\id EST Esther in Busa, Ross Jones
\ide UTF-8
\h ƐSITA
\toc1 ƐSITA
\toc2 ƐSITA
\mt1 ƐSITA
\c 1
\s1 Kína Asueru nanↄ Vasati bona kpatan
\p
\v 1 Kína Asueru gↄrↄa à kí blè bùsu mɛ̀n basuddo awɛɛsupplanↄa sɛna zaa India bùsun ari à gɛ̀ɛ pɛ́ Etiopia bùsuua. 
\v 2 Vutɛna a bɛa Susa wɛ́ran 
\v 3 a kíblena wɛ̃̀ aakↄ̃de gũn à gbãnadenↄ kũ a ìbanↄ kàkara ń pínki dikpɛ pↄ́blea. Pɛsia kũ Midião bùsu zĩ̀kari bàdenↄn kú gwe kũ gbɛ̃ bɛ̀ɛrɛdenↄ kũ bùsu gbãnadenↄo. 
\v 4 À a kpata aruzɛkɛ zↄ̃kↄ̃nↄ kũ a zↄ̃kↄ̃kɛ gakurio mↄ̀ńnɛ ari mↄ suddo. 
\v 5 Kũ gↄrↄ birenↄ pàpa, à dikpɛ pↄ́ble kɛ̀ gbɛ̃ kũ ò kú Susanↄnɛ, kínɛnↄ kũ talakanↄ ń pínki. Ò dikpɛ pↄ́ blè ari gↄrↄ suppla a bɛ ↄn líkpɛn. 
\v 6 Ò biza pura kũ a búguo dↄ̀dↄ andurufu tãnkanↄa kũ bà puranↄ kũ bà gaaruradenↄ, akũ ò lòko kpɛ́ gbɛ̀gba kũ ò bò kũ gbɛ̀punↄa. Wura kũ andurufu wutɛbↄnↄ katɛna gusara kũ ò kɛ̀ kũ gbɛ̀puo kũ gbɛ̀tɛ̃o kũ gbɛ̀sirao kũ gbɛ̀ búguo. 
\v 7 Ò wɛ̃ kpàkpaḿma gwe kũ wura tokonↄ. Toko pìnↄ buri donadona kↄ̃nɛ pínki. Kína wɛ̃ pìi kpàḿma à gɛ̃̀ ↄla. 
\v 8 Kína dìtɛ kũ òsun gí wɛ̃mirinↄnɛro. À pì a bɛgwarinↄnɛ ò wɛ̃ kpá baadia lákũ à yei nà.
\p
\v 9 Kína Asueru nanↄ Vasati dikpɛ pↄ́ble kɛ̀ nↄgbɛ̃nↄnɛ kínabɛa dↄ. 
\v 10 A gↄrↄ supplade zĩ kína pↄ kɛ̀ nna wɛ̃a, akũ à pì a dogari gbɛ̃nↄn suppla kũ ò ń fɛ̀rɛɛ kɛ̀nↄnɛ: Mɛuma, Bizita, Abona, Bigita, Abagata, Zeta kũ Kakasao, 
\v 11 ò suarɛ kũ a nanↄ Vasatio kũ a kí nanↄ fùraao kuna, de à a manakɛ mↄ gbɛ̃nↄnɛ kũ gbãnadenↄ, zaakũ nↄgbɛ̃ pì bi nↄmɛ. 
\v 12 Kũ kína dogari pìnↄ yã pìi ò a nanↄnɛ, à gì sui, akũ kína pɛ̃tɛ̃ kɛ̀ a pↄ fɛ̃̀i manamana. 
\v 13 Kína yã pìi ò wɛ́zɛ̃ri susunɛ tàasikarinↄnɛ, zaakũ àdigↄ̃ yã sĩnda pínki gbɛka gbɛ̃ kũ ò bùsu doka dↄ̃nↄamɛ. 
\v 14 Pɛsia kũ Midião gbãnade kũ òdigↄ̃ kú a sarɛ gbɛ̃nↄn supplanↄ tↄ́n dí: Kasena, Seta, Adamata, Tasisi, Mɛrɛsi, Masena kũ Mɛmukão. Mↄ́kↄ̃nↄmɛ a kpàasinↄ ũ. A kpata gbãnadenↄn gwe. 
\v 15 À pìńnɛ: Ma a dogarinↄ zĩ̀ ma nanↄ Vasatia kũ yão, akũ à gì mai. Óni kɛ kãao deramɛɛ? Doka pì deramɛɛ? 
\v 16 Akũ Mɛmukã pì kínanɛ kũ gbãnade pìnↄo: Kí, mↄkↄ̃mmɛ n nanↄ Vasati taari kɛ̀nnɛ ndoro, à taari kɛ̀ gbãnadenↄnɛ kũ n bùsu gbɛ̃ sĩnda pínkio. 
\v 17 Yã kũ n nanↄ pìi kɛ̀ ni dagula, nↄgbɛ̃ sĩnda pínki ni ma ò ń zãnↄ gya bo ò pi: Kína Asueru pì ò a nanↄ Vasati sísiarɛ, akũ à gì sui. 
\v 18 Pɛsia kũ Midião bùsu gbãnadenↄ nↄgbɛ̃ kũ ò n nanↄ yã pìi mànↄ nigↄ̃ yã vãni we ń zãnↄa tera. Lɛ́'ɛna kↄ̃a kũ zukao ni kɛ dasi. 
\v 19 Kí, tó à kàngu, ǹ yã ditɛ Vasatinɛ àsun wɛ́ kɛ pla kũnwo doro, ǹ nↄgbɛ̃ kũ à deala ká kpatan a gɛ̃nɛ ũ. Oni yã pì kɛ̃ Pɛsia kũ Midião doka kũ òdi gbororo takada gũn. 
\v 20 Tó ò yã kũ n dìtɛ kpàkpaa kɛ̀ n bùsu zↄ̃kↄ̃ↄ gũn pínki, nↄgbɛ̃nↄ ni bɛ̀ɛrɛ lí ń zãnↄnɛ, nↄ gbãnadenↄ kũ nↄ fítinnanↄ ń pínki. 
\v 21 Yã pìi kà kínagu kũ gbãnadenↄ ń pínki, akũ à kɛ̀ lákũ Mɛmukã ònɛ nà. 
\v 22 Akũ à lɛ́gbãzã kɛ̀ bùsu kũ à vĩnↄnɛ pínki, bùsu kũ bùsuuo kũ a takadakɛ̃na burio, buri kũ burio baadi kũ a buriyão. À pì gↄ̃gbɛ̃ mɛ́ anigↄ̃ gbãna ble ↄnn, a buriyãn ògↄ̃ o ↄnn pìi gũn.
