\id 2TI - Baeguu 
\h 2 Timotii 
\toc3 2 Timotii 
\toc1 Na Ruana Kekeda Laa Sa Bol Fua Sa Timotii 
\toc2 2 Timotii 
\mt1 Na Ruana Kekeda Laa Sa Bol Fua Sa Timotii  
\ip Sa Bol nia too laona lookafo 'i Rom 'ana si kada nia kedaa buka nee. Si baea 'oro ne sa Bol nia saea ki fua sa Timotii 'i laona buka nee, nia saea uri ka 'adomi nia uri nia ka uu ngasi 'ana faarongo talo lae 'ana Faarongoa Diana nee. Nia dooria sa Timotii ka toolangainia na toolangaidooa ne 'o'olo sulia malutana Alangaia Falu nee. Nia ka saea fua sa Timotii ka ilia 'ana raoa naisata 'ani nia, sui boroi 'ana tai toaa daka dooria suusi lana faasia. Nia ka dooria lau guu fua sa Timotii ka manata sulia mauri lana nia sa Bol, uri nia ka ilia lau guu doo diana nai ki 'e suai 'ana mauri lana ma 'ana toolangaidoo laa diana ne sa Bol 'e ilia.  
\iot Na 'inifuui baea ki laona buka nee:  
\io1 Si baea diane ki fua sa Timotii 1:1-18  
\io1 Na 'afitaia ne sa Timotii naofia 2:1-13  
\io1 Na waa ni rao ne God ala faafia 2:14-26  
\io1 Fa sato 'i nao ki sui sa Disas ka dao 3:1-9  
\io1 Kwaifamantaia 'isi sa Bol ki fua sa Timotii 3:10—4:22  
\ib  
\c 1  
\p
\v 1 Nau sa Bol na 'aboosol nia sa Disas Kraes, ne God nia fili nau sulia doori lana 'i tala'ana uri faarongo talo lae sulia mauria firi ne nia alangainia mai uri kolu ka too ai 'i nunufana sa Disas Kraes.  
\v 2 Nau ne ku kekeda kau fuamu nai Timotii, 'oe na wela liosaua nau 'i bali 'ana manata mamana laa nee.  
\p Na ade dianaa, na kwai'ofeia ma na aroaroa nia maa kia God fai Aofia kia sa Disas Kraes ka too 'ana fai 'oe.   
\s1 Na tango lae ma na kwaiarei lae  
\p
\v 3 Nau ku tangoa God ne ku rao fuana 'ana si manata lae wane folaa mala 'ana kokoo nau ki mai. Nau ku tango nia 'ana si kada ku manata tomu lao foa laa nau ki lelea firi 'ana sato ma rodo.  
\v 4 Nau ku dooria 'asia naa uri kwai suamu lau, suli ku manata toi na angi laa bae 'oe ilia fuaku 'ana si kada bae koro toli ma koro ka faasi koro kwailiu naa bae. Ku manata toi ne tara koro kai kwaitodai lau, 'i seeri na manata laku ka ele 'asia naa sulia.  
\v 5 Nau ku manata toi lau guu na manata mamana laa ne 'oe ilia 'e mamana. Tii kwaini manata mamana laa bae koko 'oe ni Lois nia too lau gu ai ne 'oe too lau gu ai nai. Gaa 'oe ni Iunisi ne saari ni Lois, nia boroi 'e too lau guu 'ana tii kwai manata mamana laa nai gwana.  
\v 6 Nia ne nau ku saea lau kau fuamu, 'o taea lau falea bae God faa fuamu 'ana si kada bae ku fale 'aba faafi 'oe ma ka nii na 'ani 'oe.  
\v 7 'O ade 'uri nai, suli Anoedoo Abu ne God nia falea mai nia nao si falea lau mau lae ma noni susuala lae fuakolu. Nia na Anoedoo Abu fua fale lana rigitae ma liosaue lau 'ana fuakolu ma uri sua diana lae sulia abulo lakolu ki.  
\v 8 Nia ne, 'oe nao 'osi noni susuala lau 'ana bae folaa lae sulia Aofia kolu, ma 'osi noni susuala lau suli ne nau ku too laona lookafo 'urii maana ku rao fua sa Disas Kraes. Manatamu ele gwana uri liu lae lao 'afitaie ki laona tetedea God fuamu uri faatalongai lana si Faarongoa Diana nee fai nau.  
