\id 1PE - Borna New Testamnet
\ide UTF-8
\h 1 P'et'ros
\toc2 1 P'et'ros
\toc1 1 P'et'ros Woshts Wosho
\toc3 1 P'et'.
\mt Wosheetso P'et'ros Shints Wosho
\imt Kindo
\ip Wosh na'o P'et'eros woshts wosh shintso b́ guut'e b́ woshotse «Ik'o marat' b́dek'ts ashuwotsi» ett s'egeyirwotsnat múk'na'a Isiyotsere gaar maantsi kayotse bad'wtsts krstiyaniwotssha, b́ woshotsi een k'os'onwere bo imneti jangosh gishewonat gond bek'on boats bodts nababirwotsi kúp'shonat t'engoyosha, guut'tso han b́ k'aluere b́ k'iro, k'irt b́ tuwo, aanar b́weetwok'osh jangiyetso daniyitwo Iyesus Krstos doo shishiyi aap'o nababirwotssh gawiyosha, Iyesus Krstos beyo ariyetsok'o woshde'r s'iilr gond bek'o k'amoon dek'o boosh b́ geyitwok'owa boosh b́ gawiyiri, hanton deshidek't gond bek'o bo imnetyo s'ayinfre bíamo fadeyarr «Iyesus Krstos b́ be'et aawots» boosh wotit k'awntso bo dek'etwok'o boosh b́ kitsiri.
\ip Guut'tso gond bek'o bo k'amitwok'o kúp'iyoniyere k'osho nababirwots Krstos shuutso sha'irwots beyo boosh b́ geyit narok'o wotar bobetwok'owe boosh b́ gawiri.
\iot Jamon mas'aafan b́detstso
\io1 Kindo 1:1-2
\io1 Ik' kashiyo gawiyetso 1:3-12
\io1 S'ayin wotts kashon beyosh imets izo 1:13—2:10
\io1 Kic'or Krstiyaniwots boatse geyetwo 2:11—4:19
\io1 Krstiyani maac'nefonat bo fino 5:1-11
\io1 Gúúpo 5:12-14
\c 1
\p
\v 1 Iyesus Krstossh wosheets wottso P'et'rosoke, ib wotat P'ant'osn, Gelatiyon, K'ep'edok'iyon, Isiyon, Bitiniyon bad'aat beyirwotssh, 
\v 2 Ik'o niho bali b́dantsok'on marat'etswotssh, Iyesus Krstossh alewosh, b́ s'atson fakeyar s'ayonosh, S'ayin shayiron s'ayintseyat galertee, itsh s'aatonat jeenon ankatowe.
\s Beyar bewosh jangiyetso
\p
\v 3 Iyesus Krstos k'irotse b́ tuwi jangon jamaaw beyosh wititwo jangiyetso noosh imtso, b́ mhreti ayon handr shuwewo noosh imtso, no doonz Iyesus Krstos nihi Ik'o údewe, 
\v 4 Bíwere t'afrawo, aawasherawonat gawereraw rstiyo darotse itsh k'anire. 
\v 5 Itwere s'uwaatsi aawots be'et kasho imneti weeron Ik' angon koteertee. 
\v 6 Dab ay naari fadewwots múk' aawwotssh iti boshiyaniyo ooreratse wotiyaloru amanat it kashtsosh gene'ore. 
\v 7 Fadeyan itats b́bodir it imnetiyo arik b́ wotok'o kitsoshe, t'afit awntsonwor dab tawone b́ fadefoni, awntsoniyere bogo k'awnts detsts it imnetiyonmo hank'o fadeyo bísh geyife, it imneti arik wottsanwere Iyesus Krstos b́ be'ewor údon, mangonat iti k'ees'iyeyo itsh daatsitwe. 
\v 8 Iyesus Krstosi be'atste wotiyaloru bín shunfte, dab andoor bín bek'o it k'azaloru bín amanirute, hank'oyi err falr keewerawnat mangts gene'on geneeúwirutee. 
