\id EPH - Bayso New Testament
\ide UTF-8
\h Efesooni
\toc1 Kafaramero P'awuloosakkoki Handdaa Kaɂefesooni Ibaaddo Tos
\toc2 Efesooni
\toc3 Efe.
\mt2 Kafaramero P'awuloosakkoki Handdaa
\mt1 Kaɂefesooni Ibaaddo Tos
\imt Tabano
\ip P'awuloosa Kaɂefesooni ibaaddon kas'aafera handdaa dubbaankkona hore kinttib kakkosisara «Halchcha kawaa goggolleeroo daruurnna uliinna kagira met't'ajjool dubba isiɂaatire koo kakiristoosa odonnati hegelii tagirraan arri kakkogeete gorataayya» (1:10) taɂamatto k'ofaayiya. Adena Yesuusa Kiristoosane wota koo liigureen sannii taɂibaaddo dubba too goggolleeto hikka kaɂatii halchcha felooyi goggohayisiraanun gosa kashaadisaroyya.
\ip Handdaa kaɂefesoonii tahoraarjjee banɂee s'aafiti raattonatikokki gara tahaggabero metetti k'ofa balɂaasaa, Waa odo gosakkeessa misii assaabatero, erekkeessa Yesuusa Kiristoosaa c'ubbokkisoowun haheso amamano helateeren misii iso balchchanɂi leeraan, kaɂatii kaɂabddii haafura kawaa Ayyaana K'ulluukkokki garane misii addeesamero tusara, tallami banɂee ade s'aafiti onabbabaraan raattokki girikisooyi Kiristoosaayi kaɂabaan raattonati karrummii goggolleeroo iso misii girin dootisaro shaadisara.
\ip Ibaaddo Kiristoosane wota taɂabo esella misii raattonati abo kalekaleekki lefikko bee kaɂayeesamaro ayeesii mutera, min kawaa maar malee golleero Kiristoosa ade maarkokki mete maleeya, min kawaa gimbbe aani golleero Kiristoosa ade minuun mina afarruun metekki eɂemoyya, min kawaa oori malee golleero Kiristoosa ade entterya, s'aafiti gara kakiristoosane tamuttetto sino tawaa aaloo saadisaa kakkoɂayeesiro goorata golate kagiro ayees tusara, ayees dubba usu kakkodeyaara takiristoosa geelanjjee, jaarsso laanokkeessa, haheso amano, sinonna nogoddakokki garaneya
\iot Raattoo Hikki Mas'aafa Kaɂabera
\io1 Tabano \ior 1:1-2 \ior*
\io1 Kiristoosana min kawaanna \ior 1:3—3:21 \ior*
\io1 Kiristoosaa kahelamaro giri kaɂusub \ior 4:1—6:20 \ior*
\io1 Gudisano \ior 6:21-24 \ior*
\c 1
\p
\v 1 Feɂi tawaayi Yesuusa Kiristoosayi kafaramero P'awuloosakko, Yesuusa Kiristoosaa oɂabddameeraan,\x - \xo 1:1 \xo*\xt Ofa. Fe. 18:19-21.\xt*\x*
\p Taɂefesooni katamaayi ogiraan k'ullooleewun,
\p
\v 2 Waa Aabbokkaani Goottaa Yesuusa Kiristoosakkotti sinonna nogodda isinuun halleeto.
\s1 Kiristoosaa ohelamaraan somma oɂayyaana
\p
\v 3 Daruurii ogiraan somma oɂayyaana dubbaa Kiristoosaa no kasommaasatera Goottakkaanikki Yesuusa Kiristoosakkokki Hedona odo kalleera Waa hagalataamo. 
\v 4 K'ulluunɂina tuffi kallayinɂi linne geelanjjee usu hore goggomunttoo alami hamet'amoon giraan horaarjje Kiristoosa no assaabe. 
\v 5 Feɂi tawaa taɂidan leetedde Yesuusa Kiristoosan yiis goggolleennon t'aye murttessee. 
\v 6 Hikkina kageelaamero erekeessakki garane dannabaa noon tasisero takabajaanttetto sino goggosommaasanttoya. 
\v 7 Sino tawaakokki ammagamanokko kakkeeyi erekkeessakki iigi wodoo leenenne c'ubbokkaanikkona haheso amamano helanne.\x - \xo 1:7 \xo*\xt K'ol. 1:14.\xt*\x* 
\v 8 Sinotteessa k'arummana malabano dubba jiinase noon sise. 