\c 2
\s1 Ɛsita gↄ̃na kína nanↄ ũ
\p
\v 1 Yã birenↄ gbɛra kũ kína Asueru pↄ kpàtɛ, yã kũ Vasati kɛ̀nɛ kũ yã kũ à dìtɛ a yã musuo dí sãaguro. 
\v 2 Akũ kína ìbanↄ pìnɛ: Kí, ǹ tó ò nↄkpare mananↄ wɛtɛnnɛ. 
\v 3 Ǹ gbɛ̃ zↄ̃kↄ̃nↄ ditɛ n bùsunↄ gũn pínki ò nↄkpare mananↄ kakara ò su ò ń ká n nↄgbɛ̃nↄ tɛ́ Susa la. N nↄgbɛ̃nↄ gwàri Egai kũ ò a fɛ̀rɛɛ kɛ̀ ni ń gwa kũ n nↄnↄ, oni ń kɛkɛ kũ nísidↄkↄnanↄ swáswa. 
\v 4 Nↄgbɛ̃ kũ à kàngu ni gↄ̃ n nanↄ ũ Vasati gɛ̃nɛ ũ. Yã pìi kɛ̀ kínanɛ nna, akũ à zɛ̀o lɛ.
\p
\v 5 Yuda ke kú Susa Biliaminu burimɛ, a tↄ́n Mↄdekai, Yairi nɛ́mɛ. Simɛi kũ Kisio kú a dizinↄ tɛ́. 
\v 6 À kú zĩ̀zↄnↄ tɛ́ kũ Babilↄnu kína Nɛbukanɛza ń kũkũ Yurusalɛmu kũ Yudanↄ kína Yɛkↄniao à tà kũńwo. 
\v 7 Àtɛni a disɛ̃ nɛ́ Adasa kũ òdi pinɛ dↄ Ɛsita gwa, zaakũ a de kũ a dao kunlo. Nↄkpare pì kakana mana akũsↄ̃ à mana. Kũ a de kũ a dao gà, Mↄdekai a sɛ̀ a nɛ́ ũ. 
\v 8 Kũ ò yã kũ kína dìtɛ pìi mà, akũ ò gɛ̀ɛ kũ nↄkparenↄ dasidasi Susa ò ń ná Egainɛ a ↄĩ. Akũ ò Ɛsita sɛ̀ ò gɛ̀ɛ kãao kínabɛa kína nↄgbɛ̃nↄ gwàrii pìinɛ. 
\v 9 Nↄkpare pìi kɛ̀nɛ mana, akũ à gbɛ̃kɛ kɛ̀nɛ à pì ò a kɛkɛ kũ nísidↄkↄnanↄ swáswa gↄ̃̀nↄ, ò pↄ́ble mana kpáa. À kínabɛa nↄkpare kũ a sɛ̀ gbɛ̃nↄn supplanↄ kpàa, akũ à kpɛ́ mana kpàa kína nↄgbɛ̃nↄ bɛa. 
\v 10 Ɛsita dí a buri ke a bɛ bùsu o gbɛ̃kenɛro, zaakũ Mↄdekai pìnɛ àsun tó gbɛ̃ke dↄ̃ro. 
\v 11 Lákũ gu dìgↄ̃ dↄ nà Mↄdekai dìgↄ̃ kína nↄgbɛ̃nↄ bɛ gãnulɛ zɛ́ sↄ, de à le àgↄ̃ Ɛsita kunna dↄ̃ kũ yã kũ àtɛni a leo.
\p
\v 12 Ari nↄkparenↄ zɛ́ e ògↄ̃ gɛ́ i kũ kína Asueruo, séto ò yã kũ ò dìtɛńnɛ kɛ gĩa ari mↄ kuri awɛɛpla. Òdigↄ̃ nísi kũ ò kɛ̀ kũ lí'ↄ gbĩ nnao dↄkↄḿma ari mↄ suddo, akũ òdigↄ̃ ń kɛkɛ kũ nísi gbĩ nnanↄ kũ nↄgbɛ̃ mɛ̀kɛkɛbↄnↄ ari mↄ suddo. 
\v 13 Nↄkpare kũ kína pì ina kàa, kína nↄnↄ bɛ pↄ́ kũ à gbɛ̀ka pínki òdi kpáa à gɛ́omɛ. 
\v 14 Àdi gɛ́ ↄkↄsi à su kína nↄnↄ bɛa kↄnkↄ gwàri kũ òdi pinɛ Sasagaza kũ ò a fɛ̀rɛɛ kɛ̀ fárandi. Àkũ mɛ́ àdi ↄ lika kína nↄ yìgisaride pìnↄi. Àdi le à ɛra à gɛ́ kína kĩnaa doro, séto a yã kà kína pìn à a sìsi dↄ baasiro. 
\v 15 Kũ inaa kà Abihaili nɛ́ Ɛsita kũ a disɛ̃ Mↄdekai a sɛ̀ nɛ́ ũ pìia, adi pↄ́ke gbɛkaro, séde pↄ́ kũ kína nↄgbɛ̃nↄ gwàri Egai pìi ònɛ baasiro. Ɛsita yã kà gbɛ̃ kũ ò a ènↄgu ń pínki. 
\v 16 Kína kíblena wɛ̃̀ supplade gũn ò gɛ̀ɛ kãao a bɛa mↄ kuride Tɛbɛ gũn. 
\v 17 Kína ye Ɛsitai de a nↄ kparanↄla ń pínki. A yã kàagu, à kɛ̀nɛ mana de nↄkpare kparanↄla ń pínki, akũ à kína nanↄ fùraa kùnɛ à a dìtɛ a nↄ Vasati gɛ̃nɛ ũ. 
\v 18 Akũ kína pì dikpɛ pↄ́ble kàkara gbãnadenↄnɛ kũ a ìbanↄ Ɛsita sɛna yã musu. À dìtɛ kũ ò dikpɛ zↄ̃kↄ̃ kɛ, akũ ò a kpàkpaa kɛ̀ bùsu kũ bùsuuo, akũ à gba dà gbɛ̃nↄnɛ à gɛ̃̀ ↄla.
\s1 Mↄdekai kũ Amanao
\p
\v 19 Nↄkparenↄ kakarana gɛ̃̀n pladen Mↄdekai vutɛna kínabɛ gãnu gũn. 
\v 20 Ɛsita dí a bɛ bùsu ke a buriyã o gbɛ̃ke màro lákũ Mↄdekai ònɛ nà. À tɛ̀ Mↄdekai yãi lákũ àdigↄ̃ kɛ nà zaa gↄrↄ kũ àtɛni a gwa. 
\v 21 Kũ Mↄdekai vutɛna kínabɛ gãnu gũn lɛ, kína Asueru dogari zɛ́dãkpãri gbɛ̃nↄn planↄ pↄ fɛ̃̀ kínai, akũ ò lɛ́ kpàkũsũi ò a dɛ. Ń tↄ́n dí: Bigitana kũ Tɛrɛsio. 
