\id TIT Titus in Busa, Ross Jones
\ide UTF-8
\h TITU
\toc1 TITU
\toc2 TITU
\mt1 TITU
\c 1
\s1 Titu zĩkɛna Kɛrɛti bùsun
\p
\v 1 Makũ Pↄlu, Luda zↄ̀blerii, Yesu Kirisi zĩ̀riin ma ũ. À ma zĩ mà gbɛ̃ kũ Luda ń sɛ́nↄ kara a náanikɛnan mà tó ò a donyĩzɛ yãpura dↄ̃, 
\v 2 de ń wɛ́ gↄ̃ dↄ wɛ̃̀ndi kũ àdi lákaroi kũ Luda a lɛ́ sɛ̀ zaade andunia dí kátɛro. Àdi ɛ́kɛ to sↄ̃ro. 
\v 3 Akũ yã pìi bò gupuraa a gↄrↄa waazi kũ Luda ó Surabarii dàmɛnɛ ma kɛ gũn lákũ à dìtɛ nà. 
\v 4 Makũ mɛ́ ma takada dí kɛ̃̀nnɛ Titu, ma nɛ́ yãpura Yesu zɛ́ kũ ó kú lɛɛlɛ gũn. De Luda kũ Kirisi Yesu ó Surabariio gbɛ̃kɛ kɛnnɛ, à n gba aafiaa.
\p
\v 5 Ma n to Kɛrɛti, de ǹ yã kũ ò gↄ̃̀ gwenↄ gↄ̃gↄ̃, ǹ gbɛ̃ zↄ̃kↄ̃nↄ ditɛ wɛ̃tɛ kũ wɛ̃tɛo lákũ ma ònnɛ nà. 
\v 6 À mana gbɛ̃ zↄ̃kↄ̃ gↄ̃ kun taari sari nↄmɛndode ũ. A nɛ́nↄ gↄ̃ ludanaanikɛrinↄ ũ, òsungↄ̃ ń dↄ̃ nɛ́ zãzãde sãgbãnadenↄ ũro. 
\v 7 Zaakũ gbɛ̃ zↄ̃kↄ̃ bi Luda zĩgwariimɛ, àsungↄ̃ de taaride ke ĩadãri ke pↄfɛ̃ri ke wɛ̃dɛri ke gbɛ̃ pãsĩ ke ↄgↄvãniwɛtɛri ũro. 
\v 8 Séde àgↄ̃ de nibↄkũri ũ, laakaride kũ à zɛ̀ kũ yãmanakɛnaao ũ, gbɛ̃ súsu kũ à kú adona akũsↄ̃ à a zĩda kũna dↄ̃ ũ, 
\v 9 gbɛ̃ kũ à zɛ̀ súsu kũ yã náanide kũ òdi dańnɛo ũ, de à le à lɛ́ da gbɛ̃ pãndenↄa kũ yãzɛdedannɛnaa pìio, à gbɛ̃ kũ à bò a yã kpɛnↄ ɛ́kɛ káńnɛ ń ↄĩ.
\p
\v 10 Zaakũ sãyãmarisaride kũ òdi gbɛ̃nↄ likara kũ ń yã'onaaonↄn dasi, atɛ̃nsa gbɛ̃ kũ ò zɛ̀ kũ tↄ̃̀zↄ̃yãonↄ. 
\v 11 Òdi ↄn bũnu yaka. À mana ò lɛ́sↄ dańnɛ. Òdi yã kũ à de ò dańnɛro dańnɛ ↄgↄ bɛ̃̀nɛ lena yãi. 
\v 12 Kɛrɛti bùsu annabi ke pì, Kɛrɛtinↄ bi ɛ́kɛdenↄmɛ, nↄ̀bↄ pãsĩnↄmɛ, ye'uide pↄ́ke kopirisarinↄmɛ. 
\v 13 Yã pì bi yãpuramɛ. Abire yãi ǹ kpãkɛ̃ńyĩ manamana, de ò zɛ́ sɛ́ súsu. 
\v 14 Òsun laakari dↄ Yudanↄ garaaro ke gbɛ̃ kũ ò kɛ̃̀ yãpuraa yãditɛnanↄ. 
