\id GAL - Chortí NT -Guatemala 2012 (DBL -2013) \h GÁLATAS \toc1 Jax era e ojroner lo que tzꞌijbꞌabꞌir umen e Apóstol Pablo tama e sian grupo ajcꞌupesiajobꞌ xeꞌ turobꞌ tama e departamento Galacia \toc2 Gálatas \toc3 Ga \mt2 Jax era e ojroner lo que tzꞌijbꞌabꞌir umen e Apóstol Pablo tama e sian grupo ajcꞌupesiajobꞌ xeꞌ turobꞌ tama e departamento Galacia \c 1 \p \v 1 Nen xeꞌ Pabloen jax inteꞌ apóstol tuaꞌ e Jesucristo, pero majax umen que tzacarbꞌiren tarien umen inteꞌ winic nien que pejcbꞌiren umen e winicobꞌ. Pero nen apostolen umen que pejcbꞌiren umen e Jesucristo y umen Catata Dios xeꞌ ixin usuti ubꞌixqꞌues e Jesucristo tujam e chamenobꞌ. \v 2 Pues nen taca tunor e hermanuobꞌ xeꞌ turobꞌ tacaren era war catzꞌijbꞌa e carta era tama cora sian grupo ajcꞌupesiajobꞌ xeꞌ turox tama e departamento Galacia. \v 3 Chꞌamic tunor utacarsiaj y tunor ujiriar Catata Dios y tuaꞌ Cawinquirar Jesucristo \v 4 xeꞌ jax xeꞌ ixin uyajcꞌu ubꞌa tuaꞌ achamesna tama tunor camabꞌambꞌanir y tuaꞌ ucorpeson tama ucꞌotorer e tiempo era xeꞌ mabꞌambꞌan bꞌan cocha ucꞌani Catata Dios. \v 5 Catattzꞌic ucꞌabꞌa Catata Dios iraj iraj y ejcꞌar ejcꞌar. Amén. \s1 Matucꞌa otronteꞌ ojroner xeꞌ uyubꞌi ucorpeson \p \v 6 Pues nen era war imbꞌacta inwira que nox war ixlocꞌoy najtir tut ubꞌir Cadiosir wacchetaca cocha era, y que war iwacta tin e cay ichꞌami bꞌajxan xeꞌ jax xeꞌ cay upejcox taca utacarsiaj e Cristo, y que ixiox iturbꞌa ibꞌa tama otronteꞌ ojroner xeꞌ war ichebꞌe que axin uqꞌuechiox ixixin tut e qꞌuin conda ixixin ixchamay. \v 7 Pero matucꞌa otronteꞌ ojroner xeꞌ uyubꞌi uqꞌuechion caxin tut e qꞌuin conda caxin cachamay. Ajtaca uyojroner e Cristo xeꞌ uyubꞌi ucorpeson. Pero cocha ayan tin e war ucansiox iraj iraj que ayan otronteꞌ ojroner que chenobꞌ que más erach, war ixquetpa nutꞌur iut tama tunor e sian canseyaj era. \v 8 Pero cꞌani inwareox era que majax bꞌan cocha war ixarobꞌna umen e inmojr xeꞌ war uyareox que ayan otronteꞌ bꞌir tuaꞌ acꞌotoy acorpesna inteꞌ tamar, porque matucꞌa más ojroner xeꞌ tuaꞌ ucorpeson, ajtaca e ojroner tama Cawinquirar Jesucristo. Y tin tin xeꞌ acꞌotoy uyareox que ayan otronteꞌ ojroner xeꞌ más erach, quetpac yebꞌar inteꞌ bꞌax. Y motor jay acꞌotoy inteꞌ ángel o motor jay nen xeꞌ Pabloen incꞌotoy ani inwareox que ayan otronteꞌ ojroner xeꞌ erer ani ucorpeson, pero majax bꞌan porque jax taca Cawinquirar Jesucristo xeꞌ uyubꞌi ucorpeson. \v 9 Pues inwareoxix bꞌajxan era, pero cꞌani insutpa inwareox otronyajr, que jay ayan tin e acꞌotoy uyareox que ayan otronteꞌ bꞌir tuaꞌ acꞌotoy acorpesna inteꞌ que majax bꞌan cocha cay ichꞌami, que jaxir quetpac yebꞌar inteꞌ bꞌax inyajrer. \p \v 10 Pues entonces nen era machi war inche nibꞌa tuaꞌ intajttzꞌa umen e winicobꞌ tamar lo que uyubꞌi inwareobꞌ, sino que war inturbꞌa nibꞌa tuaꞌ intajttzꞌa umen e Dios tamar lo que inche. Pues jay nen ani war insicbꞌa tuaꞌ taca intzayjres e gente uwiren, ma cocha erer inquetpa inteꞌ uman e Cristo. \s1 Conda e Pablo sicbꞌana umen e Dios tuaꞌ aquetpa inteꞌ apóstol \p \v 11 Pues entonces niwermanuox, cꞌani inwareox era que e ojroner tama e corpesiaj lo que war inchecsu axin machi tari tama ubꞌijnusiaj inteꞌ winic. \v 12 Porque nen machi inchꞌami e ojroner era tama inteꞌ winic y mamajchi xeꞌ turu tara tor e rum cay ucansen tama tunor era, sino que jax taca e Jesucristo xeꞌ cay uchecsu tunor era taniut. \p \v 13 Pues nox cay iyubꞌi cocha turu niwirnar tama e tiempo ixnix conda warto inxana tama e cꞌupesiaj tuaꞌ e gente tuaꞌ e Israel. Y war inata que tama e tiempo yajaꞌ war inche unumse ubꞌobꞌ meyra tin e war acꞌupseyanobꞌ tama e Cristo este que inturbꞌa nibꞌa tuaꞌ intijres ani tunor e grupo ajcꞌupesiajobꞌ inyajrer. \v 14 Y tama e tiempo yajaꞌ nen war ani inturbꞌa nibꞌa más nojta tama tunor nicꞌupesiaj ani este que quetpen más nojta que tunor niwet chꞌom maxtaquir porque nen cay inturbꞌa nibꞌa más meyra tuaꞌ incojco tunor e onian bꞌijnusiaj tuaꞌ catata viejobꞌirobꞌ. \v 15 Pero Cadiosir meyra ayan utacarsiaj xeꞌ cay usicbꞌen conda merato incuxpa ani, y de allí cay upejquen tuaꞌ inquetpa uman. Pues tama inteꞌ hora conda jaxir ubꞌijnu que más imbꞌutz tut, \v 16 cay uchecsu taniut chi Uyunen xeꞌ jax Cawinquirar Jesucristo. Y tamar era upejquen tuaꞌ inxin inchecsu uyojroner e Dios tama e corpesiaj tut tunor e gente xeꞌ majax tuobꞌ e Israel. Pero tama e hora yajaꞌ ma tiaꞌ ixien umbꞌi tuaꞌ otronteꞌ tama tunor era. \v 17 Y machi ixien tama e chinam Jerusalem tuaꞌ inwira tin e aquetpobꞌ apostolobꞌ bꞌajxan que nen. Pero lo que inche jax era: Ixien wacchetaca esto tama e lugar Arabia y de allí sutpa ixien wacchetaca esto tama e chinam Damasco. \p \v 18 Entonces conda cꞌapa numuy e uxteꞌ año era ixien esto tama e chinam Jerusalem tuaꞌ inwarajse e Pedro, y quetpen tacar quince día. \v 19 Pero mamajchi más cay inwarajse tujam e apostolobꞌ tama nixambꞌar era, sino que jax taca e Santiago xeꞌ jax uwijtzꞌin Cawinquirar. \v 20 Y tunor lo que war intzꞌijbꞌa