\v 22 Kũ Mↄdekai yã pìi mà kpãni, à ò kína nanↄ Ɛsitanɛ, akũ Ɛsita ò kínanɛ kũ Mↄdekai tↄ́o. 
\v 23 Ò yã pìi gwàgwa ò è yãpuramɛ, akũ ò gbɛ̃nↄn pla pìnↄ lòko lía ò gà. Ò yã pìi kɛ̃̀ bùsu gĩayãkɛna takadan kína wára.
\c 3
\p
\v 1 Yã birenↄ gbɛra kína Asueru Amɛdata nɛ́ Amana, Agaga buri gwenaa kàra à a gbà gbãna, à vutɛki kũ à de a gbãnade dakenↄ pↄ́la ń pínki kpàa. 
\v 2 Kína ìba kũ ò kú a bɛ gãnu gũnnↄ dì kútɛ ò mì natɛ Amananɛ lákũ kína dìtɛ nà, ama Mↄdekai dì kútɛ à mì natɛnɛro. 
\v 3 Akũ kína ìbaa pìnↄ Mↄdekai là ò pì: À kɛ̀ dera ńdi kína yã maroo? 
\v 4 Lákũ gu dìgↄ̃ dↄ nà òdigↄ̃ onɛ lɛ, ama àdi ń yã daro, à pì Yudan a ũ. Akũ ò ò Amananɛ de ò le ò dↄ̃ tó ani Mↄdekai yãkɛnaa pì fↄ̃. 
\v 5 Kũ Amana è Mↄdekai dì kútɛ à mì natɛarɛro, akũ a pↄ fɛ̃̀. 
\v 6 Kũ ò Mↄdekai buri ònɛ, akũ a dɛna ado kɛ̀nɛ fíti, akũ àtɛn zɛ́ wɛtɛ à Mↄdekai buri Yuda kũ ò kú Asueru bùsuu gũnnↄ dɛdɛ ń pínki.
\s1 Amana lɛ́kpakũsũna Yudanↄi
\p
\v 7 Kína Asueru kíblena wɛ̃̀ kuri awɛɛpladen a mↄ káaku Nisã gũn, Amana gbɛ̀ kũ òdi pi purimu zù à gu gwà, de à mↄ kũ ani yã pì kɛa dↄ̃ kũ a gↄrↄo. Akũ gugwanaa pìi bò mↄ kuri awɛɛpla kũ òdi pi Ada gũn. 
\v 8 Akũ Amana pì kína Asuerunɛ: Buri ke kun a gbɛ̃nↄ fã̀kↄ̃a buri pãndenↄ tɛ́ n bùsu dasinↄ gũn pínki. Ń futɛokarayãnↄ donadona kũ buri kparanↄ pↄ́o, òdi n doka daro. Adi kↄ̃ sí ǹ ń tó tɛɛnɛro. 
\v 9 Kí, tó à kɛ̀nnɛ nna, ǹ yã ditɛ de ò láka kũńwo, mani andurufu tↄn wàa pla kpá n ↄgↄ'utɛrinↄa ò ká n aruzɛkɛkatɛkin. 
\v 10 Kína a tãnka sèedakɛbↄↄ bò à kpà Amɛdata nɛ́ Amana, Agaga buri Yudanↄ zãngurii pìia 
\v 11 à pì: Ǹ kɛ buri pìinɛ lákũ à kɛ̀nnɛ mana nà, ǹgↄ̃ andurufu pì kũna n pↄ́ ũ.
\p
\v 12 Mↄ káaku gↄrↄ kuri awɛɛ'aakↄ̃de zĩ Amana kína takadakɛ̃rinↄ sìsi. Ò yã kũ Amana dìtɛ kína ìbanↄ kũ kína kũ ò kú bùsu kũ bùsuuonↄ, buri kũ burio gbãnadenↄnɛ dà takadan. Ò kɛ̃̀ buri kũ burioonɛ, baadi kũ a yã takao, bùsu kũ bùsuuo kũ a takadakɛ̃na burio. Ò kɛ̃̀ kũ kína Asueru tↄ́o, akũ ò a sèedaa kɛ̀ takada pìia kũ a tãnkao. 
\v 13 Ò takada pìnↄ nà zĩ̀rinↄnɛ ń ↄĩ ò ń gbárɛ kína bùsu dasinↄ gũn. Takada pìi gũn ò pì ò Yudanↄ dɛdɛ ò láka kũńwo ò ń buri bo, nɛ́ fíti gbɛ̃ zↄ̃kↄ̃, gↄ̃gbɛ̃nↄ kũ nↄgbɛ̃nↄo gↄrↄ do gũn, mↄ kuri awɛɛplade Ada gↄrↄ kuri awɛɛ'aakↄ̃de zĩ, ò ń pↄ́nↄ kakara. 
\v 14 Oni yã kũ à dìtɛ pì takada kpãzã bùsu kũ bùsuuoonɛ pínki de àgↄ̃ de doka ũ, oni a kpàkpa kɛ buri sĩnda pínkinɛ de ògↄ̃ kú soru gũn gↄrↄ pì zĩ. 
\v 15 Zĩ̀rinↄ wã̀ ò gɛ̀ɛ gↄ̃̀nↄ yã kũ kína dìtɛ pì yãi, akũ ò a kpàkpaa kɛ̀ Susa wɛ́ran. Kína kũ Amanao vùtɛ òtɛn í gbɛ̃. Susadenↄ sↄ̃ ò bídi kɛ̀ yã pìia.
\c 4
\s1 Mↄdekai wɛ́kɛna Ɛsitaa de à lɛ́ da yãn
\p
\v 1 Kũ Mↄdekai yã kũ ò kɛ̀ɛ pìi mà, à a pↄ́kasanↄ gà à kɛ̃̀, akũ à uta kasanↄ kùala à túbu gbɛ̃̀ a mìia, akũ àtɛn kure wɛ̃tɛ gũn àtɛn wɛ̃nda ↄ́ gbãna dↄ. 
\v 2 À gɛ̀ɛ ari kínabɛ gãnulɛa, zaakũ gbɛ̃ke dì fↄ̃ à gɛ̃ kínabɛ gãnu gũn kũ uta kasanↄ danaro. 
\v 3 Ò yã kũ kína dìtɛ doka ũ pìi kpàkpaa kɛ̀ bùsu kũ bùsuuoonɛ pínki, akũ Yudanↄ nà ↄ́ↄdↄnaaa manamana gu sĩnda pínki kũ lɛ́yĩnaao. Òtɛn wɛ́tɛ̃ kↄ́tɛ òtɛn wɛ̃nda ↄ́ↄ dↄ. Ń gbɛ̃nↄ uta kasanↄ dàda dasi ò túbu gbɛ̃̀ ń mìia.
