\id GAL Galatians in Busa, Ross Jones
\ide UTF-8
\h GALATIANƆ
\toc1 GALATIANƆ
\toc2 GALATIANƆ
\mt1 GALATIANƆ
\c 1
\s1 Baaru nna pãnde kunlo
\p
\v 1-2 Makũ Pↄlu Luda zĩ̀ri kũ ma Yesude dake kũ ó lɛɛlɛnↄ pínki, ókↄ̃nↄ mɛ́ o takada dí kɛ̃̀ sↄsi gbɛ̃ kũ ò kú Galatia bùsu gũnnↄnɛ.*fZĩr 16:6* Ma kunna zĩ̀ri ũ dí bo gbɛ̃nↄ kĩnaa ke bisãsiri gãiro, Yesu Kirisi kũ De Luda kũ à a fùtɛ bona ganwo mɛ́ à ma zĩ. 
\v 3 Ó De Luda kũ Dikiri Yesu Kirisio gbɛ̃kɛ kɛárɛ, à á gba aafia. 
\v 4 Kirisi gì a wɛ̃̀ndiii ó De Luda pↄyenyĩnaaa, à ó durunna kɛ̃̀wá de à ó bo andunia tera vãni dín. 
\v 5 Luda mɛ́ à gakuri vĩ gↄrↄ sĩnda pínki! Aami.
\p
\v 6 Kũ átɛn kpɛ li Luda kũ à á sísi a gbɛ̃kɛ gũnnɛ likalika lán dí bà, à arɛ dↄ̀ zɛ́ pãndea, yã pìi bò ma sarɛ manamana. 
\v 7 Baaru nna pãnde ke kunlo. Gbɛ̃ kũ ò ye ò Kirisi baaruu pì litɛnↄ tɛni á likaramɛ. 
\v 8 Bee tó ókↄ̃nↄ ke malaika kũ à bò ludambɛ baaru nna kũ adi kↄ̃ sɛ́ kũ a kũ o òárɛoro waazi kɛ̀árɛ, Luda láari boa. 
\v 9 O òárɛ yã akũsↄ̃ matɛn oárɛ dↄ, tó gbɛ̃ke baaru nna kũ adi kↄ̃ sɛ́ kũ a kũ a màaoro waazi kɛ̀árɛ, Luda láari boa.
\p
\v 10 Matɛn sáabu wɛtɛ bisãsirian yá, ke Luda? Matɛn wɛtɛ ma yã ká bisãsirigun yá? Tó bisãsirin má ye à káńgu ari tera, de Kirisi zↄ̀bleriin ma ũro.
\s1 Yesu Pↄlu sɛna a zĩ̀ri ũ
\p
\v 11 Ma gbɛ̃nↄ, má ye à dↄ̃ kũ baaru nna kũ madì kpáárɛ dí bo bisãsiri kĩnaaro. 
\v 12 Mádi ma bisãsiri kĩnaaro, gbɛ̃ke mɛ́ à dàmɛnɛro, Yesu Kirisi mɛ́ à bò à sùomɛnɛ.
\p
\v 13 A mà lákũ má kun nà yã Yudanↄ donyĩzɛn. Ma Luda sↄsi gbɛ̃nↄ wɛ́ tã̀ pãsĩpãsĩ, ma wɛ̀tɛ mà ń kakatɛ.*fZĩr 8:3* 
\v 14 Ma Yudanↄ donyĩzɛ pì yã kũ̀ ↄplapla de ma sáranↄla dasi, ma kokari deńla ó dizinↄ futɛokarayã pìi gũn. 
\v 15 Ama Luda ma ditɛ a pↄ́ ũ zaa ma da gbɛrɛn. Kũ ma sísina a gbɛ̃kɛ gũn gↄrↄ kàmɛ, 
\v 16 akũ à a Nɛ́ gbàrɛma,*fZĩr 9:3-6* de mà a baaru nna kpá buri pãndenↄnɛ. Mádi gɛ́ dada gbɛ̃ke kiaro, 
\v 17 mádi gɛ́ Yurusalɛmu gbɛ̃ kũ ò kun zĩ̀rinↄ ũ ma ãnↄ kĩnaaro, ma gɛ Larubunↄ bùsun gↄ̃̀nↄmɛ, akũ ma ɛra ma su Damasuku.
\p
\v 18 Wɛ̃̀ aakↄ̃ gbɛran ma gɛ Yurusalɛmu, de ò kↄ̃ dↄ̃ kũ Pitao, akũ ma kɛ kãao gↄrↄ gɛ̃ro.*fZĩr 9:26-30* 
\v 19 Mádi zĩ̀ri pãnde ero, séde Dikiri dakũna Yamisi. 