\v 9 It amantsatse tuutso it kotirwo it kashu woro daatsitwte.
\p
\v 10 Kashi jangansh itsh wotit s'aato bek'on keewts nebiyatiyots aydek' geeyat p'ec'ar s'iilo woshrne. 
\v 11 Boyitse beyiru Krstos shayiro Mesihiyo ats bodet gond bek'o, gond beek'oniyere okoon b́ daatsit mango shini kitsre b́ teshi, boowere jaman awri gizeyonat aawk'on b́ wotitwok'o p'ec'at s'ilrne bo teshi, 
\v 12 Nebiyiyanots bofinir itsha bako botokosh b́ woterawok'o boosh be'ere b́ teshi, bo finwere darotse wosheets S'ayin shayiri weeron dooshishiyo itsh keewts ashuwots itsh bokeewtso bek'shoone, keewanowere melakiwotswor dab bek'osh tewnroone bo teshi.
\s S'ayinon beyo
\p
\v 13 Mansh eshe it nibo káátsde'er finosh k'ande'ere, Iyesus Krstos b́ be'et aawots it daatsit s'aatosh s'een wotts jángiyo deshere. 
\v 14 Aleyiru nanaúwotsi wotarr bali dáron it detsts gond tewni jafrats sha'ak'ayere, 
\v 15 ernmó itn s'eegts Ik'o S'ayin b́ wottsok'o itwere it be jamon S'ayin wotoore, 
\v 16 \x - \xo 1:16\xo*\xt Lew. 11:44-45; 19:2 \xt*\x* «Taa S'ayin t wottsok'o itwere S'ayin wotoore» ett guut'ere.
\p
\v 17 Konshoru b́ boga bogshrawo ik ikosh b́ finok'o angishitu Ik'o «Nonihi» etaat it s'eegirwo b́ wottsotse datsanatse ib wotat itbeyirwotse bín shatoon beewere,. 
\v 18 It it nihwotsatse it naatts woteraw beyatse itn kéwe t'afit ambaron wee awntson b́woterawok'o danfte. 
\v 19 Itn aani kéwédek'e eeg eeg kim deshaw wee ik shap deshaw mereer wottso mangts Krstos s'atsone. 
\v 20 Bíwere b́ dane datsan b́ azeraftsere shinon b́ wotor ando s'uwaatsi dúranatsere itsh be'ere. 
\v 21 It imnetiyonat it jangitwon Ik'ats b́ wotitwok'o Iyesus weeron bín k'irotse tiztsonat bísh mang imts Ik'on amanitute.
\p
\v 22 Amantsuwotssh kááwon s'eents shuno it detsetwok'o aroosh alewosh it kashu kup'shdek'rte, mansh eshe it nibi s'eenon it ats atsewo ayide shunewere. 
\v 23 Gitlo it shuuwe beyar beetwo dúre dúron ned'itu Ik'o aap'on t'afraw shokona bako tafitwonaliye. 
\v 24 Mas'aafo b́ etirwok'on;
\q «Meets tahats jamo totsok'owiye,
\q2 B́ mang jamonwere boditsi fundok'owiye,
\q2 Totsonwere shuuk'etwe, fundonwere ooshetwe,
\q
\v 25 \x - \xo 1:24-25 \xo*\xt Isa. 40:6-8 \xt*\x* Doonzo aap'tsonmó
\q2 Dúre dúrosh kúp'ar beetwe.»
\m Itsh nabets dooshishiy keewonwere haniye.
\c 2
\s Beyar beet shutsonat s'ayin ashuwotsn
\p
\v 1 Eshe gond jámo, dirsh jamo, ats dáro, okooro, konnari óóno wokiwere, 
\v 2 And shuwets na'auots ez gooro bo tewnfok'o itwere kashon eenfere it amish s'ayin wotts shayiri dano tewnwere. 
