\id 1JN - Chortí NT -Guatemala 2012 (DBL -2013) \h 1 JUAN \toc1 Jax era e bꞌajxan ojroner lo que tzꞌijbꞌabꞌir umen e Apóstol Juan \toc2 1 Juan \toc3 1 Jn \mt2 Jax era e bꞌajxan ojroner lo que tzꞌijbꞌabꞌir umen e Apóstol Juan \c 1 \s1 E ojroner tama e cuxtar xeꞌ machi tuaꞌ acꞌapa \p \v 1 Nen xeꞌ Juanen cꞌani intzꞌijbꞌa tibꞌa tama Uyunen e Dios xeꞌ turu conda ne mato ani achena or e rum era y xeꞌ turu iraj iraj. Pues non xeꞌ apostolon cay coybꞌi unuc y cay cawira ut jaxir conda xanon tacar tara tor e rum. Y cawira ut jaxir taca unaccoit y cajajpi ucꞌabꞌ y tamar era canata ixto yaꞌ que jaxir jax inteꞌ winic. Y war cachecsu tiut que tamar jaxir ayan e ojroner xeꞌ erach tama e cuxtar xeꞌ machi tuaꞌ acꞌapa. \v 2 Pues tin e utares e cuxtar era checta ticoit y non cawira ut, y tamar era cꞌani cachecsu que erach e cuxtar era y cꞌani cawareox que ayan e cuxtar xeꞌ machi tuaꞌ acꞌapa xeꞌ turu taca Catata Dios y xeꞌ yopa y uchectes ubꞌa ticoit. \v 3 Cꞌani cawareox tamar lo que cawira y tamar lo que coybꞌi tuaꞌ ixquetpa intera ibꞌijnusiaj tacaron, bꞌan cocha quetpon non intera cabꞌijnusiaj taca Catata Dios y tacar Uyunen e Dios xeꞌ jax e Jesucristo. \v 4 Y tamar era war catzꞌijbꞌa tunor era tibꞌa tuaꞌ abꞌoro tunor itzayer este que abꞌutcꞌa iwalma tamar. \s1 E Dios bꞌan cocha inteꞌ janchꞌaquenar xeꞌ erach \p \v 5 Pues jax era e ojroner xeꞌ cansenon umen e Jesucristo, y jax lo que war cacansiox ubꞌan, que e Dios bꞌan cocha inteꞌ janchꞌaquenar xeꞌ erach y que tamar jaxir matucꞌa e incsibꞌaner. \v 6 Jay caxin ani cache lo que mabꞌambꞌan caquetpa bꞌan cocha inteꞌ xeꞌ war axana tama e incsibꞌaner. Y jay bꞌan turon cocha era, war camajresian jay caware que intera cabꞌijnusiaj taca e Dios, porque machi war cacꞌupseyan tut jaxir xeꞌ bꞌan cocha e janchꞌaquenar xeꞌ erach. \v 7 Pero jay war cache lo que erach tut e Dios, caquetpa macuir e janchꞌaquenar tiaꞌ turu jaxir. Entonces war caxana imbꞌutz tut e Dios y war aquetpa intera cabꞌijnusiaj taca inteꞌ y taca inteꞌ. Y e Jesús xeꞌ jax Uyunen e Dios war usati tunor camabꞌambꞌanir tacar uchꞌichꞌer. \p \v 8 Pero jay caware que matucꞌa e mabꞌambꞌanir tamaron, war camajres cabꞌa non taca y matucꞌa lo que erach tamaron. \v 9 Pero jay cachecsu tunor camabꞌambꞌanir tut e Dios, erer cacꞌupseyan tamar jaxir xeꞌ erach tuaꞌ usati tunor camabꞌambꞌanir y tuaꞌ uyustes tunor cawirnar. \v 10 Pero jay caware que ma tiaꞌ ixion cache e mabꞌambꞌanir, war caware tamar era que e Dios war ani amajresian, y chequer que matucꞌa uyojroner e Dios tamaron. \c 2 \s1 Ayan inteꞌ Cawajcorpesiaj xeꞌ erer utacrion calocꞌoy tama tunor e mabꞌambꞌanir \p \v 1 Pues entonces nox xeꞌ bꞌanox cocha nimaxtac, nen era war intzꞌijbꞌa tunor era tibꞌa tuaꞌ inata que machi ixto tuaꞌ ibꞌijnu iche e mabꞌambꞌanir. Pero jay