\v 9 Waa anjjirettessaa Kiristoosakokki garane t'aye goggohalchcherokki malee feɂitteessatti hool goggoɂaddeensso yele. 
\v 10 Goorata goggee Waa felo gutii kahaayisinara halchcha daruurnna ulii taggitta met't'a dubba raattoo koo kakiristoosa odonnati hegelii goggogirttonya.
\p
\v 11 Ayees dubbana feɂitteessa kafelara Waa t'aye goggohedero malee kakiristoosakokki garane unatteessa goggolleennon no assaabera. 
\v 12 Hikkina kakkonlleera Kiristoosa abddi yelataa ohoree olleenenna kabaja tawaa galataanooyi goggotunssonya.
\p
\v 13 Isinna fayyinnakkisinkotti odu taɂidan kalleero haafura karrummii kakkomaaltteen gooratta Kiristoosa ammantteettaan, adena, usu isinuun sisin abddi goggosiseroo Ayyaana K'ulluukki attamantteettan. 
\v 14 Hikkina ayyaana kabajatessaawun galata goggogeeron Waa oottessa olleeraan dubbaan taa wodoo leeroo helayiin taginno rittittaaniwun k'abdoottaaniya.
\s1 P'awuloosa ibaaddo kaɂefesoonin ebaate
\p
\v 15 Haanssun Goottaa Yesuusaa isin kaɂabttan ammanona k'ulloolee dubbaawunna taɂabttaan geelenjje takkomaale arrikko haggaɂabere, 
\v 16 Ani isin ebii shaada isin maraan Waawun galata sisano lakkoɂiisero. 
\v 17 Kabajja kakkoondootisaro Goottakkaani kayesuusa Kiristoosakokki Hedo kalleero Waa aaloo goggoɂaddeessanun Ayyaana kawaakko talleetetto k'arummana muteen isinuun goggosisiroo ani ebaatara. 
\v 18 Isin misitti abddii uumantteettaanna k'ullooleel taɂeelinnara takabajjaa rittii eeggitatti tammooggantto isin goggoɂaddeessanun wodanatisinkkonɂi ilɂo goggodeenddenawun ani ebaatara. 
\v 19 No Waa oɂammanannoon dubbaankko kaɂatii kalleero hunnakkessa goggomalabttaanun ani ebaatara, hikki hunnana usu aani kaɂatii ataankkeessakki felooyi,\x - \xo 1:19 \xo*\xt Mez. 110:1.\xt*\x* 
\v 20 Kiristoosaa goyikko keesere tadaruuree banɂee mina tamerggee hamas'isaa mutera. 
\v 21 Waa odo Kiristoosa daruurii merggetteessayi kahamas'iisera maamisikki k'alaadakkona odonnati hunnakkona Goottanatikko usumaleenna hikka kagiddanee gees kaalaal anlleennon kaɂemeeyinaro geesii golleenna mege dubbakko karooraro kakkabajaame mege sisanooyiya. 
\v 22 Waa ayees dubba odonnatikkeessa hegelii bariise, min kaɂebinna dubbaankko karooraro goggolleeroo mete yele shuume.\x - \xo 1:22 \xo*\xt Mez. 8:6.\xt*\x* 
\v 23 Min kaɂebi kakiristoosa maarya, Kiristoosana min kaɂebiinna banɂe dubbaa kameen dubba kaɂammagaro ammagamanokkeessaya.\x - \xo 1:23 \xo*\xt K'ol. 1:18.\xt*\x*
\c 2
\s1 Kiristoosaayi arddonɂi laano
\p
\v 1 Isin baasikkisininna c'ubbokkisinkkotti aalanttii gootteen gitteen. 
\v 2 Usu goorata hikka alamikkokki raa kameellan sesseetaa gitteen, usumaleenna ambbali gutii ogiraan ayyaanajjol kameellankokki hunnajjool kabariisaroon ajajaama gitteen, usuna kaɂajajaamon ibaaddo gutii kafelaro battiikki ayyaanaya. 
\v 3 Noo dubbana hittakko horeene iso t'eɂee feɂi tasooyetinna sammuuttanikokki yaada debee sesseetaa halchchakkaani kasooyeti ginne, noonna kakkalee aani met't'ataani engge tawaa hegelii ginne.