tibꞌa era erer inwareox tut e Dios que erach tunor y que machi war inmajresox nien imbꞌijc. \p \v 21 Pero nacpat era ixien tama e lugar Siria y tama e lugar Cilicia. \v 22 Y tamar era mamajchi tujam e sian grupo ajcꞌupesiajobꞌ tama e Cristo xeꞌ turobꞌ tama e departamento Judea cꞌotoy unatobꞌ chien nen tama e día yajaꞌ. \v 23 Ajtaca war uyubꞌiobꞌ inteꞌ ojroner xeꞌ che: “Ayan inteꞌ winic xeꞌ war ani usicbꞌon tuaꞌ uchamsion, pero che que coner war axin tic taca tuaꞌ ucanse tunor e gente cocha tuaꞌ acꞌupseyanobꞌ tama e Cristo tuaꞌ acorpesnobꞌ. Y jax era e ojroner lo que cꞌani ani utijres.” Bꞌan che e ojroner xeꞌ checta ixin tut tunor e sian grupo ajcꞌupesiajobꞌ tama e departamento Judea. \v 24 Y tamar era tunor e hermanuobꞌ yajaꞌ war utattzꞌiobꞌ ucꞌabꞌa Cadiosir que nen war inchecsu uyojroner e Dios tama e corpesiaj coner. \c 2 \s1 Conda e Pablo ixin tuaꞌ uwarajse cora apostolobꞌ tama e chinam Jerusalem \p \v 1 Pues entonces conda cꞌapa numuy catorce año ixien otronyajr tama e chinam Jerusalem y ixin e hermano Bernabé tacaren ubꞌan. Y caqꞌueche ixin e hermano Tito ubꞌan. \v 2 Pero ixien tama e hora era umen que bꞌan arobꞌnen umen e Dios tuaꞌ inche. Y conda cꞌotoyon cay camorojse cabꞌa taca tin e quetpobꞌ líder tama tunor e grupo ajcꞌupesiajobꞌ, y tamar era cay inwareobꞌ tunor lo que war inchecsu tut e gente xeꞌ majax tuobꞌ e Israel tama e corpesiaj. Y bꞌan inche porque machi war incꞌani tuaꞌ aquetpa bꞌan taca tunor nipatnar lo que cay inche y lo que warto inche tujam e gente xeꞌ majax tuobꞌ e Israel. \v 3 Pero nien e hermano Tito xeꞌ majax tuaꞌ e gente tuaꞌ e Israel machi arobꞌna tuaꞌ axujra imbꞌijc uqꞌuewerir utejromar bꞌan cocha ucꞌani tuaꞌ achena tama tunor e tejromtac tama e lugar Israel cocha bꞌan chꞌar tzꞌijbꞌabꞌir tama uley e Moisés. \v 4 Pero ayan ubꞌan cora winicobꞌ xeꞌ cay uyose ubꞌobꞌ ticajam mucur xeꞌ war uche ubꞌobꞌ que hermanuobꞌ pero que majax, y cꞌotoyobꞌ tuaꞌ taca utajwiobꞌ cobꞌa cacorpesiaj tama e Cristo Jesús. Pero jaxirobꞌ intaca war ucꞌaniobꞌ tuaꞌ uyosionobꞌ yebꞌar ucꞌotorer uley e Moisés otronyajr. \v 5 Pero non machi cawactobꞌ tuaꞌ ucucruonobꞌ tamar e ojroner xeꞌ cay cachꞌami tuaꞌ e Dios tama e corpesiaj. Porque jaxirobꞌ war ani ucꞌaniobꞌ que tunor tin e majax tuobꞌ e Israel ucꞌani ani tuaꞌ axujra imbꞌijc uqꞌuewerir utejromar ubꞌan tuaꞌ uyubꞌi ani aquetpobꞌ imbꞌutz tut e Dios. Pero quetpa chequer que erach tunor e ojroner tama e corpesiaj tama Cawinquirar Jesucristo bꞌan taca cocha cay cꞌupseyanox tamar. \p \v 6 Pues matucꞌa más canseyaj xeꞌ cay uyajqꞌuenobꞌ tama e corpesiaj tama e Jesucristo tin e chequer que más nuquir winicobꞌ tama e chinam Jerusalem. Pues taniut nen majax más nojta ucꞌampibꞌir inteꞌ xeꞌ nuxi winic que inteꞌ xeꞌ choquem winic porque tut e Dios aquetpobꞌ larobꞌ tunor. \v 7 Y cocha matucꞌa más bꞌijnusiaj utajwiobꞌ tuaꞌ uyajqꞌuenobꞌ, cꞌotoy unatobꞌ que nen ebꞌetbꞌir tarien umen e Dios tuaꞌ inchecsu uyojroner e Dios tama e corpesiaj tut tin e majax tuobꞌ e Israel, bꞌan cocha e Pedro quetpa sicbꞌabꞌir umen e Dios tuaꞌ uchecsu uyojroner e Dios tama e corpesiaj tut tin e tuobꞌ e Israel. \v 8 Porque bꞌan cocha quetpa chequer que Cadiosir uyajcꞌu ucꞌotorer e Pedro tuaꞌ aquetpa apóstol tuaꞌ apatna tujam e gente xeꞌ tuobꞌ e Israel, y bꞌan quetpa chequer ubꞌan que Cadiosir ixin uyajqꞌuen nen ucꞌotorer tuaꞌ inquetpa apóstol tuaꞌ impatna tujam e gente xeꞌ majax tuobꞌ e Israel. \p \v 9 Pues entonces conda cꞌotoy unatobꞌ e Santiago y e Pedro y e Juan que pejcbꞌiren ixto umen e Dios tuaꞌ inche tunor e patnar era, jaxirobꞌ xeꞌ quetpobꞌ más nuxi líder tama e grupo ajcꞌupesiajobꞌ yajaꞌ cay uchuquiobꞌ nicꞌabꞌ y ucꞌabꞌ e Bernabé tuaꞌ uchecsu ubꞌobꞌ que unatobꞌ que tuon e Dios. Y quetpa que non tuaꞌ caxin cachecsu uyojroner e Dios tama e corpesiaj tut e gente xeꞌ majax tuobꞌ e Israel y que jaxirobꞌ tuaꞌ axin uchecsuobꞌ uyojroner e Dios tama e corpesiaj tut e gente xeꞌ tuobꞌ e Israel. \v 10 Ajtaca cay uyareonobꞌ que machi tuaꞌ canajpes tuaꞌ catacre tin e tzajtaca utobꞌ tama e lugar Israel, bꞌan cocha warix unsre tuaꞌ inche ubꞌan. \s1 Conda e Pablo uyare e Pedro que majax bueno lo que war uche conda turu tama e chinam Antioquía \p \v 11 Pues ayan inyajr conda turon tama e chinam Antioquía conda yopa e Pedro ubꞌan quetpen nen xeꞌ tuaꞌ inware tut tunor e gente que mabꞌambꞌan lo que war uche. \v 12 Pues lo que numuy jax era: Conda wartocto ayopa e Pedro cay weꞌ taca tunor e hermanuobꞌ xeꞌ majax tuobꞌ e Israel xeꞌ war che que majax xurbꞌir imbꞌijc uqꞌuewerir utejromarobꞌ. Pero nacpat era cꞌotoyobꞌ cora winicobꞌ xeꞌ tuobꞌ e Israel xeꞌ ebꞌetbꞌir tariobꞌ umen e Santiago xeꞌ turu tama e chinam Jerusalem, y conda e Pedro cay uwira e winicobꞌ era bꞌacta y machi ixto cꞌani aweꞌ taca e hermanuobꞌ era cocha majax xurbꞌir imbꞌijc uqꞌuewerir utejromarobꞌ. Porque bꞌan ubꞌijnusiajobꞌ e winicobꞌ era xeꞌ tuobꞌ e Israel que machi cꞌani awiobꞌ taca tin e majax xurbꞌir imbꞌijc uqꞌuewerir