\id MRK - Borna New Testamnet (Word 4Z World)
\ide UTF-8
\h Mark'os Dooshishiyo
\toc2 Mark'os Dooshishiyo
\toc1 Mark'os Dooshishiyo
\toc3 Mar.
\mt Mark'os Guut'tso
\mt3 Nodoonz Iyesus Krstos Dooshishiyo
\imt Kindo
\ip Mark'os doo shishiyo, «Han Ik'o naay Iyesus Krstos doo shishyo b́ tuwokoniye» etona b́tuu, dooshishiyanitse Iyesus fini ashonat naash wotatni b́t'in. Bí alonwere b́daniyonat fo'erawwotsatse b́ detsts angonat ash na'i morro oorowe bí eton be'ere. Iyesus «Ashuwotsi morr finosh guuts wototse kishosh t kasho beshi de'er ímosh waats Ash Na'o taane» ett b́tookon keewre.
\ip Mark'os Iyesus jango b́t'intswere kaawonat angon s'een b́wotts weeron wotat b́t'iwintswere Iyesus aap'onat b́daniyats b́ woterawo b́fiints adits finwotsatsa b́tesh. Gupfo Yohans jangonat, Iyesus gupewon bíyats bodts fadewo k'awintsdek' b́ ími hakon guut'tsman Iyesus daniyonat kashiyon gawintsdek' b́keewi. Múk'i b́teshihakon Iyesus shuutso shoydek't shaiirwots Iyesusi iki bogshdek't danfere boami taawo Iyesusi k'efirwots iki bogshdek't bín shit'fera boam. Mas'afahan s'uwaatsi k'ot'wotsitse fa'uwots Iyesus beewotse s'uwatse ik gawiyotse wotts keewwotsi bítsnooru b́ jiteyi jangonat k'irotse b́tuwi jango keewirwotsiye.
\ip B́ doo shishiyan s'uwoke k'nfiyotse fa'a git kaywotsitse, yoots mas'aafwotsitse ik ikwots mec'rotsna bo daatsefo.
\iot Jamon mas'aafan b́detstso
\io1 B́ doo shishi tuwoko 1:1-13
\io1 Iyesus Galiln fino dek' b́tuwok'o 1:14—9:50
\io1 Iyerusalemitse b́fintsok'o 10:1-52
\io1 Iyerusalemnat bgúúratse s'uwaatsi ik gawiyor 11:1—15:47
\io1 Doonzo k'irotse b́ tutsok'o 16:1-8
\io1 K'irotse tuuts doonzo be'ewonat daromaand bí amtsok'o 16:9-20
\c 1
\s Gupfo Yohans b́ nabtso
\r (Mat. 3:1-12; Luk'. 3:1-18; Yoh. 1:19-28)
\p
\v 1 Hań Ik'onaayi\f + \fr 1:1 \fr*\fqa Ik'o naayi: \fqa*\ft Yoots mas'aaf ik ikwots Ik'o naayi etirwo dabrakno. \ft*\f* Iyesus Krstosko doo shishiyo b́ tuwokoni.
\p
\v 2 \x - \xo 1:2 \xo*\xt Mil. 3:1 \xt*\x* Nebiyiyo Isayasn,
\q «Hambe, nwerind foketwo
\q2 T woshtso nshinatse beshide woshitwee. 
\v 3 Hanwere
\q ‹Doonzosh weerindo k'aniwere
\q2 B́fudonowere manutsiwere› etfere,
\q2 Worwotse b́k'aaro eenshde'k't keewiru asho k'aaroniyee»
\m ett guut'etsok'one.
\p
\v 4 Mansh gupfo Yohans «It morrosh orowe eto itdatsish naandrone err gupewere» ett worwotse kuhdek'et keewfere b́weyi. 
\v 5 Yhud datsonat Iyerusalem kitutse ay asho b́maantsa bowaafo, bo morro kish keewr Yordanosi eteets fokotse b́ kishatsna bogupefo.
\p
\v 6 \x - \xo 1:6 \xo*\xt 2 Naash. 1:8 \xt*\x* Yohans tahonwere kambuli s'iron wozeka b́tesh. B́gebatso shaak'a bí edefo, b́maafonwere p'elonat dok'shi mas'ona. 
\v 7 Bí hank'owa bí'etfo «Túmr b́c'aami tipi joko bitsosh tborawo taayere ayidek' bogtso tshutsatse weeyirwe. 
\v 8 Taa iti aatson gupetwe, bímó itn S'ayn shayiron gupetwe.»
\s Iyesus b́gupetsok'o
\r (Mat. 3:13-17; Luk'. 3:21-22; Yoh. 1:31-34)
\p
\v 9 Manoor Iyesus Galili eteets datsatse beyiru Naazreti eteef kituts waat́ Yordanos fokotse Yohans kishon b́gupeyi. 
\v 10 Yohans manoor, Iyesus aatsotse b́keshtsok'on daro gaad'at́ b́k'eshefere, S'ayin shayiro kurkund areyat bíyats b́ oot'́fere b́bek'i. 
\v 11 \x - \xo 1:11 \xo*\xt Aze. 22:2; Dub. 2:7; Isa. 42:1; Mat. 3:17; 12:18; Mar. 9:7; Luk'. 3:22 \xt*\x* Manoor «Taan gene'úshtso t shunts na'o neene» etiru k'ááro darotse b́weyi.
\s Iyesusi fadetsok'o
\r (Mat. 4:1-11; Luk'. 4:1-13)
\p
\v 12 Manóór Ik'i Shayiro Iyesusi worwots dek't bí'ami. 
\v 13 Manoknowere worwotse Shed'ano Iyesusi hab aawosh b́ fadfera b́teshi, dín s'ootswotsntoni b́ tesh, melkiwotsu bísh finernó botesh.
\s Iyesus b́ daniyi fino Gelil datsatse dek' b́tuutsok'o
\r (Mat. 4:14-17; Luk'. 4:14-15)
\p
\v 14 Yohans detseyat tipimo b́ kindiyakon Iyesus, Ik'i mengsti jangosh doo shishiyo\f + \fr 1:14 \fr*\fqa Doo shishyo: \fqa*\ft Eto wongeliya etee. \ft*\f* nabfere Galil maants b́weyi. 
\v 15 \x - \xo 1:15 \xo*\xt Mat. 3:2 \xt*\x* B́daniyoro, «Dúro s'uuwtsere, Ik'imengstu karnfere b́watsotse it naandrone erere, dooshishi nabetsono amanore!» bí etfo.
\s Iyesus mus' detsf awdetswotsi b́s'eegtsok'o.
\r (Mat. 4:18-22; Luk'. 5:1-11)
\p
\v 16 Maniye il Iyesus Gelil aatsk'ari ganoke beshefetst Simon nat bí eshu Indriyasn mus' detsfwotsi boteshtsotse bo mus' kambo aats k'aro maants boshap'fere boon b́ bek'i. 
\v 17 Iyesuswere «T jafrats woore itsh tdanisha, err mus' it detsirwok'o ashuwotsi it detsetwok'ó woshitwe» bí eti. 
\v 18 Bowere manoor bo mus' detsi kambo k'azk'rat́ b́shuutso bo tuwi. 
\v 19 Maniyere múk'i beshat k'osh eshu gitwotsi b́bek'i. Bowere Zebdiyos nana'úwots Ya'ak'obnat Yohansna botesh. Bowere bo jelbotse bedek't bo mus' detsi kambo bok'anifera botesh. 
\v 20 Iyesus manoor boon b́s'eegi. Bowere bonih Zebdiyosnat bísh fin finirwotsn jelbatse k'azk'rat Iyesus jafrats boami.
\s Kim shayiro bín s'eents asho b́kashtsok'o
\r (Luk'. 4:31-37)
\p
\v 21 Beshatnu K'frnahom kitots bobodi. Manoori waats sanbatots Iyesus Ayhdiwots Ik' k'oni mootse daniyo dek't b́twi. 
\v 22 \x - \xo 1:22 \xo*\xt Mat. 7:28-29 \xt*\x* Iyesus, Muse nemo danifwots kok'o b́woterawo naashikook'o b́danifotse shishts jamwots b́daniyor ada bo adfo. 
\v 23 Ayhudiwots Ik' k'oni mootse beyiru ash iko gond shayiron s'eentso hank'o ett b́kúhi, 
\v 24 «Nazrettso Iyesuso, nee nooke eeg kis'e ndetsi? Noon t'afiyosh waafi? Nee koni n wottsok'o taa daank'reree. Ik'oko S'ayino neene.»
\p
\v 25 Iyesuswere gond shayirmansh «S'ik err, bí atsotse kee» ett b́fayi.
\p
\v 26 Gond shayronwere ashman dikdek't b́s'ik'iyakon b́k'aaro eensh dek't kuhefetst bí atsotse b́ keshi. 
\v 27 «Eebi han naaroni? Hanwo handr daniyeya?» Gond shayirwotsi bí aloro bo bíshere bo aleyiri, ett adt bo atsatseyo aateyo dek' bo tuwi. 
\v 28 Muk'i b́teyawo, Iyesus shúútso Galil gúúratsi dats jamatse dane b́wtsi.
\s Iyesus shodts ayuwotsi b́kashitsok'o.
\r (Mat. 8:14-17; Luk'. 4:38-41)
\p
\v 29 Muk'ib́teyawo Iyesus ayhudi Ik' k'oni mootse kesht Yak'obnat Yohansnton, Simoonnat Indryasn moots b́kindi. 
\v 30 Maa manitsno Simon awu ats k'ees'its shodo shodat bk'efera btesh. Bshodmanowere manoor Iyesussh keewbok'ri. 
\v 31 Iyesuswere bmaand t'int́ bkisho detsdek't b́tuuzi. Bi atsi k'ees'onwere manoor binfakshb́k'ri. Tuwatnwere boon b ibiy.
\p
\v 32 Aawu bkindre datso bí iliyakon ashuwots shodtswotsnat fo'erawon detsets jamwotsi Iyesusok dek't boweyi. 
\v 33 Kititsi ash jamo maa úratse kakwe b́wtsi. 
\v 34 Iyesus ay naari shoodon kic'iru ay ashuwotsi kashi b́k'ri. Fo'eraw aywotsno b́kishi. Fo'erawwotswere bí koni b́woto danfno botesh. Ernmó bokeewrawok'o boon b́baziyi.
\s Iyesus Geliln doo shishiwo b́ nab́tsok'o
\p
\v 35 Datso gatsosh bí etfere, Iyesus guuron tuut mootse kesht Ik' k'onosh ash aalok k'az bíami. 
\v 36 Simoonnat bínton teshtswots bín geyo kesht boami. 
\v 37 Bín bodatstsok'ono «Ash jamonwo neenere b́geyiri» bo eti.
\p
\v 38 Iyesuswere, «Taa twaa danyosh b́wottsotse doo shishiyo danyosh karnoke fa'a gal galóts amone!» bí et.
\p
\v 39 \x - \xo 1:39 \xo*\xt Mat. 4:23; Luk'. 9:35 \xt*\x* Mann ayhudiwots Ik' k'oni maa mootse danifetsit fo'erawwotsnowere kishfere Galil dats jamatse b́gúúrefo b́tesh.
\s Iyesus eenshodets asho b́ s'ayintstsok'o
\r (Mat. 8:1-4; Luk'. 5:12-16)
\p
\v 40 Een shod detsts ash iko Iyesus maants waat b́ tufi shirots tuk'maldek't, «Ni eekiyal taan s'ayintso falfne» eton bín b́k'oni.
\p
\v 41 Iyesuswere bísh maac'o k'ewat, b́kisho jargdek't shu'efetst, «Eekere s'ayine!» bí et. 
\v 42 Ashmanwere manoor bí een shodotse s'ayinb́wtsi. 
\v 43 Iyesus ashmansh kup'shdek't, ntooko korde'e ett faksh b́k'r. 
\v 44 \x - \xo 1:44 \xo*\xt Lew. 4:1-32 \xt*\x* «Wotts keewan ik doonzshor nkeewrawok'o ni tooko korde'e, ernmó amr ntooko kahniyosh kitswe. Ashjamosh gaw b́wotish nkashtsotse Muse k'aluwere bí etts wosho t'intswe» ett bíazazi.
\p
\v 45 Ernmó ashman manoke kesht keewman ashosh keewo dek't b́tuwi. Manatse tuutson Iyesus kit ikutsnor be'efetst kindo b́maawi. Ernmó kitoniye úratse ash aaloka b́befo. B́ wotefere ashuwots bo be beewoke b́ maants waa bowaafo.
\c 2
\s Ash duro Iyesus b́ kashitsok'o
\r (Mat. 9:1-8; Luk'. 5:17-26)
\p
\v 1 Múk' aawwotsiyere il Iyesus K'frnahom maants aanat b́weyi, manoke mootse b́beyirwok'o shisheb́wtsi. 
\v 2 Moonwere bodo b́k'aye maa úronwere b́t'ebefetsosh ay asho kakwe b́wtsi. B́ doo shishiyi keewonowere boosh b́danifoni. 
\v 3 Manoor awd ashuwots ash dur iko kurdek't bíyok boweyi. 
\v 4 Ash aytsatse tuutson duro Iyesusok de'et'ino maawt Iyesus kááwon maa tooko wogdek't duro bí ees'onton orshbok'ri. 
\v 5 Iyesuswere bo aman amano bek't durosh «T naayo n morro neesh orowa eteere» bí et.
\p
\v 6 Manoke bedek't teshts Muse nemo danifwotsitse ik ikewots bonibotse hank'o bo et. 
\v 7 «Ash han eegoshe hank'o c'asho Ik'ats b́ keewiri? Ik' ikoniye okoon morro orowe eto falitwo kone?»
\p
\v 8 Muk'i b́teyawo Iyesus bonibotse bogawirwo hank'on dandek't boosh hank'o bí et, «Eegishe it nibotse man it gawiri? 
\v 9 Durosh ‹N morro neesh orowe eteere› etonat ‹Tuur ni es'o kur de'er amee!› etotse aaw ketefa? 
\v 10 Ernmó Ash na'o datsatsi morro orowe etosh alo b́detstsok'o it danetwok'owa!» ett durosh, 
\v 11 «Tuwi, ni es'o kuurder ngalomand amee etirwe neesha» bí et. 
\v 12 Duronú manoor tuut bí es'o kurdek't ash jami shinatse b́ keshi. Mansh ash jamo adt «Hank'o b́jamon be'e danaknona» ett Ik'o bo údi.
\s Iyesus Matiyosi eteetso Lewi b́ s'egtsok'o
\r (Mat. 9:9-13; Luk'. 5:27-32)
\p
\v 13 Iyesuswere aani Galil aats k'aro ganok bíami, ash jamonúwere kakweyat b́maand boware boon b́danyi. 
\v 14 Man weeron b́beshefere t'ilish dek'eefoke beyirwo Ilfyos naay Lewi bek't, «T jafrats wowe» bí et. Bíwere tuut b́jafrats bí'ami.
\p
\v 15 Maniye il Iyesus Lewi mootse mishi maratse bedek'tni b́tesh. Ay asho b́ shuutso shoy dek' b́sha'iirwotse bínton t'ilish ko'iru aywotsnat morretswots, Iyesusnat b́ danifwotsnton mishi marats t'indek'tni botesh. 
\v 16 Ferisawino eteef jirwotsits wottswots Muse nemo danifwots, Iyesus t'ilish ko'ifwotsnat morretswotsnton b́maafere bek't «T'ilish ko'ifwotsntonat morretswotsnton eegoshe maat b́ úshiri?» ett b́ danifwotsi bo aati.
\p
\v 17 Iyesuswere man shisht, «Shodtswotssha bako jeen wotssh atetso geyirakee, taawere tweyiye kááw finirwotssh b́woterawo morretswots bo naandosh oorowe eto bodaatsitwok'o s'eegoshe» bí et.
\s S'oomi jangosh aateetsok'o
\r (Mat. 9:14-17; Luk'. 5:33-39)
\p
\v 18 Yohans danifwotsnat ferisawino eteefwots s'ooma bos'oomefo. Ik ik ashuwots Iyesus maants waat «Yohansnat ferisawino eteyrwots danifwotswo s'oomere bo s'oomefoni n danifwots s'oomo bok'az eegoshe?» bo et. 
\v 19 Iyesuswere «Guuyo bonton b́befere guuy deentswots s'oomo boosh geyituwaa? Mank'oyaliye! guuyo bonton b́befere s'oomo boon geyiratse. 
\v 20 Ernmó guuyo booke b́ dek'et aawo weetwe. Manoor s'oomitúne. 
\v 21 Tah nataats but'i handro shipfo aaliye, mank'o k'aleyalmó handr bút'onúwre taahdoro geets de'e gad'ni b́k'riti, b́gad'manwere baltsoniyere ikini b́gonditiye. 
\v 22 Mank'o weyiniyon dutsets biro bíts gas'ef arwi natoots handr weyniy biro gas'fo aaliye, mank'o k'aleyalmó weyiniyon dutsets birmań arwi natman t'up'ini b́k'riti. Woyniyon dutsets birmanwere kud'ni b́wtsiti. Arumanwere k'awntsalke b́wotiti. Mansha handr woyniyon dutsets birosh handir arwe b́geyiti» bí'et.
\s Sanbati aawi jangosh t'intsets aato
\r (Mat. 12:1-8; Luk'. 6:1-5)
\p
\v 23 \x - \xo 2:23 \xo*\xt Iwi. 23:25 \xt*\x* Sanbati aawots Iyesus sndeyi tari taalon b́beshefera b́tesh. B́ danifwots amfets sendeyi motso k'ut'dek'o botwi. 
\v 24 Ferisawino eteyirwotswere «Hambe, n danifwots sanbati aawots fink'ayere eteesto eegishe bok'aliri?» ett bo'aati.
\p
\v 25 \x - \xo 2:25-26 \xo*\xt 1 Sam. 21:1-6 \xt*\x* Iyesuswere hank'o ett boosh bí'aani, «Dawit bínton sha'irwotsnton k'ak'at b́kic'or egb́k'altsok'oo nababeratsteya? 
\v 26 \x - \xo 2:26 \xo*\xt Lew. 24:9 \xt*\x* Abyatar kaheniyots naash b́tesho dúr, bí Ik'i moots kindt, kahniwotsi bako konwor b́marawok'o baziyetso, Ik'osh imets misho b́meyi bínton teshts ashuwotssh b́ími.»
\p
\v 27 Aaninwere Iyesus boosh hank'o bí et, «Sanbati aawu ashosha bi azeyi bako asho sanbati aawosh azeratse. 
