\id GAL - Borna New Testamnet
\ide UTF-8
\h Gelati
\toc2 Gelati
\toc1 Gelati Maants
\toc3 Gel.
\mt3 Wosheetso P'awlos Wosho
\mt Gelati Ashuwots Maants
\imt Kindo
\ip Iyesus kashyo keewiru doo shishiyosh aap'etso jamoke nabfere ayhudi woteraw ashuwots dek'fere bo ami taawo «Kristiyani wotosh Muse nemo s'eentso geyifamó geyiratsa?» Etiru aato tuutni b́ tesh, múk'ef Isiyotsere Rom shirootsts Gelatyon fa'a Ik'i moowwotsitse «Asho Ik' shinatse b́ kááwish Iyesus s'uzn aman b́ woterawo Muse weeron imets nemo koto bín geyife» ett P'awlosi k'efiru ashuwots faa'ano bo tesh.
\ip P'awlos Gelati ashuwots maants woshan b́ guut' dananatse tuutso dandts ashuwotsi arik wotts imnetiyonat Krstiyaniyi beyo maants jishosha, P'awlos Iyesus Krstossh woshek b́ wotoko kitsone b́ tuwi, woshetsosh bín s'eegtso Ik'a bako ash wotb́k'azok'onat b́ woshewonu Ayhudi woteraw ashuwotsok b́ wotok'o ik ikon b́ daniyi, s'uwaatsi k'ot'wotsitsnowere Krstiyani beyo Iyesusi amannon daatseyiru shunotse t'úptso b́ wotok'oniye b́ kitsiri.
\iot Jamon mas'aafan b́detstso
\io1 Kindo 1:1-10
\io1 Wosheetso P'awlos b́ detsts alo 1:11—2:21
\io1 Ik' deeri doo shishiyo 3:1—4:31
\io1 Krstiyani nas' keshonat k'alosh boon geyit keewo 5:1—6:10
\io1 Gúúpo 6:1-18
\c 1
\p
\v 1 Ashuwotsoke wee ash weeron b́ woterawo Iyesus Krstosnat bín k'irotse tizts Ik'o nihon wosheetso wotat wosheetso taa P'awlosoke, 
\v 2 Tiyoke fa'a eshú jamwotsoke Gelati Ik'i moowwotssh wosheetso.
\p
\v 3 No nihi Ik'okere, no doonz Iyesus Krstos s'aatonat jeenon itsh wotowe.
\p
\v 4 Gond dúranitse noon kashiyosh noko Izar Izewernat no nihi bí eektsosh Krstos no morrosh b́ tooko beshidek't b́ imi. 
\v 5 Dúre dúrosh b́ borfetso Ik'osh mango wotowe! Amen.
\s Arik wotts doo shishiyo Ik s'uzo b́wottsok'o
\p
\v 6 Krstos s'aaton itn s'eegtso Izar Izeweratse káári it k'aletsonat k'osh doo shishiyo maants it aantsok'o taane bí adiri. 
\v 7 Hanowere ti etir itn dandirwotsnat Krstos doo shishiyonowere k'uriyosh geyiru ik ik ashuwots bobetsosha bako doo shishiyoniyere shinoor ik s'uzee. 
\v 8 Wotowa eree noon wotowá, daratsi melakiyo wotowa, no nonabtsonton gáwet k'osh doo shishiyo itsh nabitwo c'ashek wotowe! 
\v 9 Haniyere shini t ettsok'o andoru aani eteetwe, it it dek'tsonton ik woteraw doo shishiyo konworu itsh b́ nabiyal c'ashek wotowe!
\p
\v 10 Bére, taa t geyir asho taan b́ úditwok'owemó? Ik'o taan b́ úditwok'owe? Himó ashuwotsi geneúshosh t geetsok'oweya bí ariri? Ashuwotsi geneúshosh t geyiyal Krstossh guutso woterawnk'e b́ teshi.
\s P'awlos wosheetso wotat b́s'egeyo
\p
\v 11 Ti eshwwotso! taa itsh tnaabts doo shishiyo ashoke daatsek b́woterawok'o it danetwok'o geefe. 
