\id TIT - Chortí NT -Guatemala 2012 (DBL -2013) 
\h TITO 
\toc1 Jax era e ojroner lo que tzꞌijbꞌabꞌir umen e Apóstol Pablo tama e hermano Tito 
\toc2 Tito 
\toc3 Tit 
\mt2 Jax era e ojroner lo que tzꞌijbꞌabꞌir umen e Apóstol Pablo tama e hermano Tito  
\c 1  
\p
\v 1 Pues nen xeꞌ Pabloen jax inteꞌ uman e Dios y inteꞌ apóstol tuaꞌ e Jesucristo xeꞌ uyebꞌta tarien tuaꞌ incanse tunor tin e sicbꞌabꞌirobꞌ umen e Dios tuaꞌ acꞌotoy acꞌupseyanobꞌ tamar, y tuaꞌ acꞌotoy unatobꞌ lo que erach este que uyactobꞌ tunor umabꞌambꞌanirobꞌ.  
\v 2 Pues e cꞌupesiaj taca e natanwar era aquetpobꞌ tama inteꞌ cojcsiaj que cꞌani uchꞌamiobꞌ e cuxtar xeꞌ machi tuaꞌ acꞌapa. Porque jax Cadiosir xeꞌ machi uyubꞌi amajresian xeꞌ cay uyareon conda ne mato achena or e rum era que cꞌani uyajcꞌon e cuxtar xeꞌ machi tuaꞌ acꞌapa.  
\v 3 Y esto coner cꞌotoy e día conda cay chectesna tut e gente tara tor e rum que ayan e corpesiaj umen que cay checsuna tunor era nimener umen que arobꞌnen umen Cadiosir xeꞌ jax Cawajcorpesiaj que bꞌan ucꞌani tuaꞌ inche.  
\v 4 Pues hermano Tito, war intzꞌijbꞌa e carta era tabꞌa xeꞌ jax nisitzet tama cacꞌupesiaj tama Cawinquirar. Que Catata Dios taca Cawajcorpesiaj xeꞌ jax e Cristo Jesús uyajqꞌuiquet utacarsiaj taca tunor ujiriar.   
\s1 Upatnar e Tito tama e lugar Creta  
\p
\v 5 Pues entonces Tito, inwactet tama e lugar Creta tuaꞌ acꞌapa uꞌstes tunor lo que quetpato tuaꞌ achempa conda locꞌoyen. Y tamar era sicbꞌan chi chi tuaꞌ aquetpa líder tama inteꞌ inteꞌ grupo ajcꞌupesiajobꞌ tama inteꞌ inteꞌ chinam, bꞌan cocha cay inwaret tuaꞌ ache conda turento tacaret.  
\v 6 Pues tin e axin aquetpa inteꞌ líder ucꞌani tuaꞌ aquetpa cocha era: Que matucꞌa war uche tuaꞌ usubꞌajres ubꞌa tamar, y ucꞌani tuaꞌ aquetpa inteꞌ taca uwixcar, y umaxtac e winic era ucꞌani tuaꞌ acꞌupseyanobꞌ tama Cawinquirar, y ma erer achecta inteꞌ ojroner upater que war uche lo que mabꞌambꞌan, y ucꞌani tuaꞌ obꞌian tut utata.  
\v 7 Y cocha inteꞌ líder cocha era ucꞌani tuaꞌ ubꞌijres inteꞌ grupo ajcꞌupesiajobꞌ taca tunor upatnar e Dios, ucꞌani tuaꞌ aquetpa inteꞌ xeꞌ matucꞌa war uche tuaꞌ usubꞌajres ubꞌa tamar, y ma erer aquetpa inteꞌ xeꞌ ubꞌijnu que jax taca lo que ucꞌani jaxir tuaꞌ achempa, y ma erer aquetpa inteꞌ xeꞌ aqꞌuijna wacchetaca, y ma erer aquetpa inteꞌ xeꞌ axin acaray, y ma erer aquetpa inteꞌ xeꞌ aqꞌuijna este que axin uyajcꞌu inteꞌ upiar, y ma erer aquetpa inteꞌ xeꞌ uturbꞌa ujor tamar taca e tumin.  
