\id 1JN - Central Buang NT [big] -Papua New Guinea 2003 (web version -2012 bd) 
\h 1 JON 
\toc1 Ḳapiya Sën Jon Kevu Muġinsën Vu Kerisi-yi-alam 
\toc2 1 Jon 
\toc3 1 Jn 
\mt1 Ḳapiya Sën Jon Kevu Muġinsën Vu Kerisi-yi-alam  
\c 1  
\s1 Ġaġek Mala-tumsën-yi  
\p
\v 1 Nġaa sënë og yö nedo vu nyëmuġinsën. Lob he hanġo los halë raḳ malamin. Gehe hetunġ malamin raḳ gehe hebë nemamin raḳ meparah. Nġaa sën he nanër ġaġek raḳ agi, og yiḳ yi mehö sën tu Ġaġek sën nevonġ behil nado malad-tumsën lo.  
\v 2 Lob Mehö mala-tumsën-yi sagi tu mehönon raḳ, betöḳ yam ranġah, behe halë yi. Lob he nanër ġaġek yönon sënë ranġah, banër vu ham bë nedo mala-tumsën degwata los degwata ving Ama. Rëḳ tu mehönon raḳ behe halë yi raḳ malamin.  
\v 3 Nġaa sën he halë los hanġo ggovek lo, sën he nanër ranġah vu ham ving, in bë hil nid ga jaḳ hil nabë sën he los Ama luho Nalu Yesu Kerisi nimin negga raḳ he agi.  
\v 4 Lob he ḳevu ġaġek sënë yök vu ham in bë hil ahëd nivesa rot gemaggin pin nama.   
\s1 Hil Ana Jaḳ Ranġah  
\p
\v 5 Lob ġaġek sën he hanġo banër ranġah vu ham lo, yiḳ nebë sënë: Anutu nesepa loḳ nġaa ranġah-yi mu, gaḳ nġaa malaḳenu-yi teka su neggëp vu yi rë.  
\v 6 Bë hil nanër nabë, “Alu Anutu nimin negga raḳ he”, rëḳ mu hil nesepa loḳ nġaa malaḳenu-yi, og hil nehekuung raḳ, gaḳ hil su nesepa loḳ ġaġek anon rë.  
\v 7 Gaḳ bë hil medo jaḳ nġaa ranġah-yi nabë sën yö nedo raḳ nġaa ranġah-yi vorot lo, og hil nid negga raḳ hil vewen vewen, lob Anutu Nalu Yesu niḳöḳ yö medo neripek hil nġaa nipaya pin ya, gehil nid vesa neraḳ.  
\v 8 Bë hil nanër nabë, “Saḳ su nehevonġ nġaa nipaya rë”, og sagaḳ hil nġo netetuhin ayod meris mu, gaḳ ġaġek anon su nare loḳ hil ayod rë.  
\v 9 Rëḳ mu nabë hil nanër hil nġaa nipaya ranġah vu yi, og rëḳ kevoh na, in yi og su nepekwë yi rë. Gaḳ yö nevonġ nġaa yohvu mu, om rëḳ jevu nġaa nipaya pin na in hil ayod gehil medo nid vesa.  
\v 10 Anutu nër bë hil pin nehevonġ nġaa nipaya, om nabë hil nanër nabë, “Saḳ su nehevonġ nġaa nipaya ti rë”, og sënë nebë hil nemehoo yi ġaġek, benanër yah raḳ yi bë yi mehö ġaġek tetuhinsën, log yi ġaġek su neggëp loḳ hil ayod rë.   
\c 2  
\s1 Kerisi Og Hil Mehö Sën Neloḳ Vu Hil  
\p
\v 1 Naluġ lo, sa neḳevu ḳapiya sënë yök vu ham in bë ham su gwevonġ nġaa nipaya. Gaḳ nabë mehöti gevonġ nġaa nipaya, og hil Mehö sën neloḳ vu hil menenër hil ġaġek lo nedo ving Ama. Mehö sënë og yiḳ mehö yohvu Yesu Kerisi.  
