\id PHP - Borna New Testamnet
\ide UTF-8
\h Filp'siyos
\toc2 Filp'siyos
\toc1 Filp'siyos Maants
\toc3 Filp.
\mt3 Wosheetso P'awlos Wosho
\mt Filp'siyos Ashuwots Maants
\imt Kindo
\ip P'awlos woshan b́ guut'uwre, Mek'odoniya eteets Rom shirotse fa'a Filp'siyosyosn fa'a Ik' mooshe, Ik' maa manuwere, P'awlos Awuropi datsatse shini b́ ned'itsuniye, woshan guut'tsonwere P'awlos tipi mootse b́ beyor, k'osh Krsitiyaniyotsn k'efeyo bíats b́ bodorat Filp'siyos Ik' mootse tuwts koot dani jangon bomaac'o shiyanon b́ tishts aawotse. Wotowa bako P'awlos Iyesus Krstosatse b́ detsts imnetiyo ayidek't bog b́ wottsotse woshanitse bogt be'eyiruwo gene'onat s'een imnetiyoniye.
\ip P'awlos woshan shini b́ guut'etuok'o bín woshtso b́ kic'or bín tep'osh imo bísh bodeyitsotse Filp'siyosn amantsuwotsi udoshe, bíyatso wotowa boats k'osh k'osh kic'uwots bodrno wotiyal dab ááwu shuk'onat b́ jamon kup' woto bo detsetwok'owe mansh gawerawo boon kup'iyoshe. Tooko dambaan detsonat bog taana eto okaan bazir Iyesus Krstosn tooko dashan detson bos'enetuwok'o kup'shdek't b́ gawiyiri, Krstos Iyesus shayironton ik woton bodaatsts kasho Ik' deeri imootse t'up'tsonat imnetiyon it dek'tsoni bako nem koton datsekaliye eton boosh gawiyituwe, Krstos Iyesusnton ik wotar beetu jamwotssh Ik'o b́imet jeenonat gene'uon boosh guut're.
\ip Woshan b́danefo gene'úon, kup'ar amanon, ikwowotonat krstiyan imnetiyonat beyotse kup'on shaanide kitsone, manats dabtnuwere wosh na'o P'awlos Filip'isyus Ik'i moosh b́detsts een shunoniye b́kitsiri.
\iot Jamon mas'aafan b́detstso
\io1 Kindo 1-11
\io1 P'awlos b́tookon bítse b́teshts keewo 12-26
\io1 Krstani beyon ariyetso 1:27—2:18
\io1 T'imotiyosnat Ep'afroditussh detsetso 2:19-30
\io1 Amaneyiruwo k'efiruwotsoki ats kotiyo 3:1—4:9
\io1 P'awlos Fililp'isiyositsi Krstiyaniwotssh b́t'intsts údonat izon 4:10-20
\io1 B́ guupo 4:21-23
\c 1
\p
\v 1 \x - \xo 1:1 \xo*\xt Wosh. 16:12 \xt*\x* Krstos Iyesus guuts wottsuwots P'awlosnat T'imitiyosoke, Flp'isyos kitotse beyiru Krstos Iyesusn S'ayn wotts jamwotssh, Ik' maa eenashwotsnat diyak'oniyotsnsh.
\p
\v 2 Nonih Ik'oknat no doonzo Krstos Iyesusoki s'aatonat jeenon itsh wotowe.
\s P'awlos udon Ik'o b́k'ontsok'owo
\p
\v 3 Iti tgawi taawo jam aawo Izar Izeweri udirwe, 
\v 4 It jamets jangoshowere Ik'o tk'oni taawu jamo Ik' tk'ono gene'on s'eenke. 
\v 5 Shints aawortson dek't b́tutson andish b́borfetsosh dooshishiyo nabfetsr t fino tep'iruwotsi it wottsotse Ik'o udiruwe, 
\v 6 Fini sheengo ititse dek't tuutso Izar Izewer, Krstos Iyesus angshosh aanar b́ weet aawots s'uwomaants b́betsituwok'osh arikon danfee. 