ayan tin e axinto uche e mabꞌambꞌanir ayan Cawajcorpesiaj xeꞌ jax e Jesucristo xeꞌ erach xeꞌ erer oꞌjron upater tut Catata Dios tuaꞌ atacarna alocꞌoy tama tunor era. \v 2 Pues jaxir ixin uyajcꞌu ubꞌa tuaꞌ achamesna tuaꞌ uyubꞌi usati tunor camabꞌambꞌanir. Pero jaxir chamay majax tamaron taca sino que chamay tuaꞌ usati umabꞌambꞌanirobꞌ tunor e inmojr gente tara tor e rum ubꞌan. \p \v 3 Pues erer canata que cꞌotoy caquetpa imbꞌutz tut e Dios jay war cacꞌupseyan tut uyojroner iraj iraj. \v 4 Pero jay ayan tin e oꞌjron y che: “Nen imbꞌutzen tut e Dios”, xeꞌ che inteꞌ, pero jay machi war acꞌupseyan tut uyojroner e Dios chequer que war amajresian y que matucꞌa xeꞌ erach tamar. \v 5 Pero jay caxin cacꞌupseyan tut tunor uyojroner e Dios war canata que cꞌapa bꞌutcꞌa tunor cawalma taca ucꞌunersiaj e Dios ubꞌan. Y tamar era chequer que war caquetpa intera cabꞌijnusiaj taca e Dios. \v 6 Entonces tin e war che que intera ubꞌijnusiaj taca e Dios ucꞌani tuaꞌ axana bꞌan cocha cay xana e Jesús conda turuto tara tor e rum. \s1 Yajtanic ut ibꞌa inteꞌ intiox \p \v 7 Pues entonces niwermanuox, lo que war catzꞌijbꞌa tibꞌa era majax inteꞌ ojroner xeꞌ ma tiaꞌ cay iyubꞌi, sino que jax taca e ojroner xeꞌ cay iyubꞌi conda cay cꞌupseyanox tama e Cristo. Pues e ojroner era xeꞌ checsuna onix jax lo que iyubꞌix tama ucayesnibꞌir tunor era. \v 8 Pero imbꞌutz e ojroner lo que war intzꞌijbꞌa tibꞌa era tut e gente tara tor e rum. Y chequer que erach e ojroner era porque e Cristo war uyajta utobꞌ tunor e gente, y tin e war acꞌupseyanobꞌ tamar war uyajta ut ubꞌobꞌ ubꞌan. Y tin e aquetpobꞌ tama e incsibꞌaner war uyubꞌiobꞌ uyojroner e Dios y war uyactobꞌ e mabꞌambꞌanir, y war achecta ujanchꞌaquenar e Dios tamarobꞌ. \p \v 9 Pues bꞌajcꞌat ayan inteꞌ xeꞌ oꞌjron y che: “Pero nen war inxana tama e janchꞌaquenar”, xeꞌ che inteꞌ. Pero jay war uxejbꞌe ut uyet ajcꞌupesiajir chequer que turuto tama e incsibꞌaner. \v 10 Pero tin e war uyajta ut uyet ajcꞌupesiajirobꞌ war axana tama e janchꞌaquenar y matucꞌa war uche tuaꞌ uche acucrema inteꞌ uyet ajcꞌupesiajir tama e mabꞌambꞌanir. \v 11 Pero tin e war uxejbꞌe ut uyet ajcꞌupesiajir warto axana tama e incsibꞌaner y machi war unata tiaꞌ war axin porque tajpem unacꞌut umen e incsibꞌaner era. \p \v 12 Pues war intzꞌijbꞌa tibꞌa nox xeꞌ bꞌanox cocha nimaxtac, porque Cadiosir ixin cꞌumpa tacarox tama tunor imabꞌambꞌanir tuaꞌ acꞌotoy atajttzꞌa ucꞌabꞌa tamarox. \v 13 Y war intzꞌijbꞌa tibꞌa nox xeꞌ tatabꞌirox umen que war inata chi xeꞌ turu conda ne mato ani achena or e rum. Y war intzꞌijbꞌa tibꞌa nox xeꞌ chꞌom maxtacox umen que cꞌapa icucru tunor ucꞌotorer e diablo. \p Y war intzꞌijbꞌa tibꞌa nox xeꞌ maxtacox umen que cꞌotoyox inata chi Catata Dios. \v 14 Y war intzꞌijbꞌa tibꞌa nox xeꞌ tatabꞌirox umen que