\id COL - Borna New Testamnet
\ide UTF-8
\h K'olasiyas
\toc2 K'olasiyas
\toc1 K'olasiyas Maants
\toc3 K'ol.
\mt3 Wosheetso P'awlos Wosho
\mt K'olasiyas Ashuwots Maants
\imt Kindo
\ip Woshan b́ guut'e múk'ú Isiyotse Ephesoniyere aawkesho maantse daatseyiru K'olasiyas kittutsi Ik'i moowushe. Ik'i maa man bneed' P'awlosn woto b́k'azalor Rom shirotse keweetsu Isiyi kitt een wottsu Ephesonitse doo shishiyosh woshetswotsi b́ woshefotse K'olasiyastsnowere alo detsfe b́teshi. K'olasiyas Ik'i mooshowere biatse alo detsefe b́tesh, K'olasiyas Ik'i mootse «Ik'o danonat s'een beyo daatsosh asho ik ikon shayiri angwotsnat naashwotssh sagado geyituwe» etiru kootets danifwots bo beyok'o P'awlos shishre b́tesh, daniifihanoots boetirwo k'osh keewo «Asho ik ikon gof amook'o wotts nemwotssh keeweyarr mishonat k'osh niwuwotsi koto bín geyife» etka b́tesh.
\ip P'awlos woshan b́ guut' arik wotsts krstiyani dano t'intson bo kooti dano k'efosha btesh, b́ t'intsts aniwwotsitsere eeno «Iyesus Krstos s'een wotts beyo imetwe, k'osh imnetiyotsnat k'aleyirwotsnmó bíyatsne asho bowokiyiti» etiruwoniye, Ik'o Krstosn datso b́ azii, b́ weeronowere b́ maantsan aani de'er b́ weeti, datsu kashi jango b́ detset Krstosi nibon amanon mec'rone, han jangosh P'awlos een danan amantsuwots beyon aawk'on sháánr b́be'etwok'niye b́ kitsiri.
\ip Woshan P'awlosoke dek't K'olassiyas maants betsosh wosheetso Tikik'osnton beyirwo Onesimosi b́ wottsok'o s'iilo shenge, mansh P'awlos Onesimosi eteetso guutso jango tuzt Filmonsh k'osh wosho guut're.
\iot Jamon mas'aafan b́detstso
\io1 Kindo 1:1-8
\io1 Krstos doyonat finon 1:9—2:19
\io1 Krstosn handr beyo 2:20—4:6
\io1 Gúúpo 4:7-18
\c 1
\p
\v 1 Ik' shunon Krstos Iyesush wosheets wottso P'awlosn at no eshu T'imotiyosoke.
\p
\v 2 K'olasayasn beyiru Krstosn S'ayinonat amanek wotts amantsuwotssh.
\p Ik'o no nihokere deeronat jeenon itsh wotowe.
\s P'awlos Údo K'olasiyas Ashuwotssh
\p
\v 3 It jangosh Ik'o t k'onor nodoonz Iyesus Krstos nih Ik'o úni aawo údirwone. 
\v 4 Krstos Iyesusn it detsts imnetiyonat amants jamwotssh it detsts shuno shishrone. 
\v 5 Ari aap' wottso doo shishiyo shin shino itok b́bodor bítse fa'a jangeyirwo shishirute, mansh it imnetiyonat it shunon b́need' darotse k'aniyere itn kotirwo jangiyetsmanatsne. 
\v 6 Dooshishiyan dats jamatse shwonat eenoke b́fa'oni mank'o it doo shishyo itk'ebiyakonat Ik'i s'aato arik b́wottsok'owo t'iwints itdek'iyak aawotstson it dagots finoke b́faoni. 
\v 7 \x - \xo 1:7 \xo*\xt K'ol. 4:12; Film. 23 \xt*\x* Hanowere no shegro Krstos guuts amanetso wottsonat noontonuwere towaat finirwo shuneetso Ep'afray itsh keewre. 
\v 8 Mank'owere Ik'i Shayiron it atsatseyo it shunewo bí noosh keewre.
\p
\v 9 Mansh han noshishts aawotstson tuwat Shayiri dani teleefon t'iwints jamo Ik'i shunon t'iwints itdek'etu s'eents dano it detsetwok'o itsh Ik' k'ono ned'iratsone. 
\v 10 Mank'owere doonzosh wotts weeron beyarr b́ jamon bín it gene'ushitwok'o kon naari sheeng fino finon shuwo it shwitwok'onat Ik' danon eenfere it ametuwok'o Ik'o k'onituwe. 
