\id 1PE 1 Peter in Bokobaru, Ross Jones 
\h 1 PITA 
\toc1 PITA TAKADA KAAKU 
\toc2 1 PITA 
\mt1 PITA TAKADA KAAKU  
\c 1  
\s1 Tãmaa kɛ̀ è ń nɛroo  
\p
\v 1 Mamↄma Pita, Yesu Kirisi zĩ̀ri bé à takada kɛ̀ kɛ̃̀ Luda gbɛ̃ kɛ̀ aↄ̃ↄ dɛ nibↄnↄ ũ anduna kɛ̀ guu, kɛ̀ aↄ̃ↄ fãakↄ̃ana bùsu kɛ̀kiinↄ guunↄnɛ: Pↄntu, Galatia, Kapadosia, Asia kↄ̃n Bitiniao.  
\v 2 De Luda gĩakɛ à a dↄ̃, ben à a sɛ, a gↄ̃ à pↄ́ ũ kↄ̃n à Ninii gbãaao, lɛ à mì siɛ Yesu Kirisinɛ, à aru a gbãsĩ gogo. Luda gbɛ̃kɛ kↄ̃n aafiao kaaraare.   
\p
\v 3 Wà Luda wa Dii Yesu Kirisi De sáabu kpá! À sùu bíta guu à wa i dufu kↄ̃n Yesu Kirisi fɛɛna gaan gbãaao, ben wá tãmaa kɛ̀ è ń nɛroo vĩ,  
\v 4 zaakɛ túbi kɛ̀ diɛnaare ludambɛɛ pì è yakaro, è gbãsĩ kpáro, à maaa è yãaro.  
\v 5 Luda sorumi mà, lɛ à a mì sí a náanɛ kɛ̀ ée kɛɛ yãnzi, ben èe a dãkpaa kↄ̃n a gbãaao ai à gá bↄ mìsina pìo gupuraaa gurↄ zãanↄa.  
\v 6 Ée pↄnnaa kɛɛ kↄ̃n yã pìo, baa kɛ̀ é nawɛ̃a kɛ gĩa féte yↄ̃agwana bori sãnda píngi yãnzi.  
\v 7 Lán wè vura maaa dↄ̃ tɛ́ guu nà, lɛn yↄ̃agwana pìnↄↄ e a ludanaanɛkɛna yↄ̃ↄ à gwa lɛ, zaakɛ a ludanaanɛkɛna pì bɛ̀ɛ vĩ dɛ vura kɛ̀ à gakui è yãala maamaa. Tó a bↄ maa, Luda é a sáabu kpá Yesu Kirisi sugurↄↄ zĩ, eé a kpe da kↄ̃n gakuio.  
\v 8 Baa kɛ̀ ée à ero, á yezi. Baa kɛ̀ ée wɛ́ɛ siàlɛ zikiro, ée à náanɛ kɛɛ, ben ée pↄnna bíta kɛ̀ gɛ̃̀ onalaa kɛɛ,  
\v 9 kɛ̀ ée a ludanaanɛkɛna gbɛ̀ ee a mìsina ũ yãnzi.   
\p
\v 10 Annabinↄ gĩakɛ wà gbɛ̃kɛɛ kɛ̀ Luda é kɛao yã ò, aↄ̃ mìsina pì yã gwà, aↄ̃ à tàasi kɛ̀.  
\v 11 Kirisi Ninii kɛ̀ kú ń guu gĩakɛ à nawɛ̃a kɛ̀ Kirisi pì é kɛɛ òńnɛ kↄ̃n gakui kɛ̀ eé e à gbɛraao, ben aↄ̃ↄ wɛ̀tɛ wà yã pì zɛ́ dↄ̃ kↄ̃n à gurↄↄo.  