\v 12 Doo shishiyanowere Iyesus Krstosi taash bek'shi bako konoknoor de'atse, wee asho konwor taash daniratse.
\p
\v 13 \x - \xo 1:13 \xo*\xt Wosh. 8:3; 22:4-5; 26:9-11 \xt*\x* Joots ayhudiwots imnetiyots tteshor aawk'o tbefok'o shishrte, Ik' moowwotsi weeralo gishefetsat t'afi bazoshe tnokorefooni. 
\v 14 \x - \xo 1:14 \xo*\xt Wosh. 22:3 \xt*\x* Ayhudiwots imnetiyo kotósh tdúron teshts t jir Ayhudi jamwotsiyere bogfe b́teshi, nih nihwots niwosho okoori eeno detsfe b́teshi.
\p
\v 15 Ernmó tind maac'otse tbeefere Ik'o taan galbdek'i, b́s'aatonowere taan s'eeg b́dek'i. 
\v 16 \x - \xo 1:15-16 \xo*\xt Wosh. 9:3-6; 22:6-10; 26:13-18 \xt*\x* Ik'i ash woterawots b́ naay jangosh doo shishiyi aap'o t shishitwok'o Ik'o b́ naayi taash kitsosh b́geyor taa kontonwor shiyeratse, 
\v 17 Taayere shin teshts woshetswotsi gonkeyono Iyerusalem maants amatse, ernmó shin Araawi datsomants k'az tiami, ando aaninwere Demask'o maantse k'az tiaani. 
\v 18 \x - \xo 1:18 \xo*\xt Wosh. 9:26-30 \xt*\x* Maniyehakowere keez natoniye hakon Keefi eteefo P'et'rosnton daneyosh Iyerusalem maants ti ami, manoknowere bínton tatse úúts aawo tteshi. 
\v 19 Doonzo eshu Yak'obi tbek'i bako wosheets k'oshwotsitse konnor be'atse.
\p
\v 20 Itsh tguut'irwan kooto b́ woterawok'o Ik' shinatse itsh katsidek' danirwe.
\p
\v 21 Maniyere hakon Soriyi datsonat Kilk'i datso maants tiami. 
\v 22 Yhud Datsatse fa'a Krstos Ik'i moowwots t shiitso bek' danakne boteshi. 
\v 23 Bo boshishtsonu «Bali noon giishat teshts asho bali t'afiyosh b́geyiru imnetiyo and b́nabiri» etirwoniye. 
\v 24 Ti atse tuutsonowere Ik'o boúdi.
\c 2
\s P'awlos woshets wottsok'o k'osh woshetswotsoke b́daneetsok'o
\p
\v 1 \x - \xo 2:1 \xo*\xt Wosh. 11:30; 15:2 \xt*\x* Tatse awd natoniyere hakon Bernabasnton Iyerusalem maants aanat tiami, Titonowere taanton dek'at amree b́teshi. 
\v 2 Man maants tiamwere Ik'o taash kitst b́bek'shtsok'onee. Haniyere shin t fintso wotowa and t fintso dats mec'r wotar b́datserawok'owa etaat Ik'i ash woterawwotssh tnabiru doo shishiyo een een wotts jishirwotssh bo aal aalshe t daniyi. 
\v 3 Taanton fa'o Tito Grik dats ash b́wotiyalor gofo bíametwok'o kic'iyeeratse. 
\v 4 Ernmó nodagots ááshon mut'at kindts ik ik kootets eshwots gofo bíametwok'o geeyatniye boteshi, ashaanots k'ororosh noyits mut'at bokind Krstos Iyesusn nodetsts s'ayin no keshtso bi'ide'er guutsmots noon aaniyo geeyatniye. 
\v 5 Noomó doo shishiyi arikeewo itoke kup'arr b́beetwok'wa etaat dab múk' sa'atoshor ekewotssh da'eratsone.
\p
\v 6 \x - \xo 2:6 \xo*\xt Iwi. 10:17 \xt*\x* Ik'o ash ááwo s'iilr b́bogabogshrawotse, jisht teshts ashaanots koni bowotiyalor bojangosh taa kic'eratse, bo taa t keewiru doo shishiy aap'ats handr keewo eegor dabraatsne. 
