\id JAS James in Busa, Ross Jones
\ide UTF-8
\h YAMISI
\toc1 YAMISI
\toc2 YAMISI
\mt1 YAMISI
\c 1
\s1 Yↄ̃ogwanaa
\p
\v 1 Yamisi, Luda kũ Dikiri Yesu Kirisio zↄ̀bleri mɛ́ à fↄ kpà Isaraila buri mɛ̀n kuri awɛɛpla kũ ò fãkↄ̃ananↄa.
\p
\v 2 Ma gbɛ̃nↄ, wari burinↄ dasi. À pↄ́ kũ ani á le ditɛ pↄnna yã ũ, 
\v 3 zaakũ á dↄ̃ kũ á ludanaanikɛna yↄ̃ogwana ni mɛna iárɛ. 
\v 4 À tó mɛna papaáwa, de àgↄ̃ de gbɛ̃ kàsaranↄ ũ swáswa yãke kĩanaáwa sari. 
\v 5 Tó ↄ̃ndↄ̃ tɛn kĩa á gbɛ̃kea, à wɛ́ kɛ Ludaa, ani a gba, zaakũ àdi gbɛ̃ sĩnda pínki gba pↄ́ kũ nɛ̀sɛɛo do taari'enaa sari. 
\v 6 Tó à wɛ́ kɛ̀a sↄ̃, à a náani kɛ sikaa sari, zaakũ sikade de lán ko vlã bàmɛ. Gu kũ ĩa kàkan, gwen àdi litɛn. 
\v 7 Gbɛ̃ bire taka súngↄ̃ da áni pↄ́ le Dikiriaro, 
\v 8 zaakũ a nɛ̀sɛ kun plaplamɛ, akũ àdigↄ̃ sika kɛ yã kũ àtɛn kɛ gũn pínki.
\p
\v 9 Takaside kũ à kú ó tɛ́ pↄnna kɛ, kũ Luda a kàra yãi. 
\v 10 Aruzɛkɛde pↄnna kɛ, kũ Luda a làgo yãi, zaakũ aruzɛkɛdenↄ ni gɛ̃tɛ lán lávu kↄtɛnaa bàmɛ. 
\v 11 Ifãntɛ̃ dì futɛ kũ a puusu gbãnao, à lánↄ dì kori kɛ, a vu dì kↄ́tɛ, a manakɛ dì láka. Lɛn aruzɛkɛde ni kpágui a bↄkↄtɛnanↄ gũn lɛ.
\p
\v 12 Arubarikaden gbɛ̃ kũ àdi yↄ̃ogwana fↄ̃ ũ, zaakũ a bona mana gbɛra Luda ni wɛ̃̀ndi kũ à a lɛ́ sɛ̀ gbɛ̃ kũ ò yeainↄnɛ kɛnɛ yàri ũ. 
\v 13 Tó yↄ̃ogwana gbɛ̃ lè, àsun pi Ludamɛro, zaakũ oni fↄ̃ ò Luda lɛ́ ò gwà kũ a vãnioro, akũsↄ̃ àpii dì gbɛ̃ke yↄ̃ à gwa kũ a vãnioro. 
\v 14 Baadi yↄ̃ogwanaa dì bo a pↄ́nidɛna kĩnaamɛ, akũ àdi a wɛ́ ble à a gátɛ. 
\v 15 Akũ pↄ́nidɛnaa pìi dì nↄ̀ sí à nɛ́ i durunna ũ. Tó durunna zↄ̃kↄ̃ kũ̀ sↄ̃, àdi ga imɛ.
\p
\v 16 Ma gbɛ̃ yenyĩdenↄ, àsun á zĩda sãtɛro. 
\v 17 Gba mana swáswa sĩnda pínki dì bo musu, De Luda pↄ́gupurinↄ Kɛ̀ri kĩnaamɛ. Àdi litɛro, a gupura i dì lagoro. 
