\id EPH - Borna New Testamnet
\ide UTF-8
\h Efeson
\toc2 Efeson
\toc1 Efeson Maants
\toc3 Efe.
\mt3 Wosheetso P'awlos Wosho
\mt Efeson Ashuwots Maants
\imt Kindo
\ip P'awlos Efeson dats ashuwotssh b́ guut'ts wosh jamoniyere shino b́ t'iwintsir «Ik'o b́ k'umtso b́wotit daronat datsatse fa'a azeets jamo kakweyar Krstos s'uz shirots bowotit aawo b́bodore» (1:10) etiru asaabiyatsne. Aaninwere Iyesus Krstosnton ik wotde'er ash naar jamo iko bowotitwok'o k'umts enan finats bo jitsitwok'o Ik' ashuwotssh gawiyetkee.
\ip Ephesonsh wosheets wosh shints kayo guut'tso ik woti jango dek' b́twtso gawintsdek't, Ik'o niho bíashwotsi aawk'on galb́dek'tsok'o, b́ naay Iyesus Krstosn bomorrosh orowa eto daatsr aawk'on bos'ayinetwok'onat Ik'o een wotts b́ jángiyits aap'o shayiri S'ayini weeron aawk'on ariko b́bek'shtsok'oni b́kitsiri, Gitli kayotse ando aani guut'tso nababirwots ikwotde bobewotse Krstosn bodetsts ikwoto arik b́wotitwok'owa boosh b́gawiyir.
\ip Ashuwots Krstosnton bodetsts ik woton aawk'o ik woto bodetstsok'o k'osh k'osh jewri keewon kitsere, Ik' moowu atsok'o b́ wotor Krstos atsatsi tokok'owiye, Ik' moowu mook'o b́ wotor Krstos b gúratsi shúts eenok'owiye, Ik' moowu moogenk'o b́ wotor K'rtos moodonzk'owiye, wosh han guut'tso Krstos weeron be'ets Ik' deero ayidek't adt b́ keewor dashan gop'at wok wotts kitsone b́ bek'shiri, jam keewono b́ s'iilir Krstos shunone, b́ tooko beshide'er b́ imon, b́ maac' k'ewon, b́ deeronat b́ jenok'one.
\iot Jamon mas'aafan b́detstso
\io1 Kindo 1:1-2
\io1 Krstosnat Ik' moon 1:3—3:21
\io1 Krstosn andr beyo 4:1—6:20
\io1 B́ gúúpo 6:21-24
\c 1
\p
\v 1 \x - \xo 1:1 \xo*\xt Wosh. 18:19-21 \xt*\x* Ik' shunon Iyesus Krstossh woshek wottso P'awlosoke, Iyesus Krstosn amanek wottswots, Efesonitse beyiru S'ayinwotssh.
\p
\v 2 No nihi Ik'onat nodoonz Iyesus Krstosokere s'aatonat jeenon itsh wotowe.
\s Krstosn daatseyiru shayiri deero
\p
\v 3 Darotse fa'a shayiri deer jamo Krstosn noon deertso no doonz Iyesus Krstos nihi Ik'o údewe. 
\v 4 S'ayinonat eeg eego deshawwotsi wotaarr b́ shinatse nodaatsetwok'o datsu b́ azeftsere Krstos weeron noon gal b́dek'i.
\p
\v 5 Ik'o b́ geetso sheeng keew b́ wottsotse Iyesus Krstos finon b́ nanaúwotskok'o no wotish bale noon marat'b́dek'i. 
\v 6 Hanowere b́ k'al b́shune na'o weeron beenon noosh b́ imts mang wotts s'aato b́ úditwok'owe. 
\v 7 \x - \xo 1:7 \xo*\xt K'ol. 1:14 \xt*\x* Ik' s'aati s'eenatse tuutson b́ naay s'atson keeweyat no morrosh orowa eto daatsrone. 
\v 8 B́ s'aatono ayidek't noosh kuut're, danonat dani teleefonowere, 
\v 9 Ik'o b́ shuntso Krstos weeron bali b́ k'úmtsok'on ááshat teshts b́shunman no danetwok'o woshre. 