\p
\v 4 Ayesuun goɂameen shaagakkessaa dureessa kalleera Waa noon taɂabo taɂatii geelanjjekko kakkeeyi, 
\v 5 Baasikkanii ogoone leenne giraan, Waa Kiristoosa arddonɂi yele; isin kakkofayyiteettan sinotteessayiya.\x - \xo 2:5 \xo*\xt K'ol. 2:14.\xt*\x* 
\v 6 Waa kiristoosane wota no goyikko keesera; Kiristoosa Yesuusaa banɂe tadaruureti no usuneta hamas'iisera. 
\v 7 Hikkina kaɂemeetaro geesii Kiristoosa Yesuusaa noon tattusero meessa kallayitti sinokotti durumma tusinya. 
\v 8 Isin kakkofayyiteettan kaɂammano garane sinooyiya, hikkina ilabo kawaayya kuwaarre isinkko lakkoyo. 
\v 9 Maayyona goggot'aadanonkko taffayyinna sino kakkohelanttetta felooyi lakkoyo; 
\v 10 Aalanttina, Waa t'aye noon oɂekkaasero felo oɂidan goggofelnno Kiristoosa Yesuusaa omet't'aaminenno met't'a tawaanna.
\s1 Kiristoosa koo laano
\p
\v 11 Haanssun isin t'ayteen alattaanii Ayizaab olleeteettan, Ayihuudi gene taɂibaaddoyi hamas'iisamanoo dhaadataa isin ohamas'iisamoongittan amaa isin habaaraa kagireen shaada. 
\v 12 Usu geesii Kiristoosakko kalebeeteddeen, Isiraɂeelne wota unallaanakko fakkintteeddeen taɂammattoo abiddiin allagggatteen; alami gutii abddi kallayinna Waa kallayi goggogitten shaada. 
\v 13 Gidda goɂameen isin hitakko horeene fakkintteen ogitteen Yesuusa Kiristoosa leeteddeen iigikkeessa gabbalantteettan.
\p
\v 14 Ayihuudina Ayizaabna koo kayelara, kalekalee yeltte tagitte taɂenggee gimoo\f + \fr 2:14 \fr*\ft Taɂenggee gimoo kaɂamara haafura katusara Ayihuudina Ayizaab t'eɂee kagire ammanokokki kaleenna tusara. \ft*\f* kadiigera nogoddakkaani usuya. 
\v 15 Ajaja kaseera wogane wota sooɂootteessa tire. Yaadakkeesana gosa lamakko koo kaɂusubkki ibaaddoti issii met't'ire nogodda kayiinya. 
\v 16 Masik'alii gutii gowaanoyinna diinannati tire, lama dubbana maar koo yelere Waanneta wogarise.\x - \xo 2:16 \xo*\xt K'ol. 1:20.\xt*\x* 
\v 17 Emeetegure fakkintteen ogitteen isinuunna, gabbalame kagire Ayihuudin kanogoddaa wongala lallabee.\x - \xo 2:17 \xo*\xt Isa. 57:19.\xt*\x* 
\v 18 Noo dubbana garakkeessne ayyaanakkooyi odo tos gabbalamiin daanddeenenna.
\p
\v 19 Hikkakko kakkeey isin k'ulloolee wota ul kookki ibaaddottan, Waawun kaminee ibaaddottan kuwaarre, goortta hittakko danbbeebaan ul kaɂibaaddokokki ibaaddona martti lakkottaan. 
\v 20 Ofarameeraaniinna kahegeroolkokki ukumii dhaabbattettaan. Mina afarruun libe kalleera Kiristoosa Yesuusaya. 
\v 21 Libeenna min dubba raattoo iinsseɂabayire kagootta k'ulluukki min kawaa liin jiinatara. 
\v 22 Isin addeen Waa ayyaanakkeessayi kakkobaraaro min liin raattoo Kiristoosa gimbbamattan.
\c 3
\s1 Ayizaabn kafarame P'awuloosa
\p
\v 1 Hitta aalanttii ani p'awuloosa Yesuusa Kiristoosan kashaame kakkoonlleera isin Ayizaabn maraanya. 
\v 2 Laɂo tattisin maraan iin tasisantetto sino tawaa handdaanokkee ogiraan maaltteettan. 
\v 3 T'aye gabaabbinnaa ani goggos'aaferoo; Waa hooltteessa addeesise raagaayi iin tusera. 