\v 18 A pↄyenyĩnaa gũn à ó í kũ a yã yãpuradeo, de ò le ògↄ̃ arɛ a pↄ́ kũ à kɛ̀nↄ tɛ́.
\s1 Yãmana kũ a kɛnaao
\p
\v 19 Ma gbɛ̃ yenyĩdenↄ, à yã dí ma. Àgↄ̃ yã ma likalika á pínki, ama àsun yã o likalikaro, àsungↄ̃ pↄ fɛ̃ likalikaro. 
\v 20 Zaakũ bisãsiri pↄfɛ̃ dì su kũ yã mana kũ Luda yeiioro. 
\v 21 Abire yãi à ↄ gbarɛ dà vãni kũ yã pãsĩ kũ à dàgulanↄi pínki. À yã kũ ò tↄ̃̀ á swɛ̃̀n, kũ ani fↄ̃ à á sura ba sí kũ zĩdabusanaao.
\p
\v 22 Àsun á zĩda sãtɛro, àsun yã pì ma kũ são pãro, à zĩ kɛa. 
\v 23 Zaakũ gbɛ̃ kũ àdi yã ma, akũ àdi zĩ kɛoro de lán gbɛ̃ kũ àtɛni a zĩda gwa dígi gũn bàmɛ. 
\v 24 A zĩda gwanaa gbɛra, tó à gɛ̃̀ zɛ́la, lákũ à de nà dì sãagu gↄ̃̀nↄmɛ. 
\v 25 Gbɛ̃ kũ a wɛ́ pɛ́ Luda doka papanaaa kũ àdi tó ò gↄ̃ zĩdadenↄ ũ, akũ àdigↄ̃ gɛ́o arɛ, àdi ma à sãaguro, àdi zĩ kɛamɛ, Luda ni arubarika da adegu a yãkɛnaa gũn.
\p
\v 26 Tó gbɛ̃ a zĩda dìtɛ donyĩri ũ, akũ àdi a lɛ́ fↄ̃ro, àtɛni a zĩda kɛkɛmɛ, àtɛn donyĩ kɛ pãmɛ. 
\v 27 Donyĩkɛna swáswa kũ à taari vĩ De Ludanɛron dí: Ò tonɛnↄ kũ gyaanↄnↄ gwa ń wɛ̃ndakɛ gũn, ògↄ̃ ó zĩda kũna dↄ̃ gbãsĩ sari andunia yã musu.
\c 2
\s1 Gbɛ̃ wɛ́ gwanaa
\p
\v 1 Ma gbɛ̃nↄ, ákↄ̃nↄ kũ átɛni ó Dikiri gakuride Yesu Kirisi náani kɛnↄ, àsun gbɛ̃ wɛ́ gwaro. 
\v 2 Tó gbɛ̃ gɛ̃̀ á kↄ̃kakaranaa gũn wura tãnka kũ pↄ́kasa tɛ́kɛnaao dana, tó takaside kũ à bizakasa gbãsĩ danaa gɛ̃̀ se, 
\v 3 tó á wɛ́ tɛ́ gbɛ̃ kũ à pↄ́kasa tɛ́kɛna danaai, tó a pìnɛ à mↄ́ à vutɛ gu manan, tó a pì takasidenɛ à gɛ́ à zɛ dire, kesↄ̃ à mↄ́ à vutɛ á gbá sarɛ, 
\v 4 átɛn kↄ̃ tɛ̃̀ bomɛ, átɛn yã gwa kũ manafikion gweroo?
\p
\v 5 À ma, ma gbɛ̃ yenyĩdenↄ. Luda gbɛ̃ kũ ò de gbãnasaridenↄ ũ andunia gbɛ̃nↄnɛ sɛ̀ ògↄ̃ gbãna a náanikɛnaa gũn, de ò kpata kũ à a lɛ́ sɛ̀ gbɛ̃ kũ ò yeinↄnɛ ble. 
