\id 1TH 1 Thessalonians in Bokobaru, Ross Jones 
\h 1 TƐSALONIKADEENƆ 
\toc1 TƐSALONIKADEENƆ TAKADA KAAKU 
\toc2 1 TƐSALONIKADEENƆ 
\mt1 TƐSALONIKADEENƆ TAKADA KAAKU  
\c 1  
\s1 Tɛsalonikadeenↄ zɛ́'ↄdↄannɛna  
\p
\v 1 Mamↄma Pↄlu kↄ̃n Silasio kↄ̃n Timↄtio, wámbe wa takada kɛ̀kii kɛ̃̀ Tɛsalonika sↄsi gbɛ̃ kɛ̀ aↄ̃ↄ kú De Luda kↄ̃n Dii Yesu Kirisio guunↄnɛ. Luda gbɛ̃kɛɛ kɛare, à a gba aafia.  
\v 2 Wa aduakɛna guu a yã ègↄ̃ dↄwagu gurↄ píngi, weègↄ̃ Luda sáabu kpaa a píngi yã musu.  
\v 3 Lán èe zĩi kɛɛ a ludanaanɛkɛnaa nà, èe aĩa kɛɛ yenzi guu, bensↄ̃ èe mɛna kɛɛ wɛ́ɛdↄna wa Dii Yesu Kirisizi yãnzi, yã pìnↄ ègↄ̃ dↄwagu Luda wa De aɛzĩ.  
\v 4 Wa gbɛ̃ Luda yenzideenↄ, wá dↄ̃ kɛ̀ Luda a sɛ,  
\v 5 zaakɛ kɛ̀ wa baaru nnaa kpàare, wée mↄ́ kↄ̃n yã'onao adoro, wa mↄ kↄ̃n Luda Nini gbãaaomɛ, yã pì wa kũna gbãa maamaa. Á dↄ̃ lán wá kú a tɛ́ nà a aafia yãnzi,  
\v 6 ben a gↄ̃ wapinↄ kↄ̃n Diio dàdarinↄ ũ. Nawɛ̃a bíta guu a yã pì sì kↄ̃n pↄnnaa kɛ̀ Luda Nini dàaguuo,  
\v 7 ben a zɛ́ ↄ̀dↄa Yesudee kɛ̀ aↄ̃ↄ kú Masedonia bùsu guunↄnɛ kↄ̃n Girisi bùsuo píngi.  
\v 8 Dii yã bↄ̀ a kiia, èe zɛ Masedonia kↄ̃n Girisio adoro, a Yesu náanɛkɛna yã dàgula píngi, à baarukpana vĩ dↄro.  
\v 9 Wèe oo lán wa zɛ́ è a kiia nà, lán a kpɛɛ lì tãanↄnɛ, a aɛ dↄ̀ Ludaa nà, ben ée dↄↄ Luda Wɛ̃̀ndide yãpuradeezi,  
\v 10 ée à Nɛ́ Yesu kɛ̀ à à fɛ̀ɛ bↄna gaan dãa ai à bↄ ludambɛ, à mↄ́ wa sí pↄfɛ̃ kɛ̀ Luda é bↄbↄḿmaa.   
\c 2  
\s1 Pↄlu zĩkɛna Tɛsalonika  
\p
\v 1 Ma gbɛ̃nↄ, á dↄ̃ a zĩndanɛ, kɛ̀ wa zɛ́ ena a kiia e kɛ pãro.  
\v 2 Á dↄ̃ lán wà wɛ́ɛ tã̀wa nà, wa nawɛ̃a kɛ̀ káaku zaa Filipi, ben Luda wa gba kùgbãaa, wa à baaru nnaa kpàare ↄsi kↄ̃n ↄsiio.  
\v 3 Wa nakↄ̃rɛnaawaa dɛ ɛgɛ zɛ́ yã ũro. Wée kɛɛ laasuu zaaa ke a takiikɛna yãnzinlo.  
\v 4 Lán Luda wa ka a baaru nna kpanaa nà, lɛn weè kpáńnɛ lɛ, èe kɛ gbɛ̃ntee pↄyezin wée wɛtɛɛro, sé Luda wa laasuu tàasikɛri pↄ́.  
\v 5 Á dↄ̃ kɛ̀ wée yã nnannaa o gbɛ̃kenɛro, bensↄ̃ wée yãke kɛ kↄ̃n mↄnafikio wãkũ yãnziro. Ludan wa sèedadee ũ.  
