\id 1TI - Bayso New Testament
\ide UTF-8
\h 1 ጢሞቶሳ
\toc1 ካፋራመሮ ጳዉሎሳኮክ ሀንዳ ካሆሬ ጢሞቶሳ ቶስ
\toc2 1 ጢሞቶሳ
\toc3 1 ጢሞ.
\mt2 ካፋራመሮ ጳዉሎሳኮክ ሀንዳ ካሆሬ
\mt1 ጢሞቶሳ ቶስ
\imt ታባኖ
\ip ጢሞቶሳ ካአማማረ ዋ ካአማናረ ዎዳላት አላታኑን ትጫርት እስያ ካአማማሮ ኡልኮክ ጎሌሮ፥ አዉን አይሁድ፥ ኦዶን አደ ግሪክየ፤ ጳዉሎሳን ካፈሎ ሳትና ታዎንጋላ ፋሬኑን ኤነ ካጋርጋራረየ፤ ጳዉሎሳ ጢሞቶሳን ካጻፈረ ካሆራርጄ ሀንዳ፥ ሴድ መተ መተክ አየስ ጉት ክንትቢ ካአባመሮየ።
\ip ዱባንኮና ጣይሳ ሀንዳኬሳ ምን ካዋይ ኦሮ ኬ ማንኮግረ ማራን ካጣራ አጋልስስ ካሴርሳሮየ፤ ሂክ ማርትክ አጋልስስ ጋምሳ ካአይሁድ፥ ጋምሳ አደ ካካለ ጎሳኮክ ካአበሮ ጎሌሮ፥ “ካሙታራ አላም ጩቦ ካጋራባየ ማንኮሌ ማራን ፋይና ሄላሚን ካኮዳንዳራ ካለት ታሌተ ሆልኮክ ማላባኖይና ኮኮ ባቦጆልኮና ሃስኖኮ እስኦራታኖያ” ታአማቶ ቆፋ ጉት ታኬተቶተ። አዳማኖና ሀንዳ ምን ካዋ ባሪሳኖኮክ ጋራና ዋ ካኮሄዶይሳታራን አጋልስስኮክ ሴራ ገጌስ፥ ኡሱማለና ምን ካዋክ ጃርሶለና እሶ ኦጋርጋራራን እሶን ግርን ካዶትሳሮ አማላ ካአዴስሳሮ ካአበሮያ። ጉድሳና ጢሞቶሳ የሱሳ ክርስቶሳን ምሲ ካእዳንክ ካሀንዳሮ ሊን ዶትሳሮና ካለካለክ ምን ካዋክ እባዶ ዶሌ ግርን ካዶትሳሮ ኦዶናቲን ጳዉሎሳ ካስሰሮ ጎርሳ ሄልን ዳንዳና።
\iot ራቶ ሂክ ማጻፋ ካአበራ
\io1 ታባኖ \ior 1፡1-2 \ior*
\io1 ምን ካዋኮክ ጋራና ኦሀናዳራንኮክ ጋራ \ior 1፡3—3፡16 \ior*
\io1 ጢሞቶሳን ሀንዳኬሳ ማራን ካስሳመሮ አጋልስስ \ior 4፡1—6፡21 \ior*
\c 1
\p
\v 1 ካፋይሳሮ ዋካካን፥ አብድታታን ካሌሮ የሱሳ ክርስቶሳኮክ አጃጃ የሱሳ ክርስቶሳ ካፋራመሮ ካጳዉሎሳ ሀንዳ። 
\v 2 አማኖ ካሩም ካሌሮ ኤረኬ ጢሞቶሳን፥ ዋ ኣቦካንኮና፥ ጎታካካን የሱሳ ክርስቶሳኮ ስኖና ሻጋ፥ ኖጎዳ ኩን ሀሌቶ።
\s1 ካጣራ አጋልስስኮ ሴርሳኖ
\p
\v 3 መቀዶንያ ቶስ ታኮሰየሬ ሀዳራ ጎጎአመሬ፥ ኮኮ እባዶ አየስ ካጣራ ጎጎአጋልስሶንኮ ትርን ኤሰ ታኤፈሶን ካታማይ ሀማጺ። 
\v 4 አደና ማማና ጋቾ ካሊት አላታንኮት ጅርት ቶቶ ኦሮድ ጎጎታቦንኮ እሶ አጃጂ። ሂክ አየስ አማኖ ኦሌራን ፈሎ ኦዋኮ ሮረን ዶጋማ ኬሳራን። 
\v 5 ሂካ አጃጃኮክ ሀልቻ አደ ታሙጭንተ ዎዳናኮ፥ ታኢዳን ሳሙኮ ኡሱማለና ካሩም አማኖኮ ታሄላማቶ ጌላንጀታ። 
