\id 1PE - Chortí NT -Guatemala 2012 (DBL -2013) 
\h 1 PEDRO 
\toc1 Jax era e bꞌajxan ojroner lo que tzꞌijbꞌabꞌir umen e Apóstol Pedro 
\toc2 1 Pedro 
\toc3 1 P 
\mt2 Jax era e bꞌajxan ojroner lo que tzꞌijbꞌabꞌir umen e Apóstol Pedro  
\c 1  
\s1 E Pedro utzꞌijbꞌa inteꞌ carta tama tunor e hermanuobꞌ xeꞌ ajnesna ixiobꞌ innajt  
\p
\v 1 Nen Pedroen xeꞌ jax inteꞌ apóstol tuaꞌ Cawinquirar Jesucristo war intzꞌijbꞌa e carta era tibꞌa xeꞌ niwermanuox. Y cocha ajnesna ixiox innajt war ixturuan tic taca tama tunor e chinamobꞌ tama e departamento Ponto, y tama e departamento Galacia, y tama e departamento Capadocia. Y war ixturuan tama tunor e chinamobꞌ tama e departamento Asia, y tama e departamento Bitinia.  
\v 2 Pues sicbꞌabꞌirox umen Catata Dios bꞌan cocha ubꞌijnu uche conda ne mato achena ani or e rum era. Y nox sicbꞌabꞌirox umen Unawalir e Dios tuaꞌ ixcꞌotoy ixcꞌupseyan tut Cawinquirar Jesucristo y tuaꞌ ixquetpa pocbꞌir tamar uchꞌichꞌer jaxir. Que Cadiosir uyajqꞌuicox meyra utacarsiaj y ujiriar.   
\s1 Lo que ayan tuaꞌ cacojco tamar  
\p
\v 3 Pues entonces catattzꞌi ucꞌabꞌa Cadiosir xeꞌ jax Utata Cawinquirar Jesucristo que tamar ucꞌunersiaj uchion cacuxpa otronyajr umen que usuti ubꞌixqꞌues e Jesucristo tujam e chamenobꞌ tuaꞌ cacꞌotoy cacojcsan tamar jaxir.  
\v 4 Pues tunor lo que war cacojco tuaꞌ cachꞌami tuaꞌ e Dios war atꞌabꞌesna umener tichan tut e qꞌuin tiaꞌ machi tuaꞌ atijresna y tiaꞌ machi tuaꞌ abꞌontzꞌa y tiaꞌ machi tuaꞌ asatpa ut.  
\v 5 Y umen que war cacꞌupseyan tamar jaxir, war ucojcon tacar ucꞌotorer este que axin uchectes inyajrer e corpesiaj tama ucꞌapesnibꞌir e tiempo era conda asutpa watar Cawinquirar Jesucristo otronyajr.   
\p
\v 6 Entonces tzayenic tama tunor era motor que bꞌajcꞌat ucꞌani tuaꞌ inumse ibꞌa meyra tama e tiempo era.  
\v 7 Pues más atujri icꞌupesiaj que e oro xeꞌ erer atijresna. Porque e oro erer atajwina cobꞌa atujri conda aturbꞌana tor e cꞌajc tama ingojr bꞌejt tuaꞌ ajacha, y jay matucꞌa e sojc tamar entonces war che era que meyra utujrir. Y bꞌan ubꞌan icꞌupesiaj, conda war inumse ibꞌa aquetpa chequer cobꞌa icꞌupesiaj jay machi ixcucrema tamar lo que war inumse ibꞌa. Porque e cꞌupesiaj xeꞌ aqꞌuecꞌo cocha era atujri meyra y tamar era tin e war acꞌupseyan tama e Dios cocha era cꞌani atajttzꞌobꞌ y cꞌani achenobꞌ honrar y cꞌani aꞌjcꞌunobꞌ utawarer e Dios conda achecta watar e Jesucristo otronyajr.   
\p
\v 8 Pues nox ma tiaꞌ cꞌotoyox iwira ut e Jesucristo pero war iyajta ut. Y motor que machi war iwira ut coner pero war ixcꞌupseyan tamar y war ixtzay nojta tama iwalma este que machi uyubꞌiox iware cobꞌa tzayer war icojco.  
\v 9 Y tamar icꞌupesiaj era war ichꞌami lo que war uyusre iwalma xeꞌ jax e corpesiaj.   
\p
\v 10 Pues e profetobꞌ xeꞌ turuan tama e onian tiempo cay ubꞌijnuobꞌ meyra tamar e corpesiaj era lo que war cachꞌami non coner, y jaxirobꞌ cay ojronobꞌ meyra tamar ucꞌunersiaj e Dios y lo que aquetpa tuaꞌ cachꞌami non tama e tiempo era.  
\v 11 Pues jax Unawalir e Cristo xeꞌ cay uwirse e profetobꞌ era lo que aquetpa tuaꞌ unumse ubꞌa e Cristo y e nuxi tawarer lo que aquetpa tuaꞌ uchꞌami ubꞌan. Y jaxirobꞌ cay usicbꞌobꞌ tuaꞌ unatobꞌ chi era xeꞌ aquetpa tuaꞌ watar y tucꞌa tiempo tuaꞌ achecta ut jaxir bꞌan cocha irsenobꞌ umen Unawalir e Cristo xeꞌ turu tacarobꞌ.  
