\id 1TH - Chipaya NT -Bolivia 2009 (DBL -2013) 
\ide UTF-8 
\h 1 TESALONICENSES 
\toc1 Primera Carta a los Tesalonicenses 
\toc2 1 Tesalonicenses 
\toc3 1Te 
\mt2 PRIMERA CARTA DEL APOSTOL SAN PABLO A LOS 
\mt1 TESALONICENSES 
\c 1  
\p  
\v 1 Wejr Pabluqui, Silvanuz̈tan, Timoteoz̈tan, tii cartal cjijrz̈cuc̈ha anc̈huc Tesalónica wajtchiz z̈oñinacz̈quin. Nii wajtquiz icliz z̈oñinacc̈hucc̈ha anc̈hucqui. Niz̈aza Yooz Ejpz̈tan Yooz Majchtan tsjii kuzzizc̈hucc̈ha. Jalla niz̈tiquiztan uc̈hum Yooz Ejpz̈tan, niz̈aza uc̈hum Jesucristo Jiliriz̈tan anc̈hucaquiz yanapt'ila. Niz̈aza zuma cuntintu kuzziz walikaj kamkatla. 
\s1 JESUCRISTUZ̈QUIN ANCHA KUZZIZ Z̈OÑINACA 
\p  
\v 2 Wejrnacqui tjapa anc̈hucaz̈ cjen tirapan Yoozquin sparaquiz̈ cjiwc̈ha. Yoozquin mayizican anc̈hucaltajapa wiltan wiltan mayizuc̈ha.  
\v 3 Uc̈hum Yooz Ejpz̈quin mayizican, cjuñznuc̈ha anc̈hucaz̈ zuma Yooztajapa trabajtiquiztan. Anc̈hucqui Jesucristuz̈quin kuzziz cjen Yooztajapa tjapa kuztan trabajc̈ha. Niz̈aza anchucqui zuma munaziñi kuzziz cjen, Yoozquin zuma sirwic̈ha. Niz̈aza Jesucristo Jilirz̈ tjonz tjuñi tjewzcan, zuma tjurt'iñi kuzzizc̈hucc̈ha. Jalla nuz̈ anc̈hucaquin cjuñz̈cu Yooz Ejpz̈quin sparaquiz̈ cjiwc̈ha.  
\v 4 Jilanaca, cullaquinaca, Yooziz̈ pectanaca, Yoozqui anc̈huc illzic̈ha. Jalla nuz̈ zizcu, wejrnacqui Yoozquin sparaquiz̈ cjiwc̈ha.  
\v 5 Wejrnacqui anc̈hucaquin tjonz̈cu, liwriiñi Yooz taku paljaychinc̈ha. Anac̈ha z̈oñz̈ taku alajakaz paljaytaqui; Yooz takupanc̈ha paljaytaqui. Yooz Espíritu Santuz̈ aztan paljaychinc̈ha. Niz̈aza werar Yooz tawkquiz tjapa kuz tjurt'ican, Yooz puntu paljaychinc̈ha. Niz̈aza anc̈hucatan kamcan jaknuz̈t wejrnacqui kamchinz̈laja, jalla nii zuma zizza anc̈hucqui. 
\p  
\v 6 Anc̈huczti wejrnaca kamaña irata jalla niz̈ta kamñi z̈oñi cjissinc̈hucc̈ha. Niz̈aza Jesucristo Jilirz̈ kamañ irata kamñi z̈oñi cjissinc̈hucc̈ha. Niz̈aza anc̈hucqui wejrnacaz̈ paljayta Yooz taku catoktiquiztan, ancha sufrichinc̈hucc̈ha. Walja sufris cjenami, Espíritu Santuqui anc̈hucaquiz cuntintu cjiskatchic̈ha. Niz̈aza sufrisqui anc̈hucaquiz wejtnacaquiz iratazakaz watchic̈ha.  
\v 7 Jalla niz̈tiquiztan anc̈huca puntuquiztan zuma quintu ulanchic̈ha tjapa criichi z̈oñinacz̈quin, Macedonia yokquin z̈ejlñi criichi z̈oñinacz̈quinami niz̈aza Acaya yokquin z̈ejlñi criichi z̈oñinacz̈quinami.  
