\id COL - Chortí NT -Guatemala 2012 (DBL -2013) 
\h COLOSENSES 
\toc1 Jax era e ojroner lo que tzꞌijbꞌabꞌir umen e Apóstol Pablo tama e grupo ajcꞌupesiajobꞌ xeꞌ turobꞌ tama e chinam Colosas 
\toc2 Colosenses 
\toc3 Col 
\mt2 Jax era e ojroner lo que tzꞌijbꞌabꞌir umen e Apóstol Pablo tama e grupo ajcꞌupesiajobꞌ xeꞌ turobꞌ tama e chinam Colosas  
\c 1  
\p
\v 1 Nen e Pabloen xeꞌ jax inteꞌ apóstol tuaꞌ Cawinquirar Jesucristo y tamar era nen quetpen tuaꞌ inwareox lo que ucꞌani e Dios. Y bꞌan quetpen umen que sicbꞌabꞌiren umen e Dios tuaꞌ inxin inche tunor lo que ucꞌani jaxir. Pues nen era taca e Timoteo xeꞌ jax inteꞌ cawermano tama Cawinquirar  
\v 2 war cawebꞌta axin e carta era tibꞌa xeꞌ turox tama e chinam Colosas. Nox jax cawermanuox xeꞌ erach iwirnar tut e Dios y xeꞌ war ixxana imbꞌutz tama ubꞌir Cawinquirar Jesucristo. Pues war cacꞌajti taca Catata Dios y taca Cawinquirar Jesucristo tuaꞌ axin uyajcꞌox meyra utacarsiaj y tuaꞌ axin uyajcꞌox ujiriar ubꞌan.   
\s1 Conda e Pablo ucꞌajti taca e Dios tuaꞌ atacarnobꞌ tin e ajcꞌupesiajobꞌ tama e Jesucristo  
\p
\v 3 Pues conda war cacꞌajti taca e Dios xeꞌ jax Utata Cawinquirar Jesucristo machi war cawacta tuaꞌ catattzꞌi ucꞌabꞌa e Dios tamarox.  
\v 4 Pues cꞌotoy canata que nox war ixcꞌupseyan tama e Cawinquirar Jesucristo y que war iyajta ut ibꞌa inteꞌ intiox, y que war iyajta ut tunor e inmojr tin e tuobꞌ e Dios ubꞌan.  
\v 5 Y bꞌan cay iche umen que cay icojco tuaꞌ ichꞌami inteꞌ nuxi tuanibꞌir xeꞌ ustabꞌir umen e Dios xeꞌ tuaꞌ ichꞌami conda ixcꞌotoy tut e qꞌuin. Y cay icojco ichꞌami tunor era conda cay iyubꞌi e ojroner xeꞌ erach tama e corpesiaj.  
\v 6 Y bꞌan cocha chectesna tunor e ojroner era tiut tama utacarsiaj e Dios, y bꞌan war achectesna tut e gente axin tama tunor or e rum ubꞌan. Y tamar era ayan meyra gente xeꞌ war acay uchiobꞌ lo que erach tut e Dios, y tamar era ayanto meyra gente xeꞌ war acꞌotoy acꞌupseyanobꞌ tama Cawinquirar bꞌan cocha war anumuy tiaꞌ turox desde que cay iyubꞌi uyojroner e Dios y cay inata que ayan ixto utacarsiaj e Dios.  
\v 7 Y tunor era cꞌotoy inata umen que bꞌan ucansiox cawermano Epafras xeꞌ inchoj ut camener. Jaxir cay patna tacaron tama inyajr y era jaxir jax inteꞌ ajtacarsiaj tuaꞌ Cawinquirar Jesucristo tuaꞌ utacriox nox.  
\v 8 Y era que jaxir yopa ticoit cay uyareon que meyra war iyajta ut tunor tin e ajcꞌupesiajobꞌ tama Cawinquirar taca utacarsiaj Unawalir e Dios.   
\p
\v 9 Y desde que cꞌotoyon canata tama icꞌupesiaj tama Cawinquirar Jesucristo machi cawacta tuaꞌ cacꞌajti taca e Dios tamarox. Y war cacꞌajti taca e Dios tuaꞌ ixcꞌotoy inata tunor lo que ucꞌani Cadiosir, y que erer ixcꞌotoy inata icꞌampes unatanyaj e Dios, y que tuaꞌ aquetpa chequer tiut tunor lo que war ucꞌani Unawalir e Dios iraj iraj.  
\v 10 Y war cacꞌajti taca e Dios cocha era tuaꞌ ixcꞌotoy iche bꞌan cocha ucꞌani tuaꞌ uchiobꞌ tunor tin e tuobꞌ Cawinquirar, y que tamar era erer ixcꞌotoy iche lo que utzayjres ut e Dios. Y war cacꞌajti taca e Dios cocha era tuaꞌ acay iche meyra lo que erach tut jaxir, y que erer ixcꞌotoy inata más y más lo que ucꞌani Cadiosir.  
\v 11 Y war cacꞌajti taca e Dios tuaꞌ axin uqꞌuecꞌojsiox meyra tacar e nuxi cꞌotorer lo que cay uchecsu tut e gente ixin tuaꞌ uyubꞌiox ixqꞌuecꞌo ixwawan tut tunor lo que watar, y tuaꞌ uyubꞌiox ixquetpa tzꞌustaca motor que war inumse ibꞌa.  
\v 12 Y war catattzꞌi ucꞌabꞌa Catata Dios umen que jaxir ixin uyusteson tuaꞌ uyubꞌion cachꞌami lo que tꞌabꞌesbꞌir umener xeꞌ quetpa tuaꞌ uxere taca tunoron xeꞌ tuon e Dios conda caxin cacꞌotoy tut e qꞌuin tiaꞌ ayan ujanchꞌaquenar e Dios.  
