\id 1JN Burarra exported from InDesign June 2015 
\h 1 Jon 
\toc1 1 Jon Mu-ngoyurra Gu-jerrmarra Janguny (1 John) 
\toc2 1 Jon 
\toc3 1 Jon 
\mt1 1 Jon  
\mt3 Mu-ngoyurra Gu-jerrmarra Janguny  
\mt4 (1 John)  
\c 1  
\s1 An-gata Minypa Wengga Rrapa Wanngu An-gunega  
\p
\v 1 An-gata minypa mu-ngoyurra ay-ninyarrapa ay-workiya, an-gatiya minypa ngayburrpa nyiburr-gunaga nyiburr-galiyana nula rrapa nyiburr-mipila nyibu-buna minypa nyibi-nana rrapa wugupa nyiburr-rrigirrgarra nyiburr-workiyana, nipiya ngayburrpa nyibu-ngurrjinga nyiburr-workiya minypa nipa an-nardiya Wengga wanngu gun-gunega an-gurrimapa.\x + \xo 1:1 \xt Jon 1:1\x*  
\v 2 Nipiya wanngu an-gurrimapa a-bena arrburrwa, ngayburrpa nyibi-nana rrapa marn․gi nyiburr-ni nula minypa nipiya an-burral. Lika nipa ngayburrpa nyibu-ngurrjinga ana-gorrburrwa nyiburr-workiya, ngardawa nipiya wanngu an-gurrimapa Nyanyapa arrku wugupa abirri-ni abirri-workiyana rrapa barrwa a-bena arrburrwa ngayburrpa.\x + \xo 1:2 \xt Jon 1:14\x*  
\v 3 Lika nyibu-ngurrjinga ana-gorrburrwa nyiburr-workiya an-gatiya ngayburrpa nyibi-nana rrapa nyiburr-galiyana nula, gu-gurda ngacha. Barra minypa gu-ngardapiya arrburrwa ana-goyburrpa rrapa ngayburrpa, minypa Nyanyapa arrku wugupa arrburrwa rrapa an-nigipa An-walkurpa Jesus Christ nipiya burr-guta.  
\v 4 Rrapa gun-guna janguny ngayburrpa nyiburr-wukurrjinga ana-gorrburrwa barra minypa ana-goyburrpa nyibu-borrwa nyiburr-bamba rrapa ngayburrpa nyiburr-guna minypa nyiburr-marrkapcha barra nyiburr-ni burr-guya.   
\s1 Ngarripa Arr-yinmiya Barra Minypa Gu-gujayanaya Arr-ninya  
\p
\v 5 Janguny gun-gata ngayburrpa nyiburr-galiyana nula An-walkurpa a-wena arrburrwa rrapa minypa gun-guniya gugu nyibu-ngurrja barra ana-gorrburrwa, nipa janguny gun-guna: Wangarr nipa an-gujayanaya, rrapa gala gun-nga ana-munya gu-ji nula; wurra jarra nipa an-gujayanaya wupa.  
\v 6 Rrapa ngarripa minyja arr-ngurrjiya jimarna Wangarr wugupa arrkula, wurra minypa burdak an-munya wupa arr-nirra, gun-narda minypa arr-yolkiya arr-weya rrapa gun-burral janguny gala ay-borrwa arr-bamba, wurra gun-nyagara.  
\v 7 Wurra minyja gu-gujayanaya arr-nirra minypa nipa Wangarr a-jayanayarra a-nirra, lika ngarripa jal arr-nirra arrkula gu-gapa gu-guta, rrapa Jesus an-gata an-nigipa An-walkurpa mun-nigipa maningan arr-weparda mu-nirra gun-nga gun-nerra ay-rrimarra.   
\p
\v 8 Wurra ngarripa minyja arr-ngurrjiya jimarna ngarripa wupa arr-molamola gala gun-nga gun-nerra ay-rrima rraka nipa arr-wepa, gun-narda minypa ngarripa arr-yolkiya arr-nirra; gala gun-nga gun-burral ay-rrimangarna.  
\v 9 Wurra jarra gun-gata minypa ngarripa werra arr-negiyana, minyja gun-narda nula arr-ngurrjiya nula Wangarr minypa ngarripa arr-werra, nipa gala a-yinmiya a-bamapa nipa gochila an-dana; wurra jarra minypa nipa jawurrga a-jirra an-molamola nipa baywarra gu-nega barra arrkula ngarripa arr-yinmiyana werra arr-negiyana arr-workiyana, rrapa minypa arr-wepa barra gun-nga gun-nerra ay-rrimarra.  
\v 10 Wurra ngarripa minyja arr-ngurrjiya jimarna gala gun-nga werra arr-negiyarna arr-workiyarna, gun-narda minypa Wangarr ay-ngurrjinga an-guyolkiya rrapa minypa gun-nigipa janguny ngarripa gala ay-rrima nula, wurra gun-nyagara. Ngardawa Wangarr jarra a-ngurrjinga an-gugaliya an-nerra.   
\c 2  
\s1 Jesus Christ An-ngarripa An-gugunggaja  
\p
\v 1 Nyiburr-gurda nyiburr-ngaypa gu-ngarda yerrcha, japurra ngapa nyiburr-jirra, gun-narda ngu-wukurrjinga ana-gorrburrwa barra minypa gala mola gun-nga werra nyiburr-negiya. Wurra minyja nginyipa ny-yinga ny-jata werra nyi-negiyan, ngarripa jarra ay-rrimanga an-gugunggaja Nyanyapa arrku a-wengganacha arrkula a-workiya — nipiya an-gata Jesus Christ Jechinuwa Ay-nirrapa Ay-workiya.  
\v 2 Ngardawa nipiya Jesus Christ ana-nyala a-rorrchinga arrkula mari minypa ngarripa arr-guna ngardapa ngika, wurra jarra warlaman arr-gurdiya gorlk.   