\v 8 Anc̈hucaz̈ cjen Yooz takuqui tjapa kjutñi paljaytac̈ha. Anac̈ha Macedonia yokquizkaz niz̈aza Acaya yokquizkaz paljaytaqui. Tjapa kjutñi paljaytac̈ha. Niz̈aza jaknuz̈t anc̈hucqui Yoozquin kuzziz cjissinc̈hucz̈laja, jalla nii quintu tjapa z̈oñinacaqui zizza. Jaziqui wejrnacqui anc̈huc puntuquiztan anaz̈ iya quint'asac̈ha.  
\v 9 Ninacapacha wejtnacaquiz quint'iñitac̈ha jaknuz̈t anc̈hucqui wejtnacaz̈ paljayta Yooz taku catokchinc̈huctaz̈laja, jalla nii. Anc̈hucqui z̈oñiz̈ paata yooznacquiztan zarakchinc̈hucc̈ha, werar z̈ejtñi Yooz sirwizjapa.  
\v 10 Niz̈aza anc̈hucqui Yooz Majch arajpachquiztan tjonz tjuñi tjewz̈a. Yoozqui niiz̈ Majch ticziquiztan jacatatskatchic̈ha. Jalla nii Jesusaqui uc̈hum casticunacquiztan liwriichic̈ha. Jalla nuz̈ quint'iñitac̈ha anc̈huca puntuquiztan. 
\c 2  
\s1 PABLUZ̈ YOOZ TAKU PALJAYÑI OJKTA 
\p  
\v 1 Jilanaca, cullaquinaca, jalla tuz̈ zizza. Wejrnacqui ana ina anc̈hucaquiz tjonzinc̈ha.  
\v 2 Ima anc̈hucaquiz tjoncan Filipos wajtquiz sufrichinc̈ha, niz̈aza wejrqui iñartatac̈ha. Jalla nuz̈ sufritaz̈ cjenami Yoozqui wejrnaca yanapchic̈ha, ana ekscan tjurt'iñi kuzziz Yooz zuma liwriiñi taku paljayajo. Jalla nuz̈ paljaychinc̈ha, z̈oñinacaz̈ wejtnacatan quintra ancha aptazanami.  
\v 3 Niz̈aza wejtnaca paljaytaqui anatac̈ha chekachuc, niz̈aza anatac̈ha ana zuma kuzquiztan, niz̈aza anatac̈ha anc̈huc incallzjapa.  
\v 4 Yooz Ejpqui wejrnaca tantiichic̈ha, walikazza. Jalla niz̈tiquiztan Yoozqui wejtnacaquiz niiz̈ zuma taku cumpjiichic̈ha. Jalla nii Yooz takupan paljayuc̈ha wejrnacqui. Anal paljayuc̈ha z̈oñinacz̈ kuz wali cjeyajo kasi. Antiz Yooz kuz wali cjeyajo paljayuc̈ha. Yoozqui uc̈humnaca kuz zizza, niz̈aza tantiic̈ha ultimu.  
\v 5 Anc̈hucqui tuz̈ zizza, wejrnacqui anac̈ha zuma takunaca paljaychinc̈ha wejtnaca partiquiz luzkatzjapa, niz̈aza persunalta c̈hjulumi tanzjapa. Weraral chiyuc̈ha. Yoozzakaz wejtnaca puntuquiztanaqui nii zizza.  
\v 6 Cristuqui wejrnac apostolunaca cuchanz̈quichic̈ha. Jalla niz̈tiquiztan wejrnacqui anc̈hucaquiz mantiñi cjitasac̈ha. Pero anc̈huc ana mantichinc̈ha, niz̈aza wejtnaca honora wayt'iz̈iñi anal pecasuc̈ha, anc̈hucmi yekjanacami.  
\v 7 Antiz wejrnacqui anc̈huc zuma cwitican z̈ejlchinc̈ha, jaknuz̈t tsjaa maatak z̈onqui persun wawa cwitassaja, jalla nuz̈.  
\v 8 Niz̈aza anc̈huc ancha k'ayachtuc̈ha. Jalla niz̈tiquiztan anc̈hucaquiz Yooz zuma liwriiñi taku paljaychinc̈ha. Niz̈aza anc̈hucaltajapa c̈hjulu paazmi listutc̈ha wejrnacqui, ticz cjenami. Jalla nuz̈ anc̈huc pecñi cjissiñc̈ha.  
\v 9 Jilanaca, cullaquinaca, weriz̈ langz̈ta cjuñzna. Majiñami weenami langzinc̈ha ochañcama, wejtnaca persun wira mantinsjapa, niz̈aza anc̈hucalta ana ch'ama cjeyajo. Jalla nuz̈ kamchinc̈ha liwriiñi Yooz taku paljaycan. 
