\id GAL - Qaqet (Baining) NT [byx] -Papua New Guinea 1996 (web version -2013 bd) 
\h Galatia 
\toc1 Ma Paulus Ka Iil Sagel Ama Galatiaqena 
\toc2 Galatia 
\toc3 Ga 
\mt1 MA PAULUS KA IIL SAGEL AMA GALATIAQENA  
\c 1  
\s1 Ama Slurlka Qa Mak Ne Ma Paulus Iv Ama Aposel Na Qa  
\p
\v 1-2 Ngua ma Paulus i ngua iil sagel ngen ama Kristenkena vet ma Galatia. I ngua de lura iara, i gua rluavik dai uut taqen ne ama atlu sagel ngen. I ngua dai ma Iesus aa Aposel bareq a ngen.  
\m Kuasiq ai ngu tal luqia ama rletki ne a qeq aa dlek de maikka quasiq ai a qeq ama qaqeraqa qa mak na ngua ip ngut matna taqurla. Dap ngut matna, i ma Iesus Kristus naik ka nem ngua. De ne aa Mam ama Ngemumaqa aa dlek dai qa iames ne ma Kristus naver ama aapngipki.   
\p
\v 3 I ngu nen auut Mam ama Ngemumaqa de aa Uimka ama Slurlka ma Iesus Kristus ip ngene narli ama upka de ngen ama ngimsevetki de a ngen a rlan.  
\v 4 I maikka ma Iesus dai sa qa narligel auut Mam ama Ngemumaqa aa narliip be qa quartemiis de qa ngip bareq auur a viirang. I maikka aa rletki ama slurlki be sa qa iames nauut never ama viirang angera dlek per ama aivetki.  
\v 5 Be maikka liina dai ama barliini be qatikka mager iv uurel kuarl te ama lengiirang ama atliirang sagel auut Mam aaviit be aaviit be quasik perlverleset. A revan.   
\s1 Ama Lengi Ama Atlunget Dai Ama Quanas Nget  
\p
\v 6 Dap ngua tu gua qevep maberl sever a ngen, i ngene rledeng namen ma Iesus Kristus ka mer auut ne aa ngimsevetki. Dav iara dai sa ngen mit puuqas naqurl iang ama lengi i iari ra sil na nget, i re tuqun ai araa lengi i ama atlunget.  
\v 7 Dav ama lengi ama atlunget nagel ma Iesus dai maikka ama quanas nget. Dav iari i re siquat ip te guirltik pet ma Iesus Kristus aa lengi ama atlunget de maikka re lenges na nget be re siquat ip te surliip ne a ngen a tuaqevep.  
\v 8 Ngene narli. Ma Iesus aa lengi ama atlunget dai ama quanas nget. Dap kua ariq aiv uut, dap kuarl ama Angeluqa manarevuk i uure kaak de uure guirltik pet lungera ama lengi dai mager iv ama Slurlka ke qirlvem se uut de qem nem uut samer ama altingki.   
\m
\v 9 I murl ngua sil ba ngen na uirl sevet liina. Dai saqiaskerlka ngul sil. I sa uur reqerl a ngen ne ama lengi ama atlunget de ngen drlem sever a nget. Dap kuarl aiv iak ka men sagelem ngen de qe tekmet ip ke guirltik pet lungera ama Lengi ama Altunget dai mager iv ama Slurlka aa tuvetki ba qa masmas.  
\v 10 Dap kua ngen dru a ngen a qevep ai ngu narliip ngu tekmet ne ama qaqet ip ma arlias per a ra? Maikka quasik.  
\m Dap ngu narliip ngu tekmer iv ama arlias per ama Ngemumaqa. De qua ngu tekmet ne ama atlu i ariq aip ngu siquat ip ngua tit kur ama tuaqevep never ama aivetki ip ngu tekmet ne ara gamansena? Maikka quasik.  
\m De quariq aip ngu tekmet ne ama aivetki ara gamansena dai quasik maget ip ta tis ngua ai ma Kristus aa maatpitka.   
\s1 Aiv Ama Aposel Ne Ma Paulus Nanaa  
\p
\v 11 Dap gua rluavik, maikka ngua reqerl a ngen ne lungera ama lengi ama atlunget i murl ngua men se nget. I maikka lungera ama lengi dai quasiq ai nge men never ama qaqeraqa aa saikngias.  
\v 12 I quasik nge men sagel ngua ne ama qaqeraqa aa saikngias. De maikka quasiq ai a qek ka su ngua re lungera ama lengi ama atlunget. Dap maikka ma Iesus Kristus naik ka reqerl a ngua ne aa lengi.   
\p
\v 13 I sa murl ngene narli sever a ngua. I murl kurli ngua i ama barlka na ngua ver ama Judaqena araa lautu. I maikka ai de ngu serlin lura ama Kristenkena i ai de vetpet ngu lenges ne lura i ama Ngemumaqa aa liinka. I ai de gua nigilki qia taarl ip ngu perleset ma Iesus aa liinka.  
\v 14 De ngene narli, murl ngu ruirl se lura navet gua rlaaska iv ama barlka na ngua varlen gua lengiqi metta ver ama lautu. I maikka ngu dlek i ngu siquat ip ngu barl gua murlta araa gamansena ip gua mugunes per ama lautu dai ngu barlnas.   
\p
\v 15-16 Dav ama Ngemumaqa aa tuaqevep nge men bareq a ngua. I maikka murl ka mu ngua de gunan ara rlan de qa muvem na ngua ip ngu raneng aa ngimsevetki. I maikka aa ngimsevetki dai ama rarlimini i qa mak na ngua ip ngua ba qa. De qa reqerl a ngua ne aa Uimka ma Iesus Kristus, de qa nem ngua ip ngul sil sever a qa bareq ama qaqet i quasiq ai ra never ama Judaqena. I lua i qa nem ngua se aa rletki dai de quasiq ai ngu mali re a qeq ama qaqeraqa aa tuaqevep ip ke sem madlek na ngua. Kuasik.  
\v 17 De maikka quasik ngua mit savet ma Jarusalem, sagel lura ama Aposelkena, i qa nem ta nauirl. Dap ngua mit sever ama qerlingki i ama ausaqi na qi, i ra tis ki ma Arabia. Baiv aa de ngua guirl savet ma Damaskas saqiaskerlka.   
\p
\v 18 Baip perleser ama ages ama depguas de ngua mit sagel ma Pita ip ngut lu qa vet ma Jarusalem. De qurli ngua gel ka sa ma niirl ama 15 na nget naqatikka.  
\v 19 De vet lungera ama niirl dai quasik ngua lu iari ama Aposelkena. Dap katikka ngua lu iak ma Jems i auur a Slurlka ma Iesus aa ningamka.  
