\id ROM - Borna New Testamnet
\ide UTF-8
\h Rom
\toc2 Rom
\toc1 Rom Ashuwots Maants
\toc3 Rom
\mt3 Wosheetso P'awlos Wosho
\mt Rom Ashuwots Maants
\imt Kindo
\ip Wosh na'o P'awlos wosho Rom ashuwots maants gúút'etso P'awlos Romitse fa'a Ik' moo s'ilosh bí'ettsotse k'ande'er bín bo kotetwok'o woshosha. P'awlos Romitse fa'a amantsuwotston muk' aawosh b́ finiyakon bín bo te'úwe Spen maants amosha b́ tesh, Krstiyani imneti jangosh P'awlos t'iwints b́dek'tsonat krstiyaniwots bo beewotse finats bo jitsitu krstaniwoti danuwots jango ik ikon beezt guut're, P'awlos woshts wosho s'eenon b́datseyir woshanitsne.
\ip P'awlos Romitse fa'a amantsuwotssh b́ jamo b́ t'intsiyakon boosh Ik'o b́ k'onitwok'onowere b́ jangiyihakoon b́ woshman detstso (1:17) «Ik'oke daatsets kááwu woto amanona, amanosha wotiyalo dooshishiyon be'ere» etiru aap'o b́wottsok'owo kitsirwe.
\ip Haniyere okoon P'awlos asaabiyan gawintsdek'tni b́ guut', ayhudiwotsi wotowa Ik' ash woterawwotsi ash jamwots morrosh keewek bowottsotse Ik'onton maneyo boosh geyife, ashuwots Ik'onton manewosh bofalitwere Iyesus Kerstosn amanaarniye, Ik'onton bo need'iyit ik wot handraan b́dowetwonwere handr be b́wottsok'o P'awlos gawintsdek'tni b́kitsiri. Amantso Ik'oke jeeno detsetwe, Ik'i shayiro morronat k'iri angaatse nas'o keshetuwe, K'ot. 5 tuut 8 P'awlos Ik'i nemonat amantsuwots beyotse finit Ik'i shayiri ango eeg k'alosh b́wottsok'o kitsiruwe, Manats dabt P'awlos «Ik'o ash naarosh b́ gedtsotse ayhudiwotsnat Ik'i ash woterawwots aawuk'oneya ik woto bofaliti?» ett aatetsmansh aanidek'osho etiruwe.
\ip Ando aaniyi P'awlos b́kitstsok'on ayhudiwots Iyesusi dek'o bo k'azonwere Ik'o b́ beezke, manbwotwere Iyesus Krstos weeron Ik'o b́ kitsts kashet deero ash naar jamo b́daatsituwo woshoshe. Wotowa eree ayhudiwots Iyesusi bodek'et dúro b́weetuwok'owo P'awlos amanefe, b́s'uwatsnowere P'awlos krstiyani beyo awuk'o beyo b́geyituwok'o, bítsnor amantsuwots boatsatseyosh bodetsts gonkewon shuni weerats sha'o boosh b́geyituwok'oniye b́ iziri, Ik'osh fini jango, krstiyaniwots bodaatsi jangonat bo atsatseyosh bodetsts jishi keewi jangona, ash asaabiyon tuutson aatet keewwotsnowere ik ikon b́ iziri.
\iot Jamon mas'aafan b́detstso
\io1 Mas'afanitse ááwu wotts asaabiyots kindo 1:1-17
\io1 Kasho ash na'osh geyik b́wottsok'o 1:18—3:20
\io1 Ik'o b́kashiyi weero 3:21—4:25
\io1 Krstosn daatset handr beyo 5:1—8:39
\io1 Ik'o Isra'elsh b́detstso 9:1—11:36
\io1 Krstiyaniwotssh fin geyit fino 12:1—15:13
\io1 S'uwaatsi jamo 15:14—16:27
\c 1
\p
\v 1 Iyesus Krstossh guuts wottso woshosh s'egetsoke, Ik'i doo shishiyo daniyosh marat'etso P'awlosoke wosheets wosho.
\p
\v 2 Doo shishiyanwere Ik'o nebiyiwots weeron S'ayn mas'aafotse shin shin jangiyets aap'oniye. 
\v 3 Doo shishiyonuwere Ik'i na'o b́ naaron Dawit naarotse b́shuweetsok'o kitsitkee, 
\v 4 Mank'owere no doonz Iyesus Krstos b́ S'ayin shayiron k'irotse b́tuwon Ik' na'a b́wottsok'o bíangi eenon b́daneyi. 
\v 5 Krstos shúúts jangosh Ik' ash Woteraw jamwots bo amanituwok'onat boaletwok'o woshosh b́ weeron wosh na'o wotosh noon betsit s'aato dek'rone. 
\v 6 Itwoor Iyesus Krstosk itwotituwok'o Ik'o b́ s'eegts jirwots taalots itne.
\p
\v 7 Eshe Romitse beyiru, Ik'o iti b́ shuntswotsnat b́jiro it wotituwok'o itn s'eegts jamwotso!
\p Noo nih Ik'oknat nodoonz Iyesus Krstos s'aatonat jeenon itsh wotowe.
\s P'awlo Roomi ams'iilo b́geetsok'o
\p
\v 8 It imneti shúútso dats jamats b́shishetsotse, jamoniyere shinon Iyesus Krstos weeron it únets jangosh Izar Izeweri údituwe. 
\v 9 Jam aawo Ik'o tk'onor itn t gawiruwok'o b́ naay jangosh keewiruwo doo shishiyo daniyosh t nib s'eenon bísh t finiruwu Ik'o taash tgaawoniye. 
\v 10 Ando dabr s'uwanatse itok wosh Ik' shuno b́ wotere t weerindo b́káátsituwok'o jam aawo Ik'o t k'oniri. 
\v 11 Imnetiyats it kup'ituwok'o itn woshituwo shayiri imo itsh betsosho, itn bek'osh tewuniruwe. 
\v 12 Man ti etiruwere taa it imnetiyon, itwere t imnetiyon no atsatsewo nokup'itwok'owe.
\p
\v 13 \x - \xo 1:13 \xo*\xt Wosh. 19:21 \xt*\x* Ti eshuwotso! k'osh k'osh Ik' ash woterawwotsitse ay amantsuwotsi tdatstsok'o mank'o ititsnoru shuwo daatsosh geeyatniye tteshi, ernmó itok wosh ay aawo tk'anere andish b́borfetso taash k'ano b́k'aztsok'o it danetwok'o geefe. 
\v 14 Salat'antswotsi wotowa salat'anerawotsi wotowa dantsuwotsi wotowa danawu ashuwotsi daniyo fal k'ayaatse. 
\v 15 Eshe itsh Romn beyiruwotssh doo shishiyo daniyosh tewuniruwe.
\s Doo shishi aap'o Ik'i ango b́woto
\p
\v 16 \x - \xo 1:16 \xo*\xt Mar. 8:38 \xt*\x* Taa doo shishi aap'on jitseratse, doo shishi aap'o shino ayhudiyotssh, bíyats aanat Ik' ash woterawwotssh, Mank'o amants ash jamwotsi kashiyosh falit Ik'i angoniye. 
\v 17 \x - \xo 1:17 \xo*\xt Imb. 2:4 \xt*\x* Kááwu wotituwo imnetiyon kasho daatsituwe ett guut'ere, Ik'i kááw woto doo shishyon b́be'etsotse b́ jamon asho kááw b́ wotit imnetiyone.
\s Ash na'i gondfino
\p
\v 18 Ashuwots bogondon aro b́daneerawok'owe bok'aliri, Ik'onowere shato bo k'ztsotse bo gondi jangosh jametsats daaratse Ik' fayo be'etuwe. 
\v 19 Boon b́ sezituwere Ik' jango dano boosh b́ geyituwok'o Ik'o b́tookon b́kitsre dant boteshtsotsne. 
\v 20 Datso bíazetson tuut ashuwotssh be'erawo Ik'i doyo, manuwere dúre dúri bí angonat Izar Izeweri b́woton bí bíazts keewwots weeron sháánt b́be'eyirwonat t'iwintsosh ashuwots bot'afits t'afiyosh bo etetuwo deshatsne. 
\v 21 \x - \xo 1:21 \xo*\xt Efe. 4:17 \xt*\x* Bowere Ik'o dant bísh wotit mangonat údon imatsne, bohasabiyon woterawo bowoti t'iwintsraw bonibo t'alu b́wtsi, 
\v 22 «Dantsuwots noone» ett dartsuwotsi bowoti. 
\v 23 \x - \xo 1:23 \xo*\xt Iwi. 4:16-18 \xt*\x* Besherawu Ik'o mangiyoniyere beshit asho aro wotts ariyetso, Kafon, awd tuf detsts gizuwotsn, datsatse geetseyiru dins'otswots aron arit finetsuwotssh mango boími.
\p
\v 24 Mansh boatsatsewo botook atsats jitsit fino bok'alitwok'o Ik'o kimon s'eents bonib tewunosh keewetswotsi bowotitwok'o k'azb́k'iri. 
\v 25 Man b́wotuwere Ik' aro kooton bowonitsosh, aztso shegro azeetso boik'itsonat bísh guuts bowottsoshe, Ik'onmó dúre dúrosh údeke! Amen.
\p
\v 26 Ashuwots man bok'altsotse Ik'o Woteraw wic'ets tewunosh beshidek't boon bí imi, bo mááts máátsuwots dab azeewon daneets gonkewo daneerawu gonkeyi naaron woni bok'ri. 
\v 27 Mank'o nungushuwotswere daneets gonkewo máátsuwotswotsnton wosho k'azt boatsatsewo bogúsiyon bomis'i, mansh nungushuwots nungushonton jitsits keewo bofini, bo sheeltsi jangosho boosh wotit fayo bomeetson bodek'i.
\p
\v 28 Ashuwots Ik' dano geyo bok'aztsotse wic'ets keewo bo finituwok'o Ik'o Woteraw nibosh beshidek't imb́k'ri. 
\v 29 Mansha morron, gondon, jaalon, weerigondon, okooron, kashúd'on, shid'eyon, dirshon, gond tewunon s'eent, ando oonetswotsiye, 
\v 30 Ash shúúts t'afiyruwots, Ik'o shit'iruwots, ash ketiyiruwots, mishetswots, noona boguwotsi etiruwots, gond finosh malo geyiruwots, bonih indosh azazerawwots, 
\v 31 T'iwintsde'awwots, keewetso gakiruwots, shuno deshawwots, maac'kup'uwotsiye. 
\v 32 «Keewanotsi k'aliru jamwots k'ire boosh wotiti» etiru Ik'o nemo danfetstniye jaman bok'aliri, k'al mec'ro woterawon, man k'alirwotsnowere bokup'iri.
\c 2
\s Ik' angsho
\p
\v 1 \x - \xo 2:1 \xo*\xt Mat. 7:1; Luk'. 6:37 \xt*\x* Nee k'osh ashaats angshirwono nee ntokish bíyats nwebitwo deshatsne, k'osh ashaats ni angshor n tookatse niangshiri, nee k'osh ashaats angshfetsat, n angshts ashman b́ k'alirwoniye nk'aliri. 
\v 2 Mank'o k'aliru ashuwotsats, Ik'o boosh wotituwo boosh b́ angshiruwok'o danfone. 
\v 3 Nee ashono! mank'o k'aliru ashuwotsats angishfetsat, bo bok'aliruwo nk'alor Ik' angishi shirotse nkeeshtsok'o neesh arefa? 
\v 4 Himo Ik'o b́ sheeng wotonat jam falk b́woto, noosh b́ k'amonwere bí ankattsono ngac'iri? Ik'o sheeng b́ woto noosh bíayiyi, neen n morrosh naandre eto maants jishosh b́wotok'o danatsneya? 
\v 5 Eshe nee n morrosh naandre eto nk'aztsotsnat maac'o kup' nwottsotse Ik'i fayonat ari angshon b́be'et aawots fayo niats bí ayituwok'owe nk'aliri. 
