\id JON - Bribri NT + OT portions (Gen, Ex(portions) Jona) -Costa Rica 2009 (DBL -2013) 
\h Jonás 
\toc1 Jonás dör Jehová ttéköl e' pakè 
\toc2 Jonás 
\toc3 Jona 
\mt1 Jonás dör Jehová ttéköl e' pakè 
\mt2 Jonás 
\ip Yëkkuö i' tö se' a̱ ipakè tö ì bak Israel aleri eköl kiè Jonás e' ta̱. Ie' kaneblë' Skëköl ttekölie duas cien paryök ena duas cien kuryök ki̱ dabom ske̱yök (800-750 AC) e' shu̱ ulatök ka̱m Jesucristo ku̱r e' yöki̱. 
\ip Skëköl kë̀ wa̱ ie' patkëne Israel aleripa male̱pa pattök we̱s Skëköl ttekölpa male̱pa patkéitö es. E' skéie ie' tö ie' patkë' ká̱ kiè Nínive, e' wakpa pattök. Nínive dör ká̱ kiè Asiria e' ká̱ kibi. Asiria wakpa dör Israel aleripa bolökpa kibi. Ie'pa se̱rke suluë tai̱ë shu̱te̱ Skëköl wöa̱. E' kue̱ki̱ ie' tö Jonás patké ichök ie'pa a̱ tö ká̱ de dabom tkëyök eta̱ ie'pa e̱rdawa. Jonás wa̱ ijche̱r tö Skëköl tö s'suè̱ e̱r sia̱rë wa. Ie' ibikeitsé: “Nínive wakpa e̱r mane'wé̱, e' ta̱ ie'pa nuì̱ olo'yeraë Skëköl tö ie'pa ki̱.” Erë ie' ki̱ ikiane tö Skëköl tö ie'pa e̱wè̱wa, e' kue̱ki̱ ie' kë̀ shkakmi ie'pa pattök. E' skéie ie' tö ima'wé̱ tkökshkar bánet Skëköl yöki̱. Erë Skëköl tö ie' wöklö'wé̱ ta̱ ipatkémi Nínive wakpa pattök wake'. Ie'pa e̱r mane'wé̱, e' kue̱ki̱ Skëköl kë̀ wa̱ ie'pa e̱o̱newa. 
\ip Yëkkuö i' wa se' é̱na ia̱ne tö Skëköl tö ká̱ ulitane wakpa suè̱ e̱r sia̱rë wa. Ì sulu wamblekesö ese nuí̱ olo'yak ie' é̱na se' ki̱. Ie' ki̱ ikiane tö se' e̱r mane'ù̱ ie' a̱ a̱s kë̀ ie' tö se' we'ikö̀. 
\c 1  
\s1 Jonás kë̀ é̱na Jehová ttö̀ iu̱tak 
\p  
\v 1 Etökicha ta̱ Jehová tö iché itteköl kiè Jonás dör Amitai alà, e' a̱:  
\v 2 “Be' yú ká̱ kibi kiè Nínive ee̱, ta̱ ichö́ ká̱ e' wakpa a̱ we̱s a' e̱' wamblö̀ e' dör suluë ye' wöa̱, e' kue̱ki̱ ye' tö a' e̱we̱rawa.” 
\p  
\v 3 Erë ie' kë̀ é̱na Jehová ttö̀ iu̱tak. E' kue̱ki̱ ie' tkashkar iyöki̱. Ie' mía̱ dayë kkömik ká̱ kiè Jope wé̱ kanò irirke ee̱. Ee̱ ie' tö kanò kué̱ etö mitke ká̱ kiè Tarsis e' patué̱itö shkomi ta̱ ie' e̱' iéka̱ iki̱ ta̱ imía̱. \fig I' dör ká̱ kiè Jope e'.|src="HK00370b.tif" size="span" ref="Jonás 1.3" \fig* 
\p  
\v 4 Erë Jehová tö sërkë patké ie'pa ki̱ tai̱ë darërëë. E' tö kanò u̱yé tai̱ë dö̀ wësua itskirwa̱mi.  
\v 5 Eta̱ ko̱s ie'pa tso' kanò a̱, e'pa suane tai̱ë. Ie'pa eköl eköl tö ikieke a̱neule iwák këköl a̱: “¡Sa' tsa̱tkö́, sa' tsa̱tkö́!” Eta̱ dalì ko̱s tuléttsa̱mi dayë ki̱ a̱s kë̀ kanò katsi̱rwa̱. 
\p Erë Jonás e̱' a'wa kanò shu̱a̱ dalì bló wé a̱, ee̱ ie' kapötër tai̱ë.  