\v 20 (Ngene lu, lungera ama lengi i ngua iil iara sagel ngen dai maikka gua lengi dai ama revan. I maikka quasiq ai ama kaak nget i ama Slurlka qet lu ngua i quasiq ai ngu kaak tem ngen.)  
\v 21-22 Baip nasat de ngu tekmet ne gua rletki ver ama qerlengiim i ma Siria de ma Silisia. Dap lura ama Kristenkena vet ma Jarusalem de ma Judia Provins dai as ai de quasik ta lu gua sakngaqi.  
\v 23 Dap sa re narli ama lengi sever a ngua ma’, ‘Luqa ma Paulus i murl ke dlek ip ke peleng uut dai sa qa guirltik per aa rutka be maikka qe dlek ip ke su ne ma Iesus aa lengi. Dap murl ke siquat ip ke lenges ne ama Lengi ama Atlunget.’  
\v 24 De lura ama Kristenkena dai ra maarl ne ama Ngemumaqa aa rlenki never a ngua.   
\c 2  
\s1 Ama Aposelkena I Ama Arlias Per A Ra Te Ne Ma Paulus  
\p
\v 1 Baiv aa de verleset ama ages ama malepka ngen ama rlatpes de saqiaskerlka ngua mit savet ma Jarusalem. I ngu ne ma Banabas de ma Taitus.  
\v 2 I ama Ngemumaqa naik dai qa reqerl a ngua de qa nem ngua ip ngua tit taqurla, de qa nem ngua ip ngul sil ba ra ne ama Lengi ama Atlunget. I lungera ama lengi dai raquarl lungera ama lengi i ngua sil na nget barek lura ver ama qerleng mai i ra i quasiq ai ra naver ama Judaqena. Dap maikka ngua taqen per a ra ve ama trleses i quasik ngu narliip ngua taqen per ama buurlem ne ama qaqet. Dap maikka ngua dlek ip ngua taqen pet lura i auur a barlta naik. I qatikka ngu narliip ngu seserl ver ama lengiirang pet gua rletki, i sa ra narli sever a qi, nagel iari. I quasik ngu narliip gua rletki dai lenges na qi.  
\v 3 De vet luus aa i uure kaivung dai qurli ma Taitus ke na ngua. Be qa dai maikka quasiq ai qa never ama Judaqena dap ka never ama Grik. Taqurla be ama Aposelkena rat drlem ai murl kuasik ta sik per a qa. Dap kuasiq ai re teqestem per a qa ip te sik per a qa ip taquarl ama Judaqena araa gamansena.  
\v 4 Dav ama merlenka qa men per a uut i raquarli iari ra men se varlen me uut i ama kaak-metta. I re kaaq ai ama atlura na ra, dav araa narliip ip te kiat mer auur a tuaqevep namene ma Iesus Kristus iv uut tit kur ama Judaqena araa Aisiirang.  
\v 5 Dap maikka quasik mager iv uut narligel ta quarla iv uut tit kur ama Judaqena araa Lo. Maikka quasik maget gel uut. Dav uure dlek iv ama Slurlka aa lengi ama revan-nget, nge tit sagel ngen mai.   
\p
\v 6 De ngua tu gua qevep ai uut dai ama quanases mer uut dama Ngemumaqa aa saqang, dap kuasiq ai a qek peviit. Taqurla be quasiq ai ama qelep ngua riq ama barlta i raquarli quasiq ai mager ip te rluses ne a qeng ama lengi de lungera ama lengi ama atlunget i ngua sil na nget.   
\m
\v 7 Dap katikka muqas. I ret lu ama Ngemumaqa aa dlek pet gua rletki i ngul sil ne ama Lengi ama Atlunget bareq ama qaqet per ama aivetki i lura i quasiq ai ama Judaqena na ra. I ip taquarl ma Pita aa rletki ip ka taqen ne ama lengi ama atlunget barek lura ama Judaqena naik.  
\v 8 Ngene lu, ama Qevepka ama Glasingaqa qet matna ne ma Pita de qa nem ka ip ka iit sagel aa lengiqi metta, ama Judaqena. Dai saqikka qet matna de gua rlan de qa nem ngua sagel ama nangista, i lura i quasiq ai ra never ama Judaqena.  
\v 9 Baiv aa de ra taqen be verleset de ma Jems, de ma Kepas (Pita), de ma Jon, ta taqen per auut. (I lura ama depguas na ra dai maikka ra raquarl ama vetki ara venaik, bareq ama Kristenkena.) I re taqa meraqen de ra rarlisdem iv uut tit sagel lura i quasiq ai ama Judaqena na ra. Dap ta dai as diip ta taqen ne ama Slurlka aa lengi bareq ama Judaqena. I ra rekmet taqurla i raquarli sa rat drlem ai ngu ne ma Banabas dai sa ma Slurlka qa qurl auun te aa arlem de maikka ama arlias per a ra never auun. Taqurla de uure sangarl auur a ngerikkana navet liina.  
\v 10 De ma Pitaqena ra sem madlek na uun iv uun derat nevet lura i quasiq araa qerang. Dai maikka ngua mugelnas ne liirang aa de maikka gua tuaqevep taquarl ta.   
\s1 Ma Paulus Ka Taqen Sagel Ma Pita  
\p
\v 11 Dav aip lua i ma Pita qe paikmet sagel uut pet ma Antiok, de vet luus aa de maikka ngua maarl na qa ne iang ama lengi sevet liina arle ves i qa rekmet ne ama vu. Be maikka quasik mager ip ke guirltik ba ngua.  
\v 12 I as lua i ma Pita qa men pet ma Antiok de maikka qa tes, ke ne ama nangista i quasiq ai ra naver ama Judaqena. Dap naser iang ama niirl de ma Jems aa liinka ra men navet ma Jarusalem. De ma Pita qeng ning me ra, be saqi quasiq ai qurli qa gel ama Kristenkena ama nangista i raquarli ma Jems aa liinka dai re dlek se liina ip te sesik per ama quatta.  
\v 13 Be maikka lura ama Kristenkena, i ama Judaqena na ra, dai re ne ma Pita ta tit kur ama Judaqena araa gamansena. I maikka re kaak temiis ne liina dap ta taqen ne araa saikngias be ma Banabas ka tu aa qevep maberl de qa mit naser a ra.   
\p
\v 14 Dap lua dai maikka ngut lu i re kaak de maikka quasiq ai re tekmet taquarl ma Iesus aa Lengi ama Revan nget. De ngu kaivung gel ta be ngua maarl ne ma Pita varlen me ra. De ngu tuqun a qa, ma’, “Pita, katikka ngi never ama Judaqena. Dap pet gia mugunes dai gia gamansena ip taquarl lura ama nangista. I quasiq ai ngi tekmet taquarl ama Judaqena araa gamansena. De ngu lu nanaa be ngi teqestem pet lura ama nangista ip ta tit kur ama Judaqena araa gamansena?”   
