\id JOL 
\ide UTF-8
\h Yoɛli
\toc1 YOƐLI
\toc2 Yoɛli
\mt1 YOƐLI
\ip Gusunɔn sɔmɔ Yoɛlin wɑɑsu yɑ sɑ̃ɑ kirɔ ye u win tɔmbu kuɑ. U nɛɛ, Yinni Gusunɔn siribu bu koo nɑ bin sɑɑ sɔɔ. Siri bin sɑɑwɑ u sokumɔ Yinni Gusunɔn tɔ̃ru. Sɑɑ ye sɔɔ, twee yi koo nɑ yi tem wukiri yi ɑrumɑnibɑ kɑm koosiɑ. Nge mɛ twee yi, yi koo tem kɑm koosiɑ, nge mɛyɑ Gusunɔ u koo mɑɑ tɔn be bɑ ǹ nùn nɑɑnɛ doke kɑm koosiɑ.
\ip Yoɛli u mɑɑ nɛɛ, sɑnɑm dɑ̃ɑkim sɔɔ, Yinni Gusunɔ u koo de win Hunde u nɑ win tɔmbu sɔɔ. Yɑ mɑɑ koorɑ nge mɛ sɑ gɑrimɔ GK 2:16-21 sɔɔ.
\ip Yoɛli, yĩsi ten tubusiɑnɑ Gusunɔ u sɑ̃ɑwɑ Yinni.
\is1 Tire ten kpunɑɑ
\iq1 1. Twee yi koo tem wukiri, wiru 1.
\iq1 2. Yinni Gusunɔn tɔ̃ru, wiru 2:1-17.
\iq1 3. Ye yɑ koo Yinni Gusunɔn tɔmbu deemɑ, wiru 2:18n di sere wiru 4:21.
\ie
\c 1
\p
\v 1 Gɑri wee yi Yinni Gusunɔ u Yoɛli, Pɛtuɛlin bii sɔ̃ɔwɑ u Yudɑbɑ sɔ̃.
\s1 Twee wuuru kɑ gbeburu
\q1
\v 2 U nɛɛ, bɛɛ Yudɑbɑn guro gurobu,
\q1 i swɑɑ dɑkio i nɔ.
\q1 Bɛɛ Yudɑbɑ kpuro kpuro
\q1 i swɑɑ tem kpĩiyɔ i gɑri yi nɔ.
\q1 Gɑ̃ɑ ninin bweseru nu koore bɛɛn wɑɑti sɔɔ,
\q1 ǹ kun mɛ bɛɛn sikɑdobɑn wɑɑti sɔɔ?
\q1
\v 3 I bɛɛn bibu yen gɑri sɔ̃ɔwɔ.
\q1 Kpɑ bii be, bu mɑɑ ben bibu sɔ̃,
\q1 kpɑ be, bɑ̀ n seewɑ bu mɑɑ begibu sɔ̃.
\q1
\v 4 Wee dĩɑ ni kɔkɔnu nu di n tiɑrɑ,
\q1 twee yi nɑ yi di.
\q1 Ye twee yi nɑ yi di n tiɑrɑ
\q1 mɑ swĩini yi nɑ yi di.
\q1 Ye swĩini yi di n tiɑrɑ,
\q1 mɑ gbɑɑnu nɑ nu ye di.
\q1
\v 5 Bɛɛ be tɑm mu goomɔ, i dom yɑndo kpɑ i swĩ.
\q1 Bɛɛ tɑm nɔrobu, i weeweenu koowo.
\q1 Domi tɑm mu koo kpe resɛm biɑrun sɔ̃.
\q1
\v 6 Domi twee wuurɑ nɑ nge tɑbu kowobu
\q1 tɑ bɛsɛn tem wukiri.
\q1 Yi dɑbi, yi mɑɑ dɑm mɔ.
\q1 Yin donnu dɑm mɔwɑ nge gbee sinɑnsuginu.
\q1
\v 7 Yi bɛsɛn resɛm gbɑɑnu kɑm koosiɑmɔ.
\q1 Yi bɛsɛn figie dɑ̃nu dimɔ.
\q1 Yi yen kokosu wĩɑmɔ.
\q1 Mɑ yi yen kɑ̃ɑsi derimɔ kokosu sɑri.