\v 3 \x - \xo 2:3 \xo*\xt Dub. 33:8 \xt*\x* Tewnosh it falitwere «Doonzo tewd doo b́ wottsok'o shashwerte wotiyale.»
\p
\v 4 Mansh beyar beetk shúts wottso doonzo Iyesus maants t'inere, shútsanwere ashuwots gac'at bok'ztso, Ik'oknomó bín b́ marat'etsonat mangits k'awnts detstsoniye. 
\v 5 Doonzo Iyesus maants it t'iinet beyar beet shútsok'o Shayiri moo wotarr agewoshe, hank'on Iyesus Krstos weeron geneúshit shayiri wosho Ik'osh t'intsosh S'ayin Kahniyotsi wotitute. 
\v 6 \x - \xo 2:6 \xo*\xt Isa. 28:16 \xt*\x* S'ayin mas'aafotse
\q «Hambe! marat'etsonat mang wotts
\q2 Tungúshatse shútsuwotsi kaatsde detset shuuts kup' S'iyonits beezitwe,
\q2 bín amanitwo b́jamon jitseratse»
\m etts aap'o guut'eyatniye b́ fa'oni. 
\v 7 \x - \xo 2:7 \xo*\xt Dub. 118:22 \xt*\x* Eshe it amanirwotssh shútsan mangkee, amanerawwotsshomó
\q «Gmbi agirwots gac'at bojuuts shútso tungúshatse shutswotsi kaatsde detset shúts kúp'o b́ woti.»
\m
\v 8 \x - \xo 2:8 \xo*\xt Isa. 8:14-15 \xt*\x* Ando aani
\q «Ashuwotsi gandit shútso,
\q2 hambe! ashuwotssh t'ug wotar dikit shúts s'aloni» etfe.
\m Bowere bí aap'tso amano bok'aztsosh dihitúne, shinonowere hansh beezekne.
\p
\v 9 \x - \xo 2:9 \xo*\xt Kesh. 19:5-6; Isa. 43:20-21; Iwi. 4:20; 7:6; 14:2; Tito 2:14; Isa. 9:2 \xt*\x* Itmó t'alwotsere adits shááno maants iti s'eegts Ik'oko adits fino it nabitwok'o marat'ets shuwetswots, nugúso Kahniwots, Ik'o b́ tookosh woshb́dek'ts S'ayin ash itne. 
\v 10 \x - \xo 2:10 \xo*\xt Hos. 2:23 \xt*\x* It bal Ik' ashuwotsiliye itteshi, andomó Ik' ashuwotsi woterte, yoots máác' k'ewo daatsatste b́ teshi, andomó máác' k'ewo daatsrte.
\s Ik' guutswots
\p
\v 11 T eshwotso! datsanatsere ibwotsnat ash datsi ashuwotsi it wottsotse kashonton kaareyiru meetsi tewnotse it wokitwok'o oona itsha etirwe. 
\v 12 Daneraka «Gond finirwotsiye» err itn bo oniyaloru dab Ik'o noon s'ilosh b́ weet aawots Ik' ash woterawwots it sheeng fino be'er Ik'o bo uditwok'o bo dagotse it beyor sheeng doyo it detsetwok'owa.
\p
\v 13 Doonzo Iyesus Krstossha err ashaatsere naashts jamwotssh alewere, dambaan bogt naash b́wottsotse naashi naashosh alewere. 
\v 14 Dats k'eezirwotssho alewere, bo gond finirwotsi sezosh, sheeng finirwotsi udosh naashi naashoke wosheekne. 
\v 15 Sheengo finar dartswots bodari aap'otse s'k bo etetwok'o it k'alo Ik'i shune. 
\v 16 Ik' guutswotskok'o wotar s'ayinon beewere bako it s'ayin beyo gondo bín ipoosh woshk'ayere. 