\v 6 \x - \xo 2:6 \xo*\xt Dub. 62:12; Ari. 24:12 \xt*\x* Ik'o ik ikuwotssh bofinok'oye boosh b́ imeti. 
\v 7 Sheeng finats kup'de'er údonat mangon t'afrawu kashonowere geyiruwotssh Ik'o boosh dúre dúri kasho imetuwe. 
\v 8 Botooki keewo geyiruwotsi, ari keewosh azazerawwotsnat gondosh azazeyiru gonduowotsatsomó Ik'i fayonat kaak k'iro boats weetuwe. 
\v 9 Shin shino ayhudiwotsats maantsnowere Ik'i ash woterawwotsats gond finiru ash jamwotsats gond bek'onat kic'on weetuwe. 
\v 10 Ernmó sheeng keewo kaliru ash jamats Ayhudi wotowa Ik'i ashwoterawwotsi wotowa údono mango jeeno boosh imetuwe. 
\v 11 \x - \xo 2:11 \xo*\xt Iwi. 10:17 \xt*\x* Ik'oniye ashuwotsi boga bogshraake.
\p
\v 12 Nemo bodeshawo morr finiru jamwots nemo bot'ut'alor t'afitúne, nemonowere deshfetsr morr finiru jamwotsmó nemon bo ats angshetuwe. 
\v 13 Ik' shinatse kááwu wotituwots nemo shisht finats jitsiruwotsiye bako nemo shisht finats jitsrawotsiyaliye. 
\v 14 Nem deshaw Ik' ash woterawwots bo azeewon nemo bí azaziru keewo kalirune, man weeron nemo bot'ut'aloru botookk wotts azeeyi nemo bodetstsotse k'alosh boon b́geyituwo danfnee. 
\v 15 Bo keewanúwere nemi etiru jam keewo bo nibats b́ guut'ets b́ wotok'o kitsiruwe, aaninuere bonibo boats gawituwe, ikn ikno boon bonibo b́gac'iti, ikn iknonomó boon b́ tep'eti. 
\v 16 Han sháánon b́be'etwere, taa t nabiru doo shishi aap'ok'on Ik'o Iyesus Krstos weeron ashuwots ááshon bofints keewats b́ angshit aawotse.
\s Ayhudiyotsnat bo nemon
\p
\v 17 Hamb, nee «Ayhudi taane» etirune, nematse nte'eyiri, Ik'k nwottsosho bogtaana etaat ni'it'iri. 
\v 18 Nee Ik' ettso danfnee, Muse nemo ndantsotse sheeng fino danfnee. 
\v 19 «Nee dogwotsi jishiruwo taane, t'aluwotse faúwotssho sháán taane, 
\v 20 Danawwotssh dano kitsituwe, nanaúwotsno danituwe» níetiri, mank'o, «Muse nemon dano s'eenon detsfe» níetiri, 
\v 21 K'oshuwotsi daniruwo nwotor bére ntooko eegishe daniyo nk'azi? úp'mk'ayere nietiri, nemon úmp'e n úmp'iri, 
\v 22 Wido amk'ayere etirune, nemo wide niamiri, nee Woteraw Ik'uwotsi wic'irune, bo Ik' k'oni moowwotsno fa'o nbiik'iri. 
\v 23 Nee Ik'i nemwotsne n'it'ri, ernmó b́nemman gakat Ik'o ngac'iri. 
\v 24 \x - \xo 2:24 \xo*\xt Isa. 52:5 \xt*\x* Manuwere, «It ayhudiwotsatse tuutson Ik'i shútso Ik' danawu ashuwotsoke c'ashetwe» ett guut'etsok'one.
\p
\v 25 Gof amo arikon neesh b́ sheenget nemo nkotaale, nemo n gaaketka wotiyalmó gof niamo gofo niamawok'owe b́taaweti. 
\v 26 Mansha gof amaaw Ik' ashwoterawwots jiro nemi tzaziyo b́kotetka wotiyal gofo am b́ k'azo gof bíamtsok'o tawetwoshna? 
\v 27 Nee guut'ets nemo detstsonat gof amtso wotar nemo ngakal b́ meetson gof amawo wotar nemo s'eentsiru Ik' ash woteraw jiro níyats angshituwe. 
\v 28 Eshe shúúts mec'ron Ayhudi wottso ari ayhudiyaliye, mank'owere úratse be'eyiru meetson gof amo ari gof amaliyee. 
\v 29 \x - \xo 2:29 \xo*\xt Iwi. 30:6 \xt*\x* Ari Ayhudiwo b́gitsitse Ayhudi wottsoniye, ari gof amonwere Ik'i shayiron S'ayinon wotit nibotse gof amoniye bako nemon guut'etsok'on meetson gof amaliyee. Eshe hannaari asho údo b́dek'et Ik'okna bako ashoknaliye.
\c 3
\s Ayhudiyots amano bok'aztsok'o
\p
\v 1 Beree ayhudiyots Ik' ashwoterawwotsiyere bok'an eegoneya? Gof amo ayhudiwotssh eebi b́ k'aliti? 
\v 2 Arikon Ayhudi woto ay weeron k'anefe, bog keewo Ik'o aap'o ayhudiyotssh adaro bíimtsoniye. 
\v 3 Eshe Ayhudiyotsitsere ik ikuwots amanek wotar daatseyo bok'azal, bo amanetsuwotsi wotbok'azo Ik'o amanek b́ woto ooritúwa? 
\v 4 \x - \xo 3:4 \xo*\xt Dub. 51:4 \xt*\x* B́ jamon oriratse!
\q «N aap'ts aap'atse tuutson arikeewetsoniye nwotiti,
\q2 N mooshorowere angshon da'itune»
\m Ett guut'etsok'on ash jamo kootetso b́ wotiyalor Ik'o arikeewetske.
\p
\v 5 Ernmó no morro Ik' kááwo b́ kitsitka wotiyal eshe eebi no'eteti? Ik'o nomorrosh noon b́seziyal kááwon angshratse eteya b́ wotiti? Hanoke t keewiruwo ashkok'one. 
\v 6 B́ jamon woteratse! hank'o b́wotitkawotiyal Ik'o datsuwats aak'oneya b́ angshiti?
\p
\v 7 Ernmó kootetsi twoto Ik'o ar keewutsi b́woto kitsre, b́mangi ayono kitsitk b́ wotiyal, bere taa morretsok'o tiyats angshet eegoshe? 
\v 8 Ik ik ashuwots «Bére, Sheeng keewo b́weyish gond keewo eege nok'aliyala?» etaat tdaniruwok'o woshdek't taan bo s'aamiyir, mansh mank'owwotsats angshet angsho kááwe.
\s Ash jamo morretsi b́ wottsok'o
\p
\v 9 Bére no ayhudiyots Ik' ash woterawwotsyere k'anefone eteya? Mank'o woteratse! k'osh ash jamo Ayhudi wotowa Ik' ashwoterawwotsi wotowa morretsuwotsi bowottsok'o shin shin kitsre. 
\v 10 Hank'o ett guut'etsok'on,
\q2 «Dab ikonúwor kááwu asho aaliye, ik doonzuwor aaliye,
\q
\v 11 Nibetsonuwere aaliye,
\q2 Ik'onowere geyiruwo ikdonzwor aaliye.
\q
\v 12 \x - \xo 3:10-12 \xo*\xt Dub. 14:1-3; 53:1-3 \xt*\x* Jametsuwotswere weeratse k'az keshrne,
\q2 Ik wotdek't darwutserne.
\q2 Doo fino finiruwo dab ikdoonzuwor aaliye.
\q
\v 13 Bogogo k'eshets dook'oyiye, bo alberonowere antelcerne, bonoon keewi shuwonwere dawnz marziyok'oyiye
\q
\v 14 \x - \xo 3:14 \xo*\xt Dub. 10:7 \xt*\x* Bonoonuwere c'ashonat s'aamon bín s'eenwtskee.
\q
\v 15 Botufo ash úd'osh káárke,
\q
\v 16 Boweeratse daatsetuwere t'afonat dash aanone.
\q
\v 17 \x - \xo 3:15-17 \xo*\xt Isa. 59:7-8 \xt*\x* Jeeni weeronowere danatsne,
\q
\v 18 \x - \xo 3:18 \xo*\xt Dub. 36:1 \xt*\x* Ik'onowere b́ jamon sharaatsne.»
\p
\v 19 \x - \xo 3:19 \xo*\xt Dub. 36:1 \xt*\x* Muse nemi tzaziyo b́ s'iilfo nemmaniyere dashe fa'úwotsi b́wottsok'o danfone, manatse tuutson ashuwots bíyats boweebituwo t'ut't s'k bo etiri, dats jamonuwere Ik'i angshi shirots wotitwe. 
\v 20 Mansha asho konuwor Ik'o shinatse, Muse nemo s'eentson Kasheratse, Nemman b́kitsir ash jamo morretsi b́wotoniye.
\s Kááwu woto b́daatset amanone
\p
\v 21 Andmó Ik'o ashuwotsi kááwu b́ woshit weero nemalon b́ woteraawok'o be'ere, manuwere Muse nemonat nebiyiwots mas'aafotse gawere. 
\v 22 \x - \xo 3:22 \xo*\xt Gel. 2:16 \xt*\x* Mansha eshe Ik'o b́ k'osh k'oshirawon Iyesus Krstosi amanon amaniru jamosh kááwu woto imetuwe. 
\v 23 Ash jamwots morro finernre, Ik'o boosh b́'imts mangonowere t'ut'rnee. 
\v 24 Mansh ashuwots Iyesus Krstos b́ k'alts kashiyi fino Ik'i s'aat mec'ron kááw wotitune. 
\v 25 Ik'o Iyesus Krstosi wosho woshdek't b́ t'ints bín amanitu jamwots b́ s'atson bomorrosh oorowe eto bodatsishee, Ik'o man b́k'al b́k'amoon morr shintso k'azoon ar wotts b́took kááwo kitsoshe. 
\v 26 And dúranatse Ik'o b́ tookon kááwu b́woto b́kitsir Iyesusi amants jamwotsi kááwu woshoshe.
\p
\v 27 Haniyak bín noít'et keewo eebi fa'oni? Eegonor id'atsone! bín no id'awok'o woshitwonúwere eebi? Nemo no s'eenirwosheya? Woteratse, ernmó imneti nemone. 
\v 28 Mansh eshe Ik'i asho kááwu b́ woshit, asho nemi fino b́kaltsosh b́woterawo imnetiyon b́wottsok'o t'iwintsdek'etwone. 
\v 29 Himó Izar Izewer ayhudiwots s'uzshe Ik' b́woti? Izar Izewer Ik'i ash woterawwotsshor bokooshna? Arikon Izar Izewer Ik' ash woterawwotsshor boke. 
\v 30 \x - \xo 3:30 \xo*\xt Iwi. 26:4; Gel. 3:20 \xt*\x* Ik'o ike, ayhudiwotsi wotowa Ik' ash woterawwotsi bo amanere kááwu woshituwo bíne. 
\v 31 Bére, imnetiyatse tuutson nemo gaketuwone eteya? Iya'a, iki nemo kup'ide'erniye nodetsetiye.
\c 4
\s Abraham imnetiyon b́kashtsok'o
\p
\v 1 Eshe meetson nonih wottso Abraham daatsre noetetuwo eebi? 
\v 2 Abraham kááwu b́wot finona wotink'ere, bín b́ it'et keewo daatsiyank'e b́teshi, ernmó Ik'i shinatse it'o falratse. 
\v 3 \x - \xo 4:3 \xo*\xt Aze. 15:6; Gel. 3:6 \xt*\x* S'ayin mas'aafo, «Abarham Ik'on amanere, bíamantsonwere kááwu b́wottsok'o wotatniye bísh b́taaweyi» etfe. 
\v 4 Finiru asho b́ daatsitwo bí angi k'awnts wottsoni bako bísh imet imoniyaliye. 
\v 5 Asho sheeng fino b́t'ut'alor dab́ morretswotsi Kashitwo Izar Izeweri bíamaniyal bíamantso kááw wotar bísh taawetwe. 