\q1
\v 8 I wuri koowo nge kurɔ kpɑo wi gɔminirɑ deemɑ.
\q1
\v 9 Bɑ ku rɑ mɑɑ kɑ kɛ̃nu de Yinni Gusunɔn sɑ̃ɑ yerɔ
\q1 ni nu sɑ̃ɑ ɑlikɑmɑ kɑ tɑm.
\q1 Yen sɔ̃nɑ Yinni Gusunɔn sɔm kowo be bɑ sɑ̃ɑ yɑ̃ku kowobu bɑ sɑ̃ɑre bɑ gɔɔ sɔ̃.
\q1
\v 10 Gbeɑ kpuro yɑ kɑm kuɑ.
\q1 Mɑ yen tem mu sɑɑrɑ.
\q1 Alikɑmɑ sɑri, resɛm kɑ gum mɑɑ sɑri.
\q1
\v 11 Gbee wukobu bɑ sɔ̃ biti sɔɔ.
\q1 Be bɑ rɑ resɛm yewe, weeweenɑ bɑ mɔ̀.
\q1 Domi dĩɑ bimi sɑri.
\q1 Dĩɑnu kpuro nu kɑm kuɑ.
\q1
\v 12 Resɛm gbɑɑnu nu gberɑ.
\q1 Figie yɑ dɛllɑ.
\q1 Dɑ̃ɑ gbɑɑnu kpuro nu geɑ yinɑ.
\q1 Yɑ derɑ tɔmbu bɑ ǹ mɑɑ nuku dobu mɔ.
\s1 Yoɛli u tɔmbu kɑnɑmɔ
\s2 bu Yinni Gusunɔ suuru kɑnɑ
\q1
\v 13 Bɛɛ Yinni Gusunɔn sɔm kowobu, yɑ̃ku kowobu,
\q1 i sɑɑki sebuo
\q1 i kɑ kpunɑ wɔ̃ku giriru nuku sɑnkirɑnun sɔ̃.
\q1 Domi wee bɑ ku rɑ mɑɑ kɑ ɑlikɑmɑ kɑ tɑm kɛ̃nu nɛ
\q1 Gusunɔ bɛsɛn Yinnin sɑ̃ɑ yerɔ.
\q1
\v 14 I tɔ̃ru gɑru wunɔ
\q1 tè sɔɔ i ko i nɔɔ bɔke.
\q1 I tɔmbu kpuro mɛnnɔ sere kɑ durɔ tɔkɔnɔ
\q1 Gusunɔ bɛsɛn Yinnin sɑ̃ɑ yerɔ,
\q1 kpɑ i nùn kɑnɑ.
\s1 Yinni Gusunɔn mɔrun tɔ̃ru
\q1
\v 15 Yinni Gusunɔn tɔ̃ru tɑ turuku kuɑ.
\q1 Tɔ̃ɔ te, tɑ sɑ̃ɑwɑ win tɔ̃ru.
\q1 Te sɔɔrɑ wi, Dɑm kpurogii u koo kpuro kɑm koosiɑ.
\q1 Annɑ ɑ tɔ̃ɔ kɔ̃suru wɑ te tɑ sisi mi.
\q1
\v 16 Wee sɑ mɛɛrɑ bɑ kɑ bɛsɛn dĩɑnu doonɔ.
\q1 Mɑ nuku dobu kpɑ Gusunɔ bɛsɛn Yinnin sɑ̃ɑ yerɔ.
\q1
\v 17 Ye bɑ duurɑ, yɑ gberɑ tem kusɑnu sɔɔ.
\q1 Dĩɑnu kpɑ birɑnu sɔɔ.
\q1 Mɑ birɑ ni, nu wɔrukumɔ.
\q1 Domi nu ǹ mɑɑ dĩɑnu mɔ.
\q1
\v 18 I swɑɑ dɑkio i nɔ nge mɛ yɛɛ yi wuri mɔ̀,
\q1 mɑ yi bɔsu bɑɑmɑ.
\q1 Domi yi ǹ yɑkɑsu wɑ kpɑrɑ yerɔ.
\q1 Bɑɑ kɑ yɑ̃ɑnɔ nu nɔni sɔ̃ɔre.
\s1 Yoɛli u kɑnɑru mɔ̀
\q1
\v 19 Yinni Gusunɔ, wunɑ nɑ nɔɔgiru suemɔ.