\p
\v 3 Rrapa ngarripa marn․gi minypa gun-burral ngarripa gipa marn․gi arr-ni nula Wangarr minypa gun-nigipa joborr gun-guyinda ngarripa ay-borrwuja nula arr-bamburda, gu-gurda ngacha.  
\v 4 Wurra minyja ana-nga a-wengga, a-yinda, “Ngaypa marn․gi nula,” wurra jarra an-gata gala jama a-ji minypa nipa Wangarr a-wena, nipa an-gata an-gugaliya ngardawa an-guyolkiya; gala gun-nga gun-burral nipa gu-rrima.  
\v 5 Wurra an-nerranga ana-nga minypa gu-borrwuja nula a-workiya gun-nigipa wengga, ana-gata ngacha an-gugaliya warrpam gurrurta gu-rrimanga Wangarr gun-nika. Rrapa gu-gurda ngacha minypa ngarripa marn․gi gipa ngarripa arr-guna nipa an-gatiya Wangarr.  
\v 6 Ana-nga a-weya a-workiya jimarna nipa rrapa Wangarr gu-ngardapa abirri-negiyana, wurra nipa an-gata an-gugaliya a-yinda barra a-ni a-workiya minypa Christ a-ni a-workiyana.   
\s1 Gun-geka Joborr  
\p
\v 7 Japurra ngapa nyiburr-jirra, gun-guna joborr ngaypa ngu-wukurrjinga ana-gorrburrwa gun-geka ngika, wurra jarra gun-guwarr; gipa mu-ngoyurra ana-goyburrpa nyibi-rrimarra nyiburr-ni. Gun-gunaga gun-guwarr janguny gipa ana-goyburrpa marn․gi.\x + \xo 2:7 \xt Jon 13:34\x*  
\v 8 Wurpa lika ngu-wukurrjinga ana-gorrburrwa minypa joborr gun-geka jarra. Ngardawa nipa Jesus Christ arr-gurdagurdarraja a-nirra meyali, rrapa ana-goyburrpa niya yarlanga nyibi-nenga meyali. Ngardawa ana-munya gu-wulebiya gu-boya, minypa gun-burral gun-gujayanaya gipa gugu gu-jayanayarra gu-jirra.   
\p
\v 9 Wurra ana-nga a-ngurrjiya a-workiya jimarna gu-gujayanaya a-nirra, wurra minypa nipiya ana-nyala gala jal a-ni nula an-nigipa an-borrmunga an-guyinda, gun-narda minypa an-gata an-gugaliya burdak ana-munya a-nirra.  
\v 10 Wurra ana-nga minypa gurrurta gu-rrimanga nula an-nigipa an-borrmunga an-guyinda, an-gata an-gugaliya gu-gujayanaya a-ninyarra rrapa minypa gala gun-nga gun-gulijiwarriya gu-rrima.  
\v 11 Wurra an-gata minypa gala jal a-ni nula an-nigipa an-borrmunga an-guyinda, nipa an-gata an-gugaliya ana-munya a-ninyarra rrapa a-rrigirrgnga a-workiya; gala marn․gi ay-yinda ay-bamburda; ngardawa gapula a-negarra gun-gata ana-munya.   
\q1
\v 12 A-lay, gu-ngarda yerrcha, japurra ngapa nyiburr-jirra,  
\q2 ngaypa ngu-wukurrjinga ana-gorrburrwa  
\q2 ngardawa Wangarr baywarra gu-negarra ana-gorrburrwa gun-nerra nyibi-rrimarra,  
\q2 ngardawa minypa Jesus Christ a-rorrchinga ana-gorrburrwa.   
\q1
\v 13 A-lay, mu-murna yerrcha, ngaypa ngu-wukurrjinga ana-gorrburrwa  
\q2 ngardawa ana-goyburrpa gipa marn․gi nyiburr-ni nula an-gata mu-ngoyurra ay-ninyarrapa ay-workiya.  
\q1 A-lay, yawarriny yerrcha, ngaypa ngu-wukurrjinga ana-gorrburrwa  
\q2 ngardawa ana-goyburrpa gipa nyiburr-molamiyana;  
\q3 an-gata walkwalk gun-nerra an-gurrimapa, nipa an-nyagara.   
\q1
\v 14 A-lay, gu-ngarda yerrcha, japurra ngapa nyiburr-jirra,  
\q2 ngaypa ngu-wukurrjinga ana-gorrburrwa  
\q2 ngardawa Nyanyapa arrku ana-goyburrpa gipa marn․gi nyiburr-ni nula.  
\q1 A-lay, mu-murna yerrcha, ngaypa ngu-wukurrjinga ana-gorrburrwa  
\q2 ngardawa gipa marn․gi nyiburr-ni nula an-gata mu-ngoyurra ay-ninyarrapa ay-workiya.  
\q1 A-lay, yawarriny yerrcha, ngaypa ngu-wukurrjinga ana-gorrburrwa  
\q2 ngardawa ana-goyburrpa gipa derta nyiburr-negiyana,  
\q2 rrapa minypa Wangarr gun-nika janguny nyibi-rrimanga nyiburr-nirra,  
\q2 rrapa minypa nyiburr-molamiyana;  
\q3 an-gata walkwalk gun-nerra an-gurrimapa, nipa an-nyagara.   
\p
\v 15 Gala barra jal nyiburr-ni gun-guna rrawa rrapa minypa gun-nga burr-guta gu-gurdiya gu-yika gu-rrawa. Wurra an-gata ana-nga minyja gun-guna rrawa jal a-nirra, nipa ngardawa gala jal a-ni nula Wangarr.  
\v 16 Ngardawa gu-gurdiya gu-yika gu-rrawa — minypa gun-nerra an-gugaliya jal a-nirra a-workiya, rrapa minypa gun-nga burr-guta nipa gu-nacha a-workiya rrapa jal a-nirra barra gu-ma, rrapa minypa a-yinmiya a-workiya nipa wana a-negiya — gu-gurda ngacha Wangarr nyanma ngika; jarra gu-gurdiya gu-yika gu-rrawa.  