\v 6 Dawit b́kaaton Ik'o sheeng finalon kááw b́woshit asho awuk'o derek b́wottsok'o b́ kitsor hank'owe bíeti,
\q
\v 7 \x - \xo 4:7-8 \xo*\xt Dub. 32:1-2 \xt*\x* «Bo daro boosh oorowe eteetsuwotsnat
\q2 Bomorro boosh ipk'reets ashuwots
\q2 Derekne!
\q
\v 8 Doonzo b́morro bíats b́taawurawu asho
\q2 Deereke!»
\p
\v 9 Bére, Dawit b́keewuts deeran gofdamiyetsuwots s'uzsheya? Himó gof damiyerawwotsshe? Gof daamiyerawtsshowere, «Abraham Ik'o bíamanere bíamantsman bísh kááwu wotat b́taaweyi» etrone.
\p
\v 10 Eshe Abrahamsh b́imnetiyo kááwu wotat bísh b́taawe awure? Gofo bíamftse shinemó gofo bíamiyake? Gofo bímfetsere shina bako gofo bíamiyakaliye. 
\v 11 \x - \xo 4:11 \xo*\xt Aze. 17:10 \xt*\x* Abraham gofo bíamfetsere shino b́imnetiyo kááwu wotat b́datsetsok'o kitsosh milikito bísh b́wotituwok'o gofo bí amiye, hanuwere ando gofo boamaawo amanitu jamwots kááwu wotar botaawetuwok'o boosh niho b́wotishe. 
\v 12 Mank'owere Abraham gof amtsuwotsshor nihe, gof amtsuwotssh niho b́wottsonuwere gof boamtso s'uzosh b́woterawo bí gofo bí amfetsere shino b́detsts imnetiyi shuutso sha'iruwotsshe.
\s Ik'i keewtson amano
\p
\v 13 \x - \xo 4:13 \xo*\xt Aze. 17:4-6; 22:17-18; Gel. 3:29 \xt*\x* Abrahamnat b́ naaro datsu b́naatetwok'o Ik'o b́ jangiyi imnetiyon b́daatsts kááwona bako nem kotonaliye. 
\v 14 \x - \xo 4:14 \xo*\xt 3:18 \xt*\x* Ik'o b́jangitsman naatetwots nemo s'eentsde'e kotet ashuwotsi wotiyalma imnetiyo k'awuntso deshatse, b́jangtsonwere k'awntsalke. 
\v 15 Nemo b́dowet Ik'i faye, ernmó nemo bíaalink'e morro berawuk'ee.
\p
\v 16 \x - \xo 4:16 \xo*\xt Gel. 3:7 \xt*\x* Mansh Ik'o b́jangitsman bodaats imnetiyona b́ tesh, Ik' jangitsanwere Abraham naar jamwotssh Ik'oki s'aaton imek b́woto arikee. Manúwere nemo shoydek't sha'iru ashuwots s'uzsh b́woterawo Abrahamkok'o amants jamwotsshe, mank'onowere Abraham noúnetssh nihe 
\v 17 \x - \xo 4:17\xo*\xt Aze. 17:5 \xt*\x* Abraham jangosh, «Ay ashuwots niho neen woshre» ett guut'ere, bí k'irtsuwotsi tuuzituwonat aalo b́ fa'ok'o woshituwo Izar Izeweri bí amantsotsne. 
\v 18 \x - \xo 4:18 \xo*\xt Aze. 15:5 \xt*\x* Abrahamsh n naaro ayider ayituwe ett keewetsok'on ay ashi niho b́wotituwok'o bí amananat b́ jang eegoru jangosh wotit keewo bíalefere. 
\v 19 \x - \xo 4:19 \xo*\xt Aze. 17:17 \xt*\x* B́ idmewo bal natok'o b́teshtsotse b́ meetso b́maawutsotse k'irts ashok'o b́wottsotse shuwo b́falrawonat Sarawwere mahanat gawertsu b́wottsotse shuwo b́falrawok'o b́danaloru b́ imnetiyon maawk woteratse. 
\v 20 B́ imnetiyon kup' wotat Ik'osh manga b́ imi bako Ik'o bísh b́ jangitsatse aman k'azoon b́jamon hakebaka eraatse. 
\v 21 Ik'o b́jangitsonowere s'eentsitwo b́wotok'o b́ maac'i s'eenona bíamnefo b́teshi. 
\v 22 Mansha b́ amantso kááw wotat b́ taaweyi. 
\v 23 Ernmó, «Kááwu wotat bísh taawere» ett guut't aap'etso Abraham s'uzsh b́woterawo 
\v 24 noshorniye, nodoonz Iyesusi k'irotse tuuztso Izar Izeweri amaniruwotssh nooshor no amantso kááwu wotar b́taaweti. 
\v 25 \x - \xo 4:25 \xo*\xt Isa. 53:4-5 \xt*\x* Nodoonz Iyesuswere no morrosha ett k'irosh beshyat b́imeetsonat nonowere kááw woshosh k'irotse tutsoniye.
\c 5
\s Imnetiyon daatset jeenonat manon
\p
\v 1 Eshe no kááw woto nodaats amanon b́ wottsotse no doonz Iyesus Krstosn Ik'onton jeeno detsfone. 
\v 2 And kup'dek'at nodatseyiru s'aatok nokind bín amanon b́wottsotse Ik'o noosh b́jangits b́ mango kayitwotsi nowottsosh mann it'irwone. 
\v 3 Hanmec'ron b́woterawo gond bek'o k'amo noosh b́daatsitwok'o nodantsotse noo gond bek'on it'iruwone. 
\v 4 K'amotsnowere fadeyar kup'o, kup'otsnowere jangiyetso daatsetwe. 
\v 5 Noosh imets S'ayin shayri weeron Ik'i shuno nonibotse b́ s'eentstsotse b́ jangitso noon jitsiratse.
\p
\v 6 Maawk wotat nobefere Ik'o bíetts aawon Krstos morretswotssha ett b́k'iri. 
\v 7 Kááw ash shegro wotar k'irit asho daatso ayide'er kic'ike, b́woteferor doo ash shegro kirosh daneraka daatso faletuwe. 
\v 8 Ernmó noo morretswotsi wotat nofa'e noshegro Krstos k'irre, manuwere Ik'o noosh b́detsts shuno awuk'o een b́wottsoniye b́kitsiri. 
\v 9 No kááwutso Iyesus Krstos s'atsona wotiyal ikibogshr Ik'i fayotse no kashit b́weerone. 
\v 10 Noo Ik'o balangarwotsi wotat nobefere b́naay k'iron Ik'onton no manerone, and Ik'onton nomaneyakon b́ naay kashi weeron iki bogo kashituwone. 
\v 11 Han mec'ronaliye, Ik'onton mano bín nodatstso nodoonz Iyesus Krstos weeron Ik'on ít'irwone.
\s K'iro Adamn, kasho Krstosne
\p
\v 12 \x - \xo 5:12 \xo*\xt Aze. 3:6 \xt*\x* Ik ashaatse tuutson morro datsuwats b́weyi, morratse tuutsonowere k'iro b́weyi, mank'owere ash jamo morro b́fintsotse ash jamats k'iro b́weyi, 
\v 13 Muse nemo b́ imftsere shin morro datsuwatse fa'e b́teshi, ernmó nemo bíaltsoke morro b́ tookon morrok'o taaweratse b́ teshi. 
\v 14 B́ wotiyaloru Adamkok'o nematse beshat morro finerawotsworu dab bo'orerawo k'iro Adamatse tuut Muse ats b́ borfetso ash jamatse alo b́ daatsi, Adamwere shinomaants weetu Krstossh bí aroniye.
\p
\v 15 Ernmó Ik'o b́ s'aati imo ash morronton nuutsaliye, ik ash morri jangon aywots bo k'irtsok'o mank'o Ik' s'aatonat ik asho Iyesus Krstos weeron daatsets s'aaton imetso ayuwotssh bogshdek't imere. 
\v 16 Mank'owere Ik'o beenon b́doots imo s'aati oot'o ash iko morro b́doots oot'ok'oyiyaliye. Ash iko morratse tuutson imetso angsho b́doyi, ay morratse tuutson imets imo kááwe wot b́dowi. 
\v 17 Ash iko morratse tuutson k'iro ash jamatse alo b́detsiyakon bére Ik'i ay s'aatonat beenon imetso s'aat bín kashitu ash jamwots Iyesus Krstos weeron kashon naashitune.
\p
\v 18 Eshe Adam iks'uzo morri fayi angsho ash jamats b́dootsok'o mank'o Krstos ikoko kashi fino ayuwotsi fayotse kishr kasho imetwe. 
\v 19 Ash iko aleyo b́k'aztsatse tuutson ayuwots morretswotsi bowottsok'o mank'o ash iko bíaletsatse tuutson ayuwots kááwitune. 
\v 20 Morro bíayitsotse nemo b́weyi, ernmó morro bíaytsok'on Ik'i s'aato iki bogsht bíayi. 
\v 21 Man b́wowwere k'iratse tuutson morro b́naashtsok'o mank'o ando aani nodoonz Iyesus Krstos weeron dúre dúri kasho b́ daatseyish Ik'i s'aato kasho imon naashituwe.
\c 6
\s K'iratse k'aleyok'o morratse galeyar Krstosn beewo
\p
\v 1 Eshe eebi noeteti? Ik' s'aato bí ayituwok'o morrats kup'ar beyonowa? 
\v 2 Woteratse! no k'iron galetsok'o morratse galetswotsi wotefetsr aawk'oneya morratse kup'ar nobeeti? 
\v 3 Krstos Iyesusnton ik wotosh gupets jamwots, b́ k'irono kaytswotsi wotosh, no guupetsok'o danatsteya? 
\v 4 \x - \xo 6:4 \xo*\xt K'ol. 2:12 \xt*\x* Gupon bínton noduukeyor b́k'ironowere kaytsuwotsi woterone, mansh Krstos Niho mangon k'irotse b́ tuutsok'o noowere handr beyon beetuwone.
\p
\v 5 B́ k'iron bínton ik nowottsok'o k'irotse b́tuwon bínton ik wotituwone. 
\v 6 No ats morretso no atse b́tuwituwok'o morrosh guuts nowoto b́ oritwok'o no ats nato Krstosnton jitetsok'o danfone. 
\v 7 K'irts asho morrosh kewewotse nas'o keshre. 
\v 8 Eshe Krstosnton nok'iriyakon bínton kashon nobetuwok'o amanituwone, 
\v 9 Krstos k'irotse b́tuutsi jangosh gitlo b́ k'irawok'onat k'ironuwere bíyatse alo b́deshawok'o danfone. 
\v 10 K'iroone b́jamon iknoto morrosh k'irre, kashon b́beyonmó Ik'oshe b́beyiri. 
\v 11 Mank'o it k'iron k'alwok'o k'alewon morratse it k'aletsok'o Krstos Iyesus weeron Ik'osh kashon itbeyirwok'o taawwere.
\p
\v 12 Mansh morro it ats k'iritwatse alo b́detsetwok'onat it meets tewnosh keewetswotsi itn b́woshitwok'o eekk'ayere. 
\v 13 Mank'o it atsi kayuwotsi gondosh k'ac'o woshder morrosh kewik'ayere, ernmó k'irotse tuwat kashetswotsi it wottsok'o woshde'er it tooko Ik'osh t'intsuwere, it atsi kay jamwotsi kááwu finosh k'ac'o woshde'er Ik'osh kewiwere. 
\v 14 And it beyir s'aatoniyere dasha bako nemoniyere dash wot b́k'aztsotse morro itn b́ keewo geyiratse.
\s Kashi finosh guuts woto
\p
\v 15 Eshe eege no eteti? Nemoniyere dash nowoto b́ oorere s'aatoniyere dash wotar morro finone eteya? B́jamon woteratse! 
\v 16 Bísh alewosh guutswotsi wotosh it tooko bísh it t'iintsiruwosh, bísh it aleyirwosh b́guutsuwotsi it wottsok'o danatsteya? K'irosh morri guutswotsi wee kááwwotosh aleyi guutswots itne. 
