\id 2TI - Qaqet (Baining) NT [byx] -Papua New Guinea 1996 (web version -2013 bd) \h 2 Timoti \toc1 Ma Paulus Ka Iil Ipme Iiram Sagel Ma Timoti \toc2 2 Timoti \toc3 2Tim \mt1 MA PAULUS KA IIL IPME IIRAM SAGEL MA TIMOTI \c 1 \p \v 1 Atlu Timoti. Ngua ma Paulus, i ma Iesus Kristus ka mu ngua iv aa Aposel na ngua. I qatikka ama Ngemumaqa dai qa mer a ngua. I murl ka muvuusep i ai diip ke iames ne auut ne ma Iesus Kristus. \p \v 2 I maikka ngi dai raquarl ai nguaimka marevan. Be ai de ngu nen iv ama Ngemumaqa aa ngimsevetki dai bareq a ngen mai. De mager ip ke van a ngen te aa arlem ip ke iames na ngen tiq aa tuvetki. De mager ip ken ban a ngen te ama uupka. I liirang aa nagel auut Mam ama Ngemumaqa de auur a Slurlka ma Iesus Kristus. \s1 Kuasiq Ama Qelev Uut Se Ama Lengi Ama Atlunget \p \v 3 Gua serlura dai murl ta tit kur ama Ngemumaqa aa gamansena, taqurla dai saqikka ngua, ngut dadem. Be maikka de gua rlan dai nguat drlem ai liirang aa i ngu tekmet ne iirang dai maikka ama seserl iirang. De vet gua raring, per ama niirl ngen ama arlen, dai qatikka ai de masmas ngua tu gua qevep sever a ngi de ngua taqen ne ama atlu sagel ama Ngemumaqa. \v 4 Nguat drlem sevet liina i mekai ngik nak never a ngua, be maikka vem ngua ip ngut lu ngi ip maikka mager iv ama arlias per a ngua malai. \p \v 5 Ngua tu gua qevep sevet gia tuaqevep ama revan se nget, i quasiq ai ama kaak nget. Lungera ama tuaqevep dai murl kurli nget gel gia serluqi ma Luis nauirl, de gel ngene gi nan ma Yunis. De maikka nguat drlem ai lungera ama tuaqevep dai saqikka nget gel ngi. \v 6 Taqurla dai be ngu narliip ngua taarl ne ngia tuaqevep, ip maget ip ngiat drlem sevet liina i iini gel ngi i ama Ngemumaqa qa qurl a ngi rem iini. Mekai ngua mu gua ngerik pet gia ningaqa de ngu raring be ngia met liina i ama Ngemumaqa qa van a ngi naik tem iini. Dai mager ip ngi slepslep per a ngi se liina ip taquarl luqa i qe sis mer ama altingki be qiat dang slep. \v 7 I ngiat drlem, ai ama Ngemumaqa qa qurl auut te aa Qevepka ip kuasik uureng ning te a qeni. Dap ka qurl auut te aa dlek i nget peviit, de qerl kurl auut te aa arlem, de liina iv uure uas temiis tik iarang muqas. \v 8 Taqurla dai quasik mager ip ma qelep ngi sal sil ne auur a Slurlka aa lengi. De quasik mager ip ngi kelep tiqim ngua, i ngua karabus bareq a qa. Maikka qurli. De maikka mager ip ngi taneng ama Ngemumaqa aa dlek de ngi taneng ama merlenka i ngi na ngua se ama rletki iv uurel sil ne ama Lengi ama Atlunget. \v 9 I ama Ngemumaqa dai sa qa guirl auut de qa nes tem uut iv uut, i ama quatta ngen ama nankina dai qatikka uut bareq a qa. Kuasiq ai qa mu aa qevep sever ama tekmeriirang ama atliirang i uure tekmet niirang de qa nes tem uut. Katikka quasik, dap kurl aa narliip dai qa rekmet ne ama atlu sagel uut ama vura i quasik pem uut se qa de qa nes tem uut. As maikka murl, i as kuasiq ama Ngemumaqa qa matna ver ama aivetki, de ne ma Iesus Kristus dai qa quarl te lungera iara aa arlem sagel uut ama vura i quasik pem uut se qa. \v 10 Be iara ma