\v 4 Goortta isin hikka nabbabbaa giraan, takiristoosa hool ani misiɂmisii shaadaro addeesin daanddaattan. 
\v 5 Hitti hool k'ulloolee ofarameeraawunna kahegeroolun gidda kamutero gitakki kahorkkoo ibaaddon lakkomutere. 
\v 6 Hitti hool, Ayizaab gara kawongalane Isiraɂeelne wota raattoo oɂeelinaraan, maar kookki mikitaal liireen usumaleenna Yesuusa Kiristoosa talleetetto abddii raattoo ohedeedamaraan laanoyiya.\x - \xo 3:6 \xo*\xt K'ol. 1:26-27.\xt*\x*
\p
\v 7 Waa hunnakkeesanɂi felooyi iin kasisero kasinoo ilabo aninna hikka wongalaan kahandaaro leera. 
\v 8 Maamisiinna ani ade k'ullooleel dubbakko kayeraataro goleenna, tak'ok'k'oramoon durumma takiristoosa Ayizaabn goggolallabiroon hitti sino iin sisantte. 
\v 9 Usumaleenna dubba kamet't'eero Waayi karoorero geesijjool siyameen ogiraan hinɂa felo konɂi hool dubbaan goggotusiroo iin sisame. 
\v 10 Yaadakkeessana gees kaɂarkkaneetii min kawaakokki garane middi tammooggan taɂabtto k'arumma tawaa banɂe tadaruureti ogiraan woyichchaalunna odonnati oɂabaawun goggoɂaddeesanttoonya. 
\v 11 Hikkina Yesuusaa Kiristoosa Goottakkaani kafelero jiruu jiroommakki halchcha maleeya. 
\v 12 Usuna usuu gutii kagiro ammanokokki garane, balchchummana jabuu taɂabtto wodanaa Waa tos gabbalamiin daanddaanna. 
\v 13 Haanssun kabajjattisin kalleero isin maraan in tageetetto rakkooyi abddi goggogoosannonkko hadara amara.
\s1 Ul kaɂefesoonikki amaniilun kaɂebaamero ebi
\p
\v 14 Goortta ani Waa Odo horee gilbkkeeyi gilbbisere kakkoonɂebaatara hitta aalanttiinya. 
\v 15 Daruurnna ulii kagira min kookki ibaaddo mete metee Waakko mege helayinara. 
\v 16 Maar kaɂorroo kakkisinii goggoɂataattaanun, ayyaanakkeessakkokki garane kabajatteessatti durummana hunna isinuun goggosisiroo ebaatara. 
\v 17 Hikkina ammanoo Kiristoosa wodanattisinii goggobarirooya. Adena hidiid dagisideene geelanjjee dhaabbayiddeene, 
\v 18 Takiristoosa geelanjje balɂaanna, eeraanna, t'ok'k'imanona boollana eeggitakkiyo k'ulloolee dubbane wota kakkoɂaddeesankokki hunna goggohelataawunya. 
\v 19 Hikka malabano kaɂibaaddokko taroorttetto geelanjje takiristoosa goggoɂaddeessawun ammagamano kawaayi ammagamiin goggoɂekkaattaawun ani ebaatara.
\p
\v 20 Goortta no orroo goggofelaroo hunnakkeessakokki jilbbaa malee kaɂebaatannokko goorttun kahedatanno dubbakko aaloo roorisi felin kadaanddaro, 
\v 21 Min kawaa orroo usumaleenna Yesuusa Kiristoosaayi, geesjjool dubbaa jiruu jiroommakko taa jiruu jiroomma geeroon kabaja usuun halleeto hamiinɂi.
\c 4
\s1 Kiristoosaayi maar koo laano
\p
\v 1 Goortta Goottawun handdaanoyi kashaame kalleera ani, isin takkoɂuumantteettan uumitii kadootisaro giri goggogirttaanun ani isin ebaatara. 
\v 2 Geelanjjee isiɂisirroo obssaa arggetto fayyankkanɂina oɂidan laa; geelanjjee isiɂisirroo daanddaano gira.\x - \xo 4:2 \xo*\xt K'ol. 3:12-13.\xt*\x* 
\v 3 Kanogoddaa shiyaamano ayyaanakkokki raattonati oorayin ataayeen. 
\v 4 Kakkoɂuumantteetten goorata abddi toowun goggoɂuumanttettaan malee maar koonna Ayyaana kooyya kagira. 