\v 15 Pↄ́ke dìgↄ̃ gbãsĩ gbãsĩsaridenↄnɛro, akũsↄ̃ pↄ́ke dìgↄ̃ gbãsĩsari ludayãdarisari gbãsĩdenↄnɛro, kũ ń laasun kũ ń nɛ̀sɛɛo vãni yãi. 
\v 16 Òdi pi ò Luda dↄ̃, akũ ń yãkɛnaa dì ń ɛ́kɛ bo. Bɛgirinↄmɛ, òdi yã maro, òdi fↄ̃ ò yã mana ke kɛro.
\c 2
\s1 Yãdannɛna zɛ́de
\p
\v 1 Mↄkↄ̃n sↄ̃, ǹ yã kũ àdi kↄ̃ sɛ́ kũ yãzɛdedannɛnaao dańnɛ. 
\v 2 Ǹ da mare zↄ̃kↄ̃nↄnɛ ògↄ̃ ń zĩda kũna dↄ̃ gbɛ̃ bɛ̀ɛrɛdenↄ ũ, laakaridenↄ ũ. Ò zɛ́ sɛ́ súsu kũ yenyĩo kũ mɛnao. 
\v 3 Ǹ da nↄgbɛ̃ zↄ̃kↄ̃nↄnɛ dↄ ń kunna gↄ̃ de donyĩri mananↄ kunna ũ. Òsungↄ̃ de gudɛri ke wɛ̃ zↄ̀nↄ ũro. Ò yã mana dańnɛ, 
\v 4 de ò lɛ́ da nↄzãrenↄa ń baadi gↄ̃ ye a zãi kũ a nɛ́nↄo, 
\v 5 ògↄ̃ de laakaridenↄ ũ gbãsĩ sari, ò laakari dↄ ń ↄn zĩa, ń baadi mì natɛ a zãnɛ de òsun Luda yã vãni boro yãi.
\p
\v 6 Ǹ lɛ́ da kɛfɛnnanↄa dↄ ògↄ̃ laakari vĩ. 
\v 7 Ǹ yãmanakɛna zɛ́ mↄńnɛ a pínki gũn. N yãdannɛna gↄ̃ bɛ̀ɛrɛ vĩ à kↄ̃ sí kũ n yãkɛnaao 
\v 8 kũ yãzɛde kũ oni fↄ̃ ò a ɛ́kɛ boroo, de wé'i gbɛ̃ kũ ò bò n kpɛnↄ kũ, òsun yã vãni le ò o ó yã musuro yãi.
\p
\v 9 Ǹ lɛ́ da zↄ̀nↄa ò mì natɛ ń dikirinↄnɛ yã sĩnda pínki gũn, ò yã kũ ani káńgu kɛ. Òsun yã liḿmaro. 
\v 10 Òsun kpãni oḿmaro. Ò tó ògↄ̃ ń dↄ̃ gbɛ̃ náanidenↄ ũ manamana, de Luda ó Surabari yã kũ odì dańnɛ wɛ́ bo yã sĩnda pínki gũn.
\p
\v 11 Zaakũ Luda gbɛ̃kɛ kũ à sù kũ surabanaao gbɛ̃ sĩnda pínkinɛɛ bò gupuraa. 
\v 12 Gbɛ̃kɛ pì tɛn dawɛrɛ ò kpɛ li yã kũ adi kↄ̃ sí kũ Luda yãoronɛ kũ andunia pↄ́nidɛnanↄ, de ògↄ̃ ó zĩda kũna dↄ̃ gbɛ̃ mananↄ ũ, ludayãmarinↄ ũ andunia tera díkĩna gũn, 
\v 13 ó wɛ́ gↄ̃ dↄ gↄrↄ arubarikade kũ ótɛn dãa. Àkũmɛ ó Luda zↄ̃kↄ̃ ó Surabari Yesu Kirisi sugↄrↄ gakuride ũ. 
\v 14 À a zĩda kpà ó yãi, à ó bó vãni sĩnda pínki gũn, à ó gbãsĩ gògo, de ò gↄ̃ a zĩda gbɛ̃ kũ ò yãmanakɛna ania vĩnↄ ũ. 
