\id JON  
\h Diyona 
\toc1 Peloweta Diyona Dedena 
\toc2 Diyona 
\toc3 Diyona 
\mt1 Diyona  
\mt2 Dededena  
\is1 Diyona ena Liba Aba Fatubuna  
\ip Buka te, Diyona dedena. Diyona mate peloweta e Yaubada ena wasa tau lawenina hesa Isalaela ganahewana yai. Yaubada ya fatalaha bena ya sae Ninewa. Beyabeyana mate, Ninewa taon laꞌilaꞌi hesa Asiliya ganahewana yai. Na aho te, nuꞌuna hesana hudoꞌi sa tole: Iraki. Asiliya dodogadi adi waiyunu mate Isalaela. Debana yai, Diyona hige i fanuha bena i sai niya, yo fede, ya anfaleꞌen, be bena ya fuyo leu, Diyopa Nuꞌuna, be bena ya gelu, ya lau Sipani. Ena fanuha bena Yaubada ya panisidi edi heyaya debana yai. Diyona ya sibai, ibe ya sai niya, haba nuwadi sa bui fuyoꞌidi, be Yaubada haba ya nuwatohatohaedi, be ibege i panisidi. Buka te ya falibada mate, Diyona bena Yaubada tabu i lau watan. In moho, Yaubada Diyona ya fafiyoyama. Yo fede Ninewa dodogadi nuwadi sa buidi. Yaubada ya nuwatohatohaedi, be Diyona ya manabala Yaubada lisina yai.  
\ie  
\c 1  
\s1 Yaubada ena Nuwatuhu Diyona ya ꞌWaiyoꞌoꞌen  
\sr Diyona 1: 1-17  
\p
\v 1 Fuya ma esega, Yaubada ya libalau Amitai natuna Diyona lisina. Iyen,   
\pi1
\v 2 U lau Ninewa duhu balabalamumuna be u sagaliyedi; paꞌana dodogadi edi heyaheyaya haꞌa E sibaidi.   
\b  
\p
\v 3 Yo fede, Diyona, edaꞌeda hesa ya lau watan paꞌana hige i fanuha Yaubada ena nuwatuhu i lau watan. Ya leu Diyopa nuꞌuna yai, be waga hesa ya lobahi ya laulau Sipani.\f + \fr 1:3 \ft Sipani ganahewana yai mate nuꞌu hesa hesana Tasisi. Nuꞌuna mate Gabogabo Laꞌilaꞌi yai tefa leuleuna wananaha.\f* Yo fede ena pasisi ya famaisa na bena ya awa gela maidana, waga tau paisowadi, be sa aulaha sa leu Sipani, paꞌana tabu Yaubada ena nuwatuhu i lau watan.   
\p
\v 4 Debana yai Yaubada yauma laꞌilaꞌi ya fatamali gabogabo yai mate ya adidili wananaha be waga bena ya lubi dagidagi.   
\p
\v 5 Waga tau paisowadi sa ꞌwasabu wananaha, yo fede hesa - hesa ya anꞌeta lau ena yaubada lisina be haba sagu ya lobahi. Ginauli mahudoꞌina waga ganahewana yai sa lofe taluhidi gabogabo yai, be tabu i bulu. Maihalana yai Diyona ya lidi waga ganahewana yai, be ya eno ꞌwafu.   
\p
\v 6 Waga tau ulinna Diyona ya ita be ya fatiꞌoi, iyen,  
\pi1 Sidohana be wa laulau eno? Haga u obiyo be u lauꞌuꞌula lau em Yaubada lisina be i saguhida. Nuwana haba i nuwatohatohaeda, be ibege ta peꞌi.   
\b  
\p
\v 7 Waga tau paisowadi sa liba, tiyen,  
\pi1 Haga, nesu itaꞌita yai, ta yoꞌoi, haba te lobahi, sai ena ponoli yai be heyaheyaya te lobahi.  
\b  
\p Yo fede nuwatuhuna sa lau watan, be Diyona gilu ya bahe.   
\p
\v 8 Yo fede sa liba, tiyen,  
\pi1 Um ꞌe fagilum. Aho te, u falibamai! Somo amaiteꞌi wa ginaginauli? Em nuꞌu somo?   
\p
\v 9 Diyona alinadi ya bui, iyen,  
\pi1 Yau Hebelu dogana,\f + \fr 1:9 \ft Hebelu dodogadi hesadi hesa mate, Isalaela dodogadi.\f* Galewa Yaubadana, “Yawe,” tanohi yo gabogabo tau ginaulidi E fadebasae\f + \fr 1:9 \ft Yaubada hesana hesa wananahana mate \fq Yawe \ft Isalaela edi atahi gebageba mate \+nd Guyau\+nd*.\f* \rq (Auꞌaulaha 3:11-14)\rq*   
\m
\v 10 Yau aho E gela, paꞌana Yaubada ena nuwatuhu hige ya lau watan.  
\b  
\p Yo fede, waga tau paisowadi sa tau hiti, be sa liba, ite,  
\pi1 Sidohana be doha wa ginauli?   