\v 6 Ákↄ̃nↄ sↄ̃, átɛn gbãnasaride pìnↄ kpe bo. Aruzɛkɛdenↄ mɛ́ òdi gbãna bleáwaroo? Mↄ́kↄ̃nↄ mɛ́ òdi á gátɛ ò gɛ́ kãáo yãkpatɛkɛkiaroo? 
\v 7 Mↄ́kↄ̃nↄ mɛ́ òdi tↄ́ nna kũ à kúáwa yakaroo? 
\v 8 Luda dokayã mìde pì, àgↄ̃ ye á gbɛ̃dakei lán á zĩda wɛ̃̀ndii bà. Tó á yã pì kũna yãpura, átɛn yã kɛ a zɛ́amɛ. 
\v 9 Tó átɛn kↄ̃ wɛ́ gwa sↄ̃, átɛn durunna kɛmɛ. Doka pìi vùtɛáwa, a gↄ̃ taaridenↄ ũn gwe. 
\v 10 Zaakũ tó gbɛ̃ doka kũna pínki, tó à fù mɛ̀n doa, à gↄ̃̀ taaride ũ a pínki gũmmɛ. 
\v 11 Luda pì, àsun zina kɛro. À pì dↄ, àsun gbɛ̃ dɛro. Bee tó ńdi zina kɛro, tó n gbɛ̃ dɛ̀, n gↄ̃ dokadarisari ũmɛ. 
\v 12 Ákↄ̃nↄ kũ Luda ni yã gↄ̃gↄ̃ kãáo doka kũ àdi tó ò gↄ̃ zĩdadenↄ ũ musu, àgↄ̃ yã o, àgↄ̃ yã kɛ lákũ à kↄ̃ sì kãáo nà. 
\v 13 Luda ni yãkpatɛ kɛ kũ sùrusaridenↄ sùruu sari, ama yã ni bo kũ sùrudeo nna.
\s1 Ludanaanikɛna kũ yãmanakɛnaao
\p
\v 14 Ma gbɛ̃nↄ, tó gbɛ̃ pì, átɛn Luda náani kɛ, tó àdi pↄ́ke kɛro, bↄ́ yãn gwee? Ludanaanikɛna bire taka ni fↄ̃ à a bo yá? 
\v 15 Tó á gbɛ̃ mɛ̀n do, gↄ̃gbɛ̃ ke nↄgbɛ̃ tɛn pↄ́kasa kũ pↄ́bleo takasi kɛ, 
\v 16 tó á gbɛ̃ke pìnɛ: Luda n gba aafiaa! Ǹsun tó ĩa n dɛro, ǹ pↄ́ ble ǹ kã, tó adi wɛ̃̀ndibadↄbↄ kpáaro, bↄ́n abire ũu? 
\v 17 Lɛmɛ se ludanaanikɛna ado pↄ́kekɛnaa sari bi yã gɛ̀ɛmɛ.
\p
\v 18 Tó gbɛ̃ n pì, ntɛn Luda náani kɛ, akũsↄ̃ matɛn yã kɛ, mani pinnɛ, ǹ n ludanaanikɛna pↄ́kekɛnasari mↄmɛnɛ, mani ma ludanaanikɛna mↄnnɛ ma yãkɛnaa gũn. 
\v 19 N sì kũ Luda mɛ̀n domɛ. À mana. Bee tãnanↄ se, ò dↄ̃ lɛ, akũ òdigↄ̃ lukaluka. 
\v 20 Yↄ̃nkↄ! Pↄ́ kũ à tò ludanaanikɛna pↄ́kekɛnasari pã, ń ye mà onnɛ yá? 
\v 21 Kũ ó dizi káaku Ibrahĩ a nɛ́ Isaaku kpà sa'opↄ ũ, yã dí bo kãao nna a yãkɛna yãiroo? 