\v 13 Porque Cadiosir ixin ulocsion tama uchinam e incsibꞌaner, y tamar era machi ixto tuaꞌ acꞌotori e diablo ticajor non, y Cadiosir ixin uturbꞌon tama uchinam Uyunen xeꞌ yajtanbꞌir ut umener y tamar era jax Uyunen e Dios era xeꞌ tuaꞌ acꞌotori tama cawalma coner.  
\v 14 Porque tamar uchamer Uyunen era Cadiosir ixin ucorpeson umen que cꞌapa tojya tunor camabꞌambꞌanir umen Uyunen era.   
\s1 Ayan e jiriar taca e Dios umen que chamay e Cristo  
\p
\v 15 Pues entonces Uyunen e Dios era jax taca uchequerir ut Catata Dios xeꞌ machi uyubꞌion cawira ut non, y Uyunen e Dios era jax xeꞌ turix bꞌajxan tama tunor lo que ayan, motor lo que ayan tichan tut e qꞌuin o motor lo que ayan tara tor e rum. Jaxir turix bꞌajxan y tamar era jaxir más ayan ucꞌotorer tama tunor.  
\v 16 Porque tamar Uyunen era chena tunor lo que ayan tichan tut e qꞌuin y tunor lo que ayan tara tor e rum, bꞌan cocha lo que erer cawira ut y bꞌan cocha lo que machi uyubꞌion cawira ut. Y Uyunen e Dios era más nojta ucꞌotorer tama tunor cocha jaxir ixin uche tunor e sian angelobꞌ lo que ayan tut e qꞌuin xeꞌ jax tin e aquetpobꞌ tuaꞌ acꞌotoriobꞌ tama inteꞌ turtar, y jax tin e aquetpobꞌ tuaꞌ awinquiriobꞌ tut e qꞌuin, y jax tin aquetpobꞌ ajcꞌotorerobꞌ, y jax tin e aquetpobꞌ ajcꞌamparobꞌ tut e qꞌuin ubꞌan. Tunor lo que ayan chena umen Uyunen e Dios, y tamar era tunor lo que ayan aquetpa tuaꞌ jaxir ubꞌan.  
\v 17 Y Uyunen e Dios era xeꞌ jax e Cristo turu conda ne mato achena ani tunor lo que ayan, y jaxir jax xeꞌ war uquete tunor lo que ayan tama ucꞌabꞌ tuaꞌ machi axin atijrpa.  
\v 18 Y e Cristo era más ayan ucꞌotorer tama tunor lo que ayan cocha jaxir aquetpa tuaꞌ acꞌotori tujor tunor tin e war acꞌupseyanobꞌ tamar jaxir xeꞌ jax e iglesia. Y jaxir jax ucajyesnibꞌir tama tunor era y jax xeꞌ sutpa bꞌixcꞌa tujam e chamenobꞌ bꞌajxan ubꞌan. Bꞌan uche tuaꞌ acꞌotoy aquetpa ajyum inyajrer tama tunor lo que ayan.  
\v 19 Porque Catata Dios atzay tuaꞌ aturuan tama e Cristo taca tunor ubꞌutꞌurir.  
\v 20 Y tamar e chꞌichꞌer lo que uwechꞌe e Cristo tama ut e cruz Catata Dios ixin uchoqui tunor uqꞌuijnar lo que ayan ani taca tunor lo que ayan tara tor e rum y taca tunor lo que ayan tut e qꞌuin, y tama e Cristo era Catata Dios ixin cꞌumpa taca tunor lo que ayan.   
\p
\v 21 Pues entonces conda merato ixcꞌupseyan tama e Cristo quetpox bꞌan cocha inteꞌ ajnajtir gente y war ani ixqꞌuijna iwira ut e Dios porque war ani ibꞌijnu tuaꞌ iche lo que mabꞌambꞌan y war ani iche meyra lo que mabꞌambꞌan ubꞌan. Pero era Cadiosir ixin uchoqui tunor uqꞌuijnar lo que ayan ani tacarox.  
\v 22 Y bꞌan uche umen que cay unumse ubꞌa meyra Uyunen tama uwerir este que ixin chamay. Y Cadiosir ixin uche cocha era porque war ucꞌani tuaꞌ acꞌumpa tacarox, y tamar era uche tuaꞌ ixquetpa erach y uche tuaꞌ machi aquetpa más e bꞌonemar tamarox y uche tuaꞌ machi aquetpa tucꞌa tamarox tuaꞌ ixarena otronyajr que ayan ani imabꞌambꞌanir.  
\v 23 Pero tuaꞌ uyubꞌiox ixcꞌotoy ixturuan taca e Dios tichan ma erer iwacta icꞌupesiaj tama e Cristo, y ucꞌani tuaꞌ ixqꞌuecꞌo ixxana tama ubꞌir e Dios, y ma erer ichoqui icojcsiaj tama e ojroner lo que cayox iyubꞌi tama e corpesiaj tama ucajyesnibꞌir tunor era. Y jax uyojroner e Dios tama e corpesiaj era que war achecsuna axin tama tunor or e rum, y jax nen xeꞌ Pablo xeꞌ war inchecsu axin tunor era iraj iraj ubꞌan.   
