\id COL Colossians in Busa, Ross Jones
\ide UTF-8
\h KƆLƆSEDENƆ
\toc1 KƆLƆSEDENƆ
\toc2 KƆLƆSEDENƆ
\mt1 KƆLƆSEDENƆ
\c 1
\s1 Sáabukpana kũ aduakɛnaao
\p
\v 1 Makũ Pↄlu, Kirisi Yesu zĩ̀rii Luda pↄyenyĩnaa gũn kũ ó gbɛ̃ Timↄtio, ókↄ̃nↄ mɛ́ o takada dí kɛ̃̀ 
\v 2 ó gbɛ̃ náanide kũ ò kú adona Kirisi gũn zaa Kↄlↄsenↄnɛ. Luda ó De gbɛ̃kɛ kɛárɛ, à á gba aafiaa.
\p
\v 3 Gↄrↄ sĩnda pínki tó ótɛn adua kɛárɛ, odìgↄ̃ Luda ó Dikiri Yesu Kirisi De sáabu kpámɛ, 
\v 4 zaakũ o á Kirisi Yesu náanikɛna baaruu mà kũ yenyĩ kũ á vĩ ó gbɛ̃nↄnɛɛo ń pínki, 
\v 5 kũ á wɛ́ dↄ pↄ́ kũ à ditɛnaárɛ ludambɛi yãi. A yãpura yã mà zaa káaku baaru nna kũ o kpàárɛ gũn. 
\v 6 Baaru nna pì tɛn nɛ́ i àtɛn dagula andunia gũn pínki, lákũ à kɛ̀ á tɛ́ nà zaa gↄrↄ kũ a mà, akũ a Luda gbɛ̃kɛ súsu dↄ̃̀. 
\v 7 Ó gbɛ̃ yenyĩde ó zĩkɛri dake Ɛpafara mɛ́ à yã pìi dàárɛ ó gɛ̃nɛ ũ. Kirisi zĩkɛri náanidemɛ, 
\v 8 àkũ mɛ́ à yenyĩ kũ Luda Nini á káa òwɛrɛ.
\p
\v 9 Abire yãi zaa gↄrↄ kũ o á baaruu mà, odìgↄ̃ wɛ́ kɛárɛ Ludaa lakanaa sari, de à tó à a pↄyenyĩna dↄ̃ swáswa, a Nini á gba ↄ̃ndↄ̃ kũ wɛ́zɛ̃o pínki, 
\v 10 de àgↄ̃ kun lákũ Dikiri yei nà, á yã sĩnda pínki káagu, de á yã mana sĩnda pínki kɛna gↄ̃ dagula, á Luda dↄ̃na gↄ̃ kara, 
\v 11 de àgↄ̃ gbãna yã sĩnda pínki gũn a gbãna gakuride lɛ́n, de à pↄ́ sĩnda pínki fↄ̃ kũ mɛnao kũ pↄnnao, 
\v 12 de àgↄ̃ De Luda sáabu kpá, zaakũ à ó ká baka kũ à dìtɛ a gbɛ̃nↄnɛ gupuranwa. 
\v 13 À ó bó gusira ikon, à ó ká a Nɛ́ mɛ̀n do yenyĩde kpatan. 
\v 14 A gãin o gↄ̃ zĩdadenↄ ũ, ó durunna kɛ̃̀wá.
\s1 Kirisi de pↄ́ sĩnda pínkila
\q1
\v 15 Kirisi bi Luda kũ òdi e kũ wɛ́oro takamɛ,
\q1 Àkũmɛ daudu ũ Luda pↄ́kɛnanↄ tɛ́ pínki.
\q1
\v 16 Luda pↄ́ kũ à kú musu kũ zĩtɛoo kɛ̀ pínki a gãi,
\q1 pↄ́ kũ òdi enↄ kũ pↄ́ kũ òdi eronↄ,
\q1 kpatablerinↄn yá ke dikirinↄ
\q1 ke gbãnadenↄ ke ikodenↄ.