\v 17 Ash jamo mangiwere, amants eshwotsi shunere, Ik'o sharere, nugúso mangiwere.
\s Krstos gond bek'on ariyetso
\p
\v 18 Guutswotso itwere it doonz doonzosh mangiyon keewewere, it kewetwerere shengwotsnat doowwots s'uznsh b́ woterawo gondwotsshor keewewere. 
\v 19 Asho s'aato\f + \fr 2:19 \fr*\fqa S'aato: \fqa*\ft Grikiwots noon keew keewon \ft*\fqa Deera \fqa*\ft Etirwo udoniye. \ft*\f* b́daatsit, weeralon gondbek'o bíyats b́ bodor Ik'osha err b́ k'amitkawotiyale. 
\v 20 Gondo finar sezewo de'er it k'amiyal eegi úde it datsiti? Ernmó sheengo finar it eree gondo itbek'oor it k'amiyal Ik'oke údo daatsitute. 
\v 21 It s'egewwor manshe, b́ jafrats it sháitwok'o Krstos itsh gondo bek'osh ariyetso wotere. 
\v 22 \x - \xo 2:22 \xo*\xt Isa. 53:9 \xt*\x* Bíwere eegoru morro fineratse, b́ noonotsnowere kooto keyatse. 
\v 23 \x - \xo 2:23 \xo*\xt Isa. 53:7 \xt*\x* C'asheworowere aanidek't c'ayatse, gondo b́bek'orowere kááwon angshitwo Izar Izewersh b́ tooko oona! ett b́ imi bako sheeferatse. 
\v 24 \x - \xo 2:24 \xo*\xt Isa. 53:5 \xt*\x* Morratse k'iron k'alewok'o k'alewon k'aleyar kááwon nobetwok'o bí b́ tookon b́ meetson no morro jitatse kur b́ dek'i, b́ gaawon kashwtserte. 
\v 25 \x - \xo 2:25 \xo*\xt Isa. 53:6 \xt*\x* It t'afts mereerwotskok'o it dandefra it teshi, andomó it kashu jinirwonat kotirwok k'az aanertee.
\c 3
\s Kenihe mets jango
\p
\v 1 \x - \xo 3:1 \xo*\xt Efe. 5:22; K'ol. 3:18 \xt*\x* Mank'o it máátswotso! it kenih kenihosh alewere, hank'on ik ikwots Ik' keewtso amanerak bowotiyaloru dab bo máátswots ik noono bo keewawo bo doy mec'ron geetsewosh falitune. 
\v 2 Geetsewosh bofalitwere s'ayin wottsonat ash mangitk wotts it beyo bo bek'ore. 
\v 3 \x - \xo 3:3 \xo*\xt 1 T'im. 2:9 \xt*\x* It azsheengo took wozewon, awnts gedon, k'awnts shaawon kéwets tah tahon úratse be'eyiru baatson wotk'aye. 
\v 4 Ernmó it azsheengo Ik' shinatse b́ k'awntso ayidek't mangtsonat t'afraw s'ilalon, maac' nefonat s'k etts shayiron baatstso, nibotse ááshat beyiru gitsitsi atson wotowe. 
\v 5 Yoots dúron bo Ik'o jangat bokeewo bíats juuk'rts, S'ayin máátswots bo baatso hank'one b́ teshi, bo kenih kenihwosh bo alefere b́ teshi. 
\v 6 \x - \xo 3:6 \xo*\xt Aze. 18:12 \xt*\x* Bo alewwere Sara Abrahamsh «T doonzo!» etaat bísh bi alefi naare, itwere sheeng wotts jamo it k'aliyal eegoru itn shatit keewo iti tek'iyo b́ k'azal b nanaúwots itne.
\p
\v 7 \x - \xo 3:7 \xo*\xt Efe. 5:25; K'ol. 3:19 \xt*\x* It kenihwotso! it máátswotsnton t'iwintson ik wotar beewere,, itiyere bogo maawk bowottsotse itnton kashon beyi s'aato bo naatetwotse boon mangiwere, hank'onowere it Ik' k'onosh t'ug wotit keewo beeratse.