\v 6 Eta̱ kanò ñakökwak mía̱ dö̀ wé̱ ie' kapötër ee̱ ta̱ iché ia̱: 
\p —¿Iö́k be' kapötër? ¡Be' e̱' kö́ka̱! Be' këköl a̱ ikiö́ a̱s ie' tö se' tsa̱tkö̀. Isalema ie' se' suè̱mi e̱r sia̱rë wa ta̱ se' tsa̱tkèmiitö. 
\p  
\v 7 E' dalewa kanò wakpa male̱pa tö iché ñì a̱: 
\p —Mishka itötkök isuo̱ie yi ia̱ne iwiie e' kue̱ki̱ se' weirke i' es. 
\p Eta̱ iwëne tö Jonás idir.  
\v 8 E' kue̱ki̱ ie'pa iché ie' a̱: 
\p —Ichö́ sa' a̱, ¿ì kue̱ki̱ ì sulu i' tköke se' ta̱? ¿Iö́k be' e̱' iébitu̱ kanò i' a̱? ¿Wé̱ be' datse̱? ¿Yi ditséwö be' dör? 
\p  
\v 9 Ie' iiu̱té: 
\p —Ye' dör hebreowak. Jehová dör Skëköl tso' ká̱ jaì a̱ e' dalöiökwak ye' dör. Ie' tö dayë ena ká̱ i' yö'a̱t. 
\p  
\v 10-11 Ie' tö ie'pa a̱ ipaké tö ie' tso' tkökshkar Jehová yöki̱. Mik e' ttsé ie'pa tö ñies isué̱rakitö tö dayë kí̱ ulune tai̱ë, eta̱ ie'pa suane tai̱ë shu̱te̱. Ie'pa tö ie' a̱ ichaké: 
\p —¿Ì wè̱mi sa' tö be' ta̱ a̱s sërkë wöklörwa̱? 
\p  
\v 12 Ie' tö iiu̱té: 
\p —Ye' wa̱ ijche̱r buaë tö ye' kue̱ki̱ sërkë i' bitsi̱neka̱ tai̱ë a' ki̱. E' kue̱ki̱ ye' u̱yö́mi dayë a̱ eta̱ sërkë wöklördawa̱. 
\p  
\v 13 Erë kanò wákpa tö kanò iklémi darërëë a̱s irirka̱. Erë kë̀ ie'pa diché dë'ka̱, dayë kí̱ ulune tai̱ë e' kue̱ki̱.  
\v 14 Eta̱ ie'pa tö Jehová a̱ ikié i' es: “A Jehová, kë̀ sa' maktsa̱ duökwa̱ wëm i' kue̱ki̱. I' u̱k be' tso' sa' ta̱, e' we̱kebö we̱s be' ki̱ ikiane es. E' kue̱ki̱ wëm i' kë̀ ki̱ ì nuí̱ ta̱', e' ta̱ sa' tö ie' u̱yekemi dayë a̱ e' nuí̱ kë̀ marka̱ sa' ki̱.” 
\p  
\v 15 E' ukuöki̱ ta̱ ie'pa tö Jonás u̱yémi dayë a̱, eta̱ sërkë wöklönewa̱ ta̱ dayë mía̱ne a̱lmië.  
\v 16 Mik kanò wákpa tö e' sué̱, eta̱ ie'pa suane tai̱ë Jehová yöki̱ ta̱ idalöiérakitö tai̱ë. E' ukuöki̱ ta̱ ie'pa tö iyiwak jché ña'wé̱ mè Skëköl a̱ idalöioie, ñies ie'pa tö ttè mé ie' a̱ tö sa' tö be' dalöieraë. 
\p  
\v 17 Eta̱ Jehová tö nima bërie shu̱te̱ patké etö Jonás mulu̱kwa̱. Eta̱ nima e' tö imulé̱wa̱ ta̱ ee̱ nima shu̱a̱ ie' se̱né döka̱ ká̱ mañat ñië nañeë. 
\c 2  
\s1 Jonás tté Jehová ta̱ 
\p  
\v 1 Eta̱ Jonás tté Jehová dör ie' Këköl e' ta̱ nima shu̱a̱,  
\v 2 ta̱ ichéitö ia̱ i' es: 
\b  
\q1 “A Jehová, ye' e̱riarke sia̱rë, 
\q1 e' shu̱a̱ ye' tö be' a̱ ikié tö ye' tsa̱tkö́, 
\q1 eta̱ be' tö ye' iu̱té. 
\q1 Ye' tso'tke ká̱ dià ka̱ska' s'duulewa̱ ké̱ a̱, 
\q1 ee̱ ye' be' a̱ ikié tö ye' ki̱mú, 
\q1 eta̱ ye' ttö̀ ttsébö. 
\q1  
\v 3 Be' ye' u̱yémi dayë a̱ i̱ski̱ë dayë diki̱a̱, 
\q1 ye' ki̱tëulewa̱ dayë wa̱. 
