\id 2TH - Borna New Testamnet
\ide UTF-8
\h 2 Teselonk'e
\toc2 2 Teselonk'e
\toc1 2 Teselonk'e Ashwots Maants
\toc3 2 Tes.
\mt3 Wosheetso P'awlos Gitl Wosho
\mt Teselonk'e Ashuwots Maants
\imt Kindo
\ip Krstos aanar weyi jangosh aatets aato fayo tizfere b́ amtsotse Teselonk'e Ik' mootse fa'a gond bek'o ayefere bi'ami, P'awlos Teselonk'e ashuwotssh b́ guut'ts gitl wosho «Doonzo weyi aawo bodre» etts imnetiyo s'illike b́ teshi, P'awlos Krstos wooniyere shinon «Gond asha» eteets Krstosi k'efiru jishirwotsn datsanats gondonat ale k'azon ayefere ametuwe ett bo imnetiyo káátsosha b́tuu.
\ip Wosh na'o, nababirwotsats gond bek'ona et kic'on boats b́ ayiyalor dab bo imnetiyats bo kúp'itwok'o bonat k'osh binton finirwots bok'alirwok'o bobeyosh geyiyitwo daatsosh kúp'ar bo finitwok'o mank'o sheeng fino finoke boatso bo bazirawok'o kup'shdek't boon b́ izi.
\iot Jamon mas'aafan b́detstso
\io1 Kindo 1:1-2
\io1 Udona et adaron 1:3-12
\io1 Krstos aani weyi jangosh imets dano 2:1-17
\io1 Krstani beyi jagosh izetso 3:1-15
\io1 B́ ko'ewoko 3:16-18
\c 1
\p
\v 1 \x - \xo 1:1 \xo*\xt Wosh. 17:1 \xt*\x* Ik'o no nihinat no doonz Iyesus Krstosok wotts Teselonk'e Ik' meyitsi amantsuwotssh P'awulosoke, Silasnat Timotiyosoke guut'dek't wosheets wosho.
\p
\v 2 Ik'o nihoke no doonz Iyesus Krstosoke s'aatonat jeenon itsh wotowe.
\s Krstos aanar gitlo b́woor bí ímet angsho
\p
\v 3 Tí eshuwotso! it jangosh Ik'o jam aawo udiruwone, udonwere noosh geyike, no udiruwere it aman amano iki bogt bí eniruwnat it it atsatse shuneyo dabfere b́ amiruwotsne. 
\v 4 Mansh eshe gishewonat gond bek'on dab itats b́ bodalor it aawk'o it k'amtsok'onat it imnetiyatse kúp' it wottsok'o keewon noo k'osh Ik' moowwots dagotse wotdekat itn it'irwone.
\p
\v 5 Jam keewan b́ kitsir Ik' angsho arik b́ wotok'onat itwere bísha etaat gond bek'o it dek'ts mengst mansh bodk it wotitwok'oniye. 
\v 6 Kááw keew k'alitwo Ik'o b́wottsotse it ats gondbek'o dowirwotsats gond bek'o dowon bok'awntso boosh dashetwe. 
\v 7 And gond bek'o daatsirwotswere noonton kashdek'o itsh imetwe. Han b́wotitwere doonzo Iyesus b́melaki kúp'wotsnton darotse b́ oot'oore, 
\v 8 bí darootse be'et aat'iru tawone, manoor Ik'o danawwotsnat nondoozo Iyesusko dooshishyosh alerawwotsi sezitwe. 
\v 9 \x - \xo 1:9 \xo*\xt Isa. 2:10 \xt*\x* Bo doonz shinatsnat bí een mangatse k'aleyaarr dúre dúri t'afon bo sezeti. 
\v 10 Bo bo sezitwere manots aawots bík s'ayinwotsoke mangr bín amanir jamwotsoknowere adewosh b́wooree. Itwere noo gawuts gawo dek'at it amantsotse bonton taawetute.
\p
\v 11 Han gawon itsh no eed'irawo nó Ik'o no k'onir b́ s'egots s'eegosh bodtswotsi iti woshr sheeng finosh it detsts shunonat imneti fin jamo bí angon finde itsh b́s'eentsitwok'owe. 
\v 12 Mank'o no doonz Iyesus shútso ititsere mangr itwere noko Izar Izewernat no doonz Iyesus s'aatok'on bín it mangitwok'o Ik'o k'onirwone.
\c 2
\s Doonzo wooniyere shino morr gond shayro b́be'etwok'o
\p
\v 1 \x - \xo 2:1 \xo*\xt 1 Tes. 4:15-17 \xt*\x* Ti eshuwotso! no doonz Iyesus Krstos woonat noowere bínton wotosh nokakweyi jangosh itn nok'onirwo haniye, 
\v 2 Wee shayiron wee aap'on keewetsok'on wee noyitse woshoon guut'etsok'on woshde'er «Doonzo aawo waare» eton kááron it nibo shek'eek'aye, kic'ono kic'k'ayere. 
\v 3 Asho ik keewonor itn b́ant'elcerawok'k'owa, shin shino haalo b́warawon, Ik'o bín b́t'afit weeri gond asho b́be'erawo, aawman waratse. 
\v 4 \x - \xo 2:4 \xo*\xt Dan. 11:36; Hzk'. 28:2 \xt*\x* Weerr gond ashaan Izar Izewerotsiye ett ik'iyeyiru jam keewotsiyere damb b́tooko een b́wooshfoni, «Ik'o taane» erfetsrnwere dab Ik'i mootse bewosh ááw shuk'on b́ned'iti.