\p  
\v 10 Niz̈aza anc̈hucatan zuma kamchinc̈ha. Yooz kuzcama kamchinc̈ha. Niz̈aza anaz̈ jecmi wejtnaca quintra c̈hjul ujmi tjeezñi atasac̈ha. Jalla nii anc̈hucqui zumpacha zizza. Yooz zakaz nii zizza.  
\v 11 Anc̈hucmi zakaz zizza, jaknuz̈t tsjii ejpqui niiz̈ persun maati cwitassaja, jalla niz̈tapacha wejrnacqui anc̈huc cwitassinc̈ha. Anc̈huc kuzzinc̈ha, niz̈aza p'ekinchaychinc̈ha, niz̈aza chiiz̈inchinc̈ha, anc̈huc zuma kamajo.  
\v 12 Jaknuz̈t Yoozquin criichi z̈oñinacaqui zuma kamz waquizic̈haja, jalla nuz̈ anc̈hucqui zuma kamz waquizic̈ha. Yoozqui niiz̈quin criichinaca utchic̈ha niiz̈tan chica mantizjapa, niz̈aza niiz̈tan chica honorchiz cjisjapa. Jalla niz̈tiquiztan zuma kamz waquizic̈ha. 
\p  
\v 13 Anc̈hucqui weriz̈ paljayta Yooz taku nonzinc̈hucc̈ha, niz̈aza catokchinc̈hucc̈ha, tuz̈ cjican: “Tii takuc̈ha ultim werar Yooz takuqui. Anac̈ha z̈oñz̈ takukaz”. Jalla nuz̈ catoktiquiztan tii zuma Yooz takuqui anc̈huca kuznaca tsjan tsjan zuma cjiskatc̈ha. Jalla niz̈tiquiztan tirapan Yoozquin sparaquiz̈ cjiwc̈ha.  
\v 14 Jilanaca, culluquinaca, anc̈hucqui walja sufriñc̈hucc̈ha anc̈huca persun wajtchiz z̈oñinacaz̈ ana wali paañiz̈ cjen. Jalla niz̈ta irata sufrichic̈ha Judea yokquiz z̈ejlñi criichinacami. Werar Yooz icliz z̈oñinacaz̈ cjen niz̈ta sufrichic̈ha. Niz̈aza persun wajtchiz z̈oñinacaz̈ ana wali paañiz̈ cjen, sufrichic̈ha. Tsjiikaz anc̈hucaquizimi ninacz̈quizimi watchic̈ha.  
\v 15 Nii Judea yokquiz z̈ejlñi judionacaqui Jesús Jiliri conchic̈ha. Niz̈aza niiz̈ tuqui Yooz taku paljayñi z̈oñinaca conchic̈ha. Niz̈aza wejrnacqui chjatkatchic̈ha. Niz̈aza jalla nuz̈ paaz̈cu tjapa z̈oñinacz̈ quintraz̈ paac̈ha. Jalla nuz̈ paatiquiztan Yoozqui ninacz̈ quintra z̈awjc̈ha.  
\v 16 Wejrnacqui liwriiñi Yooz taku paljayz pecatuc̈ha ana judío z̈oñinacz̈quiz, ninaca liwriita cjeyajo. Nii anawali paañi z̈oñinacazti wejrnac atajchic̈ha. Jalla niz̈tiquiztan ninacaqui juc'anti persun ujz̈ yapkatc̈ha. Jalla nuz̈ ujnaca yapkattiquiztan Yoozqui wiñayaz̈ wali casticu tjonkataquic̈ha ninacz̈quiz. 
\s1 PABLUQUI WILTA TJONZ PECC̈HA 
\p  
\v 17 Jilanaca, cullaquinaca, tsjii kjaz̈tapacha anc̈hucaquiztan ojkchinc̈ha. Jalla nekztan wejrnacqui anc̈huc anchal cjuñznuc̈ha. Jalla niz̈tiquiztan anc̈huc ancha cherzpal pecaytuc̈ha.  
\v 18 Niz̈aza anc̈hucaquin irantisquizpan pecaytuc̈ha. Wejrnacaz̈ ojkz pecan, Satanasaqui wejrnac atajchic̈ha. Wejrqui wiltan wiltan ojkz cjichintac̈ha. Jalla nuz̈ ojkz pectaz̈ cjen, Satanasaqui wejr atajchic̈ha.  
