\id COL - Qaqet (Baining) NT [byx] -Papua New Guinea 1996 (web version -2013 bd) 
\h Kolosi 
\toc1 Ma Paulus Ka Iil Sagel Ama Iesus Aa Liinka I Qurli Ra Vet Ma Kolosi 
\toc2 Kolosi 
\toc3 Kol 
\mt1 MA PAULUS KA IIL SAGEL AMA IESUS AA LIINKA I QURLI RA VET MA KOLOSI  
\c 1  
\p
\v 1 Ngua ma Paulus i ma Iesus Kristus aa Aposel na ngua. I ama Ngemumaqa aa narliip be qatikka qa mu ngua iv ama Aposel na ngua. Be ai de ngua tit de ngul sil ne ama Lengi ama Atlu nget sevet ma Iesus Kristus. De luqa iara ama langinka dai nagel ngun auur a rluaqa ma Timoti i qerlka qa namen ma Kristus.  
\v 2 I uune lil sagel ngen ama Ngemumaqa aa uis pet ma Kolosi. Dai be ngen dai auur a nenggeni-ra na ngen i raquarli ngen dru a ngen a qevep sevet ma Kristus. Dai uure narliiv auut Mam ama Ngemumaqa dai mager ip ke tekmet ne ama atlu sagel ngen de qe tekmet ne a ngen a rut ip kurli nget maget.   
\s1 Ama Ngemumaqa Qa Maarl Ne Ama Kolosiqena Araa Tuaqevep  
\p
\v 3 De aip lua i uune raring bareq a ngen, dai qatikka ai de masmas uun deraqen ne ama atlu sagel ama Ngemumaqa. I qa dai ma Iesus Kristus aa Mam.  
\v 4-6 Ai de uun deraqen ne ama atlu sagel ama Ngemumaqa, i sa raquarli uun narli sever a ngen taqurliani: Sa mekai ama lengi ama atlu nget nge men sagel ngen be ngen narli nget. Taqurla be ngen dru a ngen a qevep ai diiv ama Ngemumaqa qe qurl a ngen te liirang aa i sa qa mak niirang ip bareq a ngen de qurli iirang i vuk pe uusep naa na ngen. Taqurla be maikka ai de ngen dru a ngen a qevep marevan sevet ma Iesus Kristus. De maikka ai de ngene rarlik ama Ngemumaqa aa uis, i ama quatta ngen ama nankina. Lungera ama lengi ama atlu nget, dai nge tit per ama aivetki mai. Be ngere tekmet ne ama qaqet be re tekmet ne ama tekmeriirang ama atliirang, de ngene iari ama qaqet i buup na ra, ta tu araa qevep, ip saqikka raquarl ngeret matna varlen me ngen. I nge rarles ianai i ngen narli nget be maikka ama revan i ngene taqat drlem ai ama Ngemumaqa dai qe tekmet ne ama tekmeriirang i maikka iirang peviit.  
\v 7 I sa ma Epapras ka su ngen te lungera ama lengi ama atlu nget. Be ama tekmeriirang ama atliirang dai sa ma Ngemumaqa qa rekmet niirang. I ma Epapras dai iaq ama atluqa vet ma Kristus aa rletki. Be qa dai namen auut i uuret matna ma Kristus aa rletki, be maikka uure narliip se qa. I ai de qa tat never a uut de qe taqa uas te ma Kristus aa rletki gel ngen.  
\v 8 De ma Epapras ka sil ba uut sevet lungera ama arlem i ama Qevepka ama Glasingaqa qa mu nget de a ngen a rlan be a ngen arlem never ama Ngemumaqa aa uis.   
\s1 Ma Paulus Ke Raring Iv Ama Ngemumaqa Qe Sem Madlek Ne Ama Kolosiqena  
\p
\v 9 De vet luqa ama nirlaqa i nge rarles i uut narli liirang aa sever a ngen, de qatikka nge rarlma ianai i qatikka masmas uure raring ba ngen. I ai de uure raring sagel ama Ngemumaqa, ip mager ip ka tat naver a ngen, ip ngene taqat drlem se ama tekmeriirang i qe narliip ngene tekmet niirang. Be mager iv ama Qevepka ama Glasingaqa qerl kurl a ngen te ama adrlem ama atlu nget i nget muqasmuqas de ngen ama tuaqevep. Be liirang aa dai maikka mager ip buup niirang gel ngen.  
\v 10 De uure raring ip mager iv a ngen a mugunes ip taquarl luqa i maikka qa namen ama Slurlka. De diip ke narliip se ama tekmeriirang i ngene tekmet niirang. De diip ngene riirl ama rleriirang ama atliirang. De maikka mager ip slepslep per a ngen se ama Ngemumaqa aa drlem ip maikka ngene taqat drlem se qa.  