\v 7 Ik'o P'et'rossh ayhudiwotssh doo shishi adaro b́ imetsok'on taashor doo shishi adaro Ik'i ash woterawwotssh t shishiyitwok'o b́wooshtsok'o bo t'iwintsdek'rnee, 
\v 8 Mansh eshe P'et'rosi ayhudiwotssh wosheetso wotar b́finitwok'o woshtso Izar Izewer taanor Ik' ash woterawwotssh wosheetso wotar t finitwok'o woshre. 
\v 9 Irok'o araat be'eyiru jishirwots Yak'obnat P'et'rosu, Yohanswere Ik'i s'aaton k'osh wotts fini gowan taash b́ imtsok'o bodantsosh taanat Bernabasnton ik bowoti milikit wottso bok'ani kisho noosh imrne, shiyeyat no Ik' ash woterawwotsok no ametuwok'o boowere Ayihudiyots maants bo ametuwok'o bok'ali. 
\v 10 S'uznmó bo dagotse fa'a tuguretswotsi no baterawok'o noosh oona etrne, hanwere arikon k'alosh t geef keewoniye.
\s P'awlos Ans'okiyon P'et'rosi b́k'eftsok'o
\p
\v 11 P'et'ros Soriyotse fa'a Ans'okiyo maants b́ woor dart b́ teshtsotse b́ shinatsere bín t k'efi, 
\v 12 Yak'ob b́ woshts ik ik ashuwots Ans'okiyo maants bowaafetsere shin Ik' ash woteraw ashuwotsitsere amantsuwotsnton towaat mááfetsetni b́ teshi, bo boweyiyakonomó, «Ik' ash woteraw jirwotsitsere amantsuwots gof amo boosh geyife\f + \fr 2:12 \fr*\fqa Gof amo boosh geyife: \fqa*\ft Etrwots ayhudiyotsi bo wotok'oni b́ kitsiri. \ft*\f*» etiru jirwotsn shatt shuutso maants aanat Ik' ash woterawwotsatse b́ galeyi. 
\v 13 K'osh ayhudi jir wotts Krstiyaniwotswor ayhudi woterawwotsnton mish móó gond b́wottsok'o aridek't P'et'roskok'o bok'ali, Barnabasworu dab b́ oreraniyere be'eyi darman maants getseyatniye b́ teshi. 
\v 14 Bo k'altsan doo shishi arikeewonton ik wotob́k'azo t bek'tsok'on P'et'rossh, «Nee ayhudi wotefetsat ayhudi nemok'on b́ woterawo Ik' ash woterawwots nemok'one n beefoni. Eshe, Ik' ash woterawwots ayhudoyots nemok'on bobetwok'o eegishe angnon n k'aliri?» etaat jami shinatse bín t k'efi.
\s Ayhudyi wotowa Ik' ash woterawwotsu bokashit amanone
\p
\v 15 Arikon no noshuweyon Ayhudi noona bako morretsk wotts Ik' ash woterawwotsnonaliye. 
\v 16 \x - \xo 2:16 \xo*\xt Dub. 143:2; Rom 3:20-22 \xt*\x* Ernmó asho kááw b́ wotit Krstos Iyesusi amanona bako nemo s'eentson b́ woterawok'o danfone, noowere nem s'eentson b́woterawo Krstosi amanon kááw nowotitwok'o Krstos Iyesusi amanerone, konwor asho nemo s'eentsr kááw woteratse. 
\v 17 Krstosi amanon kááw wotosh nogeyor no notookon morretswotsi wotar nodatsetka wotiyal eshe, morro no finitwok'o woshirwo Krstosiye eteya? mank'owiyaliye! 
\v 18 Taa ttookon t gáákts nemi niwok'owa aani tfiniri wotiyal taa t tookon nemosh alerawo twotok'oniye t kitsiri etee. 
\v 19 Ik'osh t beetwok'owa etaat k'irok'o k'aleyon nematse k'alere. Taa Krstosnton jitetsok'o t taawetsotse 
\v 20 haniyere okoon Krstosi t gitsotse beeti bako taa t tookon beetk tanliye, and t meets atson t beyir taan shuntsonat taash b́ tooko beshidek't imts Ik' na'o amanon daatsets kashone. 