\v 6 Wée sáabu wɛtɛ gbɛ̃ntee kiiaro, apinↄ ke gbɛ̃ pãndenↄ.  
\v 7 Baa kɛ̀ wá à zɛ́ vĩ wà gↄ̃are asoo ũ wa Kirisi zĩ̀rikɛ yãnzi, wá kɛ̀ao busɛbusɛ, lán nↄgbɛ̃ nɛ́dandee è làakari dↄ a nɛ́a nà.  
\v 8 Kɛ̀ wá yeazi maamaa yãnzi, wée zɛo wà baaru nnaa kɛ̀ bↄ̀ Luda kiia kpáare adoro, kↄ̃n wa zĩnda kpanaawaaomɛ dↄ, zaakɛ a gↄ̃ wa gbɛ̃ yenzideenↄ ũ.  
\v 9 Ma gbɛ̃nↄ, à tó wa zĩkɛna kↄ̃n nawɛ̃ao yã dↄagu. Gurↄↄ kɛ̀ wée baaru nnaa kɛ̀ bↄ̀ Luda kiia pì kpaaare, weègↄ̃ zĩi kɛɛ fãantɛ̃ kↄ̃n gwãavĩo, lɛ wàton gↄ̃ a gbɛ̃kenɛ asoo ũro yãnzi.  
\v 10 Ámbe wa sèedadeenↄ ũ, kↄ̃n Ludao dↄ, kɛ̀ wá kú amↄa kɛ̀ a Yesu náanɛ kɛ̀nↄ tɛ́ a zɛ́a nↄ̀sɛpuradeenↄ ũ taari sai.  
\v 11 Á dↄ̃ kɛ̀ wa yã kɛ̀ a baadenɛ lán de è kɛ a nɛ́nↄnɛ nà.  
\v 12 Wa lɛ́ dàawa, wa a nↄ̀sɛ kpàɛare, wa nakↄ̃rɛawa, lɛ a kuuna kɛ sɛ̃nkpɛ kↄ̃n gbɛ̃ kɛ̀ Luda ń ká kpata gakuidee kɛ̀ bↄ̀ à kiiannↄo.   
\p
\v 13 Kɛ̀ a Luda yã kɛ̀ wá òaree pì mà, ée diɛ gbɛ̃ntee pↄ́ ũro, á sì lán à dɛ nà, Luda yã yãpuraa ũ. Àmbe e zĩi kɛɛ amↄa kɛ̀ ée à náanɛ kɛɛnↄ guu. Bee yãnzi dↄ weègↄ̃ Luda sáabu kpaa yãana sai.  
\v 14 Wa gbɛ̃nↄ, a yã kɛ̀ sɛ̃nkpɛ kↄ̃n Luda gbɛ̃ kɛ̀ aↄ̃ↄ kú Kirisi Yesu guu zaa Yudeanↄo, zaakɛ a bùsudeenↄ wɛ́ɛ tã̀awa se lán Yudanↄↄ tã̀ḿma nà.  
\v 15 Yudanↄ Dii Yesu dɛ̀ kↄ̃n annabinↄ dↄ, bensↄ̃ aↄ̃ pɛ̀wa. Aↄ̃ yã è ká Ludanɛro, aↄ̃ íbɛtɛ kpà kↄ̃n gbɛ̃ sãnda píngio.  
\v 16 Aↄ̃è kpáwe wà yã kɛ̀ Luda è gbɛ̃ mì sío o bori pãndenↄnɛ. Lɛn durun kɛ̀ aↄ̃ègↄ̃ kɛɛ gurↄ píngi ègↄ̃ diiàlɛ lɛ. Luda pↄfɛ̃ pìtaḿma sa.   
\s1 Timↄti zĩna Tɛsalonika  
\p
\v 17 Wa gbɛ̃nↄ, kɛ̀ wa kɛ̃kↄ̃a gurↄ plaa, wɛ́ɛ bé èe kↄ̃ ero, mↄde wa laasuu kúawa. Wa a bɛgɛɛ kɛ̀ maamaa, wa mɛ̀ wã̀ wà wɛ́ɛ sikↄ̃lɛ.  
\v 18 Wá yezi wà mↄ́ a gwa dↄ. Mamↄma Pↄlu ma mↄna zɛ́ wɛ̀tɛ à dɛ gɛ̃̀n do ke gɛ̃̀n plaaala, ben Setãn kpàwe.  
