\id MAL Malachi in Busa, Ross Jones
\ide UTF-8
\h MALAKI
\toc1 MALAKI
\toc2 MALAKI
\mt1 MALAKI
\c 1
\s1 Sa'ona yã
\p
\v 1 Yã kũ Dikiri ò Isarailanↄnɛ Malaki gãin dí. 
\v 2 Makũ Dikiri ma pì má yeái, akũ a pì ma yeái deramɛɛ? Makũ Dikiri ma pì Isau bi Yakubu vĩ̀ninloo? Bee kũ abireo Yakubun má yei 
\v 3 ma gi Isaui, akũ ma a gusĩsĩde lì gugbagaraga ũ, ma a bùsuu kɛ̀ gbáranna gbɛ̃gbonnↄ kúki ũ. 
\v 4 Ɛdↄmu gbɛ̃ pìnↄ pì ò ń wɛ̃tɛnↄ dúgu zↄ̃̀, oni ɛra ò ń bɛzĩnↄ futɛ. Akũ makũ Dikiri Zĩ̀karide ma pì: Tó ò kɛ̀kɛ ò kàtɛ, mani gboro, oni pińnɛ Bùsu Vãnidenↄ, gbɛ̃ kũ Dikiri pɛ̃tɛ̃ kɛ̀ kũńwo ari gↄrↄ sĩnda pínkinↄ! 
\v 5 Á wɛ́ ni yã pì e à pi Dikiri zↄ̃kↄ̃ ari Isarailanↄ bùsu lɛ́ dire kpa.
\p
\v 6 Nɛ́ dì a de kpe ta akũsↄ̃ zↄ̀blerii dì a dikiri kpe ta. Kũ má de á De ũ, átɛni ma kpe ta yá? Kũ má de á Dikiri ũ, á ma vĩna vĩ yá? Makũ Dikiri Zĩ̀karide makũ mɛ́ matɛni á la. Ákↄ̃nↄ sa'orinↄ ákↄ̃nↄ mɛ́ átɛni ma gya bo. Adì pi: Deran o n gya bòo? 
\v 7 Kũ a ma teburu gya bò yãimɛ. Adì su ma gbagbakia kũ pↄ́ble gbãsĩo. Adì pi: Deran o n gbagbaki gbã̀a lɛ̀ɛ? 
\v 8 Kũ a su sa oma kũ pↄ́ vĩ̀nanↄ, yã vãnin gweroo? Kũ a sa òma kũ pↄ́ ɛrɛnↄ kũ a gyãrenↄ, yã vãnin gweroo? À gɛ́ kpá bùsu gbɛ̃ zↄ̃kↄ̃ↄa à gwa! Á yã ni káagu yá? Ani á sáabu kpá yá? Makũ Dikiri Zĩ̀karide makũ mɛ́ matɛni á la.
\p
\v 9 À kútɛ kɛmɛnɛ mà á wɛ̃nda gwa. Ama tó pↄ́ dí takanↄn kú á ↄĩ, mani sí yá? Makũ Dikiri Zĩ̀karide makũ mɛ́ matɛni á la. 
\v 10 Ò pi á gbɛ̃ke gɛ̀ɛ à ma ↄn zɛ́ tàta yã, de òsun gɛ̃ ò tɛ́ ká ma gbagbakia pãro. Abirekũ sã̀na. Makũ Dikiri Zĩ̀karide makũ mɛ́ ma ò. Á yã tɛn kɛmɛnɛ nnaro, mani á gba síro. 
\v 11 Zaa ifãboki kpa ari a lɛ́tɛ kpa ma tↄ́ nigↄ̃ zↄ̃kↄ̃ burinↄ tɛ́. Oni turaretiti kpátamɛnɛ oni sumɛnɛ kũ gba gbãsĩsarinↄ gu sĩnda pínkia, zaakũ ma tↄ́ nigↄ̃ zↄ̃kↄ̃ burinↄ tɛ́. Makũ Dikiri Zĩ̀karide makũ mɛ́ ma ò. 
\v 12 Ama ákↄ̃nↄ adì dↄkɛ kũ ma tↄ́o adì pi ma teburuu gbãsĩ vĩ, akũ adì sa oa kũ pↄ́kãde ginanↄ. 
\v 13 Makũ Dikiri Zĩ̀karide ma pì: Adì pi á kpasa kũ yã pìio, akũ adì lɛ́zuki kɛa. Tó a su ma gbagba kũ pↄ́ kↄ̃̀nↄkunanↄ kũ pↄ́ ɛrɛnↄ kũ pↄ́ gyãrenↄ, mani abirenↄ sí yá? Makũ Dikiri makũ mɛ́ matɛni á la. 
