\id 2TI 2 Timothy in Busa, Ross Jones
\ide UTF-8
\h 2 TIMƆTI
\toc1 TIMƆTI TAKADA PLADE
\toc2 2 TIMƆTI
\mt1 TIMƆTI TAKADA PLADE
\c 1
\s1 Pↄlu tɛ́kpana Timↄtigu
\p
\v 1 Makũ Pↄlu, Kirisi Yesu zĩ̀rii Luda pↄyenyĩnaa gũn wɛ̃̀ndi kũ à a lɛ́ sɛ̀ Kirisi Yesu gũn yã musu, 
\v 2 makũ mɛ́ ma takada dí kɛ̃̀nnɛ, ma nɛ́ yenyĩde Timↄti. De Luda kũ ó Dikiri Kirisi Yesuo gbɛ̃kɛ kɛnnɛ kũ sùruuo, à n gba aafiaa.
\p
\v 3 Ma sáabu kɛ̀ ma dizinↄ Ludanɛ kũ madì doi kũ nɛ̀sɛpurao, zaakũ n yã dìgↄ̃ dↄmagu lakanaa sari ma aduakɛna gwãani kũ fãnantɛ̃oo gũn. 
\v 4 Tó wɛ́tɛ̃ kũ à bòmma yã dↄ̀magu, madì n bɛgɛ kɛmɛ, madìgↄ̃ ye ò wɛ́ sikↄ̃lɛ, de ma pↄnna kɛ zↄ̃kↄ̃. 
\v 5 N ludanaanikɛna kũ nɛ̀sɛ mɛ̀n doo yã dↄmagu. N dai Loisi kũ n da Yunisio Luda náani kɛ̀ lɛ se, akũsↄ̃ má dↄ̃ sãnsãn kũ ntɛn kɛ lɛ se.
\p
\v 6 Abire yãi matɛn dↄngu, ǹ futɛ ǹ zɛ kũ gba kũ Luda dànnɛo gↄrↄ kũ ma ↄ nàmma, 
\v 7 zaakũ Nini kũ àdi ó gba gbãna kũ yenyĩo kũ zĩdakũnadↄ̃naaon Luda kpàwá, adi kɛ nini vĩnadenlo. 
\v 8 Abire yãi ǹsun wé'i kũ kũ ó Dikiri yã onnɛnaaoro. Ǹsun wé'i kũ kũ ma yãoro, makũ kũ ò ma da kpɛ́siran Kirisi yãi. Ǹ wari kũ òdi kɛ a baaru nna kpana yãi kɛ kũmao kũ Luda gbãnao. 
\v 9 Àkũ mɛ́ à ó sura bà, à ó sísi o gↄ̃ a pↄ́ ũ. Adi kɛ yã kũ o kɛ̀ yãinlo, a zĩda pↄyenyĩna yãimɛ kũ gbɛ̃kɛ kũ à kɛ̀wɛrɛo zaade gↄrↄ dí naaro. 
\v 10 Gbɛ̃kɛ pìi bò gupuraa ó Surabari Kirisi Yesu pì sunaa gũn sà. À ga gbãna kàkatɛ, à wɛ̃̀ndi kũ mɛ̀vãnasarioo bòwɛrɛ gupuraa a baaru nna kũ òdi kpá gũn. 
\v 11 Luda ma ditɛ a zĩ̀ri ũ, de mà baaruu pìi kpàkpa kɛ mà a yã dańnɛ. 
\v 12 Abire yãin matɛn wari dí kɛi, ama wé'i dì ma kũro, zaakũ má gbɛ̃ kũ ma a náani kɛ̀ dↄ̃, akũsↄ̃ má dↄ̃ sãnsãn kũ ani fↄ̃ à yã kũ à nàmɛnɛ ma ↄĩ dãkpã ari a sugↄrↄ zĩ. 
\v 13 Ǹgↄ̃ yã kũ n mà ma lɛ́n ari a zĩniaa pì kũna yãzɛdedannɛna ágba ũ kũ ludanaanikɛnaao kũ yenyĩ kũ ó vĩ Kirisi Yesu gũnwo. 
