\id 2PE 2 Peter in Busa, Ross Jones
\ide UTF-8
\h 2 PITA
\toc1 PITA TAKADA PLADE
\toc2 2 PITA
\mt1 PITA TAKADA PLADE
\c 1
\s1 Yãpurakpana sísina kũ Luda ó sísia
\p
\v 1 Makũ Simↄ Pita, Yesu Kirisi zↄ̀blerii, a zĩ̀rii, makũmɛ ma takada dí kɛ̃̀ gbɛ̃ kũ ó Luda ó Surabari Yesu Kirisi ń gbá zɛ́ ò a náani kɛ̀ lán ó bà à manakɛ gãinↄnɛ. 
\v 2 Gbɛ̃kɛ kũ aafiaao gↄ̃ papanaáwa Luda kũ ó Dikiri Yesuo dↄ̃naa gũn.
\p
\v 3 Luda ó sɛ́ ògↄ̃ kú a gakuri kũ a manakɛo gũmmɛ, à tò ó a dↄ̃, akũ a Ludakɛgbãna ó gbá pↄ́ kũ à kũ̀ ògↄ̃ vĩ, de ó kunna le à kɛ lɛɛlɛ kũ a yão. 
\v 4 Lɛn à yã zↄ̃kↄ̃ bɛ̀ɛrɛde kũ à a lɛ́ sɛ̀wɛrɛnↄ kɛ̀ lɛ, de a yãi ò bo andunia dà vãni kũ àdi ń yaka gũn ò Luda kunna taka sɛ́. 
\v 5 Yã bire yãi à kokari kɛ manamana, à Luda náani kɛ manakɛnaa gũn, à yã mana kɛ dↄ̃naa gũn, 
\v 6 àgↄ̃ dↄ̃na vĩ á zĩda kũnaa gũn, àgↄ̃ á zĩda kũna dↄ̃ mɛna gũn, àgↄ̃ mɛna vĩ nana Ludaii gũn, 
\v 7 àgↄ̃ nana Ludai kↄ̃gbɛ̃kɛ gũn, àgↄ̃ gbɛ̃kɛ vĩ kↄ̃o yenyĩ gũn. 
\v 8 Zaakũ tó á yã birenↄ kũna, akũ òtɛn kara, ánigↄ̃ kun pã karanaa sariro ó Dikiri Yesu Kirisi dↄ̃naa gũn. 
\v 9 Gbɛ̃ kũ à yã birenↄ kũna sↄ̃ro, à a wɛ́ nàkↄ̃a, à gↄ̃̀ vĩ̀na ũmɛ. À sã̀n kũ Luda durunna kũ à kɛ̀ yãnↄ kɛ̃̀arɛ. 
\v 10 Abire yãi ma gbɛ̃nↄ, à kokari kɛ à yãpura kpá sísina kũ Luda á sísi à á sɛ́a. Tó átɛn yã birenↄ kɛ, áni fu zikiro. 
\v 11 Lɛmɛ oni gbãnakɛ kpáái manamana lɛ, ánigↄ̃ kú kũ ó Dikiri ó Surabari Yesu Kirisio a kpata kũ àdi lákaro gũn.
\p
\v 12 Abire yãimɛ, bee kũ á yã birenↄ dↄ̃, akũsↄ̃ á zĩni pɛtɛna yãpura kũ á kũnaa gũn, manigↄ̃ yã pìnↄ dↄágumɛ. 
\v 13 Gↄrↄ kũ má kpɛ́ kú ma sↄ̀ↄ gũn, matɛn da à mana màgↄ̃ tɛ́ káágu yã pìnↄ dↄnaágu yãi. 
\v 14 Má dↄ̃ kũ ma bona ma sↄ̀n gↄrↄ ni ká tera, lákũ ó Dikiri Yesu Kirisi gĩnakɛ à òmɛnɛ nà. 
\v 15 Mani kokari kɛ, de yã pìnↄ le àgↄ̃ dↄágu gↄrↄ sĩnda pínki ma ga gbɛra.
\s1 Kirisi gakuri sèedadenↄ
\p
\v 16 Kũ o ó Dikiri Yesu Kirisi suna kũ gbãnao òárɛ, ódi tɛ́ gara kũ ò dà kũ ↄ̃ndↄ̃ooiro. O wɛ́ kɛ̀ pla kũ a zↄ̃kↄ̃kɛomɛ, 
\v 17 gↄrↄ kũ De Luda bɛ̀ɛrɛɛ lìnɛ à a tↄ́ bò. À Luda zↄ̃kↄ̃ gakuride kòtoo mà à pì a Nɛ́ mɛ̀n do légelege yenyĩden a ũ, a yã dì káagu. 