\v 20 Yã kũ ma kɛ̃̀árɛ pìi, ma sì kũ Ludao kũ adi kɛ ɛ́kɛn ma tòro. 
\v 21 Abire gbɛra ma gɛ Siria bùsun kũ Silisia bùsuuo. 
\v 22 Gↄrↄ birea Kirisi sↄsi gbɛ̃ kũ ò kú Yudeanↄ dí wɛ́ simalɛro, 
\v 23 ama ò mà ò pì, gbɛ̃ kũ àtɛni ń wɛ́ tã yã mɛ́ àtɛn donyĩzɛ kũ à wɛ̀tɛ à kakatɛ pì waazi kɛ tera sà, 
\v 24 akũ ò Luda tↄ́ bò ma yã musu.
\c 2
\s1 Pↄlu kↄ̃yãmana kũ zĩ̀ri kparanↄ
\p
\v 1 Wɛ̃̀ kuri awɛɛsiikↄ̃ gbɛra ma ɛra ma gɛ Yurusalɛmu kũ Baanabao.*fZĩr 15:2-4* Ma Titu sɛ̀, à gɛ̀ɛ kũoo se. 
\v 2 Ma gɛ gwe, kũ Luda mɛ́ à bò à sùma à pì mà gɛ́ yãimɛ. Akũ ma baaru nna kũ madì kpá buri pãndenↄnɛ bↄ̀kↄtɛ gbɛ̃ kũ ò de gbɛ̃ zↄ̃kↄ̃ ũnↄnɛ ńtɛ̃nɛ, de zĩ kũ ma kɛ̀ kũ a kũ matɛn kɛo sún kɛ pãro. 
\v 3 Titu kũ ó lɛɛlɛ, bee kũ a Girikikɛnaao, odi gã naa à tↄ̃̀ zↄ̃ro. 
\v 4 Yã pìi fùtɛ Yesude ɛ́kɛ kũ ò gɛ̃̀wái kpãninↄ musumɛ. Ò gɛ̃̀wái de ò ó zĩdadekɛna Kirisi Yesu gũn asiri gwa ò ó da zↄ̀blemmɛ, 
\v 5 akũ odì we ò mìi nàtɛńnɛro bee fíti, de à le àgↄ̃ baaru nna pì yãpura kũna yãi. 
\v 6 Gbɛ̃ kũ òtɛni ń gwa gbɛ̃ zↄ̃kↄ̃ ũnↄ dí yãke karamɛnɛro. Lákũ ò de nà dí kɛmɛnɛ yãke ũro, zaakũ Luda dì gbɛ̃ke wɛ́ gwaro. 
\v 7 Ò è Luda baaru nna kpana buri pãndenↄnɛɛ nàmɛnɛ ma ↄĩ, lákũ à a kpana Yudanↄnɛɛ nà Pitanɛ a ↄĩ nà. 
\v 8 Zaakũ lákũ Luda zĩ kɛ̀ Pita gãi nà a kunna zĩ̀ri ũ yã musu Yudanↄ tɛ́, lɛn à zĩ kɛ̀ ma gãi buri pãndenↄ tɛ́ lɛ. 
\v 9 Yamisi kũ Pitao kũ Yuhana kũ òtɛni ń gwa sↄsi gbɛ̀gba ũnↄ gba kũ Luda dàmɛnɛɛ dↄ̃̀, akũ ò ↄ kpàwá, ókↄ̃nↄ kũ Baanabao kↄ̃gbɛ̃kɛ sèeda ũ. Ò sì ò gɛ́ buri pãndenↄ kĩnaa, mↄ́kↄ̃nↄ sↄ̃, Yudanↄ kĩnaa. 
\v 10 Yã kũ ò yein dí, ń takasidenↄ yã gↄ̃ dↄógu. Gↄrↄ birea sↄ̃ ó mɛ̀ɛ wã̀ kũ a kɛnaao kↄ̀.
\s1 Yesu náanikɛna mɛ́ àdi ó sura ba
\p
\v 11 Kũ Pita sù Antiↄku, ma ginɛ tɛ̃tɛ̃ntɛ̃, kũ à zã̀ yãa yãi. 
\v 12 Zaakũ ari Yamisi zĩ̀rinↄ gↄ̃ gɛ́ ká, àdi pↄ́ ble kũ buri pãndenↄomɛ. Kũ ò kà, akũ à bòru kũ kpɛo à kɛ̃̀ḿma, kũ àtɛn vĩna kɛ Yuda kũ ò zɛ̀ kũ tↄ̃̀zↄ̃na yãonↄnɛ yãi. 