\v 7 And tipimootse tbeyanoronat ttpeftsere shin doo shishi fini aroosh mooyr bínowere kup'iyosh Ik'o b́ s'aaton b́imts gowosh it únetswor biyatse kayituwotsi it wottsotse it jam aawo t nibots itne. Manshowere it jangosh taash shiyeyiruwo arikee. 
\v 8 Krstos Iyesus shunon it únetsnoor awuk'o tgawiruwok'owosh tgawo Ik'oniye.
\p
\v 9 It shuno danonat t'iwintson s'eenk wotarr eenfere bíametwok'o Ik'o k'oniruwe. 
\v 10 Manuwere k'ants keewo p'ec'ar danr Krstos aanar b́weet aawots s'ayinwotsnat eeg eego boatse daatserawuwotsi wotarr it datsetuwok'oye. 
\v 11 Mank'oon it beyon Iyesus Krstosoke daatset kaawi shuwon s'eentso wotaarr Ik'osh mangonat udon datsiyituwotsi wotitute.
\s P'awlos tipewo dooshishiyo b́gawnetwok'o b́k'altsok'o
\p
\v 12 Tieshuwotso! tiats bodts keewu jamo dooshishiyo iki b́gawnetwok'o b́wooshtsok'o danitdek'o shunfee. 
\v 13 \x - \xo 1:13 \xo*\xt Wosh. 28:30 \xt*\x* Taa ttipe Krstos jangosh b́wottsok'owo Ron datsi nugúsi maa kotiruwotsnat manoke fa'a ash jametswots danfnee. 
\v 14 Taa ttipetsatse tuutson amants eshu eshwotsitse ayuwots iki bogshdek't doonozo amantsuwotsi woternee, mansh Ik'o aap'tso shatalon shishiyosh shintsoniyere iki bogts ááwu shuuk'o daatsrne.
\p
\v 15 Wotówa eré ik ikuwots Krstosi bo nabír okooronat nokoreyi shayirone, k'oshuwotsmó Krstosi bo nabir níb s'aayinone. 
\v 16 Hanots Krstosi bo nabir bo took shunatse tuutsone, boowere taa doo shishiyosh tdetsts mooshatse tuutson hanoke juwetso twottsok'o bodantsoshe. 
\v 17 Ekewotsmó Krstos jango k'uuridek't nabiruwots maac' s'ayinon b́woterawon botook shunonat ttipeyatse iki bogts kic'o tiats doosh gawttiniye.
\p
\v 18 Han wotowa ekeewi wotowa taa geneeúwe tgeeneúwiti, ariyon wotowa arikon wotowa jam werindon Krstosi nabetuwe. 
\v 19 K'osho taan gene'úshiruwo it Ik'o itk'onirwonat Iyesus Krstos shayiri tep'oon s'ayinr tkeshetwok'o tdantsotsne. 
\v 20 B́ jamon tjitserawok'o jangatniye tkotiri, ernmó úni aawo tk'aliruwok'onat hambets kashon t beyal wee t k'iriyal Krstos tiatsotse mangituwe etaat ááwushuk'on keewiruwe. 
\v 21 Mansha taash beya eto Krstosn beewoniye, k'ira etoonwere oot'o biitse daatset keewe. 
\v 22 Ernmó t atsi metsanaton dabr t beyetka wotink'e shuu daatsitfino finere etee, b́wotiyaloru dabr beyonat k'irotse ááwi galtdek'etwok'owo danatse. 
\v 23 Git hasabiyanots dagots detsewtsere, hank'o beyanitse k'aleyar Krstosnton woto geefe, manuwere Krstosnton beyo taash ayidek't k'ank b́wottsotsne. 
\v 24 K'osh weeron kashon t beyo itsh ayidek't geyike. 
\v 25 Mansh arikeewetsk taane, taa k'irraniye oorar it imnetiyo eenr bíere imnetiyon geneúo it daatsish it jametsnton t teshetwok'o danfee. 
\v 26 Taa aani itok twoor t jangosh it detsts it'o Iyesus Krstosn ayituwe. 
