\id 1TH - Chortí NT -Guatemala 2012 (DBL -2013) 
\h 1 TESALONICENSES 
\toc1 Jax era e bꞌajxan ojroner lo que tzꞌijbꞌabꞌir umen e Apóstol Pablo tama e grupo ajcꞌupesiajobꞌ xeꞌ turobꞌ tama e chinam Tesalónica 
\toc2 1 Tesalonicenses 
\toc3 1 Ts 
\mt2 Jax era e bꞌajxan ojroner lo que tzꞌijbꞌabꞌir umen e Apóstol Pablo tama e grupo ajcꞌupesiajobꞌ xeꞌ turobꞌ tama e chinam Tesalónica  
\c 1  
\s1 E Pablo y cora upiarobꞌ utzꞌijbꞌobꞌ e carta era tama inteꞌ grupo ajcꞌupesiajobꞌ  
\p
\v 1 Pues nen xeꞌ Pabloen taca e Silvano y e Timoteo war catzꞌijbꞌa e carta era tibꞌa xeꞌ jax inteꞌ grupo ajcꞌupesiajobꞌ xeꞌ turox tama e chinam Tesalónica. Pues nox quetpa intera ibꞌijnusiaj taca Cadiosir xeꞌ jax Catata y taca Cawinquirar Jesucristo. Chꞌamic utacarsiaj e Dios taca ujiriar.   
\s1 Ucꞌupesiajobꞌ tin e turobꞌ tama e chinam Tesalónica era quetpa chequer tut e gente xeꞌ turobꞌ innajt  
\p
\v 2 Pues non era war catattzꞌi ucꞌabꞌa Cadiosir tamarox iraj iraj. Y ma tiaꞌ canajpesox conda war cacꞌajti taca e Dios.  
\v 3 Pues war cacꞌajpes tut Catata Dios iraj iraj cobꞌa cay cꞌupseyanox tamar conda cay iche upatnar, y que meyra war ichecsu axin ucꞌunersiaj e Dios tut e gente conda war iche upatnar era, y que cay icojco meyra tama Cawinquirar Jesucristo, y que qꞌuecꞌo xanox tama ubꞌir motor que quetpa tuaꞌ inumse ibꞌa meyra conda cay cꞌupseyanox tamar.  
\v 4 Cawermanuox xeꞌ inchoj iut meyra umen e Dios, canata que nox sicbꞌabꞌirox umener.  
\v 5 Porque conda cꞌotoyon tiut tuaꞌ cachecsu uyojroner e Dios tama e corpesiaj majax ojroner taca xeꞌ locꞌoy tama cawej, sino que bꞌutꞌur tunor cawojroner taca ucꞌotorer Unawalir e Dios, y chequer tama cawalma que erach tunor lo que war cachecsu tiut. Y nox war inata que quetpa erach tunor cawirnar conda turon tijam este que tacarnox meyra umen lo que cay cachecsu tiut.   
\p
\v 6 Y nox cay iturbꞌa ibꞌa tuaꞌ ixquetpa bꞌan cocha non y cay iturbꞌa ibꞌa tuaꞌ ixquetpa bꞌan cocha Cawinquirar ubꞌan. Y tzayox meyra conda cay ichꞌami tunor e ojroner lo que cay cachecsu tiut taca inteꞌ nuxi tzayer xeꞌ ajcꞌubꞌirox umen Unawalir e Dios motor que cay inumse ibꞌa tamar lo que cay ichꞌami.  
\v 7 Y tamar era tin e ajcꞌupesiajobꞌ tama e departamento Macedonia y tin e ajcꞌupesiajobꞌ tama e departamento Acaya cay uturbꞌa ubꞌobꞌ tuaꞌ aquetpobꞌ bꞌan cocha nox tama Cawinquirar.  
