\id EPH Ephesians in Busa, Ross Jones
\ide UTF-8
\h ƐFESUDENƆ
\toc1 ƐFESUDENƆ
\toc2 ƐFESUDENƆ
\mt1 ƐFESUDENƆ
\c 1
\s1 Gbɛ̃kɛ kũ Luda kɛ̀wɛrɛ Kirisi gũn
\p
\v 1 Makũ Pↄlu, Kirisi Yesu zĩ̀rii Luda pↄyenyĩnaa gũn, makũ mɛ́ ma takada dí kɛ̃̀ Luda gbɛ̃ kũ òtɛn Kirisi Yesu náani kɛ zaa Ɛfesunↄnɛ. 
\v 2 Ó De Luda kũ Dikiri Yesu Kirisio gbɛ̃kɛ kɛárɛ, à á gba aafiaa.
\p
\v 3 Ò Luda ó Dikiri Yesu Kirisi De sáabu kpá! Ó kunna Kirisi gũn Luda a Nini arubarika sĩnda pínki dàógu zaa musu. 
\v 4 À ó sɛ́ a gũn andunia katɛna ã, de ó kunna gↄ̃ denɛ adona mamberu sari. Yenyĩ gũn 
\v 5 à gĩnakɛ à ó dítɛ a nɛ́nↄ ũ Yesu Kirisi gãi, lákũ àtɛn wɛtɛ a pↄyenyĩnaa gũn nà, 
\v 6 de à tↄ́ bo a gbɛ̃kɛ gakuride kũ à kɛ̀wɛrɛ a Nɛ́ yenyĩde gũn yãi. 
\v 7 A gũn à ó bó kũ a aruo. À ó taarinↄ kɛ̃̀wá a gbɛ̃kɛ zↄ̃kↄ̃ 
\v 8 kũ à kɛ̀wɛrɛ à gɛ̃̀ ↄla yãi. Ɔ̃ndↄ̃ sĩnda pínki kũ wɛ́zɛ̃ sĩnda pínkioo gũn 
\v 9 à tò o a pↄyenyĩna asiri dↄ̃̀, lákũ à zɛ̀o à kɛ Kirisi gãi nà. 
\v 10 Tó a pↄyenyĩnaa pì kɛgↄrↄ kà, ani pↄ́ sĩnda pínki kakara Kirisi ń Mìdenɛ, pↄ́ kũ à kú musu kũ zĩtɛo pínki. 
\v 11 Luda kũ àdi yã sĩnda pínki kɛ lákũ à zɛ̀o a pↄyenyĩnaa gũn nà gĩnakɛ à ó dítɛ lákũ àtɛn wɛtɛ nà, à ó sɛ́ a pↄ́ ũ Kirisi gũn, 
\v 12 de ókↄ̃nↄ kũ ó wɛ́ dↄ Kirisii zaa káakunↄ ògↄ̃ de a tↄ́ gakuride kpàrinↄ ũ. 
\v 13 Ákↄ̃nↄ sↄ̃, a yãpura yã mà, a baaru nna kũ à á sura bàa pìi sì. A gũn Luda a zĩda sèedaa kɛ̀áwa a Nini kũ à a lɛ́ sɛ̀ ũ. 
\v 14 Àkũmɛ túbi kũ óni le zɛnkpɛkɛ ũ ari Luda gↄ̃ gɛ́ a gbɛ̃nↄ bo, de ò a tↄ́ gakuride kpá yãi.
\s1 Pↄlu aduakɛna Ɛfesudenↄnɛ
\p
\v 15 Abire yãi zaa gↄrↄ kũ ma á Dikiri Yesu náanikɛnaa mà kũ yenyĩ kũ á vĩ kũ Luda gbɛ̃nↄ ń pínki, 
\v 16 mádi kámma bo kũ Luda sáabukpanaao á yã musuro. Á yã dìgↄ̃ dↄmagu wɛ́kɛ kũ madì kɛ Ludaaa gũn. 
\v 17 Madì wɛ́ kɛ De gakuride, ó Dikiri Yesu Kirisi Ludaa, de à á gba ↄ̃ndↄ̃, à á wɛ́ kɛ̃árɛ kũ a Nini gbãnao de à le à a dↄ̃ swáswa. 