\v 5 Usumalee Goottaa koo, ammano koonna t'ink'ata kooyya kagira. 
\v 6 Adena dubbaankko karoorara, dubbaa gutii kafelara, dubbaa gutii kagira, dubbaan Odo kalleera, Hedo kooyya kagira.
\p
\v 7 Ayesuun goɂameen Kiristoosa sisin goggomurttesserokokki jilbbaa mete metee sino noon sisanttetta. 
\v 8 Haanssun,
\q1 «Eleddee kakkobeere goorata, obojaameeraan boojee,
\q2 ibaaddowunna ilabo sise» goggoɂamamerooya.\x - \xo 4:8 \xo*\xt Mez. 68:18.\xt*\x*
\m
\v 9 Hayya hikki, «Eleddee beera» amano ade ul tos hegelddee dagera amano gollee kuwaarre kakkalee me amanoya? 
\v 10 Hegelddee kadagera, met't'a dubba alamii goggoɂammaganttoo ele daruurkko kaɂemeetera usu usuwaya. 
\v 11 Usuna kookkoo ofarameeraan, kookkoo hegerool, kookkoonna wongala olallabaraan, kakkalee ade ibaaddo kawaa ofoofaraanna oɂagaalssisaran goggolleerawun ilabool kasisera usuya. 
\v 12 Hikkina kakiristoosa una kalleere min kawaa goggodhaabbaro, ibaaddo kawaa handdaa kawaatuun ekkaasinya. 
\v 13 Hikkina kakkoonllinnara, no dubbana ere kawaa ammananonna malabanon kahelamaro raattonati tos emeetanona kanjjinkki ibaaddo laano, Kiristoosaa kahelamaro ammagamano tos taageennoonya. 
\v 14 Goortta taɂibaaddo miiggeeyi shirsanona sobaanjee kaɂekkaatero kashirisaro agaalssisii ambbal iriggadoyi hasserraa hittarraa shafamere kaɂiyaaro yiis aani lakkolleenno. 
\v 15 Haa kallaarokko rummi geelanjeeyi ayeesaa kaɂameen dubbaan mete kalleero Kiristoosa tos jiinayinanna. 
\v 16 Kalekaleekki kamaaree mikitajjool kakkoɂeselara Kiristoosaya; maar dubba kakkoɂabamera mikitaalkeessayiya; haanssun mete metee kamaaree mikita usuun osisameeraan felo gofello maar dubba jiinatara; geelanjjeenna dhaabbatara.\x - \xo 4:16 \xo*\xt K'ol. 2:19.\xt*\x*
\s1 Kiristoosa kahelamaro kaɂusubkki giri
\p
\v 17 Goortta yaadakiso addakki kalleero Ayizaab aani aroogirtten ame mege kagoottayi seerara; 
\v 18 Sammuutiso duuddetta; malabanowaattinna t'iibbettisookotti aalanttii Waa kasisaro girikko fakkimeraan. 
\v 19 Iso mulla mankkowaaten maraan battiikki ayees dubba felin isiɂoottisoo halchcha kasooyetun roorissateen sisateen.
\p
\v 20 Isin goɂameen Kiristoosa kakkoɂaddeesseettan hikka aankkikki raadii lakkoyo. 
\v 21 Ogiraan garakkeessa maaltteettan; Yesuusa tagitto rummina usukko agaalsattettaan. 
\v 22 Haanssun sobere c'ubbo tos kageesaro halchcha kameellan t'ayteen kakkogitteen, tadoɂantti met't'akotti yadalii tira.\x - \xo 4:22 \xo*\xt K'ol. 3:9. \xt*\x* 
\v 23 Sammutisinna wodanattisin haɂusubaatto. 
\v 24 Karrummii muc'c'iɂamanona k'ullummaa masuussa kawaayi kamet't'aamero kaɂusubkki maar sarssayeene.\x - \xo 4:24 \xo*\xt Met'. 1:26; K'ol. 3:10.\xt*\x*
\p
\v 25 Haanssun t'ara arooɂayeesseen; no dubbana maarkokki mikitaal mankkolleeren maraan isiɂisiɂorroo rummi ayeenssa.\x - \xo 4:25 \xo*\xt Zak. 8:16.\xt*\x* 
\v 26 Hadisa! Ayesuun goɂameen, «C'ubbo aroofeltteen» goggoɂamameroo, isin iɂootteen giraan arriti arooɂiinno.\x - \xo 4:26 \xo*\xt Mez. 4:4.\xt*\x* 
\v 27 Durrisa kakkotabiro banɂe aroossisseen. 