\v 28 Mank'owa Ash na'o sanbati aawush bdonziye.»
\c 3
\s Iyesus Kish dúr Asho B́ Kashiytsok'oo.
\r (Mat. 12:9-14; Luk'. 6:6-11)
\p
\v 1 Ayhdiwots Ik' k'oni moots Iyesus b́ kindi, manokno kish dúr ash iko fa'e b́ tesh. 
\v 2 Iyesusi s'aamiyo geyiru ashuwots, «Sanbati aawon ashaan b́kashiyo aab s'iilone!» ett kotdek'tni botesh. 
\v 3 Iyesuswere kish dur ashmansh, «Waa taalotse need'owe» bí eti. 
\v 4 Maniyere il, «Sanbati aawon fin k'ayere eteetso sheeng finemo gond fine? Kash wooriyemó kash úd'e?» ett boon bíaati. Boomó s'ik et bowtsi. 
\v 5 Iyesuswere bonibo b́ duungtsotse shiyanat bín gúrdek't fa'úwotsi sheet't ashmansh, «Nkisho jargwe» bí eti. Bíwere b́ jargtsok'on b́ kisho kash b́wtsi. 
\v 6 Manoor ferisawino eteyirwots kesht ak'alde'er Iyesusi bot'afitwok'o Herodsnton boshiyeyi.
\s Ashuwots aats k'ari ganoke Iyesusok kakwe b́wtstsok'o
\p
\v 7 Iyesus b́ danirwotsnton Galil aats k'aromaants bí'ami. Gelilnat Yhuditse ay asho b́shuutso shoydek't b́twi. 
\v 8 B́ k'aliru keew jamo boshishtsok'on ay ashuwots b́ shuutso botwi, manotswere Galiln, Yhudn Iyerusalemn, Edomiyasn, Yordanosiye bak'ets datsatse, mank'o T'irosnat Sidon kitotse waatswotswere fa'ano botesh. 
\v 9 \x - \xo 3:9-10 \xo*\xt Mar. 4:1; Luk'. 5:1-3 \xt*\x* Asho bí aytsatse tuutson ashuwots datso bí ats t'ebir bín bokic'irawok'o jelbo bo k'anyitwok'o b́daniyrwotssh b́ keewi. 
\v 10 Ay ashuwotsi shodotse kashit b́ teshtsotse shodon kic'iru jamwots bokishon bín detso geeyat, bísh datso bot'ebifera botesh. 
\v 11 Kim shayirwots bín bobek'or b́ shinats gup' gup'at, «Nee Ik'o naay neene!» etfetstni bokuhefo.
\p
\v 12 Bímó koni b́wottsok'o kish bokeewrawok'o kup'i dek' boon b́fay.
\s Iyesus tatse git woshetswotsi Galb́dek'tsok'o
\r (Mat. 10:1-4; Luk'. 6:12-16)
\p
\v 13 Iyesus guri abaats b́keshtsok'on b́geyirwotsi b́maants b́ s'eegi, boowere b́maants bo t'iini. 
\v 14 Bínton bobeyish, bo nabishowere, boon woshosho tatse gitwotsi galb́dek't «Woshetswotsi» ett bo shúútso b́kshi. 
\v 15 Fo'erawwotsi bo kishitwok'owero alo boosh b́ imi.
\p
\v 16 Galb́dek'ts tatse gitwotswere hanotsi, «P'et'rosi» ett b́ s'eegtso Sim'oni.
\p
\v 17 «Bo'anergesi» wee guumi na'uwotsi ett bo shúúts b́kishtswots Zebdiyos nanaúwots Yak'obnat Yohansna, 
\v 18 Indriyasi, Flip'osi, Bertelmiyosi, Matiyosi, Tomasi, Ilfyos naay Yak'obi, Tadiwosi, wed'eyirwoni\f + \fr 3:18 \fr*\fqa Wed'eyiruwo: \fqa*\ft Wed'etsi eta, plotik ikotsi ashe etirwotsu fa'ano. \ft*\f* Sim'onnat, 
\v 19 Iyesusi beshidek' imtso Kiriyot kittsi asho Yihudi.
\s Iyesusnat Beel zebuln.
\r (Mat. 12:22-32; Luk'. 11:14-23; 12:10)
\p
\v 20 Maniyere il Iyesus moots b́kindi. Iyesusnat b́ danifwotsn mish moonor bomawfetsosh aani ankat ashuwots kakwe bowtsi. 
\v 21 «Iyesus geewtsere» eteere boshishtsotse b́ jagwots bín detsosh b́maand boweyi.
\p
\v 22 Iyerusalemn oot' waats Muse nemo danifwots, «Bí'atsnee B'elzebuliye fa'oni, Fo'erawotsi b́kishiriye Fo'erawi naash wottso Beelzebulne!» ett bo keewi.
\p
\v 23 \x - \xo 3:23 \xo*\xt Mat. 9:34; 10:25 \xt*\x* Iyesuswere boon b́maand s'eegdek't́ jewrdek't hank'o boosh bí et, «Shed'ano aawk'o k'alderniya Shed'ano kisho b́ faliti? 
\v 24 Ik mengsto kayewtsarr bí atsatseyo b́ gawetka wotiyal mengst man kup'ar need'o falratse. 
\v 25 Mank'o Ik meyitsi asho bí atsatsewo b́k'aleyal kup'ar need'o falratse. 
\v 26 Mansha Shed'ano bí atsatsewo b́ k'aletka wotiyal t'afa b́t'afiti bako beyo falratse.
\p
\v 27 «Mank'o ash kúp' iko moots kindr b́detstso biik'oosh shin kúp'man b́ tifawo falitwo aaliye.
\p
\v 28 «Ariko it́sh etirwe ashuwots bofiniru morronat bokeewiru c'ash jamosh boosh orowe eteetwe. 
\v 29 \x - \xo 3:29 \xo*\xt Luk'. 12:10 \xt*\x* Ernmó S'ayn shayir c'ashetu jamo dúre dúrosh bo morro bo aatsa b́ wotiti bako b́ jamon boosh orowe eteeratse.» 
\v 30 Iyesus han b́ keewwere, «Kim shayire bíyatse fa'oni,» bo ettsosha b́tesh.
\s Iyesus indnat bí eshwotsn
\r (Mat. 12:46-50; Luk'. 8:19-21)
\p
\v 31 Iyesus indnat bí eshwotsn bíyok boweyi. Uratsno need'dek't bíyok asho woshat bo s'eegi. 
\v 32 Bín gúúrdek't́ beyiru ashuwots, «Hamb! nindnat n eshwots úratse need' dek't neene bogeyiri» ett bokeewi.
\p
\v 33 Bí were «Tind kone? Tí eshwots konotsne?» ett bí aani. 
\v 34 Bín gúrdek't́ beyiru ash aywots maantsan s'iilfetst, «Eshe! tindnat ti eshwots hanotsiye! 
\v 35 Ik' etts jamo k'alitwo ti'eshu, tmishu, tindu bíne.» bí et.
\c 4
\s Shook shookirwon ariyetso
\r (Mat. 13:10-17; Luk'. 8:4-8)
\p
\v 1 Iyesus aani aats k'ari ganoke daniyo dek't b́tuwi. Ayidek't ayts ash asho b́ maants waat bokakwetsotse bí aats k'aratse fa'a jelbuts kindt be b́dek'i, ash jamonúwere aatsi k'ari gúúratsa b́tesh. 
\v 2 Ay keewwotsnowere jewron boosh b́dany. B́daniyoro boosh hank'owa bí'et. 
\v 3 «K'ewere! goshtso b́shooko shookosh dek' b́keshi. 
\v 4 B́shookfere maay shook ik iko weeri gúrats fed' b́wtsi. Kafwotswere waat mec'dek't maa bok'ri. 
\v 5 Shook k'osho shawi ayo bíaalok dats t'orats fed' b́ wtsi. B́ datso shawi ayo b́t'ut'tsotse manoor bos' b́wtsi. 
\v 6 B́ wotiyalor aawo bí'ats b́keshtsok'on shoolb́wtsi. Dashan ay geenzts s'ap'o b́ deshawotse shuuk' b́wts. 
\v 7 K'osh shookonúwere angits t'ugi taalots fed'b́wtsi. Angitsonu bí eentsok'on guk'b́dek'tsosh shuwalo b́ oori. 
\v 8 Shook k'osho dats sheengats fed'at bos'b́wtsi. B́ bos'onwere eent shuwo b́imi, k'atso shasho, k'atso keez úbo, k'atsonúwere balo b́shwi.» 
\v 9 Manats dabt́ Iyesus, «Shishts waaz detstso k'ewde'e!» bí et.
\s Iyesus jewron b́keewir eegosh b́wottsok'o.
\r (Mat. 13:10-17; Luk'. 8:9-10)
\p
\v 10 Iyesus bí'aali b́ wotor b́ shuuts sha'iru ashuwotsnat tatse git b́ danifwotsnsh jewron b́keewts keewi biitso boaati. 
\v 11 Bíwere boosh hank'owa bí et, «Itsho Ik'i mengisti jango ááshts keewo it danetwok'o imere. Úre beyirwotsshmó boosh jamo jewrone keeweti. 
\v 12 \x - \xo 4:12 \xo*\xt Isa. 6:9-10 \xt*\x* Man b́wotitwere,
\q ‹Bo Ik'omaants aanarr,
\q2 Bomorro boosh orowa eterawok'owe,›
\q S'iilo s'ilfetsr bo be'awok'o
\q Shísho shífetsr bot'iwintsrawok'owa,» eteetsok'one.
\s Shook shookirwo ariyetsman b́ biitso
\r (Mat. 13:18-23; Luk'. 8:11-15)
\p
\v 13 Iyesuswere hank'owa boosh bí et, «Itshowere jewron keewetsan galiyalkeya? Bére, k'osh, jewron keewets jamwotsi ak'alde'erniya t'iwintso itfaliti? 
\v 14 Shookirwo Ik'i aap'oni b́ shookri. 
\v 15 Ik' aap'tso shookewor, shooko shookere werindats fed'tsman b́kitsir Ik'i aap'tso bok'ebor manóór shed'ano wáát bonibitse shooketsman mec'dek' b́wtsts aashwtsi b́ kitsir. 
\v 16 Mank'o dats t'orats shooketsman b́kitsir, Ik'i aap'o boshishor manóór gene'on dek'ts ashuwotsi. 
\v 17 Ernmó manórisha bako bonibotse s'ap' de'atse. Muk'i boteshiyakon Ik'i aap'atse tuutson gishewo wee gond bek'o boats b́bodal manoor dihiniye bowtsiti. 
\v 18 Angitsi taalots shooketsonmó b́kitsir Ik'i aap'tso k'ebiru ashuwotsi. 
\v 19 Wotowa eree datsanatsi asaabiyo, gizi shunonat k'osh wotera tewnon bonibots kindr Ik'i aap'o gu'u b́dek'etwotse shuwalo b́ ooriti. 
\v 20 Dats sheengats shooketsonmó, Ik'i aap'tso shisht t'iwintsdek't k'aaúdek'tswotsi b́kitsir. Man naaro k'atso shasho, k'atso keez úbo, ik ikonúwere bal shuwa b́shuwit.
\s C'eesho b́ c'eesheyir shááno b́ imetwok'o b́wottsok'o.
\r (Luk'. 8:16-18)
\p
\v 21 «Asho c'eesho c'eeshde'e gongrots gedfamó wee oosho bí ats gúp'shfá? B́ gedfo b́ shááno b́be'etwok'o grgjiyatsosha? 
\v 22 \x - \xo 4:22 \xo*\xt Mat. 10:26; Luk'. 12:2 \xt*\x* Mank'o áátsetso b́ be'erawo, áshtso danerawon ooreratse. 
\v 23 Eshe shishts waaz detstso k'ewde'e!»
\p
\v 24 Aani Iyesus boosh hank'owa bí et, «It k'ebiru keewosh it tooko korde'ere, it tatsts tatsik'ac'on itsho tatsetwe, ikinwere itish ayide'erni dabeti. 
\v 25 \x - \xo 4:25 \xo*\xt Mat. 13:12; 25:29; Luk'. 19:26 \xt*\x* Detstsosh dabde'e imetwe, deshawatsnmó dab́ b́ detstsonor bí'atse k'aa'úniye dek'eti.»
\s Eeniru shookon ariyetsok'o
\p
\v 26 Manats dabt, Iyesus hank'owa bí et, «Ik'i mengistú datsats shook shokirw ashoniye bi ari. 
\v 27 Ashman t'ú tokritwe, aawo tuwitwe, aawk'o b́wottsok'o b́danawo shooko boc'b́wtsiti, een b́wtsiti. 
\v 28 Datsunu b́tookon shino b́bos'o, ilo b gimbo kitsitwa, manyako b jáábatse shuwo daatsetwe. 
\v 29 \x - \xo 4:29 \xo*\xt Iyu. 3:13 \xt*\x* Mayonúwere borbwtsor mááy kakwo b́bodtsotse asho manoor maac'iro k'anib́k'riti.»
\s Dogni aawn ariyetso
\r (Mat. 13:31-34; Luk'. 13:18-19)
\p
\v 30 Iyesus hank'owa bí et, «Ik'i mengstu kontoniya no nutsiti? Himo egoneneya aride'e no kitsiti biina? 
\v 31 Snafic'i aawniye bi ari, bi shookewor datsatse fa'a shook jamotse múk'efuniye. 
\v 32 Bi shookeyakonmó eenr bos' jamwotsiyere bbogeti, darotsi kafwots bshirotse kúto aade beyo bofalfetsosh een een jabwotsi kish dek'etúwane.»
\p
\v 33 Iyesuswere ashuwots t'iwintsdek'o bofalitwok'on, hanank'ón b́ keewo ay jewron boosh b́keewfoni. 
\v 34 Bí b́ jewrerawo boon daniraka b́tesh, bo'aali bowootormo b́ danifwotssh jamkeewo iza b́ izfo.
\s Iyesus kúp' jongon giwts aatso s'ik bí aayitsok'o
\r (Mat. 8:23-27; Luk'. 8:22-25)
\p
\v 35 Manots kooc' Iyesus b́ danifwotssh, «Aats k'araniye bak'ets kimone» bí eti. 
\v 36 Ash asho k'azk'rat biyats keshdek't b́beyir jelbúts Iyesusi dek't boami. Jelb k'oshwotswere towat fa'ano botesh. 
\v 37 Eegurahi kúp'o aatsatse tuut jelbuts aatso b s'eenfetso jongon giwts aatso jelbu togo dek't b́ tuwi. 
\v 38 Mank'o b́wotor Iyesus, jelbu shuutso maantsi kayotse k'oyo k'oy dek't b́k'efera b́tesh. B́ danifwots bín tuzdek't «Danyifono! noo nó t'affe nee no kis'o deshatsiya?» bo eti. 
\v 39 Bíwere tokrotse tuut jongman bíhadi, aats k'armanshowere «S'ik eree» bí eti. Jongonu k'az b́k'ri, ay dek' s'ik etb́wtsi.
\p
\v 40 Iyesuswere, «Hank'o itshatir eegoshe? Aak'owe imnetiyo it t'ut'i?» bí et.
\p
\v 41 Bowere ay shatwtsat, bo atsatsewo «Jongonat aats k'aron bísh bo aleyirwan kone bíwo?» bo eti.
\c 5
\s Iyesus kim shayiron s'eents asho b́ kashitsok'o
\r (Mat. 8:28-34; Luk'. 8:26-39)
\p
\v 1 Gelil aatsk'aro jelebon kímt Gergesenon datsomand am bobodi. 
\v 2 Iyesus jelbwatse b́ oot'tsok'on kim shayiron detsets ash iko doowi beewoke kesht manóór gonke b́wtsi. 
\v 3 Ashman doowi ganoka b́befo, konúwor habilyon tifr bín ned'iyosh falraka. 
\v 4 Ayoto muk'onat habiliyona bín tipefo, ernmó habiliyono k'ut'a b́k'ut'fo, muk'ono tishdeni b́juwefo mansh konwor bín deshde'er ned'iyosh falfo aali b́tesh. 
\v 5 Úni aawonowere t'uwe aawon b́ned'irawo doowi bewokonat guri aab abaatse anaanar b́kuhefoni, bí atsonowere shútson k'ut'de'erni b́gaawifo.
\p
\v 6 Bíwere Iyesusi wokoon b́ bek'tsok'on b́maand wos't b́gubron tuk'maldek't bísh b́sagadi. 
\v 7 K'aari eenon k'et'efetst́, «Nee Ik' eeno naay Iyesuso! Nee tiyoke eeg kis'e ndetsi? Ik'i shútson neen k'onre, oona neesha! taan ono bek'shk'aye!» bí eti. 
\v 8 Man bíettsonwere, «Nee gond shayirono ashaanitse kee!» ett azazat b́teshtsosha.
\p
\v 9 Iyesuswere «N shúútso kone?» ett bíaati, bíwere «Aywotsi nowottsotse t shútso kes'i jirwotsi.» ett bí aani. 
\v 10 Datsmanatsnowere boon b́ giisherawok'o ayidek't b́k'oni.
\p
\v 11 Manokno guritsi s'eeno guri ganoke jinirwots fa'ano botesh.
\p
\v 12 Mansh «Oona neesha! amr guritswotsits nokindish noon bazik'aye,» ett bok'oni. 
\v 13 Iyesuswere boosh bíeekere, gond shayirwots ashmanitse kesht guritswotsits bokindi, guritsi s'eenotse git kumok'o wotts guritswots gohatse tengsheyat oot't aatsi k'arots lim bowtsi. 
\v 14 Gurits jinirwots giifat k'az boami, kitonat gat'ariyon keewman keewbok'ri, ash ashonwere wotts keewman bek'osh bo maa mootse bokeshi. 
\v 15 Iyesusmaants bowatsok'on, kim shayiron detseyat teshts ashman bí'atso dandek't, b́ taho tah dek't, b́ befere bek't tek'bowtsi. 
\v 16 Man shin bek'ts ashuwotswere kim shayirman bítse b́ s'eents ashonat guritswotsitse wotts jamo waatswtssh bokeewi.
\p
\v 17 Manóór datsmanatsi ashuwots Iyesus bodatsatse keer k'ay bíametwok'o bo k'oni.
\p
\v 18 Iyesus jelbúts kindoke b́befere fo'erawo bín s'eent teshts ashman, «Oona neesha! n shuutso amna» ett bín b́k'oni.
\p
\v 19 Iyesusmó bísh eekeratse, ernmó, «N gal amr doonzo aawk'o een keewo neesh b́fintsok'owonat aak'o k'aldek't neesh maac'o b́k'ewtsok'o n maa ash ashosh keewwe,» bí et.