Iesus Kristus, luqa i qa guirl uut dai sa qa men sekgames. Be ne aa rletki dai ama Ngemumaqa aa arlem sagel ama vura i quasik pem ta se qa, dai sa nge men sekgames. Ma Iesus Kristus dai sa qa bingmet ne ama aapngipki ara dlek. De ne ama Lengi ama Atlunget dai qa baing se ama iames i quasik mager ip lenges na nget. De qa mu nget men ama nirlaqa. \v 11 I ama Ngemumaqa qa mu ngua iv aa Aposel na ngua. Be qa nem ngua ip ngu su ama qaqet ne aa Lengi ama Atlunget. \p \v 12 Taqurla be ai de ngu tal luqa iara ama merlenka ve ama karabus i raquarli ngul sil ne ama Lengi ama Atlunget. De quasiq ai ama qelep ngua rik liina. Kuasik. I sa nguat drlem se luqa i ngua tu gua qevep sever a qa. De maikka nguat drlem ai mager ip ke taqa uas te luqi iara ama rletki i qa mu qi met gua ngerik. Be qatikka luqi iara dai diip kurli qi maget mas, ip katikka deng pet luqa ama nirlaqa ama Slurlka i diip ka ren. \p \v 13 Lunger iara ama lengi ama seserl nget i sa ngia narli nget na met ngua, dai liina dai ama qasiquatka ip ke teqerl a ngi ne ama aiska ama atluqa ip ngi su ama qaqet. Taqurla dai maikka ngia tu gia qevep malkuil sevet ma Iesus Kristus de gia arlem never a qa. Dai qatikka ne liina dai ngi raneng lunger iara ama lengi malkuil. \v 14 Maikka ngi taqa uas te liina iara ama atliini i sa ama Ngemumaqa qa mu iini vet gia tuaqevep ne ama Ngemumaqa aa Qevepka ip ngi uas tem iini. I liina dai mager iv iini ngere uas tem ngi vet luqi iara ama rletki. \p \v 15 I sa ngiat drlem, ai lura mai navet ma Aisia, de ngen ne ma Piligas de ma Amosanis dai sa ra mit namen a ngua. \v 16 Be ngu raring iv ama Slurlka dai mager iv aa arlem nevet ma Onisiporas ke ne aa liinka. I qatikka ai de mekai vetpet ma Onisiporas ke tekmet be qurli gua rutka maget, be quasiq ai ama qelepka i qurli ngua ve ama karabus. \v 17 Kuasik. Dap katikka qa men navet ma Rom de qet matna madlek i qe mali rem ngua, be deng i qa lu ngua. \v 18 Ngu raring sagel ama Slurlka ip mager ip diiv aa arlem never a qa ver aa Nirlaqa nasat. De ma Onisiporas dai mekai qa mat naver a ngua vetpet, pet ma Epasas. Dai katikka liini iara dai qatikka ngi, ngi taqat drlem iini. \c 2 \s1 Ama Depguas Ne Ama Qasiquarl-iirang \p \v 1 Nguaimka, ngu narliip ngia raarl malkuil ne ma Iesus Kristus aa ngimsevetki. \v 2 I sa murl ngia narli ama lengi ama atlunget i murl ngua su ama qaqet i buup. Dai mager ip ngi su lura i re narligel ama Slurlka de araa saikngias be mager ip te su ama qaqet te lungera ama lengi. I lura ip saqikka mager ip diip te su iari ip ta rluses de ama Slurlka aa rletki. \s1 Iaq Ip Taquarl Ama Amiqa \p \v 3 Mager ip ngi raarl malkuil ip taquarl ama Amiqa, i ai de qe taarl malkuil pe ama merlen iirang. I mager ip ngi tit kut ma Iesus Kristus ne lungera ama gamansena. \v 4 I luqa i qurli qa ver ama rletki i ama amiqa na qa, dai saqias ai de quasiq ai qe taneng ngen a qerang ama rleriirang muqas. Kuasik. Ai de qe taneng luqia ama rletki ip ke tit kur aa mam aa lengi iv ama arlias per a qa. \s1 Iaq Ip Taquarl Lura I Re Ruirlna \p \v 5 De iani sevet luqa qe qiuaik pet liina ip te ruirlna. Dai mager ip ke taqat drlem ama aisiirang per iini. I ariq aip kuasik, dai quasik mager ip ke raneng ama ranbandem ip taquarl ai da i aiv iaq i qa uirl. \s1 Iaq Ip Taquarl Iaq I Uas Te Aa Sleng \p \v 6 De iani sevet luqa i qet matna madlek per ama sleng de qe taqa uas tem nget, dai luqa qa ter iang ama asmes nauirl, baip maget de sagel iari ama qaqet. \s1 Mager Ip Katikka Vuktik Per A Ngi Ne Ma Iesus Kristus \p \v 7 Maikka maget ip ngia tu gia qevep sevet lungera ama lengi i sa ngua meraqen na nget ip mager iv ama slurlka qerl qurl a ngi re ama saikngias. De diip ngiat drlem ama rarlimini ve lunger iara ama lengi angera rleng. \p \v 8 De mager ip katikka vuktik per a ngi ne ma Iesus Kristus, i murl ka ngip de qa maarlviit. De qa dai namen ma Daivit aa liinka, ip taquarl ai de ngul sil ne ama Lengi ama Atlunget. \v 9 Dav iara dai ra quap per a ngua be ngu teving pe ama karabus ip diip te veleng ngua. Dav ama Ngemumaqa aa lengi dai kuasik maget ip te verleset na nget. \v 10 Taqurla be ai de ngu sem madlek nanas de ngu tal liirang iara mai ama merlen iirang. I ngu narliip ngua tat navet lura ama quatta be ma nankina i qatikka murl ama Ngemumaqa qa mak na ra bareq a nas. I ngu narliip kerlka ngen a ra re raneng lunger iara ama iames i nget gel ma Iesus Kristus, de maikka diip kurli ra masmas pe uusep pe aa ansinki. \pi1 \v 11 Maikka mager iv uut tu auur a qevep sevet lungera iara ama lengi ma’, \pi1 Ariq ama revan i mekai uut ngip uut na qa, dai saqikka diiv uure iames uut na qa. \pi1 \v 12 Ariq aiv uut taarl malkuil iara i ve ama merlen iirang mai, dai laip lua i auur a King ke guirl, dai diiv uut na qa uure uas te aa qerlengiirang. De ariq aiv uut ngim temanau na qa, dai saqikka diip ke ngim temanau nauut. \pi1 \v 13 I qatikka ver iang dai uut ding per aa lengi. Dap katikka qa dai ai de qa drlem saatmit kur aa lengi. De qatikka kuasik mager ip ke qaak. Maikka quasik maget. \s1 Maikka Ngi Raneng Ama Revan-iirang \p \v 14 Mager ip ngi tekgel gia seviraqi ip kula ra tesna ne ama lengi sevet liirang aa arle ves i quasiq ai ama Slurlka qe narliip siirang. I qatikka liirang aa dai ai de iirang nget drlem sa lenges ne ama qaqet i re narli sever iirang. Taqurla be maget ip ngi taqa su sevet liirang aa ne ama Ngemumaqa aa dlek. \v 15 Maikka ngit matna madlek ip ngi dai ama rletki na ngi marevan, ip diiv ama Ngemumaqa qe narliip se gia rletki. Taqurla de diip ngil sil ma seserl ne ama Slurlka aa lengi ama revan nget, be diip kuasiq ama qelep ngi de aa saqang. \v 16 De ngit lu riq ama qaqet i ra taqenses i quasiq ai liirang aa nagel ama Ngemumaqa. Lungera raqurla ama lengi dai as maikka diip nge tit se ama qaqet imanau nep ma aiska ip tem ngim temanau ne ama Ngemumaqa. \v 17 Be araa lengi dai ip taquarl ama biaski i qurli ki mas men iak be diip ki iirl be diip ki veleng ka. I ma Aimenias ke ne ma Pailitas dai iam namen ne luqa ama liinka i ra taqenses. \v 18 Lura raqurla dai murl ta ming per ama lengi ama revan nget. I ai de re kaaq ai ama Slurlka qa maarl ne aa liinka be re lenges ne iari araa tuaqevep, ip kuasik te lautu. \v 19 Dap kasa ama Ngemumaqa qa qutserl ama venikka ama dlek per a qa, be luqa dai katikka qa maarl aa. Be luqa ama venikka dai ra iil men a qa raqurliani ma’, \q1 ‘Ama Slurlka dai qatikka qe taqat drlem se aa qaqet i ama quatta ngen ama nankina.’ \q2 De qerlka ngen iang i re iil ma’, ‘Ama qaqet mai i ai de ra tis ama Slurlka aa rlenki, dai mager ip te ngim temanau ne ama tekmeriirang i quasiq ai ama seserl iirang.’ \m \v 20 Ngen lu, pe iaiq ama vetki ama slurlki dai ama kebalaqina i ra rekmet na nget, i iang dai ama gol na nget, de iang dai ama silva na nget, dav iang dai ne ama qulek. I lungera dai angera rleriirang muqasmuqas. I iang dai saver ama rletki ama atluqi, dav iang dai sagel ama semaning. \v 21 Taqurla dai ariq aiv ama Slurlka aa uis te lemerl nas te ama viirang dai diip te taqat matna bareq a qa. Dai diip ta raquarl lungera ama kebalaqina ama glasing a nget i nget saver ama rletki bareq ama Barlka i qa veviit. De naqerl lura dai diip mager ip tet matna per ama rleriirang ama atliirang bareq araa Slurlka. \p \v 22 Dav ama alimta ra tu araa qevep sever ama tekmeriirang ama viirang dai mager ip ngi iuaik namen a ra se liirang aa. Dap ngia tit naset lura i araa gamansena ama atlunget. I lura i ra mugelnas ne ama Slurlka aa arlem de ngen ama tuaqevep ama atlunget, de ama uupka gel ta. De qurli ngi gel lura i ra nen sagel ama Slurlka na de araa rlan. \p \v 23 De ngi ngim temanau ne ama lengi ama vunget i ra taarl metna na nget nagel lura i ama qabaing per a ra, i quasiq araa a nge ama adrlem. De sa ngiat drlem, ai lunger iara ama lengi raqurla dai ai de nget taarl ne ama arasmesna. \v 24 De luqa i qet matna bareq ama Slurlka dai quasik mager ip ke serlin. Kuasik. Dap maikka mager ip ket matna i qe palu gel ama qaqet. De luqa i qe su dai maikka maget ip ke taqa su, de qen bin ama qurek manep de qatikka aa ding se ama qaqet i re tekmet ne ama vu sagel ka. \v 25 De mager ip ke palu i qet matna de qe seserl ver ama qaqet araa tuaqevep, i lura i ai de re nging ama Ngemumaqa aa lengi. I ariq aip ke tekmet taqurla, dai diiv ama Ngemumaqa qa tat naver a ra, de ani diip te guirltik per araa rut de re taqat drlem se ama lengi ama revan nget. \m \v 26 I murl ma Satan ka mat se ra ne aa segenaqi ip mager ip ta tit kur aa lengi. Dav ariq aip tat drlem se ama lengi ama revan nget, dai saqiaskerlka diiv ama ngilka seq araa qames. De diip ta iit na met ma Satan aa segenaqi. \c 3 \s1 Liirang Aa I Diip Per Ama Niirl De Dengdeng \p \v 1 Dap mager ip ngiat drlem ma’, \it Diip per ama niirl de dengdeng dai diiv ama merlen iirang i buup i qatias ama barl iirang dai diiv iirang nge ren.