\id 2CO - Chortí NT -Guatemala 2012 (DBL -2013) 
\h 2 CORINTIOS 
\toc1 Jax era e chajr ojroner lo que tzꞌijbꞌabꞌir umen e Apóstol Pablo tama e grupo ajcꞌupesiajobꞌ xeꞌ turobꞌ tama e chinam Corinto 
\toc2 2 Corintios 
\toc3 2 Co 
\mt2 Jax era e chajr ojroner lo que tzꞌijbꞌabꞌir umen e Apóstol Pablo tama e grupo ajcꞌupesiajobꞌ xeꞌ turobꞌ tama e chinam Corinto  
\c 1  
\s1 E Pablo utzꞌijbꞌa inteꞌ carta tama e grupo ajcꞌupesiajobꞌ xeꞌ turobꞌ tama e chinam Corinto  
\p
\v 1 Nen e Pabloen xeꞌ jax inteꞌ apóstol tuaꞌ e Cristo Jesús umen que bꞌan ucꞌani Cadiosir. Nen taca e hermano Timoteo war catzꞌijbꞌa e carta era tibꞌa xeꞌ jax inteꞌ grupo ajcꞌupesiajox tama Cawinquirar Jesucristo xeꞌ turox tama e chinam Corinto, y war catzꞌijbꞌa e carta era ubꞌan tama tunor xeꞌ tuobꞌ e Dios xeꞌ turobꞌ tama e departamento Acaya.  
\v 2 Que Cadiosir xeꞌ jax Catata ubꞌan y Cawinquirar Jesucristo uyajqꞌuicox utacarsiaj y ujiriar.   
\s1 Lo que cay unumse ubꞌa e Pablo  
\p
\v 3 Catattzꞌic ucꞌabꞌa Cadiosir xeꞌ jax Utata Cawinquirar Jesucristo, y xeꞌ jax Catata xeꞌ war uyajta coit conda war canumse cabꞌa, y xeꞌ jax Cadiosir xeꞌ war ucꞌunles cawalma iraj iraj.  
\v 4 Y jax Cadiosir era ubꞌan xeꞌ axin ucꞌunles cawalma conda war acꞌuxun umen que war canumse cabꞌa. Y tamar era non ubꞌan erer caxin catacre tin e war acꞌuxun uyalmobꞌ umen que war unumse ubꞌobꞌ. Porque bꞌan cocha war catacarna umen e Dios y bꞌan ucꞌani e Dios tuaꞌ asutpa catacre non tin e war unumse ubꞌobꞌ ubꞌan.  
\v 5 Porque bꞌan cocha canumse cabꞌa umen que tuon e Cristo y bꞌan ubꞌan tuaꞌ catacarna umen e Cristo tuaꞌ acꞌunlesna cawalma conda war canumse cabꞌa.  
\v 6 Y tamar era jay aquetpa tuaꞌ canumse cabꞌa tuaꞌ cache upatnar e Dios, bueno ticoit, porque acꞌampa tunor era tuaꞌ ixtacarna tuaꞌ acꞌunlesna iwalma y tuaꞌ ichꞌami e corpesiaj. Y conda acꞌunlesna cawalma umen e Dios, jax taca tuaꞌ uyubꞌion catacriox tuaꞌ acꞌunlesna iwalma nox ubꞌan. Y tamar era erer asisa iwalma conda watar e hora tuaꞌ inumse ibꞌa bꞌan cocha war canumse cabꞌa non ubꞌan.  
\v 7 Y tamar era war aqꞌuecꞌo cacojcsiaj tamarox coner, porque war canata que bꞌan cocha war inumse ibꞌa umen que war ixxana tama ubꞌir e Dios, y bꞌan cocha era ubꞌan tuaꞌ ixtacarna tuaꞌ atꞌabꞌesna iwalma umen e Dios.   
\p
\v 8 Pues cawermanuox, quisinic inata cobꞌa cay canumse cabꞌa xeꞌ imbꞌacꞌajr uwirnar tama e departamento Asia. Pues tꞌabꞌay ticajor inteꞌ nuxi qꞌuijnar capater este que ma tzꞌacaron tuaꞌ caqꞌuecꞌo cawawan tut, y ayan hora conda war cabꞌijnu que non chamenonix ixto yaꞌ.  
\v 9 Porque non tama cawalma war cabꞌijnu que turix tuaꞌ cachamesna y que mix cocha tuaꞌ calocꞌoy tamar lo que war canumse cabꞌa bꞌan cocha inteꞌ xeꞌ arobꞌna umen inteꞌ juez que ucꞌani tuaꞌ achamesna. Pero ayan ucꞌampibꞌir tunor era cocha tamar cꞌotoyon canata que ma erer cacojco tamar cabꞌa tuaꞌ calocꞌoy tamar lo que war canumse cabꞌa cocha era, porque conda caturbꞌa cabꞌa tama ucꞌabꞌ e Dios inyajrer, cay cawira que jaxir ayan ajchi ucꞌotorer nojta tuaꞌ utacrion, cocha jaxir ayan ucꞌotorer tuaꞌ usuti ubꞌixqꞌues tin e chamen.  
\v 10 Y bꞌan uche Cadiosir tamaron que ixin ucorpeson tama cachamer, y bꞌan war uche era ubꞌan. Y war caturbꞌa cabꞌa tuaꞌ cacojco tamar jaxir tuaꞌ ucorpeson iraj iraj.  
\v 11 Y nox ubꞌan war ixtacarsan umen que war icꞌajti taca e Dios tuaꞌ ucojcon. Y ayan meyra gente xeꞌ war ucꞌajtiobꞌ tacar ubꞌan tuaꞌ catacarna, y tamar era watar e día conda meyra gente axin utattzꞌiobꞌ ut e Dios tamar lo que war uche tamaron.   
\s1 Conda e Pablo uyare e ajcꞌupesiajobꞌ tucꞌa tamar que machi ixin warajseyan  
\p
\v 12 Pues ayan lo que war ubꞌutꞌi cawalma meyra xeꞌ jax era: Que tama cawalma war canata que ixion cache cabꞌa erach tut tunor e gente tara tor e rum, y war caturbꞌa cabꞌa tuaꞌ machi aquetpa chagojr cajor tut e gente, pero más war catzay que cache imbꞌutz tunor lo que cay cache tiut. Pero jax Cadiosir xeꞌ ixin uyajcꞌon utacarsiaj tuaꞌ uyubꞌion cache tunor era, y majax umen que non ayan meyra canatanyaj.  
\v 13 Pero tamar lo que cay catzꞌijbꞌa tama cora ojroner xeꞌ cawebꞌta ixin tibꞌa, caturbꞌa cabꞌa tuaꞌ cawareox jax taca lo que erer aquetpa chequer tiut. Porque nen war incꞌani tuaꞌ ixcꞌotoy iyubꞌi tunor lo que war inchecsu tiut  
\v 14 motor que coner ayanto lo que war aquetpa mucur cora tiut tamar lo que cꞌani ani inwareox. Pero war incojco que conda asutpa watar Cawinquirar Jesús otronyajr que nox cꞌani ixtzay que war inata chien nen, y nen ubꞌan tuaꞌ intzay que war innata chiox nox. Bꞌan quisinic inwira anumuy tama e día conda asutpa watar Cawinquirar Jesús otronyajr.   
\p
\v 15 Y tamar era cꞌani inwareox que nen cay imbꞌijnu tuaꞌ incꞌotoy inwarajsiox chajr tuaꞌ uyubꞌien ani intzayjresox, pero ma tiaꞌ cꞌotoyen inche.  
\v 16 Pues cay imbꞌijnu tuaꞌ incꞌotoy ani inwarajsiox conda ixien esto tama e departamento Macedonia y de allí cꞌani ani insutpa inwarajsiox otronyajr conda sutpa locꞌoyen tama e departamento yajaꞌ. Y cay imbꞌijnu ubꞌan que tamar era nox erer ani itacren tama tunor lo que insati tama nixambꞌar esto tama e departamento Judea jay incꞌotoy ani.  
\v 17 ¿O ma ca jax erach que war imbꞌijnu que cꞌani inxin conda inwareox cocha era? ¿O war ca ibꞌijnu que intaca ojronen conda inwareox que cꞌani incꞌotoy inwarajsiox bꞌan ani cocha inteꞌ winic tara tor e rum que coner oꞌjron y che que ayan lo que cꞌani uche pero ejcꞌar asutpa ubꞌijnu que machix tuaꞌ uche?  
\v 18 Pero Cadiosir jax Cawajchecsuyaj que majax chagojr cajor conda cawareox que cꞌani cawarajsiox.  
\v 19 Y majax chagojr ujor e Jesucristo xeꞌ jax Uyunen e Dios. Porque jaxir xeꞌ cay cachecsu tiut, nen y e Silvano y e Timoteo, ma tiaꞌ tuaꞌ axin oꞌjron coner que bꞌan y ejcꞌar que majax bꞌan, porque tunor e ojroner tuaꞌ e Jesucristo erach tunor.  
\v 20 Porque tamar e Cristo era cꞌani acꞌapa achempa tunor lo que quetpa tuaꞌ achena umen Catata Dios. Y tamar utacarsiaj Cawinquirar era non war catattzꞌi ucꞌabꞌa Cadiosir iraj iraj conda caxin caware que bꞌan cocha arobꞌna umen e Dios y bꞌan war achempa umener.  
\v 21 Y jax Cadiosir xeꞌ war uqꞌuecꞌojsion tunoron tuaꞌ caxana tama ubꞌir e Cristo, y jax jaxir ubꞌan xeꞌ usicbꞌon tuaꞌ caxin cache lo que war ucꞌani jaxir.  
\v 22 Pues bꞌan cocha inteꞌ juez xeꞌ axin uche sellar inteꞌ jun tuaꞌ aquetpa chequer que ayan ucꞌampibꞌir e jun era, y bꞌan uche Cadiosir tacaron conda ixin uturbꞌa Unawalir tama cawalma tuaꞌ cacꞌotoy canata que tuon jaxir, y tuaꞌ cacꞌotoy canata que tunor lo que arobꞌnon umener bꞌan ubꞌan tuaꞌ axin uyajcꞌon.   
\p
\v 23 Entonces tamar lo que war cojron era que machi sutpa tarien tama e chinam Corinto otronyajr, Cadiosir jax Niwajchectesiaj porque jaxir war unata tunor lo que ayan tama nijor y tunor lo que ayan tama niwalma y jaxir unata que erach tunor lo que war inwareox era. Porque Cadiosir war unata que jay tarien ani tuaꞌ inwarajsiox quetpa ani tuaꞌ inchiox ixquetpa tzajtaca iut conda inwareox ani que mabꞌambꞌan lo que war iche.  
\v 24 Pero machi war imbꞌijnu tuaꞌ inturbꞌa tamarox más lo que ucꞌani tuaꞌ icꞌupse, porque nen taca e Timoteo majax iwinquiraron tamar lo que war ixcꞌupseyan tamar. Y cocha nox qꞌuecꞌoxix tama icꞌupesiaj tama Cawinquirar, entonces capatnar era tacarox jax taca tuaꞌ catzayjresox tama Cawinquirar.   
\c 2  
\p
\v 1 Y tamar era cay imbꞌijnu tuaꞌ machi inxin inwarajsiox otronyajr, jay tamar era nox tuaꞌ ixtzꞌintzꞌa tama iwalma.  
\v 2 Porque jay nen ani inchiox ixtzꞌintzꞌa tama iwalma, entonces ¿chi nic ani tuaꞌ axin utzayjresen? Jax taca ani nox xeꞌ war ani inchiox ixtzꞌintzꞌa tama iwalma. Y jay bꞌanox ani, entonces ma cocha erer itzayjresen.  
\v 3 Y tamar era cay intzꞌijbꞌa tibꞌa bꞌajxan tamar lo que war iche xeꞌ majax imbꞌutz tuaꞌ uyubꞌiox iyustes ibꞌa bꞌajxan que incꞌotoy, porque machi incꞌani tuaꞌ atzꞌintzꞌesna niwalma imener conda incꞌotoy, sino que war incojco tuaꞌ intzayjresna imener. Porque nen era war imbꞌijnu que jay nen incꞌotoy intzay, entonces tunorox tuaꞌ itzayjres ibꞌa ubꞌan.  
\v 4 Pero conda cay intzꞌijbꞌa tibꞌa war ani innumse nibꞌa meyra tama niwalma y imbꞌar tunor niwalma este que war unqꞌui. Pero intzꞌijbꞌa inteꞌ carta tibꞌa majax tuaꞌ inchiox ixtzꞌintzꞌa tama iwalma, sino que tuaꞌ inchiox inata cobꞌa war inyajta iut.   
\s1 Cꞌumpenic taca tin e cay uche e mabꞌambꞌanir tijam  
\p
\v 5 Pues ¿cꞌarto ca imener e winic xeꞌ cay uche e nuxi mabꞌambꞌanir xeꞌ cay intzꞌijbꞌa tibꞌa tamar? Pues jay ayan tin e warto acꞌuxun uyalmobꞌ uwirobꞌ lo que numuy, pues majax nen taca sino que nox ubꞌan. Pero machix tuaꞌ cawacta e disciplina era tama ujor tin e cay uche tunor era.  
\v 6 Porque chequer que manxuran e winic xeꞌ cay uche e mabꞌambꞌanir cocha nox cay itacre uwira tunor era conda tunorox cay iturbꞌa e disciplina tamar. Pero coner erer cabꞌijnu que tzꞌactix tunor e disciplina tamar.  
\v 7 Entonces coner ucꞌani tuaꞌ ixcꞌumpa taca e winic era y ucꞌani tuaꞌ ixixin itꞌabꞌse uyalma tuaꞌ machix atzꞌintzꞌa meyra este que bꞌajcꞌat axin ani ubꞌijnu que ma tiaꞌ tuaꞌ asutpa axana tama ubꞌir e Dios otronyajr.  
\v 8 Y tamar era cꞌani inwareox que coner ucꞌani tuaꞌ ixsutpa ixixin tut otronyajr tuaꞌ iware que war iyajta ut.  
\v 9 Pues tamar era cay intzꞌijbꞌa inteꞌ carta tibꞌa umen que cꞌani ani innata jay turix tuaꞌ icꞌupse tunor niwojroner.  