\v 12 Ben Ludaa tò aↄ̃ dↄ̃̀ kɛ̀ yã kɛ̀ aↄ̃ↄe oo pì dɛ ń gurↄ pↄ́ ũro, a pↄ́mɛ. Tia sa baarunnakparinↄ yã pì òare kↄ̃n Luda Nini kɛ̀ Luda pì zĩ̀ bↄna ludambɛɛ gbãaao. Baa malaikanↄↄ e ↄsi kaa yã pì dↄ̃nazi.   
\s1 Kuuna adona  
\p
\v 13 Beee yãnzi à a laasuu vu iin, àgↄ̃ a zĩnda kũna dↄ̃, a wɛ́ɛ gↄ̃ dↄ gbɛ̃kɛɛ kɛ̀ Luda é kɛare Yesu Kirisi sugurↄↄ zĩzi seka sai.  
\v 14 Lán á dɛ Luda nɛ́ kɛ̀ aↄ̃ↄe à yã maanↄ ũ nà, àton tó dà zaaa kɛ̀ á vĩ yã a wɛ́ɛsiagurↄↄ dↄare aɛro.  
\v 15 Ludaa kú adonamɛ. Lán à a sisi à a sɛ nà, àgↄ̃ kú adona a yãkɛna píngi guu.  
\v 16 Zaakɛ wà kɛ̃̀ Luda yãn wà bè:  
\q1 Àgↄ̃ kú adona,  
\q1 zaakɛ má kú adonamɛ.   
\p
\v 17 Zaakɛ Luda è yãkpaɛ kɛ kↄ̃n baadeo a yãkɛnaa ń wɛ́ɛ gwana sai, tó ée à sisii De, à vĩa kɛnɛ a nibↄkɛɛ guu kɛ̀.  
\v 18 Á dↄ̃ lán Luda a bↄ kuuna kori kɛ̀ dɛ a fɛɛakaarayã ũu guu nà. Ludaa e a bo kↄ̃n pↄ́ kɛ̀ à gakui è yãaoro lán vura ke kondogi bà,  
\v 19 à a bo kↄ̃n Kirisi aru gakuideeomɛ, kɛ̀ dɛ lán sãnɛ bↄ̀rↄ kɛ̀ bↄ̀gbɛ vĩro à gbãsĩ vĩroo bà.  
\v 20 Luda gĩakɛ à à dìɛ zaalɛ èe anduna káɛro, ben à bↄoare gupuraaa gurↄ zãa kɛ̀nↄ zĩ.  
\v 21 Beee yãnzin ée Luda náanɛ kɛɛzi. Luda à bↄ̀ gaan à gakui kpàa, lɛ à e à a náanɛ kɛ, a wɛ́ɛ gↄ̃ dↄzi.   
\p
\v 22 Lán mìsiɛna yãpuraanɛ a gbãsĩ gògo nà, ben á gbɛ̃kɛɛ vĩ kↄ̃o mↄnafiki sai, àgↄ̃ yekↄ̃zi kↄ̃n nↄ̀sɛo do.  
\v 23 Luda a i dufu kↄ̃n a yã wɛ̃̀ndidee kɛ̀ ègↄ̃ kuu gbãaao. Yã pì dɛ pↄ́borii kɛ̀ è gaa ũro, pↄ́borii kɛ̀ è garoomɛ.   
\q1
\v 24 Baade píngi dɛ lán sɛ̃̀ bàmɛ,  
\q1 aↄ̃ gakui dɛ lán sɛ̃̀vu bàmɛ píngi.  
\q1 Sɛ̃̀ è gaga, à vú è kwɛ́,   
\q1
\v 25 mↄde Dii yã ègↄ̃ kuu gurↄ sãnda píngi.  
\m Yã pì bé à dɛ baaru nnaa kɛ̀ wà kpàaree ũ.   
\c 2  
\s1 Gbɛ̀ wɛ̃̀ndidee  
\p
\v 1 Beee yãnzi à yã zaa píngi tó kↄ̃n ɛgɛtona píngio kↄ̃n mↄnafikio kↄ̃n nↄ̀sɛgↄ̃aanↄo kↄ̃n kↄ̃yakanao.  