\v 17 Minyja bubu-borrwa: Gun-guna rrawa rrapa gun-nga burr-guta minypa an-gugaliya jal a-nirra a-workiya, gu-gurda ngacha gu-boy barra, rrawa burr-guta. Wurra ana-nga an-gugaliya jama a-jirra a-workiya Wangarr gun-nika jal gun-guni, nipa jarra wanngu a-nirrapa a-workiya.   
\s1 An-jaranga An-gata An-bachirra Nula Christ  
\p
\v 18 Japurra ngapa nyiburr-jirra, nyiburr-gurda nyiburr-ngaypa gu-ngarda yerrcha, gun-guniya gugu yi-gurrepa gu-jirra gu-bamburda gun-gumungba. Minypa ana-goyburrpa marn․gi an-gata an-bachirra nula Christ a-bengga barra, wurra gun-guniya gugu nipa a-beyapa a-yurra an-jaranga, ngarla, an-bachirra nula Christ. Gu-gurda ngacha minypa ngayburrpa marn․gi yi-gurrepa gu-jirra gu-bamburda nipiya Christ ana-jeka barra.  
\v 19 Aburr-gata minypa aburr-bachirra nula Christ, birripa jarra mu-ngoyurra aburr-mulpiyana arrburrwa ngayburrpa, wurra barrwa arrbu-bawuna. Ngardawa gala gu-ngardapa arrburrwa birripa rrapa ngayburrpa. Minyja jimarn jarra gu-ngardapa arrburrwa, nguburr-ninyarrarna. Wurra arrbu-bawuna. Lika yarlanga gu-yurra minypa birripa gala gu-ngardapa arrburrwa.   
\p
\v 20 Wurra ana-goyburrpa jarra nipa Christ ana-jerrmiyana ana-gorrburrwa Mern An-mawunga, lika nyiburr-gurdiya warrpam marn․gi nyiburr-ni gun-burral janguny.  
\v 21 Ngaypa ngu-wukurrjinga ana-gorrburrwa ngu-nirra, gun-narda ngika minypa jimarn jarra ana-goyburrpa gala marn․gi gun-burral janguny. Wurra minypa ana-goyburrpa marn․gi gun-gata, rrapa minypa ana-goyburrpa marn․gi gala gun-nga gu-ngardapa butula gun-guyolkiya rrapa gun-burral.   
\p
\v 22 Lika an-an․gaya an-guyolkiya, a-lay? Wurra an-gata, ngaja, ngarla, minypa a-weya a-workiya jimarna Jesus nipa ngika Christ an-gata Wangarr a-menga arrburrwa. Ana-gatiya ngacha an-gugaliya an-bachirra nula Christ. Minypa ngoyurra a-yerryerrmiyana butula gu-ngardapa nipa Nyanyapa arrku rrapa nipa an-gata An-walkurpa.  
\v 23 Ngardawa ana-nga minypa ngoyurra a-yerryerrmiya nula An-walkurpa, an-gata an-gugaliya ngardawa gala a-rrima Nyanyapa arrku. Wurra ana-nga minypa marr a-balcharra nula An-walkurpa, an-gata an-gugaliya nipa ngardawa a-rrimanga An-walkurpa rrapa Nyanyapa arrku burr-guta.   
\p
\v 24 Buburr-jarlapiya. Mu-nguy bubi-rrimapa janguny mu-ngoyurra marn․gi nyiburr-ni. Minyja ana-goyburrpa nyiburr-yirda nyibu-borrwapa nyiburr-bamba, gun-narda minypa ana-goyburrpa rrapa bitipa An-walkurpa An-jirrpungapa gu-ngardapa nyiburr-negiyapa barra nyiburr-workiya.  
\v 25 Rrapa gun-guna minypa nipa Christ gochila an-dana: Wanngu nguburr-nipa barra nguburr-workiya, ngaja, ngarla.   
\p
\v 26 Gun-gata ngu-wukurrjinga ana-gorrburrwa rrapa nguburr-ngurrjinga ana-gorrburrwa aburr-gata minypa aburr-ngunyangunyjiya aburr-workiya, jimarna nyirrbu-warga rrapa minypa ana-goyburrpa nyiburr-lijiwarriya,  
\v 27 wurra ana-goyburrpa jarra Mern An-mawunga nyibi-rrimanga nipa Christ ana-jerrmiyana ana-gorrburrwa. Nipa Mern An-mawunga wugupa ana-gorrburrwa nyiburr-ninyarrapa, rraka gala nyiburr-yinmiya an-nerranga nyiburr-wechawecha nula marn․gi an-gunega. Ngika. Wurra jarra nipa Mern An-mawunga nyirr-guybukaja gun-bulapalawa. Rrapa gun-nga gun-gata minypa nipa nyirr-guybukaja, gun-narda gun-burral; gun-guyolkiya ngika. Ganapiya, lika bubi-yagurrma nula Mern An-mawunga gun-nigipa janguny, rrapa minypa mu-nguy gu-ngardapa nyiburr-negiyapa barra nyiburr-workiya ana-goyburrpa rrapa nipa Christ.   
\p
\v 28 Ngaw, japurra ngapa nyiburr-jirra, mu-nguy gu-ngardapa nyiburr-negiyapa nyiburr-workiya ana-goyburrpa rrapa nipa Christ. Barra gun-gata waypa an-burral ana-jeka, ngayburrpa nguburr-molamola nguburr-ni barra nula, minypa gala gona nguburr-ni nula nipa ana-jekapa, wurra gun-nyagara.   
