\id JAS - Borna New Testamnet
\ide UTF-8
\h Yak'ob
\toc2 Yak'ob
\toc1 Yak'ob Woshts Wosho
\toc3 Yak'.
\mt Yak'ob Wosho
\imt Kindo
\ip Yak'ob woshan aawu aawon nobeyosh noon jishitu hasabiyotsi detsk b́ wotor b́ guut'ewwere dats jamats bad'ts tatse git naruwotsshe, guut'tsonwere dani telefo finats nijitsit malo, Krstiyani doyo detsonat ayhudi woto jishosh wotit keewwotsi kishde'er kitsit jewuri keewuotsn b́ t'intsiri, kashi jango, bogabogsho, fadewo, sheeng amalo, amani jangonat sheeng finon, albero b́ dowet gondonat sheengon, dani teleefo, atsatseyo fayeyi jango, bogtaana etonat b́ tooko dash detson k'oshuwotsats angshi jango, it'i jango k'amonat Ik' k'oni jangon, krstiyaniwots k'alosh boon geyit keewi jango ik ikon guut're.
\ip Woshan krstiyani beewotse imnetiyo finats b́jinet jango shaanidek'tni b́ kitsiri.
\iot Jamon mas'aafan b́detstso
\io1 Kindo. 1:1
\io1 Imnetiyonat Dani teleefon. 1:2-8
\io1 Tugroonat gaalon. 1:9-11
\io1 Fadeyo. 1:12-18
\io1 Ik'o keewuts keewo k'eboonat finats jiitson. 1:19—2:13
\io1 Amanonat finon. 2:14-26
\io1 Krstiyaaniyonat bíalbeeron. 3:1-18
\io1 Krstiyaaniwonat datsaann. 4:1—5:6
\io1 K'osh k'osh naari keew jangosh imets izo. 5:7-20
\c 1
\s Jamo
\p
\v 1 \x - \xo 1:1 \xo*\xt Mat. 13:55; Mar. 6:3; Wosh. 15:13; Gel. 1:19 \xt*\x* Dats jamats bad'ts tatse git jirwotssh Ik'onat doonzo Iyesus Krstos guutso wottso Yak'oboke wosheets jamó, jeno itsh wotowe.
\s Imnetyonat Dani teleefon
\p
\v 2 Ti eshuwotso! k'osh k'osh naari fadewo itats b́bodor geenúshit keewwotsi it daatstsok'o woshde'er taawwere. 
\v 3 It imnetiyo b́fadewo k'amo itsh daatsituwo b́wottsok'owo dandek'etute. 
\v 4 K'amonowere it kup'o ik jago itsh b́shaprawo s'eenonat itn bodtswotsi woshituwo wotowe. 
\v 5 Ititse dani teleefo bísh b́shapts asho fa'e wotiyal Ik'o k'onuwe, Ik'onwere bísh imetwe, bí jametsosh shiitso bí aa'awo tewudi doon imetwo Izar Izeweriye. 
\v 6 Ernmó asho eegonor gito b́gímberawo amande'er k'onuwe, git gimbiru asho jongon gifniyeyat giwwtsts aatsk'aroniye bíariye. 
\v 7 Mannaari asho doonzoke ik jago b́daatsituwok'o bísh ark'aye. 
\v 8 Han b́wotituwere git níbo detst b́weerindatse hake baka bíetiruwoshe.
\s Tugrets ashonat gaalets ashon geneúwo
\p
\v 9 B́ beewon dashan wotts eshuwo Ik'o damban bín b́ detsetwosh geneúwowe, 
\v 10 Ash gaalo bodi fuundok'o b́ ooshetuowotse b́ beewon dambaan wotts eshuwo Ik'o b́bewo dashan b́woshiyalor gene'úwowe, 
\v 11 \x - \xo 1:10-11 \xo*\xt Isa. 40:6-7 \xt*\x* Aawo b́ k'ees'onton b́keshor bodo shuuk'iniye b́k'riti, b́ fúndonuwere ooyniye b́wutsiti, bíazisheengonwere t'afniye b́wutsiti, mank'owere gaalets asho b́fiinon b́jaakfere t'afniye b́wutsiti.