\v 10 Y cꞌani inwareox era que conda ixixin ixcꞌumpa taca inteꞌ cocha era tamar lo que cay uche que nen ubꞌan war incꞌumpa tacar. Porque conda nen inxin incꞌumpa tamar lo que cay uche, jay ayan lo que ucꞌani tuaꞌ acꞌumpa inteꞌ tamar, war inche umen que war inyajta iut y umen que bꞌan war ucꞌani e Cristo tuaꞌ inche.  
\v 11 Y bꞌan ucꞌani tuaꞌ cache porque canata que e Satanás war usicbꞌa cocha tuaꞌ utijreson conda ayan tucꞌa tamar war canumse cabꞌa tama cawalma, y war canata ubꞌan que jaxir intaquix war ucojco utajwi cocha tuaꞌ utijreson.   
\s1 Conda e Pablo machi acꞌay tama uyalma conda turu tama e chinam Tróas  
\p
\v 12 Pues conda cꞌotoyen tama e chinam Tróas tuaꞌ inchecsu uyojroner e Dios tama e Cristo tut e gente axin, cay inwira que pasar e bꞌir taniut tuaꞌ inche tunor upatnar Cawinquirar.  
\v 13 Pero nen turuanen machi incꞌay tama niwalma porque ma tiaꞌ intajwi e hermano Tito. Y tamar era cay inware e gente yajaꞌ que cꞌani inxin esto tama e departamento Macedonia.   
\s1 Cꞌani cacucru tunor lo que cꞌani ani ulocsion tama ubꞌir e Dios taca utacarsiaj Cawinquirar  
\p
\v 14 Pues entonces cꞌani catattzꞌi ucꞌabꞌa Cadiosir umen que jaxir war uqꞌuecꞌojsion y war uqꞌuechion caxin tic taca tiaꞌ ucꞌani, y war ucꞌampeson tuaꞌ cachecsu uyojroner tut tunor e gente axin. Y war uche tuaꞌ aquetpa galan ojtzꞌun axin tunor uyojroner tama e Cristo bꞌan cocha uyujtznar e ujtzꞌubꞌ xeꞌ galan ojtzꞌun xeꞌ aqꞌuejcha axin umen e icꞌar conda apurutna.  
\v 15 Y non xeꞌ war cachecsu uyojroner e Dios tama e corpesiaj axin war caquetpa bꞌan cocha uyujtznar e ujtzꞌubꞌ xeꞌ galan xeꞌ war apurutna umen e Cristo tut e Dios y xeꞌ war aqꞌuejcha axin umen e icꞌar tut tunor tin e war acorpesnobꞌ y tut tunor tin e war asatpobꞌ ubꞌan.  
\v 16 Pues tut tin e war asatpobꞌ calapir intuj uyujtzner e ujtzꞌubꞌ era y jax lo que tuaꞌ uqꞌuechiobꞌ axin tut uchamer. Pero tut tin e war acorpesnobꞌ galan ojtzꞌun uyujtzner era y jax xeꞌ war uyajcꞌuobꞌ e cuxtar xeꞌ machi tuaꞌ acꞌapa. Entonces ¿chi tawar tuaꞌ uqꞌueche axin inteꞌ ojroner cocha era?  
\v 17 Pero non machi war cache bꞌan cocha tin e war ubꞌijnuobꞌ que jax taca inteꞌ chonmar tunor e patnar tamar uyojroner e Dios tama e corpesiaj, porque tin e ubꞌijnuobꞌ cocha era war uchiobꞌ intiach tunor e ojroner era bꞌan taca cocha ucꞌaniobꞌ. Pero non xeꞌ pejcbꞌiron umen e Dios war caqꞌueche axin uyojroner e Dios bꞌan taca cocha ajcꞌunon umener, y tamar era cojron bꞌan cocha jay war cojron tut e Dios tic taca tiaꞌ war cojron tamar uyojroner e Dios porque tuon e Cristo.   
\c 3  
\s1 Inteꞌ ojroner tama e pacto xeꞌ imbꞌutz  
\p
\v 1 Pues entonces conda cacay cojron cocha era ¿war ca ibꞌijnu que war catattzꞌi cabꞌa non taca tiut que meyra ayan ucꞌampibꞌir tunor capatnar? Machi. ¿O ucꞌani ca tuaꞌ cawajcꞌox cora carta tuaꞌ uchecsu tamaron que non ayan cacꞌampibꞌir? Machi. ¿O ucꞌani ca tuaꞌ cacꞌajti cora carta tibꞌa tuaꞌ caqꞌueche axin tuaꞌ cawirse e inmojr tic taca tiaꞌ caxin bꞌan cocha acay uchiobꞌ cora winicobꞌ?  
\v 2 Machi. Porque jax nox xeꞌ bꞌanox cocha inteꞌ jun xeꞌ tzꞌijbꞌabꞌir cora ojroner tamar xeꞌ war cawirse e gente axin que non ayan cacꞌampibꞌir, y jax nox xeꞌ jaxox inteꞌ jun xeꞌ tzꞌijbꞌabꞌir tama cawalma xeꞌ chequer tut e gente axin y que erer uchiobꞌ leer tuaꞌ uwirobꞌ que non ayan cacꞌampibꞌir.  
\v 3 Pero nox jaxox inteꞌ jun xeꞌ tzꞌijbꞌabꞌir umen e Cristo y xeꞌ ebꞌetbꞌir ixin camener. Pero e ojroner era majax bꞌan cocha inteꞌ ojroner xeꞌ tzꞌijbꞌabꞌir taca e tinta tama inteꞌ jun o xeꞌ quetpa chembꞌir e ojroner tama inteꞌ tun, sino que e ojroner era quetpa tzꞌijbꞌabꞌir tama cawalma umen Unawalir e Dios xeꞌ bꞌixir.   
\p
\v 4 Pues war cawareox cocha era porque non ayan cacꞌupesiaj tama Cadiosir tama e Cristo.  
\v 5 Y machi war cawareox que non ayan cacꞌampibꞌir umen que imbꞌutz cawirnar, sino que war cawareox que e Dios ixin uyajcꞌon cacꞌampibꞌir tuaꞌ uyubꞌion cache lo que ucꞌani jaxir, y que tamar taca ucꞌotorer erer cache tunor era.  
\v 6 Pues Cadiosir ixin uyajcꞌon cacꞌampibꞌir tuaꞌ uyubꞌion cache tunor upatnar tamar ucꞌotorer inteꞌ pacto xeꞌ imbꞌutz. Pero e pacto era majax bꞌan cocha e onian pacto xeꞌ jax uley e Moisés xeꞌ quetpa tzꞌijbꞌabꞌir tama inteꞌ tun xeꞌ quetpa tuaꞌ cacꞌupseyan tut inyajrer. Pero e pacto xeꞌ imbꞌutz era jax lo que war uyajcꞌon cacuxtar xeꞌ imbꞌutz tacar Unawalir e Dios. Porque uley e Moisés che que bꞌan cocha chꞌar tzꞌijbꞌabꞌir y bꞌan ucꞌani tuaꞌ achempa motor que axin achamesna inteꞌ tamar. Porque lo que chꞌar tzꞌijbꞌabꞌir tama uley e Moisés che que ucꞌani tuaꞌ cachamesna inteꞌ intion. Pero Unawalir e Dios uyajcꞌon e cuxtar xeꞌ machi tuaꞌ acꞌapa.   
\p
\v 7 Pues uley e Moisés quetpa tzꞌijbꞌabꞌir tama inteꞌ tun, y tama e onian tiempo conda ajcꞌuna tunor e ley era e Moisés, quetpa chequer utawarer e Dios tut e Moisés, y cay ejpray meyra e nuxi janchꞌaquenar era tut e Moisés este que e gente tuaꞌ e Israel machi uyubꞌi uwirobꞌ ut. Pero tunor e nuxi janchꞌaquenar era lo que ayan tama ut e Moisés cay tajpa ixin tama e tiempo. Pero jay checta utawarer e Dios meyra cocha era conda ajcꞌuna uley e Moisés xeꞌ erer achamsan  
\v 8 ¿cobꞌato nic tuaꞌ cawira utawarer e Dios coner tamar e ojroner xeꞌ ajcꞌunon umen Unawalir e Dios?  
\v 9 Entonces cocha checta meyra utawarer e Dios conda ajcꞌuna uley e Moisés xeꞌ quetpa tuaꞌ uchamsion cocha machi uyubꞌion cache tunor lo que chꞌar tzꞌijbꞌabꞌir tamar, entonces canata ixto yaꞌ que checta más utawarer e Dios tama e ojroner xeꞌ uchecsu ticoit que erer cacorpesna tama tunor camabꞌambꞌanir.  
\v 10 Pues ixnix ayan meyra utawarer lo que chꞌar tzꞌijbꞌabꞌir tama uley e Moisés, pero coner quetpa tajpem tunor e tawarer era cocha más nojta war ejpray axin e nuxi tawarer lo que ayan tama e ojroner xeꞌ ajcꞌuna umen Unawalir e Dios.  
\v 11 Entonces jay ayan ani meyra tawarer tamar lo que acꞌapa, ¿cobꞌa más utawarer e Dios tuaꞌ aquetpa tamar lo que machi tuaꞌ acꞌapa?   
\p
\v 12 Entonces cocha ayan cacꞌupesiaj nojta tama tunor e ojroner era xeꞌ ajcꞌuna umen Unawalir e Dios, machix tuaꞌ casubꞌajra cojron tamar.  
\v 13 Pero non machi war cache bꞌan cocha cay uche e Moisés tama e onian tiempo conda cay umaqui ut taca inteꞌ bꞌujc tuaꞌ machi erna umen e gente tuaꞌ e Israel que war atajpa axin tunor e tawarer era lo que cay ejpray tama ut conda uchꞌami e ley, porque ma erer aquetpa inyajrer utawarer e Dios cocha era tama ut.  
\v 14 Y bꞌanto turobꞌ e gente tama e Israel esto coner que macar ujorobꞌ bꞌan cocha jay ayan ani inteꞌ bꞌujc tutobꞌ, y tamar era conda axin uchiobꞌ leer lo que ayan tama e onian pacto xeꞌ jax e antiguo testamento ma chequer lo que ayan tamar porque macar ujorobꞌ. Pero coner erer taca aloqꞌuesna lo que war umaqui ujorobꞌ axin conda axin uchꞌamiobꞌ ucꞌabꞌa e Cristo.  
\v 15 Y bꞌanto war anumuy esto coner conda axin uchiobꞌ leer uley e Moisés e gente tuaꞌ e Israel, porque macar ujorobꞌ y machi war acꞌotoy unatobꞌ tunor lo que ayan tamar, sino que war aquetpobꞌ bꞌan taca cocha war ubꞌijnuobꞌ.  
\v 16 Pero conda inteꞌ winic asutpa uchꞌami ucꞌabꞌa Cawinquirar, apascꞌa ujor y lo que war ani umaqui ut e winic era aloqꞌuesna umen Cawinquirar.  
\v 17 Y Cawinquirar era jax Unawalir e Dios, y conda Unawalir Cawinquirar war ubꞌijres inteꞌ, entonces inteꞌ era cꞌani apascꞌa ut e bꞌir tut tuaꞌ uyubꞌi uche lo que ucꞌani e Dios.  
\v 18 Y tamar era non mixto jax macar coit coner, sino que war aquetpa coit bꞌan cocha inteꞌ espejo xeꞌ war ejpray axin tunor utawarer Cawinquirar tamar, y tamar era war asutpa coit axin tuaꞌ aquetpa más y más bꞌan cocha Cawinquirar Jesucristo, porque ejcꞌar ejcꞌar war achecta watar más tunor utawarer ticoit. Y war achena tunor era umen Cawinquirar taca Unawalir.   
\c 4  
\p
\v 1 Entonces cocha jax Cadiosir xeꞌ cay uyajcꞌon tunor capatnar era tacar ucꞌunersiaj, non ma tiaꞌ tuaꞌ cawacta oꞌchoy e cꞌoyir tama cawalma.  
\v 2 Y non cachoquix uchenar tunor lo que erer uche inteꞌ xeꞌ mucur, y cachoquix tunor uchenar lo que erer uche inteꞌ xeꞌ subꞌar uwirnar. Y machi camajresian, y machi war cache intiach lo que che tama uyojroner e Dios. Y tamar era war cachecsu ajtaca lo que canata que erach tama e Dios tut e gente axin, y war capasi cawalma tut e gente tuaꞌ acꞌotoy unatobꞌ tama uyalmobꞌ que imbꞌutz tunor lo que war cacanseyan tama Cadiosir.  
\v 3 Pero jay tunor uyojroner e Dios tama e corpesiaj lo que war cachecsu tut e gente axin aquetpa mucur, war aquetpa mucur tut tin e satrem.  
\v 4 Y e Satanás xeꞌ jax udiosir e gente tara tor e rum war umaqui ujorobꞌ tin e machi war acꞌupseyanobꞌ tama Cawinquirar. Y bꞌan war uche tuaꞌ uquete uwabꞌu e gente era tuaꞌ machi aquetpa chequer tutobꞌ tunor utawarer e ojroner tama e Cristo xeꞌ war ejpray axin. Y e Cristo era jax uwirnar ut Catata Dios.  
\v 5 Y conda war cachecsu uyojroner e Dios, machi caware e gente axin que non imbꞌutz cawirnar y que tamar era war cachecsu uyojroner e Dios axin. Sino que non war cachecsu tut e gente que e Jesucristo jax Cawinquirar, y que non manon tibꞌa umen que tuon e Jesús.  
\v 6 Pues tama ucajyesnibꞌir tunor lo que ayan cay ojron Cadiosir y che que tama e incsibꞌaner tuaꞌ alocꞌoy e janchꞌaquenar, y jax Cadiosir era ubꞌan xeꞌ cay uche ejpray ujanchꞌaquenar esto macuir tunor cawalma tuaꞌ uyubꞌion cacꞌotoy canata tucꞌa tunor utawarer Cadiosir lo que cay ejpray locꞌoy tamar ut e Cristo.   
\s1 Non caturuan tama e cꞌupesiaj tama Cawinquirar  
\p
\v 7 Pues galan tunor uyojroner e Dios tama e corpesiaj, y bꞌan ajcꞌunon umen e Dios tuaꞌ aquetpa tama cawalma xeꞌ bꞌan cocha inteꞌ bꞌejt xeꞌ chembꞌir tama e tzꞌijc rum. Pues e bꞌejt era matucꞌa ucꞌampibꞌir pero lo que ayan macuir atujri meyra. Y bꞌan uche e Dios tuaꞌ aquetpa chequer que tunor e nuxi cꞌotorer era tari tuaꞌ e Dios y que majax ticabꞌach.  