\v 14 Ǹ yã mana kũ Luda nànnɛ n ↄĩ kũ gbãna kũ a Nini kũ à kú ó gũn gbãnao.
\p
\v 15 Ń dↄ̃ kũ Asia bùsudenↄ ma zukũna ń pínki. Figɛlu kũ Ɛmↄgɛnɛo kú ń tɛ́. 
\v 16 Dikiri wɛ̃nda dↄ̃ Ɔnɛsifↄru bedenↄnɛ! Zaakũ à sù à ma nɛ̀sɛ kpatɛnamɛnɛ lɛ́ vĩro, adi wé'i kũ kũ ma dana kpɛ́siran yãoro. 
\v 17 Kũ à sù Romu gↄ̃̀nↄ, à ma wɛtɛ ari à gɛ̀ɛ à bòma. 
\v 18 Dikiri wɛ̃nda dↄ̃nɛ yãkpatɛkɛgↄrↄ zĩ. Ń kpányĩ zↄ̃kↄ̃ kũ à kɛ̀mɛnɛ zaa Ɛfesu yã dↄ̃ sãnsãn.
\c 2
\s1 Kirisi Yesu zĩ̀kari mana
\p
\v 1 Mↄkↄ̃n sↄ̃ ma nɛ́, ǹgↄ̃ gbãna kũ gbɛ̃kɛ kũ Luda vĩ kũoo Kirisi Yesu gũnwo. 
\v 2 Yã kũ n mà ma ò pari wára, ǹ na gbɛ̃ náanidenↄnɛ ń ↄĩ, kũ oni fↄ̃ ò dada gbɛ̃ pãndenↄnɛ. 
\v 3 Ǹ warikɛna fↄ̃ kũoo Kirisi Yesu zĩ̀kari mana ũ. 
\v 4 Andunia yã bↄkↄtɛnaa dì do zĩ̀kari kũ à kú zĩ̀lannɛ arɛro, de a yã ká a dikirigu yãi. 
\v 5 Bàkpakũsũri sↄ̃, tó adi bàa lɛ́ a zɛ́aro, ani zĩ̀blena fùra lero. 
\v 6 À kũ̀ búbari kũ à zĩ gbãna kɛ̀ a baka sɛ́ káaku. 
\v 7 Ǹ laasun lɛ́ yã kũ ma òo pìnↄa, zaakũ Dikiri ni n gba ↄ̃ndↄ̃ a pínki gũn.
\p
\v 8 Ǹ dↄn kũ Yesu Kirisi bi Dauda burimɛ, akũsↄ̃ à vù bona gan. Baaru nna kũ madì kpán gwe. 
\v 9 Abire yãin matɛn wari kɛ. Ò mↄ̀ↄ kàma lán dàkɛrii bà, ama Luda yã dí sí mↄ̀ káaro. 
\v 10 Abire yãi madì yã sĩnda pínki fↄ̃ gbɛ̃ kũ Luda ń sɛ́nↄ yãi, de mↄ́kↄ̃nↄ se Luda ń sura ba, ò gakuri kũ àdi lákaro le kunna Kirisi Yesu gũn. 
\v 11 Yã díkĩna bi yãpuramɛ:
\q1 Tó o ga kãao, ónigↄ̃ kú kãao.
\q1
\v 12 Tó o mɛna fↄ̃̀, óni kí ble kãao.
\q1 Tó o ledi kpài, ani ledi kpáwái se.
\q1
\v 13 Tó ó náani vĩro, à kpɛ́ náani vĩ,
\q1 zaakũ ani we à ledi kpá a zĩdairo.
\s1 Dikiri zĩkɛri mana kũ lɛ́kpakↄ̃anaaoro
\p
\v 14 Ǹ yã pìnↄ dↄ n gbɛ̃nↄgu, ǹ nańnɛ Ludai òsun lɛ́kpakↄ̃ana kɛ yãnↄ musuro. À àre vĩro, àdi gbɛ̃ kũ òtɛn manↄ yakamɛ. 
\v 15 Ǹ kokari kɛ de Luda n sáabu kpá, zĩkɛri kũ àdi yã yãpura wɛ̃kↄ̃ańnɛ súsu ũ, kũ wé'i dì a kũ a zĩ yã musuro. 