\v 19 Jilanaca, cullaquinaca, Jesucristuqui tjonaquic̈ha. Nekztan niiz̈ yujcquiziqui anc̈hucaz̈ cjen cuntintul cjeec̈ha. Anc̈hucaz̈ cjen wejrnacqui tjewznac̈ha honora tanzjapa. Anc̈hucaz̈ Yooz taku criichiz̈ cjen, juc'antiz̈ chipznac̈ha wejrnacqui.  
\v 20 Chekapan anc̈hucqui wejtnacaquiz cuntintuz̈ cjiskatc̈ha, niz̈aza wejrnac honorchiz cjiskatc̈ha. 
\c 3  
\p  
\v 1 Jalla nuz̈ anc̈hucaquiztan ojkz̈cu, ancha anc̈huc cjuñchinc̈ha. Jalla nekztan Timoteo uc̈hum jila cuchanz̈quichinc̈ha, anc̈huc cherzñi. Parti wejrnaczti Atenas wajtquiz ecliz cjichinc̈ha.  
\v 2 Timoteuqui Yoozquin sirwiñic̈ha, Cristuz̈ liwriiz puntu paljaycan. Jalla niz̈tiquiztan Timoteuqui cuchanz̈quichinc̈ha anc̈huc juc'anti Yoozquin tjurt'iñi kuzziz cjeyajo. Niz̈aza anc̈hucaquiz zumpacha Yoozquin criizjapa p'ekinchayajo, cuchanz̈quichinc̈ha.  
\v 3 Niz̈aza Timoteuqui anc̈hucaquin tjonz̈quichic̈ha, anc̈huca kuz ana turwayta cjisjapa pruebanacaz̈ watchiz̈ cjenami. Anc̈hucpacha zizza criichinacaqui pruebanacaquiztan sufristanc̈ha, jalla nii.  
\v 4 Tuquiqui anc̈hucatan z̈ejlcan, wejrnacqui nuz̈ mazinchinc̈ha, uc̈hum criichinacz̈quiz pruebanacaz̈ tjonaquic̈ha, cjican. Jalla niz̈tapacha weriz̈ chiita taku cumplissic̈ha.  
\v 5 Jalla nuz̈ anc̈hucaquiz pruebanacaz̈ watan wejrqui quintu ana zizzi atchinc̈ha. Jalla niz̈tiquiztan ana iya awantichinc̈ha. Nekztan Timoteo cuchanz̈quichinc̈ha, anc̈huca Yoozquin criichi kuz, jaknuz̈t kamc̈haja, jalla nii zizjapa. Pinsichinc̈ha, “Satanás diablut anc̈huc tsjii kjutñi cutiskatz̈caa”, cjican pinsichinc̈ha. Anc̈huc cutiskattasaz̈ niiqui, wejtnaca obra inakaz cjitasac̈ha. 
\p  
\v 6 Tsjii kjaz̈ majquiztan Timoteuqui quejpz̈quichic̈ha Tesalónica wajtquiztan. Niz̈aza zuma quintunaca zjijcchic̈ha tuz̈ cjican: “Nii Tesalónica wajtchiz criichi z̈oñinacaqui ancha Yoozquin kuzzizpanc̈ha, niz̈aza zumaz̈ munazic̈ha. Niz̈aza ninacami uc̈humnacz̈ zumapanz̈ cjuñkalc̈ha. Niz̈aza ninacaqui uc̈humnacatan ancha zalz pecc̈ha, jaknuz̈t uc̈humqui ninacz̈tan ancha zalz pecc̈haja, jalla niz̈tazakazza ninacaqui”. Jalla nuz̈ cjican zuma quintunaca zjijcchic̈ha anc̈hucaquiztan.  
\v 7 Jilanaca, cullaquinaca, wejrnac zakaz ancha sufrisnacami pruebanacami watuc̈ha. Jalla nuz̈ cjenami nii anc̈huca puntu zuma quint'itiquiztan wejtnaca kuzqui zuma cuntintutac̈ha. Anc̈hucaz̈ Yoozquin tjapa kuzziz cjen, ancha cuntintutc̈ha.  
\v 8 Jaziqui zizzinc̈ha, anc̈hucqui Yoozquin tjurt'iñi kuzzizpanc̈ha. Jalla nuz̈ zizcu wejrnacqui tsjii ew z̈eti tanz̈taz̈okazza.  