\p
\v 4 Kũ Ɛsita ìba nↄgbɛ̃nↄ kũ gↄ̃gbɛ̃nↄ sù ò ònɛ, a nɛ̀sɛɛ yàka manamana. À pↄ́kasanↄ kpã̀zã Mↄdekainɛ à da uta kasanↄ gbɛ̀n, ama adi we à sìro. 
\v 5 Ataka kũ ò a fɛ̀rɛɛ kɛ̀ɛmɛ dogari kũ kína dìtɛ àgↄ̃ kú Ɛsita sarɛ ũ. Ɛsita a sìsi à a zĩ̀ Mↄdekaia à gɛ́ à a lá: Bↄ́ yã mɛ́ à sùu? Bↄ́ yã mɛ́ à tò àtɛn kɛ lɛɛ? 
\v 6 Ataka bò kínabɛ gãnulɛa à Mↄdekai lè. 
\v 7 Mↄdekai yã kũ à a le bàbanɛ pínki, akũ à andurufu kũ Amana pì ani ká kína aruzɛkɛkatɛkin Yudanↄ dɛdɛna yãi lɛ́ ònɛ papana. 
\v 8 À yã kũ ò dìtɛ Yudanↄ dɛdɛna yã musu kũ ò a kpàkpaa kɛ̀ Susa takada kpàa dↄ de à mↄ Ɛsitanɛ à a bↄkↄtɛnɛ. À pì à o Ɛsitanɛ à gɛ́ kína kĩnaa à kútɛ kɛnɛ à wɛ́ kɛa a gbɛ̃nↄ yã musu. 
\v 9 Ataka tà à yã kũ Mↄdekai ò bàba Ɛsitanɛ.
\p
\v 10 Akũ Ɛsita pìnɛ à gɛ́ à yã dí o Mↄdekainɛ: 
\v 11 Kía ìbanↄ kũ a bùsu gbɛ̃nↄ dↄ̃ ń pínki kũ tó gↄ̃gbɛ̃ ke nↄgbɛ̃ nà kínai a kpɛ́ gũn, tó adi a sísiro, doka kun mɛ̀n domɛ. Òdi ade dɛmɛ, tó adi kɛ kína a wura gòo dↄ̀ adea de à le àgↄ̃ kun baasiro. Makũ sↄ̃, à kà gↄrↄ baraakuri kũ odi ma sísi mà gɛ́ kína kĩnaaro. 
\v 12 Kũ à gɛ̀ɛ à Ɛsita yã pì bàba Mↄdekainɛ, 
\v 13 akũ Mↄdekai ɛ̀ra à lɛ́gbãzã kɛ̀nɛ à pì: Ǹsungↄ̃ da mↄkↄ̃n mɛ́ ĩni bo ndo Yudanↄ tɛ́ n kunna kínabɛa yãiro. 
\v 14 Tó ń yĩtɛna gↄrↄ díkĩna taka gũn, kpányĩ ni bo gukea à Yudanↄ mì sí à ń bo. Mↄkↄ̃n kũ n de bedenↄ sↄ̃ áni gaga. Tó gↄrↄ díkĩna taka yãimɛ n gↄ̃ kína nanↄ ũ, dí mɛ́ à dↄ̃ↄ? 
\v 15 Akũ Ɛsita lɛ́gbãzã kɛ̀ Mↄdekainɛ à pì: 
\v 16 Ǹ gɛ́ ǹ Yuda kũ ò kú Susanↄ kakara ń pínki, à lɛ́ yĩ ma yã musu. Àsun pↄ́ blero àsun í miro gↄrↄ aakↄ̃ fãnantɛ̃ kũ gwãanio. Makũ kũ ma ìbanↄ óni lɛ́ yĩ lɛ se. Abire gbɛra mani gɛ́ kína kĩnaa, bee tó má gɛna zɛ́ vĩro. Tó sↄ̃ ma ga, ma gan gwe. 
\v 17 Akũ Mↄdekai tà à yã kũ Ɛsita ònɛɛ kɛ̀ pínki.
\c 5
\s1 Ɛsita wɛ́kɛna kínaa
\p
\v 1 A gↄrↄ aakↄ̃de zĩ Ɛsita a kína nanↄ bizanↄ yĩ̀, akũ à gɛ̀ɛ à zɛ̀ kínabɛ ↄnn kpɛ́ kũ à kun kpɛ́lɛlɛa. Kína vutɛna kíblegbaaa kpɛ́ gũn gwe, a arɛ dↄna kpɛ́lɛlɛa. 
\v 2 Kũ à a nanↄ Ɛsita è zɛna kpɛ́lɛlɛa, a pↄ kɛ̀a nna, akũ à a wura gò kũ a kũna dↄ̀a. Ɛsita nài à ↄ kɛ̀ a gòo pì lɛ́a. 
\v 3 Kína a là à pì: Ɛsita, bↄ́mɛɛ? Bↄ́n ntɛn gbɛkamaa? Bee tó ma kpata kpadomɛ mani kpámma. 
\v 4 À wèa à pì: Kí, tó à kɛ̀nnɛ mana, ǹ Amana sísi pↄ́ble kũ matɛn kɛnnɛa gbãra. 
\v 5 Akũ kína pì ò su kũ Amanao gↄ̃̀nↄ, de ò gɛ́ ò yã kũ Ɛsita gbɛ̀kaa pì kɛ. Akũ kína kũ Amanao gɛ̀ɛ de ò pↄ́ble kũ Ɛsita kɛ̀ńnɛ pì ble.
\p
\v 6 Kũ òtɛn sèwɛ̃ mi, kína Ɛsita là à pì: Bↄ́n ntɛn wɛ́ kɛ maa? Mani kɛnnɛ. Yã kpaten ntɛn gbɛkamaa? Bee tó ma kpata kpadomɛ mani kpámma. 
\v 7 Ɛsita wèa à pì: Yã kũ matɛn wɛ́ kɛmman dí. 
\v 8 Kína, tó ma n pↄnna lè, tó à kɛ̀nnɛ, ǹ yã kũ matɛn wɛ́ kɛmma kɛmɛnɛ, à mↄ́ à pↄ́ble kũ mani kɛárɛ zia ble, mani yã kũ n ma lai onnɛ.
\p
\v 9 Kũ Amana bò zĩ birea, a pↄ kɛ̀ nna àtɛn yáa dↄ. Ama kũ à Mↄdekai è kínabɛ gãnu gũn adi futɛ à zɛ̀arɛro adi vĩna kɛarɛro, akũ à pↄ fɛ̃̀i. 