\v 2 Lán nɛ́kpãntɛ̃nↄ ègↄ̃ yↄ̃'i ni dɛɛ nà, àgↄ̃ Luda yã kɛ̀ dɛ lán zwi'ipu wásawasa bà ni dɛɛ lɛ se, lɛ à e à bíta kũ a mìsina zɛ́ guu,  
\v 3 tia sa kɛ̀ á dↄ̃̀ kɛ̀ Dii maa.  
\v 4 À sↄ̃zi, àmbe gbɛ̀ wɛ̃̀ndidee kɛ̀ wà gìzi ũ, mↄde Luda à sɛ̀ bɛ̀ɛdee ũ.  
\v 5 Apinↄ sↄ̃, ámbe gbɛ̀ wɛ̃̀ndidee kɛ̀ Ludaa e a kpɛ́ ɛ̃ɛ booonↄ ũ. Ámbe à gbã̀gbãrinↄ ũ, eè saa kɛ̀ è kánɛ o kↄ̃n à Ninii gbãaao Yesu Kirisi gãzĩ.  
\v 6 Zaakɛ wà kɛ̃̀ Luda yãn wà bè:  
\q1 Ǹ gwa, mɛ́ɛ gbɛ̀ diɛɛ Zayↄn,  
\q1 ɛ̃daɛgbɛ bɛ̀ɛdee kɛ̀ má sɛ̀ ũ.  
\q1 Wí é gbɛ̃ kɛ̀ èe à náanɛ kɛɛ kũro.   
\m
\v 7 À dɛ gbɛ̀ bɛ̀ɛdee ũ amↄa kɛ̀ ée à náanɛ kɛɛnↄnɛ, mↄde à dɛ lɛ gbɛ̃ kɛ̀ aↄ̃ↄe à náanɛ kɛɛroonↄnɛro.  
\q1 Gbɛ̀ kɛ̀ kpɛ́borinↄ pã kpàzi  
\q1 bé à gↄ̃̀ kpɛ́ gooda gbɛ̀ mìdee ũ.   
\m
\v 8 Lɛmɛ dↄ à dɛ:  
\q1 Gbɛ̀ kɛ̀ wè gɛ̃̀n sía ũ,  
\q1 gbɛ̀si kɛ̀ wè kpáàla wà lɛ́ɛ ũ.  
\m Aↄ̃ gɛ̃̀n sìa, kɛ̀ aↄ̃ↄe Luda yã daro yãnzi. Lɛn Ludaa dìɛńnɛ lɛ.   
\p
\v 9 Ámbe borii kɛ̀ Luda ń sɛ́nↄ ũ, kínanↄ kↄ̃n sa'orinↄ ũ, à gbɛ̃ kɛ̀ aↄ̃ↄ kú adonanↄ ũ, lɛ àgae Luda kɛ̀ à a sisi a bↄ gusiaan, à gɛ̃̀ao a gupura bↄnsaɛ guu sáabu kpá.   
\q1
\v 10 Á dɛ Luda gbɛ̃nↄ ũ yãro,  
\q1 mↄde tia a gↄ̃ ń ũ.  
\q1 Ludaa e sùu kɛao yãro,  
\q1 mↄde tia à kɛ̀ao.   
\s1 Kuuna ludanaanɛkɛrisainↄ tɛ́  
\p
\v 11 Ma gbɛ̃ yenzideenↄ, lán á dɛ nibↄ kↄ̃n bↄ̀amↄnↄ ũ nà anduna kɛ̀ guu, mɛ́ɛ lɛ́ daaawamɛ, à mì kɛ̃ a dà zaaa kɛ̀ aↄ̃è zĩ̀ káaonↄa.  
