\id 1TH - Borna New Testamnet
\ide UTF-8
\h 1 Teselonk'e
\toc2 1 Teselonk'e
\toc1 1 Teselonk'e Ashwots Maants
\toc3 1 Tes.
\mt3 Wosheetso P'awlos Shints Wosho
\mt Teselonk'e Ashuwots Maants
\imt Kindo
\ip Teselonk'e Mek'odoniya eteets Rom shiritsi een kittuniye b teshi, P'awlos Teselonk'e Ik' moowu b́ need'i Filip'siyosi k'azk'rat b́ amiyakone, wotowa eree Ayhudi hayimanotiyo dek'osh t'int teshts Ik'i ash woterawwots P'awlos b́ t'intsiru Krstni woshon getseyat boteshtsosh ayhudiyots okoort P'awlosats fayo tuuztni bo teshi, manshowere P'awlos Teselonk'eyi fakshr Beriyo maants bíamo ooro b́falawok'o wot b́wtsi, ja'atnwere K'orontosits am b́ bodtsok'on bíyats karnt bín tep'f teshtso T'imotiwos Teselonk'e maants amt b́ aantsok'on Ik' mootse beyiru keewo ik ikon bísh b́ dani.
\ip P'awlos b́ wosh shintso Teselonk'e ashuwotssh b́ guut' Krstiyaniwotsi kup'iyosha b́teshi, bo imnetiyona et bo shuni jango sheeng keewo b́ shishtsosh Ik'o b́ udi, P'awlos bo taalotse b́ datseyor awuk'o beyo b́ beetsok'o itsh gawituwe, maniyere okono Krstos aanar weyi jangosh aatets aatosh aaniyo b́ imi, aatetsanotsitsere k'atsuwots.
\ip «Krstos aani b́ wooniyere shinon amanat k'irtso Krstos aani b́ woor b́ daatsitdúre dúr beyoke kaydek'etuwo wotituwe? Krstos awure aanar b́ weeti?» etiruwotsiye, P'awlos manatse tuut «Krstos aani b́weyi dano tewunon korfetsr manoor b́ borfetsosh it fino finore» ett boon b́ iziri.
\iot Jamon mas'aafan b́detstso
\io1 Kindo 1:1
\io1 P'awlos gene'úwonat udon 1:2—3:13
\io1 Krstiyani beyosh wotituwo 4:1-12
\io1 Krstos aani b́ weyi jango daniyets dano 4:13—5:11
\io1 S'uwaatsi izets izo 5:12-22
\io1 Gúúpo 5:23-28
\c 1
\s Jamo
\p
\v 1 \x - \xo 1:1 \xo*\xt Wosh. 17:1 \xt*\x* Ik'o nihonat doonzo Iyesus Krstos jirwotsi wottsuwots Teselonk'e Ik'i maa ashuwotssh, P'awulosoke, Silasnat T'imotiwosoke wosheets woshoniye, s'aatonat jeenon itsh wotowe.
\s Teselonk'e ashuwots beyonat imnetiyon
\p
\v 2 Noo úni aawo Ik'o nok'onoor itn gawufetsat Ik'osh údo t'intsiruwone. 
\v 3 Noo Ik'o Izar Izewernat nonih shinatse it imnetiyo b́ finiruwo, shunosh it k'aliruwonat nodoonz Iyesus Krstosn it detstso jangat k'amoon it kotiruwo no need'irawon gawiruwone. 
\v 4 Shuneets eshuwwotso! Ik'o iti galb́dek'tsok'owo danfone. 
\v 5 Doo shishiyo itsh noshishiy noon keewu mec'ron b́woterawon angonat shayiri S'ayinone, dooshishiyo ariko b́wottsok'owo danfetsatniye, itnton noteshor itsha etaat awuk'o nobeetsok'o danfte. 
\v 6 \x - \xo 1:6 \xo*\xt Wosh. 17:5-9 \xt*\x* Ay gond bek'o itats b́ bodaloru dab S'ayin shayironton daatseyiru gene'onton b́ aap'o dek'at noonat no doonz Iyesusi sheengon artswotsi woterte. 