\v 22 N è yá? A ludanaanikɛna kũ a yãkɛnaao kpákↄ̃imɛ. A yãkɛna mɛ́ à a ludanaanikɛna pàpai. 
\v 23 Akũ Luda yã díkĩna pàpa kũ à pì, Ibrahĩ Luda náani kɛ̀, akũ Luda tò yã bò kãao nna a náani kũ à kɛ̀ yãi. Akũ ò tↄ́ kpànɛ Luda gbɛ̃nna. 
\v 24 A è yá? Yãkɛna mɛ́ àdi tó yã bo kũ gbɛ̃o nna, adi kɛ ludanaanikɛna adonlo. 
\v 25 Lɛmɛ dↄ karua Rahabu kɛ̀ nna kũ Ludao a yãkɛna yãi, gↄrↄ kũ à gu'asirigwarinↄ dìtɛ à ń gbarɛ zɛ́ kpãni gũn. 
\v 26 Lákũ mɛ̀ ninisari de gɛ̀ ũ nà, lɛn ludanaanikɛna pↄ́kekɛnasari de gɛ̀ ũ lɛ se.
\c 3
\s1 Lɛ́fↄ̃naa
\p
\v 1 Ma gbɛ̃nↄ, àsun kɛ yãdannɛrinↄ ũ dasiro, zaakũ á dↄ̃ kũ Luda ni wɛ́ piti ókↄ̃nↄ yãdannɛrinↄa yãkpatɛkɛgↄrↄ zĩ de gbɛ̃ kparanↄla. 
\v 2 Ó pínki odìgↄ̃ zã yãa baala'imɛ. Tó gbɛ̃ lɛ́ dì a ásaru kɛro, taarisaridemɛ, ani fↄ̃ à a mɛ̀ pínki gbãna fↄ̃. 
\v 3 Odì sↄ̃mↄ ká sↄ̃nɛ de à ó yã ma yãimɛ, akũ odì a milɛ ble. 
\v 4 Kesↄ̃ à gó'itɛ gwa ísirala. Bee kũ a zↄ̃kↄ̃kɛo kũ zàga'ĩa gbãna kũ àdi a yĩpao, a fĩbↄ de fítinlemɛ. Àkũ mɛ́ àdi a milɛ ble, akũ a fĩ̀rii dì a pↄyeina danɛ. 
\v 5 Lɛmɛ sↄ̃, nɛ́nɛ bi mɛ̀gu fítinlemɛ, akũ àdi ĩa dã kũ yã zↄ̃kↄ̃ↄo.
\p À gwa lákũ tɛ́ fíti dì sɛ̃̀ dasi kpáta nà. 
\v 6 Nɛ́nɛ de lán tɛ́ bàmɛ, àkũmɛ andunia vãni ũ ó mɛ̀ɛ gũn. Àdi tó gbãsĩ gↄ̃ kpá ó mɛ̀ɛa pínki. Gyãwãn tɛ́ mɛ́ àdi nakara nɛ́nɛa, akũ nɛ́nɛ dì tɛ́ kpá ó andunia kunan. 
\v 7 Bisãsiri nↄ̀bↄsɛ̃ntɛnↄ tùtuu kɛ̀ pínki kũ bãnↄ kũ pↄ́ kũ òdi táa o kũ kùaonↄ kũ kpↄ̀nↄ, à kpɛ́ àtɛn kɛ ari tera, 
\v 8 ama gbɛ̃ke dì fↄ̃ à a nɛ́nɛ tùtu kɛro. Àkũmɛ pↄ́ vãni kũ àdi zɛ tɛniro ũ. À pana kũ sɛwɛtɛ̃o, 
\v 9 nɛ́nɛn odì Dikiri ó De sáabu kpáo, akũ odì ɛra ò bisãsiri kũ à a kɛ̀ lán a bà káo dↄ. 
\v 10 Lɛ́dokↄ̃nↄ pìin sáabukpana kũ gbɛ̃kanaao dì bon. Ma gbɛ̃nↄ, àsungↄ̃ de lɛro. 