\v 9 God 'e faamauri kolu sui naa ma ka fili kolu sui naa uri kolu ka too tii bali fuana 'i tala'ana. Nia nao si faamauri kolu lau uri maana raoa neki kolu ilia ki. Nia faamauri kolu ma ka fili kolu lau 'ana sulia doori lana 'ua guu fai na ade dianaa nia. 'Ana sasafali laa 'ua mai, God nia dooria totoo kai faatainia ade dianaa nia fuakolu 'ana si kada nia falea mai Kraes Disas.  
\v 10 Ma sui 'i tari'ina, God nia ka faatainia naa ade dianaa nia nai fuakolu 'ana dao lana mai na Waa Kwai faamauri kolu sa Disas Kraes. Sa Disas nia faafunuia naa tetede lana maea, ma ka falea naa mauria ne adea wane totoo si mae lau. Ma sa Disas ka faatainia mauria nai 'i laona Faarongoa Diana nee.  
\v 11 God nia fili nau uri faarongo talo lae 'ana si faarongoa diana nai, ma uri rao 'aboosol lae ma toolangaidoo lae sulia.  
\v 12 Si doo nai gu ne adea ma nau ku nonifii 'ana too lae laona lookafo 'i tari'ina. Ma sui boroi 'ana ka 'uri nai, nau nao kwasi noni susuala guu 'ana too lae laona lookafo faafia faatalongai lae sulia sa Disas. Nia 'uri nai, suli nau ku saitoma diana ai, sa Disas waa ne ku manata mamana 'ani nia nee, 'e bobola na fainia uri ka sua diana sulia na toolangaidooa ne nia alua 'i 'abaku, ma ku saitomana lau guu ne tara nia kai suasuli diana gwana ai lelea ka dao gu 'afa sato ne nia kai oli mai.  
\v 13 'O toolangaidoo fasi fua toae ki sulia na toolangaidooa 'o'olo nai 'oe 'o rongoa kau siaku nai. Ma 'oko ilia 'i lao manata mamana lae 'ana God fai na liosaua ne kolu too ai suli kolu tiidooa fainia Kraes Disas.  
\v 14 Ma suli ne rigitaa nia Anoedoo Abu 'e nii na 'ani kolu, nia 'uri nai, 'o sua diana sulia na toolangaidooa mamana nai God nia alua naa 'i 'abamu.   
\p
\v 15 'Oe 'o saitomana gwamu bae toaa 'oro 'asia naa lao bali lolofaa 'i 'Eisia da abulo 'e'ete naa faasi nau, ma ta roo waa 'ani kera ne sa Figelus ma sa Hemogenes.  
\v 16 Na Aofia ka 'ofea 'ana sa 'Onesiforas fai 'aebara nia, suli nia 'e adea manata laku ka ele 'ana si kada 'oro ki ma ka nao si noni susuala 'ani nau sui boroi 'ana ku nii laona lookafo.  
\v 17 Suli si kada nia lea mai ka dao 'i Rom, nia ka nani talingai 'i buriku lelea ka dao toku.  
\v 18 Na Aofia ka manatai nia 'ana lelea ka dao 'afa Sato bae nia kai oli mai. 'Oe 'o saitomana gwamu na kwai'adomia 'oro bae nia ilia fuaku lao maefera 'i 'Efesas.   
\c 2  
\s1 Na 'afitaia ne sa Timotii naofia  
\p
\v 1 'O 'alakwa nau 'ae, alu God nia faatetede 'oe nunufana ade dianaa God ne 'oe dao toi lao manata mamana laa 'oe 'ana sa Disas Kraes.  
\v 2 Aia, ma na doo neki 'o rongo nau ku bae sulia fua toaa 'oro neki nee, 'o ngalida 'oko aluda 'i 'abana toa ne 'oe saitoma diana ki 'ani kera, ne kera dai toolangainia fua tai toaa ki lau guu.   
\p
\v 3 'O 'ado kwaimani 'ana nonifiie, suli ni 'oe na waa diana ni firu lae laona omee nia Kraes Disas.  
\v 4 Na waa ni firu lae ne nia dooria kai rao diana 'ana uri ka adea manata lana waa ne gwaungai fuana uri ka ele nee, nia 'afitai ka 'abarua lau 'ana si raoa 'i sara ki mai.  
\v 5 Na waa ne nia dooria kai ngalia 'ana ta kwaiaraa uri gwauna lalaea nia, nia 'afitai ka lae 'e'ete gwana faasia birangana lalaea nai nia nii laona.  