\s Sheengo finar gondbek'o
\p
\v 8 Eshe it únets it ats atsatseyo ikwotar beewere,, k'osh ash kic'o it kic'ok'o woshde'er taawwere, eshwi shunon shunewere, maac' k'ewetswotsnat took dashan detstswotsi wotoore. 
\v 9 Deerwere bako gondi shegro gondon, c'ashi shegro c'ashon anik'ayere, it its'eege han itk'alishe. Han k'alrnwere deero naatetute, 
\v 10 S'ayin Mas'aafo b́ etirwok'o;
\q «B́bewotse gene'úo geyirwonat sheeng aawwotsi bek'osh geyirwo,
\q2 Bí albero gond keewo b́ keewawok'o,
\q2 b́ noono weeri gondo b́ keewawok'o baziwe.
\q
\v 11 Gondatse wokowe, sheeng keewo finowe,
\q2 Jeenono geyowe, b́jafratsowere sha'owe 
\v 12 \x - \xo 3:10-12 \xo*\xt Dub. 34:12-16 \xt*\x* Doonzo ááwwots
\q2 kááwwots maantse bo s'iliri,
\q2 b́ waazwotswere bo k'ontso k'eboosh k'eshekne,
\q2 gond fonirwotsatsomó
\q2 Doonzo b́shits aak'on shet'etwe.»
\p
\v 13 Sheeng keewo k'alosh it kúp'iyal gondo itats betsitwo kone? 
\v 14 \x - \xo 3:14-15 \xo*\xt Mat. 5:10; Isa. 8:12-13 \xt*\x* Sheeng keewo finar it eree gond bek'o itats b́ bodalmó deero daatsitute, boon shatk'ayere, kic'ono kic' k'ayere. 
\v 15 Doonzo Krstosi it níbon mangiwere, it kashosh doonzo woshde'er, itokere fa'a it jangiyetsmansh itn aatiru jamwotssh aaniyosh jam aawo k'andek'tswotsi wotoore. 
\v 16 It aanitwonmo nooni nefonat mangiyon wotowe, Krstosk it wottsosh it detsts sheeng doyats gond keewiru ashuwots bo gond keewon bo jitsitwok'o maac' s'ayino deshere. 
\v 17 Ik' shunotso b́ wotiyal it gond fino finar gondo itbek'oniyere sheeng keewo finar gondo it bek'o k'anefe. 
\v 18 Krstos b́ tookon Ik'o maants iti t'intsosh bí kááw wotefetst kááw woterawwotssh morratse tuutson aani iwisherawok'on iknoto gondo bek't k'irre, bí meetson k'irre, shayironomó beyar beetke b́ woshi. 
\v 19 Shayir mannowere tipi mootse beyiru kashuwotsok amt dooshishiyo b́ nabi. 
\v 20 \x - \xo 3:20 \xo*\xt Aze. 6:1—7:24 \xt*\x* Tipi mootse beyiru shayr shayirwots yoots Noh dúr markabo b́ dozor Ik'o boon k'amoon b́ kotfere aleratsone ettswotsiye. Markabmanits kindt aatsotse kashtswots botaawo shmt ash wotts múk' ashuwots s'uziye. 
\v 21 Atsanwere and itn kashitu gupon ariyetsoniye, gupanu atsatsi kiimo bazosh b́ woterawo s'ayin maac'o daatsosh Ik'o maants t'iinet k'ononiye, itn b́ kashitwere Iyesus Krstos k'irotse b́ tuutsi weerone, 
\v 22 Bí daro maants amt Ik'o k'anokee, melakiwotsnat alirwots, angwotswor, bísh keewernee.