\v 21 Ik' s'aato k'awntsalo oriratse, asho kááw b́ wotit nemo s'eentson b́wotiyal Krstos b́ k'ir datsmec'ra etee.
\c 3
\s Kááw woto b́daatset Krstosi amanon b́wottsok'o
\p
\v 1 It dárts Gelati dats ashuwotso! kone iten teziyik'ri? Iyesus Krstos it shinatse jitats jiteyat b́teshtsok'on itsh sháánidek't keewere b́teshi. 
\v 2 Itoke danosh tgeyirwo han s'uziye, arikon it S'ayin shayiro it dek' nemo s'eentsoneyamó? Doo shishiyosh aap'etso shishat amanoneya? 
\v 3 It Ik' shayiron dek' tuwat andmo meetson ishoshe it geyiri, eshe hanok'o dark itne. 
\v 4 Doo shishi jangosh it dek'ts gond bek' jamo k'awtsalo wotat orere eteya? Han k'alrte wotiyal arikon k'awtsalko orere etee. 
\v 5 Ik'o b́ shayiro itsh bí imirwonat itokere adit fino b́ finir nemok'o it finirwoshemó? Doo shishiyosh aap'etso shishat it amanirwoshe?
\p
\v 6 \x - \xo 3:6 \xo*\xt Aze. 15:6; Rom 4:3 \xt*\x* Hanwere «Abrahamiye Ik'o b́ amani, manwere kááw wotat bísh b́ taaweyi» ett guut'etsok'one. 
\v 7 \x - \xo 3:7 \xo*\xt Rom 4:16 \xt*\x* Eshe amanirwots Abraham nanaúwotsi bowotok'o dande'ere. 
\v 8 \x - \xo 3:8 \xo*\xt Aze. 12:3 \xt*\x* Ik'o Ik' ash woterawwotsi imnetiyon kááw b́ woshitwok'o S'ayin mas'aafo shino be'er «Ash jamwots neen deretúne» ett Abrahamsh shin doo shishi aap'o keewere. 
\v 9 Eshe amaniru jamwots amantso Abrahamnton deretune.
\p
\v 10 \x - \xo 3:10 \xo*\xt Iwi. 27:26 \xt*\x* «Nemi mas'afotsere guut'ets tzaziyi jamon kúp'ar berawonat finats jitsraw jamo c'asheke» ett guut'etsotse «Nemo finats jiitson kááwwotsi wotitwone» etirwots c'ashekne. 
\v 11 \x - \xo 3:11 \xo*\xt Ibr. 2:4 \xt*\x* «Kááw ashonmó imnetiyon kasho daatsitwe» ett guut'etsosh nemi fin s'eentson asho konwor Ik' shinatse kááw b́ woterawok'o daneke. 
\v 12 \x - \xo 3:12 \xo*\xt Lew. 18:5 \xt*\x* Nemo imnetiyats ned'iyekaliyee, mank'owere «Asho nemon beyo b́ falit nemi tzazi jamwotsi finats b́ jitsiyale» ett guut'ere.
\p
\v 13 \x - \xo 3:13 \xo*\xt Iwi. 21:23 \xt*\x* «Mitats jitere k'iritu jamo c'asheke» ett guut'etsotse Krstos noosh c'ashets ash wotat nemi dowet c'ashmanitse noon b́ kishi. 
\v 14 Hanwere b́ wot Ik'o Abrahamsh b́ imts deero Iyesus Krstos weeron Ik' ash woterawwotsok b́ bodetwok'onat noowere Ik'o itesh imetwe bí etts Shayiri s'ayino imnetiyon nodek'ishe.
\s Nemo jangiyon aap'etso b́ gahawok'o
\p
\v 15 T eshwotso! aab keewan ashoke daneets keewonton ik woshde'er s'iilone, ash iko b́ kindts taaro kááwar b́ ned'iyakon konwor oriyosh wee dabosh falatse. 
\v 16 \x - \xo 3:16 \xo*\xt Aze. 12:7 \xt*\x* Ik'o Abrahamnat b́ naarosh jangiyets aap'wotsi b́ im hank'one, jangiyon aap'etso aywotssh b́ wottsok'o woshdek't «Nnaarwotssha» eraatse, ernmó ikosh b́ wottsok'o «Nnaarosha» etfe, «Nnaara» etetsanwere Krstosiye. 