\v 6 እባዶ ኮኮ ሂካ አየስኮ ፋክመረ ላኦ ካላይክ አየስ ቶስ አባባተራ። 
\v 7 ሂካ ካኮንየላራን ሴራ ካሙሴ ካአጋልስሳሮ ኣን ሊን ዶተሬንያ፤ ሀሌዎ ኳሬ ካአዬሰራን ላኮካሳን ጎርቱን ኖ ልክና አመረን ካአዬሳራን አየስ ላኮሻዳራን።
\p
\v 8 አየሱን ጎአመን እባዶ ጎጎዶትሳሮ ጎላኦ ቤ፥ ሴራ ካሙሴ ካእዳንክ ላኖ ካንሶዋ። 
\v 9 አደና ሴራ ካሙሴ ካኮንስሳመራ ቁሎሌዉን ሀሌኖን ግራን፥ ሴራ ኦባሳራዉና ኦሜላኑን፥ ታዋ አብስ ካላይኒዕዉና ጩባለይጆል፥ ቁሉማ ካላይኒዕና ዋ ኦቱፋታራን፥ ኦዶና ኣና ኦላጋዳራና፥ ኔፎ ኦላጋዳራን፥ 
\v 10 ኡሱማለና ኦሻርሙጣራኑን፥ ባባር ባባርነ ዎታ ካሁዱራሮን፥ እባዶ ኦዳዳላራዉና ኦኢምናራኑን፥ ኦጣራዉን፥ ጣራይ ኦአማታራን፥ ካእዳንክ ካሌሮ አጋልስስ ኦዲዳራን ዱባንያ፤ 
\v 11 ሂክ ካእዳንክ አጋልስስ ካሶማሳመ፥ ዋ እዬን ሀዳራይ ካስሰራ ዎንጋላ ካባጃነ ዎታ ካእስአታሮያ።
\s1 ጳዉሎሳን ካስሳመሮ ካጎታ ሻጋ
\p
\v 12 ሀንዳኬሳይ እን ሹመረ ካአብዳመ የለ ማንኮቶተ ማራን፥ አታን ኢን ካስሰሮ ጎታካን ክርስቶሳ የሱሳ አን ጋላታራ። 
\v 13 ሂታኮ ሆረነ ማምሲና ካኢንጋማሮ፥ ካሆሮራሮና ካሜላንክ ሊ ጎግረና፥ ማላባናዋትና አማናናዋቲ ካፈለሮዉን ኡሱ ኢን ሻጋ የለራ። 
\v 14 የሱሳ ክርስቶሳ ካሌሮ አማኖና ጌላንጀነ ዎታ ጎታካንት ስኖ አማጋንተ ኢን ስሳንተ። 
\v 15 “የሱሳ ክርስቶሳ ጩባልዬል ፋይስን አላም ቶስ ኤመተራ” ካአማራ ሃፉራ ካሩሚና እባዶ ዱባ አታይን ካዶትሳሮያ፤ ጩባለሳልኮና ዋና አንያ። 
\v 16 አየሱን ጎአመን የሱሳ ክርስቶሳ ኡሱ ኦአማናራና ጅሩ ጅሮማክ ግር ኦአታታራዉን ሜሳ ካልት ኦብስቴሳና ጩባልዬልኮ ዋና ካሌሮ እዬ ማሱሳ የል ቱስን ሻጋ ሄላየ። 
\v 17 ጎርታ አርዶክ ካሌሮ፥ ካጎኖን፥ ካሙቶና ካለ ዋ ሄዶ ካሌሮ ዎኖ ጅሩ ጅሮማኮ ታ ጅሩ ጅሮማ ጌሮን ካባጃና ጋላታ ኡሱ ሀጌዎ፤ ሀሚኒዕ።
\p
\v 18 ኡኑኬ ጢሞቶሳ! ጣየ ኩ ማራን ኦሰጋመራን ሄገሮ ማለ ሂካ አጃጃ አን ኩን ስስናራ። እሶ ሄገሮ ዴበ ሰሴታ ፈሎ ኦኢዳነቱን ሞአባታኖያ። 
\v 19 አማኖና ሳሙ ታኢዳን ኩን ሀግርቶ፤ ኮኮ እባዶ ሳምኡትሶ ጋፋርተደ በከ ኦሮ ራኮ ጌተደ ካባሮ ማርካፋ አን አማኖክሶ ባሳተራን። 
\v 20 እሶ ኦሮኮ ሄመኖስና እስክንድራ ግራን፤ እሶ ዋ ሀባራናኮ እስኦትሶ ጎጎሀሳሳራዉና ጎጎአጋልሳራዉን ጻላዬን አን ሮርሰ ስሰራ።
\c 2
\s1 ምን ካዋይ ዋ ሄዶይሳታኖኮክ ሴራ