\v 8 Y inteꞌ líder ucꞌani tuaꞌ aquetpa turix tuaꞌ uchꞌami inteꞌ ajwara tama uyotot, y ucꞌani tuaꞌ atzay uwira tunor lo que imbꞌutz, y ucꞌani tuaꞌ unata ucojco ubꞌa tuaꞌ machi uche e mabꞌambꞌanir, y ucꞌani tuaꞌ aquetpa inteꞌ xeꞌ war uturbꞌa ubꞌa tama e Dios, y ucꞌani tuaꞌ aquetpa erach uwirnar, y ucꞌani tuaꞌ uche tunor lo que aquetpa tuaꞌ uche.  
\v 9 Y tin e axin aquetpa inteꞌ líder tama inteꞌ grupo ajcꞌupesiajobꞌ ucꞌani tuaꞌ uturbꞌa ubꞌa tamar e canseyaj lo que uchꞌami tama uyojroner e Dios tuaꞌ uyubꞌi ucꞌunles uyalmobꞌ e inmojr taca e canseyaj xeꞌ erach, y tuaꞌ uyubꞌi uche acꞌupseyan tin e war oꞌjronobꞌ upater e canseyaj era.   
\p
\v 10 Porque ayan meyra gente xeꞌ ajqꞌuecranerobꞌ y meyra gente tuaꞌ e Israel xeꞌ machi ucꞌaniobꞌ lo que war cacanse xeꞌ erach. Pero e gente cocha era intaca oꞌjronobꞌ y amajresian tut e gente axin.  
\v 11 Pues ucꞌani tuaꞌ aquete awabꞌu e gente cocha era porque war axanobꞌ y war acanseyanobꞌ tamar lo que machi ani ucꞌani tuaꞌ acansena este que axin usati ujorobꞌ tunor tin e turobꞌ tama inteꞌ otot. Pero war uchiobꞌ tunor era ajtaca tuaꞌ ulocse e tumin tuaꞌ e gente axin.   
\p
\v 12 Pues ayan ani inteꞌ nuxi winic tama ureligión e gente tama e Creta era xeꞌ cay ojron tamar uyet ajlugarir y che: “Tunor niwet ajlugarir tama e Creta era ajmajresiajobꞌ inyajrer, y bꞌanobꞌ cocha inteꞌ animal, y calapir awiobꞌ, y ajcꞌoyir gentiobꞌ.” Bꞌan che inteꞌ uyet ajlugarir tama e Creta era.  
\v 13 Pues erach e ojroner era porque bꞌan turobꞌ e gente era. Y tamar era quiqui cꞌayenobꞌ tuaꞌ uyactobꞌ tunor era inyajrer y tuaꞌ uturbꞌa ubꞌobꞌ inyajrer tamar uyojroner e Dios.  
\v 14 Y tamar era machi ixto tuaꞌ axin uyubꞌiobꞌ inteꞌ tojbꞌen ojroner xeꞌ axin achecsuna umen tin e tuobꞌ e Israel, y nien machi ixto tuaꞌ axin uyubꞌiobꞌ lo que arobꞌnobꞌ umen tin e machi ucꞌaniobꞌ lo que erach.   
\p
\v 15 Pues tut tin e imbꞌutz tunor ubꞌijnusiaj matucꞌa xeꞌ majax imbꞌutz tutobꞌ. Pero tut tin e xex ut ubꞌijnusiajobꞌ y xeꞌ machi acꞌupseyanobꞌ tama Cawinquirar ubꞌijnuobꞌ que matucꞌa xeꞌ imbꞌutz tama tunor. Y bꞌan ubꞌijnuobꞌ umen que tijrem ujorobꞌ, y umen que machi ucojco ubꞌobꞌ tama ubꞌijnusiajobꞌ, y tamar era war uchiobꞌ e mabꞌambꞌanir iraj iraj.  
\v 16 Jaxirobꞌ war chenobꞌ que war unatobꞌ chi e Dios y que war acꞌupseyanobꞌ tamar ubꞌan, pero tamar lo que war uchiobꞌ chequer que matucꞌa war unatobꞌ tama e Dios. Pues e gente era war uxejbꞌiobꞌ ut tunor lo que ayan, y mamajchi tut cꞌani obꞌianobꞌ, y matucꞌa ucꞌampibꞌirobꞌ tuaꞌ uchiobꞌ nien imbꞌijc lo que imbꞌutz.   