\p
\v 20 Ashmanwere Iyesus bísh b́k'alts jamo «Tats kitwotsi» eteets datsatse keewfere b́ tuwi, shishts jamwotswere bo adi.
\s Iya'íros ni'nat Iyesus tahats bodts máátsu.
\r (Mat. 9:18-26; Luk'. 8:40-56)
\p
\v 21 Iyesus jelbon aats k'aroniye bak'ets aani kímt bí aaniyakon ay asho bíyok kakwe b́wtsi, manormó bí aats k'ari gúúratsa b́ tesh. 
\v 22 Manoknó ayhudiwots Ik' k'oni maa naashwotsitse iko fa'e b́tesh. Iya'irosi eteets asho Iyesusi b́bek'tsok'on b́ tufishirots diht 
\v 23 «T na'a múk'efu k'iroshe bi'etiri, woorr kashon b́beyishe oona neesha! waar n kisho biyats gere!» ett kúp'idek't b́ k'oni.
\p
\v 24 Iyesuswere bínton towat bí ami, ay ashuwotswere b́ jafrats sha'at bísh datso bot'ebifere botesh.
\p
\v 25 Tatse git natosh s'atso kud'at ned'ok'azt bí'ere gond bek'iru mááts iku fa'a btesh. 
\v 26 At dants aaywotsok sha'a mawat gondo bek'aat b detsts giz jamo ishbazateni b tesh. Ernmó iki gondefera bí'ami bako b́ jamon shamp'eratsa. 
\v 27 Bi were Iyesus jango shishat bteshtsotse gifniyeyiru ash dagotse b́ jiik'weeron waat b́ taho b t'awi. 
\v 28 Hano b k'al, «Dab b́ tahats t bodal kashitwe,» etaat amanat b teshtsotsna.
\p
\v 29 S'ats kud'manu manór need' b́wtsi, b shodotsno b́ kashtsok'o bi atsotse bish b́shiyeyi. 
\v 30 Iyesuswere manoor ango bí'atse b́keshtsok'o danb́k'ri, ashuwots maants wongr ett aanat, «Kone t taho t'awitsoni?» ett bí aati.
\p
\v 31 B́ danifwotswere, «Ash asho bí atsatsewo gifniyefetst n shuutso b́ sha'efere bek'fetsatniya ‹Kone ti ats bodi?› ni etiri?» bo et.
\p
\v 32 Bíwere man k'altso koni b́ woto bek'osh wongr et aanat b́ s'iili. 
\v 33 Máátsmanmo bi ats wottso b dantsotse shatoon k'ewefetsat b́ shinats dihat ari keewjamo bísh b keewi.
\p
\v 34 Bíwere «T ni'e n imnetiyo neen kashire, jeenon amee, n gond bek'otsnowere kashowe,» bish b́ eti.
\p
\v 35 Iyesus man keewoke b́befere, ayhudiwots Ik' k'oni maa jishirwo gále waats ashuwots ayhudiwots Ik' k'oni maa jishf́mansh, «N naa'u k'irwtseraniyere! eshe haniyak eegoshe danifo n shambiriri?» bo eti. 
\v 36 Iyesusmó man shisht ayhudiwots Ik' k'oni maa jishfmansh, «Amanowe bako shatk'aye!» bí eti. 
\v 37 Iyesus P'et'rosnat Yak'obn, ando Yak'ob eshu Yohansiye okoon konúwor b́shutsoshoyde b́ warawok'o b́baziyi. 
\v 38 Ayhudiwots Ik' k'oni maa jishfman mook bobodtsok'on, Iyesus ashuwots waac'refetst bo eepfere, bo kuheferowe b́ bek'i. 
\v 39 Gítsomand kindtnu, «Wac'r jamannat eepan, eegoshe? Na'ú tokra b tokri bako k'irratsane,» bí et.
\p
\v 40 Ashuwotsmo bí atsa bomiis', Iyesusmó bo jametsi mootse kishbazt, na'ú nihnat indun, b́ shuuts shairwotsi dek't na'ú beyiru maa kayots b́ kindi. 
\v 41 Na'ú kisho dets dek't, «T'alita kumi!» bish bí et. Man etonwere «Nee na'a múk'na'une neesh tuuwe etfe,» eta.
\p
\v 42 Biwere tatse git nati na'a b wottsotse manóór hake bak sha'o dek' btuwi, hank'o b́ wotoro ashuwots ayidek' bo adi. 
\v 43 Iyesusmó wotts keewan konúwor b́danawok'owa koneshor keew k'ayere ett, «B meetwo bish imere!» bí et.
\c 6
\s Iyesus Naazretn b́gac'eetsok'o
\r (Mat. 13:53-58; Luk'. 4:16-30)
\p
\v 1 Iyesus manoke kesht b́datsomand b́ weyi, b́ danifwotswere b́shuutso shoydek't boweyi. 
\v 2 Sanbati aawon ayhudiwots Ik' k'oni mootse daniyo dek' b́twi, ash ayonwere manoke daatseyat bín bok'ebfera botesh, boowere «Ashaan keew jaman eewkneya b́daatsi? Eegi naari dane bísh imetsani? Adits keewanotsi aak'o k'aldek'tnya b́finiri?» ett bo adi. 
\v 3 Aaninwere dabt «Han Mariyam naay mit gashfoniyoshna? Yak'obsho, Yosasho, Yihudsho, Simonsho bo eshwi woshna? B́mishots hanoke nontoniyosha bofa'oni?» ett gac'at bín de'aniyere bo oori.
\p
\v 4 \x - \xo 6:4 \xo*\xt Yoh. 4:44 \xt*\x* Iyesusmó, «Nebiyiyo k'osh dats ashoknee mango b́ datsiti, ernmó b́ took datsatse, b́ jagi datsatsnat b́ meyitsi ashuwots dagotsnmo gac'etwe,» ett boosh bíaany.
\p
\v 5 Manokno k'ats shodetswotsats b́ kisho gedt kashiyoniye okoon adits finwotsi k'alo falratse. 
\v 6 Ash asho amaneraniyere bo'ortsatse tuutso ayi dek't bí'adi, maniyakon Iyesus gál gálots ananatni b́ danifo.
\s Tatse git b́ wosheetsots daniyish bowoshewok'o
\r (Mat. 10:5-15; Luk'. 9:1-6)
\p
\v 7 Tatse gitwotsi bíyok s'eegdek't git gito woshdek't b́woshi, kim shayirwotsatse alo boosh bí imi, 
\v 8 \x - \xo 6:8-11 \xo*\xt Luk'. 10:4-11 \xt*\x* Boamor weerindatse gumboniye okoon mish wotowa, k'arc'itono, gizono bo edots desh bode'aawok'o boon bí azazi. 
\v 9 Boshowere hank'o bí eti, «It tufots c'aamo gerde'ere bako git kito dab kark'ayere, 
\v 10 Aawoknoor ash maa ikots it kindor, datsman itfakshfetsosh itkindts maamanitsne it tesheti. 
\v 11 \x - \xo 6:11 \xo*\xt Wosh. 13:51 \xt*\x* Ashuwots iti ibiyo k'ayr it keewo k'ebono bok'azts jamoke it tufatsi k'undo tebk'rar keer k'ayamere, manwere bo ats gawe b́ wotitiye.»
\p
\v 12 Woshetswotswere manoke kesht, ash jamo naandrone bí'etetwok'o bodany. 
\v 13 \x - \xo 6:13 \xo*\xt Yak'. 5:14 \xt*\x* Fo'eraw aywotsnowere bokishi, ay ashuwotsatso zeyito futt bokashiyi.
\s Gupfo Yohansi úd'etsok'o
\r (Mat. 14:1-12; Luk'. 9:7-9)
\p
\v 14 Iyesus shútso eent jamoke daneb́wtstsotse, nugúso Herodiswor b́ jangman shishb́k'ri. Ik ik ashuwots, «Gupfo Yohans k'irotse tuure, manshe adits keew jamanotsi k'aliruwo bíne» boetfere botesh.
\p
\v 15 \x - \xo 6:14-15\xo*\xt Mat. 16:14; Mar. 8:28; Luk'. 9:19 \xt*\x* K'oshwotswere, «Bíwo Eliyasiye» bo etfera botesh, oortswotswere «Yotsi nebiywotsitsi ikok'oyiye» bo etiri.
\p
\v 16 Herodismó jam man shisht, «Han b́biimb tk'ut'itso Yohansiye, hambe! bík'irotse k'az tuure,» bí et. 
\v 17 Herodis bí'eshu Filip'os máátsu Herodyadi b́dek'tsosh, Yohansi biyatse tuutson detsidek't típmoo gedt́ bín tipitni b́ b́tesh. 
\v 18 \x - \xo 6:17-18 \xo*\xt 3:9-20 \xt*\x* Yohans b́tipewere, Herodisish «Ni eshu máátsu dek'o nemotse aaliye!» err b́ keewfosha b́tesh.
\p
\v 19 Herodiyadu mansh iirat Yohansi úd'iyosha b́geefo b́teshi, ernmó falratsa. 
\v 20 Herodiswere maniye shin Yohans kááwonat S'ayn b́woto b́ dantsotse bín sharfetsni b́ kotiifo. Herodis Yohans keewo b́ shishtsi taawo kic'a b́ kic'efo, b́woteferor geneeúwona bín b́ k'eebfo. 
\v 21 Herodis b́ shuweyi aawo mangiyosh naash naashwotssh, kes' jishirwotssh, Gelilitse fa'a daneets ik ikwotssh moonat ushon k'ani b́k'ri. Mannowere Herodiyad sheeng weero datsbdek'i. 
\v 22 Manno Herodiyad ni'i móónat ushi moots kindat k'afefetsat Herodisnat bínton teshts ibwotsi b gene'ushi, naashonwere na'úsh, «N geets keewo b́wottso b́wotiyalor taan aatwe neesh imetwe» bí et. 
\v 23 «Dab t mengsti badonor b́wotiyal, ni'aatts jamo neesh imetwe!» ett bish b́ taari.
\p
\v 24 Biwere bi'indok amaat, «Eego aatuta?» bieti, bi'indwere « ‹Gupfo Yohans tooko taash imewe› err aatwe» bi et.
\p
\v 25 Na'únwere manoor kááron naashomand aanat, «Gupfo Yohans tooko saniyots gerde and taash imeyish geefe,» etaat bi'ati.
\p
\v 26 Nugúsonwere keewmaanatse tuutso ayidek't shiyanbwtsi, wotowa bako s'eegets ashuwots shinatse b́ taartsotse bi attsman bish baziyo geeratse. 
\v 27 Mansh nuguso manoor kotiru kes' kes'fwotsitse, iko Yohans tooko k'ut'de b́ weetwok'o b́ wosh, kes'fonwere tipi maa manits amt Yohans tooko b́ k'ut'i, 
\v 28 K'ut'ets tokmano sahaniyots ged dek'wat na'úsh bí imi, na'únwere b indsh imbk'eri. 
\v 29 Yohans danifwotswere man bo shishtsok'on waat b́ duuno dek't bo duuki.
\s Iyesus úts kum shuwotsi b́maanzitsok'o.
\r (Mat. 14:13-21; Luk'. 9:10-17; Yoh. 6:1-14)
\p
\v 30 Wosheetsots boon woshetsoke aani waat Iyesus shinatse kakwe bowtsi, bo danitsonat bo k'alts jamo bísh bokeewi. 
\v 31 Bíwere «Itiye itaal ash aaloke ikmaants amr muk'i kashde'ere,» bí eti, man bí'etwere b́maand weyirwonat amiruwon bo aytsotse misho dab bo metwoko bo t'ut'tsotsne. 
\v 32 Mansh boaali wotosh jelbots kind dek't ash aalok k'az boami.
\p
\v 33 Bo amfere ay ashuwots boon bek't danbok'r, kit kitotse kesht tufoon wos'fere boshino beshat book kakwebowtsi. 
\v 34 Iyesus jelbutse b́ oot'or ay ashuwotsi b́ bek'i. Jints deshaw mereerwotskok'o bowottsotse boosh maac'o k'ewbwtsi, ay keewonowere boosh daniyo dek' b́ tuwi. 
\v 35 Datso ilefere bí amtsotse b́ danifwotsi b́ maants t'int bísh hank'o bo et, «Hanokhaniye worwe, datsonwe ilere, 
\v 36 Bo metwonu bí altsotse gúranatse fa'a gat'ariwotsnat gal galotse amr misho keew bodek'etwok'o hanotsi deenk'rowe.»
\p
\v 37 Iyesusmó, «Bo bometwo boosh it imere» ett boosh bíaani. Bowere «Beree am bo meet misho git bal dinariyon \f + \fr 6:37 \fr*\fqa Ik dinarriyo: \fqa*\ft Ik aawo ash iko b́ finor bísh dashef ik aaw k'awntsa. \ft*\f*kewde boosh imonowa?» boet. 
\v 38 Bíwere, «Ambts mishe it detsi? Aab amr s'iilere,» bí eti, s'iiltnwere «Úts mishonat git mus'on fa'ee,» boeti.
\p
\v 39 Iyesuswere ash ashosh kakuwe kakuwede'er, atts sismanats bo bezitwok'o b́ danifwotssh bí azazi. 
\v 40 Mansh ashuwots ikok balo ikoko balk'atso kakuwe kakuweyat be bodek'i 
\v 41 Iyesuswere úts mishmannat git mus' manotsi k'aaú dek't daro maants kááw dek't s'iilt b́ deeri, mish mano tiitsdek't ashuwotssh bo kayitwok'o b́ danifwotssh bí ími, mank'o mus' gitwotsno jamwotssh b́ kayi. 
\v 42 Jamwots máát bowori 
\v 43 B́ danifwotswere meere oorts mishi tiish tisho tatse git mari s'eeno bo kaakwi. 
\v 44 Mishman maats nungshwots taawó úts kumok'oy b́ tesh.
\s Iyesus aatsi k'ari abaatse shaawefere bí'amtsok'o
\r (Mat. 14:22-33; Yoh. 6:15-21)
\p
\v 45 Iyesus manór ashuwotssh ameree etfetst b́ danifwots jelbots wotde'e bak'ets Bete Sayd maants kimr b́shino bok'ut'itwok'o boon bíazazi. 
\v 46 Maniyere hakon bo atse k'aleyat Ik'o k'onosh guromants b́ keshi. 
\v 47 Datsonwere b́ ilor jelbu aats k'ari taalotsa b tesh, bímo bíyal datsatsa b́ tesh. 
\v 48 B́ danifwots bo shinatse jongiru jongatse tuutson jelbu joko maawt bo kic'efere bek'b́k'ri, t'úwotse jed'iy sa'atonat tatse git sa'ati dagotse aats k'aratse shaawefere bo maants b́ weyi, boyere beshar amosha b́ tesh. 
\v 49 Ernmó bí aats k'ari abaatse shaawefere bí'amfere meyo boosh bíartsosh bo kuhi. 
\v 50 Jamwots bín bo bek'tsok'on tekbowtsi.
\p Bímó manoor, «Kup'ore shenúwotso! taane! shatk'ayere!» bíet, 
\v 51 Jelbots kindt, bonton beb́dok'tsok'on jongo ned'b́wtsi, b́ danifwotsu ay dek't bo adí. 
\v 52 Bo nibo dungwtsat, mishatse wotts adits keewman bo t'iwintsrawo ooratni bako, keewan boon adirawnk'e b́ tesh.
\s Iyesus Gensaret'n shodtswotsi b́kashyok'o.
\r (Mat. 14:34-36)
\p
\v 53 Aats k'aro bo kimtsok'on, Genseret'its am bo bodi, jelbu datsats t'intsdek't tipbok'ri. 
\v 54 Jelbu'abatse bo ot'tsok'ón manóór ashuwots Iyesusi danbok'ri. 
\v 55 Bowere datsman gúratse hake bako wos'fetst Iyesus b́beyiru kááw jamok shodetswotsi es'ats kurdek't woo bo tuwi. 
\v 56 Bí amts jamoke gal galotse, kitotse, gat'ariyotsno shodtswotsi jebats kisht b́ shinats bo t'intsfera boteshi, b́ shemi jilo dab t'awiyosh bín bok'onfo, bíats bodts jamwotswere kasha bokashefo.
\c 7
\s Nih nihwots niwi jango.
\r (Mat. 15:1-9)
\p
\v 1 Ferisawino eteetswotsnat Iyerusalemn waats Muse nemo danif ik ikwots Iyesusmaants waat bín gúúrdek't kakwebowtsi. 
\v 2 Iyesus b́ danifwotsitse niwon bo s'aynawo man etonwere kisho bo masherawon misho bomaafere bobek'i.
\p
\v 3 Ferisawino eteetswotsnat ayhudi eenashwotsn bo niwo koton sheengsh bo kisho bo masherawo marakno bo tesh. 
\v 4 Mank'o gawiyon bo aanoro bo masherawo marakno, wanc'ono, korono, k'áázon dozets kac'onat es'on mashok'o wotts ayo bo nemo bokotfo.
\p
\v 5 Hank'o b́wottsotse ferisawino eteetswotsnat Muse nemo danirwots, «N danifwots eenash eenashwots nemo tiitst, eegishe kisho bomasherawo misho bomeyiri?» ett Iyesusi bo aati.
\p
\v 6 Bímó hank'o ett boosh bíaani, «It git alberetswotso! Isayas it jangosh,
\q ‹Ash ashaaniye bo noon mec'rone taan bomangiri bako
\q2 Bo nibo tiyatse woke!
\q
\v 7 Ash niwo Ik'i nemok'o woshdek't danifetst k'awntsalosh taan bomangiyiri!› ett b́ keewts bek'o aree.
\p
\v 8 «Mansh it Ik'i alo k'azat ash nema it kotiri.»
\p
\v 9 Maniye hakon Iyesus hank'owa boosh bí et, «It nemo kotosha etaat Ik'i nemo it tiitsiri, 
\v 10 Muse, ‹N nihnat nindn mangiwe, aaninu b́ nihsh wee b́ indsh gondo keewit asho úd'ewe,› etre. 
\v 11 Itmó hank'owa it etfoni, ‹Ash iko b́ nihnat bíndsh k'alo bín geyits keew jamoniye K'urbani wotere› man etonwere ‹Ik'osh imk'rekee› boosh bí'etal, 
\v 12 B́ indnat b́ nihi tep'o k'azo falfe etetute. 
\v 13 Hank'onowere it took nemo k'otosha etaat Ik' aap'tso it gaakiri. Mank'onowere han artso ay keewe it k'aliri.»