\v 10 À a zĩda kũ̀ à tà bɛ. Kũ à a gbɛ̃nnanↄ sìsi kũ a nanↄ Zɛrɛsio, 
\v 11 akũ àtɛn ĩa dã a aruzɛkɛ zↄ̃kↄ̃ kũ a nɛ́gↄ̃gbɛ̃ dasinↄ yã musu. À pì a karanaa lè kína kĩnaa à a gba gbãna de a ìba kparanↄla kũ gbãnadenↄo ń pínki. 
\v 12 À pì dↄ: Madon kína nanↄ Ɛsita ma sisi à pↄ́ble kɛ̀mɛnɛ kũ kínao. À ɛ̀ra à ma sisi mà pↄ́ ble kũ kínao zia dↄ. 
\v 13 Bee kũ abireo tó ma Yuda buri Mↄdekai è vutɛna kínabɛ gãnu gũn, yã birenↄ pínki dì kɛmɛnɛ pↄ́ke ũro. 
\v 14 Akũ a nanↄ Zɛrɛsi kũ a gbɛ̃nnanↄ pìnɛ: Ǹ tó gbɛ̃nↄ lí pɛ́tɛnnɛ a lei kà gã̀sãkuru bupla akuri, ǹ wɛ́ kɛ kínaa zia kↄnkↄ à n gba zɛ́ ǹ Mↄdekai lokoa, gbasa ǹ gɛ́ kũ kínao ǹ pↄ́ ble kũ pↄnnao. Yã pìi kà Amanagu manamana, akũ à lí pìi pɛ̀tɛ.
\c 6
\s1 Bɛ̀ɛrɛkarana Mↄdekainɛ
\p
\v 1 Gwãani birea kína dí fↄ̃ à i òro. Akũ à pì ò mↄ́ kũ a bùsu gĩayãkɛna takadao. Ò a kyó kɛ̀nɛ, 
\v 2 akũ ò Mↄdekai yã è gwe, lákũ kína dogari zɛ́dãkpãri gbɛ̃nↄn planↄ Bigitana kũ Tɛrɛsio lɛ́ kpàkũsũi nà, akũ Mↄdekai bòo. 
\v 3 Kína a ìbanↄ là à pì: Ò Mↄdekai bɛ̀ɛrɛɛ kàra ò a gbà gbãna yã pì yãi deramɛɛ? Ò wèa ò pì: Odi yãke kɛnɛro. 
\v 4 Akũ kína pì: Dí mɛ́ à kú ↄnn gwee? Gↄrↄ kũ̀a Amana gɛ̃̀ kínabɛ ↄnn gↄ̃̀nↄ de à Mↄdekai lokona lí kũ à pɛ̀tɛ pìia yã onɛ. 
\v 5 Akũ kína ìbanↄ wèa ò pì: Amana mɛ́ à kú ↄnn gwe. Akũ kína pì à gɛ̃. 
\v 6 Kũ à gɛ̃̀, kína a là à pì: Bↄ́n oni kɛ gↄ̃gbɛ̃ kũ má ye mà a karanɛɛ? Amana laasunn lɛ̀ à pì: Dín kína ye à bɛ̀ɛrɛ karanɛ de makũlaa? 
\v 7 Akũ à wèa à pì: Tó ń ye ǹ gbɛ̃ bɛ̀ɛrɛ kara, 
\v 8 oni kína arukĩmba kũ n dà yã sɛ́ ò mↄ́o kũ n sↄ̃ kũ ò kífuraa kùaao. 
\v 9 Ǹ arukĩmbaa pì kũ sↄ̃ pìio kpá n gbãnade bɛ̀ɛrɛdenↄ dokea, à arukĩmbaa pì da gbɛ̃ kũ ń ye ǹ a bɛ̀ɛrɛ karanɛ à a di sↄ̃a àgↄ̃ tɛ́ a arɛ wɛ̃tɛ zɛ́danↄ gũn àgↄ̃ pũtã àgↄ̃ pi: Lɛn kína dì kɛ lɛ gbɛ̃ kũ à ye à a bɛ̀ɛrɛ karanɛɛnɛ. 
\v 10 Akũ kína pìnɛ: Ǹ gɛ́ ǹ arukĩmbaa pì sɛ́ gↄ̃̀nↄ kũ sↄ̃o lákũ n ò nà, ǹ yã pì kɛ Yuda buri Mↄdekai kũ àdigↄ̃ vutɛna ma bɛ gãnu gũnnɛ. Ǹsun yã kũ n pì ò kɛnɛɛ pì ke tóro.
\p
\v 11 Amana gɛ̀ɛ à arukĩmbaa pìi sɛ̀ kũ sↄ̃ pìio à sùo. Akũ à arukĩmbaa pìi dà Mↄdekainɛ à a dì sↄ̃a, à tɛ́ a arɛ wɛ̃tɛ zɛ́danↄ gũn, àtɛn pũtã à pì: Lɛn kína dì kɛ lɛ gbɛ̃ kũ à ye à a bɛ̀ɛrɛ karanɛɛnɛ. 
\v 12 Kũ ò sù, Mↄdekai gɛ̀ɛ à vùtɛ kínabɛ gãnu gũn, akũ Amana ↄ kù a wɛ́a à tà bɛ kũ ↄ́ↄdↄo. 
\v 13 À yã kũ à a le bàba a nanↄ Zɛrɛsinɛ kũ a gbɛ̃nnanↄ ń pínki. Akũ a lɛ́dammarii pìnↄ kũ Zɛrɛsio pìnɛ: Zaakũ Mↄdekai kũ n gↄ̃ kpɛ a yãi pì bi Yuda burimɛ, ĩni a fↄ̃ doro, ĩnigↄ̃ kĩai ǹgↄ̃ gɛ́mɛ. 
\v 14 Gↄrↄ kũ òtɛn yã pì onɛ, kína dogari kũ ò ń fɛ̀rɛɛ kɛ̀nↄ kà, akũ ò a sɛ̀ likalika ò gɛ̀ɛ kãao pↄ́ble kũ Ɛsita kɛ̀ɛa.
\c 7
\s1 Amana lokona lía
\p
\v 1 Akũ kína kũ Amanao gɛ̀ɛ pↄ́ ble kũ Ɛsitao. 
\v 2 Gↄrↄ kũ òtɛn wɛ̃ mi a gↄrↄ plade pì zĩ, akũ kína Ɛsita là à pì: Ɛsita, bↄ́n ĩni wɛ́ kɛmaa? Mani kɛnnɛ. Yã kpaten ntɛn gbɛkamaa? Bee ma kpata kpadomɛ mani kpámma. 