\v 27 Eshe jamoniyere bogo it beyotse Krstos doo shishiyo bíetirwok'on beewere,, hanuwere taa wáár itn t s'ilalo wee itoke twokiyal ik níbon kup'at it ned'tsonat doo shishiyo ik wotat betsosh it kaartsok'o shishirwe. 
\v 28 Itn k'efiruwotsi ik keewonoru shatk'ayere, it ááwu shuk'anwere boosh bot'afit milkt b́ wottsotse itshomó Ik'oke wotts it kashtsi milkte. 
\v 29 Krstosi aman mec'rosh b́ woterawo b́ jangoshowere gond bek'o it datsitwok'owe. 
\v 30 \x - \xo 1:30 \xo*\xt Wosh. 16:19-40 \xt*\x* Eshe and itats bodiru gondbek'aan bali tiyats bodt teshtsoniye, andoor tiyats b́bodiru gond bek'o itshishirwoniye.
\c 2
\s Krstos b́tooko dashan b́detstsok'onat dambaan bín beezetsok'o
\p
\v 1 Krstosn itatso kup'idek'o itdetsal, b́shunoonowere t'eng dek'tsuwotsi it wotiyal, S'ayin shayironontonuwere ik woto detsfte wotiyal, it atsatsewoshowere doowonat maac'k'ewon kitsirute wotiyal, 
\v 2 eshe ik hasabyon, ik shunon, ik Shayiron, ik finosh towaar need'on tgeneeúo s'eenk b́wotituwok'o k'aluwere. 
\v 3 Tooko dashan detson s'eenr k'osh ashuwots ityere bok'antsok'o taawwere bako took shunon wee «Taayere oko kone fa'oni» err it'on eegonor ik keewo k'alk'ayere. 
\v 4 Mank'owere ik iko b́ tookosh wotit keewu mec'ro b́woterawo k'osh ashosh wotit keewo shiyanowe. 
\v 5 Mank'oon it s'iil s'iilo Krstos Iyesuskonton ik woto geyife. 
\v 6 Bí jam aawo Ik' doyo detsfe.
\q2 Ernmó Ik'onton bín taal woshituwo
\q2 Ik'onton taal woto angnon deshde tesho geeratse.
\q
\v 7 Dab b́ detsts mang jamo k'azt
\q2 Guuts areyat be'ere
\q2 Ash aronowere daatsere,
\q2 asho aratnuwere be'ere,
\q
\v 8 Bí b́ tooko dashane b́ detsi,
\q2 K'irosh b́ borfetso
\q2 Manúwor dab mask'aliyatse jiteyar b́ k'irfetso
\q2 aletso b́ woti.
\q
\v 9 Hanatse tuutson Ik'o jamoniyere dambe fa'a
\q2 Mang beyok dambaan bín b́ woshi
\q2 Shúts jamoniyere bog shútso bísh b́ imi.
\q
\v 10 Mansh Iyesus shútsosh,
\q2 Daronat datsatse, datsoniyere dashe fa'a jamo
\q2 b́ gúbron tuk'umalitúne.
\q
\v 11 \x - \xo 2:10-11 \xo*\xt Isa. 45:23 \xt*\x* Bo alberonowere
\q2 «Iyesus Krstos doonze» err gawar
\q2 Ik'o nihosh mango imetune.
\s Datsatsi ashuwotssh c'eeshok'o shaano
\p
\v 12 T mashotso! taa itnton t beyor jam aawo aleyirwotsi it teshtsok'o, ando itatse t wokor iki bogshdek't aleyirwotsi it wotituwok'o itsh gawituwe, mansh it ik ikets it kashtsok'o s'ayintsde'er kitsosh shatonat mangon kup'arr finore. 
\v 13 Bín ge'eúshosh it shashwitok'o k'alr bísh it aletwok'o ititse bede finitwo Ik'oniye.
\p
\v 14 Kon naari fino it finor mumudk'ayere weyinmó weed'ek'ayere. 
\v 15 \x - \xo 2:15 \xo*\xt Iwi. 32:5 \xt*\x* Han b́wotiyalo k'uuronat gond s'oot'anots dagotse jitsitsonnat k'efoon boatse deshaw s'ayin wotts Ik'i nana'úwotsi wotaarr datsanatse k'eenwotskok'o c'eeshitute. 