\p
\v 29 Rrapa minypa nipa an-gata ana-goyburrpa marn․gi nula Christ minypa nipa jechinuwa a-nirrapa a-workiya, gun-narda minypa ana-goyburrpa barra nyibu-borrwa nula an-gugaliya an-guyinda minypa gun-guna: Ana-nga minypa jechinuwa a-nirra a-workiya, an-gata an-gugaliya ngardawa nipa niya Wangarr an-nika minypa an-gata Christ.   
\c 3  
\s1 Wangarr Burr-yika Gu-ngarda Yerrcha  
\p
\v 1 Minyja, a-lay, bubu-borrwa nipa Nyanyapa arrku a-yinmiyana burr-guya gurrurta gu-rrimarra arrburrwa wana, minypa nguburr-yigipa arr-negarra Wangarr nguburr-yika gu-ngarda yerrcha. Rrapa ngayburrpa gun-burral nguburr-yinagatiya nguburr-nirra Wangarr nguburr-yika gu-ngarda yerrcha. Gu-gurda nula gu-guna burr-yika gu-rrawa gala marn․gi arrburrwa, ngardawa gala marn․gi aburr-nirrarna nula Wangarr.\x + \xo 3:1 \xt Jon 1:12\x*  
\v 2 Japurra ngapa nyiburr-jirra, gun-guniya gugu ngayburrpa Wangarr nguburr-yika gu-ngarda yerrcha, wurra gala yarlanga gu-yu burdak gun-gata nguburr-guyinmiya barra nguburr-ni. Jarra ngayburrpa marn․gi minypa nuwurra waypa barra Christ a-bengga, ngayburrpa nguburr-ni barra minypa nipa, ngardawa ngubi-na barra nipiya an-guyinmiya.  
\v 3 Rrapa ana-nga an-jaranga minypa gu-gurda ngacha marrnguwa a-nirra rrapa a-nyiljinga a-bamburda, nipa minypa a-jarlapiya a-workiya, barra minypa an-molamola a-ni minypa nipa Christ a-nirra an-molamola, gala gun-nga gun-nerra gu-rrima.   
\p
\v 4 Wurra ana-nga an-gata minypa werra a-negiya a-workiya, nipa an-mornanga; joborr gu-rrumurra Wangarr gun-nika. Ngardawa gun-gata gun-nerra nipa joborr gun-gurruma, ngaja, ngarla.  
\v 5 Wurra ana-goyburrpa marn․gi minypa Christ a-bena gun-nerra barra gu-yerrnyja arrburrwa, rrapa minypa nipa gala gun-nga gu-rrima gun-nerra.\x + \xo 3:5 \xt Jon 1:29\x*  
\v 6 Rrapa gun-narda minypa gala ana-nga mu-nguy werra a-negiya a-workiya minypa nipa rrapa Christ gu-ngardapa abirri-negiyana; wurra gala a-yinmiya. Wurra an-gugaliya an-gata minypa werra a-negiya a-workiya, nipa jarra gala a-nacharna rrapa gala marn․gi nula Christ; wurra gun-nyagara.   
\p
\v 7 Ana-goyburrpa nyiburr-gurda nyiburr-ngaypa gu-ngarda yerrcha, buburr-jarlapiya, japurra ngapa nyiburr-jirra. Gala yapa ana-werranga nyirr-yolkajin, nyiburr-lijiwarriyan. Wurra ana-nga minypa gun-jechinuwa jama a-jirra a-workiya, an-gata ngardawa jechinuwa a-nirra nula Wangarr gun-maywapa minypa nipa Christ jechinuwa a-nirra nula.  
\v 8 Wurra an-nerranga ana-nga minypa werra a-negiya a-workiya, nipa jarra walkwalk nyanma an-gata gun-nerra an-gurrimapa. Ngardawa an-gatiya walkwalk, nipa werra ay-negiyapa ay-nirrapa ay-workiya. Minyjiya. Gun-narda nula nipa an-gata Wangarr an-nika An-walkurpa ana-bona: Barra minypa nipiya An-walkurpa ana-nyala gu-rruma nula walkwalk gun-nika jama gun-gata minypa nipiya walkwalk jama a-jirra a-workiya gun-nerra.  
\v 9 Wurra ana-nga an-gata an-gugaliya Wangarr an-nika an-gungarda, nipa gala a-yinmiya mu-nguy werra a-negiya a-workiya. Ngika. Jarra Wangarr an-ngurrnga an-gata nipiya an-gugaliya an-gunaga. Gala a-yinmiya mu-nguy werra a-negiya a-workiya, wurra jarra Wangarr an-nika.  
\v 10 Gu-gurda ngacha minypa ngarripa marn․gi burrwa Wangarr burr-yika gu-ngarda yerrcha minypa aburr-nga aburr-gata, rrapa walkwalk burr-yika gu-ngarda yerrcha aburr-nga aburr-gata. Minypa ana-nga an-gata gala gun-jechinuwa jama a-ji a-workiya, rrapa gala gurrurta gu-rrima nula an-nigipa an-borrmunga an-guyinda, an-gata an-gugaliya nipa ngardawa gala Wangarr an-nika.   
\s1 Gurrurta Ngubi-rrima Barra Arrburrwa Gu-gapa Gu-guta  
\p
\v 11 Janguny gun-gata ana-goyburrpa mu-ngoyurra nyiburr-galiyana, nipa minypa gun-guna: Ngayburrpa barra gurrurta ngubi-rrima barra arrburrwa gu-gapa gu-guta.\x + \xo 3:11 \xt Jon 13:34\x*  
\v 12 Wurra gala barra jama nguburr-ji minypa an-gata Geyin \pn (Cain)\pn*. Nipa jawina a-ni nula walkwalk an-gata gun-nerra an-gurrimapa, lika nipa Geyin ana-nyala an-nigipa worlapa niya a-buna, an-molamola an-gata a-juwuna. Wurra nipa Geyin an-nga nula a-buna, ya? Wurra nipiya ngardawa gala jal a-nirrarna nula an-nigipa worlapa niya, gu-gurdiya ngacha. Ngardawa an-nigipa worlapa niya gun-jechinuwa jama a-ji a-workiyana, wurra nipa jarra Geyin gun-nerra jama a-ji a-workiyana.\x + \xo 3:12 \xt Genesis 4:8\x*  
\v 13 Ganapiya, lika minyja gu-guna burr-yika gu-rrawa ngoyurra aburr-yerryerrmiyan ana-gorrburrwa, gun-narda gala barra gochila nyiburr-barrja.   