\v 17 Itiye shin morrosh guutse it teshi, andmó itsh imets danosh it nibon itazazetsotse Ik'osh údo wotowe. 
\v 18 Morrosh guuts wototse nas'o keshat kááawu woti guutswotsi woterte. 
\v 19 Taa hank'o ashosh b́wotit noon keew keewon tkeewir ash azeyon maawuk it wottsatsne. Shin shin it atsi kay kayuwotsi bokiimish weeri gondonat nemalon beyosh guutswotsi woshdek'at it t'intstsok'o andoor itatsi kayuwots bo S'ayinetwok'o kááw wotosh guutswotsi woshde'er t'intswere.
\p
\v 20 Morrosh guutso itteshor kááwo fino finosh kic'erak itne b́teshi. 
\v 21 Bére, manoor eebi it daatsi? And iti b́ jitsiyiruwoniyere okoon eegor daatsatste, keewhan b́ s'uwo k'ire. 
\v 22 Andmó morri guuts wototse nas'o keshat Ik'o guutsuwotsi itwottsotse S'ayin woto daatsitute, weeronwere b́s'uwatse dúre dúri kashe. 
\v 23 Morrotse daatset k'awuntso k'ire, Ik'oke imet imonmó nodoonz Iyesus Krstosn daatset dúre dúri kashoniye.
\c 7
\s Nematse S'ayin woti jango
\p
\v 1 Tieshuwotso! han danatsteya? Tkeewir nemo dants ashuwotsshe, nemo ashaatse alo b́ detset asho kashon b́befetso s'uziye. 
\v 2 Aab s'iilere mááts amts máátsu b́kenih kashon b́befetsosh bínton nemon tipekiye, bkenih b́k'iriyalmó btipets nemotse s'aynat keshraniye. 
\v 3 Mansh bkenih kashon b́befere k'osh kenihosh máátso bi amal widetsuniye bish eteti. Bkenih b́k'iryalmó bínton btipets nemotse nas'o keshetuwane, k'osh kenihosh máátso biamalor widetsuni eteeratse. 
\v 4 Ti eshuwotso! it keewonuwere hank'oyiye, it Krstos atsi kaywotsi it wottsotse k'iron k'alewok'o k'alewon nematse k'alerte, mansh Ik'i finon shuwo noshuwitwok'o k'osho k'irotse tuutsosh b́ jirwotsi woterte. 
\v 5 Meets shunon ananat noteshor nemon tuwiru morri tewuno k'irosh shuwo noshuwish noatsi kayutsitse finefe b́teshi. 
\v 6 Andmó noon tipdek' teshts nemo k'iron galetsok'o no'atse b́ galetsotse nemi tipotse keshrone, mansh haniyere oki bísh nofinit handr shayiri jishona bako shin guut'etsnat wotts nemi jishonaliye.
\p
\v 7 \x - \xo 7:7 \xo*\xt Kesh. 20:17; Iwi. 5:21 \xt*\x* Eshe eebi no eteti? Nemo b́tookon morreya? woteratse! ernmó morro eeg b́ wotok'o nodanish woshtso nemoniye. Nemo «Tewunk'aye» eto b́k'azik'e tewuno eeg b́wotok'o danawuk'e b́teshi. 
\v 8 Morro nemoke waats tzaziyon gowo daatsdek't jam naari tewuno ti'atsotse b́tuwitwok'o b́woshi. Nemo bíalink'ermó morro k'irke. 
\v 9 Shinon nemo bí aalor taa kashone tbeefoni, nemi tzaziyo b́ watsok'onmó taa tk'irre morro kasho b́daatsi. 
\v 10 Kashosh imetso nemi tzaziyo tiats k'iro b́doy. 
\v 11 \x - \xo 7:11 \xo*\xt Aze. 3:13 \xt*\x* Morro nemi tzaziyo weeb woshdk't taan b́ ant'elci, tzaziyanatse tuutsonowere taan b́úd'i.
\p
\v 12 Mansh nemo S'ayine, tzaziyonuwere S'ayinona, k'ááwonat sheenge. 
\v 13 Bére sheeng wotts keewan tiats k'iro dek'waare eteya? Iya'a! ernmó morro, morr wotar b́be'etuwok'o sheeng keewatse tuutson k'iro tiats dek'b́weyi, mansha morro tzaziyatse tuutson iki bog morretso b́woti.
\s Ash bewoots fa'a maak'oro
\p
\v 14 Nemo shayiri weero b́wottsok'o danfone. Taamó morri guutso wotosh kemeets meetsik taane. 
\v 15 \x - \xo 7:15 \xo*\xt Gel. 5:17 \xt*\x* Taa t k'aliruwo danatse, t shunts keewo k'alo k'azat tshit'ts keewo k'alirwe. 
\v 16 Eshe taa t k'alir tshunaaw keewoni wotiyal nemo sheeng b́wottsok'o gawituwe. 
\v 17 K'alo tgeeraw keewo k'aliruwo tiatsotse fa'a morroni bako taanaliye. 
\v 18 Tigitsotse wee tmeets doyotse eegor sheeng keewo k'alosh falaatsetsee. 
\v 19 K'alosh tgeyiru sheeng keewo k'alratse, ernmó tgeerawu gond keewoniye tk'aliri. 
\v 20 K'alosh t geerawu gond keewoni tk'aliri wotiyal han k'aliruwo tgitsotse fa'o morroni bako taanaliye etee.
\p
\v 21 Eshe nemo finats b́jine bek'etuwe, sheeng keewo tgeefere gond keewo tik'altwok'o taan b́woshiri 
\v 22 Tgitsi atson Ik'i nemon geneúwituwe. 
\v 23 Wotowa eree nibots nemonton k'efefetst ti'atsotsi kayuwotsitse finiru morri nemosh tipetso taan woshiru k'osho azeewon taan jeep'iruwo ti atsi kayuwotsitse b́ beyok'o bek'iruwe. 
\v 24 Aawuk'o woteraw ash taane! k'iritu tiatsanowere kone taan kashiti? 
\v 25 No doonz Iyesus Krstos weeron Ik'osh údo wotowe!
\p Eshe taa tnibotse, Ik'i nemosh keewetso wotat t meets doyon morri nemosh keewetso wotere.
\c 8
\s S'ayn shayiron jisheyar beewo
\p
\v 1 Mansh Iyesus Krstosn beeyruwots and boats angshetuwo deshatsno. 
\v 2 Iyesus Krstosn datsetuwo kash imetu S'ayn shayri nemo, morronat k'ir dowet nemotse nas'o taan kishre. 
\v 3 Ash doyo maawk b́ wottsatse tuutson nemo s'eentsosh b́ falawo Ik'o k'alre, b́took na'onowere morrets meets aron morri jangosh woshat b́ meetson morro angshon ok b́ bazi. 
\v 4 Man b́k'aluwere meets shunon b́ woterawo no'atsitsi Shayiri shuntsok'on ananiruwotsats noats nemi tzaziy ariko bí b́s'eentsitwok'owe. 
\v 5 Meets shunon beyiruwotsi meets keewo, Shayiri shunok'on beyiruwotsmó Shayiri keewe bogawiri. 
\v 6 Meets keewu gawo k'ire b́ doweti, Shayiri gawirúwok'on wotoonmó kashonat jeenone b́imeeti. 
\v 7 Meets keew gawo Ik'oke shit'eek b́wottstse Ik'i nemosh bíalerawotse, kewewono maawre, 
\v 8 Meets keewosh kéweyirwots Ik'o geneúsho falatsne.
\p
\v 9 Itmó Ik' S'ayn shayiro ititse beyiruwe wotiyal Shayiri shúnona bako meets shunon beeratste, Krstos Shayiro deshaw ashonúwere Krstos jiraliye. 
\v 10 Krstos itits b́ wotiyal it meetso morri jangon k'irk b́ wotiyaloru Ik'o itn b́ káátstsotse it shayiro beyar beetke. 
\v 11 \x - \xo 8:11 \xo*\xt 1 K'or. 3:16 \xt*\x* Iyesusi k'irotse tizts Ik' Shayiro ititse b́beyal, Iyesus Krstosi k'irotse tiztso Izar Izewer it gitsitse beyiru shayiri weeron k'iritk wotts it meetsosh kasho imetuwe.
\p
\v 12 Eshe t eshuwotso! no kashosh kup'o noosh geyife, ernmó noo beyon meets shunok'on beyo noosh geyiratse. 
\v 13 Meets shunok'on it beyal k'iritute, ernmó S'ayn Shayiri angon it meets fino it úd'iyal kashon beetute. 
\v 14 Ik' Shayiron jisheyru jamwots Ik' nanaúwotsiye. 
\v 15 \x - \xo 8:15 \xo*\xt Mar. 14:36; Gel. 4:6 \xt*\x* Mansh «Niho! no nihono!» etaat it s'eegirwo na'ok'o woti Shayiro it dek'i bako shatoon beyosh aani guuts woti Shayiro de'atste. 
\v 16 Ik' Shayiro no Shayironton wotar Ik' nanaúwotsi nowottsok'o noosh gawituwe. 
\v 17 \x - \xo 8:15-17 \xo*\xt 4:5-7 \xt*\x* Eshe Ik' nanaúwotsi nowotiyakon bín naatetuwots noone, Krstosntonuwere naatetuwone, andowere Krstos gond bek'o kaytsuwotsi nowotiyal maniyere okoon b́ mango kayituwotsi wotituwone.
\s Weet mango
\p
\v 18 And gond bek'an shinomaants noosh be'et mangonton b́ taatseyal eegonoru talosh b́ falawok'o woshde tawituwe. 
\v 19 Azets jamo Ik' nanaúwots be'ewo een tewunone b́kotiri. 
\v 20 \x - \xo 8:20 \xo*\xt Aze. 3:17-19 \xt*\x* Azets jamo k'awunts deshawosh kewewtsere, manwere b́ took shunon b́ woterawo jangde'er b́ kotetwok'o woshts Ik' shunone. 
\v 21 Jangiyetsonwere azeetso b́tookon t'afi guuts wototse nas'o kesht Ik'i nana'úwotsnton s'ayinonat mang kayituwo b́wotituwok'oyiye. 
\v 22 Azets jamó ik wotat hambetsish b́borfetso na'a it'i kic'on detseyat kash k'as'oke b́beyiruwok'o danfone. 
\v 23 \x - \xo 8:23 \xo*\xt 2 K'or. 5:2-4 \xt*\x* Ernmó gúútoke fa'o azeetso s'uziyaliye, S'ayin shayir shintso imets dek'tsuwots noworu no atsi shegr wottso Ik'o nana'ok'o woto kotfetsat nogitsitsi atson gúútoke nofa'oni, 
\v 24 No noworiye jangiyetsanne. Ernmó no no jangiru keewo be'etka wotiyal jangeet keewo b́woto oorituwe, be'eyiruwonere kone jangiti? 
\v 25 Nobe'aawu keewo nojangiyalmó k'amoon kotetuwone.
\p
\v 26 Mank'owere awuk'o Ik'o k'ono noon b́geiyitsok'o nodanaawotse S'ayin shayiro nomaawóko noon tep'etuwe, noonon kish keewo falerawo gúúton noosh Ik'o b́k'oniri. 
\v 27 Ash nibo shuu'at s'iliruwo Izar Izewer S'ayin shayiri asaabiyo eeg b́wottsok'o danfee, S'ayin shayiro amantsuwots jangosh Ik'o b́ k'onir Ik'i shuntsok'one.
\p
\v 28 Ik'o shuntswotsnat b́shuntsok'onowere s'eegets ashuwots Ik'o jam keewo sheengosh boosh b́k'alituwok'o danfone. 
\v 29 Shin b́dantsuwots b́ naayi araar b́ na'onúwere eshu ayuwotsitse k'aab b́wotituwok'o Ik'o shino wotituwe bíettsotsne. 
\v 30 Shino wotitune bíettsuwotsi b́s'eegi, b́s'eegtswotsnowere kááwu b́woshi, kááwu b́ woshtsuwotsnowere b́ mangiyi.
