii weriz̈ tjaajintanac jaru kamajo, nii. Niz̈aza jalla nuz̈ kamcan anapanc̈ha pjali cjicjisqui. Niz̈aza tjapa z̈oñinacz̈tan tsjii kuzziz cjis pecsa. \v 22 Niz̈aza ima icliz jilirz̈ puestuquiz uchan, nii z̈oñz̈ kuz zumpacha tantiiz̈inaquic̈ha. Ana zumpacha tantiyaquiz̈ niiqui, tsjii amiz̈ uchta icliz jiliriqui ujquiz tjojtsnasac̈ha. Nekztan parti z̈oñinacaqui amquiz zakaz uj tjojtnasac̈ha. Jaziqui ima uchcan zumpacha tantiiz waquizic̈ha. Niz̈aza am persun kuzquiz cuitasa ana ujquiz tjojtsjapa. \p \v 23 Amiz̈ walu ancha laa laa cjenaqui, anam kjaz alaja licasac̈ha. Tsjii kulla cunta koluc vinulla licsnasac̈ha. \p \v 24 Yekjap z̈oñinacaz̈ uj paatanacaqui kjanapacha tjeez̈ta cjissa ima casticta cjisnan. Yekjap z̈oñinacaz̈ uj paatanacazti chjojz̈ta cjesac̈ha, casticz tjuñicama. Nekztan tjeez̈taz̈ cjequic̈ha. \v 25 Jalla niz̈tapacha yekjap z̈oñinacaz̈ zuma paatanacaqui kjanapachac̈ha. Yekjap z̈oñinacaz̈ zuma paatanacazti ana chertac̈ha. Pero anaz̈ tirapan chjojz̈ta cjequic̈ha. Pjalz tjuñquiziqui tjeez̈taz̈ cjequic̈ha. \c 6 \p \v 1 Criichi z̈oñinacz̈quiz chiiz̈ina, tuz̈ cjican: Patrunz̈ mantuquiz kamñi piyunanacaqui persun patrunz̈quiz rispitla, parti z̈oñinacaz̈ werar Yooz quintra ana chiyajo, niz̈aza tjaajinta Yooz taku ana iñarajo. \v 2 Niz̈aza jakzilta piyunanacat criichi patrunchizlaj niiqui, juc'anti rispitla, ana quintra chiila, nii patrunaz̈ criichiz̈ cjen. Antiz juc'anti nii patrunz̈ta langz̈inspanc̈ha. Am patrunpachac̈ha criichi maziqui. Jalla niz̈tiquiztan zuma k'ayi jilac̈ha niiqui. Jalla nii puntunaca chiiz̈inaquic̈ha, niz̈aza tjaajnaquic̈ha. \s1 ANA WALI TJAAJIÑINACZ̈ PUNTU \p \v 3 Tsjii z̈oñiqui tsjemat pinsita takunacz̈tan tsjii kjutñi tjaajnac̈hani. Jalla niz̈ta ana wali tjaajnaquiz̈ niiqui, Jesucristo Jiliriz̈ zuma tjaajintanacquiztan tsjemataz̈ tjaajinc̈ha. Niz̈aza nii z̈oñiqui Yooz mantita kamañquiztan tsjemata kamaña tjaajinc̈ha. \v 4 Jalla niz̈ta tjaajiñi z̈oñiqui mit kuzzizza. Yooz puntunaca ultim werara ana zizza. Niz̈aza niz̈ta tjaajiñi z̈oñiqui ana wali kuzziz cjen z̈oñinacz̈tan ch'aazkaz pecc̈ha. C̈hjul taku puntuquiztan ch'aazkaz pecc̈ha. Jalla nuz̈ ch'aazcan chjaawjkatas z̈ejlc̈ha, niz̈aza t'aka t'akaz̈ cjissa, niz̈aza z̈oñinacaqui quintra chiyas z̈ejlc̈ha. Niz̈aza porapat uj tjojtnassa. \v 