\v 12 Àgↄ̃ kuu gbɛ̃ bɛ̀ɛdeenↄ ũ kifiinↄ tɛ́. Lɛmɛ baa tó aↄ̃ a diɛ zaakɛrinↄ ũ, tó aↄ̃ yã maaa kɛ̀ ée kɛɛnↄ è, aↄ̃é Luda sáabu kpá gurↄↄ kɛ̀ eé mↄ́ńzi.   
\p
\v 13 À mì siɛ ikodee kɛ̀ gbɛ̃ntee dìɛnↄnɛ ń píngi Dii yãnzi, kína kɛ̀ gbãa vĩ dɛńlaan yoo,  
\v 14 ke gbãadee kɛ̀ à dìɛ à wɛ́ɛ tã zaakɛrinↄa à maakɛrinↄ sáabu kpá.  
\v 15 Luda pↄyezin yɛ̀: A yãmaakɛna sàabu é yↄ̃nkↄ wɛ́ɛsiadeenↄ lɛ́ yĩtɛńnɛ.  
\v 16 Àgↄ̃ wɛ̃ɛnɛnↄ ũ, mↄde àton tó a gↄ̃na wɛ̃ɛnɛnↄ ũu gↄ̃are zaakɛna zɛ́ ũro. Àgↄ̃ kuu Luda zↄ̀blerinↄ ũ.  
\v 17 À bɛ̀ɛ li gbɛ̃ pínginɛ. Àgↄ̃ ye a Yesude daanↄzi. À vĩa kɛ Ludanɛ. À bɛ̀ɛ lí kínanɛ.   
\p
\v 18 Zĩkɛrinↄ, à mì siɛ a diinↄnɛ, à bítakɛɛ dↄ̃ńnɛ yã píngi guu. Èe kɛ dii maa nↄ̀sɛdodeenↄnɛ ńtɛ̃ɛnlo, mↄde kↄ̃n ń gbɛ̃ pãsĩnↄomɛ se.  
\v 19 Tó wà wɛ́ɛ tã̀awa pã, tó a mɛna fↄ̃̀ Luda yãnzi, bee sáabu vĩare.  
\v 20 Tó wà a gbɛ̃ a taari yãnzi, tó a mɛna fↄ̃̀, bee tↄ́ nnaa vĩ máa? Mↄde tó a nawɛ̃a kɛ̀ yã maaa kɛ̀ á kɛ̀ yãnzi, tó a mɛna fↄ̃̀, Luda é a sáabu kpá.  
\v 21 Beee yãnzin Luda a sisi à a sɛzi. Kirisi nawɛ̃a kɛ̀are, à zɛ́ ↄ̀dↄaare, lɛ àgↄ̃ tɛ́ à kɛ̀sɛgbɛzi yãnzi.   
\q1
\v 22 Èe durun kɛro,  
\q1 wèe ma à ɛgɛɛ tòro.   
\m
\v 23 Kɛ̀ wà à sↄ̃̀sↄ̃, èe yã síńlaro. Kɛ̀ à nawɛ̃a kɛ̀, èe yã pãsĩ ke ońnɛro, à zɛ̀ kↄ̃n Luda yãkpaɛkɛri maaaomɛ.  
\v 24 Àmbe à wa durunnↄ dì a mìa à gào lía, lɛ wa bà tóngↄ̃ kú kↄ̃n durunnↄ dↄro, wàgↄ̃ kú maakɛna guu. À flã̀gbɛnↄ bé wà wa gba aafia.  
\v 25 Zaakɛ a sãsã lán sãanↄ bà yã, ben a aɛ dↄ̀ a Dã̀ri kↄ̃n a Dãkparioa tia sa.   
\c 3  
\s1 Kuuna kↄ̃o  
\p
\v 1 Nↄgbɛ̃nↄ sↄ̃, à a zĩnda kpá a zãnↄa. Tó aↄ̃ gbɛ̃kenↄ e Luda yã daaro, a kuuna é ń liɛ. Baa tó ée yãke ońnɛro,  
\v 2 aↄ̃é e kɛ̀ á kuu gbãsĩ sai, bensↄ̃ a a zĩnda kpàḿma.  