\b  
\p
\v 11 Hwayahwayau ya falaꞌi, yo fede waga tau paisowadi sa fatiꞌoi, itebom,  
\pi1 Ibe somo ai lisim ꞌe ginauli haba yauma te ya fatautau?   
\b  
\p
\v 12 Diyona alinadi ya bui, iyen,  
\pi1 Au pei lidiyegu, haba gabogabo ya daumwali. E sibai mate egu ponoli yai yauma ya abi esegahimiu.   
\b  
\p
\v 13 Waga tau paisowadi sa anpate adidili bena waga sa lawen sadai yai. In moho, hige gonowadi paꞌana ainiya, ena abi ya heyaya wananaha.   
\p
\v 14 Yo fede, sa anꞌeta lau Yaubada lebena, tiyen,  
\pi1 Yaubada, somo ꞌe ginauli doga te lisina yai; tabu u manabalaꞌemai, um em nuwatuhu yai ꞌe ginauli.   
\b  
\p
\v 15 Habahim Diyona sa abi hitiꞌi; be sa lofe taluhi gabogabo yai. Yo fede, gabogabo ya daumwali.   
\p
\v 16 Amainiya, waga tau paisowaidi Isalaela edi Yaubada sa ꞌwasabuwen, yo fede sa kawawananahaꞌen, be edi antalasam sa ginauli, na sa angwala haba sa famuli watan.  
\v 17 Yaubada ena nuwatuhu yai hama laꞌilaꞌi ya fatamali be Diyona ya dom.\f + \fr 1:17 \ft Ginauli te, nuwana mate uliꞌuliyasi, o hama laꞌilaꞌi hesa.\f*  
\m Na ya miya bogana yai lahai faihona yo maihona faihona.   
\c 2  
\s1 Diyona ena Anꞌeta Yaubada Lebena yai  
\sr Diyona 2: 1-10  
\p
\v 1 Diyona mate hama laꞌilaꞌi bogana yai na ya lauꞌuꞌula lau ena Yaubada lisina. Iyen,   
\pi1
\v 2 Egu \nd Guyau\nd*, egu kamkamna te ganahewana yai E anꞌeta laowa lisim;  
\li2 na egu anꞌeta wa atahiyen. Aba peꞌi nuꞌuna yai E anꞌetaim.   
\pi1
\v 3 Um em nuwatuhu yai, be sa lofe lidiyegu gabogabo ipuꞌipuna wananahana yai.  
\li2 Be gabogabo ya fuigu yo bagodu sa laoma hewagu yai sa lau.   
\pi1
\v 4 Nuwagu yai yawa, Nuwana haꞌa u ꞌwaiyoꞌoꞌegu, be ibege ya lobahim.  
\li2 Be nuwagu mate ya mode wananaha;  
\li2 paꞌana em Dubu Tabuna Yelusalem yai, ibege ya ita fuyoi.   
\pi1
\v 5 Gabogabo ya eli buluhi wananahaigu.  
\li2 Gabogabo hawahawadi kulugu sa fakou buluhi.   
\pi1
\v 6 Gabogabo ganahewana yai, tuꞌa edi aba susu fatubu.  
\li2 Amainiya sa gudu buluhigu.  
\li2 In moho, um Yaubada egu \nd Guyau\nd* aba peꞌi yai wa fafuyoguma.   
\pi1
\v 7 Yaubada, amnagu E atahi mate haba E peꞌi,  
\li2 yo fede E anꞌeta laowa lebem,  
\li2 na em aba miya yai egu lauꞌuꞌula wa atahiyen.   
\pi1
\v 8 Be yaubada bwalabwala lisidi yai,  
\li2 tau laulauꞌuꞌula lau dodogadi mate,  
\li2 loholoho lisim yai sa ꞌwaiyoꞌoꞌen.   
\pi1
\v 9 In moho, yau haba E fadebasaem;  
\li2 nuwam aba faloholohona haba E felem;  
\li2 be E angwala mate, somo wa fatalahagu haba E ginauli,  
\li2 Mwahuli Edaꞌedana esega um!   
\p
\v 10 Debana yai, Yaubada ya liba be hama ya lau Diyona ya fula afulen fote yai.\fig |alt="Diyona, Hama ya fule afulen, fote yai" src="32_Jon_01_06_RG.jpg" size="span" loc="Jonah 2:10" ref="2:10" \fig*   
\c 3  
\s1 Yaubada ena Liba Diyona ya Awaꞌabiyen  
\sr Diyona 3:1-10  
\p
\v 1 Yaubada ya liba fuyo Diyona lisina. Iyen,   
\pi1
\v 2 U lau Ninewa, duhu balabalamumuna yai, be alinagu te dodoga u falibadi.   
\b  
\p
\v 3 Yo fede, Diyona, Yaubada ena liba ya awaꞌabiyen, be ya lau Ninewa. Nuꞌuna ya laꞌi wananaha, gonowana lahai faihona ai ganahewana sa laufi.   