war inata chi xeꞌ turu conda ne mato ani achena or e rum. Y war intzꞌijbꞌa tibꞌa nox xeꞌ chꞌom maxtacox umen que war ixqꞌuecꞌo, y umen que cꞌapa ichꞌami uyojroner e Dios tama iwalma, y umen que cꞌapa icucru tunor ucꞌotorer e diablo. \p \v 15 Y ira icꞌani lo que ucꞌaniobꞌ e gente tara tor e rum xeꞌ mabꞌambꞌan, y ira iyusre ichꞌami lo que ayan tara tor e rum xeꞌ mabꞌambꞌan. Porque jay bꞌan iche, chequer que machi war iyajta ut Catata Dios. \v 16 Porque machi tari tuaꞌ Catata Dios lo que ayan tara tor e rum xeꞌ mabꞌambꞌan sino que tari tamar taca e mundo. Y lo que ayan tara tor e rum jax era: Lo que uyusre uche uwerir e gente, y lo que uyusre uwira unacꞌut inteꞌ xeꞌ mabꞌambꞌan, y lo que uyusre inteꞌ tuaꞌ utattzꞌi ubꞌa tamar. \v 17 Pero tunor lo que ayan tara tor e rum y tunor lo que uyusre uche uwerir inteꞌ xeꞌ mabꞌambꞌan cꞌani acꞌapa. Pero tin e uche lo que ucꞌani e Dios machi tuaꞌ acꞌapa. \s1 Tin e erach y tin e ajmajresiaj \p \v 18 Pues nox xeꞌ bꞌanox cocha nimaxtac, natanic que wix acꞌapa e tiempo era. Porque cay iyubꞌi que cꞌani achecta inteꞌ winic rajxa era xeꞌ war aqꞌuijna meyra upater e Cristo. “Anti-Cristo” ucꞌabꞌa jaxir. Y ayan ubꞌan meyra gente coner xeꞌ war aqꞌuijnobꞌ upater e Cristo. Y tamar era chequer que e tiempo era warix acꞌapa. \v 19 Pues jaxirobꞌ turobꞌ ani ticajam pero de allí locꞌoy ixiobꞌ porque majax intera ubꞌijnusiajobꞌ tacaron. Porque jay intera ani ubꞌijnusiajobꞌ tacaron machi ani uyactonobꞌ. Pero bꞌan numuy tuaꞌ aquetpa chequer que jaxirobꞌ majax ticabꞌa. \p \v 20 Pero nox majax bꞌanox cocha era, porque ichꞌamix Unawalir e Dios y warix inata meyra tamar uyojroner e Dios. \v 21 Pues war intzꞌijbꞌa tibꞌa tama tunor era majax umen que machi war inata sino que war intzꞌijbꞌa umen que warix inata tama tunor era. Y nox war inata que ma cocha erer alocꞌoy lo que erach tama inteꞌ majresiaj. \p \v 22 ¿Y chi ca nic e ajmajresiaj? Pues jax tin e che que e Jesús majax e Cristo, xeꞌ war che que e Jesús machi ani uyubꞌi ucorpeson tama camabꞌambꞌanir. Y e ajmajresiaj jax ubꞌan tin e war aqꞌuijna uwira e Cristo y xeꞌ che que matucꞌa ani ucꞌampibꞌir Catata Dios y xeꞌ che que bꞌan ani e Cristo ubꞌan. \v 23 Tunor tin e umuqui ucꞌabꞌa Uyunen e Dios machi turu Catata Dios tamar. Y tunor tin e uchecsu que turu Uyunen e Dios tamar turu Catata Dios tamar ubꞌan. \p \v 24 Y tamar era cojconic tama iwalma e ojroner lo que cay iyubꞌi conda cay cꞌupseyanox tama e Cristo. Porque jay icojco e ojroner era cꞌani ixquetpa intera taca e Cristo y taca Catata Dios ubꞌan. \v 25 Y jax era e ojroner lo que Cawinquirar Jesucristo uchecsu ticoit: Que cꞌani uyajcꞌon e cuxtar xeꞌ machi tuaꞌ acꞌapa. \p \v 26 Pues war intzꞌijbꞌa tibꞌa era tamar tin e cꞌani ani umajresox. \v 27 Pues nox cocha ichꞌamix Unawalir e Dios