\v 10 Dúri s'uwi aawo b́ bodor Ik'o finats b́ jitsts b́ k'úmtsman daronat datsatse beyiru azeets jamwots ko'ide'er ik s'uzo Krstos shirots bo wotitwok'o b́ woshiti.
\p
\v 11 Jam keewo b́ took shunok'on finiru Ik'o bali b́ k'úmtsok'on Krstos weeron b́ jirwotsi no wotitwok'o noon marat'b́dek'i. 
\v 12 Man b́wotwere Krstosi jángon shintswotsi wottswots noo Ik'o b́mangosh no úditwok'owe.
\p
\v 13 It it kashosh doo shishi aap' wottso ari aap'o it shishor Krstosi it amani, mank'o bí itsh imosh jangit b́ teshts S'ayin shayri matabo itats togk'rere. 
\v 14 Shayiranwere b́ mango údosh b́ wotitwok'o Ik'o bík wotts jamwotsi b́ kashifetsosh nodaatsit naatosh dets nodek'tsoniye.
\s P'awlos Efeson ashuwotssh Ik'o b́k'ontsok'o
\p
\v 15 Eshe doonzo Iyesusatse it detsts imnetiyonat S'ayin jamwotssh it detsts shuno shishat, 
\v 16 itn Ik' k'onon gawfetsat it jangosh Ik'osh údo t'intso need'iratse. 
\v 17 Mango bísh wotitwo no doonz Iyesus Krstos nihi Ik'o ayide'er it danetwok'o dani teleefonat bek'i shayiro itsh b́ imetwok'o Ik'o k'onitwe. 
\v 18 Aaw naari jangosh it s'egetsok'onat S'ayinwots bo naatet mang wotts ristiyo aawk'o ayi b́ wotok'o it danetwok'o it nibi ááwo b́ sháánetwok'o Ik'o k'onitwe. 
\v 19 \x - \xo 1:19 \xo*\xt Dub. 110:1 \xt*\x* Tatsdeshaw bí angi eeno noosh amanirúwotssh aawk'o een b́ wotok'o it danetwok'o Ik'o k'onitwe, 
\v 20 Bí anigi eenano finats b́jiitsi k'irotse tuzdek't darotse b́ k'ano maants b́ beeztso Krstosne. 
\v 21 Ik'o niho Krstosi darotse b́ k'ano maants b́ beez aaw naari alguroniyre, aloniyere, naashoniyere, angoniyere, doonzwottsonat shúúts jamoniyere damb aaninwere datsan s'uzats b́ woterawo weet datswatsnorniye. 
\v 22 \x - \xo 1:22 \xo*\xt Dub. 8:6 \xt*\x* Jam keewo b́ aali shirots woshdek't bísh b́keewiyi, Ik' maatsnowere jamoniyere damb b́ wotitwok'o tooko bín b́ woshi. 
\v 23 \x - \xo 1:22-23 \xo*\xt K'ol. 1:18 \xt*\x* Ik' moowniye bí atsuniye, jamó b́ jamon s'eentsitwo bín s'eenon kiitsitwaniye.
\c 2
\s K'irotse kasho maants k'ay kími jango
\p
\v 1 It it daadonat it morri jangosh it shayiri beyon k'irk itne it teshi, 
\v 2 Manoor datsanatsi gond sha'ok'owa it sha'efoni, aaninwere jongatse fa'a shayiri angwotsi keewirwosha it alefoni, bíwere and azazeraw ashuwotsatse finiru kim shayironiye. 
\v 3 Nó jametswere haniye shinon bo dagotse no meets shunok'onat no maac' gawirwo shoydek'at sha'at no meets tewnok'o beyaatniye no teshi, k'oshwotskok'o no azeewon Ik' fayi shirotsne noteshi.
\p
\v 4 Ernmó Ik' maac' k'ewo ay b́ wottsonat noosh b́ detsts shuno een b́ wottsatse tuutson, 
\v 5 No morron k'irk nowotiyaloru Ik'o Krstosnton kashetswotsi no wotitwok'o woshre, it kashwere b́ s'aatone. 