\s1 E Pablo quetpa tuaꞌ utacre tunor tin e ajcꞌupesiajobꞌ tama e Cristo  
\p
\v 24 Pues entonces cꞌani inwareox era que war intzay tamar lo que uyubꞌien innumse nibꞌa tiaꞌ macaren tara tama e cárcel porque war innata que ayan ucꞌampibꞌir tunor era umen que axin utacriox tuaꞌ ixixin ixquetpa más nojta tama icꞌupesiaj nox xeꞌ turox tama e chinam Colosas, porque bꞌan quetpa tuaꞌ inche cocha era tuaꞌ uyubꞌien intacre e iglesia xeꞌ jax ucuerpo e Cristo tara tor e rum.  
\v 25 Y e Dios uyajqꞌuen tuaꞌ inquetpa inteꞌ ajtacarsiaj tuaꞌ tunor tin e ajcꞌupesiajobꞌ tama e Cristo, y tamar era ucꞌani tuaꞌ intacriox nox ubꞌan xeꞌ turox tama e chinam Colosas. Y lo que quetpa tuaꞌ inche jax era: Nen ucꞌani tuaꞌ inchecsu tiut tunor lo que ayan tama uyojroner e Dios y tunor lo que ayan tamar xeꞌ intran unatanwar ubꞌan.  
\v 26 Pues jax uyojroner e Dios era xeꞌ quetpa mucresbꞌir umen e Dios tut tunor e gente tama e onian tiempo, pero coner war uchectes tut tunor tin e war acꞌupseyanobꞌ tamar.  
\v 27 Y Cadiosir ubꞌijnu tuaꞌ uchectes e ojroner era xeꞌ mucur ani umen que e ojroner era uchecsu que tin e majax tuaꞌ e Israel cꞌani achojbꞌesnobꞌ meyra umen e Dios. Y e ojroner xeꞌ quetpa mucur ani jax era: Que war aturuan e Cristo tama iwalma, y tamar era erer ibꞌijnu que conda ixixin tut e qꞌuin e Cristo cꞌani uxere utawarer tacarox.   
\p
\v 28 Pues entonces tamar era non war cachecsu e ojroner tama e Cristo tut tunor e gente axin. Y war cawareobꞌ que iwiric tama e mabꞌambꞌanir y war cacanseyan taca tunor unatanyaj e Dios. Y bꞌan war cache tuaꞌ aquetpobꞌ erach tunor e gente era tama e Cristo conda aqꞌuejchobꞌ axin tut e Dios watar e día.  
\v 29 Y tuaꞌ uyubꞌien inxin inche tunor era war inturbꞌa nibꞌa tuaꞌ impatna meyra bꞌan cocha war apatna Cadiosir tamaren taca ucꞌotorer tuaꞌ inchecsu uyojroner axin.   
\c 2  
\p
\v 1 Y quisinic inata que war inturbꞌa nibꞌa tuaꞌ impatna meyra tuaꞌ intacriox nox xeꞌ ajcꞌupesiajox tama Cawinquirar xeꞌ turox tama e chinam Colosas, y quisinic inata ubꞌan que war inturbꞌa nibꞌa tuaꞌ intacre tunor tin e ajcꞌupesiajobꞌ xeꞌ turobꞌ tama e chinam Laodicea, y war inturbꞌa nibꞌa ubꞌan tuaꞌ intacre e inmojr ajcꞌupesiajobꞌ xeꞌ mato tiaꞌ cꞌotoy uwirenobꞌ.  
\v 2 Y war impatna meyra cocha era tuaꞌ axin aqꞌuecꞌojsena uyalmobꞌ tunor e ajcꞌupesiajobꞌ era, y que erer acꞌotoy aquetpobꞌ intera umen que war uyajta ut ubꞌobꞌ inteꞌ intiobꞌ, y war impatna meyra cocha era tuaꞌ acꞌotoy unatobꞌ inyajrer tunor e ojroner tama e Cristo xeꞌ quetpa mucur tama e onian tiempo, y que erer acꞌotoy unatobꞌ que meyra ucꞌampibꞌir tunor e ojroner era.  
\v 3 Porque tamar e Cristo aquetpa tunor e nuxi natanyaj xeꞌ imbꞌutz, y tamar jaxir erer acꞌotoy unata inteꞌ tama uyojroner e Dios xeꞌ quetpa ani mucur tut e gente tara tor e rum.  
\v 4 Pues war inwareox tunor era tuaꞌ machi ixixin ixmajresna umen tin e acꞌotoy tiut taca inteꞌ ojroner xeꞌ galan uyubꞌnar pero xeꞌ majax tuaꞌ e Cristo.  
\v 5 Y motor que nen machi turen tacarox yajaꞌ tama e chinam Colosas, pero turen tacarox tama niwalma y war intzay umbꞌi tamarox que intera ibꞌijnusiaj y que war ixqꞌuecꞌo ixxana tama icꞌupesiaj tama e Cristo.   
\p
\v 6 Pues bꞌan cocha nox cay ichꞌami ucꞌabꞌa Cawinquirar Jesucristo xanicon tacar bꞌan cocha ucꞌani tuaꞌ cache tunoron xeꞌ intera turon tacar.  
\v 7 Y turbꞌanic ibꞌa tuaꞌ ixwiri más tama e Cristo, y qꞌuecꞌojsenic ibꞌa más tamar, y cꞌupseyanenic más y más tama e canseyaj tama e Cristo bꞌan cocha cansenox umen e hermano Epafras. Y tattzꞌic ucꞌabꞌa e Dios meyra tama tunor era.   