\c 2  
\s1 E canseyaj xeꞌ erach  
\p
\v 1 Pues entonces Tito, cansen jax taca e canseyaj xeꞌ erach.  
\v 2 Aren e onian winicobꞌ que ucꞌani tuaꞌ ucojco ubꞌobꞌ, y que ucꞌani tuaꞌ aquetpobꞌ tawar tuaꞌ atzay eꞌrna umen e inmojr, y que ucꞌani tuaꞌ uquete ubꞌobꞌ tuaꞌ ubꞌijnu jay bueno tut e Dios lo que cꞌani uchiobꞌ, y que ucꞌani tuaꞌ uwirobꞌ que matucꞌa e muaquir tama ucꞌupesiajobꞌ, y que ucꞌani tuaꞌ uyajta utobꞌ tunor upiarobꞌ, y que ucꞌani tuaꞌ aqꞌuecꞌo awawan tut tunor lo que watar.  
\v 3 Y bꞌan tama tin e nojta ixictac ubꞌan, aren que ucꞌani tuaꞌ aturuanobꞌ tzꞌustaca, y que machi tuaꞌ oꞌjronobꞌ upater e inmojr, y que machi tuaꞌ axin acaray, y que ucꞌani tuaꞌ aquetpobꞌ ajcanseyajobꞌ tamar lo que imbꞌutz.  
\v 4 Y tamar era e ixictac era erer ucansiobꞌ e ixictac xeꞌ mato jax meyra ujabꞌ cocha ucꞌani tuaꞌ uyajta ut uviejo y cocha ucꞌani tuaꞌ uyajta ut umaxtac.  
\v 5 Y e nojta ixictac era ucꞌani tuaꞌ ucanse e inmojr ixictac cocha tuaꞌ uquete ubꞌobꞌ tuaꞌ ubꞌijnu jay bueno tut e Dios lo que cꞌani uchiobꞌ era, y ucꞌani tuaꞌ ucansiobꞌ cocha ucꞌani tuaꞌ aquetpobꞌ erach, y cocha ucꞌani tuaꞌ apatnobꞌ macuir uyototobꞌ, y tuaꞌ obꞌianobꞌ tut uviejobꞌ. Pues bꞌan ucꞌani tuaꞌ achempa umenerobꞌ tuaꞌ machi achecta inteꞌ ojroner upater uyojroner e Dios.   
\p
\v 6 Y tacren tin e chꞌom sitzobꞌ tuaꞌ unatobꞌ que ucꞌani tuaꞌ uquete ubꞌobꞌ tuaꞌ ubꞌijnuobꞌ jay bueno tut e Dios lo que cꞌani uchiobꞌ.  
\v 7 Y turbꞌan abꞌa tuaꞌ ache jax taca lo que imbꞌutz tut e chꞌom sitzobꞌ era tuaꞌ acanuobꞌ cocha ucꞌani tuaꞌ uchiobꞌ jaxirobꞌ. Y tamar acanseyaj irsenobꞌ que erach awirnar y que majax aras tunor era.  
\v 8 Sicbꞌan e ojroner xeꞌ uwajpi conda war icanseyan tuaꞌ machi apasi e bꞌir tut tin e cꞌani ani utuchꞌiet tamar awojroner. Y tamar era jay ayan tin e war usicbꞌa tucꞌa tamar tuaꞌ oꞌjron apater axin asubꞌajra umen que matucꞌa utajwi tamaret xeꞌ mabꞌambꞌan.   
\p
\v 9 Y cansen tin e aquetpa inteꞌ man xeꞌ mambꞌir inyajrer que ucꞌani tuaꞌ obꞌianobꞌ tut uyajyumobꞌ, y que ucꞌani tuaꞌ uturbꞌa ubꞌobꞌ tuaꞌ uchiobꞌ upatnar bꞌan taca cocha ucꞌani uyajyum, y que machi tuaꞌ uyare que machi cꞌani uche lo que arobꞌna umen uyajyum.  
\v 10 Y cansen que machi tuaꞌ axujchꞌianobꞌ, sino que ucꞌani tuaꞌ uchiobꞌ jax taca lo que erach. Y tamar era erer acꞌotoy unatobꞌ tunor tin e uwirobꞌ lo que war uchiobꞌ e manobꞌ era que galan e canseyaj tama Cadiosir xeꞌ jax Cawajcorpesiaj.   