\v 18 Madì wɛ́ kɛa à á nɛ̀sɛ wɛ̃árɛ de à le à tãmaa kũ à á sísia dↄ̃. À a túbi gakuride aruzɛkɛ pìnↄ dìtɛ a gbɛ̃nↄnɛ 
\v 19 kũ a gbãna zↄ̃kↄ̃ bonsarɛ kũ àtɛn zĩ kɛ ókↄ̃nↄ kũ odì a náani kɛnↄ gũnwo. Gbãna zↄ̃kↄ̃ↄ pì zĩ kɛ̀ Kirisi gũn 
\v 20 gↄrↄ kũ Luda a vù gan, à a vùtɛ a ↄplai zaa musu. 
\v 21 Gwen Kirisi de kpatablerinↄ kũ ikodenↄ kũ gbãnadenↄ kũ dikirinↄla ń pínki kũ tↄ́ kũ òdi mì natɛńnɛnↄ pínki. Adi kɛ andunia tera díkĩna adonlo, kũ a pↄ́ kũ ani suomɛ dↄ. 
\v 22 Luda tò à iko vĩ pↄ́ sĩnda pínkia, akũ à a dìtɛ pↄ́ sĩnda pínki mìde ũ sↄsi gbɛ̃nↄnɛ. 
\v 23 Sↄsi gbɛ̃ pìnↄmɛ Kirisi mɛ̀ ũ, à de Kirisi kũ àdi pↄ́ sĩnda pínki papa gu sĩnda pínkia papana ũ.
\c 2
\s1 Vu à bona gan gɛ̃na wɛ̃̀ndin
\p
\v 1 Á de yã gɛ̀nↄ ũ Ludanɛ á taarinↄ kũ á durunnanↄ yãi. 
\v 2 Á tɛ́ andunia díkĩna ágbai, a mìi nàtɛ ĩa gbãnadenↄ kínanɛ, Setan kũ à kpɛ́ dona ludayãdarisarinↄnɛ arɛ pìi. 
\v 3 Ó pínki ó de lán ń bà yã se. Odì pↄ́ kũ ó mɛ̀ yeii kũ yã kũ à ó pↄ gbào kɛ. Ó inaa gũn ó de gbɛ̃ kũ Luda ni pↄfɛ̃ kipaḿmanↄ ũ lán dakenↄ bà, 
\v 4 ama Luda sùru zↄ̃kↄ̃, à yenyĩ vĩwɛrɛ manamana. 
\v 5 Gↄrↄ kũ ó de gɛ̀nↄ ũ ó taarinↄ yãi, à ó fútɛ kũ Kirisio lɛɛlɛ. À á sura bà a gbɛ̃kɛ gũn. 
\v 6 Kirisi Yesu gũn à ó sɛ́ à ó vútɛ kãao zaa musu, 
\v 7 de à le à a gbɛ̃kɛ zↄ̃kↄ̃ bonsarɛ mↄńnɛ andunia kũ ani su gũn yãi yã mana kũ à kɛ̀wɛrɛ Kirisi Yesu gũn musu. 
\v 8 Luda á sura bà a gbɛ̃kɛ gũn Yesu náani kũ a kɛ̀ yãi. Abire dí bo á kĩnaanlo, Luda mɛ́ à á gbá. 
\v 9 Á surabana dí bo á yãkɛna gãinlo, de gbɛ̃ke sún ĩa dãoro yãi. 
\v 10 Luda ↄgbɛn ó ũ. Kirisi Yesu gũn à ó kɛ́ de ògↄ̃ kú kũ yã mana kũ à gĩnakɛ à dìtɛwɛrɛ kɛnaao.
\s1 Gↄ̃na mɛ̀ dokↄ̃nↄ ũ Kirisi gũn
\p
\v 11 Ákↄ̃nↄ kũ á de buri pãndenↄ ũ inaa gũn, à laasun lɛ́ á kunna yãa. Tↄ̃̀zↄ̃nadenↄ dì á sísi gyↄfↄrↄdenↄ, ama ń tↄ̃̀zↄ̃na de bisãsiri ↄgbɛ ũmɛ. 
\v 12 Gↄrↄ birea á kun Kirisi sari, á de gbɛ̃ zĩ̀tↄnↄ ũ Isarailanↄnɛ. Á baka kú Luda bàka kunna kũńwo kũ a lɛ́sɛnnɛnaaoo gũnlo. Á kú andunia gũn tãmaa sari ludadↄ̃naa sari. 