\v 13 Yuda kparanↄ nàa manafikikɛnaa pìi gũn. Bee Baanaba se ò a gà ò nàḿma. 
\v 14 Kũ ma è ò baaru nna yãpura kũna a zɛ́aro, ma ò Pitanɛ ń pínki wára: Mↄkↄ̃n Yuda ina ń kun lán buri pãnde bà, adi kɛ lán Yuda bànlo. À kɛ̀ dera ndì gã na buri pãndenↄa, de ògↄ̃ Yudanↄ yã kũnaa?
\p
\v 15 Yudanↄn ó ũ inaa gũn, buri pãnde durunnakɛrinↄn ó ũro. 
\v 16 Ama ó dↄ̃ kũ gbɛ̃ke dì bo mana doka pì kɛna yãiro, séde Yesu Kirisi náanikɛna ado.*fRom 3:20, 22* Bee ókↄ̃nↄ, o Kirisi Yesu náani kɛ̀, de ò le ò bo mana ó Kirisi náanikɛnaa pì yãimɛ, adi kɛ doka pì kɛna yãinlo, zaakũ gbɛ̃ke dì bo mana dokakũna yãiro.*fZab 143:2* 
\v 17 Gↄrↄ kũ ótɛn wɛtɛ ò bo mana Kirisi gũn, tó o è durunnakɛrinↄn ó ũ se, abire pì Kirisi tɛn durunna gba zɛ́n yá? Oi! 
\v 18 Tó ma ɛra matɛn doka kũ ma gbòro kɛkɛ, doka pì taariden ma ũ gwe. 
\v 19 Zaakũ ma gↄ̃ gɛ̀ ũ doka pìi musu, akũ ma kpɛ lìnɛ, de màgↄ̃ kun Luda pↄ́ ũ yãi. Ma ga lía kũ Kirisio. 
\v 20 Makũ mɛ́ má kun doro, Kirisi mɛ́ à kú ma gũn. Tera sà ma bisãsirikɛnaa gũn má kú Luda Nɛ́ kũ à yemai à gì a wɛ̃̀ndiii ma yãi náanikɛnaa gũmmɛ. 
\v 21 Matɛn Luda gbɛ̃kɛ da pãro. Tó gbɛ̃ dì bo mana doka pì yãimɛ, de Kirisi gà pãmɛ.
\c 3
\s1 Musa doka kũ ludanaanikɛnaao
\p
\v 1 Ákↄ̃nↄ Galatia yↄ̃nkↄnↄ! Ò pↄ́ dàáwan yá? O Yesu Kirisi gana lía mↄ̀árɛ a è sãnsãn. 
\v 2 Má ye mà yã mɛ̀n do gbɛkaáwa. A Luda Nini lè dokakũna yãin yá, ke yã kũ a màa pì náanikɛna yãimɛ? 
\v 3 À kɛ̀ dera a gↄ̃ yↄ̃nkↄnↄ ũ lán dí bàa? A naa kũ Luda Nini gbãnao, akũ átɛn láka kũ á zĩda gbãnao yá? 
\v 4 Á wari zↄ̃kↄ̃ↄ kɛ̀ pãn yá? Oi, adi kɛ pãro. 
\v 5 Luda a Nini kpàáwa, à daboyãnↄ kɛ̀ á tɛ́ á dokakũna yãin yá, ke yã kũ a màa pì náanikɛna yãimɛ?
\p
\v 6 À gwa Ibrahĩa. À Luda náani kɛ̀, akũ Luda tò yã bò kãao nna a náani kũ à kɛ̀ yãi.*fNaa 15:6, Rom 4:3* 
\v 7 Àgↄ̃ dↄ̃ kũ gbɛ̃ kũ òtɛn Luda náani kɛnↄ mɛ́ ò Ibrahĩ burinↄ ũ.*fRom 4:16* 
\v 8 Luda yã takada gĩnakɛ à a baaruu kpà Ibrahĩnɛ à pì, Luda ni arubarika da buri sĩnda pínkigu a gãi,*fNaa 12:3* zaakũ Luda yã takada pì gĩnakɛ à dↄ̃ kũ Luda ni tó yã bo nna kũ buri pãndenↄ a náani kũ oni kɛ yãi. 
\v 9 Lɛn Luda dì arubarika da gbɛ̃ kũ òtɛni a náani kɛnↄgu lɛ, lákũ à kɛ̀ a náanikɛri Ibrahĩnɛ nà. 