\v 11 Doonzo aydek' een wotts b́ kup'on itsh ang jamo ime, k'amoon jam keewo falon k'andek'tswotsi it wotitwok'o itn woshwe, 
\v 12 dabnuere shááni mengstutse S'ayinwotsnton rstiyo it kayitwok'o itn betsts Ik'o niho gene'on údooere. 
\v 13 Bíwere t'alwi angotse noon kashit shuneets naayo mengstots no kinditwok'o woshre. 
\v 14 \x - \xo 1:14 \xo*\xt Efe. 1:7 \xt*\x* Bíínowere noo aaniyi keeweyat no morrosh orowe eto daatsrone.
\s Krstos azeets jamoniyere damb b́wottsok'o
\p
\v 15 Krstos be'eraw Ik'osh bíariyoniye. Bí azeets jamoniyere k'aabe. 
\v 16 Daronat datsatse fa'awots, be'eyirwonat be'eraw, daratsi angwotsnat keewirwotsno, naashwotsnat aliru jamwots bo azee bíne. Ik'o jam keewo bí az bín bíshe. 
\v 17 Bí jam keewoniyere shine b́ teshi, jam keewo desheyat b́ need' bíne. 
\v 18 \x - \xo 1:18 \xo*\xt Efe. 1:22-23 \xt*\x* Bí bí ats wotts Ik' moosh b tooke, jam keewon shntso b́ wotitwok'o, k'irotse tuwon shintsonat k'aaboniye. 
\v 19 Han b́wotwere Ik'o Ik' b́woti s'eeno b́ naayn b́wotish Ik'o niho shuntso b́wottsotsne. 
\v 20 \x - \xo 1:20 \xo*\xt Efe. 2:16 \xt*\x* Bínowere daron wotowa datsatse fa'a keewu jamwotsi b́ tookonton maniyo shunre, jitatse kud'ts b́naay s'atson jeeno b́woshi.
\p
\v 21 Shin Ik'atse wokaatni it beefoni, it asaabiyona it gond finatse tuutson balangarwotsiye it teshi. 
\v 22 Andmó S'ayinwotsnat eegonor s'amiyerawotsi, boatse eeg eeg daatserawotsi woshdek't b́shinats itn t'intsosh, b́ naay meetson b́ k'irtsosh, Ik'o b́tookonton itin b́ maniyi. 
\v 23 Han b́ wotitwere bíyats need'dek'at matseyat bíko dooshishiyatse daatsosh jangiyets keewatse it giwrawo amanon kup'arr it beewor s'uziye, dooshishiyanwere it it shishtsonat datsatsere fa'a ashuwotssh nabetsoniye, taa P'awlos guutso twot dooshishiyanshe.
\s P'awlos woshetsi fino
\p
\v 24 And it jangatse tdek'iru gond bek'osh geneeúwirwe, bíats wotts Ik'i moowshowere Krstos gondbek'o kaydek'oonton taash shapitwo tmeetson s'eentsitwe. 
\v 25 Ik'i aap'o s'eenon itsh kitsosh Ik'oke taash imets alok'oon Ik'i moosh fintso wotere. 
\v 26 Ik'i aap'onwere beshts dúron shweets ash na'úwotssh ááshat teshtsonat andmó Ik'o bík S'ayinwotts jamwotssh b́kiitsts ááshat teshtsoniye. 
\v 27 Ik'onwere bík S'ayinwotssh kitsosh b́geeyir hanoke fa'o ááshts mangi gaalo ititse Ik'i ashwoterawwots dagotse awuk'o bodts een b́wottsok'oniye, ááshtsanwere jangat nokotiru mang bín datsetu Krstos ititse b́ wotoniye. 
\v 28 Asho ik ikon Krstosn bodtso b́wotitwok'o kaldek'at t'intsosh ash jamosh dani teleef jamon daniyat izon Krstos jango nabirwone. 
\v 29 Ik'o bíeen angon tgitsotse b́ finirwotse angaann no keewtsán b́finetwok'o kup'dek'at maak'orefetsat shaatsirwe.
\c 2
\p
\v 1 It jangonat Lodok'itse fa'a ashuwots aaninwere t shiitso dab be'e danaw ash jamwotssh awuk'o bodts kup'ts kaaro t kariruwok'o itdanetwok'o shunfee. 
\v 2 Mank'o tk'alirwere it nibo kup'de'er shunon desheyarr, s'eents t'iwints jamo oorshde'er Ik'oko ááshts keewo wottso Krstosi bodanetwok'owe. 
\v 3 Dani teleefonat dani gaalon ááshat b́fa'o Krstosoke.
