\id 2TH - Chortí NT -Guatemala 2012 (DBL -2013) 
\h 2 TESALONICENSES 
\toc1 Jax era e chajr ojroner lo que tzꞌijbꞌabꞌir umen e Apóstol Pablo tama e grupo ajcꞌupesiajobꞌ xeꞌ turobꞌ tama e chinam Tesalónica 
\toc2 2 Tesalonicenses 
\toc3 2 Ts 
\mt2 Jax era e chajr ojroner lo que tzꞌijbꞌabꞌir umen e Apóstol Pablo tama e grupo ajcꞌupesiajobꞌ xeꞌ turobꞌ tama e chinam Tesalónica  
\c 1  
\p
\v 1 Pues nen xeꞌ Pabloen taca e Silvano y e Timoteo war catzꞌijbꞌa e carta era tibꞌa xeꞌ jax inteꞌ grupo ajcꞌupesiajox xeꞌ turox tama e chinam Tesalónica xeꞌ intera ibꞌijnusiaj taca Catata Dios y taca Cawinquirar Jesucristo ubꞌan.  
\v 2 Chꞌamic utacarsiaj y ujiriar Catata Dios y tuaꞌ Cawinquirar Jesucristo.   
\s1 E jatzꞌuar lo que tuaꞌ uchꞌamiobꞌ tin e ajmabꞌambꞌanirobꞌ conda achecta watar e Cristo  
\p
\v 3 Pues niwermanuox, war catattzꞌi ucꞌabꞌa Cadiosir tamarox iraj iraj bꞌan cocha ucꞌani tuaꞌ cache. Porque war achꞌiꞌ icꞌupesiaj tama Cadiosir axin, y war iyajta ut ibꞌa más y más axin.  
\v 4 Y tamar era war catattzꞌiox tut e sian grupo ajcꞌupesiajobꞌ iraj iraj que war ixqꞌuecꞌo ixcꞌupseyan tama Cadiosir motor que war inumse ibꞌa meyra tama e sian cꞌuxner.  
\v 5 Pues chequer que erach Cadiosir conda uche juzgar porque tamar era war ixquetpa tawar tuaꞌ ixochoy tama uchinam cocha war inumse ibꞌa era umen taca que war ixcꞌupseyan tama e Cristo.   
\p
\v 6 Pues tawar Cadiosir xeꞌ cꞌani uyajcꞌu uyeror tunor tin e war uchiox inumse ibꞌa era,  
\v 7 y tuaꞌ axin uyajcꞌox ujiriar watar e día cocha war inumse ibꞌa meyra era, y bꞌan tuaꞌ axin uyajcꞌon non ubꞌan tama e día conda achecta watar Cawinquirar Jesús tut e qꞌuin macuir uwarar e cꞌajc taca uyangelobꞌ xeꞌ meyra ayan ucꞌotorer.  
\v 8 Jaxir watar taca inteꞌ nuxi jatzꞌuar tuaꞌ uwatzꞌi tunor tin e machi unatobꞌ chi Cadiosir y tunor tin e machi acꞌupseyanobꞌ tut uyojroner Cawinquirar Jesús tama e corpesiaj.  
\v 9 Jaxirobꞌ tuaꞌ axin ajajtzꞌobꞌ taca inteꞌ nuxi tijresiaj xeꞌ machi tuaꞌ acꞌapa, y ucꞌani tuaꞌ ajujrobꞌ najtir tut Cawinquirar y najtir tut e nuxi tawarer lo que ayan tama ucꞌotorer Cawinquirar.  
\v 10 Y bꞌan tuaꞌ anumuy tama e día conda achecta watar Cawinquirar tuaꞌ atajttzꞌa umen tunor tin e tuobꞌ y conda tuaꞌ atzay eꞌrna umen tunor tin e war acꞌupseyanobꞌ tamar. Y cocha nox cꞌapa ichꞌami tunor uyojroner e Dios lo que cay cachecsu tiut, nox ubꞌan tuaꞌ ixquetpa taca tunor e sian ajcꞌupesiajobꞌ era.   