\v 10 Gbɛ̃ kũ à zɛ̀ kũ dokakũnaao gↄ̃̀ láari pↄ́ ũmɛ, zaakũ à kɛ̃na Luda yãn ò pì, gbɛ̃ kũ òdigↄ̃ yã kũ ò kú doka takada gũnnↄ kũna pínki a zɛ́aro bi láari pↄ́mɛ. 
\v 11 Ó dↄ̃ sãnsãn kũ Luda dì tó yã bò kũńwo nna dokakũna yãiro, zaakũ ò pì, gbɛ̃ kũ Luda tò yã bò kãao nna a náani kũ àtɛn kɛ yãi mɛ́ anigↄ̃ kun. 
\v 12 Doka dí kↄ̃ le kũ ludanaanikɛnaaoro, zaakũ ò pì, gbɛ̃ kũ à yã pìi kɛ̀ɛ, ade ni wɛ̃̀ndi le a gũn. 
\v 13 Kirisi gↄ̃̀ láari pↄ́ ũ ó gɛ̃nɛ ũ, à ó bó doka láari gũn, zaakũ à kɛ̃na Luda yãn ò pì, gbɛ̃ kũ ò lòko lía bi láari pↄ́mɛ. 
\v 14 Abire kɛ̀ lɛ de arubarika kũ Luda dà Ibrahĩgu le à gↄ̃ buri pãndenↄnɛ Kirisi Yesu gãimɛ, de ò Nini kũ Luda a lɛ́ sɛ̀ le a náanikɛna yãi.
\s1 Musa doka kũ Luda lɛ́sɛnaao
\p
\v 15 Ma gbɛ̃nↄ, bisãsiri yãkɛna takan matɛn oárɛ. Tó gbɛ̃ lɛ́gbɛɛ dìtɛ, akũsↄ̃ à sèedadenↄ vĩ, oni fↄ̃ ò gbororo, oni fↄ̃ ò yãke karanlo. 
\v 16 Lɛn Luda lɛ́ sɛ̀ Ibrahĩnɛ lɛ kũ a burio.*fNaa 12:7* Luda yã takada dí pi kũ a burinↄ lákũ parin à tɛ́ḿma bàro, à pì kũ a buriomɛ. Gbɛ̃ mɛ̀n don à tɛ́a, àkũmɛ Kirisi ũ. 
\v 17 Yã kũ má ye mà on dí: Luda gĩnakɛ à lɛ́ sɛ̀nɛ yã à pì a bàka nigↄ̃ kú kãao. Wɛ̃̀ wàa pla kũ mɛ̀n baraakurio gbɛran doka sù.*fBon 12:40* Doka pì ni fↄ̃ à lɛ́sɛnaa pìi gbororo, ani fↄ̃ à a kɛ pãro. 
\v 18 Tó òdi Luda arubarika le dokakũnaa gũn, de adi bo a lɛ́sɛnaa gũn doro. Ama Luda gbɛ̃kɛ kɛ̀ Ibrahĩnɛ, kũ à a lɛ́ sɛ̀nɛ yãimɛ.*fRom 4:14* 
\v 19 Bↄ́yãi à doka dìtɛi dↄↄ? À doka kàra ari Ibrahĩ buri kũ Luda lɛ́ sɛ̀ a yã musu gↄ̃ sumɛ, de gbɛ̃nↄ le ò dↄ̃ kũ ò de taaridenↄ ũ Luda kĩnaa yãi. Luda a doka pìi kpà malaikanↄa, ò nà yãkɛkɛriinɛ a ↄĩ, à ditɛ gbɛ̃nↄnɛ. 
\v 20 Luda lɛ́sɛna sↄ̃, a yãmɛ ado, a bàka kú kũ yãkɛkɛriioro.
\p
\v 21 Tↄ̀, doka pìi bò Luda lɛ́sɛna kpɛn yá? Lɛnlo! Tó doka kũ àdi wɛ̃̀ndi kpáḿma kun yã, de o bo mana doka pì yãi. 
\v 22 À kɛ̃na Luda yãn ò pì, durunna gbɛ̃ sĩnda pínki kà kpɛ́n, de arubarika kũ Luda a lɛ́ sɛ̀ɛ pì le à gↄ̃ Yesu Kirisi náanikɛrinↄ pↄ́ ũ a náani kũ òtɛn kɛ pì yãi.
\p
\v 23 Zaade Yesunaanikɛna dí suro, doka ó ká kpɛ́n, à ó kũna purusunanↄ ũ ari Yesunaanikɛna kũ àtɛn su gɛ̀ɛ à bòo gupuraa. 
\v 24 Lɛn doka pì de ó gwàri ũ lɛ yã ari Kirisi gↄ̃ su, de ò bo mana a náanikɛna yãi. 