\v 8 Y cay iqꞌueche ixin uyojroner e Dios lo que cay ichꞌami tama tunor or e lugar tama e departamento Macedonia y tama tunor or e lugar tama e departamento Acaya y más innajt bꞌana ubꞌan. Y tamar era tic taca tiaꞌ caxin war catajwi e gente xeꞌ unatobꞌix tamarox y tamar icꞌupesiaj tama e Dios. Y tamar era mix tucꞌa tuaꞌ cawareobꞌ tamarox otronyajr  
\v 9 porque e gente era cay uyareon cocha ichꞌamion conda cꞌotoyon tuaꞌ cawarajsiox tama e día yajaꞌ. Y uyareon cocha cay iwacta tunor e chamen diosobꞌ tuaꞌ ixsutpa iyujtzꞌi ut Cadiosir xeꞌ erach y xeꞌ bꞌixir.  
\v 10 Y uyareon ubꞌan que war icojco e hora conda cꞌani asutpa watar Uyunen e Dios tut e qꞌuin. Pues jax e Jesús era xeꞌ sujta bꞌixqꞌuesna tujam e chamenobꞌ xeꞌ cꞌani ucorpeson tama uqꞌuijnar e Dios xeꞌ tuaꞌ watar.   
\c 2  
\s1 Imbꞌutz upatnar e Pablo tama e chinam Tesalónica  
\p
\v 1 Pues niwermanuox, nox war inata que conda cꞌotoyon tiut tuaꞌ cawarajsiox, majax tuaꞌ intaca casati e tiempo.  
\v 2 Y nox warix inata que conda merato cacꞌotoy tiut que war cacꞌayna meyra umen e gente xeꞌ turobꞌ tama e chinam Filipos y que ulocsiobꞌ cabꞌujc y que uwatzꞌionobꞌ meyra taca inteꞌ teꞌ. Pero conda yopon tiut Cadiosir uyajcꞌon meyra ucꞌotorer tuaꞌ uyubꞌion cachecsu uyojroner tiut motor que ayan meyra tin e machi war ucꞌaniobꞌ.  
\v 3 Porque tunor lo que cay cachecsu tiut tama Cadiosir bꞌan taca cocha ayan tama uyojroner e Dios, y matucꞌa war cabꞌijnu tama cajor conda cachecsu tunor era tiut, y conda cache tunor era majax taca inteꞌ aras ojroner war cache,  
\v 4 sino que tacar uyojroner e Dios tama e corpesiaj lo que ajcꞌunon umener tuaꞌ cachecsu tut e gente axin, y tamar era machi war caturbꞌa cabꞌa tuaꞌ catzayjres e gente tamar lo que war cachecsu tutobꞌ sino que war cachecsu jax taca lo que ucꞌani Cadiosir cocha jaxir war uwira tunor lo que ayan tama cawalma.  
\v 5 Y nox war inata que machi war catattzꞌi e gente taca inteꞌ ojroner xeꞌ galan uyubꞌnar xeꞌ tuaꞌ tix ucꞌupsionobꞌ, y matucꞌa war cache tuaꞌ calocse e tumin tuaꞌ e gente. Pues Cadiosir jax Cawajchecsuyaj que erach tunor lo que war inwareox era.  
\v 6 Y ma tiaꞌ war casicbꞌa tuaꞌ catajttzꞌa umen e gente y nien imener y nien umen otronteꞌ.  
\v 7 Pues non uyubꞌion ani cachectes cabꞌa tiut que non nuquir winicon umen que apostolon tuaꞌ e Cristo. Pero majax bꞌan cay cache sino que cay cache cabꞌa tiut bꞌan cocha inteꞌ tubꞌir xeꞌ incꞌun uwirnar conda war uchꞌijrse umaxtac.  
\v 8 Porque meyra war cachojres iut este que turonix tuaꞌ cawajcꞌu majax jax taca uyojroner e Dios tama e corpesiaj sino que turonix tuaꞌ cawajcꞌu cacuxtar ubꞌan tamarox jay bꞌan ani ucꞌani porque war cacꞌaniox meyra.  