\v 2 Yö diiḳ loḳ yah hil bed in bë kevoh hil nġaa nipaya na beġaġek ahë yes jaḳ in hil. Rëḳ mu su nevonġ huk sagi in bë doḳ vu hil mu rë, gaḳ nevonġ in bë doḳ vu alam pin sën denedo yoh vu dob pin agi geving.  
\v 3 Nabë hil nesepa loḳ Anutu yi horek, og hil ajaḳ ni nabë hil naraḳ yi ni.  
\v 4 Log nabë mehöti nanër nabë neraḳ Anutu ni, rëḳ mu su nesepa loḳ Anutu yi horek rë, og yi mehö ġaġek kuungsën ala, gaḳ ġaġek anon su neggëp loḳ ayo rë.  
\v 5-6 Gaḳ nabë mehöti sepa doḳ Anutu yi ġaġek, og saga tato bë nesepa loḳ Anutu yi aggata ahëvingsën-yi yönon rot. Log mehöti sën nenër bë luho Anutu denedo revuh ti lo, og gevonġ nġaa pin noh vu sën Kerisi nevonġ lo, in mëm hil ajaḳ ni nabë luho Anutu denedo loḳ ti yönon.   
\s1 Mehöti Sën Ahë Neving Ari Lo Lo, Og Nedo Raḳ Ranġah  
\p
\v 7 O sa mehö lo-e! Horek sën sa ḳevu vu ham-ë, og su mewis rë, gaḳ yiḳ horek muġeng sën yiḳ yök vu ham wirek lo. Horek muġeng saga yiḳ ġaġek sën ham nġo nyëdahis lo.  
\v 8 Rëḳ horek sën sa ḳevu vu ham agi, og horek mewis. In Kerisi yam nedo dob, lob sepa loḳ horek sagi beneggëp ranġah, log ham nesepa loḳ ving. In malaḳenu maya geheng ya, beranġah anon to dob beneggëp ya.  
\v 9 Log nabë mehöti nanër nabë nedo raḳ ranġah, rëḳ mu nelë ari paya, og mehö saga yö nahën nesepa loḳ nġaa malaḳenu-yi.  
\v 10 Gaḳ mehöti sën ahë neving ari lo, og nedo raḳ ranġah, om nġaa ti su rëḳ gevonġ mebës rë.  
\v 11 Gaḳ mehöti sën nelë ari paya lo, og nesepa loḳ nġaa malaḳenu-yi. Nesepa loḳ nġaa malaḳenu-yi om neketul loḳ in aggata niröp, in nġaa malaḳenu-yi sënë neggërin mala.   
\q2
\v 12 in Anutu kevoh ham nġaa nipaya ya raḳ Kerisi arë.   
\q1
\v 13 Log ham alam hib, sa neḳevu ġaġek sënë yök vu ham,  
\q2 in ham raḳ Mehö sën yö nedo wirek rot menedo gwëbeng agi degwa ni.  
\q1 Gesa neḳevu ġaġek sagi yök vu ham hur maġëm  
\q2 sën ham kwesuu Mehö Nipaya Satan ggovek ya lo ving.   
\q1
\v 14 Sa neḳevu ġaġek yök vu ham hurmahen  
\q2 in ham raḳ Amamin vu yaġek ni nivesa.  
\q1 Log sa neḳevu ġaġek sagi yök vu ham alam hib  
\q2 in ham raḳ Mehö sën yö nedo vu wirek rot benedo gwëbeng agi degwa ni.  
\q1 Gesa neḳevu ġaġek sënë yök vu ham hur maġëm,  
\q2 in ham hur maġëm los nimin wëëk,  
\q2 lob Anutu yi ġaġek neggëp loḳ ham ayomin  
\q2 beham kwesuu Mehö Nipaya Satan ggovek ya.   