utejromar. \v 13 Y de allí cocha ayan cora hermanuobꞌ xeꞌ tuobꞌ e Israel tama e grupo ajcꞌupesiajobꞌ era, jaxirobꞌ cay uwirobꞌ tucꞌa war uche e Pedro y tamar era bꞌactobꞌ jaxirobꞌ ubꞌan, y machi ixto cꞌani awiobꞌ taca tin e majax xurbꞌir imbꞌijc uqꞌuewerir utejromar ubꞌan. Y conda e Bernabé uwira tunor era bꞌan cay uche jaxir ubꞌan. \v 14 Pero conda cay inwira que machi war acꞌupseyanobꞌ tut lo que erach lo que ayan tama uyojroner e Dios tama e corpesiaj, cay inware e Pedro tut tunor e gente era y che: “Net cuxpet tujam e gente tuaꞌ e Israel y chꞌiet tama tunor ucanseyajobꞌ, y jax net ubꞌan xeꞌ cay awacta tunor era ixnix conda cay achꞌami ucꞌabꞌa Cawinquirar Jesucristo. Y era ¿tucꞌa tuaꞌ war ache ubꞌijnuobꞌ tunor e gente era xeꞌ majax tuobꞌ e Israel que ucꞌani ani tuaꞌ acꞌupseyanobꞌ tut tunor e onian canseyaj tuaꞌ e gente tuaꞌ e Israel tuaꞌ aquetpobꞌ imbꞌutz ani tut e Dios? Porque nien net machi war ache lo que war ache ubꞌijnuobꞌ era tin e majax tuobꞌ e Israel”, xeꞌ inware nen xeꞌ Pabloen. \s1 Acorpesnobꞌ tunor e gente umen taca que war acꞌupseyanobꞌ tama e Jesucristo \p \v 15 Y ojronen taca e Pedro otronyajr y che: “Pues nen y net era ajlugaron tama e Israel, y tamar era machi cay canuon cache tunor e sian mabꞌambꞌanir lo que cay uchiobꞌ tin e majax tuobꞌ e Israel. \v 16 Pero war canata ubꞌan que axin acorpesna inteꞌ umen taca que war acꞌupseyan tama e Jesucristo, y que machi tuaꞌ acorpesna nien inteꞌ umen que axin acꞌupseyan tut uley e Moisés. Y bꞌan war cache non; war cacꞌupseyan tama e Cristo Jesús tuaꞌ caquetpa imbꞌutz taca e Dios. Porque mamajchi uyubꞌi acorpesna umen taca que axin acꞌupseyan tut uley e Moisés. \p \v 17 ’Entonces conda cay cꞌupseyanon tama e Cristo tuaꞌ ucorpeson quetpa chequer ticoit que meyra ani ayan camabꞌambꞌanir. Entonces ¿tucꞌa cawaric tama tunor era? ¿War ca che tunor era que jax e Cristo xeꞌ cay uchion cache tunor e mabꞌambꞌanir era? Machi. \v 18 Non imbꞌutzon tut e Dios coner umen que cay cꞌupseyanon tama e Cristo. Ixion cawacta tunor uley e Moisés. Pero jay caxin cacanse ani e gente que ucꞌani tuaꞌ acorpesnobꞌ umen que axin acꞌupseyanobꞌ ani tut uley e Moisés, entonces non tuaꞌ caquetpa ani ajmajresiajon. \v 19 Pues bꞌan cocha inteꞌ chamen que machi uyubꞌi acꞌupseyan tut inteꞌ ley y bꞌanen nen ubꞌan tut uley e Moisés coner. Chamenen tut. Pero chamenen ani ubꞌan tut e Dios ixnix, pero coner bꞌixiren tut. \v 20 Pues nen ixien chamesnen taca e Cristo conda chꞌubꞌna tut e cruz, y tamar era mix jax nen xeꞌ war inware nibꞌa tucꞌa ucꞌani tuaꞌ inche tama nicuxtar era, sino que jax e Cristo xeꞌ turu tama niwalma. Y e cuxtar xeꞌ aquetpa tama nicuerpo era, turuan umen que war incꞌupseyan tama Uyunen e Dios xeꞌ uyajta niut y xeꞌ uyajcꞌu ubꞌa tuaꞌ achamesna tamaren. \v 21 Y nen era machi cꞌani inxejbꞌe ut utacarsiaj e Dios, porque jay uyubꞌi ani acorpesna inteꞌ umen que war acꞌupseyan tut uley e Moisés, entonces matucꞌa ani ucꞌampibꞌir que chamay e Cristo tut e cruz tuaꞌ ucorpeson.” Bꞌan inware e Pedro. \c 3 \s1 ¿Jax ca e cꞌupesiaj tut uley e Moisés xeꞌ ucorpeson, o jax e cꞌupesiaj tama e Cristo? \p \v 1 Pues entonces ayan lo que cꞌani inwareox xeꞌ turox tama e departamento Galacia xeꞌ jax era: ¿Tucꞌa tuaꞌ machi war icꞌampes ijor? ¿O ayan ca chi xeꞌ cay ubꞌaxeox y tamar era que war ichoqui iwacta e cꞌupesiaj tama uyojroner e Dios xeꞌ erach? ¿Machix ca cꞌar imener que conda turuanen tacarox que cay inchecsu tiut tunor uchamer e Jesucristo y cocha chꞌubꞌna tut e cruz tuaꞌ achamay tamaron? \v 2 Areniquen coner tamar lo que cꞌani umbꞌi tamarox, ¿ichꞌami ca Unawalir e Dios umen que cay cꞌupseyanox tut uley e Moisés? ¿O ichꞌami ca Unawalir e Dios conda cay cꞌupseyanox tama uyojroner e Dios lo que cay iyubꞌi incansiox? Pues chequer que ichꞌami Unawalir e Dios conda cay cꞌupseyanox tama uyojroner e Dios. \v 3 ¿Y tucꞌa era que machi cꞌani icꞌampes ijor tuaꞌ ibꞌijnu? Porque nox cay xanox bien tama ubꞌir e Dios tacar utacarsiaj Unawalir e Dios, pero era war ichebꞌe que uyubꞌiox ixquetpa erach tut e Dios tamar taca lo que ibꞌijnu nox. \v 4 Pues tunor lo que cay inumse ibꞌa conda ichꞌami Cawinquirar Jesucristo quetpa bꞌan taca tiut. Y ¿tucꞌa tuaꞌ iwacta ibꞌa inumse ibꞌa meyra cocha era jay war ani inata que matucꞌa ani ucꞌampibꞌir lo que cay ichꞌami? Pero nen war imbꞌijnu que ayan meyra ucꞌampibꞌir. \v 5 Y conda cay ichꞌami ucꞌotorer Unawalir e Dios este que cay checta cora sian milagro tiut, ¿numuy ca tunor era umen que war iturbꞌa ibꞌa tuaꞌ ixcꞌupseyan tut uley e Moisés? Machi. Cay iwira checta cora milagro tijam umen taca que cay cꞌupseyanox tama uyojroner e Dios lo que cay iyubꞌi. \p \v 6 Pues bꞌijnunic tama e Abraham xeꞌ turuan tama e onian tiempo. Jaxir cꞌupseyan tama e Dios, y tamar era arobꞌna umen e Dios que jaxir erach uwirnar. \v 7 Y cocha e Abraham cꞌupseyan tama e Dios tuaꞌ acorpesna, tunor tin e axin acꞌupseyanobꞌ tama e Dios coner axin aquetpobꞌ umaxtacobꞌ e Abraham ubꞌan