\v 9 Anc̈hucaz̈ cjen Yoozquin ancha sparaquiz̈ cjiwc̈ha. Niz̈aza anc̈hucaz̈ cjen Yooz yujcquiz ancha cuntintuz̈ wejrnacqui.  
\v 10 Niz̈aza majiñami weenami Yoozquin mayizuc̈ha anc̈hucatan wejtnacatan persunpacha wilta zalzjapa. Nekztan anc̈hucaquiz tjaajznasac̈ha juc'ant zumpacha Yoozquin kuzziz cjisjapa. Anc̈huca kamaña c̈hjulut pjaltic̈haja, jalla nii tjaajnasac̈ha. 
\p  
\v 11 Jaziqui uc̈hum Yooz Ejpz̈tan niz̈aza Jesucristo Jilirz̈tan, jalla ninacaqui wejrnaca irpijaal cjiwc̈ha anc̈hucaquiz wilta zalzjapa.  
\v 12 Niz̈aza Jesucristo Jiliriqui anc̈hucaquiz juc'anti zuma munaziñi kuzziz cjiskatla, porapatmi niz̈aza tjapa z̈oñinacz̈quizimi. Jaknuz̈t wejrnac anc̈hucatan zuma munazituc̈haja, jalla niz̈ta irata.  
\v 13 Jalla nuz̈ zuma kamtiquiztan Yoozqui anc̈huca kuz juc'ant tjurt'iñi cjiskataquic̈ha. Jalla niz̈tiquiztan anc̈huca kuzqui Yoozquinpanz̈ cjequic̈ha, Yooz Ejpz̈ yujcquiziqui ana c̈hjul ujchiz cjisjapa. Jalla nuz̈ cjequic̈ha uc̈hum Jesucristo Jilirz̈ tjonz tjuñquiziqui. Jalla niiqui tjonaquic̈ha niiz̈ partir z̈oñinacz̈tanpacha. 
\c 4  
\s1 LUCUTJIÑI ZUMA KAMZ WAQUIZIC̈HA 
\p  
\v 1 Jilanaca, cullaquinaca, jaknuz̈t zuma kamz waquizic̈haja Yooz cuntintu cjisjapa, jalla nuz̈ tjaajinchinc̈ha. Nii zuma kamañ jaru kamiñc̈hucc̈ha. Niz̈aza juc'anti niicama kamaquic̈ha. Jalla niijapa anc̈hucaquiz chiiz̈inuc̈ha, niz̈aza rocuc̈ha, Jesucristo Jiliriz̈ cuntiquiztan. 
\p  
\v 2 Tuquiqui anc̈hucatan z̈ejlcan, wejrnacqui Jesucristo Jiliriz̈ cuntiquiztan tjaajinchinc̈ha. Jalla nii tjaajintanaca anc̈hucqui zizza.  
\v 3 Yooztajapapan zuma kamajo, jalla niz̈taz̈ kamñiz̈ pecc̈ha Yoozqui. Jalla nuz̈ kamcan, anac̈ha adulteriu paazqui, niz̈aza anac̈ha tsjii luctakaqui yekja maatakz̈quiz pinzizqui.  
\v 4 Niz̈aza Yooztajapa kamcan, tjapa criichi z̈oñiqui ziz waquizic̈ha, jaknuz̈t criichinacaqui persun tjunatan zalz waquizic̈haja, niz̈aza zalz̈cu jaknuz̈t zumapanz̈ kamz waquizic̈haja, jalla nii.  
\v 5 Ana Yoozta kamñi z̈oñinacazti persun tjunatan ana zuma kamc̈ha. Yekja maatakanacz̈quizpankaz pinsican kamñic̈ha. Jalla niz̈ta irata anc̈hucqui anaz̈ kamz waquizic̈ha.  
\v 6 Anaz̈ jec criichimi yekja jilz̈ maataka kjutñi pinziz waquizic̈ha. Niz̈aza yekja jilz̈ maatakatan adulteriu paaz anaz̈ waquizic̈ha. Niz̈ta paaquiz̈ niiqui, jilz̈ quintra uj paac̈ha. Jalla nuz̈ ana zuma kamñinaca casticaquic̈ha Yoozqui. Jalla nuz̈ tuquiqui wejrnacqui anc̈hucaquiz chiiz̈inchinc̈ha.  
\v 7 Yoozqui uc̈humnaca kjawzic̈ha niiz̈ partiquiz cjisjapa, niz̈aza zuma kamajo, ana yekja kjutñi cjicjeyajo.  