\s Ik'i shuno
\p
\v 31 Eshe keewan jangosh eege noeteti? Ik'o noonton b́wotitka wotiyal kone noon k'efo faliti?
\p
\v 32 Ik'o b́ naay ik s'uzosh maac'o b́k'ewerawo noosha ett bíimiyakon b́ naaynton jamkeewo beenon aawuk'oneya noosh ímo b́k'azeti? 
\v 33 Ik'o galb'dek'tsuwotsi kone s'aamituwoni? Boon kááwwotsi woshituwo bíne. 
\v 34 Kone angshituwoni? Bí noshegro k'irre, k'irotse tuut Ik'o niho k'ani aaromants beedek'tso, nooshowere Ik'o k'onirwo Krstos Iyesusiye. 
\v 35 Krstos shunatse noon k'álo falituwo kone? Kic'eemó, gondbek'e? Gishee himó k'ak'e? Himó araats wote, t'up'ertawemó? Shike? 
\v 36 \x - \xo 8:36 \xo*\xt Dub. 44:22 \xt*\x* Hanwere
\q «N jangosh aaw jamó noone úd'eyiri,
\q2 Shukeyiru mereerwotskok'o taa weerone»
\m Ett guut'etsok'one. 
\v 37 Eshe noon shuntson bín keew jamanotsida'adek'on da'atswotsiyere bogfone. 
\v 38 Mansh k'iro b́wotiyalor, kasho b́wotiyalor, melakiwotsi bowotiyalor, naashuwotsnor bowotiyal, andfa'o b́wotiyalor, shutsi weetuwo b́wotiyalor, kup'uwotsi bowotiyalor 
\v 39 Danbaan tuuka wotiyalor, dashaanowere gop'awotiyalor, kon naaro wotowa azeetso wotiyal no doonz Iyesus Krstosn nodaatsts Ik'i shunotse noon k'álosh falituwo eegonwor biaalok'owo arikon dandek'roone.
\c 9
\s Ik'o Israe'el ashuwotsi b́marat'tsok'o
\p
\v 1 Krstosn arikoniye t keewiri, kooratse, S'ayn shayiron t nibonúwere tkorawok'o taash gawirwe. 
\v 2 Een shiyanonat k'ut'eraw kic'on t nibotse fa'ee, 
\v 3 Meetson t jag wotts tjiruwotssha err taa Krstosatse k'aleyar Ik' c'asho tiyats b́bodink'e shunfee b́teshi. 
\v 4 \x - \xo 9:4 \xo*\xt Kesh. 9:4 \xt*\x* Boye Israe'el ashuwotsiye, na'ok'o wotonat mangi wuliyo nemono b́imi, aron Ik'o bo ik'itywok'ono b́kitsi, b́ jangits keewo bíimi. 
\v 5 Amants nihwotswere bokne, Krstos meetson b́wáá bo naarotsne, bíye jamoniyere dambe. Bíwere dúre dúrosh deeretso Izar Izeweriye. Amen!
\p
\v 6 Wotowa eree Ik' aap'tso wonere etaliye, Israe'el naar jamwots ari Israe'el ashnaliye. 
\v 7 \x - \xo 9:7 \xo*\xt Aze. 21:12 \xt*\x* Mank'o Abraham naar jamo Abraham nanaúwotsiye etaliye. Ik'o Abrahamsh «N naaro b́ keshetiye Yisak'ne» bíettsoshe, 
\v 8 Mansh meetson shuwetswots Ik' nanaúwotsiyaliye, ernmó naaro wotar taawetuwots Ik'o Abrahamsh b́jangitsok'on shuwetswots s'uziye. 
\v 9 \x - \xo 9:9 \xo*\xt Aze. 18:10 \xt*\x* Hanuwere Ik'o b́jangits aap'otse «Hambets naton hank'o aawon weetuwe, Sara nungush na'o shuwitwane» etke b́teshi.
\p
\v 10 Man mec'ro b́ woterawo Rbk'aa naruwotssh niho wottsosh Yisak'sh nungush nana'a maatúwotsi b maac'ro, 
\v 11 Ik'i marat' marat'o finon b́woterawo b́s'eegon b́woto kitsosh git nan'úwots boshuwewonat gondonowere sheengonowere bok'aloniyere shino 
\v 12 \x - \xo 9:12 \xo*\xt Aze. 25:23 \xt*\x* Ik'o Rbk'ash «Eenfo múk'efosh keewek wotituwe» bí eti. 
\v 13 \x - \xo 9:13 \xo*\xt Mil. 1:2-3 \xt*\x* Manúwere «Yak'obi shunre Esawunmó shit're» ett guut'etsok'one.
\p
\v 14 Eshe eege noeteti? Ik'o boga bogshirwe eronowa? B́jamon mank'o woteratse! 
\v 15 \x - \xo 9:15 \xo*\xt Kesh. 33:19 \xt*\x* Ik'oniye Musesh «Bísh doosh tgeyruwosh doowituwe, bísh maac' k'ewo tgeyiruwoshowere maac'o k'ewituwe» etre. 
\v 16 Eshe Ik'i marat'o b́daatset ash shunonat ash finon b́woterawo Ik' dowon b́wottsatsne. 
\v 17 \x - \xo 9:17 \xo*\xt Kesh. 9:16 \xt*\x* Manatse tuutson S'ayin mas'aafotse Gbs' nugúsosh «Neen tiango kitsr tshútsonowere dats jamatse b́daneetuwok'o woshosh neen naashiyire» ett aap'etso guut'ere. 
\v 18 Mansh eshe Ik'o b́shuntsosh maac'o k'ewefe, b́shuntsonowere k'el kúp'etso woshituwe.
\p
\v 19 Eshe «Ik'i shunts keewo k'efosh konuwor falratse, béré bí ashuwots bo shuntso bo fintsosh eegishe boon b́ b́s'aamiyiri» err taan aato falfete. 
\v 20 \x - \xo 9:20 \xo*\xt Isa. 29:16; 45:9 \xt*\x* Nee ashono! Ik'onton mooshosh eegoneya nfali? Shalon dozets k'ac'o bín dooztsosh «Eegishe hank'o kaldek'at taan ndoozi?» etosh falituwa? 
\v 21 Eshe shal wozirwo iknaari shali tok'ootse k'ac iko mangosh, k'oshonowere ketts finosh woshde wozosh alo deshatsá?
\p
\v 22 Ik'o b́fayo kitsosho bíangonowere bek'shosh geeyat t'afiyosh k'antsuwotsi fayi k'ac'uwotsi ayoto k'amare wotiyal eendani? 
\v 23 Han b́ k'aluwere shin mangosh b́k'anitso sheeng b́woto dek'ets k'ac'uwotssh b́mangi ayo kitsoshe. 
\v 24 Sheeng b́ woto dek'ets k'ac'uwotsnmó ayhudiwots mec'rotse b́woterawon Ik'i ash woterawwotsitsnowere noon s'eegree. 
\v 25 \x - \xo 9:25 \xo*\xt Hos. 2:23 \xt*\x* Hanwere nebiyiyo Hose'n hank'o eteetsok'one,
\q «Tiash teyawuwotsne ‹Tiashuwotsi› err s'eegetuwe,
\q2 Shuneerawu ashuwotsnowere ‹Shuneeka› err s'eegetuwe,
\q
\v 26 Itiye ‹Tiashuwots itnaaliye› eteets beyokoke
\q2 ‹Beyat beets Ik'o nanaúwotsi› err boon s'eegetuwe.»
\p
\v 27 Isayasuwere Israe'el jangosh hank'o eton b́ k'ááro eenshdek'tine b́keewi, «Isra'el nanaúwots taawo aats k'aritsi shiyok'o dab bíayiyaloru boyitse kashituwots múk'nee. 
\v 28 \x - \xo 9:27-28 \xo*\xt Isa. 10:22-23 \xt*\x* Doonzo b́ ja'arawo kááronat s'eenon bí angsho imetwe.» 
\v 29 \x - \xo 9:29 \xo*\xt Isa. 1:9 \xt*\x* Mank'owere Isayas «Dari jirwotssh doonzo shooko noosh oriyo b́k'azink'ere
\q1 Sedom kituk'o wotiyank'one b́teshi
\q2 Gemor kitukok'o wotiyank'one b́teshi»
\m ett shin shin keewure.
\p
\v 30 Eshe eege no keewiti? Kááwi weero sha'erawu Ik'i ash woterawwots kááw woto bodaatsi, kááwo wotonwere amanar daatsetuwoniye. 
\v 31 Ernmó kááw woto daatsit nemo shuuts sha'at teshts Isra'elots, nemo s'eentsosh bomawutsotse kááwok boratsne. 
\v 32 «Eegoshe kááwok bodobok'azi?» eteyala bo kááw wottso daatsosh boge amanon b́woterawon finon b́wottsotsne, manshe t'ugwotsn bo k'is'eyi. 
\v 33 Manuwere
\q «Hambe! ashuwotsi k'is'iru shútso S'iyonits beezree,
\q2 Shútsanuwere ashuwotsi k'ic'de'er dikitu s'aloniye,
\q Bín amanituwonmó jiitsratse»
\m ett guut'etsok'one.
\c 10
\s Esra'el ashuwots Ik' weerindon sha'o bok'aztsok'o
\p
\v 1 Ti eshuwotso! t maac'otse beyiru een tewunonat Ik'o maants t t'intsiru k'onon Israe'el ashuwots bokashituwok'owe. 
\v 2 Ari danon woto b́ k'aztsosha bako bo Ik'osh okooro bo detstsok'osh taa boosh gawituwe. 
\v 3 Ik'o ashuwotsi kááw b́ woshit weerindo bodartsotse bo took kááw weerona bosha'i bako Ik' kááw weeron sha'eratsnee. 
\v 4 Ash jamo imnetiyon kááwo b́ wotish nemi s'uwo Krstosiye.
\p
\v 5 \x - \xo 10:5 \xo*\xt Lew. 18:5 \xt*\x* Nem kotón daatset kááw woto Muse b́ guut'tso «Nemo fenats jitsiru jamo kashon beetuwe» etiruwoniye. 
\v 6 Ik'o ashuwotsi imnetiyon kááw b́ woshtsok'onomó hank'o ett guut'ere, «N nibon daro maants kone kesheti?» etk'aye, hanúwere Krstosi orshoshe, 
\v 7 Wee n nibon «Si'olits kone ot'eti?» etk'aye, hanúwere Krstosi k'irotse tizoshe.
\p
\v 8 \x - \xo 10:6-8 \xo*\xt Iwi. 30:12-14 \xt*\x* Dabtnu hank'o ett guut'ere, «Ik' aap'tso n ganoke, dab nnononat n maac'otse,» keewanúwere no nokeewiiru imneti aap'oniye.
\p
\v 9 Iyesus doonz b́wotok'o nnonon ngawiyal, Ik'o k'irotse bín b́tiztsok'o n maac'on niamaniyal kashitune. 
\v 10 Asho b́ maac'on amanar kááwituwe, b́nonon b́ gawiyal kashituwe, 
\v 11 \x - \xo 10:11 \xo*\xt Isa. 28:16 \xt*\x* S'ayn mas'aafotse guut'etsok'on, «Bín amants jamo jitseratse.» 
\v 12 \x - \xo 10:13 \xo*\xt Iyu. 2:32 \xt*\x* Eshe ikosh doonz wottso jamosho doonz b́wottsosh ayhudiyonat ayhudiy woteraw dagotse eegoru k'osh k'osheyo aaliye, bín k'oniru jamosh b́s'aato ayide'er imetuwe, 
\v 13 \x - \xo 10:13 \xo*\xt Iyu. 2:32 \xt*\x* «Doonzo shúúts s'eegiru jamo kashituwe» eteere.
\p
\v 14 Ernmó bo amaneraniyere aawuk'oneya s'eegosh bofaliti? B́ jango booshiyaniyere aawuk'oneya bo amaniti? Nabirwo alonomó aawuk'oneya shishosh bo faliti? 