porque war uchiobꞌ bꞌan cocha cay uche jaxir tama e onian tiempo. \v 8 Y tama uyojroner e Dios chequer que cꞌani acꞌotoy aquetpobꞌ erach e gente xeꞌ majax tuobꞌ e Israel xeꞌ axin acꞌupseyanobꞌ tama e Dios. Porque Cadiosir uchecsu inteꞌ ojroner tama e corpesiaj tut e Abraham y che: “Tamaret cꞌani aquetpa chojbꞌesbꞌir utobꞌ tunor e gente xeꞌ turobꞌ tara tor e rum.” Bꞌan chꞌar tzꞌijbꞌabꞌir tama uyojroner e Dios. \v 9 Entonces cawira que e Abraham cꞌupseyan tama e Dios y tamar era quetpa chojbꞌesbꞌir umener. Y bꞌanon non ubꞌan coner, tunor tin e caxin cacꞌupseyan tama e Dios cꞌani cachojbꞌesna umener bꞌan cocha chojbꞌesna e Abraham. \p \v 10 Pero tunor tin e axin uturbꞌa ubꞌobꞌ tuaꞌ acꞌupseyanobꞌ tut uley e Moisés cꞌani aquetpobꞌ yebꞌar inteꞌ bꞌax porque bꞌan che tama uyojroner e Dios que: “Tunor tin e machi acꞌapa uche tunor tunor lo que chꞌar tzꞌijbꞌabꞌir tama uley e Moisés ucꞌani tuaꞌ aquetpa yebꞌar inteꞌ bꞌax.” Bꞌan chꞌar tzꞌijbꞌabꞌir tama uley e Moisés. \v 11 Y tamar era chequer que mamajchi uyubꞌi ucorpes ubꞌa tut e Dios umen que uche ubꞌa tuaꞌ acꞌupseyan tut uley e Moisés, porque jax Cadiosir xeꞌ cay uyareon tama uyojroner que tin e cꞌani acorpesna umener ucꞌani tuaꞌ acꞌupseyan tamar. Bꞌan cocha chꞌar tzꞌijbꞌabꞌir tama uyojroner e Dios y che: “Tin e cꞌani aquetpa erach tut e Dios ucꞌani tuaꞌ acꞌupseyan tamar tuaꞌ atacarna umener, y de allí cꞌani uchꞌami e cuxtar xeꞌ machi tuaꞌ acꞌapa.” Bꞌan chꞌar tzꞌijbꞌabꞌir tama uyojroner e Dios. \v 12 Pero conda e Dios cay uyajcꞌu uley e Moisés machi uyare e gente tuaꞌ e Israel que ucꞌani tuaꞌ acꞌupseyanobꞌ tamar jaxir, sino que quetpa que ucꞌani tuaꞌ acꞌupseyanobꞌ tut e ley era inyajrer. Porque chꞌar tzꞌijbꞌabꞌir tama uley e Moisés y che: “Tin e cꞌani aquetpa erach taca e Dios umen que war acꞌupseyan tut uley e Moisés ucꞌani tuaꞌ acꞌapa ucꞌupse e ley era inyajrer.” Bꞌan chꞌar tzꞌijbꞌabꞌir tama uley e Moisés. \p \v 13 Pues e Cristo ixin ucorpeson tama tunor e bꞌax lo que ayan ani tamaron tama uley e Moisés. Y tamar era non machi ixto tuaꞌ caquetpa bꞌaxbꞌir porque e Cristo ixin ucꞌocchi e bꞌax era tamaron conda chꞌubꞌna chamay tut e cruz. Porque chꞌar tzꞌijbꞌabꞌir tama uyojroner e Dios que: “Bꞌaxbꞌir tunor tin e achꞌubꞌna tut inteꞌ teꞌ tuaꞌ achamesna tamar”, xeꞌ che tama uyojroner e Dios. \v 14 Y bꞌan uche e Cristo Jesús tuaꞌ uyubꞌi ichꞌami nox ubꞌan xeꞌ majax tuox e Israel e chojbꞌesiaj lo que quetpa tuaꞌ aꞌjcꞌuna e Abraham. Y tamar era tunoron xeꞌ war cacꞌupseyan tama e Dios erer cachꞌami Unawalir e Dios xeꞌ jax e chojbꞌesiaj lo que quetpa tuaꞌ aꞌjcꞌuna e Abraham umen e Dios. \s1 Intex uley e Moisés y intex e ojroner xeꞌ ajcꞌuna e Abraham \p \v 15 Pues entonces niwermanuox, cꞌani inwareox era tamar lo que cache non xeꞌ winicon tara tor e rum conda inteꞌ winic cꞌani aquetpa intera ubꞌijnusiaj taca otronteꞌ winic tamar lo que cꞌani uchiobꞌ. Pues tin e cꞌani uchiobꞌ cocha era axin uyustes inteꞌ jun xeꞌ sellado y uchiobꞌ firmar, y de allí mamajchi erer usati lo que quetpa tzꞌijbꞌabꞌir tama e jun era y mamajchi erer utzꞌacse ubꞌan. \v 16 Y bꞌan tama uyojroner e Dios ubꞌan. Y tamar era conda e Dios uyacta inteꞌ ojroner taca e Abraham y taca inteꞌ sitzbꞌir tuaꞌ tamar lo que cꞌani uche, machi uyubꞌi asatpa e ojroner era. Ucꞌani tuaꞌ achempa bꞌan taca cocha arobꞌna umen e Dios. Pero conda che tama uyojroner e Dios que e Dios cꞌani uchojbꞌes ut e Abraham taca inteꞌ “sitzbꞌir” tuaꞌ, machi war che “sitzbꞌirobꞌ” cocha jay war ani oꞌjron taca meyra umaxtac e Abraham. Sino que quetpa e ojroner era taca e Abraham y taca inteꞌ taca sitzbꞌir tuaꞌ xeꞌ jax e Cristo. \v 17 Pues lo que war inwareox jax era: Que tama e onian tiempo e Dios cay uyare e Abraham que cꞌani uchectes ucꞌotorer tut jaxir. Y nacpat era conda numuy meyra tiempo tama e 430 año, e Dios cay uyajcꞌu uley e Moisés. Pero e ley era xeꞌ tari nacpat tunor era mix cocha erer utijres e ojroner xeꞌ actana taca e Abraham umen e Dios tama e onian tiempo. \v 18 Porque jay quetpa ani tuaꞌ cacꞌupseyan tut uley e Moisés tuaꞌ cachꞌami lo que quetpa tuaꞌ cajcꞌuna umen e Dios, entonces mix jax umen utacarsiaj e Dios tuaꞌ cachꞌami tunor era sino que jax lo que erer ani camani. Pero lo que numuy jax era: E Dios uyacta inteꞌ ojroner taca e Abraham tuaꞌ uchojbꞌes ut, y tamar era bꞌan cocha arobꞌna e Abraham umen e Dios y bꞌan taca tuaꞌ achempa umener. \p \v 19 Pues entonces ¿tucꞌa ucꞌampibꞌir uley e Moisés? Pues ajcꞌuna tujor e ojroner xeꞌ actana taca e Abraham tuaꞌ uchecsu tut e gente tara tor e rum tucꞌa e mabꞌambꞌanir, y e ley era quetpa tuaꞌ acꞌotori este que yopa e Cristo xeꞌ jax e “sitzbꞌir” tuaꞌ e Abraham xeꞌ quetpa tuaꞌ uchꞌami lo que che tama e ojroner xeꞌ actana taca e Abraham tama e onian tiempo. Pues e Dios cay ucꞌampes cora angelobꞌ tuaꞌ uqꞌuechiobꞌ axin e ley era tuaꞌ uyajcꞌuobꞌ e Moisés, y de allí e Moisés sutpa uyajcꞌu e gente tuaꞌ e Israel. Y tamar era ayan e angelobꞌ y ayan e Moisés xeꞌ quetpobꞌ tuyuxin e