\p
\v 14 Wurra jarra ngayburrpa marn․gi gipa ngubu-bawuna gun-gujuwa, lika nguburr-jurrwurra gu-gatiya wenga aa wanngu gun-guni, ngardawa minypa gurrurta ngubi-rrimanga arrburrwa gu-gapa gu-guta, gu-gurda ngacha. Wurra ana-nga an-gata gala nipa gurrurta gu-rrima, an-narda ngardawa gu-gujuwa wupa a-ninyarra.\x + \xo 3:14 \xt Jon 5:24\x*  
\v 15 Minypa ana-nga an-gata ngoyurra a-yerryerrmiya nula an-nigipa an-borrmunga, nipa an-gata an-gubu ngacha, ngardawa ngoyurra a-yerryerrmiya nula an-nigipa an-borrmunga. Rrapa ana-goyburrpa marn․gi an-gubu an-guyinda gala wanngu gun-guni gu-rrima.   
\p
\v 16 Rrapa gun-guna wupa ngayburrpa marn․gi gurrurta gun-gurrima gun-gata gun-ngiya minypa: Minypa Christ nipa wupa an-murna a-barrbiyana, a-juwuna arrburrwa ngayburrpa nguburr-marr, gu-gurda ngacha. Rrapa ngayburrpa rrapa nguburr-yinarda barra — nawanawa nguburr-ni barra aburr-ngayburrpa worlapa arrburrwa yerrcha birripa burrwa nguburr-juwa.  
\v 17 Wurra ana-nga an-gata minypa gorlk mu-rrimanga, minyja nipa a-na an-nigipa an-borrmunga an-nyagara, wurra wurpa gala a-gunggaja nula, an-gata an-gugaliya gala a-yinmiya a-ngurrjiya jimarna nipa jal a-ni nula Wangarr. Wurra gun-nyagara.  
\v 18 Japurra ngapa nyiburr-jirra, nyiburr-gurda nyiburr-ngaypa gu-ngarda yerrcha, ngayburrpa gala nguburr-yinmiya minypa ngana nguburr-jirra wupa nguburr-wengga jimarna gurrurta ngubi-rrimanga arrburrwa gu-gapa gu-guta. Ngika. Wurra gun-burral gurrurta ngubi-rrima barra arrburrwa jarra, minypa nguburr-gunggachichiya barra nguburr-workiya.   
\s1 Nguburr-yinmiya Barra Nguburr-molamola Nguburr-ni Barra Nula Wangarr  
\p
\v 19 Minyja nguburr-yirda nguburr-gunggachichiya nguburr-workiya rrapa gun-burral gurrurta ngubi-rrima arrburrwa gu-gapa gu-guta, gu-gurda ngacha minypa ngayburrpa marn․gi arrburrwa minypa ngayburrpa ngubi-rrimanga gun-burral janguny, rrapa minypa nguburr-molamola nguburr-nirra nula Wangarr nipa arr-nacha a-nirra,  
\v 20 wuriya minypa wuparnana nguburr-galiyarra arrburrwa minypa nguburr-werra. Ngardawa Wangarr nipa wana; gun-gata wuparnana nguburr-galiyarra arrburrwa gun-narda gun-delipa. Wurra Wangarr nipa jarra marn․gi gun-bulapalawa.   
\p
\v 21 Japurra ngapa nyiburr-jirra. Minyja gala gun-nga wuparnana nguburr-galiya arrburrwa nguburr-werra, gun-narda minypa nguburr-molamola nguburr-nirra nula Wangarr,  
\v 22 rrapa gun-nga minypa nguburr-ngiwijarra nula, gun-narda ngubu-mangga nguburr-workiya nipa arr-wucha. Ngardawa gun-nigipa joborr gun-guyinda ngayburrpa ngubu-borrwuja nula nguburr-bamburda, rrapa gun-nga minypa nipa jal a-nirra ngayburrpa jama nguburr-jirra nguburr-workiya, gu-gurda ngacha.  
\v 23 Rrapa nipa Wangarr gun-nika joborr minypa gun-guna: An-nigipa Walkur Jesus Christ ngayburrpa marr nguburr-balcha barra nula nipa an-nelangga, rrapa gurrurta ngubi-rrima barra arrburrwa nguburr-ni gu-gapa gu-guta minypa nipa an-gata An-walkurpa a-wena.\x + \xo 3:23 \xt Jon 13:34; 15:12,17\x*  
\v 24 Gu-gurda ngacha joborr Wangarr gun-nika. Rrapa nguburr-nga nguburr-gata minypa gun-nigipa joborr ngubu-borrwuja nula nguburr-bamburda, gun-narda minypa ngayburrpa nguburr-guna nipa an-gata Wangarr, rrapa nipa an-gatiya Wangarr ngayburrpa nguburr-guna. Rrapa gun-guna minypa ngayburrpa marn․gi nipa an-gata Wangarr ngayburrpa nguburr-guna, ngardawa nipa An-mawunga ngubi-rrimanga nipa arr-wuna.   
\c 4  
\s1 An-mawunga An-guyinda An-burral Rrapa An-guyolkiya  
\p
\v 1 Japurra ngapa nyiburr-jirra, buburr-jarlapiya. Aburr-werranga aburr-gata aburr-ngurrjiya jimarna Wangarr An-mawunga abi-rrimanga, wurra ana-goyburrpa gala barra nyiburr-yurtchapa marr nyiburr-balcha burrwa. Ngika. Wurra burdak nyiburr-ngunyangunyjiya barra burrwa minyja an-gata abi-rrimanga nipa Wangarr nyanma, waygaji gun-nyagara. Ngardawa gun-nardiya rrawa gu-jirra gu-boya an-jaranga a-boya a-workiya an-guyolkiya an-guyinda an-mujaruk.  