\v 6 Ik'o Iyesus Krstosnton k'irotse tuuzt daritsi beyokoke bínton noon b́beezi. 
\v 7 Han b́k'alwere Krstos Iyesusn noosh k'eshdek't b́kiitsts doowonat bínton nutsiyetwo deshawo s'aati gaalo weet dúrwotsitse noosh kitsosha etniye. 
\v 8 It it kash imneti weeron wotts s'aatone, manwere Ik' ima bako itokikaliye. 
\v 9 Konwor asho b́ id'aawok'owa, kashiyit s'aato b́daatse finonaliye, 
\v 10 Noo Ik'o bal b́k'anits sheengo finefetsr nobetuwok'o Krstos Iyesus weeron aaniyi azeets Ik'i aztswots noone.
\s Krstosn daatset ikwoto
\p
\v 11 Mansh eshe, bal it shwewon Ik'i ash woterawwotsi it teshtsok'o, Ayhdiwots ash kishon gofo boamtsosh it'fetst itsh gof amawwotsi ett boc'ashfok'o, 
\v 12 it Israe'el ashuwotsnton gonke deshawwots, Ik'o bí ashuwotssh b́jangitswtsats need'iyets aap'i taarwotssho ib wottswots, datsanatsnowere it jangiru ik keewalonat Ik'alon beyirwots, manorowere Krstosatse wokat it teshtsok'o gawde'ere. 
\v 13 Andmó it haniyere shin wokat teshtswots Krstos Iyesusn wotdek'at b́s'atson t'inrte. 
\v 14 Noon k'ált teshtso fayi girgido b́meetson gáákt Ayhdiwotsnat Ik'i ash woterawwotsn ik woshtso nojeeno Krstosiye. 
\v 15 Git jirmanotsitse bínton ikwotitwo ik handr asho azosh Muse nemi tzaziyonat b́ niwwotsi gaakt jeeno b́woshi. 
\v 16 Mask'aliyatse k'irtnwere s'aaleyar beyo k'aaúbazre, gitetswtsnowere ik atso woshdek't Ik'onton maniree. 
\v 17 \x - \xo 2:17 \xo*\xt Isa. 57:19 \xt*\x* Waatnwere, wokat teshtswotssh itnat karnt teshts ayhudiwotsshowere jeen dooshiy aap'o nabre. 
\v 18 Bíyatse tuutson no gitetswor ik shayiron jisheyr nihok t'inetwone.
\p
\v 19 Mansh eshe it S'ayinwotsnton ik datsi ashuwotsnat Ik'i maa ashuwots itna bako haniyere okoon ibonat ashdatsi ashuwots itnaliye. 
\v 20 Woshetswotsnat nebiywotsn need'itsats agerte, ageyiru maamansh tungúshatse shutswotse kaatsde detset shúts kup'o Iyesus Krstosiye. 
\v 21 Maa eenmanu b́ jamon bín ikok desheyarr doonzo S'ayin Ik' moo wotarr eenetwe. 
\v 22 Ik'o b́ shayiron bíts b́ beet moo wotosh itwere Krstosn tohaar ageetute.
\c 3
\s P'awlos Ik' ash woterawwotssh b́ fintsok'o
\p
\v 1 Itsh Ik' ash wotserawwotssha etaatni taa P'awlos Krstos Iyesussh tipetso t woti. 
\v 2 Itsh t sheengshitwok'o Ik'o b́ s'aaton fini gowo taash b́ imtsok'o arikon shishrte. 
\v 3 Bal k'awnon itsh t guut'etsok'o Ik'o ááshts man taash k'eshdek't kitsre. 
\v 4 Itsh t guut'tsan it nababor Krstosko ááshts keewo taa t t'iwintstsok'o danosh falfte. 
\v 5 Ááshts keewanwere Ik' shayiron S'ayin woshetswotsnat nebiyiwotssh and b́ be'etsok'on beshts dúrwotsatse teshts ashuwotssh be'eratse. 