\v 16 Hanuwere b́ wotit kash daatsit aap'man it need'iraniyere t'engider deshdek'one, mank'oon t wos'onu wotowa t fino k'awuntsalo b́ orerawotse Krstos aanar b́ woor bín t it'et keewo detsfe etee.
\p
\v 17 Ik'osh imnetiyon it t'intsiru woshonat finats tkasho dabeyar wosho wotar b́kuud'ink'ere taash genee'ue, it unetsntonwere geneeúiyank'ee. 
\v 18 Mank'o it geneúar itere taawere itgene'o kaytdek'etwok'o woshituute.
\p
\v 19 Taa it jango shiyir tkup'itwok'o T'imotiwosi kááron it maants woshosh taan b́faliyituwok'o doonzo Iyesusn jangirwe. 
\v 20 It jango b́ nibon gawiruwo T'imotiwosiyere oko k'osh asho deshatse. 
\v 21 K'oshuwotsmó botook oot' mec'ree bogishiri bako Iyesus Krstos finosh kis'o deshatsne. 
\v 22 T'imotiwos, amanek b́woto fadbek't bísh gawetso b́wotonat taantonuwere na'o nihonton b́fiinefok'o ikwotdek' dooshishiyo bífinefok'o it it tookon danfte. 
\v 23 Mansha t jango eewk b́bodetwok'owo dantdek'iyakon T'imotiyosi kááron it maants woshosh jangirwe. 
\v 24 Dabnwor taa ttookon káári it maants wosh tfalituwok'o doonzo taan tep'etwe etaat amaniruwe.
\p
\v 25 Mank'owere taan geyit keewujamoon b́tep'etuwok'o woshaat it teshtso tieeshuwi Ep'afroditusi itok wosho geyik bíwotok'o daatsre. Bí taanton matsedk'ts kes'i ashonat fini tooh wotat finefetst teshke. 
\v 26 Bínowere itok twoshir it jametsi bek'osh b́ tewuntsok'onat it were b́ shodo it shishtsatse tuutson bí b́ kic'iruwoshe. 
\v 27 Arikon bíye ayidek't shodt k'irosh bodre b́ teshi, ernmó Ik'o bísh maac'o k'ewere, b́ s'uzsh b́ woterawo shiyanats aani shiyano b́ daberawok'o taashowere maac'o k'ewere. 
\v 28 Mansh it bín be'er it geneúwituwok'onat tshiyanonuwere b́ keetituwok'o bín itok woshosh ayidek'at tgeyi. 
\v 29 Eshe doonzon amants b́ wottsosh gene'on bín de'ere, bínk'o wotts ash jamwotsno mangiwere. 
\v 30 It karnoke datseyar taash k'alosh it falawu tep'o bí s'entsosha ett Krstos fino s'eentsosh dab b́ kasho b́oorerawo k'irosh t'inre b́ teshi.
\c 3
\s Ari kááwu woto
\p
\v 1 S'uwaatsnowere t eshuwotso! doonzon gene'ore, haniyere shini itsh t guut'tsman aani gitlo tguut'al taan taahiratse, itnomó it sheelawok' kotosh falituwe. 
\v 2 Kankok'o hano hano kanzon gond finiruwotsatse it atso korde'ere, meets k'út'iruwotsatse (gof damiruwotsatse) it atso korde'ere. 
\v 3 Noo Ik'o Shayiro ik'iyirwotsnat uratse beyiru niwon b́ woterawo Krstos Iyesus s'uzn noit'irwosh arikon gofo amrone. 
\v 4 It'o taash b́geyink'ere taa bín ti it'et ay keewo fa'e b́shi, uratse be'eyiru niwon it'et asho fa'e wotiyal taa bíyere bogo bín ti it'et keewo detsfe. 
\v 5 \x - \xo 3:5 \xo*\xt Wosh. 23:6; 26:5; Rom 11:1 \xt*\x* Taa t shuwetsi shmtl aawone gofo ti ami, t shuweyono Bniyam naar wotts Esra'el ash taane, hanatse tuutson s'ayin wottso Ibrawi ash taane, Ayhudi nemo kotonowere feresawi taane. 