\v 13 Kirisi Yesu gũn tera, ákↄ̃nↄ kũ á zã̀ kũ Ludao yãnↄ a nai kãni kũ Kirisi aru gbãnao. 
\v 14 Àkũmɛ ó kunna kũ kↄ̃o nna ũ, à tò Yudanↄ kũ buri pãndenↄ gↄ̃̀ mɛ̀ dokↄ̃nↄ ũ. A mɛ̀ɛ gũn à ibɛrɛ kũ à da ń dagura bĩni ũ gbòro, 
\v 15 à Musa doka nà gui kũ a yãditɛnanↄ de à tó ń pla ń pínki gↄ̃ kãao gbɛ̃ dufu mɛ̀n do ũ. Lɛn à tò ò kɛ̀ kũ kↄ̃o nna lɛ. 
\v 16 À ibɛrɛ làka, à ń pla ń pínki kɛ̀ nna kũ Ludao mɛ̀ dokↄ̃nↄ pìi gũn a gana lía yãi. 
\v 17 À sù à kɛna nna kũ Ludao baaruu kpà ákↄ̃nↄ kũ á zã̀ kũ Ludaonↄnɛ kũ gbɛ̃ kũ ò kãni kãaonↄ dↄ. 
\v 18 Kirisi yãi ó pínki ó zɛ́ vĩ ò na De Ludai kũ a Nini dokↄ̃nↄ gbãnao.
\p
\v 19 Abire yãi á de gbɛ̃ zĩ̀tↄnↄ ke bòasunↄ ũ doro, a gↄ̃ bedenↄ ũ kũ Luda gbɛ̃nↄ, a ↄndenↄ ũmɛ. 
\v 20 Ákↄ̃nↄmɛ kpɛ́ kũ Luda bò ɛ̃ kũ zĩ̀rinↄ kũ annabinↄ nàaa ũ, akũsↄ̃ Kirisi Yesumɛ à ɛ̃pɛtɛgbɛ ũ. 
\v 21 A gũnn kpɛ́ pↄ́ sĩnda pínki dì kↄ̃ kũn, àdigↄ̃ gbã Luda kpɛ́ ũ Dikiri gũn. 
\v 22 A gũn ákↄ̃nↄ se, á de kpɛ́ pì bobↄnↄ ũ, ákↄ̃nↄmɛ Luda Nini kúki ũ.
\c 3
\s1 Pↄlu zĩkɛna buri pãndenↄ tɛ́
\p
\v 1 Abire mɛ́ à tò makũ Pↄlu, má de purusuna ũ Kirisi Yesunɛ ákↄ̃nↄ buri pãndenↄ yãi. 
\v 2 Ádi ma lákũ Luda a gbɛ̃kɛkɛnnɛna zĩ dàmɛnɛ mà kɛ á tɛ́roo? 
\v 3 Luda a asiriyã mↄ̀mɛnɛ, ma kɛ̃̀árɛ fíti kↄ̀. 
\v 4 Tó a a kyó kɛ̀, áni fↄ̃ à dↄ̃ lákũ ma wɛ́ kɛ̃̀ nà Kirisi asiriyã musu. 
\v 5 Luda dí yã pì o gbɛ̃kenɛ yãro, akũ tera sà à mↄ̀ a zĩ̀rinↄ kũ a annabinↄnɛ kũ a Nini gbãnao. 
\v 6 Yã kũ à utɛna yã pìn dí: Kirisi Yesu gũn baaru nna mana yãi buri pãndenↄ gↄ̃̀ Luda túbiblerinↄ ũ lɛɛlɛ kũ Yudanↄ, ò gↄ̃̀ kũńwo mɛ̀dokↄ̃nↄdenↄ ũ. Ń baka kú lɛ́ kũ Luda sɛ̀ɛ gũn. 
\v 7 Ma gↄ̃ baaru nna pìi kpàri ũ gba kũ Luda dàmɛnɛ, a gbãna tɛ́n zĩ kɛ ma gũn yãi. 
\v 8 Makũ kũ má kĩana Luda gbɛ̃nↄ tɛ́, Luda gba pìi dàmɛnɛ, akũ matɛn Kirisi aruzɛkɛ lakanasari baaru kpá buri pãndenↄnɛ, 
\v 9 matɛn asiriyã kũ Luda tɛn wɛtɛ gbɛ̃ sĩnda pínkinɛ bońnɛ gupuraa. Asiriyã pì utɛna Luda kũ à pↄ́ sĩnda pínki kɛ̀ kĩnaa zaa káaku, 
\v 10 akũ tera sà à tò kpatablerinↄ kũ ikode kũ ò kú musunↄ a ↄ̃ndↄ̃ buri dasinↄ dↄ̃̀ sↄsi gbɛ̃nↄ gãi. 