\v 9 Niwermanuox, ¿cꞌar ca imener cocha cay patnon meyra tuaꞌ achecta e tumin lo que ucꞌani tamaron conda turonto tacarox? Porque cay patnon tama e día y acbꞌar ubꞌan tuaꞌ catajwi e tumin tuaꞌ uyubꞌion catoyi tunor lo que ucꞌani tuaꞌ cacꞌuxi. Y tamar era machi cꞌaxi tijor nox tunor lo que cay casati tamaron conda cay cachecsu uyojroner e Dios tiut.   
\p
\v 10 Y nox ixquetpa ajchecsuyajox ticabꞌa y bꞌan e Dios ubꞌan que erach tunor lo que cay cache conda turon tacarox, y que matucꞌa cay cache que majax imbꞌutz, y que matucꞌa cay cache tuaꞌ casubꞌajres cabꞌa tijam xeꞌ war ixcꞌupseyan tama Cawinquirar.  
\v 11 Y war inata ubꞌan que cache cabꞌa tacarox bꞌan cocha inteꞌ tatabꞌir xeꞌ uyare umaxtac conda war uchiobꞌ lo que majax imbꞌutz y xeꞌ utzayjres conda war unumse ubꞌobꞌ.  
\v 12 Y cay cawareox tuaꞌ ixixin ixxana tama ubꞌir e Dios bꞌan cocha ucꞌani jaxir y tuaꞌ ixquetpa tawar tut e Dios xeꞌ cꞌapa upejcox tuaꞌ ixixin ixturuan tacar conda acay acꞌotori taca utawarer.   
\p
\v 13 Pues non era machi cawacta tuaꞌ catattzꞌi ucꞌabꞌa Cadiosir tamarox porque conda cay ichꞌami lo que cay cachecsu tiut cay iche umen que cꞌotoy inata que jax inteꞌ ojroner xeꞌ tari tuaꞌ e Dios y que majax jax taca inteꞌ ojroner xeꞌ locꞌoy tuaꞌ inteꞌ winic. Pues jax e ojroner era xeꞌ war uyustes uwirnar tunor tin e acꞌotoy acꞌupseyanobꞌ tamar.  
\v 14 Y de allí chenox inumse ibꞌa umen iwet ajlugarir umen que machi ucꞌaniobꞌ que nox war ixcꞌupseyan tama Cawinquirar Jesucristo coner. Pues bꞌan ubꞌan war unumse ubꞌobꞌ tin e ajcꞌupesiajobꞌ tama Cawinquirar xeꞌ turobꞌ tama e departamento Judea. Y tamar era erer cawareox que nox war inumse ibꞌa bꞌan taca cocha war unumse ubꞌobꞌ tin e turobꞌ tama e departamento Judea.  
\v 15 Porque jax e gente era xeꞌ uchamsiobꞌ Cawinquirar Jesús, y xeꞌ uchamsiobꞌ tunor e profetobꞌ tama e onian tiempo, y xeꞌ cꞌapa uyajnesonobꞌ non ubꞌan. Pues e gente era machi utzayjresobꞌ e Dios y uxejbꞌiobꞌ ut tunor e winicobꞌ axin ubꞌan.  
\v 16 Y tamar era conda cꞌotoyon tuaꞌ cachecsu uyojroner e Dios tut tin e majax tuobꞌ e Israel tuaꞌ uyubꞌi acorpesnobꞌ ubꞌan, e gente tuaꞌ e Israel era uturbꞌa ubꞌobꞌ tuaꞌ uquete uwabꞌuon tuaꞌ machi cache. Y tamar era más war abꞌoro axin tunor umabꞌambꞌanirobꞌ. Pero coner war acꞌaxi uqꞌuijnar e Dios tama ujorobꞌ.   