\v 11 Íboki dì í nna kũ í kyã̀kyãao bo wɛ̀ɛ dokↄ̃nↄ gũn yá? 
\v 12 Ma gbɛ̃nↄ, kaka lí ni nɛ́ i kù ũ yá? Geepi lí ni nɛ́ i kaka ũ yá? Lɛmɛ dↄ bia í sùkusukude ni í nna boro.
\s1 Ɔ̃ndↄ̃ kũ àdi bo musu
\p
\v 13 Á tɛ́, dí mɛ́ à yãdↄ̃ri ↄ̃ndↄ̃de ũu? À mↄńnɛ a kunna mana gũn kũ a yãkɛnanↄ kũ zĩdabusana kũ àdi bo ↄ̃ndↄ̃ gũnwo. 
\v 14 Tó á nɛ̀sɛgↄ̃ba pãsĩ kũ denlawɛtɛnaao vĩ á swɛ̃̀ɛ gũn sↄ̃, àsun ĩa dãro, àsun gí yãpurairo. 
\v 15 Ɔ̃ndↄ̃ bire taka dì bo musuro, andunia pↄ́mɛ, á dà pↄ́mɛ, Ibilisi pↄ́mɛ. 
\v 16 Zaakũ gu kũ nɛ̀sɛgↄ̃ba kũ denlawɛtɛnaao kún, gwen kↄ̃yãmasari kũ yã bɛ̃̀nɛ pínkio dìgↄ̃ kún. 
\v 17 Tó gbɛ̃ ↄ̃ndↄ̃ kũ àdi bo musu vĩ, káaku àdigↄ̃ gbãsĩ vĩro, a gbɛra àdigↄ̃ yãkete vĩro, àdi a zĩda busańnɛ, àdi gbɛ̃ yã ma, à sùru papana kũ yãmanakɛnaao. Àdi gbɛ̃ tɛ̃̀ boro, akũsↄ̃ àdigↄ̃ manafiki vĩro. 
\v 18 Ibɛrɛmidɛrii dì kɛna kũ kↄ̃o nna tↄ̃, akũ àdi yã mana kɛ̃.
\c 4
\s1 Gbɛ̃nnakpana kũ anduniao
\p
\v 1 Bↄ́ mɛ́ àdi fìti kũ lɛ́kpakↄ̃anaao da á tɛ́ɛ? Òdi bo á pↄyeina kũ òtɛn ↄsi ká á mɛ̀ɛ gũnnↄ kĩnaanloo? 
\v 2 Adìgↄ̃ ye pↄ́i, ama adì ero, akũ adì gbɛ̃ dɛ. Adì pↄ́ ni dɛ, akũ adì pↄ́ kũ átɛn pɛ́a lero. Akũ adì lɛ́kpakↄ̃a kɛ, adì fìti kɛ. Á a vĩro, kũ adì wɛ́ kɛ Ludaaro yãimɛ. 
\v 3 Tó à wɛ́ kɛ̀, adì ero, kũ adì wɛ́ kɛ kũ nɛ̀sɛmanaoro yãimɛ, zaakũ adìgↄ̃ ye à a bↄkↄtɛ kɛ á pↄ́nidɛnanↄ gũmmɛ. 
\v 4 Náanisaridenↄ, á dↄ̃ kũ gbɛ̃nnakpana kũ anduniao bi ibɛrɛsɛna kũ Ludaonloo? Gbɛ̃ kũ à ye à kɛ andunia gbɛ̃ ũ gↄ̃̀ Luda ibɛrɛ ũmɛ. 
\v 5 Kũ ò kɛ̃̀ Luda yãn ò pì, Nini kũ Luda dà ó gũn nɛ̀sɛgↄ̃ba vĩ, átɛn da yã pãn yá? 