\q1 Domi wee, yɑkɑsu kɑ dɑ̃ɑ dɔ̃ɔ mwɑɑrɑ gberɔ.
\q1
\v 20 Mɑ yɛɛ yi nɔɔgiru sue yi nun kɑnɑmɔ.
\q1 Domi dɑɑnu gberɑ, yɑkɑsu mɑɑ dɔ̃ɔ mwɑɑkirɑ gbɑburɔ.
\c 2
\s1 Yinni Gusunɔn tɔ̃ru
\s2 tɑ turuku kuɑ
\q1
\v 1 I kɔbɑ soowo Siɔniɔ.
\q1 I de bu ye nɔ Yinni Gusunɔn guu dɛɛrɑru mi.
\q1 Bɛɛ be i wɑ̃ɑ tem mɛ sɔɔ kpuro, i diirio bɛrum sɔ̃.
\q1 Domi Yinni Gusunɔn mɔrun tɔ̃rɑ wee.
\q1 Wee tɑ mɑm turuku kuɑ.
\q1
\v 2 Tɔ̃ɔ te, tɑ tĩriwɑ.
\q1 Tɑ guru wiru kɑ bukɔ sɔɔwɑ.
\q1 Mɑ twee wuurɑ wee yi dɑbi,
\q1 yi mɑɑ dɑm mɔ.
\q1 Yin wuu te, tɑ tĩriwɑ
\q1 nge yɑm wɔ̃kurɑ guuru wukiri.
\q1 Sɑ ǹ yen bweseru wɑɑre.
\q1 Sɑ ǹ mɑɑ yen bweseru wɑsi.
\q1
\v 3 Mi yi sɑrɑ kpuro,
\q1 n dɑ kowɑ nge dɔ̃ɔ mwɑɑrɑ u doonɑ.
\q1 Yi ku rɑ gɑ̃ɑnu deri.
\q1 Yellu bɛsɛn tem mu geɑ sɑ̃ɑ
\q1 nge gbɑɑ te bɑ mɔ̀ Edɛni.
\q1 Adɑmɑ tɛ̃ yi mu kuɑ nge mi gɑ̃ɑnu ku rɑ kpi.
\q1
\v 4 Twee yi, yi sɑ̃ɑwɑ nge tɑbu mɑɑsɔbu
\q1 be bɑ dumi yɑkiɑmɔ.
\q1
\v 5 Yi yɔ̃ɔkumɔ yi guunu gɑsirimɔ.
\q1 À n yen wɔkinu nuɑ
\q1 ɑ rɑ n tɑmɑɑ nge tɑbu kɛkɛbɑrɑ,
\q1 ǹ kun mɛ yɑkɑ si su dɔ̃ɔ mwɑɑrɑmɔn wɔkinu.
\q1 Yi rɑ n weewɑ nge tɑbu durɔ be bɑ tɑbun sɔɔru sɑ̃ɑ.
\q1
\v 6 Tɔmbu kpuro bɑ rɑ n nɑndewɑ yì n tunumɑ.
\q1 Kpɑ ben wuswɑɑ yu burisinɑ.
\q1
\v 7 Yi rɑ tii yɔ̃suwɑ nge tɑbu durɔbu,
\q1 yi n gbɑ̃rɑru gɑsirimɔ,
\q1 yen bɑɑyere yɑ n yen swɑɑ swĩi.
\q1 Yi ku rɑ gɑm gɛre.
\q1
\v 8 Yi ku rɑ mɑɑ bɑɑsinɛ.
\q1 Yen bɑɑyere yɑ rɑ n yen sĩɑ swĩiwɑ.
\q1 Gɑ̃ɑ ni nu koo ye gɔngɛrɛ ko,
\q1 yi rɑ nu wɔriwɑ sɑnnu.
\q1 Nu ku rɑ mɑɑ ye yɔ̃rɑsie.
\q1
\v 9 Yi rɑ wuu wukiriwɑ
\q1 yi n gbɑ̃rɑru kɑ yɛnusu gɑsirimɔ,
\q1 kpɑ yi n dumɔ fɛnɛntibɑn di nge gbɛnɔbu.