\s1 E Pablo war uyusre uwarajse tin e turobꞌ tama e chinam Tesalónica  
\p
\v 17 Pues niwermanuox, conda wartocto calocꞌoy tijam war ayopa ticajor meyra que cꞌani casutpa cawarajsiox otronyajr wacchetaca cocha chꞌurox tama cawalma. Y tamar era war cosre meyra tuaꞌ caxin cawarajsiox otronyajr era.  
\v 18 Y cꞌani ani caxin, y nen xeꞌ Pabloen cay inturbꞌa nibꞌa tuaꞌ inxin, pero e tzuc Satanás uxoti coit tuaꞌ machi cache.  
\v 19 Pues cꞌani ani cawarajsiox otronyajr era porque jax nox xeꞌ war ichion cacojco más tama e Dios, y jax nox xeꞌ war itzayjreson, y jax nox xeꞌ tuaꞌ ichion cachꞌami catuanibꞌir tuaꞌ e Dios watar e día, y cꞌani catajttzꞌa meyra umen e Dios conda asutpa watar Cawinquirar Jesucristo otronyajr umen que nox war ixxana imbꞌutz tama ubꞌir e Dios.  
\v 20 Porque jax nox xeꞌ cꞌani catajttzꞌa tamar umen Cawinquirar y jax nox xeꞌ war itzayjreson ubꞌan.   
\c 3  
\p
\v 1 Pues war ani cosre meyra tuaꞌ cacꞌotoy cawarajsiox otronyajr era pero machi uyubꞌion calocꞌoy coner, y tamar era cabꞌijnu tuaꞌ caquetpa cabꞌajner tara tama e chinam Atenas,  
\v 2 y tuaꞌ cawebꞌta axin e Timoteo tuaꞌ uwarajsiox. Jaxir jax inteꞌ cawet ajpatnarir tama e Dios xeꞌ meyra uchecsu uyojroner e Dios tama e Cristo axin. Jaxir cꞌani utacriox ixqꞌuecꞌo tama icꞌupesiaj tama Cawinquirar y cꞌani utꞌabꞌse iwalma tuaꞌ ixcꞌupseyan más tama Cawinquirar ubꞌan.  
\v 3 Y bꞌan tuaꞌ uche tuaꞌ utacriox tuaꞌ machi aloqꞌuesna nien inteꞌ ajcꞌupesiaj tama ubꞌir e Dios umen lo que war inumse ibꞌa era. Pues nox war inata que ucꞌani tuaꞌ canumse cabꞌa cora tara tor e rum.  
\v 4 Pues conda turonto tacarox cay cawareox que cꞌani achena canumse cabꞌa, y bꞌan numuy tacarox, pero war ixto inata tunor era.  
\v 5 Y tamar era inwebꞌta ixin e Timoteo tuaꞌ uyubꞌi tibꞌa jay war ixqꞌuecꞌo ixcꞌupseyan tama Cawinquirar. Pues nen cay bꞌacten que bꞌajcꞌat cꞌotoy e ajpijchsiaj tuaꞌ upijchꞌiox y que bꞌajcꞌat intaca patnon tamarox.   
\p
\v 6 Pero era sutpa yopa e Timoteo otronyajr tiaꞌ turox y turu tacaron tara tama e chinam Atenas coner. Pues jaxir war uyareon que nox war ixqꞌuecꞌo ixcꞌupseyan tama Cawinquirar y que war iyajta ut ibꞌa inteꞌ intiox. Y war uyareon ubꞌan que ixtzay icꞌajpeson y que war iyusre iwiron bꞌan taca cocha non war cosre cawira iut nox ubꞌan.  
\v 7 Y tamar era niwermanuox, motor que war canumse cabꞌa meyra era pero tꞌabꞌesna cawalma conda coybꞌi que war ixqꞌuecꞌo ixcꞌupseyan tama Cawinquirar.  
\v 8 Y tamar era tzayon meyra conda coybꞌi que war ixqꞌuecꞌo ixcꞌupseyan tama Cawinquirar bꞌan cocha catzay conda wartocto cacꞌupseyan tama Cawinquirar y bꞌan catzayer tamarox coner ubꞌan.  