\v 11 Luda pↄyenyĩna kũ à kun zaa káaku pì lɛ́ pàpa Kirisi Yesu ó Dikiri gãi. 
\v 12 A gũn ó zɛ́ vĩ ò na Ludai kũ swɛ̃̀ɛo kpatɛna a náanikɛna yãi. 
\v 13 Abire yãi ma wɛ́ kɛ̀áwa, àsun tó á nɛ̀sɛ yaka wari kũ matɛn kɛ á musu yãiro. Á kpetana yãimɛ.
\s1 Kirisi yenyĩ
\p
\v 14 Abire yãi madì kútɛ De Ludanɛ. 
\v 15 A kĩnaa a bede kũ ò kú musu kũ zĩtɛonↄ ń tↄ́ lèn ń pínki. 
\v 16 Madì wɛ́ kɛa à á gba gbãna á nɛ̀sɛɛ gũn kũ a Nini gbãnao a aruzɛkɛ gakuride lɛ́n, 
\v 17 de Kirisi vutɛ á swɛ̃̀n a náani kũ átɛn kɛ yãi, á zĩnipɛtɛna gↄ̃ gbãna yenyĩ gũn, 
\v 18 de à le à a yenyĩ yàasa kũ a gbã̀nao kũ a leio kũ a lòkotooo gbá dↄ̃ kũ Luda gbɛ̃nↄ pínki, 
\v 19 de à le à a yenyĩ kũ oni fↄ̃ ò a lɛ́ dↄ̃ pínkiro dↄ̃, Luda papana pínki pɛkɛrɛáwa.
\p
\v 20 Luda zↄ̃kↄ̃! Ani fↄ̃ à kɛwɛrɛ de lákũ odì a wɛ́ kɛ ke odì a laasun lɛ́ nàla manamana kũ gbãna kũ àtɛn zĩ kɛ ó gũnwo. 
\v 21 Ògↄ̃ a tↄ́ kpá sↄsi gbɛ̃nↄ kũ Kirisi Yesuoo gũn wɛ̃̀ kũ wɛ̃̀ɛo ari gↄrↄ sĩnda pínki! Aami.
\c 4
\s1 Mɛ̀dokↄ̃nↄkɛnaa
\p
\v 1 Makũ kũ má de purusuna ũ Dikirinɛ, ma wɛ́ kɛ̀áwa, á kunna gↄ̃ de lákũ Luda á sísi àgↄ̃ de nà. 
\v 2 À kↄ̃ fↄ̃, àgↄ̃ yekↄ̃i zĩdabusanaa gũn kũ nɛ̀sɛyĩdao kũ mɛnao. 
\v 3 À wɛ́ tã àgↄ̃ lɛ́dokↄ̃nↄ kũ à bò Luda Nini kĩnaa vĩ bà kũ àdi á dↄkↄ̃a ũ. 
\v 4 Mɛ̀ mɛ̀n domɛ, akũsↄ̃ Nini pìi mɛ̀n domɛ. Lɛn tãmaa kũ Luda á sísiaa mɛ̀n do lɛ se. 
\v 5 Dikiri mɛ̀n do, akũsↄ̃ donyĩzɛ mɛ̀n do kũ da'itɛkɛna mɛ̀n doo. 
\v 6 Luda mɛ̀n domɛ ó pínki De ũ. Àkũ mɛ́ à iko vĩ ó baadia, àdigↄ̃ zĩ kɛ ó gbɛ̃ sĩnda pínki gũn, à kú kũ ó gbɛ̃ sĩnda pínkio.
\p
\v 7 Kirisi gbɛ̃kɛ kɛ̀ ó baadinɛ, lákũ à gba dàwɛrɛ nà lɛ́n. 
\v 8 Abire yãi à kɛ̃na Luda yãn ò pì:
\q1 Kũ à fùtɛ à tà musu, à dò zĩ̀zↄnↄnɛ arɛ,
\q1 à gba dà gbɛ̃nↄnɛ.
\m
\v 9 A futɛ à tana musu bire de deramɛɛ? Abire pì à kìpa ari zĩtɛ gɛ̃i gĩa. 