gente y e Dios. \v 20 Pero jax taca Cadiosir xeꞌ uyacta e ojroner taca e Abraham, mamajchi más. Majax bꞌan cocha conda ajcꞌuna uley e Moisés conda quetpa e angelobꞌ y e Moisés tuyuxin e Dios y e gente tuaꞌ e Israel. \s1 Ucꞌampibꞌir uley e Moisés \p \v 21 Pues cocha war inwareox era que ayan ucꞌampibꞌir uley e Moisés ¿war ca che era que matucꞌa ucꞌampibꞌir e ojroner xeꞌ actabꞌir umen e Dios? Machi. Porque jay ajcꞌunon ani inteꞌ ley xeꞌ erer ani uyajcꞌon e cuxtar xeꞌ machi tuaꞌ acꞌapa jay cacꞌupseyan tut, entonces erer ani cacorpesna umen taca que cacꞌupseyan tut e ley era. Pero majax bꞌan. \v 22 Pero lo que chꞌar tzꞌijbꞌabꞌir tama uyojroner e Dios che que tunor e gente tara tor e rum quetpobꞌ yebꞌar ucꞌotorer e mabꞌambꞌanir, y tamar era jax taca tin e axin acꞌupseyanobꞌ tama e Jesucristo xeꞌ erer uchꞌamiobꞌ tunor e chojbꞌesiaj lo que arobꞌna e Abraham umen e Dios. \p \v 23 Pues conda merato ayopa Cawinquirar Jesucristo tuaꞌ uyubꞌion cacꞌupseyan tamar, quetpon ani yebꞌar ucꞌotorer uley e Moisés. Y bꞌan quetpon este que Cadiosir uchecsu ticoit chi tamar tuaꞌ cacꞌupseyan xeꞌ jax e Cristo. \v 24 Pues uley e Moisés cꞌampesna umen e Dios bꞌan cocha catata ucꞌampes inteꞌ man tuaꞌ ucojcon conda chuchuonto. Y tamar era uley e Moisés cꞌampesna umen e Dios tuaꞌ uqꞌuechion caxin tut e Cristo tuaꞌ uyubꞌion cacorpesna conda cacꞌupseyan tamar. \v 25 Pero era que war ixto cacꞌupseyan tama Cawinquirar Jesucristo tuaꞌ ucorpeson machi ixto tuaꞌ cacojcna más umen inteꞌ man xeꞌ jax ani uley e Moisés. \p \v 26 Porque tunoron xeꞌ cay cꞌupseyanon tama e Cristo Jesús cꞌotoy quetpon umaxtacon e Dios. \v 27 Pues tunor tin e quetpobꞌ chꞌuybꞌir tama ucuerpo e Cristo quetpobꞌ intera uwirnar bꞌan cocha uwirnar e Cristo. \v 28 Y tamar era matucꞌa lo que uchion caquetpa intiach cawirnar tut e Dios xeꞌ war cacꞌupseyan tama e Cristo. Porque tut jaxir intera tunoron motor jay tuon e Israel, o motor jay majax tuon e Israel, o motor jay ayan cawajyum o jay matucꞌa, o motor jay winic inteꞌ o jay ixic inteꞌ, porque tunoron quetpon intera tama e Cristo Jesús. \v 29 Y tamar era cocha tunoron tuon e Cristo quetpon umaxtacon e Abraham tama e Cristo ubꞌan, y tamar era non ubꞌan caxin cachꞌami tunor e nuxi herencia lo que arobꞌna e Abraham umen e Dios que bꞌan tuaꞌ uchꞌami. \c 4 \p \v 1 Entonces lo que war inwareox jax era: Jay ayan inteꞌ chuchu sitz xeꞌ chamay utata, jaxir machix tuaꞌ uchꞌami wacchetaca lo que quetpa tuaꞌ utata ani. Y conda chuchuto e sitz era aquetpa bꞌan cocha inteꞌ man tama ufamilia motor que jaxir jax e ajyum tuaꞌ tunor. \v 2 Y ayan tin e aquetpa tuaꞌ ucojco e chuchu sitz era y ayan tin e aquetpa tuaꞌ uwira tunor lo que ayan tuaꞌ este que acꞌotoy ujabꞌ bꞌan cocha arobꞌna umen utata ani conda tuaꞌ uchꞌami tunor era. \v 3 Y bꞌan ani tunoron xeꞌ tuon e Israel conda merato ani ayopa e Cristo. Quetpon bꞌan cocha inteꞌ chuchu maxtac y macaron ani yebꞌar ucꞌotorer uley e Moisés, y tamar era quetpon ani bꞌan cocha inteꞌ man tut e ley era. \v 4 Pero conda tzꞌacta e tiempo xeꞌ ucꞌani e Dios, jaxir uyebꞌta tari Uyunen tuaꞌ acuxpa tama inteꞌ ixic xeꞌ turu tama e lugar Israel, y Uyunen era cꞌotoy quetpa yebꞌar ucꞌotorer uley e Moisés. \v 5 Pues tari cuxpa Uyunen e Dios cocha era tuaꞌ ucorpeson xeꞌ quetpon ani yebꞌar ucꞌotorer uley e Moisés tuaꞌ cachꞌajma umen e Dios tuaꞌ cacꞌotoy caquetpa umaxtac. \p \v 6 Y cocha e Dios cꞌani uchecsu ticoit que non umaxtacon ixto, jaxir uyebꞌta tari Unawalir Uyunen era tuaꞌ aturuan tama cawalma, y Unawalir era xeꞌ turu tama cawalma oꞌjron y che: “Nitatet xeꞌ tanibꞌa.” \v 7 Y tamar era mixjax manon tama uley e Moisés coner sino que maxtacon ixto tuaꞌ e Dios. Y cocha non umaxtacon e Dios, lo que ayan tuaꞌ jaxir war ucꞌani tuaꞌ cachꞌami cocha inteꞌ herencia tuaꞌ. \s1 Conda e Pablo war ubꞌijnu uwira tama e ajcꞌupesiajobꞌ era \p \v 8 Pues tama e tiempo conda merato inata chi Cadiosir, manox ani tut cora chamen dios xeꞌ majax bꞌixir. \v 9 Pero coner cocha war inata chi Cadiosir, o erer caware que jax Cadiosir xeꞌ war unata chiox nox, ¿cocha tuaꞌ ibꞌijnu era tuaꞌ iyose ibꞌa otronyajr yebꞌar cora onian cꞌotorer xeꞌ machi aqꞌuecꞌo y xeꞌ tzajtaca utobꞌ tuaꞌ ixcajcha ixquetpa inteꞌ man tutobꞌ otronyajr? \v 10 Y chequer que bꞌan war iche porque war ixtzay iwira watar e sian nojqꞌuin tuaꞌ e onian cꞌupesiaj tuaꞌ e gente xeꞌ tuobꞌ e Israel xeꞌ achempa tama inteꞌ día o tama inteꞌ mes o tama inteꞌ tiempo o tama inteꞌ año. \v 11 Pues nen era war imbꞌijnu meyra tama tunor nipatnar tijam nox que bꞌajcꞌat matucꞌa ucꞌampibꞌir ani tiut, porque cay xanox imbꞌijc tama ubꞌir e Dios lo que cay incansiox, pero de allí cay iwacta tunor era. \p \v 12 Pues entonces niwermanuox, cꞌani inwareox era que actanic e onian bꞌijnusiaj bꞌan cocha inwacta nen. Sutpenic chenic ibꞌa cocha nen. Nen quetpen bꞌan cocha inteꞌ tin e majax tuaꞌ e Israel bꞌan cocha turox. Y erer inwareox era que conda turen ani tijam que matucꞌa iche nipater. \v 