\p
\v 11 Y cansen tunor lo que war intzꞌijbꞌa tabꞌa era porque coner war achectesna tut tunor e gente tara tor e rum que ayan utacarsiaj e Dios xeꞌ jax xeꞌ utares e corpesiaj.  
\v 12 Pues utacarsiaj e Dios war ucansion que ucꞌani tuaꞌ cawacta e mabꞌambꞌanir, y que ucꞌani tuaꞌ cawacta tunor lo que uyusre uche cawerir bꞌan cocha war uchiobꞌ e gente tara tor e rum, y que ucꞌani tuaꞌ caquete cabꞌa tuaꞌ cabꞌijnu jay bueno tut e Dios lo que cꞌani cache, y que ucꞌani tuaꞌ caquetpa erach, y que ucꞌani tuaꞌ cache jax taca lo que atzay uwira e Dios tama cacuxtar tara tor e rum.  
\v 13 Y utacarsiaj e Dios war ucansion cocha ucꞌani tuaꞌ caturuan conda warto cacojco uyopar e nuxi chojbꞌesiaj lo que cꞌani uyajcꞌon Cadiosir conda achecta watar e Jesucristo xeꞌ jax Cawajcorpesiaj y xeꞌ jax Cadiosir xeꞌ nojta ubꞌan.  
\v 14 Pues jax Cawinquirar Jesucristo era xeꞌ ixin uyajcꞌu ubꞌa tuaꞌ achamesna tuaꞌ ucorpeson tama tunor camabꞌambꞌanir y tuaꞌ uchion caquetpa imbꞌutz tut jaxir. Y tamar era war caquetpa uchinam e Cristo, y war cosre tama cawalma tuaꞌ caxin cache jax taca lo que erach tut jaxir.   
\p
\v 15 Pues entonces Tito, lo que war intzꞌijbꞌa tabꞌa era jax lo que ucꞌani tuaꞌ iꞌxin acanse e ajcꞌupesiajobꞌ. Cꞌunles uyalmobꞌ tin e tzajtaca utobꞌ, y cꞌayenobꞌ tunor tin e machi cꞌani uyactobꞌ e mabꞌambꞌanir taca tunor e cꞌotorer xeꞌ ajcꞌunet. Ira awacta oꞌjron tin e cꞌani uyaret que matucꞌa acꞌampibꞌir.   
\c 3  
\s1 Lo que ucꞌani tuaꞌ uche inteꞌ ajcꞌupesiaj tama Cawinquirar  
\p
\v 1 Pues cꞌajpesobꞌ tunor e ajcꞌupesiajobꞌ que ucꞌani tuaꞌ uyose ubꞌobꞌ yebꞌar ucꞌotorer e ajcꞌotorer, y que ucꞌani tuaꞌ oꞌbꞌianobꞌ tut tunor e nuquir ajcꞌamparobꞌ, y que ucꞌani tuaꞌ aquetpobꞌ turix tuaꞌ axin uchiobꞌ tunor lo que imbꞌutz.  
\v 2 Aren e ajcꞌupesiajobꞌ que machi tuaꞌ utuchꞌiobꞌ otronteꞌ, sino que ucꞌani tuaꞌ aquetpobꞌ incꞌun uwirnarobꞌ tut e gente, y que ucꞌani tuaꞌ ubꞌijnuobꞌ cocha tuaꞌ utacriobꞌ e inmojr, y que ucꞌani tuaꞌ uchecsu ubꞌobꞌ tut e gente que manxujresbꞌir turobꞌ tama uyalmobꞌ.   
\p
\v 3 Pues cꞌani inwaret que non ubꞌan intran ani cawirnar, y que machi ani cꞌupseyanon tut e Dios, y que war ani camajresna iraj iraj, y que cacharon ani tama tunor lo que uyusre uche cawerir y tamar lo que galan ani canata cache. Y war ani cache meyra e mabꞌambꞌanir, y cacꞌuxnaqꞌui ani cawira lo que ayan tuaꞌ otronteꞌ, y xejbꞌebꞌir coit ani umen e inmojr y caxejbꞌe cabꞌa ani inteꞌ intion ubꞌan.  