\s1 E cuxtar xeꞌ imbꞌutz tama e Cristo  
\p
\v 8 Y iwiric ibꞌa que mamajchi uxujchꞌi icꞌupesiaj tama e Cristo umen que axin ucansiox tama inteꞌ canseyaj que matucꞌa ucꞌampibꞌir bꞌan cocha ubꞌijnuobꞌ e winicobꞌ tara tor e rum, o umen que axin ucansiox e majresiaj tuaꞌ e nuquir winicobꞌ xeꞌ turobꞌ tara tor e rum ixnix e tiempo bꞌan cocha cansebꞌirobꞌ jaxirobꞌ umen e sian mabꞌambꞌan mein xeꞌ turobꞌ tara tor e rum ubꞌan. Pero tunor e canseyaj era majax bꞌan cocha e canseyaj xeꞌ erach lo que ayan tama Cawinquirar Jesucristo.   
\p
\v 9 Pues ucꞌani tuaꞌ iwira ibꞌa que mamajchi axin uxujchꞌi icꞌupesiaj tama e Cristo porque tamar ucuerpo jaxir aquetpa tunor ubꞌutꞌurir Catata Dios inyajrer.  
\v 10 Y tamar era ucꞌani tuaꞌ iwira ibꞌa ubꞌan umen que nox cꞌapa ichꞌami e corpesiaj tuaꞌ e Cristo conda quetpox intera tacar tama iwalma y era bꞌutꞌur ixto iwalma tacar jaxir xeꞌ aquetpa tujor tunor tin e ajcꞌotorerobꞌ y xeꞌ aquetpa tujor tunor tin e ajcꞌamparobꞌ motor jay tut e qꞌuin o motor jay tara tor e rum.  
\v 11 Y nox cocha quetpox intera taca e Cristo quetpox ubꞌan bꞌan cocha jay xurbꞌir ani imbꞌijc uqꞌuewerir itejromar pero tamar taca iwalma y machi war axujra iwerir umen inteꞌ winic tuaꞌ aloqꞌuesna imbꞌijc iwerir, sino que jax taca inteꞌ patnar xeꞌ chena umen e Cristo tama iwalma.  
\v 12 Y conda chꞌujyox osenox tama e jaꞌ y tamar era quetpox bꞌan cocha jay mucbꞌirox ani taca e Cristo. Y conda loqꞌuesnox otronyajr tujor e jaꞌ quetpox bꞌan cocha jay sujta bꞌixqꞌuesnox ani tujam e chamenobꞌ taca e Cristo, y bꞌan numuy umen que war ixcꞌupseyan tama ucꞌotorer e Dios xeꞌ ixin usuti ubꞌixqꞌues e Cristo tujam e chamenobꞌ.  
\v 13 Y nox xeꞌ majax tuox e Israel chamenox ani tama iwalma umen que iche e mabꞌambꞌanir y umen que machi cꞌupseyanox tut e Dios, y tamar era arobꞌnox ani umen e mabꞌambꞌanir lo que ayan ani tama iwalma tucꞌa ucꞌani tuaꞌ iche. Pero coner Cadiosir ixin uyajcꞌox e cuxtar xeꞌ machi tuaꞌ acꞌapa taca e Cristo, y ixin cꞌumpa tacaron y unajpes tunor camabꞌambꞌanir.  
\v 14 Y lo que uche Cadiosir jax era: Ixin usati tunor lo que quetpa tzꞌijbꞌabꞌir tiaꞌ war che que non tujchꞌon ani umen que cꞌapa cacꞌocchi uley e Moisés y tamar era quetpa ani tuaꞌ cachamesna umener. Pero coner quetpa toybꞌir tunor lo que cabꞌeto tamar conda qꞌuejcha ixin chꞌubꞌna tunor e ley era tut e cruz taca e Cristo, y tamar era cꞌapa tijresna tunor e jun tiaꞌ tzꞌijbꞌabꞌir ani que non tujchꞌon.  
\v 15 Y Cadiosir ixin ulocse ucꞌotorerobꞌ tunor e sian mabꞌambꞌan mein xeꞌ jax ani ajcꞌotorerobꞌ y xeꞌ jax ani ajcꞌamparobꞌ, y ixin umanxujresobꞌ tunorobꞌ y ixin usubꞌajresobꞌ tunorobꞌ conda e Dios uche aquetpa awawanobꞌ tut e inmojr tuaꞌ aquetpa chequer que cucurnobꞌ umen e Dios conda chamay e Cristo tama ut e cruz.   
\s1 Sicbꞌanic lo que ayan tuaꞌ e Dios tichan  
\p
\v 16 Pues ira iturbꞌa ibꞌa tamar jay ayan chi acay ucꞌayox tamar lo que war icꞌuxi o tamar lo que war iyuchꞌi, y ira iturbꞌa ibꞌa tamar jay ayan chi acay ucꞌayox umen que machi cꞌani ixnojqꞌuini tacar tin e tuobꞌ e Israel, o jay machi cꞌani icꞌupse lo que uyareox tamar e día conda chꞌoc e luna, o jay machi cꞌani ixjiri tama e día sábado bꞌan cocha ucꞌani ani tama uley e Moisés.  
\v 17 Porque tunor era quetpa bꞌan taca cocha inteꞌ chequerir tut e gente tuaꞌ e Israel tamar lo que watar nacpat era, pero coner checta ixto tunor era ticoit non tama e nuxi chojbꞌesiaj lo que war cachꞌami tama e Cristo.  
\v 18 Y ira iwacta ulocsiobꞌ ituanibꞌir lo aquetpa tuaꞌ ichꞌami conda ixcꞌotoy tut e qꞌuin tin e axin ucꞌayox que nox ucꞌani ani tuaꞌ ixsatpa umen que machi war iyujtzꞌi ut e Dios bꞌan cocha ucꞌani jaxirobꞌ, y que machi war imanxujres ibꞌa meyra cocha ucꞌani jaxirobꞌ, y que machi war iyujtzꞌi ut e angelobꞌ bꞌan cocha ucꞌani jaxirobꞌ. Pero ira icꞌupse inteꞌ xeꞌ oꞌjron cocha era porque war uche ubꞌa que meyra war unata, pero matucꞌa ayan tamar sino que intaca war utattzꞌi ubꞌa tamar e bꞌijnusiaj lo que utajwi tama ujor, porque jax taca e mabꞌambꞌanir lo que ayan tama uwerir xeꞌ war uche ubꞌijnu cocha era.  