13 Y cꞌaric imener que ajmuaquen conda yopen bꞌajxan tuaꞌ inchecsu uyojroner e Dios tiut. \v 14 Y motor que intran tiut tuaꞌ iwiren tijam ajmuaquen tama e hora yajaꞌ pero nox machi ixejbꞌe niut y nien machi ichoquien najtir, sino que cay iwiren bꞌan cocha jay jaxen ani inteꞌ ángel tuaꞌ e Dios, o bꞌan cocha jay jaxen ani e Cristo Jesús. \v 15 ¿Pero tucꞌa numuy taca e nuxi tzayer lo que cay icojco conda iwiren tama e hora yajaꞌ? Pues nen cꞌar nimener tamarox que ya ca ani uyubꞌiox ilocse unaqꞌuiut tuaꞌ iwajqꞌuen bꞌajcꞌat bꞌan ani iche tamaren. \v 16 Y era ¿war ca isutpa ixqꞌuijna iwiren umen taca que war inwareox lo que erach? \p \v 17 Pues ayan tin e turobꞌ tiwejtzꞌer xeꞌ quisinic ani ubꞌijresox, pero machi war ubꞌijnuobꞌ tuaꞌ uchiobꞌ bꞌan cocha ucꞌani e Dios. Lo que quisinic uchiobꞌ jaxirobꞌ jax era: Cꞌani uxeriox tuaꞌ machi ixto ixcꞌupseyan tamaren tamar lo que war incansiox. Y war ucꞌaniobꞌ que nox tuaꞌ ixixin tupatobꞌ tuaꞌ iche bꞌan taca cocha ucꞌaniobꞌ jaxirobꞌ. \v 18 Y bueno tuaꞌ iturbꞌa ibꞌa tamar lo que war ibꞌijnu iche jay erach lo que war icꞌani iche era. Y bꞌan ucꞌani tuaꞌ iche tunor e tiempo y majax jax taca conda turen tacarox. \v 19 Pues nox bꞌanox cocha nimaxtac, y cꞌani inwareox era que inyaj lo que war innumse nibꞌa tamar lo que war iche nox bꞌan cocha inteꞌ tubꞌir xeꞌ cꞌanix tuaꞌ aqꞌuechuan uchꞌurcabꞌ, y bꞌan tuaꞌ innumse nibꞌa tamarox era este que acꞌapa ixqꞌuecꞌo ixxana tama ubꞌir e Cristo. \v 20 Quisinic ani que ya turen tiwejtzꞌer tuaꞌ erer ani onjron tacarox y tuaꞌ umbꞌi tucꞌa cꞌani iwaren otronyajr. Porque machi innata tucꞌa tuaꞌ imbꞌijnu tamarox era. \s1 Ayan inteꞌ chequerir tama chateꞌ ixictac \p \v 21 Entonces areniquen era jayteox xeꞌ war ibꞌijnu tuaꞌ iyose ibꞌa yebꞌar uley e Moisés otronyajr. ¿O machi ca war iyubꞌi lo que che tama e ley era? \v 22 Pues chꞌar tzꞌijbꞌabꞌir que e Abraham ayan chateꞌ utejromtac. Y che que inteꞌ cuxpa tama inteꞌ ixic xeꞌ jax inteꞌ man xeꞌ mambꞌir inyajrer, y ayan otronteꞌ tejromtac xeꞌ cuxpa tama uwixcarach e Abraham xeꞌ majax mambꞌir. \v 23 E sitz xeꞌ cuxpa tama e ixic xeꞌ man cuxpa bꞌan taca cocha inteꞌ cualquier maxtac. Pero e sitz xeꞌ cuxpa tama e ixic xeꞌ majax man cuxpa umen taca que tzꞌacpesna e ixic umen e Dios cocha jaxir machi ani uyubꞌi achꞌijtesian. Y bꞌan uche Cadiosir umen que cay uyacta inteꞌ ojroner taca e Abraham que cꞌani acuxpa inteꞌ uyunen taca e ixic xeꞌ majax man. \v 24 Pero ayan lo que uchion cabꞌijnu tucꞌa war che e chateꞌ ixictac era, porque erer caware que e chateꞌ ixictac larobꞌ taca chateꞌ pacto. Ayan inteꞌ pacto xeꞌ chembꞌir tor e witzir xeꞌ ucꞌabꞌa Sinaí xeꞌ jax e pacto xeꞌ chembꞌir taca e Moisés. Pues e pacto era lar tacar e ixic xeꞌ jax inteꞌ man xeꞌ ucꞌabꞌa Agar. Pues e sitz xeꞌ cuxpa tama e ixic era lar tacar tunor tin e aquetpobꞌ yebꞌar ucꞌotorer uley e Moisés. \v 25 Y e Agar era lar tacar e witzir Sinaí xeꞌ turu tama e lugar Arabia, y tunor era lar tacar e chinam Jerusalem tama e día era. Y e chinam era taca tunor tin e aturanobꞌ tamar aquetpobꞌ bꞌan cocha cora man xeꞌ turobꞌ yebꞌar ucꞌotorer uyajyum xeꞌ jax uley e Moisés. \v 26 Pero e chinam Jerusalem xeꞌ imbꞌutz xeꞌ turu tichan tut e qꞌuin machi turu yebꞌar ucꞌotorer uley e Moisés, y e chinam era lar tacar e ixic xeꞌ majax man. Y e ixic era aquetpa bꞌan ani cocha catuꞌ y non caquetpa bꞌan cocha umaxtac. \v 27 Porque bꞌan chꞌar tzꞌijbꞌabꞌir tama uyojroner e Dios que: \q1 Tzayjres abꞌa net xeꞌ ixiquet xeꞌ machi anata ichꞌijtesian. \q1 Aruen umen e tzayer net xeꞌ machi anata tucꞌa e cꞌuxner tama e chꞌijtesiaj. \q1 Y inteꞌ ixic xeꞌ chocbꞌir turu cꞌani achꞌijtesian más que inteꞌ ixic xeꞌ ayan uviejo, \m xeꞌ chꞌar tzꞌijbꞌabꞌir tama uyojroner e Dios. \p \v 28 Entonces niwermanuox, non era laron tacar e Isaac xeꞌ jax uyar e ixic xeꞌ majax man. Jaxir cuxpa umen taca que tzꞌacpesna utuꞌ umen ucꞌotorer e Dios. Y bꞌanon non ubꞌan, cuxpon otronyajr tuaꞌ caquetpa umaxtac e Dios taca ucꞌotorer e Dios. \v 29 Y e sitz xeꞌ ixin cuxpa tama e ixic xeꞌ man ixin uche unumse ubꞌa e Isaac xeꞌ cuxpa taca utacarsiaj Unawalir e Dios. Y bꞌan anumuy coner ubꞌan, que tin e turobꞌ tara tor e rum uche unumse ubꞌobꞌ tin e cuxpobꞌ otronyajr taca utacarsiaj Unawalir e Dios. \v 30 Pero ¿tucꞌa chꞌar tzꞌijbꞌabꞌir tama uyojroner e Dios tama tunor era? Che que: “Ajnes chic e ixic xeꞌ man taca uyar inyajrer, porque e sitz era ma cocha erer uxere e herencia taca e Isaac xeꞌ cuxpa tama e ixic xeꞌ majax man.” Bꞌan chꞌar tzꞌijbꞌabꞌir tama uyojroner e Dios. \v 31 Niwermanuox, non era majax bꞌanon cocha e sitz xeꞌ cuxpa tama e ixic xeꞌ man xeꞌ bꞌan cocha tin e aquetpobꞌ yebꞌar ucꞌotorer uley e Moisés, sino que non bꞌanon cocha e Isaac xeꞌ cuxpa tama e ixic xeꞌ majax man. Y tamar era cꞌani inwareox que ira ixsutpa iyose ibꞌa yebꞌar ucꞌotorer uley e Moisés otronyajr. \c 5 \s1 Qꞌuecꞌojsenic ibꞌa tuaꞌ ixquetpa bꞌambꞌir tama e onian bꞌijnusiaj \p \v 1 Pues entonces cꞌani inwareox era que e