\v 12 Pero e Dios cay uwirse e profetobꞌ era que lo que war uchecsuobꞌ tut e gente machi tuaꞌ anumuy tama e tiempo conda turobꞌto jaxirobꞌ tara tor e rum, sino que tamar e tiempo era. Y jax era e ojroner lo que cay checsuna tiut umen tin e cay uchecsu uyojroner e Dios tama e corpesiaj tiut tama ucꞌotorer Unawalir e Dios xeꞌ ebꞌetbꞌir tari tut e qꞌuin. Y motor tin e angelobꞌ war uyusreobꞌ tuaꞌ uyubꞌiobꞌ más tama tunor e corpesiaj era lo que war cachꞌami non.   
\s1 “Quetpenic erach porque nen erachen”, che e Dios  
\p
\v 13 Pues entonces ustesic ibꞌa tuaꞌ ibꞌijnu tamar lo que cꞌani iche jay imbꞌutz o jay majax imbꞌutz. Cojconic ibꞌa tuaꞌ machi iche e mabꞌambꞌanir sino que turbꞌanic ibꞌa tuaꞌ icojco tama e Jesucristo tuaꞌ erer ichꞌami tunor e tacarsiaj lo que e Dios cꞌani uyajcꞌon conda achecta watar Cawinquirar otronyajr.  
\v 14 Y non cocha umaxtacon e Dios xeꞌ war cacꞌupseyan tut jaxir, machi ixto tuaꞌ cache bꞌan cocha cay cosre ani conda merato canata chi e Dios.  
\v 15 Pero bꞌan cocha aquetpa erach Cadiosir y bꞌan tuaꞌ caxin cache non ubꞌan, porque erach Cadiosir xeꞌ upejcon.  
\v 16 Bꞌan cocha chꞌar tzꞌijbꞌabꞌir tama uyojroner e Dios: “Quetpenic erach porque nen erachen”, che e Dios.   
\p
\v 17 Y cocha tunoron war cacꞌajti taca Catata Dios xeꞌ war ubꞌijnu uwira tunor lo que war cache tara tor e rum jay imbꞌutz o jay majax imbꞌutz, y cocha jax jaxir xeꞌ tuaꞌ uyajcꞌu uyeror inteꞌ intion watar e hora, pues non ucꞌani tuaꞌ cabꞌacre ut jaxir iraj iraj tama tunor cacuxtar tara tor e rum.  
\v 18 Pues jax Cadiosir xeꞌ ixin ucorpeson tama cacuxtar xeꞌ ma ani tucꞌa ucꞌampibꞌir lo que cachꞌami tuaꞌ catata viejobꞌirobꞌ. Y war inata que e corpesiaj era majax mambꞌir taca e oro o taca e tumin xeꞌ aquetpa tuaꞌ acꞌapa,  
\v 19 sino que corpesbꞌiron umen e Cristo xeꞌ chamesna tamaron conda uwechꞌe uchꞌichꞌer tut e cruz. Y tunor era uche tamaron, bꞌan cocha conda achamesna incojt oveja xeꞌ matucꞌa e bꞌonemar tamar, y bꞌan cocha era chamesna e Cristo tamaron.  
\v 20 Pues conda ne mato achena ani or e rum era quetpa que e Cristo jax xeꞌ tuaꞌ achamesna tuaꞌ uyajcꞌon e corpesiaj. Pero esto tama e tiempo era cꞌotoy chectesna ticoit tuaꞌ aquetpa Cawajtacarsiaj ticabꞌa.  
\v 21 Y umen lo que uche e Cristo tamaron cꞌotoy cꞌupseyanox tama e Dios xeꞌ usuti ubꞌixqꞌues e Cristo tujam e chamenobꞌ y xeꞌ sutpa utattzꞌi ucꞌabꞌa ubꞌan, y tamar era nox war ixcꞌupseyan tama e Dios coner y war icojco tamar tuaꞌ ichꞌami e cuxtar xeꞌ machi tuaꞌ acꞌapa.   
\p
\v 22 Y cocha pocbꞌirix tunor iwalma umen que war ixcꞌupseyan tut lo que erach cꞌotoy icꞌani meyra tunor e ajcꞌupesiajobꞌ tama Cawinquirar. Y tamar era cꞌani inwareox que yajtanic ut tunor e ajcꞌupesiajobꞌ era taca tunor iwalma y taca tunor iqꞌuecꞌuar.  
\v 23 Porque nox sutpa cuxpox otronyajr, pero majax umen inteꞌ tatabꞌir tara tor e rum xeꞌ aquetpa tuaꞌ achamay, sino que tamar uyojroner e Dios xeꞌ bꞌixir y xeꞌ machi tuaꞌ acꞌapa.  
\v 24 Bꞌan cocha chꞌar tzꞌijbꞌabꞌir tama uyojroner e Dios que:  
\q1 E winicobꞌ bꞌan ucuxtarobꞌ cocha e cꞌopot,  
\q1 y tunor lo que ubꞌijnu uchiobꞌ xeꞌ nojta aquetpa bꞌan cocha unichir e cꞌopot xeꞌ galan uwirnar conda asacojpa,  
\q1 pero xeꞌ axin ataqui conda aqꞌuijna uwarar e qꞌuin y axin ojri unichir.  
\q1 Y bꞌan cocha era tuaꞌ achamayobꞌ e winicobꞌ tara tor e rum ubꞌan.   
\q1
\v 25 Pero uyojroner e Dios ma tiaꞌ tuaꞌ acꞌapa,  
\m xeꞌ chꞌar tzꞌijbꞌabꞌir tama uyojroner e Dios. Y jax era uyojroner e Dios tama e corpesiaj xeꞌ checsuna tiut y xeꞌ cay ichꞌami.   