\s1 Hil Su Ahëd Geving Aggata-dob-yi  
\p
\v 15 Ham su ahëmin geving aggata-dob-yi los nġaa-dob-yi pin. Nabë mehöti ahë geving aggata-dob-yi rot, og su yoh vu bë ahë geving Ama vu yaġek rë.  
\v 16 In hil araḳ nġaa-dob-yi pin sagi ni bë nġaa sën hil navid nevonġin lo, genġaa sën hil malad anon in lo, genġaa sën hil nehaḳo hil raḳ in lo, og su yam vu hil Amad Anutu rë. Gaḳ yö verup raḳ aggata-dob-yi.  
\v 17 Rëḳ mu nġaa-dob-yi los nġaa sën hil malad anon in vu dob lo pin, og rëḳ mala nama na. Gaḳ mehöti bë sepa doḳ Anutu aye, og rëḳ medo degwata.   
\s1 Alam Sën Denelë Yesu Paya Lo Deverup  
\p
\v 18 Naluġ lo-e! Gwëbeng og hil verup loḳ buk sën dob vonġin govek na lo. Wirek og ham nġo ġaġek bë mehö sën nevonġin bë dahun Kerisi na lo rëḳ berup. Lob gwëbeng og alam nġahi nebë saga detöḳ yam ranġah ggovek ya, om hil araḳ ni bë buk dus raḳ bevonġin govek na.  
\v 19 Alam sën bë dedahun Kerisi na aga, og yiḳ sir Kerisi-yi-alam nebë hil. Rëḳ dekehe sir vër in hil, om su hil alam sir niröp rë. Gaḳ bë hil alam sir niröp, og rëḳ demedo geving hil rot. Rëḳ ma gedevuu hil ya, om hil araḳ ni niröp bë su hil alam sir rë.  
\v 20 Rëḳ mu Kerisi vonġ Anon Vabuung yök nedo ving ham, om ham pin raḳ ġaġek anon ni.  
\v 21 Sa su neḳevu ġaġek sagi yök vu ham in bë maḳ ham duġin ġaġek anon rë! Gaḳ sa neḳevu in ham raḳ ġaġek anon ni vorot geham raḳ ni bë ġaġek anon og su nenër ġaġek kuungsën ti verup loḳ rë.  
\v 22 Mehö re ġaġek kuungsën ala? Gaḳ yiḳ mehö sën nelah Kerisi vun bë su yi mehö sën Anutu ggooin raḳ in bë geḳo hil nah rë lo. Mehö saga og yiḳ mehö sën nevonġ in bë dahun Kerisi na lo, lob neruu demi vu Nalu gevu Ama ving.  
\v 23 Mehöti bë geruu demi vu Nalu, og su Ama yi alam yi rë. Gaḳ mehöti sën nenër ranġah bë nevonġ ving Nalu lo, og Ama yi alam yi ving.   
\s1 Anon Vabuung Netahu Hil Loḳ Ġaġek Anon  
\p
\v 24 Ġaġek sën ham nġo wirek muġin lo, og ham nġo najom ahon. Nabë ham najom ġaġek sën ham nġo muġin lo ahon, og ham los Ama lu Nalu rëḳ medo jevuh ti.  
\v 25 Lob nër ġaġek vu hil benare vorot bë rëḳ gevonġ behil medo malad-tumsën degwata los degwata.  
\v 26 Sa neḳevu ġaġek sënë yök vu ham in bë nanër alam sën vonġin degekuung in ham aga tato vu ham.  
\v 27 Rëḳ mu ham ḳo Anon Vabuung vu Kerisi ggovek ya benahën nedo ving ham. Om ham su nesero mehö ngwë in bë tateḳin ġaġek vu ham rë, gaḳ Anon Vabuung yö netateḳin nġaa pin vu ham. Lob Anon Vabuung yi ġaġek og ġaġek anon, gaḳ su ġaġek kuungsën rë, om ham najom ġaġek sën netateḳin vu ham lo ahon begwa jaḳ Kerisi.   