\v 11 De mager ip katikka ama Ngemumaqa qe sem madlek na ngen ne aa dlek i maikka nget peviit. De qatikka ne lungera aa dleq ama atlu nget, dai mager ip ngen deraarl malkuil pe ama merlen. De quasik mager ip ngeterl a ngen a rut. De mager iv ama arlias per a ngen.  
\v 12 De mager iv ama arlias per a ngen, de ngen deraqen ne ama atlu sagel auut Mam ama Ngemumaqa. I sa qa rekmet na ngen ip ngene tekmet ne ama tekmeriirang ama atliirang ip mager ip ngen det ama tekmeriirang i sa qa mak niirang bareq a ngen pe uusep. I diip ngen det liirang aa i ngene ne ama Ngemumaqa aa uis mai, i lura i qurli ra men ama Ngemumaqa aa nirlaqa.  
\v 13-14 I ama Ngemumaqa qa mer auut nemet ma Satan aa ngerik i ai de murl kurl uut pe ama arlenki. De qa mu uut mene luqa ama Rluimka aa liinka, i maikka vem ka se qa. Be sa qa vandem per auut de qa lemerl auur a viirang, ne aa Uimka aa rletki men ama lalemka.   
\s1 Aiv Uurem Ngim Sagel Ma Iesus Dai Uuret Lu Ama Ngemumaqa  
\q1
\v 15 Maikka quasik mager iv a qek ke lu ama Ngemumaqa. Dap ma Iesus dai maikka qa ip taquarl ama Ngemumaqa.  
\q2 De ma Iesus dai qe ruirl se ama tekmeriirang mai i ama Ngemumaqa qa rekmet niirang.  
\v 16 I raquarli ma Iesus dai qa rekmet ne ama tekmeriirang mai. I qa rekmet ne ama tekmeriirang per ama aivetki i ai de uuret lu iirang.  
\q1 De ngene liirang aa vuusep i ai de quasik uuret lu iirang. De qerlka qa rekmet ne ngen ama Angeluqena ama barlta.  
\q2 De ne ma Kristus dai ama Ngemumaqa qa rekmet ne ama tekmeriirang mai. Be liirang aa mai dai aa tekmeriirang aa.  
\v 17 As murl i as kuasiq ama tekmeriirang nge men, dap ma Kristus dai qasa qurli qa aa. Be ne aa dlek dai qa rekmet ne ama tekmeriirang mai be qatikka qurli iirang maget nademna.  
\v 18 Ma Kristus dai ama Barlka i qe ruirl se ama qaqet per ama Lautuqi. Be ama qaqet dai aa liinka na ra. I raquarli qa dai ama rarlimini se ama iames barek luqa ama liinka ver ama Lautuqi. De qa dai qa arlma i qa maarl naver ama aapngipki varlen lura ama qaqet i sa ra ngip. Dai mager ip ka dai raquarl ama Barlka i qe ruirl se liirang aa mai.  
\v 19 I ama Ngemumaqa qa mu aa qevep ip liirang aa mai i iirang gel ka dai qurli iirang gel luqa ama Rluimka. Taqurla be ama Ngemumaqa qa qurl ma Kristus te ama iames ngen ama dlek.  
\v 20 Ama Ngemumaqa dai qa mak ne aa Uimka ip ka dai ama Barlka ip ke ruirl se uut. I raquarli ma Kristus aa qerekka qa rletik men ama lalemka. I ama Ngemumaqa dai ama arlias per a qa ip saqias ke guirl ama tekmeriirang mai sagelemiis. I ama tekmeriirang naver ama aivetki de qerlka ne vuusep. I ama Ngemumaqa qa rekmet ne ama uupka varlen mis, ke ne ama qaqet ne ma Kristus aa aapngipki men ama lalemka.   
\b  
\p
\v 21 Be saqikka ngen dai qurli ngen maget ngene ne ama Ngemumaqa. Dap mekai dai qurli ngen sangis ne ma Kristus. I maikka a ngen a qumeska ne ama Ngemumaqa. I raquarli a ngen a tuaqevep dai angera qumeska ne ama Ngemumaqa be ngen dekmet ne ama viirang.  
\v 22 Dav iara dai saqiaskerlka ma Kristus ka rekmet na ngen be ama Ngemumaqa aa rluavik na ngen. I ma Kristus ka rekmet taqurla ip mager ip kat den se ngen sagel ama Ngemumaqa. Be diip mager ip ngen dai ama seserlta na ngen, i quasiq a nge ma viirang men a ngen. De ngene liirang aa i quasik mager iv ama Ngemumaqa qa raarl na ngen sever iirang arle ves.   