\p
\v 4 Itsh han tietirwere konwor itn kooton b́dashrawok'owa etaatniye, 
\v 5 Dab meetson it atse twokiyalor Shayiron itntoniye, sheeng niwon itbeyiruwok'on Krstosatse it detsts kup'ts imnetiyo bek'onowere geneúwiruwone.
\s Krstosn aatset s'enwotts beyo
\p
\v 6 Doonzo Krstos Iyesusi it dek'tsok'on bín beewere,, 
\v 7 Bíyats s'ap'arr ageyarr, dan itdek'tsok'on imnetiyon kup'ar beewere,, s'eenr orit údo t'intswere.
\p
\v 8 Krstosats need'iyek b́woterawo datsanatsi daneets niwwats, k'awntsal kooton konworu itn deshb́de'awok'o it tooko korde'ere. 
\v 9 Ik'o Ik' b́woti s'eeno atson be'eyat b́beyir s'eenon Krstosne.
\p
\v 10 Itwere s'een kasho it daats alguronat aljami took wottso Krstosne.
\p
\v 11 Bín it amantsosh gofo amrte, it gof amanwere morrets it meets doyo baziyosh Krstosn fiineka bako ash kishon fiinekaliye. 
\v 12 \x - \xo 2:12 \xo*\xt Rom 6:4 \xt*\x* It gupewor Krstosntoniye itdukeyi, bíntonowere k'irotse turte, k'irotse it tuwwere Krstosi k'irotse tuzts Ik'o angon it amantsotsne. 
\v 13 \x - \xo 2:13 \xo*\xt Efe. 2:1-5 \xt*\x* Morro itfintsonat itmeetsi doyo gof am b́k'aztsatse tuutson k'irkitne it teshi, andmó Ik'o Krstosnton k'irrawwotsi iti woshre, no morr únoshowere oorowe etre. 
\v 14 Bí noon k'efefetst noon s'aamifets teshets nemotse fa'a k'awntso guut'etso t'afibazre, jitats mismaron togdek't noatse k'aaúbazre. 
\v 15 Kup'uwotsnat aletswotsn jitatse da'at bo edo b́ bítsiyakon da'etsuwotsi wotar sháánatse bo be'etuwok'o b́ woshi.
\p
\v 16 \x - \xo 2:16 \xo*\xt Rom 14:1-6 \xt*\x* Eshe móón wee ushon, Ik' aawu koton wee shaash taawur koton, wee sanbati aawu mangiy jangon konuworu itats angshk'aye. 
\v 17 Jamanots shino maants weet keewwotssh c'ishok'one, aronmo b́ daatset Krstosne. 
\v 18 Woteraw b́ took dash detson melakiwtsi ik'iyon bogtaana etiru asho konworu k'awntsalo itn b́ orirawok'o it atso korde'ere, hank'o ashaan b́ bek'iru bek'osh kááwu taana eton woteraw meetsi asaabiyone b́ it'iri. 
\v 19 \x - \xo 2:19 \xo*\xt Efe. 4:16 \xt*\x* Hank'o ashaan took wottso Krstosnton eegonoru gonkewo falratse, ats jamo gonkidek't shas'on deshit manzirwo tooke. Ik'o ats jamo b́ ditsir hank'one.
\s Sheelts danatsere ats kordek'o
\p
\v 20 Krstosnton k'irr datsanatsi daneets niwwotsatse b́ jamon galek it wotiyakon beré and datsanatse it galeraawok'o wotat eegishe hank'o tzaziyosh it keeweyir, 
\v 21 tzaziyotswere «Detsk'aye, fadk'aye, t'awik'aye» etirwotsiye. 
\v 22 Jamanots ash fints tzaziyonat danatse tuutson b́ wottsosh finats bojiniyakon t'afosh k'andek'́kne. 
\v 23 Tzaziyanots bo took shunotse t'úp'keshts ik'iyonat woteraw b́ took dash detso, ats juwats b́ bogshituwotse dan telefetswotsiye boariri, ernmó bo meets tewuno kórdek'atse k'awntso deshawwotsiye.
\c 3
\s Krstosn handr beyo
\p
\v 1 \x - \xo 3:1 \xo*\xt Dub. 110:1 \xt*\x* Krstosnton k'irotse it tuwiyakon eshe Krstos Ik'o k'ani aaromantse b́beeyirwoke dambe fa'a keewwotsi geyore. 
\v 2 Uni aawo dambe fa'a keewwotsi gawwore bako datsatse fa'a keewwots jangosh shiyank'ayere. 
\v 3 It k'iron k'alewok'ó k'alewon datsanatse k'alewtserte, it beyonwere Krstosnton Ik'ots aashwtsere. 