\c 2  
\p
\v 1 Y tamar era ucꞌani tuaꞌ iwacta tunor e mabꞌambꞌanir y tunor e majresiaj, y ira iche ibꞌa que war iche lo que imbꞌutz tut e gente jay majax bꞌan war iche, y ira acꞌuxnaqꞌui iwira lo que ayan tuaꞌ otronteꞌ, y ira ixojron upater otronteꞌ.  
\v 2 Chenic ibꞌa bꞌan cocha inteꞌ chꞌurcabꞌ xeꞌ wartocto acuxpa xeꞌ war usajca e chuꞌ xeꞌ ayan tama utuꞌ. Y bꞌan cocha era ucꞌani tuaꞌ ichꞌami lo que ayan tama uyojroner e Dios xeꞌ erach ubꞌan. Porque tamar era erer ixchꞌiꞌ tama icuxtar y erer aquetpa chequer que war ichꞌami e corpesiaj.  
\v 3 Bꞌan cocha chꞌar tzꞌijbꞌabꞌir tama uyojroner e Dios que: “Tunor tin e axin uyejta ucꞌunersiaj e Cawinquirar Dios war unatobꞌ que galan tunor era.” Bꞌan chꞌar tzꞌijbꞌabꞌir tama uyojroner e Dios.   
\s1 E Cristo quetpa bꞌan cocha inteꞌ tun xeꞌ bꞌixir  
\p
\v 4 Pues entonces laric tut Cawinquirar xeꞌ bꞌan cocha ingojr tun xeꞌ bꞌixir. Y motor que quetpa chocbꞌir umen e winicobꞌ pero quetpa sicbꞌabꞌir umen e Dios y aquetpa bꞌan cocha ingojr tun xeꞌ meyra atujri tut e Dios.  
\v 5 Pues inteꞌ intion laron cocha ingojr tun xeꞌ bꞌixir xeꞌ ayan ucꞌampibꞌir tut e Dios tuaꞌ uche inteꞌ otot tamar. Y tamar era non war caquetpa bꞌan cocha inteꞌ otot tama cawalma tiaꞌ war aturuan Unawalir e Dios. Y laron cocha cora sacerdotion xeꞌ erach xeꞌ turon tuaꞌ catattzꞌi ucꞌabꞌa Catata Dios iraj iraj tama ucꞌabꞌa e Jesucristo.  
\v 6 Bꞌan cocha chꞌar tzꞌijbꞌabꞌir tama uyojroner e Dios que:  
\q1 Ubꞌinic, nen inturbꞌa tama e lugar Sión inteꞌ xeꞌ bꞌan cocha ingojr tun. Y e tun era bꞌan cocha xeꞌ aturbꞌana tama uwabꞌnibꞌ inteꞌ otot, y xeꞌ sicbꞌabꞌir umen e Dios y xeꞌ meyra atujri.  
\q1 Y tin e acꞌotoy acꞌupseyan tamar xeꞌ bꞌan cocha e tun era, ma tiaꞌ tuaꞌ asubꞌajra conda acꞌotoy tut Catata Dios,  
\m Bꞌan che e Dios tama uyojroner.  
\v 7 Pues ticoit non xeꞌ war cacꞌupseyan tama e Cristo atujri meyra, pero tut tin e machi acꞌupseyanobꞌ tamar aquetpa que matucꞌa ucꞌampibꞌir tutobꞌ, porque bꞌan chꞌar tzꞌijbꞌabꞌir tama uyojroner e Dios tiaꞌ che:  
\q1 E tun xeꞌ chocbꞌirix ani umen e ajcheyaj otot  
\q1 ayan meyra ucꞌampibꞌir coner,  
\m xeꞌ che tama uyojroner e Dios.  
\v 8 Y otronyajrto chꞌar tzꞌijbꞌabꞌir tiaꞌ che que:  
\q1 Ayan inteꞌ xeꞌ lar tacar ingojr tun xeꞌ chꞌar tama ut e bꞌir xeꞌ uche acucrema tunor tin e uyobꞌi ubꞌobꞌ tamar,  
\m xeꞌ che tama uyojroner e Dios. Pues tin e acucrema cocha era uchiobꞌ umen que machi ucꞌaniobꞌ e ojroner tama e Jesucristo. Y bꞌan quetpa tuaꞌ anumuy tama tunor tin e machi cꞌani acꞌupseyanobꞌ tama ucꞌabꞌa Cawinquirar Jesucristo.   
\p
\v 9 Pues tunoron bꞌanon cocha inteꞌ familía xeꞌ sicbꞌabꞌir umen e Dios, y bꞌanon cocha cora sacerdote xeꞌ aquetpa tuaꞌ cache upatnar Carey tichan, y bꞌanon cocha inteꞌ chinam xeꞌ erach, y bꞌanon cocha inteꞌ chinam xeꞌ mambꞌir umen e Dios. Y bꞌan caquetpa tuaꞌ uyubꞌion caxin cachecsu tut e gente axin tunor e tattzꞌarsiaj tama Cadiosir xeꞌ jax xeꞌ upejcon tuaꞌ calocꞌoy tama e incsibꞌaner y tuaꞌ caturuan tama e janchꞌaquenar xeꞌ galan.  
\v 10 Pues tama e tiempo xeꞌ numuy conda merato ichꞌami uyojroner e Dios mato jax chinamox ani, pero coner cꞌotoy ixquetpa uchinamox e Dios. Y tama e tiempo xeꞌ numuy mamajchi cꞌani atzay uwirox, pero coner e Dios war atzay uwirox.   