\v 15 \x - \xo 10:15 \xo*\xt Isa. 52:7 \xt*\x* Nabirwotsi wosheerawonomó aawuk'oneya nabosh bo faliti? Hanuwere, «Doo keewuman shishituwots wáá woo awuk'owe b́geneúshiti!» ett guut'etsok'one. 
\v 16 \x - \xo 10:16 \xo*\xt Isa. 53:1 \xt*\x* Ernmó Isayas, «Doonzono! no no aap'tso kone amani» ett b́ keewtsok'o, jamwots doo shishiy keewo de'atsne. 
\v 17 Eshe imnetiyo b́ daatset k'ebokne, k'ebetuwonúwere Ik'i aap'otsoniye. 
\v 18 \x - \xo 10:18 \xo*\xt Dub. 19:4 \xt*\x* Aab aatuna, eshe, b́ keewts keewo shiyatsno eteya? S'ayin mas'aafotse,
\q «Bo k'aro dats jamats b́shiyeyi,
\q2 Bo aap'ts aap'onuwere dats daarats b́ bodi»
\m ett guut'etsok'on, arikon shishrne. 
\v 19 \x - \xo 10:19 \xo*\xt Iwi. 32:21 \xt*\x* Israe'el ashuwots b́ aap'tso danatsno eteya? Han eterawok'o Muse shinon
\q «Gac'ets ash ashon okoriyat itn tgoyni,
\q2 T'iwitsrawu ash ashon itn tfayi» eteere.
\q
\v 20 \x - \xo 10:20 \xo*\xt Isa. 65:1 \xt*\x* Isayasuwere,
\q «Taan geerawwotssh tdatseyi,
\q2 ‹Ik'o aawoke?› ett
\q2 Taan aatrawwotssh tbe'eyi,»
\m ett ááwushúk'on keewure. 
\v 21 \x - \xo 10:21 \xo*\xt Isa. 65:2 \xt*\x* Israe'el ashuwotsshomó «Azazerawonat gond ashuwots tmaants boweetwok'o aawu jamo tkishuwotsi t jargi» etre.
\c 11
\s Ik'o Israe'el ashuwotsi b́jamon juu b́k'aztsok'o
\p
\v 1 \x - \xo 11:1 \xo*\xt Filp. 3:5 \xt*\x* Aab́ dab neen aatuna, Ik'o bí ashuwotsi juuwera? B́ jamon juweratse! taa ttookon Israe'el ash taane, Abraham naaro wotat Bíniyam jirots taane. 
\v 2 Ik'o shini b́ marat'ts ashuwotsi juweratse, S'ayn mas'aafo Eliyas jangosh eeg bíettsok'o gawatsteya? Dab Eliyas Israe'el ashuwotsi Ik' shinatse awuk'o ett b́ s'aamitsok'o danatsteya? 
\v 3 \x - \xo 11:3 \xo*\xt 1 Naash. 19:10; 14 \xt*\x* Manoor Eliyas «Doonzono! nebiyiwotsi úd'rne wosh t'intseyiru t'arap'ezono gaakrne, ts'uziye oori, taano úd'oshe bogeyiri» etre b́ teshi. 
\v 4 Ernmó Ik'o eega ettniya bísh bíaani? «Ba'ali eteets dozets ik'osh tuk'umalerawo shawat kúm ashuwotsi ttokish ooridek're» etre bísha. 
\v 5 And dúranatse b́wotsiyal, s'aaton marat'ere ortsuwots muk' Israe'el ashuwots fa'ane. 
\v 6 Marat'onwere s'aaton b́ wotiyal finonaliye etee, finon b́ wotiyal, s'aato s'aat b́ woto orerere etee.
\p
\v 7 Eahe b́ k'awuntso eebi b́wotiti? Esra'el ashuwots bogetso datsatsno, marat'etswotsmó bo geyiruwo daatsrne, oortsuwotsmó bo maac'o bokup'i. 
\v 8 \x - \xo 11:8 \xo*\xt Iwi. 29:4; Isa. 29:10 \xt*\x* Hanuwere «Ik'o bo nibo b́ dúngiyi, mansh eshe hambetsish b́ borfetso bo ááwo be'atse, boowazonuwere shiyatse» ett guut'etsok'one. 
\v 9 Dawitwere,
\q «Bomishi maronu detset kambo,
\q2 dikit gop'o wotar boon kic'ituwe!
\q2 bofiniru gond fino botokats boree!
\q
\v 10 Bo ááwo b́ be'awok'o t'aluwowe,
\q2 bojik'o gond bek'on jam aawo k'urowe» etre.
\p
\v 11 Aab́ aani neen aatuna, ayhudiyots bodihi aani boturawok'o wotatniya? Mank'owaliye! ernmó ayhudiyots gondo bo fintsi jangosh Ayhudi woterawwots kasho bodaatsi, han b́wotiye ayhudiyots Ayhudi woterawwotsi bo ookoritwok'o woshoshe. 
\v 12 Ayhudiyots gond fino dats jamosh deero datsire, bodiho Ik' ash woterawotssh deero wotere, Ayhudi jamwots bookashink'ee deero awuk'o aye b́wotiyank'oni!
\s Ik' ash woterawwots bokashitwok'o
\p
\v 13 And nokeewir itsh Ik' ash woterawwotsshe, Ik' ash woterawwotssh wosheetso twottsok'osh t finosh mango taash shiyeetuwe, 
\v 14 T meets jag wotts ayhudiwotsi okooriyoshe, mank'onowere daneraka ik ikuwotsi kashiyo falituwe etee. 
\v 15 Ik'o boon b́ juwoor datsatsi ash k'oshuwots Ik'onton b́ manetka wotiyal Ik'o boon b́ dek'or eeg b́wotituwok'o arefa? Haniyere k'irotse tuwok'oyi etee!
\p
\v 16 Ik naari boot'otse shintsotsi kayo S'ayinka wotiyal boot' jamo S'ayinkee b́ wotiti, mank'o mit iko b́s'ap'o S'ayina wotiyal b́ jabwotswere S'ayine bowotiti. 
\v 17 Worfitsi woyra eteyiru mit jaabo wotts ayhudiyots k'ut'eyar bodihitka wotiyal it boditsi woyiriy mit jaabo wotts Ik' ash woterawwots bo shegro shááto shegrshr weyiri zeyito bítse b́keshiru s'ap'ootse keshiru gaalonat deeron kaytsuwotsi itwotiyakon, b́ jaabwotsats ít'k'ayere. 
\v 18 It Ik' ash woterawotso jaabwotsats ít'k'ayere, it it'alomó it jaab mec'ro it wottsosh s'ap'oni itn kuriti bako it b́ s'ap'o kurirwotsi itwoterawok'o dande'ere.
\p
\v 19 Ernmó «Jabúwots tishat bodihi, taa bo beyok tikinditwok'o» etaatne b́ teshi. 
\v 20 It ettso aree, ernmó bo k'ut'at bojuwe amano bok'aztsosh b́ wottsotse itwere k'up'at it ned'iye itamantsoshe, eshe, shata bako hit'o itn geyiratse. 
\v 21 Ik'o azeewon jaab wotts ayhudiyotssh maac'o k'ewo b́ k'aziyakon itsh maac'o k'eweratse. 
\v 22 Eshe Ik' doowonat Ik' shatiyon aab s'iilere, b́ shatiyonu b́kitsir dihitswotsats b́ wotor b́ doo wotonu b́ kitsir itshee, hanowere b́k'alir b́ dowon k'up'ar it betka wotiyalemó b́ doo itsh wotituwe, kup'o itk'azalomó itwere k'ut'eyarniye it dihiti. 
\v 23 Ayhudiyots bo amaniyal yoots bobeyok aanitune, Ik'o yoots bobeyok boon aaniyosh falituwe. 
\v 24 It Ik' ash woterawwotsmó azeyon boditsi woyiri miti jaabo wotat teshtsuwots it beyokalo worfotsi woyiri mitats tokeyo it faliyakon hanots bo azeyon worfitsi woyiri miti jaabo wotts ayhudiyotsmó yoots bobeyok aanar tokeyo aawuk'oneya boosh b́ maaweeti!
\s Ik' mhretiyo jamosh b́wottsok'o
\p
\v 25 Ti eshuwotso! «Danfone» err it'k'ayere itsh tkeewitwo ááshts keewo fa'ee, bíwrer Israe'el ashuwots k'azts woto b́ jamosh b́woterawo Ik' ash Woteraw jamwots s'eenon Ik'ok bowafetsoshe. 
\v 26 \x - \xo 11:26 \xo*\xt Isa. 59:20 \xt*\x* Eshe hank'on Israe'el asha ash jamwots kashitúne. Mansh hank'o ett guut'ere,
\q «Kashituwo S'iyonn weetuwe,
\q2 Yak'ob naar jamatse gondo wokiituwe,
\q
\v 27 \x - \xo 11:27 \xo*\xt Erm. 31:33-34 \xt*\x* Bomorro boosh t t'afiyor
\q2 bonton tkindit taaro haniye.»
\p
\v 28 Israe'el ashuwots doo shishiyosh aap'etso dek'o bok'aztsotse, itjangosh it Ik' ash woterawotssh b́dooyish Ik'osh balangaro bowoti, bomarat'ewonmó nihiwots jangats tuutson Ik'o boon shunknee. 
\v 29 Ik'o noon marat'de'er b́ deero bí imiyakon b́ k'alts keewumansh b́gawtso woniratse. 
\v 30 It Ik' ash woterawwots shin Ik'osh alerawwotsiye it teshi, andomó ayhudiyots aleyo bok'aztsotse it Ik' maac' k'ewo it datsi. 
\v 31 It maac' k'ewo it daatstsok'on boowere maac' k'ewo bodatsituwok'o boowere and Ik'osh alerawwotsi woterne. 
\v 32 Ik'o b́ maac' k'ewo ash jamosh kitsosha ett ash jamwotsi ale k'azon is'k'reroshná.
\s Ik'osh t'ints údo
\p
\v 33 \x - \xo 11:33 \xo*\xt Isa. 55:8 \xt*\x* Ik' gaalona, dani teleefonat danoonúwere awuk'o eene! bí angsho fal bíats boderake, b́ werindonu danerake.
\q
\v 34 \x - \xo 11:34 \xo*\xt Isa. 40:13 \xt*\x* «Ik' hasabiyo danetuwo kone?
\q2 Bísh iztsi wotituwonmó kone?
\q
\v 35 \x - \xo 11:35 \xo*\xt Iyo. 41:11 \xt*\x* Ik'osh gushituwonat
\q2 b́ gushitsono dek'etuwo kone?»
\m
\v 36 \x - \xo 11:36 \xo*\xt 1 K'or. 8:6 \xt*\x* Jam keewo b́ daatse bíyokne, jam keewo bíne b́beeti, jam keewo bíshe b́ beeyeti, dúre dúron mango bísh wotowe! Amen!
\c 12
\s Ik'osh finosh awuk'on beyo b́geyituwok'o
\p
\v 1 Eshe eshuwotso! Ik'o genee'úshitwo, beyar beetwonat S'ayin wosho woshde'er it atso it t'intsitwok'o maarts Ik'o shútson itn k'onirwe. Manowere t'intso itn b́ geyitso ari Ik'osh finet finoniye. 
\v 2 Sheengonat genee'úshitwo kim deshawonowere Ik'o shuntso fadbek'o it falitwok'o it nibi gawirwon handraar, it beyo woneewa bako datsani ark'ayere.
\p
\v 3 Aaninuwere it ik ikets Ik'o itsh b́imts imnetiyok'on tooko dashan detson asaabore bako it angoniyere danb it tookosh bogotaane err asaabk'ayere ett taash imets s'aaton keewirwe. 
\v 4 No ats ikatse ay kayuwots fa'ane, noatsi kay ik ikonuwere k'osh k'osh fino detsfe. 
\v 5 \x - \xo 12:4-5\xo*\xt 1 K'or. 12:12 \xt*\x* Mank'owere noo ayuwotsi wotat nobefere Krstosn ik ats noone, ik atsi kayuwotsi nowottsok'on noatsatsewo desheeknone. 