\v 10 Gbɛ̃ kũ à kìpaa pìimɛ gbɛ̃ kũ à fùtɛ à tà ludambɛ musumusu ũ, de à gu sĩnda pínki pa. 
\v 11 Àkũ mɛ́ à gbɛ̃kenↄ gbà zɛ́ ògↄ̃ de zĩ̀rinↄ ũ, gbɛ̃kenↄ annabinↄ, gbɛ̃kenↄ baarunnakparinↄ, gbɛ̃kenↄ pasutonↄ ke yãdannɛrinↄ, 
\v 12 de Luda gbɛ̃nↄ gↄ̃ kú a zĩ soru gũn, de Kirisi mɛ̀ gbãna kũ, 
\v 13 ari ó pínki ògↄ̃ gɛ́ ká Luda Nɛ́ náani dokↄ̃nↄ kɛnaaa a dↄ̃na dokↄ̃nↄ gũn, de ò gↄ̃ gbɛ̃ papananↄ ũ Kirisi kũ pↄ́ sĩnda pínki pɛ̀kɛrɛa zↄ̃kↄ̃ lɛ́n. 
\v 14 Tó lɛmɛ ónigↄ̃ de nɛ́ fíti kũ òdi ↄ̃ndↄ̃ kũ manafikio kɛńnɛ ò ń sãtɛnↄ ũ doro, kũ yã dufu dannɛna dì ń sɛ́ lán ĩa ke ísↄ̃ bà. 
\v 15 Oi, óni yãpura o kũ yenyĩo, ò gbã yã sĩnda pínki musu Kirisi kũ à de a mì ũ gũn. 
\v 16 A gũnn mɛ̀gu sĩnda pínki dì kↄ̃ kũn ò nakↄ̃a kũ tĩnↄ gbãnao, akũ mɛ̀gunↄ dì zĩ kɛ a zɛ́a, mɛ̀ɛ dìgↄ̃ gbã àgↄ̃ kara kũ yenyĩo.
\s1 Kunna zĩ kũ kunna dufuo
\p
\v 17 Abire yãi matɛn yã oárɛ kũ Dikiri tↄ́o, matɛni á gbao laakarii. Àsungↄ̃ kun lán kifiri kũ ń nɛ̀sɛfutakɛ dońnɛ arɛnↄ bàro. 
\v 18 Ń laasun ń kɛ́ yↄ̃nkↄ, ò zã̀ kũ wɛ̃̀ndi kũ Luda dì kpáḿmao, kũ ń wɛ́ sira, akũsↄ̃ ń sã gbãna yãi. 
\v 19 Ò nɛ̀sɛ vĩro, ò ń zĩda kpà wé'isariyãa, ò dà vãni buri sĩnda pínki kɛna ni vĩ. 
\v 20 Ákↄ̃nↄ sↄ̃, ádi Kirisi yã dada lɛro. 
\v 21 Yesu gũn a a yã mà, a yãpura kũ à vĩ dàda. 
\v 22 Ò òárɛ à ↄ gbarɛ á dà zĩ kũ à doárɛ arɛi, kũ à yàka á pↄ́nidɛna vãninↄ yãi. 
\v 23 Ò òárɛ à á nɛ̀sɛ litɛ á laasun gↄ̃ dufu, 
\v 24 áni dà dufu kũ Luda kɛ̀ lán a pↄ́ bà sɛ́, á kunna nigↄ̃ adona kunna yãpurade ũ yãzɛdekɛ gũn.
\p
\v 25 Abire yãi à ↄ gbarɛ manafiki yãi, á baadi gↄ̃ yãpura o a gbɛ̃dakenɛ, zaakũ mɛ̀dokↄ̃nↄdenↄmɛ ó ũ. 
\v 26 Tó á pↄ fɛ̃̀, àsun durunna kɛro. Àsun tó ifãntɛ̃ gɛ̃ kpɛ́n àgↄ̃ kpɛ́ pↄfɛ̃naro, 
\v 27 de àsun Ibilisi gba zɛ́ro yãi. 
\v 28 Gbɛ̃ kũ àdi kpãni o yã à kpãni tó. À wɛ́ tã à zĩ mana kɛ kũ a ↄo, de à pↄ́ le à bo takasidenↄnɛ. 
\v 29 Àsun tó yã vãni ke bo á lɛ́nlo, séde a zɛ́de kũ ani gbɛ̃ kara, à kɛ àre ũ gbɛ̃ kũ òtɛn manↄnɛ. 