\s1 Turbꞌanic ibꞌa tuaꞌ iche lo que ucꞌani e Dios  
\p
\v 11 Pues entonces niwermanuox xeꞌ inchoj iut nimener, cꞌani inwareox era que non bꞌanon cocha inteꞌ ajxambꞌar tara tor e rum, porque calugar jax lo que chembꞌir umen e Dios tut e qꞌuin. Y tamar era cꞌani inwareox que ira iwacta ibꞌa tuaꞌ ixpijchna umen lo que uyusre uche iwerir porque tunor era jax lo que ucucru ani uyalma inteꞌ.  
\v 12 Y xanenic erach tujam tin e merato acꞌotoy unatobꞌ chi Cadiosir, porque bꞌajcꞌat ayan tin e tujam xeꞌ axin oꞌjron ipater que mabꞌambꞌan tunor lo que war iche, pero xeꞌ axin uwira otronyajr que war iche jax taca lo que erach, y tamar era cꞌani utattzꞌiobꞌ ucꞌabꞌa Cadiosir tamar lo que iche conda asutpa watar Cawinquirar otronyajr.   
\p
\v 13 Pues umen que bꞌan ucꞌani Cawinquirar, cꞌupseyanenic tut tunor tin e war acꞌotoriobꞌ tara tor e rum. Pues bꞌan ucꞌani tuaꞌ iche tut e presidente, cocha jax xeꞌ más meyra ayan ucꞌotorer.  
\v 14 Y bꞌan ucꞌani tuaꞌ iche tut e gobernador ubꞌan porque jaxir ebꞌetna tari umen e presidente tuaꞌ uwatzꞌi tunor tin e war uchiobꞌ lo que mabꞌambꞌan y tuaꞌ utattzꞌi tunor tin e war uchiobꞌ lo que imbꞌutz.  
\v 15 Porque Cadiosir war ucꞌani tuaꞌ ixixin iche intaca lo que erach, y tamar era tin e machi unatobꞌ tucꞌa war oꞌjronobꞌ y tin e intaca oꞌjronobꞌ cꞌani amactzꞌa uyejobꞌ tuaꞌ machi oꞌjronobꞌ ipater umen que war uwirobꞌ que erach tunor lo que war iche.   
\p
\v 16 Entonces chenic bꞌan cocha uche inteꞌ xeꞌ corpesbꞌirix, pero ira icꞌampes icorpesiaj era tuaꞌ iche e mabꞌambꞌanir mucur, sino que chenic bꞌan cocha ucꞌani tuaꞌ uche inteꞌ xeꞌ jax inteꞌ man tuaꞌ e Dios.  
\v 17 Chenic ibꞌa erach tut tunor e gente tuaꞌ atzayobꞌ uwirox. Yajtanic ut tunor tin e ajcꞌupesiajobꞌ tama Cawinquirar. Bꞌacrenic e Dios, y cꞌupsenic lo que che e presidente.   
\s1 Chenic bꞌan cocha cay uche e Cristo conda cay unumse ubꞌa tara tor e rum  
\p
\v 18 Y nox xeꞌ ajpatnarox, cꞌupseyanenic tut ipatron taca tunor iwalma motor jay uche lo que imbꞌutz tiut o motor jay mabꞌambꞌan uche tiut.  
\v 19 Pues imbꞌutz tut e Dios tuaꞌ caquetpa tzꞌustaca conda war canumse cabꞌa motor que matucꞌa war cache jay war canumse cabꞌa umen que war cabꞌijnu tuaꞌ caquetpa bꞌan cocha ucꞌani e Dios.  
\v 20 Pero jay axin ajajtzꞌa inteꞌ tijam umen que uche e mabꞌambꞌanir ¿cocha tuaꞌ ibꞌijnu jay imbꞌutz tut e Dios tuaꞌ ixquetpa tzꞌustaca conda war ixjajtzꞌa tamar lo que ixbꞌeto? Pero jay ixjajtzꞌa conda war iche intaca lo que imbꞌutz y matucꞌa war ixbꞌeto, entonces ayan ucꞌampibꞌir tut e Dios tuaꞌ ixquetpa tzꞌustaca conda war inumse ibꞌa cocha era.  
\v 21 Porque tamar era pejcbꞌirox umen e Dios, porque e Cristo cay unumse ubꞌa meyra tamarox y cay uwirsion cocha tuaꞌ cache non tuaꞌ uyubꞌion caxin cache bꞌan cocha uche jaxir.  
\v 22 Porque e Cristo matucꞌa e mabꞌambꞌanir cay uche, y ma tiaꞌ ixin majresian.  
\v 23 Y conda cꞌayna matucꞌa ojron, y conda chena unumse ubꞌa matucꞌa uyare tuaꞌ ubꞌajcꞌuse e gente era, sino que uyacta tunor era tama ucꞌabꞌ e Dios xeꞌ uche lo que erach conda uche juzgar.  
\v 24 Porque e Cristo ucuchi ixin tunor camabꞌambꞌanir tama ucuerpo conda chꞌubꞌna tut e cruz tuaꞌ cacꞌotoy caquetpa chamen non tut e mabꞌambꞌanir y tuaꞌ cacꞌotoy caturuan tama inteꞌ cuxtar xeꞌ erach. Pues upat e Cristo witcꞌa conda jajtzꞌa y tamar era quetpon tzꞌacpesbꞌir.  