\v 18 O kòto kũ à bò ludambɛ pìi mà gↄrↄ kũ ó kú kãao kpi kũ à kú adona musu. 
\v 19 Abirekũ mↄ̀wɛrɛ kũ yã kũ annabinↄ ò bi yãpuramɛ. À mana à laakari dↄ yã pìia fitila kũ àtɛn gu bùruburu pu ũmɛ ari gudↄo susunɛ gↄ̃ gɛ́ futɛ á swɛ̃̀n, de gu le à dↄáwa. 
\v 20 À kũ à deńla sà àgↄ̃ dↄ̃ kũ gbɛ̃ke dì fↄ̃ à yã kũ annabii kɛ̃̀ Luda yãn bↄkↄtɛ a zĩdaro. 
\v 21 Annabinↄ yãke dì bo bisãsiri pↄyeinaa gũnlo, ò Luda yã ò lákũ a Nini dòńnɛ arɛ nàmɛ.
\c 2
\s1 Ɛ́kɛyãdannɛrinↄ
\p
\v 1 Annabi ɛ́kɛnↄ bò yã Isarailanↄ tɛ́. Lɛmɛ ɛ́kɛyãdannɛrinↄ ni bo á tɛ́ lɛ se. Oni ɛ́kɛ kũ àdi tó ò kakatɛ ká Luda yãdannɛnan, ò ledi kpá Dikiri kũ à ń bói, oni ń zĩda kakatɛ kãnto. 
\v 2 Onigↄ̃ tɛ́ńyĩ dasi ń wé'isariyãkɛnaa gũn, oni yãpura zɛ́ vãni bo ń yãi. 
\v 3 Ń wãkũkɛnaa gũn oni á ble kũ ɛ́kɛ kũ òdi bleao. Yãkpatɛ vùtɛḿma à gìi kɛ̀, i dì na ń Kakatɛri wɛ́nlo.
\p
\v 4 Zaakũ Luda dí malaika kũ ò durunna kɛ̀nↄ tóro, à ń ká tↄ̃̀nↄwɛɛ sira kũ à kú zĩtɛzĩtɛ gũn, àgↄ̃ ń kũna ari yãkpatɛkɛgↄrↄ zĩ. 
\v 5 Adi andunia zĩ kũ a yãdarisari kũ ò kú a gũnnↄ tóro, à tò í dàńla. Ama à Nuhu kũ àdi manakɛna waazi kɛ bò kũ gbɛ̃nↄn suppla pãndenↄ. 
\v 6 À yã dà Sↄdↄmu kũ Gↄmↄraola à ń kákatɛ ò gↄ̃̀ túbu ũ, à ń kɛ́ lɛ yã kũ ani ludayãdarisarinↄ le sèeda ũ. 
\v 7 Ama à Lutu bò, gbɛ̃ mana kũ a nɛ̀sɛɛ yàka dokadarisari pìnↄ wé'isariyãkɛna yãi. 
\v 8 Gbɛ̃ mana pì kú ń tɛ́, yã vãni kũ àtɛn e akũsↄ̃ àtɛn ma lákũ gu dìgↄ̃ dↄ nà ũ̀a kũ a nɛ̀sɛmana yãi. 
\v 9 Lɛmɛ dↄ Dikiri gbɛ̃ kũ ò naainↄ bona yↄ̃ogwanaa gũn zɛ́ dↄ̃, akũsↄ̃ à gbɛ̃ vãni kũna dↄ̃ de à wɛ́ tãa yãkpatɛkɛgↄrↄ zĩ. 
\v 10 A pãsĩn sà gbɛ̃ kũ òdi iko gya bonↄ ũ, ń mɛ̀ dà vãninↄ mɛ́ àdi dońnɛ arɛ gbãsĩkɛnaa gũn.
\p Ɛ́kɛyãdannɛrii pìnↄ bi kùgbãnade karambaanidenↄmɛ. Dↄkɛna kũ malaika gakuridenↄ dì ń gba vĩnaro. 
\v 11 Malaika kũ ń gbãna kũ ń ikoo de gbɛ̃ pìnↄlanↄ dì we ò ń tↄ́ bɛ̃̀nɛ sí ò yã diḿma Dikiri arɛro. 