\s1 Ama Qaqet Te Iames I Ra Tu Araa Qevep  
\p
\v 15 De ma Paulus ka taqen sagel ma Pita ma’,  
\mi “De maikka uun, ne auun a qetdingki dai uun navet ma Juda. De quasiq ai auun a lavu naver ama nangista ama vura.  
\v 16 De uun drlem ai quasik mager iv ama qaqeraqa qe iames dama Ngemumaqa aa saqang ne aa gamansena i qa tit kur ama Murlta araa Lo naik. Dav ama aiska masarevuk dai mager iv ama qaqeraqa qa tu aa qevep de rlas tem ka mene ma Iesus Kristus. Kerl taqurla be sa uun dru a uun a qevep sagel ma Iesus Kristus iv ama seserl iam na uun de ama Ngemumaqa aa saqang, i uun dru auun a qevep sevet ma Kristus. Dap kuasiq ai uune iames nagel ma Moses aa Lo naik. A revan, i quasik mager iv ama Slurlka aa Lo naik ngere tekmet ne ama qaqeraqa iv ama seserlka dama Ngemumaqa aa saqang.”   
\p
\v 17 Sa ariq aip uun perleset never ama aisiirang i ama Judaqena araa Lo nge taqen sever iirang, de ariq uune siquat iv ama seserl iam na uun de ama Ngemumaqa aa saqang ne ma Kristus aa dlek naik, dai diiv iari ama Judaqena ra tis uun ai ama vu iam na uun. Ngu lu nanaa, qua ma Kristus aa ding se uune iv uune riirl ama viirang per auun a mugunes? Maikka quasik!  
\v 18 I maikka quasiq ai ngu iames nagel ama Slurlka aa Lo naik. Dav arik ngurl guirl ip ngu siquat iv aa Lo naik ngere iames na ngua dai saqiaskerlka ngua rekmet ne ama viirang.   
\m
\v 19 I maikka ama Slurlka aa Lo ngere teqerl a ngua ne gua viirang i quasik mager ip ngere iames na ngua. Taqurla be ngua ngim temanau na nget. Dap ma Iesus naik dai mager ip ke iames na ngua ip katikka ngua bareq ama Ngemumaqa naik.   
\m
\v 20 Be iara ngu iames i qurli ma Kristus de gua rlan. I murl ma Kristus ka ngip men ama lalemka be ngua ngip, ngu na qa i ngua veleng pet gua viirang mai. Be iara ngu iames pe gua qetdingki dai muqas. I ngu iames i raquarli ngua tu gua qevep de rlas tem ngua men ama Ngemumaqa aa Uimka. I qe rarlik ngua de aa ngimsevetki sagel ngua be qa ngip bareq a ngua.   
\p
\v 21 I maikka quasiq ai ngu kirlevem se ama Ngemumaqa aa ngimsevetki. I ngene lu, kuarik mager iv ama Ngemumaqa aa Lo naik ngere iames nauut dai ma Kristus dai qa ngip naik.   
\c 3  
\s1 Iari Dai Quasik Ta Tu Araa Qevep Ip Taquarl Murl  
\p
\v 1 Kua ngen ama qaqet pet ma Galatia dai ama dul men a ngen a ning? De qua iari dai re kuaindem be ra lenges ne a ngen a tuaqevep? Dap mekai dai ra su ngen te ama Lengi ama Atlunget. Be ngen drlem ama rarlimini i ma Iesus Kristus ka ngip men ama lalemka. Dap murl nauirl dai ngene taqat drlem sever a qa, i maikka murl ngene taqat drlem.   
\p
\v 2 Diip ngu snanpet na ngen ip puktik per a ngen, ne ama Qevepka ama Glasingaqa aa dlek. Kua ama Qevepka ama Glasingaqa qa man sede a ngen a rlan i raquarli ngene narligel ama Slurlka aa Lo? Maikka quasik! Dap mekai ama Lengi ama Atlunget nge men nauirl, be ngen dru a ngen a qevep sevet ma Iesus Kristus de ngen tal ama Qevepka aa dlek.  
\v 3 Kua ngen siquat iara iv a ngen a mugunes ip taquarl ama sementa? Kurli!  
\m I murl nauirl dai ngene taqat mit naser ama Qevepka aa dlek, dav iara ngene mali re liirang aa ne ama qetdingki ara dlek. I ngu lu nanaa?  
\v 4 Kua murl nge rarles i re uamet na ngen i ngen maarl malkuil, dav iara dai ngen serlek? Dap ngua tu gua qevep ai quasiq ai liirang aa ama merlen iirang nge mit naik?  
\v 5 De saqikka ngu snanpet. Kuarl ama Ngemumaqa qa qurl a ngen te ama Qevepka ngen ama dlek ip ngene tekmet ne ama nanses pemiirang bareq ama qaqet?  
\m Ii a revan, dap kuarl ama Ngemumaqa qa qurl a ngen i raquarli ngenet dadem ama Lautu angera Lo? Kuasik.  
\mi Ama dlek nge men i raquarli ngene narli ama Lengi ama Atlunget nagel ma Kristus de ngen dru a ngen a qevep sever a qa.   
\s1 A Qasiquatka I Ma Abraham Ka Tu Aa Qevep  
\p
\v 6 Ngen drlem sever auur a murlka ma Abraham, i maikka qa tu aa qevep naik de rlas tem ka men ama Ngemumaqa be maikka maget na qa, be ama Slurlka qa tis ka ai ama seserlka de aa saqang.  
\v 7 I maikka lungera nge su uut, aip kuarik uut tu auur a qevep de rerlas tem uut men ama Ngemumaqa ip taquarl ma Abraham dai maikka diiv uut dai aa uis ne ama revan.  
\v 8-9 A revan, ama qaqet mai ver ama aivetki i ra tu araa qevep de rlas tem ta men ma Kristus dai diiv ama Ngemumaqa qe qurl a ra te ama atliirang taquarl murl miaimek i qa taqen ne aa revan sagel ma Abraham. I murl ama Ngemumaqa qa reqerl ma Abraham ne ama lengi ama atlunget. I lungera dai ra iil ve ama Slurlka aa Langinka ma’,  
\q1 ‘Diiv ama qaqet per ama aivetki mai dai diiv ama Ngemumaqa qe rekmet ne ama atliirang sagel ta. I raquarli ma Abraham ka mu aa qevep sever ama Ngemumaqa.’ \rq Stt 12.3 de ma 18.18 \rq*  
\p Taqurla de ama Ngemumaqa qe iames ne iari naver ama qerleng mai ver ama aivetki. I maikka ama nangista i quasiq ai ra navet ma Isrel dai diiv ama seserlta de ama Ngemumaqa aa saqang i ariq aip ta tu araa qevep naik sevet ma Kristus.  