\v 9 Y ma cocha erer acꞌapa catattzꞌi ucꞌabꞌa e Dios tamarox y tama tunor e nuxi tzayer lo que cꞌapa cachꞌami tamar jaxir.  
\v 10 Pues non era war cacꞌajti taca e Dios tama e día y acbꞌar ubꞌan tuaꞌ uyubꞌion caxin cawira iut otronyajr, y tamar era erer catacriox tuaꞌ acꞌapa ixqꞌuecꞌo ixxana tamar icꞌupesiaj tama Cawinquirar.   
\p
\v 11 Pues war cacꞌajti taca Catata Dios y taca Cawinquirar Jesús tuaꞌ utacrion tuaꞌ uyubꞌion caxin cawarajsiox.  
\v 12 Y war cacꞌajti taca e Dios ubꞌan que ixixin ixcano cocha tuaꞌ iyajta ut ibꞌa inteꞌ intiox inyajrer y que ixixin ixcano iyajta ut tunor e inmojr ajcꞌupesiajobꞌ ubꞌan bꞌan cocha non war cayajta iut.  
\v 13 Y jay bꞌan iche entonces cꞌani aqꞌuecꞌo iwalma tuaꞌ aquetpa erach tunor iwirnar, y tamar era machi tuaꞌ ixsubꞌajra tut Catata Dios conda asutpa watar Cawinquirar Jesús taca tunor tin e erach.   
\c 4  
\s1 E cuxtar xeꞌ erach tut Cadiosir  
\p
\v 1 Pues entonces niwermanuox, cay cawareox cocha tuaꞌ icojco ibꞌa tama icuxtar tuaꞌ uyubꞌiox itzayjres ut e Dios bꞌan cocha cay cacansiox conda turon tacarox. Bꞌan cay iche y bꞌan ucꞌani tuaꞌ iche iraj iraj.   
\p
\v 2 Pues nox warto inata tunor e canseyaj lo que cay cawareox tama ucꞌabꞌa Cawinquirar Jesús.  
\v 3 Porque ayan lo que Cadiosir war ucꞌani tuaꞌ iche tama icuxtar xeꞌ jax era: Ucꞌani tuaꞌ iturbꞌa ibꞌa erach tut e Dios, y que mamajchi tijam axin uyose ubꞌa taca tin e merato anujbꞌi tacar.  
\v 4 Y inteꞌ intiox ucꞌani tuaꞌ inata cocha tuaꞌ ixturuan taca iwixcar tuaꞌ aquetpa imbꞌutz tunor era tut e Dios y tut e gente ubꞌan.  
\v 5 Y machi tuaꞌ intaca ibꞌijnu ichꞌami inteꞌ ixic bꞌan cocha uchiobꞌ e winicobꞌ tara tor e rum xeꞌ machi unatobꞌ chi Cadiosir.  
\v 6 Y ucꞌani tuaꞌ iwiric tuaꞌ machi imajres inteꞌ iwermano o inteꞌ iwermana taca inteꞌ majresiaj tuaꞌ iche aqꞌuijna uwerir, porque Cadiosir cꞌani uwatzꞌi meyra tunor tin e axin uche cocha era bꞌan cocha cay cawareox.  
\v 7 Pues e Dios upejcon tuaꞌ caxin cache lo que erach tut jaxir y majax tuaꞌ caxin cache más e mabꞌambꞌanir.  
\v 8 Pero jay ayan tin e axin uxejbꞌe ut e canseyaj era, machi war uxejbꞌe ut e winic xeꞌ war acanseyan, sino que war uxejbꞌe ut e Dios xeꞌ jax xeꞌ uyajcꞌon Unawalir xeꞌ erach.   
\p
\v 9 Pues ma ani tucꞌa tamar tuaꞌ catzꞌijbꞌa tibꞌa tuaꞌ iyajta ut ibꞌa inteꞌ intiox, cocha Cadiosir cꞌapa ucansiox tama tunor era.  