\p
\v 11 Pues tamar era war cacꞌajti taca e Dios tamarox iraj iraj que jaxir tuaꞌ axin uyustes tunor iweroj este que ixcꞌotoy ixquetpa erach inyajrer tamar jaxir porque tamar era sicbꞌabꞌirox umener. Y war cacꞌajti taca e Dios ubꞌan que jaxir tuaꞌ utacriox meyra taca ucꞌotorer tuaꞌ ixajcꞌuna tunor lo que imbꞌutz lo que war iyusre ichꞌami tuaꞌ, y que Cadiosir tuaꞌ axin utacriox taca tunor lo que war iche umen que war ixcꞌupseyan tamar.  
\v 12 Pues tamar era cꞌani axin atajttzꞌa meyra ucꞌabꞌa Cawinquirar Jesús tamarox, y nox ubꞌan cꞌani ixixin ixtajttzꞌa umen e Dios umen que meyra ayan utacarsiaj Cadiosir y tuaꞌ Cawinquirar Jesucristo ubꞌan.   
\c 2  
\s1 Ayan cora checsuyaj tamar uyopar Cawinquirar  
\p
\v 1 Pues entonces niwermanuox, tama e tiempo conda cꞌani achecta watar Cawinquirar Jesucristo otronyajr conda cꞌani caquetpa morojsebꞌiron tacar, pues ayan lo que cꞌani cawareox tamar,  
\v 2 porque jay ayan tin e ayopa tiut xeꞌ uyareox que yopix Cawinquirar, ira iwacta ibꞌa tuaꞌ apocpa iwalma wacchetaca umen inteꞌ ojroner cocha era, y ira iwacta ibꞌa tuaꞌ ixbꞌajcꞌusena porque majax bꞌan. Y motor que ixarobꞌna que jax inteꞌ ojroner xeꞌ ajcꞌuna umen e Dios o jay ichꞌami inteꞌ carta xeꞌ tzꞌijbꞌna ani camener xeꞌ che que yopix Cawinquirar,  
\v 3 ira iwacta ibꞌa tuaꞌ ixmajresna porque majax bꞌan. Pues cꞌani asutpa watar Cawinquirar Jesucristo otronyajr, pero bꞌajxan cꞌani acꞌotoy e día conda meyra ajcꞌupesiajobꞌ tuaꞌ axin uyactobꞌ ubꞌir Cawinquirar. Y de allí cꞌani achecta inteꞌ winic xeꞌ tuaꞌ e mabꞌambꞌanir inyajrer xeꞌ jax uman e diablo, pero jaxir aquetpa tuaꞌ ajujra axin tama e cꞌajc watar e día.  
\v 4 E winic tuaꞌ e mabꞌambꞌanir era cꞌani axin uxejbꞌe ut tunor lo que axin ojytzna ut umen e gente y axin uxejbꞌe ut Cadiosir ubꞌan. Y jaxir tuaꞌ axin uchꞌijse ubꞌa tujor tunor era y axin uturbꞌa uturtar macuir utemplo e Dios lo que ayan tama e chinam Jerusalem tuaꞌ ojytzna ut umen e gente este que axin uche ubꞌa que jaxir jax ani e Dios.   
\p
\v 5 Pues ¿machi ca cꞌar imener que cay inwareox tama tunor era conda turento tacarox?  
\v 6 Y nox war inata chi xeꞌ war uquete uwabꞌu e winic tuaꞌ e mabꞌambꞌanir era tuaꞌ machi achectesna este que acꞌotoy e hora tuaꞌ.  
\v 7 Pues warix acay tunor lo que war ubꞌijnu uche e winic tuaꞌ e mabꞌambꞌanir era motor que mucurto ticoit coner, ajtaquix aquetpa tuaꞌ aloqꞌuesna tin e war uquete uwabꞌu e winic era tuaꞌ machi uche tunor e mabꞌambꞌanir lo que cꞌanix ani uche.  
\v 8 Pero watar e día axin achectesna e winic era xeꞌ tuaꞌ e mabꞌambꞌanir y entonces Cawinquirar Jesús cꞌani axin uchamse tamar taca umusic y axin utijres tamar taca uwarar utawarer tama e hora conda achecta watar.  