Cristo ixin ulocsion yebꞌar ucꞌotorer e onian bꞌijnusiaj tuaꞌ caquetpa bꞌambꞌir. Y tamar era qꞌuecꞌojsenic ibꞌa tuaꞌ ixquetpa bꞌambꞌir y ira ixcꞌupseyan tut e ojroner xeꞌ che que ucꞌani tuaꞌ axujra imbꞌijc uqꞌuewerir itejromar xeꞌ jax inteꞌ canseyaj xeꞌ cꞌani uchiox ixquetpa cachar otronyajr yebꞌar ucꞌotorer. \p \v 2 Ubꞌinic niwojroner era. Nen xeꞌ Pabloen war inwareox era que jay war ibꞌijnu tuaꞌ ixcorpesna ani umen que cꞌani iwacta ibꞌa tuaꞌ axujra imbꞌijc uqꞌuewerir itejromar, pues war che era que matucꞌa ucꞌampibꞌir uchamer e Cristo tiut. \v 3 Cꞌani inwareox era otronyajr que tunor tin e war uyacta ubꞌa tuaꞌ axujra imbꞌijc uqꞌuewerir utejromar ucꞌani tuaꞌ acꞌapa acꞌupseyanobꞌ tut tunor uley e Moisés ubꞌan. \v 4 Y nox era xeꞌ war isicbꞌa tuaꞌ ixcorpesna umen que cꞌani ixcꞌupseyan tut uley e Moisés, war iwacta e Cristo tamar lo que war iche, y war ichoqui utacarsiaj e Dios ubꞌan. \v 5 Pero non xeꞌ war cacꞌupseyan tama e Cristo war cacojco tacar utacarsiaj Unawalir e Dios tuaꞌ caquetpa erach inyajrer tut jaxir. \v 6 Porque jay intera cabꞌijnusiaj taca e Cristo Jesús matucꞌa uche jay xurbꞌir imbꞌijc uqꞌuewerir catejromar o jay machi. Porque lo que más ayan ucꞌampibꞌir jax era: Que war cacꞌupseyan tama Cadiosir y que umen era war cayajta coit cabꞌa inteꞌ intion. \p \v 7 Pues nox cay xanox imbꞌutz tama ubꞌir e Dios, pero ¿chi ca nic cay umajresox era tuaꞌ iwacta ixcꞌupseyan tut lo que erach? \v 8 Porque lo que war ixcꞌupseyan tamar coner majax tuaꞌ e Dios xeꞌ cay upejcox tuaꞌ ixcꞌupseyan tamar jaxir. Porque Cadiosir upejcox tuaꞌ ixcꞌupseyan tamar lo que erach. \v 9 Pues bꞌijnunic iwira lo que uche e levadura conda ayajra tama e pan, que motor que imbꞌijc taca xeꞌ ayajra tamar pero que axin oꞌchoy macuir tunor e cꞌum era. Y bꞌan war anumuy tijam ubꞌan que motor que inteꞌ taca winic xeꞌ war umajresox, pero jaxir erer utijresox tunorox tama icꞌupesiaj tama Cawinquirar. \v 10 Pero nen era war incꞌupseyan tama Cawinquirar que nox machi tuaꞌ aquetpa intiach ibꞌijnusiaj, y que bꞌan cocha war imbꞌijnu nen y bꞌan tuaꞌ ibꞌijnu nox ubꞌan. Pero tin e war umajresox era ucꞌani tuaꞌ ajajtzꞌa umen e Dios tamar lo que war uche, motor jay nuxi winic o jay imbꞌijc taca ucꞌampibꞌir. \p \v 11 Pues entonces niwermanuox, bꞌijnunic tamaren jay nen warto ani incanse e gente axin que ucꞌani ani tuaꞌ axujra imbꞌijc uqꞌuewerir utejromar tuaꞌ uyubꞌi acorpesnobꞌ, machi ani war aqꞌuijnobꞌ uwirenobꞌ tin e bꞌan war acꞌupseyanobꞌ. Y jay bꞌan nic ani incanseyan machi ani war inqꞌuijnesobꞌ axin e gente era conda incansiobꞌ que chamay e Cristo tamaron tut e cruz. \v 12 Pero tin e war usatiox tama tunor e canseyaj era, quisinic que jaxirobꞌ axin uxuriobꞌ utejromar y uchoquiobꞌ inyajrer. \p \v 13 Pues niwermanuox, nox pejcbꞌirox umen e Dios tuaꞌ ubꞌaniox tama ucꞌotorer uley e Moisés. Pero ira ixixin iche lo que uyusre iwerir bꞌan cocha uchiobꞌ e gente tara tor e rum umen que quetpox bꞌambꞌir era, sino que tacrenic ibꞌa inteꞌ intiox umen que war iyajta ut ibꞌa. \v 14 Porque tunor uley e Moisés war oꞌjron tamar taca inteꞌ bꞌijnusiaj que che: “Yajtan ut apiarobꞌ bꞌan cocha acꞌani tuaꞌ ayajtanwa oit umen apiarobꞌ era”, xeꞌ che tama uley e Moisés. \v 15 Iwiric ibꞌa tuaꞌ machi acꞌapa icꞌuxi ibꞌa inteꞌ intiox, porque jay bꞌan iche entonces axin ixcꞌotoy itijres ibꞌa inyajrer. \s1 Intiach lo que uyusre uche inteꞌ winic y intiach e cuxtar tama Unawalir e Dios \p \v 16 Pues entonces cꞌani inwareox era que cꞌupsenic lo que war ubꞌijresox Unawalir e Dios tuaꞌ iche y ira isicbꞌa tuaꞌ iche lo que uyusre uche iwerir. \v 17 Porque tunor lo que uyusre uche cawerir majax bꞌan cocha ucꞌani Unawalir e Dios. Y tunor lo que ucꞌani Unawalir e Dios majax bꞌan cocha ucꞌani cawerir. Y tamar era conda Unawalir e Dios war ubꞌijreson war uwirsion que majax bueno tuaꞌ cache lo que uyusre uche cawerir y tamar era ma erer cache bꞌan taca cocha cacꞌani. \v 18 Pero jay war cache bꞌan cocha war ubꞌijreson Unawalir e Dios, entonces chequer que machi ixto turon yebꞌar ucꞌotorer uley e Moisés. \p \v 19 Y chequer lo que uyusre uche uwerir inteꞌ xeꞌ jax era: Conda inteꞌ axin uyose ubꞌa taca tin e merato anujbꞌi tacar, y conda inteꞌ axin uche lo que intuj tut e Dios, y conda inteꞌ axin uche lo que uche asatpa ujor conda uche. \v 20 Y lo que uyusre uwerir inteꞌ jax era ubꞌan: Conda inteꞌ axin uyujtzꞌi ut inteꞌ chamen dios, y conda inteꞌ axin abꞌaxon, y conda inteꞌ axin uxejbꞌe ut otronteꞌ, y conda majax intera ubꞌijnusiaj taca e inmojr, y conda axin atzꞌuni tut otronteꞌ, y conda inteꞌ uyacta ubꞌa aqꞌuijna wacchetaca, y conda inteꞌ ucꞌani tuaꞌ aquetpa tunor bꞌan taca cocha ucꞌani jaxir, y conda inteꞌ uche uxere ubꞌobꞌ e inmojr, y conda inteꞌ ubꞌijnu que jax taca ayan ucꞌampibꞌir. \v 21 Y lo que uyusre uche uwerir inteꞌ jax era ubꞌan: Conda inteꞌ axin acꞌuxnaqꞌui uwira lo que ayan tuaꞌ otronteꞌ, y conda inteꞌ axin acaray, y conda inteꞌ axin ubꞌijnu tamar taca e nojqꞌuin, y