\v 25 Lákũ Yesunaanikɛnaa sù nà sà, o bo ó gwàri yãn.
\p
\v 26 Kunna Kirisi Yesu gũn á de Luda nɛ́nↄ ũ á pínki a náani kũ átɛn kɛ yãi, 
\v 27 zaakũ ákↄ̃nↄ kũ a da'itɛ kɛ̀ Kirisi pↄ́ ũnↄ, a Kirisi dàa sɛ̀tɛ. 
\v 28 Yudanↄ kũ buri pãndenↄ, zↄ̀nↄ kũ zĩdadenↄ, gↄ̃gbɛ̃nↄ kũ nↄgbɛ̃nↄn donadona kↄ̃nɛro, zaakũ á pínki pↄ́ dokↄ̃nↄn á ũ kunna Kirisi Yesu gũn. 
\v 29 Tó á de Kirisi pↄ́ ũ, á de Ibrahĩ burinↄ ũmɛ, akũsↄ̃ á de arubarika kũ Luda a lɛ́ sɛ̀nɛɛ blèrinↄ ũ.*fRom 4:13*
\c 4
\p
\v 1 Matɛn oárɛ, gↄrↄ kũ túbibleri de nɛ́ ũ, bee tó a de aruzɛkɛnↄn de a pↄ́ ũ pínki, à de zↄ̀laro. 
\v 2 Àdi mì natɛ gwàrinↄnɛ kũ gbɛ̃ zↄ̃kↄ̃nↄ ari gↄrↄ kũ a de dìtɛa. 
\v 3 Lɛn ókↄ̃nↄ se, gↄrↄ kũ ódi kàsara kũro, odì zↄ̀ ble andunia pↄ́ kũ òdi mì natɛńnɛnↄnɛ.*fGal 4:9, Kↄl 2:8, 20* 
\v 4 Kũ gↄrↄ kũ Luda dìtɛ kà, à a Nɛ́ zĩ̀, ò a ì bisãsiri ina ũ Musa doka gũn, 
\v 5 de à ókↄ̃nↄ kũ ótɛn zↄ̀ ble Musa dokanɛnↄ bo, ò gↄ̃ a nɛ́nↄ ũ. 
\v 6 Luda a Nɛ́ Nini dà ó swɛ̃̀ɛ gũn, kũ ó de a nɛ́nↄ ũ yãi. Nini pìi dì wiki lɛ́ à pi: Baa, ma De! 
\v 7 Abire yãi zↄ̀ↄmɛ n ũ doro, nɛ́mɛ n ũ. Lákũ Luda nɛ́mɛ n ũ nà, à n kɛ a túbibleri ũmɛ.*fRom 8:15-17*
\s1 Pↄlu bídikɛna Galatianↄ yãa
\p
\v 8 Gↄrↄ kũ á Luda dↄ̃ro, adì do pↄ́ kũ ò de Luda ũronↄi.*f1Kↄ 8:4-6* 
\v 9 Lákũ á Luda dↄ̃ nà tera sà, atɛ̃nsa kũ Luda á dↄ̃, bↄ́yãi a ɛra átɛn arɛ dↄ pↄ́ gina futa gbãnasari pìnↄa dↄↄ? Bↄ́yãin a ɛra á ye à dońyĩ dↄↄ? 
\v 10 Adì gↄrↄ kenↄ kũ mↄ kenↄ kũ dikpɛ kenↄ kũ wɛ̃̀ kenↄ tɛ̃̀ bo.*fRom 14:5, Kↄl 2:16* 
\v 11 Vĩna ma kũ á yã musu. Ase zĩ pãn ma kɛ̀ á tɛ́ yá?
\p
\v 12 Ma gbɛ̃nↄ, ma wɛ́ kɛ̀áwa, à gↄ̃ lán ma bà, zaakũ ma gↄ̃ lán á bà. Ádi taari kɛmɛnɛ yãro. 
\v 13 Á dↄ̃ kũ gyãkɛnaa gũnn ma baaru nna kpàárɛ káaku. 
\v 14 Bee kũ ma gyãkɛna kɛ̀árɛ yↄ̃ogwana ũ, ádi ma gya boro ádi lɛ́'i kúmaro, a ma si lán Luda malaika kesↄ̃ Kirisi Yesu bàmɛ. 
\v 15 Arubarika kũ átɛn kɛmɛnɛ yã kɛ̀ deraa? Mani fↄ̃ mà o á yã musu mà pi, tó ani sí kɛ yã, de a á wɛ́ bòbo a kpàma. 
\v 16 Kũ ma yãpura òárɛ yãin ma gↄ̃ á zãnguri ũ sà yá? 