\v 30 Àsun Luda Nini kũ à kú adona da pↄsiranlo. À de sèeda kũ Luda kɛ̀áwa ari á bona gↄrↄ zĩ ũ. 
\v 31 Àsun kɛ ĩni kũ gbɛ̃keoro. À pↄfɛ̃ tó kũ pɛ̃tɛ̃o kũ patana gbãnao kũ gbɛ̃sↄ̃sↄ̃naao kũ pãsĩkɛna buri sĩnda pínkio. 
\v 32 Àgↄ̃ gbɛ̃kɛ kɛ kũ kↄ̃o. Àgↄ̃ kↄ̃ wɛ̃nda gwa. À sùru kɛ kũ kↄ̃o lákũ Luda sùruu kɛ̀ kãáo nà Kirisi gũn.
\c 5
\s1 Kunna gupuran
\p
\v 1 Lákũ á de Luda nɛ́ yenyĩdenↄ ũ nà, à a ágba sɛ́. 
\v 2 Lákũ Kirisi yewái nà à gì a wɛ̃̀ndiii ó yãi sa'obↄ kũ a gbĩ nna Ludanɛ ũ, à tó yekↄ̃i doárɛ arɛ lɛ se.
\p
\v 3 Lákũ á de Luda gbɛ̃nↄ ũ nà, adi kũ ò pãpãkɛna ke dà vãni buri sĩnda pínki ke wãkũ yã ma á tɛ́ sero. 
\v 4 Wé'isariyã'ona kũ yã dↄ̀rↄ sari onaao kũ fàai bɛ̃̀nɛ bonaao mana kãáoro dↄ, sé sáabukɛna yã. 
\v 5 Àgↄ̃ dↄ̃ sãnsãn kũ pãpãkɛri ke kesↄ̃ dàvãnide ke kesↄ̃ wãkũde ke ni kpata kũ à bò Luda kĩnaa ble lɛɛlɛ kũ Kirisioro. Pↄ́ kũ gbɛ̃ dì a wãkũ kɛ gↄ̃̀ a dikiri ũmɛ. 
\v 6 Àsun tó gbɛ̃ke á sãtɛ kũ yã pã korioro. Yã bire takanↄ mɛ́ ani tó Luda pↄfɛ̃ kipa a yãdarisarinↄa. 
\v 7 Àsun tó á bàka gↄ̃ kú kũńworo. 
\v 8 Á kú gusiran yã, tera sà Dikiri gũn á kú gupuran. Àgↄ̃ kun gupura gbɛ̃nↄ ũ, 
\v 9 zaakũ gupura dì mana buri sĩnda pínki ińnɛ kũ yãzɛdeo kũ yãpurao. 
\v 10 À yã kũ àdi ká Dikirigu dada. 
\v 11 Á bàka súngↄ̃ kú kũ gusira yãkɛna kũ à karana vĩrooro. À yã birenↄ bobo gupurai. 
\v 12 Bee yã kũ gbɛ̃ pìnↄ dì kɛ asiri gũn ona bi wé'iyãmɛ. 
\v 13 Tó ò bò kũ yão gupurai, òdi a súsu dↄ̃, 
\v 14 zaakũ gupura dì tó ò pↄ́ sĩnda pínki e. Abire yãi òdi pi:
\q1 I'ori ǹ vu ǹ futɛ bona gan,
\q1 Kirisi ni gu punnɛ.
\p
\v 15 Àgↄ̃ á táa'ona dↄ̃ manamana. Àsungↄ̃ de yↄ̃nkↄnↄ ũro, sé ↄ̃ndↄ̃rinↄ. 
\v 16 Àgↄ̃ yã kũ Luda a zɛ́ bòárɛ kɛ, zaakũ gↄrↄ díkĩnanↄn vãni. 
\v 17 Abire yãi àsungↄ̃ de yↄ̃nkↄnↄ ũro, àgↄ̃ dↄ̃ lákũ Dikiri pↄyenyĩna de nà. 