\v 8 Y motor que ayan meyra lo que war canumse cabꞌa iraj iraj, pero ayan ixto cocha tuaꞌ calocꞌoy tamar. Y motor que ayan lo que war cabꞌijnu meyra tamar, pero ma tiaꞌ war cachoqui cacꞌupesiaj.  
\v 9 Y motor que ayan tin e war aqꞌuijna uwiron xeꞌ war axin ticapat, pero non war canata que majax choquemon inyajrer. Y motor que ayan tin e axin ucucron tut e rum, pero machi uyubꞌi usation.  
\v 10 Y tic taca tiaꞌ caxin chequer tama cacuerpo que cꞌani ani uchamsion e mabꞌambꞌan gente bꞌan cocha uchamsiobꞌ e Jesús. Pero non era war caqꞌuecꞌo cawawan tut lo que watar tuaꞌ aquetpa chequer tut tunor e gente axin que bꞌixir e Jesús y que jaxir war ucorpeson tama e chamer.  
\v 11 Y e mabꞌambꞌan gente era war uturbꞌa ubꞌobꞌ iraj iraj tuaꞌ ani uchamsionobꞌ umen que war cachecsu uyojroner e Dios tama e corpesiaj axin. Y tamar era war aquetpa chequer uwirnar Cawinquirar Jesucristo tamaron motor que non winicon taca.  
\v 12 Y iraj iraj war acꞌajna cachamer umen que non war cachecsu uyojroner e Dios tama e corpesiaj axin, pero ayan ucꞌampibꞌir tunor era porque tamar era nox cꞌotoyox ichꞌami e cuxtar xeꞌ machi tuaꞌ acꞌapa.   
\p
\v 13 Pues bꞌan cocha chꞌar tzꞌijbꞌabꞌir tama uyojroner e Dios tama inteꞌ Salmo y che: “Cꞌupseyanen tama uyojroner e Dios y tamar era cay ojronen tamar”, che tama uyojroner e Dios. Y non cocha war cacꞌupseyan ubꞌan tama uyojroner e Dios war cojron tamar ubꞌan.  
\v 14 Y war canata que Cadiosir xeꞌ ixin usuti ubꞌixqꞌues Cawinquirar Jesús tujam e chamenobꞌ cꞌani axin usuti ubꞌixqꞌueson non ubꞌan tacar jaxir. Y tamar era war canata que Cadiosir tuaꞌ uqꞌuechion caxin tunoron esto tut jaxir tichan tut e qꞌuin ubꞌan.  
\v 15 Pues numuy tunor era tuaꞌ ixtacarna y tuaꞌ abꞌoro tunor tin e war uchꞌamiobꞌ utacarsiaj e Dios, y tamar era axin abꞌoro ubꞌan tin xeꞌ war uyajcꞌuobꞌ utattzꞌarsiaj e Dios y xeꞌ war utattzꞌiobꞌ utawarer ubꞌan.   
\p
\v 16 Entonces motor que war canumse cabꞌa meyra cocha era, pero machi war cawacta oꞌchoy e cꞌoyir tama cawalma. Y motor que war acꞌapa axin cacuerpo umen que war anumuy meyra año tama cajor, pero tunor cawalma war aqꞌuecꞌojsena iraj iraj umen Cadiosir.  
\v 17 Pues coner ayan lo que war canumse cabꞌa cora tamar cacuxtar tara tor e rum, pero cꞌani acꞌapa tunor era wacchetaca. Pero tama tunor era ayan lo que axin cachꞌami conda cacꞌotoy tichan tut e qꞌuin xeꞌ jax inteꞌ nuxi tawarer xeꞌ machi tuaꞌ acꞌapa xeꞌ tuaꞌ cajcꞌuna umen e Dios.  
\v 18 Pero non era machix tuaꞌ caturbꞌa cabꞌa tamar lo que erer cawira tara tor e rum, porque tunor lo que ayan tara tor e rum war oꞌcꞌoy y war acꞌapa. Y tamar era ucꞌani tuaꞌ caturbꞌa cabꞌa más tamar lo que ayan tichan tut e qꞌuin xeꞌ machi uyubꞌion cawira ut, porque lo que ayan tichan tut e qꞌuin machi tuaꞌ acꞌapa y machi tuaꞌ asatpa.   
\c 5  
\p
\v 1 Pues cacuerpo lo que ayan tara tor e rum xeꞌ aquetpa bꞌan cocha inteꞌ otot xeꞌ chembꞌir taca e xan machi tuaꞌ eixna. Y conda cachamay cꞌani acꞌapa lo que quetpa bꞌan cocha cotot tara tor e rum xeꞌ jax cacuerpo. Pero canata que non ayan intex cotot xeꞌ jax cacuerpo xeꞌ imbꞌutz xeꞌ machi tuaꞌ acꞌapa xeꞌ tuaꞌ cachꞌami conda caxin tichan tut e qꞌuin. Pero cotot yajaꞌ tichan tut e qꞌuin chembꞌir umen e Dios y majax umen inteꞌ winic.  
\v 2 Porque non coner war cacꞌoyran caturuan tama cacuerpo tara tor e rum umen lo que war canumse cabꞌa tamar, y tamar era war cosre tuaꞌ cabꞌujcse cabꞌa tamar lo que ustabꞌir umen Cadiosir tichan tut e qꞌuin.  
\v 3 Y tamar era canata que ayan lo que tuaꞌ cabꞌujcsena tamar conda caxin tichan y que majax pispis tuaꞌ aquetpa cawalma conda cacꞌotoy tut e qꞌuin.  
\v 4 Pero coner cocha turonto tama cacuerpo tara tor e rum xeꞌ bꞌan cocha inteꞌ cotot, canata que inyaj cawerir y que ayan lo que war canumse cabꞌa tamar. Y motor que ma ani cꞌani cachoqui cacuerpo lo que ayan tara tor e rum, pero war ixto cosre tuaꞌ cachꞌami cacuerpo xeꞌ imbꞌutz tut e qꞌuin, porque cacuerpo xeꞌ imbꞌutz era cꞌani aquetpa bꞌixir inyajrer.  
\v 5 Pues jax Cadiosir xeꞌ cay uyusteson tuaꞌ uyubꞌion cachꞌami intex cacuerpo xeꞌ imbꞌutz xeꞌ tuaꞌ cachꞌami conda caxin tut e qꞌuin, y ixin uyajcꞌon Unawalir tuaꞌ uchion canata que san tuaꞌ uyajcꞌon cacuerpo xeꞌ imbꞌutz bꞌan cocha cay uyareon.   
\p
\v 6 Y tamar era non ayan lo que war cacojco tamar y war canata que cocha turonto tama cacuerpo tara tor e rum que turonto najtir tut cacuerpo xeꞌ imbꞌutz xeꞌ tuaꞌ cachꞌami conda caxin caturuan taca Cawinquirar tichan tut e qꞌuin.  
\v 7 Pues non era war caxana tama ubꞌir e Dios tamar cacꞌupesiaj tamar jaxir, y machi war cachoqui cacꞌupesiaj tamar umen que machi war cawira ut jaxir tacar unaccoit.  
\v 8 Pero non war cacojcsan tamar era y qꞌuisinic cawacta cacuerpo tara tor e rum tuaꞌ caxin caturuan taca Cawinquirar tut e qꞌuin tichan.  
\v 9 Y tamar era war caturbꞌa cabꞌa tuaꞌ catzayjres Cawinquirar tama tunor lo que war cache motor que turon macuir cacuerpo tara tor e rum o motor que caxin tut e qꞌuin tuaꞌ caturuan tama cacuerpo xeꞌ imbꞌutz.  
\v 10 Porque tunoron ucꞌani tuaꞌ cacꞌotoy cawawan tut e Cristo watar e día tuaꞌ cachꞌami catuanibꞌir. Y inteꞌ intion ayan lo que aquetpa tuaꞌ cachꞌami tamar lo cay cache tama cacuerpo tara tor e rum jay imbꞌutz o jay matucꞌa ucꞌampibꞌir.   
\s1 E jiriar taca e Dios  
\p
\v 11 Y cocha non ubꞌan war cabꞌijnu que ucꞌani tuaꞌ cawawan tut Cawinquirar tuaꞌ cachꞌami uyeror ut tama tunor lo que cache tara tor e rum, war caturbꞌa cabꞌa tuaꞌ caware e gente axin tuaꞌ asutpobꞌ tut e Dios. Y Cadiosir war unata cocha turon y war incojco que nox ubꞌan war inata tama iwalma cocha turon.  
\v 12 Pues machi war cojron cocha era tuaꞌ catattzꞌi cabꞌa, sino que war cawajcꞌox tucꞌa tamar tuaꞌ itattzꞌion cora era y tuaꞌ inata tucꞌa tuaꞌ iware e gente tin e war utattzꞌi ubꞌobꞌ que galan ut uwirnarobꞌ y xeꞌ machi war ubꞌijnuobꞌ jay ayan ucꞌampibꞌir lo que ayan macuir uyalma inteꞌ.  
\v 13 Pues jay ayan tin e war ubꞌijnu que satrem tunor casasaꞌ, pues satrem ani casasaꞌ umen que war cosre tuaꞌ cache lo que ucꞌani Cadiosir. Y jay ayan tin e war ubꞌijnu que imbꞌutz tunor cajor, pues imbꞌutz turu cajor tuaꞌ uyubꞌion catacriox ixqꞌuecꞌo ixxana tama ubꞌir e Dios.  
\v 14 Pues umen que e Cristo war uyajta coit meyra uchion cabꞌijnu que, cocha ixin chamay tama tunor e gente tama tunor or e rum, que tamar era quetpa bꞌan cocha jay ixin chamayon ani tunoron tacar jaxir ubꞌan.  
\v 15 Y cocha ixin chamay jaxir tama tunoron, non xeꞌ turonto tara tor e rum machi ixto tuaꞌ taca cache lo que cacꞌani non, sino que ucꞌani tuaꞌ caxin cache lo que ucꞌani Cawinquirar xeꞌ ixin chamay tamaron y xeꞌ sutpa bꞌixcꞌa tuaꞌ utacrion.  
\v 16 Y tamar era machi ixto war cabꞌijnu tama inteꞌ winic jay imbꞌutz o jay majax imbꞌutz bꞌan cocha ubꞌijnuobꞌ e gente tara tor e rum. Pues non bꞌan ani cay cabꞌijnu tama e Cristo ubꞌan, bꞌan taca cocha ubꞌijnuobꞌ e winicobꞌ tara tor e rum. Pero machi ixto war cabꞌijnu cocha era tamar jaxir coner.  
\v 17 Y tamar era tunor tin e aquetpa intera taca e Cristo coner war aquetpa imbꞌutz tunor ucuxtar. Y lo que ayan ani tamar xeꞌ mabꞌambꞌan cꞌapa locꞌoy, y coner aquetpa imbꞌutz tunor.   
\p
\v 18 Pues tunor lo que war anumuy tama inteꞌ winic xeꞌ uche aquetpa intiach uwirnar war achena umen e Dios, porque jax jaxir xeꞌ cay cꞌumpa taca e winicobꞌ tuaꞌ uyajcꞌu ujiriar umen lo que cay uche e Cristo. Y nacpat era ixin uyajcꞌon capatnar tuaꞌ caware e gente que coner ayan e cꞌumpar taca e Dios.  
\v 19 Pues lo que war cawareox jax era: Que tama e Cristo Cadiosir war upejca tunor e gente tara tor e rum que jaxir cꞌumpa tacarobꞌ, y que jaxir machix war ucꞌajpes tunor e mabꞌambꞌanir lo que cay uchiobꞌ. Y tamar era e Dios ixin uyajcꞌon capatnar tuaꞌ cachecsu tut tunor e gente tara tor e rum que ayan ucꞌumpar e Dios coner.  
\v 20 Y tamar era non quetpon tuaꞌ cojron tacarox tama e Cristo bꞌan cocha jay e Dios war ani uchectes ubꞌa tiut tuaꞌ upejcox conda war cojron non. Y tamar era cꞌani cawareox tamar ucꞌabꞌa e Cristo que cꞌumpenic taca e Dios.  
\v 21 Pues e Cristo ma tiaꞌ ixin uche nien imbꞌijc e mabꞌambꞌanir, pero jaxir ixin chamay tamaron tuaꞌ taca utacrion conda ajcꞌuna umen e Dios tuaꞌ ucuchi axin tunor camabꞌambꞌanir, y uche cocha era tuaꞌ uyajcꞌon cocha tuaꞌ cachꞌami e corpesiaj tuaꞌ jaxir tuaꞌ uyubꞌion caquetpa erach bꞌan cocha ucꞌani e Dios.   
\c 6  
\p
\v 1 Pues entonces non era, cocha war capatna tacarox tama upatnar e Dios, cꞌani cawareox tuaꞌ machi iwacta bꞌan taca utacarsiaj e Dios lo que cay ichꞌami umen que cay cachecsu tunor era tiut.  
\v 2 Porque chꞌar tzꞌijbꞌabꞌir tama uyojroner e Dios tiaꞌ che que:  
\q1 Tama inteꞌ día conda cay acꞌajti tacaren, che e Dios, cay umbꞌi tunor lo que awaren,  
\q1 y tama e día conda cay impejquet tuaꞌ achꞌami e corpesiaj, cay intacriet, che e Dios.  
\m Bꞌan chꞌar tzꞌijbꞌabꞌir tama uyojroner e Dios. Pues coner jax e día conda Cadiosir cꞌani utacriox. Y coner jax e día conda ucꞌani tuaꞌ ichꞌami tunor e corpesiaj era.   
\p
\v 3 Entonces tunoron ucꞌani tuaꞌ cache cabꞌa tuaꞌ machi caqꞌuijnes nien inteꞌ y nien inteꞌ, porque tamar era machi tuaꞌ axin oꞌjronobꞌ upater lo que war cachecsu tamar e Cristo que majax imbꞌutz tunor era.  
\v 4 Y tamar era war cawirse cabꞌa tut tunor e gente axin que war cache lo que ucꞌani tama tunor bꞌan cocha ucꞌani tuaꞌ uche inteꞌ xeꞌ uman e Dios. Y tamar era cawacta anumuy bꞌan taca tunor lo que watar tama cajor, bꞌan cocha e cꞌuxner, o conda ma tzꞌacar lo que ucꞌani inteꞌ, o conda aquetpa intran tunor ticoit.  