\v 17 Gbɛ̃ kũ̀nↄ mɛ̀ɛ wã̀ kũ á yão, ama a mana yãinlo. Ò ye à kɛ̃wámɛ, de à naḿma. 
\v 18 Mɛ̀wãna kũ gbɛ̃ yão a mana yãi mɛ́ à nna. Ma mɛ̀ɛ wã̀ kũ á yão gↄrↄ sĩnda pínkimɛ, adi kɛ gↄrↄ kũ má kú kãáo adonlo. 
\v 19 Ma nɛ́ yenyĩdenↄ, matɛni á ina wãwã kɛ dↄ ari Kirisi gↄ̃ sà da á gũn. 
\v 20 Má ye màgↄ̃ kú kãáo tera, de mà a yã'ona litɛ, zaakũ ma bídi kɛ̀ á yãamɛ.
\s1 Hazara kũ Sarao
\p
\v 21 À omɛnɛ, ákↄ̃nↄ kũ á ye doka iko vĩáwanↄ, ádi yã kũ à kɛ̃na Musa doka takada gũn maroo? 
\v 22 Ò pì Ibrahĩ nɛ́gↄ̃gbɛ̃nↄ ì gbɛ̃nↄn pla. À a do ì kũ zↄ̀ↄomɛ,*fNaa 16:15* akũ à a do ì kũ zĩdadeo.*fNaa 21:1-2* 
\v 23 Zↄ̀ↄ pì nɛ́ ì bisãsirikɛnaa gũmmɛ, akũ zĩdade a pↄ́ ì Luda lɛ́sɛna yãi.*fRom 9:7-8* 
\v 24 Nↄgbɛ̃ pìnↄ yã dewɛrɛ yáasi taka ũ, Luda bàka kunna kũńwo yã lɛu pla ũ. A do bò Sinai kpi kĩnaamɛ, àdi zↄ̀kɛna ińnɛ. Àkũ mɛ́ à Hazara ũ. 
\v 25 À de Sinai kpi kũ à kú Larubunↄ bùsun yáasi taka ũ. Yurusalɛmu tera de a ũ dↄ, zaakũ àtɛn zↄ̀ ble kũ a gbɛ̃nↄ ń pínkimɛ. 
\v 26 Yurusalɛmu kũ à kú musumɛ zĩdade ũ. Àkũmɛ ó da ũ. 
\v 27 Zaakũ à kɛ̃na Luda yãn ò pì:
\q1 Ǹ pↄnna kɛ, mↄkↄ̃n para kũ ńdi nɛ́ iro!
\q1 Ǹ ayuwii kɛ, mↄkↄ̃n kũ ńdi nↄ̀wãwã kɛro!
\q1 Zaakũ mↄkↄ̃n kũ n zã pã kpànyĩ,
\q1 n nɛ́ dasi de nↄgbɛ̃ kũ a zã arɛ dↄ̀a pↄ́la.
\m
\v 28 Ákↄ̃nↄ sↄ̃ ma gbɛ̃nↄ, Luda lɛ́sɛna nɛ́nↄn á ũ lán Isaaku bà. 
\v 29 Nɛ́ kũ ò a ì bisãsirikɛnaa gũn wari dↄ̀ nɛ́ kũ ò a ì kũ Luda Nini gbãnaooa. Lɛn à de lɛ kũ a terao. 
\v 30 À kɛ̃na Luda yãn deramɛɛ? Ò pì: Ǹ pɛ́ zↄ̀ↄ pìia kũ a nɛ́o, zaakũ zↄ̀ nɛ́ ni túbi ble kũ zĩdade nɛ́oro.*fNaa 21:10* 
\v 31 Abire yãi ma gbɛ̃nↄ, zↄ̀ nɛ́nↄn ó ũro, zĩdade nɛ́nↄn ó ũ.
\c 5
\s1 Gↄ̃na zĩdadenↄ ũ Kirisi gũn
\p
\v 1 Gↄ̃na zĩdadenↄ ũ yãin Kirisi ó bói. À zɛo gíngin, àsun tó ò ɛra ò bà káárɛ á yĩn zↄ̀nↄ ũ doro.
\p
\v 2 Makũ Pↄlu matɛn oárɛ, tó a tò ò tↄ̃̀ↄ zↄ̃̀árɛ, Kirisi ni karana kɛárɛro. 
\v 3 Ma ɛra ma ò, ma karaárɛ, gbɛ̃ kũ à tò ò tↄ̃̀ↄ zↄ̃̀arɛ, séto à mì natɛ Musa dokanɛ pínki. 