\v 14 Manafikide kũ à pↄ́ sà vĩ a kpàsan kũ à lɛ́ sɛ̀mɛnɛ, akũ à gɛ̀ɛ à ma gbagba kũ pↄ́ mamberudeo a gɛ̃nɛ ũ, ma láari bò adea. Zaakũ makũmɛ Kína zↄ̃kↄ̃ ũ, ma tↄ́ dì burinↄ naasi kũ. Makũ Dikiri Zĩ̀karide makũ mɛ́ ma ò.
\c 2
\p
\v 1 Makũ Dikiri Zĩ̀karide ma pì: Ákↄ̃nↄ sa'orinↄ á yãn dí sà. 
\v 2 Tó ádi ma yã maro, tó ádi da á swɛ̃̀n à ma tↄ́ kpáro, mani láari boáwa de àsun gↄ̃ arubarika vĩro. Ma bòáwa se kↄ̀, zaakũ ádi da á swɛ̃̀n a ma tↄ́ kpàro. 
\v 3 À ma! Mani kpãkɛ̃ á burinↄi á yãi, mani dikpɛ sa'opↄnↄ gbↄ̃̀ lↄ́lↄ á ãnnwa, oni á sɛ́tɛ ò á kↄ́tɛ. 
\v 4 Ánigↄ̃ dↄ̃ sà kũ ma yã dí dìtɛárɛ de ma bàka kunna kũ Levi burinↄ kpɛ́ kun. Makũ Dikiri Zĩ̀karide makũ mɛ́ ma ò. 
\v 5 Ma bàka kunna kũńwo pìi gũn ma wɛ̃̀ndi kũ aafiaao kpàḿma de ògↄ̃ ma vĩna vĩ, akũ ò ma vĩna vĩ, ń nini kòko ma tↄ́ yãi. 
\v 6 Yãdannɛna yãpura da ń lɛ́n, odi ɛ́kɛyã ma ń lɛ́nlo. Ò táa ò kũmao kũ lɛ́dokↄ̃nↄo kũ nɛ̀sɛpurao ò gbɛ̃nↄ bò yã vãni gũn dasi. 
\v 7 À mana sa'ori gↄ̃ dↄ̃na vĩ de gbɛ̃nↄ le ò yãdannɛna ma a lɛ́i, zaakũ àkũmɛ makũ Dikiri Zĩ̀karide zĩ̀ri ũ. 
\v 8 Ákↄ̃nↄ sↄ̃ a zã zɛ́a, á yãdannɛnanↄ tò gbɛ̃nↄ fù dasi, a ma bàka kunna kũ Levi burinↄ gbòro. Makũ Dikiri Zĩ̀karide makũ mɛ́ ma ò. 
\v 9 Akũ ma tò ò á gya bò ma á kĩa gbɛ̃ sĩnda pínki kĩnaa, kũ ádi tɛ́ ma ágbairo akũsↄ̃ adì gbɛ̃nↄ tɛ̃̀ bo doka musu.
\s1 Yìgidɛna yã
\p
\v 10 À de ó pínki De mɛ̀n domɛɛ? À de Luda dokↄ̃nↄ mɛ́ à ó kɛɛ? Bↄ́ mɛ́ à tò odì yãfutɛ kɛkↄ̃nɛɛ? O Luda bàka kunna kũ ó dizinↄ yã gbòro. 
\v 11 Yudanↄ yãfutɛ kɛ̀ ò yã vãni kɛ̀ Isarailanↄ bùsun kũ Yurusalɛmuo, zaakũ ò tãnagbagbarinↄ sɛ̀ nↄ ũ ò Dikiri kpɛ́ kũ à yeii gbã̀a lɛ̀o. 
\v 12 Gbɛ̃ kũ à yã dí taka kɛ̀, Dikiri a kɛ̃ Yakubu burinↄa, bee tó dímɛ, bee tó à sù kũ gbanↄ Dikiri Zĩ̀karidenɛ.
\p
\v 13 Yã plade kũ adì kɛn dí. Adìgↄ̃ ↄ́ↄ dↄ àgↄ̃ wiki pɛ́, á wɛ́'i dìgↄ̃ kú Dikiri gbagbakia, kũ adi wɛ́ sɛ́ à gba kũ a suonɛ gwa gbasa à sìro yãi. 