\v 6 \x - \xo 3:4-6 \xo*\xt K'ol. 1:26-27 \xt*\x* Manwere b́ kitsir Ik' ash woterawwots ayhudiyotsnton b́ rstiyo naatetuwotsnat ik atsi kaywotsi wotar Ik'o b́ imts jangosh dooshishi weeron Krstos Iyesusnton kayitwotsi bo wottsoniye.
\p
\v 7 Ik'o b́ angi finon taash b́ imts s'aaton taawere doo shishiyansh finru guutso wotere. 
\v 8 Taa S'ayin wotts jamwotsiyere t múk'iyaloru dab́ daar deshaw Krstos gaalo manwere doo shishiyo Ik' ash woterawwotssh t shishiish Ik' s'aato taash b́ imi. 
\v 9 Mank'o beshts dur jamwotsatse jam azts Ik'on ááshat teshts Ik'o b́ beeztso eeg b́ wotok'o jamosh t kitsitwok'o s'aato taash imere. 
\v 10 Manwere b́ wot and dúranatse Ik' maa weeron daaratse fa'a alirwotsnat naashwotsn Ik' dan teleefo bí ar arok'on bo danetwok'owe. 
\v 11 Ik'o no doonz Krstos Iyesusn han findek't b́s'eents dúre dúrosh b́ k'úmtsok'one. 
\v 12 Krstosk no wottsonat bín no amantsosh Ik' shinatse ááwu shúk'onat imneityon t'inosh falfone. 
\v 13 Taa it jangosh t dek'iru gond bek'o it mangoshee b́ wotiti, mansh t gond bek'i jangatse tuutson it ango b́neferawok'owa etaat itn k'onirwe.
\s Krstos shuno
\p
\v 14 Eshe Ik'o Niho shinats t gubron tuk'umalde'k'aat Ik'o t k'onir han jangoshe. 
\v 15 Daronat datsatse fa'a ik ik maa asho koni b́ wottsok'o b́ daatsit Ik'okne. 
\v 16 Ik'o it gitsitsi atso kúp'shit ango b́ shayiri weeron b́ mangi gaalon b́ imetwok'o Ik'o k'onitwe. 
\v 17 Mank'owere Krstos imnetiyon it nibots b́ betwok'onat itwere s'ap'ar shunon kúp' it wotitwok'o Ik'o k'onitwe. 
\v 18 Ando aani Krstos shuno b́ gaawnonat b́ genzon, danmban b́ tuwonat dashan b́ gop'on, awúk'o b́ wotok'o S'ayin jamwotsnton s'eenon t'iwintso falr, 
\v 19 ash danoniyere bog wotts Krstos shuno it danetwok'o Ik'o b́ s'een jamon s'eenosh it bodetwok'o Ik'o k'onitwe.
\p
\v 20 Eshe mansh noyitse finirwo bí'angi weeron nok'onirwonat nogawirwoniyere danmb ayide'er bogshde k'alo falitwo Ik'o Izar Izewer, 
\v 21 bísh Ik'i moonat Krstos Iyesusn dúr jamon dúre dúrosh mango wotowe!, Amen.
\c 4
\s Atso ik b́wotok'o
\p
\v 1 Eshe doonzosh t fintsosh tipeets wottso taa, it s'eegets s'eegosh geyik wotts beewon it beetwok'o itn k'onirwe. 
\v 2 \x - \xo 4:2 \xo*\xt K'ol. 3:12-13 \xt*\x* Shunon it took tookon k'amefetsr tooko dashan detson maac' nefonat faleyon beewere,. 
\v 3 Jeenon it atsatseyo deshede'er Ik' shayirotse daatseyiru ik woto kotosh kúp'owere. 
\v 4 It s'eegeyor ik jángosh it s'eegetsok'o ik atsonat ik shayiro fa'ee. 
\v 5 Aaninuwere doonz iko, imneti ikonat gup iko fa'ee. 
\v 6 Dabnwere jamoniyere damb wottso, jamotse wotde finitwo, jamotse beetwo, jamosh nih wottso ik Ik'o Izar Izewer fa'ee.