\v 5 Y cawacta bꞌan taca conda ayan chi xeꞌ axin uwatzꞌion, o conda caqꞌuejcha axin tama e cárcel, o conda axin upucujcse ubꞌobꞌ e sian gente ticoit, o conda cꞌoyon umen que meyra patnon, o conda ma cocha uyubꞌion tuaꞌ cawayan, o conda canumse cabꞌa tama e winar.  
\v 6 Y war cawirse tunor lo que war cache tut e gente axin tuaꞌ unatobꞌ que erach cawirnar. Y war cachectes cabꞌa que erach cawirnar umen que war canata uyojroner e Dios, y umen que war caquetpa tzꞌustaca conda ayan tin e war uchion canumse cabꞌa, y umen que incꞌun cawirnar. Y war cawirse e gente axin que ayan Unawalir e Dios tacaron, y que majax majresiaj que war cayajta ut e gente axin ubꞌan.  
\v 7 Y war cawirse e gente axin que erach cawirnar umen que war cacansiobꞌ lo que erach, y umen que war cacꞌampes ucꞌotorer e Dios tamar cacanseyaj. Y cacuxtar xeꞌ erach war aquetpa bꞌan cocha inteꞌ arma xeꞌ acꞌampesna tama e tzꞌojyir, y bꞌan cocha era war cacorpes cabꞌa ubꞌan.  
\v 8 Y conda war cachecsu uyojroner e Dios tut e gente axin ayan tin e war utattzꞌion, pero ayan tin e intaca axin usubꞌajreson. Y ayan e gente xeꞌ uyareon que atzay uwiron, pero ayan tin e ucꞌayon ubꞌan. Y motor que non war caware ajtaca lo que erach iraj iraj, pero ayan e gente xeꞌ acay uyareon que non ajmajresiajon ubꞌan.  
\v 9 Y motor que non natanbꞌiron umen tunor e gente axin, pero ayan tin e che que: “¿Chi e Pablo? o ¿chi e Timoteo?” Y ayan tin e qꞌuix uchamsion, pero iranicto que non bꞌixironto. Y ayan e gente xeꞌ uwatzꞌion, pero machi uchamsion.  
\v 10 Y motor que tzajtaca ut cawirnar tamar lo que war canumse cabꞌa, pero non tama cawalma war catzay que war caxana tama ubꞌir e Dios. Y motor que ayan conda matucꞌa catumin, pero Cadiosir war ubꞌutꞌi cawalma axin tuaꞌ uyubꞌion catacre e gente axin. Y motor que ayan conda matucꞌa ayanon inyajrer, pero war cacojco cachꞌami tunor lo que ucꞌani tama Cadiosir.   
\p
\v 11 Entonces cawermanuox xeꞌ turox tama e chinam Corinto, cꞌani cawareox era que war capasi cabꞌa tiut tuaꞌ cawareox tunor lo que war cabꞌijnu y que pasar cawalma tiut ubꞌan.  
\v 12 Y non era matucꞌa war camuqui tiut, pero nox ayan ixto lo que war imuqui ticoit non.  
\v 13 Y tamar era cꞌani incꞌajti tacarox bꞌan cocha inteꞌ tatabꞌir xeꞌ war upejca umaxtac tuaꞌ ipasi ibꞌa ticoit tuaꞌ iwirsion tunor lo que ayan tamar bꞌan cocha cay cache non tiut.   
\s1 Non uyototon Cadiosir xeꞌ bꞌixir  
\p
\v 14 Pues entonces ira ibꞌijnu tuaꞌ inutꞌi ibꞌa taca inteꞌ xeꞌ machi war acꞌupseyan tama Cawinquirar. Porque ma cocha erer anutpa lo que erach tacar lo que mabꞌambꞌan, y machi uyubꞌi anutpa e janchꞌaquenar taca e incsibꞌaner.  
\v 15 Pues chequer que e Cristo ma erer unutꞌi ubꞌa taca e diablo, porque ma erer atzay uwirobꞌ ubꞌobꞌ. Y bꞌan ubꞌan tama inteꞌ xeꞌ war acꞌupseyan tama Cawinquirar, ma erer unutꞌi ubꞌa taca inteꞌ xeꞌ machi war acꞌupseyan tama Cawinquirar.  
\v 16 Y ma cocha erer unutꞌi ubꞌobꞌ inteꞌ chamen dios taca uyotot Catata Dios, pues jax non xeꞌ ajcꞌupesiajon tama e Cristo xeꞌ uyototon Cadiosir xeꞌ bꞌixir. Y tamar era non xeꞌ uyototon Cadiosir ma cocha erer canutꞌi cabꞌa taca inteꞌ chamen dios. Bꞌan cocha chꞌar tzꞌijbꞌabꞌir tama uyojroner e Dios tiaꞌ che:  
\q1 Nen tuaꞌ inturuan tama uyalmobꞌ tunor nimaxtac, che e Dios, y cꞌani inxana tacarobꞌ iraj iraj.  
\q1 Y nen tuaꞌ inquetpa Udiosirenobꞌ,  
\q1 y jaxirobꞌ tuaꞌ aquetpobꞌ nimaxtacobꞌ ubꞌan, che e Dios,  
\m Bꞌan chꞌar tzꞌijbꞌabꞌir tama uyojroner e Dios.  
\v 17 Y tamar era ojron Cawinquirar Dios otronyajr y che:  
\q1 Loqꞌuenic tujam e ajmabꞌambꞌanirobꞌ y ira iyose ibꞌa tacarobꞌ.  
\q1 Y ira ipijchꞌi lo que erer uchiox ixbꞌontzꞌa, porque jay ixixin ixobꞌian tama niwojroner era  
\q1 nen cꞌani inchꞌamiox, che e Dios.   
\q1
\v 18 Y nen tuaꞌ inquetpa Itaten,  
\q1 y nox tuaꞌ ixquetpa nimaxtacox.  
\m Bꞌan che Cawinquirar Dios xeꞌ nojta ucꞌotorer.   
\c 7  
\p
\v 1 Pues entonces cawermanuox xeꞌ inchoj iut camener, jax era lo que Cadiosir uyareon tama uyojroner, y jaxir san tuaꞌ acꞌapa uche tunor era bꞌan taca cocha uyareon. Y tamar era non ucꞌani tuaꞌ cawacta tunor e mabꞌambꞌanir y tunor lo que erer uchion abꞌontzꞌa tama cacuerpo o tama cawalma, y ucꞌani tuaꞌ caturbꞌa cabꞌa tuaꞌ caquetpa erach tunor cabꞌa tuaꞌ aquetpa chequer que war cabꞌacre e Dios.   
\s1 Sutpa tzay e Pablo conda cay unata que obꞌianobꞌ e ajcꞌupesiajobꞌ xeꞌ turobꞌ tama e chinam Corinto  
\p
\v 2 Entonces pasic iwalma tuaꞌ ixtzay iwiron otronyajr era. Porque mamajchi catijres, y mamajchi upater war cojron, y mamajchi war camajres.  
\v 3 Pues machi war inwareox cocha era tuaꞌ incꞌayox, porque bꞌan cocha cay inwareox ixnix y bꞌan cꞌani inwareox otronyajr era que nox turox tama niwalma, y war inyajta iut conda warto inturuan tacarox tara tor e rum, y inxin inyajta iut motor jay ucꞌani ani tuaꞌ inchamay tamarox ubꞌan.  
\v 4 Pero nen meyra war incojco tamarox, y war intzay inware e inmojr ajcꞌupesiajobꞌ axin tunor lo que war iche era. Y motor que ayan lo que war innumse nibꞌa tamar, pero machi war imbꞌijnu tuaꞌ inwacta, sino que war intzay meyra tama niwalma, y war intzay inche tunor upatnar Cadiosir.   
\p
\v 5 Pues cꞌani cawareox que conda cꞌotoyon tara tama e departamento Macedonia machi catajwi cocha tuaꞌ cajiri, porque tic taca tiaꞌ ixion ayan e sian qꞌuijnar. Y war coybꞌi e sian qꞌuecraner tic taca este que cay bꞌacton tama cawalma.  
\v 6 Pero Cadiosir xeꞌ unata ucꞌunles uyalmobꞌ tunor tin e tzajtaca utobꞌ, cay ucꞌunles cawalma taca ucꞌoter cawermano Tito.  
\v 7 Y tzayon meyra conda cꞌotoy cawermano Tito. Pero majax jax taca umen ucꞌoter que tzayon, sino que más meyra tzayon conda cay uyareon cobꞌa cꞌunlesna uyalma imener conda turuan tacarox. Y más meyra cay tzayon conda coybꞌi que nox war iyusre iwiron otronyajr, y que coner tzajtaca iut cora umen e mabꞌambꞌanir lo que cay inumse ibꞌa tamar, y que war iyusre icꞌupse niwojroner lo que cay inwareox tama inteꞌ carta xeꞌ inwebꞌta ixin tibꞌa. Y tama tunor era war intzay esto coner.   
\p
\v 8 Pues motor que cay inchiox cꞌuxun iwalma umen lo que cay intzꞌijbꞌa tama inteꞌ carta, pero bueno que inwebꞌta ixin e carta yax tibꞌa ubꞌan. Pero machi ani incꞌani tuaꞌ inchiox acꞌuxun iwalma tamar lo que cay inwareox tama e carta, pero chꞌajbꞌex e Dios que sisa tunor era coner.  
\v 9 Y tamar era war intzay coner, pero majax umen que quetpox war acꞌuxun iwalma, sino umen que cay iyustes ibꞌa tuaꞌ iwacta tunor e mabꞌambꞌanir lo que war ani iche. Pero chequer que nox cay iwacta numuy bꞌan taca e sian cꞌuxner era y que tamar era ixiox itzayjres Cadiosir cocha cay iyustes ibꞌa wacchetaca. Y tamar era chequer que machi ixto war acꞌuxun iwalma umen lo que cay intzꞌijbꞌa tama e carta.  
\v 10 Pues tin e axin uyacta anumuy bꞌan taca inteꞌ cꞌuxner tama uyalma cocha era axin utzayjres e Dios jay axin uyustes ubꞌa tuaꞌ uyacta e mabꞌambꞌanir lo que war uche era. Y tamar era machi tuaꞌ caquetpa tzajtaca coit tamar lo que cay unumse ubꞌa inteꞌ porque jaxir axin acorpesna. Pero tin e aquetpa tzajtaca ut bꞌan taca cocha uchiobꞌ e gente tara tor e rum y machi uyustes ubꞌa, cꞌani asatpa tamar.  
\v 11 Pues iranic cobꞌa cꞌampesna e cꞌuxner era umen e Dios, porque nox cay icꞌupse niwojroner y tamar era cay iyustes ibꞌa wacchetaca. Y cay ichecsu ibꞌa taniut tama tunor lo que numuy tuaꞌ iwaren que majax nox xeꞌ war iche tunor era, y ayan ani conda cay qꞌuijnox, y ayan ani conda cay bꞌactox. De allí cay iyusre iwiren otronyajr y tuaꞌ iturbꞌa tama e disciplina e hermano xeꞌ war ani aturuan taca uwixcar utata tuaꞌ utoyi lo que cay uche. Pero tama tunor era cay ichectes ibꞌa que matucꞌa war iche nox, sino que jax taca inteꞌ hermano xeꞌ cay uche e mabꞌambꞌanir era.  
\v 12 Pues conda cay intzꞌijbꞌa inteꞌ carta tibꞌa machi war imbꞌijnu tamar e winic xeꞌ cay uche e mabꞌambꞌanir y nien machi war imbꞌijnu tamar tin e chena tacar. Sino que war ani imbꞌijnu tuaꞌ intacriox iwira cobꞌa war icꞌanion tut e Dios.  
\v 13 Y tamar era non war catzay y cꞌunlesna cawalma imener.  
\p Pues entonces ayanto más tzayer tujor lo que cay cachꞌami tibꞌa era y jax conda coybꞌi que war atzay meyra e hermano Tito. Y nox ayan meyra lo que cay iche tuaꞌ itacre achecta e jiriar tama uyalma.  
\v 14 Pues non cay catattzꞌiox cora tut e hermano Tito que nox buena genteox conda ne mato ixin jaxir tuaꞌ uwarajsiox, y non ma erer casubꞌajra tamar lo que cay caware era porque bꞌanox. Y bꞌan cocha erach tunor lo que cawareox y bꞌan ubꞌan lo que cay caware e hermano Tito tamarox, y jaxir atzay meyra conda uwirox umen que conda cꞌotoy, cay uwira que bꞌan cocha caware tamarox y bꞌanox ubꞌan.  
\v 15 Y tamar era jaxir war uyajta iut tunorox porque conda jaxir axin ubꞌijnu tama e tiempo conda turu tacarox conda quetpa tuaꞌ uyareox lo que inwebꞌta ixin tuaꞌ uchecsu tiut, nox cay cꞌupseyanox tut. Y nox cay bꞌactox tut jaxir y cay ichꞌami y cay itattzꞌi bꞌan cocha jay jax ani nen.  
\v 16 Y tamar era nen war intzay tamarox que erer ixto incojco tamarox.   
\c 8  
\s1 Cawajcꞌuic cawofrenda taca e tzayer  
\p
\v 1 Pues entonces niwermanuox, cꞌani cawareox era lo que cay numuy tama e sian grupo ajcꞌupesiajobꞌ xeꞌ turobꞌ tama e departamento Macedonia. Pues cay checta meyra utacarsiaj e Dios tamarobꞌ este que cay ulocsiobꞌ utuminobꞌ lo que qꞌuecher umenerobꞌ tuaꞌ utacriobꞌ e ajcꞌupesiajobꞌ tama e departamento Judea.  
\v 2 Y motor que e ajcꞌupesiajobꞌ era ayan meyra lo que cay unumse ubꞌobꞌ tamar pero war atzayobꞌ meyra tama Cawinquirar. Y motor que imbꞌijc taca lo que ayan tuobꞌ pero umen que war atzayobꞌ meyra cay uyajcꞌuobꞌ meyra tama e ofrenda bꞌan cocha jay meyra ayan ani utumin.  
\v 3 Y nen era ajchecsuyajen tamar e ajcꞌupesiajobꞌ era que jaxirobꞌ cay uyajcꞌuobꞌ taca tunor uyalmobꞌ tunor lo que uyubꞌi uchiobꞌ tama e ofrenda y de allí cay asutpa uyajcꞌuobꞌ más ubꞌan.  