\p
\v 28 Yönon, naluġ lo! Ham nġo gwa jaḳ yi rot, loḳ mëm vu tamusën sën natöḳ nom ranġah lo, og hil bare nid wëëk los kwad vesa doḳ buk saga, gaḳ hil su aġöneng in yi.  
\v 29 Ham neraḳ Kerisi ni bë yi mehö yohvu, om ham jaḳ sënë ni geving nabë alam sën denevonġ nġaa yohvu lo, og detu Anutu nalu.   
\c 3  
\s1 Gwëbeng Hil Atu Anutu Nalu Lo  
\p
\v 1 Alam-e! Ham kwamin bo nabë hil Amad Anutu ahë neving hil panġsën rot, om sën nenër hil bë nalu hil lob sagaḳ yönon-Anutu nalu hil. Rëḳ alam sën denesepa loḳ aggata-dob-yi lo, og su deraḳ sënë degwa ni rë, in sir duġin Anutu.   
\p
\v 2 Sa mehö lo-e! Gwëbeng sënë hil atu Anutu nalu, rëḳ hil duġin sën hil rëḳ nid nabë lo, in Anutu su tateḳin meneggëp ranġah rë. Gaḳ hil araḳ ni bë tamusën, sën Yesu rëḳ natöḳ nom ranġah gökin lo, og hil rëḳ nid nabë yi, in hil rëḳ ġalë anon soġek.  
\v 3 Log alam pin sën denevo kwaj in ġaġek sagi bë anon jaḳ lo, og yö deneġin sir bedenevonġin bë denatu mehönon nijvesa rot nabë sën mehö nivesa Kerisi.  
\v 4 Gaḳ alam pin sën denevonġ nġaa nipaya lo, og denekeyëh horek, in nġaa nipaya og yiḳ nġaa sën nekeyëh Anutu yi horek.  
\v 5 Lob ham raḳ ni bë Yesu og nġaa nipaya ti su neggëp vu yi rë, gaḳ töḳ yam ranġah in bë geḳo hil nġaa nipaya nyëvewen vër in hil.  
\v 6 Mehöti sën negga raḳ yi lo, og su nesepa loḳ nġaa nipaya rë. Gaḳ mehöti sën nesepa loḳ nġaa nipaya yi aggata lo, og hil naraḳ ni bë su nelë Kerisi rë, gesu neraḳ Kerisi ni rë.   
\p
\v 7 Oo sa hur mahen lo! Ham gweġin ham in mehöti rëḳ tetuhin ham. Mehö sën yö nevonġ nġaa yohvu lo, og yi mehö yohvu nebë sën mehö yohvu Kerisi.  
\v 8 Satan ḳo nġaa nipaya raḳ nyëmuġinsën bemedo nesepa loḳ, om mehöti sën nesepa loḳ nġaa nipaya lo, og Satan yi alam yi. Rëḳ mu Anutu Nalu töḳ yam ranġah in bë basap Satan gekevoh yi huk na.  
\v 9 Mehö sën tu Anutu nalu lo, og su nesepa loḳ nġaa nipaya rë. Gaḳ Anutu vonġ beni nebë yi, om su yoh vu bë sepa doḳ nġaa nipaya rë, in tu Anutu nalu.  
\v 10 Nabë hil nehevonġin bë ajaḳ Anutu nalu lo nij, gajaḳ Satan nalu lo nij, og hil ajaḳ nij nabë sënë: Alam sën su denevonġ nġaa nivesa rë lo, og su Anutu-yi-alam sir rë. Log alam sën su ahëj neving arij lo rë lo, og su Anutu nalu sir ving rë.   
\s1 Aggata Soġek Sën Hil Ahëd Geving Arid Lo Lo Nebë Sënë  
\p
\v 11 Ham nġo ġaġek sënë vu nyëdahis beyam bë: Hil ahëd geving hil vewen vewen.  
\v 12 Hil su ġevonġ nġaa nabë Kain. In Satan yi mehö yi, om sën sis ari mediiḳ. Sis ari mediiḳ degwa raḳ va? Degwa nebë yi mehö nesepa loḳ aggata nipaya, gari nesepa loḳ aggata niröpsën-yi.   