\v 16 Ǹ pã yãbↄtɛna pã kũ àdi kↄ̃ sɛ́ kũ Luda yãoronɛ. Àdi gbɛ̃nↄ ludayãdanasari karańnɛmɛ, 
\v 17 akũ yã kũ òdi dańnɛ dì dańla lán fↄ̃nna bà. Imɛnɛu kũ Filɛtuo kú ń tɛ́. 
\v 18 Ò kɛ̃̀ yãpuraa, òdi pi ò fùtɛ bona gan kↄ̀, òdi gbɛ̃kenↄ ludanaanikɛnaa yakańnɛ. 
\v 19 Bee kũ abireo ɛ̃ kũ Luda kpàtɛ zɛna gbãna, ò yã díkĩna kɛ̃̀a: Dikiri gbɛ̃ kũ ò de a pↄ́ ũnↄ dↄ̃. Gbɛ̃ kũ àdi Dikiri sísi mì kɛ̃ yã vãnia.
\p
\v 20 Ɔn da dìgↄ̃ pↄ́nↄ vĩ dasi. Ò a kenↄ kɛ̀ kũ wuraao kũ andurufuuo yãtikisikɛbↄ ũ, akũsↄ̃ ò a kenↄ kɛ̀ kũ lío kũ gbĩ̀io yãfitikɛbↄ ũ. 
\v 21 Tó gbɛ̃ ↄ bↄ̀tɛ yã bɛ̀ɛrɛsari gũn, ani gↄ̃ yãtikisikɛbↄ ũ, anigↄ̃ anfãni vĩ Dikirinɛ, anigↄ̃ kú adona yãmanakɛna pínki soru gũn. 
\v 22 Ǹ bàa sí kɛfɛnna pↄ́nidɛnanↄnɛ, ǹ tó manakɛna kũ ludanaanikɛnaao kũ yenyĩo kũ kunna kũ kↄ̃o nnao donnɛ arɛ lɛɛlɛ kũ gbɛ̃ kũ òdi Dikiri sísi kũ nɛ̀sɛpuraonↄ. 
\v 23 Ǹ ↄ bↄtɛ mìsari lɛ́kpakↄ̃ana kũ à dↄ̃na ke vĩron. Ń dↄ̃ kũ àdi fìti da. 
\v 24 À mana Dikiri zↄ̀bleri gↄ̃ fìti vĩro. A nɛ̀sɛ gↄ̃ do kũ gbɛ̃ sĩnda pínkio, yãdannɛri mana kũ àdi gbɛ̃ fↄ̃ ũ, 
\v 25 à gbɛ̃ kũ òdi a yã síronↄ gba laakari busɛbusɛ. Òdigↄ̃ dↄ̃ro ke Luda ni fↄ̃ à ń gba zɛ́ ò nɛ̀sɛ litɛ ò yãpura sí, 
\v 26 ò bo Ibilisi kũ à ń kũ à ń dá a pↄyenyĩnaa gũn bàn, ń laakari suḿma.
\c 3
\s1 Bisãsirinↄ yãkɛna gↄrↄ kpɛdenↄa
\p
\v 1 Ǹgↄ̃ dↄ̃ kũ gↄrↄ kpɛdenↄ nigↄ̃ pãsĩ. 
\v 2 Gbɛ̃nↄ zĩda yã ni dońnɛ arɛ, ↄgↄ ni ń swɛ̃̀ ble. Onigↄ̃ de karambaanidenↄ ũ, zĩdabirinↄ, gbɛ̃sↄ̃sↄ̃rinↄ, de kũ dao yãdarisarinↄ, guturunↄ, ludayãdarisarinↄ, 
\v 3 gbɛ̃yãkɛrisaridenↄ, sùrusaridenↄ, gbɛ̃yakarinↄ, fayasaridenↄ, aniapãsĩdenↄ, yã mana ibɛrɛnↄ, 
\v 4 bonkpɛdenↄ, laasunsaridenↄ, yↄ̃̀gↄ̃denↄ. Onigↄ̃ ye pↄnnakɛnaai de Luda yãla. 