\v 4 It kash wottso Krstos b́be'ewor itwere bínton mangon be'etute.
\s Natona bandr beyon
\p
\v 5 Eshe mansh it gitsotse datsatsi beyi tewun jamo ud'uwere, boowere «Widona, kiimo, gusiyo, gond tewuno, Woteraw ik'uwotsi ik'iyok'o wotts tewno» manootsiye. 
\v 6 Keewanotsatse tuutson aleraw ashuwotsats Ik'i fayo weetuwe. 
\v 7 It woor haniyere shin it beyor keewanotsi finefetsatniye it teshi.
\p
\v 8 Andmó fayo, nibk'úno, nemigondo, ash shúts t'afiyo, itatse wokiwere, jitsit keewonwere it nonotse keshk'aye. 
\v 9 \x - \xo 3:9 \xo*\xt Efe. 4:22 \xt*\x* Natts doyo b́fiinonton kishde'k'at juu it k'rtsotse itatsatseyo kooto keewek'ayere. 
\v 10 \x - \xo 3:10 \xo*\xt Aze. 1:26; Efe. 4:24 \xt*\x* Aztso aro aron dano daatsosh andrefere ameetwo handr doyo tahdek'rtee. 
\v 11 Hank'on Girik ashonat Ayhudi ashon, gof amtsonat gof amawon, ash dats ashwotowa, salat'ank wotowa salat'anera ash wotowa, guutsonat guutswoteraw ash dagotse k'osh k'oshewo aaliye, Krstos jamoniye, jamotsnowere bíne.
\p
\v 12 \x - \xo 3:12-13 \xo*\xt Efe. 4:2 \xt*\x* Eshe Ik'o galb́dek'tsanotsnat S'ayin shunetswots it wottsosh maac'k'ewo, doo, b́took dashan detso, t'at'deshawo, k'amo tahde'ere. 
\v 13 \x - \xo 3:13\xo*\xt Efe. 4:32 \xt*\x* It atsa atsewo k'amewere, ititsere iko ikats b́ iirits keewo fa'e wotiyal orowa erere, Krstos itsh orowa b́ ettsok'o itwere orowa erere. 
\v 14 Jamánatsere bogshde'er jamo ikok koide tifde'er b́ jamon ik wot daatsit shuno tahde'ere. 
\v 15 Ik atsikaywotsi wotat arikon s'eegetswots jeen wotts Krstosko jeeno itnibats naashowe, bín údirwotsnowere wotoore. 
\v 16 Krstos aap'tso ititse s'eenon it nibots beewe, dani teleef jamonowere it atsatsewo daniwere, shiyewere, duubonat údi dubonowere, Shayiri jááwi dubonowere it nibotse Ik'o údfetsr duuwere. 
\v 17 \x - \xo 3:16-17 \xo*\xt Efe. 5:19-20 \xt*\x* Iyesus weeron Ik'o niho údfetsr it keewirwonowere it k'aliru jamo doonzo shútson k'aluwere, bínowere Ik'o niho údoore.
\p
\v 18 \x - \xo 3:18 \xo*\xt Efe. 5:22; 1 P'et'. 3:1 \xt*\x* Máátsuwotso! doonzo shinatse sheeng b́wottsotse it kenihsh alewere.
\p
\v 19 \x - \xo 3:19 \xo*\xt Efe. 5:5; 1 P'et'. 3:7 \xt*\x* Kenihuwotso! it máátswotsi shunere, boosh maac' kup'wotsi wotk'ayere.
\p
\v 20 \x - \xo 3:20 \xo*\xt Efe. 6:1 \xt*\x* Nana'uwotso! han doonzo geneúshitk b́wottsotse jamkeewon it ind nihosh alewere.
\p
\v 21 \x - \xo 3:21 \xo*\xt Efe. 6:4 \xt*\x* Nihwotso! bo maac'o bok'ut'rawok'o it nana'o fayon nibo k'únik'ayere.
\p
\v 22 \x - \xo 3:22-25 \xo*\xt Efe. 6:5-8 \xt*\x* Guuts guutsuwotso! datsatsi it doonzotssh jamkeewon alewere, it aletwere bo iti bobek'iruwonat ash maac'o k'eezon be'ewosh b́woterawon doonzo shatonat nib s'ayinon wotowe. 
\v 23 It k'aliru jamo ashosh b́woterawon doonzo Iyesussh it k'aliruwok'o it nibon k'aluwere. 