\b
\s Ashaats bodet fadewo
\p
\v 12 Doonzo b́ taartsok'on bín shuntswotssh b́ imet kashi akililiyo b́ dek'etuwosh fadeyo k'amar kúp'it asho deereke. 
\v 13 Ik'o gond keewon noon b́ fadrawotse mank'o bíwere konnoru b́ fadrawotse asho b́ fadeyor «Ik'o taan fadre» etk'aye. 
\v 14 Ernmó asho ik ikon b́ fadeyir b́ took tewnon geetseyar bí ant'elcewore. 
\v 15 Haniyhakon tewunu bmaac'or morro shuwitwaniye. Morronu s'eenon bi eeniyakon k'iro shuwituwane.
\p
\v 16 Shuneets eshuwwotso! it ant'elcherawok'owa! 
\v 17 Sheengts imonat s'een wotts deer jamo Ik'okne, han b́weetuwe c'ishok'o wona wonewo deshaw shááni niho Ik'okne. 
\v 18 Ik'o bí azts jam shintswotsitse gawdek't ari aap'on noon shuure.
\s Shishetso finats jitso
\p
\v 19 Shuneets eshuwotso! han batk'ayere, ash jamo k'ebosh káártso, noonkeewonat fayosh mango wotowe. 
\v 20 Ash fayo Ik'i kááwo daatsiratse. 
\v 21 Hansha kiimonat weerigondi ayonowere ok k'aúbayr Ik'o it nibots b́ toktsonat it kasho kashiyo falitu aap'man it tooko dashan detson de'ere.
\p
\v 22 Ik'i aap'tso finats jiitswere bako it tooko dashfetsr shish mec'ro shishfwotsi wotk'ayere. 
\v 23 Ik' aap'ts aap'o finats jiitsraw asho bín bíazeets shiitso mastayiton bek'iru ashok'oyiye, 
\v 24 Ashaan b́shiitso mastyiton b́s'iliyakon ametuwe, awuk'o b́wottsok'owo manoor batni b́k'riti. 
\v 25 Wotowa eree nas' kishit b́ nemo sheengshr s'iilr bín kup'ituwo bínowere shiir baterawo, finats jitsitu asho b́ finon deereke b́ wotiti.
\p
\v 26 Bí albero korde'aniyere Ik'o Ik'irwe eteet asho b́ tookoniye b́ dashiri, b́ ik'iyonwere k'awuntso deshatse. 
\v 27 Ik'o niho shinatse s'ayinonat kimaw hayimanotiyo, nihonat indo k'irts nanaúwotssh, aaninu bokenih k'irts máátsuwotssh bo kic'or boon tep'o, b́ tookonowere datsanatsi kimatse kordek'oniye.
\b
\c 2
\s Ash bogabogsho b́geyirawok'o
\p
\v 1 Tieshuwotso! mangts doonzo Iyesus Krstosn amaniruwotsitna wotiyal iko ikoniyere bogfe eton asho bogabogshk'ayere. 
\v 2 Git ashuwots it kakuweyiru bewokok weetune, iko b́kishi jabots awntsi k'ubelo geddek'tsonat tah sheengo tah dek'tso gaaletska, k'osho kiimts tahidoro tahts tugretska, 
\v 3 Sheengiru tah tahdek'ts asho mangiyon «Sheeng beyokanats bede'e» it eteti. Tugretsonmó «Neyere manoke need'owe, wee ttufishiroots bede'e» it eteti, 
\v 4 Eshe, mank'oon it dagotse k'osh k'oshewonat bogabogshr angisho it angshituwok'o itsh be'eratsa?
\p
\v 5 Shuneets eshuwotso! k'ewere, Ik'o amanon galetswotsi bo wotitwok'onat bín shuntswotssho b́ jangits mengsto bo naatetwok'o datsanatsi tugretswotsi marat'de'atsa? 