\v 6 Ma na waa ni rao lae 'ana ole, ne nia rao noni maabe, nia ne bobola fainia daka tolingi nia fasi 'i nao 'ana fuana aludooe.   
\p
\v 7 'O manata fasi sulia si doo nai ku saea nai, suli na Aofia nia kai faaliotoo 'oe uri 'oko saitomana doo nai ki.   
\p
\v 8 'O manata 'amua sulia sa Disas Kraes, nia waa 'ana kwalafaa sa Defet, ne God tatae nia faasia maea 'uri bae nau ku faatalongainia laona Faarongoa Diana nee.  
\v 9 Na faarongoa diana nai gu ne nau ku nonifii ma kera daka karo nau na faafia 'i tari'ina mala 'ana bae ta waa 'oia taki. Sui boroi 'ana, na bae lana God nia 'afitai uri kera daka karo faafia.  
\v 10 Nia ne adea nau ku noni maabe gwaku uri nonifii lae, uri ka diana fua toaa ne God fili kera ki lau guu uri ngali lana maurie nunufana Kraes Disas, ma uri too lae laona 'initoaa 'i salo.  
\v 11 Si baea mamane bae nia 'urii,  
\q1 “Lea kolu mae sui naa fai Kraes Disas, tara kolu kai mauri lau gu fainia.   
\q1
\v 12 Lea kolu noni maabe 'ana nonifii lae fainia, tara kolu kai 'inito lau gu fainia.  
\q1 Ma lea kolu tofe nia, tara nia kai tofe kolu lau guu.   
\q1
\v 13 Sui boroi 'ana lea kolu si mamana fua ili lae sulia doori lana, tara nia ka ilia gwana si doo nia saea kai ilia fuakolu, suli nia 'afitai ka lio ekwatainia bae lana 'i tala'ana.”   
\s1 Na waa rao ne God ala faafia  
\p
\v 14 'O faarongo kera 'ana doo nai ki ka lelea firi. Ma 'oko bae fifii 'ani kera 'i naofana God uri nao kera dasi olisusuu gwada faafia 'atona baee ki. Na ili lae 'uri nai 'e nao si falea guu ta diana laa, ma ka tauwelaa gwana toaa ne kera da noni maabe uri fafurongo lana doo ki.  
\v 15 'Oe wane ni rao lae, 'oko susuu ta'aa uri 'oko abulo 'ana abuloa ne God nia ala faafi 'oe fainia ma ka nao nonimu si susuala fainia 'i naofana. 'Oko toolangai 'o'olo 'ana toolangaidooa 'o'olo nee fuana toae ki.  
\v 16 'Oko too tau 'amua faasia 'atona baea ne nao si diana, suli nia talai 'e'ete 'ana toae ki faasia God.  
\v 17 Na kwaini baea uri nai tara nia fali ka lea sui gwana fuana toae ki gwana mala 'ana ta saru baita ne sarufia wane ma ka 'idu ka lea guu. Ta roo waa 'ana toa ne da liu fai kwaini baea uri nai ne sa Haemenas ma sa Filitas.  
\v 18 Keerua daru toolangaidoo ka lea 'e'ete naa faasia toolangaidooa 'o'olo bae. Keerua daru tauwelaa sui naa manata mamana laa kera bali 'ana toae, suli keerua daru saea na tatae laa bae faasia maea fua toae ki sui guu nia fuli sui naa.  
\v 19 Aia nia ka 'uri nai boroi 'ana, na toaa nia ki God kera daka uu ngado gwada mala 'ana bae ta fau lalifuu. Si kekeda laa 'i fafona fau nai nia bae 'urii, “Aofia nia lio saitomana gwana toaa nia,” ma ka bae lau gu 'urii, “Wane ne nia bae faatai sulia saea nia lea burina Aofia, nia ka abulo 'e'ete 'ana faasia garoe.”   
\p
\v 20 Na luma baite, nao lau otona gwana doo ni raodoo neki da saungainia ki 'ana gool, ma 'ana silfa uri ka too 'ua guu maasia fa dani baite ki ne da nii laona. Tai doo ne da saungainia ki gwada 'ana 'ai ma 'ana saegano, uri daka 'arutoi 'ana fa dani ki sui gwana, kera boroi da nii lau guu 'i laona luma nai.  
\v 21 Waa ne nia faafaalu nia 'i tala'ana faasia doo garo ki, nia 'e mala 'ana doo ni fanga laa nai 'e tio maasia fa dani baite. Waa nai nia faa abu nia 'i tala'ana ma ka kwaimaasi gwana maasia ili lana raoa diane ki fua waa gwaungai nia.   