\p
\v 23 I diip nge ren taqurla i ariq aip ngene taneng ama tuaqevep merep, de maikka ngen deraarl madlek. De quasik mager iv a ngen a ding se a qerang iv iirang ngere kiat met ngen. Taqurla ip ngen diit namene lungera ama tuaqevep madlek sevet lungera ama lengi ama atlu nget. I lungera i sa ra sil na nget bareq ama qaqet per ama aivetki. I ngua ma Paulus dai sa qurli ngua vet luqia ama rletki, i ngul sil ne lungera ama Lengi ama Atlu nget. Be uurel sil na nget bareq ama qaqet per ama aivetki.   
\s1 Ma Paulus Ka Tat Never Ama Lautuqi  
\m
\v 24 Be iara dai ama arlias per a ngua i ngu tal ama merlen bareq a ngen. I liina dai iini nge tat never a ngen. I liina dai sa ma Kristus ka sil ai diip ngu tal ama merlen, lua i aip ngu narliip ngul sil ne ama lengi ama atlu nget, ip nge tat never ama qaqet per ama Lautuqi. Be luqia ama Lautuqi dai ip taquarl ma Kristus aa qetdingki. Taqurla be ngu narliip ngu verleset ne lungera ama getget i ma Kristus ka mak na ngua ip ngu verleset na nget. Be ngua tat never ama qaqet per ama Lautuqi.  
\v 25 De ngua dai qatikka ama Ngemumaqa qa mu ngua ip ngut matna bareq ama Lautuqi. I luqia ama rletki ip kia tat navet lu ngen aa i quasiq ai ngen nevet ma Isrel. De gua rletki ip ngul sil mer ama Ngemumaqa aa lengi mai.  
\v 26 I qatikka ai de murl vet lungera ama niirl dai de ama Ngemumaqa qe trles lungera ama lengi rik ama qaqet mai. Dav iara dai sa qa reqerl na nget sekgames bareq aa qaqet.  
\v 27 Ama Ngemumaqa dai qe narliip ke teqerl aa qaqet ip mager ip tat drlem se lungera ama lengi ama trleses pem nget. I maikka ama atlunget. Be mager ip nge tat naver ama qaqet mai i ngene lura i quasiq ai ama Isrelkena na ra. I lungera ama lengi dai raqurliani: Ma Kristus dai qurli qa de a ngen a rlan. Be qurli ngen de naa na qa ip diip ka iit se ngen ip kurli ngene na qa vuusep.   
\p
\v 28 Taqurla be ai de uurel sil ne ama Lengi ama Atlu nget sevet ma Kristus bareq ama qaqet mai. I ai de uure su ra ne aa saikngias ama atlunget i uur raneng a nget. De uurel sil ba ra ip te taqam ngim de ra tit kur ama Ngemumaqa aa lengi mai. I raquarli uure narliiv uut den se ama qaqet mai i iak de iak sagel ama Ngemumaqa; iv aip ta men sagel ama Ngemumaqa, de uut narliip ta dai ama seserlta ip taquarl ma Kristus.  
\v 29 Uure narliip liina nge ren taqurla, be ne gua dlek, dai ai de ngut matna maden. I qatikka ma Kristus ka qurl a ngua re lungera ama dlek. Be lungera ama dlek dai nge ret matna gel ngua.   
\c 2  
\s1 Maikka Mager Ip Ta Tu Araa Qevep Ma Dlek  
\p
\v 1 Ngu narliip ngen drlem ai maikka ai de ngut matna madlek ip ngua tat never a ngen ama Kolosiqena, de ngen ama qaqet mai i lura i as ai de quasik ta lu gua sakngaqi.  
\v 2 De ngut matna madlek i raquarli, ngu narliip ngene dlek, i qurli ngen men a na ne ama Slurlka aa ngimsevetki. Ai de ngut matna madlek be diip liina ngere sem madlek ne a ngen a tuaqevep. Be maikka mager ip diip ngene taqat drlem pe ama Ngemumaqa aa lengi angera rleng i ama trleses pem nget. I qatikka lungera ama lengi ama trleses pem nget dai ne ma Kristus.  
\v 3 I qatikka ama saikngias ama atlunget de ngen ama tuaqevep ama trleses pem nget dai maikka nget mai gel ma Kristus i maikka liirang aa dai iirang peviit i iirang nge uirl se ama qelaing.   
\p
\v 4 Ngua taqen taqurla, i raqurli quasik ngu narliiv a qek ke qaak tem ngen ne a qeng ama lengi ip ka iit se ngen puuqas. I lungera ama lengi i quasiq ai nget nagel ma Kristus.  
\v 5 Ama revan i ne ama qetdingki dai quasiq ai qurli ngu na ngen. Dap ne gua tuaqevep dai ai de ngua tu gua qevep sever a ngen masmas. De ama arlias per a ngua i ngut lu ngene taqat matna, de ngen dru a ngen a qevep madlek sevet ma Kristus.   