\p
\v 7 Ernmó Krstos imosh bí ettsok'o bodtso no took tookosh s'aati imo noosh imere. 
\v 8 \x - \xo 4:8 \xo*\xt Dub. 68:18 \xt*\x* Mansh S'ayin mas'afotsere,
\q «Damb b́keshor mus'o mus'dek'tni bí'ami,
\q2 Ashuwotsshowere imuwotsi b́ imi» eteetsok'owiye.
\m
\v 9 Beree «Dambaan b́ keshi» etiru aap'an shini shin datso maants, datsotsnoru ayidek't dashan wotts beyok b́ ot'tsoni bako k'osho eebi b́ kitsiri? 
\v 10 Dashan ot'tsanwere bí jamo s'eenosh dar jamoniyere damb keshtsoniye. 
\v 11 Bíwere ik ikwotsi wosheetso, ik ikwotsi bek'etswotsi, ik ikwotsi doo shishiyo nabitwotsi, ik ikwotsi amantsuwotsi jinetwotsi, ik ikwots danitwotsi bowotitwok'o imuwotsi boosh b́ imi. 
\v 12 Hanowere b́ k'al amantswotsi kirstani finosh k'anir Krstos ats wotts Ik' moowu bi agetuwok'owe. 
\v 13 Ando Ik' na'o danon imnetiyon daatseyiru ik wotok bodroone, Krstos s'ayinonat s'een b́ wottsok'o noowere ik wotde s'een asho no wotitwok'owe. 
\v 14 Haniyere okoon ashuwots gondonat ant'elcosh k'andek'ts dani jongonat aats fundon hake bako gifnide'er daamet nanaúwotskok'o woteratsone. 
\v 15 Dab maniyere aro shunon keewfetsr jam keewon took wottso Krstos maants eenetwone. 
\v 16 \x - \xo 4:16 \xo*\xt K'ol. 2:19 \xt*\x* K'osh k'osh atsi kaywots bodesh Krstosne, ats jamonwere ikok b́ deshee shas'wotsne, eshe ik ik atsi kayo bísh eteets fin sheengshde'er b́ finor ats jamo bí eneti, shunonowere b́ kup'iti.
\s Krstosn daatset handr beyo
\p
\v 17 Haniyakon, k'awntsalkeew gawirw Ik' ash woterawwotskok'o beek'ayere etaat doonzo shútson it tooko kor it dek'etwok'o itsh keewre, 
\v 18 Bo asaabiyo t'aluwtskee, bodaronat bo k'elikúp'i jangosh Ik'o boosh bí imts beyatse k'alernee. 
\v 19 Jitso bot'ut'tsosh kim jamo k'alosh bo tewnirwotse botoko meets tewunosh beshidek't imrne. 
\v 20 Itmó Krstos jango hank'owaliye it dani, 
\v 21 Arikon b́ jango shishrte, aronwere Iyesusitse b́ fa'ok'o bín danrte, 
\v 22 \x - \xo 4:22 \xo*\xt K'ol. 3:9 \xt*\x* Mansh antelchde'er morro maants jishit Woteraw tewno shini bín it beyiru nat wotts it azeets doyo okaan juu bayere. 
\v 23 It nibonat asaabiyon b́ jamon handr wotowe, 
\v 24 \x - \xo 4:24 \xo*\xt Aze. 1:26; K'ol. 3:10 \xt*\x* Arik wotts kááwonat S'ayinon Ik' arok'on azeetso handr atso tahade'ere.
\p
\v 25 \x - \xo 4:25 \xo*\xt Zek. 8:16 \xt*\x* Eshe kooto keewk'ayere, no jamets ik atsi kaywotsi no wottsotse no ats atsewo ari keewo keewwone. 
\v 26 \x - \xo 4:26 \xo*\xt Dub. 4:4 \xt*\x* Fayore! it fayonomo morro fink'ayere, it fayetsok'on it befere aawo ilk'aye. 
\v 27 Dablossh b́ kindit fúro imk'ayere. 