\p
\v 1 ጎርታ ዱባንኮ ጣይ ኤብ፥ ኮ ካካለቱን ኤባታኖና ጋላታ እባዶ ዱባዉን፥ ዎኖላሉና ኦዶናት ካአቦን ዱባን ጎጎሌሮን ሻድሳራ፤ 
\v 2 ህክና ካሩም አያናኮክ ግርና ቁሉማ ዱባይ፥ ኖጎዳና ጫልኢትይ ጎጎግርኖንያ። 
\v 3 ሂክ ካፋይሳሮ ዋካን ሆረ ካገጌላይስሮያ። 
\v 4 ኡሱ እባዶ ዱባ ጎጎፋይሮና ሩም ማላባኖ ቶስ ጎጎጌናዉን ዶታራ። 
\v 5 ዋ ኮ ካግራ፤ አደና ዋይና እባዶ ጠኤ ካዎጋርሳራ ኮ ግራ፤ ኡሱና እባዶ ካሌሮ የሱሳ ክርስቶሳያ። 
\v 6 እስኦቴሳ እባዶ ዱባን ዎዶ የላተ ስሳተ፤ ህክና ልክኪ ጎራታ ጎጌ ፋይና ካዋኮኒዕ ፈሎ ካቱሳሮ አቶናትያ። 
\v 7 አንና ሂካ አየሱን ካገጌላይስሮ ሰግረ ካፋራመሮ ኡሱማሌ አይዛብዉን ሩምና አማኖ ካአጋልስሳሮ ሌ ሹማመ፤ ሩም አዬስናራ ኳሬ፤ ጣራ ላኮአዬስናሮ።
\p
\v 8 ጎርታ ባባር ባንኤ ዱባ ኤንገና ዶጋማ ካሊ ኦቁሎየን ገነኖኦትሶ ኤለ ጦቂሳይረን ጎጎኤባናዉን ዶታራ። 
\v 9 ኡሱማሌ ሄለል እስኦትሶ ሁስሳይ ካዶትሳሮ ሳርስ ሀሳርሳተ ኳሬ መተ ሀራኣይደ ጎርቱን ዎርቂ ጎርቱን ዶክ አዉኣሎ ካሌሮ ሳርስጆሊ አሮኢሳዶ፤ 
\v 10 አየሱን ጎአመን ኖ ዋ ሄዶይሳታና ካአማራ ሄለል ፈልን ኦዶትሳራን ፈሎ ኦኢዳኒዕ እስኦቴሳ ሀኢሳድሳተ። 
\v 11 ሄለልትቲ ጫልኢ አማኖይና እስ የራሳታኖ ሀአጋልሳቶ። 
\v 12 ሄለልትቲ ታእስላተ ጎጎሌቶን ኳሬ ጎጎአጋልስሶን ጎርቱን ባባርትት ጉት ኦዶናት ጎጎግሮን ፈኢ ላኮስስናሮ። 
\v 13 ኣላንቲና አዳመ ጣየ መጣመራ፤ ኤሰኮና ሄዋን መጣንተ። 
\v 14 አደና ካሶባመራ አዳመ ላኮዮ፤ ታሶባንተታና ጩባለቲ ታሌተታ ሄሌልትቲታ፤ 
\v 15 ሀሌዎ ኳሬ ሄለልትቲ አማኖና ጌላንጀ፥ ቁሉማይና እስኦትሴ ሁስሳይደ ጎአታተ ይስ ኡሙላኖይ ፋይናታ።
\c 3
\s1 ምን ካዋይ ሆረሃዬን ኦባሪሳራን
\p
\v 1 “ማዮና ምን ካዋይ ሆረሃየ ካባሪሳሮ ሊ ጎዶታተ፥ ፈሎ ኦኢዳን ሀልቻራ” ካአማራ ሃፉራ ካአብዳመያ። 
\v 2 ጎርታ ምን ካዋዉን ሆረሃየ ካፈላራ ካቱፋሞን፥ ኦር ቶኮክ ኤንተር፥ ኤካክ፥ እስካአባታሮ፥ ሴራይ ካባራሮ፥ ማርት ካቆጳታሮ፥ አጋልስስን ካዳንዴሮ፥ 
\v 3 ካሴትኖን፥ ካኢንሰኢንጋሞን ዱሳክ ካሌ፥ ካዶጋሞን፥ ማራጋደ ካጌላኖን ሊን ዶትሳራ። 
\v 4 ይስኬሳ ካሀንዳሮና ካካባጅሮ የል ጂናሳኖይ ካምነ እባዶካከሳ ማራጌ ካባሪሳታሮ ሊን ዶትሳራ። 
\v 5 እባዶት ኮ ምንካኬሳ ማላባይ ካባሪሳኖን ጎሌ፥ ምን ካዋ ምሲ ባሪስን ዳንዳራ? 