\p
\v 13 Arig lo! Nabë alam sën denesepa loḳ aggata-dob-yi lo sënë degelë ham paya, og ham su gwelëk mejanġa nemamin in nġaa saga.  
\v 14 Hil ahëd neving arid lo, om hil araḳ ni raḳ sënë bë: Hil hevuu sën hil nadiiḳ na veröḳ yi lo ya, gatöḳ yam sën hil medo malad-tumsën degwata lo. Gaḳ mehöti sën su ahë neving ari lo rë lo, og yö nahën nedo loḳ diiḳsën.  
\v 15 Mehöti sën nelë ari paya lo, og sënë nipaya böpata rot nebë sën sis yi mediiḳ. Lob ham raḳ ni bë alam sën denesis mehönon medenediiḳ lo, og mala-tumsën sën gevonġ behil medo degwata los degwata lo su neggëp vu sir rë.  
\v 16 Yesu diiḳ loḳ yah hil bed in bë doḳ vu hil, lob hil araḳ ahëvingsën anon degwa ni raḳ sënë. Om yiḳ hil geving. Hil dahun hil badoḳ vu arid lo nabë saga, genabë hil nadiiḳ og yiḳ ggovek.  
\v 17 Rëḳ mu nabë mehöti yi nġaa dob sënë neggëp, lob lë gari ti raḳ vu in nġaa ti, rëḳ ruu demi vu ari sënë, gesu loḳ vu yi raḳ yi nġaa rë, loḳ nenër bë ahë neving Anutu in va?   
\p
\v 18 Oo sa hurmahen lo, hil su ahëd geving arid lo jaḳ vengwënġsën los avid meris mu, gaḳ hil ahëd geving sir yönon beġevonġ huk madoḳ vu sir.   
\s1 Alam Sën Denevonġ Ving Anutu Lo, Og Su Deneggöneng In Mala Rë  
\p
\v 19 Nabë hil ġevonġ nabë saga, og rëḳ tato vu hil nabë: Hil nesepa loḳ ġaġek anon yönon, genabë hil ayod neggëp nivesa, om hil su rëḳ aġöneng in Anutu mala rë.  
\v 20 Gaḳ nabë hil ayod nanër hil nabë hil nehevonġ nġaa nipaya, og hil kwad bo nabë Anutu og böpata kesuu hil ayod meneraḳ nġaa pin ni los degwa.   
\p
\v 21 Sa mehö lo-e! Nabë hil ayod su nanër hil nabë hil nehevonġ nġaa nipaya rë, og hil su aġöneng in Anutu mala.  
\v 22 Log nġaa sën hil neḳetaġ in vu yi lo, og nevonġ vu hil. In hil nesepa loḳ yi horek behil nehevonġ nġaa yoh vu sën ahë neving lo.   
\p
\v 23 Log yi horek nebë sënë: Hil ġevonġ geving Nalu arë nabë yiḳ yi Yesu Kerisi, gehil ahëd geving hil vewen vewen nabë sën nër vu hil vorot lo.  
\v 24 Nabë mehöti sepa doḳ Anutu yi horek, og luho Anutu detu timu gAnutu nedo loḳ yi. Lob Anon Vabuung sën Anutu vonġ vu hil lo tato vu hil behil naraḳ ni bë Anutu nedo loḳ hil ayod.   
\c 4  
\s1 Anutu Yi Anon Vabuung Ga, Memö Lo  
\p
\v 1 Oo sa mehö lo! Alam-ġaġek-kuungsën nġahiseḳë denedo yoh vu nyëġ vu dob. Nebë saga, om ham su gwevonġ geving mehönon pin sën denenër bë Anon Vabuung nedo loḳ sir lo. Gaḳ ham seggi nġaa sën nedo loḳ sir lo pin mejaḳ ni rë nabë Anon Vabuung sën neyam vu Anutu lo yönon ma ma.  