\v 5 Òdi donyĩ kɛ, ama ò ye a gbãnairo. Ǹ kɛ zã̀ kũ gbɛ̃ bire takanↄ. 
\v 6 Ń gbɛ̃kenↄ dì gɛ̃ nↄgbɛ̃ kũ òdi mì gbãkɛnnɛronↄi, ò ń fu kũ lɛ́o. Durunna sàa dà nↄgbɛ̃ pìnↄn, dà vãni mɛ́ à gↄ̃̀ńnɛ, 
\v 7 òdigↄ̃ yã dada gↄrↄ sĩnda pínki, ama òdi fu yãpura kũnaa. 
\v 8 Lákũ Yanɛ kũ Yambɛrɛsio bò Musa kpɛ nà, lɛn gbɛ̃ pìnↄ dì bo yãpura kpɛ lɛ. Ń laasun lɛ́kpɛrɛmɛ, ó donyĩzɛ gũn pↄ́ ginyĩnanↄmɛ. 
\v 9 Ò gɛna arɛ vĩ doro, zaakũ gbɛ̃ sĩnda pínki ń yↄ̃nkↄkɛ dↄ̃, lákũ ò Yanɛ kũ Yambɛrɛsio pↄ́ dↄ̃̀ nà.
\s1 Luda yã àree
\p
\v 10 Mↄkↄ̃n sↄ̃, ń tɛ́mai. Ń ma kunna dↄ̃ kũ ma yãdannɛnaao kũ yã kũ matɛn pɛ́aao kũ ma ludanaanikɛnaao kũ ma mɛnakɛo kũ ma yenyĩo kũ ma zɛna gbãnao 
\v 11 kũ wɛ́ kũ ò tã̀mao kũ wari kũ ma kɛ̀ɛo. Ń yã kũ à ma le Antiↄku kũ Ikↄniuo kũ Lisitirao dↄ̃ kũ wɛ́tãmmana zↄ̃kↄ̃ kũ ma fↄ̃̀ↄo. Ama Dikiri ma bo a sĩnda pínki gũn. 
\v 12 Gbɛ̃ kũ ò ye ògↄ̃ kun ludayãmarinↄ ũ Kirisi Yesu gũnnↄ ni wɛ́tãmmana le. 
\v 13 Gbɛ̃ vãninↄ kũ manafikidenↄ vãnikɛna nigↄ̃ karamɛ. Oni gbɛ̃nↄ sãtɛ, mↄ́kↄ̃nↄ se onigↄ̃ sãtɛna. 
\v 14 Mↄkↄ̃n sↄ̃, ǹ zɛ kũ yã kũ n dàda n sì yãpura ũo. Ń gbɛ̃ kũ ò dàdannɛnↄ dↄ̃, 
\v 15 zaakũ ń Luda yã dↄ̃ zaa n nɛ́fitikɛgↄrↄa. Ani fↄ̃ à n gba ↄ̃ndↄ̃ à n ká Kirisi Yesu náanikɛna kũ àdi ń sura baa. 
\v 16 Yã kũ à kú Luda yãn bò Luda kĩnaa pínkimɛ. À àre vĩ, zaakũ àdi yãpura dańnɛ, àdi ń ɛ́kɛ káńnɛ ń ↄĩ, àdi ń gba laakarii, àdi lɛ́ daḿma yãkɛna a zɛ́aa gũn, 
\v 17 de Luda gbɛ̃ sorukɛna ma yãmanakɛna sĩnda pínki zɛ́ gũn.
\c 4
\p
\v 1 Ma nannɛ Ludai kũ Kirisi Yesu kũ ani ɛra à su à kpata ble à yãkpatɛ kɛ kũ gbɛ̃ bɛ̃nɛnↄ kũ gyãwãndenↄo, 
\v 2 ǹ Luda yã waazi kɛ. À zɛ́ kɛ̀ kesↄ̃ adi kɛro, ǹgↄ̃ kúo. Ǹ yã ditɛńnɛ, ǹ kpãkɛ̃ńyĩ, ǹ lɛ́ daḿma, ǹ yã dańnɛ kũ mɛna zↄ̃kↄ̃ↄo. 