\v 6 ኮራይ አማጋምረ ዱርሳ ካኮኢየሮ ፍርዳ ጎጎኢኖንኮ ኤነ ዋ ካአማኔሮ አሮሌኖ። 
\v 7 አደና መገኬሳ ጎጎቱፋሞንኮና ዱርሳኮት ሜል ኦሮ ታብረ ጎጎኢኖንኮ፥ ሳሬ ኦግራን ዶሌ ካእዳን አቶ ካአቦ ሊን ዶትሳራ።
\s1 ዳቆን ላኖኮክ ጋራ
\p
\v 8 ዳቆኒልና ኡሱማሌ ኦካባጃሜን፥ አየስ ኦኢግልሶን፥ ካሞጋን ጣሞ ካዎይኒ ኦሀልችኖን፥ ማራጋዴን ካጋጲጋጲኖን እባዶ ላኖ ዶትሳራ፤ 
\v 9 አማኖኮት ሆል ቁሉት ሳሙይ ኦራታኖ ዶትሳራ። 
\v 10 እሶና ጣይ ሀጫፋሜን፤ ኤሰኮና፥ ኮና ቱፍ ካልኒዕ ሊ ጎሙቴን ምን ካዋይ ዳቆን ሊ ሀሃንዳዬን። 
\v 11 ኡሱማለና ኦርጆልክሶ ካካባጃመ፥ ሀም ካላይኒዕ አየሱን ጎአመን ልክኪና ካአመን ዱባን ኦአብዳሜን ሊን ዶትሳራ። 
\v 12 ዳቆን ኦር ቶክ ኤንተር ሊን ዶትሳራ፤ አደና ይስክሶና ካምነ እባዶክሶ ማራጌ ኦባሪሳታራን ሊን ዶትሳራ። 
\v 13 ጎጎዶትሳሮ ሀንዳ መተክሶዉን ታንጂን ካባጃ፥ የሱሳ ክርስቶሳና ካአባን አማኖይ ታንጂን ጃቡ ሄላታራን።
\s1 ሆል ታአቲ
\p
\v 14-15 ኤነ አን ኩ ቶስ ኤመይን አብድ የላየረ ሂካ አጃጃ ኩን ጻፋራ፤ ሂካ ኩን ካኮንጻፋራ ካአዳላየ ጎሌና እባዶ ምን ካዋይ ምሲ ግርን ዶትሳሮ ጎጎአዴሶንያ፤ ምና ካአርዶ ካዋኮክ ምን ካዋ ህክና ካሩም ልበና ኡኩምናያ። 
\v 16 ዋ ሄዶይሳታኖኮት ሆል ሄዳታኖ ካላይ ታአትታ፤ ኡሱ እባዶ ሌ ሙተ፤ አያናይ ባተ፤ ኤርግቻይ ሙተ፤ ጎሳ ዱባዉን ላላባመ፤ አላም ካግሮ እባዶ አብዳመ፤ ካባጃይ ዳሩር ቤ።
\c 4
\s1 ጣራ ኦአጋልስሳራን
\p
\v 1 አያና ቁሉክ አደ አዴስሰ ሃ አማራ፤ “ካኤሜታሮ ጌስጆሊ እባዶ ኮኮ ካሶሶይሳሮ አያናና አጋልስስ ካዱርሳ አታይረ ዋ አማናኖክሶ ካካይናራን።” 
\v 2 ሂካ ኣንክክ አጋልስስ ካኮኤሜታራ ሳሙትሶ ኤለኒ ሄላባተ ታጉባተቶ ማርጮ አን ካኮንዶቶይተቶ ጣራመሳልኮያ። 
\v 3 ሂካ ኣንክክ እባዶ አታታኖና ኬሳማኖ ትራራ፤ ዋ ካአማናራና ሩም ካካሳ እባዶ ኡሱ ጋላታ ጎጎአምሮን ዋ ካመጠሮ ባቦ “አሮአንተ” አማ ትራራን፤ 
\v 4 ዋ ካመጠራ ማምስክ አዬንሳ ካእዳንክያ፤ ጋላታይ ካአታቴራንኮ ኮና ካሻፋምራ ላኮግሮ። 