\v 17 Eshe taa ti etirwo haniye, awd bale shaash natoniyere il imets nemo shino Ik'okere s'ayntsdek't imets taaro gaahr jangiyets aap'man t'afiyo falratse. 
\v 18 \x - \xo 3:18 \xo*\xt Rom 4:14 \xt*\x* Ik keewo naatet nemok'ona wotink'ere jangit imets aap'i weeron b́ woto orere b́ teshi, ernmó Ik'o naato Abrahamsh bí'im jangit b́ aap'tsoshe.
\p
\v 19 Eshe, nemo ime eegoshe? Nemo dabee Abrahamsh jangiyon imets naaro b́ wafetsosh nomrratse tuutsone, nemo melakiyo weeron beshat dagi taalotsi ash ikosh imere. 
\v 20 Ernmó dagtalotse bede'er manit asho git jirosha bako ik jiro s'uzosh fineratse, Ik'onmó ike.
\s Nemo eegosh imetsok'o
\p
\v 21 Eshe nemo Ik' jangits keewo k'efitwa? B́ jamon k'eferatse! kasho daatsit nemo imere wotink'e kááw woto nemi weerone b́ datseyak'oni b́ teshi. 
\v 22 Ernmó Iyesusi amanon daatset jangets keewo amantsuwotssh imetwok'o S'ayin mas'aafo b́ etirwok'o dats jamu morrosh kéweyat morron tipetsu woterane.
\p
\v 23 Imnetiyo b́ waftsere shinon nemosh tipetswotsiye noteshi, hanwere imnetiyo b́ be'efetsosh nemo noon kotdek't detsdek'tniye b́ teshi. 
\v 24 Hank'on, imnetiyon kááw no wotitwok'o Krstos b́ wááfetsosh nemo noon ditsirwo wotatniye b́ teshi. 
\v 25 Andomó imnetiyo b́ waatsosh nemi ditsi shirots nowoto orere.
\p
\v 26 Iyesus Krstosi amanon it jametswor Ik' nanaúwotsi woterte, 
\v 27 Gúpeyon Krstosnton ik wotts it únetswots Krstosi tahok'o tahadek'rte. 
\v 28 It jametswor Krstos Iyesusn ik it wottsotse ayhudiyonat Girikiyon, gútsonat guuts woterawon, núngushonat máátson dagotse eegoru k'osh k'osheyo aaliye. 
\v 29 \x - \xo 3:29 \xo*\xt Rom 4:13 \xt*\x* Eshe Krstosk it wotiyakon Abraham naar itne, jangiyets aap'mank'on naatetwots itne.
\c 4
\s Ik' nanaúwotsi nowottsok'o
\p
\v 1 Andoor tietirwo haniye, naatetwo na'i marmat'o wotar b́ daatsewor dets jamosh doonzo b́wotiyalor guutsoniyere eegonor k'osheratse. 
\v 2 Ernmó b́nih bísh b́gedts aawo b́borfetsosh ditsirwotsnat maanzirwots shirootse b́ wotiti. 
\v 3 Mank'owere no shayiri keewon nana'i marmat'wotsk'o noteshor datsan niwoosh keewetswotsi wotat gutswotsiye noteshi. 
\v 4 Ernmó eteets dúro b́bodtsok'on Ik'o b́naayi noosh b́woshi, bíwere nemi shirots wotat máátsatse b́shuweyi. 
\v 5 \x - \xo 4:5-7 \xo*\xt Rom 8:15-17 \xt*\x* Hano b́k'al Mesee nemi shirotse teshtswotsi aani kewdek'onat noonowere Ik' nana'úwotskok'o noon woshoshe.
\p
\v 6 Ik' nana'úwotsi it wottsosh Ik'o «Nihono!» ett s'eegiru naayo shayiro no nibots b́woshi. 
\v 7 Mansh eshe haniyak na'a neena bako guuts neenaliye, na'a nwotiyalo Ik'atse tuutson naatetwots neene.