\q1
\v 10 Mi yi duɑ, tem mu rɑ diiriwɑ,
\q1 kpɑ n sɑ̃ɑre wɔllɑ koo wɔrumɑ,
\q1 kpɑ suru kɑ sɔ̃ɔ yɑm tĩrɑ,
\q1 kpɑ kperin bɑllibu kpe.
\q1
\v 11 Nge mɛyɑ Yinni Gusunɔ ù n gɑri geruɑ win tɑbu kowobun wuswɑɑɔ,
\q1 bɑ rɑ nùn mɛm nɔɔwɛwɑ.
\q1 Bɑ dɑbi, bɑ mɑɑ dɑm mɔ.
\q1 Yen sɔ̃nɑ win tɔ̃ɔ te, tɑ nɑnum mɔ.
\q1 Wɑrɑ u koo yɔ̃rɑ u tu mɑ.
\s1 I gɔ̃ru gɔsio
\q1
\v 12-13 Yinni Gusunɔ u nɛɛ,
\q1 nɑ sɑ̃ɑwɑ wɔnwɔndugii.
\q1 Nɛn kĩru tɑ kpɑ̃.
\q1 Nɛn mɔru yɑ ku rɑ fuuku se.
\q1 Nɑ rɑ mɑɑ tɔnu suuru kue
\q1 kɔ̃sɑ ye nɑ rɑɑ kĩ n nùn kuɑ sɔɔ.
\q1 Tɛ̃, i wurɑmɑ kɑ bɛɛn gɔ̃ru kpuro nɛn mi,
\q1 i nɔɔ bɔke, kpɑ i wuri ko.
\q1 Bɛɛn gɔ̃ruwɑ i ko i gɔsiɑ,
\q1 n ǹ mɔ i yɑ̃nu gɛ̃ɛku tɔnɑ.
\q1 I wurɑmɑ nɛ, Gusunɔ bɛɛn Yinnin mi.
\q1
\v 14 Sɔrɔkudo kon gɔ̃ru gɔsiɑ,
\q1 kpɑ n bɛɛ durom kuɑ.
\q1 Sɑɑ ye sɔɔrɑ i ko i kpĩ i kɑ mɑn ɑlikɑmɑ kɑ tɑm kɛ̃nu nɑɑwɑ.
\s1 I kɑnɑru koowo
\s2 kɑ nɔɔ bɔkuru
\q1
\v 15 I kɔbɑ soowo Siɔniɔ.
\q1 I tɔmbu mɛnnɔ,
\q1 kpɑ i nɔɔ bɔkurun tɔ̃ru yi.
\q1
\v 16 I tɔmbu mɛnnɔ bu mɑn sɑ̃,
\q1 guro gurobu kɑ bibu, kɑ bii wɛ̃ɛnɔ.
\q1 Bɑɑ kɑ be bɑ wɑ̃ɑ kurɔ kpɑɑ dirɔ,
\q1 bu yɑrio ben kurɔ kpɑɑ dirun di.
\q1
\v 17 Kpɑ yɑ̃ku kowo be bɑ mɑn sɑ̃ɑmɔ
\q1 bu du nɛn sɑ̃ɑ yerɔ kɑ swĩi,
\q1 yɑ̃ku yeru kɑ kɔnnɔn bɑɑ sɔɔ,
\q1 bu nɛ ben Yinni kɑnɑ bu nɛɛ,
\q1 n ben wɔnwɔndu wɑɑwo, be, nɛn tɔmbu.
\q1 N ku bu sekuru doke.
\q1 N ku de tɔn tukobu bu bu yɛ̃ɛ bu nɛɛ,
\q1 mɑnɑ nɛ, ben Yinni nɑ wɑ̃ɑ.
\s1 Yinni Gusunɔ
\s2 u win tɔmbu wisimɔ
\q1
\v 18 Yinni Gusunɔ u nisinu mɔ win tem sɔ̃.
\q1 U win tɔmbun wɔnwɔndu mɔ.
\q1
\v 19 Mɑ u win tɔmbun kɑnɑru wisɑ,
\q1 u nɛɛ, kon bɛɛ ɑlikɑmɑ kpɑɑ wɛ̃, kɑ resɛm, kɑ gum.
\q1 I ko i deburu wɑ.
\q1 Nɑ ǹ mɑɑ derimɔ bweseru gɑru tu bɛɛ yɛ̃ɛ.
