\id HAB 
\ide UTF-8
\h Hɑbɑkuku
\toc1 HABAKUKU
\toc2 Hɑbɑkuku
\mt1 HABAKUKU
\ip Hɑbɑkuku u win sɔmburu kuɑwɑ Yudɑbɑn sinɑ boko Yoyɑkimun wɑɑti sɔɔ. Wi kɑ Yeremiwɑ bɑ sɔmburu kuɑ wɑɑti tiɑ sɔɔ.
\ip Hɑbɑkukun tireru tɑ win biti kɑ win nuku sɑnkirɑnu sɔ̃ɔsimɔ win tɔmbun sɔ̃. Sɑɑ ye sɔɔ, Bɑbilonigibu bɑ Isirelibɑ dɑm dɔremɔ. Mɛyɑ bwese ni nu kɑ bu sikerenɛn tii nu bu kuɑmmɛ. Yerɑ Isirelibɑ bɑ tii bikiɑmɔ bɑ mɔ̀, ɑmɔnɑ ben wɑ̃ɑrɑ ko n sɑ̃ɑ be kɑ Gusunɔ. Mɑ Gusunɔ u bu wisɑ sɑɑ win sɔmɔ Hɑbɑkukun nɔɔn di u nɛɛ, wi u Gusunɔ nɑɑnɛ doke, wiyɑ u koo kpĩ u n wɑ̃ɑ. Wi u mɑrɑ Gusunɔ u nùn yɑkiɑ, wiyɑ u ko n wɑ̃ɑ, wiru 2:4.
\is1 Tire ten kpunɑɑ
\iq1 1. Gɑrin wiru, wiru 1:1.
\iq1 2. Hɑbɑkuku u kɑ Gusunɔ gɑri mɔ̀, wiru 1:2n di sere wiru 2:20.
\iq1 3. Hɑbɑkuku u Gusunɔ siɑrɑ, wiru 3.
\ie
\c 1
\p
\v 1 Gɑri wee yi Yinni Gusunɔ u win sɔmɔ Hɑbɑkuku sɔ̃ɔwɑ.
\s1 Hɑbɑkuku u Yinni Gusunɔ
\s2 somiru kɑnɑmɔ
\q1
\v 2 Yinni Gusunɔ, sere sɑɑ yerɑ̀ ko nɑ n nun somiru kɑnɑmɔ.
\q1 Sere sɑɑ yerɑ̀ kɑɑ n mɑn mɑɑri.
\q1 Sere sɑɑ yerɑ̀ kɑɑ de nɑ n nun sɔ̃ɔmɔ
\q1 mɑ tɔmbɑ dɑm dɔrenɑmɔ.
\q1 Nge sere sɑɑ yerɑ̀ kɑɑ nɑ ɑ sun wɔrɑ.
\q1
\v 3 Mbɑn sɔ̃nɑ ɑ derɑ nɑ kɔ̃sɑ mɛɛrɑ.
\q1 Mbɑn sɔ̃nɑ kɑɑ n tɔmbu mɛɛrɑ
\q1 bɑ n gem birɑnɑmɔ.
\q1 Wee, tɔmbɑ dɑm dɔrenɑmɔ
\q1 bɑ dɑɑ kɔ̃sɑ mɔ̀ bɑɑmɑ kpuro.
\q1 Sɑnnɔsu yibɑ, mɑ tɔmbɑ siribu sokunɑmɔ bɑɑmɑ kpuro.
\q1
\v 4 Goo sɑri wi u woodɑ mɛm nɔɔwɑmmɛ.
\q1 Bɑ ku rɑ tɔmbu ben gem wɛ̃ nge mɛ n weenɛ.
\q1 Tɔn kɔ̃sowɑ u rɑ gemgii siribu di.
\s1 Gusunɔ u Hɑbɑkuku wisɑ
\s2 u nɛɛ, Bɑbilonigibɑ wee
\q1
\v 5 Yinni Gusunɔ u nɛɛ, i bwesenu mɛɛrio i kɑ sikerenɑ.