\v 3 Àton tó a nↄmaakɛɛ gↄ̃ mɛ̀baa pↄ́ ũro, mìtãna ke nↄmaablebↄnↄ ke pↄ́kãsãdanan yoo.  
\v 4 Mↄde àgↄ̃ dɛ a nↄ̀sɛ guu yã kɛ̀ è yãaroo ũ, nↄ̀sɛyĩi kↄ̃n zĩndabusanao. Beee bé à bɛ̀ɛ vĩ Ludanɛ.  
\v 5 Zaakɛ lɛn nↄgbɛ̃ dↄnziri kɛ̀ aↄ̃ wɛ́ɛ dↄ Ludazi yãanↄ ń zĩnda kɛ̀kɛ lɛ, aↄ̃ ń zĩnda kpà ń zãnↄa.  
\v 6 Lɛn Sara dɛ lɛ, è Ibraĩ yã ma, è à sísi Baa. Tó ée yã maaa kɛɛ, tó ée pↄ́ kɛ̀ wè vĩa kɛnɛ yã daaro, a Sara dà sɛ̀n gwe.  
\v 7 Gↄ̃gbɛ̃nↄ sↄ̃, àgↄ̃ kúńyo nↄgbɛ̃kɛɛ dↄ̃nańnɛ guu, àgae yã maḿma, lɛ pↄ́ke tón kpáare a aduakɛna guuro, zaakɛ á dɛ wɛ̃̀ndi gbablerinↄ ũ lɛdomɛ.   
\p
\v 8 Beee gbɛra àgↄ̃ lɛdolɛ vĩ kↄ̃o a píngi. Àgↄ̃ kↄ̃ wɛ̃nda dↄ̃, àgↄ̃ yekↄ̃zi, àgↄ̃ gbɛ̃kɛɛ vĩ kↄ̃o, à busakↄ̃nɛ.  
\v 9 Àtongae à zaaa fĩa bo kↄ̃n à zaaaoro. Àtongae gbɛ̃ kɛ̀ à a sↄ̃sↄ̃ sↄ̃sↄ̃ro. À sa maaa onɛ, zaakɛ Luda a sisi, lɛ à aubarika daagu yãnzimɛ.   
\q1
\v 10 Gbɛ̃ kɛ̀ yezi a wɛ̃̀ndi gↄ̃ maa,  
\q1 bensↄ̃ à yezi a kuuna gↄ̃ nna,  
\q1 à a lɛ́ kũ kↄ̃n yãzaa'onao,  
\q1 àton tó ɛgɛɛ bↄ a lɛ́nlo.   
\q1
\v 11 Adee kpɛɛ li à zaaanɛ, à à maaa kɛ,  
\q1 à aafia zɛ́ wɛtɛ, àgↄ̃ tɛ́zi.   
\q1
\v 12 Zaakɛ Dii ègↄ̃ gbɛ̃ maaanↄ tàasi kɛ,  
\q1 è swã kpá ń aduakɛnanↄzi,  
\q1 mↄde è mìkpɛɛ zu zaakɛrinↄnɛ.   
\s1 Nawɛ̃akɛna maakɛna yãnzi  
\p
\v 13 Tó á aĩa vĩ kↄ̃n maakɛnao, dé bé eé wɛ́ɛ tãawaa?  
\v 14 Baa tó a nawɛ̃a kɛ̀ maakɛna yãnzi, á aubarika vĩ. Àtongae vĩa kɛ aↄ̃ wɛ́ɛtãmmananɛro, àton tó a swɛ̃̀ degero.  
\v 15 À Kirisi dↄ̃ Dii ũ a swɛ̃̀ guu. Àgↄ̃ kú soru guu gurↄ píngi, lɛ à e à yã we gbɛ̃ kɛ̀ èe a laa yã kɛ̀ á wɛ́ɛ dↄzi mìzila.  