\v 28 Ump'irwo haniyak úmp'k'aye, dab kic'tswotssh b́ imish gizo b́ daatsitwok'o b́ kishon sheeng fino finowe. 
\v 29 B́ jamon it nonotse woteraw keewo keshk'aye, maniyere dab shishetwotsi geneúshitwonat kup'shosh wotitu keewo ashuwotssh keewwere. 
\v 30 It kashts aawo b́ kiitstwok'o wotitwo it ats jot'ets Ik' S'ayin Shayiro shiyanik'ayere. 
\v 31 S'aam woto, nib k'úno, fayo, kúúho, c'ashonat kon naari gond jamo it atsere okaan wokowe. 
\v 32 \x - \xo 4:32 \xo*\xt 3:13 \xt*\x* Maniyere it ats atseyosh doowwotsnat maac' nefwotsn, shiyanitwotsnat imetwotsi wotoore, Ik'o Krstosn it morro itsh orowe bí ettsok'o it were it atsatsewosh orowe erre.
\c 5
\s Shanotsi beyo
\p
\v 1 Haniyere okoon shuneets nanaúotskok'o itwere Ik' shuuts sha'irwotsi wotoore, 
\v 2 Krstos noon b́ shuntsok'onat Ik'o geneúshit sheeng sháák' detsts imonat wosho woshdek't b́ kasho noosh beshidek't b́ imtsok'o itwere shunon beewere,.
\p
\v 3 Han naari keewan Krstiyaniyosh b́ geyirawotse wido wee kon naari kiimo wee jaalo itokere shishek'aye. 
\v 4 Maniyere dab Ik'osh udo t'intswere bako iritwonat dárts ash keewo, wee aatsni keewu keewo itesh woteratse, hank'o keewan itsh geyiratse. 
\v 5 Gobetso b́ witiyal, kon naari kim fin finiruwo b́ wotiyal, wee woteraw Ik'o ik'iyok'o wotts jaalo b́ wotiyal, Krstosnat Ik' mengstotse bano b́ dashawok'o dande'ere.
\p
\v 6 Keewanotsatse tuutson aleraw ashuwotsats Ik' fayo b́ wetwotse konwor woteraw keewon itn ant'elck'aye. 
\v 7 Mansh aleraw ashuwotsnton ik wotk'ayere, 
\v 8 Yoots it t'alwwotsiye it teshi, andomo doonzok it wotsosh sháán itne mansh sháánon beyiru ashuwotskok'o sha'ore. 
\v 9 Doo jamo, kááwonat ari shuwo b́ daatset shááanokne. 
\v 10 Mansh doonzo geneúshit keewo eeg b́ wotok'o p'ec'ar s'iilere. 
\v 11 Shuu deshaw t'alwi finonton ik wotk'ayere maniyere shááno maants kishde'er kitswere. 
\v 12 T'alwotse beyiru ashuwots ááshon bok'aliru keewo keewonwor dab jiitsike. 
\v 13 Jam keewo shááno maants b́ woor eeg b́ arok'o shiratsne b́ be'eti. 
\v 14 Shiratse be'eyiru jamo shááne, mansh,
\q «Nee tokrirwono tuuwe! k'irtswotsitse galeyar tuuwe!
\q2 Krstoswere neesh c'eeshitwe» eteere.
\p
\v 15 Eshe aawk'o it beyirwok'o t'iwintsde'ere dan teleef danetswotsk'owa bako danteleef deshawwotskok'o beek'ayere. 
\v 16 \x - \xo 5:16 \xo*\xt K'ol. 4:5 \xt*\x* Dúran gond b́ wottsotse itsh imets aawo b́ besheraniyere bín finore.
\p
\v 17 Mansh doonzo shuno eeg b́ wotok'o t'iwintswere bako dartswotsi wotk'ayere.
\p
\v 18 T'afiyo maants itn b́ dametwotse woyiniyon dutsets bíron mashk'ayere, maniyere S'ayin Shayiron s'eenere. 