\q1 I de biti yu bɛɛ mwɑ.
\q1 Domi kon gɑ̃ɑnu ko bɛɛn nɔni biru
\q1 ni i ǹ nɑɑnɛ mɔ̀,
\q1 bɑɑ goo ù n bɛɛ nu tusiɑ.
\q1
\v 6 Wee, kon Bɑbilonigibu seeyɑmɑ.
\q1 Tɔn be, bɑ nuki sum.
\q1 Bɑ tem kpuro bukiɑnɑmɔ
\q1 bu wɑ bu kɑ bwesenu gɑnun wɑ̃ɑ yenu mwɛɛri.
\q1
\v 7 Bɑ nɑnum mɔ ben dɑm sɑɑbu.
\q1 Berɑ bɑ rɑ gɔsi ye bɑ kĩ.
\q1
\v 8 Ben dumi yi sɑnnɛkunu ǹ kun mɛ gbeeku bɔ̃nu dukɑ kere.
\q1 Sɑɑ tontonden diyɑ yi rɑ yɔ̃,
\q1 kpɑ yi yibɛrɛ wɔri nge kɑsɑ ye yɑ goo buu wɑ.
\q1
\v 9 Be kpurowɑ bɑ wee bu kɑ tɔmbun yɑ̃nu gurɑ.
\q1 Bɑ nɔni girɑriwɑ mi bɑ dɔɔ.
\q1 Mɑ bɑ yobu mwɛɛrimɔ bɑ mɛnnɑmɔ nge yɑni sɛɛri.
\q1
\v 10 Bɑ sinɑmbu gɛmɑ.
\q1 Bɑ tem yɛ̃robu yɛ̃ɛmɔ.
\q1 Bɑ ǹ wusun gbɑ̃rɑnu gɑrɑ.
\q1 Domi bɑ rɑ tem turenu kowɑ bu kɑ gbɑ̃rɑ ni yɔ
\q1 kpɑ bu wuu si mwɑ.
\q1
\v 11 Yen biru kpɑ bu yɑri min di nge woo gunɑ,
\q1 kpɑ bu mɑɑ dɑ bu gɑm wɔri bu kɔ̃sɑ ko.
\q1 Ben dɑmɑ bɑ nɑɑnɛ sɑ̃ɑ, mu sɑ̃ɑ nge ben bũu.
\s1 Hɑbɑkuku u mɑɑ Gusunɔ soku
\q1
\v 12 Sɑɑ yellun di, wunɑ ɑ sɑ̃ɑ Gusunɔ.
\q1 Wunɑ ɑ sɑ̃ɑ nɛn Yinni.
\q1 A dɛɛre. Yen sɔ̃, sɑ ǹ gbimɔ.
\q1 Yinni, wunɑ ɑ sɑ̃ɑ nɛn kpee bɑɑ mi nɑ rɑ kuke.
\q1 Wunɑ ɑ Bɑbilonigibu gɔsɑ,
\q1 mɑ ɑ bu dɑm kɑ̃ kpɑ bu kɑ sun sɛɛyɑsiɑ.
\q1
\v 13 Adɑmɑ ɑ ǹ kpɛ̃ ɑ yɔ̃rɑ ɑ n kɔ̃sɑ mɛɛrɑ,
\q1 domi ɑ dɛɛre too.
\q1 Ǹ n mɛn nɑ, mbɑn sɔ̃nɑ ɑ mɛɛrɑ ye tɔn kɔ̃sobɑ mɔ̀,
\q1 mɑ ɑ ǹ gɑ̃ɑnu gerumɔ.
\q1 Mbɑn sɔ̃nɑ ɑ mɑɑri tɔn kɔ̃sobu bɑ gemgibu goomɔ.
\q1
\v 14 Mbɑn sɔ̃nɑ ɑ tɔmbu kuɑmmɛ nge swɛ̃ɛ,
\q1 ǹ kun mɛ nge kɔkɔ ni nu ǹ kpɑro mɔ.