\p
\v 22 'O too tau 'amua faasia na kwaidooria ta'aa kera waa dafi baita ki. Ma 'oko nani burina tooa ne 'o'olo, na fiitoo lana sa Disas, na liosau lae ma na too laa ne aroaro fai toae ki. 'Oko ili kwaimani 'ana doo nai ki fainia toaa da foosia ki Aofia fai si lioewane ne sakwadoloa fasi ta'aa lae.  
\v 23 Ma 'oko too tau 'amua faasia na olisusuu oewanea lae ki, suli 'o saitomana ne doo nai ki tara da safalia firue.   
\p
\v 24 Ma na wane ne nia rao fuana Aofia, nao nia si firufiru lau. Nia ka ade diana fua toae ki sui guu, ma ka saitomana ka toolangaidoo laona marabibi lae.  
\v 25 Nia ka marabibi fua toaa da tatae rakesasu ki uri nia 'ana si kada 'e faatainia garo laa kera ki. Nia ka manata ngado 'ana God uri ka bulasia manata lada ki uri daka oli mai uri saitomadooa mamane.  
\v 26 'I seeri kera dai oli mai dai manata lau, uri daka tafi na 'ada faasia 'aukwai nia nai sa Saetan ne nia karo faafi kera ai ma daka ade sulia doori lana.   
\c 3  
\s1 Lao fa sato 'isi ki  
\p
\v 1 Si doo 'urii ne 'oe 'oko manata toi: Na doo ta'ae ki dai fuli naa 'ana fa sato 'isi ki.\f + \fr 3:1 \fq fa sato 'isi ki: \ft Si kada safali mai burina sa Disas tatae faasia maea lea ka dao 'ana kada nia oli mai kai dao lau.\f*  
\v 2 Na toae ki dai manata gwada suli kera 'i tala'ada, da liosau nada 'ana malefo, da uu kera ki nada 'i tala'ada, da naunau, ma dai ununu ta'aa sulia wane ki. Kera daka ade faasia bae lana maa kera ki fai gaa kera ki, tara nao dasi sae diana lana naa tasi doo diana ne ta waa ka ilia fuada, ma daka sae ta'aa lana naa doo nia ki God.  
\v 3 Kera daka ade ta'aa fua wane ki, nao dasi kwaimanatai guu fua taa wane, daka suke gwada faafia wane ki, daka dooria gwada firue, daka mala naa 'ana doo kwasi ki, ma daka ote kera naa 'ana doo diane ki.  
\v 4 Ma kera daka 'olea naa mae lana waa ki, nao dasi manata diana guu sulia ili lana doo ki, daka manata naunau tasa naa, daka liosau nada 'ana kwaidooria 'ana noni, ma God ka nao naa.  
\v 5 Ni kera toaa nai ki da ade lau guu mala 'ana toaa manata mamana ki 'ana God, ma sui ta kera ne nao dasi faolomainia guu rigitaa God uri ka ilia tatala lae laona mauria kera ki. 'Oe 'oko too tau 'amua faasia kwai toaa 'uri nai ki.   
\p
\v 6 Kera lea doo daka ruufia nada lume ki fainia toolangaidooa garo kera ki, ma daka saitomana 'asia naa talai garo lae 'ana keni neki manata lada nao si rafo uri kera daka faasi na 'ada doo mamane ki. Ma 'i seeri na garoa kera keni nai ki ka faamakeso kera naa, ma na kwaidooria ta'aa 'oro ka suu na faafi kera.  
\v 7 Ma 'i seeri, kera daka fafurongoa toolangaidooa garo nai ki ka lelea firi gwana lelea nao dasi saitomana gu doo mamanae ki.  
\v 8 Na toaa toolangaidoo garo nai ki, da firu fainia toolangaidooa mamane. Na toaa nai, na manata lada nao si rao 'o'olo ma na manata mamana laa kera nai nia nao lau guu doo mamane. Kera da ade mala 'ana sa Dianes fai sa Dambres\f + \fr 3:8 \fq sa Dianes ma sa Dambres: \ft Satana na roo waa bae 'i 'Isib ki bae keerua firu fainia sa Mosis kada nia dooria kai talaia toaa 'i 'Israel ki faasia 'i 'Isib. Kada sa Mosis 'ui 'ania fa kubau nia, keeru boroi 'ui lau guu 'ania fa kubau keeru ki ka alua na fa loi ki. \f* bae daru ngatafia sa Mosis.  