\v 8 Jalla nii tjaajintaqui anaz̈ z̈oñz̈ kuzquiztan tjonc̈ha, Yooz kuzquiztanpan tjonchic̈ha. Jalla niz̈tiquiztan jequit nii tjaajinta taku ana pajc̈haja, niiqui Yooz ana pajc̈ha. Yoozqui anc̈huca kuzquiz niiz̈ Espíritu Santo luzkatchic̈ha anc̈huc zuma kamajo. 
\p  
\v 9 Tsjiilla wejr cjiwc̈ha, criichi jilanacz̈tan zuma munaziz puntuquiztan. Jalla niz̈ta puntuquiztan Yoozqui anc̈hucaquiz tjaajinchic̈ha porapat zuma munazizjapa. Jalla niz̈tiquiztan wejrnacqui anc̈hucaquiz nii puntuquiztan ana ancha cjijrac̈ha.  
\v 10 Jalla nuz̈ zuma munaziñc̈hucc̈ha tjapa Macedonia yokquiz kamñi criichinacz̈tan. Jilanaca, cullaquinaca, wejrnacqui anc̈huc chiiz̈inuc̈ha, anc̈huca kuz juc'anti munaziñi cjisla, jalla nuz̈ cjiwc̈ha.  
\v 11 Niz̈aza anc̈hucqui zuma llan kuzziz cjee. Yekja z̈oñz̈ asuntuquiz anapan mitiz waquizic̈ha. Pero persun kamañ wirquiz kuz tjaasa. Niz̈aza persun kjarz̈tan langznaquic̈ha. Tuquiqui nuz̈ anc̈hucaquiz mantichinc̈ha.  
\v 12 Jalla nuz̈ anc̈huc zuma langztiquiztan ana criichi z̈oñinacaqui anc̈huc rispitaquic̈ha. Niz̈aza anc̈hucaquizpacha ana c̈hjulumi pjaltaquic̈ha. 
\s1 JESUCRISTUQUI WILTA TJONAQUIC̈HA 
\p  
\v 13 Jilanaca, cullaquinaca, wejrnacqui anc̈hucaquiz ticzi z̈oñinacz̈ puntuquiztan tjaajinz pecuc̈ha, ana ancha llaquita cjeyajo. Ana jacatatz wira tjewzñi z̈oñinacaqui llaquizic̈ha tsjii ticzi cjenaqui. Ana niz̈ta cjeyajo, anc̈hucaquiz tjaajinz pecuc̈ha.  
\v 14 Uc̈humqui criichinc̈humc̈ha, Jesucristuqui ticziquiztan jacatatchic̈ha, jalla nii. Niz̈aza criichinc̈humc̈ha, Yoozqui Jesucristuz̈quin criichi ticzinaca jacatatskataquic̈ha. Niz̈aza ninaca Jesucristuz̈tan chica tjonkatta cjequic̈ha. 
\p  
\v 15 Niz̈aza tii Jesucristo Jiliriz̈ tjaajinta taku anc̈hucaquiz tjaachinc̈ha. Jesucristo Jiliriz̈ tjonz tjuñquiziqui primiraqui ticzi criichi jilanacaqui niiz̈tan zalaquic̈ha. Nekztan tii yokquiz z̈ejtchi criichinacaqui tsewcchuc chjitz̈tazakaz cjequic̈ha, Jesucristuz̈tan zalzjapa.  
\v 16 Uc̈hum Jesucristo Jiliripacha tsewc arajpachquiztan chjijwz̈caquic̈ha. Nii orapacha criichinaca kjawznaquic̈ha mantiñi jorz̈tan. Niz̈aza tsjii pajk jilir arc anjilaqui kjawznaquic̈ha. Niz̈aza Yooz trompeta tjawunznaquic̈ha. Jalla nekztan Cristuz̈quin ticzi criichinacaqui jacatatskattaz̈ cjequic̈ha.  
\v 17 Tii muntuquiz z̈ejtchi criichinacz̈ tuqui jacatatskattaz̈ cjequic̈ha. Nii ticzi criichinacaz̈ jacatatskattiquiztan parti criichinacaqui ninacz̈tan juntupacha chjitz̈tazakaz cjequic̈ha. Nekztan tsewcchuc tsjir taypiquiz Jesucristo Jilirz̈tan zalaquic̈ha. Jalla nekztanaqui tjapa criichinacaqui tirapanz̈ Jesucristo Jilirz̈tan wiñaya kamaquic̈ha.  