\s Ash kiimshf keewo
\r (Mat. 15:10-20)
\p
\v 14 Ash ashonowere aani b́ maants s'eegdek't, boosh hank'o bí eti, «It únets t'iwintsde taan k'ewere, 
\v 15 Ash kimshfoniye, ash gitsotse keshetwoniye bako, uratse ash gitsomaants kindirwoniye asho kimshrake! 
\v 16 Eshe k'ebet waaz detstso k'ewe!»
\p
\v 17 Iyesus ash asho k'azk'rat moots b́ kindtsok'on b́ danifwots aridek' b́ keewtsman biitso bín bo aati. 
\v 18 Bíwere hank'o ett boosh bíaani, «Itwere han t'iwintsratsteya? Uratse ash atsi gitsomaants kindit keewo ash kimsho b́falawok'o itsh galeratsa? 
\v 19 Maac' weeron beshar uromaantsa b́ kesheti bako nibomand amatse». Hannowere Iyesus meetu jamo s'ayin b́wottsok'o b́ daniyi.
\p
\v 20 Manats dabt hank'owa bíet, «Ash kimishfwots ashnibotse keshf keewwotsi. 
\v 21 Bowere, gond tewno, wido, úmp'o, ash úd'o, 
\v 22 gobo\f + \fr 7:22 \fr*\fqa Goba: \fqa*\ft Ash maatsok amtsoni. \ft*\f*, jaalo, weeri gondo, ash dirsho, shiraats jintsi woto, okooro, onoo, b́ tooko dambaan danbaan detso, kis' deshawo wotonat hanotsiye. 
\v 23 Gond keew jaman ash nibotsne b́ keshfoniye, ashono b́ kimshfoni.»
\s Mááts Iku imnetiyo
\r (Mat. 15:21-28)
\p
\v 24 Iyesus manoke tuut T'iros kitu ganoke fa'a galots bíami, maa ikots kindit manoke b́ beyirwok'o konwor b́ danawok'o b́ geyi, wotowa bako ááshosh falratse. 
\v 25 B na'ú kim shayiron detsets mááts iku Iyesus jango shishat manóór waat b́ tufi shishirots b dihi. 
\v 26 Máátsunwe Sirofinik'e dats ashu wotat Griki noon keewf ashi b tesh, biwere bna'ú atsotse fo'erawo b́kishish Iyesusi b́k'oni, 
\v 27 Iyesusmó, «Nana'i misho de'er kanwotssh imo woteratse aab shin nana'uwots worune,» bí eti.
\p
\v 28 Bi were «Aree tdoonzo, b́ woteferor kanwotswor mari shirotse wotde nana'o b́ mafere fed'ts mishi fed'o mafnale,» etaat biaani.
\p
\v 29 Mansh Iyesus, «N keewanatse tuutson fo'erawo n na'ú aatsótse keshre, éshe n gál amee!» bí et.
\p
\v 30 Biwere b galomaants bi aanór b na'ú fo'erawo fakshb́k'erere es' abaatse jeenon b k'eefere datsbdek'i.
\s Iyesus gidik'onat duts asho b́kashitsok'o
\p
\v 31 Iyesus T'iros datsatse kesht k'az bíami, Sidon weeron amt Tats kita eteef datson Galil aats k'aromaants b́ weyi. 
\v 32 Manoke gidik' wotat, aani dutso b́ maants dek't boweyi, b́ kishono bí ats b́ gedetwok'o bok'oni. 
\v 33 Iyesuswere ashman ashotse k'aldek't bí aali dek' amt b́ jaabo ash man waazots gedt, s'udono tuf ett asho alberono b́ shuu'í, 
\v 34 Daromaand kááw dek't s'iilt ah ett kasho wosht ashmansh «Eeftah!» bí et. B́ biitsonwere «K'eshewe!» etee.
\p
\v 35 Manóró b́ waazo k'eshe b́wutsi, bíalberonwere bish b́ wutsi, ik kic'alono s'ayintsdek't keewo dek' b́ tuwi. 
\v 36 Iyesus keewan konshor bokeewrawok'o ashuwotsi bí azazi, wotowa bako bokeewrawok'o bíazaztsoniye bogshdek't ay dek'tni bokewfo bo teshi. 
\v 37 Shishts jamwotswere ay dek't adt, «Jam keewo sheengonee b́fiini! gidik'wotsu boshishetwok'o, dutswotswere bo keewitwok'owe b́ k'aliri!» bo et.
\c 8
\s Iyesus awd kum ashuwotsi b́maanzitsok'o
\r (Mat. 15:32-39)
\p
\v 1 Manoori aawwotsitse aani ay ashuwots kakwe bowtsi, bometwono deshatsno bo tesh, mann Iyesus b́ danifwotsi s'eegdek't boosh hank'o bí eti, 
\v 2 «Ashaanots hamb, taanton keez aawo teshrnee, bometwo eegor bo deshawotse boosh t maac'o k'ewere, 
\v 3 Hank'on bo k'ak'tsok'on bo gálomants ameree err t fakshiyal weerindatse maawniye bowtsiti, dab boyitse ik ikwots wokooke waaknee.»
\p
\v 4 B́ danifwotswere, «Béré worwotse jam ashaanotssh bodet misho kone daatso faliti?» ett bísh bo aani. 
\v 5 Iyesuswere, «Ambts misho detsfte?» ett boon bíaati, boowere, «Shawat misho detsfone» bo eti.
\p
\v 6 Ashuwots datsats beewne bíeti, shawat mishono dets dek't Ik'osh mango b́ ími, tiitsdek't ash ashosh bo imetwok'o b́ danifwotssh b́ ími, boowere ash ashosh bo t'intsi. 
\v 7 Ay woterawo mus' nana'úwotsno detsfno botesh, mus' manots jangosho Ik'o b́údiyakon ash ashosh bo t'intsitwok'o b́ danifwotssh b́ keewi. 
\v 8 Jam ashuwots máát bowori, méére oorts mishi tiish tishono kakut shawat een een maron s'eeno bo k'aaúwi. 
\v 9 Maats ashuwotsu awd kumok'o wotituno botesh, Iyesus bono ameree ett faksh b́ k'ri. 
\v 10 Maniyere il b́ danifwotsnton jelbats wotdek't Dalmanut awrajo maants k'azbíami.
\s Adits keewo bek'osh aatetsok'o
\r (Mat. 16:1-4)
\p
\v 11 \x - \xo 8:11 \xo*\xt Mat. 12:38; Luk'. 11:16 \xt*\x* Ferisawino eteyirwotsitse Iyesus maants waat bínton moosho dek' botwi, bín fadosh gawt darotse adits keew iko boosh b́kitsitwok'o bín bo'aati. 
\v 12 \x - \xo 8:12 \xo*\xt Luk'. 11:29 \xt*\x* Iyesus ah ett kashowosht, «Dúranatsi s'oot'o adits keewo bísh k'aleyish eegosh geefa? Aroniye itsh t keewiri, dúranatsi na'osh b́ jamon adits keewo kitseratse!» bí eti. 
\v 13 Boon k'az k'rat aani jelbats wotdek't bak'etsomand k'az b́ kimi.
\s Ferisawino eteefwotsnat Herodis boot' shasho
\r (Mat. 16:5-12)
\p
\v 14 B́ danifwots misho bo battsatse tuutson jelbotse ik mishuniye okoon eegor deshatsno bo tesh. 
\v 15 \x - \xo 8:15 \xo*\xt Luk'. 12:1 \xt*\x* Iyesuswere «Ferisawino eteefwotsnat Herodis boot' shashatse it atso korde'ere,» ett bí azazi.
\p
\v 16 Bowere «Han bí etir, daneraka misho no t'ut'tsosha b́wotiti» ett boatsatseyewo bokeewi.
\p
\v 17 Iyesusewere bo gawirwo dandek't hank'o boosh bí eti. «Misho no t'út'tsosha etaat eegoshe it gawiri? Andoor eegor t'iwintso falawwotsnat danawots itneya? It nibo andoor b́ dungtsok'oneya b́fa'oni? 
\v 18 \x - \xo 8:18 \xo*\xt Erm. 5:21; Hzk'. 12:2; Mar. 4:12 \xt*\x* Ááwo detsfetsat be'aatsteya? Waazono detsfetsat shiyatsteya? Aak'oneya gaweyo itsh b́ k'azi? 
\v 19 Úts misho úts kúm ashosh t titsor b́ ooro ambts mari s'eene it k'aaúwi?» Bo were «Tatse git mari s'eena» bo eti.
\p
\v 20 «Mank'o shawat mishono awd kúm ashuwotssh t titsor oortso ambts mari s'eene it k'aaúwi?» Et boon bí aati. Bowere «Shawat mari s'eena» bo eti.
\p
\v 21 Bíwere «Beree, andoor t'iwitsratsteya?» Bosh bí eti.
\s Iyesus Betesayidn ááw dog asho b́kashitsok'o
\p
\v 22 Betesayid maantsowere ambobodtsok'on ashuwots dog iko Iyesus maants dek' boweyi, shodtsman b́ shuuítwok'o bok'oni. 
\v 23 Bíwere bek'falaw ashman b́ kisho detsdek't jishfere gálotse b́kishi, ashman ááwats s'udo tuf ett b́ kisho bíats gedt «Ik jago bek'irwiya?» ett bí aati.
\p
\v 24 Ááw doogonu kááw dek't, «Ee ashuwots taash be'eyirune, ernmó shaíru mitwotsiye taash bo ariri,» bí eti.
\p
\v 25 Ando aani Iyesus asho aawwotsats b́ kisho b́ gedi, manoor ashman t'iwitsdek' b́ s'iili, kashatnu jam keewo s'ayintsdek't b́ bek'i. 
\v 26 Maniye il Iyesus «Galots kindk'aye,» ett b́ galomand bí ametuwok'o fakshb́k'ri.
\s Iyesus Mesihi b́ woto P'et'ros b́ keewtsok'o
\r (Mat. 16:13-20; Luk'. 9:18-20)
\p
\v 27 Iyesusnat b́ danifwotsn Filip'os K'isariya eteyiru dats kayu ganoke fa'a galwots maants botwi, weeratse bobefere Iyesus, «Ash ashuwots taan koni etfnó?» Ett b́ danifwotsi bí aati.
\p
\v 28 Bowere, «Ik ikwots gupfo Yohansiye, k'atswots Eliyasiye, ando k'atswotswere nebiyiwotsitsi ikoniye etfne neesha,» ett bo aaniyi.
\p
\v 29 \x - \xo 8:29 \xo*\xt Yoh. 6:68-69 \xt*\x* «Itmo taan koni etfte?» ett bí aati. P'et'roswe «Nee he, Ik'o futtso neene,» ett bí aani.
\p
\v 30 Iyesusere, «T jango konshor keewk'ayere,» ett kúp'shdek' boosh b́ izi.
\s Iyesus k'ironat k'irotse b́ twitwok'o tewrero b́ keewtsok'o
\r (Mat. 16:21-28; Luk'. 9:22-27)
\p
\v 31 Iyesus b́ danifwotsi hank'o ett daniyo dek'́ b́twi. «Ash na'o ay gond bek'o daatso bísh geyife, eenashwotsoke, kahni naashwotsnat Muse nemo danifwotsoke gac'etwe, úd'etwe, ernmó keez aawoniye okoon k'iro da'ar twitwe.» 
\v 32 Keewano bek'shdek't boosh b́keewi, manóór P'et'ros bín bíaali ash aalok s'eegdek't fayo b́tuwi. «Hank'ó et k'aye» eton bín b́ fay. 
\v 33 Iyesusmó wongr ett aanat b́ danifwotsi s'ilt́ P'et'rosi, «Nee shed'anan t shutsomandan amee! nee ashka bako Ik'iko gawratsne!» ett b́ fay.
\s Krstos jafrats sha'o bíaatit wosho
\r (Mat. 10:38-39; 16:24-28; Luk'. 9:23-27; 14:25-27)
\p
\v 34 \x - \xo 8:34 \xo*\xt Mat. 10:38; Luk'. 14:27 \xt*\x* Maniyere il Iyesus ash asho b́ danifwotsnton s'eegdek't boosh hank'o bí et, «T jafrats woo shuntso fa'e wotiyal b́ tooko juk'rowe, b́ mask'aliyono kurde'er tshuutso wowe, 
\v 35 \x - \xo 8:35 \xo*\xt Mat. 10:39; Luk'. 17:33; Yoh. 12:25 \xt*\x* B́ kashu faridek'o geyiru jamo bin t'ut'etwe, s'uznmó t jangonat doo shishiyi jangosh b́ kasho beshide imetwo fari dek'etwe, 
\v 36 Asho dats jamatsi gaal jamo daatsrr b́ kasho b́t'ut'al eege bísh b́ k'aliti? 
\v 37 Asho b́ kashu woriyosh aak'o k'awntse dashosh b́ faliti? 
\v 38 Haalirwotsnat morrets, dúranatsi s'oot'anots shinatse taanat tkeewi jangosh jitsitu jamosh, ash na'o tnih mangon S'ayin melakiwotston t wóór b́ jangosh taawere jitsitwe.»
\c 9
\s Iyesus aro b́wone woneyo
\r (Mat. 17:1-13; Luk'. 9:28-36)
\p
\v 1 Manatse tuut Iyesus, «Itsh aroniye tietiri and hanoke fa'anotsitse ik ikwots Ik'i mengstú een angnon b́ woor bobek'fetsosh k'irrawots fa'ane» bí eti.
\p
\v 2 Shirt aawoniye il Iyesus P'et'rosi, Yak'obnat Yohansn s'uzi b́ shutsats dek't, gur ayidek't eeno abaats kesh b́dek'i, bo shinatsno bí aro wone b́ wutsi.
\p
\v 3 B́ shemonu ayidek't golbwutsi, dats jik'atse konwor mashtso mankok'o mayde'er s'ayintso b́falawokó b́ wotefetso nas'buutsi. 
\v 4 Manoor Eeliyasnat Musen be'eyat Iyesusnton bokeewefere boosh bobe'eyi. 
\v 5 P'et'rosuwe Iyesussh, «Danyirwono! hanoke beyo noosh sheenge, eshe iko neesh, iko Musesh, iko Eliyassh wotit keez gofwotsi awone» bí eti. 
\v 6 B́danif keezwots ayidek't boshattsotse P'et'eros b́ keewirwo danatse b́teshi.
\p
\v 7 \x - \xo 9:7 \xo*\xt Mat. 3:17; Mar. 1:11; Luk'. 3:22 \xt*\x* Dawnonu waat boon degb́dek'i, dawnotsno, «T shunts na'o haniye! bín k'ewere!» etiru k'ááro b́ shiyeyi. 
\v 8 Manóóro wongr ett aanat bo s'iile boganoke Iyesus s'uzi bako konnor be'aatsno.
\p
\v 9 Guri abaatse bo oot'or Iyesus, «Ash na'o k'irotse b́ tuufetsosh it bek'tsan konshor keewk'ayere» ett boon bí azazi.
\p
\v 10 B́keewtsono k'ebdek't bo nibots detsbodek'i, wotowa bako «K'irotse tuwa etaan eega etek'úna?» ett bo atsatsewo bo keeweyi.
\p
\v 11 \x - \xo 9:11 \xo*\xt Mil. 4:5; Mat. 11:14 \xt*\x* Bowere, «Muse nemo daniyirwots Eliyasiye shino weetwoni bo etir eegoshe?» ett bo aati.
\p
\v 12 Bíwere hank'o ett boosh bíaanyi, «Arikee, Eliyasiyere shino weetwe, unono káátsitwe, ernmó, ash na'o mangts gondbek'o b́ dek'etwonat b́ gac'etwok'on guut'etso aawk'one? 
\v 13 Taamó Eliyasiye shino waare, b́ jangosh guut'etsok'on ashuwots boshuntsok'o bíats k'alrne» etirwe itsha.
\s Iyesus kim shayiron detsets na'o b́ kashiyo
\r (Mat. 17:14-21; Luk'. 9:37-43)
\p
\v 14 Iyesusnat b́ danif keezwotsn b́ danif ortswotsok aanat boowor ay ashuwots kakweyat boon gúúrdek't bo s'iili, Muse nemo danifwotsu b́ danifwotsnton bo moshfera bo teshi. 
\v 15 Ashjamo Iyesusi bobek'tsok'on adt bo tek'i, b́ maantsó wos't jamó bín bo aati. 
\v 16 Iyesuswere, «Bonton itmoosheyir eegi jange b́ teshi?» ett boon bíaat.
\p
\v 17 Ashuwots dagotse iko hank'o ett bí aani, «Danifono, gidik' woshts gond shayiron detsetso t na'onee n maants dek'waare, 
\v 18 Bíyatse b́ twoor bín dike b́dikfoni, b́ nonotse úmbo kisht b́ gasho b́ k'ashfoni, bí atsonwere duunok'o shuu'ini b́ wutsefoni, kim shayirmano bo kishish n danifwotsi aatre b́ teshi, ernmó falratsne.»
\p
\v 19 Iyesuswere hank'o boosh bí eti, «It amaneraw ashaanots! awrish b́ borfetsone itnton t beeti? Awrish b́ borfetsone iti t k'amiti? Aab na'o t maants dowere!» 
\v 20 Bowere na'o b́ maants dek'boweyi, kim shayirmanwere Iyesusi b́bek'tsok'on na'o dikdek't b́ s'ik'íyi, na'onwere datsats p'up'urefetst úmbó kisho dek'b́twi. 
\v 21 Iyesuswere na'o nihsh, «Shodan awre hake bín b́ detsi?» et bí aati. Nihonwere hank'o ett bí aani, «Marmat'on detstniye. 
\v 22 Úd'osho geeyat ayoto tawonat aatsots b́ fet'foni, ernmó k'alosh nfaliyal oona! noosh maac'o k'ewowe! nonowere tewu'e!»
\p
\v 23 Iyesuswere, «N faliyala etfi? Amanit ashosh jam keewo faletwe!» bí bí eti.
\p
\v 24 Manoor na'o nih, «Amanonere amanitwe, ernmó amano tmawituu jam keewatse nee taan faliwee!» ett b́ kuhi.
\p
\v 25 Iyesuswere ash ashuwots dimbirefetst bowaafe b́ bek'i, kim shayirmansh, «Nee dogonat gdik' wotts kim shayironó na'o atsotse n keshetwok'o anarnu bí atsots n kindrawok'o neen azazere!» ett b́ hadi.
\p
\v 26 Kim shayironúwere k'aari eenon k'eet'at, na'ono ay dek't b́ s'ik'iyakon b́ keshi, na'onúwere duunok'o wotb́wtstsosh aywotssh k'irk arbwtsi. 