\v 9 Ma sui ta, tara nia 'afitai fua toaa nai ki uri daka faagaroa toaa 'oro ki, suli toae ki sui guu da suana sui naa oewanea lada, mala 'ana doo nai nia fuli fua sa Dianes fai sa Dambres.   
\s1 Sa Bol nia bae totongai fua sa Timotii  
\p
\v 10 Nia 'uri nai boroi 'ana, ni 'oe ne 'o saitoma diana 'ana toolangaidooa nee ku bae sulia. Ma 'oko saitoma diana 'ana birangaku, ma na doo neki nau ku dooria laona mauria nau uri ili lana ki, ma na manata mamana laa nau, ma na mamarato laa nau, ma na liosaua nau, ma na susuu ta'aa laa nau,  
\v 11 ma na ilimataia nau ki ma na nonifii laa nau ki, mala 'ana doo ta'aa baki kera ilia 'ani nau laona maefera 'i 'Antiok fai 'Aekoniam ma 'i Listra. Sui ka 'uri nai boroi 'ana, Aofia nia ka 'adomi nau ma ka nao kwasi mae guu.  
\v 12 Nia mamana 'asia naa, waa ne dooria kai too 'o'olo laona mauria nia 'ana tiidooa laa nia fai sa Disas Kraes, tara dai ilimatainia.  
\v 13 Na toaa ta'ae ki ma na toaa toolangaidoo suke ki kera dai ta'aa kai tasa, ma kera dai talai garo 'ana toae ki ma 'ani kera lau guu 'i tala'ada.  
\v 14 Aia ma ni 'oe, 'o dau ngasi faafia doo mamana neki 'oe 'o faamamanea ki naa. 'Oe 'o saitoma diana gwamu 'ana si doo mamana nai ki, suli 'oe 'o saitomana gwamu ne kameli ne meli toolangaidoo fuamu.  
\v 15 'Oko manata toi bae 'ita 'ua mai 'ana si kada 'oe tu'uu ka lea mai, 'oe 'o saitomana na Kekeda laa Abu ki da faatainia ade laa ne God nia ilia 'ana faamauri lamu 'ana si kada 'oe manata mamana 'ana Kraes Disas.  
\v 16 Na kekeda laa abu neki sui guu God nia falea mai, ma daka diana fua toolangaidoo lae, ma fua ngatafi lana waa da garo ki, ma fua 'olosi lana doo garo ki, ma fua faatai lana 'o'oloe,  
\v 17 uri ka adea na wane ni rao nia God ka bobola diana uri ili lana raoa diane ki sui guu.   
\c 4  
\p
\v 1 Nau ku bae totongai fuamu 'i naofana God ma naofana Kraes Disas waa ne nia kai ketoa toaa mauri ki ma na toaa mae ki kera sui guu, ma waa ne nia kai oli mai uri ka 'inito lao molaagali.  
\v 2 'O bae 'ana faatalongai lana si Faarongoa Diana nee ma 'oko kwaimaasi uri ili lae 'uri nai lao si kada ki sui gwana. Si kada 'o toolangaidoo, 'oko ilia fai si manata lae wane 'ana mamarato lae, ma 'oko 'olosia manata laa garo ki, ma 'oko ngatafia toaa da ilia doo garo ki, ma 'oko area toae ki fua ili lana doo diane ki.   
\p
\v 3 'O ili 'uri nai, suli si kada fua toae ki daka nao dasi dooria lau fafurongo lana toolangaidooa mamane nia kai dao mai. Kera da dooria na 'ada nani lae burina kwaidooria kera ki tala'ada, ma daka konia na 'ada mai toa 'oro ni toolangaidoo ki ne dai bae sulia doo kera dooria rongo lana ki.  
\v 4 Ma kera dai abulo 'e'ete na 'ada faasia fafurongo lana doo mamane ki, ma daka fafurongoa na 'ada ununua nao si mamana ki.  
\v 5 Aia ma ni 'oe, 'oko fii 'oe 'i tala'amu 'ana si kada ki sui guu ma 'oko susuu ta'aa 'amua fai raoa 'oe, sui boroi 'ana ka 'afitai. 'O ilia 'amua raoa 'oe nee 'ana faatalongai lae sulia si Faarongoa diana nee, ma 'oko ilia lau guu raoe ki sui gwana ne God alua 'i 'abamu.   
\p
\v 6 Aia ma ni nau, nia dao naa 'ana si kada fua daka saumaeli nau naa uri 'abuku ka igwa\f + \fr 4:6 \ft Namba ki 28:7 Afuafua lae 'ana doo ni kuufi lana.\f* mala 'ana ta afuafua da falea naa.  