\s P'awlos Gellatiyi ashuwotssh b́detsts kic'o
\p
\v 8 Haniye shin Ik'o it dartsatse tuutson bo doyon izar izewerotsi woterawwotssh guutso wotatni it kéweefoni. 
\v 9 Andmó Ik'o danrte, dabnwor Ik'o itn danre, bere, ekeewots maawtswotsnat k'awntsal datsanatsi nemwotsok awk'oniya it aani? Aawuk'oneya ún aani aanat bo guutswotsi wotosh itgeyiri? 
\v 10 K'osh k'osh aawwotsnat shashwotsn woriwoti kaywotsitsnat natwotsitse it atso kotosh k'osh wotts mango it imiri. 
\v 11 It dagotse finon t maawts maaw jamo k'awntsalo oritwe etniye t shatiri.
\p
\v 12 T eshwotso! taa itkok'o t wottsosh itwere tikok'o wotoore etaatniye t k'oniri, it taan eegoru daderatste. 
\v 13 Shini doo shishiyi aap'o itsh nabosh gowo t daats t shodtsatse tuutson b́wotok'o danfte. 
\v 14 T shodo dab itsh fadee b́ wotiyaliru taan gac'eratste wee taan wic'atste, dab melakiyo it dek'iruwok'owe woshdek'at taan it dek'i, Krstos Iyesusi dek'iruwok'o woshat taan it dek'i. 
\v 15 Haniyere shini it detsts geneú jamo aawoke b́fa'oni? B́ faleyal it ááwwotsi dab kishde'er it imetwok'o taa t tookon gaw wotitwe. 
\v 16 Eshe, and ariko itsh t keewtsosheya it balangaro wotat t daatseyi?
\p
\v 17 K'osh ashuwots it jangosh kic'atniye boshiyaniri, ernmó han bok'alir sheengoshaliye, bo geyirwo it noatse it k'aletwok'owonat boosh kúp'ar it shiyanitwok'owe. 
\v 18 Sheeng k'os'osh kúp'o jam gizewon shenge, ernmó it kúp'an taa itnton t beyor s'uzosh wotk'aye. 
\v 19 T nana'otso! Krstos it atse sháánon b́ be'efetsosh aani it jangosh na'it'i shambatse t fa'oni. 
\v 20 Itsh eeg k'alo taash b́ geyituwok'o itdartsotse dandeyatniye t kic'i, it dagotetsere datseyar k'osh k'osh noon keewon tkeewink'ere aawk'owe t shuni.
\s Agarnat Saran ariyetso
\p
\v 21 It nemosh keewetswotsi wotar beyo geyirwots aab taash keewwere, nemo bíetirwo shiyatsteya? 
\v 22 S'ayin mas'aafwotsitse «Abraham git nana'úwotsi detsfe b́teshi, iko b́shwee gonuwatse wotat k'oshonu b́shwee mááts gon woteraawwatsna b́teshi» ett guut'ere. 
\v 23 Gonu naay b́shuwe meets niwok'on b́wotefere gon woteraw naay b́shuwemó bísh jangit aap'etsok'one b́teshi. 
\v 24 \x - \xo 4:24 \xo*\xt Aze. 16:15; 21:2 \xt*\x* Shints taarets taaretsnwere Sin guratstsu b wotor gutsmosh wotit nana'o shuwiruniye, biwere Agariye. 
\v 25 Agaar Araawi datsatse fa'a Sin guro ariyetsuniye bteshi, mansh eshe andtsu Iyerusalemntoniye biariri, bi bnanaúwotsnton guutsmotse fa'úniye. 
\v 26 Dambe darotsik wottsu Iyerusalemmó goniyaliye, biye no indiye.
\q
\v 27 \x - \xo 4:27 \xo*\xt Isa. 54:1 \xt*\x* «Nee nana'a shuraawne gene'úwowe!
\q2 Nee shuwosh id'r danaawne ‹ílll› eree,
\q Kenih detsts máátsuniyere
\q2 K'azk'rets máátsu ay nana'o detsfane» ett guut'ere.
\p
\v 28 Tieshwotso! itwere Yisaak'kok'o jangiyets aap'i nana'úwots itne. 