\v 18 Jalla nii zizcu, nii takunacz̈tan porapat kuzasnaquic̈ha. 
\c 5  
\p  
\v 1 Jilanaca, cullaquinaca, c̈hjulorat Jesucristuqui quejpz̈cac̈haja, niz̈aza ima niiz̈ quejpz̈can c̈hjulut watac̈haja, jalla nii pizc puntuquiztan anc̈hucaquiz ana anchal cjijruc̈ha.  
\v 2 Anc̈hucqui nii pizc puntu zumpacha zizza, Jesucristo Jiliriqui tiripintitz̈ tjonz̈caquic̈ha. Z̈oñinacaz̈ ana c̈hjulu pinsita, tiripintit tsjii tjañiqui luzza. Jalla niz̈taz̈ cjequic̈ha Jesucristo Jiliriz̈ tjonzqui.  
\v 3 Ana criichi z̈oñinacaz̈ “Walikal kamok” cjenpan, niz̈aza cuntintu z̈elan, tiripintit Yoozqui ninacz̈quiz tsucnaquic̈ha casticz̈ tjuñz̈tan. Jaknuz̈ut tsjaa ic maatak z̈on tiripintit laaquic̈haja majtsjapa, jalla niz̈taz̈ tiripintit ana criichi z̈oñinacaqui castictapanz̈ cjequic̈ha. Nii casticz tjuñquiztan ana atipa ataquic̈ha.  
\v 4 Jilanaca, cullaquinaca, ana criichinacaqui zumchiquiz kamc̈ha. Anc̈huczti anaz̈ zumchiquiz kamc̈ha. Jalla niz̈tiquiztan Jesucristuz̈ tjonzqui anaz̈ anc̈huc tsucnaquic̈ha tsjii tjañiz̈takaz.  
\v 5 Tjapa anc̈hucqui Yooz zuma kjañ jiczquiz kamiñc̈hucc̈ha, anaz̈ zumchiquiz kamiñc̈hucc̈ha.  
\v 6 Jalla niz̈tiquiztan Jesucristo Jiliriz̈ tjonz tjuñi anc̈hucqui listu tjaczi zuma kuzziz tjewznaquic̈ha. Zuma kamcan, listupachaz̈ tjewz̈na, ana tjajtaz̈okaz. Ana criichi z̈oñinacaqui ana juyzu paac̈ha Jesucristo tjonz tjuñi puntuquiztan. Ana niz̈ta cjee. Jesucristuz̈ tjonz tjuñi zuma listuz̈ tjewz̈na, tjaji watsi kuzziztakaz. Niz̈aza zuma kamzjapa persun wira cwitasa.  
\v 7 Weenqui z̈oñinacaqui panz̈ tjajc̈ha. Niz̈aza weenqui z̈oñinacaqui licc̈ha, panz̈ licc̈ha. Jalla nuz̈ paacan, ana iya c̈hjulumi pinsic̈ha. Jalla niz̈tac̈ha ana criichi z̈oñinacaqui. Jesucristuz̈ tjonz puntuquiztan ana juyzu paac̈ha.  
\v 8 Anc̈hucqui ana niz̈ta cjee. Uc̈humnacaqui Yooz kjan jiczquiz kamiñc̈humc̈ha. Jalla niz̈tiquiztan persun kuz zuma Yooz jiczquiz kamzjapa, cwitasa. Yoozquin tjapa kuztan cjee, Yooz anc̈huc Satanasquiztan tsijtsinajo. Niz̈aza criichi z̈oñinacz̈tan zuma munaziza. Niz̈aza anc̈hucqui liwriiz tjuñi zuma listuz̈ tjewz̈naquic̈ha. Jalla nuz̈ kaman armichiztakaz cjequic̈ha. Jalla niz̈tiquiztan Satanasaqui anc̈huc ana atipasac̈ha.  
\v 9 Yoozqui uc̈humnaca ana utchic̈ha casticta cjisjapa. Pero Yoozqui uc̈humnaca utchic̈ha, zuma liwriita wira tanzjapa Jesucristo Jilirz̈ cjenaqui.  
\v 10 Jesucristuqui uc̈hum laycu ticzic̈ha, z̈ejtchi criichinacami ticzi criichinacami niiz̈tan chica cuntintu kamajo.  
\v 11 Jalla niz̈tiquiztan porapat p'ekinchayrasaquic̈ha, tjurt'iñi kuzziz cjisjapa. Niz̈aza porapat yanaparasaquic̈ha, zuma kamañchiz kamzjapa. Anziqui anc̈hucqui porapat yanapassa. Jalla nuz̈ tirapan porapat yanaparasaquic̈ha. 