\v 19 Pero inteꞌ cocha era aquetpa najtir tut e Cristo, xeꞌ jax ujor e iglesia xeꞌ turu bꞌan cocha ucuerpo e Cristo tara tor e rum. Y tamar era jaxir war uche achꞌiꞌ tunor ucuerpo era bꞌan cocha ucꞌani e Dios, y war ubꞌijres cocha tuaꞌ achꞌiꞌ inteꞌ inteꞌ bꞌaquer tama tunor ucuerpo, y war uche aqꞌuecꞌo tunor or ubꞌaquer xeꞌ cachbꞌir taca e sian chicher.   
\p
\v 20 Entonces cocha nox intera ibꞌijnusiaj taca e Cristo war che era que nox chamayox tacar ubꞌan, y tamar era machi ixto turox yebꞌar ucꞌotorer e sian mabꞌambꞌan mein xeꞌ war ani acꞌotoriobꞌ tijor nox xeꞌ turox tara tor e rum, sino que coner bꞌanox cocha inteꞌ chamen que mixto erer aqꞌuejcha axin tama e cárcel jay abꞌeto ani. Y tamar era ira iturbꞌa ibꞌa tamar lo que e sian mabꞌambꞌan mein warto uyareox. Pues nox warto ixcꞌupseyan tutobꞌ conda uyareox y che:  
\v 21 “Ira ipijchꞌi era, y ira iwejta e yax, y ira iturbꞌa e yax tama icꞌabꞌ”, xeꞌ chenobꞌ e sian mabꞌambꞌan mein era.  
\v 22 Pero tunor era lo que jaxirobꞌ war uyareon que ma erer capijchꞌi y que ma erer cawejta y que ma erer caturbꞌa tama cacꞌabꞌ cꞌani acꞌapa conda axin acꞌampesna, y tamar era ira iturbꞌa ibꞌa tama tunor e ojroner cocha era porque tunor lo que war ixarobꞌna cocha era jax taca e canseyaj tuaꞌ inteꞌ winic.  
\v 23 Pues tunor e canseyaj cocha era jax taca tuaꞌ utacsu e gente tuaꞌ axin uchiobꞌ lo que uyusre uchiobꞌ tama uwerir, motor que uwirnar tunor e canseyaj era bꞌan cocha jay ayan ani meyra natanyaj tamar porque e gente war acansenobꞌ tuaꞌ ojytzꞌianobꞌ bꞌan cocha cay ubꞌijnuobꞌ jaxirobꞌ, este que war ucanse e gente que ucꞌani tuaꞌ umanxujres ubꞌobꞌ meyra, y este que jaxobꞌ taca war uche unumse ubꞌobꞌ tama ucuerpuobꞌ. Pero tunor era matucꞌa ucꞌampibꞌir porque tin e war uchiobꞌ cocha era machi war atacarnobꞌ tuaꞌ uyactobꞌ e mabꞌambꞌanir.   
\c 3  
\p
\v 1 Pues cocha nox bꞌixcꞌoxix taca e Cristo tama iwalma, quetpox bꞌan cocha jay sujta ani bꞌixqꞌuesnox tujam e chamenobꞌ taca e Cristo, y tamar era sicbꞌanic lo que ayan tichan tut e qꞌuin tiaꞌ turu e Cristo xeꞌ war aturuan tama uturtar tuyejtzꞌer unojcꞌabꞌ Catata Dios.  
\v 2 Y tamar era bꞌijnunic iraj iraj tamar taca lo que ayan tichan tut e qꞌuin, y ira ibꞌijnu iche e mabꞌambꞌanir bꞌan cocha war uchiobꞌ e gente xeꞌ turobꞌ tara tor e rum.  
\v 3 Y coner cocha machi ixto war iche e mabꞌambꞌanir lo que cay ani iche, bꞌanox cocha inteꞌ xeꞌ chamen tut tunor lo que ayan tara tor e rum. Y bꞌan turox coner tut e mabꞌambꞌanir umen que war ixturuan taca e Cristo xeꞌ turu tuyejtzꞌer Catata Dios xeꞌ turu tut e qꞌuin tichan, pero ma chequer tunor era tut e gente tara tor e rum.  
\v 4 Pero conda e Cristo xeꞌ cay ubꞌixqꞌueson tama cawalma asutpa achecta tut e gente tara tor e rum, non ubꞌan cꞌani cachectesna tut e gente tacar, y jax e hora yajaꞌ conda cꞌani cachꞌami meyra utawarer e Cristo.   
\s1 Lo que cay cache ixnix xeꞌ mabꞌambꞌan y lo que war cache coner xeꞌ imbꞌutz  
\p
\v 5 Entonces chamsenic tunor uyuseriaj e mabꞌambꞌanir lo que ayan tamarox. Y tamar era nox xeꞌ winicox machi ixto tuaꞌ iyose ibꞌa taca otronteꞌ ixic xeꞌ majax iwixcar, y xeꞌ ixictacox machi ixto tuaꞌ iyose ibꞌa taca inteꞌ winic xeꞌ majax iviejo. Y inteꞌ winic ma erer uchꞌami inteꞌ uyet winiquir, y bꞌan inteꞌ ixic que ma erer uchꞌami inteꞌ uyet ixiquir. Y ma erer iyusre tama iwalma tuaꞌ iche cocha era, y ma erer iyusre tama iwalma tuaꞌ iche lo que mabꞌambꞌan. Y ma erer iyusre ichꞌami lo que tuaꞌ otronteꞌ, porque tin e axin uche cocha era war uyujtzꞌi ut lo que ayan tuaꞌ otronteꞌ bꞌan cocha jay jax ani udiosir.  