\v 9 Pero conda ne mato achecta watar Cawinquirar, cꞌani achecta watar e winic xeꞌ tuaꞌ e mabꞌambꞌanir taca ucꞌotorer e Satanás. Y jaxir tuaꞌ umajres e gente taca e sian milagro y taca e sian seña y taca e sian chectesiaj lo que cꞌani ucꞌampes tuaꞌ uche acꞌupseyanobꞌ e gente que erach ani tunor era.  
\v 10 Y jaxir cꞌani ucꞌampes meyra sian mabꞌambꞌanir tuaꞌ umajres e gente xeꞌ turix tuaꞌ asatpobꞌ, cocha jaxirobꞌ machi cay uchꞌamiobꞌ lo que erach y nien machi uyajta ut lo que erach tuaꞌ uyubꞌi acorpesnobꞌ.  
\v 11 Y tamar era cocha matucꞌa ucꞌaniobꞌ xeꞌ erach, e Dios tuaꞌ uyebꞌta watar inteꞌ nuxi majresiaj ojroner tuaꞌ uche acꞌupseyanobꞌ tamar lo que majax erach.  
\v 12 Y bꞌan tuaꞌ anumuy tuaꞌ aquetpobꞌ satrem tunor tin e machi ucꞌani acꞌupseyanobꞌ tamar lo que erach porque jaxirobꞌ war atzayobꞌ uchiobꞌ ajtaca lo que mabꞌambꞌan.   
\s1 Sicbꞌabꞌirox tuaꞌ ixcorpesna  
\p
\v 13 Pues entonces niwermanuox xeꞌ yajtanbꞌirox umen Cawinquirar, cꞌani catattzꞌi ucꞌabꞌa e Dios tamarox, porque e Dios cay usicbꞌox conda ne mato achena ani or e rum era tuaꞌ ucorpesox. Pues usicbꞌox tuaꞌ ixquetpa bꞌajxan tuaꞌ ixcorpesna umen upatnar Unawalir e Dios conda cay uyustes tunor iwirnar y umen que cay cꞌupseyanox tamar lo que erach.  
\v 14 Pues Cadiosir upejcox tuaꞌ ixcꞌupseyan tamar lo que erach conda cay cachecsu uyojroner e Dios tama e corpesiaj tiut. Y jaxir upejcox ubꞌan tuaꞌ uyubꞌiox ichꞌami tunor utawarer Cawinquirar Jesucristo.   
\p
\v 15 Entonces niwermanuox, qꞌuecꞌojsenic ibꞌa tama ubꞌir e Dios y ira inajpes e canseyaj lo que cay cachecsu tiut conda turonto tacarox y lo que cay catzꞌijbꞌa tama inteꞌ carta tibꞌa.  
\v 16 Pues e Jesucristo xeꞌ jax Cawinquirar taca Catata Dios war uyajta coit meyra y tacar utacarsiaj war utꞌabꞌse cawalma inyajrer y war uyajcꞌon lo que war cacojco tuaꞌ cachꞌami tuaꞌ jaxir.  
\v 17 Que Cawinquirar Jesucristo taca Catata Dios axin utꞌabꞌse iwalma y axin uqꞌuecꞌojsiox tuaꞌ alocꞌoy imbꞌutz tunor lo que iche y tunor lo que iware.   
\c 3  
\s1 Cꞌajtinic taca e Dios tamaron  
\p
\v 1 Pues entonces niwermanuox, cꞌajtinic taca e Dios tamaron que uyojroner Cawinquirar tama e corpesiaj axin acꞌotoy tama tunor or e rum, y que tic taca tiaꞌ acꞌotoy e ojroner era que cꞌani achꞌajma taca inteꞌ nuxi tzayer bꞌan cocha numuy tacarox.  
\v 2 Y cꞌajtinic taca e Dios ubꞌan tuaꞌ machi uchionobꞌ canumse cabꞌa e mabꞌambꞌan winicobꞌ xeꞌ calapir uchiobꞌ, porque chequer que majax tunor xeꞌ war acꞌupseyanobꞌ tama Cawinquirar.  
\v 3 Pero erach Cawinquirar xeꞌ cꞌani uqꞌuecꞌojsiox tuaꞌ ixxana tama ubꞌir jaxir y xeꞌ cꞌani ucojcox tuaꞌ machi ixpijchna umen e diablo.  