\v 6 Itmó tugretswotsiye it gac'iri, itn dadaat angshi moo maants iti geetsirwots gaaletswotsiyoshna? 
\v 7 It bín it s'eegeyiru sheeng shúútso c'ashiruwots bonoshna?
\p
\v 8 \x - \xo 2:8 \xo*\xt Lew. 19:18 \xt*\x* «K'osh asho ntookok'o woshde'er shune» et S'ayin mas'aafotse guut'etso Ik'i mengestitsi nemo it s'eentsiyal sheenge it finiri. 
\v 9 Ash dago it boga bogshiyalmó morre it finiri, nemo it beshiruwotse iti k'oretute. 
\v 10 Asho tzaziwotsitsere iko gaahr oorts jamwotsi b́ s'eentsiyal dab jamwotsi b́ gaktsok'owe taaweti. 
\v 11 \x - \xo 2:11 \xo*\xt Kesh. 20:13-14; Iwi. 5:17-18 \xt*\x* «Wido amk'aye» etts doonzo mank'o «Ud'k'aye» etre, mansh wido amo nk'azal dab n ud'iyal nemo gaakrne. 
\v 12 S'ayin kishit nemoke angsho dek'osh fa'a ashuwotskok'o keewwere, mank'owere k'aluwere. 
\v 13 Ik' angsho maarraw ashuwotssh mhreti woshratse, b́ wotefere mhretiyo angsho daa'ituwe.
\b
\s Imnetiyonat finon
\p
\v 14 T eshúwotso! asho imnetiyo detsfe bí etal, ando aani b́ imnetiyo sheeng finon kitso b́ k'azal eebi bísh b́ k'aliti? B́ imnetiyo bín kashiyosh falituwa? 
\v 15 Bo tahituwonat bo meetuwo deshaw eeshuwotsnat mishúwotsn bobeyal, 
\v 16 ititsere iko bo beyosh geyit keewo imaniyere «Jeenon ameree! itsh k'ec'ee! woorwere!» bí etal eebi boosh b́ k'aliti? 
\v 17 Mank'o sheeng fin deshaw imnetiyo k'irkee.
\p
\v 18 Ernmó «Nee imnetiyo detsfne, taawere sheeg fino detsfe» etetuwo b́ beyal, «N imnetiyo finalo taash kitsuwe, taawere t finon t imnetiyo kitsituwe» etetuwe. 
\v 19 Nee «Ik Ik'o fa'ee» etaat amanirune, sheenge, amanonere Fo'erawwotswor amanirune, shatonowere k'ewirune. 
\v 20 Nee dartsano! imnetiyo finalo k'awuntso\f + \fr 2:20 \fr*\fqa K'awtsalka: \fqa*\ft Etirwan yoots brani mas'afwots k'irka etfe. \ft*\f* b́ deshawok'o danosh geefiya? 
\v 21 \x - \xo 2:21 \xo*\xt Aze. 22:1-14 \xt*\x* Nonihi Abraham b́ naayi Yishak'i wosh t'intseyru t'arap'ezats Ik'osh wosho woshdek't b́ t'intsor kááw b́ wot b́ finonalneya? 
\v 22 Eshe imnetiyo finonton ikoke b́ teshtsok'onat imnetiyo finon s'een b́ wottsok'o bek'irute? 
\v 23 \x - \xo 2:23 \xo*\xt Aze. 15:6; 2 Zen. 20:7; Isa. 41:8 \xt*\x* S'ayin Mas'aafotse «Abraham Ik'o bí amani, b́ imnetiyonwere kááw wotat bísh b́ taaweyi» ett aap'ets aap'o s'eenbwutsi, hank'on Ik' shun ash b́woti etiyi. 
\v 24 Eshe asho b́ kááwit imneti mec'ron b́woterawon finono dabde'er b́wotsok'o bek'etúnee.