\v 6 Ama gbɛ̃kɛ kũ Luda vĩ kũoo de abirekũla, zaakũ ò kɛ̃̀ Luda yãn ò pì:
\q1 Luda dì ibɛrɛ sɛ́ kũ zĩdabirinↄ,
\q1 ama à gbɛ̃kɛ vĩ kũ zĩdabusarinↄ.
\m
\v 7 Abire yãi à mì natɛ Ludanɛ. À gí Ibilisinɛ, ani bàa síárɛ. 
\v 8 À na Ludai, ani naái. Durunnakɛrinↄ, à ↄ bo durunnan. Nɛ̀sɛpladenↄ, à á swɛ̃̀ pípi. 
\v 9 À ↄ́ↄ dↄ kũ pↄsirao kũ wɛ̃ndayão. À á yáadↄna litɛ ↄ́ↄdↄna ũ, à á pↄnna litɛ nɛ̀sɛyakana ũ. 
\v 10 À á zĩda busa Dikiri arɛ, ani á kara.
\p
\v 11 Ma gbɛ̃nↄ, àsun kↄ̃ tↄ́ bɛ̃̀nɛ síro. Gbɛ̃ kũ à a Yesude dake tↄ́ bɛ̃̀nɛɛ sì ke à a bɛ̃̀nɛɛ bò, à Luda doka sèeda vãni kɛ̀, à a vãni bò. Tó n Luda doka vãni bò sↄ̃, a màriimɛ n ũro, a vãniboriimɛ n ũ. 
\v 12 Ludan dokaditɛri ũ kũ yãkpatɛkɛriio. Àkũ mɛ́ à gbɛ̃ surabana kũ a kakatɛnaao gbãna vĩ. Mↄkↄ̃n sↄ̃, dímɛ n ũ, kũ ndì n gbɛ̃dake vãni boo?
\s1 Luda bàka bonaa
\p
\v 13 À yã ma sà, ákↄ̃nↄ kũ adì pi, gbãra ke zia áni gɛ́ wɛ́ran, áni vutɛ gwe wɛ̃̀ do, áni laga tá à àre le. 
\v 14 Á yã kũ ani á le zia dↄ̃ yá? Á dↄ̃ lákũ á wɛ̃̀ndi de nà yá? Á de lán suka bàmɛ. Tó à kpà fíti, akũ àdi gɛ̃tɛ gↄ̃̀nↄ. 
\v 15 Yã kũ à de à on dí: Tó Dikiri wè, akũ ó aafia, óni kɛ lán dire bà ke lán dí bà. 
\v 16 Tera sↄ̃ átɛn ĩa dã, a Luda bàkaa bò. Ĩadãna bire taka buri manaro. 
\v 17 Gbɛ̃ kũ à yãmanakɛna dↄ̃, akũ adi kɛro durunna kɛ̀.
\c 5
\s1 Kpãkɛ̃na aruzɛkɛdenↄi
\p
\v 1 Ákↄ̃nↄ aruzɛkɛdenↄ, à yã ma sà. À ↄ́ↄ dↄ, à wiki lɛ́ kisira kũ ani á le yãi. 
\v 2 Á aruzɛkɛnↄ yàka, kↄ̀kↄnↄ á pↄ́kasanↄ sòso. 
\v 3 Á ↄgↄ dã̀a kpà, akũ a dã̀akpanaa pì ni á da yãn, ani á mɛ̀ piti lán tɛ́ bà. A aruzɛkɛ dì gↄrↄ kpɛde zĩ. 
\v 4 À ma! A ↄgↄzĩkɛri kũ ò á burapↄnↄ kɛ̃̀árɛnↄ blè, akũ ↄgↄ pì yã Luda ki lè. Pↄ́kɛ̃rii pìnↄ wikilɛnaa gɛ̃̀ Dikiri Zĩ̀karide sãn. 
\v 5 A á mɛ̀na mà zĩtɛ la á pↄyeinakɛnaa gũn. A mɛ̀ɛ kpà kùtukpana gↄrↄ pↄ́ ũ. 