\s1 Maikka Mager Ip Kurl Uut Mas Men Ma Kristus  
\p
\v 6 Sa ngen mer auur a Barlka ma Iesus Kristus sede a ngen a rlan. Taqurla dai be maikka mager ip ding se ngen ip kurli ngen masmas men a qa ip ngen diit kut ka.  
\v 7 Be qatikka mager ip mene ma Kristus naik dai ngen deraarl men a qa. I qatikka ama iames de ama dlek dai nagel ka. Be maikka mager ip ngen dru a ngen a qevep malkuil sevet lungera ama lengi ama atlu nget i sa uut su ngen tem nget. De qatikka mager ip masmas ngen deraqen ne ama atlu sagel ama Ngemumaqa sever ama tekmeriirang ama atliirang i qe tekmet niirang sagel ngen.   
\p
\v 8 Maikka mager ip ngenet lu, iv ait de qula a qek ka rekmet na ngen ip ngen diit kur aa lengi i qe su na nget. I qe su ngen te lungera ama tuaqevep i quasiq ai ama revan nget. I qatikka ngerel sil sevet liirang aa ama tekmeriirang i ama qaqet naik ta tu araa qevep niirang. I lura raqurla dai ai de ra taqen sever ama serlura araa gamansena de ngen ama ais iirang muqasmuqas.  
\v 9 I ngen drlem, ai ama Ngemumaqa aa iames mai dai qa qurl ma Iesus tem nget, lua i qurli qa iara varlen me uut per ama aivetki.  
\v 10 Be ma Kristus aa tekmeriirang ama atliirang dai maget niirang gel ngen. I raquarli rlas tem ngen men a qa. Be qa dai qa veviit daleng lura i re ruirl de qe ruirl se ngen ama dlek mai.  
\v 11 Be raqurla be ama quanases met ngen ngene na qa. I ma Kristus dai quasiq ai qa sik per a ngen ip taquarl ai de ama Judaqena te tekmet. Dap ke sesik per a ngen te a ngen a viirang angera dlek. De qe periktem se ngen namen ama viirang angera dlek.  
\v 12 De murl lua i ra uk ngen pe ama qerlap, dai raquarl ai ama Ngemumaqa qa qutserl ngen, ngene ne ma Kristus. Baip lua i ngen maarl nep ma qerlap dai raquarl ai ama Ngemumaqa qa maarl na ngen, ngene ne ma Kristus. I qatikka liina nge men taqurla i raquarli ngen dru a ngen a qevep ai diiv ama Ngemumaqa qe rekmet taqurla ne aa dlek.   
\p
\v 13 As mekai nauirl ver a ngen a tuaqevep dai ngen ngip. I ngen ngip mer a ngen a viirang, i raquarli quasiq ai ama Ngemumaqa aa uis na ngen de quasiq ai ngen mit kur ama Lo i ama Ngemumaqa qa qurl ma Moses. Dav iara dai saqias ama Ngemumaqa qa iames na ngen ip saqiaskerlka raquarl ka iames ne ma Kristus. I qa rekmet taqurla ne liina i aa arlem never auut de qa suquv auur a viirang.  
\v 14 Ama qarlidang mai ve ama langinges i lungera i ngere narliip nget sev auut pes sever auur a viirang arle ves, dai sa ma Ngemumaqa qa verleset na nget. I ama Ngemumaqa qa verleset ne liina raqurliani: Lua i ma Iesus Kristus ka ngip men ama lalemka, dai raquarl ai ama Ngemumaqa qa met luus aa ama langinges de qa uadem se uus men ama lalemka. Be ama qarlidang ne ama Lo ve luus aa ama langinges dai verleset na nget.  
\v 15 Be ne ma Kristus aapngipki men ama lalemka, dai qa reqerl ama qaqet mai ai sa qa mer ama iaus arla dlek i mekai nge re ruirl se uut de nge re uas tem uut.   
\s1 Kula Ngen Diit Kur Ama Lo I Ama Qaqet Ta Mu Nget  
\p
\v 16 Dai quasik mager iv a ngen a ding se a qek ip ke tekmet na nge ma ais iirang i qe tuqun ai ngene tekmet ne ama vu se liirang aa i ngen dres ama asmes i nget muqas. Dap kuarl a nge ma qerlap i nget muqas. Dap kua raquarli quasik ngene tekmet ne ama talak per ama ages. Dap kuarl i aip baingbaing se ama iaqunki de quasik ngene tekmet ne ama talak. Dap kuarl i aiv ama nirlaqa ma Sabat de quasik ngene tekmet ne ama talak.  