\p
\v 25 \x - \xo 2:25 \xo*\xt Iya. 2:1-21 \xt*\x* Widetsu Ra'ab Isra'elitse woshetswotsi b mootse bdek'or k'osh weeron boametuwok'o bwoshor bi bfinonon kááweratsna?
\p
\v 26 Kashaatse k'aleets meetso k'irkee, mank'owere finatse k'aleets imnetiyo k'irkee.
\c 3
\s Albero kordek'i jango
\p
\v 1 Ti eshuwotso! noo danifuwotsi wottsuwots iki bogts angsho node'k'etwok'o itdantsotse ititse ayuwots danifuwotsi wotk'ayine. 
\v 2 No noúnets aayote nosheeliri, b́ noon keew keewon darrawo bí bí ats jamo kordek' falituwo ik jag bí atse daatseraw ashe. 
\v 3 Farsho noosh bí azazetwok'o b́ nonots lugamo nogedeti, mank'oon bíats jamó no shuntsok jiishituwone. 
\v 4 Markabo awuk'o een b́ wotiyaloru jong angon b́ jookewor, markab jokirwo bir múk'naún b́ shuntso maants b́ jiishiti. 
\v 5 Mank'owere alberu muk'na'a atsi kayu wotefetsat een een keewwotsn bit'iri, een gemo b́mis'fo taw muk'na'úne. 
\v 6 Alberunu tawok'oyiye. Alberu noatsi kaywotsitse daatseru gond datsuniye. Ats jamats aldetstsonat noats jamo bi awaashiti. Gahanemitse keshiru tawok'o nobee jamo bmitsiri. 
\v 7 Datsatsi s'otswotsnat kafuwots, datsatse getseyirwotsnat aats k'arotse sha'iru azeets jamwots ashon sezewo falitune, andoor sezeerne. 
\v 8 Wotowa bako albero sezo falituwo konuwor aaliye, úd'it marziyo bín s'eentsonat kashdek'o biitse deshaw gond keewniye. 
\v 9 \x - \xo 3:9 \xo*\xt Aze. 1:26 \xt*\x* Bín no nihi Ik'o noúdiri, mank'owere bín Ik'i aron azeets ashuwotsi noc'ashiri. 
\v 10 Noon ikotse údonat c'ashon keshirune, tieshuwotso! han b́ woto geyiratse. 
\v 11 Aats t'up' ikotse úshosh wotit shaaw aatsonat s'aam aatson t'up'osh falituwa? 
\v 12 Ti eshuwotso! belesi mito woyira eteets mit shúwo shuwosh falatse. Wee woyini bos'o Belesi shuwo shuwosh falatse? Mank'o s'aam aatsotse shaaw aatso keyatse.
\s Daronat datsatsi dani teleefo
\p
\v 13 It dagotsere dan teleefonat t'iwints detsts asho kone? Dani teleefonat b́tooko dashan detson b́fiintsfino b́sheng beyon kitsuwe. 
\v 14 Wotowabako s'aamts okooronat b́ took shuno it nibots fa'e wotiyal it'k'ayere, arikeewatsowere kootk'ayere. 
\v 15 Dani teleefan b́ daatseti, datsuwatse meetsatse, Dablosokna bako Ik'onaaliye. 
\v 16 Okooronat took shunon bobeyokoke dimbironat gond fin jamwots beetune. 
\v 17 Wotowaere Ik'oke daatset dani teleefo shin shino s'ayine, manats dabrnuwere jeenon s'eents, doo, maneyo, mhretiyo, sheeng shuwo bín s'eentso, bogabogshoonat gitalberetsi woto biitse deshawoniye. 
\v 18 Jeen be shunts ashuwots jeeno shoohr kááwi shuwo kakuwitune.
\c 4
\s Datsanatsi gondonton kod'ewo k'azi jango
\p
\v 1 It dagotse fa'a kes'onat fayon awuke waake? It atsotse kaariru it meetsi tewunaatsnosha? 