\v 16 Àgae ońnɛ busɛbusɛ kↄ̃n bɛ̀ɛlinnɛnao. À ońnɛ kↄ̃n nↄ̀sɛpuraao dↄ, lɛ wí gbɛ̃ kɛ̀ aↄ̃ↄe a sↄ̃sↄ̃ↄ a yãmaakɛna Yesu zɛ́n yãnzinↄ kũ.  
\v 17 Nawɛ̃akɛna Luda pↄyezi guu yãmaakɛna yãnzi maa dɛ nawɛ̃akɛna yãzaakɛna yãnzila.   
\p
\v 18 Kirisi gà gɛ̃̀n do durunkɛ̃nnɛna yãnzi. Taarisaidee gà wamↄwa taarideenↄ yãnzi, lɛ à e à gáwao Luda kiia. Wà à dɛ̀ mɛ̀baa guu, ben Luda à vù ninikɛɛ guu.  
\v 19 À ninikɛɛ pì guu à gàa à waazi kɛ̀ gɛ̀wãadee kɛ̀ wà ń ká kpɛ́siaannↄnɛ.  
\v 20 Aↄ̃ bↄ̀ Luda yã kpɛɛmɛ yã, gurↄↄ kɛ̀ à mɛna ai Nuu gàa à góro'itɛ kɛ̀ à yã̀ao. Gbɛ̃ kɛ̀ aↄ̃ bↄ̀ ín aafia góro pì gãzĩnↄↄ pariro, gↄ̃ↄn sↄraagↄ̃mɛ.  
\v 21 Í pì bé à dɛ a batisikɛna kɛ̀ è a mì sí tiaa taka ũ. Batisikɛna pì nɛ́ mɛ̀ gbãsĩgogona yãnlo, lɛ́gbɛ̃na Ludanɛ kↄ̃n nↄ̀sɛpuraaomɛ. È ń mì sí, kɛ̀ Yesu Kirisi bↄ̀ gaan yãnzi.  
\v 22 À gbãaa blè malaikanↄa kↄ̃n tãanↄo kↄ̃n ń gbãadeenↄ kↄ̃n ń ikodeenↄ, ben à tà ludambɛ, à kú Luda ↄplaazi.   
\c 4  
\s1 Bↄna kuuna ziin  
\p
\v 1 Lán Kirisi nawɛ̃a kɛ̀ a mɛ̀baan nà, apinↄ se à nↄ̀sɛ beee bori sɛ́, zaakɛ gbɛ̃ kɛ̀ nawɛ̃a kɛ̀ a mɛ̀baan, adee mì kɛ̃̀ durun-amɛ.  
\v 2 Gurↄↄ kɛ̀ gↄ̃̀are a kuuna guu, a dà zaaa tóngae dↄare aɛ dↄro, sé Luda pↄyezi.  
\v 3 A kuuna kifiinↄ yãkɛna guu yãa mↄ̀ lɛ. Yã á kú wísaiyãkɛna guu kↄ̃n mɛ̀baayã nidɛnao kↄ̃n wɛ̃dɛkɛnao kↄ̃n pãpã kↄ̃kↄ̃o kↄ̃n wɛ̃mikↄ̃kↄ̃ bɛ̃̀ɛo kↄ̃n tãagbãgbãna kɛ̀ Luda zàn-o.  
\v 4 Kɛ̀ eè kakↄ̃ańyo aↄ̃ pãpã bíta pì kɛna guu dↄro, è kɛńnɛ yãbↄnsaɛ ũ, ben aↄ̃è a tↄ́ zaaa sí.  
\v 5 Aↄ̃é ń yãkɛnanↄ tↄ̃kɛ̃ Ludanɛ, kɛ̀ à yãkpaɛkɛna kↄ̃n gbɛ̃ bɛ̃ɛnↄ kↄ̃n gɛ̀wãadeenↄ sorumi mà.  