\v 17 I murl dai liirang iara dai raquarl ai ama nemki niirang i iirang ngere teqerl ne liirang aa i as iirang nget den. Dav iara dai sa liirang aa nge men. I liirang aa ngere siquat te ama a raatmaat-nevet i nget gel ma Kristus.   
\m
\v 18 De ariq aiv iak ka taqen sevet liirang aa i qa liirang per ama veng, de ariq aip kel sil ai, ai de qe manepnas de qe lautu sagel ama Angeluqena, dai quasik mager iv a ngen a ding se luqa raqurla ip ka sev a ngen pes. I lura raqurla dai buup ta ne liirang aa ip ta taarl nanas. I raquarli, ama mugunes ama murlases dai qatiaskerl ai de uus nge re uas tem ta.  
\v 19 Dai de quasiq ai maikka rel sil ne ma Kristus aa lengi ama revan nget. I ma Kristus dai auur a Barlka, de uut dai raquarl ai aa qetdingki na uut. Be ai de qe uas tem uut ama qaqet per ama Lautuqi, be ai de uure riirl ip taquarl ama Ngemumaqa qe narliip.   
\p
\v 20 I ngen drlem ai sa ngen ngip ngene ne ma Kristus. Be ngen dai sa verik tem se ngen namen ama Lo i nget muqasmuqas naver ama aivetki. Dap ngu lu nanaa be ai de a ngen aatmitki ip taquarl lura i ra naver ama aivetki? De ngu lu ai de nanaa be ngen diit kur ama Lo raqurliani:   
\mi
\v 21 “Kula ngene taneng liina, de qula ngen dres liina, de qula ngenep kuap ama tekmeriirang per a ngen a ngerik?” \rq Ais. 29.13\rq*   
\m
\v 22 De lungera ama Lo dai nge taqen sevet liirang aa i aiv uur rekmet niirang baip maget de lenges niirang i qatikka liirang aa never ama aivetki. I qatikka ama qaqet ta mu lungera ama Lo dap kuasiq ai ama Ngemumaqa de re su uut tem nget.  
\v 23 Lungera ama Lo dai naqerl taquarl ai sever ama saikngias ama atlunget. Dap lungera ama Lo dai nget namene lungera i ama qaqet naik ta tu nget. De ngere tekmet ne ama qaqet be re kaaq ai re manepnas, de ngere tekmet na ra be re sairl senas. Dap lungera ama Lo dai quasik mager ip ngere tiktik de auur a mugunes ama murlases angera narliip.   
\c 3  
\s1 Ngene Iames Ngene Ne Ma Kristus  
\p
\v 1 Dai ama Ngemumaqa dai qa qurl a ngen te ama iames, dai be raquarl ai qa maarl na ngen never ama aapngipki. Taqurla dai mager ip slepslep per a ngen i ngene mali re ama tekmeriirang nev uusep. I vet luqia ama luqupki, dai qurli ma Kristus i ama King na qa ve ama Ngemumaqa aa merlmerliit i qe uas te ama tekmeriirang mai. De qerlka ama Ngemumaqa qa taarl ne aa rlenki.  
\v 2 De qatikka mager ip masmas ngen dru a ngen a qevep sever ama tekmeriirang nev uusep. De maikka mager ip ngene rarlik liirang aa veviit. De qula ngen dru a ngen a qevep sever ama tekmeriirang ama viirang i ai de ama qaqet te tekmet niirang.  
\v 3 I raquarli quasiq ai ngen diit kur ama aivetki ara tekmeriirang ip taquarl murl. I sa ngen dai raquarl luqa i qa ngip. Be liirang aa never ama aivetki, dai quasik mager iv iirang ngere kiat mer a ngen a tuaqevep. Dai lungera ama iames i ngene ne ma Kristus ngene taneng a nget, dai quasiq ai ariq ama qaqet naver ama aivetki ret lu nget. Maikka quasik. I qurli nget gelna ne ama Ngemumaqa, be de araa saqang dai nge rles.  
\v 4 Ma Kristus dai ama rarlimini na qa se auur a iames. Baip lua nasat i diip ke guirl de diiv ama qaqet te lu qa. De diip te lu ngen a ngen i baing se ngen sekgames ngene na qa. Be diip ngen a ngen, ngene raneng lungera ama iames ama atlu nget i nger ip taquarl ama Ngemumaqa aan sinki.   