\q1
\v 20 Kon bɛɛ yibɛrɛ be bɑ nɑ sɑɑ sɔ̃ɔ yɛ̃sɑn nɔm geu giɑn di girɑ,
\q1 kpɑ n de bu dɑ n tomɑ
\q1 mi tem mu gbere mɑ gɑ̃ɑnu ku rɑ kpi.
\q1 Kon de ben swɑɑ gbiobu bu nim wɔ̃ku bɔruguu wɔri.
\q1 Kpɑ be bɑ wɑ̃ɑ biruɔ bu nim wɔ̃ku ge bɑ mɔ̀ Mɛditerɑnɛ wɔri.
\q1 Ben gonu nu koo numiɑ sere bu kpɑnɑ bu wɛ̃siɑ.
\q1 Geemɑ, Yinni Gusunɔ u gɑ̃ɑ bɑkɑnu kuɑ.
\q1
\v 21 Tem, ɑ ku bɛrum ko,
\q1 ɑ nuku dobu koowo,
\q1 domi Yinni Gusunɔ u gɑ̃ɑ bɑkɑnu kuɑ.
\q1
\v 22 Bɛɛ gbeeku yɛɛ, i ku nɑndɑ.
\q1 Domi yɑkɑsu su koo wure su kpi temɔ,
\q1 kpɑ dɑ̃nu nu mɑ.
\q1 Figie kɑ resɛm yɑ koo binu mɑ siki siki.
\q1
\v 23 Bɛɛ Siɔnigibu i nuku dobu koowo Gusunɔ bɛɛn Yinni sɔɔ.
\q1 Domi u koo de gurɑ yu nɛ yen sɑɑ sɔɔ nge yellu.
\q1 U koo de yu nɛ sɑɑ ye yɑ rɑ tore
\q1 kpɑ u de yu kpe sɑɑ ye yɑ rɑ kpe.
\q1
\v 24 Alikɑmɑn soo yerɑ kun mɑɑ gberɑmɔ.
\q1 Olifin gum, kɑ resɛm tɑm kun mɑɑ biɑrɑmɔ wekenɔ.
\q1
\v 25 Kon bɛɛ wɔ̃ɔ si kɑ dĩɑ nin kɔsire wɛ̃,
\q1 ni nɛn tɑbu kowobu, kɔkɔnu, kɑ gbɑɑnu, kɑ twee yi di
\q1 wɔ̃ɔ si su doonɑ sɔɔ.
\q1
\v 26 Bɛɛ nɛn tɔmbu, i ko i di i debu.
\q1 I ǹ sekuru wɑsi.
\q1 Kpɑ i nɛ, Yinni Gusunɔ bɛɛrɛ wɛ̃,
\q1 nɛ wi nɑ bɛɛ sɔm mɑɑmɑɑkiginu kuɑ.
\q1
\v 27 Sɑɑ ye sɔɔ, i ko i giɑ
\q1 mɑ nɑ wɑ̃ɑ bɛɛ Isirelibɑn suunu sɔɔ.
\q1 Mɑ nɑ sɑ̃ɑ Gusunɔ bɛɛn Yinni.
\q1 Nɛ bɑɑsi, Yinni goo mɑɑ sɑri.
\q1 Bɛɛ nɛn tɔmbu, i ǹ mɑɑ sekuru wɑsi.
\c 3
\s1 Yinni Gusunɔ u koo
\s2 win Hunde doke tɔmbu sɔɔ
\q1
\v 1 Yen biru kon nɛn Hunde doke tɔmbu kpuro sɔɔ.
\q1 Bɛɛn bii tɔn durɔbu kɑ tɔn kurɔbu bɑ koo nɛn gɑri gere,
\q1 kpɑ bɛɛn durɔ tɔkɔnu nu n dosusu mɔ̀,
\q1 kpɑ bɛɛn ɑluwɑɑsibɑ bu kɑ̃sinu wɑ.
\q1
\v 2 Bɑɑ kɑ yobɔ, kon bu nɛn Hunde wɛ̃wɑ tɔ̃ɔ te.
\q1
\v 3 Yen tɔ̃ɔ te sɔɔ, kon mɑɑmɑɑkibɑ ko.
\q1 Kon de yɛm kɑ dɔ̃ɔ kɑ wii bɑkɑsu sɔ̃ɔsirɑ wɔllɔ kɑ temɔ.