\v 19 Duubonat udon, Shayiri jááwonowere it ats atsewo keewewere, it maac'otse kishde jááwar duwr doonzo udoore. 
\v 20 \x - \xo 5:19-20 \xo*\xt K'ol. 3:16-17 \xt*\x* Jam keewosh no doonzo Iyesus Krstos shútson jam aawo Ik'o Niho udoore.
\s Kenihonat máátson
\p
\v 21 Krstos mangosha err ititsere iko ikosh alewee.
\p
\v 22 \x - \xo 5:22 \xo*\xt K'ol. 3:18; 1 P'et'. 3:1 \xt*\x* Máátswotso! doonzo Iyesussh it aleyrwok'o it kenih kenihosh alewere, 
\v 23 Krstos bí ats wotts Ik' mowush took'onat bin kashitwo b́wottsok'o kenihonwere b́ máátsush tooke. 
\v 24 Ik' moow Krstossh bi aleyirwok'o máátswots jam keewon bo kenihosh alewne.
\p
\v 25 \x - \xo 5:25 \xo*\xt K'ol. 3:19; 1 P'et'. 3:7 \xt*\x* Kenihwotso! Krstos Ik' moowu b́ shuntsok'onat b́ tooko bish beshidek't b́ imtsok'o itwere it máátswotsi shunere, 
\v 26 Krstos han b́ k'al Ik' moow S'ayintsosh geeyatniye, b́ S'ayintswere b́ aap'iweeron aatson mashdek'tniye. 
\v 27 Hank'on kiimo wee shiits aak'o wee han arts k'osh gond keewo biyatse b́ datserawo S'ayinat biyatse eeg eeg deshaw sheeng woshdek'tniye b́ maants b́ t'intsi. 
\v 28 Eshe kenihwots bo tooko boshunirwok'o bo mááts máátso shunne, b́ máátsu shunirwo b́ tooke b́ shuniri. 
\v 29 B́ took atso shit'etwo konwor aaliye, dab Krstos Ik' moosh b́ k'alirwok'o b́ manziti, b́ dugniti. 
\v 30 Noowere Krstos atsi kaywots noone, 
\v 31 \x - \xo 5:31 \xo*\xt Aze. 2:24 \xt*\x* «Hank'on asho b́ nihinat bíndn k'ayir b́ máátswats b́ deeshiti, gitetswotswere ik atse bowotiti» eteere. 
\v 32 Ááshts keewanwere eene, hanowere t etir Krstosnat Ik' maats aridek'atniye. 
\v 33 Ernmó keewan itne b́ s'iliri, mansh keniho b́ máátsu b́ tookok'o woshde'er shune, máátsunwere b kenihi mangiwye.
\c 6
\s Ind nihonat nana'i jango
\p
\v 1 \x - \xo 6:1 \xo*\xt K'ol. 3:20\xt*\x* Nana'úwotso! doonzo shinatse geyitk b́wottsotse it ind nihosh alewere. 
\v 2 «Nnihnat nindn mangiwe» etiru alo jangiyets aap'o bítse detsts shints tzaziyo haniye, 
\v 3 \x - \xo 6:2-3 \xo*\xt Kesh. 20:12; Iwi. 5:16 \xt*\x* Han nk'aliyalowere «Jam keewo neesh kááwitwe, datsanatsnowere nkasho genzitwe.»
\p
\v 4 \x - \xo 6:4 \xo*\xt K'ol. 3:22-25 \xt*\x* Itwere nihwotso! doonzo Iyesusn boosh niwo danifetsr, kiitsfetsr fayefetsr ditswere bako itnana'i nibo k'úni k'ayere.
\s Doonzwotsnat guutswots jango
\p
\v 5 Guutswotso! meetson itsh doonz wottswotssh shatonat k'ewon kéwewere, Krstossh it aleyirwok'o itnibi kááwon boosh alewere. 
\v 6 It aletwere Ik'i shuntso it nibon finiru Krstos guutswotskok'o wotde'erni bako asho geneúshosh be'ewosha err wotk'aye. 
\v 7 Ashosh b́woterawo doonzosh finirwotskok'o wotde'er it shunon shengshde'er finore. 