conda inteꞌ axin uyusre uche tunor e mabꞌambꞌanir cocha era. Bꞌan uyusre uche uwerir inteꞌ. Pero cꞌani inwareox era bꞌan cocha cay inwareox tama inyajr, que tunor tin e axin uche cocha era machi tuaꞌ oꞌchoy tama uchinam e Dios. \p \v 22 Pero tin e bꞌijresbꞌir umen Unawalir e Dios cꞌani achecta tama uyalma que war uyajta ut upiarobꞌ, y que war atzay axana, y que ayan e jiriar tamar, y que machi aqꞌuijna wacchetaca, y que incꞌun uwirnar, y que turix tuaꞌ utacre upiarobꞌ, y que matucꞌa e majresiaj tama uyalma, \v 23 y que ayan e manxujresiaj tama uyalma, y que ucojco ubꞌa tuaꞌ machi uche e mabꞌambꞌanir. Pues matucꞌa inteꞌ ley upater tunor era. \v 24 Y tamar era tunoron xeꞌ tuon e Cristo Jesús machi ixto cꞌani cache e mabꞌambꞌanir, sino que war caquetpa bꞌan cocha inteꞌ chamen tut tunor lo que uyusre uche cawerir. \v 25 Y cocha war caturuan tama ucꞌotorer Unawalir e Dios, cawactic cabꞌa tuaꞌ cabꞌijresna umener. \p \v 26 Entonces machix catattzꞌic cabꞌa que otronteꞌ cocha non matucꞌa, y machix capaqꞌuic e qꞌuijnar ticajam, y machix tuaꞌ cacꞌuxnaqꞌui cawira lo que ayan tuaꞌ otronteꞌ ticajam. \c 6 \s1 Tacrenic ibꞌa inteꞌ intiox \p \v 1 Pues entonces niwermanuox, jay ayan inteꞌ tijam xeꞌ axin acucrema tama inteꞌ mabꞌambꞌanir, entonces nox xeꞌ war ixqꞌuecꞌo ixxana tama ubꞌir e Dios ucꞌani tuaꞌ ixixin itacre tuaꞌ asutpa tama ubꞌir e Dios otronyajr. Pero tin e war axin tuaꞌ atacarsan era ucꞌani tuaꞌ aquetpobꞌ incꞌun uwirnarobꞌ tut jaxir y ucꞌani tuaꞌ ucojco ubꞌobꞌ tuaꞌ machi apijchnobꞌ umen e mabꞌambꞌanir ubꞌan. \v 2 Y tacrenic ibꞌa inteꞌ intiox conda ayan tin e war unumse ubꞌa tijam tuaꞌ machi acucrema tamar. Porque jay war iche cocha nen war acꞌapa iche bꞌan taca cocha ucꞌani e Cristo. \p \v 3 Pero jay ayan tin e war utattzꞌi ubꞌa que jaxir nuxi winic conda majax bꞌan, intaca war umajres ubꞌa. \v 4 Bꞌijnunic iwira inteꞌ intiox jay imbꞌutz o jay majax imbꞌutz tunor lo que war iche. Y tamar era erer ixtzay tamar lo que war iche xeꞌ imbꞌutz porque majax bueno tuaꞌ cabꞌijnu jay lar cacꞌampibꞌir cocha otronteꞌ. \v 5 Porque inteꞌ intion ucꞌani tuaꞌ cache lo que ajcꞌunon umen e Dios tuaꞌ cache. \p \v 6 Pues tin e war acansena uyojroner e Dios umen otronteꞌ ucꞌani tuaꞌ uxere uyajcꞌu uyajcanseyaj era imbꞌijc imbꞌijc tama tunor lo que ayan tuaꞌ xeꞌ bueno. \p \v 7 Pues ira imajres ibꞌa, porque mamajchi uyubꞌi umajres ut e Dios. Inteꞌ intion caxin cachꞌami e cosecha bꞌan taca cocha cꞌapa capaqꞌui. \v 8 Pues jay inteꞌ axin uche inteꞌ pacmar tuaꞌ taca utzayjres uwerir, tama uwerir era axin uchꞌami e cosecha xeꞌ jax e chamer. Pero jay inteꞌ axin uche inteꞌ pacmar tuaꞌ utzayjres Unawalir e Dios, entonces axin uchꞌami inteꞌ cosecha tuaꞌ Unawalir e Dios era xeꞌ jax e cuxtar xeꞌ machi tuaꞌ acꞌapa. \v 9 Pues machi tuaꞌ cacꞌoyran cache lo que imbꞌutz tut Unawalir e Dios, porque watar e día conda caxin cache cosechar catuanibꞌir tuaꞌ e Dios jay machi cawacta tuaꞌ cache lo que imbꞌutz. \v 10 Y tamar era cachic tunor lo que uyubꞌion cache xeꞌ imbꞌutz tut tunor e gente, pero cachic más meyra lo que imbꞌutz tut tin e ajcꞌupesiajobꞌ tama Cawinquirar. \s1 Lo que ucꞌani tuaꞌ cawira \p \v 11 Pues nen xeꞌ Pabloen cay intzꞌijbꞌa taca nicꞌabꞌ tara tama e ojroner era. Y chequer tiut que nen umen que nojta e letra lo que war intzꞌijbꞌa era. \v 12 Pues tunor tin e war uyareox era que ucꞌani tuaꞌ axujra imbꞌijc uqꞌuewerir itejromar war uchiobꞌ tuaꞌ taca aquetpobꞌ imbꞌutz tut e gente. Pues jaxirobꞌ machi war ucꞌaniobꞌ tuaꞌ axejbꞌna utobꞌ umen que war ani uchecsuobꞌ uyojroner e Dios tama uchamer e Cristo. \v 13 Y nien tin e xujra imbꞌijc uqꞌuewerir utejromar era machi war acꞌapa uchiobꞌ tunor lo que chꞌar tzꞌijbꞌabꞌir tama uley e Moisés. Pero jaxirobꞌ war uyusre tuaꞌ uwirobꞌ e xuremar era tama iwerir tuaꞌ taca utattzꞌi ubꞌobꞌ tamarox. \v 14 Pero nen matucꞌa tamar cꞌani inchꞌijse nibꞌa tama nibꞌijnusiaj cocha era sino que cꞌani inchꞌijse nibꞌa tamar taca uchamer Cawinquirar Jesucristo tut e cruz. Pues umen uchamer e Cristo era quetpa chamen taniut tunor lo que ayan tara tor e rum xeꞌ upejca uyalmobꞌ e gente tuaꞌ uchiobꞌ e mabꞌambꞌanir, y nen chamenen ubꞌan tut tunor lo que ayan tara tor e rum. \v 15 Y tamar era matucꞌa ucꞌampibꞌir jay xurbꞌir imbꞌijc uqꞌuewerir catejromar o jay majax xurbꞌir, porque ticoit non xeꞌ tuon Cawinquirar Jesucristo lo que más ayan ucꞌampibꞌir jax era: Que chequer que intiachix cawirnar umen lo que cay uche e Dios tamaron. \v 16 Pues tunorox xeꞌ war ixcꞌupseyan tut lo que war intzꞌijbꞌa tibꞌa era chꞌamic ujiriar e Dios y ucꞌunersiaj, y bꞌan tunor tin e erachox xeꞌ umaxtacox e Dios. \p \v 17 Pues mamajchi más erer oꞌjron nipater que nen majax manen tuaꞌ e Dios, porque chequer tama niwerir e sian jatzꞌuar lo que cay inchꞌami umen taca que war inchecsu uyojroner e Dios tama uchamer e Jesús. \p \v 18 Pues entonces niwermanuox, quetpac utacarsiaj Cawinquirar Jesucristo tacarox. Tara acꞌapa tunor niwojroner, che e Pablo.