\v 2 Ik keewo daatsosh tewunirute, ernmó daatsatste, asho úd'irute okoorirute eree daatsatste, fayeyirute, koyeyirute. Ik'o it k'onraawotsnowere it geyiru keewo daatsatste. 
\v 3 Ik'o it k'oniyaloru Ik' it k'onts mansh aaniyo daatso itk'azir it k'oniru keewo meets geneeúwats jiitsosh gond asaabiyon Ik'o it k'onirwooshe. 
\v 4 It widetswotso! datsu shuntso Ik'i t'alato b́wottsok'owo danatsteya? Eshe konwor datsunton shune geyiruwo b́tooko Ik'i t'alato b́woshoniye. 
\v 5 Ando S'ayin mas'aafotse «Ik'i okooro, bí no gitsots b́ k'eezts shayiro b́ s'uzsh no wotitwok'oye» bí ettso datsmec'reya? 
\v 6 B́ wotiyaloru s'ayin mas'fo «Ik'o bog taana etirwotsi k'efituwe, dash took detsirwotsshomó b́ s'aato imetwe» b́ ettsosh Ik' imet s'aato jamoniyere boge.
\p
\v 7 Mansh Ik'osh keewewere dablosnoweer k'efoore, bíwere itatsere okaan wos'etuwe. 
\v 8 Ik'ok t'inere, bíewere itok t'inetwe, it morretsuwotso! it kishuwotsi s'ayntsuwere, it hakebaka etiruwotso! it nibo s'ayintswere. 
\v 9 Kic'oore, shiyanowere, efere, it miis'o eepo maants, it gene'o shiyano maants wonewe. 
\v 10 Doonzo shinatse it tooko dashan deshere, bíwere dambaan itn tuuzitwe.
\b
\s Ashaats angsh k'azo
\p
\v 11 Eshuwotso, it atsatsewo oonek'ayere, ash oonitwo wee ashaats angshituwo neme b́ ooniri, nematse b́ angshiri, nemats n angshiyalomo dab angshtsi nwoti bako nemó s'eentsitk neenaliye. 
\v 12 Nem imetwonat angshituwo Ik' ikoniye, woriyosho t'afiyoshowere falituwoniye b́ s'uziye, eshe k'osh ashaats angshituwo kene neewo?
\b
\s Bogtaana etotse atso kordek'o b́geyituwok'o
\p
\v 13 It «Hambets wee yaats hank'o wotts kitots amr manoke worwot iko beetwone, jaahrnwere oorshitwone» etiruwots itatso korde'ere. 
\v 14 \x - \xo 4:13-14 \xo*\xt Ari. 27:1 \xt*\x* Yaats wotituwo danatste, it beyo eebi? ikonoto be'eyar il t'afit daawnok'o itne. 
\v 15 Maniyeremó eto iti b́geyituwo «Doonzo bíere nobeetka wotiyal han wee ekeewi k'alituwone» etoniye itsh geyiti. 
\v 16 Itmó han it etfk'oon bognona etoone it it'iri, han naari it' jamoniye gonde.
\p
\v 17 Eshe sheeng keewo k'alo danfetsr k'alraaw asho k'al b́k'azo morre bíats b́wotiti.
\c 5
\s Gaaletswotssh boatso korbodek'etwok'o b́wooshtsok'o
\p
\v 1 Andoor it gaaletswotso! aab waa k'ewere, weerali gond bek'o it ats b́weetwotse kuhar efere. 
\v 2 It gaaljamo ok'wutsere. It tahonowere biliyon meewtsere. 
\v 3 \x - \xo 5:2-3 \xo*\xt Mat. 6:19 \xt*\x* It awntsonat it ambaron ajwutsere, bí aj ajonwere gawe itats b́wotiti, it meetsonowere tawok'owe b́meetiye, s'uwaatsi aaw hanotsitse ay gaalo ko'irte. 