\v 6 \x - \xo 3:6 \xo*\xt Wosh. 8:3; 22:4; 26:9-11 \xt*\x* Eshe yoots nemosha etaat okooronowere Ik'i mootse amantsuwotsi t giishatniye tteshi. Nemo koton kááwonowere ik jago tiatse datserawona tbeefo b́tesh. 
\v 7 Eshe haniyere shin ot'etske etaat boats tiamaniru keewu jamwotsi Krstos jangosha etaat k'awunts deshaw Woteraw keewok'o woshdek'at boon taawirwe. 
\v 8 Maniyere okoon t doonz Krstos Iyesusi danoniyere bogo k'osho ik keewonwor bíaalok'owo tiamantsotse jam keewo oot'o b́ deshawok'o woshdek' taawirwe, b́ jangatse tuutson jam keewo t'ut're. Krstosnowere datsosha etaat jamkeewo maa fokets shotok'o taawuree. 
\v 9 Mantk'alir eegishe eteyal nemats need'iyetso t took kááwo k'ayk'rar imnetiyats need'iyetso Ik'iko kááwo Krstosi amanon daatsr bíntonuwere wotooshe. 
\v 10 K'oshonuwere eegishe Krstosnat Krstos k'irotse b́tuwi ango danoshe, b́ gondbek'o kaytsi wotaarr b́ k'iroonowere bín arooshe. 
\v 11 Mank'onowore t k'iriyakon tuur dúre dúrosh kashon t beetuewk'o amanirwe.
\p
\v 12 Jaman and daatsafa'ee, weemó jamann s'eenre eto falratse, wotowa eree shlmatiyo dek'osh shinomaants wos'on kup'irwe, manshe Krstos Iyesus taan detsb́dek'i. 
\v 13 T eshuwotso! hniya biyok t bodtsok'o woshde'er taawatse, ernmó ik keewo k'alituwe, bíwere t shuutsmaande beyiruwo bataar t shinatse beyiruwo detsosh kup'ituwe. 
\v 14 Shlmatiyo daatsosh t shinatse beyiru k'os'ok bodosh wos'etuwe, shlmatiyanowere Ik'o Krstos Iyesus weeron dambaan s'ede'r b́ imet kashoniye.
\p
\v 15 Eshe shayiri beyon katsts jamwots han arts asaabiyo detso noosh geyituwe, it k'osh k'oshi hasabiyo it dagotse b́ beyal hasabiyan Ik'o itsh kishde'er kitsituwe. 
\v 16 Han wotowa ekeewi wotowa and no bodts shayiri beyonton manuts wotowe.
\p
\v 17 \x - \xo 3:17 \xo*\xt 1 K'or. 4:16; 11:1 \xt*\x* Ti eshuwotso! taan araar tshuutso sha'on ikwotore, noon aroosh no shuuts shairwotsi nibnde'er s'iilere. 
\v 18 Haniyere shin ayoto itsh tkeewtsok'onat andoru ti aac'uwo kuut'fetsat itsh tkeewiru jamok'o ayuwots bosha'a sha'on Krstos jitewosh balangarwotsi woterne. 
\v 19 Bosh bo Ik'o bomaac'oniye, bíyats tuutson boon jitsit keewone boi'it'iri, botewnonwere datsatsi keewe, mansh bokeewi s'uwo t'afe. 
\v 20 Noomó dari mengsit ash noone, manoknowere waar kashituwo no doonz Iyesus Krstosi tewunon kotirwone. 
\v 21 Bíwere ketts no atsan woniyiri b́ mangi atso bíarituwok'o woshituwe, hanuwere b́ k'alit jamo b́ ali shirots woshosh faliyit angone.
\c 4
\s Ilmaantsi izo
\p
\v 1 It tshuniirwotsnat tmiraac'iruwotso tgene'eúwonat tfiini mangi akliliwotsi wotts tieshuwotso! doonzo ats kup'de'er beewere.
\p
\v 2 Ewodiyanat Sent'ikin boatsatsewo doonzoton ik wotde'er bobetwok'o boon k'onirwe. 