\v 15 Ǹ yã pìnↄ dańnɛ ǹ lɛ́ daoḿma. Ǹ kpãkɛ̃ńyĩ kũ iko kũ ń vĩo pínki. Ǹsun tó gbɛ̃ke n gya boro.
\c 3
\s1 Ò laakari dↄ yãmanakɛnaaa
\p
\v 1 Ǹ dↄ n gbɛ̃nↄgu ò mì natɛ gbãnadenↄnɛ kũ ikodenↄo, ò ń yã ma, ògↄ̃ kú kũ yãmanakɛna sĩnda pínki soruo. 
\v 2 Òsun gbɛ̃ke tↄ́ vãni síro. Ògↄ̃ de nɛ̀sɛdode yãketesaridenↄ ũ kũ ò busana gbɛ̃ sĩnda pínkinɛ. 
\v 3 Zaakũ ókↄ̃nↄ se, ó faya vĩ yãro, ludayãdarisarinↄn ó ũ. O sãtɛ, ó de pↄnnakɛna kũ dà vãni sĩnda pínkio zↄ̀nↄ ũ. Odìgↄ̃ kú nɛ̀sɛ vãnio kũ nɛ̀sɛgↄ̃bao. Ó de bɛgirinↄ ũ, o zãkↄ̃gu. 
\v 4 Bee kũ abireo kũ Luda ó Surabari gbɛ̃kɛ kũ a yenyĩo bò gupuraa, 
\v 5 akũ à ó sura bà. Adi kɛ ó yãmanakɛna yãinlo, kũ à ó wɛ̃nda dↄ̃̀ yãimɛ. À ó zú ò à ó í dufu, à tò o gↄ̃ gbɛ̃ dufunↄ ũ kũ a Nini 
\v 6 kũ à pìsiwá gbãnao Yesu Kirisi ó Surabarii gãi, 
\v 7 Abire yãi yã bò kũoo nna a gbɛ̃kɛ yãi, o gↄ̃ túbiblerinↄ ũ, ó wɛ́ dↄ wɛ̃̀ndi kũ àdi lákaroi. 
\v 8 Yã pì bi yãpuramɛ.
\p Má ye ǹ gã na yã pìnↄ onaaa manamana, de ludanaanikɛrinↄ le ò mɛ̀ kpá yãmanakɛnaaa. Abirekũ mana, à karana vĩ gbɛ̃nↄnɛ. 
\v 9 Ǹ pã mìsariyã yãgaganaanɛ kũ dizinↄ tↄ́ kↄ̃nↄwɛnaao kũ fìtiio kũ lɛ́kpakↄ̃ana Musa doka yã musuo, zaakũ yã pãnↄmɛ, ò karana vĩro. 
\v 10 Ǹ kpãkɛ̃ gbɛ̃ kũ àdi tó ò kɛ̃kↄ̃aai bee gɛ̃̀n pla, gbasa ǹ pɛ́a. 
\v 11 Ǹgↄ̃ dↄ̃ kũ gbɛ̃ bire taka sã̀tɛ. Durunnakɛriimɛ, à a zĩda bↄ̀bↄ.
\s1 Lɛ́zammanaa
\p
\v 12 Tó ma Atema ke Tikiku zĩ̀mma, ǹ zɛ́ wɛtɛ ǹ su ǹ ma le Nikↄpↄli, zaakũ ma zɛo mà bunsirɛ láka gwe. 
\v 13 Ǹ ania kɛ ǹ zàna kɛ bùsu dokadↄ̃ri Zenasinɛ kũ Apoloo de pↄ́ke sún kĩaḿmaro ń tá gũn. 
\v 14 À mana ó gbɛ̃nↄ yãmanakɛnaa dada ò ń zĩda kpáa, ò yã kũ à kↄ̃ sìonↄ bↄkↄtɛ de òsungↄ̃ kun pãro. 
\v 15 Gbɛ̃ kũ ó kú lɛɛlɛnↄ fↄ kpàmma ń pínki. Ǹ fↄ kpá gbɛ̃ kũ ò yewái Yesu zɛ́ gũnnↄa. Luda gbɛ̃kɛ kɛárɛ á pínki.