\v 6 Wà baaru nnaa kpà baa gɛ̀wãadee pìnↄnɛ se, lɛ aↄ̃ e wàgↄ̃ kú ninikɛɛ guu lán Luda bà, baa kɛ̀ yã vɛ̃̀ɛḿma mɛ̀baa guu lán gbɛ̃ píngi bà.   
\s1 Ludayãdarinↄ  
\p
\v 7 Pↄ́ píngi yãana kà kĩi. Beee yãnzi àgↄ̃ kuu làakarideenↄ ũ, àgↄ̃ a zĩnda kũna dↄ̃, lɛ àgↄ̃ adua kɛɛ yãnzi.  
\v 8 Yã kɛ̀ dɛ à píngilaan yɛ̀: Àgↄ̃ yekↄ̃zi kↄ̃n nↄ̀sɛo do, zaakɛ yenzi è pↄ́ kúɛ durunnↄa pari.  
\v 9 À kↄ̃ yàari kɛ yãketekana sai.  
\v 10 Lán Luda gba dà a baadenɛ nà, à dↄokↄ̃lɛ ludangba bori doodo zĩkɛri maaanↄ ũ.  
\v 11 Gbɛ̃ kɛ̀ dɛ waazikɛri ũ, à Luda yã ońnɛ. Gbɛ̃ kɛ̀ dɛ dↄnlɛri ũ, à dↄńlɛ kↄ̃n gbãaa kɛ̀ Luda à gbào, lɛ à Luda tↄ́ kpá yã píngi guu Yesu Kirisi gãzĩ. Àmbe à gakui vĩ kↄ̃n gbãaao gurↄ píngi! Aami.   
\s1 Nawɛ̃akɛna tɛna Yesuzi yãnzi  
\p
\v 12 Ma gbɛ̃ yenzideenↄ, àton tó yↄ̃agwana pãsĩ kɛ̀ èe a lee bↄ a saɛ lán yã dufu bé à a lee bàro.  
\v 13 Lán a bà kú Kirisi nawɛ̃akɛna guu nà, à pↄnnaa kɛo, lɛ à e àgↄ̃ pↄnna bíta vĩ gurↄↄ kɛ̀ Kirisi pì é bↄ gupuraaa kↄ̃n gakuio.  
\v 14 Tó wà a sↄ̃sↄ̃ Kirisi tↄ́ kɛ̀ kúawa yãnzi, á aubarika vĩ, zaakɛ Luda Nini Gakuidee kúawa.  
\v 15 A gbɛ̃ke tón nawɛ̃a kɛ gbɛ̃dɛna ke kpãi'ona ke zaakɛna ke gudɛ yãnziro.  
\v 16 Tó a nawɛ̃a kɛ̀ a Yesudekɛ yãnzi, àton kɛare wíyã ũro. À Luda sáabu kpá kɛ Yesu tↄ́ kúawa yãnzi.  
\v 17 Zaakɛ wɛ́ɛtãmmagurↄↄ kà, Luda gbɛ̃nↄn à nàańyo. Lán wámbe à nàawao káaku nà, eé mì dɛ kↄ̃n gbɛ̃ kɛ̀ aↄ̃ gì Luda baaru nnaa mazinↄo diamɛ?   
\q1
\v 18 Zaakɛ gbɛ̃ maaanↄ mìsina kɛ̀ zĩ'ũ,  
\q1 yã é bↄ kↄ̃n ludayãdarisainↄ kↄ̃n durunkɛrinↄo diamɛ?   
\m
\v 19 Beee yãnzi gbɛ̃ kɛ̀ aↄ̃ↄe nawɛ̃a kɛɛ Luda pↄyezi guunↄ ń zĩnda na ń Kɛ̀ri náanɛdeenɛ a ↄzĩ, aↄ̃ↄ kpɛ́ gↄ̃ yã maaa kɛɛ.   