\v 3 Neewere manoke fa'o amanets taanton finiruwo ttohono, máátsanotsi n tep'etwok'o neen k'onirwe, máátsanots taanton K'elemnt'osnat bo shútso kashi mas'aafats guut'ets k'osh k'osh bo fini tohuwotsnton wotat doo shishiyo jamok betsosh kaarerne.
\p
\v 4 Jam aawo doonzon gene'owere, ando aani «Gene'owere!» etirwe.
\p
\v 5 Sheeng ash it woto ash jamoke daneek wotowe, doonzo karnee, 
\v 6 mansh jam keewo Ik' k'onon, k'oonat udon Ik'osh t'intsuwere bako egoshoru kic'k'ayere. 
\v 7 Asho gaw b́ falitwoniyere bog wotts Ik' jeeno it nibonat it asaabiyon Iyesus Krstosn koteetuwe.
\p
\v 8 S'uwaatsnowere t eshuwotso! arikon, mango, kááwo, s'ayino, geneushituwonat udituu wotts keewu jamwotsi gawwere. It asaabiyo jamanotsiyere bogtsonat udiyit keewwotsn s'eenk wotowe. 
\v 9 Tiyokere it dantsonat it dek'tso, it shishtsonat it bek'ts jamo k'aluwere, jeenik wottso Izar Izewer itnton wotituwe.
\s Pawulossh doyiyets imosh udo b́t'intsok'o
\p
\v 10 It ja'iyak ando aani tkic'osh shiyano dek'at it tuutsotse doonzon ayidek'atniye t gene'úwi, han tietirwere itmaac' gawiruwo finats jiitsosh wotit gowo datsrafa'ate eta bako tkic'o gawo k'azrte etishaliye. 
\v 11 Aaninuwere hantietir t beyosh wotit keewo tt'ut'tsoshaliye, taahe «Tdetstso taash bodfe» eto dandek're. 
\v 12 Mansh daatsonowere wotowa t'ut'ono danfee, konoki beyokna wotowa jam gizeyon woronat k'ak'on, daatsonat t'ut'on aashts keewo dandek're. 
\v 13 Ang taash imetuwo Krstosn jam keewo k'alo falituwe.
\p
\v 14 Wotowa eree it t kic'o kayitsuwotsi wotat it daatsetsotse sheenge it k'ali. 
\v 15 \x - \xo 4:15-16 \xo*\xt 2 K'or. 11:9 \xt*\x* Haniyere okoon dooshishiyo nabosh dek' tuuts gizewon Mek'odoniyon t woor it Filp'syusn fa'a amantsuwotsiyere okoon imon wotowa dek'on taanton ik wottso k'osh Ik' moo bí altsok'o it it tookon danfte. 
\v 16 \x - \xo 4:16 \xo*\xt Wosh. 17:1 \xt*\x* Tesolok'en k'ic'o tiyats b́ bodtsok'o dandek'at aani taash geyituwo it deyiyi. 
\v 17 Hanowere ti eton it imo daatsosh k'awutatni b́ woterawo it imi shuwo itsh b́ ayituwok'o tewunatniye. 
\v 18 Taash b́ geyitsok'onat taash b́ geyitsoniyere bogshdek'at taash it deyits imo Ep'afroditus kishatse dek're, it imanuwere sheeng shaak'o detsts woshok'o Ik'o b́ dek'etuwonat bín b́ geneúwitwoniye. 
\v 19 Mansh tiko Izar Izewer b́ mangi gaalon Krstos Iyesus weeron itsh geyts jamo ime. 
\v 20 No nihinat noko Izar Izewersh dúre dúrosh mango wotowe, Amen.
\s S'uwaatsi jamo
\p
\v 21 Amants jamwotssh Krstos Iyesusn jamo t'intsuwere, taanton beyiru eshuwotswere jamo itsh deyirne. 
\v 22 K'osh amants jamwots bitsnowere Rom naashi naasho miyitsi ash wottsuwots jamo itsh t'intsune.
\p
\v 23 Doonzo Iyesus Krstos s'aato it shayironton wotowe.