\q1 Pↄ́ sĩnda pínki bò a kĩnaamɛ,
\q1 akũsↄ̃ ò kun a pↄ́ ũ.
\q1
\v 17 À kun pↄ́ sĩnda pínki ã,
\q1 pↄ́ sĩnda pínki kun a gãimɛ.
\q1
\v 18 Àkũmɛ sↄsi gbɛ̃ kũ ò de a mɛ̀ ũnↄ mì ũ.
\q1 Àkũmɛ naana ũ, gàavu káaku ũ,
\q1 de à gↄ̃ pↄ́ sĩnda pínki mìde ũ.
\m
\v 19 Zaakũ à kà Ludagu a kíkɛ pínki pɛkɛrɛa. 
\v 20 À tò pↄ́ sĩnda pínki kɛ̀ kãao nna a gãi, pↄ́ kũ ò kú zĩtɛ ke musunↄn yá. A aru kũ à kↄ̀tɛ lía mɛ́ à sù kũ kɛna nna pìio.
\p
\v 21 A kɛ̃ Ludaa yã. A ibɛrɛnↄn á ũ á laasun kũ á vãnikɛnanↄ yãi, 
\v 22 akũ Luda tò a kɛ kãao nna Kirisi gana a bisãsirikɛmɛɛ gũn yãi sà, de à á kpan'arɛ kɛ gbãsĩ sari, mamberu sari, taari sari, 
\v 23 tó á zɛna gbãna á ludanaanikɛnaa gũn yĩgãnaa sari gíngin, tó ádi kɛ̃kↄ̃a kũ tãmaa kũ á vĩ baaru nna kũ a màa gũnworo. Ò baaru nna pìi kpà gbɛ̃ kũ Luda kɛ̀ zĩtɛ lanↄnɛ pínki kũ makũ Pↄlu, ma gↄ̃ a kpàri ũ.
\s1 Pↄlu zĩkɛna sↄsi gbɛ̃nↄnɛ
\p
\v 24 Tera sà matɛn pↄnna kɛ kũ wari kũ matɛn kɛ á yãiio. Wari kũ Kirisi kɛ̀ sↄsi gbɛ̃ kũ ò de a mɛ̀ ũnↄ yãin matɛn pↄ́ kũ à gↄ̃̀ papa ma mɛ̀ɛ gũn. 
\v 25 Luda zĩ dàmɛnɛ, akũ ma gↄ̃ sↄsi gbɛ̃ pìnↄ kpanyĩri ũ. À ma zĩ mà a yã oárɛ papana. 
\v 26 Asiriyã kũ à utɛna gbɛ̃nↄnɛ zaa káaku zaade Luda dí andunia kátɛro mɛ́ à bò Luda gbɛ̃nↄnɛ gupuraa sà, 
\v 27 Luda ye ò dↄ̃ lákũ asiriyã pì gakuri zↄ̃kↄ̃ nà buri pãndenↄ kĩnaa. Asiri pìn dí: Kirisi kú á gũn, akũ á wɛ́ dↄ gakuria. 
\v 28 A waazin odì kɛ gbɛ̃ sĩnda pínkinɛ, odì lɛ́ daoḿma, odì yã dao gbɛ̃ sĩnda pínkinɛ kũ ↄ̃ndↄ̃ sĩnda pínkio, de ò gɛ́ kũ baadio papana Luda arɛ Kirisi gũn. 
\v 29 Abire yãi matɛn zĩ kɛ, matɛn kokari kɛ kũ a gbãna kũ àtɛn zĩ kɛ ma gũnwo gbãnagbãna.