\v 8 Guutso wotowa nas' wotowa b́took tookon b́fiints sheeng finosh doonzoke b́ k'awntso dek'etk b́wottsok'o danfte.
\p
\v 9 \x - \xo 6:9 \xo*\xt Iwi. 10:17; K'ol. 3:25; 4:1 \xt*\x* Itwere doonzwotso! ash shiitso s'iilr boga bogshrawo itnat boonsh doonzo darotse b́beyirwok'o gawfetsr sheefo k'ayk'rar it guutswotssh sheengo k'alwere.
\s Ik'oke daatset kes'i k'ac'wotsi
\p
\v 10 Eshe haniyere okoon doonzonat bí angi eenmann kup'ore, 
\v 11 Dabilos shoobi fino k'efo itfalitwok'o Ik' kes'i k'ac' jamo tahde'ere. 
\v 12 No kaareyo ashuwotsnton b́woterawo t'aluts dúranatse kewirwotsnton, naashwotsnat datsatsi angwotsnton man etonwere darwotsitse fa'a kim shayirwotsntoniye. 
\v 13 Eshe gond aawots t'alati ango k'efo it falitwok'onat jametswotsi b́jamon ishr kup'ar need'o it falitwok'o Ik'o kes'i k'ac' jamó k'aa'úde'ere!
\p
\v 14 \x - \xo 6:14 \xo*\xt Isa. 11:5; 59:17 \xt*\x* Eshe haniyak arikeewo znaarok'o it gebaats edde'er, kááw wotono t'ururiyok'o\f + \fr 6:14 \fr*\fqa T'ururiya: \fqa*\ft Eto kes'o amewor gerats kardek'ef gino asho b́ koyawok'o bazitke. \ft*\f* tahade'er, 
\v 15 \x - \xo 6:15 \xo*\xt Isa. 52:7 \xt*\x* C'aamo geddek'ts wotadarok' jeeni doo shishiyo itdek'tso nabosh k'ande'er need'ore. 
\v 16 Jamaniyre danbono taw lalwok'o aat'efre sha'iru diyablos gin jamwotsi bín t'afiyosh it falitwo imnetiyo geepok'o k'aa'úde'ere. 
\v 17 \x - \xo 6:17 \xo*\xt Isa. 59:17 \xt*\x* Kash daatsonowere tookats gerdek'ef k'uriya eteetsok'o it tookats gup'sh de'ere, iknwere S'ayin shayiratse daatset shiki gorado bíwere Ik'o aap'etso deshde'ere. 
\v 18 Uni aawo S'ayin shayiron jishefetsr Ik' k'onon t'intswere. Mank'oon Ik'o S'ayints b́ dek'ts ashuwotssh it baterawon kup'ar Ik'o k'onwere. 
\v 19 Dooshishiko ááshts keewo shatalon kishde'er t keewor geyit aap'o keewosh t falituwok'o taashowere Ik'o k'onwere. 
\v 20 Andoor habiliyon tipeyat dooshiyansh woshek taane, mansh ááw shuk'on tkeewitwok'o taash Ik'o k'onwere.
\s S'uwaatsi jamo
\p
\v 21 \x - \xo 6:21 \xo*\xt Wosh. 20:4; 2 T'im. 4:12 \xt*\x* Shuneets eshwonat doonzo Iyesus finatsnowere amanets guutso wottso Tikik'os t jango aawk'o b́wottsok'onat eeg t finirwok'o jam keewo itdanetwok'o itsh keewitwe. 
\v 22 \x - \xo 6:22 \xo*\xt K'ol. 4:7-8 \xt*\x* Mansh noo aawk'o nowottsok'o itdanetwok'o aaninwere itnoor b́kup'shitwok'owa etaat bín it maants woshere.
\p
\v 23 Ik'o nihonat doonzo Iyesus Krstos jeenonat shunon imnetiyonton eshwotssh wotowe. 
\v 24 K'ut'eraw shunon no doonz Iyesus Krstosi shunts jamwotssh s'aato wotowe.