\v 10 Pues chequer que war iyajta ut ibꞌa taca tunor e hermanuobꞌ tiaꞌ turox tama e departamento Macedonia. Pero cꞌani cawareox era cawermanuox, tuaꞌ iwacta ibꞌa tuaꞌ abꞌoro más icꞌunersiaj tut ibꞌa más ubꞌan.  
\v 11 Y turbꞌanic ibꞌa tuaꞌ ixturuan taca inteꞌ chꞌancabꞌar tama iwalma, y ira iyose ibꞌa tamar lo que majax tibꞌa, y patnenic taca icꞌabꞌ tuaꞌ iche lo que tibꞌa bꞌan cocha cay cawareox bꞌajxan.  
\v 12 Bꞌan ucꞌani tuaꞌ iche tuaꞌ atzay ixerna umen tunor tin e machi unatobꞌ chi Cadiosir, y tuaꞌ machi acꞌapa lo que ucꞌani tama icuxtar.   
\s1 Conda asutpa watar Cawinquirar otronyajr  
\p
\v 13 Pues entonces niwermanuox, machi cacꞌani tuaꞌ ixquetpa bꞌan taca que matucꞌa inata tamar tin e cꞌapa chamayobꞌ. Y machi cacꞌani tuaꞌ ixaru meyra tamar tin e wartocto achamay bꞌan cocha uchiobꞌ tin e machi war ucojcobꞌ tama Cawinquirar.  
\v 14 Pues bꞌan cocha cacꞌupse que chamay e Jesús y que de allí sutpa bꞌixcꞌa tujam e chamenobꞌ, y bꞌan ixto cacꞌupse ubꞌan que Cadiosir cꞌani usuti ubꞌixqꞌues tunor tin e chamayobꞌ xeꞌ war acꞌupseyanobꞌ tama e Jesús, y que conda asutpa watar Cawinquirar otronyajr que cꞌani uqꞌueche watar tunor e ajcꞌupesiajobꞌ era tacar ubꞌan.   
\p
\v 15 Pues entonces cꞌani cawajcꞌox era inteꞌ canseyaj que cachꞌami tuaꞌ Cawinquirar xeꞌ che que non xeꞌ bꞌixironto tara tor e rum conda asutpa watar Cawinquirar que majax non xeꞌ tuaꞌ caxin bꞌajxan, sino que tin e chamayobꞌ xeꞌ cꞌupseyanobꞌ tama Cawinquirar cꞌani asujta abꞌixqꞌuesnobꞌ bꞌajxan, y de allí cꞌani caqꞌuejcha caxin tichan non ubꞌan tacarobꞌ.  
\v 16 Porque Cawinquirar cꞌani ecmay watar tut e qꞌuin y cꞌani aꞌru taca inteꞌ nuxi nuc. Y e más nuxi ángel cꞌani aꞌru taca inteꞌ nuxi nuc ubꞌan. Y cꞌani aꞌru ucorneta e Dios. Y tamar era tunor tin e chamayobꞌ xeꞌ cꞌupseyanobꞌ tama e Cristo cꞌani abꞌixqꞌuesnobꞌ tujam e chamenobꞌ bꞌajxan.  
\v 17 Y de allí tunoron xeꞌ quetponto tara tor e rum cꞌani caqꞌuejcha caxin tichan tama e tocar taca tunor tin e bꞌixqꞌuesnobꞌ era tuaꞌ catajwi cabꞌa taca Cawinquirar tama e icꞌar tichan. Y tamar era cꞌani caquetpa tacar Cawinquirar inyajrer.  
\v 18 Pues tꞌabꞌsenic iwalma taca e canseyaj era tuaꞌ machi ixquetpa tzajtaca iut tamar tin e chamayobꞌ xeꞌ cꞌupseyanobꞌ tama Cawinquirar.   