\v 3 À wèa à pì: Tó ma n pↄnna lè akũsↄ̃ yã pìi kɛ̀nnɛ, ǹ tó màgↄ̃ kú wɛ̃̀ndiio. Wɛ́kɛ kũ ma kɛ̀mman gwe. Ǹ tó ma gbɛ̃nↄ gↄ̃ wɛ̃̀ndi vĩ. Yã kũ ma gbɛ̀kan gwe. 
\v 4 Zaakũ makũ kũ ma gbɛ̃nↄ, ò dìtɛ kũ ò ó dɛdɛ ò láka kũńwo ò ó buri bomɛ. Tó òtɛni ó yía zↄ̀nↄ ũ yãmɛ, de má yĩtɛna. Wari dí taka dí ká mà wari dↄmmaro. 
\v 5 Akũ kína a là à pì: Dímɛɛ? Dí mɛ́ ani fↄ̃ à zɛ kũ yã bire taka buri kɛnaaoo? 
\v 6 À wèa à pì: Amana vãni díkĩnan ibɛrɛ kũ à zã̀ógu pì ũ. Swɛ̃̀ɛ kɛ̃̀ Amanaa kína kũ a nanↄ pìio yã musu. 
\v 7 Kína fùtɛ a wɛ̃la pↄfɛ̃ gũn à gɛ̀ɛ líkpɛn a ↄnn. Amana sↄ̃ à gↄ̃̀ gwe kũ Ɛsitao, akũ Amana tɛn kútɛ kɛnɛ a wɛ̃̀ndi yã musu, zaakũ à è kũ kína zɛ̀o à vãni kɛarɛmɛ. 
\v 8 Kũ kína bò líkpɛn à sù pↄ́blekia gↄ̃̀nↄ, Amana lɛ̀lɛ gbà wutɛbↄ kũ Ɛsita gɛngɛsɛkɛnaaa, akũ à pì: À ye à kusi ma nanↄa ma wára kpɛ́ gũn lan yá? Kũ yã pìi bò kína lɛ́n gↄ̃̀nↄ, ò sù ò pↄ́ yĩ̀ Amana ãnnwa. 
\v 9 Kína dogarinↄ doke Abona pìnɛ: Lí pɛtɛna Amana pì bɛ sarɛ à kà gã̀sãkuru bupla akuri. Àkũ mɛ́ à lí pìi pɛ̀tɛ de à le à Mↄdekai kũ à yã mana kɛ̀nnɛ lokoa. Akũ kína pì: À a lokoa. 
\v 10 Kũ ò Amana lòko lí kũ à pɛ̀tɛ Mↄdekainɛ pìia, akũ kína pↄ kpàtɛ.
\c 8
\s1 Kína yã pãnde ditɛna Yudanↄ yã musu
\p
\v 1 Zĩ pìian kína Asueru Yudanↄ zãnguri Amana bɛ kpà a nanↄ Ɛsitaa. Ɛsita pì kínanɛ Mↄdekaimɛ a danɛ ũ, akũ Mↄdekai nà kínai. 
\v 2 Kína a tãnka kũ à sì Amanaa bò à dà Mↄdekainɛ, akũ Ɛsita Amana bɛ nànɛ a ↄĩ.
\p
\v 3 Ɛsita ɛ̀ra à gɛ̀ɛ yã o kínanɛ dↄ. À wùtɛ a gbá arɛ àtɛn wɛ́tɛ̃ kↄ́tɛ, à kútɛ kɛ̀nɛ de à yã vãni kũ Agaga buri Amana a lɛ́ kpàkũsũ Yudanↄii gboro. 
\v 4 Kína wura gò dↄ̀a, akũ à fùtɛ à zɛ̀ a arɛ 
\v 5 à pì: Tó ma yã kàngu akũsↄ̃ ma n pↄnna lè, tó yã díkĩna zɛ́ vĩ akũsↄ̃ ma yã kànnɛ, zaakũ Amɛdata nɛ́ Amana, Agaga buri zɛ̀o à Yuda kũ ò kú n bùsu gũnnↄ dɛdɛ ń pínki, ǹ o n takadakɛ̃rinↄnɛ ò takada kɛ̃ ò Amana yã pì litɛ kpɛdangara. 
\v 6 Mani kɛ deran mà kisira kũ ani su ma gbɛ̃nↄ le gwaa? Mani kɛ dera mà wɛ́ kɛ pla kũ ma burinↄ dɛdɛnaaoo? 
\v 7 Akũ kína Asueru pì a nanↄ Ɛsitanɛ kũ Mↄdekaio: À gwa, ma Amana bɛ kpà Ɛsitaa, akũ ma Amana pìi lòko lía kũ à yã vãni kpàkũsũ Yudanↄi yãi. 
\v 8 À takada kɛ̃ Yudanↄ yã musu lákũ à kɛ̀árɛ mana nà. À kɛ̃ kũ ma tↄ́o à ma tãnka sèeda kɛa, zaakũ takada kũ ò kɛ̃̀ kũ ma tↄ́o ò ma tãnka sèedaa kɛ̀a litɛna vĩro. 
\v 9 Gwe gↄ̃̀nↄ ò kína takadakɛ̃rinↄ sìsi. Mↄ aakↄ̃de Sivã gↄrↄ baro awɛɛ'aakↄ̃de zĩn ò yã kũ Mↄdekai dìtɛ Yudanↄnɛ kũ kína ìbanↄ kũ kínanↄ kũ bùsu gbãnadenↄo kɛ̃̀ pínki bùsu mɛ̀n basuddo awɛɛsupplanↄnɛ sɛna zaa India bùsun ari à gɛ̀ɛ pɛ́ Etiopia bùsuua. Ò takada kɛ̃̀ bùsu kũ bùsuuo kũ ń takadakɛ̃na burio, buri kũ burio kũ ń yão. Ò takada kɛ̃̀ Yudanↄnɛ kũ ń takadakɛ̃na takao kũ ń buriyão dↄ. 
\v 10 Mↄdekai takada kɛ̃̀ kũ kína Asueru tↄ́o à kína tãnka sèedaa kɛ̀a à takada pìnↄ nà zĩ̀rinↄnɛ ń ↄĩ, akũ ò dì sↄ̃ bàalɛri kũ ò bò kína sↄ̃yĩkianↄa ò gɛ̀ɛo.
\p
\v 11 Yã kũ kína dìtɛ pì Yuda kũ ò kú wɛ̃tɛ kũ wɛ̃tɛonↄ gbà zɛ́ ò kↄ̃ kakara ò gí kũ ń zĩdao. Tó buri ke bùsu zĩ̀kari ke lɛ̀tɛḿma kũ ń nɛ́nↄ kũ ń nↄgbɛ̃nↄ, ò ń dɛdɛ ò láka kũńwo ò ń mì dɛ ò ń pↄ́nↄ sɛ́tɛ. 