\q1
\v 15 Bɑbilonigibu bɑ tɔmbu mwɛɛrimɔ
\q1 nge swɛ̃ɛ yi bɑ mwɑ kɑ kɔkɔnu
\q1 ǹ kun mɛ kɑ yɑ̃ɑkoronu,
\q1 kpɑ bu bu gurɑ bu kɑ doonɑ kɑ nuku dobu.
\q1
\v 16 Yen sɔ̃nɑ bɑ rɑ ben yɑ̃ɑkoronu yɑ̃kunu kue,
\q1 kpɑ bu nu turɑre dɔ̃ɔ dokeɑ.
\q1 Domi nin sɑɑbuwɑ
\q1 bɑ koo kɑ kpĩ bu dĩɑ geenu wɑ
\q1 ni nu do bu di.
\q1
\v 17 Dommɑ bɑ koo den ben tɑkobibɑ wesiɑ ben kɑrɑnɔ.
\q1 Bɑ ko n bwesenu sɑkirimɔwɑ wɔnwɔndu sɑriru sɔɔ sere kɑ bɑɑdommɑɔ?
\c 2
\q1
\v 1 Adɑmɑ nɛ, Hɑbɑkuku nɑ yɔ̃wɑ gbɑ̃rɑru wɔllɔ nɛn kɔ̃su yerɔ
\q1 nge wi u yɔɔru bwɛ̃ɛ,
\q1 kpɑ n kɑ nɔ ye Gusunɔ u koo mɑn sɔ̃,
\q1 kɑ nge mɛ u koo mɑn wisi nɛn weeweenun sɔ̃.
\s1 Gusunɔ u Hɑbɑkuku wisɑ
\q1
\v 2 Yerɑ Yinni Gusunɔ u mɑn wisɑ u nɛɛ,
\q1 n gɑri yi yoruo yi u mɑn sɔ̃ɔmɔ.
\q1 N yi yoruo kpɑsɑsɑ kpee bɛsi sɔɔ.
\q1
\v 3 Yin tɔ̃rɑ kun ginɑ turɑ yi kɑ koorɑ.
\q1 Adɑmɑ yi koo koorɑ yin sɑɑ yɑ̀ n turɑ.
\q1 Bɑɑ yì n tɛɛmɔ, nɑ n gesi yi mɑrɑ.
\q1 Domi yi koo koorɑwɑ kɑm kɑm.
\q1
\v 4 N yoruo mɑ wi u tii sue u ǹ wɑ̃ɑ swɑɑ geɑ sɔɔ.
\q1 Adɑmɑ wi u kuɑ gemgii nɑɑnɛ dokebu sɔɔ, u ko n wɑ̃ɑwɑ.
\q1
\v 5 Wi u tii sue, u ku rɑ sinɛ sɛ̃ɛ.
\q1 U rɑ n sɑ̃ɑwɑ nge tɑm nɔro,
\q1 kpɑ u n nɔɔ wukie nge gɔribun wɑ̃ɑ yeru.
\q1 U ku rɑ debu nge gɔɔ.
\q1 U rɑ n tii bwesenu gɑwemɔwɑ u kɑ ko nin yinni.
\s1 Bɔ̃rusibu nɔɔbu
\q1
\v 6 Adɑmɑ bwese ni u mwɛɛrɑ mi,
\q1 nu koo nùn seesi nu nùn gɑri sɔ̃ kɑ wɔmɑ kɑ mɔnnu, nu nɛɛ,
\q1 u kuɑwɑ bɔ̃ruro wi, wi u dukiɑ mɛnnɑmɔ ye yɑ ǹ sɑ̃ɑ wigiɑ,
\q1 mɑ u gɑbun yɑ̃nu gurɑmɔ u tɔrubɑ yiimɔ.
\q1 Sere sɑɑ yerɑ̀ u ko n mɔ̀ nge mɛ.
\q1
\v 7 Bèn dibu u nɛni, bɑ koo nùn seesi subɑru sɔɔ,
\q1 kpɑ bu gurɑ ye u mɔ.