\v 27 Ernmó Iyesus na'o kisho detsdek't tuuzbk'rí, na'onu tuut ned'b́wtsi.
\p
\v 28 Iyesuswere moots b́kindór b́ danifwots, «Eshe eegoshe kim shayiro noo kisho nomaawi?» ett bí aali boaati.
\p
\v 29 Bíwere, «Han naaro Ik' k'ononat s'oomiyon b́ wotiyala bako k'oshon eegonor keyatse.» et boosh bíaany.
\s Iyesus b́ k'iri janogonat b́ tuwi jango gitlo b́ keewtsok'o
\r (Mat. 17:22-23; Luk'. 9:43-45)
\p
\v 30 Iyesusnat b́ danifwotsn beyokman k'azk'rat Gelil weeron boami, b́ beyokono konwor b́danetwok'o Iyesus geeratse b́tesh, 
\v 31 Man b́wottsonwere Iyesus b́ danifwotssh, «Ash na'o ashuwots kishots besheyar ímetwe, bo were bín úd'itúne, úd'eyakonmo keezl aawots tuwitwe.» etfetst boon b́daniri b́ tesh.
\p
\v 32 B́ danifwotsmó keewan t'iwintsde'atsno, bo aatrawok'oyisho shatbowtsi.
\s Jamoniyere bogo kone?
\r (Mat. 18:1-5; Luk'. 9:46-48)
\p
\v 33 Iyesusnat b́ danifwots K'frnahom maants bo waa, Iyesus moots b́ kindihakon b́ danifwotssh, «Weratse waafetsat it mooshiru keewo eebi b́teshi?» et boon bíaati. 
\v 34 \x - \xo 9:34 \xo*\xt Luk'. 22:24 \xt*\x* Eree bomó s'ik et bobeyi, manwere weratse bo befere, «No únetsitse bogo kone?» et bo mooshfere boteshtsotsna. 
\v 35 Bíwere be b́dek'iyakon tatsegitwotsi s'eegdek't, «Konwor wotowa asho shintso wotosh b́geyiyal únoniyere shuuts wotáár únosho guuts woto bín geytwe» bí et. 
\v 36 Na'í marmat' iko dek'wat bodagots ned'í bík'ri, gep'dek'tnu boosh hank'o bí et, 
\v 37 \x - \xo 9:37 \xo*\xt Mat. 10:37; Luk'. 10:16; Yoh. 13:20 \xt*\x* «Nana'anotsitse ikok'o t shúútsosha err dek'etwo taano dek'etwe, taano dek'etu jamo taan b́woterawo taan woshtso dek'etwe.»
\s Noon shid'aw jamoniye noonton ike
\r (Luk'. 9:49-50)
\p
\v 38 Yohans Iyesussh, «Danifono ash ikoniye n shúútson fo'erawo b́kishfere nobek'i, ernmó, noonton wotob́k'aztsotse bazirone» bí et.
\p
\v 39 Mannowere Iyesus hank'o bí et, «T shúútson adits keewo finefetsr manóór ti atsats gondo keewitwo bí altsotse k'ayk'rore, bazi k'ayere, 
\v 40 \x - \xo 9:40 \xo*\xt Mat. 12:30; Luk'. 11:23 \xt*\x* Noon k'eferaw jamó nontoniye, 
\v 41 \x - \xo 9:41 \xo*\xt Mat. 10:42 \xt*\x* Aroniye itsh ti etiri, Krstosk it wottsosh t shúútsosh dab́ aats ik brc'k'o itsh ishitwo b́ k'awntso t'ud'atsee» bíet.
\s Ashosh t'ug wotatse ats kordk'o b́ geyitwok'o
\r (Mat. 18:6-9; Luk'. 17:1-2)
\p
\v 42 «Konwor asho taan amaniru nana'a múk'anotsitse ikosh t'ug b́ wotoniyere di' shúts mango b́bimbats tífde'er aats k'arots b́ juwewo k'anefe. 
\v 43 \x - \xo 9:43 \xo*\xt Mat. 5:30 \xt*\x* Mansh n kishu neesh t'ugo bwotiyal k'ut'de juk'rowe! git kisho deshfetsr gahanemits n juwewoniye kish k'ut' wotar kash weero maants n kindo k'anefe. 
\v 44 Gahanem b́ shipir ash maafo k'irraka, b́ taawo tahraw beyoke. 
\v 45 N tufo neesh t'ugo b́ wotitkawotiyal, k'ut'de juk'rowe, git tufo deshfetsr gahanemits n juwewoniyere, dúr wotar kashomaants nkindo neesh k'anefe. [ 
\v 46 Gahanem b́ shipro k'irrawo, b́ tawo tahraw beyoke.] 
\v 47 \x - \xo 9:47 \xo*\xt Mat. 5:29 \xt*\x* Ni ááwonwere neesh t'ugo b́wotitka wotiyal kishde juk'rowe, git ááwo deshfetsr Gahanemits n juwewoniyere ik ááwetso wotar Ik'i mengstots kindo neesh k'anefe. 
\v 48 \x - \xo 9:48 \xo*\xt Isa. 66:24 \xt*\x* Gahanemitse ash mááf shipro k'irraka, b́ tawonwere tahrakee. 
\v 49 Wosho beeron b́ s'aynfok'o, asho ik ikon tawon s'ayno bín geyitwe. 
\v 50 \x - \xo 9:50 \xo*\xt Mat. 5:13; Luk'. 14:34-35 \xt*\x* Beero sheenge, ernmó, beeri shaawo b́t'út'al eegneyá bín it shawshiti?
\p «Ititsere shuneyi beeri shaawo beewe, it atsastewo ik wotarr jeenon beewere,» bí et.
\c 10
\s Máátsunat kenihon faksheyi jangosh Iyesus b́ danitsok'o
\r (Mat. 19:1-12; Luk'. 16:18)
\p
\v 1 Iyesus manoke tuut, Yordanos fokoniye bak'etsonat Yihud datso maants bí ami. Aydek't ayts asho aani b́maants ko'ee b́wtsi, bíwere bali b́k'alfok'owa b́danyfo.
\p
\v 2 Fersawino eteetswotsitse k'atswots bíyok t'iinbodek'i, bín fado geeyat, «Asho máátso b́fakshitwk'o nemotse fa'áá?» ett bín bo'aati.
\p
\v 3 Iyesuswere, «Muse keewan jango iti bí'azaztso eebi?» bí eti.
\p
\v 4 \x - \xo 10:4 \xo*\xt Iwi. 24:1-4; Mat. 5:31 \xt*\x* Bowere, «Museyiyere bin b́fakshtsok'o kitsit work'ato ímr b́ fakshitwok'o wotowe etre» bo eti.
\p
\v 5 Iyesuswere hank'o ett boosh bíaani, «Museyiyere tzaziyan itsh b́ guut' it maac'o kup'at bíere shisho itk'aynee, 
\v 6 \x - \xo 10:6 \xo*\xt Aze. 1:27; 5:2 \xt*\x* ernmó shintson azeetswotsi bíazor dek' b́ tuutsok'on ‹Ik'o nungushonat máátson woshdek'tni bíaziye. 
\v 7 Mansha asho b́ nihnat bí indn k'ayr b́ máátsunton ike b́wotiti. 
\v 8 \x - \xo 10:7-8\xo*\xt Aze. 2:24 \xt*\x* Gitwotswere ik atse bowotitye,› maniyehako git bowoto b́ oorere ike bowotiti. 
\v 9 Eshe Ik'o ik b́ woshtso asho k'alk'aye.»
\p
\v 10 Moo maants bo aanor b́ danifwots keewman jango aani Iyesusi bo aati.
\p
\v 11 \x - \xo 10:11-12 \xo*\xt Mat. 5:32; 1 K'or. 7:10-11 \xt*\x* Bíwere hank'o ett boosh bíaany, «B́ máátsu fakshr k'osh mááts dek'etwo b́ máátsu ats dabt dek'ts gobetso wotere, 
\v 12 Mank'ó b kenihatse faksheyar k'osh nungushosh mááts ametuwú bíwere gobetsu woteraniye etee.»
\s Iyesus nana'uwotsi b́ deertsok'o
\r (Mat. 19:13-15; Luk'. 18:15-17)
\p
\v 13 Boon b́ shuíítwok'o nana'o Iyesusok dek'tboweyi, ernmó b́ danifwots nana'a dek'weyirwotsi bo hadi. 
\v 14 Iyesuswere man b́bek'tsok'on b́ danifwotsi fayat hank'o boosh bíet, «Ik'i mengstu hanotsk'owwotssh b́wottsotse k'ayere nana'uwots tiyok wone, boon bazik'ayere, 
\v 15 \x - \xo 10:15 \xo*\xt Mat. 18:3 \xt*\x* Aarikoniye itsh ti etiri, na'ok'o wotar Ik'i mengstu de'aawo b́jamon bits kindratse.» 
\v 16 Maniye il nana'uwotsi matdek't b́ kisho bo ats geddek't boon b́ deeri.
\s Gaalets ash iko
\r (Mat. 19:16-30; Luk'. 18:18-30)
\p
\v 17 Iyesus manoke kesht amoke b́befere ash iko b́maand wos'fere waat b́ shinatse tuk'maldek't, «Doo danífono, dúre dúri kasho daatsosh eeg k'alo taash geyifa?» ett bín bí aati. 
\v 18 Iyesuswere hank'o ett bísh bí aaniy, «Eegoshe doono taash nieetírí? Ik' ikoniye okoon konúwor dówó aaliye, 
\v 19 \x - \xo 10:19 \xo*\xt Kesh. 20:12-16; Iwi. 5:16-20 \xt*\x* B́ tzaziwotsi danfnee, boowere, ‹Úd'k'aye, gobo amk'aye, úmp'k'aye, kooto gawk'aye, dirshk'aye, n nihnat nindn mangiwe› eteetswotsiye.»
\p
\v 20 Ashmanwere, «Danifono, tzazi hanotsi na'ortson kotdek're» bí et.
\p
\v 21 Iyesuswere bín s'iilt shunbk'ri, et hank'o bísh bíet, «Neesh ortsu ik keew fa'ane, amee, ndetsts jáámo kemr n gizo tugretswotssh ime, ko'ííyets gaalo darotse daatsitune, manyere hakon t shutsats wowe» 
\v 22 Ashmanwere man b́shishtsok'on shiyanon b́ shiitso aak'bwutsi, aydek't detstsi b́ wottsosh shiyanefere k'az bíami.
\p
\v 23 Iyesus wongret aanat b́ danifwotsi s'iilt, «Gaaletsosh Ik' mengstots kindo aak'o kic'ike!» bí eti.
\p
\v 24 B́ danifwots b́keewman shisht bo adi, Iyesusmó aani hank'owa bí et, «Nanawotso! Ik' mengsto maants kindo aak'o kic'itke! 
\v 25 Gaalets asho Ik' mengtots b́ kindoniyere kambulo mafi fúrotse b́ besho ketefee.»
\p
\v 26 B́ danifwots ayidek't adt, «Béré hank'on kone fal kashitwoni?» ett bo atsatseyo bo'aateyi.
\p
\v 27 Iyesus bomaand s'iilt, «Arikon keewan ashuwotssh faleratse, Ik'oshmó faletwe, Ik'oshe jám keew falefe» bí et.
\p
\v 28 P'et'roswere, «Hamb, noo úno k'azk'rat n jafratse waarone» bí et.
\p
\v 29 Iyesuswere hank'o ett bí aani, «Aaroniye itsh ti etírí, t jangonat dooshishiyi jangosha ett b́ moo, wee b́ eshuwotsi, b́ mishotsi, b́ indi wee b́ nihi, wee b́na'ó, wee b́ detstso k'azet asho bogo daatsitwe, 
\v 30 Dúranatsnoor gisheyonton dab́ moowwotsi, bí eshwotsi, b́ mishuwotsi, b́ nana'o, b́ taaronowere bal kisho daatsitwe, weyiru datsatsno dúre dúri beyo daatsitwe. 
\v 31 \x - \xo 10:31 \xo*\xt Mat. 20:16 \xt*\x* Wotowa eree shinatse fa'a aywotsitse shuutstsi wotitune, shutsts teshtswotswere shintsi wotitune.»
\s Iyesus b́ k'iritwok'onat k'irotse b́ tuwi jango keezlo shini b́ keewtsok'o
\r (Mat. 20:17-19; Luk'. 18:31-34)
\p
\v 32 Iyerusalem maants daamet weerindatse bosha'efere, Iyesus bo shin shinatsa b́ sha'iri b́tesh, b́ danifwotswere keewanatse tuutson bo adi, b́ shutsatse weyirwotsu shat bowtsi. Aaninwere tatsegitwotsi bíyok t'intsdek't, bí ats bodet keewi jango hank'o ett boosh b́ keewi, 
\v 33 «Hamb Iyerusalem maants amishee no etiri, Ash na'oniye kahni naashwotsnat Muse nemo daniyrwotssh beshide'er imetwe, boowere k'iri keewo bí ats angshitune, Ik'i ash woterawwotssh beshide'er imetúnee, 
\v 34 Ik'i ash woterawotswere bí ats kaashetúne, bíats s'udetune, bíno jot'etune, úd'itune, ernmó keezl aawoniye okoon tuwitwe.»
\s Yak'obnat Yohansn bo k'on k'ono
\r (Mat. 20:20-28)
\p
\v 35 Zebdiwos nanauots Yak'obnat Yohansn Iyesusok t'int, «Danifono, neen nok'onitu jamo noosh nk'alitwok'o geefone» bo et.
\p
\v 36 Bíwere, «Itsh eeg tk'ale it geyi?» bí eti.
\p
\v 37 Bowere, «N mengsti mangotse noyitsi iko n k'ano maants noyitsi iko n giromaants no beetwok'o alo noosh ime» bo et.
\p
\v 38 \x - \xo 10:38 \xo*\xt Luk'. 12:50 \xt*\x* Iyesusmó, «It it k'onírwo danatste, taa t úshet gond bek'i wanc'o úsho falituteya? Taa t gupet gupewono it fal gupeetuteya?» bí et.
\p
\v 39 Bowere, «Ee, falitwone,» bo eti. Iyesuswere hank'o boosh bí eti, «Arikee taa t úshet gond bek'i wanc'o úshetute, taa t gupet gupewono gupetute, 
\v 40 ernmó t giromaantsonat k'anomaants beyo imetwo taanaliye, han boosh ímeetwots Ik'o boosh b́k'anítswots s'uzshe.»
\p
\v 41 Oorts tatswots man shisht Yak'obnat Yohansats fayo dek'botuwi. 
\v 42 \x - \xo 10:42-43 \xo*\xt Luk'. 22:25-26 \xt*\x* Iyesus jamwotsi b́ maants s'egdek'et boosh hank'o b́ eti, «Ik' ash woteraw ashuwotsats naashtswots, ash k'eezirwotsi err s'egeyirwok'onat bo jishirwotswere bo atse alo bo detstsok'o danfte, 
\v 43 ititsnomó mank'o woto geyiratse, it dagotse een wotó geyirwo, it guuts woto bísh geyife, 
\v 44 Mank'o ititse jamoniye shintso woto geyirwo jamosh guuts wotowe. 
\v 45 Ash Na'oniyere ashuwotssh finonat b́ kashu ay ashuwots bin bokashit k'awntso woshde'er ímosha b́ weyi bako bísh bofinitwok'o waratse.»
\s Iyesus ááw dogo Bert'elemiwosi b́ kashitsok'o
\r (Mat. 20:29-34; Luk'. 18:35-43)
\p
\v 46 Maniyere il Iyesus b́ danifwotsnton Iyariko kito maants b́ weyi. Beshatnu kitotse kesht bí amor ayidek't ay ashuwots b́ jafrats bo sha'efera botesh, T'imewos naay Bert'elemiwosi eteets ááw dog ash iko weeri gúúratse bedek't k'ono b́ k'onfera b́ tesh. 
\v 47 Nazrettso Iyesus man weeron b́ beshirwok'o danb́k'rtsok'on, «Dawit naay Iyesuso, oona neesha! taash maac'ó k'ewowe!» etfets kuho dek't b́twi.
\p
\v 48 Aaywotsu, «S'ik eree!» ett bín bo hadi, bímó, «Dawit naayo aage! Oona neesha maac'o taash k'ewowe!» etfetst aydek't bogshdek't b́ kúhi.
\p
\v 49 Iyesuwere need'dek't, «Bín s'eere!» bí eti, boowere dogosh, «Eree kup'owe! tuuwe! Iyesusiye neene b́s'egiri!» bo et.
\p
\v 50 Bíwere b́ shemó juuk'rat t'oolat tuut Iyesusmaants bíami.
\p
\v 51 Iyesuswere, «Neesh eeg tk'alish geefi?» ett bín bí aati. Ash ááwu dogonwere, «Daniyrwono! oona neesha! ti'ááwo b́ bek'etwok'o taash woshwe,» bí et.
\p
\v 52 Iyesuswere, «Eree! amee, n imnetiyoniye neen kashire,» bí eti. Ashmanwere manoor bek'o b́fali, weerindono Iyesus shuutso shoy dek't b́ tuwi.
\c 11
\s Iyesus mangi eenon Iyersalemits b́ kindo
\r (Mat. 21:1-11; Luk'. 19:28-40; Yoh. 12:12-19)
\p
\v 1 Iyesusnat b́ danifwotsn Iyerusalem maants t'infe boowor Bete Fagenat Bitaniya eteets dats weeron waat Debrezeyit gurok bo bodi, Maniyako Iyesus b́ danifwotsitse gitwotssh hank'o ett b́ woshi, 
\v 2 «It shinatse fa'a galuts shino ameree, bíyok it bodtsok'on konúwor ik asho bíyats kesh b́ danaw daazna'o tipetso daatsitute, bíno biishde'er hakan de'ewore. 
\v 3 Konwor asho ‹Eegishe han it k'aliri?› bí'etala ‹Doonzosh b́ geytsotsnee erere, manoró aani doyitwe,› erere.»
\p
\v 4 Bowere amt daaz na'aman weeri gúúratse maa úratse tipetsok'on daatst bobitsi. 
\v 5 Manoor manoke need'dek't teshts ashuwotsitse ik ikwots «Daazna'o it biitsir eegoshe?» ett bo aati.
\p
\v 6 Bowere Iyesus boosh b́ keewtso bo keewi, ashuwotsu k'az bok'r. 
\v 7 B́ danifwotsu daazna'o Iyesus maants dek'boweyi, bo tahono daazna'o jik'ats bo geere Iyesus bíats beeb́dek'i. 