\p
\v 5 Itnton tteshor keewanotsi itsh keewat tteshtsok'o gawraatsteya? 
\v 6 Bísh beezets sa'aton b́be'efetsosh and b́be'erawok'o bín baziyiruwo eeg b́wottsok'owo danfte. 
\v 7 Aashts weer gondi angman fino dek'tuure, b́wotefere andoor baziyirwo fa'e, han b́wotwere baziyiru ekeew b́t'affetsoniye. 
\v 8 \x - \xo 2:8 \xo*\xt Isa. 11:4 \xt*\x* Maniyere ilowere nemalon beyiruman be'etwe, doonzo Iyesus b́ nonotsi kash jongon bín úditwe, be'eyi eenon aanar b́ woor b́beyoko t'afibazetwe. 
\v 9 \x - \xo 2:9 \xo*\xt Mat. 24:24 \xt*\x* Mor gond asho b́weet shed'ani angon kootets aditswotsnat milikituwotsn ayi adits keewwotsnowere k'alone, 
\v 10 Mank'owere t'afit ashuwotsi bín bo dashit eeg naari gond keewwotsi k'alone. Ashaanots bot'afitwere kashosh boon betsitwo ariko shunt dek'o bo k'aztsotsne. 
\v 11 Man jangosh kooton boamanituwok'o Ik'o boon ant'elcit ango boats woshitwe. 
\v 12 Hanwere b́ wotit aro amaneratsone et morrats geneúwiru jamwotsats angshetwok'owe.
\s Kashosh gaalets ashuwots
\p
\v 13 Doonzon shuneets eshuwotso! noomó it jangosh Ik'o jam aawo udo noosh geyife, no uditwere it shayiri S'ayinon it s'ayinontsonat arono it amanon it kashitwok'o Ik'o shini itn galb́dek'tsoshe. 
\v 14 Ik'o no itsh no nabts doo shishiyann itn s'eegts doonzo Iyesus Krstos mango it kayitwok'owe. 
\v 15 Mansh t eshuwotso, kúp'arr need'ore, it aap'ona wotowa guut'ets woshon nooke itsh beshts dano kúp'ide'er deshere. 
\v 16 B́ tookon no doonz Iyesus Krstosnat, noon shuntso, b́ s'aaton dúre dúri kúp'iyo, sheeng jangóno noosh imtso Ik'o no nihiye. 
\v 17 Bí it maac'o kúp'shwe, sheeng finonat sheeng noon keew jamon itn kup'shwe.
\c 3
\s Ik' k'ono jamosh b́ geyitwok'o
\p
\v 1 S'uwatsno ti eshwotso! itokere wottsok'o doonzo aap'tso káári jamok borr b́ mangitwok'o noosh Ik'o k'onuwere. 
\v 2 Mank'owere jam asho amankaaliye, mansh weri gondetswotsnat gond ashuwotsatse no faritwok'o noosh Ik'o k'onuwere.
\p
\v 3 Doonzonmó amaneke, bí itn kup'shitwe, gondatsnowere itn kotetwe. 
\v 4 Itn no azazitwo and wotowa shino maants it k'alitwok'o it jangosh doonzo ats amanatniye.
\p
\v 5 Doonzonú it nibo Ik' shúnonat Krstos k'amo maants jishwe.
\s Fin bitsatse boatso korbodek'etwok'o
\p
\v 6 Tí eshúwotso! fin bitstsk wottsonat nookere itsh beeshiyets danok'on beeraw krstiyani jamatse it galetwok'o doonzo Iyesus Krstos shútson itn azazerone. 
\v 7 Noon aro itsh b́k'anitwok'o it it tookonor danfte, noo itnton noteshor fino biitstswotsi teyatsone, 
\v 8 Kon mishonor datsmec'ron mááratsone, dabnwor ititse konatsor kuro nowoterawok'owa etaat t'uwe aawo no maawfetsosha nofinefoni. 
\v 9 Mank'o nok'alwere it noon araar no jafrats it sha'iitwok'owa etaatni bako itkooke tep'o dek'o noosh b́ faletwok'o daratniyaliye. 
\v 10 Itnton noteshor «Fin finosh geerawo maak'aye» etts niwo itsh imrone b́ teshi.
\p
\v 11 Han noo etwere ititsere ik ik fin biitstswots bo fa'ok'o t shishtsotsne, ashaanots boon geraw keewots kinda bako botookon eegor fineratsne. 
\v 12 Hank'o ashuwots s'ker beyar bo finitwok'o bín bo beetwo bodaatsitwok'o doonzo Iyesus Krstos shútson hanotsk'o ashuwotsi azazerone, izitwone.
\p
\v 13 Itmó ti eshúwotso! shaatsrone err sheeng fin finosh nefk'ayere. 
\v 14 Woshanitse itsh nobeshits izo de'aw asho b́ beyal hank'o ashaan t'iwintswere, b́ jitsitwok'owere bínton gonkek'ayere. 
\v 15 B́ wotefere eshúwok'o izwere bako t'alatok'o taawk'ayere.
\s S'uwaatsi jamo
\p
\v 16 Jeeni doonzo b́ tookon jam aawo jam keewon jeeno itsh ime, doonzo it únetsnton wotowe.
\p
\v 17 Jamán t kishon itsh guut'tso taane P'awlosiye, t wosh jamotse daatset wosho tik b́wti milikito haniye. T guut'etwere hank'owe.
\p
\v 18 No doonz Iyesus Krstos s'aato it únetsnton wotowe.