\q1
\v 8 Nge mɛ u tɔn dɑbinu wɔri u nin yɑ̃nu gurɑ,
\q1 nge mɛyɑ be bɑ tie, bɑ koo mɑɑ nùn wɔri bu win yɑ̃nu gurɑ
\q1 yèn sɔ̃ u tɔmbun yɛm yɑri,
\q1 mɑ u tem kɑ mɛn wusu kɑ mɛn tɔmbu dɑm dɔre.
\q1
\v 9 Bɔ̃rurowɑ wi u dukiɑ gurɑmɔ
\q1 ye yɑ ǹ dɛɛre win berusebun mi,
\q1 kpɑ u wɑ u n wɑ̃ɑ ɑye bɛɛrɛgiru sɔɔ,
\q1 mi u ǹ mɑɑ nɔni swɑ̃ɑru wɑsi.
\q1
\v 10 Adɑmɑ win yɛnun sekurɑ u sɔɔru kuɑ mi,
\q1 ye u kɑ bwese dɑbinu go.
\q1 Win tiin wɑ̃ɑrɑ u kɑri bɔrie.
\q1
\v 11 Domi bɑɑ kɑ gɑniɔ, yi koo wuri ko yi nùn tɑɑrɛ wɛ̃,
\q1 kpɑ kpɛɛrun yɑri yi wuri wurɑ.
\q1
\v 12 Bɔ̃rurowɑ wi u win wuun kpɛɛkpɛɛku swĩimɔ yɛm wɔllɔ,
\q1 mɑ u tɔmbu dɑm dɔremɔ.
\q1
\v 13 Ye tɔmbɑ mɔ̀ kpuro, yɑ koo dɔ̃ɔ mwɑɑrɑ.
\q1 Bɑ tii nɔwiɑ mɔ̀wɑ kɑm sɔɔ.
\q1 Gusunɔ wɔllu kɑ tem Yinniwɑ u koo ye kpuro kɑm koosiɑ.
\q1
\v 14 Sɑɑ ye sɔɔ, Yinni Gusunɔn bɛɛrɛ yɛ̃ru tɑ ko n yibɑwɑ tem sɔɔ
\q1 nge mɛ nim wɔ̃ku gɑ rɑ n nim yibɑ.
\q1
\v 15 Bɔ̃rurowɑ wi u win beruse tɑm bɔɔbɔm wɛ̃ɛmɔ
\q1 mu kɑ nùn go nge dɛ̃ɛ, u n yɔ̃ tereru,
\q1 kpɑ u nùn sekuru doke u n mɛɛrɑ.
\q1
\v 16 Yɛ̃ro u tii sekuru dokemɔwɑ mi, n ǹ mɔ bɛɛrɛ.
\q1 Win tii u mu nɔruo kpɑ u tereru yɔ̃rɑ.
\q1 Yinni Gusunɔ u koo nùn tilɑsi ko
\q1 u kɑ win mɔrun nɔrɑ nɔ kpuro,
\q1 kpɑ win bɛɛrɛ ye u rɑɑ mɔ yu gɔsiɑ sekuru.
\q1
\v 17 Dɑɑ kɔ̃sɑ ye u kuɑ Libɑniɔ,
\q1 yɑ koo wɔri win wiru wɔllɔ.
\q1 U yɛɛ go.
\q1 Adɑmɑ yɛɛ yi, yi koo nùn nɑndɑsiɑ.
\q1 Yeni kpuro yɑ koo nùn deemɑ yɛm mɛ u yɑrin sɔ̃,
\q1 kɑ dɑm mɛ u tem mɛ kɑ mɛn wusu kɑ mɛn tɔmbu dɔren sɔ̃.
\q1
\v 18 Arufɑɑni yerɑ̀ bwɑ̃ɑrokunu nu mɔ tɔnu u kɑ sinɑ u nu seku.
\q1 Nu sɑ̃ɑwɑ ni bɑ sekɑ kɑ sisu,
\q1 mɑ nu derɑ u weesu nɑɑnɛ sɑ̃ɑ.