\c 2
\p
\v 1 Má ye àgↄ̃ kokari zↄ̃kↄ̃ kũ matɛn kɛárɛ dↄ̃, ákↄ̃nↄ kũ Laodiseadenↄ kũ gbɛ̃ kũ ódi wɛ́ sikↄ̃lɛronↄ pínki, 
\v 2 de ń swɛ̃̀ le à kpátɛ, ò lɛ́dokↄ̃nↄ kɛ kũ yenyĩo, de ń wɛ́ kɛ̃ swáswa, ògↄ̃ Luda asiriyã kũ à de Kirisi pì ũ dↄ̃. 
\v 3 A kĩnaan ↄ̃ndↄ̃ kũ dↄ̃naao aruzɛkɛ sĩnda pínki ùtɛn. 
\v 4 Matɛni abire oárɛ, de gbɛ̃ke sún á sãtɛ kũ lɛ́nna lɛ́kpakↄ̃anaaoro yãi. 
\v 5 Bee tó má kú kãáoro, ma nini kú kãáo, ma è átɛn yã kɛ a zɛ́a, akũsↄ̃ á Kirisi náanikɛna gbãna, akũ ma pↄ kɛ̀ nna.
\s1 Pↄ́ sĩnda pínki pɛkɛrɛmmana Kirisi gũn
\p
\v 6 Lákũ a Kirisi Yesu sì á Dikiri ũ nà, àgↄ̃ kú a gũn lɛ, 
\v 7 á zĩni gↄ̃ pɛtɛna a gũn. À kara a gũn, àgↄ̃ gbãna a náanikɛnaa gũn lákũ ò dàárɛ nà. Àgↄ̃ kú kũ sáabukpanaao manamana. 
\v 8 À laakari kɛ de gbɛ̃ke sún dↄ̃na gbãna kasaárɛ à á sãtɛ kũ bisãsiri ↄ̃ndↄ̃ pã korioro. Yã birenↄ dì bo futɛokarayãnↄ kũ andunia yãkɛnanↄ kĩnaamɛ, adi kɛ Kirisi kĩnaanlo. 
\v 9 Zaakũ Luda kíkɛ sĩnda pínki pɛ̀kɛrɛ Kirisia a bisãsirikɛmɛɛ gũn. 
\v 10 Kunna gbɛ̃ kũ à de gbãna sĩnda pínki kũ iko sĩnda pínkioo mìde ũ pìi gũn, a sĩnda pínki pɛ̀kɛrɛáwa. 
\v 11 A gũn a tↄ̃̀ↄ zↄ̃̀ à bò á dà zĩn. Adi kɛ tↄ̃̀ kũ bisãsiri dì zↄ̃ńnɛnlo, kũ Kirisi dì zↄ̃ńnɛmɛ. 
\v 12 Zaakũ da'itɛkɛnaa gũn ò á vĩ kãao, akũ a futɛ kãao, kũ a gbãna kũ Luda a fùtɛo bona gan náani kɛ̀ yãi. 
\v 13 Á de gɛ̀nↄ ũ yã Luda kĩnaa á taarinↄ kũ á dà zĩnↄ yãi, akũ Luda á gbá wɛ̃̀ndi dufu lɛɛlɛ kũ Kirisio, à sùruu kɛ̀ kũoo kũ ó taarinↄ pínki. 
\v 14 Luda ó taari takada kũ à ó dá yãn gògo, à sɛ̀ à pà lía. 
\v 15 Kirisi gana lía gbãna sì dikirinↄ kũ gbãnadenↄooa, à bò kũńwo sarapuraa à ń kpe bò, à ń kpan'arɛ kɛ̀ zĩ̀zↄnↄ ũ.
\p
\v 16 Abire yãi àsun tó gbɛ̃ke á taari e pↄ́blena ke pↄ́mina ke dikpɛ ke mↄ dufu bona ke kámmabogↄrↄ yã musuro. 
\v 17 Yã birenↄ pínki bi yã kũ ò pì ani su takamɛ, yã pìnↄ bↄkↄtɛnan Kirisi ũ. 