\v 4 Y cay ucꞌajtiobꞌ meyra tacaron tuaꞌ cawacta utacriobꞌ tama e ofrenda lo que war cachꞌami tuaꞌ cawebꞌta axin tuaꞌ catacre umaxtacobꞌ e Dios xeꞌ turobꞌ tama e departamento Judea.  
\v 5 Pero jaxirobꞌ cay uchiobꞌ meyra tujor lo que war cabꞌijnu que uyubꞌi uchiobꞌ, y tamar era cay uturbꞌa ubꞌobꞌ tamar Cawinquirar, y de allí sutpa uturbꞌa ubꞌobꞌ tamaron non ubꞌan bꞌan cocha ucꞌani Cadiosir.  
\v 6 Y tamar era cay incꞌajti tuaꞌ e hermano Tito xeꞌ jax xeꞌ cay uchꞌami tunor e nuxi ofrenda era tibꞌa ambꞌi tuaꞌ asutpa ucꞌajti tibꞌa tuaꞌ itacre otronyajr era tamar e tacarsiaj lo que cꞌani cawebꞌta axin tama e ajcꞌupesiajobꞌ xeꞌ tzajtaca utobꞌ tama e departamento Judea.  
\v 7 Pues nox era war ixqꞌuecꞌo meyra tacar utacarsiaj Unawalir e Dios, y tacar utacarsiaj era war ixcꞌupseyan nojta tama e Dios, y war ixcꞌampesna umen e Dios tuaꞌ ichecsu uyojroner axin, y Cadiosir war uwirsiox meyra lo que war aquetpa mucur tut e inmojr, y war ixtzay ibꞌijnu iche tunor upatnar e Dios, y war ichecsu ibꞌa que war iyajta coit bꞌan cocha cay cacansiox iche. Y tamar era chequer que cꞌani ixixin iche lo que ucꞌani tama tunor e ofrenda era ubꞌan.   
\p
\v 8 Pues nen machi war inwareox tucꞌa ucꞌani tuaꞌ iche. Ajtaca cꞌani inwareox era cobꞌa tzayer ayan tuaꞌ e ajcꞌupesiajobꞌ tama e departamento Macedonia conda cay uyajcꞌuobꞌ e ofrenda era, y tamar era jay nox ixixin ixtzay meyra ubꞌan conda iwajcꞌu e ofrenda, erer innata que erach que war iyajta utobꞌ e ajcꞌupesiajobꞌ xeꞌ tzajtaca utobꞌ.  
\v 9 Y nox war inata cobꞌa utacarsiaj Cawinquirar Jesucristo y que motor que jaxir ayan meyra lo que ayan tuaꞌ conda turuto tichan taca Catata Dios conda ne mato ayopa tara tor e rum tuaꞌ acuxpa, pero que conda turuan tara tor e rum sutpa tzajtaca ut tuaꞌ uwirsion utacarsiaj. Y bꞌan uche tuaꞌ uchion casutpa rico umen que jaxir quetpa tzajtaca ut conda turu tara tor e rum.   
\p
\v 10 Pues nox era ucꞌani tuaꞌ iyubꞌi lo que nen war imbꞌijnu tama tunor e ofrenda era. Pues jax nox xeꞌ cay iwajcꞌu bꞌajxan e ofrenda era ambꞌi, y majax jax taca bꞌajxan tuaꞌ iwajcꞌu pero cay iche tunor era umen que nox war icꞌani iwajcꞌu.  
\v 11 Y cocha nox cay tzayox iwajcꞌu e ofrenda ambꞌi y era cꞌani cawira jay warto icꞌani tuaꞌ ixsutpa iwajcꞌu otronyajr. Pero ajcꞌunic inteꞌ intiox bꞌan taca cocha uyubꞌiox tamar lo que ayan tibꞌa.  
\v 12 Porque jay inteꞌ hermano cꞌani uyajcꞌu e ofrenda tamar lo que ayan tuaꞌ, Cadiosir atzay uchꞌami lo que war uyajcꞌu era. Pero Cadiosir machi war ucojco uchꞌami ticabꞌa lo que matucꞌa.   
\p
\v 13 Y machi war inwareox que nox ucꞌani tuaꞌ inumse ibꞌa tama e winar umen que war itacre e inmojr era, y machi war inwareox que tin e war itacre era axin ani aquetpa meyra lo que ayan tuobꞌ umen que nox war inumse ibꞌa tama inecesidad.  
\v 14 Machi. Lo que war inwareox jax era: Que bueno ani tuaꞌ ixquetpa lar tama tunor, y tamar era nox ayan lo que ayanox coner tuaꞌ uyubꞌiox itacriobꞌ tamar unecesidobꞌ. Pero bꞌajcꞌat watar e día conda nox acay inumse ibꞌa tama inecesidad y jaxirobꞌ ayan meyra tuobꞌ tama e tiempo yajaꞌ, entonces jaxirobꞌ erer axin utacriox otronyajr. Pues tamar era erer aquetpa lar lo que ayan tibꞌa tacar lo que ayan tuobꞌ.  
\v 15 Bꞌan cocha chꞌar tzꞌijbꞌabꞌir tama uyojroner e Dios que: “Tin e ixin umorojse meyra maná matucꞌa quetpa tuaꞌ conda cꞌapa weꞌ. Y tin e ixin umorojse imbꞌijc taca e maná ixin tzꞌacta lo que umorojse tuaꞌ ucꞌuxi.” Bꞌan chꞌar tzꞌijbꞌabꞌir tama uyojroner e Dios.   
\s1 Inteꞌ ojroner tama e Tito y cora hermanuobꞌ  
\p
\v 16 Pues entonces cꞌani intattzꞌi ucꞌabꞌa e Dios tama e hermano Tito que jaxir turbꞌana tama uyalma umen e Dios tuaꞌ uyusre ucojcox bꞌan cocha war unsre inche nen ubꞌan.  
\v 17 Y tamar era jaxir atzay conda cay inware tuaꞌ axin uwarajsiox otronyajr era, pero coner war imbꞌijnu que ixin ani otronyajr tuaꞌ uwarajsiox motor que nen machi ani inware tuaꞌ axin, porque jaxir chequer que war uyusre uwirox otronyajr era.   
\p
\v 18 Y taca e hermano Tito era war cawebꞌta axin otronteꞌ hermano xeꞌ cꞌajna umen tunor e grupo ajcꞌupesiajobꞌ tama tunor or e lugar era umen que jaxir war apatna meyra tuaꞌ utacre alocꞌoy uchequerir uyojroner e Dios tama e corpesiaj.  
\v 19 Y majax jax taca era sino que jaxir sicbꞌabꞌir ubꞌan umen tunor e grupo ajcꞌupesiajobꞌ tuaꞌ axin axana tacaron tuaꞌ utacrion caqꞌueche axin e ofrenda tut e ajcꞌupesiajobꞌ xeꞌ turobꞌ tama e departamento Judea. Y bꞌan war cache tuaꞌ catattzꞌi ucꞌabꞌa Cawinquirar y tuaꞌ achecsuna tut e ajcꞌupesiajobꞌ yajaꞌ que non war catzay cabꞌijnu catacriobꞌ.  
\v 20 Pues non era war caturbꞌa cabꞌa tuaꞌ cacojco tunor e ofrenda era tuaꞌ machi ubꞌijnu nien inteꞌ jay ayan ani chi xeꞌ war uchꞌami mucur e tumin era. Y jax tamar era que ayan cora ajcꞌupesiajobꞌ xeꞌ war axanobꞌ tacaren tuaꞌ uwirobꞌ tama e ofrenda era.  
\v 21 Pues non war cacꞌani tuaꞌ alocꞌoy erach tunor lo que war cache tuaꞌ aquetpa imbꞌutz tunor era tut Cawinquirar y tuaꞌ aquetpa imbꞌutz tunor era tut e winicobꞌ ubꞌan.   
\p
\v 22 Y tamar era war cawebꞌta axin otronteꞌ ajcꞌupesiaj ubꞌan xeꞌ cay uwirse ubꞌa que war atzay meyra uche lo que ucꞌani Cadiosir, y warto atzay coner ubꞌan tuaꞌ uche e xambꞌar era cocha cay inware cobꞌa tuaꞌ ixixin itacre tama e ofrenda.  
\v 23 Y jay ayan chi xeꞌ axin uyubꞌi tibꞌa chi e hermano Tito, pues arenicobꞌ que jaxir jax inteꞌ nipiar y que jaxir apatna tacaren y que coner war acꞌotoy tiut tuaꞌ utacriox. Y jay ayan chi xeꞌ axin uyubꞌi tibꞌa tamar e inmojr hermanuobꞌ era arenicobꞌ que jaxirobꞌ ebꞌetbꞌirobꞌ umen cora grupo ajcꞌupesiajobꞌ y que jaxirobꞌ war utattzꞌiobꞌ ucꞌabꞌa e Cristo axin.  
\v 24 Pues quisinic era que nox ixixin iwirse e ajcꞌupesiajobꞌ era que war ixto iyajta utobꞌ, y quisinic que nox ixixin iwirse ubꞌan que erach lo que cay inware cora grupo ajcꞌupesiajobꞌ ixin conda cay intattzꞌiox que nox tuaꞌ ixixin icojcobꞌ tama tunor.   
\c 9  
\s1 E ofrenda lo que tuaꞌ utacre e ajcꞌupesiajobꞌ tama  
\s2 Cawinquirar xeꞌ turobꞌ tama e departamento Judea  
\p
\v 1 Pues tamar e ofrenda lo que war cachꞌami tuaꞌ catacre e ajcꞌupesiajobꞌ tama Cawinquirar xeꞌ turobꞌ tama e departamento Judea, machi ani ucꞌani tuaꞌ intzꞌijbꞌa más tibꞌa, cocha warix inata tama tunor era.  
\v 2 Porque warix innata tamarox que warix ibꞌijnu tuaꞌ itacre tama e ofrenda era, y tamar era cay intattzꞌiox tut e ajcꞌupesiajobꞌ xeꞌ turobꞌ tama e departamento Macedonia que nox xeꞌ turox tama e departamento Acaya turix tuaꞌ itacre tama e ofrenda era desde ambꞌi. Y tamar era meyra ajcꞌupesiajobꞌ tama e departamento Macedonia cay tzayobꞌ ubꞌijnuobꞌ tuaꞌ utacriobꞌ tama e ofrenda era ubꞌan.  
\v 3 Pero war inwebꞌta axin e Tito taca cora ajcꞌupesiajobꞌ tibꞌa tuaꞌ machi insutpa ajmajresiajen tamar lo que cay inware e ajcꞌupesiajobꞌ era tamarox. Porque ucꞌani tuaꞌ aquetpa ustabꞌir tunor iwofrenda conda incꞌotoy bꞌan cocha cay inware e ajcꞌupesiajobꞌ era.  
\v 4 Pero jay majax ani turix tunor iwofrenda conda acꞌotoyobꞌ e ajcꞌupesiajobꞌ tuaꞌ e departamento Macedonia, entonces non tuaꞌ caxin casubꞌajra meyra cocha cay cacojco meyra tamarox. Y machi war cojron tamar e subꞌar lo que nox tuaꞌ ani inumse ibꞌa tamar ubꞌan.  
\v 5 Y tamar era nen cay imbꞌijnu que imbꞌutz tuaꞌ inwebꞌta axin e Tito taca cora ajcꞌupesiajobꞌ tuaꞌ utacriox iyustes tunor e ofrenda lo que cay iwareon ambꞌi que cꞌani iche. Y tamar era erer aquetpa turix tunor e ofrenda conda non caxin cacꞌotoy, y erer aquetpa chequer tut tunor e ajcꞌupesiajobꞌ que nox war iwajcꞌu e ofrenda umen que bꞌan war icꞌani y majax umen que nen war ani inwareox que bꞌan ucꞌani tuaꞌ iche.   
\p
\v 6 Entonces cꞌaric imener tamar era: Que tin e axin upaqꞌui imbꞌijc, pues imbꞌijc taca tuaꞌ uchꞌami tamar ubꞌan. Pero tin e axin upaqꞌui meyra, cꞌani axin uchꞌami meyra tamar ubꞌan.  
\v 7 Pero inteꞌ intion ucꞌani tuaꞌ caxin cawajcꞌu e ofrenda bꞌan cocha cabꞌijnu tama cawalma, porque machi tuaꞌ cawajcꞌu umen taca que ayan tin e war uyareon que bꞌan ucꞌani tuaꞌ cache. Pero ucꞌani tuaꞌ cawajcꞌu taca tunor cawalma, porque Cadiosir uyajta ut tin e war atzay uyajcꞌu uyofrenda.  
\v 8 Porque Cadiosir uyubꞌi uyajcꞌon meyra tacarsiaj tama tunor lo que ucꞌani inteꞌ tuaꞌ atzꞌacta tunor lo que ucꞌani tama uyotot, y tuaꞌ atzꞌacta ubꞌan tuaꞌ utacre e inmojr tin e matucꞌa ayan.  
\v 9 Bꞌan cocha chꞌar tzꞌijbꞌabꞌir tama uyojroner e Dios tiaꞌ che:  
\q1 Tin e erach uwirnar axin uyajcꞌu meyra tin e tzajtaca ut,  
\q1 y lo que uche xeꞌ imbꞌutz era machi tuaꞌ acꞌapa utuanibꞌir tut e Dios.  
\m Bꞌan chꞌar tzꞌijbꞌabꞌir tama uyojroner e Dios.  
\v 10 Pues jax Cadiosir xeꞌ war uyajcꞌu tunor ut e semilla tin e tuaꞌ apacma, y jax ubꞌan xeꞌ war uyajcꞌu e comida lo que tuaꞌ ucꞌuxi inteꞌ. Y jax Cadiosir era ubꞌan xeꞌ tuaꞌ axin uyajcꞌon tunor e tumin lo que ucꞌani tuaꞌ uyubꞌion cawajcꞌu e ofrenda bꞌan cocha jay ut e semilla era ani. Y jaxir tuaꞌ axin uchꞌijrse tunor cawofrenda era bꞌan cocha jay jax ani cajinaj. Y jaxir tuaꞌ axin utoyon meyra ubꞌan tama tunor lo que caxin cache xeꞌ imbꞌutz bꞌan cocha jay jax ani lo que war cachꞌami tama tunor lo que war capaqꞌui.  