\v 14 Adì pi: Bↄ́ mɛ́ à sù kũ yã dioo? Kũ Dikiri mɛ́ à sèedade ũ á dagura kũ n kɛfɛnnakɛgↄrↄ nↄkpammao yãimɛ. Zaakũ n nↄkpamma pìn n gbɛ̃ndo kũ a kↄ̃ yã mà ũ, akũ n yã fùtɛnɛ. 
\v 15 À de Dikiri á kɛ mɛ̀ dokↄ̃nↄ ũ de á mɛ̀ kũ á lɛ́o gↄ̃ dokↄ̃nↄ yãimɛɛ? Bↄ́n Luda tɛn pɛ́a á mɛ̀dokↄ̃nↄkɛ pìi musuu? De á nɛ́nↄ le ò a yã ma yãimɛ. Abire yãi àgↄ̃ á zĩda kũna dↄ̃ de àsun yã futɛ á nↄkpammanɛro. 
\v 16 Makũ Dikiri Isarailanↄ Luda ma pì, ma zã yìgidɛnan kũ nↄ kpebonaao. Makũ Dikiri Zĩ̀karide makũ mɛ́ ma ò. Àgↄ̃ á zĩda kũna dↄ̃, àsun yã futɛnɛro.
\p
\v 17 A tò Dikiri kpàsa kũ á yã'onaao. Adì pi: Ó yã kpate mɛ́ à a kpàsaa? Kũ adì pi vãnikɛrinↄ mana Dikirinɛ, akũ ń yã dì káagu yãi. Adì pi dↄ Luda kũ àdi yãkpatɛ kɛ kũ gbɛ̃nↄo a zɛ́a pì kú mámɛɛ?
\c 3
\s1 Dikiri yãkpatɛkɛgↄrↄ zĩ
\p
\v 1 Makũ Dikiri Zĩ̀karide ma pì: À ma! Mani ma Zĩ̀ri gbarɛ à domɛnɛ arɛ à zɛ́ kɛkɛmɛnɛ. Dikiri kũ adì a kĩnaa wɛtɛ ni gɛ̃ a kpɛ́n kãnto. À ma, ma bàka kunna kãáo Malaika kũ á pↄ dↄaa pì tɛn su! 
\v 2 Ama dí mɛ́ ani a sugↄrↄ fↄ̃ↄ? Tó à bò gupuraa, dí mɛ́ ani fↄ̃ à zɛɛ? Zaakũ anigↄ̃ de lán mↄ̀baasari tɛ́ bàmɛ, lán pↄ́pipirii mↄsↄnↄ gbãna bà. 
\v 3 Ani vutɛ à gbɛ̃nↄ baasa à gbãsĩ bońnɛ. Ani gbãsĩ bo Levi burinↄnɛ lákũ òdi kɛ wura kũ andurufuuoonɛ nà, gbɛ̃nↄ ni gbasa ò su Dikirinɛ kũ gbanↄ a zɛ́a. 
\v 4 Gↄrↄ birea Yurusalɛmudenↄ kũ Yudanↄ ń pínki gba ni ká Dikirigu lán yã bà, lán a zĩ bà.
\p
\v 5 Makũ Dikiri Zĩ̀karide ma pì: Mani suái yãkpatɛkɛkia manigↄ̃ wãna mà gbɛ̃ kũ ò ma vĩna vĩronↄ bobo ń dàn: Pↄ́dammarinↄ kũ zinakɛrinↄ kũ gbɛ̃ kũ òdi la da ɛ́kɛyã musunↄ kũ gbɛ̃ kũ òdi gbãna mↄ ń zĩkɛrinↄnɛ kũ gyaanↄnↄ kũ tonɛnↄ kũ bòasunↄ.
\s1 Kpãni'ona Ludaa
\p
\v 6 Makũ Dikiri madì litɛro. Abire yãin ákↄ̃nↄ Yakubu burinↄ ádi kakatɛro. 
\v 7 Makũ Dikiri Zĩ̀karide ma pì: Zaa á dizinↄ gↄrↄa a pã ma yãnɛ á tɛ́iro. À arɛ dↄma, mani arɛ dↄáwa. Adì pi, deran óni arɛ dↄmmaa?
\p
\v 8 Bisãsiri dì kpãni o Ludaa yá? Ama átɛni kpãni oma. Adì pi, bↄ́ musun átɛn kpãni omaa? Á pↄ́ kuride kũ á gbanↄ yã musumɛ. 
\v 9 Á buri sĩnda pínki gↄ̃̀ láari pↄ́ ũ kũ átɛn kpãni oma yãi. 