\v 18 Àsun tó gbɛ̃ kũ àdi a zĩda busa ɛ́kɛ pↄ́ ũ kũ àdi donyĩ kɛ malaikanↄnɛ á sãtɛ à á bo pↄ́ kũ á wɛ́ pɛ́anlo. Wɛ́gupu'ena yã mɛ́ àdigↄ̃ gbãna gbɛ̃ bire takanɛ, akũ àdi a zĩda bi pã a bisãsirikɛda laasunnↄ yãi. 
\v 19 À pɛna Kirisi kũ à de mì ũaro. Kirisi gũn mɛ̀gu sĩnda pínki dì kↄ̃ kũ, ò nàkↄ̃a kũ tĩnↄ gbãnao, mɛ̀ɛ pìi dìgↄ̃ gbã lákũ Luda ye à gbã nà.
\p
\v 20 Zaakũ a ga kũ Kirisio andunia yãkɛnanↄ musu, bↄ́yãin adì ń yãditɛnnɛnanↄ ma lán andunia gbɛ̃nↄ bàa? 
\v 21 Òdi pi, ǹsun adikĩna na n ↄĩro, ǹsun adikĩna í kɛro, ǹsun ↄ na adiaro. 
\v 22 Pↄ́ birenↄ pínki dì láka kũ ń anfãnikɛnaaomɛ. Bisãsiri yãdannɛnan abirenↄ ũ. 
\v 23 Yã birenↄ de lán ↄ̃ndↄ̃ yã bàmɛ, zaakũ òdi donyĩ yã tilasi dańnɛ kũ zĩdabusanaao kũ waridↄna ń zĩda mɛ̀ɛao. Bee kũ abireo àdi kpá ó dànↄnɛro.
\c 3
\s1 Kunna wɛ̃̀ndi dufu gũn
\p
\v 1 Lákũ a futɛ kũ Kirisio nà, à tó ludambɛ yã doárɛ arɛ, zaakũ gwen Kirisi vutɛna Luda ↄplai. 
\v 2 À tó á laasun gↄ̃ kú ludambɛ yãnↄa, àsungↄ̃ kú andunia pↄ́aro. 
\v 3 Zaakũ a ga, á wɛ̃̀ndi utɛna kũ Kirisio Luda gũn.
\p
\v 4 Lákũ Kirisi de á wɛ̃̀ndi ũ nà, tó à bò gupuraa, ákↄ̃nↄ se áni bo kãao kũ gakurio sà. 
\v 5 Abire yãi à andunia yã kũ ò kú á nɛ̀sɛɛ gũnnↄ dɛ: Pãpãkɛnaa, wé'iyã, mɛ̀futɛnaa, yã vãni nidɛna kũ wãkũuo. Pↄ́ kũ gbɛ̃ dì a wãkũ kɛ gↄ̃̀nɛ a dikiri ũmɛ. 
\v 6 Yã birenↄ yãin Luda ni pↄfɛ̃na kipa a yãmarisarinↄa. 
\v 7 Ákↄ̃nↄ se, á kú yã pìnↄ gũn yã, ò dòárɛ arɛ. 
\v 8 À ↄ gbarɛ yã dí takanↄi sà: Pↄfɛ̃naa, zukakanaa, nɛ̀sɛ pãsĩ, gbɛ̃sↄ̃sↄ̃na kũ yãpãpã'onaao. 
\v 9 Àsungↄ̃ ɛ́kɛ tokↄ̃nɛro, zaakũ a á dà zĩ kũ a yãkɛnanↄ gòala, 
\v 10 a a dufu sɛ̀ kũ à kɛ̀kɛ àtɛn dufu kũ de à gↄ̃ lán a Kɛ̀ri pↄ́ bà. 
