\id 2PE Burarra exported from InDesign June 2015 \h 2 Birta \toc1 2 Birta Barrwa A-wukurrjinga Janguny (2 Peter) \toc2 2 Birta \toc3 2 Birta \mt1 2 Birta \mt3 Barrwa A-wukurrjinga Janguny \mt4 (2 Peter) \c 1 \p \v 1 Mun-guna jurra ngaypa Jayman Birta \pn (Simon Peter)\pn* ngu-wukurrjinga ana-gorrburrwa minypa ngaypa ngu-mujama nula Jesus Christ nipa nguna-jerrmarra. \p Gun-guna janguny ana-gorrburrwa ana-goyburrpa nyiburr-gata gu-ngardapa arrburrwa marr nguburr-balcharra gun-molamola gun-gata gun-gumarrkapcha. Minypa Jesus Christ nipa bama jechinuwa gu-borrwuja a-workiya, nipa gala ngardapa ngardapa arr-nega, wurra minypa nipiya an-gata an-ngarripa Wangarr rrapa an-ngarripa Wanngu An-gunega, gu-gurdiya ngacha. \p \v 2 Nipa Wangarr a-gunggaja barra ana-gorrburrwa a-workiya rrapa minypa ana-goyburrpa burr-guya nyiburr-molamola nyiburr-ni barra, gala barra minypa gun-nga nyibu-borrwa nyiburr-ni. Ngardawa minypa ana-goyburrpa marn․gi nula Wangarr rrapa ana-goyburrpa marn․gi nula an-ngayburrpa Bunggawa Jesus, gu-gurdiya ngacha. \s1 Bubi-rrimapa Bubu-mungba Gun-gata Minypa Nipa Wangarr A-gonyjinga Ana-gorrburrwa \p \v 3 Gu-yigipa gu-ganyjarr Wangarr arr-wuna gun-bulapalawa gu-gata ngacha barra minypa ngayburrpa wanngu nguburr-ni rrapa gu-molamola minypa ngayburrpa marn․gi nguburr-nirra nula nguburr-bamburda, gu-gurdiya ngacha. Ngardawa nipa an-gatiya a-gonyjinga arrburrwa nipa gu-gujayanaya ay-nirrapa ay-workiya an-molamola warrpam. \v 4 Gu-gurdiya ngacha minypa nipa arr-wuna gun-jaranga gun-gata nipa wola gun-guwarr gochila an-dana wana gun-babalapa rrapa gun-gumarrkapcha. Barra nyanma ana-goyburrpa nyiburr-malcha nula Wangarr nipiya a-yinmiya a-nirra a-workiya, rrapa minypa nyiburr-lijiwarriya barra nula gun-nerra gu-yurra gu-workiya gun-guna rrawa an-gugaliya gun-nika jal gun-guni. \v 5 Ganapiya, lika ngardawa Wangarr arr-wuna gu-gatiya ngacha gochila gun-gurra, wurra ana-goyburrpa gala barra borijipa marr nyiburr-balcha, wurra burr-guya bubu-borrwa ana-goyburrpa nyiburr-yinmiya barra nyiburr-ni nyiburr-molamola nyiburr-gugaliya nyiburr-burral. Rrapa ana-goyburrpa nyiburr-gata minypa nyiburr-nirra nyiburr-molamola nyiburr-gugaliya nyiburr-burral, bubu-borrwa nyiburr-yinmiya barra ana-goyburrpa bama jechinuwa nyiburr-ni. \v 6 Rrapa ana-goyburrpa nyiburr-gata minypa bama jechinuwa nyiburr-nirra, bubu-borrwa nyiburr-yinmiya barra ana-goyburrpa gun-nerra nyiburr-jarlapiya nula nyiburr-workiya. Rrapa ana-goyburrpa nyiburr-gata minypa gun-nerra nyiburr-jarlapiya nula nyiburr-workiya, bubu-borrwa nyiburr-yinmiya barra ana-goyburrpa nyiburr-jinyjapa nyiburr-workiya. Rrapa ana-goyburrpa nyiburr-gata minypa nyiburr-jinyjarrapa nyiburr-workiya, bubu-borrwa nyiburr-yinmiya barra ana-goyburrpa gu-molamola nyiburr-ni nyiburr-workiya. \v 7 Rrapa ana-goyburrpa nyiburr-gata minypa gu-molamola nyiburr-nirra nyiburr-workiya, bubu-borrwa