\it* \v 2 Ama qaqet dai qatikka diip te narliip senas, de diip te rarliq ama qelaingka. De qatikka diip ta, ra taarl ne araa rlen, de re ngelanges maden de ra tit ne ama Ngemumaqa. De diip te nging araa lavu araa lengi. De diip kuasik ta taqen ne ama atlu. De diip te nging tiq ama gamansena ama atlunget. \v 3 De diip kuasiq araa rluavik ne lura i qatikka ra i ama qerekka ama quanaska. De diip kuasik ngerlangken per a ra ne ama araserlin. De diip ta taqenses maden maden de diip kuasiq ai re uas te araa qetdingki ara narliip. De ama qaqet maden dai diip te lenges na ra. De diip araa qumes-iirang ne liirang aa mai i ama atliirang. \v 4 De lura i araa rluavik na ra dai diip ta tu ra mer araa qumespiq araa ngerik. De araa tuaqevep i kuasiq ai ama atlunget dai diip masmasna ra tit kut nget. De diip ta tu araa qevep ai qatikka ra dai ama barlta na ra. De qatikka ama arlias never ama qetdingki, dai qatikka diip te narliip se nget dap kuasik te narliip se ama Ngemumaqa. \v 5 De diip ta tit naser ama Ngemumaqa ne ama qetdingki naik de diip tem ngim temanau ne ama Ngemumaqa aa tekmeriirang angera dlek. Maikka mager ip ngi rledeng tik lura ama qaqet. \p \v 6 Ai de iari raqurla dai ai de rat dan sev ama nankina araa vet, i lura i araa tekmer-iirang ip taquarl ama kabaing per a ra, be ra ding ser araa tuaqevep. De lura ama nankina dai buup ta ne ama ngerlvem-iirang de ngen iarang per araa tuaqevep. De araa rut dai ai de nge taarl sever ama tekmeriirang muqas muqas, be iirang ngere kiat na ra maden maden. \v 7 I lura ama nankina dai qatikka ai de masmas de re su re ama lengi, dap maikka quasik mager ip ta taqat drlem se ama lengi ama revan nget. \v 8 Dai saqikka raqurla be ai de lura iara ama quatta te kirlvem se ama lengi ama revan nget ip taquarl murl ma Ianis ke ne ma Iambris i ianen birling ma Moses. I qatikka lura araa tuaqevep dai lenges na nget, be ama Ngemumaqa dai quasik ke narliip se ra i raquarli quasiq ai ra tu araa qevep ne ama revan. \v 9 Dap lura i re tekmet taqurla dai quasiq ai araa lengi ngere ruirl se ama qaqet per ama ainkul. Dap diiv ama qaqet mai re lu araa qabaing, ip taquarl murl ama qaqet ta lu ma Ianis ke ne ma Iambris iane qabaing. \s1 Ngi Raneng Ama Ngemumaqa Aa Lengi Merep \p \v 10 Dap ma Timoti ngi taqat drlem se gua tekmeriirang mai, be sa ngiat drlem se lunger iara ama lengi i ai de nguat drlem sal sil bareq ama qaqet na nget. De ngiat drlem se gua aatmires, de ngiat drlem ama rarlimini ve gua lengi mai angera rleng. De ngiat drlem se ngua, i ngua tu gua qevep madlek sever ama Ngemumaqa, de qatikka ai de masmas de ngu sem madlek nanas de ngut matna. De ngiat drlem se ngua i ai de ngu rarliq ama qaqet. De ngua taarl malkuil i ngu tal ama merlen iirang. \v 11 De ngiat drlem se ama merlen iirang i ama qaqet ta rekmet niirang sagel ngua. De ngen ama getget mai i ngua raneng a nget navet ma Antiok, de ma Aikoniam de ma Listra. Dai be ngiat drlem se liirang aa mai i ra van a ngua rem iirang be ngua ral iirang. Dav ama Slurlka qa iames na ngua na met liirang aa mai ama merlen iirang. \v 12 A revan, i lura mai ama qaqet i re narliip ding se ra mene ma Iesus Kristus de ra tit kur ama Ngemumaqa aa gamansena, dai diiv araa qumespik te tekmet ne ama vu sagel ta. \v 13 Dap lura ama qaqet i ama vura de ngen ama