\v 8 Ash aywotswere bo shemo weeratsa bo es'fera bo tesh, k'atswotswere bodootse maarets miti jaabo k'ut'dek't werindatsa bo es'fera boteshi. 
\v 9 \x - \xo 11:9 \xo*\xt Dub. 118:25-26 \xt*\x* Shin shinats beshtswotsnat shutsatse shoy dek't weyiru jamwots, «Hosa'ana! Doonzo shútson wetwóniye deereke! 
\v 10 Weyiru nonih Dawit mengestu deerekiye! darotsno hosa'ana!» ett bo kúhi.
\p
\v 11 Iyesuswere Iyersalemi b́ bodtsok'on Ik'i moots b́ kindi, gúúrmanatse fa'a keew jamo b́ s'ííli, datsonu b́'iltsotse tatse gitwotsnton Iyerusalemitse kesht Betaniy maants bí ami.
\s Iyesus b́ c'ashts belesi mitu
\r (Mat. 21:18-19)
\p
\v 12 Yaatsok'ono Betaniyere bo aanor Iyesus k'ak'bwtsi. 
\v 13 Bmaaró atts belesi mitu wokoon bek't daneraka shuwo biyatse b́datseyala et bmaand bí ami, ernmó bmaand b́ t'inor belesi shuwo b́ borafa'otse maaroniye okoon eegor biyatse daatsratse. 
\v 14 Mansho Iyesus belesi mitush, «Haniyak konwor ni atse shuwo maak'aye!» bí et.
\p Han b́ keewferowere b́ danifwots boshishi.
\s Iyesus Ik'i mootse jaakirwotsi b́ kishtsok'o
\r (Mat. 21:12-17; Luk'. 19:45-48; Yoh. 2:13-22)
\p
\v 15 Iyerusalemits bobodtsok'on Ik'i moots kindt bítse kemirwotsnat keewiru ashuwotsi kisho dek' b́twi, giz wonyirwots t'arap'ezonat kúrkúnd kemirwots jorwotsi b́ gúp'shi, 
\v 16 Asho konnor b́ wotiyal, eegi naari k'ac'o b́ wotiyalor, kurde'er Ik' k'oni maa manitse b́sha'erawok'o b́baziyi. 
\v 17 \x - \xo 11:17 \xo*\xt Isa. 56:7; Erm. 7:11 \xt*\x* Hank'o ett boon b́ daniy, « ‹T moo ash jamosh Ik' k'oni maa etitwe!› ett gut'eratsa? Itmo bik'tswotssh goop'ee it woshi.»
\p
\v 18 Kahni naashwotsnat Muse nemo danyrwots man b́keewfere bo shishi, ash jamonu b́ daniru danmaanatse tuutson adt boteshtsotse bín shatbowtsi, mann aak'ok'alde'er bín bo t'afiyet malo bo geefera botesh.
\p
\v 19 Datsonwere b́ iltsok'on Iyesusnat b́ danifwotsn kitotse k'az bokeshi.
\s Belesi mítú atse tuutson daatsets dano
\r (Mat. 21:20-22)
\p
\v 20 Yaats guurok'on weeron beshefetst belesi mit man b s'ap'onton shuuk'wtsat biere bobek'i. 
\v 21 P'et'roswere keewman gawdek't Iyesussh «Danifono! hambe, n c'ashts mitú shuuk' wtserane» bí et.
\p
\v 22 Iyesuswere boosh hank'o bí eti, «Ik'one amanore, 
\v 23 \x - \xo 11:23 \xo*\xt Mat. 17:20; 1 K'or. 13:2 \xt*\x* Aarikoniye itsh ti etiri, konwor asho b́ nibotse b́ nibon amanar b́geyiyal keew jamo bísh b́wotitwok'o amanar, guran ‹Hanoke tuur aats k'arots shap'ewe,› bí'etal bísh wotitwe. 
\v 24 Eshe itsh keewirwe, Ik' k'onon konnari keewonor it k'oniyal itsh k'alk'retsok'o woshr amanore, it k'oniru jamone itsh ímetwe. 
\v 25 \x - \xo 11:25-26\xo*\xt Mat. 6:14-15 \xt*\x* Darotse fa'o itnih it morro itsh oorowe bí etetwok'o, itwere k'onosh itned'or, asho ik keewon iti irire wotiyal bísh orowa erere. [ 
\v 26 It k'oshwots fints morro boosh orowe eto itk'azalmó darotse fa'o it nih it fints morrosh itshor orowe eraatse.»]
\s Iyesus kon alon b́ finirwok'o aatetsok'o
\r (Mat. 21:23-27; Luk'. 20:1-8)
\p
\v 27 Aaninwere Iyerusalem maants boweyi, Iyesuswere Ik' mootse ananoke b́befere kahni naashwots, Muse nemono danifwotsnat eenash eenashwotsn b́ maants waat́ 
\v 28 «Keewanotsi n finir kon aloneya?» himó keewanotsi n k'alitwok'o alo neesh imtso kone? ett bín boaati.
\p
\v 29 Iyesuswere boosh hank'owa bí et, «Taawere iti ik keewo aatitwe, it taash it aaniyal, taawere keewanotsi kon alon t k'alirwok'o itsh keewitwe. 
\v 30 Yohans gupo Ik'okike moo ashokike? Aab taash anyibe'ere,» bí eti.
\p
\v 31 Bowere, «And eshe eega erono?» Eton boatsatsewo shiyewo dek't botwi, « ‹Ik'okne› no etal ‹Beree eegoshe bín amano itk'azi?› eteetwe, 
\v 32 ‹Ashokike,› no eetale?» Mank'o bo erawok'o ash jamo Yohansi arikon nebiyiye bo eetfosh shatbowtsi. 
\v 33 Mansha, «Noo danatsone.» ett bo aani.
\p Iyesuswere, «Béré taawor kon alon keewanotsi tfinirwok'oo itsh keeweratse,» bí eti.
\c 12
\s Woyini mitwotsi goshfwotsn ariyets jewro
\r (Mat. 21:33-46; Luk'. 20:9-19)
\p
\v 1 Manats dabt Iyesus jewron hank'o ett keewo dek' b́ tuwi «Ash ikoniye weyinyi mito b́toki, b́ gúúrono b́ kas'i, woniyo fíís'osh wotit gop'ono ishdekt dóóz b́k'́ri, woyniwo kotoosh wotit ayidekt eents gmbyi kako agb́k'ri, maniyere hakon mítwots datsman goshtswotssh shiro imk'rat wok datso k'azbíami. 
\v 2 Shuwo b́bodtsok'on, woyni shuwotse bísh bodowetwok'o b́ guutso goshtswotsok b́ woshi. 
\v 3 Goshtswotsmó b́ guutso detsdek't tog bo ishihak kishi baashon damiy bok'ri. 
\v 4 Doonzo aani k'osh guutso b́woshi, goshtsmanots manowere fas'dek't́ ketidek't bo damyi. 
\v 5 Aaninu k'osho b́woshere úd'bok'ri, mank'o ayuwotsi b́woshere, ik ikotsi bo togi, k'oshwotsno bo úd'i. 
\v 6 And k'alosh bísh ortso b́ shunts na'o wosho s'uzi b́ tesh, mansh ‹Tnayi mangiyo k'ayatsne› ett gawdek't s'uwi aawatse b́ naay b́ woshi. 
\v 7 Ernmó goshtswots bo atsatsewo ‹Han eshe naatetwoniye! woore bín úd'k'rone! b́ naato noosh wotitwe› bo eti. 
\v 8 Mann detsdek't bo úd'i, woyiny mit beyok manoke kish dek't ur juubok'ri.
\p
\v 9 «Eshe weyni doonzo eege b́ k'aliti k'una? doonzo b́tookon weetwe, gooshtswotsno úd'itwe, weyni mitmano k'oshwotsish imk'ritwe. 
\v 10 \x - \xo 12:10-11 \xo*\xt Dub. 118:22-23 \xt*\x* Eshe,
\q ‹Gmby agfwots bo gac'ts shútso
\q2 Bíwere shúts kup'o shúts jamwotsi tungúshatse kaatsde detset shúts wot b́wtsi,
\q
\v 11 Manúwere doonzo fínk fínee,
\q2 no ááwoshowere adike›
\q2 etirwo S'ayin mas'aafotse nababeratsteya?»
\p
\v 12 Ayhudi naashwots Iyesus jewrdek't b́ keewtsman boon s'iilitk b́woto t'iwints dek't danbok'rtsosh bín deshdek'o bo geyi, ernmó ashjamo shatt k'azk'rat bo ami.
\s Ereer dashi jango aatetsok'o
\r (Mat. 22:15-22; Luk'. 20:20-26)
\p
\v 13 Ferisawiwotsi eteefwtsnat Herodis jirwotsitse wotts ik ik ashuwots Iyesusi b́ noon keew keewon detsosh b́ maants bo wosheyi. 
\v 14 Bíyok t'iintnwere bísh hank'o boeti, «Danifono, neehe ar keewtso nwotonee danfone, ash shatonat eege taash eteti eton nfints keewo aaliye, Ik'i weerindono aronee n daniyiri, eshe, Rom nugúsosh ereer dasho niwe moo? Niwaalne? Ereerwonomo ereerk'ayono?» bo eti.
\p
\v 15 Iyesuswere git alberetswotsi bowottsok'o dan k'rat «Eegoshe taan detso itgeyiri? Aab ambarman dewar taash kitswere,» bí eti.
\p
\v 16 Bowere ambaro bísh dek't boweyi, bíwere «Ambarmanatse fa'a arunat bíyats guut'ets shúútsu konkne?» ett bíaati.
\p Bowere «Rom nugúsoke,» bo eti.
\p
\v 17 Iyesuswere «Béré nugúsoko nugúsosh, Ik'oko Ik'osh ímeree,» ett boosh bíaaniy. Bowere bíaany anyatse tuutson bo'adi.
\s K'irtswots k'irotse tuwi jangosh aateetsok'o
\r (Mat. 22:23-33; Luk'. 20:27-40)
\p
\v 18 \x - \xo 12:18 \xo*\xt Wosh. 23:8 \xt*\x* «K'írtswots tuwo aaliye,» etef Seduk'awino eteefwots Iyesus maants waat́ hank'o ett bo aati, 
\v 19 \x - \xo 12:19 \xo*\xt Iwi. 25:5 \xt*\x* «Danyfono, ‹Ash iko na'o b́shuurawon k'iron b́máátsuatse b́k'aleyetka wotiyal bí eshu máátsmani de'er k'írtso shaato shegrshwee,› ett Muse noosh guut're. 
\v 20 Eshe, shawat eshwwots fa'ano bo teshi, jam manotssh k'aabo máátso dek't na'o b́ shuurawon k'írb́wtsi, 
\v 21 Bo eshu gitlonu máátsmani dek't́ na'o b́shuurawon k'irb́wutsi, keezlonwere mank'ó wotb́wtsi, 
\v 22 Mank'oon shawat eshwots bin dek't shááto boshegrishrawon k'irbos'uwi, jamoniyere il ando máátsman k'irbwtsi. 
\v 23 Shawat eshwots tar taron bín dek'rneree, eshe k'irtswots bo twoor aawshe mááts bwotiti?»
\p
\v 24 Iyesuswere hank'o ett boosh bíaany, «It it shelir S'ayn mas'afwotsnat Ik'i angon it dartsoshe? 
\v 25 K'irtswotsiyere botwor darotse beyiru melakiwotskok'owa bowotiti bako de'aatsnó de'eratsne. 
\v 26 \x - \xo 12:26 \xo*\xt Kesh. 3:6 \xt*\x* K'irotse tuwi janga wotiyal Ik'o Musesh buushitsi tawotse eeg bísh b́keewtsok'o Muse mas'aafotse nababeratsteya? Manwere ‹Taa Abraham Ik'o, Yisak' Ik'o, Yak'ob Ik'o taane,› bí ettsoniye. 
\v 27 Mansha Ik'o kashetswots Ik'a bako k'irtswots Ik'aliye, it imó ayidek'atniye it sheliri.»
\s Jamoniyere bogts tzazyo
\r (Mat. 22:34-40; Luk'. 10:25-28)
\p
\v 28 \x - \xo 12:28-34 \xo*\xt Luk'. 10:25-28 \xt*\x* Muse nemo daniyirwotsitse iko bomooshirman b́k'ebfera b́teshi, Iyesus sheengshdek't boosh bíaanitsok'ó nem danifman t'iwintsb́dek'i, Iyesus maants t'iindek't «Jamoniye bog tzaziyo aawne?» ett b́aati.
\p
\v 29 Ieyesuswere hank'ó ett bísh bíaanyi, «Jamoniye bogts tzaziyo ‹Isra'elo! shiye, Izar Izewer no Ik'oniye ik Ik'e,› 
\v 30 \x - \xo 12:29-30 \xo*\xt Iwi. 6:4-5 \xt*\x* Neewere Doonzo Izar Izeweri n maac' s'eenon, n be jamon, nnib s'eenon, ni angi s'eenon shune, etirwonye. 
\v 31 \x - \xo 12:31 \xo*\xt Lew. 19:18 \xt*\x* Han arts gitl tzaziyoniye, ‹k'osh asho n tokok'o woshde'er shune,› etirwoniye. Gitetsanotsiyere k'osho bogts tzaziyo aaliye.» 
\v 32 \x - \xo 12:32 \xo*\xt Iwi. 4:35 \xt*\x* Muse Nemo danifonwere Iyesussh hank'o bíet «Sheenge, danifono! ‹Ik'oniye ike, bíye oko Izar Izewer k'osho aaliye› etaat nkeewtsoniye aree. 
\v 33 \x - \xo 12:33 \xo*\xt Hos. 6:6 \xt*\x* Mansh asho Ik'o maac' s'eenonn, b́ be jamon, nib s'eenon, ang s'eenon shunonat k'osh asho b́ tokok'ó woshde'er shuno bísh geyife, tawats mitsr s'uwiyet wosho t'itsonat k'osh wosho Ik'osh t'intsoniyere git tzaziyanotsi koto boǵfee.»
\p
\v 34 Iyesuswere Muse Nemo danifman danitelefonat t'iwitson bíaanitsok'ó bek't «Neehe Ik'i mengstuuke wokk neenaliye» bí eti.
\p Maniye hakon Iyesusi aatosh ááwu shuuk'tso konwor aali.
\s Mesihiyo jango aatetsok'o
\r (Mat. 22:41-46; Luk'. 20:41-46)
\p
\v 35 Iyesus Ik' mootse danifetst hank'o ett bíaat, «Muse nemo danyirwots ‹Mesiyo Dawit naayiye,› bo etír eegoshe? 
\v 36 \x - \xo 12:36 \xo*\xt Dub. 110:1 \xt*\x* Dawit b́tookish S'ayn shayiron jisheyat
\q ‹Ik'o t doonzsh
\q2 N balangarwotsi n tufi shirots neesh t gerfetsosh
\q2 T k'ani aaromand beewe,› etre.
\m
\v 37 Dawit b́ tookon ‹Doonza› et b́s'eegiyakon eshe, Krstos Dawitsh aak'oneya b́ naay b́ wotiti?» Ay ashuwotsu gene'úona bín bok'ebiri botesh.
\s Muse nemo danfwotsnat ferisawiwotsatse bo atso kotiyetsok'o
\r (Mat. 23:1-36; Luk'. 20:45-47)
\p
\v 38 Iyesus b́ daniyor hank'o etre, «Tahi geenz geenzo karde hake bako gúúro, gawyotsno mangts jamo dek'osh shunírwots Muse nemo danyfwotsatse it atso kode'ere, 
\v 39 Bo ayhudiwots Ik' k'oni mootse mangts jooro, móónat úshi beyokno mang beyoko daatsoshe bogeefoní. 
\v 40 Be'ewosh bo t'intsiru geenzide Ik' k'ononwere webdek't kenih k'irts máátswots detstso bo bik'foni, mansh boon bog angshe kotiri.»
\s T'oo máátsu im imo
\r (Luk'. 21:1-4)
\p
\v 41 Iyesus giz ko'iyeyiru sat'ni shinatse b́ beewor ashasho sat'nots gizo bo fet'fere s'iilfetst b́teshi, gaalets ayuwots ay gizo bo gedfere bo teshi, 
\v 42 T'oow mááts iku waat git santim wotit k'azwotsi manits dabbk'ri. 
\v 43 Iyesus b́ danifwotsi s'eegdek't hank'o bíet, «Aroniye itsh tietiri, sat'nots giz gedts ash jamwotsitse bogsh dek' gedtsuniye t'owu máátsaniye. 
\v 44 K'oshwots bo jamets bo ímiye bo detstsotse s'eent oortsoniye, bimó tugrets wotefetsat eegonor b orirawo b detsts jamo imraniye.»
\c 13
\s Iyesus Ik' moo b́ gaahitwok'o b́ keewtsok'ó
\r (Mat. 24:1-2; Luk'. 21:5-6)
\p
\v 1 Iyesus Ik' mootse keshfetst b́ danifwotsitse iko, «Danifonó, shútsanotsnat gmbiyanotsn s'ííle, adiknee!» bíeti 
\v 2 Iyesuswere «Gmbi een eenanotsi bek'irwiya? Shúts jamanots gaahitune, shútsats shútso kos'eyarr ooritwo aaliye,» ett bísh bíaany.
\s Dúrí s'uwi milikito
\r (Mat. 24:3-14; Luk'. 21:7-19)
\p
\v 3 Iyesus Ik' maa shinatse fa'a Debrezeyit guri abaatse b́befere P'et'rosu, Yak'obu, Yohansnat Indriyasn bo aal b́ maants t'iindek't 
\v 4 «Keewan b́wotitwo awre? Jaman wotosh b́t'ínor b́ mlkito eebi? Aab noosh keewwe» eton boaati.
\p
\v 5 Iyesuswere hank'o ett boosh bíaani, «Konwor iti b́darirawok'o it tooko korde'ere, 
\v 6 Ayuwotsiye ‹Taa Krstos taane!› etfere t shútson wetuune, ay ashono daritune, 
\v 7 It ganoke kes'o kes'ewonat kes'i jango it shishor tek' k'ayere, jaman b́woto oreratse, ernmó manoor dúri s'uwo borafa'ee. 
\v 8 Ash asho bíaatsatseyo, mengsto mengstats kes'o tuuzitwe, dats datsatse dats shek'ewonat k'ak'on wotitwe, jaman na'a it'í kic'o b́twortsok'o kic'e.