nyiburr-yinmiya barra ana-goyburrpa jal nyiburr-ni ana-gorrburrwa gu-gapa gu-guta minypa gun-maywapa ana-goyburrpa nyiburr-guymachichiyana. Rrapa ana-goyburrpa nyiburr-gata minypa jal nyiburr-nirra ana-gorrburrwa gu-gapa gu-guta minypa gun-maywapa gu-ngardapa nyiburr-bonapa, bubu-borrwa nyiburr-yinmiya barra ana-goyburrpa gurrurta nyibi-rrima burrwa warlaman wurra gama gorlk. \v 8 Ngardawa minyja ana-goyburrpa mu-nguy nyiburr-yirdapa nyiburr-bamba nyiburr-workiya, gu-gurda ngacha minypa gun-molamola nyibu-gurdanyja barra nula nyiburr-workiya an-goyburrpa Bunggawa Jesus Christ minypa ana-goyburrpa gipa marn․gi nyiburr-ni nula. \v 9 Wurra an-gata ana-nga gu-gata ngacha gala gu-borrwa, nipa minypa a-bamapuna gun-gata minypa Jesus a-wepana gun-nerra nipa mu-ngoyurra gu-rrimarra. Minypa nipa an-gugaliya an-balangarta rraka gala a-yinmiya gu-na meyali gun-gata. \p \v 10 Ganapiya, jela, worla, wurra burr-guya bubu-borrwa ana-goyburrpa nyiburr-yinmiya barra nyibi-rrimapa nyibu-mungba gun-gata minypa Wangarr a-gonyjinga ana-gorrburrwa rrapa nyirr-menga. Minyja ana-goyburrpa nyiburr-yirda nyiburr-bamba, gun-narda minypa ana-goyburrpa gala nyiburr-yinmiya nyiburr-lijiwarriya; \v 11 wurra nyiburr-bamba barra, Wangarr burr-guya gun-molamola gu-nega barra ana-gorrburrwa, ana-goyburrpa barra wugupa nula Jesus Christ an-ngayburrpa Wanngu An-gunega nipa Bunggawa a-nipa barra a-workiya. \p \v 12 Gun-narda ngardawa gun-burral, ngaypa arr-gelamajortka barra ngu-workiya gun-gata, wurra wuriya ana-goyburrpa gipa marn․gi rrapa nyiburr-jinyjarrapa nyiburr-workiya gu-burral janguny. \v 13 Minyja ngaypa ngu-borrwurra minypa gun-molamola ngaypa minypa gun-guniya burdak nguburr-nirra ngaypa barra arr-gelamajortka ngu-workiya. \v 14 Ngardawa ngaypa marn․gi yi-gurrepa gu-nirra gu-bamburda ngaypa ngu-boy barra minypa an-ngayburrpa Bunggawa Jesus Christ nipa yarlanga gu-negarra apula ngaypa ngu-yinmiya barra ngu-juwa. \v 15 Minyja ngaypa burr-guya nawanawa ngu-nirra minypa mu-guna jurra ngu-wukurrjinga ana-gorrburrwa, barra nuwurra waypa ngaypa ngu-boy, ana-goyburrpa nyibu-ngurrja barra nyiburr-workiya janguny rrapa nyibu-borrwa barra nyiburr-workiya ana-goyburrpa nyiburr-yinmiya barra derta nyiburr-negiya. \s1 Ngayburrpa Nyibi-nana Jesus Nipa Burr-gujayanaya A-bena \p \v 16 Gun-gata ngayburrpa nyibu-ngurrjinga ana-gorrburrwa an-ngayburrpa Bunggawa Jesus Christ nipa burr-barlmarrk ana-jeka barra, gun-narda ngika minypa janguny borijipa gun-guyinda an-gugaliya gu-borrwuja rrapa a-yolkiya a-workiya. Wurra ngayburrpa jarra mu-ngayburrpa m-barra nyibi-nana nipa Jesus burr-gujayanaya a-bena. \v 17 Minypa Nyanyapa arrku waykin a-nirra nipa gu-gata gu-gujayanaya wenga ana-wena nula Jesus rrapa an-molamola a-negarra, nipa a-jayanayana a-ji gun-gatiya minypa ngayburrpa gatiya. Minypa Wangarr a-yinagata a-wena, “An-guna an-ngaypa walkur ngaypa jal ngu-nirra nula. Nipiya an-guna ngaypa ngu-marrkapchinga nula.” \v 18 Minyja ngayburrpa nyiburr-guna ana-manyjirda nyiburr-galiyana waykin wenga nipa a-yinagata ana-wena, ngardawa ngayburrpa nyiburr-gatiya wugupa nula Jesus gatiya gu-japurra mu-mirk.