\v 2 Log ham yoh vu bë jaḳ ni nabë Anutu yi Anon Vabuung nedo loḳ mehöti og rëḳ nabë sënë: Alam pin sën denanër nabë Yesu Kerisi tu mehönon raḳ meyam dob lo og Anutu yi Anon Vabuung nedo loḳ sir.  
\v 3 Gaḳ alam pin sën su denenër nebë agi rë lo, og nġaa sën nedo loḳ sir lo su yam vu Anutu rë. Gaḳ yam vu mehö sën vonġin bë dahun Kerisi na, beham nġo bengö wirek bë rëḳ nam lo. Lob gwëbeng yam ggovek ya benedo dob.   
\p
\v 4 Oo sa hurmahen lo! Anutu yi nġaa ham, lob ham dahun alam-ġaġek-kuungsën lo ggovek ya. In Anon Vabuung sën nedo loḳ ham aga kesuu Memö Nipaya sën nedo loḳ alam vu dob agi.  
\v 5 Alam-ġaġek-kuungsën sën aga, og denesepa loḳ aggata-dob-yi. Lob hir ġaġek pin og yiḳ denenër nġaa-dob-yi mu, lob alam sën denesepa loḳ aggata-dob-yi lo denebë nengaj vu ayej.  
\v 6 Gaḳ hileḳ Anutu yi nġaa hil. Om mehöti sën neraḳ Anutu ni lo, og nebë nenga vu hil ġaġek. Gaḳ mehöti sën su Anutu yi mehö yi rë lo, og su nebë nenga vu hil ayed rë. Yiḳ hil nġo rëḳ ajaḳ Anon Vubuung ġaġek-anon-yi ni, gajaḳ memö ġaġek-kuungsën-yi ni jaḳ nġaa nabë sënë.   
\s1 Ahëvingsën Degwa Soġek Anutu  
\p
\v 7 Oo sa mehö lo! Hil pasanġ ahëd geving hil vewen vewen. In sën hil ahëd geving alam lo, og degwa vu Anutu. Om mehö sën nesepa loḳ aggata-ahëvingsën-yi lo, og Anutu nalu yi beneraḳ Anutu ni yönon.  
\v 8 Gaḳ mehö sën su ahë neving ari lo rë lo, og yi duġin Anutu, in ahëvingsën degwaseḳë Anutu.  
\v 9 Anutu yiḳ nalu perurek timu nedo, lob vonġ luḳ yam dob in bë doḳ vu hil behil medo malad-tumsën jaḳ yi. Lob sënë tato vu hil bë Anutu ahë neving hil.  
\v 10 Ahëvingsën degwa nebë sënë: Anutu su ahë neving hil in hil ahëd neving yi muġin rë. Gaḳ yö ahë neving hil muġin bevonġ Nalu luḳ yam dob in bë natu seriveng doḳ nah hil bed, bekevoh hil nġaa nipaya na.   
\p
\v 11 Oo sa mehö lo! Nġaa sënë tato vu hil bë Anutu ahë neving hil panġsën rot, om yiḳ hil ġevonġ nabë saga behil nġo ahëd geving hil vewen vewen.  
\v 12 Mehöti su mala raḳ Anutu rë. Rëḳ mu nabë hil ahëd geving hil vewen vewen, og Anutu rëḳ medo doḳ hil ayod, lob mëm hil rëḳ ahëd geving hil niröp rot nabë sën Anutu ahë neving hil lo.  
\v 13 Vo yö yi Anon Vabuung vu hil, lob hil naraḳ ni raḳ sënë bë hil los Anutu atu timu, genedo loḳ hil ayod.  
\v 14 He halë raḳ malamin bë Ama vonġ Nalu luḳ yam dob in bë geḳo alam vu dob nah vu yi, om sën he nanër ġaġek sënë ranġah.  
\v 15 Nabë mehöti nanër ranġah nabë Yesu sënëḳ Anutu Nalu, og Anutu nedo loḳ mehö saga, geluho mehö saga detu timu.   