\q1 Dayë u̱rke tai̱ë e' patkébö, e' tka ye' ki̱kke̱. 
\q1  
\v 4 Ye' ittsé tö ye' kë̀ ku̱'ia̱ be' wörki̱. 
\q1 Ye' ibikeitsé tö ye' kë̀ dë'ia̱ne be' wé buaë e' a̱. 
\q1  
\v 5 Dayë tai̱ë, e' shu̱a̱ ye' a̱nemi. 
\q1 Ye' ki̱kke̱, ye' pamik, ye' diki̱a̱, e' dör dayë ë̀me. 
\q1 Dayë a̱ itö'könu tso', e' mali̱tsé̱ka̱ ye' wökir mik tai̱ë dayë shu̱a̱. 
\q1  
\v 6 Ye' a̱nemi dayë a̱ dö̀ i̱ski̱ë, 
\q1 dö̀ wé̱ ka̱bata bitu̱keka̱ ee̱. 
\q1 Ye' ittsé tö ye' wötënewa̱ da'a̱ ká̱ dià ka̱ska'. 
\q1 Erë, a Jehová, be' dör ye' Këköl, 
\q1 be' dör ye' yéttsa̱ne s'duö̀wa̱ ulà a̱ deka̱ne ttsë'ka. 
\q1  
\v 7 A Jehová, mik ye' ittsé tö ye' duökewa̱tke, 
\q1 eta̱ ye' be' a̱ ikié tö ye' tsa̱tkö́, 
\q1 eta̱ ì kiéyö, e' ttsébö be' wé buaë e' a̱. 
\q1  
\v 8 Wé̱pa tö íyi diököl dalöieke be' skéie, 
\q1 e'pa kë̀ tö be' dalöieku̱'ia̱. 
\q1  
\v 9 Erë ye' tö wëstela cheraë be' a̱ ke̱kraë, 
\q1 iyiwak jcheraë ña'we̱raëyö be' a̱ be' dalöioie. 
\q1 Ye' ttè mé be' a̱, e' wawe̱raëyö. 
\q1 ¡A Jehová, be' ë̀ a̱ sa' tsa̱tkërmi!” 
\b  
\p  
\v 10 E' ukuöki̱ ta̱ Jehová tö nima patké Jonás tuöktsa̱ ká̱ sí ki̱, ta̱ ituéttsa̱itö. 
\c 3  
\s1 Jonás tö Jehová ttö̀ iu̱té 
\p  
\v 1 Eta̱ Jehová tö iskà chéne Jonás a̱:  
\v 2 “Be' yú ká̱ kibi kiè Nínive ee̱ ta̱ ì chekeyö be' a̱, e' chö́ ká̱ e' wakpa a̱.” 
\p  
\v 3 Eta̱ ie' tö Jehová ttö̀ iu̱té. Ie' mía̱ Nínive. E' dör ká̱ bërie. Shkotkö ká̱ e' shu̱a̱, e' dör ká̱ mañat wa'ñe. \fig I' dör ká̱ kiè Nínive e'.|src="HK00225b.tif" size="span" ref="Jonás 3.3" \fig* 
\v 4 Jonás shké ká̱ e' shu̱a̱ ká̱ et wa'ñe ta̱ ie' tö icherami ká̱ e' wakpa a̱ a̱neule: “Ká̱ i' ki̱ ká̱ de dabom tkëyök (40), eta̱ a' e̱rdawa.”  
\v 5 Eta̱ Nínive wakpa ko̱s e̱rblé Skëköl mik. E' kue̱ki̱ ie'pa ko̱s, ësepala ena dalöiërta̱', e'pa ko̱s tö iché: “S'ka̱wöta̱ batsök, ñies s'ka̱wöta̱ datsi' a̱ja̱ë ese iök iwà kkachoie tö se' e̱r mane'wé̱.” Eta̱ es ie'pa tö iwé̱. 
\p  
\v 6 Mik ttè e' ttsé Nínive blú tö, eta̱ ie' e̱' kéka̱ ikulé ki̱, ta̱ idatsi' bua'buaë iëtkër iwa̱, e' yéttsa̱ skéie datsi' a̱ja̱ë iéka̱itö ta̱ ie' e̱' tkése̱r i̱ski̱ mulu̱chka ki̱.  