\v 10 Dap saqi iang muqas, i lura i ra tu araa qevep de rlas tem ta mene ma Moses aa Lo ip te iames nagel nget, dai quasik maget. I ama Slurlka aa tuvetki dai diip ki lenges na ra. I ama Slurlka aa Langinka dai qa sil, ma’,  
\q1 ‘Ama Slurlka aa tuvetki dai barek lura i quasik ta tit masmas kur ama Slurlka aa Lo i ra iil me nget pe ama Langinka.’ \rq Lo 27.26 \rq*   
\p
\v 11 Be maikka uut drlem ai quasik mager ip ta tis uut ai ama seserl ta nauut dama Ngemumaqa aa saqang i raquarli uut tit kur aa Lo. Katikka quasik. I murl ta iil ma’,  
\q1 ‘Ta tis ama qaqet ai ama seserlta na ra dama Ngemumaqa aa saqang i raquarli ra tu araa qevep sagel ka.’ \rq Hab 2.4 \rq*   
\p
\v 12 Dap maikka ama Lo angera uaq ama aiska dai qa muqas namen ama tuaqevep angera uaq ama aiska.  
\q1 ‘Arik ngi narligel ama lengi ama dlek pem nget per ama niirl mai dai diip ngi iames.’ \rq Livai 18.5 \rq*   
\p
\v 13 Dap ma Iesus dai sa qa iames nauut naver ama aiska i ama Lo ngere lenges nauut. I sa qa van per auur a viirang, be qa ral auur a tuvetki. I maikka ama Lo angera tuvetki dai qia aat per a qa bareq auut. I ama Lengi nge sil, ma’,  
\q1 ‘Ama Ngemumaqa aa tuvetki barek lura i ra uadem se ra men ama mengka. \rq Lo 21.23 \rq*   
\p
\v 14 I ma Iesus Kristus dai ama rarlimini be mager iv ama Slurlka aa raatmaat-nevet sagel ma Abraham, dai maget kur ama nangista ver ama aivetki mai. Be mager iara ip lura i ra tu araa qevep sever ka dai diip te raneng ama Qevepka ama Glasingaqa i murl ka meraqen ne aa revan.   
\s1 Ama Slurlka Aa Lengi I Qa Muvuusep  
\p
\v 15 Gua rluavik, diip ngu reqerl a ngen ne ama qasiquatka. Aiv iak ka muvuusep sagel iak de ra iil liina ve ama langinges be ra tu araa rlen dama kiap aa saqang, baiv aa de quasik mager iv iak ke rluses dap kua qe bingmet lungera ama lengi varlen me iam.  
\v 16 Taqurla, de murl miaimek ama Ngemumaqa qa mu vuusep sagel ma Abraham ke ne aa Uimka iv aa Uimka dai diip ke raneng ama raatmaat-nevet. Dap maikka quasik ai qa tis ma Abraham aa laanivas. (i ama Judaqena) Dav ama Langinka qa sil sever iaq ama quanaska. I qatikka aa Uimka naik. I luqa i aa Uimka dai ma Kristus, dap kuasiq ai a qek.  
\v 17 Ngu narliip ngu taqa su ngen sevet liina. I ama Ngemumaqa aa Lo nge men per ama ages ama 430 naset ma Abraham. Dap kuasik mager iv aa Lo ngere guirltiq per ama lengi i qa muvuusep sagel ma Abraham. I maikka aa lengi i qa muvuusep dai qurli nget masmas.  
\v 18 I ama Slurlka qa qurl auut te aa atliirang kur aa lengi i qa meraqen ne aa revan. Dav arik uure mali te liirang aa kur ama Lo naik, dai diiv uure lenges ne aa lengi i murl ka muvuusep. Dav ama Slurlka qa qurl ma Abraham te ama tekmeriirang ama atliirang ip taquarl murl ka muvuusep.   
\s1 A Slurlka Qa Muvuusep Sagel Ma Abraham Dav Ama Lo Nge Men Gel Ma Moses  
\p
\v 19 Taqurla dai ngu lu qurl ama Lo ip nanaa? Liina dai raqurliani: Ama Ngemumaqa dai qe narliiv ama rarlimini se ama viirang dai qurli iini sekgames. Taqurla be murl ka mu ama Lo mer ama Angeluqena, de ama Angeluqena ra qurl iak, i qurli qa i ama Veleqeska (i luqa dai ma Moses). De ama Lo dai ip kurli nget ip deng i luqa ama Rluimka qe baingses, i murl ama Ngemumaqa qa muvuusep sever a qa.  
\v 20 Dap pet luus aa i ama Ngemumaqa qa tu vuusep sagel ma Abraham ne ama Lengi ama Atlunget dai qatikka qa ama quanaska i qa maarl vet ma Abraham aa saqang. I quasik kurl a qek peleqes na iam.   
\s1 Ama Lo Ip Ngere Kirlvem Uut Sagel Ma Kristus  
\p
\v 21 Kua ma Moses aa Lo dai nget muqas ip ngere ruirl se ama Lengi ama Altunget i ama Ngemumaqa qa muvuusep na nget barek ma Abraham? Maikka quasik. I ariq a qeni nevet lungera ama Lo i mager iv iini ngere van auut te ama iames, dai mager iv ama seserl ama mugunes i liina i mager ip maikka re taqat mit kur ama Lo.  
\v 22 Dav iara dai ama Slurlka aa Langinka qa taqen ma’,  
\q1 ‘Ama viirang dai iirang nge karabus ne ama qaqet mai.’  
\p I qa rekmet taqurla iv uut, i uut tu auur a qevep sevet ma Iesus Kristus, dai mager iv uure raneng liirang aa i murl ama Ngemumaqa qa muvuusep barek lura i ra tu araa qevep.  
\v 23 I as murl i as kuasiq ama aiska qa men iv ama qaqet ta tu araa qevep, de ama Lo dai nge karabus na uut. Be nge karabus na uut be deng i ama tuaqevep sevet ma Kristus.  
\v 24 Be ama Lo dai raquarl ai auur a matka i qe uas tem uut, ip nget den se uut sagel ma Kristus. Be mager iv uut tu auur a qevep sever ama lengi ama atlu nget de mager iv ama Ngemumaqa qa tis uut ai ama seserlta na uut.  
\v 25 Dap sa iara dai sa ma giqi iv ama qaqet ta tu araa qevep. Taqurla, dai be ama Lo ip taquarl auur a matka i qe uas tem uut dai sa quasiq ai qurl uut per aa arlim.  