\s1 Sama Iamesta Na Uut  
\p
\v 5 Ngen dai sa raquarl ai ngen ngip ngene ma Kristus. Taqurla dai quasik mager ip ngene tekmet ne ama viirang. Maikka qurli. De maikka mager ip ngene veleng per ama aivetki ara tekmeriirang mai i liirang aa i qurli iirang per a ngen a tuaqevep. I liirang aa i ngua taqen sever iirang, dai i iirang taqurliani: Liina i re nanna maden maden de iarang i quasiq ai ama atliirang. De liina i ama rut nge taarl sevet liina ip te nanna, de liina i re rarliq ama viirang de re rarliq iari araa quvang iirang. Liina i re rarliq ama tekmeriirang, dai liirang aa never ama aivetki, dai ai de iirang ngere kut naser ama Ngemumaqa de a ngen a rlan.   
\m
\v 6 Kuasik mager ip ngene tekmet taqurla. Maikka qurli. I raquarli diiv ama Ngemumaqa qe guirltik ne ama vu bareq ama qaqet mai i ai de re tekmet ne liirang aa raqurla, dai de quasiq ai ra tit kur aa lengi.  
\v 7 Saqikka murl ngen dai quasiq ai ngen diit kur ama Ngemumaqa aa lengi. De saqikka ngene tekmet ne liirang aa ama tekmeriirang.   
\m
\v 8 Dav iara dai mager ip ngene serlek ne liirang aa raqurliani:  
\mi Kuasik mager ip ngene serlin iari de maikka rletrlet per a ngen na ra.  
\mi De quasik mager ip ngen druqut iari, dap kua ngen deraqen ne ama lengi ama vu nget.   
\mi
\v 9 De quasik mager ip ngene kaak te a ngen ari be iari ama Kristenkena. I sa raquarli, gelem ngen dai sa ngen kirlvem se ama mugunes ama murlases nagelemiis.   
\mi
\v 10 Be ngen dai sa ma iames ta na ngen. I qatikka luus aa ama mugunes ama iameses dai ama Ngemumaqa qa rekmet na uus. Be qatikka ai de ama Ngemumaqa qel kurl a ngen te ama adrlem ip ngen drlem se qa, de qe tekmet na ngen iv ama iames ta na ngen. Be luus aa ama mugunes dai qatikka mager ip maikka raquarl ka.   
\mi
\v 11 Taqurla dai ariq aip pet luus aa ama mugunes, dai ariq aip ngi i quasiq ai ngi navet ma Isrel dap kua naver iang ama liin, dai liina dai quasiq a qeni. Dap kuarik ngia tit kut liina i ai de re sesik per ama quatta dap kua quasik, dai quasiq a qeni. Dap kuarik ngi never iaq ama lengiqa qatti sangis dap kua ngi nep ma qevel i quasik gia nge ama adrlem dap kua ngi i qurli ngi mer iaq aa ngerik dap kua ngi dai verik tem se ngi be qurli ngi naik, dai saqikka liina dai quasiq a qeni. Dap liina i ama barl iini dai raqurliani: Ma Kristus dai qa rekmet ne ama tekmeriirang mai. De ma Kristus dai qurli qa dama qaqet mai araa rlan be ama quanases met ta.   
\s1 Maikka Mager Ip Gia Arlem  
\p
\v 12 De ama Ngemumaqa dai sa qa mak na ngen bareq a nas. Be ngen dai aa qaqet na ngen be maikka ai de qe rarlik ngen. Taqurla dai mager ip ngene tekmet taqurliani: Maikka mager iv a ngen arlem naver ama qaqet mai de ngene taqa tekmet se ra. De mager iv a ngen a narliip dai ngene manep nget, de mager ip ngene tekmet ne ama uupka vem iirang sagel ama qaqet de mager iv a den ngen se ra de re tekmet ne ama vu sagel ngen dap kuasik ngene piirlit ba ra.   
\m
\v 13 De ariq aiv iari never a ngen i araa nge ama lengi i iari ra rekmet ne ama vu sagel ngen, dai quasik mager ip ngene piirlit liirang aa ama viirang ne ama vu. Kurli, dap mager iv a ngen arlem naver a ra, de ngerlangken per a ngen ne araa viirang. I sa ma Kristus dai sa qa lemerl a ngen a viirang, dai be saqikka mager ip ngene tekmet taqurla.  
\v 14 Mager ip ngene tekmet ne liirang aa. Dap liina i maikka iini veviit, dai ama arlem naver a na. I liina i ama arlem naver a na dai ai de iini ngere sem mamerl ver a ngen a rut be qurli ngen temna ne ama atlu.  
\v 15 Ai de ma Kristus kerl kurl a ngen te ama uupka. Taqurla dai mager iv a ngen a ding se luqa ama uupka ip ke ruirl nanaiq a ngen a tuaqevep per ama tekmeriirang i ngene tekmet niirang. I raquarli ama Ngemumaqa qa mak na ngen bareq a nas, ip mager ip ngen dai ama quanases met ngen per ama liinka ama quanaska. De qerlka mager ip ngen deraqen ne ama atlu sagel ama Ngemumaqa sever ama tekmeriirang mai.   