\v 3 Zaakũ gↄrↄke ni su kũ gbɛ̃nↄ ni we ò sã kpá Luda yãzɛdedannɛnaairo. Oni yãdannɛrinↄ kakarańyĩ ń zĩda pↄyeinaaamɛ, de ò yã kũ à kàńgu dańnɛ. 
\v 4 Oni ń kↄ̀kↄtↄ zu yãpuranɛ ò arɛ dↄ garanↄa. 
\v 5 Mↄkↄ̃n sↄ̃, ǹgↄ̃ laakari vĩ yã sĩnda pínki musu. Ǹ wari fↄ̃, ǹ baarunnakpari kɛna kɛ, ǹ n zĩ lɛ́ papa.
\s1 Pↄlu kunna ga lɛ́i zaa Romu
\p
\v 6 Ma gↄrↄ pàpa kↄ̀, oni ma aru kↄ́tɛ sa'o'i ũ tera. 
\v 7 Ma ↄsi mana kà, ma bàa lɛ̀ ma bↄtɛ. Má Yesu yã kũna ma a lɛ́ pàpa. 
\v 8 Kunna mana fùra ditɛna, àtɛni ma dã sà. Dikiri yãkpatɛkɛri mana mɛ́ ani kúmɛnɛ yãkpatɛkɛgↄrↄ zĩ. Adi kɛ makũmɛ ma adoro, kũ gbɛ̃ kũ ò ye a sunaainↄ ń pínkimɛ.
\p
\v 9 Ǹ zɛ́ wɛtɛ ǹ su ma kĩnaa likalika. 
\v 10 Demasi ma ton à tà Tɛsalonika, kũ à ye anduniai yãi. Kɛrɛsɛnsi tà Galatia bùsun, akũsↄ̃ Titu tà Dalamatia bùsun. 
\v 11 Luku mɛ́ à gↄ̃̀ kũmao ado. Ǹ Maaku sɛ́ à mↄ́ lɛɛlɛ, zaakũ àdi kpámai zĩ gũn manamana. 
\v 12 Ma Tikiku gbàrɛ Ɛfesu. 
\v 13 Tó ntɛn su, ǹ ma utagyaba kũ ma tò Kaapu bɛa zaa Toroasi sɛ́ ǹ suomɛnɛ kũ ma takadanↄ, atɛ̃nsa a kũ ò kɛ̀ kũ báraonↄ.
\p
\v 14 Alɛsanda sia yã vãni kɛ̀mɛnɛ manamana. Dikiri ni yã kũ à kɛ̀ɛ pì fĩna bonɛ. 
\v 15 Ǹ laakari kɛi, zaakũ à bò ó yã kpɛ pãsĩpãsĩ. 
\v 16 Yãkpatɛkɛna kũmao káaku gũn gbɛ̃ke dí zɛ kũmaoro, ò ma ton ń pínki. Luda sún ń yã pì daro. 
\v 17 Dikiri zɛ̀ kũmao à ma gba gbãna, akũ ma zɛ́ lè ma waazi kɛ̀ ma a lɛ́ pàpa, buri pãndenↄ mà ń pínki. À ma bo músu lɛ́i. 
\v 18 Dikiri ni ma bo yã vãni gũn pínki, ani ma sura ba ari mà gɛ́ káo a kpatan musu. Àkũ mɛ́ à gakuri vĩ gↄrↄ sĩnda pínki, aami.
\s1 Lɛ́zammanaa
\p
\v 19 Ǹ fↄ kpá Pirisila kũ Akilaooa kũ Ɔnɛsifↄru bedenↄ. 
\v 20 Erasatu gↄ̃̀ Kↄrinti. Ma Torofimu tò kũ gyão Milɛtu. 
\v 21 Ǹ zɛ́ wɛtɛ ǹ su ari bunsirɛ gↄ̃ ká. Yubulu kũ Pudɛnio kũ Linuo kũ Kalaudiao kũ ó gbɛ̃nↄ pínki fↄ kpàmma. 
\v 22 Dikiri gↄ̃ kú kũnwo. À gbɛ̃kɛ kɛárɛ.