\v 26 Be ngen mai dai ngen dru a ngen a qevep sevet ma Iesus Kristus. Be ne lungera ama tuaqevep, dai qurli ngen i ama Ngemumaqa aa uis na ngen.  
\v 27 Be ngen i murl ta ukmestem ngen ne ma Kristus be ding se ngen men a qa, dai be ngen muremiis na qa. Be ngen ip taquarl ka, i ngen muremiis na qa ip taquarl ne ama luanki.  
\v 28 Be iara dai quasiq ai ama Ngemumaqa dai qet lu ai ngi dai qatti ngi never ama Judaqena dap kua ngi never ama Grikkena. De quasiq ai qet lu ai ngi dai luqa i ra vandem per a qa iv ama maatpitka dap kuarl luqa dai i quasiq ai ra vandem per a qa iv ama maatpitka. De quasiq ai qa tatmet ip ngi dai qatikka ama quatka de qatikka ama nanki. I ngen dai ama quanases met ngen mene ma Kristus.  
\v 29 De ariq aip ngen dai nemen ma Kristus, dai saqikka ngen dai ma Abraham aa uis. Be ngen dai diip ngen det liirang aa i murl ama Ngemumaqa qa mak niirang ip barek ma Abraham.   
\c 4  
\s1 A Ngemumaqa Aa Uis  
\p
\v 1 Saqi ngu narliip ngu sil ba ngen ma’, Ama rluimka dai diip ka ter ama tekmeriirang mai nagel aa mam. Dav as murl i ama gil ama rluimka dai qa ip taquarl ama buaiska i quasik mager ip ke raneng a qeni.  
\v 2 De qatiaskerl mager ip kurli qa vet lura araa arlim i re uas de lura i re ruirl. I diip kurli qa raqurla ip deng pet luqia ama giqi i aa mam ka mu qi.   
\m
\v 3 Dai saqikka uut taqurla. I saqikka murl uut ip taquarl ama arluis. I murl ama aivetki ara iaus ama vu nget ngere karabus na uut.   
\m
\v 4 Dav aip lua i ama giqi qia men i ama Ngemumaqa qa mu qi, de qa nem aa Uimka. Be aa Uimka dai ama nanki qia sel a qa. De qatikka aa Uimka qa men be aa aatmires ip taquarl ama Judaqena araa Lo nge taqen.  
\v 5 I ama Ngemumaqa qa rekmet taqurla ip ke vadem per auut nev ama Lo. Taqurla be uut dai iara qurl uut i ama Ngemumaqa aa aatmer-ara na uut.   
\m
\v 6 Be uut, dai iara aa uis na uut. Taqurla be ama Ngemumaqa qa nem aa Uimka aa Qevepka sede auur a rlan. Be ai de ama Qevepka qe tekmet na uut be uures nes ma’, “Auut Mam.”  
\v 7 Taqurla be ngi dai quasiq ai ama buaiska na ngi naik. Kuasik. Dap ngi dai aa uimka na ngi. Dai ariq aiv ama Ngemumaqa qa mer a ngi, be ngi dai aa uimka na ngi, dai be ngi ip diip ngia aar aa tekmeriirang.   
\s1 Ma Paulus Ka Tu Aa Qevep Maberl Sever Ama Galatiaqena  
\p
\v 8 Dav ama revan i murl kuasik ngen drlem se ama Ngemumaqa, dap ngenet matna i ngene karabus bareq ama iaus ama vu nget i quasiq ai angera dlek ip taquarl ama Ngemumaqa.   
\p
\v 9 De iara dai sa ngen drlem se ama Ngemumaqa ama revanka. Be mager ip ngu tuqun ai sa ma Ngemumaqa qat drlem se ngen. Dap saqias ngu lu nanaa be ngen guirl ip ngen diit kut lungera ama iaus ama vu nget ip taquarl murl? Saqias kua ngene narliip liirang aa ngere karabus na ngen?   
\m
\v 10 De qatikka ai de masmas ngenem ngim sagel ama niirl ama slurlnget, de ama iaquan, de ama lautu ama slurl-nget de ama ages.  
\v 11 Be ngua tu gua qevep sever a ngen be ngung ning. I ngung ning i ngua matna gel ngen dai be naqatti gua rletki qia mit naik.   
\p
\v 12 Gua rluavik, murl vet luus aa i baing se ngua gel ngen dai ngu tekmet ip taquarl ngen.  
\m Taqurla be iara nguk nak ip maikka ngen druaqen ngua. De quasiq ai ngen dekmet ne a nge ama vu sagel ngua.  
\v 13 I sa ngen drlem ai murl dai ngut temarl vet gua qetdingki. Taqurla de ngul sil ne ama lengi ama atlu nget bareq a ngen i lua i ngere rarlma.  
\v 14 Be ama revan i lua i quasiq ai ama atlu sever a ngua, dai liina ngere siquat na ngen.  
\m Dap kuasiq ai ngen ngim temanau na ngua, de quasiq ai ama neng na ngen se ngua. Maikka quasik. Dap ngen mer a ngua ip taquarl ai ngen mer a nge ama Ngemumaqa aa Angeluqa dap kua raquarl ai qatikka ngen met ma Iesus Kristus.   
\m
\v 15 Ai de medu ama marl na ngen. Dai ngu lu a ngen arlias kua? I maikka ngua taqen ne ama revan sever a ngen a tekmeriirang ama atlu iirang. De vadai de vet luus aa de ngen berltik per a ngen a saqang de ngen kurl a ngua.  
\v 16 De iara dai nanaa? I sa ngua sil ba ngen ne ama revan. Be ani ngua dai a ngen a qumeska na ngua?   
\p
\v 17 Ngene narli. Lura i ra taqen per a ngen ip ngenen ngim sagel ta, dap kuasiq araa a nge ama tuaqevep ip ta tat never a ngen. Maikka quasik. I re narliip te pesdet sarem ngen, ip ngen dru a ngen a qevep ip ngen derat never a ra.  
\v 18 Ariq aiv uut tu auur a qevep madlek iv uut tat never iari, dai maikka maget iv uut tat never a ra. Dai qatikka mager ip masmas ngene tekmet ne liina. De qatikka quasiq ai lua i aiv i saqikka qurli ngu na ngen de ngene tekmet ne liina.   
\p
\v 19 Gua arluis, saqi ngu narli ngu tal ama getget i nget ip taquarl ai de ama nanki qi tal nget i aip kia tu ama rluimka. I maikka raquarli ngu narliip ngen dai rlas tem ngen mene ma Kristus.   