\v 19 Tó wa Dii Yesu mↄ̀, dé bé eégↄ̃ dɛ wa tãmaa kↄ̃n wa pↄnnaao kↄ̃n wa gã̀sazubↄo ũ à aɛ a baasii?  
\v 20 Zaakɛ ámbe wa gakui kↄ̃n wa pↄnnaao ũ.   
\c 3  
\p
\v 1 Kɛ̀ wée fↄ̃ wà mɛna dↄro, wa zɛo wà gↄ̃ Atɛni wa tɛ̃ɛ,  
\v 2 wa wa gbɛ̃ndo Timↄti, Luda zĩkɛri daa Kirisi baarunnakpana guu zĩ̀awa, lɛ à a gba gbãaa, à a nↄ̀sɛ kpáɛare a ludanaanɛkɛna guu,  
\v 3 lɛ a gbɛ̃ke làakari tón fɛɛ wɛ́ɛtãmmana pì yãnziro. Á dↄ̃ a zĩndanɛ kɛ̀ Luda beee taka dìɛwe.  
\v 4 Gurↄↄ kɛ̀ wá kú a kiia, wa gĩakɛ wá òare kɛ̀ weé wɛ́ɛ tãwa, ben à kɛ̀ lɛ lán á dↄ̃ nà.  
\v 5 Bee yãnzi kɛ̀ mɛ́ fↄ̃ mà mɛna dↄro, ma à zĩ̀ à a ludanaanɛkɛna gwa. Ke Ibilisi a lɛ à a gwa, wa zĩi kɛ̀ pãn yoo, wá dↄ̃ro.   
\p
\v 6 Kɛ̀ Timↄti sù sa, à a ludanaanɛkɛna kↄ̃n a yenzio baaru kpàwe. À bè wa yã ègↄ̃ dↄagu kↄ̃n laasuu maaao, bensↄ̃ ée wa bɛgɛ kɛɛ lán wée a bɛgɛ kɛɛ nà.  
\v 7 Ma gbɛ̃nↄ, a ludanaanɛkɛna yã bé à tò wa làakari kpaɛna a yã musu wa wɛ́ɛtãmmana kↄ̃n wa nawɛ̃ao guu píngi.  
\v 8 Zaakɛ á zɛna gíngin Dii guu, tia wa ĩampà sa.  
\v 9 Wé fↄ̃ wà Luda sáabu kpá a yã musu. Wa wa Luda sáabu kpà maamaa kↄ̃n pↄnna bíta kɛ̀ weè kɛ à aɛ a yãnzio.  
\v 10 Gwãavĩ kↄ̃n fãantɛ̃o weègↄ̃ wɛ́ɛ kɛɛ maamaa, lɛ wà e wà wɛ́ɛ sikↄ̃lɛ, wà pↄ́ kɛ̀ kɛ̃̀sã a ludanaanɛkɛna guu papaare.   
\p
\v 11 Luda wa De kↄ̃n wa Dii Yesuo zɛ́ bↄwe wà mↄ́ wà a gwa.  
\v 12 Dii yenzi kɛ̀ á vĩ kↄ̃o kↄ̃n baade píngio kaaraare, à dadaala lán yenzi kɛ̀ wá vĩao bà,  
\v 13 à a swɛ̃̀ gba gbãaa lɛ àgↄ̃ kuu gbãsĩ sai taarisaideenↄ ũ Luda wa De aɛ wa Dii Yesu kↄ̃n a gbɛ̃nↄ píngi mↄ́gurↄↄ zĩ.   
\c 4  
\s1 Kuuna lán Ludaa yezi nà  
\p
\v 1 Yã kɛ̀ gↄ̃̀n yɛ̀, ma gbɛ̃nↄ, á mà wa lɛ́n lán à maa a kuuna ká Ludanɛ nà. Á kuuna dɛ lɛ kↄ̀, mↄde wée wɛ́ɛ kɛɛawa, wée agbaa kpaaare wa Dii Yesu guu, àgↄ̃ kuu lɛ àgↄ̃ gaao.  
\v 2 Á yã kɛ̀ wá dàare kↄ̃n Dii Yesu tↄ́o dↄ̃.  
\v 3 Ludaa yezi a kuuna gↄ̃ adona, à mì kɛ̃ pãpãkɛnaa.  