\v 4 Ákↄ̃nↄ kũ átɛn wɛtɛ à bo mana doka gũnnↄ, a á zĩda kɛ̃̀ Kirisia, a kɛ̃ Luda gbɛ̃kɛa. 
\v 5 Yesu náanikɛnaa gũn ó bona mana tãmaa vĩ, ó wɛ́ dↄi kũ a Nini gbãnao. 
\v 6 Kirisi Yesu gũn tↄ̃̀zↄ̃na ke tↄ̃̀zↄ̃nasari yãke vĩro, séde Yesu náanikɛna kũ àdi yenyĩ ińnɛ.
\p
\v 7 Átɛn gɛ́ arɛ yã manamana. Dí mɛ́ à tɛna yãpurai zɛ́ zↄ̃̀árɛɛ? 
\v 8 Yã kũ a a zɛ́ lè dí bo Luda kũ à á sísi à á sɛ́ kĩnaaro. 
\v 9 Lùbɛnɛ fítinna dì flawadɛna futɛ pínki.*f1Kↄ 5:6* 
\v 10 Má á náani vĩ Dikiri gũn, kũ áni nɛ̀sɛ pãnde daro. Gbɛ̃ kũ àtɛni á likara sↄ̃, ani a zĩ gbɛ̀ le, bee dímɛ. 
\v 11 Makũ sↄ̃ ma gbɛ̃nↄ, tó tↄ̃̀zↄ̃na waazin matɛn kɛ ari gbãra, bↄ́yãi òtɛni ma wɛ́ tãi dↄↄ? Tó lɛmɛ, de Kirisi gana lía yã ni ũ gbɛ̃kearo. 
\v 12 Gbɛ̃ kũ òtɛni á likara kũ tↄ̃̀zↄ̃na yãonↄ gɛ́ ò ń zĩda fɛ̀rɛ kɛ se.
\p
\v 13 Ákↄ̃nↄ sↄ̃ ma gbɛ̃nↄ, Luda á sísi à gↄ̃ zĩdadenↄ ũmɛ, ama àsun tó á gↄ̃na zĩdadenↄ ũ pì gↄ̃árɛ pↄyeinakɛna zɛ́ ũro. Àgↄ̃ mì natɛkↄ̃nɛ kũ yenyĩo, 
\v 14 zaakũ yã mɛ̀n do díkĩnamɛ Musa doka sĩnda pínki mì ũ: Ǹgↄ̃ ye n gbɛ̃dakei lán n zĩda wɛ̃̀ndii bà. 
\v 15 Tó átɛn saka tↄ̃tↄ̃kↄ̃a átɛn kↄ̃ sóso, à laakari kɛ kↄ̃kakatɛnaai.
\s1 Luda Nini donnɛna arɛ
\p
\v 16 Matɛn oárɛ, à tó Luda Nini doárɛ arɛ, á bisãsirikɛ pↄyeina ni láka. 
\v 17 Á bisãsirikɛ pↄyeinaa dì kↄ̃ sɛ́ kũ Luda Nini pↄ́oro, akũsↄ̃ Luda Nini pↄyeinaa dì kↄ̃ sɛ́ kũ á bisãsirikɛ pↄ́oro. Òdi gíkↄ̃imɛ, abire yãi adì fↄ̃ à yã kũ á yei kɛro.*fRom 7:15-23* 
\v 18 Tó Luda Nini tɛn doárɛ arɛ, doka iko vĩáwaro.
\p
\v 19 Ó ó bisãsirikɛ dànↄ dↄ̃ sãnsãn: Pãpãkɛnaa, gbãsĩkɛnaa, wé'isariyã, 
\v 20 tãnagbagbanaa, gãwãkɛnaa, zãngu, fìtii, nɛ̀sɛgↄ̃baa, nɛ̀sɛwãnaa, denlawɛtɛnaa, kɛ̃kɛ̃kↄ̃anaa, kↄ̃kpaatɛtɛnaa, 
\v 21 kɛna kũ kↄ̃o ĩni, wɛ̃dɛnaa, fàai pãpã bona kũ yã bire takanↄ. Ma a lɛ́ dàáwa lákũ ma dàáwa nà yã, yã bire taka kɛ̀rinↄ ni kpata kũ à bò Luda kĩnaa lero.
\p
\v 22 Luda Nini sↄ̃, àdi yenyĩ ińnɛ kũ pↄnnao kũ aafiaao kũ mɛnao kũ gbɛ̃kɛo kũ manakɛnaao kũ náanio 
\v 23 kũ busɛkɛnaao kũ zĩdakũnadↄ̃naao. Doka ke dì gí yã birenↄ takairo. 