\v 5 ሃፉራ ካዋይና ኤቢ ካቁሎየ ላራ።
\s1 ካክርስቶሳ ካእዳንክ ካሀንዳሮ ላኖ
\p
\v 6 ሂካ አጃጃ አቢላሉን አጋልስሰዋ፥ ካአማኖ ሃፉራይና አት ካአታተቶ ካእዳንክ አጋልስስ አታይደ ካክርስቶሳ የሱሳ አዳ. ካሀንዳሮ ልናታ። 
\v 7 ዋ ታካባጅኖን ላኦ ካላይት ጅርትኮና ካጃርቲልኮክ ማማልኮ ፋክም፤ ሀሱኮ ካሩም አያናኮክ ግርና እስኦታ አጋልስሳ። 
\v 8 ማር ፉፉራታኖ አየስ ክጫሩን ጋርጋራራ፤ ካሩም አያናኮክ ግር እስ አጋልስሳታኖ ጎአመን ግዳኑና ሌረ ካኤሜታሮ ግሪ አብድ ማንኮግቶ ማራን ላማ ዱባዉና ላኦ ስሳራ። 
\v 9 ሂክ ሃፉራ ካአብዳመና እባዶ ዱባ አታይን ካዶትሳሮያ፤ 
\v 10 ሂካኑን አምነኔ እጻማ ሀራና፤ ህክና እባዶ ዱባዉን ካካለኮና ዋ ኦአማናራዉን ካፋይሳሮ አርዶክ ዋይ አብድ ማንኮየላታኖ ማራንያ።
\p
\v 11 ሂካ አየስ አጃጂ፤ አጋልስስ። 
\v 12 ዎዳሉማታ ማዮና አሮቱፋኖ፤ አየሱን ጎአመን አማኒሉን አዬሲና ባሪሳኖይ፥ ጌላንጄ፥ አማኖይና ሙጭማኖይ ካእዳን ማሱሳ ሌ። 
\v 13 አን ታ ኤሜሮን ቁሉክ ማጻፋጆል ናባብን፥ ማርካ ስሲንና አጋልስስን አታ። 
\v 14 ምን ካዋት ጃርሶለ ገነትሶ ኩ ጉት ጎካይተ ሄገሮይ ኩን ካስሳመሮ ካስኖ እላቦ አሮዲደ። 
\v 15 እባዶ ዱባ ጂናንካ ጎጎዴሮን ሂካ አየስ ጉት ክንትቢና አታኒ ፈል። 
\v 16 ግርካዉና አጋልስስካዉን እስኦራ፤ ህናኣኒና አታ፤ ሂካ ጎየልተ እስኦታና ታታ ኦማላራን ፋይሶዋ።
\c 5
\s1 ዋ ኦአማናራዉን ካስሳመሮ ጎርሳ
\p
\v 1 ካጃሮመ እባዶት ኣቦካ ኣን ቶቲደ ጎርሳ ስስ ኳሬ ጅብዳም አሮአዬሰ። ዎዳላ ባባር አብላልታ ኣን ቆጳ፤ 
\v 2 ኡሱማለና ጃርትል ኣጮልካ ኣን፥ ዴሌል አድ አባላልታ ማለ ታሙጭንተ ዎዳናይ ዲያ።
\p
\v 3 ኦግራን ኦራካታራን ጋልታንተጆል ካባጃ። 
\v 4 ጋልታንቴ ቶ ይስክሴ ጎርቱን ይስክሴኮክ ይስ ጎአባናዪተ፥ ሂክ ይሳስ ካምነ እባዶክሶ ጋርጋራኖና ኦኡሙለራኑን ገነትሶ አባባኖይ ዱባንኮ ሆረነ አማኖክሶ ፈሎይ ቱስን አጋልሳይን ዶትሳራ፤ ሂክ ዋ ካገጌላይስሮያ። 