\v 7 Mansh Mek'odoniyonat Akayiyon beyiru amants jamwotssh sheengon ariyetswotsi wotertee. 
\v 8 It nabts doonzo aap'o b́ shishe Mek'odoniyonat Akayiy mec'ron b́ woterawo Ik'atse it detsts imnetiyo jam beyok danere b́ teshi, han jangosh noo eegoru keewo noon geyiratse. 
\v 9 Itok nowoor awuk'o noon it dek'tsok'o arikon beyat beyirwo Izar Izewersh finosh woteraw ik'atsere galeyat awuk'on Ik'o maants it aantsok'o ashmanots botookon gawitune. 
\v 10 Mank'o Krstosi k'irotse tiztso, weet fayotse noon fariyituwo, b́ naayi Iyesusi daaratse b́woo awuk'on it kotetuwok'o gawitune.
\c 2
\s P'awlos woshetsi fino Tesolonk'eyitse
\p
\v 1 Ti eshuwotso! no it maants nowoo shuwalo b́teyawok'o it it tookon danfte. 
\v 2 \x - \xo 2:2 \xo*\xt Wosh. 16:19-24; 17:1-9 \xt*\x* It itdantsok'o haniyereshin Filipisyositse no teshor gond bek'onat c'ashon noats bodre, ernmó een wotts k'efo noats b́ bodaloru dab Ik'i dooshishiyo itsh nobetsitwok'o Izar Izewer noosh ááwu shuuk'o imre. 
\v 3 Noo iti noiztso dáron wee kim keewon jiisheyatniyaaliye, iti dariyosh nok'alts keewo eegonwor aaliye. 
\v 4 Maniyere dab Ik'o noosh dooshishiyan adaron noon amanat b́imtsotse keewituwone, manowere nok'alir nonib s'iliru Ik'o gene'ushosha bako asho gene'ushosh etniyaliye. 
\v 5 Iknotunoru dáshon wee gizi shunon detsetwo no keewawok'o b́ jamon it it tookon danfte, Ik'onu noosh gawe. 
\v 6 Itoke wotowa k'osh asho konoknoru mango geeratsone. 
\v 7 Krstossh woshetswotsi no wottsok'on noosh geyitwo itoke aatosh falfone b́ teshi, ernmó indu b nana'o b maants bdetsfok'on maac' nefon it dagotse no anaani. 
\v 8 Eshe ayidek'at itn noshuntsatse tuutson doo shishiyo itsh ím mec'ro b́ woterawo nokashonoru dab itsh no shunon imosh k'andek'k noone. 
\v 9 Ti eshuwotso! awuk'o no fintsok'onat shaatstsok'o gawo falfte, Ik' doo shishiyo itsh no nabor ik doonzatsoru kuro nowoterawok'owa etaat t'uwe aawo finone nomawufoni.
\p
\v 10 Amantsuwots dagots itnton nobeyor awuk'o s'ayinonat aawk'o kááw eeg eeg deshaw beyon nobefok'osh it noosh gaw itne, Ik'onuwere noosh gawe, 
\v 11 niho b́ nana'uwotssh b́ k'alfok'o noowere itsh ik ikon nok'altsok'o danfte, 
\v 12 jam aawo itn izon kup'efetsat b́ mengstonat b́ mango it kayituwok'o itn s'eegtso Izar Izewer b́ geene'úituwok'o it beyish oona itsha, no ettsok'o danfte.
\p
\v 13 Dabnu it jangosh noneed'rawo Ik'o no udiru weero detsfone, bíwere nooke it shishtso Ik' aap'o it dek'tsok'on itoke amantsuwotsoke finit aap'an it dek' ash aap'tsok'o b́ woterawo ari Ik' aaop'tsok'o woshdek'atniye, arikon Ik' aap'e. 
\v 14 \x - \xo 2:14 \xo*\xt Wosh. 17:5 \xt*\x* Ti eshuwotso, it Yhud datsatse faúwots Krstos Iyesusn Ik' maa wottsuwotsitse sheengwotsi wottsuwots jafro shoyerte, boowere ayhudiyotsn gond bek'o boats b́ bodtsok'o jamon itwere it took jirwotsoke gond bek'o itats bodre. 