\v 12 Gbɛ̃ pìnↄ dì yã kũ ò a gbá dↄ̃ro bɛ̃̀nɛ bomɛ. Bisãsiri bára mɛ́ à kúḿma, ò laasun vĩro. Ò ń í, de ò ń kũkũ ò ń dɛdɛ yãimɛ. Oni kakatɛ lán nↄ̀bↄnↄ bà, 
\v 13 oni a vãni kũ ò kɛ̀ fĩna bońnɛ. Dàvãnikɛna fãnantɛ̃ dì kɛńnɛ nna. Gↄrↄ kũ òtɛn pↄ́ ble kãáo, òdi pↄnna kɛ kũ ń pↄ́nidɛnanↄ. Ń kunna á tɛ́ bi mamberumɛ kũ gbãsĩo. 
\v 14 Zinakɛna kú ń wɛ́a, durunnakɛna dì mↄḿmaro. Òdi manafiki kɛ gbɛ̃ kũ Luda yã dí zĩni pɛ́tɛ ń gũnlonↄnɛ. Wãkũ ń swɛ̃̀ɛ blè. Luda lɛ́ kɛ̀ńnɛmɛ. 
\v 15 Ò sã̀tɛ, ò kɛ̃̀ zɛ́ súsua, ò zɛ́ dokↄ̃nↄ sɛ̀ kũ Bɛↄ nɛ́ Balamu kũ à ye ↄgↄ vãni lenaai. 
\v 16 Zaaki pↄ́lɛbũnu'ina yã ònɛ lán bisãsiri bà, à kpã̀kɛ̃i a vãnikɛna yã musu, à gìnɛ kũ a yↄ̃nkↄkɛnaao. 
\v 17 Gbɛ̃ abirenↄn de lán ísɛ̃boki kũ ń í bàbanↄ bàmɛ, lán luku kũ à gɛ̃̀tɛ kũ ĩao bà. Gusira níkinikin Luda dìtɛńnɛ yàri ũ. 
\v 18 Òdi ĩa kori zↄ̃kↄ̃ dã, òdi ↄ̃ndↄ̃ kɛ gbɛ̃ kũ ò bò sãtɛna zɛ́n dufunↄnɛ kũ dàvãniyão kũ wé'isariyão. 
\v 19 Yã kũ àdi ń yaka zↄ̀nↄmɛ ń ũ, akũ òdi gↄ̃na zĩdadenↄ ũ lɛ́ sɛ́ńnɛ. Zaakũ gbɛ̃ sĩnda pínki bi yã kũ à a swɛ̃̀ɛ blèe zↄ̀ↄmɛ.
\p
\v 20 Tó ò bò andunia yãgbãsĩkɛnan ó Dikiri ó Surabari Yesu Kirisi dↄ̃naa gãi, akũ ò tò yã pìi ɛ̀ra à ń daguraa kɛ̀, à ń swɛ̃̀ɛ blè, ń kunna kpɛde vãni de a káakupↄla. 
\v 21 Tó odi yãpura zɛ́ dↄ̃ yãro, de abirekũ manańnɛ de kũ ò dↄ̃̀, gbasa ò kpɛ lì Luda yã kũ ò dàńnɛnɛla. 
\v 22 Yáasi kũ ò kɛ̀ díkĩnanↄ pàpa ń musu yãpura: Gbɛ̃da dì ɛra a pisii. Lɛmɛ dↄ: Alɛdɛ kũ ò a zú ò dì ɛra à mátɛmatɛ bↄkↄtↄmmɛ.
\c 3
\s1 Dikiri sugↄrↄ zĩ
\p
\v 1 Ma gbɛ̃ yenyĩdenↄ, takada plade kũ ma kɛ̃̀árɛn dí. Takada mɛ̀n pla pínki pìnↄ gũn ma yã dↄ̀águ de à vu in kũ laasun manaomɛ. 
\v 2 Má ye yã kũ Luda annabinↄ ò yãnↄ dↄágu kũ yã kũ ó Dikiri ó Surabarii dìtɛ a zĩ̀rinↄnɛ ò òárɛo. 