\v 29 \x - \xo 4:29 \xo*\xt Aze. 21:9 \xt*\x* Ernmó manoor meetson shuwetso Shayiron shuweetsman b́gishtsok'o hambetsoor mank'oyiye. 
\v 30 \x - \xo 4:30 \xo*\xt Aze. 21:10 \xt*\x* Ernmó S'ayin mas'aafo bíetirwo eebi? S'ayin mas'aafo «Mááts gonu bshuts na'o gon woteraw máátsu bshutsonton towaar b́naarawotse gonu bnaaynton okaan kishwe» etfe. 
\v 31 Mansh eshe tieeshwotso, noo s'ayinu nana'úwots noone bako gonu nanaúwots noonaliye.
\c 5
\s Krstosn daatset nas' kesho
\p
\v 1 Krstos nas'o noon b́kish nas'on nobeyishe. Mansh eshe kup'arr need'ore, aaninwere guutsmi k'ambariyots tipek'ayere.
\p
\v 2 Hambe! taa P'awlos itsh tietetwo haniye, gofo it amal Krstos itsh eegor k'alratse, 
\v 3 Gof ametu jamo «Nem jam s'eentso bín geyife» err aani bísh keewitwe, 
\v 4 It nem koton kááw wotosh geyiru jamwots Krstosatse k'alewtserte, b́ s'aatotsnowere keshrtee. 
\v 5 Noomó Ik' shayiron kááwi wotosh jángiyetso imnetiyone nokotiri. 
\v 6 Iyesus Krstosn beetwosh shunon finitwo imnetiya boko gof amaa wee amk'azo eegoru oot'o imatse.
\p
\v 7 It sha'a sha'o sheenge b́ teshi, eshe and arkeewosh it alerawok'o itn bazitso kone? 
\v 8 Hank'o izan itn s'eegts Ik'oke waakaliye. 
\v 9 \x - \xo 5:9 \xo*\xt 1 K'or. 5:6 \xt*\x* Manwere boot' shash muk'ú boot' jamo b shashitwoshe. 
\v 10 Ernmó haniyere k'osho it gawirwo it deshawok'osh arikon wotde'er doonzats amanittwe, konworu it took s'adiitwo b́ beyal angsho dek'etwe.
\p
\v 11 Tí eshwotso! taa andish b́ borfetsosh t nabirwo, «Kashosh gof amo geyife» etirwe wotiyal andish b́ borfetsosh eegishe t gisheyiri? Hank'o b́ wotitka wotiyal Krstos mask'aliyo ashuwotssh t'ug woterawnk'e b́ teshi. 
\v 12 Eshe hanots iti dandiru ashaanots bogeyiyal gof amo s'uzi b́ woterawo boatso gato bowoshink'ere shúnfe.
\p
\v 13 Tí eshwotso! it nas'o keshtswotsi it wotish s'egerte, ernmó iko k'oshosh shunon finowa bako nas'o it keshaan meets tewno s'eentsosh wotk'aye. 
\v 14 \x - \xo 5:14 \xo*\xt Lew. 19:18 \xt*\x* Nem jamo «K'osh asho n tokok'o woshde'er shune» eteets aap' ikon s'eenetwe. 
\v 15 Ernmó it atsatseyo shac'eyatni it meeyeyiri wotiyal it atsatseyo it s'uweerawok'oo it atso korde'ere.
\s Shayironat meets beewo
\p
\v 16 Eshe haniyak shayiron jisheyar it betka wotiyal, meets tewno s'eentsk'ayere. 
\v 17 \x - \xo 5:17 \xo*\xt Rom 7:15-23 \xt*\x* Meets tewno shayiri tewnontotoniye b́ wed'eyiri, shayiri tewnonu meets tewnontoniye b́wed'eyri, mansh meetsonat shayiron boats atsewo bo wed'eyiri, eshe it geyirwo k'alo falratste. 
\v 18 Shayirona it jiisheyiri wotink'eremó nemosh keweyirwotsi woterawnk'te.