\c 5  
\p
\v 1 Pues entonces niwermanuox, matucꞌa tamar tuaꞌ inwareox tama e tiempo y nien tama e hora conda cꞌani asutpa watar Cawinquirar Jesucristo otronyajr,  
\v 2 porque warix inata tama tunor era. Porque cꞌani acꞌotoy e día conda cꞌani asutpa watar Cawinquirar otronyajr conda mamajchi war ucojco que jax e día era conda tuaꞌ watar, bꞌan cocha conda acꞌotoy inteꞌ ajxujch acbꞌar.  
\v 3 Pero watar e día era conda e gente war chenobꞌ que: “Mix tucꞌa tamar tuaꞌ cabꞌijnu yaꞌ”, chenobꞌ. Pero jax tama e hora era conda cꞌani achecta watar inteꞌ nuxi tijresiaj tama ujorobꞌ wacchetaca, bꞌan cocha inteꞌ ixic conda acꞌotoy e hora tuaꞌ aqꞌuechuan uyar que watar inteꞌ nuxi cꞌuxner tamar, y bꞌan e nuxi tijresiaj era que mix cocha tuaꞌ alocꞌoy aꞌjniobꞌ tut.  
\v 4 Pero nox niwermanuox, machi turox tama e incsibꞌaner bꞌan cocha tin e machi unatobꞌ chi Cawinquirar. Y tamar era machi tuaꞌ ixbꞌajcꞌusena conda achecta e día conda asutpa watar Cawinquirar Jesucristo bꞌan cocha abꞌajcꞌusena inteꞌ conda achecta inteꞌ ajxujch acbꞌar.  
\v 5 Porque cocha tunorox ajcꞌupesiajox tama Cawinquirar war ixturuan tama e janchꞌaquenar y war ixturuan tama e día, y tamar era mix jax mucur tunor era tiut nox bꞌan cocha aquetpa mucur tut tin e aturuanobꞌ tama e incsibꞌaner umen que ajmabꞌambꞌanirobꞌ.  
\v 6 Y tamar era machi cawactic cabꞌa tuaꞌ cache bꞌan cocha uchiobꞌ tin e ubꞌijnuobꞌ que matucꞌa ucꞌampibꞌir uyojroner e Dios porque ujorobꞌ e gente era war awayan, pero nox bꞌixqꞌuesic ijor y cojconic ibꞌa tuaꞌ machi iche e mabꞌambꞌanir.  
\v 7 Tin e awayan tama e acbꞌar awayanobꞌ, y tin e acaray, tama e acbꞌar acarayobꞌ ubꞌan.  
\v 8 Pero cocha non war caturuan tama e día ucꞌani tuaꞌ cacojco cabꞌa tuaꞌ machi cache bꞌan cocha uchiobꞌ tin e turobꞌ tama e acbꞌar. Pues turbꞌanic e cꞌupesiaj tama Cawinquirar y turbꞌanic ucꞌunersiaj e Dios xeꞌ aquetpa bꞌan cocha inteꞌ taqꞌuin lo que uturbꞌa inteꞌ soldado tuaꞌ ucojco ut ubꞌa. Y cojconic tama ucorpesiaj Cawinquirar xeꞌ bꞌan cocha inteꞌ soldado xeꞌ ucꞌampes inteꞌ casco tuaꞌ ucorpes ujor tuaꞌ machi achamesna.  
\v 9 Porque Cadiosir machi uquetion tuaꞌ caxin cachꞌami uqꞌuijnar, sino que uquetion tuaꞌ cacorpesna umen lo que uche Cawinquirar Jesucristo  
\v 10 xeꞌ ixin chamay tamaron tuaꞌ uyubꞌion caxin caturuan tacar. Y bꞌan tuaꞌ cache jay bꞌixiron tara tor e rum o jay caxin cachamay, pero cꞌani caxin caturuan tacar jaxir watar e día.  