\v 15 \x - \xo 2:15 \xo*\xt Wosh. 9:23, 29; 13:45; 14:2, 5, 19; 17:5, 13; 18:12 \xt*\x* ayhudiyots doonzo Iyesusnat nebiyatiyotsi bo úd'tsok'o nonowere giishdek't datsatsere noon kishtsuwotsiye, boowere Ik' shiyanirwotsnat ash jamo shit'irwotsiye, 
\v 16 Ik' ash woterawwots bín bokashit aap'o t keewawok'o dab bobaziyiri, hank'on morro morrats dabfere boamiri, mansh s'uwatsere Ik' fayo boats waare.
\s P'awlos aani Tesolok'e ashuwotsi s'ilosh b́detsts tewuno
\p
\v 17 Ernmó ti eshuwotso! shayiron b́ woterawo meetson múk' gizewosh itatsere no k'aletsosh itsh t detsts mirac'o ay b́ wottsotse ti ááwon itn bek'osh ayidek'at geere b́ teshi. 
\v 18 Mansh it maants wosh geyatni notesh, bítsnowere taa P'awlos it maants wosh anaani geyere b́teshi, ernmó Shed'ano noon b́baziyi. 
\v 19 Bere, nojangiruwo wee nogeneeúwo wee nodoonz Iyesus b́woor b́shinaatse no it'etuwo no da'atsi mangi jip'uwots (akliliwots) itna bako kone? 
\v 20 Arikon nomanguwotsnat nogeneeúwotsuwots itne.
\c 3
\p
\v 1 \x - \xo 3:1 \xo*\xt Wosh. 17:15 \xt*\x* Mansh eshe haniyere okoon k'amdek'o nomaawtsotse Ateni eteets kitots noaali ooro noosh sheeng araatniye b́ be'eyi. 
\v 2 No eshu Ik'i guuts wottso, Krstosko sheeng doo shishiyon finon no tooho T'imotiyosi itsh wosherone, itsh no woshuwere iti b́kup'shr imnetiyon it kup'ituwok'o itn b́ izituwok'owe, 
\v 3 Hanuwere it ats bodts gond bek'atse tuutson it shek'eerawok'o iti woshituwe, gond bek'an noosh beezets gowo b́wottsok'owo it it tookon danfte. 
\v 4 Dabnwor itnton noteshor gondbek'o no ats b́bodetuwok'o shin shino keewfoone b́teshi, it dantsok'onowere gond bek'o noats bodre, 
\v 5 manatse tuutson k'amoon koto tmaawtsotse it amano danosh geeyat T'imotiwosi itok woshere, bín twoshwere daneraka fadfo iti ik weeron fadrek'úwa etaat, nofinonwere datsmec'ro wotat oorwtsere k'úwa etaat shatatniye.
\p
\v 6 \x - \xo 3:6 \xo*\xt Wosh. 18:5 \xt*\x* Andmó T'imotiwos itoke nomaants waat it imnetiyi jangonat it shuni jangosh gene'úshit keewo noosh keewre, mank'owere úni aawo sheeng keewon noon it gawitwok'onat no iti bek'osh nomiraac'irwok'o itwere noon bek'osh it mirac'rwok'owo noosh b́keewi. 
\v 7 Eshe mansh eshuwotso, noo nodaatseyir kic'oonat gondbek'otse b́wotiyalor it imnetiyatse tuutson no ango kup'ere. 
\v 8 It doonzo Iyesusats kup'de'er itbeyo nooshowere man nok'alo noosh nobee. 
\v 9 Eshe and it jangosh udo t'intsirwone, it jangatse b́ shinatse nodetsts geneeúwosh Ik'o úditwone. 
\v 10 T'uwe aawo kup'sh dek'at Ik'o nok'onir nomeets ááwon iti be'er it amantsotse shaptso s'eentsosh tfalituwok'owe.