\q1 Mbɑn sɔ̃nɑ tɔnu u koo win nɑɑnɛ doke bwɑ̃ɑroku ni u sekɑ sɔɔ,
\q1 ni, ni nu ǹ kpɛ̃ nu gɑri gere.
\q1
\v 19 Bɔ̃rurowɑ wi u dɑ̃ɑ kuku sɔ̃ɔmɔ u mɔ̀, gu seewo,
\q1 mɑ u kperu sɔ̃ɔmɔ u mɔ̀, tu dom yɑndo.
\q1 Yen gɑɑ yɑ koo kpĩ yu nùn bwisi kɛ̃?
\q1 Geemɑ, u nu wurɑ kɑ sii geesu pote.
\q1 Adɑmɑ nu ǹ hunde mɔ, nu n sere wɑ̃ɑru mɔ.
\q1
\v 20 Yinni Gusunɔ u wɑ̃ɑ win sɑ̃ɑ yee dɛɛrɑrɔ.
\q1 Tɔmbu kpuro bu nɔɔ mɑrio win wuswɑɑɔ.
\c 3
\s1 Hɑbɑkukun kɑnɑru
\p
\v 1 Wee kɑnɑ te Gusunɔn sɔmɔ Hɑbɑkuku u kuɑ kɑ weeweenu.
\q1
\v 2 U nɛɛ, Yinni Gusunɔ, nɑ nuɑ ye ɑ geruɑ.
\q1 Mɑ nɑ nɑndɑ.
\q1 A de yu koorɑ wɔ̃ɔ sini sɔɔ.
\q1 A de tɔmbu bu ye wɑ bɛsɛn wɑɑti yeni sɔɔ.
\q1 Adɑmɑ wunɛn mɔru ye sɔɔ, ɑ yɑɑyo ɑ sun wɔnwɔndu kuɑ.
\q1
\v 3 Gusunɔ, ɑ nɑ sɑɑ Edɔmun di.
\q1 Wunɛ, Dɛɛro, ɑ nɑ Pɑrɑnin guurun di.
\q1 Wunɛn yiiko yɑ wɔllu yɑm bururɑsie.
\q1 Mɑ tem kpuro mu nun siɑrɑmɔ.
\q1
\v 4 A nɑ, mɑ yɑm mu bururɑ.
\q1 Sɔ̃ɔ yɑ̃nɑ yɑrɑ wunɛn nɔmɑn di,
\q1 mi wunɛn dɑm mu wɑ̃ɑ.
\q1
\v 5 A derɑ bɑrɑnu nu pusimɔ.
\q1 A nu derimɔ mi ɑ sɑrɑ kpuro.
\q1
\v 6 À n yɔ̃rɑ, tem mu rɑ yĩiriwɑ.
\q1 À n bwesenu mɛɛrɑ, nu rɑ diiriwɑ.
\q1 Guu ni nu wɑ̃ɑ sɑɑ yee yellun di, nu wɔrukɑ,
\q1 gunguu ni nu wɑ̃ɑ sɑɑ tɛɛbun di, nu kɔsikirɑ,
\q1 domi niyɑ nu rɑɑ sɑ̃ɑ wunɛn swɑɑ ye ɑ rɑ sĩ.
\q1
\v 7 Nɑ Kusɑnigibun weeweenu nɔɔmɔ.
\q1 Nɑ mɑɑ wɑ mɑ Mɑdiɑnibɑ bɑ bɛrum soore.
\q1
\v 8 Yinni Gusunɔ, ɑ kɑ dɑɑnu mɔru mɔ̀wɑ?
\q1 Nge nim wɔ̃kuwɑ ɑ kɑ mɔru mɔ̀.
\q1 Wee ɑ yɔɔwɑ guru winu wɔllɔ
\q1 nge wi u yɔɔwɑ tɑbu kɛkɛn wɔllɔ,
\q1 mɑ yɑ nùn nɑsɑrɑ wɛ̃.
\q1
\v 9 A wunɛn tɛndu bɛri.