\v 24 Gbɛ̃ kũ ò de Kirisi Yesu pↄ́ ũnↄ ń bisãsirikɛ dàa pà lía kũ a pↄ́nidɛnanↄ kũ a pↄyeinanↄ lɛɛlɛ. 
\v 25 Lákũ ó kú Luda Nini gãi nà, ò a dↄ̀rↄ sɛ́. 
\v 26 Òsungↄ̃ yↄ̃̀gↄ̃ vĩro, òsun kↄ̃ dↄkↄ̃aro, òsun gↄ̃baa kpá kũ kↄ̃oro.
\c 6
\s1 Ɔdana kↄ̃a
\p
\v 1 Ma gbɛ̃nↄ, tó á gbɛ̃ke sù à sã̀tɛ à durunna kɛ̀, ákↄ̃nↄ kũ Luda Nini tɛn doárɛ arɛnↄ à gↄ̃gↄ̃ kãao busɛbusɛ, à laakari kɛ de òsun á yↄ̃ ò gwa sero. 
\v 2 Àgↄ̃ kↄ̃ aso sɛ́. Átɛn Kirisi doka papan gwe. 
\v 3 Tó gbɛ̃ke tɛni a zĩda gwa pↄ́ke ũ, akũsↄ̃ à kun pↄ́ke ũro, àtɛni a zĩda sãtɛmɛ. 
\v 4 Baadi a yãkɛna tàasi ká gbasa à ĩa dã. Àsun a yã lɛkↄ̃a kũ gbɛ̃ pãnde pↄ́oro, 
\v 5 zaakũ baadi ni a zĩda aso sɛ́mɛ.
\p
\v 6 Gbɛ̃ kũ òtɛn Luda yã danɛ, à a aruzɛkɛ li a dannɛriinɛ.
\p
\v 7 Àsun á zĩda kɛkɛro, Luda dí sí foboro. Pↄ́ kũ gbɛ̃ tↄ̃̀ↄn àdi kɛ̃. 
\v 8 Tó gbɛ̃ tↄ̃̀ a bisãsirikɛ dàaa, ani kakatɛna inɛ. Tó gbɛ̃ tↄ̃̀ Luda Nini donɛna arɛ gũn sↄ̃, ani wɛ̃̀ndi kũ àdi lákaro inɛ. 
\v 9 Òsun kpasa kũ yãmanakɛnaaoro, zaakũ tó ódi kámma booro, óni àre le a gↄrↄa. 
\v 10 Abire yãi tó o zɛ́ lè, ògↄ̃ a mana kɛ gbɛ̃ sĩnda pínkinɛ, atɛ̃nsa ó Yesu náanikɛri dakenↄ.
\s1 Lɛ́zammanaa
\p
\v 11 À wãnzãn gbàgidigbagidi kũ ma kɛ̃̀ kũ ma zĩda ↄo gwa sà.
\p
\v 12 Gbɛ̃ kũ òtɛn yã kɛ gbɛ̃nↄ wɛ́ yãinↄ mɛ́ òtɛn gã naáwa kũ tↄ̃̀zↄ̃na yão, de òsun wɛ́ tãḿma zɛna kũ Kirisi gana lía yãoro yãi. 
\v 13 Bee tↄ̃̀zↄ̃rii pìnↄ se, ò doka kũnaro. Ò ye à tↄ̃̀ zↄ̃, de ò le ò ĩa dã á sèedaa pìi yã musu yãimɛ. 
\v 14 Mani ĩa dã pↄ́ke yã musuro, séde ó Dikiri Yesu Kirisi gana lía yã baasiro, zaakũ a yãi andunia gↄ̃̀mɛnɛ gɛ̀ ũ akũsↄ̃ ma gↄ̃ gɛ̀ ũ andunianɛ. 
\v 15 Tↄ̃̀zↄ̃na ke tↄ̃̀zↄ̃nasari yãke vĩro, séde gↄ̃na gbɛ̃ dufu ũ. 
\v 16 Luda gbɛ̃kɛ kɛ gbɛ̃ kũ ò yã pì kũnanↄnɛ, à ń gba aafiaa. Mↄ́kↄ̃nↄmɛ Isaraila yãpuranↄ ũ.
\p
\v 17 Zaa gbãragbɛ̃ke sún ma wɛ́ tã doro. Wari kũ ò dↄ̀ma Yesu yãi bↄ̀gbɛ kpɛ́ kú ma mɛ̀ɛa.
\p
\v 18 Ma gbɛ̃nↄ, ó Dikiri Yesu Kirisi gbɛ̃kɛ kɛárɛ! Aami.