\v 4 A baade gↄ̃ a zĩnda kũna dↄ̃ kↄ̃n bɛ̀ɛo gbãsĩ sai,  
\v 5 èe kɛ kↄ̃n dà zaa nidɛnao lán kifii kɛ̀ aↄ̃ↄ Luda dↄ̃roonↄ bànlo.  
\v 6 Yã pì musu gbɛ̃ke tón a gbɛ̃daaa takii kɛ ke à taari kɛnɛro, zaakɛ Dii é wɛ́ɛ tã yã beee taka kɛ̀rinↄa lán wa gĩakɛ wá òare nà, wa a swã gào.  
\v 7 Ludaa e wa sísi wàgↄ̃ kú kↄ̃n gbãsĩoro, séde wa kuuna gↄ̃ adona.  
\v 8 Bee yãnzi gbɛ̃ kɛ̀ gì yãdannɛna kɛ̀zi, èe kɛ gbɛ̃nteen à gìziro, Luda kɛ̀ è a Ninii kɛ̀ kú adona dawaguun à gìzi.   
\p
\v 9 Wé e wà yekↄ̃zina yã oarero, zaakɛ a zĩndanɛ Luda yekↄ̃zina dàare.  
\v 10 Á kuuna dɛ lɛ kↄ̀, á ye wa gbɛ̃ kɛ̀ aↄ̃ↄ kú Masedonia bùsu guunↄzi ń píngi. Ma gbɛ̃nↄ, wa lɛ́ dàawa, àgↄ̃ kɛɛ lɛ àgↄ̃ gaao,  
\v 11 à zɛ́ wɛtɛ àgↄ̃ kuu yãkete sai, à a zĩnda yã kɛ à a zĩnda zĩi kɛ, lán wá dìɛare nà,  
\v 12 lɛ a kuuna e à ká bàazideenↄnɛ, lɛ àton fu a zĩndaa à da gbɛ̃keziro.   
\s1 Dii mↄna  
\p
\v 13 Ma gbɛ̃nↄ, wá yezi àgↄ̃ yãpuraa dↄ̃ gbɛ̃ kɛ̀ aↄ̃ anduna tònↄ yã musu, lɛ a pↄↄ tóngↄ̃ sia lán gbɛ̃ kɛ̀ aↄ̃ↄ tãmaa vĩroonↄ bàro yãnzi.  
\v 14 Zaakɛ wá sì kɛ̀ Yesu gà à fɛ̀ɛ, lɛn dↄ Luda é tó gbɛ̃ kɛ̀ aↄ̃ anduna tò Yesu guunↄ ɛara wà mↄ́o lɛdo.   
\p
\v 15 Yã kɛ̀ wée ooaree kɛ̀ki nɛ́ Dii yãdannɛnamɛ. Wamↄwa gbɛ̃ kpaaa kɛ̀ wégↄ̃ kuu ai Dii mↄ́gurↄↄ zĩnↄ, wé dↄ gbɛ̃ kɛ̀ aↄ̃ anduna tò pìnↄnɛ aɛro.  
\v 16 Dii bé eé bↄ ludambɛ, à pita kↄ̃n yãdiɛnnɛnao kↄ̃n malaika gbɛ̃nsi kòtoo kↄ̃n Luda kãkãki ↄ́o, gbɛ̃ kɛ̀ aↄ̃ gà Kirisi guunↄ é fɛɛ bↄna gaan káaku,  
\v 17 beee gbɛra wamↄwa gbɛ̃ kpaaa kɛ̀ wá kuunↄ, weé wa sɛ́ɛńyo lɛdo ai ludambɛ luguun wà da Diilɛ ĩa guu, gbasa wàgↄ̃ kúo ari gurↄ píngi.  
\v 18 Bee yãnzi à kↄ̃ làakari kpáɛ kↄ̃n yã pìo.   
\c 5  
\p
\v 1 Ma gbɛ̃nↄ, yã pì kɛna ke à kɛgurↄↄ onaare zɛ́ vĩro,  
\v 2 zaakɛ á dↄ̃ sãnsãn lán kpãi è mↄ́ gwãavĩ nà. Lɛn eégↄ̃ dɛ lɛ Dii mↄ́gurↄↄ zĩ.  
\v 3 Tó gbɛ̃nↄↄ e bee, wá aafia, wá kú wa làakaria, kaatɛna é mↄ́ḿma kãndo lán nɛ́'iwãwãa è mↄ́ nↄ̀sindadeea nà, aↄ̃é bↄro.  