\c 4
\s Ik'i shunok'on bobetwok'o b́ iztsok'o
\p
\v 1 Krstos b́meetson gond bek'o b́ datstsosh itwere kes'i taho taahadek'ts ashok'o hasabiyanats k'up'ar k'ande'ere, b́meetson gond bek'o dek'ts asho morro fino need'ik'rere.\f + \fr 4:1 \fr*\ft Krstos b́meetson gondo b́ bek'tsosh morro ango b́ deshawok'o woshre. \ft*\f* 
\v 2 Haniyakon eshe oorts datsatsi it beyon meetsi gond tewno s'eentson b́ woterawo Ik'i shuntsok'on beewere. 
\v 3 Ik' ash woterawwots bo k'alfok'o shiraatse jintsi woton, gusiyon, máshon, werali gáálon, weralo úyide'er duubonat wic'ik wotts dozets ik'uwotsi ik'iyon it beshits dúro bodfe. 
\v 4 Andomó keewann weralo bonton ik woton beshiyo it k'aztsosh bo adiri, bo c'ashiri. 
\v 5 Ernmó kashon fa'úwotsnat k'irtswotsats angshosh k'andek'tso shinatse aatetúne. 
\v 6 Eshé hank'on boowere ash jamikok'o bomeetson bok'iritwok'o boats angshere, ernmó boshayron Ik'ok'o beyar beetwotsi wotar bobetwok'o doo shishiyo k'irtswotssh nabere.
\s Ik' imts imuwotsi sheengshde'e boon k'eezo
\p
\v 7 Eshe jam keewi s'uwo bodre, kup'arr Ik' k'ono it falitwok'o mangdek'ts nibo deshere, it angok'owere beewere,. 
\v 8 \x - \xo 4:8 \xo*\xt Ari. 10:12 \xt*\x* Shuno morri ayo b́ aatsitwotse jamoniyere bogo it ats atseyo kúp'shde'er shunewere. 
\v 9 Múmúderaniyere it ats atseyon ibo ibiwere. 
\v 10 K'osh k'osh naari Ik'i s'aatwotsi sheengsh k'eezfetsr ititse ik iko bísh imets s'aaton k'oshosh finowe. 
\v 11 Danirwo Ik' aap'o b́ danirwok'on daniwe, finirwonu Ik'o bísh b́ imet angon finowe, hank'on Ik'o Iyesus Krstos weeron jam keewon mangitwe, mangonat angon dúre dúrosh bísh wotowe, amen.
\s Gondbek'otse kup'o
\p
\v 12 T mashotso! tawok'o fadit gond bek'otse it daatsewo daneraw ib wotts keewo itats b́ bodtsok'o woshde'er adk'ayere, 
\v 13 Maniyere dab Krstos mangon b́ be'ewor ayde'er it geneútiwok'o b́ gond bek'otse kaydek'tswotsi it wottsok'o gene'owere. 
\v 14 Krstos shúútsi jangosh it c'asheyal mang wotts Shayiro etonwere Ik' Shayiro itats b́ oot'etwotse derek itne. 
\v 15 Ititsere konworu gondo b́ bek'or kash úd'tsok'o, úmp'etsok'o, gond fintsok'o, ash keewots s'eegerawo kindirwok'o wotk'aye. 
\v 16 Krstiyani b́ wottsatse tuutson gondbek'o bíyats bodetwonmó krstiyaniyat b́ s'egetsosh Ik'o mangiwa bako jitsk'aye.
\p
\v 17 Man eegoshe? Angsho b́ tuwit aawo bodre, angshonú b́tuwit Ik' ashuwotsatsne, eshe angsho b́ tuwit noyitsna wotiyal Ik' doo shishiyosh aleraw ashuwots bo s'uwo aawk'owe b́ wotitik'úna? 
\v 18 \x - \xo 4:18 \xo*\xt Ari. 11:31 \xt*\x* S'ayin mas'aafotse b́ etirwok'o,
\q «Kááwonúwor dab kasho b́ falit k'ic'ona wotiyal
\q2 Ik' Ik'irawotsnat morrets ashuwots aawk'owe bowotiti?»