\x + \xo 1:18 \xt Metiyu 17:1-5; Mark 9:2-7; Luk 9:28-35\x* \p \v 19 Rrapa gu-gatiya wenga gugu ngayburrpa burr-guya marn․gi nyiburr-ni minypa Wangarr gun-nika janguny wola mu-ngoyurra gubu-ngurrjinga aburr-workiyana gun-narda gun-burral. Minypa birripa aburr-wena aburr-workiyana, “Wanngu An-gunega ana-boy barra.” Rrapa ana-goyburrpa, japurra ngapa nyiburr-jirra, bubu-borrwa buburr-bamba gun-gata janguny. Ngardawa gu-gurda janguny minypa gun-maywapa ranginy lam \pn (lamp)\pn* gu-rrongga gu-jirra ana-munya gu-nirra, nuwurra waypa guna-gepa barra rrapa nipa an-gata minypa jin-maywapa jin-gata jin-ngardapa gata guna-wurrgakaja jina-bamburda jina-workiya, nipa a-jayanaya barra ana-gorrburrwa wuparnana nyiburr-ngurrnga. \v 20 Wurra ana-goyburrpa bubu-borrwa gun-guna: An-gata gala ana-nga rrapa a-yinmiya nipa wupa nyanma yarlanga gu-nega gun-gata wola janguny birripa gubu-ngurrjinga aburr-workiyana Wangarr gun-nika. \v 21 Wurra gun-gata ngika minypa an-gugaliya nipa wupa gu-borrwuja rrapa a-weya a-workiya, wurra jarra minypa Mern An-mawunga wugupa burrwa birripa aburr-wena Wangarr nyanma. \c 2 \s1 Aburr-guyolkiya \p \v 1 Wurra aburr-werranga aburr-gata wola aburr-wena aburr-workiyana, birripa jarra aburr-guyolkiya aburr-guyinda aburr-mujaruk, minypa burrbu-yolkaja aburr-workiyana wurra gama gorlk. Rrapa gun-guniya gu-yirdiya barra gu-ni. Minypa aburr-guyolkiya aburr-guyinda marn․gi aburr-gunega birripa aburr-balagarrgurrjiya barra ana-gorrburrwa, janguny gun-nerranga gubu-ga barra gurda, wurra ngika Wangarr gun-nika, wurra gun-gujuwa, ngaja, ngarla. Birripa minypa abu-bawa barra an-gata Bunggawa nipa mu-maningan a-jortchinga burrwa, gu-gata wenga barra minypa nipa yibirrich burr-bu barra. \v 2 Wurra aburr-jaranga aburr-malcha barra burrwa aburr-gata birripa burr-guya gun-nerra jama aburr-jirra aburr-workiya, rrapa gu-gata wenga wurra gama gorlk gun-nerra gubi-nega barra gun-guna gun-molamola jarlakarr gun-burral, jimarn jarrapa gun-guyolkiya. \v 3 Aburr-gata aburr-guyolkiya aburr-guyinda marn․gi aburr-gunega, birripa nyirrbu-yolka barra aburr-workiya ana-goyburrpa, ngardawa aburr-ngumurda. Minypa birripa gubu-borrwuja gu-gata gu-birripa gu-janguny minypa mbi-ma barra rrupiya. Ngardawa janguny birripa aburr-weya aburr-workiya, gun-gata birripa wupa nyanma; Wangarr nyanma ngika. Gun-narda nula wola baman gu-ni nipa Wangarr nawanawa a-ni burr-mari a-wengga barra burrwa rrapa burr-bu barra. Gu-gata nula nipa minypa burr-jaywuja a-jirra, ngaja, ngarla! \p \v 4 Minypa gun-maywapa ranginy waykin aburr-guyinda aburr-gata aburr-werranga werra aburr-negiyana rrapa nipa Wangarr gala baywarra