\p
\v 4 Lahai bwaꞌibwaꞌi yai, Diyona ya lau be duhu balabalamumuna ya mahano, habahim ya fatubu ya falibadi. Iyen,  
\pi1 Lahai 40 mulina yai Ninewa Nuꞌuna, Yaubada haba ya faheyaya.   
\b  
\p
\v 5 Ninewa dodogadi mahudoꞌidi, habahim, sa kawawananahaꞌen be edi hineli sa ginauli bena mahudoꞌidi sa andabu. Sa logo be edi baiki sa liꞌodi hinaga, edi nuwabui fafaꞌilalana.   
\p
\v 6 Fuyana Ninewa edi kin wasa ya atahiyen, ya logo hinaga. Ena aba taꞌai ya lau afulen, yo ena leli loholohodi ya kamfahidi, na baiki ya liꞌo, na ya lau afusa yai ya taꞌai.   
\p
\v 7 Laugagayo ya fatamali Ninewa dodogadi lisidi yai. Iyen,  
\pi1 Itete yau yo dodoga lalaꞌi, alinamai, dodoga yo emi bulumakau, sipi, tabu somo laꞌi ti an yo ti nom.   
\pi1
\v 8 Dodoga yo emi yosiyosi bena baiki ami fakoudi, mahudoꞌimiu, bena ma nuwa ofi fahimiu ami lauꞌuꞌula lau Yaubada lisina yo laulau heyaheyaya tabu au ginauli.   
\pi1
\v 9 Yena ita doha te ginauli, nuwana Yaubada Wananahana haba nuwana ya bui, be ibege ta peꞌi.   
\b  
\p
\v 10 Be somo sa ginauli mate, Yaubada ya ita mate moꞌisa, nuwadi sa buidi, be laulau heyaheyayadi sa fatautaudi. Yo fede, somo Yaubada ya libaen bena ya ginauli wa, nuwana ya bui, be hige i ginauli lisidi yai.   
\c 4  
\s1 Diyona ya Manabala, na Yaubada ya Nuwatohatoha  
\sr Diyona 4:1-11  
\p
\v 1 Nuwatuhuna ni Diyona hige i fanuha, be ya famala ena manabala.   
\p
\v 2 Yo fede, ya lauꞌuꞌula, iyen,  
\pi1 \nd Guyau\nd*, doha haꞌa E falibam, fuyana hola hige egu nuꞌu ya lau afulen mate, bena doha ite wa ginauli?  
\pi1 Logena be E gela E lau Sipani!  
\pi1 E siba mate, um tauꞌulu yo nuwatohatoha Yaubadana. Fuya ouꞌouli wa nuwa talu, wa tauꞌulu, ma nuwa ofi fahim, yo fuya ouꞌouli hinaga nuwam wa bui, be ibege heyaheyaya u ginaulidi.   
\pi1
\v 3 \nd Guyau\nd*, aho te, E falibam ibe wa lau funuhigu mate, ya loholoho!   
\b  
\p
\v 4 Yaubada wa, Diyona alinana ya bui, iyen,  
\pi1 Em dudulai somo be wa manabala?   
\b  
\p
\v 5 Diyona ya finahe hasa duhu balabalamumuna ganamulina yai ya taꞌai.  
\p Mulina yai ena gwaꞌu ya pei, be ya anlogulogu. Habahim ya bagibagi haba somo Ninewa ai lisidi ya tubu bena ya ita.\fig |alt="Diyona ya anlogulogu" src="32_Jon_04_03_RG.jpg" size="col" loc="Jonah 4:5-7-" ref="4:5" \fig*   
\p
\v 6 Habahim, Yaubada ya liba be mahina hudoꞌi ya in hasa, be Diyona ya faꞌanlogulogu, haba kamnana ya loholoho. Diyona nuwana ya amna wananaha mahina lisina yai.   
\p
\v 7 Bobonna ya ifi tatatali, Yaubada ena nuwatuhu yai, mwatamwata mahina wa ya faheyaya, yo fede, ya peꞌi.   
\p
\v 8 Maihala haꞌa ya kepama, Yaubada bolibolima gigibwalina ya fatowa, yo maihala gigibwalina Diyona kuluna ya sinai, be egoba ya tau peꞌipeꞌi, na iyen,  
\pi1 Ibe E peꞌi mate, ya loholoho.   
\b  
\p
\v 9 Yo fede, Yaubada ya libalau lisina, iyen,  
\pi1 Em dudulai somo be mahina te wa luluwen?  
\b  
\p Alinana Diyona ya bui, iyen,  
\pi1 Maꞌegu dudulai be E manabala. Manabalana ni, ibe ya kamfunuhigu!   
\b  
\p
\v 10 Yaubada ya libalau lisina, iyen,  
\pi1 Mahina ni maihona esega ganahewana yai ya in, na bobonna ya peꞌi. Um hige somo u ginauli lisina yai, yo hige u faꞌin.   
\pi1
\v 11 Egu nuwatohatoha laꞌina haba doha somo, Ninewa duhu balabalamumuna ni ai lisidi? In moho ganahewana yai mate, dodoga loholohodi 120,000 ya diꞌoi, yo edi yosiyosi hinaga oulina doha.