Aamki-na-ra ama kaak-ta, dai diip te kaak sever a nas. Be lura dai maikka diip te teving met liirang aa veviit. \p \v 14 Dap ngi, dai maikka ngi taneng lungera ama lengi malkuil i sa mekai ngia mer a nget de sa ngia tu gia qevep sever a nget. De maikka ngi dai sa ngi taqat drlem se uut i ama quatta ngen ama nankina, i mekai uut su ngi re lunger iara ama lengi. \v 15 As murl i ama giliini na ngi de ngia arles i re su ngi te ama Slurlka aa Langinka. Be ama Langinka qa reqerl a ngi ne ama aiska ip trlas tem ngi mene ma Iesus Kristus be qe iames na ngi. \v 16 Katikka ama Ngemumaqa aa Qevepka dai sa qa baing se ama lengi mai nev ama Langinka. Be lunger iara ama lengi dai ama atlunget ip ngere teqerl auut ne ama adrlem ama revan nget, de ngere teqerl auut ne auur a viirang, de iani ip ngere seserl ver auut, de ngere su uut te ama mugunes nagel ama Ngemumaqa. \v 17 Taqurla be qa rekmet nauut iv ama Ngemumaqa aa qaqet nauut i maikka maget ne auur a dlek de uut muvem nanas iv uuret matna ama lat mai ama atlunget. \c 4 \s1 Maikka Ngi Taqal Sil Ne Ama Ngemumaqa Aa Lengi \p \v 1 Ma Iesus Kristus dai diip ka ratmet se ama qaqet mai, i lura i as te iames de ngene lura i sa ra ngip. I ngua i qurli ngua men ama Ngemumaqa qe ne ma Iesus Kristus, dai ngu tuqun a ngi ma’, ‘Diip ma Iesus Kristus ka ren dama qaqet mai araa saqang be diiv ama King na qa masmas’. \mi \v 2 Taqurla dai maikka mager ip ngia tu gia qevep sevet liini iara, de ngil sil ne aa lengi ama atlunget. Be ariq aiv ama qaqet ta muvem nanas ip te narli ama lengi, dap kuariq aip kuasik ta muvem nanas, dai a den. Dap katikka masmas de maikka mager ip ngil sil ne ma Kristus aa lengi. De maikka mager ip ngirl sirl ama qaqet ara rut ne ama lengi ama dlek pem nget ip mager ip nge taarl ne araa rut ip ta guirltik per a nget. De ngia taarl ne araa rut ip tat tit kur ama Ngemumaqa aa gamansena. De maikka mager ip masmas de ngi taqa palu ba ra i ngit matna de ngi taqa su ra. \p \v 3 Ngi narli, diiv ama qaqet dai diip kuasik te narliip te narli ama lengi ama seserl nget. Maikka kuasik. Katikka diip ta tit maden taquarl te narliip. De re kiarlet mer araa tiksiqena, ip te su ra ne ama lengi i ai de ama qaqet ta rarlik nget na de araa rlan. \v 4 De diip te ngim temanau ne ama lengi ama revan nget, de diip ta tu araa asdem ip te narli ama siit maden maden. \p \v 5 Dap katikka ngi, dai maikka mager ip ma ngilka gel ngi masmas. De maikka mager ip ngia taarl ve ama merlen iirang. De mager ip ngit matna i ngil sil ne ama lengi ama atlunget bareq ama qaqet. De gia rletki i mager ip ngit matna ki ne gia revan. \p \v 6 Dai iara ngu sem madlek na ngi i raquarli ama qares ip diip ngu prleset. I sa ngua muvem nanas ip taquarl ai de ra tuvem ne ama ranbandem sagel ama Ngemumaqa. \v 7 De sa ngua verleset ne liirang aa mai ama rleriirang i ama Ngemumaqa qa qurl a ngua rem iirang. I qatikka ngua dlek be ngua verleset ne liirang aa ip taquarl ama amiqa i qa uirl se ama arasmesna, de raquarl iaq i qe qiuaik be qa verleset ne liina ip te