\id TIT - Borna New Testamnet
\ide UTF-8
\h Tito
\toc2 Tito
\toc1 Tito Maants
\toc3 Tito
\mt3 Wosheetso P'awlos Wosho
\mt Tito Maants
\imt Kindo
\ip Tito Krstiyani imnetiyo maants b́ waa Ik' ash woterawwotsoke b́ wotor P'awlosi doo shishi keewon karndek't tep'oke b́ fini toohoni b́ teshi, P'awlos wosh han b́ guut' shweyon bíyere na'a wottso b́ fini tooho Titossh b́ wotor Tito manoor Ik' maa fino s'iilosh K'ert'esitsna b́ fa'o b́ teshi. B́ woshonwere bogon b́ s'iilir keez een een keewwotsatse.
\ip Iklo, Ik' maa jishirwotssh bítsnor K'ert'es ashuwots gond niwok'on bodetstsotse awuk'o niwon bonton beyo boon b́ geyitwok'o Titossh b́ gawiyiri, Gitlo, Ik' mootse fa'a k'osh k'osh jirwots man etonwere boshúweyi dúron een wotts nungushwotsnat maatswotsn, mank'o jawets núngushwotsnat guutswotsn awúk'o daniyo boosh b́ geyituwok'o Titosh b́ iziri, s'uwaatsnowere Krstiyani sheeng niwo bítsnor jenonat shunewon beyo, mank'o Ik' mootse shit'o, mooshonat k'alerawok'o wosho, Titosh izonat bín jisho b́ imiri.
\iot Jamon mas'aafan b́detstso
\io1 Kindo 1:1-4
\io1 Ik' maa jishirwots 1:5-16
\io1 Ik' mootse k'osh k'osh jirwots fini bano 2:1-15
\io1 Izonat ats kordek'on 3:1-11
\io1 Gúúpo 3:12-15
\c 1
\p
\v 1 Ik'i guutsonat Iyesus Krstos wosheets wottso P'awulosoke, Ik'o galbdek'ts ashuwotsi bo imnetiyon kup'shr, Ik'i ash beyo maants jishit aro bodanetwok'o wosheetso, 
\v 2 Imnetiyanúwere Ik'o dúre dúri beyo imosh noosh b́jangitsatse need'ke, koorawo Izar Izewer kashan noosh imosh jam dúroniyere shin noosh taarre. 
\v 3 Ari b́ gizewo b́ bodtsok'on noon worits Ik'o azaztsok'on taa t shishiyitwok'o taash imets adarok'on Ik'o bí aap'tso b́ jangi.
\p
\v 4 \x - \xo 1:4 \xo*\xt 2 K'or. 8:23; Gel. 2:3; 2 T'im. 4:10 \xt*\x* Noshir wotts imnetiyon arikon t naayi wottsosh neesh Titosh, Ik'o nihoknat noon kashitso Krstos Iyesusokere s'aatonat jeenon neesh wotowe.
\s Titos fino K'ert'esitse
\p
\v 5 Neen K'ert'esitse k'aztk'rtso eegoshe manutseraawo manutsir, neen tiazaztsok'on Ik'i máá eenashwotsi kit kitotse nnaashitwok'owe. 
\v 6 Ik'i máá eenasho eeg eeg bíatse deshawonat mááts iku kenihi wottsoni, shiraats jintsi wotonat bo alek'azeyatse tuutson k'ooreraw amants nana'úwotsi detsts asho woto bín geyife. 
\v 7 Ik'i maa jishirwo Ik'i fino adaron b́ dek'tsotse bíyatse eeg eeg deshaw s'ayino woto bín geyife, mank'owore bika bako shiyawo, káári fayerawo, masherawo, fayetsi woterawo, gizosh k'awntrawo woto bín geyife. 
\v 8 Maniyere ib dek'fo, sheeng keewo shuntso, káts wottso, kááwo, Ik'i finosh gaaletso, bítook kewdek'faltso wotowe. 