xeꞌ ebꞌetbꞌir tari umen e Jesucristo mix majchi ucꞌani tuaꞌ ucansiox, porque jax Unawalir e Dios xeꞌ axin ucansiox tunor uyojroner e Dios. Y erach tunor ucanseyaj jaxir y machi amajresian. Y tamar era turbꞌanic ibꞌa tuaꞌ ixquetpa intera taca e Cristo bꞌan cocha war ucansiox Unawalir e Dios. \p \v 28 Pues entonces nox xeꞌ bꞌanox cocha nimaxtac, quetpenic intera taca e Cristo tuaꞌ machi ixbꞌacta y tuaꞌ machi ixsubꞌajra tut jaxir conda achecta watar otronyajr. \v 29 Y cocha warix inata que erach e Jesucristo, ucꞌani tuaꞌ inata ubꞌan que tunor tin e axin uche lo que erach, jax umaxtac e Dios ubꞌan. \c 3 \s1 Tin e umaxtac e Dios \p \v 1 Pues entonces bꞌijnunic cobꞌa uyajta coit Catata Dios que ixin upejcon tuaꞌ caquetpa umaxtac, y bꞌanon. Y tamar era tin e turobꞌ tara tor e rum machi war unatobꞌ cocha turon porque machi war unatobꞌ cocha turu e Dios ubꞌan. \v 2 Niwermanuox xeꞌ inchoj iut nimener, non umaxtacon e Dios y machito achectesna cocha tuaꞌ caquetpa conda asutpa watar e Cristo. Pero canata que conda achecta e Jesucristo non tuaꞌ caquetpa bꞌan cocha turu jaxir, porque cꞌani cawira uyeroj tacar unaccoit. \v 3 Y tunor tin e war ucojcobꞌ tuaꞌ acꞌotoy aquetpobꞌ bꞌan cocha e Cristo conda asutpa watar war uyactobꞌ tunor umabꞌambꞌanirobꞌ. Porque e Cristo erach. \p \v 4 Pues tunor tin e war uche e mabꞌambꞌanir machi war acꞌupseyan tut uyojroner e Dios. Y jax era lo que war che e ojroner mabꞌambꞌanir: “Tuaꞌ ucꞌocchi uley e Dios.” \v 5 Y war ixto inata que e Jesucristo tari tara tor e rum tuaꞌ ulocse tunor camabꞌambꞌanir. Y war ixto inata ubꞌan que jaxir matucꞌa nien imbꞌijc e mabꞌambꞌanir tamar. \v 6 Pues tunor tin e war aquetpa intera taca e Jesucristo machi war axana tama e mabꞌambꞌanir. Pero tunor tin e war axana tama e mabꞌambꞌanir ma tiaꞌ cꞌotoy uwira ut jaxir y nien ma tiaꞌ cꞌotoy unata chi jaxir. \v 7 Pues nox xeꞌ bꞌanox cocha nimaxtac, ira iwacta ibꞌa tuaꞌ ixmajresna tamar era, porque erach tunor tin e war uche lo que erach, bꞌan cocha erach Cawinquirar. \v 8 Pero tin e war axana tama e mabꞌambꞌanir war uche lo que ucꞌani e diablo, porque e diablo warix uche e mabꞌambꞌanir tama ucajyesnibꞌir or e rum era. Pero tamar era tari Uyunen e Dios tara tor rum: Tuaꞌ utijres tunor lo que e diablo war uche. \p \v 9 Pues entonces tunor tin e cꞌotoy cuxpa otronyajr tama e Dios machi war axana tama e mabꞌambꞌanir porque ayan ucuxtar e Dios tamar. Y tamar era machi ixto uyubꞌi axanobꞌ tama e mabꞌambꞌanir porque quetpobꞌ umaxtacobꞌ e Dios. \v 10 Y tamar era erer inata chi umaxtac e Dios y chi umaxtac e diablo, porque tunor tin e machi uche lo que erach y nien machi uyajta ut uyet ajcꞌupesiajir, majax tuaꞌ e Dios. \s1 Cayajtic cabꞌa inteꞌ intion \p \v 11 Pues jax era e canseyaj lo que cay iyubꞌi tama ucajyesnibꞌir