\v 6 Porque tunor tin e axin uche cocha era axin watar uqꞌuijnar e Dios tama ujorobꞌ.  
\v 7 Pues bꞌan cay iche tunorox conda merato ixcꞌupseyan tama e Cristo conda turoxto ani tama e mabꞌambꞌanir.  
\v 8 Pero coner ucꞌani tuaꞌ iwacta tunor e mabꞌambꞌanir xeꞌ jax e qꞌuecraner, y e qꞌuijnar, y e bꞌijnusiaj tuaꞌ iche e mabꞌambꞌanir, y e ojroner upater otronteꞌ tuaꞌ taca iche unumse ubꞌa, y e ojroner xeꞌ calapir xeꞌ alocꞌoy tama iwej,  
\v 9 y e majresiaj tijam. Ira iche tunor era porque cꞌapix ichoqui tunor e onian bꞌijnusiaj lo que ayan ani tamarox, y cꞌapa iwacta iche tunor e mabꞌambꞌanir lo que war ani iche conda xanox taca e gente tara tor e rum.  
\v 10 Pero coner war ichꞌami iwirnar xeꞌ imbꞌutz tuaꞌ e Dios xeꞌ warto uyustes axin iwirnar tuaꞌ ixcꞌotoy ixquetpa bꞌan cocha uwirnar jaxir, y tamar era erer ixcꞌotoy inata meyra tamar jaxir.  
\v 11 Y tamar era non xeꞌ intera turon taca e Cristo mix cocha tuaꞌ cabꞌijnu jay inteꞌ winic o inteꞌ ixic jax tuaꞌ e Israel o jay majax. Y machix tuaꞌ cabꞌijnu tama inteꞌ winic jay xurbꞌir imbꞌijc uqꞌuewerir utejromar o jay majax xurbꞌir. Y machix tuaꞌ cabꞌijnu jay ajlugar inteꞌ winic o inteꞌ ixic o jay majax\f + \fr 3:11 \ft Jay ajlugar o jay majax, jay cansebꞌir o jay majax: Tama e castilla chenobꞌ “bárbaro” y “escita” tamar e gente era. E ojroner “Majax ajlugar” war che tama e griego que jax inteꞌ xeꞌ machi uyubꞌi oꞌjron tamar e ojroner tuaꞌ e gente era xeꞌ jax e griego. Y e ojroner “Majax cansebꞌir” war che tama e griego tin e machi ubꞌijnuobꞌ tamar lo que war uchiobꞌ y xeꞌ machi unatobꞌ acꞌupseyanobꞌ tut e ley.\f*, o jay cansebꞌir o jay majax, o jay jax inteꞌ man xeꞌ mambꞌir tuaꞌ aquetpa tuach uyajyum o jay matucꞌa uyajyum. Pero ayan lo que ucꞌani tuaꞌ cabꞌijnu xeꞌ jax era: Que e Cristo jax xeꞌ más ayan ucꞌampibꞌir tama tunor lo que ayan y que jaxir turu tama cawalma.   
\p
\v 12 Entonces niwermanuox, cocha nox sicbꞌabꞌirox umen e Dios tuaꞌ ixquetpa tuaꞌ, y cocha quetpox chꞌujbꞌabꞌir umener umen que chojresbꞌir iut umener, ucꞌani tuaꞌ iturbꞌa ibꞌa tuaꞌ aquetpa incꞌun iwirnar tut ibꞌa inteꞌ intiox, y ucꞌani tuaꞌ iturbꞌa ibꞌa tuaꞌ aquetpa imbꞌutz iwirnar tut ibꞌa inteꞌ intiox, y ucꞌani tuaꞌ ixxana taca e manxujresiaj, y ucꞌani tuaꞌ ixquetpa tzꞌustaca tut e hermanuobꞌ conda uchiobꞌ lo que majax bueno tut inteꞌ, y ucꞌani tuaꞌ icojco anumuy bꞌan taca tut lo que uchiobꞌ e inmojr ajcꞌupesiajobꞌ jay uchiobꞌ lo que majax bꞌan cocha ibꞌijnusiaj tibꞌa.  
\v 13 Y machi tuaꞌ ixqꞌuijna wacchetaca tamar lo que war uche inteꞌ ajcꞌupesiaj. Y jay ayan inteꞌ xeꞌ war aqꞌuecran ipater ucꞌani tuaꞌ ixcꞌumpa tacar inteꞌ intiox bꞌan cocha ixin cꞌumpa Cawinquirar Jesucristo tamaron y ixin unajpes tunor camabꞌambꞌanir ubꞌan, y tamar era nox ubꞌan ucꞌani tuaꞌ ixixin ixcꞌumpa inteꞌ intiox.  
\v 14 Pero lo que ayan más ucꞌampibꞌir tujor tunor jax era: Que nox ixixin iyajta ut ibꞌa inteꞌ intiox, porque tamar era ixixin ixquetpa intera tunorox inyajrer tama Cawinquirar.  