\v 11 Gwe Yudanↄ kũ buri pãndenↄ dokↄ̃nↄmɛ kũ tↄ̃̀zↄ̃nadenↄ kũ gyↄfↄrↄdenↄ kũ sɛ̃̀ntɛ gbɛ̃nↄ kũ wɛ́siradenↄ kũ zↄ̀nↄ kũ zĩdadenↄ. Kirisimɛ ń pínki ũ, à kú ń gũn ń pínki.
\p
\v 12 Abire yãi, lákũ Luda á sɛ́ a gbɛ̃ yenyĩdenↄ ũ nà, dà kũ ò de à daáwanↄn dí: Wɛ̃nda, gbɛ̃kɛ, zĩdabusanaa, busɛkɛ kũ mɛnao. 
\v 13 À kↄ̃ fↄ̃. Tó yãke sù à á ká kũ kↄ̃o, à sùru kɛ kũ kↄ̃o. Lákũ Dikiri sùru kɛ̀ kãáo nà, à kɛ kũ kↄ̃o lɛ se. 
\v 14 A pínki musu à yenyĩ kũ àdi yã pìnↄ kakara swáswa daáwa. 
\v 15 À tó aafia kũ à bò Kirisi kĩnaa kí ble á swɛ̃̀ɛ gũn, zaakũ kunna kũ kↄ̃o aafiaan Luda á sísia mɛ̀dokↄ̃nↄdenↄ ũ. Àgↄ̃ Luda sáabu kpá. 
\v 16 À tó Kirisi yã vutɛki le á nɛ̀sɛn manamana. À yã dakↄ̃nɛ, à lɛ́ dakↄ̃a kũ ↄ̃ndↄ̃ sĩnda pínkio. Sáabukpanaa gũn à lɛ̀ sí Ludanɛ á swɛ̃̀ɛ gũn kũ zaburao kũ tↄ́kpanaao kũ donyĩ lɛ̀ nↄ. 
\v 17 Pↄ́ kũ átɛn kɛ ke kũ átɛn o pínki, à kɛ kũ Dikiri Yesu tↄ́o, à De Luda sáabu kpá a gãi.
\s1 Luda gbɛ̃nↄ kunna kũ kↄ̃o
\p
\v 18 Ákↄ̃nↄ nↄgbɛ̃nↄ, á baadi gↄ̃ mì natɛ a zãnɛ. Lɛn à kũ̀ à kɛ Dikiri gũn lɛ. 
\v 19 Gↄ̃gbɛ̃nↄ, á baadi gↄ̃ ye a nanↄi. Àsungↄ̃ pãsĩ kũńworo. 
\v 20 Nɛ́nↄ, à á de kũ á dao yã ma yã sĩnda pínki gũn, zaakũ abire mɛ́ àdi ká Dikirigu. 
\v 21 Denↄ, àsun á nɛ́nↄ nɛ̀sɛ futɛ à ń pↄ yakaro. 
\v 22 Zↄ̀nↄ sↄ̃ à á andunia dikirinↄ yã ma yã sĩnda pínki gũn. Àsun zĩ kɛńnɛ ń wɛ́ yãiro. À zĩ kɛńnɛ kũ nɛ̀sɛ mɛ̀n doo, zaakũ Dikiri vĩnakɛrinↄn á ũ. 
\v 23 Yã kũ átɛn kɛ pínki, àgↄ̃ kɛ kũ yãpurao, lándↄ̃ Dikirin átɛn kɛnɛ bà, adi kɛ bisãsirinlo. 
\v 24 Àgↄ̃ dↄ̃ kũ áni Dikiri láada le á baka ũ. Dikiri Kirisin átɛn doi. 
\v 25 Yãvãnikɛri ni a vãni gbɛ̀ le. Luda dì gbɛ̃ke wɛ́ gwaro.
\c 4
\p
\v 1 Ákↄ̃nↄ dikirinↄ, à á zↄ̀nↄ gwa a zɛ́a súsu. Àgↄ̃ dↄ̃ kũ ákↄ̃nↄ se á Dikiri vĩ musu.