\v 12 À ń gbá zɛ́ ò abire kɛ kína Asueru bùsunↄ gũn pínki mↄ kuri awɛɛplade Ada gↄrↄ kuri awɛɛ'aakↄ̃de zĩn. 
\v 13 Ò yã kũ à dìtɛ pì takada kpã̀zã bùsu kũ bùsuuo pínki doka ũ. Ò a kpàkpaa kɛ̀ buri sĩnda pínkinɛ de Yudanↄ gↄ̃ kú soru gũn ò yã yía ń ibɛrɛnↄa zĩ birea. 
\v 14 Kína yãditɛna pì yãin zĩ̀rii pìnↄ kɛ̀ likalika dina kína sↄ̃ bàalɛrinↄa ò gɛ̀ɛ. Akũsↄ̃ ò yã pìi kpàkpaa kɛ̀ Susa wɛ́ran. 
\v 15 Mↄdekai bò kínabɛa à kíkɛ pↄ́ pura kũ pↄ́ búguo dana, à kífura zↄ̃kↄ̃ kũ ò pì kũ wuraao kuna. À táaru biza arukĩmba tɛ̃ra dana dↄ, akũ Susadenↄ ayuwii kɛ̀ kũ pↄnnao. 
\v 16 Gu pù Yudanↄnɛ zĩ birea, òtɛn pↄnna kɛ kũ yáa dↄo, zaakũ ò ń gbá gbãna. 
\v 17 Bùsu kũ bùsuuo wɛ̃tɛ kũ wɛ̃tɛo, gu kũ kína yã ditɛnaa pìi kàn pínki Yudanↄ pↄnna kɛ̀ kũ yáa dↄo ò dikpɛ kɛ̀ kũ pↄ́blegbɛ̃naao. Buri pãndenↄ gↄ̃̀ Yudanↄ ũ dasi, kũ vĩna ń kũ Yudanↄ yã musu yãi.
\c 9
\s1 Yudanↄ zĩ̀blena ń ibɛrɛnↄa
\p
\v 1 Mↄ kuri awɛɛplade Ada gↄrↄ kuri awɛɛ'aakↄ̃de zĩn yã kũ kína dìtɛ kɛgↄrↄ ũ. Zĩ kũ̀a Yudanↄ ibɛrɛnↄ wɛ́ dↄi yã kũ ò gbãna mↄ Yudanↄnɛ, ama yã pìi lìtɛ kpɛdangara, akũ Yudanↄ gbãna mↄ̀ ń ibɛrɛnↄnɛ. 
\v 2 Kína Asueru bùsunↄ gũn pínki Yudanↄ kↄ̃ kàkara fárandi kũ ò kun de ò lɛ́tɛ gbɛ̃ kũ ò yã vãni kpàkũsũńyĩnↄa. Gbɛ̃ke dí fↄ̃ à ń furo, zaakũ buri pãndenↄ tɛn vĩna kɛńnɛ ń pínki. 
\v 3 Bùsu gbãnadenↄ, kína ìbanↄ kũ kínɛnↄ kũ a zĩkɛrinↄ ń pínki zɛ̀ Yudanↄ kpɛ, kũ òtɛn vĩna kɛ Mↄdekainɛ yãi. 
\v 4 Mↄdekai bɛ̀ɛrɛ vĩ kínabɛa, akũ a tↄ́ dà bùsu sĩnda pínkila, zaakũ a gbãna tɛn karamɛ.
\p
\v 5 Yudanↄ ń ibɛrɛnↄ dɛ̀dɛ kũ fɛ̃nɛdao ò láka kũńwo ń pínki ò ń pↄyeinaa kɛ̀ ń zãngurii pìnↄa. 
\v 6 Ò gↄ̃gbɛ̃nↄ dɛ̀dɛ Susa wɛ́ran gbɛ̃nↄn wàa pla kpɛ́ basↄↄro. 
\v 7 Ò Pasandata kũ Dalafↄ̃o kũ Asapatao 
\v 8 kũ Poratao kũ Adaliao kũ Aridatao 
\v 9 kũ Pamasatao kũ Arisaio kũ Aridaio kũ Vaizatao dɛ̀dɛ dↄ. 
\v 10 Gbɛ̃ pìnↄ bi Amɛdata nɛ́ Amana, Yudanↄ zãnguri nɛ́gↄ̃gbɛ̃ gbɛ̃nↄn kurinↄmɛ. Bee kũ abireo odi ↄ kɛ ń pↄ́kearo.
\p
\v 11 Zĩ dokↄ̃nↄ pìian ò gbɛ̃ kũ ò ń dɛdɛ Susanↄ dasi lɛ́ gbã̀ kínanɛ. 
\v 12 Akũ à pì a nanↄ Ɛsitanɛ: Yudanↄ gↄ̃gbɛ̃nↄ dɛ̀dɛ Susa la gbɛ̃nↄn wàa pla kpɛ́ basↄↄro kũ Amana nɛ́gↄ̃gbɛ̃ gbɛ̃nↄn kurinↄ. Bↄ́n ò kɛ̀ ma bùsu kparanↄ gũn sɛ́ɛ! Yã kpaten ntɛn wɛ́ kɛma dↄↄ? Mani kɛnnɛ. Bↄ́ yãn ntɛn gbɛkamaa? Mani kpámma. 
\v 13 Ɛsita wèa à pì: Kína, tó à kɛ̀nnɛ mana, ǹ Yuda kũ ò kú Susa lanↄ gba zɛ́ ò yã kũ n dìtɛ ò kɛ gbãra kɛ zia dↄ, ò Amana nɛ́gↄ̃gbɛ̃ gbɛ̃nↄn kurii pìnↄ loko lía. 
\v 14 Kína pì, ò kɛ lɛ. Ò a kpàkpaa kɛ̀ Susa, akũ ò Amana nɛ́ pìnↄ gɛ̀ɛ lòkoloko. 
\v 15 Yuda kũ ò kú Susanↄ kↄ̃ kàkara Ada gↄrↄ gɛ̃ro donsaride zĩ, akũ ò gↄ̃gbɛ̃nↄ dɛ̀dɛ dↄ gbɛ̃nↄn wàa do kpɛ́ basↄↄro. Bee kũ abireo odi ↄ kɛ ń pↄ́kearo.
\p
\v 16 Yuda kpara kũ ò kú kína búsunↄ gũnnↄ ń pínki kↄ̃ kàkara de ò gí kũ ń zĩdao ò bo ń ibɛrɛnↄ yãn, akũ ò ń zãngurii pìnↄ dɛ̀dɛ gbɛ̃nↄn dúbu basiikↄ̃ sↄↄro sari. Bee kũ abireo odi ↄ kɛ ń pↄ́kearo. 