\v 5 ኦግራን ጋልታንቴ ታሌተታ፥ ካለካለ ታግታ አብድትሴ ዋይ ጉት ካታ፤ ኤቢዉና ጋርጋርሳ ካዋ ኤባታ አሪነ ሄመኔ አታታተ። 
\v 6 ገጌሎ ኦኡሌ ታዶታታ ጋልታንቴ ጎአመን ኔፎ ግራን ታጎተታ። 
\v 7 ማምስክ እባዶና ቱፊ ካላይ ጎጎግሮን፥ ሂካ ዎጋ ጎሳዉን ሰጊ። 
\v 8 እባዶት ኮ ፋልኬሳ፥ ካካለኮና ካምነ እባዶ ካጋርጋሮን ጎሌ አማኖኬሳ ካካካተ፥ ዋይ ካአማኖን እባዶኮ ሮረ ካሜላንያ።
\p
\v 9 ጌስ ሎታምኮ ሄገልባንት ጋልታንቴ ማዝጋባ አሮታቦ፤ አደና ኤንተር ኮት ኦር ላኖ ዶትሳራ፤ 
\v 10 ይስ ጂናሳታኖይ፥ ማርት ቆጳታኖይ፥ ቁሎሌኮኒዕ ሉቃ. አልሳኖይ፥ ኦራካታራን ጋርጋራኖና ያዳሊ ታኢዳን ዱባን እስኦትሴ ስሳታኖይ ፈሎ ኦኢዳነቱና ታአቶታንተቶ ላኖ ዶትሳራ።
\p
\v 11 ይሱማ ካአቦ ጋልታንተጆል ጎአመን ሂካማለክ ማዝጋባ አሮጻፍቴን፤ ኣላንቲና ካሶየ ሀልቻክሶይ ታክርስቶሳ ጌላንጀ ጎሀንቃቶ ኤንተሪ ኬሳሚን ዶታታራን። 
\v 12 ሂካኒና ፍርዳ እስኦትሶ ጉት ኬናታናን፤ ሆራርጀ ኦታቤራን አማቶ ዲጌራን። 
\v 13 አደ ፈሎ ፉራታኖና ምንኮ ምን ማራሙራኖ አጋልሳታራን፤ ፈሎ ፉራታኖ ካላል አንሌኖን ግራን፥ ካዶትሶን አዬሳ ኦሀማታራና ሃጃ ታእባዶይ ጠኤ ኦታባራን ላራን። 
\v 14 ሃንሱን ኤንተር ካኮንጎየራ ይሱማ ካአባ ሄለል ጎጎኬሳምሮን፥ ይስ ጎጎኡሙላኑና ምንክሶ ጎጎባርሳናኑን፥ ዲናና እሶ ካኮቱፋሮ አየስ ጎጎሄሎንኮ አን እሶ ጎርሳራ። 
\v 15 ሂታኮ ሆረነ ጋልታንቴል ኮኮ ጻላዬ ዴበ ሰሴታ ካሩም ራኮ ቤራን። 
\v 16 ዋ ታአማናቶ ታሌተታ ማምስት ሄለልትቲና ምንካክሰክ እባዶ ኦሮ ጋልታንተጆል ካግሮ ጎሌ፥ ምን ካዋ ካሩም ጋልታንተጆል ካላል ጋርጋርን ጎጎዳንደቶ ኤሰዋ ሀጋርጋርቶ ኳሬ ምን ካዋቱን ስዳነ ጎጎሌናዉን አሮኢሶ።
\p
\v 17 ምን ካዋ ጎጎዶትሳሮ ካባሪሳሮ፥ ሂካኮና ላላባኖዪና አጋልስሳኖ ኦአታታራን ጃርሶለጃዉን ካዶትሳራ አየስ አምባ እሶን ሀስሳሞ። 
\v 18 ቁሉክ ማጻፋና፥ “ኦታ ካግሮ ኣር ሙንጀ አሮሺተ፤” አደና፥ “ካፈላሮን ዳሞዛ ዶትሳራ” አማራ። 
\v 19 አቶ ላማ ጎርቱን ሴድ ጎአቶታመ ኳሬ ጃርሶለ ጉት ካኤሜታሮ ሞቶ አሮአተ። 