\v 25 Pues nox ixnix war ani ixxana cocha inteꞌ oveja xeꞌ ajsatpar, pero coner yopox tut e Cristo xeꞌ aquetpa bꞌan cocha inteꞌ ajcojc oveja tibꞌa nox. Y bꞌan cocha era war ucojco tunor iwalma coner ubꞌan.   
\c 3  
\s1 Cocha tuaꞌ ucojco ubꞌobꞌ inteꞌ ixic y inteꞌ winic xeꞌ nujbꞌirobꞌix  
\p
\v 1 Pues entonces nox xeꞌ ixcarbꞌirox, manxujresic ibꞌa tut iviejo bꞌan cocha uche e Cristo tut e chamer, porque jay ayan inteꞌ winic xeꞌ machi war ucꞌupse uyojroner e Dios, bꞌajcꞌat erer acꞌotoy acꞌupseyan tama e Cristo umen lo que uwira iche xeꞌ erach y matucꞌa tuaꞌ iware,  
\v 2 sino que axin uchꞌami uyojroner e Dios conda uwira que war iche erach tunor y que war ixcꞌupseyan tut tunor lo que war uyareox iche.  
\v 3 Y conda iyustes ibꞌa tuaꞌ aquetpa más imbꞌutz iwirnar ira ibꞌijnu tamar taca lo que chequer patir tama icuerpo, o tuaꞌ imani lo que meyra atujri lo que erer atzꞌabꞌpruma ut tuaꞌ iturbꞌa tama utzutzer ijor, o tuaꞌ imani lo que chembꞌir tama e oro tuaꞌ iturbꞌa, o tamar lo que erer ilapi xeꞌ meyra atujri,  
\v 4 sino que bꞌijnunic jay ayan ucꞌunersiaj e Dios tama iwalma. Porque ayan meyra ucꞌampibꞌir jay incꞌun uyalma inteꞌ ixic y jay inchiꞌ lo que alocꞌoy tama uyojroner. Porque uwirnar cocha era machi tuaꞌ acꞌapa y meyra atujri tut e Dios ubꞌan.  
\v 5 Pues bꞌan cay uchiobꞌ e ixictac tuaꞌ aquetpa galan uwirnarobꞌ xeꞌ xanobꞌ tama ubꞌir e Dios tama e onian tiempo. Jaxirobꞌ cꞌupseyanobꞌ tama e Dios y cꞌupseyanobꞌ tut uviejo ubꞌan.  
\v 6 Pues bꞌan cay uche e Sara tama e onian tiempo xeꞌ ucꞌupse tunor lo que arobꞌna umen e Abraham xeꞌ jax uviejo este que cay uyare que: “Jax niwinquiret.” Y nox coner quetpox ijchꞌoctacox tuaꞌ e Sara era jay iche lo que erach tama tunor y jay machi ixixin ixbꞌacta.   
\p
\v 7 Y nox xeꞌ winicox, tzayenic tuaꞌ ixturuan taca iwixcar y yajtanic ut porque war canata que uwixcar inteꞌ machi aqꞌuecꞌo cocha aqꞌuecꞌo inteꞌ winic y que jaxirobꞌ ayan ucuxtar e Dios tacarobꞌ bꞌan cocha ayan tacaron. Chenic cocha era porque jay majax bꞌan iche, machi tuaꞌ ichꞌami lo que war icꞌajti taca e Dios.   
\s1 Tin e war unumse ubꞌobꞌ umen que war uchiobꞌ lo que erach  
\p
\v 8 Pues entonces tzayenic tunorox tuaꞌ ixturuan tamar inteꞌ taca bꞌijnusiaj. Y quetpenic incꞌun iwirnar tut inteꞌ cocha inteꞌ, y yajtanic ut ibꞌa inteꞌ intiox xeꞌ ajcꞌupesiajox. Y quetpenic taca inteꞌ tzayer tama iweroj tut e gente, y manxujresic ibꞌa tut ipiar ubꞌan.  
\v 9 Y ira isuti uyeror ut tama tin e war uche e mabꞌambꞌanir ipater. Y ira ibꞌaxe tin e war ubꞌaxeox, sino que chojbꞌesic utobꞌ. Porque Cadiosir ixin upejcox tuaꞌ ichꞌami e chojbꞌesiaj.  
\v 10 Porque chꞌar tzꞌijbꞌabꞌir tama uyojroner e Dios tiaꞌ che:  
\q1 Tin e uyajta ut ucuxtar y xeꞌ cꞌani aturuan meyra tiempo tara tor e rum  
\q1 umaquic uyej tuaꞌ machi oꞌjron lo que mabꞌambꞌan  
\q1 y tuaꞌ machi amajresian.   
\q1
\v 11 Loqꞌuenic najtir tut e mabꞌambꞌanir y chenic lo que erach.  
\q1 Sajcanic ujiriar e Dios y xanenic tamar.   
\q1
\v 12 Porque Cawinquirar ucojco tunor tin e uchiobꞌ lo que imbꞌutz  
\q1 y uchiquini lo que ucꞌajtiobꞌ tacar.  
\q1 Pero usuti uyeroj tupat tut tin e uchiobꞌ e mabꞌambꞌanir.  
\m Bꞌan chꞌar tzꞌijbꞌabꞌir tama uyojroner e Dios.   
\p
\v 13 Entonces ¿chi tuaꞌ aqꞌuijna uwirox jay imbꞌutz taca war ibꞌijnu iche?  