\v 11 Y Cadiosir tuaꞌ uche achecta meyra lo que ayan ticabꞌa y tamar era uyubꞌion cawajcꞌu meyra tama e ofrenda. Y de allí umen que nox war iwajcꞌu e ofrenda era y war iwebꞌta axin, nox war iche que tin e war uchꞌamiobꞌ e ofrenda axin uyajcꞌuobꞌ meyra tattzꞌarsiaj e Dios tama tunor era.  
\v 12 Pero conda war cawajcꞌu inteꞌ ofrenda cocha era majax jax taca war catacre e ajcꞌupesiajobꞌ tamar lo que ucꞌani, sino que ayan ucꞌampibꞌir ubꞌan porque war cache utattzꞌiobꞌ e Dios meyra tamar lo que war cache era.  
\v 13 Pues tin e war uchꞌamiobꞌ e ofrenda era cꞌani axin utattzꞌiobꞌ ucꞌabꞌa e Dios, y tunor e ofrenda tuaꞌ uchectes tutobꞌ que nox war ixcꞌupseyan tut tunor uyojroner e Cristo. Y jaxirobꞌ tuaꞌ axin utattzꞌiobꞌ ucꞌabꞌa e Dios tamarox umen que cay iwajcꞌu meyra tama e ofrenda lo que war iwajcꞌuobꞌ y lo que war iwajcꞌu tunor e ajcꞌupesiajobꞌ axin tin e ayan unecesidad.  
\v 14 Y tamar era e ajcꞌupesiajobꞌ era xeꞌ cay tacarnobꞌ imener cꞌani axin ucꞌajti taca Dios tuaꞌ ixtacarna umener y axin uyajta iut meyra umen e nuxi tacarsiaj lo que Cadiosir ixin uchectes tamarox era.  
\v 15 ¡Catattzꞌic ucꞌabꞌa Cadiosir tama e nuxi tacarsiaj lo que ixin uyajcꞌon que machi uyubꞌion cabꞌisi porque nojta meyra tama tunor!   
\c 10  
\s1 Ucꞌotorer e Dios xeꞌ ayan tama e Pablo umen que aquetpa inteꞌ apóstol  
\p
\v 1 Pues entonces nen xeꞌ Pabloen ayan lo que cꞌani inwareox era, pero cꞌani inturbꞌa nibꞌa bꞌan cocha e Cristo xeꞌ umanxujres ubꞌa y xeꞌ incꞌun uwirnar tuaꞌ onjron tacarox era. Pues ayan tin e tijam xeꞌ war oꞌjron nipater que insubꞌajra conda turen tijam tuaꞌ onjron, pero que conda innajt turen tiut inxin inqꞌuecꞌo tama niwojroner lo que intzꞌijbꞌa tama inteꞌ carta tibꞌa. Bꞌan cocha era war oꞌjron cora winicobꞌ nipater.  
\v 2 Y tamar era cꞌani incꞌajti tibꞌa era tuaꞌ machi ichien aqꞌuecꞌo tunor niwojroner conda incꞌotoy tiut otronyajr porque erer inata que erer ixto aqꞌuecꞌo niwojroner jay bꞌan ucꞌani. Porque tin e war oꞌjronobꞌ capater que non war cache tunor capatnar bꞌan taca cocha inteꞌ winic tara tor e rum, pues jay machi cꞌani uyustes ubꞌobꞌ e winicobꞌ era entonces nen ucꞌani tuaꞌ aqꞌuecꞌo niwojroner tuaꞌ onjron tacarobꞌ conda incꞌotoy.  
\v 3 Pero non motor que winicon tara tor e rum pero machi catzꞌojyi bꞌan cocha uchiobꞌ e winicobꞌ tara tor e rum.  
\v 4 Porque bꞌan cocha inteꞌ soldado tara tor e rum xeꞌ axin ucꞌampes lo que qꞌuecher umener tuaꞌ ucucru tin e war aqꞌuijna uwira, non ubꞌan ayan lo que qꞌuecher camener xeꞌ war cacꞌampes tuaꞌ cache upatnar e Dios xeꞌ jax ucꞌotorer e Dios. Pero machi cacꞌampes e arma era bꞌan cocha acꞌampesna umen inteꞌ soldado tara tor e rum. Y tamar era conda non ucꞌani tuaꞌ catzꞌojyi cacꞌampes ucꞌotorer e Dios, y bꞌan cacꞌampes tuaꞌ cacucru tunor ucꞌotorer e Satanás y tuaꞌ cacucru tunor e mabꞌambꞌan bꞌijnusiaj tuaꞌ e gente bꞌan ani cocha e soldadobꞌ xeꞌ axin ucucruobꞌ inteꞌ cuartel o inteꞌ otot xeꞌ más aqꞌuecꞌo xeꞌ tuaꞌ e gente xeꞌ war aqꞌuijna uwirobꞌ.  
\v 5 Y tacar ucꞌotorer e Dios caxin catijres tunor e canseyaj lo que matucꞌa ucꞌampibꞌir y tunor e canseyaj lo que war uquete uwabꞌu uyojroner e Dios. Y tacar ucꞌotorer e Dios caxin casuti tunor ubꞌijnusiajobꞌ tin e machi war obꞌianobꞌ tut e Dios tuaꞌ aquetpobꞌ ajcꞌupesiajobꞌ tut e Cristo.  
\v 6 Y cꞌani cawareox era que conda acꞌapa iyustes ibꞌa ticoit y tut e Dios tuaꞌ isutpa ixcꞌupseyan tut cawojroner otronyajr, entonces turix tuaꞌ caturbꞌa tama e disciplina tunor tin e machi cꞌani acꞌupseyanobꞌ tut cawojroner y tut uyojroner Cadiosir.   
\p
\v 7 Pues nox ayan lo que war icojco porque war iturbꞌa ibꞌa tamar taca lo que iwira tama inteꞌ, y machi war ibꞌijnu jay ayan lo que ayan tama uyalma. Pero jay ayan tin e war ubꞌijnu que jaxir tuaꞌ e Cristo entonces ucꞌani tuaꞌ ubꞌijnu otronyajr era tuaꞌ acꞌotoy uwira que non ubꞌan tuon e Cristo.  
\v 8 Y jay nen era inxin intattzꞌi nibꞌa tiut que nen meyra ayan nicꞌotorer pues machi tuaꞌ insubꞌajra inche, porque ajcꞌunen tunor era umen Cawinquirar tuaꞌ uyubꞌien intacriox ixqꞌuecꞌo ixxana tama ubꞌir e Dios, majax tuaꞌ intijresox tamar.  
\v 9 Porque machi incꞌani tuaꞌ ibꞌijnu jay nen war ani inturbꞌa nibꞌa tuaꞌ imbꞌajcꞌusiox tamar cora ojroner xeꞌ inwebꞌta tibꞌa más bꞌajxan, porque majax bꞌan.  
\v 10 Pues ayan inteꞌ ojroner xeꞌ war axin era xeꞌ che: “Conda e Pablo utzꞌijbꞌa inteꞌ carta ticabꞌa imbꞌar tunor uyojroner, pero conda jaxir turu tacaron tzajtaca ut uwirnar y subꞌar uwirnar conda oꞌjron.” Bꞌan che inteꞌ ojroner nipater xeꞌ war umbꞌi era.  
\v 11 Pero tin e war oꞌjron capater cocha era ucꞌani tuaꞌ ubꞌijnu que bꞌan cocha aqꞌuecꞌo cawojroner conda catzꞌijbꞌa tama inteꞌ carta conda turon najtir tiut, y bꞌan ubꞌan tuaꞌ caqꞌuecꞌo cache lo que ucꞌani conda cacꞌotoy tiaꞌ turox.   
\p
\v 12 Y coybꞌi inteꞌ ojroner que ayan cora winicobꞌ xeꞌ war acꞌotoyobꞌ tiut xeꞌ war utattzꞌi ubꞌobꞌ jaxobꞌ taca que jaxirobꞌ apostolobꞌ y que jaxirobꞌ nojta ucꞌampibꞌirobꞌ. Pero non ma tiaꞌ tuaꞌ caxin canutꞌi cabꞌa tacarobꞌ porque jaxirobꞌ war uchiobꞌ lo que machi ani tuaꞌ uchiobꞌ. Pues jaxirobꞌ war unutꞌi ubꞌobꞌ jaxobꞌ taca, y tamar era machi war ubꞌijnuobꞌ jay aquetpa imbꞌutz tunor era tut e Dios sino que ajtaca uchiobꞌ lo que oꞌchoy tama ujorobꞌ.  
\v 13 Pero non machi cꞌani catattzꞌi cabꞌa tamar lo que machi ajcꞌunon umen e Dios, sino que cꞌani cawareox tamar taca lo que uyajcꞌon Cadiosir tuaꞌ cache. Porque jax Cadiosir xeꞌ ixin uyajcꞌon cacꞌampibꞌir tuaꞌ cache capatnar era, y jax jaxir xeꞌ uyareon tiaꞌ tuaꞌ caxin capatna. Y tamar era cꞌotoyon tuaꞌ cachecsu uyojroner e Dios tama e corpesiaj esto tiaꞌ turox ubꞌan tama e chinam Corinto.  
\v 14 Porque cꞌotoyon tiut tuaꞌ cachecsu uyojroner e Dios majax umen que bꞌan taca ochoy ticajor tuaꞌ cache, sino que cꞌotoyon tiut umen que bꞌan arobꞌnon umen e Dios tuaꞌ cache. Y tamar era ererto cacꞌotoy tiut otronyajrto era cocha jax non xeꞌ cꞌotoyon bꞌajxan tuaꞌ cachecsu uyojroner e Dios tama e Cristo tijam nox.  
\v 15 Pero non ma tiaꞌ caxin caware que ticabꞌach inteꞌ patnar tuaꞌ e Dios jay jax otronteꞌ xeꞌ cꞌotoy bꞌajxan tuaꞌ ucajyes tunor e patnar era. Pero coner war cacojco que axin achꞌiꞌ más tunor icꞌupesiaj tama Cawinquirar y que tamar era erer ixcꞌotoy iwira cobꞌa cacꞌampibꞌir lo que ajcꞌunon umen e Dios tuaꞌ catacriox y que tamar era que non uyubꞌion capatna más nojta tijam nox ubꞌan.  
\v 16 Y de allí cꞌani caxin cachecsu uyojroner e Dios tama e corpesiaj tama e lugar más innajt tiaꞌ turox, pero machi cꞌani caxin capatna tujor upatnar otronteꞌ tuaꞌ machi caxin cabꞌijnu jay nuxi patnar lo que war cache.   
\p
\v 17 Pues bꞌan cocha chꞌar tzꞌijbꞌabꞌir tama uyojroner e Dios y che: “Jay ayan tin e cꞌani axin utattzꞌi ubꞌa jax taca, más ani bueno tuaꞌ utattzꞌi ucꞌabꞌa Cawinquirar tamar lo que chena umener.” Bꞌan chꞌar tzꞌijbꞌabꞌir tama uyojroner e Dios.  
\v 18 Porque aquetpa imbꞌutz inteꞌ winic jay bꞌan war ubꞌijnu Cawinquirar. Pero jay inteꞌ winic axin utattzꞌi ubꞌa que jaxir meyra ayan ucꞌampibꞌir, entonces matucꞌa ucꞌampibꞌir lo que war uche era.   
\c 11  
\s1 ¿Tucꞌa tuaꞌ war icꞌupse lo que majax erach tuaꞌ asutpa ixejbꞌe ut lo que erach?  
\p
\v 1 Pues cꞌani inwareox era cora ojroner que bꞌajcꞌat cꞌani ibꞌijnu que matucꞌa ucꞌampibꞌir, y tamar era quisinic que intaca iyubꞌi tzꞌustaca lo que cꞌani inwareox era. Pues cꞌani intattzꞌi nibꞌa cora era.  
\v 2 Pues nen war imbꞌijnu tamarox bꞌan cocha ubꞌijnu Cadiosir. Porque nen bꞌanen cocha inteꞌ tatabꞌir y tunorox larox cocha inteꞌ chꞌom ijchꞌoc tanibꞌa, y tamar era nox quetpoxix ajcꞌubꞌir nimener tuaꞌ ixnujbꞌi taca e Cristo.  
\v 3 Pero nen war imbꞌacta que bꞌajcꞌat ixquetpa bꞌan cocha inteꞌ ijchꞌoc xeꞌ aquetpa majresbꞌir umen inteꞌ winic, bꞌan cocha cay unumse ubꞌa e Eva xeꞌ jax e bꞌajxan ixic xeꞌ majresna umen e chan xeꞌ jax e Satanás tuaꞌ uche e mabꞌambꞌanir este que satpa. Y bꞌan war imbꞌacta tamarox que bꞌajcꞌat ixixin ixnajtran tama ibꞌijnusiaj tut ubꞌir e Cristo umen que war iyubꞌi meyra canseyaj que majax bꞌan cocha ucꞌani e Dios.  
\v 4 Porque nox war iwacta ibꞌa tuaꞌ ixcansena umen tuqꞌuic tuqꞌuic winic xeꞌ acꞌotoy tiut motor que axin uchecsu intex canseyaj tama e Jesús que majax bꞌan cocha cay cachecsu non. Y nox matucꞌa iware motor que axin uchecsu tiut que ucꞌani tuaꞌ ichꞌami inteꞌ mein xeꞌ mabꞌambꞌan bꞌan cocha jay jax ani Unawalir e Dios xeꞌ majax bꞌan cocha cay cacansiox non. Y war iwacta bꞌan taca motor que axin uchecsu tiut intex ojroner tama e corpesiaj xeꞌ majax bꞌan cocha cay cacansiox tuaꞌ ichꞌami bꞌajxan.  
\v 5 Pues machi war imbꞌijnu jay nen más chuchu apostolen tut tin e war uche ubꞌobꞌ que más nuxi apostolobꞌ ani.  
\v 6 Pues bꞌajcꞌat machi alocꞌoy galan tunor niwojroner bꞌan cocha uchiobꞌ e nuxi apostolobꞌ ani era, pero nen ayan lo que ajcꞌunen umen e Dios xeꞌ jax e natanyaj xeꞌ quetpa chequer tiut conda ixien incansiox.   