\m
\v 20 Guarii, maikka ama arlem ngua i quasiq ai qurli ngu na ngen iara. Dav arik kurli ngu na ngen dai arik maget iv uure taqal sil ba na de ngurl kurl a ngen te ama lengi ama atlu nget. Be maikka ngua tu gua qevep maberl sever a ngen. Be quasik nguat drlem aip diip ngua raat never a ngen nanaa.   
\s1 A Qasiquatka Sevet Ma Haiga Qi Ne Ma Sara  
\p
\v 21 Dap ngen, i ngene narliip ngene narligel ama Lo, dai mager ip ngene sil ba ngua iara. Kua ngen drlem aiv ama Lo nge taqen nanaa?  
\v 22 De ama lengi ve ama Ngemumaqa aa Langinka dai ngerel sil ma’,  
\mi ‘Abraham dai aa uimiam ama quariam. I ama buaiski i ai de qit matna naik, ma Haiga dai qia sel iak. De luqia i aa ngerlki ma Sara dai qia sel iak.  
\v 23 Be luqia i ma Abraham aa buaiski, dai are uimka i qia sel a qa ip katikka raquarl ai de ama nankina rel sel ama arluis. Dap luqia i aa ngerlki ma Sara, dai are uimka, i ama Ngemumaqa qa muvuusep de baing se qa.  
\v 24 Dai ama qasiquatka ne luqa ama siitka, ai liim aa ama naniim dai iane siquat i iane teqerl ne ama Ngemumaqa aa aisiam i ianet matna gel Aa qaqet. I ma Haiga dai qi siquat te liina ver ama damki ma Sainai. De are uis dai raquarl ama liin ne ama buaiskena i ret matna naik.  
\v 25 De ma Haiga dai qi siquat te ama damki ma Sainai, i luqia ama damki i murl ma Moses ka mer ama Lo i qurli qa ve reves. I luqia ama damki dai qi ver ama qerlingki ma Arabia. De qi siquat te ngene ma Haiga are uis i qurli ra iara vet ma Jarusalem. I lura i qurli ra vet ma Jarusalem dai raquarl ai qurli ra ve ama karabus i ret matna naik. I ama lengiqi ama dlek pem ki nevet ma Jarusalem dai ai de vet ki lenges ne ra.   
\p
\v 26 Dav auur a luqupki ama iameski dai ip taquarl iaiq ama Jarusalem i qi vuusep, i diiv uure iames de qurl uut maget per a qi.  
\v 27 De ama Ngemumaqa aa Langinka dai qa taqen ma’,  
\q1 ‘Ngi ama nanki i ai de quasik ngil sal ama arluis, dai mager iv ama arlias per a ngi. De ngi i ai de quasik ngia ral a nge ama getget ip ngil sal ama arluis, dai mager iv ama atlu gia rutka. De mager ip ngi taing ama taing de ama arlias per a ngi de ngis nes ne ama arlias. I raquarli ngi dai maikka diip buup ne gia arluis. I maikka diip buup na ra dap luqia i qia ngerlvet dai naqatikka diiv ama langas ne araa ri ama arluis.’ \rq Ais. 54.1 \rq*   
\p
\v 28 Gua rluavik, maikka ngen taquarl ma Aisak i ma Sara are uimka. I ne liina i ama Ngemumaqa qa muvuusep dai ngen dai aa uis na ngen.  
\v 29 Dap luqa ama rluimka i qa men ne luqa ama aiska i ai de ama qaqet ta tu ama arluis, dai qa rekmet ne ama vu sagel luqa ama rluimka i qa men ne ama Qevepka ama Glasingaqa aa narliip. Dai be qatikka ai iara dai qurli liina ama arasmesini veleqes ne ama liiniam  
\v 30 Dap ngu lu ama Ngemumaqa aa Langinka dai qa taqen nanaa? Ka taqen ma’,  
\q1 ‘Te nem luqia i ai de qit matna naik, ki ne are uimka. I quasik mager ip luqia i ai de qit matna naiq are uimka qat aa mam aa tekmeriirang angera garliqa de ngene luqia are uimka i maikka a ngerlki marevan.’ \rq Stt. 21.10 \rq*  
\p I qatikka diip liirang aa mai nger iit barek luqia ma Sara are uimka. I ama Ngemumaqa aa Langinka qa taqen taqurla.  
\v 31 Dai guariqena, uut drlem, ai uut dai quasiq ai ma Haiga are uis na uut ip ma Moses aa Lo ngere uas tem uut. Maikka quasik. Dav uut dai ma Sara are uis na uut be qurl uut per ama Slurlka aa arlim i qa veriktem se uut.   
\c 5  
\s1 Maikka Veriktem Se Uut Marevan  
\p
\v 1 Ma Kristus dai sa qa veriktem se uut be qurl uut per aa arlim, ip kuasik mager iv ama Lo ngere uas tem uut. Taqurla dai be maikka mager ip ngen deraarl malkuil. De saqias kuasik mager iv a ngen a ding se ama tekmeriirang iv iirang ngere kuap per a ngen.   
\p
\v 2 Ngene narli. Ngua ma Paulus i ngul sil ba ngen, ai ariq aiv a ngen a ding se liina ip te sesik men a ngen a qetdengiit, dai ma Kristus aa rletki dai maikka quasik mager ip kia raat never a ngen. Maikka quasik.  
\v 3 I ngen ama quatta mai i a ngen a ding se liina i ip te sesik per a ngen, dai ngu narliip saqiaskerlka ngu raqal sil ba ngen ma’, ‘Ariq aip ngene tekmet ne liina raqurla, dai saqikka mager ip maikka ngene taqat mit kut ngen ama Lo mai.’  
\v 4 De ariq aip ngene narliip ngen diit kur ama Lo, i ne liina i ngene narliiv ama Ngemumaqa qa tis ngen ai ama seserlta na ngen, dai sa ngen mit nemen ma Kristus. De ngen mit nemen ama Ngemumaqa aa ngimsevetki.   
\p
\v 5 I qatikka ne ama Qevepka ama Glasingaqa aa dlek dai uut tu auur a qevep sever ama Ngemumaqa. De qurl uut de ver a qa ip ka tis uut ai ama seserlta.  
\v 6 De ariq aiv iak i qurli qa men ma Kristus, dai liina i re sesik men aa qetdengiit dai quasiq a qeni. De luqa i aa tekmeriirang i quasik ta sik per a qa dai saqikka quasiq a qeni. Dap luqa i aa tekmeriirang i qa tu aa qevep de rlas tem ka mene ma Kristus dai liina nge taarl na qa ip maikka qe rarliq iari, dai liina dai maikka ama barliini.   
\p
\v 7 Mekai dai ai de ngene taqat dadem ma Kristus aa aiska. Dap nemka qa vesdet men ama aiska be sa quasiq ai ngen diit kur ama lengi ama revan nget?  