\c 5  
\s1 Luda sã kpàsa gwana  
\p
\v 1 Mɛ́ɛ lɛ́ daa a gbɛ̃nsinↄa sa. Gbɛ̃nsin ma ũ se. Má dɛ nawɛ̃a kɛ̀ Kirisi kɛ̀ sèedadee ũ, bensↄ̃ ma bà kú kↄ̃n gakui kɛ̀ eé bↄ gupuraaao se.  
\v 2 Àgↄ̃ dɛ kpàsa kɛ̀ Ludaa kàɛaree dã̀rinↄ ũ. À ↄ ligazi kↄ̃n pↄyezinao, èe kɛ tiasinlo, lán Ludaa yezi nà. Èe kɛ ↄↄwɛtɛna yãnzinlo. À kɛ kↄ̃n nↄ̀sɛo do.  
\v 3 Àtongae gbãaa ble gbɛ̃ kɛ̀ wà ń náare a ↄzĩ pìnↄaro. À tó a kuuna gↄ̃ a sãa pìnↄ daa zɛ́a,  
\v 4 é kífura kɛ̀ à gakui è yãaroo e gurↄↄ kɛ̀ Sãdãriki é mↄ́.   
\p
\v 5 A gↄ̃kparɛnↄ sↄ̃, à a zĩnda kpá gbɛ̃nsinↄa. A píngi à a zĩnda busakↄ̃nɛ, zaakɛ:  
\q1 Luda è íbɛtɛ kpá kↄ̃n ĩadãrinↄ,  
\q1 mↄde à gbɛ̃kɛɛ vĩ kↄ̃n zĩndabusarinↄ.   
\m
\v 6 Beee yãnzi à a zĩnda busa Luda gbãadeenɛ, eé a sɛ́ lezĩ gurↄↄ kɛ̀ à dìɛa.  
\v 7 À a yã'ↄ̃ammanↄ tónɛ píngi, zaakɛ è làakari dↄawa.   
\p
\v 8 A wɛ́ɛ gↄ̃ dↄ, àgↄ̃ kú a làakaria. A ibɛɛ Ibilisi dɛ lán músu ↄ́ↄdↄri bàmɛ. Èe kpáɛ kɛɛazi, èe gbɛ̃ wɛtɛɛ à kũ.  
\v 9 À gínɛ, à zɛ gbãa ludanaanɛkɛna guu, zaakɛ á dↄ̃ kɛ̀ a Yesude daa kɛ̀ aↄ̃ↄ kú anduna guunↄ ń píngi e nawɛ̃a dↄ̃nkↄ̃ pì kɛɛmɛ se.  
\v 10 Luda Aubarikapingide a sisi a gakui kɛ̀ è yãarooa Kirisi guu. Tó a nawɛ̃a kɛ̀ féte, eé a bↄ maa, eé a zɛ gíngin, eé a gba gbãaa, eé a kãsãa pɛ́ɛ.  
\v 11 Àmbe à gbãa vĩ ai gurↄ píngi! Aami.   
\s1 Lɛ́zammana  
\p
\v 12 Wa gbɛ̃ndo Silasi bé à lá nɛ́ngo kɛ̀ kɛ̃̀mɛare. À kuumɛ gbɛ̃ náanɛdee ũ. Ma lɛ́ dàawa, má dɛ à sèedadee ũ kɛ̀ yã kɛ̀ má ò dɛ Luda gbɛ̃kɛ yãpuraa ũ. À zɛo gíngin.  
\v 13 Babilↄnu gbɛ̃ kɛ̀ Luda ń sɛ́ lán a bànↄ ì kpàawa. Ma nɛ́ Maaku ì kpàawa dↄ.  
\v 14 À ì kpákↄ̃a kↄ̃n lɛ́pɛkↄ̃anao yenzi guu. Luda amↄa kɛ̀ á kú Kirisi guunↄ gba aafia a píngi.