\p
\v 7 Entonces ¿war ca ibꞌijnu que majax bueno que nen ixien incansiox tunor uyojroner e Dios tamar e corpesiaj bꞌan taca y que machi inwareox que toyenic tamar? ¿O ma ca jax bueno tiut que nen ixien inmanxujres nibꞌa cocha era tuaꞌ injachiox?  
\v 8 Pues lo que cay inche conda turen tacarox tama inyajr, cay inchꞌami cora cora e tumin tuaꞌ cora grupo ajcꞌupesiajobꞌ tama inteꞌ inteꞌ lugar. Y tamar era uyubꞌien intacriox bꞌan taca y matucꞌa inlocse tibꞌa.  
\v 9 Y tamar era conda turuanen tacarox nen ma tiaꞌ cay inwareox jay ayan lo que ucꞌani, porque conda tariobꞌ cora hermanuobꞌ tama e departamento Macedonia, jaxirobꞌ utaresobꞌ cora ofrenda xeꞌ cay uyajqꞌuenobꞌ tuaꞌ utacren tama tunor lo que ucꞌani. Y tamar era mamajchi cay inware tijam tuaꞌ utacren. Y bꞌan cocha cay inche tama e tiempo xeꞌ numuy era y bꞌan tuaꞌ inche iraj iraj tacarox ubꞌan.  
\v 10 Y bꞌan cocha innata ixto yaꞌ que erach tunor e ojroner tama e Cristo, pues bꞌan ubꞌan que mamajchi tuaꞌ ulocse nitzayer lo que ayan tamaren umen que nen ma tiaꞌ tuaꞌ inxin inlocse e tumin tibꞌa xeꞌ turox tama e departamento Acaya umen que war incansiox uyojroner e Dios.  
\v 11 ¿Y tucꞌa tuaꞌ war inwareox tunor era? ¿Umen ca que machix war inyajta iut? Pues Cadiosir unata que majax bꞌan, y que nen war incꞌaniox meyra.   
\p
\v 12 Pues tunor lo que cay inche era que ma tiaꞌ inlocse itumin tuaꞌ intacriox cꞌani inxin inche iraj iraj ubꞌan, porque machi incꞌani tuaꞌ oꞌjronobꞌ tin e war uche ubꞌobꞌ que nuxi apostolobꞌ ani que jaxirobꞌ war apatnobꞌ ani bꞌan cocha non, porque majax bꞌan.  
\v 13 Porque e winicobꞌ era majax apostolobꞌ tuaꞌ e Cristo. Intaca war uche ubꞌobꞌ que jax. Pero jaxirobꞌ ajmajresiajobꞌ taca y matucꞌa ayan tamarobꞌ.  
\v 14 Pero tunor era ma erer ubꞌajcꞌusion porque war canata que e Satanás ubꞌan ixin majresian y uche ubꞌa que jax ani inteꞌ ángel xeꞌ erach xeꞌ tuaꞌ e janchꞌaquenar tichan.  
\v 15 Pero bꞌan cocha uche e Satanás y bꞌan taca uchiobꞌ tin e war axanobꞌ tama ubꞌir ubꞌan, y tamar era non machi tuaꞌ cabꞌacta cawira jay umanobꞌ e Satanás war uche ubꞌobꞌ que umanobꞌ ani e Cristo. Porque watar e día conda tunorobꞌ tuaꞌ axin uchꞌamiobꞌ uyeror tama tunor lo que cay uchiobꞌ xeꞌ mabꞌambꞌan tara tor e rum.   
\s1 Lo que cay unumse ubꞌa e Pablo umen que jax inteꞌ apóstol  
\p
\v 16 Pues cꞌani inwareox otronyajr era que quisinic que mamajchi tijam tuaꞌ ubꞌijnu que nen matucꞌa ani nisasaꞌ. Pero jay ayan chi bꞌan war ubꞌijnu, actaniquen tuaꞌ onjron cora era bꞌan cocha inteꞌ xeꞌ matucꞌa ani usasaꞌ tuaꞌ uyubꞌien intattzꞌi nibꞌa cora tamar lo que cay innumse nibꞌa.  
\v 17 Pues Cawinquirar machi uyaren tuaꞌ inwareox cobꞌa nicꞌampibꞌir, pero nen cꞌani inxin onjron bꞌan cocha inteꞌ xeꞌ matucꞌa ani usasaꞌ cocha cꞌani inxin intattzꞌi nibꞌa cora era tamar nicꞌampibꞌir lo que ajcꞌunen umen e Dios.  
\v 18 Pero cocha ayan meyra tin e war utattzꞌi ubꞌobꞌ tamar e cꞌampibꞌir lo que ayan tuobꞌ tara tor e rum, nen ubꞌan cꞌani intattzꞌi nibꞌa nen taca.  
\v 19 Pues cocha nox war iche ibꞌa que más ayan lo que inata tama ijor iraj iraj, war ixtzay iwira acꞌotoy tin matucꞌa unatobꞌ tuaꞌ uwarajsiox.  
\v 20 Y nox war ixtzay iwira acꞌotoy tin e axin uyareox tucꞌa tuaꞌ iche, y tin e axin ulocse tunor lo que ayan tibꞌa, y nox turix tuaꞌ iche tunor lo que uyareox. Y nox intaca iyubꞌi tin e axin umajresox y tin e axin utattzꞌi ubꞌa tiut, y nox iwacta bꞌan taca tin e axin uyajcꞌox tama icajram y war ixtzay tamar.  
\v 21 Pues nen era insubꞌajra imbꞌijnu tuaꞌ inche ani lo que cay uchiobꞌ e nuxi apostolobꞌ ani tamarox. ¿War ca nic che era que nen injayjayen, y que tamar era que machi war inche cocha war uchiobꞌ e apostolobꞌ ani era?  
\p Pues entonces jay ayan tin e cꞌani axin utattzꞌi ubꞌa que nojta ucꞌampibꞌir, pues nen erer ani inxin inche ubꞌan, motor que nen imbꞌijnu que war onjron era bꞌan cocha inteꞌ xeꞌ matucꞌa ani usasaꞌ.  
\v 22 Pues jay e nuxi apostolobꞌ ani axin utattzꞌi ubꞌobꞌ que uyubꞌiobꞌ oꞌjronobꞌ tama e ojroner hebreo, ucꞌani tuaꞌ inata que nen ubꞌan uyubꞌien onjron tamar. Y jay jaxirobꞌ axin utattzꞌi ubꞌobꞌ que jaxirobꞌ tuobꞌ e Israel, pues nen ubꞌan tuen e Israel. Y jay jaxirobꞌ axin utattzꞌi ubꞌobꞌ que sitzbꞌirobꞌ tuaꞌ e Abraham xeꞌ turuan tama e onian tiempo, pues nen ubꞌan sitzbꞌiren tuaꞌ.  
\v 23 Y jay jaxirobꞌ axin utattzꞌi ubꞌobꞌ que umanobꞌ e Cristo, pues nen era imbꞌijnu que war onjron bꞌan cocha inteꞌ xeꞌ matucꞌa ani usasaꞌ. Pero machi cꞌani inwareox tamar lo que inche xeꞌ locꞌoy bueno sino que cꞌani inwareox tamar lo que numuy tamaren umen que nen injayjayen. Y tamar era cꞌani inwareox que nen patnenix más tama upatnar Cawinquirar que jaxirobꞌ, y que nen esto jajtzꞌenix meyra más que jaxirobꞌ, y nen esto qꞌuechbꞌiren ixien tama e cárcel más que jaxirobꞌ, y nen ayan ani meyra veces conda cay imbꞌijnu que cꞌanix inchamesna umen que war inche upatnar Cawinquirar.  
\v 24 Cinco veces jajpnen umen e gente tuaꞌ e Israel tuaꞌ uwatzꞌien treinta y nueve veces taca e qꞌuewer.  
\v 25 Jajpnen uxyajr umen e soldadobꞌ romano tuaꞌ uwatzꞌienobꞌ taca e teꞌ, y ayan inyajr conda chamesnen ani taca e tun. Y uxyajr cꞌapa muctzꞌa inteꞌ barco macuir e jaꞌ conda nen war inxana tamar, y ayan inyajr conda innumse inteꞌ día y inteꞌ acbꞌar tor e jaꞌ umen que cꞌapa muctzꞌa e barco y intaca turen tama e jaꞌ war incojco chi chi tuaꞌ ayopa ucorpesen.  
\v 26 Y nen meyra xambꞌar cay inche, y tamar era ayan meyra lo que cay innumse nibꞌa tamar xeꞌ imbꞌacꞌajr uwirnar. Ayan ani conda qꞌuix ani inchamay tama inteꞌ xucur, y intran taniut conda quetpa tuaꞌ inxana tor e bꞌir tiaꞌ ayan e sian ajxujch. Y chamesnen ani umen taca niwet ajlugarobꞌ tama e Israel, y chamesnen ani umen e gente xeꞌ majax tuobꞌ e Israel. Y chamesnen ani macuir e chinam, y chamesnen ani tama e choquem lugar, y chamayen ani macuir e jaꞌ tama e mar. Y chamesnen ani umen tin e war uche ubꞌobꞌ que ajcꞌupesiajobꞌ ani tama Cawinquirar.  
\v 27 Y ayan conda cꞌapa patnen meyra y cꞌoyen meyra, y ayan ani conda machi uyubꞌien inwayan. Y ayan ani conda aintzꞌa meyra y que war ataqui nitiꞌ meyra. Y ayan ani conda machi war inweꞌ, y ayan ani conda sisayen meyra, y ayan ani conda war acꞌapa nibꞌujc.   
\p
\v 28 Y tujor tunor era ayanto lo que cay innumse nibꞌa tamar xeꞌ jax lo que uchien imbꞌijnu iraj iraj jay war axanobꞌ imbꞌutz tama ubꞌir e Dios tunor e sian grupo ajcꞌupesiajobꞌ tic taca tiaꞌ cay inchecsu uyojroner e Dios ixin.  
\v 29 Pues conda ayan inteꞌ hermano xeꞌ machi aqꞌuecꞌo tama ucꞌupesiaj tama Cawinquirar, nen inquetpa bꞌan cocha jay nen injayjayen ani tama niwalma ubꞌan. Y conda ayan tin e axin uqꞌuijnes inteꞌ hermano tuaꞌ uche acucrema tama e mabꞌambꞌanir, nen inxin inqꞌuijna ubꞌan.  
\v 30 Pues jay ucꞌani tuaꞌ inxin intattzꞌi nibꞌa, cꞌani intattzꞌi nibꞌa tamar lo que uchectes que nen injayjayen.  
\v 31 Porque war unata Cadiosir xeꞌ jax Utata Cawinquirar Jesús xeꞌ tawar tuaꞌ achojbꞌesna iraj iraj que erach tunor lo que war inwareox era.  
\v 32 Y tama inyajr conda turen tama e chinam Damasco e gobernador xeꞌ jax inteꞌ ajcꞌampar tuaꞌ inteꞌ rey xeꞌ ucꞌabꞌa Aretas cay uturbꞌa cora soldadobꞌ tut inteꞌ inteꞌ portón lo que ayan tama e nuxi muro xeꞌ ayan tutiꞌ tunor e chinam yajaꞌ tuaꞌ usicbꞌenobꞌ y tuaꞌ uqꞌuechienobꞌ inxin tama e cárcel umen que nen war inchecsu uyojroner e Dios axin.  
\v 33 Pero ayan cora hermanuobꞌ xeꞌ cay utacrenobꞌ xeꞌ uturbꞌenobꞌ macuir inteꞌ nuxi chiquiꞌ y de allí ulocsienobꞌ tama inteꞌ ventana lo que ayan tama e nuxi muro y uyemsenobꞌ taca inteꞌ lazo tama e chiquiꞌ y tamar era nen locꞌoy ajnien.   
\c 12  
\s1 Umayjut e Pablo lo que irsena umen e Dios, y lo que arobꞌna umen e Dios  
\p
\v 1 Pues entonces cꞌani inwareox que matucꞌa ucꞌampibꞌir jay inteꞌ axin utattzꞌi ubꞌa ubꞌajner, pero cꞌani inwareox tamar e mayjut lo que irsenen umen e Dios y cꞌani inwareox tamar lo que arobꞌnen umener ubꞌan.  
\v 2 Pues ayan inteꞌ winic xeꞌ tuaꞌ e Cristo xeꞌ natanwa nimener xeꞌ qꞌuechbꞌir ixin esto tama e uxteꞌ ut qꞌuin tichan tiaꞌ turu Catata Dios y que ayix catorce año conda numuy tunor era. Y esto coner machi ixto innata jay qꞌuechbꞌir ixin tamar taca uyalma o jay qꞌuechbꞌir ixin taca tunor ucuerpo, jax taca e Dios xeꞌ war unata tunor era.  
\v 3 Y cꞌani inwareox otronyajr era que machi innata jay e winic era qꞌuechbꞌir ixin tut e qꞌuin taca tunor ucuerpo o jay tamar taca uyalma, jax taca e Dios xeꞌ war unata tama tunor era.  
\v 4 Pero nen innata ixto que e winic era qꞌuechbꞌir ixin esto tiaꞌ turu Catata Dios tiaꞌ galan tunor. Y conda turu yajaꞌ tut e qꞌuin cay uyubꞌi meyra lo que galan xeꞌ ucꞌani tuaꞌ aquetpa mucur tut e winicobꞌ tara tor e rum coner y que ma cocha erer tuaꞌ achecsuna.  
\v 5 Pues nen uyubꞌien ani intattzꞌi nibꞌa tamar lo que cay uwira e winic era tut e qꞌuin, pero nen machi tuaꞌ intattzꞌi nibꞌa tamaren taca, sino que tamar taca lo que axin uchecsu que nen injayjayen.  
\v 6 Pero jay nen ani inxin intattzꞌi nibꞌa tamar lo que inche, machi war che era que nen cꞌapa ani tunor nisasaꞌ, porque war ani inwareox jax taca lo que erach. Pero machi inche cocha era tuaꞌ machi acꞌotoy ubꞌijnuobꞌ e gente jay nen más nuxi winiquen, porque ucꞌani tuaꞌ ubꞌijnuobꞌ cobꞌa winiquen tamar taca lo que uwirenobꞌ inche y tamar taca lo que uyubꞌienobꞌ onjron.   