gu-nengarna burrwa. Ngika. Wurra nipa burr-yerrnyjinga yi-gata wuparnana gu-jel, gatiya birripa an-munya aburr-ninyarra, aburr-bichiya aburr-nirra burr-gubandawiya jirn \pn (chain)\pn* nuwurra waypa jurdach guna-bampa barra Wangarr burr-mari a-wengga barra burrwa. \v 5 Minypa mola gun-maywapa aburr-gata mu-ngoyurra aburr-ni nipa Wangarr gala baywarra gu-nengarna burrwa, wurra bugula wana guna-jerrmarra burrwa, birripa aburr-bulapalawa aburr-guybuna ngardawa gala jal aburr-nirrarna nula Wangarr. Wurra an-ngardapa wupa an-gugaliya Wangarr a-jarlapuna a-menga, nipa an-gata Nowa \pn (Noah)\pn* a-wena a-workiyana jechinuwa gun-gunega janguny. Nipiya Nowa aburr-yigipa burr-bapala burr-jawa rrapa aburr-birripa mu-gumarrbipa yerrcha Wangarr burr-jarlapuna burr-menga minypa arr-ngardapa arr-murna rrapa arr-jirrapa arr-ngardapa, minypa 8.\x + \xo 2:5 \xt Genesis 6:1—7:24\x* \v 6 Minypa barrwa gun-maywapa gu-gata gu-rrawa Jorram \pn (Sodom)\pn* rrapa Gumóra \pn (Gomorrah)\pn* Wangarr burr-yalpuna gu-bol, gu-yirdiya barra gu-ni barra burrwa aburr-gata ngacha gu-galiya yerrcha minypa gala jal aburr-ni nula Wangarr.\x + \xo 2:6 \xt Genesis 19:24\x* \v 7 Wurra minypa Wangarr a-jarlapuna a-menga an-ngardapa an-gugaliya an-gata an-nelangga Lot minypa nipa jechinuwa a-ni a-workiyana rrapa wargugu a-ni gun-gata nula minypa aburr-gata aburr-werra gun-nerra jama aburr-ji aburr-workiyana\x + \xo 2:7 \xt Genesis 19:1-16\x* — \v 8 (Minyjiya, ngarla. Nipa an-gatiya jechinuwa a-ni a-workiyana gu-birripa gu-rrawa, wurra minypa burr-guya wargugu a-ni nipa burr-nana a-workiyana rrapa a-galiyana burrwa a-workiyana birripa gun-nerra jama aburr-ji.) \v 9 Wurra minypa Wangarr a-jarlapuna a-menga Lot, gun-narda minypa gu-galiya yerrcha aburr-yinmiyapa minypa jal aburr-nirra nula Wangarr nipiya ganyjarr gu-rrimanga burr-jarlapurda burr-mangga a-workiya gun-gata gun-guwarga gun-guyinda rrapa gun-nerra. Rrapa aburr-werranga aburr-gata gun-nerra jama aburr-jirra aburr-workiya nipa ganyjarr gu-rrimanga burr-burnda a-workiya nuwurra waypa gun-balmapa gu-ni nipa burr-mari a-wengga barra burrwa rrapa minypa gun-gubu gu-mungba barra. \v 10 Gu-guyinarda ngacha, wurpa lika nipa Wangarr burr-guya a-bachirramiya burrwa a-nirra aburr-gata minypa birripa aburr-burral werra aburr-negiya aburr-workiya minypa gun-nerra birripa burr-guya gubi-rrimanga rrapa gala aburr-galiya nula aburr-workiya bunggawa an-guyinda. \p Aburr-gurdiya ngacha gu-galiya yerrcha birripa minypa gala ana-nga aburr-gurkuja nula aburr-workiya, wurra minypa gun-nga birripa jal aburr-nirra, gun-gata wupa jama aburr-jirra aburr-workiya. Birripa gala aburr-gurkuja gun-gata minypa an-nerra abi-nenga aburr-workiya wana an-guyinda waykin a-nirra. \v 11 Wurra aburr-gata minypa Wangarr burr-yika waykin aburr-guyinda aburr-mujaruk, birripa jarra marrban aburr-molamola rrapa burr-barlmarrk jama