ruirlna. \v 8 Be iara dai liina ip barek luqa i aip ka uirl vet lungera ama raqiuaik dai qurl iini aa, i ama mereqes i qurl iini ip naa na ngua. A revan i auur a Barlka i ai de qe tatmet se ama qaqet ma seserl dai diip ka ru ama ningaqa pet ngua ves. Dai quasiq ai ngerek se ngua dap diip ngen ne lura i araa rut nge taarl sever araa Slurlka i diip kerl guirl. \s1 Iang Ama Lengi Sagel Ma Timoti \p \v 9 Maikka mager ip ngi kaverl de masna ngia ren sagel ngua. \v 10 I sa raquarli ma Demas ka mit namen a ngua. I maikka ka narliip se ama tekmeriirang naver ama aivetki, de qa mit savet ma Tisalanikka. De ma Krisin ka mit savet ma Galatia, de ma Taitus dai qa mit savet ma Dalmaisia. \v 11 Dap ngerek se ma Luk dai qurli qe na ngua. De maikka ngiat ma Mak, de ngi na qa uan den. I qa dai ama atluqa na qa ip ka tat never a ngua se ama rletki. \v 12 De sa ngua nem ma Tikikas navet ma Epasas. \b \s1 Ka imaneng ama qemengka ne ama Langinka \p \v 13 I aip ngiat den, de ngi ral luqia ama kautrinki ama ainkul ki i medu ngua mit dap kurli qi vet ma Troas, pe ma Kapus aa vetki. De ngi ral ngen ama Langin. De maikka ngit lu iv aip de qula ngerlangken per a ngi ne lungera ama langin i ra mat naver a nget ne ama aurl angera qetdeng. \p \v 14 De ma Alaksada, luqa i ai de qet matna ver ama tekmeriirang ne ama ain, dai maikka qa rekmet ne ama vu malai sagel ngua. Dap nasat de ama Slurlka qe virliit ba qa, katikka qut liirang aa i qa rekmet niirang. \v 15 De qerlka ngen a ngi dai maikka mager ip ngit lu rik luqa iara ama qaqeraqa. I maikka qa dai mekai qa nging auur a lengi. \p \v 16 Lua i ma Rom ara Kiapkena ra rles, i ra mit se ngua ip ngua taqen i ngu piirlit per ama kot dai quasiq ai a qek ka maarl ip ka tat never a ngua. Kuasik. Dav ama qaqet mai ra mit namen a ngua. De ngu raring sagel ama Ngemumaqa ip mager ip ngerlangken per a qa ne liina araa viini. \v 17 Dav ama Slurlka dai sa mekai kurli qa, qe ne ngua de qa sem madlek na ngua. Taqurla be ngul sil ne ama lengi ama atlunget ip mager ip lura i quasik ta drlem se ama Ngemumaqa dai mager ip ta narli. I mekai ra siquat ip tet dan a ngua semer ama laion ip ke peleng ngua dai ama Ngemumaqa qa iames na ngua. \v 18 De diiv ama Slurlka qa ra ngua namer ama viirang mai i liirang aa i re narliip te tekmet ne iirang sagel ngua. De diip ke guirl a ngua de qa iit se ngua saver aa luqupki ama atluqi i qe uas pe uusep. Dai mager iv uut taarl ne aa rlenki de uut taqen ama atlu sagel ka masmas. A revan. \p \v 19 De ngi quarl te gua lengi ne ama atlu sagel ma Prisila ki ne ma Akuila, de ma Anasipuras aa liinka. \p \v 20 De ma Aristas dai as kurli qa vet ma Korin, de ma Tropimas dai ama arlemki ver a qa be ngua mit dap kurli qa vet ma Mailitas. \v 21 Maikka mager ip masna ngia ren ip mager ip ngia ren pe ama niingki ruut. I ma Ubulus de ma Pudans de ma Lainas de ma Klaudia, de auur ari mai dai ra quarl te araa lengi ne ama atlu sagel ngi. \v 22 Ngu nen ama Slurlka ip kurli qa, qe na ngen, de qurl aa ngimsevetki mirlek na ngen. \p Prleser aa