\p
\v 2 À á zĩda kpá aduakɛnaaa kũ itɛ̃kɛnaao kũ sáabukpanaao. 
\v 3 À wɛ́ kɛwɛrɛ Ludaa dↄ, à zɛ́ bowɛrɛ ò a yã waazi kɛ, ò Kirisi asiriyã ońnɛ. Abire yãin ò ma dai kpɛ́siran. 
\v 4 À wɛ́ kɛmɛnɛ mà yã pì o swáswa, lákũ à kũ̀ mà o nà. 
\v 5 Àgↄ̃ á zĩda kũna dↄ̃ Yesusaridenↄ tɛ́ kũ ↄ̃ndↄ̃o. Àgↄ̃ yã kũ Luda a zɛ́ bòárɛ kɛ a gↄrↄa. 
\v 6 À tó á lɛ́gbɛ gↄ̃ nna àgↄ̃ karana vĩ, de àgↄ̃ dↄ̃ lákũ áni yã lí baadia nà.
\s1 Lɛ́zammanaa
\p
\v 7 Ó gbɛ̃ yenyĩde Tikiku ni ma baaru kpáárɛ pínki. Àkũmɛ zĩkɛri náanide ũ, ó zↄ̀bleri dakemɛ Dikiri zĩ gũn. 
\v 8 Abire yãimɛ matɛni a zĩáwa de à ó kunna oárɛ, à laakari le à kpátɛ.
\p
\v 9 Á gbɛ̃ndo Ɔnɛsimu, ó gbɛ̃ yenyĩde náanide tɛn su kãao. Oni pↄ́ kũ ó kú a gũn gu dia oárɛ pínki. 
\v 10 Arisitaku kũ ó kú lɛɛlɛ kpɛ́siran fↄ kpàáwa kũ Baanaba dakũna Maakuo. Ò Maaku yã òárɛ kↄ̀. Tó à sù á kĩnaa, à gbãnakɛ kpánɛ. 
\v 11 Yesu kũ òdi pinɛ Yusutu fↄ kpàáwa dↄ. Yuda kũ ótɛn kpata kũ à bò Luda kĩnaa zĩ kɛ lɛɛlɛnↄ lɛ́n gwe. Ma laakari kpatɛna kũńwo. 
\v 12 Á gbɛ̃ndo Ɛpafara, Kirisi Yesu zↄ̀bleri fↄ kpàáwa. Àdigↄ̃ ania kɛ kũ aduakɛnaárɛo gↄrↄ sĩnda pínki, de à le à kàsara kú àgↄ̃ papana Luda pↄyenyĩnaa gũn. 
\v 13 Mani fↄ̃ mà a sèeda kɛ kũ àtɛn zĩ kɛárɛ manamana, ákↄ̃nↄ kũ Laodiseadenↄ kũ Iɛrapↄlidenↄ. 
\v 14 Ó likita yenyĩde Luku kũ Demasio fↄ kpàáwa. 
\v 15 À fↄ kpá ó gbɛ̃ kũ ò kú Laodiseanↄa kũ Nimfao kũ sↄsi gbɛ̃ kũ òdi kↄ̃ kakara a bɛanↄ. 
\v 16 Tó a takada dí kyó kɛ̀, à kpá Laodisea sↄsi gbɛ̃nↄa ò a kyó kɛ, gbasa à ń pↄ́ kyó kɛ se. 
\v 17 À o Akipunɛ, à laakari dↄ Dikiri zĩ kũ ò dànɛɛa, à a mì dɛ. 
\v 18 Makũ Pↄlu makũ mɛ́ ma yã dí kɛ̃̀ kũ ma zĩda ↄo, ma fↄ kpàáwa. À tó ma kunna kpɛ́siran yã gↄ̃ dↄágu. Luda gbɛ̃kɛ kɛárɛ.