aburr-jirra aburr-workiya, wurra gatiya birripa balapala gubi-rrenyjinga nula aburr-workiya Wangarr, birripa gala werra burrbi-nega aburr-workiya aburr-werranga. \v 12 Wurra aburr-guna gu-galiya yerrcha, birripa minypa an-gata an-mugat a-rrigirrgnga a-workiya rrapa gala gu-borrwa ana-werranga a-bu barra a-juwa. Minypa gun-burral birripa aburr-guna gu-galiya yerrcha gun-nerra gubi-nenga aburr-workiya gun-nga gun-gata minypa gala gubu-malawa, wurra gala gubu-borrwa minypa birripa aburr-juwa barra gu-gata gu-werra birripa gubi-rrimanga; \v 13 gala gubu-borrwa gun-nerra guna-jeka barra burrwa, mu-ngoyurra birripa werra burrbi-negarra aburr-werranga. Minypa gun-guniya Wangarr marr gu-ganyja arrburrwa warlaman arr-gurdiya gorlk, wurra birripa jarra aburr-worlworlchinga aburr-nirra aburr-workiya gun-gata wupa nyanma gu-guniya gu-yika gu-rrawa. Minypa gun-gata ana-goyburrpa Wangarr nyiburr-yika gu-galiya yerrcha gu-ngardapa nyiburr-negiya nyiburr-workiya rrapa balaja nyibu-banga wugupa ngardawa minypa jal nyiburr-nirra ana-gorrburrwa gu-gapa gu-guta, wurra gun-narda birripa jarra aburr-guna minypa gun-maywapa gun-nerra gu-mulpiya, barra minypa ana-goyburrpa gona nyiburr-ni barra burrwa. \v 14 Birripa mipila aburr-jirra marrambay gun-guji gubu-borrwuja aburr-workiya rrapa mu-nguy jal aburr-nirra aburr-workiya gun-nerra. Rrapa abirriny-yerranga abirriny-jata gun-jaranga gubirriny-borrwuja abirriny-yorkiya, birripa aburr-guna burrbu-yolkaja aburr-workiya, abirriny-malchinga burrwa gun-nerra birripa jama aburr-jirra. Birripa aburr-ngurrnga minypa gun-jaranga jal aburr-nirra aburr-workiya, wurra Wangarr mari gu-rrimanga burrwa, ngaja, ngarla!\x + \xo 2:14 \xt Genesis 6:5\x* \v 15 Birripa minypa gun-molamola jarlakarr gubu-bawuna, aburr-lijiwarriyana. Minypa abu-jurrjurrmunga aburr-nirra an-gata Beylam \pn (Balaam)\pn* mu-ngoyurra a-ni, an-gatiya Biyor \pn (Beor)\pn* an-nika an-walkurpa jal a-ni a-bamuna rrupiya, birripa minypa abu-wirrpana, nipa minypa gun-nerra jama a-ji burrwa. \v 16 Wurra Beylam nipa Wangarr a-jobujobuna gun-gata nula gun-nerra nipa jama a-ji. Minypa Beylam jin-nika dongki manyjirda jiny-jirra jiny-nyukurdanyjiyana minypa an-gugaliya jiny-yena, nipiya ji-nyala a-jobujobuna Beylam an-gatiya wurpa niya nipa Wangarr ana-nyala a-wuna a-workiyana nipa gu-ngurrjinga Wangarr gun-nika, wurra barrwa gugu an-nerra an-gugaliya a-ni.\x + \xo 2:16 \xt Numbers 22:4-35\x* \p \v 17 Aburr-gurdiya gu-galiya yerrcha, birripa minypa gun-maywapa gun-gata bugula mipila gu-jirra nipa minypa gu-gachinga, gala gu-yinmiya arr-jalkaka. Rrapa barrwa birripa minypa gun-maywapa gun-gata nguparr minypa gu-gakiya gu-bamburda gu-workiya, gu-barlmarrk gu-jalanggakaja, rraka yorr gala gu-bungga, gu-gurraga rrawa. Birripiya Wangarr gu-jarlapuna burrwa minypa an-munya wupa aburr-nipa barra aburr-workiya \v 18 ngardawa minypa wana aburr-negiyana