\v 7-9 Eta̱ ie' tö ttè patké ká̱ e' ulitane wakpa a̱. Ttè e' tö ichè i' es: “A' ulitane kë̀ kàne chkök di'yök yës. Ñies kë̀ a' kàne a' baka ena a' obeja tiök. A' ulitane ka̱wöta̱ datsi' a̱ja̱ë iökka̱. A' kköchö́ Skëköl a̱ a' diché ko̱s wa a̱s a' e̱' wamblö̀ suluë ese ko̱s nuí̱ olo'yö̀itö a' ki̱. Ñies a' e̱' wamblö̀ suluë, ese ko̱s olo'yö́. Isalema ie' e̱r mane'u̱mine, eta̱ ie' e̱r buarmine se' ki̱, eta̱ ie' kë̀ tö se' e̱we̱pawa. Ttè i' dör ye' dör a' blú e' ttè ena a' wökirpa ttè, e' kue̱ki̱ a' ulitane ka̱wöta̱ idalöiök.” 
\p  
\v 10 Eta̱ ie'pa tö ttè e' iu̱té buaë. Ie'pa e̱' wamblö̀ suluë ese ko̱s olo'yérakitö. Mik e' sué̱ Skëköl tö, eta̱ ie' ibikeitséne kë̀ yö ie'pa we'ikepa we̱s ye' ibikeits es. 
\c 4  
\s1 Jonás uluneka̱ Skëköl ki̱ 
\p  
\v 1 Erë e' kë̀ dör bua' Jonás a̱ ta̱ ie' uluneka̱ tai̱ë.  
\v 2 Ie' iché Jehová a̱: 
\p —A Jehová, be' isué̱. Mik ye' tkëria̱ ye' ka̱ska', eta̱ ye' iyë' tö be' e̱r buaë chöraë Nínive wakpa a̱. Ye' wa̱ ijche̱r tö be' dör es, e' kue̱ki̱ ye' bakshkar Tarsis. Ye' wa̱ ijche̱r tö be' kë̀ ulurta̱'ka̱ bet. Be' e̱r tottoë. Be' sa' suè̱ e̱r sia̱rë wa. Mik sa' tö ì sulu wamblé ta̱ sa' e̱r mane'wé̱, e' ta̱ bet e' nuí̱ olo'yé be' tö sa' ki̱, kë̀ sa' we'ikè we̱s be' sa' pau̱ñé es.  
\v 3 A Jehová, e' kue̱ki̱ ye' be' a̱ ichè ye' ttö́wa̱, e' dör bua'ie ye' a̱. 
\p  
\v 4 Erë Jehová tö ie' a̱ ichaké: 
\p —¿I̱ma be' ibikeitsè tö be' wa̱ ka̱wö ta̱' ulunukka̱ se̱ es? 
\p  
\v 5 Eta̱ Jonás e̱' yéttsa̱ Nínive mía̱ diwö tskirke e' kke̱ ta̱ ee̱ úla yuéka̱itö e̱' blóie dìba yöki̱. Ee̱ ie' e̱' tkése̱r ì tkö̀mi Nínive wakpa ta̱ e' wà panuk.  
\v 6 Eta̱ Skëköl Jehová tö kalkua tskéka̱ elka tala'wé̱ka̱itö Jonás tsa̱ka̱ a̱s ikí̱ ttsë'r buaë. E' tö ie' ttsë'wé̱ buaë.  
\v 7 Erë bule es bla'mi ká̱ ñine eta̱ Skëköl tö í̱ patké kalkua katökwa ta̱ isinewa̱ duowa̱.  
\v 8 Mik diwö deka̱, eta̱ ie' tö siwa̱' darërëë ba'baë e' patké diwö tskirke e' kke̱ Jonás ki̱. Dìba a̱ne darërëë Jonás wökir ki̱, ta̱ ie' tö ittsé tö ie' siwa̱'a̱rkewa̱. Ibikeitséitö “¡Ye' mú duö̀wa̱!” Ie' iché, “Ye' duowa̱, e' dör bua'ie ye' a̱.” 
\p  
\v 9 Erë Skëköl tö iché ie' a̱: 
\p —¿I̱ma be' ibikeitsè tö be' wa̱ ka̱wö ta̱' ulunukka̱ kalkua sinewa̱ e' kue̱ki̱? 
\p Ie' iiu̱té: 
\p —Tö́, ye' wa̱ ka̱wö ta̱'. ¡Ye' ulune tai̱ë mik ye' duowa̱ eta̱ e' olone! 
\p  
\v 10 Eta̱ Jehová tö iché ie' a̱: 
\p —Kal kuá kë̀ tkëne be' wa̱, kë̀ talane kë̀ kaneo̱ne be' wa̱. E' tskine talane ká̱ et nañewe ë̀, bule es nañewe ta̱ iduowa̱, e' dalëne be' é̱na.  
\v 11 Eta̱ ¿we̱s ye' kë̀ é̱na Nínive wakpa dalënuk? Ie'pa dör tai̱ë, ie'pa ala'rla tso' tai̱ë döka̱ 120.000 kë̀ wa̱ ijche̱r ì dör buaë, ì dör suluë. Ñies ie'pa iyiwak tso' tai̱ë.