\v 4 Pues non era war cacojco tama Cawinquirar que nox war ixcꞌupseyan tut tunor lo que cay cawareox y que bꞌan tuaꞌ iche iraj iraj ubꞌan.  
\v 5 Pues Cawinquirar ubꞌijresicox tuaꞌ iyajta ut e inmojr bꞌan cocha war uche Cadiosir y que ubꞌijresicox tuaꞌ iwacta anumuy bꞌan taca lo que war inumse ibꞌa era bꞌan cocha cay uche e Cristo.   
\s1 Tunoron ucꞌani tuaꞌ capatna  
\p
\v 6 Pues entonces niwermanuox, ayan lo que cꞌani cawareox era tamar ucꞌabꞌa Cawinquirar Jesucristo, que ira inutꞌi ibꞌa taca inteꞌ hermano xeꞌ machi cꞌani apatna y xeꞌ machi cꞌani obꞌian tut e canseyaj lo que cay ichꞌami tamaron.  
\v 7 Pues nox inata ixto cocha ucꞌani tuaꞌ ixturuan tuaꞌ iche bꞌan cocha cache non. Porque non machi turuanon bꞌan taca conda turon tacarox sino que cay patnon iraj iraj.  
\v 8 Y ma tiaꞌ cay wesenon bꞌan taca sino que ixion catoyi tunor lo que cay cacꞌuxi. Y tamar era cay patnon este que cꞌoyon tama e día y tama acbꞌar ubꞌan tuaꞌ machi acꞌaxi tama ijor nox tunor lo que ixion casati tamaron.  
\v 9 Pues erer ani cacꞌajti e tacarsiaj tibꞌa bꞌan cocha cay cacansiox, pero machi cache umen que war cabꞌijnu tuaꞌ caquetpa bꞌan cocha inteꞌ chequerir tiut tuaꞌ uyubꞌiox iwira tucꞌa ucꞌani tuaꞌ iche tama Cawinquirar.  
\v 10 Porque conda turonto tacarox cawareox que tin e machi apatna machi tuaꞌ aweꞌ ubꞌan.  
\v 11 Pues war cawareox cocha era umen que cay coybꞌi que ayan tijam tin e taca turobꞌ y xeꞌ machi war apatnobꞌ, ajtaca war unumsiobꞌ e tiempo tama e sian ojroner lo que war uchiobꞌ upater otronteꞌ.  
\v 12 Entonces cꞌani caware tamar ucꞌabꞌa Cawinquirar Jesucristo tunor tin e machi war apatnobꞌ que turicobꞌ tzꞌustaca y que chic patnacobꞌ tuaꞌ utajwiobꞌ e tumin tuaꞌ uyubꞌi umaniobꞌ lo que cꞌani ucꞌuxiobꞌ.   
\p
\v 13 Pues cawermanuox, ira ixcꞌoy iche lo que imbꞌutz tut e Dios.  
\v 14 Pero jay ayan tin e machi cꞌani acꞌupseyanobꞌ tut lo que war catzꞌijbꞌa tibꞌa era, chꞌujcunic iwira chi y ira inutꞌi ibꞌa tacar tuaꞌ ayopa e subꞌar tamar.  
\v 15 Pero ira ibꞌijnu que inteꞌ cocha era tuaꞌ aquetpa bꞌan cocha inteꞌ xeꞌ war aqꞌuijna uwiret, sino que cansenic lo que erer uche bꞌan cocha iche taca inteꞌ iwet ajcꞌupesiajir.   
\s1 E chojbꞌesiaj  
\p
\v 16 Que Cawinquirar xeꞌ tuaꞌ e jiriar uyajqꞌuicox e jiriar iraj iraj tic taca tiaꞌ chicox. Cawinquirar quetpac tacarox inteꞌ intiox.   
\p
\v 17 Pues nen xeꞌ Pabloen war intzꞌijbꞌa inteꞌ cꞌajpesiaj tibꞌa taca nicꞌabꞌ bꞌan cocha inche iraj iraj conda inwebꞌta axin inteꞌ carta cocha era.  
\v 18 Cawinquirar Jesucristo uwechꞌic utacarsiaj tama ijor tunorox. Tara acꞌapa tunor niwojroner, che e Pablo.