\v 6 Mansh Ik'o b́ s'aaton noosh b́ ímts k'osh k'osh naari deero finats jiitswone, noosh imetso Ik'o aap'ts keewa wotiyal no amantsok'on Ik' aap'tso keewwone. 
\v 7 Noosh imetso k'oshwotssh fina wotiyal kup'ar finone, noosh imetso daniya wotiyal sheengshde'er daniwone, 
\v 8 \x - \xo 12:6-8 \xo*\xt 1 K'or. 12:4-11 \xt*\x* noosh imetso iza wotiyal izwone, noosh imetso tuwdi dowawotiyal nib s'eenon imone, noosh imetso ashuwotsi k'eeza wotiyal kup'ar k'eezwone, noosh imetso mihretiya wotiyal hanowere gene'on k'aluwone.
\p
\v 9 Git alber deshaw ari shunewo t'ut'k'ayere, gond keewo shid'ere, sheeng keewi shuutso sha'ore. 
\v 10 It ats atsewo eshuwwots shunon shunewere, it ats atsewosh mango imosh nohewere, 
\v 11 mawuk'ayr, Shayron aat'iruwotsi wotoore, doonzosh keewewere. 
\v 12 Jangiyetson gene'owere, gond bek'o k'amoore, jam aawo Ik'o k'onwere. 
\v 13 Amants eshuwotsi bokic'or te'úwere, ibwotsno ibíewre.
\p
\v 14 \x - \xo 12:14 \xo*\xt Mat. 5:44; Luk'. 6:28 \xt*\x* Itn gishirwotsi deerwere, derwere bako c'ashk'ayere. 
\v 15 Geneúwirwotsnton gene'ore, epiruwotsnton efere. 
\v 16 It ats atseyo ik hasabiyon ikwotar beewere, it tooko danbaan deshr bog taana eto k'ayr\f + \fr 12:16 \fr*\fqa Bog taana et k'ayere: \fqa*\ft T'owwotsnton ik wotar beewere,, wee gac'ets fino finosh it shúno wotowe. \ft*\f* t'owwotsnton ik wotar beewere. It tookosh danfone etk'ayere.
\p
\v 17 Ash jami shinats sheeng wotts keewo k'aluwere bako, ashuwots itats gond keewo bok'aliyal, it aanide'er gondo boosh k'alk'ayere. 
\v 18 Itsh b́ faleyal ash jamonton jeenon beyosh it weeron it falitu jamo k'aluwere. 
\v 19 \x - \xo 12:19 \xo*\xt Iwi. 32:35 \xt*\x* T jirwotso! fayo Ik'osh k'ayere boko it it tookon weero oorshk'ayere, «Weer weershtwonat weer worshi gushono anituwo taane etfe Doozo Ik'oni» ett guut'ere. 
\v 20 \x - \xo 12:20 \xo*\xt Ari. 25:21-22 \xt*\x* Mansh weer worshoniyere n balangaro b́k'ak'iyal mazuwe, b́shashuwiyal shashuwo kishwe, hank'o n k'aliyal goyinar b́ jitsituwok'o woshitune. 
\v 21 Mansh gond keewo sheeng keewon da'úwere boko gond keewon da'ek'ayere.
\c 13
\s Mengsti naashuwotssh alewo b́geyitsok'o
\p
\v 1 Konuworu naash wottso b́ daatsit Ik' shunon b́ wottssotse and datsk'eziruwots bo naash Ik'on b́ wottsotse ash jamo naashwotssh alewo bísh geyife. 
\v 2 Mansh naashuwotsi k'efitu jamo Ik' aloniye b́k'efiri, aleraw jamonuwere sezi angsheyo b́ tookats dowetuwe. 
\v 3 Dats k'eziruwotsi shatet gond finirwotsi bako sheeng finiruwotsiyaliye, naashuwotsi shat k'azo geefneya? Bére sheeng fino finowe, booke údo daatsitune. 
\v 4 Naasho neesh sheengo b́ k'alituwok'o naashiyets Ik' guutsoniye, dats k'eeziruwo shiki gorado bí'ed hank'on woto b́k'aztsotse gond fintso nwotiyal dats k'eeziruwo share, bíwere gond finiruwotsi sezosh Ik' weer wershono kitsr Ik'osh finitune. 
\v 5 Mansh mengst naashuwotssh alewo itsh geyife, it aletwere Ik' fay mec'ro shatoon b́ woterawo it nibo itn b́ gac'ituwosh woto geyituwe.
\p
\v 6 Ereero it imiru manshe, naashuwots finan finosh botuu Ik'osh finoshe. 
\v 7 \x - \xo 13:6-7 \xo*\xt Mat. 22:21; Mar. 12:17; Luk'. 20:25 \xt*\x* Eshe danbi naashuwotssh k'alo geyituwu jamo k'aluwere, ereero bísh wotituwosh ereero, t'ilisho bísh wotituwosh t'ilisho imere, shatetwono sharere, mango bísh wotituwosho mango imere.
\s Ats atseyo shunewo
\p
\v 8 Kon k'awuntsonúwor itatse beek'aye, itatse beeyet k'awuntsoniye itats atseyo shúnee mec'r wotowe, ash shunetuwo nemo finats jitsre. 
\v 9 «Wido amk'aye, úd'́k'aye, úmp'k'aye, k'osh ashk wotts keewu jamo tewunk'aye» etiru tzaziyotsnat k'osh tzazi jamwots, «Asho ntookok'o woshde'er shune» etiru ik tzaziyotse ko'eyat bofa'oni. 
\v 10 Ash shuniru jamo b́ shuniru ash manats gond keewo k'alatse, mansh ash shuniruwo nem jamo finats jitsre etee.
\p
\v 11 Eshe tokrotse it tuwit sa'ato and b́bodtsok'o dande'ere, shini noamanortsoniyere bogo and no kashit aawo iki nomaants t'inre. 
\v 12 T'úwonu beshe b́ beshiri, aawonu t'inree, eshe t'aluwotse fineyiru finon fink'ayone, sháánon bin finet kes'i tahono tahade'one. 
\v 13 Weral míshon, mashon, widonat máátsonat nungushi iko ikats keshon, fayonat okooron b́ woterawo aawu shanon beyiruwu ashuwotskok'o s'ayinon sha'owone. 
\v 14 Eshe Doonzo Iyesus Krstosi tahade'ere bako it meets shuni shashuwo kishosh gawuk'ayre.
\c 14
\s Ashaats angshk'azo
\p
\v 1 Ititse b́ imnetiyon maawuk wotts asho b́ keewo de'ere bako b́ took asaabiyats moosho tuuzk'ayere. 
\v 2 Dab ash iko konnari keewo móósh faliyit imnetiyo detsetwe, b́ imnetiyon kup'eraw ashonmó worfi maay mec'ro meetuwe. 
\v 3 Mansh jam keew meyiru asho mááraw asho gac'k'aye, máárawonwere meet asho ats angshk'aye, Ik'o bínowere dek're. 
\v 4 Bére, ash k'oshi guutso ats angshiruwan nee kone? Bí b́ need'iyal wee b́ dihiyal b́ doonzo kis'e. Dab Ik'o bín need'iyo b́ falituwotse kup'ar need'ituwe.
\p
\v 5 Mank'o aawu iko aawu ikoniyere bogo mangfe et gawiruwo beyo falituwe, ando k'oshonu aawu jamwots mango taale bako aawwotsitse bogabogo aaliye ett asaabirwe. Eshe hanan arts keewwotsatse asho ik ikon b́nibots bíamantsok'o woshuwe. 
\v 6 \x - \xo 14:1-6 \xo*\xt K'ol. 2:16 \xt*\x* Ik aawo k'osh aawoniyere bogshde'er mangiyituwo b́ beyal han b́ k'alirwe doonzo mangosha ettniye, jam naari mishono meyiruwo doonzo mangosha etniye b́meyiri, b́ meyiru mishosh Ik'o údituwe, jam naari mishono marawo doonzo mangosha err maratse, maa b́ k'aztsotsno Ik'o údituwe. 
\v 7 Noyitsere ikonuworu b́ kashon wotowa b́ k'iron b́tokkaliye. 
\v 8 Nobeyalo doonzosha nobeeti, no k'iriyalo doonzosha no k'iriti, eshe nobeyalo, nok'iriyalo doonzok noone, 
\v 9 Eshe Krstos k'irt k'irotse b́ tuu kashon betuwotsnat k'irtsuwotssh doonz wotoshe. 
\v 10 \x - \xo 14:10 \xo*\xt 2 K'or. 5:10 \xt*\x* Bére, nee n eshuwats eegoshe n angshiri? Wee ni eshuwi eegishe n gac'iri? No únets Ik' angshi jori shinats ned'ituwone.
\q
\v 11 \x - \xo 14:11 \xo*\xt Isa. 45:23 \xt*\x* Manwere, «Taa kashon betuwo taane etfe Ik'oni,
\q2 Ash jamo b́ gurbon tshinatse tuk'umalituwe,
\q2 B́ alberon taa Ik' twottsok'o gawituwe» ett guut'ere.
\m
\v 12 Eshe notook tookon no took fini jangosh Ik' shinats t'inr aatetwone.
\s Ashosh t'ug wotatse aats kordek'o
\p
\v 13 Eshe iko ikats angshk'aye, ernmó asho b́ eshuwsh weratse kambo wee t'úgo gedk'azosh no atso korde'one. 
\v 14 Ik keewo kiime err asaabiru ashosh keew man kima b́ wotiti bako kon naari keewonworu b́ tookon kim b́ woterawok'o taa doonzo Iyesusn t'iwintsdek' danre. 
\v 15 Nee n meyiru mishi jangon ni eshush t'ugo n wotiyal shúnonaliye nbeyiri, eshe Krstos bísh b́k'irts asho n meyiru mishi jangon b́ t'afitwok'o woshk'aye. 
\v 16 Eshe itoke sheeng keew wotts keewo k'oshuwots bok'efetuwok'o woshk'ayere. 
\v 17 Ik' mengsto S'ayin shayiron datsetsetk kááwe, jeenonat gene'ona bako, móónat úshi keewaliye. 
\v 18 Han jangosh Krstissh guuts wotts asho Ik'o geneúshituwe, ashoknowere údeek wotituwe.
\p
\v 19 Eshe jeenwoto bín datsetuwonat no ats atseyo bín nokup'it keewon sha'owone. 
\v 20 Mishi jangosh Ik' fino gakk'ayone. Mish jamo s'ayine, ernmó k'osh ashosh t'ug wotitu mish móó dáree. 
\v 21 Eshe ni eshúsh t'úg wotk'azosh meetso maak'azo, Weyinyon dútsets biro úsh k'azo, wee kon naari t'ug wotituwo fino fin k'azo sheenge b́ wotiti. 
\v 22 Eshe imnetiyan itnat Ik' dagots wotowe, err n amants keewo b́k'alor b́ maac'o bín b́gac'erawu asho údekee. 
\v 23 B́ amaneraniyere meyiru ashonmó b́ k'aliruwo imnetiyatse tuutson wot b́ k'aztsosh bíyats angshetuwe, imnetiyon k'aleraw keewu jamo morre.
\c 15
\s Ashuwotsi geneúsho b́ geyituwok'o
\p
\v 1 No imnetiyon kúp wottswots, mawirwots kuro kurdek'o geyife bako no took mec'ro geneúshitu woto geyiratse, 
\v 2 no took tookon k'osh asho b́ imnetiyon b́ kup'ituwok'o bín t'ak'amituwonat geneúshit keewo k'aluwone. 
\v 3 \x - \xo 15:3 \xo*\xt Dub. 69:9 \xt*\x* Krstos b́ tooko geneúshratse, dab «Ashuwots neen boc'ashts c'asho ti'ats b́ oot'i» etiru S'ayn mas'aafotse eteetso bí ats b́ bodi. 
\v 4 S'ayin mas'aafotse nodatsituwots k'amonat kup'on, noosh jángo b́beetuwok'o shin guut'ets jamo dano noosh b́ wotituwok'o guut'ere. 