5 Niz̈aza nii millk'u kuzziz z̈oñinacaqui porapat ana tucuziñi ch'aasñic̈ha. Ninacaqui Yooz pinsitanacami zuma werar razunanacami ana zizza. Tii muntuquiz wali jiru kamz cjis pinsican, Yooz jiczquin luzza. Nii wali jiru kamzqui, “Jalla nii kamzkazza waliqui”, cjican pinsiñic̈ha. Jalla nii ana wal pinsitanacchiz z̈oñinacz̈tan ana munazaquic̈ha. \v 6 Pero tsjiikaz cjiwc̈ha. Yooz jiczquiz kamzqui ancha walic̈ha, wali jiru kamzquiztan juc'anti. Yoozquinkaz kuzziz cjican z̈oñinacaqui cuntintu cjequic̈ha. \v 7 Tii muntuquiz nascuqui uc̈humqui ana c̈hjulchiztac̈ha. Niz̈ta irata ticz̈cuqui tii muntuquiztan ana c̈hjulchiz okaquic̈ha. \v 8 Jalla niz̈tiquiztan tii muntuquiz z̈ejlcan, c̈hjerchizimi zquitchizimi cuntintu cjistanc̈ha. \v 9 Jakziltat wali jiru cjis pecc̈haja, ujquiz tjojtsnasac̈ha, niz̈aza ana wal jiczquiz lusasac̈ha. Nekztan zumzu pinsamintuchiz cjesac̈ha. Niz̈aza persun quintra ana wal kamzquizkaz pecasac̈ha. Nekztan nii ana wal kamtiquiztan tjappacha pertaquic̈ha. Liwj akztaz̈ cjisnaquic̈ha nii z̈oñiqui. \v 10 Paazquin kuz tjaazqui tjapaman ana walinacquiz cjiskatc̈ha. Paazquin kuz tjaacan yekjap criichi z̈oñinacaqui Yoozquiztan tsjii kjutñi chjichta cjissic̈ha. Nekztan persunpacha wira ancha sufriskatc̈ha. \s1 TIMOTEOZ̈QUIZ CHIIZ̈INTA TAKUNACA \p \v 11 Timoteo jila, amqui Yooz z̈oñimc̈ha. Jaziqui ana walinacz̈quiz anapan kuz tjaaquic̈ha. Antiz zuma kamzquin kuz tjaaquic̈ha. Yooz kuzcama kama. Niz̈aza Yoozquin kuzzizpan cjee. Niz̈aza zuma munaziñi kuzziz cjee. Niz̈aza pasinziz kuzziz tjurt'a. Niz̈aza humilde kuzziz cjee. \v 12 Zuma zultatuz̈takaz Yoozquin tjurt'iñi kuzziz cjee, niz̈aza Satanás diabluz̈ partiranacz̈ quintra cjee. Niz̈aza arajpachquin Yooztan wiñaya kamzjapa, kuz tjaaquic̈ha. Arajpachquin wiñaya kamajo Yoozqui am kjawzic̈ha. Niz̈aza nuz̈ kjawztan, amqui walja z̈oñinacz̈ yujcquiz ticlarchamc̈ha, “Yoozquinkaz kuzziztc̈ha wejrqui” cjican. \v 13 Timoteo jila, Yoozqui tjapa tii muntuquiz z̈ejlñinacz̈quiz z̈eti tjaac̈ha. Niz̈aza Jesucristuqui Poncio Pilatuz̈ yujcquiz Yooz Ejpz̈quinkaz kuzziztac̈ha. Jaziqui Yooz yujcquizimi Jesucristuz̈ yujcquizimi wejrqui amquin mantuc̈ha, \v 14 Yooz kamañquizkaz kama, jalla nii. Nekztan z̈oñinacaqui Yooz kamaña quintra ana c̈hjul chiyasac̈ha, niz̈aza Yooz kamañaqui