tunor era: Que cayajtic cabꞌa inteꞌ intion. \v 12 Y machi tuaꞌ caquetpa bꞌan cocha e Caín xeꞌ turuan tama e onian tiempo xeꞌ quetpa intera ubꞌijnusiaj taca e diablo este que ixin uchamse uwijtzꞌin. ¿Y war ca inata tucꞌa tuaꞌ ixin uchamse uwijtzꞌin? Umen que e Caín war uche e mabꞌambꞌanir iraj iraj, pero uwijtzꞌin war uche jax taca lo que erach. \p \v 13 Pues entonces niwermanuox, ira iturbꞌa ibꞌa tamar e gente tara tor e rum jay axin uxejbꞌiobꞌ iut. \v 14 Pues non canata que locꞌoyon tujam tin e satrem y que turon tujam tin e bꞌixirobꞌ tut e Dios porque war cayajta ut cabꞌa taca tunor cawet ajcꞌupesiajir. Pero tin e machi war uyajta ut uyet ajcꞌupesiajir aquetpa chequer que satremto. \v 15 Tunor tin e war uxejbꞌe ut uyet ajcꞌupesiajir aquetpa bꞌan cocha inteꞌ ajchamseyaj. Y war inata que ma cocha erer aquetpa e cuxtar xeꞌ machi tuaꞌ acꞌapa tamar inteꞌ xeꞌ warto achamsan. \v 16 Pues chequer ticoit tucꞌa ucꞌunersiaj e Dios tamar lo que cay uche e Jesucristo tamaron, porque jaxir ixin uyajcꞌu ubꞌa tuaꞌ achamesna tamaron. Y non ubꞌan ucꞌani tuaꞌ caturbꞌa cabꞌa tuaꞌ catacre cawermanuobꞌ motor este que caxin cawajcꞌu cabꞌa tuaꞌ cachamesna tamarobꞌ. \v 17 Y non xeꞌ ayan tucꞌa ayanon tara tor e rum, jay cawira inteꞌ cawermano xeꞌ matucꞌa ayan tacar pero jay matucꞌa cawajcꞌu tuaꞌ catacre, ma cocha erer caware que war cayajta ut e Dios. \v 18 Pues nox xeꞌ bꞌanox cocha nimaxtac, majax bueno tuaꞌ taca caware que war cayajta ut inteꞌ, sino que ucꞌani tuaꞌ cachectes que erach que war ixto cayajta utobꞌ cawermanuobꞌ tamar lo que war cache tacarobꞌ. \s1 Cocha tuaꞌ cacꞌotoy canata que turu e Dios tacaron \p \v 19 Pues bꞌan cocha era erer canata que non umaxtacon e Dios y erer cacꞌotoy cajiri tama cawalma tut jaxir. \v 20 Porque jay cawalma acay uyareon que majax bueno lo que war cache, Cadiosir xeꞌ más nojta erer utacrion tuaꞌ canata lo que erach, porque jaxir unata tunor. \v 21 Y tamar era niwermanuox xeꞌ inchoj iut nimener, jay cawalma matucꞌa war uyareon, entonces más axin ajiri cawalma tut e Dios. \v 22 Y jaxir tuaꞌ axin uyajcꞌon tunor lo que war cacꞌajti tacar, porque war cacꞌupseyan tut uyojroner y war cache bꞌan taca cocha atzay uwiron cache. \v 23 Y lo que e Dios war uyareon tuaꞌ cache jax era: Tuaꞌ caxin cacꞌupseyan tama Uyunen xeꞌ jax e Jesucristo, y tuaꞌ cayajta ut e hermanuobꞌ inteꞌ intiobꞌ bꞌan cocha uyareon tuaꞌ cache. \v 24 Y tunor tin e war acꞌupseyanobꞌ tut lo que arobꞌnobꞌ umen e Dios war aturuanobꞌ tama e Dios y e Dios war aturuan tamarobꞌ. Y tamar era erer canata que jaxir war aturuan tamaron porque ixin uyajcꞌon Unawalir. \c 4 \s1 Cꞌani aquetpa chequer tin e turu Unawalir e Dios xeꞌ erach tamar y tin e turu inteꞌ mein xeꞌ ajmajresiaj tamar \p \v 1 Pues entonces niwermanuox xeꞌ inchoj iut