\v 6 A yã dà gbɛ̃ mananↄla, a ń dɛdɛ, odi gíárɛro.
\s1 Mɛna
\p
\v 7 Abire yãi ma gbɛ̃nↄ, àgↄ̃ mɛna fↄ̃ ari Dikiri sugↄrↄ. À gwa lán búbarii dì a burapↄ bɛ̀ɛrɛde kɛ̃gↄrↄ dã nà. Àdi mɛna fↄ̃ zaa kaburagↄrↄ ari sakare. 
\v 8 Ákↄ̃nↄ sↄ̃, à mɛna fↄ̃ à zɛ gbãna, zaakũ Dikiri sugↄrↄ kà kãni. 
\v 9 Ma gbɛ̃nↄ, àsun yãkete kákↄ̃iro, de Luda sún yãkpatɛ kɛ kãáoro yãi. Yãkpatɛkɛrii pì zɛna kpɛ́lɛlɛa fá! 
\v 10 Ma gbɛ̃nↄ, annabi kũ ò yã ò yã kũ Dikiri tↄ́onↄ, à mɛna kũ ò kɛ̀ warikɛnaa gũn zɛ́ dí taka sɛ́. 
\v 11 Odì pi ò arubarika vĩ, kũ ò mɛna fↄ̃̀ yãimɛ. A Ayuba mɛnakɛna baaruu mà, a mà lákũ Dikiri kɛ̀nɛ nà kpɛkpɛ, zaakũ wɛ̃nda kũ sùruuo papana Dikiria.
\p
\v 12 Atɛ̃nsa ma gbɛ̃nↄ, àsun la daro. Àsun pi a sì kũ ludambɛo ke kũ zĩtɛo kesↄ̃ kũ pↄ́ pãndeoro. À tó á ee gↄ̃ ee. À tó á oi gↄ̃ oi, de yã sún vutɛáwaro yãi.
\s1 Aduakɛna ludanaanikɛnaa gũn
\p
\v 13 Á gbɛ̃ke tɛn wari kɛ yá? À adua kɛ. Á gbɛ̃ke pↄ nna yá? À Luda sáabu kpá. 
\v 14 Á gbɛ̃ke tɛn gyã kɛ yá? Ade sↄsi gbɛ̃ zↄ̃kↄ̃nↄ sísi ò adua kɛnɛ, ò nísi máa kũ Dikiri tↄ́o. 
\v 15 Adua kũ ò kɛ̀ ludanaanikɛnaa gũn ni gyãre pì werekↄ̃a. Dikiri ni a futɛ. Tó à durunna kɛ̀ yã sↄ̃, ani kɛ̃a. 
\v 16 Abire yãi à á durunnanↄ okↄ̃nɛ, à adua kɛkↄ̃nɛ de à le àgↄ̃ aafia. Gbɛ̃ mana aduakɛna gbãna, àdi zĩ kɛ manamana. 
\v 17 Iliasu bi bisãsirimɛ lán ó bà. À adua kɛ̀ manamana, de legũ sún maro, akũ legũ dí tↄ́ zĩtɛaro ari wɛ̃̀ aakↄ̃ kũ mↄ suddoo. 
\v 18 À ɛ̀ra à adua kɛ̀ dↄ, akũ legũ'i bò manamana, zĩtɛ pↄ́ble kɛ̀.
\p
\v 19 Ma gbɛ̃nↄ, tó á gbɛ̃ mɛ̀n do zã̀ yãpura zɛ́a, akũ á gbɛ̃ke ɛ̀ra à a dà zɛ́n, 
\v 20 àgↄ̃ dↄ̃ kũ gbɛ̃ kũ à tò durunnakɛrii pìi bò sãtɛna zɛ́n à ɛ̀ra à sù, à a sì gaamɛ, akũsↄ̃ à lá kù durunna dasinↄla.