\p
\v 16 De ma Kristus aa lengi dai maikka mager ip kurli nget de a ngen a rlan. De mager ip ngene su ne ama saikngias i nget muqasmuqas ama atlu nget, de ngene sem madlek nana. De mager ip ngene taing ama taing nev ama Ngemumaqa aa Langinka. De ngen ama taing i nget sevet ma Iesus. De ngen ama taing i nget nagel ama Qevepka. I maikka mager ip ngene taing nade a ngen a rlan ne ama arlias sagel ama Ngemumaqa.   
\m
\v 17 De ama tekmeriirang mai i ngen deraqen de ngene tekmet niirang, dai ip ngenet dadem liirang aa i ai de ama Slurlka ma Iesus aa qaqet te tekmet niirang. De qerlka mager ip maikka ngen deraqen ne ama atlu sagel ama Ngemumaqa sever ama tekmeriirang mai. De auur a Slurlka dai diip ke tal liina i uut taqen ne ama atlu de qerl kurl auut Mam ama Ngemumaqa.   
\s1 A Lengi Bareq Ama Lavu Ngen Ama Arluis  
\p
\v 18 Ngen ama nankina, dai mager ip ngene narligel de ngen diit kur a ngen a ngerlviq ama quatta. I raquarli ngen dai namen ama Slurlka be liina dai ama barl iini de aa saqang.   
\p
\v 19 De ngen ama quatta, dai maikka mager ip ngene rarliq a ngen a ngerlviq ama nankina. De maikka mager ip ngene taqa uas tem ta de ngene taqa tekmet se ra i arik ma lenges ne araa tuaqevep.   
\p
\v 20 De ngen ama arluis, dai maikka mager ip ngene narligel a ngen a lavu, i mager ip ngen diit kur ama lengi ver ama tekmeriirang mai. I ama Slurlka qe narliip se ngen ip ngene tekmet ne liina raqurla.  
\v 21 De ngen ama lavu ama quatta, dai quasik mager ip ngene serlin a ngene uis maden. I arik ma raqurla be lenges na ra be quasik te siquat ip ta tit naser ama Slurlka.   
\s1 Ama Lengi Bareq Ama Buaiskena De Ngen Ama Mastaqena  
\p
\v 22 A buaiskena, maikka mager ip ngene narligel a ngen a mastaqena ver ama tekmeriirang mai. De quasik mager ip ngene tekmet ne liina i ngenet matna maden i aiv a ngen a mastaqena rem ngim sagel ngen. Kuasik maget. Dap mager ip ngeneng ning ama Slurlka, de qatikka qurli ngen maget per ama lat i ngenet matna masmas. I raquarli ngenet matna bareq ama Slurlka.   
\m
\v 23 De ama tekmeriirang mai i ngene tekmet niirang, dai qatikka mager ip ngenet matna madlek ne a ngen a revan. I quasiq ai ngenet matna bareq ama qaqet. Kuasik. Dap ngenet matna bareq ama Slurlka.   
\m
\v 24 I ngen drlem, ai nasat de ama Slurlka qe qurl a ngen te lungera ama ranbandem, i sa qa mak ne lungera ama ranbandem bareq a ngen. I ama buaiskena na ngen barek ma Kristus, i a ngen a Slurlka.  
\v 25 De lura i re tekmet ne ama viirang, dai diiv ama Slurlka qa raarl na ra sevet liirang aa arle ves i sa ra rekmet niirang. De qatikka ama Ngemumaqa dai qe tekmet taquarlna sagel ama qaqet mai.   
\c 4  
\p
\v 1 De ngen ama mastaqena, dai qatikka mager ip ngenerl kurl a ngen a buaiskena re ama tekmeriirang ama atliirang de ama seserl iirang. I ngen drlem, ai saqikka a ngen a Slurlka vuusep i qe uas.   
\s1 Liina Ip Te Raring Madlek De ama Mugunes Ne Ama Atlu  
\p
\v 2 De qatikka mager ip masmas ngene raring. Be ver a ngen a raring, dai mager ip ngene taqa mu a ngen a qevep de masmas ngene raring sagel ama Ngemumaqa.  
\v 3 De qerlka mager ip ngen deraqen ne ama atlu sagel ama Ngemumaqa ip ka tat never auut taqurliani: Mager ip ke tekmet ne ama aiska bareq auut iv uurel sil ne aa lengi. I lungera ama lengi, dai ama lengi ama trleses pem nget sevet ma Kristus. I ai de ngul sil ne lungera ama lengi ama revan nget, taqurla be qurli ngua ve ama karabus.  