\v 9 \x - \xo 1:6-9 \xo*\xt 1 T'im. 3:2-7 \xt*\x* Arik wotts dano daniwon izosh k'efirwotsshowere aani dek'o b́falitwok'o danb́dek'ts amanets aap'ats kup'de'e.
\p
\v 10 Ay ashuwots, bítsnor Ayhudi jirwotsi wottswots gofami niwo shoyirwots, alerawwots, datsmec'ron ooshirwotsnat dashirwots fa'ane. 
\v 11 Ashaanotsi s'k boetetuwok'o wosho geyife, bo jitsit oot'o daatsosh woteraw keewo danifetst maa ash asho boshek'iri. 
\v 12 Boyitse iko, botook nebiyiwo «K'ert'es ashuwots jam aawo kootetswotsi, gond s'ootswotsi, fin biitsts maac' geenzwotsiye» etre. 
\v 13 Gawets gawanúwere arikee, mansh eshe shod deshaw imnetiyo bodetsetwok'o ashaanotsi ayide hadowe. 
\v 14 Ayhudi tururi shuutso bo sha'irwok'o, ariko k'efiru ashuwots tzaziwotsno bok'ewawok'o kup'shde'e hadowe. 
\v 15 S'ayn nib detstswotssh, jam keewo s'ayine, kiimwotsnat amaneraw ashuwotsshmó s'ayin wottso eegonwor aaliye, dabnwor bonibo wotowa bomaac'o kiimwtske. 
\v 16 «Ik'o danfone» etirune, bofiinonmó jamere etetune bísha, bo wic'iknee, alerawwotsna sheeng keewo iko k'alo falawwotsiye.
\b
\c 2
\s Arik wotts dani jango
\p
\v 1 Neemó kááw danonton ik wotts dano daniwe, 
\v 2 Eenash wotts nungshwots, bo detsts detsok'on beetwotsi, bo mango kotdek'tswotsi, bo atso kotdek'tswotsi, imnetiyonat shunon, k'amonowere jeenwotsi bowotitwok'o izwe. 
\v 3 Mank'owere eenash wotts máátswots bo Ik' shatirwotsi bowotitwokowa bako oonetswotsnat, úsho shuntsowotsi bowoterawok'onat sheeng daniyo bodaniyituwok'o izuwe. 
\v 4 Hank'owere guuy máátswots bo kenihotsnat bo nana'on bo shuneetwok'o, 
\v 5 botook kewdek'tswotsnat s'ayinwotsn, mootse sheengon finirwotsi, bo kenihotsshowere keweyirwotsi bo wotitwok'o daniwne. Han bok'alitwere Ik' aap'o b́ k'eferawok'owe.
\p
\v 6 Hank'owere jawetswots botoko korde'er bo beetwok'o izwe. 
\v 7 Neewere sheeng wottso finefetsr jamkeewon boosh sheengon arewe, n danon kááw nwoto, ari keew kewetsi n woto kitswe, 
\v 8 K'oorerawo jeeni noon keewo boosh kitswe, hank'on k'efirwots no ats bo keewit gond keewo bo t'ut'or jiitsitune.
\p
\v 9 Guutswotswere bodoonzotssh bo kewetwok'o, jam keewonowere boon bogene'úshitwok'o, boosh bok'ayawok'o, 
\v 10 bo gizonowere boatse boúmp'erawok'o izwe, maniyere dab noon kashit Ik' dano jam keewon b́ mangitwok'o jam aawo b́ jamon amanek nwoto kitsitne.
\p
\v 11 Ik'o asho bín b́kashiyit b́s'aato jam ashosh kish kitsre, 
\v 12 deeranuwere jamere etonat meets tewunon k'ayk'rar b́ tooko korde'er, kááwonat shayiri beewon datsanatse no beetwok'owe noon b́ daniyiri. 