aburr-workiyana. Ngardawa birripa gun-jaranga aburr-weya aburr-workiya gun-guyolkiya gun-guyinda rrapa minypa burrbu-warganyja aburr-workiya gu-werra gu-gata ngacha minypa an-gugaliya gun-nerra jama a-jirra a-workiya. Minypa aburr-werranga aburr-guna waya aburr-molamiya aburr-bamburda gu-gata gu-guyolkiya wenga, birripa jarra barrwa aburr-lijiwarriya aburr-workiya ngardawa aburr-guna aburr-guyolkiya wupa nyanma. \v 19 Minypa birripa aburr-guna gochila burrbi-rracha aburr-workiya wurra gama gorlk jimarn jarra gun-molamola gu-ni barra burrwa. Wurra aburr-gunaga aburr-guyolkiya birripa jarra minypa aburr-mujama aburr-nirra nula gun-nerra, [rrapa gu-yirdiya barra gu-ni burrwa aburr-gata minypa aburr-galiyarra burrwa aburr-workiya.] Minyjiya, ngarla. An-gugaliya an-mujama a-nirra nula a-workiya gun-nga gun-gata minypa a-rrimanga gu-nirra. \v 20 Rrapa birripa aburr-gata minypa mu-ngoyurra marn․gi aburr-ni nula an-ngayburrpa Bunggawa Jesus Christ, an-gatiya an-ngayburrpa Wanngu An-gunega, rrapa minypa gun-nerra gu-guna gu-yika gu-rrawa birripa minypa gubu-beybana, aburr-molamiyana ngardawa nipa nyanma, wurra minyja barrwa aburr-ngukurdanyjiya, aburr-jeka gu-werra, gun-narda minypa mu-ngoyurra aburr-werra aburr-ni, wurra barrwa gugu aburr-werra aburr-ni burr-guya aburr-werra. \v 21 Gun-mola jimarn jarra birripa gala mu-ngoyurra marn․gi aburr-nirrarna gun-molamola jarlakarr. Wurra minypa gun-gata birripa marn․gi aburr-ni gun-gata gun-japurra joborr Wangarr burr-wuna, wurra barrwa gubu-bawuna, gun-narda minypa birripa werra aburr-negiyanapa warrpam. \v 22 Minypa ngayburrpa nguburr-weya nguburr-workiya janguny: “Gulukula a-jeknga a-workiya nula gun-gata nipa a-gurljinga a-workiya,” rrapa “Bigibigi ngubu-weparda nguburr-workiya, barrwa jiny-jeknga, jiny-jurnumbiya jiny-yorkiya jilpirr gu-guyinda.”\x + \xo 2:22 \xt Proverbs 26:11\x* \c 3 \s1 Gun-balma Gu-jirra Gu-bamburda Bunggawa A-bengga Barra \p \v 1 Ana-goyburrpa, japurra ngapa nyiburr-jirra, mun-guna jurra ngaypa ngu-jirrapa ng-goma ngu-negarra ngu-wukurrjinga ana-gorrburrwa. Minypa ngaypa arr-gelamajortkarra, ana-goyburrpa barra bama nyiburr-jirra nyiburr-molamola nyiburr-ni. \v 2 Ngaypa jal ngu-nirra barra ana-goyburrpa nyibu-borrwa Wangarr gun-nika janguny gun-gata aburr-yigipa aburr-mujaruk ngunyuna aburr-guyinda gubu-ngurrjinga aburr-workiyana wola gun-guwarr rrapa barrwa gun-gata an-ngayburrpa an-ngardapiya arrburrwa Wanngu An-gunega nipa joborr burr-wuna ana-gorrburrwa aburr-yigipa aburr-mujama. \p \v 3 Mu-ngoyurra waypa bubu-borrwa gun-guna: Minyja gun-guniya jurdach aburr-werranga aburr-guborrkpa aburr-bengga barra, rrapa gubu-borrkpa barra aburr-workiya Wangarr gun-nika janguny. Ngardawa birripa minypa gun-nerra gubi-rrimanga aburr-nirra rrapa aburr-malchinga nula aburr-nirra gun-gata.