zumapankaz tjeez̈ta cjequic̈ha, Jesucristo Jiliriz̈ tjonz tjuñicama. \v 15 Yooz Epiz̈ pinsita timpuquiz Jesucristuqui wilta tjonaquic̈ha. Yooz Ejpqui zinta zuma Yoozza. Jalla niic̈ha tjappachquiztanami chekanaqui. Niz̈aza Yoozqui tsjan pajk jiliric̈ha c̈hjul jilirinacz̈quiztanami. Niz̈aza niic̈ha juc'ant azziz mantiñiqui c̈hjul mantiñinacz̈quiztanami. \v 16 Yoozpankazza wiñay z̈ejtchizqui. Niz̈aza anaz̈ jec ujchiz z̈oñimi Yoozquin macjati atasac̈ha juc'ant zuma kjañquiz kamchi, nekztan. Jalla niz̈tiquiztan anaz̈ jec z̈oñimi Yooz cherchic̈ha, niz̈aza ana cherasac̈ha. Yoozqui wiñaya honorchiz cjila. Niz̈aza wiñaya mantiñej cjila. Jalla nuz̈oj cjila. Amén. \p \v 17 Amqui tii muntuquiz wali jiru kamñi z̈oñinacz̈quiz mantaquic̈ha, ancha cusasanacchiz cjenami ana mita kuzziz cjeyajo. Anaz̈ wiñaya niz̈ta wali jiru kamasac̈ha. Jalla niz̈tiquiztan cusasanacquiz anac̈ha kuz tjaazqui. Antiz Yoozquinkaz kuz tjaa. Nii z̈ejtñi Yoozpankaz uc̈humnacaquiz tjapaman wintizunanaca tjaac̈ha, uc̈humnaca cuntintu kamzjapa. \v 18 Niz̈aza nii wali jiru kamñi z̈oñinacz̈quiz mantaquic̈ha tuz̈ kamajo. Ninacaqui zuma obranaca paaz waquizic̈ha. Nekztan zuma obranacaz̈ paachiz̈ cjen ultim werar wali jiruz̈ cjequic̈ha Yooz yujcquinaqui. Niz̈aza ninacaqui zuma kuztan ninacz̈ cusasanacz̈tan z̈oñinacz̈quiz yanapz waquizic̈ha. Ana zkutu kuzziz cjis waquizic̈ha. \v 19 Jalla nuz̈ zuma obranaca paatiquiztan arajpachquin ultim werar cusasanaca juntaquic̈ha. Nuz̈ juntitiquiztan, ultimupan Yoozqui arajpachquin ninacz̈quiz zuma kamkataquic̈ha, wiñaya. Jalla nii arajpachquin wiñay kamzquin kuz tjaaz waquizic̈ha. Nii kamzqui juc'ant zumac̈ha. Jalla nuz̈ wali jiru z̈oñinacz̈quiz mantaquic̈ha amqui. \p \v 20 Timoteo jila, wejrqui amquiz tjapa Yooz puntunacquiztan tjaajinchinc̈ha. Jalla nii tjaajintanaca zumpacha cjuñzna, niz̈aza nii jaru kama. Niz̈aza ina z̈oñz̈ takunaca ana nonz̈na. Ana Yooz takunacac̈ha ninacz̈ takunacaqui. Niz̈aza zuma tjaajintanac quintra chiitaqui ana nonz̈na. Yekjap z̈oñinacaqui tsjii kjutñi chiiz̈cuqui, “Zuma zizta takuc̈ha weriz̈ chiitaqui”, cjiñic̈ha. \v 21 Niz̈aza yekjap criichi z̈oñinacaqui nii ana wal taku catokz̈cu Yoozquiztan tsjii kjutñi zarakchic̈ha. Ana zuma kuzziz cjissic̈ha. \p Yoozqui am wintijla. Jalla nuz̈oj cjila. Amén.