\v 10 À su kũ pↄ́ kurideo pínki à ká ma aruzɛkɛkatɛkin, de pↄ́ble gↄ̃ kú ma kpɛ́n. Makũ Dikiri Zĩ̀karide makũ mɛ́ ma ò. À ma lɛ́ abire musu à gwa, tó mádi musu zɛ́ wɛ̃ ma arubarikaa pìsiárɛ a kura a kákakiiro. 
\v 11 Makũ Dikiri Zĩ̀karide ma pì: Mani kpá á burapↄ yàkarinↄnɛ de òsun á pↄ́nↄ kakatɛro. Á geepi línↄ nɛ́ ni wororo. 
\v 12 Buri sĩnda pínki ni pi arubarikadenↄn á ũ, zaakũ á bùsu nigↄ̃ nna. Makũ Dikiri Zĩ̀karide makũ mɛ́ ma ò.
\p
\v 13 Makũ Dikiri ma pì: A yã pãsĩ ò ma musu. Adì pi, bↄ́ yãn o ò n musuu? 
\v 14 A pì zↄ̀blena Ludanɛ bi yã pãmɛ. Kũ o zĩ kɛ̀ Dikiri Zĩ̀karide yãa akũsↄ̃ o uta kasanↄ dà a yãi, bↄ́ àreen o lèe? 
\v 15 Tera lán dí bà adì pi ĩadãrinↄn arubarikadenↄ ũ. Átɛn da yãvãnikɛrinↄ mɛ́ òtɛn zĩni pɛ́tɛ, gbɛ̃ kũ àdi pi Luda kipa ò ↄsi ká sↄ̃, yãke dì a lero.
\p
\v 16 Akũ gbɛ̃ kũ ò Dikiri vĩna vĩnↄ yã ò kũ kↄ̃o, akũ à sã kpà ń yãi à mà. Akũ ò gbɛ̃ kũ ò Dikiri vĩna vĩ kũ òdi laasun lɛ́anↄ tↄ́ kɛ̃̀ dↄngu takadan a arɛ. 
\v 17 Makũ Dikiri Zĩ̀karide ma pì gↄrↄ kũ ma bo kũ yão, onigↄ̃ de ma pↄ́ ũ ma aruzɛkɛ ũ. Mani sùru kɛ kũńwo lákũ gbɛ̃ dì sùru kɛ kũ a nɛ́ kũ àtɛn zĩ kɛnɛɛo nà. 
\v 18 Áni gbɛ̃ mananↄ kũ gbɛ̃ vãninↄ dↄ̃kↄ̃nɛ sà, gbɛ̃ kũ òtɛn do Ludainↄ kũ gbɛ̃ kũ òtɛn doironↄ.
\c 4
\s1 Dikiri sugↄrↄ zĩ
\p
\v 1 Makũ Dikiri Zĩ̀karide ma pì: À ma! Gↄrↄ pì tɛn su, anigↄ̃ wãna lán tãmatɛ bà, akũsↄ̃ ĩadãrinↄ kũ yãvãnikɛrinↄ nigↄ̃ de lán sɛ̃̀ kori bà. Gↄrↄ pì ni ń kpata ń pínki, ń zĩni ke ń ↄnɛ ni gↄ̃ro. 
\v 2 Ákↄ̃nↄ kũ á ma vĩna vĩnↄ sↄ̃, á surabana Ifãntɛ̃ ni bo, aafia nigↄ̃ kú a gupurai. Áni bↄtɛ àgↄ̃ vĩvĩ lán zùnɛ kũ ò ń gbárɛnↄ bà. 
\v 3 Makũ Dikiri Zĩ̀karide ma pì: Gↄrↄ kũ ma bo kũ yão áni gɛ̀sɛ pɛ́tɛpɛtɛ gbɛ̃ vãninↄa, onigↄ̃ de lán túbu bà á gbá gɛ̃i.
\p
\v 4 À tó doka kũ ma kpà ma zↄ̀bleri Musaa zaa Orɛbu gↄ̃ dↄágu, yã kũ ma dìtɛ Isarailanↄnɛ kũ yã kũ ma dàńnɛo. 
\v 5 À ma! Mani annabi Ilia zĩáwa ari ma sugↄrↄ zↄ̃kↄ̃ vĩnade gↄ̃ gɛ́ ká. 
\v 6 Ani tó denↄ pↄ gↄ̃ kú ń nɛ́nↄa akũsↄ̃ nɛ́nↄ pↄ nigↄ̃ kú ń denↄa. Tó lɛnlo, mani su mà ↄ pãtɛpãtɛ á bùsun mà lɛ́ kɛárɛ.