\p
\v 9 \x - \xo 13:9-11 \xo*\xt Mat. 10:17-20 \xt*\x* «Itwere it tookish it tooko korde'ere, ashuwots iti moosh moosheyirwok beshide'er ímetúne, ayhudiwots Ik' k'oni mootsnowere iti jot'etnee, gawo taash it wotitwok'o alirwotsnat naash naashwots shinats angshosh ned'itute. 
\v 10 Ernmó jaman b́woteftsere shino dooshishiyo datsjamatsi ashjamosh bodo bín geyife. 
\v 11 Ashuwots iti deshde angshosh bo t'intsor, ‹Eebí nokewiti k'úna?› err shiyank'ayere, S'ayin shayironi bako itnaliye keewiti. Eshnee, manóór itsh bí ímts mec'ro keewwere. 
\v 12 Eshuwo bíeshuwi, niho b́na'o k'irosh beshide'er ímetwe, nana'onu bo ind nihats tuwitúne, bonowere úd'itune. 
\v 13 \x - \xo 13:13 \xo*\xt Mat. 10:22 \xt*\x* Teshútsosha err ash jamoke shit'eek wotitute, ernmó k'amde'e b́s'uufetso kup'itwoniye kashitwe.
\s Kic'iyit gondbek'o
\r (Mat. 24:15-28; Luk'. 21:20-24)
\p
\v 14 «Ando daatseyo bín b́geyiraw beewoke t'afo dowet wic'its keewo bek'etute, hanowere nababirwo t'iwintsde'a manóór Yihud datsatse fa'uwots guromants woc'nee, 
\v 15 \x - \xo 13:15-16 \xo*\xt Luk'. 17:31 \xt*\x* Maa tookats keshdk't fa'o ood'r mootse ik keewo dek'osh moots kindk'aye. 
\v 16 Tarotse fa'onu b́ shemdek'o shuuts aank'aye. 
\v 17 Manóór na'i maac'wotsnat s'aats ishiru na'i indwotsnsh indowe boosha! 
\v 18 Jaman joshon b́woterawok'o Ik'o k'onwore. 
\v 19 \x - \xo 13:19 \xo*\xt Dan. 12:1; Bek'. 7:14 \xt*\x* Man dúr, Ik'o datso bí'azortson tuut andish b́borfetso be'e danerawo gond bek'o wotitwe, shinomaantsishor mank'óó kic'o b́jamon boratse. 
\v 20 Doonzo aaw manotsi k'awintso b́k'azink'ere konwor kasho falrawnk'e, ernmó marat'ets ashuwotssha eteere aawmanots k'awnetúne.
\p
\v 21 «Eshé konwor wotowa ‹Krstos hambe hanokna!› Wee ‹Ekebe ekewokna!› itsh bí'etal bín amank'ayere. 
\v 22 Kootets kirstosotsnat kootets nebiyiwots weetúne, bo boosh b́faleyink'ere marat'etswotswor dab́ bo orerawo dariyosh adits keewo finitúne. 
\v 23 \x - \xo 13:24 \xo*\xt Isa. 13:10; Hzk'. 32:7; Iyu. 2:10, 31; 3:15; Bek'. 6:12 \xt*\x* Jam keewo itsh shino keewre eshe it tooko korde'ere.
\s Krstos aaniyi b́weyi jango b́ keewtsok'o
\r (Mat. 24:29-31; Luk'. 21:25-28)
\p
\v 24 «Manoori aawwotsitse, gond bek'maniye il, aawu t'alwitwa, aashitsnu bshaano imatsaniye, 
\v 25 \x - \xo 13:25 \xo*\xt Isa. 34:4; Iyu. 2:10; Bek'. 6:13 \xt*\x* K'eenwotsu daaratse fed' s'wituno, daaratse beyiru angwotswere giwwtsituno. 
\v 26 \x - \xo 13:26 \xo*\xt Dan. 7:13; Bek'. 1:7 \xt*\x* Maniyere hakon Ash Na'o een angonat een mangon daawnon b́ wááfere bek'etwe, 
\v 27 B́ melakiwotsno woshitwe, boowere awd kaaton amr datsonat dari deshok b́borfetso fa'úwotsi, bísh marat'ets ashuwotsi kakwitúno.
\s Doonzoko kitsit belesi mitú ariyetsok'o
\r (Mat. 24:32-35; Luk'. 21:29-33)
\p
\v 28 «Belesi mitú s'ílde'e biatse dande'ere, bjabwots k'uk'o botworonat bo maarwots bo atóór manoor k'aawo\f + \fr 13:28 \fr*\fqa Maari ata: \fqa*\ft Keewetsan biitso b́ kitsir mitwotsatse maaro boc'r bí atfo k'aawon b́wotoniye. \ft*\f* b́t'intsok'o danetute. 
\v 29 Mank'ó itwere jaman b́woto itbek'oor Ash Na'o weet aawo, waat maa úratse b́ karntsok'o dande'ere, 
\v 30 Arikoniye itsh tietiri, and shuwetsanots bobeshefetsere jaman s'eenetwe. 
\v 31 Daronat datson beshituno, ti aap'tsonmó b́jamon besheratse.
\s Doonzo b́ weet aawonat sa'aton konúwor danatse
\r (Mat. 24:36-44)
\p
\v 32 \x - \xo 13:32 \xo*\xt Mat. 24:36 \xt*\x* «Ernomó aawman jango nihoniyere okoon konwor dantso aaliye, darotsi melakiwotswor danatsne, naayonwor danatse. 
\v 33 B́ sa'ato awr b́wotitwok'o itdanawotse it tooko korde'ere, kup'ore. 
\v 34 \x - \xo 13:34 \xo*\xt Luk'. 12:36-38 \xt*\x* Manúwere, b́moo k'azk'rat wok datso amts ashoni bíari, bíwere b́gutswotsi ik ikon finats b́ naashiyi, bísh kotfono kup'de b́ kotetwok'o bísh b́ keewi. 
\v 35 Eshe moo doonz b́weet aawo it danawotse it tooko korde'ere, wee kooc'omand, wee taali titsa, wee baaki k'adore, weyinmó guur weetwe, 
\v 36 Gawerawo wáárr k'eyoke iti b́ daatsrawok'o kup'ore.
\p
\v 37 «Itsh t keewtsok'o, k'osh jametswots jangoshor kup'ore! etirwe.»
\c 14
\s Iyesusatsats máleets málo
\r (Mat. 26:1-5; Luk'. 22:1-2; Yoh. 11:45-53)
\p
\v 1 \x - \xo 14:1 \xo*\xt Kesh. 12:1-7 \xt*\x* Ayhudi fazigi baaliyonat tushmeyi baaliyo mangiyosh git aawo oorat b́ befere, kahni naashwotsnat Muse Nemo danifwotsn, Iyesusi malon deshde'er boúd'it málo bo geyiri. 
\v 2 Ernomó ash ashuwots fayo tuzitune ett «Baaliyi aawon han k'alratsone,» bo eti.
\s Iyesusats shitú fuutts máátsu
\r (Mat. 26:6-13; Yoh. 12:1-8)
\p
\v 3 \x - \xo 14:3 \xo*\xt Luk'. 7:37-38 \xt*\x* Iyesus Bitaniya eteets datsatse een shodon detseyat teshtso Simon mootsna b́ tesh. Mishimaratsnó t'int b́befere, mááts iku b́ k'awntso ayidek't shaaw wottsonat mangts Nardosi shitúwo biitse s'eentso, Albast'rosiya eteets shútson dozets blk'at'iyo dek'at bweyi, blk'at'iyo titsat shitúwo Iyesus tookats kuut'bk'ri. 
\v 4 Manoke fa'úotsitse ik ikwots wotts keewmaanatse tuutson fayat, «Shitúwan dats mec'ro eegoshe bíawashiti? 
\v 5 Shitúwan kemeyink'ere ik asho ik nato fiinar b́ daatsit k'awntsoniyere bogosh kemde'er gizman t'owwotssh ímo faleyank'e b́teshi!» et bo atsatsewo bo keeweyi, máátsno bo bak'ni.
\p
\v 6 Ernmó Iyesus hank'owa bí et, «K'ayere Biina! eegoshe bin itkic'iri? Biye taash sheeng keewo k'alraniye, 
\v 7 \x - \xo 14:7 \xo*\xt Iwi. 15:11 \xt*\x* T'owwots jam aawo itnton bo wottsosh it geyor boosh sheengo k'alosh falitute, ernmó jam aawo taan itoke daatsratste, 
\v 8 Máátsaniye bfaltso k'alrane, t meetso b́ dukeftsre shini k'aniyosh shitúwo futrane. 
\v 9 Aro itsh keewirwe, dats jik' jamatse doo shishyetsoki beyok jamoke, taash bk'altsann bin gawetwok'o bish keewetwe.»
\s Yihud Iyesusi beshidek't imosh keewe b́k'rtsok'o
\r (Mat. 26:14-16; Luk'. 22:3-6)
\p
\v 10 Tatse gitwotsitse iko, Ask'rot datstso Yihud Iyesusi beshide imosh kahni naashwots maants bí ami. 
\v 11 Bowere man dan bodek'ortsok'on gene'úbowtsi, gizono bísh ímetwone bo eti. Bíwere Iyesusi beshide ímosh k'ants aawo b́ kotfera b́tesh.
\s Iyesus ayhudiy fazigi kooc' misho b́danifwotsnton B́ maatsok'oo
\r (Mat. 26:17-25; Luk'. 22:7-14, 21-23; Yoh. 13:21-30)
\p
\v 12 Fazig mereero bo shukeet tushmeyi baaliyi aaw shintsots, b́ danifwots Iyesusok t'int, «Fazigi kooc' misho móósh aawok amr neesh nok'aniyishe n geyeyi?» et bín bo aati.
\p
\v 13 Iyesuswere b́ danifwotsitse gitwotsi hank'o et b́ woshi, «Kito maants ameree, manokno aats koro kuriru asho daatsitute, b́ jafrats ameree, 
\v 14 B́ kindit moots amr moo doonzosh, ‹Danyfo, t danifwotsnton fazigi kooc'i misho tmeetwok'o taash wotitwo ibi kaashitwoki moo aawne?› etfe erere. 
\v 15 Bíwere dadri abaatse fa'o k'aniyetsonat es'k'rets maa gawno itsh kitsitwe, manoke taash k'aniwere.» 
\v 16 B́ danif gitwots manoke kesht kitu maants bo ami, arikon Iyesus ettsok'on daatsbodek'i. Fazigi kooc' mishono manoke bok'aniyi.
\p
\v 17 Datso b́ ílere tatse gitwotsnton towat b́weyi, 
\v 18 \x - \xo 14:18 \xo*\xt Dub. 41:9 \xt*\x* Marats t'int bo maafe Iyesus «Aroniye itsh tietiri, itítsi ikoniye taan beshide imetwe, bíwere and taanton kooc'misho mooke b́ fa'oniye,» bí et.
\p
\v 19 Bowere keewanatse tuutson shiyanat «Taan wotifa nietirwoni?» Etfetst tar taron boaati.
\p
\v 20 Iyesusu hank'owa boosh bí et, «Ashmaniye it tatse gitwotsitse wottso iko and taanton s'awotse ito itdek'irwoniye, 
\v 21 Ash Na'o shin shin b́ jango guut'etsok'on k'iromaand bí amo oreratse, ernmó Ash Na'o beshide imetú ashmansh indowe bísha! ashmaniye balor shin shuweraniyere b́ oorink'e k'anefe!»
\s No doonz kooc' mishi jango b́need'its nemo
\r (Mat. 26:26-30; Luk'. 22:14-20; 1 K'or. 11:23-25)
\p
\v 22 Bo móóke bo befere Iyesus misho k'aawdek't b́ deeri, tiitsdek'tnwere b́ danifwotssh «Nahere, han t meetsoniye» et boosh b́ ími.
\p
\v 23 Úshi wanc'ono k'a'ú dek't Ik'o údt boosh b́ ími, jamwotsu úshets waanc'otse bo úshi. 
\v 24 \x - \xo 14:24 \xo*\xt Kesh. 24:8; Erm. 31:31-34 \xt*\x* Hank'owere boosh bíeti, «Han aywotssh kuud'it handron taareyosh wotitwo t s'atsoniye. 
\v 25 Arikoniye itsh ti'etirii, Ik'i mengitotse k'osh aron aani handr weyinyo túshfetso weyiniyi shuwatse fis'etsan aani úyatse.»
\p
\v 26 Maniyere il Ik'i duubo duubt Debrezeyt guro maants bo keshi.
\s P'et'eros bín halitwok'o Iyesus shino b́keewtsok'o
\r (Mat. 26:31-35; Luk'. 22:31-34; Yoh. 13:36-38)
\p
\v 27 \x - \xo 14:27 \xo*\xt Zek. 13:7 \xt*\x* Iyesus b́ danifwotssh hank'owa bí et « ‹Jinirwono jod'de úd'itwe, mererwotswere bad'itúúne,› et guut'etsotse it únetswor taash bín danatsone etetute, tiyatsnowere shuuts aanitute, taan k'ayr wos'etute, 
\v 28 \x - \xo 14:28 \xo*\xt Mat. 28:16 \xt*\x* Ernmó k'irotse t twiyakon Gelil maants shino beshar ametuwe.»
\p
\v 29 Manoor P'et'ros «K'oshwots bo jamets neen bohaliyalor, taa b́jamon neen haaleratse!» bí eti.
\p
\v 30 Iyesuswere «Ariko neesh etirwe, hambets t'úwaanitse baako gitoto b́k'adfetsere shino nee keezoto tjangosh, jamere taa bíndanatse etetune,» bí eti.
\p
\v 31 P'et'rosmó «K'ir b́wotiyal dab́ neentoni tk'iriti bako jamon neen danatse eraatse!» et kup'i dek't b́ keewi.
\p B́ danif k'oshwotsu mank'o bo etfera botesh.
\s Iyesus Getesemanen Ik'o b́ k'ontsok'o
\r (Mat. 26:36-46; Luk'. 22:39-46)
\p
\v 32 Maniyere hakon Getesemaneyi eteets beyokok boami, Iyesus b́ danifwotssh, «Taa ekewoke Ik'o tk'onfere it hanok betere,» bí eti. 
\v 33 B́ shutsats P'et'rosna, Yak'obnat Yohansno dek't bí ami, manokno ayidek't shiyanefetst kic'o dek'b́tuwi. 
\v 34 Hank'owo boosh bí eti, «T kashu k'írosh bborfetso shiyanwtsere, hanoke be teere, err kup'arr korere.» 
\v 35 Boyere muk'i okaan wokdek't k'azbiami, datsats b́baron gup'gup'dek't faleetk b́wotiyal sa'at man b́beshitwok'o Ik'o b́ k'oni. 
\v 36 Hank'o bí eti, «Nihono, keew jamo neesh falefe, gond bek' úshi wanc'ani tiatse wokiwe, ernmó nee n shuntsok'owa bako taa t shuntsok'o wotk'aye.»
\p
\v 37 B́ danif keezwotsok aanat b́waatsok'on, k'eewwtsat bobefere b́ daatsi, mansh P'et'rossh «Simo'ono, k'eeniya nwtsi? Dab ik sa'atune beyo nmaawi?» bí eti. 
\v 38 «Fadeyi kic'ots it kindrawok'owe kup'ar Ik'o k'onwere, Shayironiye k'anke, meetsonmó maawke,» bí eti.
\p
\v 39 Aaninu amt, enéé bí ettsmank'o et aani Ik'o b́ k'oni. 
\v 40 Ando aanat b́ woor, bo aawotse tokro mangt b́ teshtsosh tokrat bobefere, b́ daatsi, bísh bokeewirwono danatsno bo tesh.
\p
\v 41 Keezlo aanat bomaand waat hank'o boosh bí eti, «Andoor it k'eetsok'oonya it fa'oni? Andoor kashdek'oke it fa'o? Ando bodre! sa'ato bodwtsree! hambe! Ash Na'o morretswots kishats beshide'er imetwe. 
\v 42 Eshe tuuwere! amone! taan beshide imetwo hamb t'inre!»
\s Iyesus b́detseyo
\r (Mat. 26:47-56; Luk'. 22:47-53; Yoh. 18:3-12)
\p
\v 43 Manóór Iyesus man b́keewfere tatsegitwotsitsi iko wottso Yhud waa b́keshi, bíntonu gumbonat shiki goradon detsdek'ts ash aywots fa'ano bo tesh, boowere kahni naashwotsitse, Muse nemo danifwotsitse, eenashwotsokno woshekno bo teshi. 
\v 44 Bín beshi de'er imetwo Yihud, «It it detsetiye taa jamó aatr t joobitwoniye, bíne t'iwintsde deshde ameree,» et boosh milikito ímtni b́tesh.
\p
\v 45 Yihud manoor wáát Iyesusok t'índek't «Danifono!» et bín b́ joobi. 
\v 46 Maniyere il ash ashuwots Iyesusi detsbodek'i. 
\v 47 Manoke ned'irwotsitse Iyesus shuuts sha'efwotsitse iko b́ shiki gorado kishdek't kahnyi naasho guutso waazo k'ut'b́k'ri. 
\v 48 Iyesus hank'owa boosh bí et, «Shiki goradonat gumbon dek'at it wáá taan wonbadewok'o detsoshe? 
\v 49 \x - \xo 14:49 \xo*\xt Luk'. 19:47; 21:37 \xt*\x* Aaw aawon Ik'i mootse itn danifetsat itnton tbewor taan deshatste b́ teshi, ernmó han b́wotiye S'ayin mas'afwotsitsi keewetso b́s'eenetwok'owe.»
\p
\v 50 B́danifwots bojamets bín k'azt bowos'i.
\p
\v 51 Ket'i mitoon wozets nat'al mec'r tahtso jawets na'a iko s'uz Iyesus shuutso shoydek't amiruwe b́tesh, ashuwots bín dets bodek'or 
\v 52 B́nat'alu juuk'rat araatson wos'fere k'az bíami.
\s Iyesusi mooshi jooro shinats b́dametsok'o
\r (Mat. 26:57-68; Luk'. 22:54-55, 63-71; Yoh. 18:13-14, 19-24)
\p
\v 53 Iyesusmó kahni naasho gal dekt boami, manoke kahni naashwots, eenashwotsnat Muse Nemo danif jamwots kakwe bowtsi. 
\v 54 P'et'roswere kahnyi naasho mook b́ bodfetso wokdek't Iyesus shuutso bí amfera b́teshi. Manoknowere guuts guutswotsnton bedek't tawo b́ kashfere b́ teshi. 
\v 55 Kahniwots naash naashwotsna, moosh moshyf jamwots, Iyesusi úd'iyosh gaw wotitwo bogefere botesh, ernmó daatsratsno. 