\v 18 Àsungↄ̃ kú kũ wɛ̃dɛkɛnaaoro, àdi pãpã zĩḿmamɛ, ama à tó Luda Nini gↄ̃ zĩ kɛ á guu papana, 
\v 19 gbasa à fàai bo kũ kↄ̃o kũ zaburao kũ Luda tↄ́kpanaao kũ lɛ̀ kũ Luda Nini dì daárɛo. À lɛ̀ sí, à Dikiri tↄ́ kpá á swɛ̃̀ɛ gũn, 
\v 20 àgↄ̃ De Luda sáabu kɛ gↄrↄ sĩnda pínki yã sĩnda pínki gũn kũ ó Dikiri Yesu Kirisi tↄ́o. 
\v 21 À mì natɛkↄ̃nɛ Kirisi vĩna kũ á vĩ yãi.
\s1 Gↄ̃gbɛ̃ kunna kũ a nanↄo
\p
\v 22 Ákↄ̃nↄ nↄgbɛ̃nↄ, á baadi gↄ̃ mì natɛ a zãnɛ lákũ Dikirin átɛn kɛnɛ bà. 
\v 23 Zaakũ gↄ̃gbɛ̃mɛ nↄgbɛ̃ mì ũ, lákũ Kirisi de sↄsi gbɛ̃ kũ ò de a mɛ̀ ũnↄ mì ũ nà kũ ń Surabariio. 
\v 24 Lákũ sↄsi gbɛ̃nↄ dì mì natɛ Kirisinɛ nà, lɛmɛ se nↄgbɛ̃nↄ gↄ̃ mì natɛ ń zãnↄnɛ lɛ yã sĩnda pínki gũn.
\p
\v 25 Ákↄ̃nↄ gↄ̃gbɛ̃nↄ sↄ̃, á baadi gↄ̃ ye a nanↄi lákũ Kirisi ye sↄsi gbɛ̃nↄi nà, à gì a wɛ̃̀ndiii a yãi. 
\v 26 À gbã̀ bònɛ kũ ío a yã gãi de àgↄ̃ de a pↄ́ ũ, 
\v 27 de à ń kpan'arɛ kɛ kũ gakurio sãa sari yitorokũnaa sari mamberu sari gbãsĩ sari taari sari. 
\v 28 Lɛn à kũ̀ gↄ̃gbɛ̃ sĩnda pínki gↄ̃ ye a nanↄi lɛ lán a zĩda mɛ̀ɛ bà. Gbɛ̃ kũ à ye a nanↄi ye a zĩdaimɛ. 
\v 29 Gbɛ̃ke dì gí a zĩda mɛ̀ɛiro. Àdi pↄ́ble kpáa, àdi laakari dↄa lákũ Kirisi dì kɛ sↄsi gbɛ̃nↄnɛ nà, 
\v 30 kũ ó de a mɛ̀gunↄ ũ yãi. 
\v 31 Abire yãi gↄ̃gbɛ̃ ni bo a de kũ a dao bɛa, oni nakↄ̃a kũ a nanↄo, ń gbɛ̃nↄn pla ni gↄ̃ mɛ̀ do ũ. 
\v 32 Asiri zↄ̃kↄ̃ kú yã pìi gũn, ma è à de lɛ Kirisi dagura kũ sↄsi gbɛ̃ↄo. 
\v 33 Bee kũ abireo à de á yã ũ se dↄ. Á baadi gↄ̃ ye a nanↄi lán a zĩda bà. Nↄgbɛ̃ sↄ̃, à a zã yã da.
\c 6
\s1 Nɛ́nↄ yã
\p
\v 1 Ákↄ̃nↄ nɛ́nↄ, Dikiri gũn àgↄ̃ á de kũ á dao yã ma, zaakũ abire mɛ́ à mana. 
\v 2-3 À bɛ̀ɛrɛ lí á de kũ á daonɛ, de àgↄ̃ aafia à gì kɛ andunia gũn. Yã kũ Luda dìtɛ káaku kũ lɛ́sɛnaaon gwe.
\p
\v 4 Ákↄ̃nↄ denↄ sↄ̃, àsun á nɛ́nↄ pↄ yakaro. À ń tùtu kɛ à lɛ́ daḿma Yesude nɛ́gwana ũ.
\s1 Zↄ̀nↄ yã
\p
\v 5 Ákↄ̃nↄ zↄ̀nↄ, àgↄ̃ á andunia dí dikirinↄ yã ma kũ nɛ̀sɛdoo kũ vĩnao kũ lukanaao lákũ Kirisin átɛn kɛnɛɛ bà. 
\v 6 Àsun zĩ kɛńnɛ ń wɛ́ yãiro. Àgↄ̃ Luda pↄyenyĩna kɛ kũ yãpurao kũ ákↄ̃nↄmɛ Kirisi zↄ̀nↄ ũ yãi. 