\p
\v 7 Pues entonces cocha cay arobꞌnen meyra sian ojroner tuaꞌ e Dios xeꞌ galan ixto yaꞌ, ebꞌetna tari taniut lo que bꞌan ani cocha inteꞌ tꞌix xeꞌ war uxeqꞌuien tama nichejchec xeꞌ war acꞌuxun meyra. Pues e tꞌix era jax inteꞌ man tuaꞌ e Satanás xeꞌ cꞌotoy taniut tuaꞌ uqꞌuijnesen inxin iraj iraj. Y bꞌan ajcꞌunen tuaꞌ machi incꞌotoy imbꞌijnu jay nen nuxi winiquen y tuaꞌ machi inxin intattzꞌi nibꞌa tama tunor lo que irsenen umen e Dios.  
\v 8 Pero nen incꞌajtix tama uxyajr taca e Dios tuaꞌ ulocse tunor era lo que war uchien acꞌuxun era.  
\v 9 Pero ojron e Dios tacaren y che: “Pues nen cꞌapa inwajqꞌuet meyra tacarsiaj xeꞌ atzꞌacta tuaꞌ utacret tama tunor lo que war anumse abꞌa era. Porque más achecta nitacarsiaj tut tin e injayjay turu, y tamar era más cꞌani achecta nitacarsiaj tacaret coner cocha ayan lo que war anumse abꞌa tamar.” Bꞌan uyaren e Dios. Entonces nen era war intzay que injayjayen porque tamar era war achecta tunor utacarsiaj Cawinquirar Jesucristo tuaꞌ utacren taca tunor lo que war innumse nibꞌa.  
\v 10 Y tamar era war intzay conda war injayjayran, y war intzay conda ayan tin e war uqꞌuijnesen, y war intzay conda ma tzꞌacar lo que ayan tanibꞌa, y war intzay conda ayan tin e war uchien innumse nibꞌa, y war intzay conda war innumse nibꞌa tamar lo que inyaj taniut umen taca que war inchecsu uyojroner e Dios tama e Cristo tut e gente axin. Porque conda war injayjayran axin más war inqꞌuecꞌo porque tamar era más war uqꞌuecꞌojsen Nidiosir.   
\s1 Lo que war ubꞌacre e Pablo uwira tamar lo que war ubꞌijnuobꞌ e grupo ajcꞌupesiajobꞌ xeꞌ turobꞌ tama e chinam Corinto  
\p
\v 11 Pues nen era war inche nibꞌa bꞌan ani cocha inteꞌ xeꞌ matucꞌa ani usasaꞌ umen que war intattzꞌi nibꞌa cora era. Pero jax nox xeꞌ ichien inche cocha era, y jax nox ubꞌan xeꞌ ucꞌani ani tuaꞌ iwaren que imbꞌutz tunor lo que war inche. Porque motor que ayan ani conda nen matucꞌa ani nicꞌampibꞌir tiut, pero nen más ayan nicꞌampibꞌir que tin e war uche ubꞌobꞌ que nuxi apostolobꞌ ani que nox war iturbꞌa ibꞌa tamar iraj iraj.  
\v 12 Pues tunor lo que ucꞌani tuaꞌ uche inteꞌ tuaꞌ aquetpa chequer que jaxir jax inteꞌ apóstol tuaꞌ Cawinquirar chempa nimener tiut. Y tamar era nen cay inwirsiox meyra seña tuaꞌ e Dios, y cay inche meyra patnar tacar ucꞌotorer e Dios, y cay inche e milagro tiut ubꞌan. Y machi cꞌoyen inche tunor era conda turen tacarox.  
\v 13 Pero cꞌani inwareox era que nen ixien inche nibꞌa tacarox bꞌan cocha cay inche nibꞌa tut tunor e inmojr grupo ajcꞌupesiajobꞌ ubꞌan, pero ma tiaꞌ incꞌajti e tacarsiaj tibꞌa tamar lo que ucꞌani. Pues jay mabꞌambꞌan tiut lo que inche que machi ixien incꞌajti e tumin tibꞌa, cꞌumpenic tacaren era.   
\p
\v 14 Pues entonces coner war unstes nibꞌa tuaꞌ inche e uxyajr xambꞌar tiaꞌ turox tuaꞌ inwarajsiox, y conda incꞌotoy machix tuaꞌ incꞌajti e tacarsiaj tibꞌa otronyajr. Porque nen machi war incꞌani tuaꞌ inchꞌami itumin sino que jax nox. Porque majax e maxtac xeꞌ tuaꞌ axin umorojse e tumin tuaꞌ uwese utata y utuꞌ, sino que jax e tatabꞌir y e tubꞌir xeꞌ ucꞌani tuaꞌ uwirobꞌ cocha tuaꞌ uwese umaxtacobꞌ.  
\v 15 Pero nen era intzay tuaꞌ inxin insati tunor nitumin y tuaꞌ insati nibꞌa ubꞌan tuaꞌ intacriox ixqꞌuecꞌo ixxana tama ubꞌir e Dios. Y tamar era aquetpa chequer tiut que nen war inyajta iut, pero nox chequer que war asatpa axin icꞌunersiaj tamaren.   
\p
\v 16 Pues nox war inata que nen ma tiaꞌ cay inwareox tuaꞌ itacren taca e tumin. Pero war umbꞌi que ayan tin e war oꞌjron nipater y che: “E Pablo ayan ucꞌampibꞌir pero jaxir cay ucꞌampes e majresiaj tuaꞌ uchion cache lo que machi ani cacꞌani”, che e ojroner era nipater.  
\v 17 ¿Cay ca nic inmajresox tacar tin e cay inwebꞌta ixiobꞌ tibꞌa? Pues machi.  
\v 18 Pues cay incꞌajti taca e Tito tuaꞌ axin uwarajsiox, y ayan otronteꞌ hermano xeꞌ inwebꞌta ixin tacar. ¿Cay ca umajresox e Tito conda turu tacarox? Pues majax bꞌan uche. Porque e Tito y nen war caturuan intera cawirnar y war caturbꞌa cabꞌa tuaꞌ caquetpa bueno tiut y bueno tut tunor e ajcꞌupesiajobꞌ axin ubꞌan.   
\p
\v 19 Pues entonces bꞌajcꞌat ayan tin e turobꞌ tijam xeꞌ war ubꞌijnuobꞌ que tunor e ojroner era tuaꞌ taca calocse cabꞌa tacarox. Pero majax bꞌan sino que non war cojron tut e Dios tamar ucꞌabꞌa Cawinquirar Jesucristo tuaꞌ cacꞌumpa tacarox. Y tunor lo que war cache tacarox iraj iraj war cache tuaꞌ taca catacriox ixqꞌuecꞌo ixxana tama ubꞌir e Dios, nox xeꞌ cawermanuox xeꞌ inchoj iut camener.  
\v 20 Pero nen era war imbꞌacta cora que conda incꞌotoy tuaꞌ inwarajsiox que inxin inwira que nox majax bꞌan iwirnar cocha quisinic ani inwira, y que nox conda ixixin iwiren que niwirnar machix tuaꞌ aquetpa cocha war icꞌani ubꞌan. Y war imbꞌacta que bꞌajcꞌat ayan tijam tin e machi war ucꞌani lo que cꞌajna umen e inmojr, y que ayan tin e war acꞌuxnaqꞌui uwira otronteꞌ, y que ayan tin e ayan e qꞌuijnar tamar, y que ayan tin e war ubꞌijnu que jax taca ayan ucꞌampibꞌir. Y war imbꞌacta que bꞌajcꞌat ayan tijam tin e war oꞌjron upater otronteꞌ, y que ayan tin e war aqꞌuecran axin, y que ayan tin e war ubꞌijnu que jaxir más ayan ucꞌampibꞌir que e inmojr, y que ayan tin e war utijres axin tunor e culto umen que acay oꞌjron meyra conda majax bꞌan ucꞌani.  
\v 21 Y war imbꞌacta que conda inxin incꞌotoy tuaꞌ inwarajsiox otronyajr que bꞌajcꞌat Nidiosir axin uchien insubꞌajra inwirox, y que bꞌajcꞌat aquetpa tuaꞌ inxin anru tamar lo que war uchiobꞌ cora hermanuobꞌ tijam xeꞌ cay uchiobꞌ e mabꞌambꞌanir ixnix y que machi ixto uyactobꞌ tunor era, y que warto uchiobꞌ lo que intuj tut e Dios, y que warto uchiobꞌ e mabꞌambꞌanir taca inteꞌ ixic o taca inteꞌ winic, y que machi ixto acay ubꞌijnu tuaꞌ uyacta uchiobꞌ tunor era lo que cay uchiobꞌ ixnix xeꞌ mabꞌambꞌan.   
\c 13  
\s1 Ayanto más ojroner tuaꞌ e Pablo tama ucꞌapesnibꞌir e carta era  
\p
\v 1 Pues entonces jax era e uxyajr xambꞌar lo que war inche tuaꞌ inwarajsiox, y conda incꞌotoy cꞌani anumuy bꞌan cocha chꞌar tzꞌijbꞌabꞌir tama uyojroner e Dios que: “Cꞌani aquetpa chequer que erach uyojroner inteꞌ jay ayan chateꞌ o uxteꞌ ajchecsuyajobꞌ xeꞌ uwirobꞌ lo que numuy.” Bꞌan chꞌar tzꞌijbꞌabꞌir tama uyojroner e Dios.  
\v 2 Pero cꞌani inwareox tunorox era xeꞌ cay iche e mabꞌambꞌanir ixnix y tunor e inmojr ubꞌan que bꞌan cocha cay inwareox tama inteꞌ xambꞌar y bꞌan tuaꞌ inchecsu tiut otronyajr era ubꞌan motor que innajt turen tiut coner pero conda incꞌotoy otronyajr era mamajchi tuaꞌ ajni tut e disciplina jay machi cꞌani uyacta e mabꞌambꞌanir lo que war uche.  
\v 3 Y conda cꞌapa inchiox disciplinar cocha era cꞌani aquetpa chequer tiut que ayan ixto ucꞌotorer e Cristo tamaren conda onjron. Y tunor e nuxi patnar lo que axin uche e Cristo tamarox cꞌani uchectes tiut que jaxir majax injayjay ubꞌan, porque jaxir tuaꞌ axin uchectes meyra ucꞌotorer tiut tamar lo que axin uche tamarox.  
\v 4 Y motor que Cawinquirar Jesucristo uche ubꞌa que injayjay conda qꞌuejcha ixin tuaꞌ achamesna tut e cruz, pero jaxir sujta bꞌixqꞌuesna tujam e chamenobꞌ umen ucꞌotorer e Dios. Y bꞌan cocha Cawinquirar uche ubꞌa que injayjay tama e tiempo yajaꞌ y bꞌanon ubꞌan, pero umen que intera turon tacar jaxir war caturuan tamar ucꞌotorer tuaꞌ uyubꞌion catacriox.   
\p
\v 5 Entonces bꞌijnunic iwira tamarox jay war ixto ixcꞌupseyan tama e Cristo. Otronyajrto cꞌani inwareox que bꞌijnunic iwira tamar ibꞌa era. ¿O turu ca e Cristo Jesús tama iwalma? Pues turu jay war ixcꞌupseyan tamar. Pero tin e intaca war uche ubꞌa que ajcꞌupesiaj tama e Cristo ma erer ubꞌijnu jay turu e Cristo tama uyalma.  
\v 6 Pero nen war incojco tamarox que machi tuaꞌ ibꞌijnu que nen intaca war inche nibꞌa que ajcꞌupesiajen tama e Cristo.  
\v 7 Y non war cacꞌajti taca e Dios tuaꞌ machi iche e mabꞌambꞌanir. Pero machi war cacꞌajti cocha era tamarox tuaꞌ taca querna que galan tunor lo que war cache, sino que umen que cꞌani cawira que nox ixixin iche imbꞌutz tama tunor. Pues taniut nen era machi uchien imbꞌijnu jay ayan tin e ubꞌijnu jay majax imbꞌutz lo que war cache.  
\v 8 Porque machi uyubꞌion cache lo que majax bꞌan cocha lo que erach, sino que ucꞌani tuaꞌ cache ajtaca lo que erach tut e Dios.  
\v 9 Y catzay conda caquetpa injayjay jay machi ucꞌani tuaꞌ cachectes ucꞌotorer e Dios tuaꞌ ani cachiox disciplinar, y catzay tamar que nox ixqꞌuecꞌo axin jay war iche imbꞌutz tama tunor. Y tamar era war cacꞌajti taca e Dios tamarox tuaꞌ ixquetpa erach tama tunor.  
\v 10 Y tamar era war intzꞌijbꞌa tunor e ojroner tama e jun era conda turento innajt tiut porque machi incꞌani tuaꞌ aquetpa imbꞌar tunor niwojroner conda incꞌotoy tiut. Porque ajcꞌunen tunor nicꞌotorer umen Cawinquirar, majax tuaꞌ incꞌampes tuaꞌ intijresox, sino que tuaꞌ intacriox ixqꞌuecꞌo ixxana tama ubꞌir e Dios.   
\p
\v 11 Pues entonces niwermanuox, cꞌani inwacta tunor niwojroner era. Pero cꞌani inwareox que tzayesic ibꞌa tamar Cawinquirar, sicbꞌanic cocha tuaꞌ iyustes ibꞌa axin tuaꞌ ixquetpa más erach tut e Dios, cansenic ibꞌa tuaꞌ iche más lo que imbꞌutz tut e Dios, turbꞌanic ibꞌa tuaꞌ aquetpa intera tunor ibꞌijnusiaj, y turbꞌanic ibꞌa tuaꞌ aquetpa ujiriar e Dios tijam. Y tamar era Cadiosir xeꞌ war uyajta iut y xeꞌ war uyajcꞌon meyra ujiriar tuaꞌ ucojcon iraj iraj aquetpac tama iwalma tunorox.  
\v 12 Chenic ibꞌa erach inteꞌ intiox conda itzꞌujtzꞌi ibꞌa tuaꞌ icꞌajpes ibꞌa.  
\v 13 Tunor e ajcꞌupesiajobꞌ tama Cawinquirar xeꞌ turobꞌ tama e lugar era war ucꞌajpesox tama inteꞌ cꞌajpesiaj.   
\p
\v 14 Entonces cꞌani inchojbꞌesox era y che: “Que utacarsiaj Cawinquirar Jesucristo axin aquetpa taca tunorox, y que ixcꞌotoy inata cobꞌa ucꞌaniox Catata Dios, y que Unawalir e Dios aquetpa tacarox iraj iraj. Amén.” Tara acꞌapa tunor niwojroner, che e Pablo.