\v 15 Pues jax Cawinquirar era xeꞌ cay usisijres tunor e qꞌuijnar lo que ayan ani tijam, y tamar era ucꞌani tuaꞌ iwacta acꞌotori ujiriar e Dios tama iwalma inteꞌ intiox coner tuaꞌ ixquetpa intera taca tunor e inmojr ajcꞌupesiajobꞌ, cocha sicbꞌabꞌirox umen e Dios tuaꞌ ixquetpa intera tamar jaxir bꞌan cocha jay inteꞌ intiox jax inteꞌ bꞌac ani tama ubꞌaquer e Jesucristo tara tor e rum. Y tattzꞌic ucꞌabꞌa e Dios tama tunor iraj iraj.   
\p
\v 16 Y canoenic más y más tama tunor e ojroner lo que ajcꞌunon umen Cawinquirar Jesucristo. Cansenic ibꞌa inteꞌ intiox tunor tama Cawinquirar, y tꞌabꞌsenic iwalma inteꞌ intiox taca tunor unatanyaj e Dios, y cꞌaywijresic inteꞌ intiox inteꞌ salmo y inteꞌ himno y inteꞌ coro, y chenic tunor era tuaꞌ itattzꞌi ucꞌabꞌa e Dios tama tunor lo que cay uche tamarox.  
\v 17 Y tunor lo que caxin caware y tunor lo que caxin cache, cachenic tunor era tama ucꞌabꞌa Cawinquirar Jesucristo. Y catattzꞌic ucꞌabꞌa Catata Dios tama ucꞌabꞌa Cawinquirar Jesucristo iraj iraj tama tunor lo que war uche tamaron.   
\s1 Cocha tuaꞌ cache cabꞌa non xeꞌ war caxana tama ubꞌir e Dios tujam e inmojr gente  
\p
\v 18 Pues entonces nox xeꞌ ixcarbꞌirox ucꞌani tuaꞌ ixcꞌupseyan tut iviejo xeꞌ tibꞌa porque bꞌan ucꞌani tuaꞌ uche inteꞌ ixic xeꞌ intera turu taca Cawinquirar Jesucristo.  
\v 19 Y nox xeꞌ winicox cꞌaninic iwixcar xeꞌ tibꞌa y ira iche ibꞌa intran iwirnar tutobꞌ.  
\v 20 Y nox xeꞌ maxtacox cꞌupseyanenic tut itata y tut ituꞌ tama tunor lo que uyareox tuaꞌ iche porque axin atzay Cadiosir conda uwirox que war ixcꞌupseyan tutobꞌ cocha era.  
\v 21 Y nox xeꞌ tatabꞌirox ira icꞌaye meyra imaxtac tuaꞌ machi iche acꞌuxun uyalma.  
\v 22 Y nox xeꞌ manox xeꞌ mambꞌirox inyajrer turbꞌanic ibꞌa tuaꞌ ixcꞌupseyan tut ipatron tama tunor lo que uyareox tuaꞌ iche. Y cꞌupseyanenic tut ipatron iraj iraj taca tunor iwalma umen que war ibꞌacre e Dios, y ira iche bꞌan cocha tin e ajtaca apatnobꞌ conda war eꞌrnobꞌ umen upatron tuaꞌ taca atzay eꞌrnobꞌ umener.  
\v 23 Y tunor e patnar lo que ixixin iche, chenic tunor era taca tunor iwalma porque war ixpatna tama Cawinquirar Jesucristo y majax jax taca tama inteꞌ winic.  
\v 24 Y cꞌaric imener que jax Cawinquirar Jesucristo xeꞌ tuaꞌ utoyox tama ipatnar era conda axin uyajcꞌox lo que tꞌabꞌesbꞌir umener, porque war ixpatna tama Cawinquirar Jesucristo y majax tamar taca inteꞌ ipatron tara tor e rum.  
\v 25 Pero tin e war uche lo que mabꞌambꞌan ucꞌani tuaꞌ atojya ubꞌan tamar e mabꞌambꞌanir lo que war uche era, porque Cadiosir xeꞌ war uwira tunor lo war cache cꞌani ubꞌijnu cocha tuaꞌ utoyon inteꞌ intion tama tunor lo que cꞌapa cache. Porque Cadiosir mamajchi uyacta bꞌan taca que machi utoyi, sino que uwira tunor lo que war uche inteꞌ jay imbꞌutz o jay majax imbꞌutz.   
\c 4  
\p
\v 1 Y nox xeꞌ patronox chenic lo que imbꞌutz taca inteꞌ inteꞌ iman xeꞌ mambꞌirobꞌ inyajrer. Porque nox xeꞌ patronox ayan ubꞌan inteꞌ ipatron tichan tut e qꞌuin xeꞌ war uwira tucꞌa war iche taca iman y jaxir tuaꞌ utoyox ubꞌan tamar lo que war iche.   
\p
\v 2 Y cꞌajtinic taca e Dios iraj iraj tama tunor lo que ucꞌani, y choquic tunor e cꞌoyir tuaꞌ uyubꞌiox iwira tucꞌa ucꞌani tuaꞌ icꞌajti tamar, y tattzꞌic ucꞌabꞌa e Dios.  
\v 3 Y cꞌajtinic taca e Dios tuaꞌ apascꞌa ut e bꞌir taniut tuaꞌ uyubꞌien inxin inchecsu tunor e ojroner xeꞌ mucur ani tama e Cristo. Porque umen taca que war inchecsu e ojroner era xeꞌ mucur ani que turen tama e cárcel coner.  
\v 4 Y tamar era cꞌajtinic taca e Dios que nen uyubꞌien inchecsu tunor uyojroner e Dios tama e Cristo tut e gente axin, porque bꞌan ucꞌani tuaꞌ inche.   