\p
\v 11 Andoor Izar Izewernat nonih b́tookon Iyesuswor it maants noweetwok'o noweero noosh kaatswe. 
\v 12 Noo iti noshunirwok'o doonzo it atsatseyonat jamoshor it detsts shuno eenr bí'ayituwok'o itsh woshuwe. 
\v 13 Mank'oon nodoonz Iyesus bik S'ayin jamwotsnton b́woor noko Izar Izewernat nonih shinatse it nibo eeg eeg deshawonat S'ayin b́wotituwok'o doonzo iti kup'shwe.
\c 4
\s Ik'o geneúshit beyo
\p
\v 1 S'uwaatsnowere tí eshuwotso! Ik'o geneúshosh awuk'o beyo itsh b́geyituwok'owo no atse dandek'rte, andoor it beyir mank'owe, doonzo Iyesus shúútson iti nok'onirwonat iti noizirwere haniyere shini it k'aliruwoniyere bogo it finishe. 
\v 2 Doonzo Iyesus shúútson eeg arts bínjííshetso itsh no imtsok'o danfte. 
\v 3 Ik'i shuno it it s'ayinetwok'onat widatse it wokitwok'owe. 
\v 4 Ititse ik iketso b́máátsu S'ayinonat mangon korde'er detso dande'e. 
\v 5 Ik'o danawu Ik'i ash woteerawwotskok'o gusiyi tewuno b́deshawok'owa. 
\v 6 Keewanatse asho konuworu beshk'aye, amants k'oshono daadk'aye, haniyere shin itsh t keewutsok'onat tgawtsok'on keewanotsi k'alituwotsats doonzo boon sezituwe. 
\v 7 Ik'o noon b́ s'eeg s'ayinon nobetuwok'owa bako kimon no beyishaliye. 
\v 8 Eshe izets izan gac'ituwo, b́ gac'irwo S'ayin shayiro itsh imts Ik'oni bako ashaaliye.
\p
\v 9 It atsatsewo shuneyi jango it it tookon Ik'oke it dantsotse manjangosh konuwor itsh b́ guut'o geyiratse. 
\v 10 Mek'odoniyi s'eenotse fa'a eshú jamwotsi shunfte, b́ woteferoru ti eshuwotso, and itsh no izituwo bogshde'er it shuneetwok'o, 
\v 11 s'ker beyosh it kúp'ituwok'onat it took jangosh it gawitwok'o, haniyere shin itsh no azaztsok'o it kishon it finituwok'owe. 
\v 12 Mank'oon amaneraw ashuwotsoke sheeng beyo beetute, konatsoru te'etswotsi woteratste.
\s Doonzo aanar b́woor kashetswotsnat k'irtsuwots jango
\p
\v 13 Ti eshúwotso! bo jangts deshaw ashuwotskok'o k'irts ashuwotssh it shiyanerawok'o aro it danetuwok'o shunfone. 
\v 14 Iyesus b́ k'irtsok'onat k'irotse b́ tuwtsok'o amanituwone, mansh Iyesusi amanat k'irtswots Ik'o bínton boon de'er weetuwe.
\p
\v 15 Doonzoke no dek'ts aap'ok'on itsh no keewitwo haniye, doonzo b́ wafetsosh kashon beyirwots k'irtsuwots shinats besheratsone. 
\v 16 Azazit k'ááro, melaki náásho k'ááro, Ik'i gááti k'aronuwere shishetuwe, doonzo b́tookonowere hanootsn jisheyar darotse oot'etwe, Krstosn amanat k'irtswotswere shin shino tuwitune. 
\v 17 \x - \xo 4:15-17 \xo*\xt 1 K'or. 15:51-52 \xt*\x* Maniyere il noo kashon fa'úwots doonzonton jongats gonkewosh bonton daawnon dambaan k'awu'etuwe, dúre dúrosh doonzonton wotitwone. 
\v 18 Mansh eshe aap'ets aap'an it atsatseyo iko iko kup'shwere.