\v 28 Hetaa kagire hittakko horenbbaan arooheto; haa kallaarokko karrakkatewun sisin maragade goggowaattamonkko genetteessa kaɂidankki ayees hafele. 
\v 29 Hiɂittisinkko kameellan ayees duuddo aroobbeenno; ayesuun goɂameen omaalaraawun kageggelaayisirona muc'c'isin kagarggaarro ibaaddowunna kadootisaro haafura ayeesaa. 
\v 30 Wodoo takkobeyaattan arrii ato isinuun goggolleeroo kakkoɂattamantteettan Ayyaana kawaa arook'uk'amisseen. 
\v 31 Okokonjjee, amaraan, iɂoo, iyya, habaarnna, maamisitti meellanena dubba isinkko fakki haɂantto. 
\v 32 Haa kallarokko isin isisiɂorroo oɂidanɂina shugonɂi onenɂeeyisaattan laa; Waa Kiristoosaa haheso isin goggoɂamiroo isinna isiɂisiɂorroo haheso ama.\x - \xo 4:32 \xo*\xt K'ol. 3:13.\xt*\x*
\c 5
\s1 Ifaa orroo girano
\p
\v 1 Goortta kageelaamero yiis aani isinna masuussa kawaayi sesseen. 
\v 2 Kiristoosa no goggogeelateroo Waa kageeggelayisiro taɂidantti urit kaɂabo meebaanna jaarsso yele girikeessa no maraan roorisate goggosisateroo isinna geelanjjee gira.\x - \xo 5:2 \xo*\xt Biy. 29:18; Mez. 40:6.\xt*\x*
\p
\v 3 Hikka aankkikki ayees k'ullooleewun mankkodootisoon maraan sharmmut'umma goorttun maamisikki kabattoye kookona goorttun gap'igap'aano duuddo isin dollee aroomaalssamo. 
\v 4 Haa kallaattankko Waawun galata sisa kuwaarre kak'uk'amisirona kagowummaa ayees, goorttun kak'oos ayees ayeesano lakkodootisaro; hikka aankkikki ayees isinuun lakkodootisaro. 
\v 5 Sharmmut'umma golleetena, maamisikki battiikki ayees kafelero gollee, goorttun tolchcha hedoyisatanona gap'igap'aano gollee, Kiristoosaanna wononnati kawaayi rittii kahelannon laano addeesa.
\p
\v 6 Hikka ayeeskkotti aalanttii kaɂajajaamon ibaaddo gutii engge tawaa mankkoɂemeeyinatto maraan maayona kamaaddinon ayeesii isin aroosobo. 
\v 7 Haanssun hikka kaɂajajaamon ibaaddone wota aroo leeteen. 
\v 8 T'ayteen isin mugudii gitteen; gidda goɂameen ogootta mankkolleeten maraan ifattaan; Haanssun ifaa kagiro ibaaddo aani sesseeyene. 
\v 9 Taɂifa il idanee, k'ullummanna rummii dubba dollee gitta. 
\v 10 Haanssun Goottaa kageggelaayisira ayees meyyo k'ok'k'ora. 
\v 11 Ifa tos beesaddeen tusa kuwaarre il kallayinɂi omugudi felone wota maamisitti esellana aroogginno. 
\v 12 Mugudii kagira ibaaddo siyame kafelaro ayees ayeesin mullaara. 
\v 13 Kaɂameen dubba ifaa tos gobeero tarummi middi diidaa bee mutatta. 
\v 14 Aalanttina ayees dubba goggomutiroo kayelara ifaya; haanssun,
\q1 «Ati kahudduratta nabbaadina!
\q2 Goyikko ki Kiristoosa kuun haank'ayisinara» amamera.
\p
\v 15 Goortta misii girnnattaan isiɂoorayeen shaada; k'arumma kaɂabo aani kuwaarre gowolee aani aroogirtten. 
\v 16 Hikki gees kameellankki mankkollee maraan maagoreenna taɂeselatto esellaa laɂo biyaa.\x - \xo 5:16 \xo*\xt K'ol. 4:5.\xt*\x* 
\v 17 Haanssun feɂi tawaa metto shaada kuwaarre gowolee aroolleeten.