\v 14 Pero jay war inumse ibꞌa tamar lo que war iche xeꞌ erach, tzayenic tamar porque cꞌani ixchojbꞌesna umen e Dios. Ira ibꞌacre nox lo que war ubꞌacriobꞌ e gente tara tor e rum, y ira iwacta aloqꞌuesna e jiriar lo que cay ichꞌami tuaꞌ e Dios.  
\v 15 Sino que turbꞌanic ibꞌa tama e Cristo xeꞌ jax Cawinquirar. Y bꞌijnunic iwira tucꞌa tuaꞌ iware tin e uyubꞌi tibꞌa tucꞌa tuaꞌ war icojco tama e Cristo cocha era. Pero iwiric ibꞌa tuaꞌ alocꞌoy incꞌun tunor iwojroner tutobꞌ.  
\v 16 Cojconic ibꞌa tuaꞌ inata que imbꞌutz tunor lo que war iche tut e Dios. Y tamar era tunor tin e axin oꞌjronobꞌ ipater umen que war iche intaca lo que imbꞌutz tama e Cristo, axin asubꞌajra utobꞌ tamar lo que cay ojronobꞌ ipater.  
\v 17 Entonces jay bꞌan ucꞌani e Dios más ani bueno tuaꞌ inumse ibꞌa umen que cay iche lo que erach que jay war inumse ibꞌa umen que cay iche lo que mabꞌambꞌan.   
\p
\v 18 Porque jax e Cristo xeꞌ chamay tuaꞌ utoyi tunor camabꞌambꞌanir inyajrer, y tamar era machi tuaꞌ asutpa achamay otronyajr. Jaxir erach, pero chamay tamaron xeꞌ ajmabꞌambꞌaniron tuaꞌ uqꞌuechion caxin tut Cadiosir. Jaxir chamesna tama ucuerpo pero sutpa bꞌixqꞌuesna umen Unawalir e Dios.  
\v 19 Pero conda merato asutpa abꞌixcꞌa ixin tuaꞌ uchecsu uyojroner e Dios tut e sian majinobꞌ tuaꞌ e chamenobꞌ xeꞌ chꞌarobꞌ preso.  
\v 20 Y e sian ajchamerobꞌ era jax tin e machi cꞌupseyanobꞌ tut e Dios tama e onian tiempo conda turuto e Noé war uche e nuxi barco. Pues tama e tiempo yajaꞌ e Dios cay cojcsan tama e gente era, cꞌani uwira jay acꞌotoy acꞌupseyanobꞌ ani tut. Pero ajtaca ocho gente xeꞌ jax e Noé taca uwixcar y umaxtac xeꞌ cꞌotoy corpesnobꞌ tama e jaꞌ.  
\v 21 Y e jaꞌ era jax uchequerir tuaꞌ e chꞌuymar xeꞌ war ucorpeson. Pues e chꞌuymar era majax bꞌan cocha conda axin aꞌti inteꞌ, sino que jax uchequerir que inteꞌ war uturbꞌa ubꞌa imbꞌutz tut e Dios tamar lo que ayan tama uyalma, y jax era lo que war ucorpeson coner tamar lo que uche e Jesucristo conda sutpa bꞌixcꞌa tujam e chamenobꞌ.  
\v 22 Y de allí tꞌabꞌay ixin e Jesucristo tut e qꞌuin y ya turu coner tama unojcꞌabꞌ Catata Dios. Y yebꞌar ucꞌotorer e Cristo era quetpobꞌ tunor e sian angelobꞌ y tunor e sian ajcꞌamparobꞌ y tunor e sian ajcꞌotorerobꞌ lo que ayan tut e qꞌuin.   
\c 4  
\s1 Inteꞌ intion ayan cacꞌampibꞌir bꞌan cocha ajcꞌunon umen e Dios  
\p
\v 1 Pues entonces cocha e Cristo cay unumse ubꞌa meyra tama uwerir, nox ucꞌani tuaꞌ ixquetpa turix tuaꞌ inumse ibꞌa tama iwerir ubꞌan, porque tin e axin unumse ubꞌa tama uwerir axin uyacta tunor e mabꞌambꞌanir,  
\v 2 y aquetpa tuaꞌ uche bꞌan taca cocha ucꞌani e Dios tama tunor ucuxtar tara tor e rum, y machi ixto tuaꞌ uche lo que uyusre uwerir.  
\v 3 Porque cay iche tama e tiempo xeꞌ numuy bꞌan cocha tin e matucꞌa unata tamar Cawinquirar, y meyra cay isati ibꞌa tama e mabꞌambꞌanir, y meyra cay iche lo que uyusre uche iwerir, y carayox, y nojqꞌuiniox, y cay xanox tupat e sian ixictac, y war iyujtzꞌi ut e sian chamen dios.  
\v 4 Pero coner tin e warto uchiobꞌ tunor e mabꞌambꞌanir cocha era war ubꞌijnu uwirobꞌ que nox machi ixto cꞌani ixxana tacarobꞌ, y tamar era war uqꞌuijnesox.  
\v 5 Pero inteꞌ ajmabꞌambꞌanir cocha era aquetpa tuaꞌ acꞌotoy uchectes ubꞌa tut e Dios watar e día porque jax e Dios xeꞌ tuaꞌ uche juzgar tunor tin e bꞌixirto y tunor tin e chamenix.  
\v 6 Y tamar era checsuna uyojroner e Dios tut tin e chamenobꞌ coner, conda mato jax chamenobꞌ ani. Y tunor tin e uchꞌamiobꞌ uyojroner e Dios motor jay chamenobꞌ, pero bꞌixir turu uyalmobꞌ tut e Dios.   