\v 20 ካካለ ዲጉረን ጎጎእስ ኦራናዉን ጩቦ ካፈላሮ ጎሳ ሆረ ሀድስ።
\p
\v 21 ዋይና ክርስቶሳ የሱሳ፥ ካሹማመሮ ኤርግቻ ሆረ ሂካ አጃጃ በቤድ በቤዲ አንሌኖን ግራን ጎጎኦራቶና አየስ ኮና ኮኮኮ ሮርሳኖይ ጎጎፈሎንኮ ሀዳራ አማራ። 
\v 22 ማዮ ጉቲና ገነታ ካይን አሮጄርተ፤ ካካለኔ ዎታ ጩቦ ፈልን ዎታ አሮሌተ፤ እስኦታ ቁሉማ ኦራ።
\p
\v 23 ቦጉና ሃር ጋለ ጋለ ኩን ካከያሮ ካሞጋን ሀዉኣምዉን፥ ኡጫር ጣሞ ካዎይኒ ጣምና ኳሬ ጎርታ በከ ኦላል አሮጣንተ። 
\v 24 እባዶ ኮኮክ ጩቦ ካሙታሮ ማንኮሌ ማራን ጣየ ፍርዳ ግራኖ ቱሳራ፤ ካካለ እባዶኮክ ጩቦ አደ አዳላተ ግያራ። 
\v 25 ፈሎ ኦኢዳን ኡሱማሌ ኦሙታራንያን፤ ካሙቶን ግሮ ጎሌና ዱዶ ስያም ላኮሄስናሮ።
\c 6
\s1 ድይጆሉን ካስሳመሮ ጎርሳ
\p
\v 1 መገ ካዋና አጋልስስኬሳ ጎጎሀባራሞንኮ፥ ድዩማ ኦግራን ዱባ፥ ጎታጆልክሶ ካባጃምን ካዶትሳሮ ላኖ የላይሬነ ሀቶታቴን። 
\v 2 ዋ ኦአማናራን ጎታል ኦአባን ድይጆል፥ አቢላል ማንኮሌን ማራን አሮቱፋኖ፤ ሂካኮ ሀንዳክሶይ ላኦ ኦሄላታራን ዋ ኦአማናራና እሶ ኦጌላታራን ማንኮሌ ማራን ሂካኮ ካሮረ እሶ ሀንዳይን ዶትሳራ። ሂካ አየስ አጋልስስ፤ ጎርሲ።
\s1 አጋልስስ ካጣራና ኡራዎ ኦሩሚ
\p
\v 3 ማዮና ካጣራ አጋልስስ ጎአጋልስሰ፥ ጎታካን የሱሳ ክርስቶሳኮ ካእዳንክ ሃፉራና ካሩም ዋ ላኖ ካአታይስሮ አጋልስስነ ዎታ ካእስአቶን ጎሌ፥ 
\v 4 ሀሱ እባዶት ኮራይ አማጋማራ፤ ኮና ላኮሻዳሮ። ሃፉራጆልኮክ ጋራ ዶጋማኖና ኢንሰኢንጋምን ሀልቻ ካሜላን አባ፤ ህኒዕና ጋቢ፥ ኢኦ፥ ሀባራኖ፥ ሄዳታኖ ካሜላን፥ 
\v 5 ኡሱማለና ሳሙትሶ ታባቶይተቶና ሩም ካኮንባተቶ እባዶ ካመጣራን ታአልኖን ዶጋማ ኬናራ፤ ሂካ ኣንክክ እባዶ ዋ ሄዶይሳታኖ ኡራዎ ካኮሄላታራን ራ ኣን ሌ ሙታራ።
\p
\v 6 አየሱን ጎአመን “ኢን ካግራ ሌራ” ካአማሮ እባዶትን ዋ ሄዶይሳታኖ ካንጅንክ ዎረኤያ። 
\v 7 ሂካ ኡል ቶስ ኖ አንተ ካኤሜነና ኮኮ ኮና ላግሮ፤ ሂታኮ ኮና ኖ አት ካሴይናና ላግሮ። 
\v 8 አየሱን ጎአመን ባቦና ሳርስና ጎግረ ኖን ሌራ። 