\v 4 De ngene raring ip mager ip ngu taqal sil vet lungera iara ama lengi ama trleses pem nget bareq ama qaqet. I qatikka raquarli ama Ngemumaqa qa qurl a ngua re luqia ama a rletki be maikka mager ip ngut matna qi.   
\p
\v 5 De ver a ngen aatmires parlen lura i quasiq ai ra tu araa qevep, dai mager ip ngene taqa tekmet senas. De quasik mager ip ngen dering pet liirang aa i ama Slurlka qa matna.   
\m
\v 6 De a ngen a lengi i ngen deraqen dai qatikka mager ip masmas de maikka ama atlu nget de ama a treska vem nget. Taqurla dai diip ngene taqa su ai lu mager ip ngene taqa guirltik taqurla barek lura i quasik ta tu araa qevep.   
\s1 Ma Paulus Ka Nem Ma Tikikas Ke Ne Ma Onisimas  
\p
\v 7 Ma Tikikas i maikka gua negeniqa, de qa dai ai de qe taqat matna bareq ama Slurlka. De qa dai gua rluaqa i uunet matna remna. Dai diip ke sil ba ngen sever ama lat mai i ngut matna.  
\v 8 I qatikka lu ngum nem ka sagel ngen se liina, ip mager ip ngen drlem ai lu auur a mugunes dai raqurla. De mager ip ke sem madlek na ngen.  
\v 9 De diip ngum nem auur a negeniqa ma Onisimas ip ke ne ma Tikikas. I qa dai maikka auur a negeniqa ama atlu qa. De qa dai a ngen a lengiqi met ka i qa nagel ngen pet ma Kolosi. Be diiv iane sil ba ngen sever ama tekmeriirang mai i iirang ngere baingses iara gel uut.   
\s1 Ma Paulus Kem Nem Ama Atlu Sagel Ama Kolosiqena  
\p
\v 10 De ma Aristakas, i qe karabus ke na ngua, dai qem nem aa lengi ne ama atlu sagel ngen. De ma Mak i aa verliqa ma Banabas, dai qerlka ngen a qa, qa nem aa lengi ne ama atlu sagel ngen. Dai ariq aip ka men gel ngen, dai mager ip ngen darl se qa, ip sa raquarl medu ngua nem ama lengi sagel ngen.  
\v 11 De ma Iesus i qerlka ra tis ka ma Jastas, dai qerlka ngen a qa, qa nem aa lengi ne ama atlu sagel ngen. I lura naik naqatikka never ama Judaqena, i lura i ra tu araa qevep. I re na ngua uuret matna remna i uurel sil bareq ama qaqet ip ta tet ma Iesus sede araa rlan iv araa Barlka na qa de diiv ama Ngemumaqa qe uas tem ta. De lura dai maikka re taqat mat naver a ngua.   
\b  
\p
\v 12 De qerlka ma Epapras kem nem aa lengi ne ama arlem sagel ngen. I qa dai qet matna barek ma Iesus Kristus de qerlka qa, dai a ngen a lengiqi met ka. De qatikka ai de masmas ke raring madlek bareq a ngen. Dai de qe raring sagel ama Ngemumaqa ip mager ip ke tekmet na ngen ip ngene riirl ip taqua luqa ama Kristen i maikka ama revan se qa. De mager ip ngen drlem se ama Ngemumaqa aa narliip mai.  
\v 13 I sa nguat drlem se qa be ngul sil ma, ai de qet matna maden ip ka tat never a ngen, ngene ne ama qaqet navet ma Laiudisia de ma Hirapolis.   
\p
\v 14 De ma Luk, i luqa i ama doktaqa i maikka ai de uure rarlik ka, dai qe ne ma Dimas ianem nem ian a lengi ne ama atlu sagel ngen.  
\v 15 De mager ip ngene quarl te gua lengi ne ama atlu sagel ma Nimpa de sagel ngen ama Lautuqi i ai de qi ngingdemna ve ara vetki.  
\v 16 Be sa aip ngen mis pe luqa iara ama langinka, de mager ip ngene nem ka sagel ama Lautuqi vet ma Laiudisia ip saqikka mager ip ta ris pem ka. De ama langinka i ngua iil vem ka savet ma Laiudisia, dai saqikka mager ip ngen dis pem ka.  
\v 17 De ngene sil barek ma Akipas ma, “Maikka mager ip ngi taqa uas te luqia ama a rletki i ama Slurlka qa qurl a ngi, de maikka ngi taqat matna.”   
\m
\v 18 I qatikka ngua ma Paulus i ngua iil lungera iara ama lengi ne ama atlu sagel ngen. Maikka mager ip ngen dru a ngen a qevep sever a ngua i as kurli ngua ve ama karabus. Ama Ngemumaqa aa ngimsevetki dai mager ip kurli qi, qi na ngen.   
\s1 Katikka verleser aa.