\v 4 Pero conda e Dios xeꞌ jax Cawajcorpesiaj cay uwirsion que incꞌun uwirnar y que war uyajta utobꞌ tunor e gente tara tor e rum,  
\v 5 ixin ucorpeson. Majax umen que war ani cache lo que imbꞌutz tut jaxir, sino que umen que jaxir ayan ucꞌunersiaj tamaron. Y ixin ucorpeson conda quetpon pocbꞌir umen Unawalir e Dios xeꞌ usuti ucuxpeson otronyajr y xeꞌ ixin uyustes tunor cawirnar.  
\v 6 Pues jax Cawajcorpesiaj Jesucristo xeꞌ ixin ucorpeson, y tamar era Cadiosir ixin uyajcꞌon meyra ucꞌotorer conda uyebꞌta tari Unawalir tuaꞌ aquetpa macuir cawalma.  
\v 7 Y tamar utacarsiaj era xeꞌ uchion caquetpa erach ixin upasi e bꞌir tuaꞌ uyubꞌion cachꞌami e cuxtar xeꞌ machi tuaꞌ acꞌapa lo que war cacojco tuaꞌ cachꞌami watar e día.   
\p
\v 8 Pues tunor e ojroner era tawar tuaꞌ acꞌupesna umen tunor e gente, y tamar era ira awacta tuaꞌ achecsu tunor e ojroner era tut e ajcꞌupesiajobꞌ, porque tunor tin e war acꞌupseyanobꞌ tama e Dios ucꞌani tuaꞌ uturbꞌa ubꞌobꞌ tuaꞌ uchiobꞌ tunor lo que imbꞌutz. Pues tunor era galan y ayan meyra ucꞌampibꞌir tut tunor e ajcꞌupesiajobꞌ.  
\v 9 Pero ira awacta abꞌa tuaꞌ iyosena macuir inteꞌ bꞌiritir xeꞌ matucꞌa ucꞌampibꞌir conda war oꞌjron inteꞌ tamar uchꞌajnarir, o conda war aqꞌuecran inteꞌ tamar lo que ayan tama uley e Moisés, porque matucꞌa utacrion cache y matucꞌa ucꞌampibꞌir tunor era.   
\p
\v 10 Y jay ayan tin e war uche ubꞌa tuaꞌ uxere inteꞌ grupo ajcꞌupesiajobꞌ, aren chajr tuaꞌ uyacta, y jay machi cꞌani oꞌbꞌian, tzacren loqꞌuic.  
\v 11 Pues erer anata que inteꞌ cocha era cꞌochochoj tunor ubꞌijnusiaj tama uyalma y que jax inteꞌ ajmabꞌambꞌanir, y tamar era war aquetpa tijresbꞌir inyajrer umen lo que war uche.   
\p
\v 12 Pues entonces Tito, cꞌani inwebꞌta axin e hermano Artemas o e hermano Tíquico toit. Y conda acꞌotoy tin xeꞌ cꞌani inwebꞌta axin, turbꞌan abꞌa tuaꞌ iꞌxin asicbꞌen tama e chinam Nicópolis tiaꞌ war imbꞌijnu inquetpa tama e tiempo tuaꞌ e sisar.  
\v 13 Y tacren e hermano Zenas xeꞌ jax inteꞌ abogado xeꞌ war axana era taca e hermano Apolos. Tacrenobꞌ taca tunor lo que ucꞌaniobꞌ tama uxambꞌar era tuaꞌ machi unumse ubꞌobꞌ tor e bꞌir.  
\v 14 Pues tunoron xeꞌ ajcꞌupesiajon tama Cawinquirar ucꞌani tuaꞌ cacano cache lo que imbꞌutz uwirnar iraj iraj, y tuaꞌ catacre cabꞌa inteꞌ intion conda ayan lo que ucꞌani tamaron, porque tamar era cꞌani abꞌoro tunor cacꞌampibꞌir tut e Dios.   
\s1 E cꞌajpesiaj  
\p
\v 15 Pues tunor tin e turobꞌ tacaren tara war uyebꞌta axin e cꞌajpesiaj tabꞌa. Y cꞌajpesobꞌ ubꞌan tunor tin e atzay uwiron xeꞌ war acꞌupseyanobꞌ tama Cadiosir tiaꞌ turet. E Dios utacricox inteꞌ intiox. Tara acꞌapa tunor niwojroner, che e Pablo.