\v 8 Lunger iara ama tuaqevep i iara ngen diit kut nget, dai quasiq ai nget nagel ama Ngemumaqa. I ngen, dai ai de ama Ngemumaqa qes nes tem ngen.   
\m
\v 9 Be ngen drlem, ai iang ama lengi muqas dai nget ip taquarl ama Yis i ama langas na nget dap mager ip ngere tekmet ne ama plaua mai ip ngere riirl ama bret.  
\v 10 Dap ngua tu gua qevep ai diiv ama Slurlka qa tat never a ngen be diip kuasik ngene taneng a qeng ama tuaqevep muqas. I quasik nguat drlem aip nemka qa tit se a ngen a tuaqevep puuqas. Dap kuasiq a qeni, i qatikka luqa dai diip ke raneng ama ranbandem sever ama viirang arle ves.   
\p
\v 11 Gua rluavik, ariq ama revan i qatiaskerl ai de ngul sil ne ama lengi bareq ama qaqet ip maikka mager ip te sesik per ama quatta, dai dap katiaskerl ngu lu nanaa be re tekmet ne ama vu sagel ngua? Dai ariq aip ngu tuqun a ra ip te sesik men ama qetdengiit per ama quatta, dai ama lengi sever ama lalemka, dai liina dai quasiq ama dlek pem iini de diip kuasik te serlin sever iini arle ves.  
\v 12 Dai lura ama qaqet i ra tit se a ngen a tuaqevep puuqas, de re dlek se liina ip te sesik men ama qetdengiit. Dap katikka ani mager ip te sesik per a nas de re sik naset ngen araa quvel mai.   
\p
\v 13 Guariqena, maikka ama revan, i sa ma Ngemumaqa qa nes tem ngen ip mager ip kurli ngen per aa arlim. Dav arik ma ngen dru a ngen a qevep ma’, “Uut dai sa ma Kristus ka veriktem se uut. Taqurla dai be qua mager iv uure tekmet ne ama rutka ama murlaska aa tekmeriirang?” Kuasik.  
\m Maikka quasik mager ip ngen dru a ngen a qevep taqurla. Dap ngen i iak de iak dai qatikka mager ip ngen derat never iari ama qaqet i ama Ngemumaqa aa uis. De mager iv a ngen arlem never a na.   
\m
\v 14 I ama Lo mai dai nget mai ve liini iara ama lengi iini ma’,  
\q1 ‘Maikka mager ip ngi rarlik gia ari ip katikka raquarl ai de ngi rarlik nas.’   
\m
\v 15 Dap katikka arik parlen me ngen dai ngene serlin de ngene uamet nana maden, dai mager ip ngenet lu. I qatikka arik ma ngen lenges nanas mai.   
\s1 A Qevepka Ama Glasingaqa De Ama Rutka Ama Murlaska Ian A Gamansena  
\p
\v 16 De gua lengi dai raqurliani, maikka mager iv a ngen a ding se ama Qevepka ama Glasingaqa ip ke ruirl se a ngen aatmires. I ariq aip ngene tekmet taqurla, dai quasik mager ip ngen diit kur ama aatmires ama murlases angera narliip.   
\m
\v 17 I uut drlem, ai ama rutka ama murlaska dai qe narliip ka sev ama Qevepka ama Glasingaqa aa uuves.  
\m De ama Qevepka ama Glasingaqa dai qe narliip ka sev ama rutka ama murlaska aa uuves. I iam dai ian a qumes-iam nana.  
\m Be liirang aa i ngene narliip ngene tekmet niirang, dai quasik mager ip ngene tekmet niirang.  
\v 18 Dai be arik ngen diit naser ama Qevepka ama Glasingaqa, dai quasiq ai ama Lo ngere uas tem ngen.   
\s1 Ama Tekmeriirang Na De Auura Ran I Ama Viirang  
\p
\v 19 Dai sa ngen drlem se ama rutka ama vuqa aa gamansena.  
\li1 I ama tekmeriirang dai iirang muqasmuqas taqurliani;  
\li1 Liina i re nanna maden maden, de liina i ra tu ama qevep sever ama viirang taqurla.  
\li1 De liina i ama rutka qa taarl ip sever ama viirang.   
\li1
\v 20 De liina i re lautu sever ama Sinap ngen ama iaus de ngen iang ama lautu ama kaak nget.  
\li1 De liina i re tekmet ne ama qenang muqas muqas.  
\li1 De liina i ama qumespik nana, de ama qurek per ama rutka,  
\li1 De ama vu ama rutka,  
\li1 De liina i re rarliq iari araa quvang iirang.  
\li1 De liina i qatikka re rarlik nas,  
\li1 De liina i ra taqen sagelna maden be re barlmet ne ama qaqet araa liin.   
\li1
\v 21 De liina i maikka ama vu ama rutka sevet lura i qurli ra maget, de liina i re srluuv ama qerlap be re kabaing,  
\li1 De liina i re ngelanges, de liina i res nes slep maden maden,  
\li1 de qatikka liirang aa maden maden taqurla.  
\p De qasa mekai ngua sil ba ngen, dap saqiaskerlka ngua tit pet lungera ama lengi. Be lura mai i re tekmet ne liirang aa raqurla, dai quasik mager ip diip ta ran sever ama Ngemumaqa aa luqupki.   
\s1 Ama Qevepka Ama Glasingaqa Dai Aa Tekmeriirang i Qe Qurl Auut  
\p
\v 22 Dav ama Qevepka ama Glasingaqa dai ai de qa taarl ne auur a rut iv uure tekmet ne ama tekmeriirang ama atlu iirang taqurliani;  
\li1 Liina i maikka re rarliq iari,  
\li1 De liina i ama arlias sagel ama Slurlka  
\li1 De liina i ama uupka dama rlan  
\li1 De liina i quasiq ai masmasna rletrlet per ama qaqeraqa  
\li1 De liina i ra tat never iari de re tekmet ne ama atlu sagel ta  
\li1 De liina i qatikka ama seserl ama aatmires masmas   
\li1
\v 23 De liina i ama sungsung ne ama qaqeraqa  
\li1 De liina i ren bin ama rutka ama murlaska aa gamansena manep.  
\p Dai maikka quasiq a qeni never ama Lo nge qel a qeni nevet liirang aa ama tekmeriirang.  
\v 24 Be lura mai i ama quatta ngen ama nankina i ra nemen ma Iesus Kristus aa liinka, dai ra miirl ama aatmires ama murlases de ngen ama a narliiv ama vu nget, i lungera i re narliip se iari araa tekmeriirang. Dai sa ma Kristus ka ngip men ama lalemka sevet liirang aa.   