\p
\v 18 Ayyaanaa ammagama kuwaarre t'amo kawooyiniiti aroosetiteen, hikkina darɂaatanoya. 
\v 19 Mazamurinna hedoyisatanoo, kaɂayyaana yaaye isi isiɂorroo ayeesaa; wodanattisinii Goottaa galataa. 
\v 20 Goottakkaani Yesuusa Kiristoosakokki megee kaɂameen dubbaawun Waa odo arggetto sommaasayeen.\x - \xo 5:20 \xo*\xt K'ol. 3:16-17.\xt*\x*
\s1 Kaɂoorinna kaɂenttereekokki gara
\p
\v 21 Takirisitoosa kabajaan amaddeene isiɂisi orroo koo kakkaleetun ajajaama.
\p
\v 22 Isin oorijool! Goottaa Yesuusaan goggoɂajajaamattaan malee entterjjoolkkisinunna ajajaama.\x - \xo 5:22 \xo*\xt K'ol. 3:18; 1 P'et. 3:1.\xt*\x* 
\v 23 Kiristoosa min kawaa mete goggolleeroo entternna ooriwun meteya; adena Kiristoosan maar kakkoleeron min kawaakokki fayyinnaya. 
\v 24 Min kawaa Kiristoosan goggoɂajajaamaroo usumalee oorijool kaɂameen dubbaa entterjjolun haɂajajaame.
\p
\v 25 Isin entterjjolnna! Kiristoosa min kawaa goggogeelateronna isiɂoottessa roorisate goggosisateroo isinna oorijoolkisin geelayene.\x - \xo 5:25 \xo*\xt K'ol. 3:19; 1 P'et. 3:7.\xt*\x* 
\v 26 Kiristoosa hikka kakkoonyelera min kawaa muc'c'isin dootereyya; kakkomuc'c'iserana gara kahaafurane bekeeyi aalisereya. 
\v 27 Hikka garaayi min kawaa t'ork'k'e goorttun hore meelilisano goorttun hikka aankkikki kakkalee kameellan ayees hamutooni k'ulluutti, koonna ayees kallayittina taɂidantti yelate isi tos gabbalatara. 
\v 28 Usumaleenna entterjjol isiɂoottisoo goggogeelatarankki malee oorijoolkisoo geelatano dootisara; ooritteessa kageelaatara isiɂoottessa geelaatara. 
\v 29 Maarkkeessa kadiidara maayona laagiro; duuddowa Kiristoosa min kawaatun goggoyelarokki malee isiɂoottessa aamisatara; karkkaraatara. 
\v 30 Noonna kakiristoosa maarkokki mikitajjoolnna. 
\v 31 Haanssun ibaaddo Aabbokkeessana Aayetteessana iisere, oorine wota k'urannaamaran; lama dubbana maar koo laaran.\x - \xo 5:31 \xo*\xt Met'. 2:24.\xt*\x* 
\v 32 Hitti hool taɂatii hooltta; hikkana kaɂamara Kiristoosa maraanna min kaɂebi maraan masuussa yelereya. 
\v 33 Ayesuun goɂameen hikki ayees isinna fakkaatara; haanssun entter oori isiɂoottessa aani yelayire hageelaato; oorina entterkisee hakabajiito.
\c 6
\s1 Oɂumuleeraanna yiiskokki gara
\p
\v 1 Yiiso! Isin oɂumuleeraawun Goottaayi ajajaama; hikki kadootisaroya.\x - \xo 6:1 \xo*\xt K'ol. 3:20.\xt*\x* 
\v 2 «Aabbokkaanna Aayettanna kabajiina» kaɂamara ajaja kaɂabddii haafura kakkogira kahoraarjjee ajajaya. 
\v 3 Hikka kaɂabddii haafurana, «Kaɂameen dubba ekkaarowa; hikka uliinna geeskakka eeraarowa» kaɂamaroya.\x - \xo 6:3 \xo*\xt Biy. 20:12; Ada. 5:16.\xt*\x*
\p
\v 4 Oɂumultteettaanna! Isinna Goottaa Yesuusaa woga agaalssisanoyi, tukkul umisaanna hadisaa jiinasa kuwaarre yiiskisin iɂooyi aroomararisseen.\x - \xo 6:4 \xo*\xt K'ol. 3:22-25.\xt*\x*
\s1 Goottajjoolnna diyyijjoolkokki gara
\p
\v 5 Isin diyyijjool! Kiristoosan goggoɂajajaamattaani ulii goottolee olleeraanun kabajaayinna abssii, wodana tukkulttii ajajaama. 