\v 17 Ò yã pìi kɛ̀ Ada gↄrↄ kuri awɛɛ'aakↄ̃de zĩmɛ, a gↄrↄ gɛ̃ro donsaride zĩn ò kámma bò. Ò gↄrↄ pìi dìtɛ dikpɛ ũ de ò dikpɛ pↄ́ble kɛ ò pↄnna kɛ gↄrↄ pìia.
\p
\v 18 Yuda kũ ò kú Susanↄ kↄ̃ kàkara a gↄrↄ kuri awɛɛ'aakↄ̃de zĩ kũ a gↄrↄ gɛ̃ro donsaride zĩo, akũ ò kámma bò a gↄrↄ gɛ̃rode zĩ. Ò gↄrↄ pìi dìtɛ dikpɛ ũ de ò dikpɛ pↄ́ble kɛ ò pↄnna kɛ gↄrↄ pìiĩ. 
\v 19 Abire yãin Yuda búbari kũ ò kú lakutu gũnnↄ dì dikpɛ pì kɛ Ada gↄrↄ gɛ̃ro donsaride zĩ ò dikpɛ pↄ́ble kɛ ò pↄnna kɛ òdi pↄ́ble dakↄ̃nɛ.
\s1 Purimu dikpɛ ditɛnaa
\p
\v 20 Mↄdekai yã pìnↄ kɛ̃̀ takada gũn, akũ à kpã̀zã Yuda kũ ò kú kína Asueru bùsuu gũnnↄnɛ ń pínki, gbɛ̃ kũ ò kú kãninↄ kũ gbɛ̃ kũ ò kú zã̀nↄ ń pínki. 
\v 21 À dìtɛńnɛ kũ ògↄ̃ dikpɛ pì kɛ wɛ̃̀ kũ wɛ̃̀ɛo Ada gↄrↄ gɛ̃ro donsaride zĩ kũ a gↄrↄ gɛ̃rode zĩo. 
\v 22 Gↄrↄ pìnↄmɛ Yudanↄ bona ń ibɛrɛnↄ ↄĩ dikpɛ ũ. Mↄ pìi gũn ń pↄsira lìtɛ pↄnna ũ, ń wɛ̃ndakɛnaa lìtɛ dikpɛkɛna ũ. Ògↄ̃ dikpɛ pì kɛ gↄrↄ pìnↄ zĩ, ògↄ̃ dikpɛ pↄ́ble kɛ ògↄ̃ pↄnna kɛ, ògↄ̃ pↄ́ble dakↄ̃nɛ, ògↄ̃ gba da takasidenↄnɛ. 
\v 23 Yudanↄ zɛ̀ kũ yã kũ Mↄdekai kɛ̃̀ńnɛo, akũ dikpɛ kũ ò kɛ̀ pìi gↄ̃̀ńnɛ futɛokarayã ũ.
\p
\v 24 Amɛdata nɛ́ Amana, Agaga buri Yudanↄ pínki zãnguri yã vãni kpàkũsũńyĩ kũ à ń dɛdɛ, akũ à gbɛ̀ kũ òdi pi purimu zù à a gu gwà de à le à ń fu à ń dɛdɛ. 
\v 25 Ama kũ kína yã pìi mà kpãni, à yã dìtɛ takada gũn, de yã vãni kũ à a lɛ́ kpàkũsũ Yudanↄii pì ɛra a musu. Akũ ò a lòko lía kũ a nɛ́gↄ̃gbɛ̃nↄ lɛɛlɛ. 
\v 26 A yã mɛ́ à tò òdi gↄrↄ pìnↄ sísi Purimu, zaakũ gbɛ̀ kũ à zù à a gu gwà tↄ́n gwe. Yã kũ Mↄdekai kɛ̃̀ takada pìi gũn kũ yã kũ à ń lénↄ yãin 
\v 27 ò sì kũ ò dikpɛ kɛ gↄrↄ pla pìnↄ gũn wɛ̃̀ kũ wɛ̃̀ɛo. Ò pì mↄ́kↄ̃nↄ kũ ń nɛ́nↄ kũ gbɛ̃ kũ ò nàḿmanↄ ni gí dikpɛ pì kɛiro, ògↄ̃ kɛ a gↄrↄa lákũ ò kɛ̃̀ takadan nà. 
\v 28 Wɛ̃̀ kũ wɛ̃̀ɛo gↄrↄ pìnↄ yã gↄ̃ dↄńgu, ògↄ̃ a dikpɛ kɛ ↄn kũ ↄnnwo wɛ̃tɛ kũ wɛ̃tɛo bùsu kũ bùsuuo, de Purimu dikpɛ pì sún láka Yudanↄ kĩnaaro yãi, a kɛgↄrↄ sún mì dɛ ń burinↄaro.
\p
\v 29 Kína nanↄ Ɛsita, Abihaili nɛ́ takada plade kɛ̃̀ kũ a ikooo pínki Purimu yã musu, à gbãna kpào takada kũ Yuda buri Mↄdekai kɛ̃̀a. 
\v 30 Mↄdekai takada pìi kpã̀zã Yuda kũ ò kú kína Asueru bùsu mɛ̀n basuddo awɛɛsuppla gũnnↄnɛ. À kunna aafia kũ laakarikpatɛnaao yã òńnɛ, 
\v 31 akũ à Purimu dikpɛ pìi dìtɛ a gↄrↄa, lákũ àpii kũ kína nanↄ Ɛsitao dìtɛńnɛ nà, lákũ mↄ́kↄ̃nↄ sↄ̃ ò sì ò kɛ nà kũ ń burinↄ ń kpɛ kũ lɛ́yĩnaao kũ ↄ́ↄdↄo. 
\v 32 Yã kũ Ɛsita dìtɛ pì gbãna kpà Purimu doka pìnↄa, akũ ò kɛ̃̀ takadan.
\c 10
\s1 Kína Asueru kũ Mↄdekaio yã
\p
\v 1 Kína Asueru tò gbɛ̃ kũ ò kú a bùsuu gũnnↄ pínki kũ ísira luannↄ táfe boarɛ. 
\v 2 Yã zↄ̃kↄ̃ kũ à kɛ̀nↄ kũ a ikokɛyãnↄ kɛ̃na Midiãnↄ kũ Pɛsianↄ kínanↄ gĩayãkɛna takadan. Lákũ kína Mↄdekai gbà gbãna à gↄ̃ gbɛ̃ zↄ̃kↄ̃ ũ nà, a yã kú takada pìi gũn dↄ. 
\v 3 Yuda buri Mↄdekaimɛ kína Asueru kpàasi ũ. À tↄ́ bò Yudanↄ tɛ́ akũsↄ̃ a yã kàńgu dasi, zaakũ à a gbɛ̃nↄ aafiaa wɛ̀tɛ, akũ à kunna nna zɛ́ kɛ̀kɛ a buri pìnↄnɛ.