\p
\v 25 De ama Qevepka ama Glasingaqa dai qa qurl auut te ama iames. Taqurla dai maikka mager iv auur a ding se ama Qevepka ama Glasingaqa ip ke ruirl se auur aatmires mai.   
\p
\v 26 De maikka quasik mager ip naqatikka uut taarl ne iari araa rut ip te uamet. De quasik mager iv uure narliip se iari araa quvang iirang.   
\c 6  
\s1 Ngen Derat Never A Na  
\p
\v 1 Gua rluavik, ariq aip ngen drlem ai iak never a ngen dai sa qa rekmet ne ama vu, dai ngen i ngen diit kur ama Qevepka ama Glasingaqa, dai mager ip ngene taqat lu gel ka. De ngen derat never a qa ip ke seserl ver aa mugunes. Dap katikka mager ip ngene taqat lu gelnas. I arik ma’, ma Satan ke siquat na ngen be arik ma ngen aat be saqikka ngen dekmet ne ama vu.   
\p
\v 2 De mager ip ngen derat never iari, i ngene tal araa merlen. I ariq aip ngene tekmet taqurla dai maikka ngene taqat mit kut ma Kristus aa lengi ama dlek pem nget.  
\v 3 De ariq aiv iak i qa tu aa qevep ai qa veviit, dap kuasiq ai ama revan ai qa veviit, dai luqa dai qatikka qe kaak temiis.   
\p
\v 4 De qatikka mager iv ama qaqet mai re taqam ngim per araa rleriirang aip kua ama atlu dap kua quasik. Dai ariq aiv iak ke tekmet taqurla, dai mager ip katikka ama arlias per a qa nevet liina i qe tekmet niini. De quasik mager ip ke siquat ne aa mugunes se qur iaq aa qas ama mugunes.  
\v 5 I qatikka raquarli mager iv iak de iak ke tal aa rleriirang i qe tekmet niirang.   
\p
\v 6 De nemka i qa su re ama Ngemumaqa aa lengi, dai mager ip kerl kurl luqa i qe su qa re aa iarang ama tekmeriirang nagelemiis.   
\p
\v 7 De quasik mager iv a ngen a ding se iari ip te kaak tem ngen. I quasik mager iv a qek ke sembal te ama Ngemumaqa. Maikka quasik maget na ngen. I aip ngi kutserl a nge ama asmes iini i nanaa, dai qatikka diip liina raqurla ngere iirl vet gia sleng.  
\v 8 Taqurla dai be ariq aiv iaq i qatikka qa tit kur aa rutka ama murlaska aa narliip, dai luqa ama rutka ama vuqa dai diiv aa tekmeriirang ngere baing se ama asmes ama vu nget. Be diip ngere lenges ne luqa. Dav ariq aiv iak ka tit kur ama Qevepka ama Glasingaqa aa narliip, dai diiv ama Qevepka ama Glasingaqa qe baing se ama iames gel luqa ama qaqeraqa. Be qa dai diip kurli qa maget masmas.  
\v 9 Taqurla dai be quasik mager iv ama neng na uut sa tekmet ne ama tekmeriirang ama atlu iirang. I ariq aip kuasik tiktik dem uut dap katikka uuret matna, dai diiv uut ter ama asmes, de maikka diiv uure taneng ama asmes ama atlu nget.  
\v 10 Taqurla dai ngu lu diip kesnada de mager iv uure tekmet ne ama atlu sagel iari? Maikka mager ip masmas uure tekmet taqurla i aiv uuret lu iaq i ama ruus per a qa re iarang. De maikka mager iv uure dlek iv uure tekmet ne ama a tekmeriirang ama atlu iirang sagel ama quatta ngen ama nankina mai i ra tu araa qevep sever ama Slurlka de qerlka ngene iari.   
\s1 Arlias Pet Ma Paulus Se Ma Kristus Aa Lalemka  
\p
\v 11 Liini iara ama lengiini dai qatikka ngua, ngua iil. I ngene lu lunger iara ama qarlidang ama barl nget i ngua rekmet na nget ip ngu iil ama lengi.   
\p
\v 12 De ngene narli. Lura iara ama qaqet i maikka re dlek ip te sesik per a ngen, dai re tekmet taqurla, i raqurli re narliip te taneng ama a rlenki ama barlki de iari ama qaqet araa saqang. I ai de reng ning i arik iari ra tuqut ta i raquarli ra tu araa qevep sevet ma Kristus aa lalemka. De diip te tekmet ne ama vu sagel ta.  
\v 13 Be lura i sa ra mer ama Judaqena araa merlengaqa be sa qurli qa men na ra, dai qatikka ra dai ai de quasiq ai re taqat mit kur ama Lo. Dap katikka re narliip te sesik men a ngen a qetdeng, ip mager ip ta ter ama a rlen ama barlnget nevet liirang iara i sa ra rekmet niirang per a ngen a qetdeng.   
\p
\v 14 Dap maikka quasik mager ip katikka ngua taarl nanas dap kuarl a qeq ama qaqeraqa. Kuasik. Dap katikka diip ngua taarl ne ama Slurlka ma Iesus Kristus naik, i qa ngip men ama lalemka. Be qatikka ama marl na ngua nevet liina naik. I ama rletki i ma Kristus ka rekmet na qi men ama lalemka, dai ama aivetki ara tekmeriirang dai iirang nge ngip nevet gua tuaqevep. Be qatikka raquarl ai ngua, ngua ngip men ama lalemka. Be saqias kuasiq ai ngua tit kur ama aivetki ara tekmeriirang.   
\m
\v 15 Be iara dai liina i re sesik per ama a qaqeraqa dai liina dai quasiq a qeni, de liina i quasik ta sik per ama qaqeraqa dai saqikka quasiq a qeni. Dav ama Ngemumaqa qa rekmet na uut be ama iames ta na uut, dai liina dai maikka ama a revan iini.   
\p
\v 16 Dai ama Ngemumaqa dai mager iv aa ngimsevetki never ama qaqet mai i ama quatta ngen ama nankina, i lura i re taneng lungera ama tuaqevep de ra tit kut nget. De mager ip ke tekmet ne araa rut ip kurli nget i ama uupka. Be lura iara dai maikka ama Isrelkena na ra i ama Ngemumaqa aa liinka na ra marevan.   
\p
\v 17 Dai sa quasik ngu narliiv a qek ke van a ngua re a nge ama merlenka saqias. Kuasik. I sama verliit pet gua qetdingki, i liina ngere teqerl ai maikka ngut matna barek ma Kristus.  
\v 18 Gua rluavik, auur a Slurlka ma Iesus Kristus aa ngimsevetki dai mager ip kurli qi de a ngen a rlan. A revan.   
\s1 Katikka Verleset Aa.