\p
\v 7 Pues entonces cocha watarix e día conda tuaꞌ acꞌapa tunor lo que ayan, bꞌijnunic ixto tama tunor lo que cꞌani iche, y turbꞌanic ibꞌa tuaꞌ icꞌajti taca e Dios iraj iraj.  
\v 8 Pero lo que ucꞌani tama tunor jax era: Que nox ixixin iyajta ut ibꞌa inteꞌ intiox, porque tin e war uyajta ut uyet ajcꞌupesiajir axin unajpes tunor lo que chena tacar. Y tin e ucꞌani uyet ajcꞌupesiajir war acꞌumpa tacar y war unajpes meyra e mabꞌambꞌanir.  
\v 9 Tzayenic tuaꞌ iwacta oꞌchoy inteꞌ hermano conda acꞌotoy tama iyotot y ajcꞌunic tiaꞌ tuaꞌ awayan y tucꞌa tuaꞌ ucꞌuxi y ira ixojron upater.  
\v 10 Pues inteꞌ intion ajcꞌunon cacꞌampibꞌir umen e Dios. Pero ucꞌani tuaꞌ cacꞌampes lo que ajcꞌunon era umen e Dios tuaꞌ catacre e inmojr hermanuobꞌ, cocha majax inteꞌ taca upatnar e Dios tuaꞌ achena.  
\v 11 Entonces tin e ajcꞌuna ucꞌampibꞌir tuaꞌ uchecsu uyojroner e Dios, ucꞌani tuaꞌ axin uche tunor era bꞌan cocha abꞌijresna umen e Dios. Y tin e ajcꞌuna ucꞌampibꞌir tuaꞌ atacarsan, ucꞌani tuaꞌ uche tunor era taca utacarsiaj e Dios. Pues tunor lo que cache, cachic tuaꞌ atajttzꞌa ucꞌabꞌa Catata Dios tama e Jesucristo. Porque jaxir ayan meyra utawarer y ayan meyra ucꞌotorer xeꞌ ma tiaꞌ tuaꞌ acꞌapa. Amén.   
\s1 Lo que tuaꞌ uche tin e war unumse ubꞌa umen que war acꞌupseyan tama Cawinquirar  
\p
\v 12 Pues entonces niwermanuox xeꞌ inchoj iut nimener, ira ibꞌijnu tamar lo que war inumse ibꞌa era, bꞌan cocha jay jax taca ani nox xeꞌ war inumse ibꞌa.  
\v 13 Pero tzayenic que nox uyubꞌiox inumse ibꞌa bꞌan cocha cay unumse ubꞌa e Cristo. Porque tamar era nox cꞌani ixixin ixtzay más nojta tama e día conda achecta watar e Cristo taca tunor utawarer.  
\v 14 Pues chojbꞌesbꞌir ut tin e acꞌayna umen taca que war acꞌupseyan tama e Cristo, porque Unawalir e Dios cꞌani aquetpa tacar jaxir taca tunor utawarer.  
\v 15 Pero jay ayan tijam tin e war unumse ubꞌa umen que war uche e mabꞌambꞌanir majax bueno tunor era. Entonces tin e war achamsan, o tin e war axujchꞌian, o tin e imbꞌacꞌajr uwirnar, o tin e war uyose ubꞌa tamar lo que majax tuaꞌ y war unumse ubꞌa umener, pues inteꞌ cocha era tawar tuaꞌ unumse ubꞌa porque mabꞌambꞌan lo que war uche.  
\v 16 Pero tin e axin unumse ubꞌa umen taca que war acꞌupseyan tama e Cristo ma erer asubꞌajra tamar, sino que utattzꞌic ucꞌabꞌa e Dios que uyubꞌi aꞌrobꞌna que jaxir ajcꞌupesiaj tama e Cristo.   
\p
\v 17 Pues entonces jax era e hora conda cꞌani acay atojya uyeror tin e turobꞌ tama uyotot e Dios. Y jay bꞌan acay cocha era tacaron xeꞌ turon tama uyotot e Dios, ¿cobꞌa nic tuaꞌ unumse ubꞌobꞌ tin e machi war acꞌupseyanobꞌ tut uyojroner e Dios tama e corpesiaj conda atojyobꞌ uyeror?  
\v 18 Y jay intran tuaꞌ acorpesna inteꞌ xeꞌ war uche lo que imbꞌutz tama tunor ucuxtar tara tor e rum, ¿tucꞌa tuaꞌ anumuy tama tin e majax imbꞌutz, y tin e war uche e mabꞌambꞌanir iraj iraj?  
\v 19 Entonces tin e war unumse ubꞌobꞌ umen que bꞌan ucꞌani e Dios, ucꞌani tuaꞌ uturbꞌa uyalmobꞌ tama ucꞌabꞌ e Dios xeꞌ jax xeꞌ uchion y xeꞌ machi tuaꞌ uyacton, y de allí cachic jax taca lo que erach.   
\c 5  
\s1 Inteꞌ canseyaj tuaꞌ tunor tin e war acꞌupseyanobꞌ tama e Dios  
\p
\v 1 Pues nen xeꞌ Pedroen cꞌani impejca tin e aquetpobꞌ anciano tama inteꞌ inteꞌ grupo ajcꞌupesiajobꞌ tic taca tiaꞌ turobꞌ. Pues nen jax inteꞌ anciano ubꞌan, y nen cay inwira tunor lo que cay unumse ubꞌa e Cristo, y nen ubꞌan ayan lo que tuaꞌ inchꞌami tama utawarer e Cristo conda uxere tunor era tacaron conda asutpa achecta otronyajr.  