\s1 PABLUZ̈ CHIIZ̈INTA TAKUNACA 
\p  
\v 12 Jilanaca, cullaquinaca, anc̈hucatan Yooz taku paljayñi z̈oñinaca z̈ejlc̈ha. Jalla ninacz̈quiz rispitaquic̈ha. Niz̈aza anc̈huca irpiñinacz̈quiz rispitaquic̈ha. Niz̈aza anc̈hucaquiz zuma tawkz̈tan chiiz̈iñi z̈oñinacz̈quiz rispitaquic̈ha. Yooz Jiliriz̈ uchtaz̈ cjen nii z̈oñinacz̈ mantuquiz z̈ejlc̈ha anc̈hucqui. Jalla ninacz̈quiz rispitajo rocuc̈ha.  
\v 13 Anc̈hucqui tjapa nii z̈oñinacami ancha rispitaquic̈ha ninacaz̈ Yooztajapa langztiquiztan. Ninacz̈tan zuma munazaquic̈ha. Niz̈aza anc̈hucqui porapat zumapanz̈ kamaquic̈ha. 
\p  
\v 14 Jilanaca, cullaquinaca, anc̈hucaquiz chiiz̈inz̈cuc̈ha, jayrazñi criichinacz̈quiz zumpacha trabajzjapa chiiz̈inajo, niz̈aza ururñi kuzziz criichinaca tjup kuzziz cjeyajo, niz̈aza llajllasñi kuzziz criichinaca tjurt'iñi kuzziz cjiskatajo. Niz̈aza tjapa criichinacz̈tanami pasinziz kuzziz cjee. 
\p  
\v 15 Tsjii z̈oñiqui ana wali paatan tsjiizuñaqui ana niz̈ta ayni tjepunz waquizic̈ha. Antiz zuma munaziz waquizic̈ha porapatmi niz̈aza tjapa z̈oñinacz̈tanami. 
\p  
\v 16 C̈hjulu watanami cuntintuz̈ cjee.  
\v 17 Yoozquin tirapanz̈ mayiza.  
\v 18 C̈hjulu watanami Yoozquin sparaquic̈ha cjee. Jalla nuz̈ anc̈hucalta Yooz munc̈ha anc̈hucqui Jesucristuz̈quin kuz tjaachiz̈ cjen. 
\p  
\v 19 Espíritu Santuz̈ obra tjeeznan, ana nii ataja.  
\v 20 Niz̈aza Yooz taku paljayñi z̈oñinaca ana iñara.  
\v 21 Antiz nii paljayñi z̈oñinacz̈ taku zumpacha tantiya, werar Yooz taku ana werar Yooz taku, jalla nii. Zuma Yooz takuz̈ cjenaqui, kuzquiz nii taku catokaquic̈ha.  
\v 22 Ultimu ana werar Yooz taku cjequiz̈ niiqui, nii taku ana catokaquic̈ha. C̈hjul ujmi niz̈aza anawalinacami anapan paa. 
\p  
\v 23 Uc̈hum Yoozza cuntintu kuzziz cjiskatñiqui. Jalla nii uc̈hum Yooz anc̈hucaquiz niiz̈ kuzcamapankaj kamkatla. Niz̈aza Yoozqui anc̈huca kuzmi, animumi, janchi curpumi zumapaj cwitila ana tsjii uj cjeyajo, Jesucristo Jiliriz̈ tjonzcama.  
\v 24 Yoozqui anc̈huc kjawzic̈ha niiz̈ partiquiz cjisjapa. Yoozza niiz̈ taku panz̈ cumpliñiqui. 
\p  
\v 25 Jilanaca, cullaquinaca, oracionz̈tan yanapz̈calla. 
\p  
\v 26 Tjapa criichi jilanacz̈quiz zuma tsaanaquic̈ha, jaknuz̈t anc̈huca tsaanz cuzturumpi z̈ejlc̈haja, jalla nuz̈. 
\p  
\v 27 Wejrqui anc̈hucaquiz tjiinuc̈ha, tii carta tjapa criichi jilanacz̈quiz liiz̈inaquic̈ha, jalla nuz̈. 
\p  
\v 28 Uc̈hum Jesucristo Jiliriqui anc̈hucaquiz yanapt'ila. Nuz̈ukazza tii cartaqui. Amén.