\v 7 Nau ku faasuia naa raoe baki sui guu ne God alu 'i 'abaku. Nau ku mala naa 'ana ta wane ne nia lalae lelea ka faasuia naa lalae laa nia. Nau ku sua diana mai sulia na faamamane laa kolu nii laona nee.  
\v 8 'I tari'ina, na kwaiaraa nau uri maana 'o'oloa ne nau ku too mai laona nia kwaimaasi naa maasi nau. Na Aofia waa ne kwai ketoi 'ana 'o'oloe, nia kai kwaiarangai nau 'afa dani nia kai dao. Nao lau taifili nau ne nia kai kwaiarangai nau. Nia kai ilia fua toae ki sui guu ne da manata ele uri suai lae dao lana mai.   
\s1 Si faarongo laa faasia sa Bol  
\p
\v 9 'O sasi ngangata uri 'oko dao 'ali'ali mai siaku.   
\p
\v 10 Suli sa Dimas nia faasi nau naa ka lea na 'ana 'i Tesalonaeka, suli nia 'e liosau na 'ana 'ana fera ne 'i saegano. Sa Kresens ka lea na 'ana uri bali lolofaa 'i Geleisia, ma sa Taetas ka lea na 'ana uri bali lolofaa 'i Dalmatia.   
\p
\v 11 Sa Luk taifili nia naa ne too siaku nee. 'O odua sa Maak muru ka lea mai, suli nia ne bobola fainia 'adomi laku fai raoa nee.   
\p
\v 12 Nau ku fale sa Tikikas ka lea naa uri 'i 'Efesas.   
\p
\v 13 Si kada 'oe lea mai, 'oko ngali mai maku tikwa nau bae ku faasia mai siana sa Karafas 'i Troas. Ma 'oko ngali lau gu mai buka\f + \fr 4:13 \ft Na 'eerebeba ki.\f* nau baki. Ta, na buka diana baki da saungainia 'ana 'ungana sifsif ne ku dooria ki 'asia naa.   
\p
\v 14 Sa 'Aleksanda waa ne saungainia doo ki 'ana si salo ki, nia faanonifii nau 'asia naa. Na Aofia 'ana ne kai duua maana doo nai ki nia ilida.   
\p
\v 15 'O sua diana 'amua suli 'oe faasi nia, suli nia ne waa 'e firu suusia si faarongoa ne kolu faarongo talo ai.   
\p
\v 16 Si kada kera da safali keto nau ai, nao ta waa si 'adomi nau guu. Na lukatai laku lae 'ana ne toae ki sui guu da ilia 'ani nau. Alu God nia manata luke kera 'ana uri maana si doo nai.   
\p
\v 17 'Uri nai boroi 'ana, Aofia nia ka too gwana fai nau uri faatetede laku uri nau ku tala'ana faatalongai lana Faarongoa Diana nee fua toaa 'oro ne nao lau Diu ki uri daka rongoa. Ma na Aofia nia ka faamauri nau gwana faasia toaa ta'aa ki ne da mala 'ana ta Laeon uri saungi laku lae.   
\p
\v 18 Na Aofia nia kai tafalangai nau faasia doo ta'ae sui guu, ma kai ngali nau uri laona 'initoaa nia 'i salo. Na taloe na doo nia naa lelea firi totoo si sui! Iuka, nia 'uri nai.   
\s1 Si baea 'isi ki naa 'ana manata diana lae  
\p
\v 19 Nau ku falea kau si baea 'ana manata diana lae fuana sa 'Akuila fai 'afe nia ni Brisila, ma fuana 'aebara nia sa 'Onesiforas.   
\p
\v 20 Sa 'Erastas nia too na mai 'i Koren, ma sa Trofimas lau guu nia matai nau ku faasi nia na mai 'i Militas.   
\p
\v 21 'O sasi ngangata 'oko lea na mai uri 'oko dao 'i seki sui fatai kafi dao lao uni koburu gwagwari'olaa bae.  
\p Sa Iubulus, sa Budens, sa Laenas, ma ni Klodia fai toaafuta manata mamana ki sui guu 'ana sa Disas Kraes ne da nii seki, kera falea lau guu kau si baea kera 'ana manata diana lae fuamu.   
\p
\v 22 Na Aofia kolu ka too fai mauria 'oe, ma na ade dianaa God ka too fai kamolu sui guu.