\c 5
\s Doonzo woo k'ande'er korere
\p
\v 1 Ti eshuwotso! keewan b́ wotit́ dúronat b́ gizewosh eegoru itsh guut'o geyiratse. 
\v 2 \x - \xo 5:2 \xo*\xt Mat. 24:43; Luk'. 12:39; 1 P'et'. 3:10 \xt*\x* Doonzo b́ weet aawo úmp'etso t'úwon b́ wafok'o b́ wottsotse it it tookon sheengshde'k'at danfte. 
\v 3 Ashuwots «Keew jamó jeenonat s'k erkee» bo etor na'a maac'ts máátsuwats na'a shuwi shambo bin b́detsfok'o t'afo danerawo boats b́ weeti, eegi weeronoru bítse keshosh falatsne. 
\v 4 Ti eshuwotso itmó, t'aluwots itnaliye, mansh aaw man ump'etsok'o itats waratse. 
\v 5 It it únets shááni ashuwots, aawi ashuwots itne, nooye wee t'úwi wee t'alwi ashuwots noonaliye. 
\v 6 Mansh eshe no tooko kewde beewone bako k'oshwotskok'o tokrk'ayone. 
\v 7 Tokriru ashuwots t'úwone botokriri, mashiruwotswere t'úwone bomashiri. 
\v 8 \x - \xo 5:8 \xo*\xt Isa. 59:17; Efe. 6:13-17 \xt*\x* Noomó aawi ashuwotsi nowottsotse notooko keewon no angok'on beewone, imnetiyonat shunon t'ururiyok'o nogerats tahde'oone, kashosh jangetso kes'tswots boatse baziyosh bogúúfef k'obiyok'o tookats guufde'one, 
\v 9 Ik'o noon b́ s'eeg fayosh b́woterawon nodoonz Iyesus Krstos weeron no kashishee. 
\v 10 Krstos no jangosh b́k'ir kashon nobeyal wee nok'iriyal bínton nobeyishe. 
\v 11 Mansh and it k'alirwok'on iko iko kup'shon t'engde'e.
\s S'uwaatsi izonat jamon
\p
\v 12 Eshuwotso! ititse finon shaatsirwotsi, doonzon it naashwotsnat iti iziruwotsi it mangiyituwok'o itn k'oniruwoone, 
\v 13 Bo finatse tuutson boosh eents manogonat shunon it detsetwok'owa, itwere it atsatsewo jeenon beewere.
\p
\v 14 Eshuwotso! «Wihuwotsi fayore, aaw shuuk' deshawwotsi kúp'shwere, maawtswotsi te'uere, ash jamosh k'amoore» etaat gawiruwone. 
\v 15 Asho konworu gondi shegrosh gndon bí anirawok'o it atso korde'er, dab jam aawo it it took tookosh wotowa mank'o k'osh ashuwotssh k'osh ash jamwotssh sheeng finosh kup'ore.
\p
\v 16 Jam aawo gene'owere, 
\v 17 it eed'irawo Ik'o k'onwere, 
\v 18 jam keewon Ik'o udoore, Krstos Iyesusn it detsts beyon Ik'o itatse b́ geyirwo maniye.
\p
\v 19 S'ayin shayiri fino úp'k'ayere, 
\v 20 bek'o gac'k'ayere. 
\v 21 Jam keewo faduwere, sheeng wottso deshde'ere. 
\v 22 Gond fin jamatse wokoore.
\p
\v 23 B́ tookon jeeni Ik'o Izar Izewer jam keewon iti S'ayintsuwe, it Shayiro, it kasho, it ats jamo no doonz Iyesus Krstos b́ weet aawosh ik jagalo koteyar beewe. 
\v 24 Iti s'egtsmań amanek b́ wottsosh han k'alituwe.
\p
\v 25 Ti eshuwotso! nooshowere Ik'o k'onwere.
\p
\v 26 Eshúw jamwotsi S'ayints jobon jamo aatewere. 
\v 27 Woshan amants jamwotssh b́ nababetwok'o doonzo shútson oona itsh etetuwe.
\p
\v 28 No doonz Iyesus Krstos s'aato itnton wotowe.