\q1
\v 4 Sɔ̃ɔ u koo yɑm tĩrɑ,
\q1 kpɑ suru u swɛ̃rɑ nge yɛm,
\q1 Yinni Gusunɔn tɔ̃ɔ nɑnumgii te, tu sere tunumɑ.
\q1
\v 5 Adɑmɑ yen tɔ̃ɔ te,
\q1 wi u Yinni Gusunɔ sokɑ, u koo fɑɑbɑ wɑ.
\q1 Gɑbu bɑ koo kisirɑ nɔni swɑ̃ɑ ten di
\q1 Siɔnin guurɔ Yerusɑlɛmuɔ
\q1 nge mɛ Yinni Gusunɔ u geruɑ.
\q1 Beyɑ be u sokɑ bɑ n kɑ wɑ̃ɑru mɔ.
\c 4
\s1 Yinni Gusunɔ
\s2 u koo bwese tukunu siri
\q1
\v 1 Yinni Gusunɔ u nɛɛ, yen tɔ̃ɔ te,
\q1 kon Yudɑbɑ kɑ ben wuu Yerusɑlɛmu wesiɑ nge yellu.
\q1
\v 2 Kpɑ n bwese tukunu kpuro mɛnnɑ
\q1 n nu sure Yosɑfɑtin wɔwɑ sɔɔ.
\q1 Miyɑ kon nu siri
\q1 kɔ̃sɑ ye nu nɛn tɔmbu Isirelibɑ kuɑn sɔ̃.
\q1 Domi nu bu yɑrinɑsiɑ tem kpuro sɔɔ.
\q1 Mɑ nu ben tem bɔnu kuɑ.
\q1
\v 3 Nu nɛn tɔmbu bɔnu kuɑ kɑ tɛtɛ.
\q1 Nu ben ɑluwɑɑsibɑ mwɛɛrɑ nu dɔrɑ
\q1 nu kɑ wɑ nu kurɔ tɑnɔbu dwe.
\q1 Mɑ nu wɔndiɑbɑ mwɛɛrɑ nu dɔrɑ nu kɑ tɑm nɔ.
\q1
\v 4 Bɛɛ Tirigibu kɑ Sidonigibu kɑ sere be bɑ wɑ̃ɑ Filisitibɑn temɔ,
\q1 mbɑ i kĩ nɛn mi.
\q1 I kĩ i mɑn mɔru kɔsiɑwɑ?
\q1 Ǹ n mɛn nɑ, nɑ ǹ tɛɛmɔ n kɑ mɑɑ bɛɛ mɔru kɔsie.
\q1
\v 5 Wee i nɛn sii geesu kɑ nɛn wurɑ
\q1 kɑ nɛn ɑrumɑni gurɑ.
\q1 Mɑ i dɑ i ye kpuro yi bɛɛn bũu sɑ̃ɑ yerɔ.
\q1
\v 6 Mɑ i Yudɑbɑ kɑ Yerusɑlɛmugibu mwɛɛrɑ i Gɛrɛkibɑ dɔre.
\q1 Nge mɛyɑ i kɑ bu tondɑsiɑ ben tem di.
\q1
\v 7 Adɑmɑ nɛ, kon kɑ bu wurɑmɑ mi bɑ rɑɑ wɑ̃ɑ.
\q1 Kon de kɔ̃sɑ ye i bu kuɑ mi,
\q1 yu wɔri bɛɛn wiru wɔllɔ.
\q1
\v 8 Kon bɛɛn bibu Yudɑbɑ dɔre.
\q1 Kpɑ be mɑɑ, bu be Sɑbegibu dɔre,
\q1 be bɑ wɑ̃ɑ n tomɑ.
\q1 Yeniwɑ nɛ, Yinni Gusunɔ nɑ geruɑ.
\s1 Tɑɑ dɑ̃ɑkibu kɑ siribu
\p
\v 9 Yoɛli u nɛɛ,
\q1 i bwese tukunu nɔɔsio bu tɑbun sɔɔru ko.
\q1 Nu tɑbu durɔ dɑmgibu seesio, kpɑ bu swɑɑ wɔri,
\q1 tɑbu kowobu kpuro gesi.
\q1
\v 10 Nu nin nɑɑ tebonu gɔsio tɑkobibɑ,
\q1 kpɑ nu nin kɔmbɔnu gɔsiɑ yɑɑsi.