nimener, ira icꞌupse wacchetaca tunor tin e che que tuaꞌ e Dios lo que war oꞌjronobꞌ, sino que bꞌijnunic iwira jay e ojroner era tuaꞌ e Dios o jay majax. Natanic que coner ayan meyra winicobꞌ tara tor e rum xeꞌ war amajresianobꞌ tamar lo que war acanseyanobꞌ y war chenobꞌ que jax uyojroner e Dios tunor era. \v 2 Y tamar era cꞌani inwareox cocha tuaꞌ inata chi xeꞌ turu Unawalir e Dios tamar. Pues turu Unawalir e Dios tama tunor tin e war acꞌupseyan que e Jesucristo tari tara tor e rum y quetpa bꞌan cocha inteꞌ winic taca ubꞌaquer y taca uwerir. \v 3 Pero tin e machi ucꞌupse cocha era tama e Jesús machi turu Unawalir e Dios tamar, sino que ayan inteꞌ mabꞌambꞌan mein tamar xeꞌ ucꞌabꞌa: “Anti-Cristo” xeꞌ war aqꞌuijna upater e Jesús. Pues nox cay iyubꞌi que cꞌani achecta watar e mabꞌambꞌan mein era, y coner yix turu tara tor e rum war apatna. \p \v 4 Pues entonces nox xeꞌ bꞌanox cocha nimaxtacox, tuoxix e Dios y cꞌapix icucru tunor e ajmajresiajobꞌ cocha era porque Unawalir e Dios xeꞌ turu tacarox más ayan ucꞌotorer que umein e diablo xeꞌ war apatna tama uyalmobꞌ e gente tara tor e rum. \v 5 Pues e gente era tuobꞌ lo que ayan tara tor e rum y tamar era ojronobꞌ tamar taca lo que ayan tara tor e rum ubꞌan. Y tamar era war oꞌbꞌnobꞌ umen tin e turobꞌ tara tor e rum. \v 6 Pero non tuon e Dios. Y tin e tuaꞌ e Dios axin uyubꞌi lo que cawareobꞌ tamar uyojroner e Dios. Pero tin e majax tuaꞌ e Dios machi cꞌani uyubꞌi lo que cawareobꞌ tamar uyojroner e Dios. Y tamar era aquetpa chequer tin e turu Unawalir e Dios xeꞌ erach tamar y tin e turu inteꞌ mein xeꞌ ajmajresiaj tamar. \s1 Conda war ixto cayajta ut e Dios \p \v 7 Pues entonces niwermanuox xeꞌ inchoj iut nimener, ucꞌani tuaꞌ cayajta ut cabꞌa inteꞌ intion, porque tuaꞌ e Dios tunor tin e war uyajta ut uyet ajcꞌupesiajir. Y tamar era chequer que inteꞌ cocha era jax inteꞌ umaxtac e Dios y jaxir war unata chi e Dios. \v 8 Pues tin e machi uyajta ut inteꞌ uyet ajcꞌupesiajir ne mato unata chi e Dios, porque e Dios war uyajta ut tunor. \v 9 Y Cadiosir uchectes ticoit que meyra war uyajta coit conda uyebꞌta tari Uyunen xeꞌ inteꞌ taca ayan tuaꞌ uyubꞌion cachꞌami e cuxtar xeꞌ machi tuaꞌ acꞌapa tamar. \v 10 Pues ucꞌunersiaj e Dios aquetpa chequer tamar era: Majax que non cay cayajta ut jaxir, sino que jaxir cay uchecsu cobꞌa war uyajta coit conda uyebꞌta tari Uyunen tuaꞌ achamesna tamaron tama ut e cruz tuaꞌ usati tunor camabꞌambꞌanir. \p \v 11 Pues entonces niwermanuox xeꞌ inchoj iut nimener, cocha e Dios war uyajta coit meyra cocha era, ¿machi ca tuaꞌ cayajta coit cabꞌa inteꞌ intion ubꞌan? \v 12 Mato majchi uwira ut e Dios, pero jay war cayajta coit cabꞌa inteꞌ intion, e Dios war aturuan tamaron y ucꞌunersiaj e Dios war aquetpa chequer tamaron iraj iraj. \v 13 Pues