\v 56 Aaywotsu kooton bíats gawerno, b́woteferor bo gawor bo keewo ik woteraniyere b́ oori.
\p
\v 57 Ik ikwots tuut hank'o et kooto bí ats bogawi, 
\v 58 \x - \xo 14:58 \xo*\xt Yoh. 2:19 \xt*\x* «Taa ash kishon ageets Ik'i maa han gaahde keez aawotse k'osho ash kishon finerawo agetwe ett b́keewfre shishrone.» 
\v 59 Manbwotiyalor bo gawts gawo ik woteratse.
\p
\v 60 Kahni naashonúwre bo taalotse need'dek't, «Eegor aaniyalkneneya? Ashaanots ni'ats bo t'intsiru s'aamiyo eebi b́ naaroni?» ett Iyesusi bí aati.
\p
\v 61 Iyesusmó s'k eta bí eti bako eegor aaniratse. Kahni naashmanwere «Deerets Ik'o Na'o Krstos neeneya?» ett aani bí aati.
\p
\v 62 \x - \xo 14:62 \xo*\xt Dan. 7:13 \xt*\x* Iyesuswere «Ee, taane, ash Na'o Ik'o k'ani aaro maantse b́befere bek'etute! ando aani daaratse daawnon aanar b́woor bek'etute» 
\v 63 Kahni naashonwere nibk'unon b́ taho gaat't «K'osh gawo eegoshe b́geyiti? 
\v 64 \x - \xo 14:64 \xo*\xt Lew. 24:16 \xt*\x* Hambe! Ik'o b́c'ashirwok'onoor shishrte, eshe eege itsh bíari?» bí eti.
\p Jametswots ik wotdek't «K'iro bísh wotitwe!» et bí ats boangshi. 
\v 65 Ik ikwotswere bo s'udo bí ats s'udo dek't bo tuwi, bí aawono shemoon p'uuridek't «Nee nebiyi nwotiyal aab neen kon b́ jot'tsok'ó dane!» etfetst kishi t'umon bo jot'fere botesh. K'oshwotswere jabefere dek't bo ami.
\s P'et'ros Iyesusi b́haltsok'o
\r (Mat. 26:69-75; Luk'. 22:56-62; Yoh. 18:15-18, 25-27)
\p
\v 66 P'et'ros kahni naasho mooniye dashe b́ kas'otse b́befere kahniwotsitsi k'aabo gon iku waa b́ keshi, 
\v 67 Bi P'et'ros tawo b́kashefere bek'aat t'iwintsdek' s'iilat «Neewor Nazrettso Iyesusntonye n teshi,» bísh bi et.
\p
\v 68 Bímo «Taa danatse, eebi ni'eetirwoni,» ett bíhaali. Manówere et fengesho maants b́ keshtsok'on baako b́ k'adi.
\p
\v 69 Gonunwere P'et'rosi bek'aat manoke ned'irwotssh «Hanwor bo jirotsitske!» etaat aani keewo dek' btwi, 
\v 70 Bímó aani jamere taa bín danatse bí eti. Muk'i boteshiyakon manoke need'iru ashuwots P'et'rossh «Gelil dats ash n wottsok'o n noon keew keewo kitsirwe, manshe arikon neehe bo jirwotsits neene» bo et.
\p
\v 71 Bímó «It etiru ash han taa danatse!» etfetst taart bí atso b́c'ashi.
\p
\v 72 Manoor baako gitlo b́ k'adi, P'et'roswere «Baako gitoto b́k'adfetsere, keezoto taan jamere bín danatse etetune,» et Iyesus b́ keewtso keewo bísh gawe b́wtsere ay dek't bí'eepi.
\c 15
\s Iyesus P'ilat'os shinats b́t'íntsok'o
\r (Mat. 27:1-2, 11-14; Luk'. 23:1-5; Yoh. 18:28-38)
\p
\v 1 Guur dats b́gatstson kahni naashwots, eenashwotsnton, Muse nemo danifwotsnton, moosh mooshif jametswotsnton boshiyeyi, maniyere il Iyesusi típdek' amt P'ílat'ossh beshi dek't ím bok'ri. 
\v 2 P'ilat'os «Ayhudiy nugúso neeneya?» ett bíaati. Iyesuswere «Nee niettsok'oyiye,» bí eti.
\p
\v 3 Kahni naashwotsmó Iyesusi ay dek'tni bo s'aamifere bo tesh. 
\v 4 Mansh P'ilat'os «S'iile! ambts keewon neen bos'aamirwok'ona! b́jamon eegor ni'aanitwo deshatsiya?» ett aani bíaati.
\p
\v 5 P'ilat'os bí'adfetsosh andoor Iyesus egoŕ aaniratse.
\s Iyesusats b́k'iritwok'o angshetsok'o
\r (Mat. 27:15-26; Luk'. 23:13-25; Yoh. 18:39-40; 19:1-16)
\p
\v 6 P'ilat'os worwot worwoton Ayhudi fazigi woroti baalyots ashuwots boosh b́bitsetwok'o bo'aatts tipitsi ash iko boosh biitsfe b́ tesh. 
\v 7 Manóór mengstats tuut datso s'eezits, asho úd't tipi moots kindtswots fa'ano botesh, manotsitsno iko Berbani eteef ashoni b́tesh. 
\v 8 Ash ashuwotswere P'ilat'os maants t'int bodantsok'on boosh b́k'alish bín bok'oni. 
\v 9 Bíwere «Ayhudí nugúso biishde itsh tfaksho geefteya?» ett boon bí'aati. 
\v 10 Han bí'etirwere kahni naashwots Iyesusi beshidek't boímir okooron b́ wottsok'o b́dantsotsna b́tesh.
\p
\v 11 Kahni naashwots, «B́ shegro Berban noosh biitsewa,» err P'ilat'osi bok'onitwok'o ashuwotsi tuuz bok'ri. 
\v 12 P'ilat'oswere, «Béré, ayhudi nugúsa it etirwan aak'o k'aluta?» ett ashuwotsi aani bí aati.
\p
\v 13 Bowere «Bín jiire!» etfetst aani bokuhi. 
\v 14 P'ilat'oswere «Eegishe? Eege bí aawashits keewoní?» bí eti.
\p Bowere «Bín jiire!» etfetst aydek't bo kuhi.
\p
\v 15 P'ilat'os ashuwotsi gene'ushosha ett Berbani bitsdek't boosh faksh b́k'ri, Iyesusnmó jot't b́jiitetwok'ó beshidek't imb́kri.
\s Kes' kes'fuwots Iyesusats tirgic'o bokashtsok'o.
\r (Mat. 27:27-31; Yoh. 19:2-3)
\p
\v 16 Kes' kes'irwots Iyesusi datsu keewirwo múúlok dek't bo ami, oorts kes' kes'iru jamwotsno bo s'eegi, 
\v 17 Tah birono bísh takbok'ri, angitso k'odetso wozdek't b́ tookats gúp'sh bok'ri, 
\v 18 «Ayhudi nugúsono aage! Jeeno neesh wotowe!» etfetst bíats kashfetst jamo bín bo'aatfere botesh. 
\v 19 Guumbono b́ tookats bo togfere botesh, s'údono bíats s'udfetst tirgic'o bíats kashfetst tuk'maldek't b́ gubrats bo sagadfere botesh. 
\v 20 Bí'ats bokashihakon tah bíro kishbazt, b́took taho takbok'ri, jitosho bín dekt boami.
\s Iyesus b́jiitetsok'o
\r (Mar. 14:32-44; Luk'. 23:26-43; Yoh. 19:17-27)
\p
\v 21 \x - \xo 15:21 \xo*\xt Rom 16:13 \xt*\x* Amoke bobefere K'eren dats ash wotts Iskndriyosnat Rufosn nih Sm'on gat'ariyon waat kitots b́ kindfere daats bodek'i, Iyesus mask'aliyo angnon b́kuritwok'o bowoshi. 
\v 22 Maniyerehakon Iyesusi b́bitso took k'ola eteets beewoko Golgotók dek't boami. 
\v 23 Manokno kerbewonton eeketso weyini biro b́ úshetwok'o boimi, eree bímó úyatse. 
\v 24 \x - \xo 15:24 \xo*\xt Dub. 22:18 \xt*\x* Maniyere hakon jitbok'ri, b́tahwotsnó kon aawi b́dek'etwok'o it'o shap't kaybodek'i. 
\v 25 Iyesusi bo jitor datso guur keez sa'ata b́ teshi. 
\v 26 B́ t'afiyo kiitsoshowere «Ayhudi nugúsa» ett guut'etso guut'k'reyi. 
\v 27 Gond finets gitetswotsi dek' waat Iyesusnton iko k'ano maants ikono b́giromaants jit bok'ri. 
\v 28 \x - \xo 15:28 \xo*\xt Isa. 53:12 \xt*\x* Mank'onowere «Gond fintswotsnton b́ taaweyi,» ett keewetso b́ s'eenetwok'wa.
\p
\v 29 \x - \xo 15:29 \xo*\xt Luk'. 22:7; Dub. 109:25; Mar. 14:58; Yoh. 2:19 \xt*\x* B́ganoke beshefetst teshts ashuwotsi gac'on botoko shek'efetst hank'o ett bín boc'ashfere botesh, «Indowe neená! nee Ik'i moo gaahr keez aawotse aak'ritwono! 
\v 30 Aab́ and jitatse ood'ŕ ntooko kashiwe!»
\p
\v 31 Mank'oon kahni naashwotsnat Muse nemo danifwotsn bo atsatsewo hank'o ett bíats trgc'o bokaashi. «K'oshwotsi kashire, b́tokonmóó kashiyo falratse! 
\v 32 Bí Krstosi Israe'el Nugusoni wotiyal bére aab and jitatse ood'e, noowere be'er bín amanone!»
\p Mank'o bínton jitetswots wonbedewotswere bín boc'ashfere botesh.
\s Iyesus k'iro
\r (Mat. 27:45-56; Luk'. 23:44-49; Yoh. 19:28-30)
\p
\v 33 Aaw shrt sa'aton tuut jed'i sa'ato b́borfetso dats jamatse t'alwo wotb́wtsí. 
\v 34 \x - \xo 15:34 \xo*\xt Dub. 22:1 \xt*\x* Jed'i sa'at b́wottsok'on Iyesus «Elohe, elohe, lama sebek'tani,» ett k'áári eenon b́ kuhi. Mank'o etonwere «T Ik'ono, t Ik'ono! eegishe taan k'aznk'ri?» eta.
\p
\v 35 Manoke need'at teshts ashuwotsitse ik ikwots b́ kuho shisht «Hambe! Eliyasiye b́ s'eegiri,» bo eti. 
\v 36 \x - \xo 15:36 \xo*\xt Dub. 69:21 \xt*\x* Boyitsi iko wos't weyni biri shasho s'olok'o s'aamo spoonjiwots\f + \fr 15:36 \fr*\fqa Sponjiya: \fqa*\ft Aatso b́ gitsomaants múús'fo wee k'ac'ono bín firek naara. \ft*\f* gupdek't s'entsb́k'ri, b́ úshetwok'owere gumbats ged dek't Iyesussh imt «Aab Eliyas wáár bín oorshitewe woto s'iilone!» bí eti.
\p
\v 37 Maniyehakon Iyesus k'áári eenon b́kuuhi, b́ kashunwe bí aatsotse k'az bkeshi.
\p
\v 38 Ik' mootsi magarajiyo dambe dek't dash b́borfetsó gaad'at́ gitok kayb́wtsi. 
\v 39 B́maask'aly shinatse eed' dek't́ teshts bali naasho Iyesus kasho bíatsotse aawk'on b́ keshtsok'o t'iwints dek' b́ bek'tsok'on, «Ash han arikon Ik'o naayiye bíteshi» bí eti.
\s Golgotatse teshts mááts máátsuwotsi
\r (Mat. 27:55-56; Yoh. 19:25-27)
\p
\v 40 Wokoon wotdek't s'iliru mááts ik ikwotswere manoke fa'ano botesh. Boyitsnó Megdel datstsu Mariyamu, muk'efo Yak'obnat Yosa ind Maryamu, Selomewwere fa'ano botesh. 
\v 41 \x - \xo 15:41 \xo*\xt 8:2-3 \xt*\x* Bowere Iyesus Galiln b́ teshor, b́ shuutso sha'aŕ bísha bo finefo. Mank'owere Iyesusok Iyerusalem maantse waats aywots fa'ano botesh.
\s Iyesusi duketsok'oó
\r (Mat. 27:57-61; Luk'. 23:50-56; Yoh. 19:38-42)
\p
\v 42 Datso ilat b́teshtsotse sanbati kindi aawonat k'andek'i aawonowere b́ woti. 
\v 43 Manoró Ayhudi moosh moshifwotsitse iko teshtso Yosefi eteefo, mangiyets Armatiyas asho b́ weyi. Bíwere Ik'imengsto kotirw asha b́tesh. Bíwere b́sharawo P'ilat'os shinats t'int Iyesus duuno bísh b́ ímish b́ k'oni. 
\v 44 P'ilat'oswere «Aak'oneya hank'o káári b́k'iri» ett bí adi. Bali abaatse naashonó s'eegit́ «Arikon b́ k'iriyako ja'ará?» ett bíaati. 
\v 45 Iyesus k'iro bali abaatse naasho atse b́ shishihakon duuno b́ dek'etwok'o Yosefsh bí eeki. 
\v 46 Yosef duuni shemo keewdek't mask'aliyatse Iyesus duuno orshdek't k'od b́k'ri, s'alatse k'ewdek't k'aniyets doowots duk b́k'ri. Shúts eeno kukulshdek' doowo ipbok'ri. 
\v 47 Megdelawi eteetsu Mariyamnat Yosá ind Mariyamń Iyesusi eewk duketsok'o bos'iilfera botesh.
\c 16
\s Iyesus k'irotse b́ tuutsok'o
\r (Mat. 28:1-8; Luk'. 24:1-12; Yoh. 20:1-10)
\p
\v 1 Sanbati aawo b́beshi hakon Megdelawi kititstsu Mariyam, Yak'ob ind Mariyamnat Selomen wotat́, Iyesus duunats fuutosh shitúwo keew bo dek'i. 
\v 2 Ik gawyotsi shints aaw wotts sanbat eenots guur t'úwon, aawu keshfere bwoor, doowo maants bo ami. 
\v 3 Bo «Shútso doowi nonatse konek'uwa noosh kukulshiti?» etfetst keewefere bo amir. 
\v 4 Manowere bo etir doowo bín ipets shútso ayidek't een b́ teshtsosha, kááwdek't bo s'iilnmó shútso ik maants kukulwtsat́ b́befere bo bek'i. 
\v 5 Doowotso bo kindor shemi nas' tahirwo jawetso k'anomaantse b́ befere bobek'tsotse tek'bowtsi.
\p
\v 6 Bímó boosh hank'owa bí et «Tek'k'ayere! it it geyirwo jitt teshetso Nazrettso Iyesusi b́ wottsok'o danfee, bí k'az tuure, hanoke aaliye, b́duukeyokonúwere hambe s'iilere. 
\v 7 \x - \xo 16:7 \xo*\xt Mat. 26:32; Mar. 14:28 \xt*\x* Andoor ameree, b́ danifwotsnat P'et'rosnsh, ‹Haniyere shin Iyesus itsh b́ keewutsok'on bí Gelil maants itiyre shinar ametuwe, manokno bín bek'etute,› err boosh keewwere.»
\p
\v 8 Máátswotswere shatoon k'ewefetst doowi ganoke kesht k'azbo'ami, ayidek't́ shatt boteshtsotse ik keewo konshor keewratsnó.
\s Iyesus megdela kititsttsu Mariyamsh b́ be'etsok'o
\r (Mat. 28:9-10; Yoh. 20:11-18)
\p [ 
\v 9 Ik gawiyotse shints aawots Sanbata gudots Iyesus guuron k'irotse b́ tuwi hakon, shin shino shawat fo'erawo biyatse b́kishtsu Megdela eteef kititstsu Mariyamsh b́be'eyi. 
\v 10 Biwere amaat, shiyanon eepoke fa'ua b́shuuts sha'efwotssh keew bk'ri. 
\v 11 Biwere «Iyesus k'irotse tuut, kashon fa'ee, taawor ti ááwon bek're,» etaat boosh b keewi, ernmó boowor bin amaneratsno.
\s Iyesus b́ danif gituwotssh b́ be'ewo
\r (Luk'. 24:13-35)
\p
\v 12 Maniyere hakon gat'ariyomants amfetst teshts b́ danif gitwotssh Iyesus k'osh aron b́ be'e. 
\v 13 Bowere aanat b́danif oortswotssh keewbokri, ernmó manotsnor amaneratsno.
\s Iyesus wosheets tatse ikuwotssh b́be'ewo
\r (Mat. 28:16-20; Luk'. 24:36-49; Yoh. 20:19-23; Wosh. 1:6-8)
\p
\v 14 Maniyere hakon tatse ikwots mishimarats t'int́ bomaafere Iyesus bo ats be'eeb́wtsi, «Iyesus k'irotse tuut kashon fa'ee no ááwono bek'rone,» ett boosh keewtswotsi aman bo k'aztsona et bo nib kup'osh boon b́k'efi. 
\v 15 \x - \xo 16:15 \xo*\xt Wosh. 1:8 \xt*\x* Hank'owa boosh bíet, «Dats jik' jamats ameree, ash jamoosho doo shishiyo daniwere. 
\v 16 Amantsonat guupetson kashitwe, amanerawonmó bí ats angshetwe. 
\v 17 Taan amanitu jamwots adits keewanotsi finituno, t shúútson fo'erawo kishituuno, handr noon keew keewonowere keewituuno, 
\v 18 Dawunzwotsi bodetsalo, wee úd'it merziyo dab́ bo úshal eegor boon k'alratse, bo kishono shodtswotsats bo gedor shodtswotś kashitune.»
\s Iyesus daro maants b́dek'etsok'o
\r (Luk'. 24:50-53; Wosh. 1:9-11)
\p
\v 19 \x - \xo 16:19 \xo*\xt Wosh. 1:9-11 \xt*\x* Doonzo Iyesus jaman boosh b́keewiyhakon daromaand k'az bíami. Ik'o k'ani aaromants be b́wtsi. 
\v 20 B́ danifwotswere dats jamatse sha'at́ bo daniyi, doonzonúwere bonton b́ finefoni. Adits finono bo k'alitwok'o alo boosh ímt bo daniyru man ar b́wottsok'o b́ kup'shfoni.]