\v 2 Wurra ana-goyburrpa nyibi-na barra nula an-gata minyja Wangarr An-mawunga a-rrimanga o an-nyagara. Ngardawa ana-nga minypa a-ngurrjinga Jesus Christ, minypa nipa ana-bupiyana, an-gugaliya a-ni an-ngayburrpa Wanngu An-gunega, an-gata an-gugaliya ngardawa a-rrimanga Mern An-mawunga Wangarr nyanma.  
\v 3 Wurra ana-nga an-gata gala a-yirda marr a-balcha nula Jesus, an-gata an-gugaliya gala Wangarr nyanma An-mawunga a-rrima, wurra ngika. Wurra jarra a-rrimanga an-mawunga an-gata an-bachirra nula Christ, an-mawunga an-gata ana-goyburrpa gipa nyiburr-galiyana rrapa marn․gi nyiburr-ni minypa nipa ana-boy barra ay-ngunyuna; jarra gipa gugu a-benapa a-ninyarra.   
\p
\v 4 Wurra, japurra ngapa nyiburr-jirra, nyiburr-gurda nyiburr-ngaypa gu-ngarda yerrcha ana-goyburrpa Wangarr nyiburr-yika. Rrapa aburr-gata aburr-guyolkiya aburr-guyinda aburr-mujaruk ana-goyburrpa nyiburr-molamiyana, birripa aburr-nyagara. Ngardawa An-mawunga ana-goyburrpa nyibi-rrimanga nipa wana an-babalapa, wurra gu-gurda burr-yika gu-rrawa abi-rrimanga nipa jarra marr a-yinaga.   
\p
\v 5 Aburr-gata aburr-guyolkiya aburr-guyinda aburr-mujaruk, birripa gu-gurdiya burr-yika gu-rrawa, rrapa janguny birripa aburr-weya aburr-workiya gu-gurdiya gu-yika gu-rrawa. Gu-gurda ngacha minypa wurra gama gorlk jiny-jaliyarra a-galiyarra burrwa a-workiya jiny-yorkiya, ngardawa birripa niya gu-gurdiya burr-yika gu-rrawa.  
\v 6 Wurra ngayburrpa jarra nyiburr-guna Wangarr nyiburr-yika nyiburr-mujaruk, rrapa ana-nga minypa marn․gi a-ni nula Wangarr, an-gata an-gugaliya a-galiyarra arrburrwa a-workiya ngayburrpa. Wurra an-nerranga ana-nga nipa Wangarr nyanma ngika, an-gata an-gugaliya gala a-galiya arrburrwa a-workiya, wurra gun-nyagara. Rrapa gu-gurda ngacha wupa lika ngayburrpa marn․gi nguburr-ni barra burrwa ana-nga an-mawunga abi-rrimanga, minyja gun-burral an-gurrimapa wurra waygaji an-guyolkiya.   
\s1 Wangarr Nipa Gurrurta An-gurrimapa  
\p
\v 7 Japurra ngapa nyiburr-jirra. Ngayburrpa barra gurrurta ngubi-rrima barra arrburrwa gu-gapa gu-guta. Ngardawa gurrurta gun-gurrima nipa gun-gata Wangarr nyanma, rrapa aburr-nga aburr-gata minypa gurrurta gubi-rrimanga burrwa gu-gapa gu-guta, birripa ngardawa Wangarr nyanma rrapa minypa marn․gi aburr-nirra nula aburr-bamburda nipa Wangarr.  
\v 8 Wurra ana-nga an-gata gala gurrurta gu-rrima, nipa ngardawa gala marn․gi a-nirrarna nula Wangarr. Ngardawa Wangarr nipiya gurrurta an-gurrimapa.  
\v 9 Rrapa Wangarr arr-gurdagurdarrana nipa gurrurta gu-rrimanga arrburrwa minypa gun-gunaga: Minypa an-nigipa Walkur an-ngardapiya gurdiya rrawa ana-jerrmarra arrburrwa ngayburrpa barra wanngu nguburr-ni nipiya An-walkurpa nyanma.  
\v 10 Gu-gurdiya ngacha gurrurta gun-gurrima. Ngika minypa gun-gata ngayburrpa jal nguburr-ni nula Wangarr, wurra jarra minypa nipa jal a-ni arrburrwa ngayburrpa rrapa an-nigipa Walkur ana-jerrmarra arrburrwa, barra minypa a-juwa arrburrwa rrapa minypa mari a-rorrcha barra arrburrwa, gu-gurda ngacha.   
\p
\v 11 Japurra ngapa nyiburr-jirra. Gun-narda minypa Wangarr gurrurta gu-rrimarra arrburrwa burr-guya. Lika ngayburrpa barra gurrurta ngubi-rrima barra arrburrwa gu-gapa gu-guta.  
\v 12 Gala ana-nga a-nacharna a-workiyarna Wangarr, wurra minyja ngayburrpa gurrurta ngubi-rrimanga arrburrwa gu-gapa gu-guta, gun-narda minypa nipa an-gata Wangarr ngayburrpa nguburr-guna, rrapa gurrurta gun-gata minypa nipa gu-rrimanga arrburrwa ngayburrpa ngubi-rrimanga warrpam.\x + \xo 4:12 \xt Jon 1:18\x*   
\p
\v 13 Rrapa ngayburrpa marn․gi nipa an-gata Wangarr ngayburrpa nguburr-guna rrapa ngayburrpa nguburr-guna nipa an-gata Wangarr, ngardawa nipiya arr-wuna nipa An-mawunga, gu-gurda ngacha.  