\v 7 Àgↄ̃ zĩ kɛ kũ kokario lákũ Dikirin átɛn kɛnɛɛ bà, adi kɛ bisãsirinlo. 
\v 8 Àgↄ̃ dↄ̃ kũ Dikiri ni baadi yãmanakɛna fĩna bonɛ, zↄ̀ kesↄ̃ zĩdade.
\p
\v 9 Ákↄ̃nↄ dikirinↄ sↄ̃, àgↄ̃ kɛńnɛ lɛ se. À yã pãsĩ ońnɛna tó. Àgↄ̃ dↄ̃ kũ mↄ́kↄ̃nↄ kũ ákↄ̃nↄo pínki, á Dikiri kú musu, àdi yã kɛ gbɛ̃ke wɛ́ yãiro.
\s1 Gↄ̃kɛbↄ kũ Luda kpàwánↄ
\p
\v 10 Yã kũ à gↄ̃̀n dí: Àgↄ̃ gbãna Dikiri gũn kũ a iko gbãna zↄ̃kↄ̃ↄo. 
\v 11 À gↄ̃kɛbↄ kũ Luda kpàáwanↄ da pínki, de à le à zɛ gíngin à Ibilisi ↄ̃ndↄ̃ fↄ̃. 
\v 12 Zaakũ adi kɛ bisãsirinↄn ótɛn ↄsi ká kũńworo, sé nini vãni kũ ò kú musunↄ. Ò de andunia díkĩna gusira kíblerinↄ ũ kũ ń mìdenↄ kũ ń ikodenↄ. 
\v 13 Abire yãi à gↄ̃kɛbↄↄ pìnↄ sɛ́tɛ à da pínki, de à fↄ̃ à zɛ à gí gↄrↄ vãnia, gbasa à gↄ̃ zɛna gíngin a pínki kɛnaa gbɛra. 
\v 14 Àgↄ̃ zɛna gbãna, à yãpura dↄ á pi asa ũ, à yãzɛdekɛ da mↄ̀ uta ũ. 
\v 15 À kɛna nna kũ Ludao baaru nna kpá kyate ũ, de àgↄ̃ kú kũ soruo. 
\v 16 Àgↄ̃ ludanaanikɛna kũna sɛ̃gbako ũ gↄrↄ sĩnda pínki, de à fↄ̃ à Setan kà tɛ́denↄ dɛ pínki. 
\v 17 À surabana sɛ́ à kú mↄ̀ fùra ũ, àgↄ̃ Luda yã kũ à de a Nini fɛ̃nɛda ũ kũna. 
\v 18 Àgↄ̃ adua kɛ gↄrↄ sĩnda pínki, àgↄ̃ Luda kpányĩ gbɛka yã sĩnda pínki gũn kũ a Nini donnɛna arɛo. Àgↄ̃ itɛ̃ kɛ kũ mɛna zↄ̃kↄ̃ↄo, àgↄ̃ adua kɛ Luda gbɛ̃nↄnɛ ń pínki. 
\v 19 À adua kɛmɛnɛ dↄ, de tó matɛn yã o, Luda ma gba lɛ́ mà a baaru nna asiri ońnɛ vĩna sari. 
\v 20 Baaru nna pì yãi má de Luda wɛ́de kũ ò dà kpɛ́siran ũ. Àgↄ̃ adua kɛmɛnɛ, de mà baaru nna kpá vĩna sari lákũ à kũ̀ mà kpá nà.
\s1 Lɛ́zammanaa
\p
\v 21 Ó gbɛ̃ndo yenyĩde Tikiku, Dikiri zĩkɛri náanide ni ma baaru kpáárɛ pínki, de à le àgↄ̃ ma kunna dↄ̃ kũ pↄ́ kũ matɛn kɛo. 
\v 22 Ma a zĩ̀áwa de à ó kunna oárɛmɛ, á nɛ̀sɛ le à yĩda kũ.
\p
\v 23 Ó gbɛ̃nↄ, De Luda kũ Dikiri Yesu Kirisio á gba aafia, à á yena kↄ̃i karaárɛ kũ á ludanaanikɛnaao. 
\v 24 Luda gbɛ̃kɛ kɛ gbɛ̃ kũ ò ye ó Dikiri Yesu Kirisii lakanaa sarinↄnɛ ń pínki.