\m
\v 19 Mansh Ik' shunok'on gond bek'iru ashuwots bokeew jamo azts amanetsosh adaro imr sheeng keewo k'alosh shuutsan etk'ayne.
\c 5
\s Ik' ashuwotsi bín k'eezosh imets izo
\p
\v 1 Eshe taa bonton tohaat Ik' meyitsi eenash wottso, Krstos gond bek'osh gaw wottso, ando shino maantsish be'et mango kayitk wottso, it dagotse beyiru Ik' máá eenashwotsi izitwe. 
\v 2 \x - \xo 5:2 \xo*\xt Yoh. 21:15-17 \xt*\x* Adaro itsh imets Ik' gizi s'eeno jinere, gizi s'eenmanowere it jinet angnon b́ woterawo Ik'o b́ getsok'on, shunon wotowe, ambarosh k'awnton b́ woterawo finosh it detsts shunon wotowe. 
\v 3 Mank'o it naashi shirotse beyirwotsi fiic'de'er kéwon b́ woterawo Ik' giz s'enwotssh sheeng ariyo kitson wotowe. 
\v 4 Hank'o it k'aliyal jints eeno b́ be'ewor awaasheraw mangi akliliyo dek'etute.
\p
\v 5 \x - \xo 5:5 \xo*\xt Ari. 3:34 \xt*\x* Ando! it jawetswotso! eenashúwotssh alewere, it jamets maac' nefo tahok'o tahade'er iko ikosh finowe,
\q «Ik'o bog taana etirwotsi k'efitwe
\q2 botoko dashan detsetwotsshomó s'aato imetwe» ett guut'ere.
\m
\v 6 \x - \xo 5:6 \xo*\xt Mat. 23:12; Luk'. 14:11; 18:14 \xt*\x* Eshe Ik'o b́ etts aawon itn dambaan b́ tuzish Ik' kishi kúp'o shirots it tooko dashan deshere. 
\v 7 Bí itsh b́ shiyanirwotse iti kic'iru shiyan jamo bíyats juuk'rore.
\p
\v 8 It detstson beewere,, k'ande'ere! it balangaro diyablos b́ k'ot'etwo geefetst guundiru ééshok'o it gúúratse b́ ananiri. 
\v 9 Dats jamatse fa'a it eshúwots han naari gond bek'o bo dek'irwok'o dande'er it amantsats kúp'ar imnetyon bín k'efoore. 
\v 10 Muk' gizewosh gondo it bek'iyakon Krstosn dúre dúri mango maants iti s'eegtso s'aat jami Ik'o bí b́ tookon iti s'eenwotsi woshitwe, iti tep'etwe, iti kup'itwe, iti need'itwe. 
\v 11 Dúre dúrosh b́ borfetso ango bísh wotowe! amen.
\s S'uwaatsi jamo
\p
\v 12 \x - \xo 5:12 \xo*\xt Wosh. 15:22 \xt*\x* Amanets eshwe etaat t gawirwo Silas weeron woshan k'awnon itsh guut're, itsh t guut'uwere itsh t izirwan ari Ik' s'aato b́ wotok'o itsh gawoosha etaatniye, mansh Ik' s'aatanotsatse kúp'ar need'ore.
\p
\v 13 \x - \xo 5:13 \xo*\xt Wosh. 12:12, 25; 13:13; 15:35-39; K'ol. 4:10; Film. 24 \xt*\x* Itkok'o marat'dek'etsu Babilonitse fa'a Ik'i moow jamo itsh t'intsirwane, t naa'yi Mrk'oswere jamo itsh t'intsirwe. 
\v 14 Krstiyaniwots shunon it ats atseyo jobeyon jamo aatewere.
\p Krstosk wotts it únetssh jeeno wotowe.