war canata que cꞌapa caturbꞌa cabꞌa tama e Dios y que jaxir turu tamaron umen que jaxir ixin uyajcꞌon Unawalir. \v 14 Pues non xeꞌ apostolon cawira lo que cay uche e Cristo conda turuto tara tor e rum, y tamar era war cawareox era que Catata Dios uyebꞌta tari Uyunen tuaꞌ aquetpa Ajcorpesiaj tuaꞌ tunor e gente tara tor e rum. \v 15 Y chic taca tin e uchectes que e Jesús jax Uyunen e Dios, turu Catata Dios tamar y jaxir turu tama Catata Dios. \p \v 16 Pues tamar era cꞌotoy canata y cꞌotoy cꞌupseyanon que Cadiosir war uyajta coit, porque Cadiosir incꞌun uwirnar. Y tunor tin e war aturuan incꞌun uwirnar, war aturuan tama e Dios, y e Dios war aturuan tamar jaxir. \v 17 Y war aquetpa chequer que incꞌun cawirnar y tamar era machi tuaꞌ casubꞌajra tama e día tuaꞌ e juicio, porque bꞌan cocha uwirnar e Cristo y bꞌan cawirnar non ubꞌan tara tor e rum. \v 18 Pues conda war ixto cayajta ut e Dios matucꞌa casubꞌar tut jaxir. Porque e cꞌunersiaj uyajnes alocꞌoy e subꞌar. Pero tin e war asubꞌajra tut e Dios, war ubꞌacre que watar inteꞌ jatzꞌuar tuaꞌ porque machi war uyajta ut e Dios taca tunor uyalma. \p \v 19 Pues war cayajta ut e Dios, porque jaxir cay uyajta coit bꞌajxan. \v 20 Jay ayan inteꞌ tijam xeꞌ oꞌjron y che: “Pero nen inyajta ut e Dios ubꞌan”, xeꞌ che inteꞌ, pero jay war uxejbꞌe ut uyet ajcꞌupesiajir, chequer que majresiaj taca war uche. Porque jay machi war uyajta ut uyet ajcꞌupesiajir xeꞌ war uwira ut, ma cocha erer uyajta ut e Dios xeꞌ machi war uwira ut. \v 21 Pues e Jesucristo uyacta inteꞌ ojroner ticoit xeꞌ che: “Tin e uyajta ut e Dios uyajtic ut uyet ajcꞌupesiajir ubꞌan”, che Cawinquirar Jesucristo. \c 5 \s1 Cocha tuaꞌ cacucru tunor ucꞌotorer e mabꞌambꞌanir \p \v 1 Pues tunor tin e war ucꞌupse que e Jesús jax e Cristo jax inteꞌ umaxtac e Dios. Pues tin e axin uyajta ut inteꞌ tatabꞌir tara tor e rum war uyajta utobꞌ tunor umaxtac ubꞌan. \v 2 Y conda war cayajta ut e Dios y war cacꞌupseyan tut uyojroner, war canata que war cayajta ut umaxtac e Dios ubꞌan. \v 3 Pues non xeꞌ war cayajta ut e Dios war cacꞌupseyan tut lo que arobꞌnon umener. Y lo que arobꞌnon tuaꞌ cache umener ma imbꞌar ticoit tuaꞌ caqꞌueche axin. \v 4 Y tunoron xeꞌ cuxpon tama e Dios war caqꞌuecꞌo tama cawalma tuaꞌ cacucru tunor ucꞌotorer e mabꞌambꞌanir. Y lo que war uqꞌuecꞌojsion, jax cacꞌupesiaj tama Cawinquirar Jesucristo. \v 5 Pues tunor tin e war ucucru ucꞌotorer e mabꞌambꞌanir jax taca tin e war ucꞌupse que e Jesús jax Uyunen e Dios. \s1 Tin e uchecsu que e Jesús jax Uyunen e Dios \p \v 6 Pues conda tari e Jesucristo tari taca e jaꞌ y taca e chꞌich. Machi tari tamar taca e jaꞌ sino que taca e chꞌich ubꞌan. Bꞌan war uchecsu ticoit Unawalir e Dios, y Unawalir e Dios era erach tama tunor. \v 7 Pues ayan uxteꞌ ut era xeꞌ war