\q1 Be bɑ rɑɑ sɑ̃ɑ bɛrurobu, bu tii koowo tɑbu durɔbu.
\q1
\v 11 I seewo fuuku i nɑ.
\q1 Bɛɛ bwese ni i wɑ̃ɑ turuku, i mɛnnɑmɑ.
\q1 Yinni Gusunɔ, ɑ de wunɛn tɑbu kowobu bu nɑ.
\q1
\v 12 Mɑ Yinni Gusunɔ u nɛɛ, bɛɛ bwesenu kpuro,
\q1 i seewo i nɑ Yosɑfɑtin wɔwɑ yen mi.
\q1 Domi miyɑ kon sinɑ
\q1 n bwese ni nu wɑ̃ɑ mi kpuro siri.
\q1
\v 13 Domi ben nuku kɔ̃surɑ bɑndɑ.
\q1 I kɔmbɔnu suo i tɔn be gɛ̃ nge dĩɑ ni nu ye.
\q1 I nɑ i bu munku nge resɛm ye bɑ doke gɑmɑ yerɔ,
\q1 mɑ yen nim mu kotosu yibɑ.
\q1
\v 14 Wee tɔn wɔru gɑ wee wɔwɑ yèn mi bɑ koo tɔmbu siri.
\q1 Domi nɛ, Yinni Gusunɔn tɔ̃ɔ te, tɑ turɑ
\q1 tè sɔɔ kon nɛn mɔru sɔ̃ɔsi.
\q1
\v 15 Sɔ̃ɔ kɑ suru kun mɑɑ bɑllimɔ.
\q1 Mɑ kperi yi yɑm tĩrɑ.
\q1
\v 16 Nɛ, Yinni Gusunɔ nɑ kukirimɔ Siɔnin guurun di.
\q1 Nɛn nɔɔ gɑ nɔɔrɑmɔ Yerusɑlɛmun di.
\q1 Wɔllu kɑ tem mu yĩirimɔ.
\q1 Adɑmɑ nɑ nɛn tɔmbu Isirelibɑ kɔ̃su.
\q1 Nɛnɑ nɑ sɑ̃ɑ ben kuku yeru.
\q1
\v 17 Bɛɛ Isirelibɑ, i ko i giɑ
\q1 mɑ nɛ Gusunɔ nɑ sɑ̃ɑwɑ bɛɛn Yinni,
\q1 nɛ wi nɑ wɑ̃ɑ Siɔniɔ nɛn guu dɛɛrɑru mi.
\q1 Yerusɑlɛmu kpuro yɑ koo kpɑm ko nɛgiɑ.
\q1 Tɔn tukobu bɑ ǹ mɑɑ ye wɔrimɔ.
\s1 Yinni Gusunɔ
\s2 u koo win tɔmbu domɑru kuɑ
\q1
\v 18 Sɑɑ gɑɑ wee yè sɔɔ resɛm yɑ koo geɑ ko
\q1 sere kɑ gungunu wɔllɔ.
\q1 Kpɑ sɑbenu nu di mi.
\q1 Kpɑ nu bom ko mu n kpɑ̃.
\q1 Yudɑn tem dɑɑnu kpuro nu koo nim koku.
\q1 Dɑru kokɑ gɑɑ koo yɑri
\q1 Yinni Gusunɔn sɑ̃ɑ yerun di,
\q1 kpɑ yen nim mu dɑ
\q1 sere Sitimun wɔwɑɔ.
\q1
\v 19 Egibiti yɑ koo kɑm ko,
\q1 kpɑ Edɔmun tem mu ko bɑnsu.
\q1 Domi bɑ Yudɑbɑ dɑm dɔre,
\q1 mɑ bɑ tɑɑrɛ sɑrirugibu go.
\q1
\v 20-21 Adɑmɑ kon be bɑ tɔmbun yɛm yɑri mi mɔru kɔsiɑ.
\q1 Kpɑ Yudɑbɑ kɑ Yerusɑlɛmugibu bɑ n wɑ̃ɑ ben temɔ
\q1 sere kɑ bɑɑdommɑɔ.
\q1 Kpɑ nɛ, Yinni Gusunɔ nɑ n wɑ̃ɑ Siɔniɔ.