\x + \xo 3:3 \xt Jut 1:18\x* \v 4 Birripa aburr-yinda barra aburr-wengga, “Yina an-gaya an-gata gochila an-gurra? Nipa gala a-beyarnapa. Minypa aburr-ngayburrpa nyanyapa arrburra yerrcha gipa mu-ngoyurra aburr-juwuna, wurra gun-gata minypa Wangarr mu-ngoyurra gu-jarlapuna gun-nardiya rrawa rrapa minypa gun-guniya gu-ni gun-maywapa!” \v 5 Birripa aburr-wengga barra gu-gurdiya ngacha, minypa gubu-morrarna aburr-ni gun-gata minypa wola baman gu-ni nipa Wangarr gu-yigipa gu-wengga gu-jarlapuna rrawa waykin rrapa gun-guna nguburr-nirra. Minypa nipa rrawa gu-doljinga, rrapa minypa bugula gu-yu waykin rrapa wupa,\x + \xo 3:5 \xt Genesis 1:6-9\x* \v 6 rrapa minypa gu-gata ngacha gu-bugula nipa Wangarr barrwa gu-wurlupakaja rrapa wurra gama gorlk aburr-juwuna.\x + \xo 3:6 \xt Genesis 7:11\x* \v 7 Wurra an-gatiya an-maywapa a-wena minypa gun-guna rrawa waykin rrapa wupa nipa gu-borrwurra gu-bol gu-rro barra, laka gu-gaya barra. Wurra gun-gata ngika burdak. Wurra nuwurra waypa barra gun-balma gu-ji nipa barra burr-mari a-wengga rrapa burr-bu aburr-gata gala jal aburr-nirrarna nula, gun-gatiya barra rrawa gu-rro. \p \v 8 Ana-goyburrpa, japurra ngapa nyiburr-jirra, gala barra nyiburr-bamapa gun-gata minypa gun-ngardapa ngorrngurra, gun-narda nula nipa Wangarr minypa gun-bulawa jemberr minypa 1,000; wurra gun-gata gun-bulawa jemberr minypa 1,000, gun-narda nula Wangarr minypa gun-ngardapa wupa ngorrngurra.\x + \xo 3:8 \xt Psalms 90:4\x* \v 9 Aburr-werranga abu-yopurda aburr-workiya Wangarr, jimarna bama aburr-yinaga nipa gun-baykarda gu-negarra, waygaji gu-ngukurdanyjinga gun-gata nipa mu-ngoyurra gochila an-dana. Wurra gun-narda ngika. Wurra nipa jarra marr gu-ganyja ana-gorrburrwa. Nipa gala jal a-ni ny-yinga ny-jata ny-juwa ny-mungbiyapa, wurra nipa jal a-nirra arr-gurdiya gorlk barra gun-nerra ay-bawa rrapa arr-ngukurdanyjiya nula nipa. \p \v 10 Wurra gun-balma gu-jirra gu-bamburda nipa Bunggawa a-bengga barra rrapa burr-mari a-wengga barra. Wurra gun-gata ngayburrpa gala marn․gi gu-yinpa barra. Minypa gun-maywapa an-ngumurda an-gugaliya a-beya a-workiya, gala ana-nga marn․gi nuluwa gu-yinpa barra a-bengga. Wurra gun-gata Bunggawa Christ a-bengga barra, waykin burr-guya gu-wulja barra gu-bamba rrapa dach rrapa nguparr gu-werrpiyapa barra. Jin-gata gata jin-guyinda rrapa marnnga rrapa ran․gu burr-guta warrpam gu-bol a-wulebiya barra. Rrapa gun-guna rrawa rrapa gun-nga burr-guta gun-jaranga an-gugaliya gu-jarlapuna, gun-narda gu-rro barra warrpam.\x + \xo 3:10 \xt Metiyu 24:43; Luk 12:39; 1 Jechalónika 5:2; Borrich 16:15\x* \v 11 Ganapiya, wurra gun-guna rrawa ngardawa gu-yirda barra gun-nyagara gu-ni, wurra gun-guniya ana-goyburrpa nyiburr-yinmiya barra nyiburr-bamba nyiburr-workiya, ya? Wurra minypa Wangarr nyibu-borrwa barra nyiburr-workiya rrapa jama nyiburr-ji barra nyiburr-workiya gun-molamola, \v 12 minypa marr nyibu-ganyja nuluwa nipa rrapa jama nyiburr-jirra nula, minyja barra ana-goyburrpa yi-gurrepa nyibi-nega nipa a-benggapa barra. Gun-gata barra gugu waykin gu-rro barra warrpam, minypa jin-gata gata jin-guyinda rrapa marnnga rrapa ran․gu burr-guta gun-nyagara gu-nipa barra. \v 13 Wurra minypa nipa gochila an-dana, ngayburrpa marr ngubu-ganyja gun-gata waykin rrapa gun-guna rrawa gun-geka gu-ni barra — jechinuwa gun-guni rrawa.