\v 13 Hank'on no jangirw deeretso, hank'owere noko eeno Izar Izewer, noon kashiyitwo Iyesus Krstos mangon b́ be'ewo kotirwone. 
\v 14 \x - \xo 2:14 \xo*\xt Dub. 130:8; Kesh. 19:5; Iwi. 4:20; 7:6; 14:2; 1 P'et'. 2:9 \xt*\x* Krstos weeri god jamatse noon kashiyir sheeng fino finosh maawirwotsnat bísh gaalets s'ayin ashuwotsi nowotitwok'o noon s'ayintsosh no shegro b́ tooko beshidek't b́ími.
\p
\v 15 Eshe keewanotsi daniwe, ali s'eenonowere izwe, fayono fayowe, konwor neen b́ gac'eraawok'owa.
\c 3
\s Krstiyani nemó
\p
\v 1 Ash jametso kéwirwotsnat naashwotsnsh b́tooko dashan detson bo aletwok'o, sheeng keew jamo finosh k'andek'tswotsi bowotitwok'o, 
\v 2 konatsor gond keewo bo keewrawok'o boosh gawiwe, dab maniyere ashonton fayerawwotsnat maac'nefwotsi, b́ jamon ash jamosh bo tooko dashan detso kitsitwotsi wotoone, 
\v 3 Noowere haniyere shin danawwotsi, azazerawwotsi morrgondwotsi, noweeronowere sheelk'rts woterawwotsi, k'osh k'osh naari gusiyonat meetso geneúwoshosh kewetswots, weerigondonat nemi gondon beefwots, shit'eetswotsnat no atsatseyo fayefwotsiye noteshi. 
\v 4 Ernmó no ato Ik'o doo wotonat ash shunon b́ be'ewor, 
\v 5 noo nofints S'ayin finon b́ woterawo b́ took maac' k'ewon noon kashire, noon b́ kashiyiwere handr shweyon mashonat S'ayin shayiri weeron daatsets handrone. 
\v 6 Ik'o noon kashitwo Iyesus Krstosn b́ shayiro ayidek't noosh kuut're. 
\v 7 Hanowere b́k'al b́ s'aaton kááwar jangat nokotir dúre dúri kasho nonaatetwok'owe. 
\v 8 Etetsanwere amaneke. Ik'on amants ashuwots sheeng finosh bokup'itwok'o keew jamahan kup'shde'er ngawiitwok'o geefe, keewanwere sheengonat ashosh ik ikon ot'etske. 
\v 9 Ernmó dartswots mooshatse, naar taawotse, fayotse, nematse tuutson twit fayatse wokowe, keewanots eegor oot'deshawonat k'awntsalwotsiye. 
\v 10 K'alewo dowet asho iknoto wee gitoto bín ni iziyakon bíyatse wokowe. 
\v 11 Hank'o wotst asho k'uuronat morretske, bí b́ tookats angshtso b́wottsok'o dande'e.
\s S'uwaatsi izo
\p
\v 12 \x - \xo 3:12\xo*\xt Wosh. 20:4; Efe. 6:21-22; K'ol. 4:7-8; 2 T'im. 4:12 \xt*\x* Art'emasi wee Tikik'osi itmaants twoshoor nee Nik'olyonits t maants wosh káárwe, taa joosho biyoke beshiyosh k'ut'dek're. 
\v 13 Nem dantso Zenasnat Ap'losn bo sha'o de'er botwitwok'o woshwe, boosh geyit keew jamonowere boon tewu'e.
\p
\v 14 Noo ashuwotsuwere aani shwalo bo'orerawok'o err beyi kic'o ketiyo bofalitwok'o sheeng fino finosh dande'ene.
\p
\v 15 Taanton fa'a jamwots jamó neesh t'intsirune, imnetiyon noonton kayitwotsi wotts no mashots bojamets jamo neesh t'intsirune.
\p Ik'oko s'aato it únetsnton wotowe.