\v 24 Hanshowere doonzo dari ristiyo k'awnts woshde'er itsh b́imetwok'o danfte, bísh itfinirwonwere doonzo Krstosiye, 
\v 25 \x - \xo 3:25 \xo*\xt Iwi. 10:17; Efe. 6:9 \xt*\x* Ik'oke bogabogsho bíaaltsotse gond finitwonwere b́gondfinosh fayo dek'etwe.
\c 4
\p
\v 1 \x - \xo 4:1 \xo*\xt Efe. 6:9 \xt*\x* Doonzwotso! itwere daaratse doonzo it detstsok'o danr it guutswotsi kááwonat taalon boon k'eezwere.
\s Dabeets izo
\p
\v 2 Kup'ar Ik' údon it k'ut'rawo Ik'o k'onuwere, 
\v 3 hantonwere Ik'o b́ aap'osh fengesho noosh b́ k'eshitwok'onat taawere b́ jangosh tipeyat t beyirwo Krstosk ááshtso keewo keewosh no falituwok' nooshowere Ik'o k'onwere. 
\v 4 Taawere shengshde'er b́ aap'o kishde'er t keewituwok'o taash Ik'o k'onuwere.
\p
\v 5 \x - \xo 4:5 \xo*\xt Efe. 5:16 \xt*\x* Dúro kewude'fetsr amaneraw ashuwotsoke dani teleefon beewere. 
\v 6 Ik ik ashosh wotit keewo aaniyosh it falituwok'o jam aawo it keewo nefonat aamb shaawon wotowe.
\s S'uwaatsi jamo
\p
\v 7 \x - \xo 4:7 \xo*\xt Wosh. 20:4; 2 T'im. 4:12 \xt*\x* Tikik'os t jangosh jam keewo itsh keewituwe, bíhe shuneets eshwe, amanek guutsonat doonzo finoshowere taanton fini toohe. 
\v 8 \x - \xo 4:7-8 \xo*\xt Efe. 6:21-22 \xt*\x* Bín itok twoshwere t jangosh itsh b́ keewituwok'onat it nibo b́ kup'shishe. 
\v 9 \x - \xo 4:9 \xo*\xt Film. 10-12 \xt*\x* Bínton it jir wottso amanetsonat shuneets eshwo Onesimos it maants weetwe, boowere hanoke fa'a keewu jamo itsh daniitwne.
\p
\v 10 \x - \xo 4:10 \xo*\xt Wosh. 19:29; 27:2; Film. 24; Wosh. 12:12, 25; 13:13; 15:37-39 \xt*\x* Taanton tipetso Arst'rokoswere jamo itsh t'intsirwe, iknoto, «Itok b́ woor it dek'etwok'owa» etaat itsh gawiyat t teshtso Barnabasiy naayi Mark'oswere jamo itsh t'intsirwe. 
\v 11 Iyost'osi ett s'egeyirwo Iyasu jamo itsh t'intsitwe, Ik' mengst jangosh taanton tohaat finiru ashuwotsitse ayhudiwotsitse amantsanots s'uziye taan kup'iyri.
\p
\v 12 \x - \xo 4:12 \xo*\xt K'ol. 1:7; Film. 23 \xt*\x* It jir wottso Iyesus Krstos guutso Ep'afrawwere jamo itsh t'intsirwe, shayiri beyon eenr kup'ar it ned'itwok'onat Ik' shunonowere jamon it s'eentsitwok'o bí itsh jam aawo Ik'o k'onirwe. 
\v 13 It jangosh Lodok'iyonat Hirapolis kittwotsitse fa'a ashuwotssh ayidek't b́ mawirwok'osh taa t tookon gawu taane. 
\v 14 \x - \xo 4:14 \xo*\xt 2 T'im. 4:10-11; Film. 24 \xt*\x* Shuneets hakimiyo Luk'asnat Demasn jamo itsh t'intsirune. 
\v 15 Lodok'iyon fa'a eeshuwotsna Nimfnnat b meyitse fa'a Ik' moowushowere jamo t'intsuwere. 
\v 16 Woshani it nababiyakon Lodok'iy ashuwotsoke fa'a Ik' mootse b nababeetuwok'o woshuwere, itwere Lodok'iyon itsh woshet wosho nababoore. 
\v 17 \x - \xo 4:17 \xo*\xt Film. 2 \xt*\x* Arkip'asshowere «Doonzo finosh neesh imets fino sheengshde'er n s'eentsitwok'o» err keewuwere.
\p
\v 18 S'uwaatsi jaman t kishon guut' taane P'awlosiye, Habiliyon tipeyat t beyiruwok'o gawwere.
\p Ik' s'aato itnton wotowe.