\v 14 Rrapa minypa ngayburrpa nyiburr-guna nyiburr-mipila nyibu-buna, ngayburrpa lika nyibu-ngurrjinga nyiburr-workiya gun-gata minypa Wangarr ana-jerrmarra an-nigipa Walkur nipa An-walkurpa ana-nyala barra wanngu arr-nega arr-gurdiya gorlk.  
\v 15 Rrapa ana-nga minypa a-weya Jesus nipa Wangarr an-nika An-walkurpa, nipa an-gata an-gugaliya ngardawa Wangarr an-nika nipa rrapa Wangarr gipa gu-ngardapa abirri-negiyana.  
\v 16 Gun-narda minypa ngayburrpa nguburr-jaranga marn․gi rrapa marr nguburr-balcharra nula Wangarr minypa nipa gurrurta gu-rrimanga arrburrwa.  
\p Wangarr nipa gurrurta an-gurrimapa. Rrapa ana-nga an-gugaliya gurrurta gu-rrimangapa a-nirra a-workiya, an-gata an-gugaliya nipa Wangarr, rrapa Wangarr nipa an-gata an-gugaliya.  
\v 17 Ngayburrpa gurrurta warrpam ngubi-rrimangapa arrburrwa gu-gapa gu-guta nipa Wangarr nyanma, barra minypa nuwurra waypa burr-mari a-wengga, ngayburrpa jarra nguburr-molamola nguburr-ni barra nula ngardawa gun-guna rrawa mu-ngoyurra nguburr-ni nguburr-molamola minypa nipa Christ.  
\v 18 Ngardawa ana-nga minypa gurrurta gu-rrimanga, an-gata an-gugaliya gun-gugurkuja an-nyagara. Wurra gurrurta gun-molamola warrpam, gun-narda jarra gona gu-yerrnyjinga nula. Ngardawa gun-gugurkuja, nipa mari nula, rrapa ana-nga minypa a-gurkujarra, an-gata an-gugaliya ngardawa gala gurrurta gun-molamola warrpam gu-rrima.   
\p
\v 19 Ngayburrpa gurrurta ngubi-rrimanga ngardawa minypa ni-gugu Wangarr gurrurta gu-rrimarra arrburrwa ngayburrpa.  
\v 20 Wurra minyja ana-nga a-wengga jimarna nipa jal a-nirra nula Wangarr, wurra wurpa an-nigipa an-borrmunga an-guyinda ngoyurra a-yerryerrmiya nula, gun-narda minypa an-gata an-gugaliya a-yolkiya a-weya, ngarla. Ngardawa minypa an-nigipa an-borrmunga an-guyinda an-gata minypa abirri-nachichiya abirri-workiya nipa ana-guna gala jal a-ni nula, gun-narda minypa gala a-yinmiya jal a-ni nula Wangarr an-gata gala a-nacharna a-workiyarna nipa ana-gugaliya ana-nyala.  
\v 21 Wurra joborr Christ arr-wuna gun-gunaga: Ana-nga minypa jal a-nirra nula Wangarr, nipa an-gata an-gugaliya barra jal a-ni nula an-nigipa an-borrmunga burr-guta.   
\c 5  
\s1 Ngayburrpa Nguburr-molamiyana Wurra Gu-gurdiya Gu-yika Gu-rrawa Ngika  
\p
\v 1 Aburr-nga aburr-gata minypa marr aburr-balcharra nula Jesus ngardawa nipiya Christ an-gatiya Wangarr a-menga arrburrwa Wanngu An-gunega, aburr-gata ngacha minypa Wangarr burr-yika gu-ngarda yerrcha, rrapa ngayburrpa barra gurrurta ngubi-rrima barra burrwa aburr-gata. Ngardawa ana-nga minypa gurrurta gu-rrimanga nula an-jirrpungapa an-guyinda, an-nigipa delipa rrapa gurrurta gu-rrimanga nula a-workiya.  
\v 2 Rrapa ngayburrpa marn․gi ngayburrpa gurrurta ngubi-rrimanga burrwa Wangarr burr-yika gu-ngarda yerrcha minypa gun-gunaga: Minypa jal nguburr-nirra nula nipa Wangarr rrapa gun-nigipa joborr gun-guyinda ngubu-borrwuja nula nguburr-bamburda.  
\v 3 Rrapa ngayburrpa jal nguburr-nirra nula Wangarr minypa gun-gunaga: Minypa gun-nigipa joborr gun-guyinda ngubu-borrwuja nula nguburr-bamburda. Rrapa gun-nigipa joborr gun-guyinda gun-narda gun-derta gun-gorla arrburrwa ngika.\x + \xo 5:3 \xt Jon 14:15\x*  
\v 4 Wurra jarra nguburr-nga nguburr-gata ngayburrpa minypa Wangarr nguburr-yika gu-ngarda yerrcha, ngayburrpa gipa nguburr-molamiyana; gu-gurdiya gu-yika gu-rrawa gala mola gu-yinmiya wana gu-negiya arrburrwa, wurra gun-nyagara. Minyjiya. Ngayburrpa nguburr-molamiyana minypa gun-gunaga: Minypa marr nguburr-balcha nula Jesus, gu-gurda ngacha.  
\v 5 Ya? Minypa gu-gurdiya gu-yika gu-rrawa a-rrimanga gu-nirra, ana-nga an-gugaliya a-molamiya a-workiya? Wurra gala ana-nga rrapa a-yinmiya, wurra minyja marr a-balcha nula Jesus ngardawa nipiya Wangarr an-nika An-walkurpa, gu-gurdiya ngacha.   