\v 5-6 Ik níbon wotde'er ik noonon Ik'o nodoonz Iyesus Krstos nihi, bín it mangitwok'o, k'amikonat angi kúp'iko Ik'o Izar Izewer Krstos Iyesus shunok'on it atsatsewo ik níbetsuwotsi woto itsh ime.
\p
\v 7 Krstos Ik' mangosh itn b́ dek'tsok'o it jamets iko iko de'e. 
\v 8 Hanowere t keewor Ik'o shints nihuwotssh b́ jangitso b́ wotituwok'onat Ik'o arikeewets b́ wotonwere b́ danetuwok'o Krstos ayhudiyotssh guutso wotere etee. 
\v 9 \x - \xo 15:9 \xo*\xt 2 Sam. 22:50; Dub. 18:49 \xt*\x* Krstos ayhudiyots guutso b́ wottso k'osh jango Ik' ash woterawwots Ik'o b́ mhretiyosh bín bo údituwok'owe, hanuwere,
\q «Eshe Ik' ash woterawwots dagotse neen udituwe,
\q2 n shúútsosh dubon údo t'intsituwe»
\m ett guut'etsok'one. 
\v 10 \x - \xo 15:10 \xo*\xt Iwi. 32:43 \xt*\x* Aaninu
\q «It Ik' ash woterawotso,
\q2 Ik' ashuwotsnton gene'owere!» ett guut'ere.
\m
\v 11 \x - \xo 15:11 \xo*\xt Dub. 117:1 \xt*\x* Aaninuwere,
\q «Ik' ash Woteraw jamwots! doonz údoore,
\q2 Ash ash jamwotswere údoore!» ett guut'ere.
\m
\v 12 \x - \xo 15:12 \xo*\xt Isa. 11:10 \xt*\x* Ando Isiyas,
\q «Iseyi naarotse shuwetuwo weetuwe,
\q2 Ik' ash woterawwotssho jishituwo wotar tuwituwe,
\q2 boowere bojangtso biyats woshdek'etune» etfe.
\p
\v 13 It jangtso S'ayin shayiri angon eenfere b́ ametuwok'o jangetso Izar Izewer bín it amanetsosh gene'únat jeenon s'eenon itsh ime.
\s P'awlos ááwu shuk'on b́guut'tsi jango
\p
\v 14 Ti eshuwotso! doo woton s'eentsuwotsi, danon gaaltsuwotsnat it ik iketsuwots k'osho izosh falituwotsi itwottsok'o danre. 
\v 15 Ik ik keewwotsi itsh gawiyosh geeyat woshan Ik'o taash b́ imts s'aatok'on ááwushuk'on itsh guut're. 
\v 16 Deeranuwere taash b́ime Ik'o doo shishi keewo Ik'i ashwoterawwotssh shishiyosh kahniyo wotat Krstos Iyesush finoshe, Mansh Ik' ashwoteraw ashuwotssh S'ayin shayiro S'ayintsonat Ik'onowere gene'úshit wosho wotáár bot'inetuwok'o finiruwone. 
\v 17 Manatse tuutson Krstos Iyesun Ik'osh fino tfaltsotse it'iruwee. 
\v 18 Ik'i ash woterawwots bo aletwok'o woshosh Krstos ti aap'onat finatse tuutson b́ fints keewo wotiyalabako k'osho aap'osh aawo shu'atse. 
\v 19 Hank'owere een adits milikit finuwotsn S'ayin shayiri angon Iyerusalemnat b gúúratse tuut Elwarik'oni b́ borfetso Krstos doo shishiyo danire.
\p
\v 20 Jam aawu t tewuno k'osh asho b́ agtsats dabr ago b́woterawo Krstos shutso b́ shiyerawu beyok jamok sheeng doo shishiyi keewuman daniye. 
\v 21 \x - \xo 15:21 \xo*\xt Isa. 52:15 \xt*\x* Hanu,
\q «Haniyere shinon b́ jangosh eegoru keewerawu ashuwots bek'etune,
\q2 b́ jangosh shiyawwots t'iwitsitunee»
\m ett guut'etsok'one.
\s P'awlos Rom Maants Amoosh B́ Gawutsok'o
\p
\v 22 Manshowere itmaants twarawok'o ayoto taan baziyeree. 
\v 23 Andomó han gúúratsi fa'a datsuwotsatse t finit beeyokuwots bo beetsotse, hank'o ay dúrosh itn s'ilosh een tewuno tdetstsotse 
\v 24 Ispen maants t amor man weeron itn s'ilosh gawure. Muk' aawosh itnton gene'útsat tteshiyakon twerindo ttuwosh taan falit tep'o it k'alituwok'o jangere. 
\v 25 Andomó Ik' jirwots tep'et gizo deshde'er Iyerusalem maants ametuwe. 
\v 26 \x - \xo 15:25-26 \xo*\xt 1 K'or. 16:1-4 \xt*\x* Hanuwere Mek'odoniyonat Ak'yiyi datsatse fa'a Ik' jirwots Iyerusalemn beyiru tugúretsuwotssh boon tep'et gizo woshosh boshunon bogawutsotsne. 
\v 27 \x - \xo 15:27 \xo*\xt 1 K'or. 9:11 \xt*\x* Tep'anowere bo shunon imo boosh geyik b́wottsotsne, Ik' ash woterawots ayhudiyotsnton shayiri deero kayosh b́wotiyal boowere bomeets deeron ayhudiyotsi tep'o boosh geyife. 
\v 28 Eshe ko'iyets gizan Iyerusalem maants de'am boosh t imiyakon it weeron waar Ispen maants t ameti. 
\v 29 Itok twoor Krstos deero s'eenon itsh de'er tweetuwok'o danfee.
\p
\v 30 Tieshuwotso! t jangosh Ik'o maants k'onon tmaak'oriruwo taash itdabish nodoonz Iyesus Krstosnat S'ayin shayiri shunon iti k'oniruwe. 
\v 31 Ik'o taash it k'onituwere Yihud datsatsi fa'a amanerawu ashuwots kishotse farr Iyeresalemitse t detsts fiinonuwere Ik'i jirwotsoke dek'eyo b́daatsituwok'owe. 
\v 32 Han b́wotiyakon Ik'o bíetal geneúwon itok waarr itoke kashdek'o shunfee. 
\v 33 Jeeniko Izar Izewer it únetsnton wotowe! Amen.
\c 16
\s Jamo
\p
\v 1 Feben Knkriy kitotse Ik' moowosh finiru nomish amanetsu b wottsok'o it dano geefe. 
\v 2 Bi taanat k'osh ay ashuwotsi b tep'iruwotse amants ibuwotsi ibiyo boosh b́ wotituwok'o doonzo shútson de'er bish geyit keewo jamon bin it tep'etuwok'o oona itsh etiruwe.
\p
\v 3 \x - \xo 16:3 \xo*\xt Wosh. 18:2 \xt*\x* Iyesus Krstos fino finiruwotsnton ik wottsuwots P'rsk'lnat Ak'ilnsh jamo keewwere, 
\v 4 boowere t shegro k'iroshoru dab k'andek'kne boteshi, hann boon jam aawosh úditwe, t s'uzi b́ woterawo Ik' ashwoteraw krstani woto maants aants Ik' moowwotsworu it údirune. 
\v 5 Bo moots Ik' k'onosh kakuwets amantsuwotssh jamo t'intsuwere.
\p Isiyi dats kayatse shini Krstosn amantsonat tshuntso Ep'enet'ossh jamo keewwere. 
\v 6 Itsh ayidek'at maawutsu Mariyamsh jamo t'intsuwere. 
\v 7 Taanton tipeyat teshts woshetswotsitsere daneets teshts ayhudiyots jaagúwots Andronik'osnat Yuniyassh\f + \fr 16:7 \fr*\fqa Yuniyassh: \fqa*\ft Ik ik branon guut'etswotsitse, «Yuliya» etee boetiri. \ft*\f* jamo t'intsuwere, boowere taayere shine Krstosi bo amani.
\p
\v 8 Doonzon tshúntso Amp'ilyat'ossh jamo t'intsuwere, 
\v 9 Krstos finon noonton ik wottso Úrbanosnat tshúntso Ist'akussh jamo t'intsuwere. 
\v 10 Krstosk b́ wottsotse fadeyat bíere bísh gawetso Ap'elissh jamo t'intsuwere, Arst'obulos maa ash wottsuwotssh jamo t'intsuwere. 
\v 11 Ayhudiyotse t jago Herodiyonsh jamo t'intsuwere, Narsises maa ashuwotsitse Doonzon amantsuwotssh jamo t'intsuwere.
\p
\v 12 Doonzosh finon ayidek't maawirwotssh Trufaynnat Trufolsh jamo t'intsuwere. Doonzo finon ayidek'at mááwtsunat Krstosn ayidek'at tshunts Persissh jamo t'intsuwere. 
\v 13 \x - \xo 16:13 \xo*\xt Mar. 15:21 \xt*\x* Doonzosh finon ayidek't danetso Rufossh jamo t'intsuwere, taan b naayikok'o shunfu b́ indshowre jamo t'intswere. 
\v 14 Asnkritosnat Flegonsh, Hermesmsh, Patrobasmsh, Hermasmsh, bonton fa'a eshúwotssh jamo t'intsuwere. 
\v 15 Filologossh, Yulyash, Neryanat b́ mishsh jamo t'intsuwere, hank'o Olumpasnat bínton fa'a amantsuwots jamwotssh jamo t'intsuwere. 
\v 16 S'ayin jobon it atsatseyo jobeyar jamo aatewere. Krstosk wotts Ik' maa jamwots jamo itsh t'intsirune.
\s S'uwaatsi izo
\p
\v 17 Ti eshuwotso! it dek'ts dan man k'efituwotsi wotat it dagotse k'aleyon gond bek'o dowet ashuwotsatse it atso korde'ere, boatsere wokoore! 
\v 18 Hank'o ashuwots botookosha bako Krstosshaliye bo finiri. Bonono shaawshdek' dáshon garaamiwots nibo boant'elciri.
\p
\v 19 Doo shishi aap'osh aleets ash it wottso ash jamokere b́ danetsotse geneúk t wotwotiyaloru, sheeng keewosh dantswotsi, gond keewoshomó maac' kúp'uwotsi it wotitwok'o geefe. 
\v 20 Jeeniko Izar Izewer káári Shed'ano it tufi shirots tiitsetwe.
\p No Doonz Iyesus Krstos s'aato itnton wotowe.
\p
\v 21 \x - \xo 16:21 \xo*\xt Wosh. 16:1 \xt*\x* T finonton ik wottso T'imotiwos jamo itsh t'intsiruwe, eshe ayhudiyotse t jag wotts Luk'iyosnat Iyason Sosip'at'roswere jamo t'intsirune.
\p
\v 22 Woshhan guut'tso taawe T'ert'iyos Doonzon jamo t'intsituwe.
\p
\v 23 \x - \xo 16:23 \xo*\xt Wosh. 19:29; 1 K'or. 1:14; 2 T'im. 4:20 \xt*\x* Taanat hanokere fa'a jamo Ik' moowwotsi Ibiiruwo Gayiyos jamo t'intsiruwe, kitutsi gizo detsiruwo Erast'os, no eshú K'a'rt'os jamo itsh t'intsiruwe. 
\v 24 \f + \fr 16:24 \fr*\ft Hiye awdl taawan yoots guut'ets S'ayin mas'afwotsitse aali. \ft*\f*
\s Údi k'ono
\p
\v 25 Taa tdaniru doo shishi keewan Iyesus Krstos jangosh beshiyeyiru woshonat yootstson aashat teshtso, andomó be'ets ari ááshts keewon Ik'onwere it imnetiyats it ned'ituwok'o iti woshosh falituwe. 
\v 26 Andomó arikan be'ere, dúre dúrts Ik'o tzaziyon jamwots amanar bo aletwok'o Nebiywots mas'aafi weeron ash jamwots bo danetuwok'o k'alere.
\p
\v 27 B́ s'uzn dani teleefo detsts Ik'o Izar Izewersh, Iyesus Krstosn dúre dúron údo wotowe! Amen.