\v 11 Y tamar era tꞌabꞌsenic ibꞌa inteꞌ intiox tama e ojroner era y qꞌuecꞌojsenic ibꞌa inteꞌ intiox tamar era ubꞌan, bꞌan cocha warix iche.   
\s1 Ayan inteꞌ uyojroner e Pablo tama e hermanuobꞌ era  
\p
\v 12 Pues niwermanuox, cꞌani cawareox era tuaꞌ machi iwactobꞌ bꞌan taca tin e war uchiobꞌ meyra upatnar Cawinquirar tacarox y tin e líder tibꞌa, porque jaxirobꞌ war ubꞌijresox y war ucansiox bꞌan cocha ucꞌani Cawinquirar.  
\v 13 Pues chojbꞌesic y yajtanic utobꞌ meyra tama e patnar lo que war uchiobꞌ tacarox. Y turuanic taca e jiriar inteꞌ intiox.   
\p
\v 14 Pues cawermanuox, cꞌani cawareox era que arenic tuaꞌ apatna más tin e war acꞌoyi apatnobꞌ, y tacrenic tuaꞌ achpa tama ubꞌir e Dios tin e insis turu, y tacrenic tin e injayjay tuaꞌ aqꞌuecꞌo axanobꞌ, y turbꞌanic ibꞌa tuaꞌ aquetpa incꞌun iwirnar tut tunor e gente.   
\p
\v 15 Y iwiric que mamajchi tijam axin utoyi uyeror ut tut tin e cay uche e mabꞌambꞌanir upater, sino que turbꞌanic ibꞌa tuaꞌ iche ajtaca lo que erach tijam y tut tunor e inmojr gente ubꞌan.   
\p
\v 16 Entonces turbꞌanic ibꞌa tuaꞌ ixquetpa ixtzay iraj iraj.  
\v 17 Cꞌajtinic taca e Dios iraj iraj.  
\v 18 Tattzꞌic ucꞌabꞌa Cadiosir taric lo que taric, porque jax lo que ucꞌani Cadiosir tamarox xeꞌ ajcꞌupesiajox tama e Cristo Jesús.   
\p
\v 19 Y ira iquete iwabꞌu Unawalir e Dios.  
\v 20 Y ira ixejbꞌe ut inteꞌ ojroner xeꞌ ebꞌtana tari umen e Dios.  
\v 21 Chꞌujcunic iwira jay imbꞌutz o jay majax imbꞌutz tunor e ojroner cocha era, y chꞌujbꞌanic tunor lo que imbꞌutz,  
\v 22 y loqꞌuenic tut tunor e mabꞌambꞌanir.   
\p
\v 23 Pues e Dios xeꞌ uyajcꞌon e jiriar uchꞌijsenicox tuaꞌ aquetpa erach inyajrer tunor imajin y tunor iwalma y tunor icuerpo tuaꞌ machi aquetpa nien imbꞌijc e bꞌonemar tuaꞌ e mabꞌambꞌanir tamarox, y que bꞌan taca tuaꞌ ixquetpa este que asutpa watar Cawinquirar Jesucristo otronyajr.  
\v 24 Pues Cadiosir xeꞌ cay usicbꞌox ma tiaꞌ ixin majresian y jaxir cꞌani acꞌapa uche tunor lo que cay uyareox.   
\s1 Jax era inteꞌ cꞌajpesiaj  
\p
\v 25 Pues niwermanuox, cꞌajtinic taca e Dios tamaron.   
\p
\v 26 Tzꞌujtzꞌinic ibꞌa inteꞌ intiox taca inteꞌ tzꞌujtzꞌiaj xeꞌ erach tut e Dios.   
\p
\v 27 Cꞌani inwareox tama ucꞌabꞌa Cawinquirar tuaꞌ iche leer e carta era tut tunor e ajcꞌupesiajobꞌ.   
\p
\v 28 Cawinquirar Jesucristo utacricox inteꞌ intiox. Tara acꞌapa tunor niwojroner, che e Pablo.