\v 3 Àgↄ̃ dↄ̃ zaa káaku kũ gↄrↄ kpɛde zĩ zĩdapↄyeinakɛrinↄ ni su ò á fobo 
\v 4 ò pi: Adi a suna lɛ́ sɛ́roo? À kú máa? Ó denↄ gà, ama pↄ́ sĩnda pínki kú a gbɛ̀n zaa lákũ Luda andunia kàtɛ nàmɛ. 
\v 5 Kũ Luda yã ò yã à musu kũ anduniao kɛ̀, ò yã pìi kpà sãkoto. À zĩtɛ bò ín, à a kɛ̀ í pìi gãimɛ, 
\v 6 akũ í pìi dà andunia káakupↄla, à a kàkatɛ. 
\v 7 Luda yã'ona dokↄ̃nↄ pì mɛ́ à tò musu kũ andunia tera dío ditɛna tɛ́ pↄ́ ũ ari gↄrↄ kũ ani yãkpatɛ kɛ kũ a yãdarisarinↄ, à ń kakatɛ.
\p
\v 8 Ma gbɛ̃ yenyĩdenↄ, àsun tó yã díkĩna sãáguro: Gↄrↄ do de Dikirinɛ lán wɛ̃̀ wàa sↄↄro bàmɛ, wɛ̃̀ wàa sↄↄro sↄ̃ denɛ lán gↄrↄ do bàmɛ. 
\v 9 Dikiri mɛ̀fɛ̃ vĩ kũ yã kũ à a lɛ́ sɛ̀ kɛnaao lákũ gbɛ̃kenↄ tɛn da nàro, àtɛn mɛna kɛ kãáomɛ. À ye gbɛ̃ke kakatɛro, à ye gbɛ̃ sĩnda pínki nɛ̀sɛ litɛmɛ. 
\v 10 Dikiri sugↄrↄ nigↄ̃ de lán kpãni suna bàmɛ. Zĩ birea musu ni gɛ̃tɛ fìoo, a pↄ́nↄ ni tɛ́ kũ ò pia, zĩtɛ kũ pↄ́ kũ ò kú a gũnnↄ nigↄ̃ kun doro. 
\v 11 Zaakũ pↄ́ sĩnda pínki ni kakatɛ lɛ, gbɛ̃ kpate burin ánigↄ̃ de a ũu? À tó á kunna gↄ̃ adona ludayãmarinↄ ũ 
\v 12 wɛ́dↄna a sugↄrↄi, à wɛ́ tã gↄrↄ pì ká likalika. Zĩ pìia musu ni tɛ́ kũ, a puusu wãna ni a pↄ́nↄ yↄ́. 
\v 13 Ókↄ̃nↄ sↄ̃, ó wɛ́ dↄ ludambɛ dufu kũ zĩtɛ dufuooi kũ Luda a lɛ́ sɛ̀wɛrɛ. Gwen manakɛna nigↄ̃ kún.
\p
\v 14 Abire yãimɛ ma gbɛ̃ yenyĩdenↄ, á wɛ́dↄna gↄrↄ pìii gũn à kokari kɛ àgↄ̃ kun mamberu sari taari sari, àgↄ̃ nna kũ Ludao. 
\v 15 À ó Dikiri mɛnakɛ ditɛ surabana ũ, lákũ ó gbɛ̃ yenyĩde Pↄlu takada kɛ̃̀árɛ nà kũ ↄ̃ndↄ̃ kũ Luda a gbào. 
\v 16 Yã pìnↄn Pↄlu ò takada kũ à kɛ̃̀nↄ gũn pínki. A takada pì gukenↄ dↄ̀rↄ dↄ̃na zĩ'ũ. Wɛ́siradenↄ kũ gbɛ̃ kũ ń zɛna gbãnaronↄ dì yã pìnↄ litɛ kpɛdangara, lákũ òdi kɛ nà kũ Luda yã takada kparanↄ. Lɛn òdi ń zĩda da kakatɛnan lɛ.
\p
\v 17 Ákↄ̃nↄ sↄ̃ ma gbɛ̃ yenyĩdenↄ, lákũ á yã pì dↄ̃ nà kↄ̀, à laakari kɛ, de dokadarisarinↄ sún á sãtɛ kũ ń ɛ́kɛoro. Àsun bo á zɛna gbãnan à lɛ́tɛro. 
\v 18 Àgↄ̃ gbã ó Dikiri ó Surabari Yesu Kirisi gbɛ̃kɛ kũ a dↄ̃naaoo gũn. Àkũ mɛ́ à gakuri vĩ tera ari gↄrↄ sĩnda pínki! Aami.