\p
\v 5 Y turbꞌanic ibꞌa tuaꞌ aquetpa imbꞌutz iwirnar tut e gente xeꞌ machito acꞌupseyanobꞌ tama Cawinquirar Jesucristo conda war ixojron tacarobꞌ. Y conda itajwi ibꞌa taca inteꞌ cocha era cꞌampesic e tiempo tuaꞌ ichecsu ucꞌunersiaj e Dios tutobꞌ.  
\v 6 Y conda war ixojron taca e gente cocha era quetpacox incꞌun tama iwojroner, y tamar era ixixin inata tucꞌa tuaꞌ iware otronyajr conda axin uyubꞌi inteꞌ ojroner tamarox.   
\s1 E cꞌajpesiaj  
\p
\v 7 Pues entonces lo que war anumuy tamaren cꞌani ixarobꞌna umen e hermano Tíquico conda acꞌotoy tiut taca e carta era. Pues e hermano era xeꞌ inchoj ut nimener war utacren iraj iraj y war uche tunor upatnar Cawinquirar tacaren.  
\v 8 Y tamar era war inwebꞌta axin tibꞌa tuaꞌ uyubꞌi uyareox tama tunor lo que war innumse nibꞌa y tuaꞌ uyubꞌi utꞌabꞌse iwalma nox ubꞌan.  
\v 9 Y war inwebꞌta axin ubꞌan e hermano Onésimo xeꞌ machi acꞌoy apatna tama upatnar Cawinquirar, y xeꞌ inchoj ut nimener ubꞌan, y xeꞌ jax inteꞌ ajlugar tibꞌa. Conda acꞌotoyobꞌ jaxirobꞌ cꞌani uyareox tunor lo que war anumuy tara.   
\p
\v 10 Y e hermano Aristarco xeꞌ turu tama e cárcel tara tacaren war uyebꞌta axin e cꞌajpesiaj tibꞌa, y e hermano Marcos xeꞌ primo hermano taca e hermano Bernabé war uyebꞌta axin e cꞌajpesiaj tibꞌa ubꞌan. Pues tamar e hermano Marcos era cayix inwareox que jay uyubꞌi acꞌotoy uwarajsiox que chꞌamic bien.  
\v 11 Y e hermano Jesús xeꞌ ucꞌabꞌa Justo ubꞌan war uyebꞌta axin e cꞌajpesiaj tibꞌa. Pues jax taca e uxteꞌ hermanuobꞌ era xeꞌ tuobꞌ e Israel xeꞌ cay patnobꞌ tacaren tuaꞌ cachꞌijse axin uchinam e Dios tara tor e rum. Pues e uxteꞌ hermanuobꞌ era jax e hermano Aristarco y e hermano Marcos y e hermano Jesús. Jaxirobꞌ cay utacrenobꞌ meyra conda cay utꞌabꞌse niwalma tama Cawinquirar.  
\v 12 Y e hermano Epafras xeꞌ ajlugar tibꞌa y xeꞌ war uche upatnar Cawinquirar Jesucristo iraj iraj war uyebꞌta axin e cꞌajpesiaj tibꞌa. Jaxir war ucꞌajti meyra taca e Dios tamarox que e Dios tuaꞌ axin utacriox ixqꞌuecꞌo ixxana tama ubꞌir y que erer ixcꞌotoy inata tama iwalma tunor lo que ucꞌani Cadiosir.  
\v 13 Pues cꞌani inwareox tamar e hermano Epafras era que jaxir meyra war ubꞌijnu tamarox y tamar tin e turobꞌ tama e chinam Laodicea y xeꞌ turobꞌ tama e chinam Hierápolis.  
\v 14 Y e hermano Lucas xeꞌ jax inteꞌ ajtzꞌaconer xeꞌ inchoj ut camener war uyebꞌta axin e cꞌajpesiaj tibꞌa, y bꞌan war uche e hermano Demas ubꞌan.   
\p
\v 15 Y cꞌajpesicobꞌ tunor e hermanuobꞌ xeꞌ turobꞌ tama e chinam Laodicea, y cꞌajpesic e hermana Ninfas taca tunor e ajcꞌupesiajobꞌ tama e Cristo xeꞌ war umorojse ubꞌobꞌ tama uyotot tuaꞌ utattzꞌiobꞌ ucꞌabꞌa e Dios.  
\v 16 Pues conda acꞌapa iche leer e carta era tut tunor e hermanuobꞌ tiaꞌ turox, ebꞌtanic chic esto tama e chinam Laodicea tuaꞌ uyubꞌi uchiobꞌ leer tut tunor e grupo ajcꞌupesiajobꞌ yajaꞌ ubꞌan. Y e carta xeꞌ cꞌapa inwebꞌta ixin esto tama e grupo ajcꞌupesiajobꞌ xeꞌ turobꞌ tama e chinam Laodicea, quiqui taresic y chenic leer tut tunor e grupo ajcꞌupesiajobꞌ tiaꞌ turox ubꞌan.  
\v 17 Y arenic e hermano Arquipo cocha era que: “Quetpac chequer que iꞌxin ache tunor e patnar lo que quetpa tuaꞌ ache, cocha net intera turet taca Cawinquirar Jesucristo”, che e Pablo.   
\p
\v 18 Pues nen xeꞌ Pabloen war intzꞌijbꞌa e cꞌajpesiaj era taca nicꞌabꞌ tuaꞌ inata que jax nen xeꞌ war inwebꞌta axin e carta era. Y cꞌaric imener tuaꞌ icꞌajti taca e Dios tamaren umen que turen tara tama e cárcel. Utacarsiaj e Dios turic tacarox inteꞌ intiox. Tara acꞌapa tunor niwojroner, che e Pablo.