\v 4 Apinↄ sↄ̃ wa gbɛ̃nↄ, á kú gusiaanlo, gurↄↄ pì é suawa lán kpãi bàro,  
\v 5 zaakɛ gupura gbɛ̃nↄn a ũ, fãantɛ̃ gbɛ̃nↄn a ũ a píngi. Gwãavĩ ke gusia gbɛ̃nↄn wa ũro.  
\v 6 Beee yãnzi wàton ii o lán danↄ bàro. Wà itɛ̃ kɛ wàgↄ̃ kú wa làakaria.  
\v 7 I'orinↄ è ii o gwãavĩ, wɛ̃dɛrinↄ sↄ̃ è wɛ̃dɛɛ kɛ gwãavĩ.  
\v 8 Wapinↄ sↄ̃, zaakɛ fãantɛ̃ gbɛ̃nↄn wa ũ, wàgↄ̃ kú kↄ̃n làakario, wà ludanaanɛkɛna kↄ̃n yenzio da mↄ̀ uta ũ, wà mìsina tãmaa kú mↄ̀fura ũ.  
\v 9 Zaakɛ Ludaa e wa diɛ à pↄfɛ̃ pitawaro. À wa diɛ à wa mì sí wa Dii Yesu Kirisi gãzĩmɛ.  
\v 10 Àmbe à gà wa yãnzi lɛ wàgↄ̃ kúo, tó wá bɛ̃ɛ ke wa anduna tòn yoo.  
\v 11 Beee yãnzi à lɛ́ dakↄ̃a, à kↄ̃ gba gbãaa, lán ée kɛɛ nà.   
\s1 Pↄlu yãdiɛna Tɛsalonikadeenↄnɛ  
\p
\v 12 Ma gbɛ̃nↄ, wa wɛ́ɛ kɛ̀awa, à bɛ̀ɛ lí gbɛ̃ kɛ̀ aↄ̃è zĩi kɛ a tɛ́nↄnɛ, kɛ̀ aↄ̃ iko vĩawa Dii guu, aↄ̃ↄe a daa zɛ́anↄ.  
\v 13 À ń gakui dↄ̃ńnɛ maamaa yenzi guu zĩi kɛ̀ aↄ̃ↄe kɛɛ yãnzi. Àgↄ̃ nna kↄ̃o.  
\v 14 Ma gbɛ̃nↄ, wa lɛ́ dàawa, à faasaideenↄ da zɛ́a, à gbɛ̃ yĩinↄ gba swɛ̃̀, à làakari dↄ gbãasaideenↄa, à mɛna kↄ̃n baade píngio.  
\v 15 À làakari kɛ, a gbɛ̃ke tón à zaaa fĩa bo kↄ̃n à zaaaoro. À zɛ́ wɛtɛ àgↄ̃ à maaa kɛɛkↄ̃nɛ kↄ̃n gbɛ̃ píngio gurↄ píngi.   
\p
\v 16 Àgↄ̃ kú pↄnnaa guu gurↄ píngi.  
\v 17 Àgↄ̃ adua kɛɛ yãana sai.  
\v 18 Àgↄ̃ Luda sáabu kpaa yã píngi musu. Beee bé à dɛare à pↄyezi ũ Kirisi Yesu guu.  
\v 19 Àton Luda Nini tɛ́ kɛ̀ è káńgu dɛdɛro,  
\v 20 àton kya ká annabikɛyãnlo.  
\v 21 À yã píngi tàasi kɛ, àgↄ̃ à maaa kũna,  
\v 22 à mì kɛ̃ zaakɛna bori píngia.   
\p
\v 23 Luda Aafiade tó a kuuna gↄ̃ kú adona yã sãnda píngi guu, à a nini kↄ̃n a wɛ̃̀ndio kↄ̃n a mɛ̀o dãkpaare aafia taari sai ai wa Dii Yesu Kirisi mↄ́gurↄↄ zĩ.  
\v 24 Luda kɛ̀ à a sisi à a sɛ náanɛ vĩ, eé yã pì kɛare.   
\p
\v 25 Ma gbɛ̃nↄ, à adua kɛwe.  
\v 26 À ì kpá wa gbɛ̃nↄa ń píngi kↄ̃n Luda gbɛ̃nↄ lɛ́pɛmmanao.  
\v 27 Ma naare Diizi, à takada kɛ̀ kyó kɛ wa gbɛ̃nↄnɛ ń píngi.  
\v 28 Wa Dii Yesu Kirisi gbɛ̃kɛɛ kɛare.