uchecsuobꞌ tunor era ticoit, \v 8 Unawalir e Dios y e jaꞌ y e chꞌich. Y bꞌan cocha uchecsu ubꞌa ticoit Unawalir e Dios y bꞌan uchecsu uchꞌichꞌer e Jesucristo y bꞌan e jaꞌ ubꞌan. \v 9 Pues cachꞌami lo que checsuna umen e winicobꞌ, pero lo que checsunon umen e Dios más atujri. Porque lo que e Dios war uchecsu ticoit era war uyareon tamar Uyunen. \v 10 Y tin e war acꞌupseyan tama Uyunen e Dios, chectesna tunor era tama uyalma. Pero tin e machi war acꞌupseyan tama e Dios war ani uche aquetpa inteꞌ ajmajresiaj, porque machi war uchꞌami lo que e Dios uchecsu ticoit tamar Uyunen. \v 11 Y lo que e Dios war uchecsu ticoit jax era: Que jaxir ixin uyajcꞌon e cuxtar xeꞌ machi tuaꞌ acꞌapa, y que e cuxtar era atajwina tamar taca Uyunen. \v 12 Tin e turu Uyunen e Dios tama uyalma, turu e cuxtar xeꞌ machi tuaꞌ acꞌapa tama uyalma ubꞌan. Pero tin e machi turu Uyunen e Dios tama uyalma, matucꞌa e cuxtar xeꞌ machi tuaꞌ acꞌapa tama uyalma ubꞌan. \s1 Ucꞌapesnar e ojroner era \p \v 13 Pues war intzꞌijbꞌa tunor era tibꞌa xeꞌ war ixcꞌupseyan tama Uyunen e Dios tuaꞌ inata que ayan e cuxtar tamarox xeꞌ machi tuaꞌ acꞌapa. \p \v 14 Y non era war canata que tunor lo que war cacꞌajti taca e Dios, jay cacꞌajti bꞌan cocha ucꞌani jaxir, que jaxir war uyubꞌi tunor era. \v 15 Y cocha war canata que e Dios war uyubꞌi tunor lo que war cacꞌajti tacar cocha era, war canata ubꞌan que cꞌani cachꞌami tunor lo que war cacꞌajti tacar. \p \v 16 Y jay ayan inteꞌ tijam xeꞌ uwira inteꞌ uyet ajcꞌupesiajir xeꞌ axin uche inteꞌ mabꞌambꞌanir xeꞌ machi tuaꞌ achamay tamar, ererto icꞌajti taca e Dios tuaꞌ acꞌumpa e Dios taca e ajcꞌupesiaj era. Y e Dios tuaꞌ uyajcꞌu ucuxtar otronyajr. Y bꞌan tuaꞌ icꞌajti tama tunor e ajcꞌupesiajobꞌ xeꞌ axin uche inteꞌ mabꞌambꞌanir xeꞌ machi tuaꞌ achamay inteꞌ tamar. Pero ayan inteꞌ mabꞌambꞌanir xeꞌ axin achamay inteꞌ tamar y machi war inwareox tuaꞌ icꞌajti tamar tin e axin uche cocha era. \v 17 Pues tunor e mabꞌambꞌanir majax bueno tut e Dios y ayan e mabꞌambꞌanir xeꞌ machi tuaꞌ achamay inteꞌ tamar. \p \v 18 Pues canata que tunor tin e quetpobꞌ umaxtacobꞌ e Dios machi ixto war uchiobꞌ e mabꞌambꞌanir, porque Uyunen e Dios war ucojcobꞌ y tamar era machi uyubꞌi tuaꞌ apijchnobꞌ umen e diablo. \p \v 19 Y canata que tuon e Dios, y que tunor tin e turobꞌ tara tor e rum war aquetpobꞌ yebꞌar ucꞌotorer e diablo. \p \v 20 Y war canata que tari Uyunen e Dios tara tor e rum, y que jaxir ixin uyajcꞌon tuaꞌ cacꞌotoy canata chi e Dios xeꞌ erach. Y tamar era war caturuan tacar jaxir xeꞌ erach xeꞌ jax Uyunen xeꞌ jax e Jesucristo. Jaxir jax e Dios xeꞌ erach y tamar jaxir ayan e cuxtar xeꞌ machi tuaꞌ acꞌapa. \v 21 Pues nox xeꞌ bꞌanox cocha nimaxtac, ira iwacta ibꞌa tuaꞌ iyujtzꞌi ut e sian chamen dios. Tara acꞌapa tunor niwojroner, che e Juan.