\v 2 Pues cojconic tunor tin e aquetpobꞌ yebꞌar icanseyaj bꞌan cocha inteꞌ ajcojc oveja xeꞌ ucojco tunor e oveja lo que aquetpa tama ucꞌabꞌ, porque jax e Dios xeꞌ cay uyajcꞌox tunor ipatnar era. Pero chenic tunor ipatnar era tama tunor iwalma y tama tunor iqꞌuecꞌuar bꞌan cocha ucꞌani e Dios. Y chenic bien tunor ipatnar, majax umen taca que war ixtojya sino que umen que bꞌan war icꞌani iche.  
\v 3 Y ira iche ibꞌa que nox ajyumox tujor e gente xeꞌ aquetpobꞌ yebꞌar icanseyaj, sino que ucꞌani tuaꞌ iwirse e gente era cocha tuaꞌ axanobꞌ imbꞌutz tama ubꞌir e Dios tamar lo que war iche xeꞌ erach nox.  
\v 4 Porque conda asutpa achecta e más nojta Pastor xeꞌ jax Cawinquirar Jesucristo nox inteꞌ intiox tuaꞌ ixajcꞌuna inteꞌ nuxi tuanibꞌir xeꞌ machi tuaꞌ acꞌapa xeꞌ bꞌan cocha inteꞌ corona xeꞌ ayan meyra tawarer tamar.   
\p
\v 5 Y bꞌan ubꞌan tamarox nox xeꞌ chꞌom maxtacox, ucꞌani tuaꞌ iturbꞌa ibꞌa yebꞌar ucꞌabꞌ tin e más ayan ujabꞌ que nox. Y tunoron ubꞌan ucꞌani tuaꞌ camanxujres cabꞌa tut e Dios y tut capiar porque chꞌar tzꞌijbꞌabꞌir tama uyojroner e Dios que:  
\q1 E Dios uxejbꞌe ut tunor tin e uche ubꞌa que jax taca unata,  
\q1 pero utacre taca ucꞌunersiaj tunor tin e war umanxujres ubꞌa.  
\m Bꞌan che tama uyojroner e Dios.  
\v 6 Entonces manxujresic ibꞌa yebꞌar ucꞌotorer e Dios, y jaxir tuaꞌ utꞌabꞌsiox conda acꞌotoy e hora.  
\v 7 Y jay ayan lo que war ulocse e jiriar tama iwalma, actanic tunor era tama ucꞌabꞌ e Dios, porque jaxir turix tuaꞌ utacrion.   
\p
\v 8 Y achpenic y chꞌujcunic iwiric porque e diablo xeꞌ war aqꞌuijna uwiron war axana war aꞌru bꞌan cocha inteꞌ nuxi león xeꞌ war usajca tucꞌa tuaꞌ ucꞌuxi.  
\v 9 Pero qꞌuecꞌojsenic ibꞌa tuaꞌ ixwawan tut uqꞌuijnar e diablo tamar icꞌupesiaj tama e Dios, cocha war canata que bꞌan war unumse ubꞌobꞌ tunor cawermanuobꞌ xeꞌ turobꞌ tama tunor or e rum.  
\v 10 Pero conda acꞌapa anumuy tunor lo que war inumse ibꞌa era Cadiosir uchiox ixquetpa más erach y utacriox tuaꞌ ixqꞌuecꞌo tuaꞌ machi ixcucurna tama ubꞌir e Dios, y jaxir axin uqꞌuecꞌojse uwabꞌuox y uchiox icojco más tama uyojroner e Dios. Porque Cadiosir jax xeꞌ war uchojbꞌeson meyra y jax xeꞌ upejcon tuaꞌ cachꞌami utawarer e Dios taca e Cristo. Y utawarer era machi tuaꞌ acꞌapa.  
\v 11 Catattzꞌic ucꞌabꞌa Cadiosir xeꞌ meyra ayan ucꞌotorer xeꞌ machi tuaꞌ acꞌapa. Amén.   
\s1 Ucꞌapesnibꞌir nicarta era  
\p
\v 12 Pues tacar utacarsiaj e hermano Silvano xeꞌ erach taniut xeꞌ Pedroen war catzꞌijbꞌa e chuchu carta era tibꞌa tuaꞌ intꞌabꞌse iwalma y tuaꞌ inchecsu tiut que erach tunor utacarsiaj e Dios lo que war incansiox era. Ira iwacta tuaꞌ ixqꞌuecꞌo tama utacarsiaj e Dios era.   
\p
\v 13 Pues e grupo ajcꞌupesiajobꞌ xeꞌ turobꞌ tama e chinam Babilonia xeꞌ sicbꞌabꞌirobꞌ umen e Dios bꞌan cocha nox, uyebꞌta axin e cꞌajpesiaj tibꞌa, y bꞌan uche e hermano Marcos xeꞌ bꞌan cocha inteꞌ sitz tanibꞌa.  
\v 14 Tzꞌujtzꞌinic ibꞌa inteꞌ intiox conda war iche saludar ibꞌa tuaꞌ ichectes ibꞌa que war iyajta ut e Dios.  
\p Chꞌamic ujiriar e Dios tunorox xeꞌ tuox e Cristo. Amén. Tara acꞌapa tunor niwojroner, che e Pedro.