\q1 Wunɛn bɔ̃ri yi sɑ̃ɑwɑ nge sɛ̃ɛnu.
\q1 A tem bɛrɑ mɑ dɑɑnu kokɑ min di.
\q1
\v 10 Guunu nù n nun wɑ, nu rɑ diiriwɑ.
\q1 Gurɑ yɑ nɛmɔ kɑ dɑm, mɑ nim wɔ̃kun nim mu wɔki,
\q1 mu nim kurenu kɔ̃ɔmɔ sere wɔllɔ.
\q1
\v 11 Sɔ̃ɔ kɑ suru bɑ yɔ̃rɑ ye bɑ wunɛn guru mɑɑkinu wɑ
\q1 nu bɑllimɔ nge yɑɑsɑ, mɑ nu dɔɔ nge sɛ̃ɛnu.
\q1
\v 12 Wee ɑ tem bukiɑnɑmɔ,
\q1 ɑ bwesenu kɔsukumɔ kɑ mɔru bɑkɑ.
\q1
\v 13 Wee ɑ yɑrɑ
\q1 ɑ wunɛn tɔmbu kɑ wunɛn sunɔ wi ɑ gɔsɑ somiru nɑ.
\q1 A tɔn kɔ̃sobun sunɔ go.
\q1 A win bwɑ̃ɑbu kpeerɑsiɑ mɑm mɑm.
\q1
\v 14 A yibɛrɛbɑn sinɑmbun winu yɑburɑ kɑ ben tiin sɛ̃ɛnu.
\q1 Bɑ rɑɑ sun wɔrim wee kɑ sɛndɑru nge woo bɔkɔ,
\q1 bu kɑ sun yɑrinɑsiɑ.
\q1 Bɑ nuku dobun kuuki mɔ̀.
\q1 Bɑ sɔɔru sɑ̃ɑ bu kɑ sun go bɛsɛn kuku yenɔ.
\q1
\v 15 Yinni Gusunɔ, ɑ sɔ̃ wunɛn dumin wɔllɔ,
\q1 ɑ nim wɔ̃ku tɑɑkumɔ
\q1 ge gɑ nim kɔ̃ɔmɔ gɑ wɔki.
\q1
\v 16 Nɑ gen wɔkinu nɔɔmɔ too.
\q1 Mɑ nɑ nɑndɑ gem gem,
\q1 nɛn nɔɔ gɑ diirimɔ bɛrum sɔ̃.
\q1 Mɑ nɛn wɑsi yi wɔkɔnu wɔrimɔ,
\q1 nɑ yɔ̃ sɛ̃ɛ nɑ nuku sɑnkirɑnun tɔ̃ru mɑrɑ
\q1 te tɑ wee bwese ni nu koo sun dɑm dɔren sɔ̃.
\q1
\v 17 Figien dɑ̃nu nu ǹ ko n binu mɔ.
\q1 Resɛm dɑ̃nu nu ǹ mɑɑ mɑrumɔ.
\q1 Olifin dɑ̃nu nu ǹ mɑɑ binu mɑrumɔ.
\q1 Gbeɑ kun mɑɑ dĩɑnu wɛ̃ɛmɔ.
\q1 Yɑ̃ɑnu kɑ kɛtɛ kun ko n mɑɑ wɑ̃ɑ gɔ̃ɔwɔ.
\q1
\v 18 Adɑmɑ nɛ, nɛn nuku dobu weewɑ wunɛ Yinni Gusunɔn min di.
\q1 Nɑ nuku dobu mɔ yèn sɔ̃ ɑ rɑ mɑn fɑɑbɑ ko.
\q1
\v 19 Wunɑ ɑ sɑ̃ɑ nɛn dɑm.
\q1 A rɑ de nɑ n sɑ̃u nge nɛmu.
\q1 Kpɑ nɑ n sĩimɔ guunu wɔllɔ.
\pi1 Womu geniwɑ bɑ wom kowobun wirugii kuɑ kɑ mɔrɔku.