\v 4 \x - \xo 5:4 \xo*\xt Iwi. 24:14-15 \xt*\x* Hamb it tarootse k'es'roon jints fini ashuwots k'awuntso bik' itde'e bokuhi k'ááro b́shiyeyri, mááy ko'iruwots k'ááronowere dari kes'i jirwots doonzo waazats bodrere. 
\v 5 Datsatsi it beyo b́dowere it shuntsok' beerte. It tooko shukosh k'aniyets miinzok'o shopidek'rte. 
\v 6 Kááwo ats angshat úd'rte, bíwere itn k'eferatse.
\b
\s Doonzo aanar b́woo k'amoon koto
\p
\v 7 Eshuwwotso! eshe haniyak doonzo b́waafetsosh k'amoon korere, goshtso b́ dats shintsonat ili awusho b́ daatsfetsosh k'amefetsr mangts k'awunts detstso b́ datsi shuwo kotfe. 
\v 8 Itwere mank'o k'amoore, doozo weyi aawo b́karntsotse it nibon kup'ore.
\p
\v 9 Eshúwotso! iti k'orerawok'o, it ats atseyo mumundk'ayere, Hamb eshe angshituwo fengeshatse need'wtsere. 
\v 10 Eshúwotso, doonzo shútson keewts nebiyatiyots gond bek'o k'amoon dek'on bo artsok'o danere. 
\v 11 \x - \xo 5:11 \xo*\xt Iyo. 1:21-22; 2:10; Dub. 103:8 \xt*\x* Dabnu k'amoon kúp'ts manots «Derekne» etiruwone boosha, Iyob awuk'o b́ k'amtsok'o shishrte. doononwere il bísh b́ k'alts sheeng keewo bek'rte, mannowere doonzo maartsonat maac' nefetso b́ wottsok'o bek'rte.
\p
\v 12 \x - \xo 5:12 \xo*\xt Mat. 5:34-37 \xt*\x* Eshúwotso! b́jamon daron wotowa datson jam keewon keewonoru taark'ayere, it keewo ee eta wotiyal arikon ee eto wotowe, woteratse wotiyal arikon woteratse erere, mank'o woto b́ k'azalomó it ats angshetuwe.
\p
\v 13 Ititse bí ats kic' bodts asho b́ beyal Ik'o k'onuwe, geneúts asho b́ beyal Ik'o udefetsr dúwe. 
\v 14 \x - \xo 5:14 \xo*\xt Mar. 6:13 \xt*\x* Ititsere shodts asho b́ beyal Ik' maa eenashuwotsi bíyok s'eede'e, boowere shodts manats doonzo Iyesus shútson zeyito furr Ik'o k'onune. 
\v 15 Hank'o imnetiyats need'ts Ik' k'ono shodts man kashituwe, Doonzonu b́ shodotse bín kashituwe, b́ fints morro b́ beyalo bísh orowa etetuwe. 
\v 16 Mansh it kashituwok'o it morro it ats atsewosh kewewore, iko k'oshosh Ik'o k'onuwe, kááw ash Ik' k'ono ay k'awuntso daatsit ango detsfe, 
\v 17 \x - \xo 5:17 \xo*\xt 1 Naash. 17:1; 18:1 \xt*\x* Eliyas nonk'o ashe b́ teshi, wotowa bako awusho b́ búyawok'o kúp'shdek't b́ k'oni keez natonat worwoti badosh datsats eegoru awusho búyatse.
\p
\v 18 \x - \xo 5:18 \xo*\xt 1 Naash. 18:24-45 \xt*\x* Aaninwere Ik'o b́ k'onre daro awusho b́ imi, datsunuwere aani shúwo b imi.
\p
\v 19 T eshúwotso! ititsere iko ari keewi weratseere b́ keshal k'osho ari weero maants bín bí aaniyal, 
\v 20 \x - \xo 5:20 \xo*\xt Ari. 10:12; 1 P'et'. 4:8 \xt*\x* morretso b́ darts weeratse bí aaniyal, morretso kashu k'irotse b́kashituwok'onat ay morrosh orowa eto bísh b́ daatsituwok'o dande'e.