\p
\v 16 Lob hil araḳ ni benehevonġ ving bë Anutu ahë neving hil. Ahëvingsën degwaseḳë Anutu, log mehöti sën nesepa loḳ aggata-ahëvingsën-yi lo, og luho Anutu detu timu gAnutu nedo loḳ ayo.  
\v 17 Nabë hil medo dob sënë beġevonġ nġaa nabë Kerisi, og hil araḳ ni bë hil nesepa loḳ aggata-ahëvingsën-yi niröp rot. Om hil su rëḳ aġöneng in buk böpata sën nyëvewen-yi lo rë.  
\v 18 Nabë hil ahëd geving yönon, og hil su rëḳ aġöneng rë. Yönon, nabë hil sepa doḳ aggata-ahëvingsën-yi niröp rot, og saga rëḳ juuk ggönengsën na. Ggönengsën degwa nebë mehönon kwaj nevo bë rëḳ denatöḳ jaḳ hir nġaa nipaya nyëvewen. Om nabë mehöti nahën neggöneng, og hil naraḳ ni bë su nesepa loḳ aggata-ahëvingsën-yi niröp rot rë.  
\v 19 Ahëvingsën neggëp vu hil in degwa raḳ sën Anutu yö ahë ving hil muġin lo.  
\v 20 Nabë mehöti nanër nabë ahë neving Anutu, loḳ hil halë bë nelë ari paya, og mehö saga yö kuung raḳ. In lë ari raḳ mala rëḳ su ahë neving yi rë, om su yoh vu bë rëḳ ahë geving Anutu sën su lë raḳ mala rë lo.  
\v 21 In hil haḳo horek sënë vu Kerisi bë: Mehöti sën ahë neving Anutu lo, og yiḳ ahë geving ari lo geving nabë saga.   
\c 5  
\s1 Alam Sën Denevonġ Ving Lo, Og Denedahun Nġaa-dob-yi Ya  
\p
\v 1 Alam sën denevonġ ving Yesu bë yi mehö sën Anutu ggooin raḳ in bë geḳo hil nah lo, og alam saga detu Anutu nalu. Log alam sën ahëj neving Anutu lo, og ahëj neving nalu lo pin ving.  
\v 2 Om nabë hil ahëd geving Anutu besepa doḳ yi horek, og saga tato vu hil bë hil ahëd neving Anutu nalu lo ving.  
\v 3 Bë hil ahëd neving Anutu, og hil rëḳ sepa doḳ yi horek, lob yi horek su rëḳ maggin vu hil rë.  
\v 4 In alam pin sën denetu Anutu nalu lo, og denevuu nġaa-dob-yi ya. Log sën yiḳ hil ayod neya timu vu Kerisi lo og vonġ behil hevuu nġaa-dob-yi ya gehil nare nidwëëk.  
\v 5 Mehö nebë tena nevuu aggata-dob-yi ya genare niwëëk-a? Gaḳ yiḳ mehö sën nevonġ ving Yesu bë Anutu Nalu lo.   
\s1 Anutu Nër Nalu Yi Ġaġek Ranġah  
\p
\v 6 Yiḳ Yesu Kerisi sënë sën yam los bël-ripeksën-yi lo, geyam in bë keseh ḳöḳ jaḳ ḳelepeḳo*. Su bël mu tateḳin yi ranġah rë, gaḳ bël los ḳöḳ detateḳin yi ranġah loḳ ti. Lob Anon Vabuung tateḳin ġaġek raḳ Kerisi ving, in Anon Vabuung og mehö ġaġek-anon-yi.  
\v 7 Sir löö sënë denetateḳin yi ranġah:  
\v 8 Anon Vabuung, gebël, geḳöḳ, lob yiḳ lööhoho denenër ġaġek neggëp ti.  