\s1 Wangarr An-mawunga Rrapa Bugula Rrapa Maningan  
\p
\v 6 Jesus Christ, nipa an-nardiya a-bena arrburrwa minypa burr-bugula burr-maningan. Burr-bugula minypa a-yinagatiya ana-werranga bama a-gurragaja, rrapa burr-maningan minypa a-yinmiyana nipa a-juwuna. A-yinagata a-bena arrburrwa: Burr-bugula ngardapa ngika, wurra burr-maningan burr-guta. Rrapa Wangarr An-mawunga nipiya a-ngurrjinga arrburrwa a-workiya Jesus Christ, ngardawa minypa Wangarr An-mawunga nipiya gun-burral an-gurrimapa.  
\v 7 Minypa aburr-gurdiya abirri-jirrapa rrapa an-ngardapa abu-ngurrjinga Jesus Christ:  
\v 8 Minypa Wangarr An-mawunga rrapa bugula rrapa maningan. Minypa gun-gata gun-ganawa burrwa janguny birripa abirri-jirrapa aburr-ngardapa abu-ngurrjinga.  
\v 9 Minyja bubu-borrwa: Ngayburrpa gu-galiya yerrcha marr nguburr-balcharra arrburrwa nguburr-workiya janguny, wurra gun-gata minypa Wangarr a-wena janguny, gun-narda jarra wana gu-jirra. Ngardawa nipiya Wangarr a-wena rrapa a-ngurrjinga an-nigipa An-walkurpa.  
\v 10 Rrapa ana-nga minypa marr a-balcharra nula Jesus ngardawa nipiya Wangarr an-nika Walkur, gun-narda janguny nipa an-gata an-gugaliya a-galiyarra a-workiya wuparnana. Wurra an-nerranga ana-nga gala marr a-balcha nula Wangarr, an-gata an-gugaliya nipiya ana-nyala minypa an-guyolkiya a-nenga Wangarr, ngardawa gala marr a-balcha nula nipa a-ngurrjinga an-nigipa An-walkurpa.  
\v 11 Minypa janguny gun-gunaga: Wangarr arr-wuna wanngu gun-guni, rrapa gun-narda wanngu gun-guni ngardawa nipa nyanma An-walkurpa.\x + \xo 5:11 \xt Jon 3:36\x*  
\v 12 Ana-nga an-gugaliya a-rrimanga Wangarr an-nika An-walkurpa, an-gata an-gugaliya gu-rrimanga a-nirra wanngu gun-guni. Wurra an-nerranga ana-nga gala a-rrima Wangarr an-nika An-walkurpa, an-gata an-nyagara; gala wanngu gun-guni gu-rrima.   
\s1 Wanngu Gun-guni  
\p
\v 13 Gun-narda janguny mu-guna mu-jurra ngaypa ngu-wukurrjinga ana-gorrburrwa barra ana-goyburrpa marn․gi nyiburr-ni gun-gata nula minypa ana-goyburrpa nyibi-rrimanga wanngu gun-guni — nyiburr-ganarda minypa marr nyiburr-balcharra nula Wangarr an-nika An-walkurpa.  
\v 14 Rrapa minypa ngayburrpa wolawola Wangarr yi-gurrepa nguburr-negiya nula nguburr-workiya, ngayburrpa marn․gi minypa gun-gunaga: Gun-nga gun-gata ngubu-wengganacha nguburr-workiya gun-nigipa jal gun-guni, nipa Wangarr a-galiyarra arrburrwa a-workiya.  
\v 15 Rrapa minypa ngayburrpa marn․gi nipa a-galiyarra arrburrwa gun-nga minypa ngubu-wengganacha nguburr-workiya, ngayburrpa marn․gi minypa ngubu-wengganachapa lika ngubi-rrimanga.   
\p
\v 16 Minyja ny-yinga ny-jata nyi-na an-borrmunga werra a-negiya a-workiya ngoyurra gun-mirdi gun-gujuwa ngika, wurra Wangarr ny-yenggana barra nula, lika nipa a-wu barra wanngu gun-guni. Gun-narda ngu-wena an-gata nula minypa werra a-negiya a-workiya ngoyurra gun-mirdi gun-gujuwa ngika. Wurra gun-nerranga gun-nerra nipa jarra gun-gujuwa; gun-gata nula gala ngu-weyarna jimarna Wangarr ny-yenggana.  
\v 17 Minyja gun-nga burr-guta minypa werra nguburr-negiya nguburr-workiya, gu-gurda ngacha gun-nerra, wurpa lika gun-nerranga gun-gata ngoyurra gun-mirdi gun-gujuwa ngika.   
\p
\v 18 Ngayburrpa marn․gi minypa gala ana-nga Wangarr an-nika an-gungarda mu-nguy werra a-negiyapa a-workiya. Ngika. Wurra Wangarr an-nika An-walkurpa nipa jarra a-jarlapurda a-ganyja an-gata an-gugaliya, rraka walkwalk an-gata gun-nerra an-gurrimapa gala a-yinmiya a-rrima, wurra gun-nyagara.  
\v 19 Ngayburrpa marn․gi minypa ngayburrpa Wangarr nguburr-yika gu-ngarda yerrcha, rrapa minypa gun-nardiya rrawa nipa walkwalk gu-rrimanga a-nirra, an-gata gun-nerra an-gurrimapa.  
\v 20 Rrapa ngayburrpa marn․gi nula Wangarr an-nika An-walkurpa, minypa nipa ana-bona rrapa arr-wuna marn․gi gun-guni, barra minypa an-gata an-burral Wangarr ngayburrpa marn․gi nguburr-ni nula. Lika ngayburrpa nguburr-guna nipa an-gata an-burral Wangarr, minypa ngayburrpa nguburr-guna nipa an-gata an-nigipa Walkur Jesus Christ — an-nardiya an-burral Wangarr, rrapa gun-nardiya minypa wanngu gun-guni.   
\p
\v 21 Japurra ngapa nyiburr-jirra. Nyiburr-gurdiya nyiburr-ngaypa gu-ngarda yerrcha, buburr-jarlapiya nula an-guripa an-guyinda wangarr.