\x + \xo 3:13 \xt Isaiah 65:17; 66:22; Borrich 21:1\x* \p \v 14 Ganapiya, japurra ngapa nyiburr-jirra. Wurra ngardawa gun-gata nula ana-goyburrpa marr nyibu-ganyja, lika burr-guya bubu-borrwa minypa ana-goyburrpa nyiburr-yinmiya barra nyiburr-bamba nyiburr-workiya minypa barra nipa Wangarr nyirr-na ana-goyburrpa nyiburr-molamola, gala gun-nga gun-nerra nyibi-rrima rrapa gala werra nyiburr-negiyarna, wurra minypa magaya nyiburr-nirra ana-gorrburrwa gu-gapa gu-guta ana-goyburrpa rrapa nipa Wangarr. \v 15 Rrapa gun-gata minypa an-ngayburrpa Bunggawa marr gu-ganyja burrwa wurra gama gorlk birripa barra gubu-bawa gun-nerra rrapa aburr-ngukurdanyjiya nula, gun-narda ana-goyburrpa barra nyibu-borrwa minypa nipa barra wanngu burr-nega. Gun-narda gun-ngardapiya janguny minypa an-ngayburrpa worlapa arrburrwa Paul, japurra ngapa a-jirra, nipa mu-ngoyurra a-wukurrjinga ana-gorrburrwa minypa Wangarr a-gurdagurdarrana nipa. \v 16 Minypa gun-gata nula janguny nipa a-yinagata gu-ngurrjinga a-workiya, nipa mu-jurra a-wukurrjinga burrwa a-workiya gu-werranga gu-werranga gu-rrawa aburr-nirra. Wurpa lika nipa mu-jurra gu-ngurrjinga a-workiya gun-nerranga gun-gata gun-derta an-gugaliya gala marn․gi. Rrapa gun-gata gun-derta gun-guyinda janguny Wangarr gun-nika minypa Paul a-wukurrjinga rrapa minypa aburr-werranga burr-guta aburr-wukurrjinga, gun-narda aburr-werranga gubu-ngukurdanyjinga aburr-workiya, birripa gubu-ngurrjinga aburr-workiya. Ngardawa birripa minypa gala burr-guya gubu-borrwa aburr-ni gun-molamola janguny, wurra jarra aburr-jeknga aburr-workiya. Wurra Wangarr burr-bu barra birripa gubu-ngukurdanyjinga aburr-workiya gun-nigipa janguny. \p \v 17 Wurra ana-goyburrpa, japurra ngapa nyiburr-jirra, buburr-jarlapiya burrwa aburr-gata ngacha gu-galiya yerrcha. Ngardawa gun-guniya mu-ngoyurra ana-goyburrpa marn․gi burrwa minypa birripa gala gubu-borrwa aburr-ni Wangarr gun-nika jarlakarr. Ana-goyburrpa jarra wanngu nyiburr-nirra, wurra buburr-jarlapiya burrwa aburr-gata; gala yapa nyirrbu-warga gu-gata gu-guyolkiya birripa gubi-rrimanga; gala yapa nyiburr-lijiwarriyan. \v 18 Wurra mu-nguy buburr-yindapa buburr-bamba minypa Wangarr nyirr-wucha a-workiya ganyjarr rrapa minypa ana-goyburrpa marn․gi nyiburr-nirra nula nyiburr-bamburda an-ngayburrpa an-ngardapiya arrburrwa Wanngu An-gunega Jesus Christ. An-nardiya ngayburrpa barra an-nelangga an-molamola ngubi-negapa barra nguburr-workiya minypa gun-guniya rrapa mola mu-nguy guy-bampa barra guy-workiya. Gun-nardiya gugu, gun-nardiya gugu, ganapiya.