\v 9 ዱረሳ ሊን ኦዶታታራን አደ ታጫፍቲ ሜል ቶስ ኡሱማለና እባዶ ዳርአኖና ባስ ቶስ ኦጌሳራን ካሞጋን አዳክ ካሜላን ሀልቻ እያራን። 
\v 10 ኣላንቲና ማራጋደኮት ጌላንጀ ሜላነ ዱባኮት ህዲድታ። ኮኮ ዱረሳ ሊን ካአባን ሀልቻልኮ ካከይ ራ ካአማኖኮ ሽርሜን ሰተራን፤ እስኦትሶና ካሞጋን አቦሳ ታብሳቴራን።
\s1 ጳዉሎሳ ጢሞቶሳን ታስሰሮ ሀዳራ
\p
\v 11 አት እባዶ ካዋ! አት ጎአመን ሂካ ዱባኮ ፋክም፤ ቁሉማ፥ ካሩም አያናኮክ ግር፥ አማኖ፥ ጌላንጀ፥ ኦብሲና ኢዳነ ዶታ። 
\v 12 ካአማኖ ጀሬን ሻፋታኖ ካእዳን ሻፋ፤ አት ኡሱ ቶስ ካኮኡማንተ ጎራታ አቶ ካሞጋን ሆረ ልክኪ አቶናት ካኮንስሰቶ ጅሩ ጅሮማክ ግር አባ። 
\v 13 ዱባዉን ግር ካስሳሮ ዋይ ዶሌ ኡሱማሌ ጰንጢዮሳት ጲላጦሳ ሆረ ሩም ካአቶቴሮ ክርስቶሳ የሱሳ ሆረ ኩን ሀዳራ አን ካአማራ፥ 
\v 14 ጎታካን የሱሳ ክርስቶሳ ታሙትሮን ጊን፥ ሂካ አጃጃ ሽሬና ካላይና ቱፍ ካሊ ግርደ ጎጎኦራቶንያ። 
\v 15 ካክርስቶሳ ሙታኖና፥ ካሶማሳመና ካለካለ ሞት ካሌሮ ዎኖላልኮክ ዎኖ፥ ጎታጆልኮክና ጎታ ዋ ጎራታኬሳይ ካቱስናሮያ። 
\v 16 ኡሱ ካላል ካጎኖንያ፤ ማዮና ጋባላሚን ካዳንዴኖን ኢፋ ኦሮ ግራ፤ ኡሱ ካዴራ ማዮና ላግሮ፤ ዲና ካዳንደራ ላግሮ፤ ኡሱን ካባጃና ሁናና ጅሩ ጅሮማዉን ሀሌዎ፤ ሀሚኒዕ።
\p
\v 17 ሂካ አላም ዱሬሳል ካሌራ ጎጎኮርኖኮ፥ ኖ ጎጎገገላኖን ካመን ዱባ ጫባጫባኢሰ ካስሳሮ ዋይ ኳሬ አብዳማኖ ካላይክ ኡራዎ ጉት አብድ ጎጎየላኖንኮ እሶን አጃጂ። 
\v 18 እዳነ ጎጎፈላዉን፥ ሹጎኒዕና ካካለቱን ስስን ኦኤካቴን ጎጎሌራዉን እሶ አጃጂ። 
\v 19 ሂካ ጋራይ ካሩም ግር ጎጎሄላራዉን፥ ካኤሜታሮ ጌሱን ካአቲ ኡኩም ኦሌራን ኡራዎ እስኦትሶዉን ኩኩይሳታራን። 
\v 20 ጢሞቶሳ! ሀዳራ ካአታተቶ ዱባ ኦራ። ዋ ካካባጅሶን አዳክ ኢያኖና ዲዳኖን ማላባኖ አንሌኖን ግራን፥ “ማላባኖ” ኣን ካላሮ መጣመ ካአዬሳማሮ አየስኮ ፋክም። 
\v 21 ሂካ ኣንክክ ማላባኖ አብና አማ ኦግረን ኮኮ ሂካ የላኖይ ካአማኖ ራኮ ሽርሜን ሰተራን። ስኖ ታዋ ኩኔ ዎታ ሀሌቶ።