\v 6 Isitusayinna isoo dollee saadamiin alleenon giraan kakiristoosa diyyijjool aani feɂi tawaa wodanakko felin ajajaama. 
\v 7 Ibaaddo anlleennon giraan Goottawun kahandaattan laano addeesaddeen feɂittisinii wodanakko handdaa; 
\v 8 Aalanttina, diyyina leere balchchakki ibaaddo kafelaro kaɂidankki ayees dubba barɂaara Goottakko kaɂatayinnaro laano kassanwa.
\p
\v 9 Isin goottolee! Ibaaddo hore kaɂululisoon kakkisinna kakkiso Goottaa daruurii kagiro shaadaa; abissiisano iisaddeene diyyiilkisinun idane fela.\x - \xo 6:9 \xo*\xt Ada. 10:17; K'ol. 3:25; 4:1.\xt*\x*
\s1 Kawaa huu kajereene
\p
\v 10 Goortta kagootta kaɂatii hunnaa ataayeen. 
\v 11 Odurrisa felo omiiggee neebaayin goggodanddeetawun kawaa huu kajereene dubba sarssayeene. 
\v 12 No jereen kanneshafayinanna ibaaddone wota anlleennon giraan hikka kamugudi geesii ofelaraan mootijjolnnee, odonnati oɂabaannena hikka alamikokki hunnajjoolnne goorttun hikka amano daruurii ogiraan battiikki ayyaanajjolnne wotaya. 
\v 13 Haanssun tameellan arri hunna kadiina awodayiin goggodanddeetanunna kaɂameen dubbana gudisiddeene ataayi aallin goggodanddeetanun kawaa huu kajereene dubba abayeen.
\p
\v 14 Goortta rummi zinnaara aani mooɂootisin mowayeeddeene, k'ullumma laala aani sarssayenddeene,\x - \xo 6:14 \xo*\xt Isa. 11:5; 59:17.\xt*\x* 
\v 15 kanogoddaa wongala keferro aani luk'k'aɂoottisinii tabssayeenddeen ekkaasayen aallaa.\x - \xo 6:15 \xo*\xt Isa. 52:7.\xt*\x* 
\v 16 Hikka dubbakkona eleen aani baldabalda taɂamatto tadurrisa dukutto dubba baasin kakkodaanddetaan ammano wontte aani k'eenffayeen. 
\v 17 Fayyinna tamete gulle aani metekisinii kaayen; usumaleenna Ayyaana K'ulluukikko kahelamaro shiifa usuna haafura kawaa abayeen.\x - \xo 6:17 \xo*\xt Isa. 59:17.\xt*\x* 
\v 18 Arggetto Ayyaana K'ulluukki k'ajeelaa ebina galata sisa. Hikka garaayinna Waa kak'ullooyisero ibaaddo maraan nabbaadaddeenna ataayeenddeen ebaayen. 
\v 19 Hool tawongala abissi kallayi goggofurroo, kakkoɂayeesaro gooratana kadootamara haafura goggosisamiroo iinna ebaayen. 
\v 20 Giddanna sanssalataa shiyaamere ani hikka kawongala handdaa kageggeyisaroya. Haanssun iin goggodootisaroo abissi kallayi goggoɂayeesiroo iin ebaayen.
\s1 Gudiskotti nogodda
\p
\v 21 Meyii orroo girona me ani felaro goggoɂaddeessawun kageelaamera abbikkaanina Goottaayi kaɂabddamera kahandaaro kalleera Tikik'oosa kaɂameen dubba isinuun segirowa.\x - \xo 6:21 \xo*\xt Ofa. Fe. 20:4; 2 T'im. 4:12.\xt*\x* 
\v 22 Haanssun no misii ginno goggomalabttanunna isinna goggoɂataayisiroon amere usu isin tos ani farera.\x - \xo 6:22 \xo*\xt K'ol. 4:7-8.\xt*\x*
\p
\v 23 Waa odokkona Goottaa Yesuusa Kiristoosakko nogoddana, geelanjje, ammanone wota abbilaalun halleeto. 
\v 24 Tanbbaanon geelanjjee Goottakkaani Yesuusa Kiristoosa ogeelaataraawun dubbaan sino isoon halleeto.