\v 9 Hil nehanġo ġaġek sën mehönon denenër vu hil lo benehevonġ ving, rëḳ mu ġaġek sën Anutu nenër lo kesuu ġaġek sën mehönon denenër agi. Lob ġaġek sën Anutu nër agi, og yiḳ ġaġek sën netateḳin Nalu ranġah lo.  
\v 10 Mehöti sën ayo neya timu vu Anutu Nalu lo, og raḳ ni loḳ ayo bë ġaġek sën Anutu nër agi og yönon. Gaḳ mehöti sën su ayo neya timu vu Anutu rë lo, og sagaḳ nenër bë Anutu mehö ġaġek-kuungsën. In su nevonġ ving Anutu Nalu yi ġaġek anon sën Anutu yö tateḳin ranġah lo rë.  
\v 11 Ġaġek anon sën Anutu nër agi nebë: Anutu vo mala-tumsën degwata los degwata vu hil, degwa raḳ Nalu.  
\v 12 Mehöti sën yö negga raḳ Anutu Nalu rot lo, og mala-tumsën neggëp vu yi. Gaḳ mehöti sën nedo ading in Anutu Nalu lo, og mala-tumsën sënë su neggëp vu yi rë.   
\s1 Hil Ajaḳ Ni Nabë Hil Rëḳ Medo Malad-tumsën Degwata  
\p
\v 13 Sa ḳevu ġaġek sënë yök vu ham, in bë ham sën ham nevonġ ving Anutu Nalu arë lo jaḳ ni borot nabë ham ḳo mala-tumsën degwata los degwata yök vu ham ggovek ya.  
\v 14 Bë hil ḳetaġ nġaa ti vu Anutu, og hil su aġöneng in yi, in hil naraḳ ni vorot bë: Nabë hil ḳetaġ noh vu sën kwa nevo lo, og rëḳ gebë nenga vu hil.  
\v 15 Yönon, hil araḳ ni vorot bë nebë nenga vu hil in nġaa pin sën hil neḳetaġ vu yi in lo, om hil ajaḳ sënë ni geving nabë vonġ nġaa sën hil ḳetaġ in vu yi lo vu hil ggovek ya.  
\v 16 Bë mehöti lë gari vonġ nġaa nipaya ti, rëḳ mu nġaa nipaya sënë su yoh vu bë gevonġ bari sënë na mala nama doḳ Nyëġ Nipaya rë, og najom jaḳ vu Anutu in yi, lob Anutu rëḳ gevonġ bemedo mala-tumsën. Yiḳ senër alam sën denevonġ nġaa nipaya sën su yoh vu bë gevonġ bemalaj nama doḳ Nyëġ Nipaya rë lo. Gaḳ nġaa nipaya sën rëḳ gevonġ bemehönon malaj nama doḳ Nyëġ Nipaya lo, og sa su nër raḳ saga bë ham kwetaġ in rë.  
\v 17 Nġaa pin sën su neyoh vu rë lo, og sagaḳ nġaa nipaya pin. Rëḳ nġaa nipaya vahi og su nevonġ bemehönon malaj nema veröḳ yi loḳ Nyëġ Nipaya rë.  
\v 18 Hil araḳ ni bë alam pin sën detu Anutu nalu lo, og su denesepa loḳ nġaa nipaya rë. Gaḳ Anutu Nalu nemalain sir nivesa, om Satan su yoh vu bë gebë nema jaḳ sir rë.  
\v 19 Hil naraḳ ni bë hil atu Anutu nalu lo, gaḳ Satan tu mehönon sën denesepa loḳ aggata-dob-yi lo pin alaj.  
\v 20 Hil araḳ ni bë Anutu Nalu yam ggovek ya, lob tateḳin hil kwad in bë hil ajaḳ Anutu soġek ni rot. Lob hil los Anutu soġek atu timu, in hil los Nalu Yesu Kerisi atu timu ggovek ya. In Nalu og yiḳ yi Anutu soġek, bemala-tumsën degwa neggëp degwata los degwata vu yi.   
\p
\v 21 Oo sa hurmahen lo! Ham gweġin ham vu anutu-kuungsën.