\p
\v 19 Meetsi finwots daneknee, boowere wido, kiimwoto, shiraats jintsi woto, 
\v 20 Woteraw ik'wotsi ik'iyo, atetsi woto, balangar woto, mooshewo, fayo, okooro, b́took shuno, k'aleyo, weeri gondo, 
\v 21 ash een shit'o, másho, weral t'oola, hanotsi artswotsiye, haniyere shin itatso korde'ere tiettsok'on andoor aaniyi it atso korde'ere etirwe, hanotsk'o wotts keewwotsi finit ashuwots Ik'i mengtstu naaratsne.
\p
\v 22 S'ayin shayiri shuwonmó shuno, geneúwo, jeeno, k'amo, sheengo, doowo, amanetso woto, 
\v 23 Dingato woto, b́took keewoniye. Hanotsk'o keewwotsi k'efit nemo aaliye, 
\v 24 Krstos Iyesusk wotts ashuwots meetso b́gusiyontonat b́tewnonton mesk'eliyats jitk'rerne. 
\v 25 Shayirona nobeeyiri wotiyal shayiron jishewone. 
\v 26 Iko k'osho gondosh tuuzr noatsatsewo okoorefetsr datsmec'ro it'k'ayone.
\c 6
\s Bí atsatseyo tep'eyo
\p
\v 1 Ti eshwotso! ash iko morro finar b́daatsetka wotiyal shayiri ash wottswots it han naari asho maac' nefon káátswere, ernmó neewere man naari fadewots ndihrawok'o ntooko korde'e. 
\v 2 Ititsi ik ikets k'oshoko kuri mango kurde'e, mank'oon Krstos nemo s'eentsitute. 
\v 3 Asho konwor k'oshwotsiyere b́k'ants keewo b́deshawo «Taa k'oshwotsiyere bogfe» err biasabiyal b́ tookoniye b́ ant'elciri. 
\v 4 Asho ik ikon b́took fino shu'arr fadbe'e, maniyere il b́ tooko k'oshwotsnton nohiyo b́woterawon b́ tooku s'uz bín b́ it'et keewo daatsitwe. 
\v 5 Ik ik asho b́ took kuro kurdek'o bísh geyife.
\p
\v 6 Doo shishyi aap'tso daniru asho bín daniyirwonton sheeng keew jamó kayde'e.
\p
\v 7 It tooko ant'elck'ayere, asho b́k'es'et b́ shooktso b́wottsotse Ik'ats kasho faleratse. 
\v 8 B́ meetso gene'úshosh shookirwo b́meetsatse k'iro k'es'etwe, shayiro geneúshosh shooketwo shayiratse dúre dúri kasho k'es'etwe. 
\v 9 Maac'o k'ut'dek'o no k'azetka wotiyal b́dúro b́bodor mááy katso nokakwitwotse sheeng fino finosh maawk'ayone. 
\v 10 And wotts aawo nodetstsotse ash jamwotssh bítsnor amaniru ashuwotssh sheeng keewo k'alwone.
\s S'uwori izonat jamon
\p
\v 11 Aawk'o een een fidalwotsn han t kíshoon t guut'tsok'o s'iilere! 
\v 12 Gofo itametwok'o iti kic'irwots úratse sheeng araar be'ewo geyiru ashuwotsiye. Han k'alirwotswere Krstos mask'aliyatse tuutson gishewo boats b́boraawok'owa ettniye. 
\v 13 Boohe it meetsats it'osha ettni gofo itametwok'owo bogeyiri bako gof amtswotswor dab botokish nemo koratsne. 
\v 14 Nodoonz Iyesus Krstos mask'aliyoniyere okoon k'oshon it'o tiatse wokowe, jit hanatse tuutson datso tiatse k'alewtsere, taawere datsatse k'alewtsere. 
\v 15 Mansh gof amonu gof amk'azonu eegor k'alratse, k'alitwoniyere azeets handro wotoniye. 
\v 16 Memeri shuutso shoyiru jamwotsnat Ik'i jir wotts Isra'el ashuwotssh jeenonat mhretiyon wotowe.
\p
\v 17 Ti atsatse fa'a jot'eetsi shoro Iyesusk twottsok'o b́kitsirwotse haniyak konúwor taan kic'ik'aye.
\p
\v 18 Ti eshwotso! nodoonz Iyesus Krstos s'aato it shayironton wotowe! Amen.